مسك فهد يد جوري الراجفه و لبسها الدبله و اخيراً حب حياته و طفولته صارت حلاله

ابتسمت جوري مسكت يده و بيد راجفه لبسته الدبله لاحظ رجفتها و ابتسم مد يده ليدها و تقدم يقبلها ابتسمت جوري بخجل و تقدم فهد يشبك اياديهم مع بعض

ام مشاري ابتسمت وهي جالسه تشوف الحب بعيون ولدها: الله يهنيكم يارب ، يالله تعالوا قطعوا الكيك

تقدموا يقطعون الكيك حطت جوري يدها فوق يد عوض و بدوا يقصون و يصورونهم

لجين بهمس : ياعمري واضحك قد ايش مبسوطه

جود : اي و واضح بعد انها مستحيه حيل شوفوها

ضحكوا البنات على خجلها و التفتوا لليان اللي بالها كان مشغول

العنود : ليلي فيك شي

هزت راسها بالنفي و مسكت جوالها تدور رقم سلطان بالقروب و بعد مده لقته و كانت متردد ترسل له او له تشجعت و رسلت له

ليان : سلطان ما كان قصدي الطراق بس الشي ذا غلط مره وخفت اول شي جاء في بالي و فكرت فيه علشان أبعدك هو ذا الشي اسفه مو بالقصد و مارضى زعلك و ما أرضى أضربك اسفه مره ثانيه بس الموضوع كان مستاهل الموضوع مو بالسهوله اللي انت تحس فيها

تركت تلفونا و جلست تناظر جوري و فهد و فرحتهم و ابتسمت لهم سمعتك صوت جوالها و كان رساله من سلطان

سلطان : معك حق الشي ذا غلط مو بالقصد اسوي الشي ذا مو انتِ اللي لازم تعتذرين أنا اللي لازم اعتذر لك و أقولك اسف و اسف على الكلام إذا ضايقك او جرحك و أوعدك الحركه ذي ما أعيدها إلا بالحلال ابتسمت من قرأت الجزء ذا و كمل سلطان :بس ابيك تفهمين مشاعري لك ، ليان أنا من شفتك بالمجلس وانا مغرم فيك و حابك و اخذتي باللي و تفكيري و آسف إذا ضايقتك

قرت الرساله و اكتفت بالابتسامه و عدم الرد

بعد فتره طلع فهد لمجلس الرجال و بدأ مجلس الحريم يفضى شوي شوي و مابقى غير أهل البيت

بمجلس الرجال دخل عبدالرحمن : السلام عليكم يا عرب

وقف الكل يسلم عليه و يتحمد له بالسلام و جلس عبدالرحمن : وش صاير كلكم مرسمين

ضحك ابو وليد : العلم يقولك ان اليوم كانت ملكه جوري و فهد

ناظر عبدالرحمن فهد بصدمه : انتم صادقين

الجد : لا جالسين نلعب عليك

ضحكوا على كلام الجد وقف عبدالرحمن يسلم على فهد و يبارك له و يحضنه

ابو رنا : علامك انصدمت

عبدالرحمن : انلخمت على خبري جوري صغيره

ابو وليد ضحك : صارت مرا

عوض : خبرك قديم يا عبدالرحمن

عبدالرحمن جلس : اي والله

الجد : جاي زياره ولا خلاص جالس هنا

ابتسم عبدالرحمن وبتنهيده : خلاص جالس هنا ولا طالع

ابتسم الجد بفرحه احفاده و عياله حوالينه من جديد كان ناقص المكان حبيبه عمره و زوجه و صاحب كل دروبه فاطمه تنهد و ترحم عليها من داخله

عبدالرحمن : ابي ادخل أشوفهم شوفوا لي طريق

وقف خالد يبلغ الحريم و بالفعل الحريم كانوا مبدلين ملابسهم و جالسين يتقهوون بعد ما راحوا الحريم بعد مابلغ خالد الحريم طلع الجد مع احفاده و عياله لداخل البيت للمجلس

الجد : السلام عليكم

الكل : وعليكم السلام

عبير : حياكم يبه

عند شوق اللي كانت تسولف مع جوري عن العجوز اللي كانت بتخطب ليان

شوق: حقيره والله العنود ما خلتها

جوري : كفوا عنودي

شوق التفتت لدخولهم و جلوسهم : اي وا... صرخت و بدت تركض لعبدالرحمن اللي فتح يده لها

