دقايق وقامت حنين من حست بتأخر الوقت والتفتت لوتين

و سألت الجدة: بترجعون؟

وتين تقدمت تسلم عليها: تأخرنا لازم نرجع

حصة ناظرت التوأم بابتسامه: انتبهوا لدربكم وردّوا الزيارة عاد

وجد بضحكة: بيردّونها مالهم فكه مني!

وتين مشت تمدّ القطوه لوجد وهمست: ارسلي لي مقاساتك انتِ والبنات

وجد شالت القطوه وابتسمت: لا تتعبين نفسك كنت أمزح

وتين نفت: ودّي أصمم لكم

ابتسمت وجد بامتنان، وطلع عناد شايل شنطته على ظهره ومشى متجه لبوابة المزرعة

وأشّرت غاليه: عناد جابك الله، اطلع مع التوأم لا يمشون للمزرعة لحالهم

هز راسه عناد ومشى بعد ما ودّعهم ومشت حنين وبجنبها وتين تشوف عناد يفتح باب سيارته يركّب أغراضه

وانتبهت وتين للولاعة اللي طاحت منه وتقدمت تشيلها من الأرض

ونادته: راعي الجي كلاس

التفت عناد يصحّح اسمه: عناد

وتين مدّتها له: راعي الجي كلاس

تقدم بياخذ الولاعة وابعدت وتين يدها: غيرت رأيي

رفع عناد حاجبه يشوفها تحط الولاعه بشنطتها: وش تبين بها؟

وتين مشت تتعدّاه: بولّع بها شمعاتي

ابتسم عناد وركب السيارة وعينه على وتين اللي التفتت تشوفه

يشغّل أنوار سيارته ينوّر لهم طريقهم

وغمضت وتين عيونها من رفع النور بوجهها بتكرار وصدّت

ومشت تناظر حنين اللي سبقتها كم خطوه والتفتت من حست باقتراب سيارة عناد اللي يمشي جنبها بهدوء يجاري خطواتها

فتح الشباك يمد يده: ولّاعتي

وتين مدّت يدها: اللافندر أول

ضحك عناد من فهم انها تقصد غصن الخزامى اللي في جيبه

و نفى: الشيء اللي أخذته ما يرجع

وتين هزت راسها: وانا بعد

سكت عناد يناظر طريق المزرعة اللي قرّبوا لها

والتفتت له بتردّد تأشر على سيارته: كيف جبتها؟ الجي كلاس

عناد ناظرها ورفع أكتافه: اشتغلت و جبتها

وتين: يعني ما كانت حلمك؟

عناد ناظرها بغرابة: لازم تكون حلمي عشان أجيبها؟

وتين خفّفت خطواتها وسألت: أجل وش حلمك؟

صدّ عناد يتكرّر سؤالها بعقله، يناظر طريقه بشرود يجهل إجابته

يجهل حلمه، يجهل ماضيه وحاضره ومستقبله، يجهل حتى نفسه

كل اللي يعرفه إنه دفن نفسه وأحلامه وسط رماد ذاكرته

نفى عناد: ما اعترف بالأحلام

ناظرته وتين بصدمه: ليه؟

عناد ناظرها: الأحلام كذبه مالها واقع ولا حقيقه، عباره عن أوهام…

وتين بإنفعال: لما يصير عندك حلم تعيش عشانه مو وهم

سألها عناد: وش حلمك؟ الجي كلاس؟

وتين لمست نبرة الاستهزاء بصوته: أكيد، تحسب كل الناس ما عندهم حلم مثلك؟

وقف عناد سيارته ووقفت وتين تزامن مع وقوفه تناظر جموده

ناظرها ثواني، ومشى يتعداها تاركها واقفه تناظر ابتعاد سيارته عن المكان

عقدت حاجبها ومشت لباب المزرعة: معتوه!

