صد شدّاد بتفكير، يتذكر غضب عناد وقت معرفته بالحقيقة، يتذكر وقوفه قدامه بصورة أمه و خالته

ونطق: يدري إنها بنت خالته، بيتركها بهالسهوله؟

فريدة شدت على يدها بقهر والتفتت تناظر الفراغ، ثواني وطلعت من المكتب تترك شدّاد غارق بأفكاره، ناظر الشاش على رجله

ما زال يحس بعجزه ويعد الأيام عشان يوقف على حيله و يواجه عناد ووتين بنفسه، يدري إن وتين ما تستسلم ولا توقفها حقيقة موت أمها وسط النار

مرّت دقايق طويلة غارق فيها وسط شرور أفكاره وحقد قلبه

التفت من وصله الصوت عند الباب وعقد حاجبه: فريدة؟

ما وصله رد و قام يعرج باتجاه الباب وطاحت عينه على كومة الصور اللي طايحه تحته، نزل لمستواها وأخذها باستغراب

جمدت ملامحه من تعرّف على الأشخاص اللي بالصور، يعرفهم تمام المعرفة رغم تشوّه الصور بالرماد وبقايا الحريق

رفع نظراته للباب من استوعب وجود شخص غيره بالمكان يدري إن فريدة راحت تنام

تقدم يفتح الباب ووقف بصدمه يشوف الصناديق المتراكمه تسد عليه طريق الخروج، نقل نظراته بينهم كانت الأغراض شبه محترقه، كتب و جرايد و خشب وحطام، ووتين

رفع نظراته يشوفها واقفه خلف الصناديق اللي تفصله بينه وبينها

شدّاد: وتين! كيف دخلتي

وتين رفعت المفتاح باستهزاء: بيت خالي و أدلّه

شدّاد تقدم يرفس الصندوق برجله السليمه يبعده عن طريقه

يحاول يوصل لوتين اللي رفعت الولاعه بيدها

وقف مكانه يناظرها بصدمه، ونطقت وتين: عرفت هالصناديق لمين ولا أعلمك؟

ناظرها يفهم إنها تهدده، تقرّب الولاعه لمحتوى الصناديق ويراقبها بحذر

ونطق: اتركي الولاعه

نفت وتين تناظر الصناديق: ما عاد أحتاجها، نبشت فيها الليل كله وما لقيت ريحة وحدة لأمي، بحرقها

شدّاد أشر لها بتهديد: وتين

قاطعته وتين بقهر: ترجيتك يا شدّاد، بكيت قدامك تاخذني لأمي تذكر وش قلت؟ قلت لي أمك رمتك عندي و راحت تعيش حياتها

رفع شدّاد نظراته لعناد اللي مشى باتجاههم شايل آخر صندوق

تركه على الأرض ونفض يده تحت نظرات الغضب من شداد اللي تقدم يحاول يرمي الصناديق عن طريقه المسدود

وصرخت وتين تكمل كلامها: أمي ماتت وما تركت خلفها إلا رماد، رماد يا حقير! خليتني أعيش وانا اخاف من طاري أمي واشتاقها! خليتني أعيش أدورها في مراياتي وأحلامي ما دريت إني فقدتها للأبد

ناظرها عناد بصمت يشوف انفجارها بوجه شدّاد ومسك كتفها يذكّرها بخطتهم وهمس: الولاعه

تقدم شداد يبعد الصناديق بنفس اللحظة ولّعت وتين في الجرايد برجفه وتراجعت مع عناد تراقب انتشار النار

وصرخ شدّاد بجنون: وتين!

ناظره عناد ببرود: لا تخاف ما راح تموت، بس جرّب تعيش الشعور اللي أخفيته عنهم

صدت وتين ومشت تعطي ظهرها لشدّاد اللي يناديها و ينادي عناد بصوت عالي، رفس الصناديق المشتعله وتراجع يحس بالحرارة واختل توازنه و طاح على الأرض يناظر النار اللي اشتعلت قدام باب المكتب تمنعه يهرب منه، كان يدري إن وتين ما يوقفها شيء لكنه ما توقع إنها تواجهه بهالسرعه، ناظر الصور المنتثره على الأرض تحمل بين أوراقها ملامح أخواته، عايشة و جميلة اللي لفظوا آخر أنفاسهم وسط الدخان، تراجع يدخل المكتب يبتعد عن النار ويفتح الشباك

و رفع صوته ينادي: فريدة!

