وقف عناد عند الكوفي بعد ما طلبت منه وجد

والتفتت وتين تدوّر نظارتها اللي كانت على المقعد: وين نظارتي وجد عندك؟

رفعت راسها تشوف عناد يلوّح لها بنظارتها وعرفت انه أخذها بدون لا تحس، يردّ لها حركة الولاعة

جت بتتكلم وسحبتها حنين: روقينا بتغيب الشمس ما يحتاج نظاره

والتفتت وجد بعد ما نزلت: بناخذ قهوة للطريق تبي معنا؟

عناد نفى: إما شاهي ولا فلا

وتين نزلت تناظر عناد بطرف عينها، ومشت: حتى انا وجد، ما احب القهوة

مشوا التوأم مع وجد يدخلون للكوفي ويطلبون لهم قهوتهم

وتين ناظرت الموظف: عندكم شاهي؟

الموظف هز راسه: عندنا ساده ونعناع وكرك

وجد نطقت: عناد يشربه ساده

وتين هزت راسها تطلب: اثنين شاهي نعناع

ضحكت حنين وتنهدت وجد باستسلام: مستحيله هالبنت

دقايق ورجعوا للسياره ومدّت وجد الكوب لعناد اللي كان ينتظرهم بالسيارة

أخذه بابتسامه وتلاشت ابتسامته من شاف أوراق النعناع داخل كوبه

وناظر وجد: شكلك غلطانه عطيتيني حق مهووسة النعناع

وتين ضحكت، والتفت عناد يشوف كوبها بيدها

ورفع حاجبه: طلبتوا لي بنعناع؟ وانا ما اشربه الا ساده

وجد بضحكه: اكسر الشر هالمره واشربه

التفت لوتين يشوفها مبتسمه وصدّ عناد يخفي ابتسامته

وحرّك السياره يرجعون للمزرعة بعد ما انهوا مشاويرهم بشوارع الدمام

وفي وسط صمتهم داخل السياره، تأملت وتين ألوان الغروب وشربت من نعناعها بتلذّذ

فز قلبها والتفتت من صدح صوت تايلور سويفت بالسياره

والتفتت وجد بصدمه تناظر عناد اللي رفع الصوت ويناظر الطريق

يحس بنظراتهم، ويدري بابتسامات وتين اللي ابتهجت ملامحها وهي تسمع كلمات مغنّيتها المفضلة

وشرب عناد من كوبه، يحس بشعور جديد على قلبه، يشم ريحة النعناع تنتشر بسيارته بعد ما كان يشم ريحة دخّانه

يذوق طعم السكر في كوبه بعد ما كان يشربه مُر، ويسمع صوت جديد على مسامعه بعد ما اعتاد صوت الفنّ القديم

في مزرعة راجح

قام شدّاد بعد ما أنهى فنجاله واستأذن: لازم أرجع للمزرعة

راجح التفت: اجلس شوي وتعشى عندنا ومنها ينبسطون بناتنا مع بعض

شدّاد سأل: بناتنا؟

هز راجح رأسه بالإيجاب: بناتي وبنات اختك

سكت شدّاد والشك يتخلّل صدره، ونفى: كثر الله خيرك خلّها يوم ثاني

بنفس الوقت وقف عناد سيارته قدام مزرعة التوأم

ناظرت حنين سيارة شدّاد اللي واقفه عند بابهم ومسكت راسها

وضحكت وتين بصدمه: جاء!

التفتت وجد: وش فيكم؟

نفت وتين تفتح الباب ونزلت مع حنين اللي تحس بنبضات قلبها العاليه

نزل عناد يفتح باب الشنطه ينوي ينزّل أغراض وتين

ناظرته وتين بتردّد وتقدمت: اتركها في السياره، جيبها لي بعدين

عناد باستغراب: ما تبين الأغراض الحين؟

وتين ناظرت الفضول بعيون عناد: مابيه يشوفهم، خلّها بسيارتك

ومشت وتين بخطوات متسارعه تدخل المزرعة وعقد حاجبه عناد باستغراب

ومشى للسياره مع وجد اللي سألته: والاغراض؟

عناد مشى يدخل مزرعة راجح: قالت ننزّلها بعدين

هزت راسها وجد ونزلت، ونزل عناد وانتبه لنظارة وتين اللي طايحه على مقعده

اخذها وابتسم بخفوت يحطها في جيبه، والتفت يمشي باتجاه بيت الشعر

وقف مكانه من وصلته أصواتهم يسلّمون على الشخص الغريب

راجح ابتسم: نشوفك على خير

هز راسه شداد والتفت يطلع من بيت الشعر ومشى وطاحت عينه بعين عناد اللي واقف آخر الممر يناظره، عقد حاجبه عناد يتذكر ملامحه اللي مرّت عليه

