وصدّت بتنهيده، تفتقده وتلاحظ تأثيره عليها، تحتاجه قربها بعد كل هذا الشتات، تحتاجه يلملمها ويمسك يدينها ويدلّ ضياعها

ثواني وسمعت صوته: كنت بجيك، شفتك جالسه وما حولك ضوّ قلت بجيب لك جاكيت

ناظرت بالجلسة حولها تفهم إنه يشيل هم البرد بسبب إن الجلسه مافيها شبّة نار

ومشى يحط الجاكيت حول أكتافها، ونطقت: مو مره برد

نفى يجمع الحطب ويشبّه: الجو يبرد آخر الليل خصوصًا اذا المكان خلاء مثل المزرعة، والمكان اذا صار خالي يا بنت سلطان يهب البرد عليه من كل محل

سكتت وتين تفهم كلامه، وكمل عناد: مثل مكانك ليلة أمس في غرفتي، ما نمت من البرد

نزّلت نظراتها للنار اللي شبّت، و مد يده يمسك فكّها: ناظريني

ناظرته وابتسم يدوّر لمعة العسل بعيونها: زعّلك أحد غيري؟

وتين: معترف إنك مزعلني يعني؟

عناد جلس جنبها: اعترف، بس لو دريت إن فيه شخص ثاني مزعّلك والله لأضيق دنياه

وتين ضربت صدره: انطم روح قول هالكلام لتهاني

ارتفعت ضحكاته ورفع راسه يمسك صدره يضحك بقوه

وابتسمت وتين تناظر خط خده، وناظرها مبتسمه وتقدم يعدم المسافة ويحط عيونه بعيونها العسلية يسمح لنفسه يغرق فيها ويرضى بالغرق

تقدم يبوس عيونها: اسف، تضيق الدنيا في عيني لو أزعّلك

ارتجف قلبها تسمعه يعتذر بكل صدق، يعترف بخطأه ويطلبها تسامحه

تناست أسباب الخصام وتلاشت بعيونها كل الغلطات ورمت نفسها بحضنه و شدّ على حضنها بتنهيده يفهم إنها كتمت بصدرها كثير و كبحت رغبتها بإنها ترمي كل شيء خلف ظهرها و ترتمي بحضنه

ابتعدت ورفعت نظراتها له: اسفه تصرفت بدون شعوري، أدري خوّفتك بس

قاطعها: ما زلت على وعدي، قلت لك إني سيفك و سلاحك و عنادك وانتِ بوجهي! خليني قدامك لا تتركيني وراك وتخوفيني

هزت راسها بابتسامه تفهم إنه مستعد يخوض الحرب كامله لنهايتها، مستعد يوقف جنبها يده بيدها

مسكت يدينه تفتقد دفاها وابتسم يحس ببرودة يدها كالعادة، مسح عليها يدفيها وتقدمت تحط راسها على كتفه وشدّ عليها يقربها ورفع راسه ياخذ نفس تحوم حوله ريحة عطرها وابتسم براحه ورفعت نظراتها لابتسامته

يكفيها من كل هذا كله شوفته قربها، يبتسم ويضحك لها

بلعت ريقها تتذكر موضوع راجح وانقبض قلبها تجهل كيف تعلمه؟ أخفت عنه سلاح و شافت انهياره كيف لو كان السرّ راجح؟ كيف تنطق بهالخيبه قدامه وهي اللي اعتادت ضحكاته و غمّازاته اللي تحبها؟

٤:٠٠ م

دفعت وجد كرسي حنين بيدها وسكّرت عيونها بيدها الثانيه وخلفها وتين المبتسمه

حنين حاولت تبعد يدها: تستهبلين وجد وخري يدك ما أشوف!