بنفس الوقت نفضت وتين يدها تتجه لمخرج البيت بجنبها عناد اللي طلع سيجارته يحطها بين شفايفه بدون ما يشعلها

التفت لها: هاتي الولاعه

وتين نفت: دق على الدفاع المدني

تقدم يقرب لها يأشر على السيجاره: ولّعتي في مصنع كامل، ولّعتي في مكتب شدّاد، صعب عليك تولّعين زقاره؟

وتين تقدمت تأشر على صدره: ما تولّع جوا صدرك وأنا فيه، طلّعني منه أول

ابتسم يناظرها بذهول من ردّها، شال السيجاره وطلّع جواله بدون ما يفصل نظراتهم و دق يرفع الجوال لإذنه

نطق من وصله الرد: عليكم السلام، بيت خالي يحترق

كتمت ضحكتها من كلمة "خالي" وصدّت وقفل عناد المكالمه

وناظرها: خمس دقايق ويجون

مشت وتين باتجاه السياره: خمس دقايق يعني ما يمديه ينلسع من النار

عناد ركب بجنبها يناظر جواله: بس يمدينا نسمع مخاوي الليل وهو يقول ما تدري انك بنار الحب كاويني، ما تدري انه عليك الشوق غنّيته

ابتسمت تسمع صوت الأغنية يصدح بسيارته والتفتت تسمعه يدندن مع كلماتها، تأملته ثواني تستوعب فكرة إنه منها و فيها، تشوف فيه أهلها وعائلتها بعد ما كانت حنين عائلتها الوحيدة، اليوم تحس عائلتها تكبر و يقوى ترابطها رغم الشتات والضياع

نزّلت نظراتها ليدينهم المتشابكه ولمعت عيونها اللي لاحظها عناد وابتسم برضى يتأمل لمعة العسل اللي يحبها

ثواني و التفتوا لصوت الدفاع المدني اللي صدح بالحي بصوته العالي

ونطقت وتين بتنهيده: فكرة السلاح كانت أحلى

ضحك عناد و قرّب منها يردد كلمات الأغنية: ما تدري انه عليك الود طاويني، و ما تدري إني عليك الليل ما أمسيته؟

ضحكت وتين وحرّك عناد سيارته يبتعد عن بيت شدّاد براحه بعد ما تأكد من وصول الدفاع المدني بالوقت المناسب

لف الدركسون يتجه لطريق المزرعة غافل عن جواله اللي يدق بإسم تميم

تأفف تميم: ما يرد

التفتت وجد لحنين: دقي على وتين

حنين نفت: ما ترد

تسند مشاري على سياج الاسطبل: وين راحوا! عناد ما عنده دوام بكره جمعه

بتّال بتفكير: يمكن لقوا حل أو تواصلوا مع محامي

قاطعه مشاري: محامي بهالليل؟ عناد ما طلع هالوقت إلا عشان شيئين، يا يعزف يا يحرق

بتّال عقد حاجبه: وش يحرق وهو بالاطفاء؟

تميم باستهزاء: لا هو كذا عنده وظيفتين، في النهار يطفي وفي الليل يحرق

ضحكت حنين بخفوت والتفت تميم بذهول من سمع ضحكتها

تميم ابتسم يناظرها: اعجبتك؟

ابتسمت حنين وصدّت، والتفتوا من انفتحت بوابة المزرعة يشوفون سيارة عناد وتنهدت حنين براحه ومشى بتّال باتجاه السياره يشوف عناد ينزل مع وتين

عقد عناد حاجبه يشوفهم مجتمعين عند الاسطبل: وش فيكم!

تميم ناظره ثواني ونفى: ولا شيء، انتم بخير؟

هز راسه عناد بالإيجاب والتفت لوتين اللي مشت باتجاه حنين وفتحت ذراعها تحضنها بصمت

حنين همست: ريحتك حطب، وش سويتي؟

وتين ابتسمت بهمس: ولا شيء، طفيت نارنا

وقفت فريدة بذهول تناظر مكان الصناديق المحترقه والتفتت لصوت الباب اللي قفله شدّاد بعد ما راحوا الدفاع المدني

فريدة: ليش خليتهم يروحون! ليش ما بلّغت على وتين و عناد!

