‘

ناظرته لثواني لأنها تبي تعرف الوقت ومتى والحكاية لكن بنفس الوقت ما ودها تضغط عليه ، ومسح على طرف حاجبه يعدل أكتافه : آخر يوم رحت به الخيام يومها لقيته ، ويومها سمّاه أبوي وقت شافه

عضّت شفايفها لثواني لأنها تعرف ما يتكلم عن علاقاته نهائياً ، لا عن أبوه ولا عن ورد ولا عن نهيّان ولا عن أمه ولا عن أي أحد بحياته بشكل يثير فضولها دايمًا وتعرف علاقته مع أبوه من أسامة ، ومن أحواله بكثير أوقات لكن للآن عجزت توصل لنقطة السؤال أو إنه يتكلم لها : تحبه؟

لف نظره لها يعرف إن السؤال عن أبوه ، يعرفه بالصريح لكنه لفّه لعزّام : عزام ؟ يبيني أحبه وما قصّر

إبتسمت فقط تهز راسها بإيه ، ورنّ جوالها بمكالمة جماعية من أخوانها تبتسم : يا أهلاً

إبتسم فهد : قصيد بسألج ، ذياب يعرف يصورج وإلا

لأنه سمع هو رفع حاجبه ، وضحك تركي : فهودي غيران ؟ تبي الصج دشيت الألبوم أشوف وهي معنا تلعب وشلون نصورها أدور فروقات بينّا لا يغطي علينا الذيب

ضحكت قصيد تخجل لأن ذياب يسمع معاها ، وإبتسم عذبي أخوها : مو عوايدج تنزلين ستوري جذي قصيد

رفعت حاجبها لثواني لأنها ما نزلت ، وإنتبهت إنها فعلاً نزلت تحذفها بعدم إهتمام لأنها صورة الكورة وأقدامهم وما شافت حتى مين لمحها : ما كانت مقصودة إيه ، شكل ما شافها غيركم أصلاً لهالدرجة تنتظروني يعني ؟

لف ذياب نظره لها يسمع سوالفها مع أخوانها ، يده تتأمل شعرها اللي تحرّكه الريح بين يده يبي كل عمره يوقف على مثل هاللحظة فقط ، يبي سكون هاللحظة وما كمل من صوت إشعارات جواله من محمد جديد يهز داخله بلحظة من رسل له صورة ، صورة وصل حنانها لقلبه مباشرة من سجل له مقطع صوتي “ جاء يسأل عنك ياعم هو وابراهيم معاه ، تقهوى عندي وأخذ حليب وصلى معي وراح للحلال مع ابراهيم “ وسكن قلبه من الصورة لأنه جالس بين الحلال ، جالس بضعف يشوفه ذياب من هامته ، وقامته ، ومن الصور المفرقة يلي رسلها له محمد مرة يمسح جبينه ، ومرة يعدل الفروة عليه رغم إن الصور بالنهار لكن كان من ضمن الصور صورة لابراهيم - سواقه - يترك الفروة على أكتاف جده ودق هو بدوره على محمد لأنه ما رسل له صور متعب من البداية ويعرف طبع محمد بهالشيء : طيّب أبوي يامحمد ؟

سكت محمد لأن الحال اللي جاء متعب فيه مخيف ، مخيف لدرجة غير طبيعية يحس البرد والجو عبارة عن حرارة لا توصف ، ويسكت كأنه بعالم آخر غير عالمهم : طيب الحمدلله ياعم ، طيب يقول جاء يدورك وحلّفني ما أرسل لك شيء بس ما قدرت إنت وصيتني

سكت ذياب فقط يهز راسه بإيه ، وقفّل من محمد تمشي له قصيد ولمحت صورة متعب قبل يقفل جواله : تحبه؟

هز راسه بإيه بهمس : ..

_

هز راسه بإيه بهمس لأن الصور تذكره بأشياء كثير ، تذكره بشخص واحد ماله بديل : الله يطول بعمره

رفعت نظرها له لثواني تحاوطه ، ومدّت يدها لجواله قبل تطفي الشاشة تشوف صور متعب بين الحلال ، إبتسامته بصورة ، وتعبه بالأخرى وبفروته وشماغه ما قدرت تتخطى منظره لو ثانية وحدة ورفعت نظرها لذياب الساكن تماماً يتأمل بشكل تعجز تعرف شعوره منه : ذياب؟

هز راسه بالنفي يبعد أفكاره عنه لأنه ما يتحمل لكن ما تتخيل كيف صارت تنازعه روحه يرجع للرياض بدون مقدمات ، يرجع لشايبه لأنه يدري به ما جاء لخيامه إلا وهو مشتاق له وما يبي يقول له وجاء الحال غريب يمسح على ملامحه ، يرمي ظنونه : عونك

ما كمل لوهلة من لمح رسالة عمه عناد له يسكن داخله “ تعال الرياض ياذياب “ يفز قلبه بشكل مؤلم ، تألم قلبه بشكل ما يخفيه شيء وقفّل جواله مباشرة ما تلمح الإشعار يقبّل راسها ونزل نظره لها : وش ؟

هزت راسها بالنفي وهي حسّته ، حست شعوره وما يحتاج يقول نهائيًا : أعرف كيف تحبه ، وأعرف كيف تشتاق

هز راسه بإيه فقط يمسح على طرف حاجبه من رنّ جواله بإسم عمه عناد يشتت نظره : دقيقة قصيد

هزت راسها بالنفي لأنها ما تبيه يتحرك من مكانه لأنها تشوف ملامحه ، تشوف كيف تغيّرت ، وتبدّلت ، وكيف صارت ألف شيء يرد لكن ما قوى ينطق بكلمة غير سم ومسح عناد على حواجبه لثواني : ذياب أبوي ، قل لا إله إلا الله وتعال

↚

« الريـاض ، بيـت متعـب »

دخل يسمع نبض قلبه بأذنه من شدة الضغط اللي يحسه ، دخل يشوف كم بيض الثياب على مد عينه ونظره من وجودهم كلهم بالبيت يضجّ فيهم ولمح عمه فزاع اللي ملامحه حارقة بالبكاء ، نهيّان الواقف بجنبه والواضح من ملامحه إنه “ يحترق “ بالصمت وإنتهى كله من طلع أبوه من غرفة جده يسكّر الباب خلفه ولا رفع عينه ولا نظره عن الأرض يشلّ حواس ذياب كلها : أبوي !

سكت حاكم تماماً ، سكت لأنه هو ما دق وقال له رغم معرفته بمجيئه للرياض وسكت لأن هالمنظر بالذات ما يبي يشوفه : جدتك تبيك

هو نطقها وإبتعد بشكل رجّف أقدامه ، بشكل شل عقله لوهلة يشوف النظرات له ، يسمع لاحول ولاقوة إلا بالله ، ويشوف نحيب عمه فزاع اللي تغطّى بشماغه فقط لأن متعب موّدع ، هذا الأكيد وهذا اللي يعرفونه كلهم لكن وش الحال اللي هو فيه مايدري ذياب ويخاف يدري ، يخاف تثقل خطاه يحس المسافة بين وقوفه ، وبين الباب اللي خلفه جده عمر مو مسافة عادية ، يحس إنه يمشي وما يتقدّم بخطوته وتمنى ، تمنى يدخل أبوه معه لكن الكل وقوف ، الكل ينتظر والكل يراقبه بشكل جرّحه يفتح طرف الباب بعد ما دقّه بيده لمرة وحدة يستأنس من جدته اللي نطقت براجف الصوت : من

_رجفت شفايفه ما ينطق ، عجز يتكلم وينطق : ذيـاب

سكن الصوت يحسّه من علياء ، من جدته يطير عقله كله من سمع صوت جده اللي يحاول ينطق : تـ تعال ذيـ

بكت علياء تصد بشيلتها لأن ذياب دخل كله مباشرة ، دخل كله ينطق برعب يمسك يد جده اللي يمدّها بالهواء : استريح ، استريح جيتك يمك أنا جيتك يبه

لأنه مسك يد جده اللي يحاول يتعدل يقبلّها ، يقوي نبرته بالقوة بإرتاح ، واستريح ، وخلّك لا تتحرك ويمّك أنا تبكيه علياء اللي تمسح دموعها ، ونطق متعب إرتجافه : ذياب

نطق برجفة صدره كلها يقبّل يده : سم ، سم أبوي سم

إبتسم متعب اللي ينازع روحه بكل ما تعنيه الكلمة من معنى ، إبتسم تغرق عيون ذياب مباشرة لأن تجاعيد وجه جده ، نظراته اللي تبين إنه مودّع لامحالة يقبّل يده للمرة الثانية ، والثالثة ، والألف لأنه كله صار يرجف من سنين ما تخطّى مشهد الموت والحين ينعاد عليه بأحنّ وجه عرفه يضحك متعب متجاهل التعب كله : ولدت الناقة ؟

ضحك تنزل دموعه مباشرة يقبّل يد جده لأن نبرته مؤلمة ، نبرة تعبه مع ضحكه جات مؤلمة يهز راسه بإيه : ولدت ، ولدت حوارٍ صغير يبيك تسميه شد حيلك

هز متعب راسه بإيه يحاول ينطق بالقوة رغم إحساسه بشديد العطش اللي يبيّن بشفايفه : أبطيت علي يابوك ذيـ

هو نطقها ، وهو تلاحق نفسه اللي قُطع يوقّف قلب ذياب مباشرة : على مهلك ، على مهلك أبوي

وقف قلب ذياب كله يناظر جده اللي سكن تماماً ولا كأنه كان ، سكن يهلع كونه لأن جده يحترق بالحرارة بشكل ما يتحمله هزيل جسده نهائي ومسح على ملامحه برعب : ووش قال الدكتور ؟ وين علاجاته وش قال لك أمي ؟

كان يدور بالأكياس حوله ، يدّور بشكل “ مجنون “ لأنه ما كلمه ، ما لقاه ويقول له أبطيت علي بهالشكل المعاتب يحرق له قلبه كله ورجفت يديه يدّور بعلاجاته ، يقرأ وش تعبه ووش يرهقه وبكت علياء اللي تحاول تكفّ يده عن الادوية فقط : ذيـاب ، يمه ذيـاب

مسك يدها لثواني ينتبه لها ، ينتبه إنها غرقانه بدموعها وسكت تماماً يقبل يدها ، يتمالك نفسه بمحاولة للثبات وأخذت علياء نفس من أعماقها : ليه جيت يمه ؟ ليه جيت له كم يوم يهوجس بك وينتظرك ليه تريّحه وتجي يمه ليه !

ناظرها تشحب عينه مباشرة ، وبكت علياء لأن خوفها من راحة متعب مو من عذابه : يدوّرك ، ويسأل عنك ويبي الدنيا عشان يشوفك يمه ليه تجيه ليه !

_

طلع من غرفة جده بالقوة يتدارك خطوته ، بالقوة يشد حيله لأنه بيطيح لا محالة ما جاء وقع كلام جدته هيّن عليه وإن كانت ما تعنيه ويدري ، وإن كان مو بيده ولا يدّها يدري لكنه ما تخطى ورجف نهيان أخوه اللي توجه له مباشرة : ذياب ، أبوي ساكت يكلمونه وما يرد ذياب

ناظره لثواني يشد عيونه بالقوة ، ياخذ أخوه تحت جناحه لوقت طويل ومسح نهيّان على ملامحه عينه تتأمل أبوه الساكن على أحد الكراسي ونُفض صدر ذياب كله من رفع أبوه يدينه لراسه فقط يواري نفسه عن الكل رغم الزحام ، نُفض صدره يضرب على ظهر أخوه : قل لا إله إلا الله وتوجه هو لأبوه من بينهم كلهم ، توجه يمشيّه قلبه ماهو رجوله وأكثر تسكن الأصوات ، سكن كون حاكم كله من حسّ بيدين ولده فوق راسه ومن حسّ به قدامه ينحني يقبّل راسه لوقت طويل ، لين رفع حاكم يدّه ليد ولده اللي على جوانب راسه يشدّها بقوة : لا إله إلا الله يا ذياب ، لا إله إلا الله يابوك

أجهش نهيّان يغطي ملامحه بشماغه فقط لأنه شاف كيف مشى ذياب لأبوه براجف الخطوة يمسك راسه ، ينحني بين كل الجموع لأبوه الجالس يقبّل راسه يشدّه ووقت رفع حاكم يده ليد ولده ما تحمّل نهيان نهائياً يحاول يسكت ، يحاول يشد حيله لكنه عجز تماماً من لمح إرتجاف أكتاف أبوه وعيون ذياب اللي صار يحسّ لهيبها من هالمسافة من كثر ما يحاول يكتم دموعه ويحاول يتصبّر ، يحاول لأن الكثرة حولهم مرعبة ومخيفة واليأس ، اليأس اللي ودّه يكون رجّال ويقتله بمحلّه من كثر ما يكرهه بعيون كل شخص حوله وإن متعب ، متعب نهايته بتُسطر لامحالة وهذا اللي تقوله كل الوجوه حوله ..