مشى شدّاد يتعدى عناد، ونطق عناد: وش أخبارك عسى لحقت على زوجتك؟

جمد وجه شدّاد والتفت لعناد يناظره بغرابه

ونطق شدّاد من تذكّره: انت اللي صلحت الكفر!

هز راسه عناد ومدّ يده يصافح شدّاد اللي كل ماله يحس بحرارة جسمه وتعرّق جبينه أكثر، و ردّ: الحمدلله، لحقت

هز راسه عناد وأسرع شدّاد بخطواته يتعداه ويطلع من المزرعة، والتفت عناد يكمل طريقه لبيت الشعر

ووصله صوت راجح: الرجال مشى ونسى كرتون التمر ما أخذه

فزّ مشاري، ونطق عناد: اجلس أنا أودّيه، بس من هو ذا؟

مشاري: هذا خال التوأم

وتين دخلت غرفتهم وشالت عبايتها: سيارته برا بس مو بالمزرعه، ان شاء الله طاح في حفره ولا شيء

حنين سكتت ثواني، ونطقت بقلق: يمكن بالمستودع! وتين تصاميمك هناك

وتين فزّت تطلع من الغرفه ومشت معها حنين تناظر حولها

طلعت وتين من البيت ومشت بين الزرع متجهه للمستودع

فتحت الباب وطلّت تشوفه فارغ، نقلت نظراتها من مكتبها الفوضوي للكنبه بالوسط والصناديق المتراكمة بالزاوية

وقفلت الباب والتفتت لحنين: مو موجود

حنين جلست على عتبة البيت، ومشت وتين لباب المزرعة بسخريه: ما توقعت بيجي يوم أدوّر فيه على شدّاد

ضحكت حنين، ومدّت يدها وتين بتفتح الباب وتراجعت من انفتح

ودخل شدّاد واحتدت نظراته من شافها: وش جابك عند الباب؟ ناويه تطلعين؟

وتين ناظرته بغرابه: من متى جيت؟

شدّاد مدّ يده يدفعها بتكرار يبعدها عن طريقه: بتحاسبيني متى اجي بعد؟ تحاسبيني؟

وتين تراجعت تقاوم دفعاته المستمره و فقدت توازنها وطاحت

بنفس الوقت وقف عناد بمكانه شايل كرتون التمر ويسمع الضجة باستغراب، تقدّم بهدوء يشوف باب المزرعة شبه المفتوح

شدّاد نزل لمستوى وتين بغضب: طلعتوا مكان في غيابي؟

حنين تقدمت تمنع وتين من انها تتكلم، ونطقت: ما طلعنا

شدّاد رفع صوته: و راجح وش يعرّفه فيكم؟

جمدت ملامح حنين، وضحكت وتين بصدمه: رحت للجدّ راجح؟

شدّاد دفعها بحدّه، وقطع عليهم صوت الباب اللي ضربه عناد برجله…

قطع عليهم صوت الباب اللي ضربه عناد برجله والتفتت وتين تشوفه شايل بيدينه الكرتون وصادّ عنهم

شدّاد ناظر التوأم: ادخلوا داخل!

قامت وتين اللي نست ألم سقوطها من عرفت ان اللي واقف برا هو عناد

مشى شدّاد لعناد اللي ينتظره، وسأل: وش بغيت؟

عناد بجمود: نسيت التمر

شدّاد هز راسه وتقدّم بياخذه من يدين عناد

عناد تراجع ونفى: ما قلت لك تاخذه

شدّاد عقد حاجبه بعدم فهم، ونطق عناد: ما انت كفو تاخذه، ولا انت برجّال تدخل مجالسنا

وتين وسعت عيونها تسمع صوت عناد الواضح لهم

أما شداد تقدم لعناد بغضب: احترم اللي أكبر منك لا أنا أعرفك ولا انت تعرفني!