مشى يعرج وعقد حاجبه بغضب وجلس يناظر الصور على الأرض

وصرخت فريدة بجنون: كنت بتموت! ولّعوا بالمكتب وانت داخله وقدام عينك! ما خافوا من شيء لأنك ساكت لهم!

شدّاد ناظرها: مين قال لك إني بسكت لهم؟

فريدة: واللي قاعد تسويه وش؟

شدّاد نزل نظراته لرجله والشاش اللي تلطّخ بالدم بسبب جرحه

وهز راسه: قاعد أخذ وقتي

فريدة جلست بتعب: إلى متى؟

شدّاد بهدوء: لين تبرد حرّتهم وتطيب جروحهم

ناظرته فريدة بترقّب: وبعدها؟

شدّاد: نفتح جرح جديد

تنهدت من حطت راسها على الوسادة بعد يومها المُتعب

غمضت عيونها تفكر بكل اللي عاشته الليلة، ليلة وحدة وكأنها عن عشرين عام، عشرين جرح، التهب و نزف وانتشر ألمه مثل انتشار النار في الهشيم، تحس بالتصدّع في كل جسدها والحرارة تطفح من جوفها ولا كأنها ترجف من صقيع الجو و بلَل راسها

التفتت من حست بجلوسه جنبها على السرير وعدّلت جلستها تتسند على ظهرها تشوفه ينفض البلَل عن شعره بعد ما أنهى استحمامه

التفت بجسده لها واقترب يشوفها شارده، نزل لمستواها وابتسم يترك قطرات المويه تطيح على وجهها من شعره

ابتسمت تمسح المويه عن خدها، ونطق عناد: عشان تصحصحين

ناظرته قريب منها تنقل نظراتها بين ملامحه، رسمة حاجبه، لمعة عيونه، غمازة خده، ومدت يدها تمرّرها على طرف فكّه

وتين: فيك مني، كيف ما لاحظتك؟

عناد اللي ما زال منحني بجسده يسند يدينه حولها: ما لاحظتي انعكاسك في عيني؟ تشرّبتك مثل شرب النعناع و زرعتك في جوفي ما شميتي ربيعك؟

لمعت عيونها بدموعها تناظره بصمت، وكمّل: اعتادت يديني الزقاير قبل أمسك يدينك، طفيت نيران و اشعلتي فيني نار ما تطفي ولا ودي تطفي

طاحت دموعها ونزل لها يعدم المسافة ويبوس عيونها يمنع دمعها بطريقته…

-

اكتفينا صقيع؟

طاحت دموعها ونزل لها يعدم المسافة ويبوس عيونها يمنع دمعها بطريقته

وناظرها يسرد لها شعوره: أصعب ليلة عشتها، بكت عيني وأنا اتلوّى عند قبر ماهو لأمي، بكيت أمي و بكيتك وأنا اتحسّر على عشرين عام مضت ما عرفتك فيها

سكت ثواني يرتب حروفه، يحاول يشرح لها إنها أصعب وأبرد ليالي عمره لكنها أعذبها وأدفاها، الليلة اللي عرف فيها حقيقة قُربها له مثل قُرب حبل الوتين في جوفه، حقيقة إنها عائلته وبنت خالته

نطق يكمل: وأجمل ليلة، تدرين ليه؟ عشت غريب أدور في عينك وطن، والليلة ما عادني الغريب وصرنا واحد، صرتي لي وطن وصرت لك شعب، صرتي لي حرب و صرت لك سيف

حاوطت وتين رقبته بذراعينها تقربه أكثر و بكت تستسلم لمشاعرها اللي فاضت بسبب كلماته لها

ونطقت بين عبراتها: ما يهمني لو ينهار داخلي وطن و يتشرّد شعب و تنهزم حربي وينكسر سيفي، لأنك تبقى عنادي مني و فيني

حضنها يشدّها له وغمض عيونه يسمع شهقاتها، صارت تبكي بسهوله بعد ما كانت تحبس عبراتها بكل قوة، كانت في عز ضعفها ويعيش هو ضعفه معها، يقوى بها و تقوى به، لأنه عنادها و سيفها الحاد ولأنها وتينه ووريده النابض للأبد.

