حنين أخذت نفس وتمسح دموعها: وتين بتتزوج شدّاد يجبرها، قاعد يتحداها، بتتزوج بكره يا وجد بكره! وزوجها راعي خراب وخرّيج سجون وجد ماراح اتحمل اعيش مع متخلف ثاني

وسّعت وجد عيونها بصدمه، وهمس تميم: وش صاير؟

عناد تقدّم باستغراب يناظر ملامح وجد اللي جمدت: ايش!

ونطقت حنين بصوتها المختنق: وجد وش أسوي؟ وتين مو راضيه تسمعني واخذت السالفه تحدي، ما في خير يجي من وراء شدّاد، هالزواج ما بيجي منه خير

عناد سأل: وش صاير وجد؟

وجد بلعت ريقها بربكه: خالهم، يجبر وتين على الزواج

تميم عقد حاجبه: يجبرها!

وجد هزت راسها: تقول بكره بتتزوج، وزوجها ماهو كويس خالها بيزوجها راعي خراب

عناد التفت وأسرع بخطواته يطلع من المزرعة، ما يشوف بين عيونه إلا باب المزرعة وتقدم يضربه بتكرار

وتين اللي كانت بالمستودع وتدري بموعدها مع عناد سمعت صوت الباب

و مشت تلبس عبايتها وفتحت الباب وناظرت عناد اللي تقدّم بعصبيه: وش قاعده تسوين؟

وتين باستغراب: وش فيك؟

عناد ناظر هدوءها، عكس العواصف اللي عاثت داخله

عناد سال: صدق اللي سمعته؟ بتتزوجين بكره؟

وتين سكتت بصدمه وعرفت إن الموضوع وصل لهم

ونطقت: صدق

عناد ناظرها بصدمه: برضاك؟

وتين بلعت ريقها: برضاي

عناد لاحظ اهتزاز صوتها رغم ثبات ملامحها: خالك يجبرك صح؟ سمحتي له؟

وتين بغضب: محد يجبرني! لو بجلس بجلس باختياري ولو بطلع اطلع باختياري، واخترت اطلع!

عناد تقدم يعدم المسافه: قولي انا بنت سلطان

وتين عقدت حاجبها: لا تجيب طاري أبوي

عناد بقلّ صبر: قولي أنا بنت سلطان وما راح أسويها

وتين نفت وبقهر: بسويها، و ماني قاعده عند شدّاد المتخلف ولا يوم زياده! بطلع من هنا وأترك له المكان لو اطلع لجهنّم

عناد غمض عيونه يتحدّاها بكلماته يدري بعنادها: اذا بتسوينها قولي أنا بنت سلطان

وتين رفعت صوتها: أنا بنت سلطان و

قاطعها عناد: تزوّجيني

سكتت وتين تناظره بذهول، وناظرها عناد يترقّب ردها

وتراجعت وتين: انت قاعد تسمع الكلام اللي تقوله؟

هز راسه بالإيجاب يكرر كلامه: تزوجيني يا بنت سلطان

وتين صدّت تاخذ نفس، ترتجف يدها اللي شدّت على الباب

ولاحظها عناد ونطق: كان في راسك عناد وتحدّي، تزوجي عناد نفسه، كانك بتوقفين بوجه خالك اوقفي بقوّتك وعنادك

عقدت وتين حاجبها ونفت: ما احتاج وقفة أحد ولا تظلم نفسك معي

قاطعها عناد يرفع صوته: ما أحد يظلم نفسه هنا غيرك

وتين ارتفع صوتها: وانت؟ مالك الا كم اسبوع تعرفني ووقفت قدامي تقول تزوجيني كأن الموضوع سهل

عناد ضحك بسخريه: على اساس راعي الخراب ذا تعرفينه من سنين؟

سكتت وتين وصدّت، ونطق عناد يتقدم يعدم المسافه بينهم

وتراجعت وتين تخفي ارتباكها من قربه، ونطق عناد: ما نمت من ليل أمس، جيتك وأنا شايل بصدري كلامك لي، جيتك وأنا ناوي أنبّش في الرماد معك