عناد هز راسه: أعرفك، أعرف أشكالك مثل عديم الرجولة بين مجالس الرجال ويتصنّعها لا رجع البيت، ترفع صوتك وتمدّ يدك على بنت؟

شدّاد: ما يعلمني الرجوله بزر مثلك

وتين نطقت من شافت عناد يترك الكرتون بالارض بغضب: خلاص!

شدّاد التفت: ما قلت ادخلي؟

عناد صدّ من وصله صوتها وسكت ياخذ نفس يمسك أعصابه لا يتهوّر، يشوف الغضب بعيون شدّاد ويدري لو تكلم زيادة و تطاول عليه راح يأذّي التوأم

شدّاد ناظره بسخريه: الحسافة انك ولد راجح

عناد نفى قبل يمشي: الحسافه والله شنبك

غطت وتين فمها تكتم ضحكتها، والتفتت حنين تسرع بخطواتها تدخل غرفتهم ومشت خلفها وتين اللي قفلت الباب وضحكت بعلوّ صوتها

وتين رفعت كمّها من حسّت بالألم وناظرت حنين ذراعها والكدمه الحمراء: تعوّرتي!

وتين تأففت: وكسر ان شاء الله! شوّهني

سحبتها حنين: تعالي أحط لك كريم

مشت معها وتين وضحكت تتذكر الموقف: رفض يعطيه التمر

رمى عناد كرتون التمر عند مدخل مزرعة راجح يأشّر للعمال: خذ التمر وزّعه عليكم

ودخل يقفل الباب بكل قوته ومشى للصالة والتفت مشاري للصوت العالي وعقد حاجبه يشوف عناد وملامح الغضب بوجهه.

ما اعتاد يشوف عصبيّته، كان عناد دايم هادي بملامح مُسالمه، يضحك اذا استفزّوه ويبتسم اذا مازحوه، ما كان فيه شيء يثير غضبه بالحياة كثر النّار، والعُنف

دخل غرفته ومشى يدخل الحمام يشيل ثيابه ويوقف تحت المويه

يلقط أنفاسه ويغمض عيونه يتذكّر صوت الارتطام واللي كان عارف إنها وتين، يتذكّر حدة شدّاد معها وصوته العالي

التفت لصوت مشاري اللي طق الباب: ولد فيك شيء؟

عناد قفل المويه وأخذ نفس: مافيني شيء، شوي وأطلع

طلع مشاري بتنهيده، ومشى للمطبخ يسمع ضجّة البنات وتميم اللي يضحك على سوالف وجد

وجد ضخّمت صوتها تقلد عناد: انا ما اسمع للفن غير فنّ مخاوي الليل

ضحك تميم، وكمّلت وجد: وبعد ساعه يشغّل تايلور متخيلين!

تهاني عقدت حاجبها: هذا عناد؟

وجد بضحكه: ايه! اكتشفت انه اذا روّق يصير غير

مشاري حك جبينه: واذا عصّب يصير غير

تميم التفت بتساؤل: معصب؟

مشاري تنهد يتسند على الطاولة: بيهدأ ويجي، علمنا كيف التدريب؟

تميم هز راسه: الأمور زينه، حدّدنا وقت البطولة وارسلت التذاكر لكم في القروب

وجد فزّت: جبت تذاكر للتوأم؟

تميم ابتسم: مثل ما وصّيتيني

تهاني سكتت ثواني تناظر كوب قهوتها ونطقت: ما تلاحظين انك تحشرينهم معنا بكل شيء؟

وجد التفتت لها: ليه؟ مضايقك الموضوع؟

تهاني هزت راسها: مضايقني تواجدهم حولنا بكل وقت ودخولهم بحياتنا فجأه!

هاجر ناظرت اختها بصدمه، وكمّلت تهاني: حتى في مناسباتنا الخاصه! بطولات تميم دايم نحضرها لوحدنا ما نعزم صحباتنا

تميم قاطعها: بالعكس، أنا راضي

مشاري ناظر تهاني بغرابه: وش مشكلتك؟

تهاني قامت بانفعال: مشكلتي اني ما تقبّلت وجود ناس غريبه بمزرعتنا وبيننا

وجد رفعت صوتها: ناس غريبه!

