وجد عقدت حاجبها تشوف مشاري يصدّ يرفض سباقهم اللي اعتادوا يسوونه كل مره ويتحدون بعضهم بحماس

لانت ملامح وجد تشوفه يلتفت ويمشي باتجاه الدكّه

بنفس الوقت دخل عناد بسيارته لأسوار المزرعة يجذب انتباه تميم وهاجر عكس وجد اللي ما زالت تتبع مشاري بنظراتها

نزلت من على ظهر الخيل بتنهيده تترك كل شيء وتطلع من الاسطبل تفقد حماسها ومتعتها تحت نظرات هاجر اللي تنهدت بقل حيله

مشت وجد تشوف مشاري جالس على الدكّة يناظر جواله باندماج

ونطقت تجذب انتباهه: رفضت تتسابق لأنك خايف أهزمك كالعادة؟

مشاري نفى: ما قد هزمتيني، أنا استقصد أخفف سرعة الخيل

وجد ضحكت ورفعت حاجبها: عشان أفوز؟

هز راسه مشاري وسكتت وجد تناظره بشرود، نست الخيل والاسطبل وركّزت على مشاري الجالس قدامها بهدوء

ونطق مشاري يناظر الجوال: قريتي الايميل اللي من بتّال؟

وجد: قريته، حق الاجتماع اللي بنسويه لمشروع فرع الخبر

مشاري ناظرها: بيجون موظفين من البحرين؟

هزت راسها وجد: اللي أعرفه شموخ و سعود وصلهم الايميل وراح يجون يحضرون الاجتماع ويرجعون

مشاري: سعود؟ ما نقل هنا؟

وجد نفت: لا، توظف رسمي في فرع البحرين

مشاري رفع نظراته لها: كنتِ تبينه يجي للخبر

وجد تكتفت بتنهيده: كنت، لكن الحين لا

مشاري عقد حاجبه: كيف يعني

وجد ابتسمت: قلت لك، ما يهمني

ابتسم مشاري بخفوت، ونطقت وجد: نتسابق؟

ناظرته بترجّي، تدرك شوقها لوقتها معه وتفقد وجوده جنبها بكل مكان، تدري إن ميشو اللي هي اعتادته ما يرفض أي شيء يخصّها ويشاركها اهتماماتها وحماسها وشغفها

ابتسمت تشوفه يقوم يمشي للاسطبل ومشت خلفه بحماس

ناظرته يصعد على ظهر الخيل وصعدت على الخيل الثاني يستعدون لسباقهم، التفتت تسرق نظره له وابتسمت برضى من انطلقت خيولهم وصرخت وجد بحماس وابتسم مشاري لحماسها

بنفس الوقت في الاسطبل

شدّت حنين على لجام الرعد تخفف سرعته قدام نظرات تميم اللي يلاحظ مهاراتها وقدراتها

ونطق بابتسامه: قدرتي تتحكمين بسرعة الخيل كذا نضمن فوزك بالمسابقة

حنين مسحت على الرعد: أقدر اتحكم لأنه الرعد

تميم: الرعد كذا، إذا يحبك بيسمح لك تتحكمين بكل شيء خصوصًا في مسابقة قفز الحواجز

التفتت له حنين تسمعه باهتمام وهو يتكلم عن الرعد

وكمّل تميم: قفز الحواجز كانت أول مسابقة فزت فيها مع الرعد قبل عشر سنوات

حنين بذهول: كم عمر الرعد؟

تميم مشى يحضن راس الرعد: الحين عمره 15 سنه، انولد وأنا عمري 12 وكبرنا مع بعض

حنين بابتسامه: ليش سمّيته الرعد؟

تميم رفع أكتافه: كنت أحلم بخيل لونه أبيض من صغري، وكنت أقول راح أسمّيه الرعد أنسبه للونه وياخذ من صفاته

ضحكت حنين تفهم مقصده، وكمّل تميم: وهذا هو الرعد قوي، سريع، وكلهم يهابونه

حنيني بابتسامه: أفهم سبب حبك للرعد، أنا حبيته من أول يوم كيف انت؟

تميم ابتسم: لو بتسأليني وش أحلى يوم في طفولتي كلها بقول لك ولادة الرعد، ما تركني من يومها وأنا أخذه معي لكل بطولة وما قد رجعت منها خايب

