ابتسمت تحس بيدينه تحاوط خصرها يحضنها ويدفن وجهه بين خصلاتها وغمض عيونه بتنهيده

ونطق: تميم يسألني عن حنين

التفتت توقف قدامه وتتسند على الطاولة تحس بيدينه تحاصرها

ونطقت بفضول: يسأل عن ايش؟

عناد: وش المدن اللي تفضّلها؟ وين ودّها تروح؟ قال لي اسألك

وتين ابتسمت من فهمت إن تميم يخطّط لشهر العسل

ناظرت حولها بتفكير ونطقت: حنين عاشت حياتها بين سطور الكتب و الروايات، مره تتنقل بين مدن سويسرا، بحيرة جنيف و جبال إنترلاكن، ومرة ألقاها على شاطئ موريشيوس و مرة تاكل بيتزا في ميلان

ضحك عناد، ورفعت وتين أكتافها: على حسب الكتاب اللي تقراه

عناد ابتسم: شوفي وين أخذها الكتاب اللي تقراه هاليومين، وعلّميني

هزت راسها والتفتت تاخذ الكوب بعد ما نقع النعناع ومدّته له

وناظرها عناد: وانتِ؟

وتين رفعت كوبها: هذا كوبي

نفى عناد: أقصد وين تاخذك الكتب والروايات؟

وتين ابتسمت من فهمت سؤاله يدري إنها ما تقرأ لكنه يسألها عن أحلامها بطريقته

ومسكت يده تسحبه برا المطبخ وتاخذه لغرفتها ودخلت تسمح له يدخل خلفها يشوف تفاصيل غرفتها لأول مرة

وتين مشت تأشر له على الجدار اللي امتلأ بصور تايلور سويفت، صور الفساتين اللي رسمتها من صغرها و صور برج لندن و الجسر اللي تخيّلته وتين سنين عمرها كلها

عناد رفع حاجبه: لندن! ليه هي بالذات؟

وتين جلست على السرير تناظر الصور: الأحلام لها أسباب؟

عناد جلس جنبها بضحكة: أحلامك ايه

ضحكت وناظرته: طايحه من عينك أحلامي؟ ما نسيت استهزائك بالجي كلاس يا المعتوه

عناد ضحك والتفت يأشر على صورة تايلور: وهذي لا يكون حلمك؟

وتين هزت راسها بالايجاب، وضربها عناد على راسها بخفه: يالله عاد! ما بقى إلا هي!

وتين ضحكت بعلوّ صوتها وابتسم عناد يناظرها بشرود

يتأمل جلوسها بجنبه على سريرها بين أشياءها و أحلامها

بين الرفوف اللي شالت أحلام طفولتها، وسط المكان اللي ناموا فيه و هم صغار و جمعهم و هم كبار

بين الزوايا اللي كانت شاهدة على كل لحظة، هنا ضحكت، وهنا تلوّت من ألم الظلم، هنا صرخت، كسرت ونثرت خيباتها، هنا نسجت أًول خيوط جَناحها، هنا نزفت دم و هلّت دمع

وهنا عاشت مشاعر حُبها الأول و تلبّست العناد مثل لبسها للثياب وتشرّبت حُبه مثل شُربها للنعناع

نطق عناد يكسر الصمت: أحبك

ارتفعت نبضاتها تناظره يعدم المسافة ويقبّلها برقه

و نطق بين قُبلاته: يا شقى باكر

ابتعد يناظرها وابتسم يكمل: يا فرح هاليوم

غمضت عيونها بتعب من كل المشاعر اللي تعيشها قُربه، تذوق معه حُلو النعناع و تشم الربيع وتلمس نعومة الريش وتطير لأبعد مدى في سماه

نزل لمستواها يلمّها بين يدينه و حاوطته بذراعينها تحس باندماج نبضاتها مع نبضاته

يوم جديد

٧:٠٠ ص

تحركت وجد تصحى من نومها و التفتت تاخذ جوالها تشوف الساعه وتنهدت من عرفت إن باقي ساعتين على دوامها

مرت دقايق منشغله فيها على جوالها وفزّت بشهقه من طاحت عينها على الصوره المنتشره، ناظرتها بذهول تعرف الأشخاص بالصورة

ونطقت بعدم تصديق: هاجر!

فزت تقوم من سريرها تغسل وجهها بعجله ومشت تطلع تسمع صوت الهدوء بالمزرعة ومشت لغرفة التوأم وطلت تشوف حنين نايمه

التفتت باتجاه غرفة راجح و حصة تسمع صوت الهدوء وتأففت ما تدري وش تسوي

التفتت لصوت مشاري: وش فيك!

