اخذ نفس سلمان و نطق وهو يحط يده على كتف مشعل: انا و أخوي بترتاحين منّا قريب شوفي ذو الثنتين

حسناء: ثواني مشعل ندري انه بيخطب بس انت؟

ابتسم و نطق: وانا ناوي اخطب

توسعت عيونهم و كانت ردودهم بين: مين، دانه، دنو؟

هز راسه و نطق: اي بخطب دانه

اعتلت الفرحه ملامحهم و بدو يضموه

نطقت رويدا بعد ما بعدت عنه: و أخوي…موافق؟

سلمان: والله ما ادري

مشعل: معليك ان شاءلله اذا كلمه جدي يوافق

-

↚

فـ مكان ثاني-

طلعت من بيت صديقتها متوجهة لبيتهم

كان الطريق فاضي ومافي احد بحكم ان الوقت صلاة العشاء

فجأه حست بيد تسحبها لمكان بعيد عن الانظار

صرخت برعب لكن كتم صرختها اليد الضخمه اللي انحطت على فمها

اتسعت عيونها بصدمه و خوف وهي تشوف الشخص اللي سبب لها رعب كل طفولتها

صدرها يعلى و ينزل من شدة الخوف، دموعها تنزل وهي تناظر فيه قريب منها و مثبتها على الجدار و يده على فمها

ابتسم ذياب وهو يناظر فـ عيونها: من زمان عن حلوتي لا يكون عجبك بعدي عنك

همهمت وهي تحاول تتكلم لكن يده تمنعها

جمدت لما سمعت صوت الصرخه هي تعرف ذا الصوت اكثر من اسمها

ذياب اول ما سمع صوت فارس تركها وهرب امّا ريم طاحت على الأرض من قوة موجة الخوف اللي مرت فيها

لكن سرعان ما وقفت وهي تصرخ بـ ألم لما سحبها فارس من شعرها: هذي اخرتك يالكلبه هاه!!

نطقت بـ الم و دموعها ما وقفت: فارس لا تفهم غلط الحين

صرخ فـ وجها بـ عصبيه: وش افهم واقفه مع رجال فـ ذي الظلمه و قريب منك كذا

نطق وهو يشد شعرها بقوه اكثر: لو ما جيت الحين وش كنتي سويتي؟ هاه

سحبها معه لبيتهم و دخل دفها على الارض اول ما دخل و قفل الباب

خرجت أم فارس على صوت صرخة بنتها

نطقت بـ صرخ: فارس وش ذا! ليه دفيت اختك

ابتسم بـ قهر و نطق: اسألي بنتك الرخيصه وش مسويه

وقفت ريم و نطقت: والله ما سويت شي هو اللي سحبني هو

سكتو على صوت الباب اللي يندق بقوه و صوت ابو فارس

فتح فارس و دخل ابوه و معه سهم

نطق:  فضحتونا كل الناس تسمع صراخكم شفيكم

فارس قفل الباب و نطق بـ سخريه: شف يبه ذي بنتنا المتربيه الشريفه قبل شوي كانت مع واحد فشارع مافيه الا هم مكان مظلم الله لا يوريك اللي شفت يبه فضحتنا و سودت وجهك بين الناس مين يدري عنها يمكن ذي مو اول مره

نطقت بـ صراخ: فارس لا تتهمني كذا والله انك تكذب هو اللي سـ...

بتر كلمتها الكف اللي لف وجهها من قوته

رفعت وجها وهي حاطه يدها على خدها تسمع صرير فـ اذنها و تحس بـ خدها يحترق

ابو فارس بصراخ: ذي اخرتك يا بنت الذين!