حنين ابتسمت: يعني شمّ فيك ريحة الحب من أول يوم له في الدنيا، وحبّك

ضحك من فهم إنها تردّ له كلامه لها، والتفتت حنين تاخذ نفس تستنشق نسيم البحر اللي وقفوا عنده وجد ومشاري

رفعت وجد جوالها: ميشو ناظرني بصوّر

التفت لها وصوّرته بابتسامه، توثّق لحظاتهم كعادتها بكل مكان

ناظرت صورته بجوالها تتأمل ملامحه وابتسامته الواسعة

رفعت نظراتها له تشوفه يناظر البحر بشرود وارتفعت نبضاتها يمرّها شعور جديد عليها، تدرك إن مشاري الوحيد اللي حسّسها بهالشعور ولمس قلبها بهالطريقه

في بيت الشعر اللي جالسين فيه راجح و حصة لوحدهم

راجح بضيق: والله يا حصوص حارت بي دروبي، كل ما جيت بعلّمه الحقيقة يردّني شيء

حصة بتفكير: تقول إن شدّاد سارق ورث هالمسكينات ولو عرف عناد عنه والله ما يخليه وبتكبر السالفة! والورث له سنين وخلاص راح

وصلهم صوت عناد: شدّاد سارق ورث البنات؟

جمدت ملامح راجح يشوف عناد يدخل بعد ما سمع حوارهم وعرف عن حقيقة الورث

حصة تنهدت بدون رد، ونطق عناد يجلس جنب راجح: يبه صدق هالكلام؟

راجح ناظره بهدوء وتنهد: صدق، ما عرفت عن الموضوع إلا من يومين

عناد صدّ بتفكير واحتدّت نظراته: عشان كذا كذب على البنات وقال إن أمهم ما ماتت طول هالسنين! عشان ما يطالبون بالورث اذا كبروا

مسك راجح راسه يحس بصداع، ونطقت حصة بقلق: راجح!

التفت عناد لراجح وفزّ: يبه وش فيك

راجح بألم: عطني حبوب الضغط

فزّ يجيبها يدل مكانها، وأخذ علبة المويه ورجع يجلس بجنبه وتعطيه حصة علاج ارتفاع ضغطه وتسمّي عليه بهمس

ونطق راجح: يا عناد طلبتك، أبعد عن هالشر، أخذ حقه وخسر تجارته يكفيه اللي جاه

عناد بتنهيده: انت ارتاح لا تشيل هم شيء

حصة ناظرت راجح بضيق، تدري بخوفه من ردة فعل عناد وتدري إنه يحاول يبعد عناد عن شدّاد ويدفن حقيقة الحريق للأبد

باس عناد راس راجح و تقدم يبوس راس حصة اللي ابتسمت تشوفه يقوم ويطلع من عندهم

ونطق راجح بعد صمت: ما حافظنا على أمانة سيف وسلطان يا حصة، ما حافظنا عليها…

ونطق راجح بعد صمت: ما حافظنا على أمانة سيف وسلطان يا حصة، ما حافظنا عليها

حصة نفت تمسك يده: لقينا البنات بعد سنين وأخذناهم عندنا قبل ينظلمون أكثر! وهذا هو عناد قدامك أكبر دليل إننا حفظنا الأمانه، نجى من الحريق وكبر بيننا ورفع راسنا، شال على ظهره مسؤولية وطن وشعب ورمى نفسه وسط النار، رفع اسمك بأعمالك وهذا هو صار يفهم بالتجارة ويعاون بتّال والعيال، لو سيف عايش بيفتخر فيه

راجح سكت بضيق، وكمّلت حصة: خبّينا عنهم حقيقة موجعه لأننا نحبه و نبي نشوفه مبسوط! توّه تزوج وأسّس له بيت وبكره يلعبون عياله حولك، اذا ما تقدر على الحقيقة لا تقولها يا راجح

راجح غمض عيونه وتسنّد: و شدّاد بيسكت عنها؟

وقف عناد في زاوية المزرعة وسط الظلام ينوّر طريقه النور الخافت من المزرعة، تاخذه أفكاره لشدّاد و ظلمه للبنات وسرقته للورث، ما زال الغضب ينهش جوفه و يشد على يده بقوه

طلّع باكت الدخان من جيبه يناظره بتفكير و صدّ بتنهيده ياخذ جواله و يلقى نفسه في محادثتها

في جلسة المزرعة في الحديقة

شربت هاجر من قهوتها تسرق نظره لوجد ومشاري اللي لاهين في الاسطبل وتشوف تميم اللي منشغل يدرّب حنين للمسابقة

والتفتت لوتين اللي مثبّته نودي بحضنها: اجلس بنظف أسنانك ريحتك تونه!