كان معتوه بالنسبة لوتين اللي عاشت حياتها على قيد الأحلام

كانت تحلم عشان تعيش، أحلامها هي الدافع اللي يخليها تعيش

و نبرة الاستهزاء من عناد كانت مُستفزة، باردة ومُحطمة لها

تنهدت والتفتت لصوت حنين: وتين! سيارة شدّاد موجودة

وتين أسرعت بخطواتها تدخل ووقفت مكانها تشوف سيارة شدّاد واقفه داخل المزرعة

أما عند عناد اللي مسك طريق الخبر بشرود

تردّد صدى آخر كلماتها براسه وشدّ على الدركسون بيده

كلامها كان مثل الصفعة اللي خلّته يستوعب مدى فراغه

فارغ من الذكريات، فارغ من الأحلام، فارغ حتى من الشعور

كل اللي يشعر فيه إن صدره امتلأ بحروق مجهوله، يحس بلهيبها

نار تشتعل فيه وما قدر يطفّيها، يمكن لو ودّه يحلم

بيحلم إنه يقدر يطفّيها و تبرد دواخله.

مشت وتين تفتح باب البيت تسمع صوت الهدوء ووراها حنين اللي تناظر حولها بقلق، تقلقهم فكرة وجود شدّاد بالبيت في غيابهم، تمرّ في بالهم مليون فكرة أولها إن هدوء شدّاد هو هدوء ما قبل العاصفة

دخلت وتين ووقفت مكانها تشوفه جالس بالصالة وبيده ايباده

يعقد حواجبه يدري بوصولهم للمزرعة ويسمع صوت خطواتهم

ناظرته وتين بجمود ومشت بتصعد غرفتهم ومشت وراها حنين

شدّاد بهدوء: على وين؟

وتين التفتت له: انت جيت؟ ما انتبهت لك

شدّاد رفع عيونه لها، يشوفها تتصنّع اللامبالاة بملامحها

ترك ايباده بهدوء، ورفس الطاولة اللي قدامه ينثر زجاجها على الأرض

وتقدم لها بعصبية: والحين؟ انتبهتي؟

وتين ناظرت الزجاج تبعد عيونها عن نظرات الحدّة منه

شدّاد صرخ: وين كنتوا؟

حنين ردّت باندفاع: كنا نتمشى بالبحر

شدّاد رفع حاجبه: تتمشون بهالليل؟

ناظرته وتين بدون ردّ، وتقدم شدّاد يعدم المسافة بينهم

و مسك ذراعها يغرس اصابعه: اروح وارجع اخر الليل ألاقيكم طالعين؟ انا ما قلت لا تتعدون باب المزرعة؟

حنين تقدمت تبعد وتين عنه، ودفعها بصرخه: نسيتوا مين أنا وتمرّدتوا، خليتكم يومين وحسبتوا الدنيا على كيفكم

وتين تجاهلت ألم ذراعها: دقيقه، مين انت؟

صفعها وشدّ شعرها ينفث سمومه: أنا اللي ضفّيتك انتِ واختك ولا كان عشتوا عيشة شوارع

وتين قاومته تبعد يده عنها: عيشة الشوارع أرحم من العيشه معك

شدّاد تقدم بيضربها ووقفت حنين تمنعه ونطق شدّاد: أنا ما عرفت أربيكم

وتين بحدّه: مين انت؟ مين انت؟

شدّاد دفع حنين عنه ومسك وتين من ذراعها يرميها على الزجاج

قاومت وتين الألم ورفعت راسها تكمل كلامها: مالك وجود بحياتنا، ولا لك سُلطة علينا، ما شفنا منك خير ولا لنا عندك حاجة

شدّاد نزل لمستواها يناظرها بجنون، ويسمع جنونها اللي تسرده بدون خوف منه

ناظرته وتين بتحدّي، تلقط أنفاسها وتحس بلسعة الزجاج على كفوفها اللي متسنّده عليها

تقدم شدّاد يمدّ يده لخدها بهدوء، يطبطب على خدها بتكرار: لكم عندي حاجة، وبدون خيري ما تعيشون، محد معيشكم ويأكّلكم ويقضي حاجاتكم غيري

كرّرها يصفع خدها: حاجاتكم

ناظرته وتين بحدّه وقام شدّاد والتفت لحنين اللي واقفه تناظر بعيون دامعه، تحس باختناق أنفاسها وخمول أطرافها

ووقف شدّاد يهدد: هذي اخر مره أحذّر، لا تتعدون باب المزرعة

ومشى لغرفته يصفع الباب خلفه، وانهارت حنين اللي تقدمت تحضن اختها

وتين رفعت يدينها عن الزجاج تبعد حنين: انتبهي لا تنجرحين

حنين ناظرت الدم بيدين اختها وقطع الزجاج المنغرسه بجلدها الناعم

وطاحت دموع حنين: انجرحتي!