وجد ضحكت تدفعها داخل غرفتها: عندي لك مفاجأة لا تشوفين

ابتسمت حنين من حست بتوقف وجد وسط الغرفة وابعدت يدها عن عيونها تسمح لها تشوف قدامها الباقة على الطاولة وبجنبها البوكس المغلف

قفلت وجد الباب بضحكة: تميم وصّاني توصلك الهدية بكل سرية

ضحكت حنين بذهول وتقدمت تاخذ البوكس تحت نظرات وتين اللي نطقت: افتحيها

فتحت حنين الغلاف تكشف عن محتوى البوكس واللي كان خوذة و شوز خاص لركوب الخيل ولمعت عيونها تناظرها بإعجاب

وجد ابتسمت: ولدنا تحمس و جاب هدية الخطوبة قبل يعرف الجواب

تسندت وتين على التسريحة تناظر تورّد ملامح حنين اللي تتلمس الخوذة

وكملت وجد: تلبسينها اذا طابت رجلك ان شاء الله ورجعتي أقوى رجعه للاسطبل بعد ما تاخذين تميم طبعًا

ناظرتها حنين بعيون لامعه وقلب مضطرب، تدري بإن رحلة شفاءها صعبه و طويلة لكنها تشوف وجود تميم معها و تشجيع وجد لها

وجد ضخّمت صوتها تقلد تميم: ابيها بكسرها ولا كسرت رجلي مثلها، تخيلي إنه قال كذا لأمي!

فز قلب حنين، وأشرت لها وجد: لازم تستخيرين هذا مو صاحي

ضحكت حنين وابتسمت وجد لضحكاتها، وناظرت حنين الورد بشرود ونطقت: اشكريه عني

نفت وجد: ما يبي شكر، يبي جواب ايه أو ايه

حنين غطت ملامحها بضحكة تتعبها ردود وجد وتحرجها

وهزت راسها وجد قبل تطلع من الغرفة: فهمنا فهمنا خلاص لا تصيحين

ضحكت وتين من طلعت وجد وتقدمت لحنين تجلس قدامها

ونطقت: لا تخلين شيء يضغط على قرارك، اذا تحسين رجلك ما تشيلك تقدرين تخلين الملكة بعد ما تطيبين

ناظرتها حنين ثواني ونفت: طول حياتي مع شدّاد كنت مُسيّره، ما اذكر إن كل شيء جاء باختياري إلا هالمرة، اخترت وأنا راضية، حتى قلبي قدر يختار بدون ضغط وبدون إجبار

ابتسمت وتين ترفع خصلاتها خلف اذنها، تفهمها و تفهم إنها "تبيه" تبي تميم بكسرها وألمها و حيرتها، تبيه لأنه تميم

كملت حنين: وقف قدامي بعد موت الرعد يعتذر لي متخيله؟ انشغل عن كل أحزانه وما التفت إلا لحزني، بكيت قدامه ما قدرت أرد وقتها عرفت إنه هو المقصود وهو اللي اختاره قلبي

انفتحت بوابة المزرعة ودخل عناد راجع من دوامه لابس بدلة الدفاع المدني، شال نظاراته يمشي باتجاه البيت وابتسم يلمح راجح اللي يمشي بعصاه وجنبه حاتم

التفت راجح يرحّب: يا مرحبا و مسهلا

عناد تقدم يبوس راسه، ونطق راجح: رحت لدوامك وخليتني مع ذا المجانين

حاتم بمزح: عساني مو من ضمنهم

نفى راجح بضحكة يأشر على تميم ومشاري وبتال اللي جالسين في بيت الشعر

ودخلوا للصالة ترتفع ضحكاتهم، والتفتت حصة: يا جعله حسّ ما ينقطع

ابتسم راجح يجلس بجنبها والتفت: وين البنيّات؟

غالية ابتسمت: لقوا لهم شيء يشغلهم

ضحكت حصة تفهمها وهزت راسها: موضوع ملكة حنين و تميم

راجح ابتسم: الله يتمّم لهم على خير

و التفت يوصّي غالية: علميني يا بنتي عن أي شيء تحتاجونه بالذات حنين تراها تستحي

التفت عناد من سمع صوت خطواتها وابتسم يشوف وتين اللي لفت عبايتها حولها و اتسعت ابتسامتها من شافته

ورحّبت حصة: تعالي يا بنيّتي

مشت تجلس بجنب عناد اللي مد باطن يده يطلبها تمسكها وابتسمت تلبّي طلبه تحضن كفّه بيدها والتفتت تسمع سوالفهم