_

« المطـار »

محد بالدنيـا قدر يطمّن إحساسها ، يهدّي رعبها وأيامها اللي حسّتها مرّت مرور الدهر بكل مكالمة تجمعها بأحد من أهلها ويقولون الأحوال والأمور طيبة لكن هي تدري بتعب جدّها ، تدري وزلّت جود بوجودها تقول " الله يرحمنا برحمته لكن كلهم يقولون يحتضر " وحذفتها بنفس اللحظة لكن ورد شافتها ، ورد شافتها ومن وقّتها طيّرت نصار بالدموع " أنا بروح الرياض .. أنا برجع حتى لو مالك رجعة وما تقدر أنا برجع أعرف إن جدي يودّع والكل ساكت وبشوفه نصّار ! بشوفه ما أبي وقت يروح يقولون راح يا ورد ما لقيتيه بشوفه " تنهار بالدموع وما قدر نصّار يردّها ، ما قدر ما يركض للرياض بترجّي لأبوه إنها ما يقدر يتركها بإنهيارها وإن كانت أمه بترجع معاها ..

فرك عيونه بالقوة لأن له يومين ما ذاق طعم النوم من سوء نوم ورد وكوابيسها ، قلقها وإنها تغفى من التعب لكن تفز على أبسط صوت تنتظر من بيقول لها " مات " وهالرعب لحاله غير طبيعي ولف يشوفها ، يشوف ذبولها الـ

_

ولف يشوفها ، يشوف ذبولها الغير معقول وتنهّد من أعماق قلبه : ورد

هزت راسها بالنفي تنزل دمعتها لأن كل سيء الخيالات بعقلها ، تتخيل وجه أبوها ، تتخيل وجه أمها ، تتخيل ذياب ، وتتخيل نهيّان وتتخيل الكل والخيال لوحده مُفجع كيف يكون الواقع : لا إله إلا الله ، لا إله إلا الله ..

أخذ نفس من أعماقه يمسك يدّها ، يتوجّهون للخارج وللسيارة اللي تنتظرهم يمدّ يده للباب تركب ورد ، وركبت أمه من الجهة الأخرى يركب هو بجنب السوّاق : جبت اللي وصيتك عليه ؟

هز راسه بإيه ، ومدّ يده للكيس ياخذه للخلف : أمي ، ورد ما أكلت شيء طول الرحلة ومن أمس ..

هزت راسها بإيه تتنهد ، تاخذ الكيس بيدها : حرام اللي تسوينه بنفسك يا أمي ، الرياض ووصلناها وودهم يشوفونك بحيلك ياحبيبتي .. زين أمي ؟

أخذت نفس من أعماق قلبها لأنها تدري كيف تعّبتهم ، أهلكتهم تعب وخوف عليها لكن مو بيدها تاخذ التمرة من يد عمتها : لا تشيلون همي ..

لف نصّار نظره للخلف تنتبه لعينه ، تنتبه لنظراته بشكل جمّع دموعها من جديد بعينها تشتت نظرها بمحاولات للتدارك : نصّار ، كلمت ذياب؟

هز راسه بالنفي يمسح على أنفه : ما يرد ، الحين نروح البيت ترتاحون إنتِ وأمي وأروح أشوفـ

هزت راسها بالنفي مباشرة : لا ، بروح معاك بيتنا نصار

شتت جمانة نظرها لثواني لأن لو قال نصّار لا ، وأصرّ على رأيه ممكن تنهار بمحلّها تهز راسها بإيه : نروح يمه ، نروح أنا وإنتِ نروح لا نمر البيت نصار ، على بيت أبوذياب على طول

ضغط على عيونه مباشرة يهز راسه بإيه فقط وشتت ورد نظرها للشوارع من أول ما حطت أقدامها أسبانيا وهي تتخيل رجعتها للرياض بتكون بأي مناسبة ، بأي فرحة وكيف بتكون المسرّات وما توقّعت تكون الرجعة بحزن ، بخوف ، بقلق وبشعور سحاب الموت يخيّم على ديارهم وماتحبه ، ما تحبّ مروره لأنه يمر وتمطر دمُوعهم بعده وتنهّدت من أعماق قلبها تمسح على عيونها من لاح لها بيت أبُوها المظلم ، لاحت لها أسواره ، النُور الوحيد عند بوابته الداخلية فقط بشكل يذكّرها بكئيب الأيام اللي عجزت تتخطاها ، عجزت تمرّ عادية عليها يوقف نفسها كله ، يُقطع تماماً من لمحت البُاب يفتح والخارج من وراه نهيّان أخوها اللي يحني راسه على جواله وكانت منه إلتفاته لشخص يكلّمه بالداخل لكنها تعرفه ، تعرفه بشكل كتم نفسها كله لأنه رد بكلمة ورجع يصد لجواله تدري إن وده يختفي وبمجرد ما وقفت السيارة ، بمجرد ما إنتبه نهيّان توه على السيارة اللي دخلت للداخل وأمامه هو سكنت ملامحه ما يشوف داخلها ، لكن من فُتح الباب الخلفي يشوف أقدامها هو عرفها مباشرة ، عرفها يفز قلبه يدخل جواله بجيبه : ورد !

↚

ما يدري كيف نزلت أقدامه عتبات الدرج كلها بلحظة من شاف إنها فعلاً ورد اللي تركت السيارة كلها تركض لحضن أخوها فقط يصرخ داخل نصار اللي تقطّع بوقوفه عند باب السيارة لأن هالإندفاع منها ، وهالشدّة من نهيان تحرقه هو لأنه بطريقة ما من زمان ، ومن مدّة طويلة يشوفهم أخوانه الصغّار وإن كانت ورد زوجته لكن يحمل هالشعور لهم قبل لا تكون زوجته وطلعت ملاذ من الداخل تشدّ جلالها برعب من خلف الباب : نهيّـان ؟

مسح دموعه مباشرة يشد على ورد ، يمسح دموعها بيده : إيه أنا هنا ، جات ورد أمي

طلعت من خلف الباب تشد جلالها ، طلعت تشحب نظرتها مباشرة من لمحت السوّاق اللي طلع خارج أسوار البيت ، نصّار الواقف عند باب المعاون ، وأم نصار اللي تمشي لجنب ولدها تمسك ذراعه والأمرّ ، دموع ورد اللي غرّقت ملامحها ووقف نهيّان اللي يمسك أخته بجنبه هدّها ، هدّها تماماً تغرق عيونها بالدموع لكنها مسكتها تشتت نظرها لثواني : لا توقفون هنا ، تعالوا تعال أمي نصار .. أم نصّار

سكتت أم نصّار لأنها تشوف كيف كتمت ملاذ دموعها ، كيف إهتزّت نبرتها تمشي هي قبلهم لأن نهيان وورد للآن يتهامسون وأخذت ملاذ تضمّها : الله يصبّركم ، ويجبركم ، ويقوّي حيلكم ولا يفجعكم بغاليكم يا ملاذ ، عساه أهـ

بُترت كلمتها من نزلت دموع ملاذ تمسحها ، تحس السوء من سرعة مسحها وهمست ملاذ بضعف ، برجفة : الله يلطف به يا أم نصار ، الله يلطف به ويلطف بنا

سكتت أم نصار تشدّ كتفها فقط ، وسلّم نصار عليها يقبّل راسها فقط وعينه للخلف ، لورد ونهيّان اللي يمسكها ما فارقت يدّه يدها ومن وقفت قدام أمها كانت تحاول تجمّع كلام ، تجمّع حروف وتتكلم لكن عيون أمها اللي ماودها بالكلام أهلكتها ، حرقتها تمسح دموعها تضمّ أمها لوقت طويل وشدّت ملاذ عليها بهمس : قولي لا إله إلا الله يا أمي ، قولي لا إله إلا الله وتصبّري الله يلطف به وبنا ..

هزت راسها بإيه تاخذ نفس من أعماق قلبها ، ترجع شعرها للخلف ولفت نظرها لنهيّان : بتروح لهم الحين ؟

هز راسه بإيه : بروح ، أبوي وذياب هناك بروح أجلس وأقنع واحد منهم يرجع ويجي لكم ، يدري إنكم جايين ؟

هز نصّار راسه بالنفي : محد يدري ، بروح معاك أنا الحين

هزت ملاذ راسها بالنفي : يروح نهيان الحين ، توكم جايين من السفر يا أمي إرتاح شوي ويجي عمك وإلا يجي ذياب

لفت ورد نظرها لهم لثواني : بروح معاكم

هز نهيّان راسه بالنفي برفض مباشر لأنها ما بتتحمل ، مستحيل تتحمل : لا ورد ، إرتاحي وبيجي أبوي أصلاً لا درى إنك هنا ووقتها تروحين معه لو ودك تروحين .. أمي روحوا إجلسوا خذي ورد معاك وإرتاحوا بيجي أبوي

_

هزت ملاذ راسها بإيه تاخذ ورد ، ومشى نهيّان مع نصار اللي ضغط على راسه : وش صاير نهيّان

ركب نهيان السيارة مباشرة يمسح على ملامحه : وش صاير ؟ الله يرحمنا برحمته يانصّار ، الله يرحمنا برحمته

لف نظره له لثواني طويلة ما يحتاج يقوله نهيّان عن كم القلق ، والخوف ، والحزن ، كلّه مسطر بملامحه ومرسوم من شحوب وجهه ، انخطاف لونه وهالاته اللي تعبّر عن عدم نومه ولا ارتياحه يتنهدّ من أعماق قلبه : يارب

_

« بيـت متعـب »

مشيت علياء على أقدامها بالقوة بعدم إهتمام لضجيج الرجال بالبيت ، مشيت تشوف ريف بنته تبكي على يدّه لأنه يغيّب عن الوعي ويذكرها لحظة ينساها لحظات ، مشيت تتوجه لكرسيها وتسمع نحيب ريف لأن شكل الموت مُفجع ، وجه الموت قبيح بشعوره بوجوده بكل معانيه ودخل حاكم بجنبه ذياب ولده اللي ماعاد يطيق الوجود ، ما عاد يتحمّله ووقت الفجر بالذات يضيق صدره بشكل محدٍ يتخيلّه ، محد يخففّه عنه لأن محد يدري به ولأن مابه وقت ، ما به وقت أبوه شايل الحمل كله وهو شايل أبوه والحمل عنه معه بشكل مؤلم لأن الكل يتألم ، والكل يتوجع وينهار لكن لو إنهاروا كلهم والمقصد هو وأبوه ، من بيمسك الباقي ؟

رجفت شفايف ريف من صحى ، من تحرّكت يده تحت يدها تلف نظرها لأخوها : حاكم ، حاكم صحى أبوي .. صحى أبوي يبه تسمعني ؟ يبه أنا ريف بنتك حبيبي

سكنت ملامح ذياب لأنه يعرف هالنظرة ، يعرف هالصحوة ، يعرف هالإبتسامة المتهالكة اللي طلعت منه بشكل شدّ عروق راسه كلها ، بشكل يحس الدم ينساب من راسه منه يحس برطوبته : عمتي

هو إنحنى يوقّفها عنه مباشرة لأنها بكت من إن لسانه ثقيل ما يقوى الكلام ، لأنها إنهارت بدموعها عنده وقرّب حاكم لأبوه مباشرة يمسك يدّه اللي رفع سبّابتها ، وداخله كل يموّت كيف يلفّظ أبوه الشهادة وتغيب شمسه : قل أشهد أن لا إله إلا الله

رجف صدر ذياب كله من رجفة همس أبوه ، من إنه هو ما قوى وإن عمته ريف جنّت تضرب صدره بمحاولات للتفكك منه لكنه يمسكها ، يمسكها ولا يحسّها ولا عاد يحسّ شيء من إنحنى راس أبوه يمسح على ملامحه ، يضغط عيونه بالقوة يكمّل الشهادة لأبوه وأجهش بمجرد ما إنتهى ، بمجرد ما ثقلت يد أبوه بيده على دخول فزّاع ، نهيان اللي مات حيله عند الباب يضحك فزاع بالرعب مباشرة : ما مات أبوي ما مات حاكم ، بشوفه مامات

وقف حاكم مباشرة يمسك أخوه ، وضحك فزاع بالذهول يصرخ على ريف : لا تبكيـن إنتِ ما مات لا تبكينه حيّ !

مسكه بالقوة يخليه يستوعب ، ومدّ يده الأخرى لولده نهيان اللي إنكتم تماماً يضمّه ما صار يُسمع إلا صوت البكاء ، صوت الإنهيار بين اللي ..

_

صوت الإنهيار بين اللي يحاول يكتم شهقاته ، واللي يحاول يردّ دموعه ، واللي غاب عن وعيه أساساً وهي ريف اللي شالها ذياب بيدّه عجز لسانه ينطق ، عجز لأن راسه صدّع بشكل يضرب رؤيته وسمع همس نهيّان بشكل يشله تماماً “ ورد جات ، كانت تبي تجي معانا وقلت لها لا أبوي يجيك ما قدرت أجيبها “ينتفض صدره ودخل عناد ، دخلوا رجال آل سليمان تضجّ الغرفة بالصوت والازدحام ولف حاكم نظره لنهيّان يمسح دموعه : روح البيت ، عطهم خبر وعط الرجال خبر وقل لهم يقولون لا إله إلا الله .. كلنا لله وكلنا له راجعون يابوك

توجه ذياب بجنب أبوه يضغط على عيونه ، ونفض داخل نصّار الواقف على عتبة الباب من لمح خروج نهيّان وحاكم وذياب من غرفة متعب : عمي ، ذياب ..