وشهقت حنين بين دموعها تكمل كلامها: يدينك كلها دم

وتين عقدت حاجبها تشوف انهيار حنين، شهقاتها المتكرره وصوتها المكتوم

وتقدمت وتين تهدّيها: خذي نفس! حنين تنفسي

حنين تنفست بين دموعها وقامت وتين تنفض الزجاج عنها

و مشت تلمّ الزجاج بيدينها، وفزّت حنين: انتبهي!

وتين شالت الزجاج ومشت تنثره قدام باب غرفة شدّاد، تحرص إنها تكون على درب رجوله متأمّله يذوق المرّ منها مثل ما ذاقته

و تقدمت تحضن حنين اللي ما زال الغضب ينهش جوفها ونار قهرها ما طفت

مثل نار وتين اللي تحس بلسعاتها مو بس بقلبها حتى بيدها

جلست على سريرها تنتف الزجاج من يدها بجمود ملامحها وبجنبها حنين اللي مسحت المعقم على جروح وتين

وتين نطقت بشرود: مالنا عنده حاجة

حنين ناظرتها بصمت، وكملت وتين كلامها: عشنا عمرنا ندوّر حاجتنا، حاجتنا اللي هو حارمنا منها

لمعت عيون حنين تسمع اختها تلفظ آلامها على هيئة حروف

حروف انحبست بصدرها سنين، حروف انقالت بعد ما طابت نفسهم وانهارت جبال تراكماتهم

وتين نطقت بقهر: حرمنا من الحياة، ما عرفنا معه طعم الحنية والحب لين صرنا ندوّره عند الغريب

وتين وقفت ترمي الشاش اللي بيدها: كسر أجنحتنا، كسرها عشان نحتاجه!

طاحت دموع حنين تستوعب مدى خيبتهم وتعاستهم

وتين رفعت كفوفها المجروحه تناظرها بصمت، وكملت كلامها بقهر: بس ما يدري إني راح أخيط الجناح ولو إن يديني داميه، و بنطير لأبعد مدى ولو عكّر سكون السماء ريح

مشت وتين لمكتبها تنثر خيوطها وأقمشتها على الطاولة وختمت كلامها: إذا ما صار لهالوضع نهايه، أنا نهايته!

مرّت ساعات الليل الموحشه بكل ثقل، ينتشر السكون بزوايا المزرعة ما عدا صوت المقص اللي قصّت فيه وتين القماش

تركت المقص بهدوء والتفتت تسرق نظره لحنين اللي استسلمت للنعاس ونامت بتعب بجنب اختها

وتين تنهدت والتفتت تناظر رسوماتها والتصاميم اللي سهرت عليها

والتفتت تفتح جوالها تناظره بتركيز، تنفّذ اللي ببالها رغم النعاس والصداع، ورغم لسعات جروحها وحريق جوفها، ما رفّ لها جفن ولا هدأ لها بال، تتكرّر سموم شدّاد بمسامعها ويشتد غضبها

مثل عناد اللي فتح باب بيته وقفل الباب بكل قوته ومشى يدخل يشد على المفتاح بيده يعبّر عن غضبه رغم هدوء ملامحه

شغل الأنوار والتفت يناظر الأثاث اللي ما زال جديد والصناديق اللي بكل زاوية، يناظر بيته اللي تعب واشتغل عشان يشتريه بعد ما عاش أغلب سنين عمره بمزرعة راجح

رمى مفتاحه ومشى يفتح الصناديق وينثر أغراضه، ما زال داخله يحترق من أخر كلمات وتين له، ما زال يفكر بأحلامه المجهوله

رفس الصندوق بغضب، شال بدلة الدفاع المدني ورماها، مشى للرفوف اللي تراكمت عليها أوراقه وكتبه بعشوائيه ومد ذراعه يطيّحها على الأرض

رمى نفسه على السرير بتعب يناظر السقف ويلقط أنفاسه

بنفس الوقت اللي كانت وتين ترسم وتخيط أحلامها بوسط ظُلمة غرفتها، كان عناد ينثر خيباته و ينبذ أحلامه الضايعه وحياته المجهوله