مشت وجد و بجنبها حنين اللي بدأت تستخدم عكّاز للمشي

وفزّت حصة: بسم الله عليك حنين ليش تقومين من الكرسي

نفت حنين تطمنها: ما عليك يمه العكّاز أسهل لي

غالية: اذا تعورك ارجعي للكرسي

ابتسمت حنين لخوفهم: ما تعورني

ابتسم راجح من التمّوا البنات بجنب حصة، والتفت من دخلت هاجر شايله صينية القهوة

ورحّب بعلوّ صوته: والله هذي شيخة الشيخات

لمعت عيونها وتقدمت تبوس راسه، وضحكت وجد: كل اسبوع شيخه جديدة! اخر مره كانت أنا

هاجر ناظرتها: طاح سوقك خلاص

ضحك راجح وكحّ يمسك صدره و فزّ عناد يعطيه مويه واستمر راجح يكحّ وعقد حاجبه حاتم يفهم إنها نوبة من نوبات مرض أبوه وقام يركض لغرفة راجح

كحّ يضرب صدره وارتبك عناد يكرّر: بسم الله عليك يبه خذ نفس

قامت وتين من بدأ الموضوع يصير جدّي، و فزت حصة تمسح على ظهر راجح اللي استمرّت كحّته لين بلّل الدم فمه

ومسكت وتين قلبها تشوف الدم ينزف من أنف و فم راجح

ارتبكت هاجر تاخذ مناديل تساعدهم، وارتجفت يدين عناد اللي مسح الدم بيده ويكرّر: يبه خذ نفس، بسم الله عليك

حاتم رجع و معه علاج راجح اللي أخذه من يده برجفه ياكله تحت نظرات القلق من عناد اللي ما زالت يدينه ترجف

ناظرت وتين الرجفة بيدين عناد ورفعت نظراتها لملامحه وحواجبه المعقوده، تشوف خوفه و قلقه على راجح وعضت شفايفها

راجح أخذ نفس يضغط على راسه: نسيت أكل حبوب الضغط

حصة أنّبته: ذكّرتك تاكلها كم مره ما طاوعتني! وثقت في حاتم قلت أكيد إنه أعطاك إياه

حاتم اللي يدري إنه مو بسبب الضغط: نسيت يمه

عناد تراجع يمسح صدره: أهم شيء إنك بخير يبه؟

راجح هز راسه يطمنه: بخير يا ولدي

وجد ناظرته بتنهيده: خوفتنا يبه

صدّت هاجر من حست بتجمّع دموعها، والتفت عناد يبتعد عن الصالة بتنهيده ويتجه لغرفته ومشت خلفه وتين بخطوات متسارعه

عند تميم اللي وقف من شاف وجد تمشي باتجاه الاسطبل وركض باتجاهها

وقرّب يهمس: وافقت؟

وجد مسحت على الخيل عناد وناظرته: يبي لها وقت تستخير

تميم: تستهبلين! طيب وش قالت عن الهديه؟

وجد ناظرت لهفته وترقّبه لجواب حنين، وضحكت: اعجبتها

ابتسم والتفت بيمشي للبيت ونادته: تميم!

التفت لها، ونطقت: وافقت ترا

ارتفعت نبضاته، هي الوحيدة اللي تربك نبضاته بعد ما اعتاد ارتفاعها وقت ركوبه الخيل، هالمره حنين عيّشته شعور ركوب الخيل والفوز ببطولة استصعبها أيام طويلة، عيّشته شعور الانتصار والبهجة، شعور الحب واللهفة، بعد ما كان يعد الأيام لبطولاته و تدريباته اليوم صار يعد الأيام لليلة اللي يجتمع فيها مع حنينه، لليلة اللي يرتبط فيها اسمها بإسمه من مدرب ومتدربه لتميم و حنينه زوج و زوجة.