هاجر تقدمت تهدّيهم: اكسروا الشر الموضوع ما يسوى

وجد صدّت: تهاني فارقيني لا تعكّرين جوي اكثر

مشت تهاني تطلع من المطبخ ومشت هاجر وراها بتنهيده

أخذت وجد جوالها ترسل تذاكر البطولة للتوأم بعقدة حاجبها

وناظرها مشاري: اليوم تعاملت مع المعصّبين كثير! روقوني

تميم مشى ياخذ الإبريق يملاه بالمويه: الحين أضبط لكم شاهي يهجد شياطينكم

والتفتوا لدخول عناد اللي رمى نفسه على الكرسي بتنهيده

وناظره تميم: هلا فان تايلور

ضحكوا، و سفههم عناد يسأل وجد: كلّمتي التوأم؟

هزت راسها: قبل شوي، ليش؟

عناد خلّل أصابعه بشعره المبلول يمثل اللامبالاة: قلت تشيّكين على وضعهم، ومتى ارسل أغراضهم

وجد ناظرت جوالها: وتين قالت اذا راح خالها عشان تاخذ راحتها بترتيبهم

صدّ عناد يعقد حاجبه، ونطق مشاري: على طاري خالهم، والله يا الرجّال مافيه قبول أبد

تميم اللي لاهي يسوي الشاهي: ليش وش فيه؟

مشاري: ودّك اذا تكلم تجلده، تحسه متوتر ويوتّرك معه، بثر!

ضحك تميم وعقد حاجبه عناد يتلمّس طرف الطاولة

وقامت وجد اللي لاهيه بجوالها: سوالفكم ما اعجبتني انتهى وقتكم

طلعت وجد من المطبخ، وتوجّهت أنظار تميم ومشاري لعناد الشارد

انتبه لنظراتهم ورفع راسه لهم باستغراب: وش؟

تميم ومشاري تقدموا يجلسون حوله، ونطق مشاري: شيئين تعصب منهم بحياتك، النار واللي يمدّ يده

تميم هز راسه يكمل: وما فيه مبرر لعصبيتك الا انك طفّيت حريق حول المزرعة وجيت

مشاري بضحكه: او انك انجلدت من أحد

عناد ناظرهم بدون ردّ، وأشّر على الفرن: الشاهي قاعد يفور

فزّ تميم يطفّي النار وتأفف مشاري يمسح الشاهي اللي انتثر على الفرن و يأنب تميم

دخل شدّاد غرفته يحس بتلف أعصابه، جلس على سريره يهز رجله بغضب، استفزّته ضحكات وتين وعدم مبالاتها، استفزّه كلام عناد وإهانته له قدام التوأم

التفت لصوت جواله، وأخذه يرد على المكالمه

ووصله صوتها: شدّاد وينك! تركتني وحدي ورجعت للمزرعة

شدّاد بتنهيده: فريده

فريده عقدت حاجبها: وش فيك؟

شدّاد: برجع بكره وباخذ معي البنات

فريده بغضب: ما يدخلون بيتي يا شدّاد، ما يدخلونه

شدّاد صرّ على اسنانه: لو تركتهم هنا تمرّدوا أكثر!

نفت فريدة: ما يهمني! عاشوا عندي أول حياتهم ولما كبروا ماني مسؤولة عنهم! وانت تدري لو جبتهم عندي ايش بيصير

شدّاد غمض عيونه، وكملت فريدة بحقد: راح ارجع أعيّشهم بجحيم مثل ما عيشوني جميلة وعايشة بجحيم، مثل ما جميلة تخلّت عني انا وياك وقت حاجتنا راح اتخلّى عن بناتها

احتدّت ملامح شدّاد من طاري جميلة، ونطقت فريدة: ارجع لي شدّاد، اتركهم وارجع

نفى شدّاد بغضب: كيف اتركهم يسوون اللي يبون هنا لوحدهم!

سكتت فريدة بتفكير، ونطقت: بكره نتفاهم اذا جيت

يوم جديد بدأ بهدوء عكس ضجيج ليلة أمس

طلّت حنين من شباك غرفتهم تشوف سيارة شدّاد تغادر أسوار المزرعة

وتنهدت براحة: أخيرًا ذلف! مو طبيعي كيف وجوده بالمكان يخنق

والتفتت لوتين اللي متسنّده على تسريحتها تحط مناكير بأصابعها بتركيز

وعقدت حاجبها: وش تسوين!