وجد فزت بتوتر: ما رحت بيتكم مع هاجر؟

نفى: نمت هنا

توترت و صدّت و عقد مشاري حاجبه: وش فيك؟

وجد ناظرت جواله بين يدينه تدري إنه لو يفتحه راح يشوف كل شيء

وجد ناظرت حولها: تعال نتكلم برا

مشت تسرع بخطواتها للحديقة و مشى خلفها باستغراب

وقفت وجد بالحديقه ورفعت راسها تاخذ نفس، مو مصدقة الصور والخبر المُلفّق اللي قرأته

وسأل مشاري بقل صبر: تكلمي وش صاير!

وجد ناظرته ثواني ومدّت جوالها له وتقدم بياخذه وابتعدت بتردد

ونطقت: اوعدني ما تعصب وتفهم الموضوع!

ابتسم ياخذ الجوال من يدها: هدّيها بس

سكتت وجد تشوفه يناظر الجوال ولانت ملامحه من شاف صورة هاجر واقفه بجنب فواز ورفع نظراته لوجد بعدم فهم

وجد نطقت بسرعة: كانت تشتري لنا من الكافتيريا، مافي شيء بينهم مو مثل المكتوب! ما بينهم علاقة والله هاجر مو راعية هالسوالف…

قاطعها مشاري: وانتِ تحسبيني شاك إن بينهم شيء؟

وجد زمّت شفايفها تشوفه يمد لها الجوال بتنهيده

وكمل كلامه: بكلم فواز يتصرف مع الصحيفة اللي نشرت الصور قبل يشوفها أبوي

وجد: يعني انت مو معصب؟

مشاري سكت يشوف نظرات القلق منها وأشّر على الجوال: مين اللي بالصورة؟

وجد: هاجر

مشاري هز راسه: لأنها هاجر ما عصبت

وجد ابتسمت بخفوت، وكمّل مشاري: هاجر اختي، ترسم حدودها و تفرض احترامها بكل مكان تمرّه، و فواز خويّي وأعرفه

وجد تنهدت براحه: خفت والله

مشاري أخذ جواله يتصل على فواز: خافي من أبوي، ما راح يعدّي فكرة إن صور هاجر منتشره

وجد مشت جنبه تشوفه يمشي باتجاه سيارته ينتظر رد فواز

ونطقت بخوف: بيشوفها أكيد

مشاري ركب السياره: لازم أروح البيت

وقفت تشوفه يشغل السيارة و رفعت صوتها: طمني! بنتظرك بالفندق

أسرع مشاري يتجه لبيتهم يناظر طريقه ثواني و ثواني يناظر جواله ينتظر رد من فواز اللي منشغل عن جواله

تأفف و اتصل على هاجر اللي كانت في المطبخ لوحدها

ابتسمت من انتبهت لاتصال مشاري وردت: ميشو

مشاري: وينك؟

هاجر استغربت صوته: في بيتنا وين بكون يعني؟ وش فيك؟

مشاري شدّ على الدركسون: أبوي صاحي؟

هاجر ناظرت تهاني اللي دخلت المطبخ تاخذ من السلطة اللي جهّزتها هاجر لفطورهم

ونطقت تسأل تهاني: أبوي صحى؟

تهاني اللي لابسه عبايتها متجهزه لدوامها هزت راسها بالإيجاب

هاجر جاوبت مشاري: صاحي، راح ياخذ تهاني للجامعة، ليه تسأل؟

مشاري: أنا جاي الحين

هاجر ابتسمت: تعال افطر معي سويت السلطه اللي تحبها

قطع عليها صوت أبوها العالي: هاجر!

هاجر رفعت راسها باستغراب: هلا يبه

قفل مشاري المكالمه تزامن مع وقوفه قدام بيتهم و نزل يسرع بخطواته للمدخل

بنفس الوقت انفتح باب المزرعة ودخل عناد مع وتين راجعين من مزرعتهم بعد ما قضوا ليلتهم وناموا فيها

مشت وتين شايله بيدها ألبومات تايلور سويفت و بعض أغراضها من غرفتها

والتفت عناد يناظرها: لو تطاوعيني وتبيعين هالألبومات

وتين: اسكت عناد اسكت

ضحك والتفت يسمع الهدوء بالمزرعة: شكل محد صاحي

وتين دخلت تهمس: روح البس لا تتأخر على الدوام

وصلهم صوت وجد: بسم الله من وين جايين!

وتين فزّت، والتفت عناد: كنا بالمزرعة…

وتين قاطعته ترفع الأغراض: جبت أغراض احتاجها

ابتسم عناد ومشى من انتبه للساعة ودخل الغرفة يتجهز للدوام

والتفتت وتين لوجد: وانتِ ما عندك دوام ليش للحين ما رحتي؟

وجد تنهدت: بروح الحين

وتين عقدت حاجبها: صاير شيء؟

صرخ حاتم يدفع هاجر اللي ارتدّ جسدها على الجدار: تسألين وش صاير بعد؟ لك وجه تسألين

تهاني قربت برعب: يبه وش فيك!

قاطعها حاتم يتقدم لهاجر يسحبها من شعرها: وش كنتِ تسوين مع فواز!