دخل يخلع جاكيت البدله، ودخلت خلفه تناديه: عناد

وقف والتفت لها: وتينه

قفلت الباب وتقدمت بتردّد: بتكلم معك عن موضوع

ناظر الجدّية بملامحها وعقد حاجبه يشوفها تجلس على الكنبه وتأشر له يجلس جنبها

مشى يجلس وناظرها: ماني مرتاح لك يا بنت سلطان وش عندك؟

بلعت ريقها وناظرت ابتسامته وغمّازة خدّه ومدت يدها تتلمّسها بتفكير، شافت خوفه على راجح و ما فاتتها رجفة يدينه و صوته وهو يناديه، خاف على راجح و خافت هي على عناد

التفت عناد يناظر نعناعه اللي جلست بينهم ورفعت وتين وجهه باتجاهها: بقول لك شيء، ناظرني طول ما أنا اتكلم لا تبعد عيونك عني طيب؟

عناد ناظر عيونها: أضيع اذا ضيعت عيونك يا بنت سلطان، غريب أنا و عينك لي وطن

بلعت ريقها بدون رد وانقبض قلب عناد يفهم إن الموضوع اللي بتقوله ما هو شيء عادي

عدّل جلسته يناظرها: وش فيك وتين؟

وتين ما زالت ماسكه وجهه بكفوفها: انت تدري أبوي راجح عنده الضغط والسكر و تعبان شوي

عقد حاجبه وهز راسه بالإيجاب، وعضت وتين شفايفها تطير حروفها و كلماتها

عناد بقلّ صبر: تكلمي وتين

صدّت تاخذ نفس وناظرته: شفت خوفك عليه، خفت يصير له شيء بدون علمك و اعيش عمري كله ندمانه، خايفه يا عناد خايفه

عناد سكت يفهم إن الموضوع يخص أبوه، يخص صحّته تحديدًا

وكرّر: تكلمي

وتين مسحت كفّها على خده: أبوي راجح مريض، أبيك تدري عن هالشيء مني قبل يصير شيء لا سمح الله

قاطعها ووقف: كيف يعني مريض! هو بس عشانه ما أكل حبوب الضغط

وتين نفت ووقفت قدامه: مو بس الضغط، عنده مشكلة ثانية

مسكها من أكتافها يشدّها ناحيته تحس بارتجاف صوته: وش فيه؟

مسكها من أكتافها يشدّها ناحيته تحس بارتجاف صوته: وش فيه؟

وتين تقدمت تحاوط رقبته وتحضنه قبل تجاوبه، تهدّي روعته قبل تروّعه، وغمض عيونه ياخذ نفس: علميني

وتراجعت تناظره تسرد لك الحقيقة: أبوي راجح عنده ورم في الراس

لانت ملامحه يناظرها بعدم استيعاب، وكمّلت وتين: بس ان شاء الله هو بخير، ما ادري عن تفاصيل حالته بس هو

قاطعها يبتعد ويلتفت للباب وأسرعت وتين بخطواتها تناديه بتكرار و سبقته تقفل الباب بالمفتاح وتوقف قدامه

عناد ناظرها و رجف صوته: ابعدي وتين!

نفت و حطت يدينها على صدره تبعده: محد يدري عن الموضوع غير حاتم وهاجر حتى أبوي راجح ما عنده علم إني أدري!

تقدم يحاول ياخذ المفتاح: بروح اشوفه! لازم اشوفه!!

ودفعته من صدره تمنعه: تكفى عناد اهدأ! ان كان لي خاطر عندك لا تطلع لهم بهالحاله وهو تعبان

ناظرها بصمت وبلعت ريقها تخاف سكوته، لكنها تلمس بيدينها ارتفاع نبضاته وسرعة أنفاسه، ترتجف رموش عيونه وتنعقد حواجبه

ما يصدق كلامها لأول مره، يكذّبها، ينكر حروفها و ينفي براسه

ويكرّر: أبوي ما فيه شيء

احمرّت عيونه وصدّ من حس بعبرته تخنقه، نزل نظراته لدم أبوه بيدينه، يتكرر مشهد نوبته في الصالة، يفهم سبب صداع راجح المتكرّر، فقدانه للشهّيه، الأرق اللي يعيشه كل ليلة، و شحوب ملامحه

مسك عناد راسه وتراجع يمشي بالغرفة يشد خصلاته بين أصابعه

ونطق بحسره: كيف ما انتبهت! كيف ما لاحظت

وتين تقدمت بخوف تشوفه ينهار ويضرب المرايا اللي اهتزت تلطّخها قطرات الدم من انجرحت يده

وتقدمت وتين تمسكه تمنعه يأذي نفسه أكثر: عناد!