يوم جديد ونهار جديد، بعد قسوة الليلة الماضية على قلوبهم

حنّت الشمس ونوّرت ظلام الغرفة اللي امتلت بالأقمشة

تحركت حنين بانزعاج والتفتت لضجة اختها اللي ما نامت

فزّت حنين وشهقت: وتين ما نمتي من أمس؟

وتين اللي لاهيه تعلّق العبايه وتحطها داخل الكيسه المخصّصه لها

هزت راسها: ما جاني نوم

حنين التفتت تناظر العبايات الثلاث اللي علّقتهم وتين، وناظرت الساعه بصدمه: قرّب يأذن الظهر

وتين رفعت العبايه بشرود: تحسين ذوق وجد؟

حنين ناظرت العبايه وابتسمت: حتى لو مو ذوقها بتحبها

علّقتها وتين وتراجعت تناظر انجازها بتفكير، و أخذت جوالها تشيّك عليه تحت نظرات حنين اللي استغربت حال توأمها وانشغالها

قامت حنين للحمام تاركه وتين شارده بتصاميمها

وصلها صوت شداد اللي ينادي، تسمع ضجته تحت وشتايمه

مشت وتين تفتح باب الغرفه ونزلت تتبع صوت شداد المعصب

ابتسمت وتين تشوفه جالس على الأرض ينتف الزجاج من رجوله الحافية

رفع راسه شداد يشوف ابتسامتها: تبين اكسر وجهك؟

نفت وتين: تنكسر اليد اللي تكسرني

شداد قام بيهاجمها وعقد حاجبه بألم من حس بالزجاج برجوله

وصرخ: ليش ما نظفتوا الأرض عقب أمس

وتين: كنت مشغوله انتف الزجاج من يديني

تأفف شدّاد ووصله صوت جواله اللي يرن: انا طالع بعد شوي! لا اشوفكم طالعين من المزرعة تفهمين؟

وتين سفهته والتفتت تصعد وقفلت باب الغرفة بانزعاج من صراخه، ورجعت تنشغل في تصاميمها وعباياتها

ووصلها صوت حنين اللي تنشف شعرها: وش يبي شداد يصارخ

وتين: وطت رجله على زجاج أمس

حنين ضحكت، والتفتت تناظر انشغال اختها وسألت: وش ناويه عليه؟

وتين سكتت ثواني وابتسمت: بسوي لي براند

جمد وجه حنين بصدمه: صادقه؟

وتين هزت راسها: ما هو براند وبس، هذي الأجنحة اللي راح نطير بها من هنا

ناظرت حنين توأمها بعدم تصديق، تشوف الاصرار بعيونها الناعسه وتشوف اثار السهر والتعب المرسوم بملامحها

وقرّبت تلم وجه وتين بين كفوفها: اثق فيك

وتين ابتسمت تناظر لمعة عيون حنين: الأحلام اللي تسمعيني أردّدها لك كل ليلة بدون ملل، بنعيشها

حنين طاحت دموعها، وحضنتها وتين: طال الزمن أو قصر بنعيشها

حنين ابتعدت تمسح دموعها واخذت نفس تهز راسها: ان شاء الله

والتفتت تسمع صوت سيارة شدّاد يغادر أسوار المزرعة كعادته

وتنهدت حنين تطلع من الغرفة: بسوي لنا فطور

وتين التفتت تلمّ عباياتها وأغراضها وطلعت من الغرفة، تدلّ طريقها للمستودع الخارجي، دخلت تترك الأغراض على الأرض وتكتفت تناظر المكان بتفكير

شمّرت أكمامها ترتب المكان وتسحب الصناديق للزاوية، الصناديق اللي تحمل جواتها صور وكتب، ألعاب وتماثيل ثمينة، جرائد وأشرطة مُسجلة

تقدمت تناظر الجريدة القديمة وقرأت عنوانها بفضول واللي كان "خالد عبدالرحمن: خاويت الليل من أجل الحب"

رفعت وتين حاجبها تاخذها: مخاوي الليل!