هاجر بضحكة: اتركيه القطط تنظف نفسها بنفسها

وتين نفت: لا حبيبتي اشتريت له معجون خاص فيه بيتنظف غصب عنه

التفتوا لتهاني اللي طلعت تجلس معهم وناظرت الاسطبل من بعيد

ونطقت تهاني: متى المسابقة لهم فتره يجهزون لها؟

هاجر: مشاري يقول إنها الاسبوع الجاي

ثواني والتفتت وتين لرسالة عناد بجوالها

"تعالي عند زرع أمي حصة"

تسنّد عناد على جذع النخلة بعد ما أشعل سيجارته يترك دخانها يتطاير ويراقب رمادها بدون ما يستنشقها

التفت يسمع خطوات وتين القريبة يشوفها تمشي باتجاه زرع حصة مو منتبهه لوقوف عناد بسبب الظلام

ابتسمت وتين تنزل لمستوى الزرع تتلمّس أوراق الورد و النعناع والتفتت من وصلتها ريحة دخان سيجارته وعقدت حاجبها تدوّره بالظلام حولها

ونطقت: يا المعتوه اطلع

ابتسم عناد يطفي سيجارته ويرميها، ومشى باتجاه وتين اللي فزّ قلبها من حاوطها عناد من الخلف

ونطق يناظر الزرع: قلتي تبين ورد، اختاري اللي تبين

وتين بذهول: يا ويلك! زرع أمي حصة

أشّر عناد يعدد لها: ورد و خزامى وشيح وياسمين ونعناع

وتين بضحكة: بتقطفه؟ اخر مره سألتك قلت لي تخسين

عناد ابتسم: وعدتك أجيب لك ورد، وهذا أغلى ورد جاء في بالي لأنه زرع من يدين حصوص مستحيل يذبل

ضحكت وتين، وناظرها عناد: ما يذبل وهو بالأرض أجل كيف لو جاء بيدينك؟ يعيش

وتين ابتسمت: بس حصوص بتزرعنا جنب النعناع لو تدري عننا

ضحك عناد و ابتسمت وتين تحس بالدفء وتفوح ريحة عطره اللي اختلطت مع ريحة الدخّان

وابتعد عناد يتقدم للزرع وينزل لمستوى الورد يقطفه لوتين اللي التفتت تناظر حولها بحذر تتأكد إن محد يشوفهم

وسعت عيونها بصدمة تشوف كومة الورد اللي قطفه عناد

ومدّه لها بابتسامه: ما هي باقة ولا لها تغليف، نكسر الروتين

وتين ضحكت تاخذ الورد: صدقني ما انتظرت باقة، زرعت لي ٢٠٠ شتله نعناع بيوم ملكتنا وطلبت من عباياتي بيوم الافتتاح و ركّبتني براشوت يوم بغيت أطير و حرقت مصنع يوم بغيت أحرق، انت تكسر الروتين كل يوم يا معتوه

ضحك عناد وتقدم يعدم المسافة بينهم يحاوط خصرها وينحني لمستواها

وناظرته وتين: وش تسوي؟

عناد ابتسم: اكسر الروتين

ناظرت وتين حولهم يلاحظ عناد ارتباكها، ونطق: على طاري كسر الروتين تدرين وش قال خالد عبدالرحمن؟

وتين ابتسمت: وش قال

عناد نطق بدون ما يبعد عيونه عن عيونها: أحبك يا شقى باكر، أحبك يا فرح هاليوم

ارتفعت نبضات وتين، وانحنى عناد يقبّلها قُبله ناعمه استشعرتها وتين وارتعش قلبها تتلمّس حنانه و دفاه وغمضت عيونها وابتسم عناد وسط قُبلتهم اللي فصلتها وتين تبتعد عنه وتناظره مبتسم بخمول

وابتسمت وتين وتقدمت تحشر كومة الورد اللي بيدها بوجهه

وصدّ عناد بضحكة يبعد الورد عنه ويشيل الأوراق اللي لصقت في طرف فمه

ونطق: ليه!