انتهت ليلة طويلة، اشتعلت و طفت فيها نار، هب فيها صقيع و ذاب ثلج ونبت مكانه ورد وربيع، ليلة وحدة غابت شمسها حارقة و أشرقت عقبها شمس دافية

ارتفع صوت أذان الجمعة يوصل لمسامع حصة اللي نثرت الخزامى وسط الإبريق تسمع ضجة العيال في الصالة لكنها تفقد حس عناد بينهم، ما شافته من ليلة أمس و تشيل همه ويشغلها هدوءه

طلعت للصالة تسمع غاليه تأنب بتّال: استح على وجهك انت أكبرهم و تخلي البزران يصحون للصلاة قبلك و يصحونك!

تميم ومشاري بتزامن: من هم البزران؟

بتّال تجاهلهم ونطق: نمت متأخر أمس بسبب أشغال الفندق

حصة مشت تشوف شنطة بتّال: بتمشي للبحرين؟

هز راسه بالإيجاب: ماني مطول أسبوع ان شاءالله

قاطعه تميم: خذ راحتك يا أبو الشموخ لو تقعد شهر

مشاري ضحك: و سلم لنا على الشموخ

بتّال ناظره بحده: تستظرف؟ ترا وراك دوام الاحد لا تنسى من هو مديرك

سكت مشاري يتذكر بداية وظيفته في فرع الخبر مع وجد وابتسم بخفوت

التفتت حصة حولها تتحرّى عناد اللي لف شماغه بعد ما تجهز لصلاة الجمعة وناظر وتين من انعكاس المرايا يشوفها تلفلف خصلاتها بجنبه

تقدم يتلمس الكيرلي بطرف أصابعه وابتسمت وتين تشم ريحة عطره تفوح حولها، وابتسم يتأملها يدري إنها تتماسك و توقف على حيلها و ترجع لطبيعتها، تسقي النعناع عند شبّاكه، تحط الأكل للقطاوه، تلف شعرها وتنثره على أكتافها، وتكثّف الماسكرا بتركيز

سمعته يتنهد وناظرته بفضول، ونطق عناد: بيشبهك

وتين عقدت حاجبها: مين؟

عناد التفت ياخذ مفتاحه يستعد لخروجه: سيف، بيشبهك

سكتت تحاول تستوعب مقصده، وضحك من لاحظ تورّد ملامحها

ورفعت صوتها قبل يطلع: معتوه!

طلع والابتسامه ما زالت مرسومه بوجهه ووصله صوت حصة اللي فزّت من شافته: يا جعلها دايمة يا وليدي

تقدم يبوس راسها وغمضت عيونها حصة تحس بالعبره تخنقها

ومشت معه لبيت الشعر: تعال، راجح يتحراك ما نامت عينه ولا ارتاح له بال لين يتطمن عليك

سكت عناد، وناظرته حصة: وين كنت ليلة أمس؟

عناد ابتسم يطمنها: قريب ما ابعدت

حصة هزت راسها: لا تبعد يا وليدي، لا تغيب عن عيني

وقف مكانه بتردد من وصل لباب بيت الشعر يوصله صوت راجح اللي يكح بتعب

وتنهدت حصة تدخل: شيّب الشايب ما عاد يتحمل البرد

دخل عناد يسمع رد راجح: عاد اليوم دفى

تقدم عناد يبوس راسه: جعله آخر التعب يبه

راجح مسك ذراعه يسحبه: اجلس جنبي و سولف لي قبل يقيم الإمام

مد يده عناد يشرب من الخزامى، ونطق راجح يناظره بترقّب: عسى ما شلت بخاطرك علي؟ انت تدري ليش ما علمتك…

قاطعه عناد: ما شلت بخاطري إلا كل خير

راجح بضيق: رحت لشدّاد صح؟ عسى ما ضايقك؟

وصلهم صوت بتّال اللي دخل: قلت له يكلم محامي ما طاوعني

نفى عناد: ماله داعي محامي

بتّال أشر عليه: غيّروا اسمه ما صار عنيد إلا من عناد

ضحكوا، ونطق حاتم بتردد: عناد اعذرني على اللي سوته تهاني ما دريت

قاطعه عناد يمنعه يكمل اعتذاره: ماهو ذنبك ولا ذنبها

صدت حصة بتنهيده، والتفت عناد يكمل: ولا تقسون عليها، بالنهايه هي بنيّه، ولا يا يبه؟