مسحت الغبار عن الجريدة ومشت تحطها مع أغراضها

وانشغلت بتنظيف المكان، شالت المانيكان تحطه بجنب مكتبها اللي رتّبت فوقه دفاترها وألوانها، تخطط بإنه يكون مكانها ومكان أحلامها مع توأمها، بين بقايا الحريق وتراكم الرماد، بين شقوق جدران المستودع راح تنسج خيوط آمالهم، وتنثر الثلج على حروقهم، و تمسح الغبار عن رفوف حياتهم القاسية

التفتت لصوت حنين اللي دخلت شايله بيدها صحن العسل وكيسة الخبز

وناظرت المكان بذهول: بتسوين تصاميمك هنا؟

هزت راسها وتين: شدّاد نادر يدخل المستودع وباخذ راحتي هنا اكثر من الغرفة وعشان ما ازعجك وانتِ نايمه

نفت حنين وتقدمت تجلس: ما تزعجيني، تدرين وش كثر أحب اتأملك وانتِ تصممين لين يغلبني النعاس

ابتسمت وتين وناظرت صحن العسل ورفعت عيونها لحنين بتساؤل: عسل؟

حنين رفعت أكتافها: المطبخ فاضي، شدّاد شال كل شيء

وتين ضحكت: يسوي كذا عشان نضطر نحتاجه ونطلب منه

حنين غطّت قطعة الخبز بالعسل ورفعتها لوتين: نحتاجه؟

وتين جلست قدامها تأكل من يد اختها: حلم ابليس بالجنة!

ضحكت حنين وشاركت اختها صحن العسل، مو بس صحن العسل

تشاركوا أحلامهم، آلامهم، وأفكارهم، تشاركوا الضحكة والدمعة، الجرح والعلاج، تشاركوا حتى الملامح والأطباع

التفتت حنين لرسالة وجد اللي صوّرت لهم جلستها بحديقة المزرعة وابتسمت تقرأ كلماتها لوتين "تجون تفطرون معي أنا وكاتي؟ هاجر وتهاني نايمين وسحبوا علي"

وقفت وتين بحماس والتفتت تشيل العبايات اللي صمّمتها: قومي نروح، لازم أعلمها عن فكرة البراند

تلاشت ابتسامة حنين من تذكرت شدّاد وجنونه وتهديده لهم ليلة أمس

حنين بتردّد: و شدّاد؟

وتين سألت: شدّاد مين؟

ابتسمت حنين ومشت مع وتين يتجهزون مثل وجد اللي فزّت من قرأت ردّ حنين "سخّني الخبز"

مشت للمطبخ بابتسامه، سخّنت الخبز وجهزت إبريق الشاهي والتفتت تدوّر النعناع تدري بحُب وتين له

مشت تنبّش بالثلاجة تدوّره وتأففت بهمس: خلّص!

وصلها صوت مشاري العالي: يا وجد حالي!

وجد فزّت ومسكت قلبها: الله لا يبارك بعدوك

مشاري تسنّد على الثلاجة يدندن: يا وجد حالي على اللي صار لي مده ما شفت زوله

وجد سفهته، وسأل مشاري: وش تدوّرين؟

وجد ناظرته: نعناع بس ما لقيت، بالله مشاري اقطف لي من زرع أمي حصوص

مشاري بضحكه: عشان تزرعني جنب النعناع

وجد عقدت حاجبها: بالله ميشو بس غصن واحد

نفى مشاري وتقدم يناظر صينية الفطور ومشت وجد تشيلها قبل لا توصلها يده: وخر! التوأم بيجون

سبقها يسرق قطعة الخبز من الصينية وهرب يختفي عن أنظارها

و طلع مشاري يمشي بين أشجار المزرعة يناظر حوله

ثبّت قطعة الخبز بين أسنانه ونزل لمستوى الزرع يقطف من النعناع

أما وجد رتّبت السفرة وقامت من وصلها صوت الباب ومشت تفتح الباب للتوأم اللي حضنوها

وشهقت وجد تشوف وتين شايله بيدها أكياس العبايات: سويتيها!

وتين مشت بضحكه: تعالي عندي لك موضوع!

مشوا متجهين لجلستهم في الحديقة ووقفت وجد بصدمة تناظر كومة أغصان النعناع على السفره

فتحت حنين فمها بصدمه: وجد!

وضحكت وتين: قلت أحب النعناع بس مو كذا!