وتين التفتت تتجه للبيت: اكسر الروتين

ضحك ومشى معها شايل الورد بيدينه ومشت وتين ماسكه قلبها تاخذ نفس بربكه

يوم جديد أشرقت شمسه تنوّر ظلام ليلة أمس ويسطع شعاعها على سعف النخيل وشتلات الجدة حصة اللي وقفت عند زرعها تأشر بعصاها لمشاري وتميم اللي يزرعون

ونطقت بعصبيه: لا تترك ولا مكان إلا زرعتوه! احفر احفر زين

مشاري بحلطمه: يمه ليش ما تصدقيني مو أنا اللي قطفته!

حصة: انت آخر واحد تتكلم ولا نسيت يوم تقطف كل نعناعي

تميم نفض يده بتعب: يمه أنا أمس كله كنت في الاسطبل متى يمديني اقطفه

قاطعته الجدة حصة: اقطع الصوت

بنفس الوقت في الصالة طلع عناد من غرفته شايل شنطته على ظهره

غالية التفتت: عناد عندك دوام؟

عناد ناظر ساعته: ماهو الحين بس عندي مشوار مع وتين

التفت لوتين اللي نزلت من غرفتهم بعد ما جهزت

وسأل عناد: وين أمي حصوص؟

فاطمة بتنهيده: من أصبحنا وهي مستلمه تميم ومشاري عشان زرعها اللي ناقص

وتين زمّت شفايفها تمنع ابتسامتها تناظر عناد اللي حك جبينه بدون رد ومشى معها يطلعون لهم

حصة التفتت من طلع عناد وابتسمت ترحّب فيه: وليدي!

وعضّت وتين شفايفها تشوف تميم ومشاري يزرعون مكان الورد الفارغ

عناد ناظر الزرع: وش فيك يمه؟

حصة: والله يا وليدي أذكر اني زارعه ورد وخزامى واختفى نصّه جيت لقيت الزرع ناقص

عناد مثّل الصدمه وصدّت وتين تغطي ملامحها باحراج

ونطق مشاري بسخريه: ايه أنا أمس ما تعشيت واشتهيت أكل ورد وخزامى حصوص

حصة رفعت عصاها تضرب راسه: تستظرف بعد

تميم ناظر مشاري: ثقيل دم يمه لا تردين عليه

عناد أشر له: ازرع انت وياه لا تكثرون كلام

التفتوا لصوت بتّال اللي طلع: مشاري لا تنسى اجتماع اليوم

مشاري ناظره: ما تشوفني مشغول؟ اصبر شوي

بتّال أشر: يمه بالله اعتقيه لا يجينا الاجتماع و ريحته طين

حصة: روح لا أجيبك تزرع معهم

عناد مسك ذراع وتين: احنا نستأذن

حصة ناظرتهم: الله يحفظكم يا وليدي

مشى مع وتين اللي ضحكت من ابتعدوا وابتسم لضحكاتها

وتين: حسيت بتأنيب ضمير!

عناد ناظرها: يعني لو جايب لك باقه أحسن؟

وتين ركبت السياره وناظرته: تستهبل! هذا أحلى ورد جاني بحياتي كلها

ابتسم عناد برضى وحرّك السياره يسمعها تسأل: وين بنروح؟ للحين ما راح تعلمني؟

نفى عناد: مفاجأة

نزلت وجد بعد ما تجهزت لاجتماعهم في فندق بتّال

وابتسمت غالية تغمرها بدعواتها: الله يوفقك يا بنتي

وجد ابتسمت تبوس راسها وناظرت حولها: وينهم؟ راحوا بدوني؟

غالية: ظنتي بتّال راح بس مشاري في الحديقة مع أمي

مشت وجد بتطلع لهم ووقفت مكانها من انتبهت لاتصال سعود لها وعقدت حاجبها باستغراب

ناظرت حولها وابتعدت ترد عليه ويوصلها صوته: وجد

وجد نطقت: هلا، ليش دقيت؟

سعود بتنهيده: لأني اذا أرسلت تردين متأخر، وبغيت أكلمك ضروري قبل الاجتماع

وجد بفضول: وش بغيت؟

سعود حك جبينه يناظر مدخل الفندق قدامه: أدري ما عاد فيه أمل بس ودي تكلمين بتّال اليوم بخصوص نقلي للمره الأخيره

غمضت وجد عيونها بتعب: سعود!