وتين نفخت على أصابعها: وجد قالت بنسوي جلسة تصوير لتصاميمي اليوم عشان نبدأ ننشرها

ورفعت يدينها تسأل: شرايك؟ تحسين يديني يدين مصممة؟

حنين ضحكت، وتقدمت تتسند جنب توأمها: مو بس يدينك، انتِ انولدتي مصممة! متاكدة طلعتي من بطن أمي بيدك خيط وابره

تلاشت ابتسامة وتين من نطقت حنين بـ "أمي" وسكتت حنين تستوعب اللي قالته وبلعت ريقها

وتين ابتسمت بخفوت والتفتت تناظر أصابعها: ليت أمي أخذتنا، كيف كانت بتصير حياتنا لو إننا معها؟

حنين غيّرت الموضوع: كلمتي وجد يجيبون الأغراض؟

هزت راسها وتين بالإيجاب، دقايق ووصلها اتصال وجد وردّت تسمع صوتها المتحمس "افتحي الباب أنا وجَناح في الطريق"

ضحكت وتين وقامت تلبس عبايتها مع حنين اللي مشت خلفها بابتسامه

فتحت وتين الباب وابتسمت تشوف وجد شايله الأكياس

ومشت وجد تدخل وتترك الأكياس على الأرض و تسلّم على التوأم

التفتت وتين اللي ما زالت واقفه عند الباب، تشوف عناد ينزّل باقي الأغراض من السياره

مشى عناد للباب شايل البوكس الكبير بيدينه وتقدمت وتين بتشيله

ونفى عناد: ثقيل عليك، ما تقوينه

وتين تراجعت: مافي شيء ما أقواه! لكني حاطه مناكير وما ودّي يخرب

ابتسم عناد، ومشت وتين تفتح له باب المستودع: اتركه داخل المستودع

تجمّد مكانه يناظر باب المستودع بشرود…

تجمّد مكانه يناظر باب المستودع بشرود وناظرته وتين باستغراب

مشى يدخل ويحطه على الأرض يحاول يتجاهل حقيقة المكان ووقوفه بين جدرانه

رفع راسه وبلع ريقه من طاحت عيونه على الصناديق والسواد حولها

ونطقت وتين: المكان فوضى شوي، لكن هنا اشتغل

التفت عناد يناظر مكتبها، ومكان تصاميمها والعبايات والفساتين المُعلقة

تراجع من حس بضيق المكان يخنق صدره، يتهيأ له ريحة الرماد والدخان

وطلع تحت نظرات وتين اللي استغربت حاله وطلعت خلفه

وجد التفتت لوتين: جت ببالي فكرة نصوّر العبايات عند البحر

وتين اللي ناظرت عناد يطلع من المزرعة، وهزت راسها: نصور عند البحر

والتفتت وجد ترفع صوتها: عناد لا تروح قبل توصّلنا للبحر

تسنّد على السيارة وغمض عيونه، يلسعه لهيب الذكريات المجهولة ويحرق جوفه منظر السواد اللي شافته عينه

التفت يشوف وتين شايله بيدها بوكس الريش وخلفها حنين اللي ضحكت: شكلك ناويه تطيرين صدق

وجد اللي شايله كومة العبايات: الله يستر من أفكارها

تقدم عناد بيشيل البوكس عنها، ونفت وتين: أقواه

التفت عناد يخفي ابتسامته وشال العبايات من وجد يحطها بالسيارة

وركبوا يتجهون للبحر ينفّذون فكرة وجد بتصوير العبايات

وفكرة وتين اللي نثرت الريش على الرمل وتسنّد عناد على سيارته يناظرها من بعيد، ينقل نظراته من السماء المغيّمه لأمواج البحر الهادية و أخيرًا لوتين

يشوف انشغالها بتحقيق حلمها، يشوفها تطرّز من الريش جَناح مخفي لكنه واضح بلمعة العسل بعيونها، واضح بضحكاتها العالية وحماسها

يشوفها توقف قدام الكاميرا اللي ماسكتها وجد و تعدّ: واحد اثنين ثلاثه

التفتت وتين تحرّك طرف العباية ويتطاير الريش حولها، تغيّر وضعيتها كل ثانية، تناظر البحر وترفع ذراعينها وتلتفت للكاميرا بضحكة

وابتسمت حنين الجالسة على الرمل تتأمل اختها بعيون لامعة

تراجعت وجد تناظر صور الكاميرا: تهبل الصور!