ناظره حاكم اللي رد بدون وعي أساسًا : روح مع نهيان لورد يانصار ولا تخلوّنها لحالها ، لا تعلّم أمك وهي واقفة نهيان خلهم يقعدون ويوحّدون يابوك ، طيب يانهيّان؟

هز نهيّان راسه بإيه ينتفض صدره من مد أبوه يده يضرب على خده ، وشحبت نظرات نصّار من صارت التمتمات كلها “ لا إله إلا الله .. لا حول ولا قوة إلا بالله ، وإنّا لله وإنّا إليه راجعون “ ما يدري حاكم هو كيف للآن على أقدامه ، وما يدري كيف للآن واقف بحيله لكن من توجه نصّار لذياب يضمه ، وإنتبه إن ذياب ضمه بيد وحدة فقط يستوعب توه إن يد ولده خلف ذراعه من مدّة تسنده ، توّه يحسها ويستوعب وشدّ ذياب على كتف نصار بهمس : روّح

ناظره نصّار لثواني طويلة وهو يهتز قلبه ، يبيّن على ملامحه حزنه لأنه يشوف ملامح صاحبه ويحسّه وشتت ذياب نظره فقط من صارت ضجة الرجال يشدّ على كتفه للمرة الثانية يودعه فقط ..

_

« بيـت حـاكـم ، العصـر »

مدّت يدها لأسفل بطنها وهي ما تقدر للوقوف ، ولا تقدر للجلوس من الشعور اللي تحسه ودخلت ورد اللي تمسح دموعها من كثرة الناس : تعبت .. يالله تعبت

سكتت حروفها من إنتبهت لملامح ديم شديدة الإحمرار تمشي لها مباشرة تسندها : ديم !

عضّت ديم شفايفها لثواني تجلس بمساعدة ورد ، تتمددّ بمساعدتها وكتمت صرختها ألم تنطق ورد مباشرة اللي تمسح دموعها : لا تبكين ، لا تبكين وخذي نفس شوي عشان البيبي ديم ، عشان البيبي

عضّت ديم شفايفها لثواني لأن نهيان وقت جاء ، وقت دخل الغرفة جلس عند الباب على طول يجهش ببكاه ونظره كله لديم وبطنها “ قال لي ما بعد شفت ولدكم يانهيّان ، حفيدي من أحفادي الإثنين “ وصرخ بعدها بإنه نساه ، وإنه غاب عنهم يبكيه القاصي والداني والغريب والقريب ، تبكيه قلوبهم كلهم وعضّت شفايفها برجفة : كان يبي يشوفه ، يشوفها ورد ما أدري وتوّه ! توّه كان طيب

لأن ديم منهارة تماماً ، ما كان

_

ما كان حال ورد اللي ضمّتها أقل منها تاخذ نفس : الله يرحمه ويغفر له ، الله يرحمه ..

أخذت ديم نفس من أعماق قلبها لأنه جدها ، ولأنها تعرف قسوة ضرب الموت عليهم كيف يزلزلهم وإنّ كان يومه ووقته وراحته : يارب .. يارب آمين رجعوا الرجال ؟

دخلت درة اللي تعدّل نفسها ، تمسك نفسها وهي أصبرهم : دفنوه توهم ، لكن ما رجع أحد للحين ..

سكنت ورد وهي تذكر النفور اللي حصل من الكل بعد عزاء فاطمة وعزاء نهيّان ببيت نهيّان نفسه ، تذكره بشكل مؤلم وكل قلبها خفّاق لحال أبوها وأخوها اللي ما لمحتهم ولا تدري عنهم تمسح دموعها : درة خليك عند ديم ، وإرتاحي بقول للعاملة تجيب لك شيء تاكلينه

دخلت وسن اللي معاها أكل لديم أساسًا ، ولفت نظرها لورد : تعالي إرتاحي إنتِ بعد ، شوفي وجهك كيف

دخلت جود وخلفها توق اللي رجف قلبها : ورد روحي لأمي علياء ، جابوها من بيتها توهم العيال

هزت راسها بإيه مباشرة تخرج للخارج ، للكم الهائل من النساء المجتمعين ببيتهم وما خفّ فيض البوابة نهائياً وأفضل الحلول كانت إن النساء ببيت حاكم ، والرجال ببيت متعب ذاته ومسحت دموعها من لمحت علياء المنهارة بينهم وبجنبها عمتها ريف تنحني لأقدامها : أمي

لأن ورد جلست قدام ركبها تمسك يدها ، لأن ريف إنهارت مباشرة ولأن علياء بكت ، علياء بكت من أعماق قلبها تمسح على ملامح ورد : توّه يمسك يديني وراح يمه ورد ، راح متعب يمه

نزلت دموعها تحرق خدها تقبّل يد جدتها ، ومسحت ملاذ دموعها مباشرة من الحال ، والوضع ، والشعور الموجع اللي الكل يحسه بدون إستثناء والكل يتألم منه تضغط على صدرها : لا إله إلا الله .. لا إله إلا الله ..

↚

« حـدود بيـت متعب »

لو ما كانت تعرف بإن بنتها في حال يُرثى لها ، ولو ما كانت تدري بإن مستحيل يقرّ قلبها أو يهدأ لها بال لين تشوفه ، لين تلمحه بين غفير الجموع ما كانت جات معاها وطاوعتها لحدود بيت متعب يمروّن بالسيارة بمحاولات لأنهم يلمحونه ومدّت سلاف يدها لبنتها : ماما قصيد

هزت راسها بالنفي وهي للآن متماسكه ، للآن تحاول تمسك نفسها لأنها شافت عمه ، شافت نهيان ، شافت نصّار وشافت الكل إلا هو وأبوه ما لمحتهم : بس بشوفه أمي ، بس بشوف من وقت رجعنا ما لمحته ماما ما تـ

بُترت جملتها كلها من لمحته عند البوابة الخارجية وسط غفير الجموع يرجف قلبها مباشرة بذهول وعضّت سلاف شفايفها تتجمع دموعها بعينها : قصيد ماما

هزت راسها بالنفي ترجف شفايفها من المنظر اللي تشوفه قدامها ، ما تشوف عيونه من نظارته الشمسية لكن وقوفه ، يدينه اللي خلف ظهره وجامد ملامحه بجوار أبوه “ هدّتها “ تشد يد أمها بعدم إدراك وهي حتى النفس ما صارت

‘

ما صارت تعرف له من منظره ، من إنها تشوفه وبينهم شارع وكثرة رجال بسلامهم يحجبونه عن مدى شوفها ورؤيتها كل شوي من كثرة مرورهم تنهار كلها : ماما ، ذياب أ

رجفت شفّتها من كثر ما تزاحم الكلام بداخلها ، من إحساسها بإن داخلها يتقطّع حرفيًا لأنه جامد ، لأن اللي يمروّن قدامه ما يحسهم ويصافحون أبوه لكن هو يهز راسه بالإيجاب فقط يرجف داخلها ونزلت دموع سلاف مباشرة على ملامح بنتها يلي إحتقنت بالإحمرار وإنها تحاول تتكلم بعدم قدرة : لا حول ولا قوة إلا بالله ياماما خلاص ، خلاص الحمدلله صابر ومحتسب هذا قضاء وقدر يا ماما

هزت راسها بالنفي تجهش ببكاها بمجرد ما ضمّتها سلاف اللي نطقت للسواق يكمّل طريقه ، كيف بتواجه آل سليمان بعد ما لمحته وكيف بيبقى عقلها بمحلّه ما تعرف وعضّت سلاف شفايفها تشد على بنتها ترجّعها قدامها تمسح دموعها بيدها : خلاص ياماما .. خلاص

أخذت نفس من أعماق قلبها تشتت نظرها لأن وقت وصولهم لبيت عمها هي ما تدري كيف بيكون حالها لكن تدري بإنها تعيش شيء لأول مرة تعيشه بحياتها ، من سنين وهي تنفر من أي عزاء ، من أي طاري للموت ماتحبه وما تحضر نهائياً وهالمرّة تألمت لطاري الموت ذاته يرعبها ، وتألمت لمحبوبها اللي ما شافته من وقت رجوعهم يتركها ببيت أهلها وهو غاب ماعاد له طاري ..

أخذت نفس من أعماق قلبها تمسح على ملامحها من ازدحام السيارات قدام بيت عمها حاكم ، كثرة النساء الداخلة والخارجة ونزلت هي بجنب أمها تشتت نظرها لكل زاوية بالبيت ما عندها إستعداد تشوف علياء ، ما عندها إستعداد تشوف ملاذ ، ولا ريف ولا ورد اللي تعرف برجوعها وقدّمت خطوة أمها قبلها ينتفض داخل قصيد مباشرة من صوت البكاء اللي كل مصدره علياء ، من حسّت بفيض الدموع وتجمّعهم حول علياء اللي ورد تدلّك لها يدها ، ودرّة تمد لها كأس يرويها تمسح على جبينها هي من وقفت ملاذ لسلاف تسلّم عليها ، من طال السلام وطالت مسكة سلاف لملاذ تعزيّها : الله يرحمه ويغفر له ويجبر قلوبكم ياحبيبتي ، الله يرحمه عظم الله أجركم

هزت ملاذ راسها بإيه تشد على كتف سلاف الآخر ونظرها على قصيد اللي خلفها : جزاك الله خير ، بنتي قصيد

لأن نظرتها ونطقها صار لقصيد اللي عيونها تصرخ بالإحمرار ، وملامحها تصرخ بآثار بُكاها نطقت هي من فيض الحنان اللي صار بـ" بنتي قصيـد " : عمتي

تركت ملاذ سلاف تضمّ قصيد اللي شدت على كتف عمتها تتدارك دموعها ، تهمس بآمين لدعاء ملاذ بين الله يرحمه ، ويغفر له ، ويصبّرنا وهي ممنونه لأن عمتها بنفسها تكلّمت ودعت وإلا هي ممكن تكتمها دموعها تهز راسها بإيه تقبّل راس عمتها : آمين ..

_

رفعت علياء نظرها وهي تحاول تشوف من بين دموعها : قصيـد ؟

هزت راسها بإيه تعضّ شفايفها مباشرة وقرّبت تنحني تقبل راس علياء الجالسة على الكنب : قصيد يمه ، سميّ

شتت ورد نظرها مباشرة لأن كتمتها دموعها ، كتمتها ما تقدر تسكت عنها تنهار كلها مباشرة ومدّت درة يدها ليد ورد تقومّها عن إنحناءها بالأرض تجلّسها بجنبهم ، وإنحنت قصيد لعلياء اللي تقبّلها للآن تحس حرارة دموعها وهمست براجف الصوت : عظم الله أجركم ، والله يرحمه ويغفر له

هزّت علياء راسها بإيه كانت على وشك تتكلم ، لكنها أجهشت بالبكي من جديد تضم قصيد لها وتبكيه ، تبكيه بجُملها بحروفها بكلامها ومسكت قصيد نفسها رغم حارق الدمع على خدها : أمي قولي لا إله إلا الله ..

_

« آخـر الليـل »

صار وقت رجوع الرجال بعد مهُلك اليوم وطويله ، علياء نامت وأخيرًا وسكن البيت ، سكن رغم إنه مليء بآل سليمان وبقيت قصيد وأمها معاهم لكن تأثير الموت والعزاء للآن أخذ منهم كثير ، كثير ما يردّه أحد وجلست درة بجنب ديم تهمس لها : روحي غرفتك إرتاحي ، أمي علياء طيبة مافيها شيء وحنّا كلنا موجودين روحي فوق

هزت راسها بالنفي تشد يد درة وهي أفزعها الموت ، أفزعها ولازال يفزعها السكون الغير عادي بجلستهم رغم إمتلاء الصالة بنساء آل سليمان وإن ما بقى إلا الأهل لكن فيه شعور " مؤلم " بملامحهم الباهتة ، بإنها تشوف أمها متمددة على فخذ ملاذ ، تشوف توق وجود الجالسين بصمت ، وسن المتمددة بأحد الكنبات وجنبها بنتها النايمة ، ورد المرتكية على كتف قصيد بجنبها ، وسلاف الساكنة بجنب قصيد وأم نصار جنبهم ونزلت نظرها لجوالها من وصلتها رسالة من نهيّان " كلنا جايين " تقفل جوالها : الرجال جايين

تنهّدت ملاذ من أعماق قلبها : الحمدلله ، كلهم ياديم؟

هزت راسها بإيه ، وتنهّدت نهى : جهزي لهم شيء ياملاذ

قامت ملاذ فعلاً تقوم خلفها توق وجود ولفت قصيد نظرها لورد يلي إحترقت محاجرها من جديد وبدون مقدمات بهمس : وردي

هزت راسها بالنفي تغطي عيونها : ماعندي إستعداد

عضّت قصيد شفايفها لأن أصوات الرجال ضجّت بالمدخل الخارجي توصلهم ، يوّدعهم أبوها تسمع صوته وتميّزه بينهم وذياب ماله صوت تلفّ سلاف بإتجاه قصيد بهمس : هذا أبوك .. تجين معانا ماما؟

ما تعرف ، وش الوضع كله ما تعرف هي المفروض تجلس وتلاقيه ، وإلا هو بيجيها ، وإلا هو بيكلمها أساساً ما تعرف لكن وسط إنهيار ورد هذا هي ما بتمشي وتتركها : لا

_

هزت سلاف راسها بإيه فقط ، ومسحت ورد على عيونها لثواني من وقفت درة تقفّل جوالها : نروح ورد ؟