سعود نطق: اسمعيني وجد أدري إني

قاطعته وجد: تدري إنك تستغلني؟

سكت سعود، وكملت وجد: لا تظن إني برجع أعاملك نفس قبل! من يوم تضاربت مع مشاري تغيرت نظرتي لك حتى لو اعتذرت

والتفتت من سمعت صوت خطوات تميم اللي دخل يناظرها

ونطقت وجد: لذلك كل اللي علي أرسل لك التقارير ونراجعها قبل تسليمها، شاكره لك جهدك

قفلت المكالمة وناظرت حالة تميم: وش ذا الطين بملابسك!

ما رد تميم، ودخل خلفه مشاري ينفض ثيابه وضحكت وجد على أشكالهم

وهز راسه مشاري يمشي للدرج: اضحكي اضحكي

تميم نطق من صعد مشاري: وجد مين بيوديك؟

وجد: سيارتي برا

نفى تميم: أنا بجي معك، نروح سوا

وجد عقدت حاجبها: ليش تجي؟

رفع تميم أكتافه: ما عندي شغل وودي أحضر اتعلم كم شيء معكم

دقايق ونزل مشاري يسمع دعوات الجدة حصة: روحوا عسى ربي يزرع دربكم ورد

مشاري نفى: مابي أسمع كلمة ورد بعد اليوم يمه لو ينزرع شوك راضي

دقايق ونزل مشاري يسمع دعوات الجدة حصة: روحوا عسى ربي يزرع دربكم ورد

مشاري نفى: مابي أسمع كلمة ورد بعد اليوم يمه لو ينزرع شوك راضي

ارتفعت ضحكاتهم، ومشى مشاري يشوف تميم يركب سيارته مع وجد بعد ما بدّل ملابسه يستعدون لاجتماع بتّال

والتفت مشاري يتجه لسيارته، ونطقت وجد: ما راح تجي معنا؟ دربنا واحد

تميم ناظر مشاري بصمت، ونفى مشاري: بروح مشوار سريع قبل الاجتماع وبجيكم

في سيارة عناد

ابتسمت وتين تناظر تشابك يدينهم وتسرق نظره لعناد المبتسم يناظر طريقه المجهول بالنسبة لوتين

التفتت تشوف مبنى الدفاع المدني على يمينها ورفعت حاجبها: ماخذني لدوامك تستهبل؟

عناد ضحك يلف السياره للشارع الثاني تحت نظرات الاستغراب من وتين، لانت ملامحها من وقف السيارة قدام واجهة المحل الكبيره تقرأ اسم اللوحة واللي كانت "جَناح" والتفتت لعناد بذهول

ونطقت: مو من جدك!

عناد ضحك يشيل حزامه ويناظرها: انزلي يا بنت سلطان، تحسبين البراشوت لحاله اللي يطيّر؟

ناظرت وتين المحل بعيون لامعه، وأشّر عناد: هناك جَناحنا

نزل عناد ونزلت وتين تشوفه يفتح باب المحل ووقف ينتظرها تدخل قبله، مشت وتين تخطي أول خطواتها لحلمها مع عناد

ناظرت المكتب والمانيكان بالوسط يحاوطه ألوان الأقمشة اللي ترتبت بالرفوف يتبعها الآلات الخاصة للخياطة والتطريز اللي اختارتها مع عناد في البحرين

رفعت نظراتها للوحات المُعلقة على الجدران والديكورات والإضاءة اللي اختارها عناد بعناية

ونطقت بذهول: عناد!