وناظرها بتعب: كيف ما دريت إنه يعاني؟ كيف؟

تقدمت تحضنه بقوه: ان شاء الله إنه طيّب، أبوي راجح قوي و عنيد مثل عناد!

ابتعدت تمسك يده المجروحه وتسحبه للكنبه بعد ما أخذت كومة المناديل تضغط بها على جرحه وتمسحه

و صدّ يمسح وجهه بيده الثانية يمرّرها على شنبه و ذقنه بتنهيده ولاحظت وتين رجفة أصابعه تدري إنه وده ينهار، وده يصرخ ويلوم ويبكي لكنه يتلبّس الثبات

ثواني والتفت لها: كيف دريتي؟

وتين: دريت من هاجر، سمعت أبوها وهو يتكلم عن علاجات وأدوية

عناد عقد حاجبه بضيق: يعلم حاتم وما يعلمني

وتين ناظرته: ما ألومه! ما شفت نفسك في عيني وانت تضحك؟ كنت بضعف وأخبي عنك، وحتى هو ما يبي يضايقك ما يبيك تشيل همه و تناظر له بحزن

سكت يسمعها تواسيه، تخفّف لوعة قلبه، تعلّمه إن راجح يطيب اذا طاب خاطر عناد، يضحك إذا ضحك عناد، كيف لو شافه حزين وضايق؟ وهو اللي اعتاده ضحوك و بشوش الوجه؟

رفعت يدها تتلمّس خده: يخبّي عنك عشانك وعشان نفسه، تزين نفسيته إذا شافك تدري؟ انا علمتك عشان يكون عندك خبر، عشان تسنده وانت قوي و تقوّيه، اسأل حاتم اذا ودك تتطمن عليه، وخلك مع أبوي راجح وأنا معك

تقدم يسند ذراعينه على ركبته ويدفن وجهه بين كفوفه بتنهيده

ناظرته وتين بضيق تدري إنه يحترق من داخله على أبوه، يخاف وخوفه باين من صوته و رجفة يدينه، ترعبه فكرة إن الورم ينهش بجسد أبوه ويأكل من عمره وهو ما بيده حيله

وتين نطقت تكسر الصمت: ناظرني عناد قلت لك لا تبعد عيونك

ناظرها وبلعت ريقها تشوف الذبول بعيونه، ونطقت: نروح البحر؟

نادت وجد: هاجر!

صحت هاجر من شرودها والتفتت لوجد اللي تورّيها صورة فستان بجوالها

وكرّرت سؤالها: وش رايك فيه لملكة حنين وتميم؟

هاجر ناظرته وهزت راسها: حلو

حنين التفتت لهاجر: تعبانه هاجر؟ وش فيك مو على بعضك

نفت هاجر تطمنها: بس خمول

وابتسمت هاجر تحاول تطرد أفكارها وتسولف: ما وريتيني فستانك؟

حنين ابتسمت: وتين بتصممه لي

هزت راسها هاجر والتفتت لتهاني اللي مشغوله في جوالها تكتب

ونادتها تجذب انتباهها: من جلسنا وانتِ على جوالك مين تكلمين؟

تهاني قفلت جوالها؛ أدور لي فستان

حنين سألتهم بتوتر: راح يجون ناس كثير زي يوم زواج وتين وعناد؟

وجد ابتسمت ونفت: في الملكة محد راح يجي إلا اهلنا والقريبين، بس إذا طابت رجلك أمي حصوص متحلفه ترقصين معها على الكوشه قدام جماعتنا وأهل الخبر كلهم

ضحكت حنين، وابتسمت وجد تناظر جوالها ترجع تنشغل فيه

ثواني والتفتت لهاجر تورّيها: شوفي مو هذا البراند اللي يحبه مشاري؟ منزلين كولكشن بلوفرات