سهم: يبه تعوذ من الشيطان ذي تربيتك شلون تشك فيها

ابو فارس بصوت اعلى: انكتم! اخوك يكذب؟؟

ريم: قسم بالله انه مو صاحي ولا انت صاحي شلون تشكون فيني وانا ما عمري سويت شي

رفع يده بيضربها مره ثانيه لكن سحبتها ام فارس و خلتها وراها

نطقت: فارس! انت وش تقول هذي اختك جنيت انت و ابوك

ابو فارس: بنتك تبي تسود وجيهنا بين العرب وانتي تدافعين عنها

سهم: ياناس مستحيل ريم تسوي شي غلط اكيد فارس مشبّه عليها ومين ذا اللي كانت معه

فارس: اقولك انا جايبها من الشارع بيدي انا لو ماني متأكد ما تكلمت

ابو فارس تقدم و سحبها من ورا امها و دخل داخل وهو يسحبها وراه وكلهم لحقوه

دخل الغرفه و قفلها بسرعه قبل يدخل احد منهم

دق سهم الباب بقوه و نطق: يبه افتح

غمض عيونها لما سمع صوت صراخها و ضرب

جلست ام فارس وهي ماسكه ركبها و دموعها على خدها: الله لا يسامحك بنتي ماتسوي كذا

فارس: يمهه! انا من متى اكذب؟ بنتك شفتها بعيني معه

تقدم سهم بـ عصبيه: ومين معه؟ ها؟ ليه م تقتله لما شفته مع اختك؟ ولا لا تقدر بس على اختك تضربها صح؟

فارس: سهم الزم حدك لا اتوطاك الحين

سهم: جرّب عشان افش حرتي فيك اسمع اسمع صراخ ريم مين يفكها من ابوك الحين؟ والله يافارس لو تطلع تكذب بكلمه وحده والله العظيم اني بنسى انك اخوي و انك اكبر مني

فارس بـ حده: شفت ذي الرخيصه اللي تدافع عنها اقل شي يسوي ابوي يأدبها عشان تعرف طريقها زين

خرج فارس و جلس سهم جنب امه وهو ماسك راسه

مر وقت ما قدر يتحمل صوت صراخها وقف و حاول اكثر من مره يعيد دق الباب لكن اخر حل وصل له انه يكسره لان صوت صراخها قطع قلب امه…

رفس الباب و وقف وهو يتنفس بقوه و ابوه مواصل ضرب فـ ريم

ركض له و لم يديه عليه بحيث يعيق حركة يديه

ابو فارس بـ صراخ: ابعد ياولد

سهم كزّ على اسنانه و طلع ابوه بالقوه وهو يسحبه

رجع لها بسرعه و نطق: ريم ريم

ما كان يطلع منها الا انين خافت

غمض و رفعها عشان تجلس

نطقت ببكاء و ضعف: والله ما سويت شي

ضمها و نطق: اهدي تعالي

وقفها وجلسها على السرير

نطق وهو ماسك يدها: علميني وش صار مين ذا اللي كنتي معه وليه وقفتي جنبه لا تخافي مستحيل اسوي لك شي

شهقت وهي تحاول تجمع الكلام: كنت راجعه فجأه سحبني وقفل فمي…

اجهشت بالبكاء بسبب الغصه اللي منعتها تكمل

سهم: وش بعد، مين هو؟

حطت يدينها على وجها تخفي دموعها: ذ ذياب ولد الجيران

غمّض عيونه وهو يحاول يتمالك اعصابه: كمّلي

ريم: س سحبني وشافنا فارس

حط يده ورا ظهرها و نطق يحاول يطمنها: قفلي الباب عليك و ارتاحي اذا سمعتي صوت ابوي او فارس لا تفتحي

هزت راسها وهي تمسح دموعها و وجهها وجسمها كله كدمات

خرج و نطق: وينه؟

ام فارس وهي تمسح دموعها داخله على بنتها: طلع

خرج من البيت وناظر حوله ما يشوف غير الشياطين تدله على بيت ذياب

وقف ودق الباب

ثواني و الباب ما انفتح وهو يحس بنار تشتعل بداخله

رجع يدق و بعد مُده قصيره انفتح الباب

محمد بـ ابتسامه: ارحب يالسهم هلا فيك

سهم بـ حده: وينه الخسيس ذياب

عقد حواجبه من شكل سهم: ذياب راح قبل شوي

سهم مسكه من ياقة ثوبه ونطق بـ حده: قول وينهه اخوك

محمد مسك يدين سهم اللي عليه ونزلها: شتدور انت ذياب لم اغراضه يقول عنده روحه مستعجل