وتين طلّت بالكاميرا تناظرهم: كيف أنقلهم لجوالي؟

وجد التفتت: عناد يعرف، الكاميرا حقته

والتفتت تناديه: عناد

مشى باتجاههم يسمعها تسأله: كيف ننقل الصور للجوال

عناد حك جبينه: السلك بغرفتي، اذا نقلتها برسلها لوجد

هزت راسها وتين، والتفتوا للصوت اللي وصلهم وضحكت حنين تشوف الرعد يركض باتجاههم وعلى ظهره تميم

وخلفه مشاري اللي شايل العود بيده ويلوّح لهم بيده الثانية

وسأل مشاري: فاتنا شيء؟

وجد بضحكة: ما فاتكم شيء بس ما اذكر اني عزمتكم

تميم نزل من على الخيل: الرعد ودّه بجوله ولا ردّيته

والتفت لحنين اللي عينها على الرعد بابتسامه، وتقدمت تلمسه بهمس: وحشني

تميم سمعها وابتسم: جبته يغير جو قبل البطولة، بتحضرون؟

وتين وحنين بتزامن: أكيد

مشاري التفت لتميم: باقي ثلاث أيام مستعد؟

تميم طبطب على خيله: أنا و الرعد مستعدين

شال تميم خوذته يمدّها لحنين اللي ناظرت الخوذه وناظرته وابتسمت تاخذها منه وتقدّمت تصعد على ظهر الرعد ببراعة

وصفّقت وجد: واو حنين بدأتي تتعودين!

ابتسمت وتين لهم، والتفتت تلمّ الريش من على الرمل تسمع ضحكات حنين ووجد اللاهين مع خيل تميم

تركت الريش داخل الصندوق وانتبهت لخطواته القريبه منها ورفعت راسها تشوف عناد واقف قدامها بيده الريش اللي لمّه

ونزل لمستواها يحطه في الصندوق: الريش بكل مكان

ضحكت وتين والتفتت تشوف تطاير الريش حول البحر: بس حلو

ناظر عناد البحر وتباعدت الغيوم تكشف لهم أشعة الشمس

ورفعت وتين ذراعها تبعد الشمس عن ملامحها

طلّع عناد نظارة وتين من جيبه ولبسها والتفتت وتين له

ورفعت حاجبها: نظارتي رجّعها!

عناد ابتسم: أخذتها، والشيء اذا أخذته ما يرجع

صدّت وتين بتنهيده، وسكت عناد يشوفها تبعد خصلاتها عن ملامحها ولمح آثار جروحها

وسأل: الجروح اللي بيدينك منه؟

ناظرته وتين اللي فهمت انه يقصد شدّاد: مو منه، مني أنا اللي سمحت له يطيّحني

عقد حاجبه عناد: يعاملكم كذا دايم؟

سكتت وتين تفكر بسؤاله، دايم؟ الدايم المقصوده كانت سنين عمرها، عاشت طفولتها ناقصه ومراهقتها مُرّه، عاشت تخيط دُميتها وألعابها بنفسها، تضيف السكر والنعناع لمرارة مراهقتها بنفسها، عاشت تلبّي احتياجاتها بالسرّ وبالخفاء بعيد عن عيون شدّاد الطاغي وزوجته الظالمة

والتفتت تجاوبه: ما يهمني تعامله لأنه ما كان له وجود بحياتي أصلًا

عناد ناظرها: لا تسمحين له يمد يده

وتين ابتسمت تتذكر وقوفه قدام شدّاد ليلة أمس

ونطقت تقلد صوته: ما عليك بقول له، الحسافه شنبك

وضحكت، وابتسم عناد يصدّ للبحر وضحك على تقليدها له

ونطق عناد بجدّيه: بس لا تسكتين له، ماله حق يضربكم مهما كان السبب

وتين نفت وأشّرت على الريش: ما سكت له، وهذا سبب وجودي هنا

سكت عناد يناظر عيونها العسلية، يفهم سبب اختيارها للريش

تعلّمه إنها بتغادر أرض شدّاد بجنحانها، تنتظر لحظة طيرانها

و تعدّ أيامها على مهل وكأنها تعدّ لانتصاراتها

وسأل عناد: متى افتتاح المشروع؟

وتين ابتسمت تتلمس الريشه بيدها: هالأسبوع على ما يجهز الموقع ونتفق مع المندوب

والتفتت له تكمّل كلامها: تدري أول طلب يوصلني ما راح أنساه وبعيش باقي عمري كله أتذكّره