وجد تلفتت حولها: والله مو أنا

حنين: أجل مين؟

وجد حكت جبينها: مشاري

مشاري اللي نفض يده و مشى لبيت الشعر يجهّز شبة النار

يدري بقومة الجد راجح هالوقت وجلسته فيها كالعاده، أخذ دلة القهوة بعد ما ملأها بالمويه وثبّتها فوق النار وتسنّد ينتظر غليانها

والتفت لصوت الجد: مشاري

مشاري فزّ: سم

راجح دخل ومشى يجلس: مين اللي مع وجد في الحديقة

مشاري: بنات المزرعة اللي جنبنا

هز راسه راجح بتفكير والتفت له: لا جاء بكره أبيك تروح للمزرعه وتعزم أبوهم عندي

مشاري نفى: ماهو أبوهم، سمعت انه خالهم

راجح: ما يخالف وأنا أبوك المهم نوجّب الجار، نتقهوى معه ونعرف وش هو من رجّال…

مشاري: أبشر

تسنّد راجح بتنهيده: وين اخوانك؟

ابتسم مشاري من فهم انه يقصد تميم وعناد: تميم نايم وعناد في الخبر

راجح: مشى ما وادعني!

مشاري نفى: بيرجع اليوم

راجح سأل: متى؟

مشاري ناظر ساعته: ظنتي انه في الطريق الحين

كان فعلًا في الطريق للمزرعة بعد دوامه المُتعب

يصدح صوت خالد عبدالرحمن بسيارته ويناظر الطريق بشرود

ثواني وهدأ سرعته يشوف الشخص اللي واقف بالشارع ويأشّر

وقف عناد وفتح الشباك: بغيت شيء يا أخوي؟

تقدّم الشخص: ايه والله، بنشر الكفر عندي

عناد فكّ حزامه ونزل يناظر الكفر بتفكير: وين رايح؟

الشخص اللي كان واضح عليه العجله: الدمام، ولازم ألحق على زوجتي تعبانه

عناد التفت يناظر حالته، كان متوتر وجبينه متعرّق رغم برودة الجو

عناد سأل: وش اسمك؟

الشخص بقلّ صبر: شدّاد، شدّاد

عناد هز راسه وأشر: استرح يا شدّاد، عندك كفر احتياطي؟

شدّاد هز راسه: عندي

رن جوال شدّاد وابتعد عن عناد يرد على جواله

والتفت عناد يفحص الكفر ويسمع صوت شدّاد المتوتر

نزل عناد لمستوى الكفر يصلّحه ويبدّله ببراعة

دقايق وانتهى والتفت لشدّاد: تقدر تمشي الحين

شدّاد هز راسه وركب السيارة بعد ما شكره وتراجع عناد ينفض يده وركب سيارته يكمل طريقه للمزرعة

بنفس الوقت اللي مدّت وتين العبايه لوجد: جربيها مقاسك ولالا

وجد لبستها وابتسمت حنين تشوف العبايه اللي ناسبت وجد وفاقت توقعاتهم

وجد بامتنان: تجنن الله يسلم هاليدين

وتين بابتسامه: قررت أسوي لي براند

وجد شهقت: كذابه!

حنين ضحكت: ما نامت من أمس تفكر وتخطط

وجد فزّت بحماس: بقوم أجيب لابتوبي ونسوي لك دراسة جدوى كاملة ونصمم الموقع والشعار مافي وقت

ضحكوا التوأم على وجد اللي أسرعت بخطواتها للغرفة

ثواني وطلعت من غرفتها بيدها جهازها والتفتت لتميم اللي طلع من غرفته و يلبس جاكيته

وجد باستغراب: صاحي هالوقت وش عندك؟

تميم: عندي تدريب للبطوله

مشت وجد وراه: ليش ما تتدرب هنا بالاسطبل

تميم: لازم أروح للنادي وباخذ معي الرعد، انتبهي للاسطبل ولا تتركين الأنوار مفتوحة

طلع وطاحت عينه على التوأم وابتسم يلوّح لهم من بعيد وكمل طريقه للاسطبل بخطوات متسارعة

تحت نظرات حنين الفضوليه تشوفه ينط السياج ويصفّر للرعد

وجد جلست والتفتت لهم: ما ظنتي بنلعب مع الرعد اليوم، تميم عنده تدريب بالخبر

حنين بفضول: متى البطولة؟

وجد رفعت أكتافها: اتوقع الاسبوع الجاي بس باقي ما تحدّد الموعد

هزت راسها حنين والتفتت تشوف انشغال تميم مع مشاري اللي طلع يساعده بنقل الخيل بالسيارة المخصّصة له