شد على قبضة يده و ضرب الحيط: الله ياخذه وين راح

رفع كتوفه ونطق : مدري ما علمني حتى قال لاتقول لا احد الا بعد ما اروح

ناظر فـ محمد و أكمل وهو يرفع سبابته: قول له والله لو اشوفه ما بيكون عمره طويل

محمد: وش صاير؟

مشى سهم بدون ما يرد عليه راجع لبيتهم

دخل محمد البيت وهو مستغرب اتصل على ذياب لكن ما رد عليه

مر اسبوع و ذياب محد يدري وينه ولا في خبر عنه

-

نطق بـ عصبيه: وش بينك مع بنت الناس اخوانها يتوعدون برقبتك

ذياب: يبه مو مشكلتي اذا اخوها مجنون انا كنت بكلم البنت

ابو ذياب: تكلمها! عيد وش قلت

غمض عيونه بـ صرب و نطق: انا ابي البنت زوجه لي وكنت بسألها واني بجي اخطبها

ابو ذياب: لا حول ولاقوة الا بالله تبيها زوجه تروح انت وهي تتكلمون فالشوارع، هيا مين يفكك من عيال عمر الحين

تنهد و نطق: ناخذ معنا رجال شيوخ و نروح نخطب وقتها اكيد محد منهم بيقول شي و اكيد انهم مابيفضحو اختهم

هز رأسه ونطق: خابرك رخمه

-

-

كانت جالسه فـ غرفتها و ضامه نفسها

مر اسبوع وهي ما شافت احد من اخوانها او ابوها

حتى امها بس تجيب لها اكل وتطلع

غمضت عُيونها اللي احرقتها من كثر البُكاء

دخلت زوجة فارس معها صحن: خذي كلي

بلعت ريقها بهدوء ونطقت: شكراً خذي اكلك معك مابي شي

مشاعل: كلي لا تموتي علينا حرام تموتي جوع ابي اشوف فارس يقتلك بيده عشان يبرد قلبي

لفت ونطقت بنفس الهدوء: مشاعل اللي فيني مكفيني يرحم امك فكيني من شر لسانك

وصل مسمعها صوت ضحكة مشاعل المستفزه و من ثم كلامها اللي احرق قلب ريم بسبب ان الكل مصدق كلام فارس:وحده تتصلق بعيال الشوارع فنص الليل وتتكلم !

عضت شفتها تمنع دمعتها تنزل و وقفت

نطقت وهي تأشر على الباب: تدلين طريق غرفتك

خرجت مشاعل وهي تضحك وقفلت وراها الباب

جلست بقهر و خلخلت اصابعها بين خصلات شعرها تشده وهي تدعي على ذياب

نزلت دموعها بسبب حالها اللي انقلب و بسبب اخوها اللي أكّد للكل انه صادق وانها كانت ملتقيه مع ذياب

-

-

نزلت متوجة للبيت بعد وصولهم

لفت على صوته يناديها

لفت بـ توتر: هلا

حامد: عطي جدي

اخذت الصندوق منه و مشت بربكه وهي تحاول تنظم انفاسها اللي تسارعت بـ مجرد مناداته لها

دخلت وشافت جدتها تأمر البنات يبدو تنظيف

توجهت للداخل وحطت صندوق ادوية جدها

خرجت و نطقت: فتيمه ما جات؟

ام سالم: قايله لمرت عمك من امس انّا بنجي اليوم عشان ترسلها تنظف لكن ذو الحريم مدري شصاير بعقولهم

دخلت أم دانة و نطقت: هلا والله هلا نوّرنا

بدو يسلمون على بعض

ضمت اصايل دانة و نطقت بـ همس: هلا بعروستنا

بعدت عنها وهي عاقده حواجبها: وش عروسته؟

ابتسمت و نطقت: بعدين اعلمك