وحضنته : عبدالرحمن وكملت ببكي : اشتقت لك قلتلي ماراح تطول ليش طولت

عبدالرحمن ضحك : خلاص راح اجلس عندكم إذا مشتاقه لي كذا

ابتعدت عن حضنه و حط يده على كتفها يمشي معها وقالت : امانه

عبدالرحمن هز راسه : والله ، بعدي شوي عطي الباقين حقهم و راح اجلس جنبك بس اسلم عليهم ابتعدت عنه وبدا يسلم على اخته و بنات اخوانه ، ناظر ابو وليد شوق و قال بضحك : الحين هذا عبدالرحمن الصدقي لا تخافين

ضحك عوض من فهم مقصده و صدت راسها بخجل

عبدالرحمن جلس جنب شوق ضحك : ليش في عبدالرحمن كذبي

هز راسه الجد بالنفي

عبير بفرحه : جالس جالس ولا أسبوع و ماشي قول الصدق

عبدالرحمن و هو حاط يده على كتف شوق و راسها بحظنه : لا المره ذي صدق صدق

ناظر عبدالرحمن جوري : مبروك الله يتمم لكم على خير

جوري بخجل : الله يبارك فيك

عبدالرحمن : اي وش مسوين ، وش مسويه الحياه معكم

التفتت له شوق و بحماس : تخيل اني انقبلت طب

قعد يتخيل عبدالرحمن: تخيلت

ضربته على يده شوق : انقبلت صدق

عبدالرحمن فز: صدق والله

هزت راسها و تقدمت يحضنها و بادلته الحضن

عبير تقدمت له بالقهوه : احط لك عشاء ولا متعشي

عبدالرحمن: لا الحمدالله تعشيت كانت النيه أتعشى معكم لكن ماكتب

↚

عند ليان اللي ارتبكت اول ماشفت سلطان و تذكرت كلامه و الموقف اللي صار بينهم شتت أنظارها بعيد عنه ، كان جالس يناظرها و حس بندم انه تقدم خطوه زياده عن اللزوم و جلس يلوم نفسه

بدأ الكل يستأذن ينام و يعلن نهايه اليوم السعيد و بقي العيال و البنات بالمجلس

سيف بتنهيده : ابي فعاليات اي شي

عوض : وفعاليات اليوم مو كافيه

هز سيف راسه بالنفي

غلا : طيب ايش رايكم نجلس بالحوش و نسوي شي نأكله و نلعب ألعاب

شوق : موافقه

عبدالرحمن: وانا مع شوق

جود : عمي كأنك تحبها زياده عننا

ضحك عبدالرحمن: راح احبك انتِ زياده لأنك قلتيلي عمي

ضحكوا و قالت جوري : أنا الصراحه تعبانه ابي انام من الصباح جالسه ماقدرت انام

ناظرها فهد ابتسم : أسم الله عليك من التعب

ضربه عوض بالمخده : درينا انك تحبها و تخاف عليها

مسك فهد المخده وضحك و تقدمت جوري لغرفتها تنام وقال فهد : يالله حتى أنا اعلن استسلامي سلام

لمار : قرروا من الحين ايش تبغون نسوي علشان لايصير ازعاج

جود : نطلب قهوه وحلا

عبدالرحمن هز راسه بالنفي : لا لا نسوي هنا اسرع

شوق : اي صح ليش نطلب وانا عندي كل الاغراض

لجين : نسوي بودنق كيك

العنود : تم تم تم

ناظر عبدالرحمن ليان الهاديه و اشر عليها : هذي ليش ما يطلع صوتها

ضحكوا

العنود بضحكه: هي كذا ليلي هاديه

ناظرها سلطان و شتت أنظاره بسرعه عنها

عوض : يالله خلصوني

شوق : افف طيب لا تنافخ ، شوفوا انتم ترتبون الجلسه و حنا نسوي الحلا و القهوه

سيف : يالله طيب

تقدموا العيال للحوش يجهزون الجلسه و البنات للمطبخ

عند البنات بالمطبخ

شوق : بنات ارسلوا بالقروب ايش تبون قهوه وانا راح أسويها فوق بغرفتي

لجين : خلاص ما عليك

راحت شوق لغرفتها و التفتت العنود لليان اللي كانت جالسه تقطع الفراوله و سرحانه : ليلي انتبهي على يدك و خليك من السرح