وتقدمت وجد تجلس بينهم تفتح لابتوبها: والحين نرجع لموضوعنا

دخل عناد بسيارته من انفتحت بوابة المزرعة ووقّف يشوف السيارة الكبيرة اللي عند الاسطبل

نزل يعدّل نظارته الشمسيه ومشى للاسطبل يسمع ضجّة تميم ومشاري

تراجع مشاري من صهل الرعد بوجهه وطاح وارتفعت ضحكات تميم اللي يربط لجام الرعد

مشاري ناظر الجرح بذراعه وتأفف: والله يا خيلك نفسيه!

التفتوا لضحكات عناد اللي تسنّد على السياج: كيف طعم الرفسه؟

مشاري قام ينفض الغبار عن ثوبه: عاد انت متعود عليها ما يحتاج تعرف

لوّح لهم تميم اللي ركب السياره: يالله أنا ماشي دعواتكم

هز راسه مشاري ورفع عناد يده يلوّح له

والتفت مشاري من مشى تميم: يجي واحد ويروح الثاني، أبوي راجح يسأل عنكم من الصبح

عناد ابتسم: ببدّل وأجي، اغسل جرح يدك لا تشوفه أمي حصوص

مشى عناد لمدخل البيت والتفت من وصلته أصوات البنات

يشوف وجد اللي ترفع غصن النعناع قدام وتين: هذا نعناع وهذي عبايه فيه فرق!

وتين رفعت حاجبها: طيب وش فيها اذا سمّيت البراند نعناع؟

عناد ابتسم بخفوت وصدّ، ومسكت حنين راسها: بتصدّعني هالبنت

وجد التفتت من انتبهت لمشاري اللي ماسك ذراعه بألم: تعال تعال وش مهبّب؟

مشاري دخل البيت: لحد يكلمني

وتين طاحت عينها على عناد اللي نطق: الرعد رفسه

ضحكوا وناظر عناد ابتسامتها والتفت يناظر أكياس العبايات واللابتوب اللي بين يدينها

صدّت وتين من تذكرت حوارهم الأخير ليلة أمس وكلماتهم وكشّرت

ودخل عناد من انقطع تواصل نظراتهم ومشى لغرفته يدلّك رقبته

مثل وتين اللي تسندت تدلّك رقبتها: تعبت ما توقعت الموضوع مُعقد كذا

حنين ابتسمت: نتعب عشان نطير ولا نسيتي؟ قلتي لي ان هذي أجنحتنا اللي بنطير بها صح؟

وتين سكتت تفكر بكلام اختها، وفزّت: عرفت وش راح يكون اسم البراند

وجد اللي كانت مشغوله باللابتوب: وش؟

وتين ابتسمت: جَناح، بسمّيه جَناح

ابتسمت حنين، وكمّلت وتين تشرح بشغف: وأبغى الشعار رسمة أجنحة وحولها خيوط

وجد ناظرتها وعلامات الاعجاب مرسومه بملامحها

وتين ناظرتها تختم كلامها: و أبغى الثيم كله ريش، ودي البراند يطير وأطير معه

وجد ابتسمت، ونطقت حنين: بس المشكلة كيف بنرسم الشعار كذا؟

وتين رفعت أكتافها: أنا تخصصي ارسم عبايات وفساتين بس

وجد قاطعتهم: الشعار عندي لا تشيلون همه

وتين بتساؤل: كيف؟

وجد ابتسمت: هاجر تعرف ترسم

حنين بذهول: هاجر رسامه؟

هزت راسها وجد: تحب ترسم بالأيباد أكثر، بتنبسط لو طلبت منها ترسم الشعار

وتين حضنت وجد بامتنان: يا الله شكرًا وجد

تسندت وجد بتنهيده: باقي نعتمد الموقع ونطلّع لك وثيقة عمل حُر

وتين عقدت حاجبها: كيف أطلعها؟

وجد بتفكير: بتّال يعرف هالأشياء بس انه في رحلة عمل ومشغول

وتين باحراج: لا تشغلينه، ببحث عنها وأشوف