ناظرت هاجر وهزت راسها: ايه هو نفسه

وجد طلبت لمشاري منه باعتياديه: باخذ له منهم يغيّر عن البلوفرات اللي عنده

ناظرتها هاجر ثواني وسألتها فجأة: ما علمتيني وش صار على سعود؟

تلاشت ابتسامة وجد ما تبعد عينها عن جوالها: تسرعت بالحكم عليه

شهقت حنين: يعني ما عاد فيه وينه سعود القلب؟

سكتت وجد تستحي تعلمهم عن استغلاله لها وخداعه

ونطقت هاجر: تسرعتي بالحكم عليه ولا في قلبك غيره؟

ناظرتها وجد بصمت، ووسعت حنين عيونها بذهول: فيه سعود ثاني؟

غمزت هاجر لوجد تأشر لها على جوالها: البلوفرات، اطلبي الأزرق يحبه

شهقت حنين و مدت وجد رجولها تحاول ترفس هاجر: تبين اسدحك عند حنين وتتشاركين معها العكاز؟

حنين ناظرتها: بدون تجريح واطلبي البلوفر وانتِ ساكته

ارتفعت ضحكاتهم والتفتت تهاني من سمعت صوت الباب تشوف خروج وتين مع عناد وعقدت حاجبها من شافت تشابك يدينهم

التفت عناد لبيت الشعر بصمت ولاحظت وتين نظراته

ونطق عناد: ودي اشوفه قبل نطلع

وتين هزت راسها بتفهّم: بنتظرك

مشى عناد لبيت الشعر يسمع ضحكات العيال وصوت راجح اللي رحّب بعناد من شافه

ابتسم وتقدم يجلس بجنبه وطبطب راجح على كتفه: ما نمت عقب تعب الدوام، عسى ما تعبت!

ناظره عناد بصمت، يشوف نظرات القلق بعيون راجح اللي شال هم تعب عناد و تناسى تعبه

يشوفه يلتفت للعيال وينطق: صبوا لعناد يطيب راسه، عطوه من التمر زين لصحّته

أخذ فنجاله والتفت لراجح المبتسم، كان المكان مزدحم بأصواتهم، سوالف حاتم وبتّال وصرخات مشاري وتميم يتبعها صوت معلّق المباراة اللي ارتفع من شاشة التلفزيون، لكن بالنسبة لعناد كان الهدوء قاتل، وكأنه يشوف المشهد من خلف الكواليس، يدري عن تعب راجح اللي يخفيه خلف ابتسامة باهته، يدري عن قلق حاتم اللي يخفيه بثرثرته مع العيال، وهو؟ يخفي معرفته خلف ملامح الجهل

التفتت وتين للبنات بالحديقة وتقدمت لهم

حنين التفتت لها: تراضيتوا أخيرًا

وجد بضحكة: ليتكم طولتوا شوي كنتم تضحكوني

حنين ابتسمت: حتى انا ضحكوني بس كنت خايفه اضحك عند وتين وهي معصبه

وجد ناظرت هاجر: تخيلي جيناهم للبحر كل واحد فوق راسه شياطين، وحتى وتين رمت مفتاحه بالبحر

عقدت تهاني حاجبها وصدّت: طفله!

وتين سمعتها، ونطقت هاجر تتدارك الموقف: ليش تخاصمتوا؟

وتين رفعت يدها تشكّل سلاح باصابعها: رميت شدّاد وزوجته

وصوّبت يدها لتهاني بتهديد وتكمل: نثرتها حولهم وما رمشت عيني

تهاني اللي استفزّها أسلوب وتين: فقدت جنينها بسببك ما عندك ضمير؟

هاجر ناظرت تهاني بصدمه من فهمت إنها تتواصل مع فريدة

ونفت وتين: فقدته بسببها هي و زوجها! مافي أُم ترضى تأذي بنت بريئة وتكسر حلمها! المفروض خافت على بنتها من الشر اللي تسويه في بنات الناس

تهاني بحقد: انتِ مو أقل منها شر

وتين لانت ملامحها: أنا كنت أخاف على الطير لا طاح ريشه وأبكي عليه، تعرفين وش معنى "كنت" ابكي؟ الطفلة اللي ناديتيني بها هم موّتوها، حرموها حتى من البكاء

عقدت حنين حاجبها بضيق تسمع الغضب بنبرة وتين اللي تراجعت من وصلها صوت عناد يناديها

التفتت ومشت ولانت ملامحه يشوف الغضب بعيونها

ومسك ذقنها يلفّها له: وش فيك؟

وتين مسكت ذراعه: مشينا

عناد التفت باتجاه البنات يرفع صوته: وش فيها!