التفتت لها ليان و هزت راسها و رجعت تسرح وتقطع و فجأة: اصبعي

التفتت لها غلا : ليان شفيك انتبهي

لمار : انتظري اجيب لك لاصق جروح

اكتفت ليان بهز راسها

العنود : غسلي إصبعك بالمويه و تعالي تحط لك

تقدمت لمار تحط لاصق الجروح لليان

العنود : خلاص ليلي لا تقطين روحي رتبي الجلسه برا معهم او اجلسي معهم إذا خلصوا

عند شوق بغرفتها ارسلت بالقروب

شوق : واحد كفو يجي يساعدني بالقهوه لان تعبت طلباتكم كثيره

العنود : مو فاضين شوفي واحد من العيال يساعدك

تأففت شوق و ارسلت : مين يجي يساعدني أنا فوق بغرفتي

عوض : أنا جاي أساعدك

↚

عند عوض و العيال بعد ما رتبوا الجلسه شاف الرساله وقال سيف : يا عيال وحده من البنات تبينا نساعدها

عوض : أنا اروح اجلس انت

راح عوض لداخل البيت

عبدالرحمن :مسوين قروب

سيف و هو ماسك جواله و يلعب بشعره : اي جدي طلب مننا نتقرب من بعض و قلنا نسوي القروب ذا يجمعنا كلنا

عبدالرحمن هز راسه : دخلوني معكم

سيف : يالله طيب الحين أدخلك

دخل عبدالرحمن القروب و عرف ان اللي كانت تبي مساعده هي شوق و ضحك

سيف : شفيك مهبول انت

عبدالرحمن بضحك: راح تصير حرب فوق راح تذوقون قهوه بطعم الرماد

ما فهم عليه سيف و سلطان كان هادي

سيف عقد حواجبه بعد الفهم: اشرح مافهمت

عبدالرحمن : اللي تبي مساعده شوق يا غبي

ضحك سيف : توك ما شفت المحارش و المناقر عدل احاول أتجنب الضحك بس مااقدر توم و جيري

عند شوق اللي كانت جالسه تسوي قهوه و باب غرفتها مفتوح سمعت صوت خطوات وقال : جابك الله تعال ساعدني تعبت طلباتهم كثير

عوض دخل الغرفه : جيتك

التفتت له شوق بصدمه : ايش جابك

عوض : تستهبلين مو انت تبين مساعده

اكتفت شوق بهز راسها

عوض : طيب ايش اسوي الحين

شوق : شوف في مطبخ هنا ادخل و حط ثلج بالأكواب ذول و بعدها تعال هنا حط الحليب و فوقه شوت الاسبريسو

هز راسه عوض و تقدم يأخذ الأكواب و يمشي للمطبخ وقف التفت لغرفتها و جلس يناظرها و يناظر تسريحتها و مكتبها و بعدها مشى للمطبخ يحط الثلج وجاء لغرفتها

عوض : خلصت من الثلج

شوق اكتفت بهز راسها و مسكت الأبرق و بدأ تصب المويه تأفف : أنا أبي افهم مين الغبي اللي يبي v60 اثنين

ابتسم عوض و هو جالس يصب الاسبريسو : معاك الغبي رسمياً

التفتت له شوق و رجعت تكمل و جلس كل واحد صامت ما دار اي حوار بينهم

عوض : خلصت

هزت راسها شوق: انتظرني علشان تشيل معي ما اقدر

تقدم عوض يجلس على السرير : اي ما دزرلك الحيوان شي بعد هذيك الليله

تنهدت شوق و هزت راسها بالنفي : تعبت الصراحه منه مو عارفه ايش يبي مني بالضبط ما طلبت منه ولا شي ولاشي كل اللي ابيه يبعد عني و يخليني ارتاح ، ارتحت ٤ شهور بدون و جوده لكن رفعت أكتافها : رجع مره ثانيه ما عمري طلبت منه شي والله ياعوض ماابي شي منه بس يبعد عني دمعت وقالت : حتى وجوده ماابي احس فيه ماابي و نزلت السيرفر و حطت يدها على عيونها و بدأت تبكي

ما عرف عوض ايش يقول ايش يتصرف وقف قدامها وحاول يبعد يدها عن عيونها : ناظريني لا تغطين عيونك و تبكين كذا