عناد: اخترت هالمكان لأنه قدام دوامي، و تعرفين إني حولك و حواليك

ضحكت وطاحت عينها على الدرج اللي يودّي للدور الثاني

ومسك عناد ذراعها يصعد معها فوق

وابتسم يأشر: هنا مكان راحتك، خليتها صالة وغرفة نوم في حال احتجتيها

وتين ناظرت الغرفة بذهول والتفتت لعناد اللي يناظر الأثاث برضى

و مشى للوحه المُعلقه وعقد حاجبه: ركّبوها مايله

ناظرته وتين ثواني وهو يفك مسامير اللوحه يحاول يعدلها

وتقدمت تسحب ذراعه والتفت لها يشوفها تحاوط رقبته وتحضنه بصمت

ثواني وابتعدت بدون ما تترك حضنه وناظرت عيونه: خسرت أشياء كثير، خسرت طفولتي و أبوي وأمي، خسرت آمالي وبعض أحلامي، لكني كسبتك!

ابتسم عناد، وكمّلت وتين تمسح كفها على خده: وحتى لو خسرت جَناحي، انت جَناحي و طيري وسماي

ضحك عناد من فرط شعوره يسمعها تعبّر له بكلماتها لأول مره، كانت تسكت دايم و تعبّر له بأحضانها و لمساتها وهالمره تلمسه بيدينها و بحروفها وتزعزع سكون قلبه ونبضاته

عناد نطق يسرد لها شعوره: عاندت فيك الصعب والشدّة والظروف، و سكنتي قلبي وأنا ما سكن قلبي طول عمري غير جمر ولهب، إذا أنا جَناحك انتِ وتيني

وتين لمعت عيونها: عناد

نطق يلبّي نداءها: وتينه

وتين: أحبك، أحبك عِناد للجمر واللهب وعناد للشِداد وللظروف

اتسعت ابتسامته يناظر لمعة العسل بعيونها، وناظرت وتين خط خده وغمازته و مدت يدها تتلمّسها برقّه

تعلّمه إنه جناحها العنيد وما تطير إلا معه، ويعلّمها إنها وتينه النابض ما ينبض وما تطفي نيرانه إلا بها

ينسج الريش على جناحها بعد كسره، وتضخّ هي الدم في وتينه بعد ما ضخّ فيه الرماد سنين طويلة

في فندق فرع الخبر

هز سعود رجله يناظر وجد اللي لاهيه بالأوراق ومندمجه في الاجتماع، ورفعت نظراتها لسعود اللي يناظرها تدري إنه ينتظرها تتكلم عن موضوع انتقاله وصدّت تشغل نفسها

التفت مشاري اللي كان منتبه لنظرات سعود لوجد من بداية الاجتماع، يلاحظ سعود اللي ما شال عينه عنها ومتجاهل الاجتماع

مشاري عقد حاجبه ياخذ علبة المويه يرميها باتجاه سعود اللي فز والتفت للعلبة اللي طاحت جنبه

مشاري: طاحت مني بالغلط

سعود ناظر مشاري بدون رد، و صدّ مشاري يركز بالاجتماع اللي أعلن بتّال نهايته ويختمه بشكره لحضور الموظفين اللي بدأوا يطلعون من القاعة

و التفتت وجد باستغراب تدوّر تميم اللي اختفى من انتهى الاجتماع

ووصلها صوت سعود: وجد

ناظرته يتقدم باتجاهها ونطق: كان عندي أمل بسيط تتكلمين مع خالك لكن خاب ظني

وجد بتنهيده: قلت لك كل اللي عندي بالمكالمه

سعود هز راسه: عمومًا جيت اقول لك اني بستقيل وأدور لي وظيفه ثانيه هنا في الخبر

وجد بسخريه: والحين ينتهي دوري؟

سعود رفع أكتافه: اسف اذا أوهمتك بشيء، تعرفين اللي بيننا ما كان بس تقارير يمكن حسيتي بشعور ثاني معي

ناظرته وجد بذهول وضحكت بعدم تصديق من وقاحة اسلوبه معها: يعني تعترف انك مثّلت علي شعور وهمي؟

سعود: اكثر وحده تعرف هدفي من هذا كله هو انتِ، مابي غير الوظيفه في الخبر عند أهلي وبيتي

صدّت وجد وطاحت عينها على مشاري اللي يناظرهم من بعيد يجهل حوارهم

ونطقت ترد على وقاحته: أنا اللي اسفه لو أوهمتك بشيء ثاني غير إنك مجرد زميل، شعوري كله كان عند شخص ثاني من الاساس