وتين سحبته وكرّر عناد سؤاله يناظر البنات: والله لو أدري إنكم مزعّلينها

قاطعته وتين: خلاص عناد

ولوّحت وجد لهم: الله يحفظكم

طلعوا والتفتت حنين لتهاني بغضب: لا تتكلمين مع اختي كذا! ما أرحمك يا تهاني والله ما تشوف عيني ولا أكبر راس فيكم واموّتك بيدي تفهمين؟

قامت تهاني ومشت تبتعد عنهم ومشت خلفها هاجر

دخلت الغرفة ودخلت هاجر: تكلمتي مع فريدة؟ وش ناويه عليه تحسبيني غبيه ما أفهم؟

تلاطمت الأمواج وانتشر نسيم البحر بالمكان وجلست بجنبه تتلمّس الرمل بيدينها وتناظر شروده بالبحر ونجوم السماء الواضحة

ابتسمت وتين تكسر الصمت: اخر مره جينا هنا كنا زعلانين

ابتسم عناد يتذكر أصواتهم العالية ونقاشهم الحاد والتفت لها

وسكتت وتين تشوف الهدوء بملامحه والشرود بعيونه، تدري إن باله مشغول عند راجح

وتقدمت تعدم المسافة تحاوط ذراعه بيدينها: تكلم معي عن أبوي راجح، علمني عنه

ابتسم يفهم إنها تحاوله، ودّها تسمعه يتكلم و يخرج عن سكوته

من وين يبدأ يتكلم؟ يعلمها عن السنين اللي قضاها تحت ظل راجح ولا عن النار اللي رمته بأحضانه؟

عناد نطق ينثر حروفه اللي اشتعلت في جوفه: أبوي راجح هو أول شخص عرفته بعد ما فقدت ذاكرتي، أول اسم حفظته كان راجح

عقدت وتين حاجبها بعدم فهم، وكمّل عناد: رمى نفسه وسط النار و شالني بيدينه، ما كنت في وعيي وما أتذكر شيء إلا شوفته واقف جنب راسي في المستشفى، أذكر حروق ثوبه وأدري إن ما وراه إلا لسعات موجعه، يخفي ألمه ويفز لي كل ما ونّيت من حروقي

التفت عناد ينزّل طرف جاكيته يكشف لها عن آثار ندوبه خلف رقبته

تلمّست وتين ندوبه، وكمل عناد: مسح علي وقتها و نسى حروقه، فقدت قدرة الكلام و تكلم لسانه بدالي "عناد يبي مسكن يا دكتور، عناد يعوّره راسه، عناد جوعان يا حصة"

بلع ريقه يحس وكأنه يبلع جمره: شدّ ظهري و علّمني إن الصوت ولو راح يبقى له صدى، علّمني إن الندوب ولو إنها توجع تقوّي، علّمني وما انتظر مني ردّ، يردّد "عناد رجّال، عناد قوي، عناد ولد سيف"

امتلت عيونها بدموعها من سمعت نبرة الحزن بصوته

وناظرها عناد: علّمني إن أبوي سيف وأمي عايشة، يردّدها علي كل يوم وكأنه يعلمني إن حتى لو فقدت الذاكرة ما نسيتهم

مسكت كفّه تلمّها بين كفوفها تسمعه يلفظ كل اللي في جوفه

عناد ناظرها: وبعد سنتين من الصمت نطق لساني وأول من ناديت كان أبوي راجح، ناديته يوم زلقت رجله عند باب المزرعة، خفت عليه لأول مره

وابتسم عناد للذكرى القديمة: ما اهتم لألم رجوله من طيحته وبكى من سمع صوتي، وبكيت أنا أحسبه متعوّر

وتين تقدمت تبوس غمّازته وناظرها بذهول تصدمه بحركتها وسط كلامه، وابتسمت: كمّل

ضحك وصدّ للبحر بتنهيده: أبوي راجح شخص عظيم بعيوني ما ينصفه كلام مهما طال

وتين سندت كفها على خدها: وأمي حصوص؟

عناد ناظرها: لو بتكلم عن أمي حصوص بيصبح الصبح ما سكت

وتين: لا تسكت، لا تسكت يا عناد بسمعك