بعدت شوق يدها و ناظرته بعيون باكيه حس بقلبه ينكسر على حالها تمنى بس لو يشيل من حزنها و يحطه بقلبه بس ما يشوف عيونها كذا ، تقدم يمسك وجهها : قلتها لك و ارجع أقولها ما يطولك و كلنا حولك و بعدين امسحي دموعك مو كفو تنزل دموعك على واحد واطي مثله ، مو كل أب يستحق يكون أب خلاص لا تفكرين فيه لأن والله ما يستاهلك و ما يستاهل دموعك و زعلك ذا كله و ربي عوضك بجدي شوفي كيف يعاملك مثل بنته و اكثر والله و كلنا شايفين و عمه عبير والله ما قصرت كانت لك الأم و الأب ، ليش الزعل و البكي تذكري انك طلعتي من كل ذا بأم تحبك و تخاف عليك و بجد حنون وطيب عليك

شوق بصوت باكي : جدي

هز عوض راسه و كملت :بس محد يقدر يأخد مكان الأب يعوض محد حتى ماما ماقدرت تغطي ، أنا احتاجه احتاج و جوده ابيه يحسسني بوجوده ،  الشي اللي كان يسوي لي و بدأ تبكي و تنزل راسها و جهها بيدين عوض :  والله مو قليل الأشياء اللي شفتها و أنا و بزر تشيب الرأس يا عوض و الله

هزت راسها و بدأ يمسح على خدودها اللي بيده بأصابعه : عارف والله عارف ، بس انتي هدي الحين لا تبكين ، أنا عارف ان محد يأخذ مكان الأب بس ما تعرفي بقدر الله و خيرته من ذا كله يمكن صار كل ذا علشان ربي يشوف صبرك و يعوضك العوض اللي يسعد قلبك

هزت راسها شوق و بعدت راسها عن يدين عوض و بدأت تمسح دموعها بعشوائيه ابتسم : طلعت تعرف تواسي

ضحك عوض : طيب يالله تأخرنا عليهم

هزت راسها و تقدمت تنزل معه

جلسوا بالحوش على شكل دائره

سيف : طيب بس كذا نشرب قهوه و ناكل حلا

غلا : لا لا جايبين ألعاب راح نلعب

شوق : طيب تبون اسأله ولا مابينا غريب

لمار: اسأله احلا

عبدالرحمن : اي يالله اسأله

اتفق الكل على الاسأله التفتت العنود على ليان اللي كانت جالسه و كوب القهوه بين يدينها و سرحانه : ليلي شفيك اليوم سرحانه ماعطيتينا رايك

لجين : اي صح سرحانك صاير كثير انتبهي لنفسك سلم أصبعك المره ذي مره ثانيه يمكن ما يسلم

عبدالرحمن : شفيك ليان

هزت راسها بالنفي : مافي شي بس جرحت إصبعي و رفعت اصبعها و أنا جالسه اقطع

ضحكت شوق بقوه و التفتوا لها

سيف : شفيك انهبلتي

هزت راسها بالنفي : بس اتذكرت اول يوم جرحت اصبعي

عبدالرحمن : حسبت عندك سالفه

ابتسم عوض من لمح غمازاتها و ضحكتها

عند سلطان اللي دخل الواتساب

سلطان : ماتشوفين شر ، انتبهي لنفسك

التفتت ليان لجوالها و ابتسمت ابتسامه خفيفه و ناظرت فيه و اكتفت بهز راسها

عبدالرحمن : يالله خلصوني مين يبداً

شوق : شوفوا راح نحط اسمائنا بالعجله على الايباد و اللي يطلع اسمه يسحب

عوض :  بس تم يالله

بدأت شوق تحط الأسماء و تقولها : جود ، سيف ، لمار ، غلا ، النشبه

ضحكوا لما فهموا قصدها

التفت لها عوض : خير ايش قصدك

شوق رفعت أكتافها : اللي على راسه بطحه تنطحه

عوض : ماشاءالله و أمثال بعد ، خلصي اكتبي اسمي مثل الناس

هزت راسها شوق بالنفي : شعرفك انت أصلاً حبيبي و رفعت شعرها ورا أذنها : أنا ام الأمثال و الحكم واسمك ماراح أغيره

ضحكوا عليها وانتبه عوض من كلمه حبيبي اللي قالتها له و ابتسم تمنى يسمعها دايم منها ما عرف ليش بس تمنى الشي ذا