هزت راسها بإيه لأنهم بيشوفون آبائهم ، ووقفت ديم معاهم تمسكها درة : مافيك حيل إرتاحي

_

« جهة الرجـال »

وقـف نصّار بجنب نهيان بالحديقة الخارجية يمسح على راسه ، يمسح على جبينه وهو يرسل لورد ما ترد عليه ولف نظره لنهيّان الشارد تماماً : نهيّـان

نزل نهيان شماغه عن راسه ياخذ نفس من أعماق قلبه : يسلّمون على أبوي وعمي الحين أكيد يعزوّنهم

هز راسه بإيه يلف نظره للخلف : ذياب بالمجلس ما طلع

تنهّد نهيان من أعماق قلبه لأنه وقت ما شالوا جنازة جده ، لأنه شاف موقف يمكن محد لمحه إلا هو لكنه نفّض صدره بشكل غير طبيعي من شاف أبوه “ تعب “ لوهلة ، وهُزم لوهلة وشاف ذياب اللي تبدّلت ملامحه كلها كأنه ما حس موت متعب إلا بعد ما تبدّلت ملامح أبوه تغرق عيون نهيّان يضغط عليها من جديد : يارب

تنهّد نصار يضرب على ظهره ، ياخذ نفس من أعماق قلبه من لمح تركي خرج لسيارته : ما قصر أبوعذبي ، ما قصّر

هز نهيّان راسه بإيه يمشي للجهة الخلفية : يطلعون أهله الحين أكيد ، تعال

-

وقفت على مدخل المجلس تحس رجولها ما تشيلها ، تحس رجولها ما تحملها ورجعت خطوة ديم ، ودرة من تنحنح ذياب قبل خروجه تتسمّر ورد بمكانها : ذيـاب

سكنت ملامحه لأنه كان خارج من المجلس وده ياخذ نفس لكن وقت سمعها هي خطفت كل النفس عنه ، زلزلت الأرض تحته من نبرتها : معك أحد ؟

هزت راسها بالنفي ترجف بمحلها وما تكلّمت ، ما قوت تتكلّم بكلمة يرفع نظره يدوّرها : ورد ؟

عضّت شفايفها مباشرة لأنها بتبكي ، لأنها ترجف ولأنه بمجرد ما طلع كله يصير أمامها هي ما عاد قدرت تمسك دموعها ومدّ يده مباشرة لها من إرتمت بحضنه يشدّ عليها ، يُشل لسانه بمثل هالمواقف لكنه ضمّها من أعماقه يمكن يهدي روعها ، يمكن يهدّي خوفها اللي يعرف كل أسبابه وكل مافيه ينطق : أبوي طيّب ، وصابر وواقف ومسلّم لله وبحيله ورد حبيبتي .. طيّب أبوي

هزت راسها بالنفي تشهق مباشرة : كيف بسلّم عليه كيف بشوف عيونه ذياب ما أقدر ! ما أقدر

كيف يلومها وهو طول وقوفه ما قوى يحط عينه بعين أبوه ، طول وقته حوله وجنبه وخلفه لكن ما قوى يشوف عينه لو لحظة لأنها بتهدّه ومسح دموعها على وشك يتكلّم ، على وشك ينطق لكن فُتح الباب ينطق حاكم : ذيـاب

كان ودّها تصرخ ، ودها تنهار بمحلها لكن ما لقت إلا إنها تغطي ملامحها كلها بيد ذياب اللي يمسح دموعها ، تتوارى خلفه لأن ماعندها قدرة ولا طاقة تشوفه وإبتسم حاكم بهدوء : بنتي ورد

بكت ، من أعماق قلبها بكت يـ…

_

‘

يتقطّع قلب حاكم اللي شتت نظره فقط ، بكت ورد لأنها تعرف إن أبوها يحزن ويرسم طيف الإبتسام عشانها هي بشكل يحرقها وما قوت حتى تسلّم عليه يمسح حاكم على جبينه لأن ذياب تسمّر بمكانه يشدها ، يحاول يخفّ إنهيارها وهو إنتهى كله لانه لمح نظرة أبوه لورد المنهارة يمسح دموعها ، يقبّل جبينها بهمس : روّحي له ..

أخذت نفس من أعماق قلبها وهي تدري بمجرد ما تسلّم على أبوها بتهلّ دمعتها من جديد وبالفعل من أول ما مسكت يده ، من أول ما رفعت نفسها تقبّل راسه وشتت ذياب نظره من قبّل أبوه راس ورد يهمس لها : الحمدلله على كل حال ، والله يرحمه ويغفر له إدعي له ياورد

شتت ذياب نظره لأن ورد تبكي جدها ، وتبكي حزنه من حنانها وهزت راسها بإيه ترجف نبرتها : الله يرحمه ..

طلع فزاع من المجلس يشوف ورد اللي مسحت دموعها بعشوائية تناظره وحاكم اللي يحاوطها بشدّة تحت جناحه يحنّها من الشعور كله : ورد

عضّت شفايفها تمدّ يدها تسلم عليه ، تقبّل راسه بهمس لكن ما بعّدها حاكم عن جناحه تنطق هي : عظم الله أجرك عمي ..

هز راسه بإيه يتنهّد : أجرنا وأجرك يابنتي ، الله يرحمه يابوك

دخلت ريف تلف نظرها لدرّة وديم ، وسكنت ملامحها من لمحت حاكم وفزاع ودموع ورد وذياب : البنات هنا

هز ذياب راسه بإيه لأنه بيخرج ، ومشى بإتجاه الباب ينطق حاكم بشكل ما توقّعه هو من نفسه : لا تروح ياذياب

لف نظره لأبوه لأنه ما بيروح ، ومستحيل يروح ويتركه يهز راسه بإيه : أبشـر

طلع يحتاج يتنفّس ، يحتاج يوّقف صداعه شوي لأن العواقب وخيمة لو طوّل بنفس الضغط ويدري بها وطلع يتنفّس ، طلع يحاول يستوعب وهو ما وده بالإستيعاب وأكثر من مر عمّه عناد بجنبه : ما بقى أحد يا ذياب ، مشى عمك تركي وأهله وأصحاب أبوك بعد .. بروح الحين تبون شيء ناقصكم شيء يابوك ؟

هز راسه بالنفي يمسح على عيونه : ما قصرت ياعمي

ضرب عناد على كتفه يمشي ، ورفع ذياب نظره لثواني يستوعب “ مشى عمك تركي وأهله “ يلف نظره لبيت أبوه من جديد هي جات ، ومشت ، أو ماجات ، أو وينها بالضبط مايدري ونُفض صدره لوهلة لأن هي مع أمها وأبوها مستحيل يمشون وتبقى هي يضغط على عيونه : يارب

كان على وشك يطلع جواله من جيبه يكلمها لو ما جاء له نصّار ، وجاء نهيّان بجنبه يمسح على جبينه : بروح داخل

هز ذياب راسه بإيه فقط ينبهه بعينه إن فيه أحد ، يهز نهيّان راسه بإيه وناظر نصّار ذياب لثواني طويلة : تشوف؟

هز راسه بإيه رغم إن مرّت عليه لحظات يحس الدم يسيل على جبينه ونظره “ إحساسًا “ فقط من قوة صداعه والألم ، مرّت عليه لحظات تظلم عيونه من شدة الضغط كأنه بيطيح من طوله لكنه يتماسك وشتت نصّار نظره : …

_

: كانت تبي تشوفه ورد .. ليه رديّتوها ذياب؟

رفع نظره لنصّار لثواني لأن أخته “ حنونة “ ، أخته رقيقة بشكل ما تتحمّل بسيط التعب يمسّ حبايبها كيف تتحمّل إنها تشوف الموت بوجه جدّها اللي تعشقه ، كيف تتحمّله وما تحمّله أبوها ، ولا تحمّله هو ولو رُمى هالشعور ومنظر متعب على الجبال هدّته كيف بأخته ورد : عشانها

تنهّد نصار لثواني لأنه يعرف لكن بنفس الوقت يسأل ، وهز ذياب راسه بالنفي يمسح على جبينه : أبوي أدرى نصار ، يدري هي وش بيجيها لا شافته ووش بيصير بها ..

ناظره نصّار لثواني لأنه يعرف لكن بنفس الوقت فيه جزء منه “ ينهار “ وشتت نظره : إنت طيب ؟

كان منه الإيجاب بإنه طيّب ، وناظره نصار لوقت طويل يمسح على عيونه ونطق ذياب : ورد مع أبوي بالمجلس

_

« الداخـل ، الأعـلى »

دخل يلف نظره لها من دخلت خلفه مباشرة ، من سكّرت الباب تمد يدها لبطنها ينطق بقلق مباشر : تعبتي صح ؟

هزت راسها بالنفي وهي حسّت المسافة من عند المجلس ومن بين ورد وحاكم وأبوها لغُرفتهم عُمر لكن وأخيراً إنتهى اليوم ، وأخيًرا إنتهى تتوجه للسرير وسكنت ملامح نهيّان مباشرة لأن يدها صارت لظهرها : تعبتي إنتِ

توجه قدامها بعد ما نزّل شماغه ، وسكنت ملامحه ينحنيّ أمام جلوسها اللي على طرف السرير : ديم ؟

عضّت شفايفها لثواني تشتت نظرها : كنا عارفين .. وكنا نقول لا إله الا الله ومتأكدين إن بتجي لحظة يقولون فيها توفّى .. ليه يوم توفى صدق ماتحمّلنا نهيان ؟ كلنا

سكتت ملامحه لأن تعب متعب بآخر أيامه كان مؤلم ، مؤلم عليهم هم بشكل غير عادي لأنهم يعرفون إن الموت راحته وحق لكن ما يقوون ينطقونه ، ولا يقوون يصرّحون به ويدعون حتى له يقبّل يدها لأن ما عنده ردّ ، وعضّت شفايفها لثواني تغرق عيونها بالدموع : أمي علياء ما بقّت دمعة بعيونها وأخاف عليها نهيان ، أخاف من كثر مابكت اليوم تـ

وقف يسكّتها مباشرة لأنها بتفكر بالسيء والاسوأ ، وقف يجلس بجنبها يقبّل راسها بمحاولات للتماسك : وتبكي ، تبكي تفرّغ ولا تكتم بقلبها وحنّا حولها ، حنّا كلنا حولها ودامها تقول لا إله إلا الله كل مابكت .. لا تخافين عليها

أخذت نفس من أعماق قلبها تمد يدها لبطنها ، وشتت نظره لثواني يمد يدّه معاها : لا تبكين إنتِ ولا تتعبين وإن كان يضايقك الجو تحت لا تنزلين ، محد يلومك ديم

هزت راسها بالنفي لكنه أصرّ يأشر على بطنها : عشانه ، عشانها ، لا تتعبين بالحيل ما تشيلين نفسك وبس ديم

تجمّعت دموعها بمحاجرها بشكل يحرق ، بشكل ذاب له داخل نهيّان يقبل خدها لوقت طويل يضمّها يواسيها ، وتواسيه بعد طويل الهلاك والتعب ، وكثير الدموع منه ومنها ..

↚

_

« بالأسفـل »

دخل من سمع صوت عمه حاكم يسمح له بالدخول ، ووقف فزّاع يمسح على ملامحه : بروح البيت ياحاكم ، العصر إن شاء الله نصليه ببيت أبوي

هز حاكم راسه بإيه يوقف : إن شاء الله ، تعال يانصّار

دخل نصار يتوجه لجنب ورد اللي كانت جالسة بجنب أبوها لحد ما وقف ، وشتت حاكم نظره بعد ما كانت منه نظرة وحيدة لنصّار يشد على كتفه وتعدّاه لفزاع اللي يمشي للباب تغرق عيون ورد بالدموع مباشرة لأن أبوها توجه يدخّل أخوه تحت جناحه وجلس نصار بجنبها بهمس : إرحمي عيونك من الدموع تكفين ، تكفين

هزت راسها بالنفي تغطي ملامحها : مو بيدي ، مو بيدي نصّار أشوفه وأحس ودي بيدي شيء عشانه وما بيدي

يدري إنها تقصد أبوها بشكل هزه يشتت نظره ومدّ يده ليدها : ورد ، حبيبتي

خنقتها عبرتها بشكل مجنون تحتقن ملامحها بالإحمرار : يبتسم لي ، يبتسم لبنات عمي ، يكلّمنا كأن ما صار شيء وراح لعمي يواسيه ولعمتي ويواسينا كلنا وهو أبوه نصّار ! أعرف أبوي وأعرف وش يحس بس ما أقدر أواسيه ما أقدر أسوي ولا شيء عشانه

رجف قلبه لأنها بكت ، بكت تشرح له بعجز يضمّها وما قوى ينطق كلمة وحدة لأن هذا حنانها ، هذا تفكيرها كيف يردّه وشتت نظره يمسح دموعها : يبتسم لك يبيك تشوفين إنه بخير وطيّب وراضي ورد ، وهو ما يبي يشوف دموعك يبي يطمّنك عليه

هي تعرف إنه كذلك لكن ما تقدر تكتم دموعها ومسحت بيدها على قلبها ، على عنقها تاخذ نفس : تعبت ، تعبت ما ودي أبكي قدامه بس ما أقدر ما أقدر نصّار