ناظرته وتين بدون رد، وكمّل عناد: ما تبين تعرفين أمك؟

نفت وتين: أمي تركتنا

عناد سأل: وكيف عرفتي وانتِ ما تعرفينها؟ مو انتِ نفسها اللي قالت لي كيف تعرف انك ما تتذكر؟ كيف سمعتي لشدّاد وما سمعتي لأمك نفسها؟

قاطعته وتين: لا تدخّل المواضيع ببعضها

عناد ناظرها: جيتك وأنا أبي اتذكّر، وقررتي تروحين؟ تتركين اسئلتك بدون جواب؟

بلعت ريقها وتين، وهمس عناد: ودك ترمين نفسك في النار؟ أنا نار ما طفى لهيبها سنين، إلمسيني، بارد لكن جوفي جمر مشتعل

ناظرته وتين بدون ردّ، تشم ريحة عطره تحوم حولها

يتردّد صوته بمسامعها، ونزّلت نظراتها لكفوف يدينها

ونطق عناد: يقهرك؟ يتحدّاك؟ ويجبرك على شيء ما تودّينه؟

ناظرته تحط عينها بعينه، وختم عناد كلامه: اقهريه، تحدّيه واجبريه على شيء ما يودّه، وأنا بوجهك

وتين سكتت ثواني والتفتت تدخل وتجلس على عتبة المستودع تحت نظرات عناد اللي تقدّم يتسند على الباب

مسكت وتين راسها بصمت، ورفعت نظراتها له: ليه تسوي معي كذا؟

عناد صدّ وابتسم بخفوت: لأنك بنت سلطان، وقفتي بوجهي يوم طفيت زقارتي على نعناعك، وصرختي بوجهي يوم استصغرت أحلامك، عاندتي النار اللي في صدري وحطيتي صور أمي بين يديني، ليه تسمحين لشدّاد يهزمك؟

وتين نفت: ما هزمني

عناد عقد حاجبه: اجل ليه وافقتي!

وتين بقهر: رفضت لكنه ذلّني، يحسسّنا بحاجتنا له و يذكرنا بغياب أمي عننا

عناد سأل: و ظنك يوم وافقتي قهرتيه؟ انتِ سويتي اللي يبيه و ظلمتي نفسك

غطّت وتين ملامحها بكفوف يدينها تستوعب حجم المصيبة اللي طاحت فيها وناظرها عناد يفهم شعورها

وهمست وتين: ما ادري عناد ما ادري

صدّ وابتسم بخفوت، يسمعها تناديه باسمه لأول مره

وناظرها عناد: تدرين يا بنت سلطان تدرين، تدرين انك بتقهرينه وبتطيرين بجنحانك اللي تخيطينها وبتلاقين أمك بعد كل هالغياب، بتقهرينه

رفعت نظراتها له: انت تشفق علي؟

تقدّم عناد ووقف قدامها يشوفها تناظره تترقب إجابته

ونطق: أشفق على نفسي لو دريت عن هذا كله و ما وقفت قدامك هالوقفه، اشفق على نفسي أنا لو ما كنت حربك وسيفك و نارك اللي بتهزمين بها شدّاد

ناظرته وتين وملامح الحيره ارتسمت بوجهها، تحس بارتفاع نبضاتها وارتجاف دواخلها، تشوف جدّيته وتسمع النبره الجديدة عليها منه، لكنها تكره الموقف اللي انحطت فيه، وتكره حاجتها وقهرها اللي تحس فيه بسبب شدّاد، تضايقها فكرة تورّط عناد معها وتحس بالعبء والثقل عليه

ونطق عناد: موافقه؟

وتين ناظرته ثواني ووقفت: بحل الموضوع لا تشغل نفسك فيه، مثل ما بديت هالحرب بنفسي بنهيها بنفسي

عقد حاجبه عناد وتراجعت وتين تدخل المستودع تنهي نقاشهم

وتنهد عناد بتعب من عنادها، ناظر حوله بشرود وطاحت عينه على شتلة النعناع ونبتة البابونج اللي تتوسّطه، وابتسم

تراجع وطلع من المزرعة يقفل الباب خلفه واسرع بخطواته لمزرعة راجح

سمعت وتين صوت الباب وعرفت انه راح، تسندت تمسح على صدرها المرتاب، تسترجع كلماته لها ووقوفه قدامها بجرأه