شوق : يالله خلصت راح أبدا أدور العجله

غلا : يالله ابدأي

دور شوق العجله و جت عند لمار

شوق : يالله لمار اسحبي كرت

لمار : بسم الله ، ان شاء الله سؤال اقدر اجاوب عليه و ما اتوهق بالعقاب

أخذت لمار الكرت و قرته : وش الشي اللي ندمت عليه بحياتي

جلست لمار تفكر : هممم اكثر شي ندمت عليه يمكن اني عطيت ناس اكثر من حجمها و هي ما تستاهل

عبدالرحمن صفق لها وضحك : حلو جوابك وان شاءالله تعلمتي منه

هزت راسها لمار و بدأت شوق تدور العجله مره ثانيه و طلع عوض

شوق تأفف : افف يالله يالنشبه اختار كرت

اخذ عوض الكرت و قراه :  وش الشي اللي يخليك سعيد

عوض : سهله ما يبي لها تفكير ، القهوه

دارت العجله شوق و طلع اسمها

شوق بحماس : يالله دوري بسم الله خايفه

عوض ضحك : رايحه حرب انتي

مدت لسانه له :  اااا مالك دخل

أخذت الكرت و قرته : شخص تحبينه غير اهلك

جلست تفكر و ضحك عوض ناظرته : وش اللي يضحك

عوض بضحكه هز راسه بالنفي و نزل راسه لتحت يضحك

شوق بعصبيه : لا خلص قول وش اللي يضحك بالموضوع

عوض هز راسه بالنفي: لا ولا شي بس انتي و اشر عليه من فوق لتحت تحبين و ضحك

وقفت شوق بعصبيه و انفعال : ليش وش فيني علشان ما احب وش الشي الغلط

عوض حبس ضحكته : لا ولا شي

شوق بعصبيه : تستهبل معي انت تضحك و تقول ولا شي ، أبدا مافي شي يضحك يا عوض أبدا ولا سويت شي غلط ولا حرام إذا حبيت احد غير اهلي ماينقصني شي علشان ما احب و انحب

عوض : لا تصرخين و بعدين شايفه شكلك كيف مين يبي يحبك تكفين و ضحك

ناظرته شوق و بدت تبكي : حيوان أكرهك ياليت ما جيت معهم كان انبسطت كل يوم ومشت تدخل البيت التفت سيف لعوض اللي كان جالس جنبه : شسويت يا عوض حرام عليك

رفع أكتافه عوض و جلس يناظرهم كيف يناظرون له ضحك : شفيكم جالسين نمزح يالله نكمل اللعبه

العنود : ماراح نكمل بدون شوق

عبدالرحمن وقف : أنا بروح أشوفها وانت اشر على عوض حسابك معي بعدين

ضحك عوض و هز راسه

لجين : أنا بدخل

ليان : اخذيني معك هذولي ما عندهم غير الهواش

بدأوا يدخلون البيت يتجهون لغرفهم و بقى عوض و سيف ناظر سيف عوض : ليش كذا يا عوض حرام عليك على الأقل جامل شفيك عليها

عوض : شفيكم علي كلكم قلبتوا علي وش سويت

سيف : اللي سويته انك جرحتها بكلماتك ذي

عوض بصدمه : أنا

سيف : مين اجل اكيد انت ما شفت كلامك قبل شوي عليها

تنهد عوض و تأفف : ياأخي هي دلوعه زياده عن اللزوم

سيف : طيب انت تعرف انها كذا و تزعل بسرعه و جدي وصانا ان ما نزعلها ليش سويت كذا

رجع راسه لورا عوض : ياأخي معرف انبسط لما أحارشها و اتخانق معها ابتسم و كمل : طريقه كلامها تصير تضحك

ضربه سيف على راسه : مو كذا يا غبي

عوض : طيب لا تضرب لا اتوطى في بطنك الحين

تنهد عوض و جلس يشرب من القهوه و يناظر مكان جلوسها التفت له سيف : تحبها علشان كذا تحب تحارشها

↚

تنهد عوض و جلس يشرب من القهوه و يناظر مكان جلوسها التفت له سيف : تحبها علشان كذا تحب تحارشها

عوض : معرف يا سيف معرف ايش سوت فيني البنت ذي من اول يوم شفتها فيه و أنا مو على بعضي