هز راسه بإيه يشدّ يدها ، يحاول بكل مافيه يسكّتها لأنها هلكت بالبكي وهمس يقبّل يدها اللي يشدّها بيده : أدري ، والله أدري بس قلبك رهيّف ، قلبك حنون وش نسوي به حنّا والأكيد أبوك أكثر من يدري به ورد لا تفكرين تكبر لا فكرتي فيها ، قولي لا إله إلا الله ورد

أخذت نفس من أعماق قلبها تحاول ، ومدّ يده للمويا أمامه يمدّها لها بتأكيد : حال الدنيا ورد ، الله يرحمه ويغفر له ويعوّضه بجنة النعيم عن تعبه ووجعه وأبوك طيب الله يطول بعمره ولاهو ضعيف إيمان ياورد يكفيّك

هزت راسها بإيه تاخذ نفس : آمين

قبّل خدها توصله رسالة من أمه ، ولف نظره لها : ترجعين معي؟

ورد : لا ، بجلس هنا لأن كلهم بيجلسون وأريح لي عندهم

نصّـار : توقعت .. بودي أمي البيت ترتاح وإنتِ كلّميني

كانت منها الموافقة تمسح على كتفه ، ووقفت معاه من وقف يدخل جواله بجيبه تضمّه لوقت طويل وهمس بتأكيد : لأنك بترتاحين هنا بخليّك ، لا بغيتي شيء كلميتي

هزت راسها بإيه تقبّل خده ، ومدّ خده الآخر تلقائياً تقبله وإبتسم لأنه حس بإبتسامتها : حبيبتي

_

« بالأعـلى »

خفق قلبها لأنها تـ

_

لأنها تشوفه من الشباك ، لأنها تشوف ظهره فقط ووقوفه تحس خفّاق قلبها بهاللحظة بيطلع من محلّه ويتوجه له وعجزت تتنفس من لمحت أبوه يمشي له لكن ذياب ما رفع راسه تهمس برجفة ، بخوف إنه ما يشوف : يارب لا .. يارب لا

-

كان وده يتنفس ، ودّه يشد حيله ويفكر بدون لايستوعب لأن الحال يفرض عليه تصرّفات كثيرة والحمل يثقل بظهره بدون لا يعيش شعوره ، بدون لا يستوعب ولا حتى تمرّه لحظة الإدراك بإن متعب ، واروه تحت الثرى يودعونه وما حس إلا باليد يلي مُدت لذراعه : ذياب

لف لأبوه يحسه ونطق حاكم بتأكيد : لا تروح بيتك ياذياب ، تنام الليلة هنا لقيت أمك وإلا ما لقيتها ؟

هز راسه بالنفي لأنه طول الوقت معه كيف يلاقيها ووقت حاول كانت ديم معاها ، وتنهّد حاكم من أعماق قلبه يمسح على راسه : تعال ، قصيد موجودة وإلا مشت ؟

بيّن إنه ما يدري ، ما يدري وقلبه ماتلاحق يحسّ ويدري وشتت حاكم نظره بعد ما تأمل ولده لثواني لكنه ما يقدر ، ما يقدر لأن وجهه ما يعبّر عن أي شيء يمشي معاه للداخل بدون شعور ، بدون ما يحس كأن كل مشاعره رُميت بجانب تماماً وتنحنح حاكم بهدوء : يا بـنـت

وقفت ملاذ مباشرة : تعال ياحاكم مو حولكم

دخل حاكم يسمع أصواتهم يعزوّنه بمجرد ما مرّ ، يهز راسه بإيه لأن الكل صار ينطق له بـ” عظم الله أجرك “ وخطوة ذياب وقفت مع خطوة أبوه يحس بالضغط الغير عادي لأنه ما سمع صوتها بينهم ، وما حسّ وجودها تمشي له ملاذ اللي غرقت عيونها بالدموع : أمي ذياب .. عظم الله أجرك يا أمي الله يرحمه ويغفرله ..

هي مدّت يدها لصدره تمسح عليه ، وقبّل راسها بهدوء يهز راسه بإيه بهمس : أجرنا وأجرك ، قصيد مشت؟

نزلت ورد من الأعلى بجنبها قصيد ، ورفع حاكم نظره يبتسم لقصيد اللي شُلّ عقلها بلحظة من وقوفه خلف أبوه لأنها سمعت تعالي الأصوات بـ” عظم الله أجرك عمي ، وعظم الله أجرك أبوذياب “ من نساء آل سليمان وبناتهم وتوقّعته عمها لوحده بتنزل تسلّم عليه بإصرار ورد لكن ما توقّعت تشوفه ، ما توّقعت تلمحه تحس قلبها يعتصر بلحظة لأن أمه تحت جناحه ويدّها على صدره وهو جامد تماماً وإبتسم حاكم لأنه يشوف ساكن ملامح ورد ، ويشوف قصيد اللي خُطفت نظرتها : بنتي قصيد

سكنت ملامحه تبرد يرفع نظره مباشرة ، يرفع نظره لنظرة وحدة صادفت عينه بعينها تشتت هي نظرها لعمّها مباشرة لأنها ما لقيته ولا بأي شكل من الأشكال تتوجه له ، تصافح يده اللي مُدت لها وكتمتها حروفها ما تقوى تتكلّم : عظم الله أجرك ياعمي ، الله يرحمه ويغفر له

هز راسه بإيه يشد يدها من رفعت نفسها تقبّل راسه : أجرنا وأجرك يابوك جزاك الله خير ، يدك مثلجه يابنتي وين جالسة !

—

هزت راسها بالنفي لأنها كانت تشوفهم من الأعلى وما شافت وقت غابوا عن عينها لأن ورد جات تسولف لها وناظرها حاكم لثواني لأن ملامحها تحتقن بالإحمرار لكنه ما تكلّم يمد يده لخدها ونطقت ورد لأنها تحس بقصيد بهاللحظة : فوق فيه قهوة جاهزة بالصالة لو ودكم

هز حاكم راسه بإيه يبتسم : دام فيه بنتقهوى

حس قلبه يطلع من محلّه ولاعاد به خافي بنظراته لها وقت صارت ملامحها بكفّ أبوه وكانت منها نظرة وحيدة له ، وقت لمح كيف غرقت عيونها وأكثر له ومن نزل حاكم يده يشد على كتفها بقوله “ نتقهوى “ وطلع حاكم للأعلى أولهم وبجنبه ملاذ ، وخلفه ذياب اللي أخذ بيد قصيد معه يشدّها وتشدّه وما تكلّم يقدّمها أمامه ويده على ظهرها ، ما تكلّمت حتى هي لأن الموقف فوق إستيعابها وللآن ما تستوعبه ، ما تكلّمت من رمى حاكم نفسه على الكنبة بالصالة ياخذ نفس من أعماق قلبه وصبّت له ملاذ تجلس بجنبه : أكلتوا شيء حاكم ؟ ذياب أكلت شيء ؟

هز حاكم راسه بإيه يتنفّس وأخيرًا ، يقدر يتخفف من ثقله وأخيرًا لكن عينه للآن على ذياب : تنامون هنا ذياب أبوي

جلس لأن أمه صبّت له فنجال تمده يجلّس قصيد بجنبه وهو ما ودّه ، يكذب لو يقول ودّه لأنه يبيها وببيتهم يبي الخلاء وحريّته وبيت أبوه مزدحم بالناس وهزت ملاذ راسها بإيه : جهّزت لكم الغرفة من وقت قلت ما تروحون وأريح لكم هنا ، لا تروحون يا أمي

هز راسه بإيه يأشر على خشمه فقط ، ومسح حاكم على ملامحه : من كلمك اليوم ذياب ؟ من بقى ما جاء

كانت تحس فيه بإنه ما يحسّهم ، بإن صدره يلتهب ومدت يدها هي تاخذ الفنجال اللي مدته لها ملاذ بالمثل يشد على جبينه : بقى اللي ماهم بالرياض ، اللي نعرفهم بالديرة كلهم جو ماظنتي بقى أحد

حـاكم : وشفت جوالك إنت وإلا ماشفته اليوم

هز راسه بالنفي يطلعه من جيبه : مامداني

فتح تشوف هي كم المحادثات ، كم الإتصالات عليه وشتت نظره لأبوه اللي تنهّد : ترد عليهم بعدين ، نهيّان نام وإلا صاحي ؟

رفعت ملاذ أكتافها بعدم معرفة ، وخلّص ذياب فنجاله يتركه وتركت قصيد بالمثل ينطق حاكم : ارتاح يابوك ، ارتاحوا

هز راسه بإيه يوقف : إن بغيت شيء أنا صاحي

سكن داخل قصيد كله من توجه ذياب يقبّل راس أبوه ، يسكن داخل حاكم اللي شتت نظره لأن نهيّان ، ورد ، الكل ، هو يحنّ عليهم ويحنوّنه بحنان يناسبهم إنهم عياله الصغار لكن ذياب مختلف ، ذياب يحنّه حنان “ السند “ بطريقة ما ويهزّه يهمس من مشى : الله يحفظك يابوك

_

هي مشيت قبله وما خفّ خفق قلبها لحظة لأن هذا شعور - لأوّل مرة - يعيشونه بإنهم يكونون لهالدرجة قدام الناس ودخلت يدخل خلفها يسكّر الباب وتعرّت روحه مباشرة لـ

_

لأنها وقت دخولها ما بعدّت ، تركت له المسافة الكافية يسكّر الباب فقط وبمجرد ما سكرّه هي لفت كلها تضمّه ينحني لها ، ينحني لها صار يحس بضرب براسه مو نبض وبس وقبّل عنقها يتنفس ، توّه يتنفس وعضّت شفايفها تشد أكتافه تمسك حارق دموعها بالقوة : أبـوي ..

أخذ نفس من أعماق قلبه من عنقها ، من ريحتها هي كأنه طول الوقت الماضي مايعرف النفس ولا يتنفّسه وصابته بمقتل وقت نطقت له هي “ أبوي “ اللي أكثر من يفهم حنانها ويحبّه هو ، أكثر من يصرخ بها لها هي بكل موقف ..

شدّته عن شوقها ، وعن شعورها ، وعن لهفتها اللامتناهية له هو وعن إنها تعرف داخله ولهيبه من الفقد عاهدت نفسها ما تدمع ، لكن اللي يلاقي حنانه كيف مايدمع هذا سؤالها ومدّ يده يمسح دموعها ، يقبّل جبينها وبعّد مسافة يشوفها : طيبة إنتِ ؟

هزت راسها بإيه ترفع يدّها ليده اللي على خدها ودها تنهار من منظره وهلاكه : طيّب إنت ؟

ما يدري وش حاله ، ما يدري وش بصدره أساساً يدري بآخر الأحوال وخَفق قلبه من وقت رفع عينه لها بنزولها والباقي كله ما عاد يدركه ، ما يدركه من رجع يضمّها من جديد تشدّ ذراعه اللي حاوطتها كلها من قبّل راسها تعرف كم لهفته وتحلف به لأن كم له ما لقاها لكنها هزّت راسها بالنفي ترجع ملامحه قدامها ، تمدّ يدها لوجهه بالقوة تكتم دموعها : ذياب

هز راسه بالنفي برجاء : لا تسأليني ، لا تسأليني مدري

عضّت شفايفها لثواني تشوفه ، تتأمله وما تسيطر على حنان نظراتها اللي ودّها تدخله بضلوعها وتبعد به وسكن ، فعلاً سكن كله لأن باكي ملامحها مو شوق وبس ، باكي ملامحها كانت له ولحاله وسكن كله ياخذ نفس من أعماق قلبه فقط يجلس على طرف السرير ، وجلست بجنبه تمد يدها لفخذه : ذيـابي

سكن كله لأن راسه يصدّع ، لأنه ما يستوعب للآن وهز راسه بالنفي : طيّب قصيد ، طيّب ماعلي خلاف الحمدلله

عضّت شفايفها لثواني لأنه ما بيتكلم ، ما بيقول لها شيء وشد على جبينه ياخذ نفس بهدوء : الحمدلله

رقّ قلبها تمد يدها لكتفه ، لأعلى ظهره : الحمدلله

سكت ، لدقائق طويلة كان منه السكوت يحس يدها اللي على كتفه ، يدها الأخرى اللي على فخذه وكيف إن ودها تحتويه يشتت نظره فقط للآن ، لهاللحظة هو ما يحس شيء وما يدري كيف يحسّ ونطقت هي : شوفني ذياب

جمّع نفسه يلتفت تقابل ملامحه اللي هزّت لها قلبها كله من سواد الإرهاق وقل النوم تحت عيونه وإنتفاخها ، من جمود ملامحه اللي تعرف وش خافيها لو يستوعب وهُز قلبها لأنها إشتاقت له ، إشتاقت لرمش عينه تاخذ نفس : كم صار لك ما نمت ؟

أشّر بإنه ما يدري وما يفرق معاه لكنه يفرق معاها ، يفرق معاها وأكثر من…

↚

وأكثر من مدّت أناملها للإنتفاخات تحت عينه ، لرمش عينه يسكن كله يتأملها ، يتأمّلها عن كم إشتياقه الحارق لكل تفصيل بملامحها وما يكتفي باللمس مثلها ، مثل ما تتحسسّ له طرف حاجبه ، رمشه ، وتحت عينه تصرخ له عيونها باللهفة ، بالشوق ووقت نزلت يدّها لخده آلمته ، آلمته يغمّض عينه من الحنان وعضت شفايفها لثواني بدون مقدمات : أحبك ذياب