ابتسم راجح يفهم إن عناد يقلد أسلوبه يذكّره بإنصافه و حبه لبناته و حفيداته

وبنفس الوقت نطقت فاطمة: هاجر، خذي لتهاني من اللافندر

رفعت تهاني راسها من انفتح الباب ودخلت هاجر شايله بيدها كوب اللافندر، وتقدمت تحطه على الطاولة

وناظرتها بتنهيده: عاجبك الوضع؟ يقفلون الموضوع كل ما مر طاريك ويمتنعون عن شوفتك؟ وش استفدتي؟

دمعت عيون تهاني ونزلت راسها تحت نظرات هاجر اللي كملت كلامها تعاتبها: قلت لك وقفي اللي تسوينه ماراح يفيدك شيء! عناد ماهو لك ولا راح يصير لك بهالأفعال

بكت تهاني بتعب، وجلست هاجر قدامها تمسك يدينها: طلعي هالعناد من راسك و حبي نفسك بدال ما تحبين لك سراب! اصحي من غفلتك و عيشي حياتك من جديد

قطع عليهم صوت مشاري اللي طق الباب ودخل: هاجر، أبي شاحن

هاجر قامت تلبّي طلبه، وتقدم مشاري يناظر تهاني اللي تمسح دموعها وتسند على الجدار بصمت

مشاري نطق بشرود: ما كنت أحس إنك أبعد من إنك تصيرين اختي إلا ليلة أمس يوم دريت عن اللي سويتيه، كنت أقرب لهاجر منك وما استوعبت مدى بُعدك إلا أمس

غطت تهاني ملامحها تحس بالاختناق، وكمل مشاري: مدري هو انتِ انطويتي على نفسك ولا أنا اهملتك؟

شهقت تهاني تمسك قلبها بألم، وختم مشاري كلامه: ماني مهاجمك ولا كاسر عظامك مثل اللي سواه أبوي، بس ودي أكسر الحاجز اللي بيني وبينك و اللي يمنعني أعرف وش اللي يصير مع اختي

هاجر دخلت بيدها الشاحن ومدّته له: أقامت الصلاة لا تتأخر

هز راسه ياخذ الشاحن، وناظر تهاني: تراك اختي وأغليك مثل ما هاجر غالية عندي، لا تزعّليني

طلع مشاري والتفتت هاجر لتهاني تناظرها بعتاب ونفت تهاني براسها تكرر بين شهقاتها: اسفه، والله اسفه

تقدمت هاجر تحضن تهاني بتنهيده وطبطبت على ظهرها تهدّيها

البحرين - ٣:٠٠ م

وقف سيارته قدام مدخل الفندق ونزل شايل شنطته على ظهره

مشى والتفت خلفه يناظر بالسيارات يدوّر سيارتها بينهم بدون ما ينتبه لخطواته وتراجع من ضرب كتفه بكتفها وشهقت شموخ من طاح جوالها من يدها

ناظرها تنزل لمستوى جوالها بحسره: انكسر!

و رفعت راسها له بعصبية: أثوَل ما تش…

سكتت من انتبهت إنه بتّال و لانت ملامحها: استاذ بتّال

بتّال ناظر جوالها اللي تهشمت شاشته: كل من شفتيه تنادينه أثوَل كذا؟

شموخ بقهر: اللي ما يشوف طريقه و يعدم سيارتي ويكسر جوالي أناديه أثوَل

بتّال ناظرها ثواني ونزل نظراته لساعة يده: طالعه قبل نهاية الدوام

شموخ توترت تناظر حولها: خلصنا شغل

بتّال نفى: ما خلصنا توني جيت، و باقي ساعه على نهاية الدوام

شموخ شدت على يدها يستفزها أسلوبه و عدم مبالاته

مشت تدخل للفندق تتلمّس شاشة جوالها بضيق وخلفها بتّال اللي ابتسم لاستقبال الموظفين له