ضحك سيف و ربت على كتفه : الحب دمار ، طيب قول لها لا تقعد تحارشها تتعب نفسك و تتعبها بكلامك القاسي

تأفف عوض : اقول لها ايش يا سيف إذا أنا بنفسي مو عارف مشاعري مو عارف نفسي تبي اقول لها و تنقلب الدنيا البنت بعدها بزر تبي تضحك و تلعب ما ابي اصدمها و اقول لها اي والله اني تنهد : احبك

ابتسم سيف : تهون وانا اخوك تهون ، بس إذا تحبها صدق قول لها ما راح تخسر شي

عوض : راح اخسر كثير يسيف و أولهم كرامتي ما أبيها تردني و ترفضني وانا من الأساس عارف انها راح ترفضني

سيف : علشان كذا تحارشها

رفع عوض كتفه بعد المعرفه : امش ننام و قفل لي على الموضوع

مشوا لداخل البيت ينامون

عند شوق بالغرفه كانت جالسه تبكي على سريرها دق الباب عبدالرحمن : عادي ادخل

شوق بصوت باكي و مبحوح : تعال

دخل عبدالرحمن و شافها تبكي تقدم لها : افا افا كل هل بكي

جلس عبدالرحمن قدامها : ما عليك منه ذا

شوق ببكي : كلامه يجرح دايم يجرحني دايم و اسكت بس هذي المره كلامه كبير و قلبي ما يتحمل الكلمه والله ما يتحمل شي بعد

عبدالرحمن تقدم يحضنها : حسابه عندي ما عليك منه اخليه يعتذر لك

هزت شوق راسها بالنفي : ما ابي اعذار ، ابي بس يوقف يحارشني

عبدالرحمن ابتسم : طيب خلاص عندي أنا اكلمه ، بس خلاص امسحي دموعك لا تبكين ذا خبل ما يعرف يتكلم

هزت راسها شوق و ابتعدت عن حضنه تمسح دموعها ضحك عبدالرحمن: تعرفين وش

ناظرته شوق : وش

ابتسم عبدالرحمن: لما كنا صغار كنت دايم احارشك لان ابوي كان يدلعك وانا اغار ضحك و كمل : و كنا نتخانق و انتِ تروحين عند عوض تتحامين فيه و تتخبين عنده علشان لا أضربك و الحين العكس

شوق بصدمه :  أنا

هز عبدالرحمن راسه : اي ما تذكرين كنتِ بزره

ضحكت و اكتفت بهز راسها و قال عبدالرحمن: يالله تصبحين على خير ما ابي اشوفك تبكين

شوق : حاضر

صعد عبدالرحمن عند دور العيال : عوض

طلع عوض من غرفته : هلا

عبدالرحمن بعصبيه : وش اللي سويته قبل شوي

تأفف عوض : خلاص طيب اعرف اني زودتها حبتين بس الصراحه بنت اختك دلوعه

عبدالرحمن دخل غرفه عوض وجلس على الكنب : وش اللي دلوعه انت شفت كلامك اللي مثل السم

جلس عوض على الكنب جنب عبدالرحمن: طيب ، الحين وش المطلوب

ناظره عبدالرحمن:  المطلوب انك توقف محارشك معها افهم البنت ما تتحمل الحرف وانت كلامك ذا يدمرها

هز راسه عوض : طيب ، ممكن تطلع راسي مصدع بنام

عبدالرحمن بتهديد: أنا طالع لكن والله و بالله يا عوض الموقف ذا ان تكرر والله ما يحصل لك طيب

طلع عبدالرحمن و راح عوض ينام

يوم جديد ، يوم الجمعه عيد المسلمين كان البيت ريحته بخور و عود و قهوه و كيكه الليمون

دخلت شوق المجلس : صباح الخير

الكل : صباح النور

تقدمت تقبل راس جدها : جمعه مبارك

الجد : علينا و عليك

تقدمت شوق تجلس جنب البنات : صباح الخير ، كيفك جوري بعد ليله امس

جوري بأبتسامه: احسها حلم بس كل ما ناظرت الدبله استوعب انه حقيقه

ضحكوا البنات و قالت العنود : الله يهنيك

تقدمت ام وليد بكيكه الليمون الشهيه : يالله اخذوا لكم قطعه كيكه و اشربوا لكم فنجال قهوه قبل الصلاه

ابو وليد التفت يدور عوض : إلا عوض وينه

وليد : جاي جالس يتسبح