هي نطقتها وسط مرور أناملها على طرف شنبه ، على شفايفه تهز له روحه وتعرف وش بيكون ردّه وتراهن عليه ، تحلف به يفُوز رهانها من بعّد يدها يلغي المسافة يقبّلها ، من حسّت كل شعوره بيده اللي بشعرها ، من إنه مايبيها تبعد عنه ولو بيدّه ، دخلها بضلوعه وما يكتفي وما بعّدت ، ولا بعّد هو ما ينتهي شوقه ، ما تنتهي لهفته وعضّت شفايفها ترتكي بين عنقه وكتفه ، تحس بقُبلاته لخدها ، راسها ، ويدّه اللي تحاوطها وشتت نظرها بهدوء : شفتك العصر بين الرجال ، وشفتك قبل شوي لحالك

رفع نظره لها يبيها تكمّل ، ورجفت شفتها لوهلة ترجع يدها على خده : أعرف وأشوف إنك ماترحم نفسك وأخاف ، خفت تصدع خفت يضايقك النور خفت كل شـ

نزّل يدها اللي على خده لشفايفه يقبّل باطنها بهدوء : ما عليّ خلاف ، لا تخافين

ما يركّز ، للآن ما يحس بشيء غير إنه يتأملها ونطقت بهدوء : كلّمني ذياب لا تتأملني مو أنا الموضوع اليوم

ذيـاب : كل مواضيعي إنتِ قصيد ، لا تسأليني مابي شيء ولا أحس شيء

تأملته لثواني تشوف من عينه إن كل خافيه ووضوحه بهاللحظة هي مو غيرها ، تسكن كلها من رجع ينحني بالهدوء يقبّلها لوقت طويل يخطف نفسها وما يكتفي لين ما شدّت ذراعه من حسّته لأنه يقبّل نابض عنقها : ذيـاب

هز راسه بالنفي فقط ما عاد يحسّ الكون حوله : لا تردّيني

رجف قلبها لأنها تعرفه ، لأنها تعرف وشدّت ذراعه ودها يستوعب نفسه ومكانهم من غيّر مكانها من جنبه ، لحضنه بدون مقدمات : أقدر أردّك ؟

هز راسه بالنفي لأنها ما تقدر ، ولا هو يقدر ، ولا الدنيا كلها تقدر تردّه عنها لأنه ما عاد يحسّ بشيء إلا هي ، وما يبي شيء إلاّ هي : ما تردّيني

عضّت شفايفها لأنه يعرفها ، ولأنها تعرفه وتخافه بهاللحظة من فار دمّه بالإدراك ينحني ، يتكيّ راسه بحضنها : المفروض حنّا ببيتنا

مدّت يدها لشعره تهز راسها بإيه ، ينبض عنقها على عينه من وقت رفعت راسه تجاهها وذاب كله ، كله إنتهى من كان منها السؤال برجاء : تألمت اليوم ؟ بس جاوبني ذياب

هز راسه بإيه فقط ينتهي ، ينتهي وسطّرت موته من إنحنت تقبّل جبينه عن صداعه ، وعينه عن الألم يهز راسه بالنفي لأنه ما عاد يقدر ولعبت بشعوره كله : وش تسوين بي

_

« غـرفـة ورد »

جلست ورد على السرير لأن البنات بينامون عندها كالعادة ولفت وسن نظرها لورد : قصيد ما مشت صح؟

هزت درة راسها بالنفي : سمعت عمي حاكم يوصّي أول قال لحد يروح ناحية غرفة ذياب ولحد يزعجهم

هزت ورد راسها بإيه : بما إن ذياب بيجلس هنا أكيد معاه

إبتسمت وسن فقط وهي ما ودها تفتح الموضوع لأنها تعرف وش بيميل له الحديث قدام ورد وكيف بيضايقها ، لكن جود فتحته : ذياب يشبه أبوك مره ورد

هزت ورد راسها بإيه وهي تعرف إن قصدها الهيئة ، وما تكلّمت توق اللي تتأمل أظافرها فقط تاخذ درّة نفس من أعماقها : زين اللي جلس هنا ، عشان يكون مع أبوك طول الوقت واضح عليه متأثر عمي ووجود ذياب يخفف عليه

إبتسمت ورد لثواني : فعلاً ، بشوف قصيد لو صاحية تجي

هزت وسن راسها بالنفي بذهول : وش تبين بالبنت خليها مع زوجها ، موجودة ما مشت الظاهر بس معاه أكيد

هزت درة راسها بإيه : عزاء ، ومو وقته والله يلطف بالحال بس بنات آسفه لكن أبي أحد يفزّ لي زي ذياب اليوم

ناظرتها وسن لثواني ، وضحكت جود لأنها هي إنتبهت : لاحظتي ؟ وقت وقف عمي يرد علينا ابتلش ودّه يمشي وعلى أعصابه ومتوتر بس يوم قال بنتي قصيد تبدّل

ضحكت درة تهز راسها بإيه ، وأخذت ورد نفس من أعماقها لأنها " شايله همه " لكن هي مثلهم ، شافت نظرته لقصيد ولأنها تعرف قصيد ترتاح من هالناحية وإبتسمت وسن ما تعلّق تنتبه لها توق : الإبتسامات ؟

إبتسمت فقط تهز راسها بالنفي ، وضحكت درّة : ما ودها تتكلم كأننا ما نشوف من عيونك الحين ، قولي

إبتسمت ورد تشوف وسن : وتخجل كمان ، أبحرت وسن

ضحكت تهز راسها بإيه : لا تضغطون علي مايخصكم ، ساكتة ما تكلمت يعني مالكم دخل بعقلي وخيالي

ضحكت درة تهز راسها بإيه فقط ، وإبتسمت ورد لأنها تعرف إن الحزن هلكهم لدرجة حتى الإبتسام والضحكات بهالوقت يجي وقعها غريب ولفّت جود نظرها لتوق بهمس : إنتِ فيك شيء ؟

_

« الفجـر »

فتحت عيونها على صوته يصحّيها ، من مدّ يده لكتفها عشان لا تفز تسمعه يسمّي عليها : بروّح المسجد قصيد

ناظرته لثواني تشوف مبلول شعره وهزت راسها بإيه يشتت نظره : بس قومي قفّلي الباب وراي ، ونامي

عدلت نفسها تجلس لأن ودها تستوعب لثواني وإنتبهت إنه يتأملها ، إنتبهت على نظراته ترجع شعرها خلف أذنها ، تشدّ اللحاف على جسدها : بتطوّل ؟ ليه أقفل

شدّ ذياب يده على ركبته يوقف : قرّبت تقوم الصلاة ، قومي

ما لها حيل ، مافيها حيل بشكل رجّع خطوته لجنبها من مدّت يدها لجبينها : بك شيء ؟

هزت راسها بالنفي يمد يده لجبينها وعنقها ، لخدّها يتأكد بنفسه وإنحنى ياخذ جواله : أقفّل أنا خلاص لا تقومين ، لا بغيتي شيء دقي علي

_

كان منها الإيجاب توقف خطوته يتأملها ورجع يمدّ يده من جديد تهمس : مافيني شيء ، لا تطول ذياب

هز راسه بإيه ينحني يقبّل راسها : بقفل ، بس دقي علي لا بغيتي شيء المسجد قريّب وإلا تقفلين إنتِ ؟

مدّت قصيد يدها ليده اللي على خدها : قفّل إنت

قبّل راسها للمرة الثانية ياخذ شماغه يخرج بقلق ، يشوفها لآخر لحظة من خروجه وقفّل الباب يترك المفتاح بجيبه تحت أنظار أبوه اللي مرّ من جنب غرفته بيشوفه يقوم أو لا : يالله يا ذياب ، ما ردّت ديم يا ورد ؟

هزت ورد راسها بالنفي تتأمل ذياب : لا ، ما ردّت ..

لف ذياب نظره لها : المطبخ به أحد ياورد ؟

رفعت أكتافها بعدم معرفة : أجيب لك ، تبي مويا ؟

هز راسه بإيه يأشر لها بيده ثنتين تتوجه للمطبخ ورجعت تمد له المويا ينطق بهدوء : عشتي ، ما قام نهيان صح ؟

ورد : لا ، دقيت عليه ما يرد ودقيت على ديم ما ردّت عشان كذا أبوي يسأل

هز راسه بإيه يتبع أبوه اللي سبقه للأسفل ، يتوجه ذياب خلفه بهدوء : تعب نهيّان البارح ، لا تلومه ما صحى

يدري حاكم إنّ كلهم مرهقين ، لأن هو بنفسه ما غفى له جفن ونطق ذياب بتساؤل من خرج للشارع : نمت أبوي ؟

لف حاكم نظره له لثواني فقط ، يوصله الجواب من عين أبوه أساساً بدون لا ينطق يكمل السكون لحين وصولهم لعتبة المسجد يشوف ذياب ، ويحسّ النظرات عليهم من جيرانهم اللي ينطقون “ عظم الله أجرك يابوذياب “ وهُلك قلبه لأن أبوه يرد بالإشارة على صدره ، بإنه يجاوب إيماء براسه فقط : بك شيء ؟

عدل حاكم وقوفه بالصف بهدوء : الله أكبر ياذياب ، تعدّل

تعدل تستوي الصفوف ، تستوي ويُهز قلبه بدون ما يهدأ لو لحظة وحدة لأن أبوه “ مُختلف تماماً “ بشكل ضيّع منه خشوعه كله ، بشكل حسّه من وقت نطق الإمام “ الله أكبر “ ترتخي أكتاف أبوه اللي يحس لوعة صدره أضعاف بشكل محد يفهمه لأنه يفكر بفقدانه هو لأبوه بهالعمر ، وفقدانه لولده اللي “ جنبه “ بشكل ما يستوعبه عقل بشر وبشكل هو فكّر فيه يهلكه ، هو ما فقد ذياب بالموت ولا بغيره ذياب واقف جنبه ، لكنه يحسّ قصر العمر بشكل غير عادي ويدري إن الموت حق لكن أفزعته الفكرة ، أرّقته الفكرة وقت بقى هو يفكر بكل ذكرياته مع أبوه ، وبردت عظامه وقت فكّر ، وش ذكريات ذياب معاه غير الجروح ، والقسوة ، والشِّدة اللي بالمقابل كانت لين تام مع أخوانه يصبّر نفسه ، يتصبّر بالقوة والشدة رغم إحساسه بالضعف الغير عادي وهو يضعف ، يضعف بكل صلاة لربّه خشوعاً لكن هالمرة وده يجهش من بُكاه مو سخط ، ولا قلّ إيمان ولا رضا لكن لأن اللي بقلبه كثير ، كثير ولو ما يدري بإن ولده بينكسر مباشرة بمجرد ما …

_

كثير ولو ما يدري بإن ولده بينكسر مباشرة بمجرد ما يشوف دموعه ، ويشوفونها الناس حوله ما كان قصّر ولا ردّها يجلس للتشهد ، يردد يقين بإن لا إله إلا الله يتنفّس ، أو يحاول يتنفّس وقت سلّم الإمام ، وسلّم حاكم وذياب اللي لف نظره لأبوه “ يسكن “ فقط لأنه ساكن وداخله ينهار يشوف هالشيء ويعرفه وما تكلّم ، ما نطق بحرف غير إنه يفتح له المويا يتركها أمامه وهذا تعبير ذياب ومداراته اللي حاكم أكثر من يعرفها وتمنّى ، لوهلة طغت الأنانية بصدره يتمنّى يكون ولده عاصي ومايبرّه لأنه أهون عليه بشعوره لو كان كذلك ، تمنّى على ضياع السنين الماضية بالشدة ، والقسوة ، وكثير الحدود يكون ذياب يقابله بالمثل ، يقابله بالهجر ، بالعقوق ، بالقطاعة وأضعفه يقابله بوقوفه بوجهه لكن ذياب ما يوقف بوجهه ، ذياب وقف بوجه ظلمه يوم تجبّر بإنه ياخذ أعز أشيائه منه وردّ تجبر هو بنفسه يطبع " كف " على ملامح ولده اللي بكل مجلس ، بكل جلسة يُصرخ ببره ، برجولته ، بإنه " ونعم الإبن " ويحسدونه عليه لكن مايدرون بالخافي ، ما يدرون به ورجفت أكتاف حاكم من أوشك يجهش ببكاه تشحب نظرة ذياب مباشرة : أبوي

سكت يتقطع داخله ، سكت يحاول يمسك نفسه وشتت نظره لبعيد : الله يرحمه ويغفر له ، الله يرحمه يا ذياب

هز راسه بإيه وهو يرجف صدره ، يرجف لأن أبوه يصد بالشماغ عنه ما يشوفه وأخذ حاكم نفس من أعماق قلبه يشتت نظره للمدى : ما أذكر إني برّيت فيه بر يُذكر ياذياب ، أذكر إني طول عمري تربية نهيّان ، ومع نهيّان ولا أذكر إنه مرّة ، تأفف وقال ترى أنا أبوك ياحاكم

سكت ذياب يشتت نظره ، ونُفض صدر حاكم توسع الإختلافات بعينه بشكل حارق : كنت عاصي ، ما أشوف فوق راسي راس ياذياب لا شدّت أنا حاكم ، وأنا أبو حاكم ، وأنا أمه وأنا كل الناس له من يحتاج حاكم ؟