اجتمعوا في مكتب بتّال يعلمونه بآخر تطورات الشغل

كان لاهي يناظر جواله و يسمع كلمات الموظف اللي نطق يختم كلامه: باقي نصمم شعار الفندق الجديد وحاليًا تشتغل عليه استاذة شموخ

بتّال سأل باندماج: أسود ولا بنفسجي ولا كحلي؟

شموخ عقدت حاجبها: شنو؟

بتّال رفع نظراته لها: لون الشعار، اختاري واحد منهم

شموخ بتفكير: الأسود كئيب والكحلي غامق، البنفسجي أحلى

هز راسه و قام: ما قصرتوا، أشوفكم بكره تقدرون تطلعون بيوتكم

التفتت شموخ بتطلع، ونطق بتّال: استاذة شموخ بتجلسين تشتغلين على الشعار

وقفت مكانها وغمضت عيونها تهدّي نفسها وابتسم بتّال يدري إنها في قمة غضبها منه

التفتت ترسم الابتسامه غصب: برسله لك على الايميل

هز راسه بتّال يأكّد: بنفسجي، زي ما تحبين

هزت راسها شموخ: بنفسجي

قربت شمسهم تغيب و تزيّنت سماءهم بألوان الغروب

تلاطمت الأمواج و انتشر نسيم البحر اللي استنشقته وتين بتنهيده

مشت على الرمل وبجنبها عناد اللي ماسك يدها و بيده الثانيه شايل العود بابتسامه

وتين ناظرت باتجاه المزرعة خلفهم: سحبنا عليهم

عناد ناظرها: ما سحبنا عليهم، سبقناهم

لفّت عبايتها الكُحلية حولها وجلست ترفع خصلاتها خلف إذنها من حرّكها الهواء والتفتت لعناد اللي جلس بجنبها يحط العود بحضنه

ونطقت بتردّد: تكلمت مع أبوي راجح؟

عناد حرّك أصابعه على الأوتار و هز راسه بالإيجاب

وتين بتساؤل: زعلان منه؟

عناد التفت لها ثواني وأشّر على مكان جلوسهم: في هالمكان بالضبط سألتيني عن أبوي راجح، و قلت لك إنه شخص عظيم و ما ينصفه كلام

هزت راسها وتين تتذكر حوارهم بهالمكان وقت معرفتهم بمرض راجح

وابتسم عناد يكمل كلامه: ما زال عظيم بعيوني، هو وأمي حصوص

وتين تقدمت تبوس غمّازته برقّه و تراجعت تناظر البحر بابتسامه

سمعته يتنهد وضحكت من نطق بهمس: يا عذابي

وتين حوّلت نظراتها لأصابعه على الأوتار تشوفه يعزف ببراعة

ونطقت بذهول: كيف عرفت تعزف كذا؟

عناد قرّب منها يحاوط كتفها بذراعه يترك العود بينهم وهو حاضنها بذراعه، وابتسمت وتين من مسك كفّها يحطه على كفّه على الأوتار

وضحكت من عزف بأصابعها تحس بخشونة الأوتار وقوّتها بين أصابعها الناعمة

مسك أصابعها يعلمها: عدّلي الوزنية بهالطريقة

ما كانت منتبهه للشرح، شردت تحس بقربه وتشم ريحة عطره

تحس بلمسات يدينه على يدينها و تسمع نبرة صوته من بدأ يغني

"يا عذابي، كيف أنا بقوى عذابك

لا صار في بعدك عذاب، وفي قربك عذاب

يا شبابي، زينة أيامي شبابك

لك في حياتي حساب، و نسيانك حساب"

رفعت نظراتها لملامحه القريبة و ابتسم عناد يناظرها ويكمل عزفه ويغني لها

"ما تصدق لو أقول إنك حياتي

في كل شيء، سمعي و شوفي انت

بإسم الهوى لا زلت، فكري و هوجاسي

و تدري علي، بعدك عذاب

و في قربك عذاب"

نزّلت نظراتها ليدها بيده اللي يعزف بها وسنّدت راسها على كتفه

بنفس الوقت اللي نزّل عناد راسه قريب لإذنها و طرف خدها

"يا حب، مالي فيك غير الشقى

يا حب، أخذ من حياتي ما بقى

عشته بإحساسي ولا به شكّ

يبدّل شعوري، حبك جرى بدمي و ذاب"

مسك فكّها يلفّها باتجاهه و يبوسها برقّه وغمضت عيونها تحس بسُكون جسدها، لمّت وجهه بين كفوفها تتلمس خشونة ذقنه

تستريح قربه و يطمئن هو بقربها، يسافرون لعالم من السُكون

يركد الموج، يخضرّ اليَباس، يرتوي ظمأ و تطفي نار و يهدأ عاصوف لأنه بقربها، يده بيدها و قلبهم واحد.