بكت هاجر بألم تحاول تبعد يد أبوها عن شعرها وصرخ حاتم بجنون يضربها

دخل مشاري يركض باتجاه هاجر يسحبها من يدين حاتم

ووقفت هاجر خلفه تحتمي فيه برعب من جنون وغضب أبوها اللي صرخ: وخر يا مشاري! وخر

مشاري نفى، وصرخ حاتم بوجهه: وخر خلني اتفاهم معها!

مشاري: تفاهم معي أنا

حاتم رفع الجوال اللي يعرض صورة هاجر مع فواز وصرخ: عاجبك اللي تسويه!

مشاري ارتفع صوته: هاجر ما سوت شيء غلط

رفع حاتم يده يصفع مشاري بكل قوته و لفّ وجهه بجمود وبكت هاجر تشد على ثوب مشاري اللي ما نطق بكلمه

وكمّل حاتم بغضب: ما عندك غيره على اختك؟ ربّيتك كذا يا رخمه؟ تشوف صورتها مع رجّال غريب و تقول ما سوت شيء؟

هاجر ببكاء: كنت اطلب من الكافتيريا ما بيني وبينه شيء والله ما أعرفه حتى

قاطعها حاتم بصرخه: انطمي

دخلت فاطمة برعب من وصلتها أصواتهم: وش فيكم!

حاتم بغضب: فضحتينا! صورك بكل مكان

مشاري بهدوء: بكلم فواز، ما تغيب الشمس إلا و الصور محذوفه

مسك حاتم ياقة مشاري: الحين تنحذف، الحين!

فاطمة تقدمت تسحب حاتم تدري إنه مو بوعيه و الغضب أعمى عينه، تدري إن حاتم له أيام مضغوط نفسيًا من موضوع مرض أبوه و ضغوطات الشغل، تدري إنه من أتفه شيء يثور غضب و يفرّغ عصبيته على اللي حوله

فاطمة: اهدأ، تعوذ من ابليس

تراجع حاتم يمسح وجهه بتنهيده تحت نظرات تهاني اللي تقدمت تمسح على كتف هاجر تهدّيها

وسحب مشاري ذراع هاجر يطلع من المكان ويبتعد عن عيون أبوه

ركب السيارة و ركبت هاجر جنبه بعد ما لبست عبايتها بعجله

ترتجف يدينها و تعيش شعور الخوف من أبوها لأول مرة

التفت مشاري يشوفها تمسح دموعها وتاخذ نفس بين شهقاتها

والتفتت تناظره بين دموعها: مشاري والله ما بيني وبينه شيء

مشاري هز راسه: أدري ما عليك من أبوي هو معصب الحين، ابعدي عن عينه هالفترة لين يهدأ الموضوع

هاجر ببكاء: والصور؟

مشاري ناظرها: بتنحذف! ولو ما انحذفت بحرق اللي صوّرها

مسحت دموعها هاجر تهدّي نفسها والتفت مشاري من وصلته رسالة من وجد اللي دخلت الفندق وجلست بمطعم الموظفين تنتظر وتهز رجلها بتوتر

في مكان ثاني

انفتح باب الغرفة ودخلت تشوفه منحني يربط حبال جزمته

وتقدمت تضربه على راسه بتكرار: يا لعّاب! يا مينون!

ابتعد عنها يمسك راسه بألم: خير!

شموخ التفتت تسكر الباب وناظرته: هاجر اخت مشاري! هاجر يا فواز ما لقيت إلا هالمسكينه

فواز عقد حاجبه بعدم فهم: وش فيها هاجر

شموخ: وينك عن جوالك يا بطل السلّة يا فخر البحرين!

فواز التفت يدوّر جواله بارتباك و أخذه يشوف اتصالات مشاري

يسمع شموخ اللي نطقت: يا ويلك من أبوي والله إن يحشرك وسط السلة

فتح فواز الصورة ووسع عيونه بصدمه ونطق يشتم بغضب، وعقدت حاجبها شموخ تشوفه يتصل على مشاري ويحوم بالغرفة بارتباك

وصله الرد بثواني و نطق فواز: مشاري والله ما

قاطعه مشاري: لا تبرّر، اذا باقي في الخُبر لازم أشوفك

فواز مسح على شعره بتوتر: وينك انت بجيك

مشاري رفع نظراته لمبنى الفندق: تعال الفندق

شموخ نطقت من قفل المكالمه: بتروح له؟ بيذبحك يا مينون

مشى فواز ما يشوف طريقه ولا يسمع اللي حوله كل تفكيره بإنه ورّط هاجر معه، يلوم نفسه على إهماله، ووقوفه مع هاجر بين عيون اللي حوله، ما يدري كيف تخلّى عن حذره و كلّمها و ابتسم لها بمكان عام رغم إنه حذر بالتعامل مع اللي حوله ومُحافظ على سمعته كلاعب مشهور لكن هالمرة كانت غير، كل شيء غير.