سكت تُبتر حروفه من كتمته عبرته ، سكت تخنقه نفسه يمسح على ملامحه اللي صارت تشّع حرارة من كتمه لحزنه ، من محاولته يمسك دموعه : بعد ما راح نهيّان ، ما لقيته يعاتبني يوم صرت ملازمه وطول الوقت يمّه ، ما سمعته مرة قال يابوك تعدّيتني وحطيت جدك أبُو لك وما شفتني ويوم مات عرفت إن لك أبو ، ما سمعته مرة يقول ولدي أبو نفسه وما

شتت ذياب نظره لأن أبوه يقارن وتكتمه المقارنة ، لأن أبوه حرقة جوفه أعظم من فقده لأبوه فقط وما عرف وش يسوي ، إحتار وش يسوي غير إنه مد يده لكتف أبوه : أبوي ، أبوذياب

لعلّها جات على جرحه ، لعلها كسرت ظهره " أبوذياب " بهالشكل منه وإنحنى ذياب يقبّل كتف أبوه فقط حرقته روحه ، إحترق كله يـ

↚

إحترق كله يقبّل كتف أبوه لوقت طويل يفهمه حاكم ، ووقف بعده يقبّل راسه يبتعد بخطوته لأنه ماعاد يقدر حتى هو ، ولأنه أكثر من يعرف أبوه وشد على جبينه يوقف على باب المسجد يلي مافيه بداخله إلا أبوه ، يوقف على العتبة لا داخله ، ولا خارجه جُزء منه يُنهش على أبوه الجالس بكل ضعف ، وجزء منه يحاول يوقف صداعه ويتنفس أنسام الفجر يمكن يهدأ داخله اللي ثار كله وقت لمح كفوف أبُوه ترفع للسماء يناجي ربه ، وقت حس إنّ عيونه ما عادت تطيعه تغرق بالدمع مباشرة على هالمنظر وحُرق خده نار من نزلت دمعته يمسحها بطرف كمه مباشرة يحاول ، يحاول يشد حيله اللي يهدّه موت متعب والحزن مرة ، وتهدّه أحوال أبوه ألف مرة يشتت نظره فقط : رحمتك يارب

رفع نظره للسماء ينتظر متى يشعّ نور الشمس اللي ودّه وكل وده تشرق بقلب أبوه قبل السماء ، ودّه يشيل الحمل كله عنه لكنه ما يعرف ، لأبوه بالذات ما يعرف ..

لف حاكم نظره للخلف يشوف ولده الواقف على باب المسجد ، شاف كل عمره بهالوقوف بلحظة ما يغّصه ، يغصّه بشكل "شديد التأثير " من نزل ذياب خطوة عن العتبة لساحة المسجد الخارجية ، ونزل أكثر كان وده يناديه لكن ما طاعه الصوت وهو يشوف إن يد ذياب على راسه : ذيـ

ما طاعه صوته ولا الخطوة ولا حيله من سمع صوت ضرب فرامل غير عادي بدون مقدمات ، من تعالت الأصوات بلحظة يصرخ حيله اللي يحاول يشدّه ويقوم وما يدري ، ما يدري كيف وقف ولا كيف صار وقوفه على باب المسجد يشوف المنحني للأرض قدام سيارة أوشكت تصدمه يبيّن من الحال ، يشوف السائق نزل غاضب وبين بيض الثياب اللي تجمّعت هو ما لمح ولده يحس قلبه بيخرج من محلّه ، ما عاد يحس كونه حوله بعجز غير عادي ومدّ ذياب يده لأبوه مباشرة بقلق : أبوي

شد يده لوهلة ما يصدقه ، ما يصدقّه لكن ذياب اللي كان جالس بطرف الساحة وقت سمع الصوت ، وشاف الحادثة هو فزّ كله يركض لباب المسجد لأنه يدري وش بيصير بصدر أبوه وداخله وإنتهى حيله وقت شاف إندفاع أبوه تجاه الباب وشد يد أبوه يوعيّه : أبوي أنا ذياب هنا

بكى داخل حاكم كله لأنه هو واقف على عتبة المسجد بالأعلى فوق الدرج ، وذياب بثالث درجة يمسكه لكن شدّت عروق ذياب كلها من أخذ أبوه راسه يقبّله بدون مقدمات ، من حاوط راسه كله بذراعه يقبّله " بدموع "

أحرقت داخل ذياب كله يشد ذراع أبوه اللي بكى " فعلاً " يقبّل راسه : كسرت ظهري ياذياب .. كسرت ظهري

_

ما عاد يحس بقلبه من الوجع ، من حضن أبوه له وإنه يقبّل راسه للآن وشدّ ذياب ذراع أبوه اللي تحاوطه يقبّلها وما قدر ينطق بكلمة ، ما قدر ينطق بحرف من حرقة جوفه ياخذ حاكم نفس من أعماقه يتدارك نفسه ، يتمالك نفسه ومسح دموعه يوقف على حيله بالقوة يشدّه وشتت ذياب نظره بهدوء لأن نطق أبوه له " كسرت ظهري " مؤلم مايدري كيف يرّده ، ولا يدري كيف يقابله : لا تخاف علي أبوي .. لا تشيل همي طيّب وماعلي خلاف

لف حاكم نظره له لثواني ، لف نظره لولده اللي أمس ، بالأمس كان عمره ٧ سنين واليوم واقف قدامه بهالشكل ، بالثلاثين من عمره بشنبه ، بكامل رجُولته من عرض أكتافه لأقدامه بآثار قسوة الزمان ، وقسوته هو بوجهه يشتت ذياب نظره لبعيد : نروّح البيت ، ترتاح

هز حاكم راسه بإيه ينزل الدرج ، لكن بيد ذياب اللي تسند ذراعه وشتت نظره تكتمه عبرته مباشرة : يوم إنك ولد السبع سنين ، تجلس معي لين تشرق الشمس ولا تروّح وكلٍ يقول ياحاكم الولد عنده مدرسة ليه تصحيّه الفجر

سكت ذياب ، وشتت حاكم نظره : كنت أقول لهم الصلاة حق الله عليه ، لكن جلسته معي مالي بها كنت أبيك تروّح البيت بعد الصلاة وترجع تنام لين وقت مدرستك ، لكنّك تعنّد وبقعد معك لين تشرق الشمس ما أروح بدونك

إبتسم ذياب فقط ، وشاب قلب حاكم يتأمل ساحة المسجد الخارجية بكتمة : يوم رسلتك ، قلت هاك الفلوس روّح قل للعمال يحمّلون مويا للمسجد وإنتبه

هز ذياب راسه بإيه يشتت نظره : يومها جاء واحد ، مدّ لي بيده شيء قال وصّله لأبوك

ضحك حاكم لأن قلبه يوجعه ، قلبه يحرقه بهاللحظة : قلتله من إنت ، قال وصّله لأبوك وغلطان ، أشهد بالله غلطان يوم فكّر يتجبر عليك يقولك وصّله

ضحك ذياب لأنه يتذكر ، يتذكر سخريته منه : قلتله تبيه وصّله بنفسك ، من يكون يتأمر علي ؟

ضحك حاكم وسط حرقة قلبه اللامتناهية ، وسط ناره الغير طبيعية وسكت ذياب يشتت نظره لبعيد : كنت أدري لا شفته ما بتخلّيه وجيت له ، جيت هديّت له حيله من تكون تلمس ولدي ، وبأي حق تلمسه ، صارت بين الكبار وأنا ما كبرت ألوي ذراعه بنفسي بدل لا تلويها له

لف حاكم نظره لولده ، وهز ذياب راسه بإيه يشتت نظره لبعيد : كنت أدري أبوي من ، وأعرف من يكون أبوي وأشهد له قبل كل الناس وما ودي ، ما ودي يقولون ذياب ولد حاكم ما ربّاه حاكم ياخذ حقه بيمينه ..

_

« بيـت حـاكـم »

وقفت ملاذ على الشباك تنتظر ، تنتظر وتحس قلبها " يغلي " لأن حاكم طول الليل ما رفّ له جفن ، طول الوقت ساكت وساكن بشكل يتعبه هو تعرف هالشيء ورغم عديد محاولاتها فيه لكن ما…

_

‘

لكن مامنه تجاوب ، ما يطلع منه شيء كأنه بعالم آخر غير عالمهم تماماً وخرجت من الغرفة تسمع الهدوء ، والصمت الطويل تلف نظرها تجاه غرفة ذياب : وما أدري عن حالكم ، الله يهدي بالي

أخذت نفس من أعماق قلبها يسكن داخلها بلحظة من لمحت مجيء حاكم وذياب اللي يمشي بجنبه ، من لمحت السكون بخطوتهم تشوف إن ذياب وقف على العتبة الخارجية ويده خلف ظهر أبوه الواضح إنه ما بيدخل البيت لكن إلتفات حاكم له “ ما تصدقه “ ..

-

هز ذياب راسه بإيه يشد ظهر أبوه يحاول يطمّنه : باخذ كم شيء من البيت وأعوّد ، ماني مطول

ناظره حاكم وداخله ينهش نفسه من القلق ، من السخط الغير طبيعي وده يدخله قدامه وما يبعده عن عينه لحظة ونطق ذياب بتأكيد : ماني مطول .. البيت قريّب

هز حاكم راسه بالنفي : ماهو قريّب ، لا تسرع يا ذياب

أشّر على خشمه فقط يناظره حاكم لثواني وللآن ، لهاللحظة ما فهم هو ليه قفّل الباب على قصيد : قصيد

نطق ذياب بهدوء يمسح على أنفه : نايمة

هز حاكم راسه بإيه : إيه نايمة ، وراك قفلت عليها الباب ؟

سكت لثواني يشتت نظره بهدوء وهو قفّله لأسباب كثيرة ، لأنها نايمة أولها ، ولأنها بترتاح لو الباب مقّفل ما بتقلق بعدم وجوده ، ولأن حالها ووضعها ما يسمح لأي أحد يدخل قاصد أو غلطان ولأنه ما تعوّد يكونون عند أحد نهائياً وفهم حاكم يهز راسه بإيه : لا تطول

هز ذياب راسه بإيه يركب سيارته ، يلف نظره لأبوه الواقف على الباب للآن يضرب البوري - بخفة - لمجرد إنه يطلبه يروح للبيت ويرتاح وإنتبهت ملاذ على هالحركة ومن رفع حاكم يده له ، من بقى بوقوفه لين ما غابت سيارة ذياب عن نظره تشوف إنه لف يدخل للداخل ونزلت مباشرة : حاكم

دخل ينزع شماغه بتعب ، بإرهاق شديد ياخذ نفس : مانمتي

هزت ملاذ راسها بالنفي تمشي له ، تمد يدها لصدره مباشرة : وين أنام وما لقيتك ، وين راح ذياب حاكم ؟

حاكـم : بيته ، راح ياخذ أغراض ويرجع ماهو مطول

إبتسمت لأنه مرتاح تحس هالشيء ، وجلس على أقرب كنبة ياخذ نفس من أعماق قلبه : أمي ما صحت ؟

جلست ملاذ بجنبه تمد يدها ليده : صحت ، أمي عندها لا تشيل هم صلّت ورجعت نامت على طول

هز راسه بإيه يتأمل ساعته تنطق ملاذ : توه راح ياحاكم

_

_

« قصـر ذيـاب »

بمجرد دخوله إرتخت أكتافه مباشرة ، إرتخت ولا فيه وقت للإنهيار يمسح على أنفه يركض للأعلى ولا ودّه يطول أكثر ، ما وده يستوعب حتى بيته يفتح دولابهم ، ملابسها بهمس : وش المناسب تلبسينه لهم

مدّ يده يتأمل فساتينها لوهلة ، كلها تلبسها “ له “ فقط وشتت نظره يطلع جواله من جيبه يشوف إنها ما رسلت له شيء يحتار ، بين كل ملابسها يحتار وما وده يتصل

_

وما وده يتصل عليها وتصحى : تزهينها إنتِ ، ما يهم وش أجيب لك أنا

حاول يقنع نفسه من طلع لها جينز ، وتيشيرت أبيض يفكّر هي تلبسهم مع بعض أو لا : لا ، ما تحبينها

رجع يطلع بنطلون أسود ، وتيشيرت رمادي يتأمل لثواني وعضّ شفايفه : وش تلبسين حبيبتي ، وش تلبسين؟

هو لف نظره لملابسها لوهلة يحاول يركّز لأنه يعرف دقتها بموضوع الملابس وإنهم حالياً ببيت أهله مو منطقي تلبس شيء ما تبيه : إذا ماعجبك ، أرجع آخذ لك غيره

طلع شنطتها يترك لها الملابس اللي طلعها ، وأخذ تيشيرت من تيشيرتاته لها في حال ماودها تلبس أي واحد منها ونزل نظره لباقي الأمور اللي ممكن تحتاجها ياخذ لها ، كل تفصيل ماغفل عنه يسكّر الشنطة بعد ما دخل لنفسه معاها ملابس ، ومد يده ياخذ ثوب من ثيابه وشماغ لكن سكنت ملامحه من لمح عباياتها جنب ثيابه : أكيد ما تبين عباية غير اللي معك ؟

هو سكت يفكر فعلياً ، وجدياً يفكر لكنه شتت نظره بذهول : بترجع تاخذ لها ، بترجع لا تفكر الحين عوّد ..