التفتت وجد لتميم اللي بيطلع مع حنين يتجهون للبحر مثل ما اتفقوا

وجد أشرت لهم: خذوا معكم القهوه وبلحقكم انا و هاجر بباقي الأغراض

مشت حنين بعكّازها وابتسم تميم يشوفها تحاول تتوازن على الرمل، وتقدم يوقف قدامها يسحبها تصعد على ظهره

وشهقت حنين تناظر خلفها: لا تشيلني!

قاطعها يمسك أغراض القهوه وعكّازها: تمسّكي لا تطيحين

حنين حاولت تنزل وصرخت من ركض بها بين النخيل وضحك تميم من تحوّلت صرخاتها لضحكات عالية، تمسّكت تحاوط رقبته بذراعينها ورفعت راسها تحس بارتفاعها على ظهره و تنهدت تشوف ارتفاع النخيل و زُرقة السماء اللي بدأ الظلام يغطيها

ضربت حنين كتفه بتكرار من وصلوا للبحر: نزلني، وتين وعناد هناك

ناظر تميم باتجاه البحر و غيّر طريقه يرجع وسط النخيل: آخر لفه و نروح لهم

ضحكت حنين وتنهدت تتمسك فيه وابتسم تميم يمشي بهدوء

ونطقت حنين: ثقيلة عليك؟

تميم: ثقيله بقلبي؟ ايه

عضت شفايفها بابتسامه، وكمّل تميم: يبي لي قلبين، قلب واحد ما يكفيك

ارتبكت نبضات حنين اللي غمضت عيونها من فرط شعورها من تصير معه، يربكها بكلماته و يعترف لها بشعوره بدون تردّد

يعلمها إنها استوطنت قلبه، و امتلكت شعوره، يحس بها في جوفه مثل ما يحس بدبلته بين أصابعه

مشت هاجر شايله الأغراض وتسمع توصيات الجدة لهم

حصة: لا تنسون البسبوسه وانتبهوا لنفسكم

مشت وجد شايله صينية البسبوسه: تهاني ما بتجي؟

نفت هاجر بدون رد وناظرت وجد حولها تدوّر مشاري اللي لبس البلوفر الأزرق بابتسامه، رش من عطره وأخذ جواله وطلع

أسرع بخطواته من شافها عند بوابة المزرعة و ركض يتعداها

ورفع صوته: سباق!

وجد صرخت تترك الصينية وركضت خلفه: غشاش!

ضحك مشاري من اقتربت وجد منه وأسرع يحاول يسبقها

تلاشت ضحكاته من سمعها تطيح و رجع يركض لها يشوفها تتألم

نزل لمستواها بخوف: جاك شيء؟

وجد نفضت الغبار عن كفوفها وعقدت حاجبها تمسك رجلها

وناظرها مشاري بقلق: وش يوجعك؟

وجد ناظرته ثواني تشوف الخوف الواضح بعيونه وقامت

وقام مشاري يناظرها بترقّب وينقل نظراته بين يدينها يتطمن باله إنها ما تعوّرت: تقدرين تمشين؟

وجد استغلت انشغاله وضحكت تتعداه و تركض تكمل سباقهم

وسع عيونه من فهم إنها مثّلت عليه وركض خلفها: يا الغشاشه!

لقطت وجد أنفاسها من وصلت للبحر وناظرت تميم وحنين اللي جلسوا مع وتين و عناد والتفتت لهاجر اللي شايله الأغراض وتتحلطم بصوت عالي: محد فكّر يشيل معي و يساعدني

مشاري ضحك يمشي باتجاهها وشال معها الأغراض واجتمعوا يزيّنون جلستهم و يلتمّون حول بعض وترتفع أصواتهم مع ارتفاع صوت الأمواج حولهم