عناد: ليه؟

وتين رفعت الريشه تناظرها: لأنه أول ريشه من جَناحي، ما بنساها

هز راسه عناد وابتسم بخفوت والتفتت وتين تشوف وجد اللي رفعت الكاميرا تصوّرهم وضحكت

ومشى مشاري يمدّ العود لعناد اللي أخذه بابتسامه

ونادت وجد: ميشو، تعال صوّرني مع البحر

تقدم مشاري يلبّي طلبها ويصوّرها، امتلت الكاميرا بصورهم العشوائية، من صور عبايات وتين للريش وغيوم السماء والبحر

والرعد وضحكات حنين اللي رفعت ذراعينها وهي على ظهره

ونطق تميم اللي ماسك لجام الخيل ويمشي بجنبه: تمسّكي لا تطيحين

نفت حنين: الرعد ما يطيّحني

تميم ضحك بمزح: ان خسرت البطولة فهو بسببك

حنين: ليه؟

تميم نطق: لأن الرعد بيصير يحبك أكثر مني

حنين نفت بابتسامه: بتفوز ان شاء الله

هز راسه تميم، ونطقت حنين: هذي أول بطولة للخيول راح أحضرها بحياتي

رفع حاجبه تميم: اجل ضروري أفوز فيها دامها أول بطولة تحضرينها!

حنين ضحكت تأيّده: ضروري!

والتفتت حنين لوتين اللي لوّحت لها بابتسامه تعلّمها انها ما غفلت عنها وتشوفها تعيش حلمها

وارتفع عزف عناد بالمكان، وحوّلت وتين نظراتها له

تشوفه يمرّر أصابعه على الأوتار ببراعة واحترافية

وتقدّمت وجد تصوّره فيديو، توثّق فنّه وابداعه بابتسامه

وغنّى عناد بصوته الهادي:

"أنا وقتي معك.. نظرة وترحال

صدفة تبيّن لي مشارف مطلعك"

سندت وتين خدّها على كفّها تسمعه، ورفع عناد نظراته يكمّل:

"ما أروعك.. يا مُلفت أنظار

خلّيت كل الخلق خلفك تتبعك"

ابتسمت وتين، والتفتت وجد تصوّر البحر تترك صوت عناد خلفية للتصوير

تلاطمت الأمواج و هبّ النسيم البارد حولهم، وانكمشت وتين تشدّ عبايتها عليها

ومدّت حنين يدها وشهقت: تمطر

رفع تميم أنظاره للغيوم المتراكمة، وابتسم من حسّ بقطرات المطر على ملامحه

ووصلهم صوت وجد: خلونا نرجع لا تقلق أمي حصوص علينا

في مزرعة راجح

دخل حاتم الصالة بغضب والتفتوا الجد والجدة لصوته

حاتم بعصبيه: ما سمعت ولدك عناد وش مسوي؟

راجح عدّل جلسته: سلّم وتكلم زين

جلس حاتم ياخذ نفس، وناظر أبوه: قابلت شداد في طريقي للمزرعه قبل ساعه، كان معصب

هز راسه راجح: ووش بلاه؟

حاتم عقد حاجبه: قال ان عناد امس تلفظ عليه وأهانه عند باب بيته

حصة نفت: وليدي ما يسوي كذا

حاتم وقف بعصبيه: خليتوه يصدق انه ولدنا لين صار يستقوي على ضيوفنا

راجح رفع صوته: حاتم

دخلوا المزرعة بعد ما قضوا وقتهم عند البحر

مشى تميم ياخذ خيله للاسطبل، ومشت وجد مع التوأم

وخلفهم عناد ومشاري اللي سرق نظره لبيت الشعر الفارغ

ونطق: شكلهم مجتمعين في الصاله

دخلت وجد مستغربه صوت جدّها العالي ووراها التوأم اللي وقفوا مكانهم باحراج من عرفوا ان اللي في الصالة الجد راجح وولده

حاتم بصوت عالي: اللي ما يحشمنا في بيتنا ماني حاشمه! هالغريب يتطاول على اللي اكبر منه وتبيني اسكت

صدت الجدة تستغفر بهمس، ونطق راجح بغضب: ثمّن كلامك يا حاتم، عناد ماهو غريب

حاتم ارتفع صوته يوصل لمسامع عناد اللي وقف عند الباب يسمع كلامه بجمود