نزل الدرج بأسرع ما يمكن يركب سيارته ، ياخذ نفس من أعماق قلبه ويحمد ربه على إنشغاله بهاللحظة وماوده تجيه لحظات الإدراك بأي موضوع غير وقت يختلي ، وقت يصير لحاله وبس وحرّك مايحس الخط إلا بوصوله أمام بيت أبوه ياخذ الشنطة بيده ، وثوبه بيده ينزل على أقل من مهله للداخل وفتحت له ملاذ قبل يدق الباب تسكن ملامحه : أمي

أشّرت له بالسكون يدخل خلفها وسكنت ملامحه ، فعلاً سكنت من لمح أبوه “ نايم “ بجلوسه تهمس : عجز ينام ، أقول له تعال الغرفة ترتاح يقول ما جاء ذياب للحين

سكت يترك ثوبه على الكنب والشنطة ، وتوجه لأبوه ينحني قدامه بهمس : أبـوي

فز حاكم مباشرة يستوعب مكانه ، وشد ذياب على ركبة أبوه : تروّح ترتاح ؟ ما نمت من البارح أبوي

ناظره حاكم لثواني ، وإبتسمت ملاذ : جاء ذياب ، كنت تنتظره وجاء تقدر تنام وترتاح مابينك وبينه إلا كم جدار

سكت لأنه صار “ مفضوح “ بضعيف الحال تجاه ذياب اللي هز راسه بإيه فقط : ولاني مروح لين ترتاح ، ماعليك

إبتسمت ملاذ يوقف حاكم اللي ضرب على كتف ذياب فقط ، وطلع معاها للأعلى ياخذ ذياب ثوبه ، وشنطة ملابسهم يصعد للأعلى يسمع صوت باب أمه وأبوه اللي تقفل يطلع المفتاح من جيبه لكنه سمع أصوات قريبة منه ينطق مباشرة : يـابنـت

سكتت جود مباشرة توقف توق ، وفتح باب الغرفة يدخل وقفّل مباشرة خلفه تكشّر توق : ما نتكلم يعني صح ؟ ومقّفل والمفتاح معه يعني مدري وش أقول صراحة

ضحكت جود : مو متعود ، خايف نطلع بوجهه بالغلط

كشّرت توق تشد الجلال عليها : لأننا نتمشى بدون جلالات طبعاً

_

ناظرتها درة لثواني : ممكن تقولين لي وش يدريه عنا ووش نتمشى فيه ؟ سمع أصواتنا قال يابنت عشان ننتبه

ناظرتها توق بذهول : طيب وش فيكم علي الحين مافهمت ؟ وش النظرات ذي وش التبرير هذا يعني ؟

ضحكت جود بذهول : محد كلمك روحي نامي بس روحي

-

« غرفـة ذيـاب »

قلق ، كل نومتها كانت قلق بشكل ما يتصّوره أحد لدرجة إنها فزّت وقت نطق " يابنت " كأنه ينطقها لها : ذياب

سكّر الباب خلفه يقفله ، يعلّق ثوبه ولف نظره لها : أبوي

ناظرته لثواني تاخذ نفس ، تجلس : مين يابنت ؟

توجه يغسّل يديه : درب عشان ما يطلع أحد ومايدري بي

قصيـد : بس قلتها قريب هنا ، كأنك تقولها لي

لف نظره لها لأنها " دايخة " تماماً ، ونفض يديه يمشي لها : هنا سمعت صوت ، صحّيتك يوم قلتها ؟

هزت راسها بالنفي من جلس على طرف السرير بجنبها تأشر له يقرب ، وسكنت ملامحه لأنه بمجرد ما قرّب هي إرتكت تسند راسها بين كتفه ، وعنقه ينطق مباشرة : فيك شيء قصيد ؟ يوجعك شيء ؟

مافيها شيء ، لكنها مرهقة لدرجة تفز كل شوي لغيابه ومجيئه ومد يده لعاري ظهرها يمسكها : قصيد أبوي

أخذت نفس من أعماق قلبها : ما صلّيت للآن ، عجزت

ناظرها لثواني ولو ماكانت الصلاة " حق " كان شالها عنها ، ولفت نظرها له تعاتبه يبتسم بهدوء : آسف

إبتسمت فقط تاخذ نفس ، ترجع جسدها للخلف ووقف هو بدوره : تقومين الحين ؟

هزت راسها بإيه يفتح الشنطة ، ومد لها تيشيرته تبتسم بهدوء : جاي ومعاك حلول يعني

إبتسم بهدوء يتأملها : ما قلتي مو عدل تسبب وماتحل ؟

حسّته غير ، أو حسته يحاول يكون غير تلبس تيشيرته وهي بالليل ، من عدم إحساسه بشيء وإن كل رغباته هي ينُولها إستغربته لكن تحوّل إستغرابها لتفهّم شديد لأنها تعرفه ونبض عنقها خجل من إنه يتأملها : وش يعني

هز راسه بالنفي : قومي ، عشان تصلين وننام

إبتسمت لثواني تهز راسها بالنفي : تتوقع بنام معاك يعني

لف نظره يتأمل الغرفة : ووين ترّوحين عني ؟

وقفت تعدل تيشيرته عليها : حدنا هالغرفة مو ببيتنا ، أروح لورد هنا وما تردّني تعرف هالشيء ؟

وقف يقابلها بهدوء : ما يمديك لا هنا ، ولا ببيتنا ماتروّحين

يعرفها ، يعرف كيف تحبّه ويعرفها بشكل يريّحه تجاه كل شيء بدون مبالغة وإبتسمت فقط تتوجه للحمام - الله يكرمكم - ياخذ نفس من أعماق قلبه ، كثير اللي بداخله ، وكثير اللي على ظهره ، وكثيرة مشاعره ما يستوعبها وما يدري ، ما يدري كيف لو ماكانت قصيد بحياته ينشغل بوجودها ، يتلهّف لرجعته لها ، يفكّر فيها كل ما شدت عليه وكل ماحُرق قلبه يتذكرّها برد للهيبه ، ما تسأله ، ما تردّه ومكانه للأبد بين أحضانها : لا تطولين

هو نطقها بعدم إدراك منه يـ

_

ياخذ جواله ، يجلس على طرف السرير بإنتظار لخروجها يتأمل كم المحادثات ، كم الناس اللي تعزيّه يرد ، وأخذه الوقت بالرد يرفع نظره لها من خروجها وإنها تحاوط جسدها بالمنشفة يأشر لها : جبت لك ملابس

هزت راسها بإيه يوقف : مافيه مويه ؟

لفت نظرها لثواني تدّور : لا ما أعتقد ، كانت فيه بالليل مسح على جبينه يجلس : بشوف ورد إن كانت صاحية

إبتسمت لثواني فقط : ليه قفلت المكيف طيب

رفع نظره لها وهذا “ موضوع جدال “ أبدي بينهم ، هي تقفل المكيف وقت يتحمم لكن ياويله ، ياويله يقفّل المكيف وقت هي تخرج من الشاور : لأن ماهو على كيفك

ما جادلته تبتسم للملابس ، تضحك وغرقت بالخجل مباشرة من إستوعبت إنه جايب كل شيء وكل التفاصيل من الخارج للداخل : ما قصرت

هز راسه بإيه يشوفها تتأمل الملابس : مدري تلبسينها وإلا ما تلبسينها إن بغيتي غيرها أجيب لك

هزت راسها بالنفي تاخذ بجامتها بإنبهار ، ورجع جسده للخلف بهدوء : كان أسهل شيء أجيبه اللي تلبسينه عندي ، ما ردت ورد للحين لكن بطلع أجيب لك

قصيـد : يمكن فيه أحد بالمطبخ طيب !

ميّل شفايفه وهو أكيد فيه أحد : وش يعني تطلعين إنتِ؟

هزت راسها بإيه لكن كان منه النفي مباشرة : لا

قصيد بتعجب : مافي بالبيت إلا نهيّان وأكيد ما بيخرج الحين ، أخرج أنا آخذ لي ولك وبلبس عبايتي تمام ؟

ما وافق نهائياً ، وتوجهت تبعد عن عينه تلبس بجامتها اللي جابها لها شورت وقميص دايماً ما تسكر أزراره وتركت مبلول شعرها على حريته تلبس عبايتها : ذياب

هز راسه بالنفي يوقف بهدوء : نروّح سوا

قصيد : لأن المويا ثقيلة ما يقدر واحد فينا يشيلها لوحده

ما رد عليها لأنها تطقطق عليه ، وما حطت الطرحة على راسها لأنه طلع قبلها يتنحنح وما رد الصُوت عليه أحد تمشي قصيد قبله للمطبخ : شفت إن مافي أحد ؟

دخل خلفها يوقف على طرف الباب ، وتوجهت تاخذ لنفسها وله مويا لكنه نطق : ما ودك تفطرين ؟ ما أكلتي

قصيـد: لأنك أكلت بدوني ، صح

رفع حاجبه لثواني : ليه تكلميني كذا ؟ من الغرفة وجاي

ميّلت شفايفها تمشي بإتجاهه : لأنك ما تفكر بنفسك ، تفكر بقصيد وبس لازم العدل

هي تكلّمت بعادية تخطف قلبه لأن نظرها له ينطق بهدوء : وإنتِ أعدل الناس بي يعني ، تقولينها ؟

إبتسمت فقط لأنها تعرف أحواله ، تحفظه عن ظهر غيب ورجعت للغرفة معاه تصلي على ما بدّل هو يتمدد ، وتوجهت لجنبه بعد ما إنتهت من صلاتها تدخل بحضنه وأخذ نفس من أعماق قلبه يقبّل راسها ، ياخذ ريحتها لأعماقه وهمست لثواني : ما بتقول لي شيء؟

_

كان منه هادي النفي ترفع نظرها لها ، تشوف إن الإرهاق صار واضح على ملامحه ما يقاومه ولا يقاوم النعاس نهائياً وللأبد ، تحب هالحال منه ما يعترف بإرهاقه ، وتعبه ، وهلاكه إلا لو تمدد بحضنها أو هي بحضنه “ بالهدوء “ وبهالحال فقط يبيّن عليه تنزل نظرها ليده اللي تحاوط خصرها وهي تحس بالنعاس أكثر منه وما طالت صحوتها تغفى هي معاه بعد ما سكّرت خافت النور اللي جنبهم ..

_

« الظهـر »

وسط ضجيج آل سليمان ، وصحوة الأغلب وتجهيزات الغداء ما كان الشعور ثقيل مثل ما كان بالأمس بعد الفجعة وإن الكل تلقّى الخبر لوحده أو ما حوله كثير وهذا اللي يقوّي عزمهم ، إنهم مجتمعين ودائماً مجتمعين بالأفراح والأحزان ولفت ملاذ نظرها للبنات : يلا يابنات يجون الرجال من الصلاة والغداء جاهز ، ورد

سكّرت ورد جوالها تشوف نصار اللي صوّر لها بالمسجد معاهم : جاهز المقلط وكل شيء جاهز روحي إرتاحي

دخلت قصيد للمطبخ تدخل جوالها بجيبها : أساعدكم؟

إبتسمت ورد تهز راسها بالنفي : أمي علياء كيفها ؟

لأن نظراتهم كلهم لفّت لقصيد ملهوفة هي هزت راسها بإيه : أحسن الحمدلله ، قالت وين القهوة

رفضت ملاذ مباشرة : ما أكلت شيء قولي لها الغداء جاهز بعدين القهوة يا أمي ، من أمس ما أكلت شيء على القهوة والتمر ما يصلح لها

هزت قصيد راسها بإيه : قلت لها عمتي ، قالت سوي لي

ورد : لا ماعليك بعد الغداء نقهويها ، ذياب معاهم قصيد

لفت ملاذ نظرها تنتظر الجواب ، وهزت قصيد راسها بإيه بإستغراب : ذياب من قبل الظهر مع عمي ليه ؟

ضحكت ورد لأن ملامح قصيد خطفت : أكيد معاه ، لأن نصار توه صوّر لي شفت نهيان بس ما شفت ذياب

دخلت ديم تشيل الصينية ، ومدّت قصيد يدها تاخذ عنها لأنها بتتركها : ديم تعبتي مرة روحي إجلسي

تنهّدت ملاذ تشتت نظرها : ديم عنيدة ديم ، ماشاءالله البيت مليان يا أمي روحي إجلسي وإرتاحي ليه ما تجلسين

جلست على الكرسي تاخذ نفس ويدها على بطنها : أتوتر إذا جلست ما أعرف ، عالأقل أغيّر جو لا تحركت

دخلت درة : عمي حاكم معصّب عليك ، سمعنا وإحنا نهاوش نقولك لا تشيلين قال جلّسوها وإلا جيتها أنا

إبتسمت ورد : تعرفين وش يعني جيتها أنا صح ؟

ناظرت ديم أختها لثواني : أصلاً جاني النوم بروح أنام

دخلت شدن تركض لقصيد بذهول : حتى إنتِ عندنا !

إبتسمت قصيد تهز راسها بإيه : حتى أنا

ناظرتها شدن بإعجاب ، بإنبهار تبتسم درّة بشبه حزن : ليتني بزر زيك ياشدن

لأن ملاذ فهمت هي نطقت مباشرة بهدوء : درة !

عضّت درة شفايفها لثواني من مشيت شدن : صدق والله أتمنى ، يعني عالأقل هي الحين تفكر هالإجتماع واللمة لأننا مبسوطين والدنيا وردية ما تدري

_