سعود: شخص ثاني؟

وجد رفعت صوتها تناديه: ميشو

مشاري رفع حواجبه يشوفها تلوّح له وتناديه لها، وقام يمشي باتجاهها

ونطقت وجد تناظر سعود: تشرفت فيك والله يوفقك في حياتك

سعود سكت، والتفت له مشاري: بتمشي؟

نفت وجد: بيستقيل

مشاري ناظر سعود اللي صدّ، وهز راسه بتفهّم

ومشى سعود يتعداهم، وناداه مشاري: سعود

التفت سعود بدون رد، وابتسم مشاري: مشاري آل منصور، لا تنسى زين؟

مشى سعود تحت نظرات وجد اللي شدت على يدها من اختفى سعود، والتفت مشاري يشوفها تقاوم دموعها و غضبها

ونطق بقلق: وش فيك!

وجد ناظرته تطيح دموعها، فكرة اعتراف سعود باستغلالها وخداعه لها و تلاعبه بمشاعرها ، فكرة انها انجذبت لشخص مثله واستنزفت مشاعر إعجابها واهتمامها له تنهش جوفها وتقهرها

مشاري سأل يناظر دموعها: تبكين عشانه بيستقيل؟

نفت وجد وضحكت بين دموعها على تفسير مشاري و غيرته اللي صارت واضحه لها

مشاري عقد حاجبه: أجل ليش الدموع!

وجد مسحت وجهها بتنهيده: أبكي على غبائي و غفلتي عن حقيقته

مشاري مشى بغضب: أنا أوريه

نادته وجد: لا مشاري اتركه

التفت لها ورجع: علميني تبين امسح فيه البلاط الحين امسحه

نفت وجد: بكيفه خله يروح

طلع سعود من الفندق مقتنع بقراره واستقالته ما يتلبّسه التردّد ولا حتى الندم

التفت تميم اللي كان واقف عند المدخل ورفع أصابعه لفمه يصفّر لسعود من بعيد و يجذب انتباهه له يسمع تصفيره

أشّر له تميم بمعنى تعال، ومشى سعود باتجاهه باستغراب

تميم نطق: سعود ان ما خاب ظني؟

سعود هز راسه: تميم صح؟

تميم مسك ياقة سعود يضرب راسه براسه بقوه: صح!

طاح سعود بألم يمسك راسه، وتراجع تميم يحس بالصداع من الضربه

وقف سعود بعصبيه يهجم على تميم اللي مسكه بغضب

ونطق تميم: لا جيت بتمد يدك على مشاري، مدّ يدك علي أول يا الرخمه

سعود ضربه و طيّحه يثبّت تميم على الأرض بنفس الوقت طلع مشاري مع وجد اللي صرخت: تميم!!

مشاري ركض باتجاههم يبعد سعود عن تميم اللي وقف بغضب

وصرخ مشاري يحاول يبعد تميم: خلاص!

وتراجع تميم بسبب مشاري اللي دفعه: امش قدامي

وابتعد سعود يمشي لسيارته بغضب يسمع تهديدات تميم له

ونطق مشاري يسحب تميم بعيد عن المدخل: قلت خلاص ما تفهم!

تميم بعصبية: كان خليتني لين أكسر يده اللي انمدت عليك

مشاري مسك تميم من ياقته: وانت وش عليك؟ طلبت منك تدافع عني؟ بغى يقتلك وتقول تكسر يده يا غبي

تميم دفعه يبعده عنه بدون ردّ، ومشى للسياره تحت نظرات وجد اللي تنهدت بتعب من كل هذا الصدود والجدال بين أقرب اثنين لها

شموخ اللي كانت واقفه في الاستقبال ماسكه شنطة السفر

وتتكلم مع الموظف: حجزت يوم واحد لكن كنسلت

الموظف ناظر الجهاز بربكه: نقدر نكنسل لك الحجز قبل ب٢٤ ساعه لكن الحين لا

شموخ: ليش لا! أنا موظفه في فرع البحرين

التفتت لصوته: العميل يبقى عميل حتى لو موظف

شموخ كشّرت من شافت بتّال اللي تقدم يناظرها بابتسامه

والتفتت شموخ للموظف: ممكن لو سمحت تلغي الحجز

بتّال نطق بجدّيه: وش المشكله؟

شموخ بتنهيده: حجزت على اساس أنام هنا بعد الاجتماع لكن عقبها عرفت إن أهلي جايين للخبر وبروح لهم