مثل وقوفه قدام الجد راجح اللي رفع نظراته لعناد باستغراب

ونطق عناد: يبه، بغيتك بموضوع

أشّر راجح بجنبه: تعال اجلس وعلمني

بنفس الوقت في الحديقة، التفتت وجد لتميم: عناد طلع مستعجل ورجع مستعجل وش صار ظنك؟

تميم بتفكير: ما أدري، ما عاد ردت عليك حنين؟

نفت وجد وقامت: ودي أروح لهم واتطمن بنفسي

مشت وجد بتلبس عبايتها وناداها تميم والتفتت له

ونطق: طمنيني

هزت راسها بابتسامه ومشت تكمل طريقها للتوأم

تحديدًا لحنين اللي مشت تدخل للمستودع تدوّر وتين

التفتت وتين لصوت الباب وطاحت عينها على حنين وصدّت تبلع ريقها

وتقدمت حنين تجلس بجنبها على الكنبه وتناظر الفراغ

نطقت وتين:انتِ علمتيهم صح؟

هزت راسها حنين بالإيجاب: ما كنت ادري وش اسوي

لمّت وتين راسها بين يدينها، هزّت رجولها بصمت ولاحظت حنين ارتباك اختها الواضح

وسألت: وتين وش صار؟

وتين نطقت: احضنيني

انقبض قلب حنين وتقدمت تحضن توأمها وشدت وتين على حضنها بصمت

و بكت حنين، عكس وتين اللي حافظت على جمود ملامحها

كانت حنين تبكي حال وتين، مدّت وتين يدها تمسح على ظهر حنين تهدّيها

ثواني ووصلهم صوت الباب، وابتعدت حنين تسمح دموعها: هذي وجد، قالت لي بتجي

فتحت الباب ودخلت وجد تناظرهم: ما بتكلم ولا بقول شيء، بس انتم بخير؟

وتين ابتسمت تشوف خوف وجد عليهم: بخير، ادخلي وجد ادخلي

وجد دخلت ونطقت تغير الجو: وين خالكم موجود؟ ودكم أطقه؟

ضحكت حنين وناظرتها وجد تلمح بلَل رموشها وتقدمت تمسح عيونها: لا بارك الله في اللي يبكيك

ناظرتها وتين ونطقت تغير الموضوع: تعالي أوريك مكان جَناح

ابتسمت وجد تشوف وتين تورّيها مكتبها وتصاميمها بشغف

رغم انها لاحظت اختلاف حالهم، لاحظت شرود وتين والضيق بملامح حنين الا انها يكفيها وجودها بينهم، يتطمن بالها

وتطمن بال تميم اللي قرأ رسالتها "الأمور تمام"

تنهد ورفع راسه يشوف عناد يطلع من بيت الشعر بعد نقاشه الطويل مع راجح، يحك جبينه ويناظر طريقه بشرود

ناظر تميم شرود عناد بصمت، مثل نظرات وجد لشرود وتين اللي ترسم بدفتر تصاميمها

والتفتت وجد لحنين اللي همست بقلق: وش أسوي وجد؟

وجد بتنهيده: يحلّها ربي، يحلها ربي ان شاء الله

مرّت ساعات يومهم ما بين فكرة وهاجس، يقلقهم مرور الوقت ويربكهم اقتراب موعدهم اللي اتفق عليه شدّاد

ترك جواله بعد ما ارسل للتوأم "أنا في الطريق"

التفتت حنين لوتين اللي جالسه على تسريحتها تناظر انعكاسها بالمرايا بصمت

ونطقت حنين: شدّاد جاي وتين

وتين بهدوء: خليه يجي

حنين عضت شفايفها وناظرتها: وتين تكفين

قاطعتها وتين: حنين خلاص

حنين ارتفع صوتها: وش بتسوين؟ بتوقعين الكتاب؟ بتمشّين كلام شدّاد

سكتت وتين وتنهدت حنين وامتلت عيونها بدموعها

ونطقت: تأكدي لو وقعتي، ما بجي معك وبجلس هنا

بلعت ريقها وتين وطلعت حنين من الغرفه تسكّر الباب خلفها بقوه

وغطّت وتين ملامحها بيدينها، تحس بصداعها يزيد وأنفاسها تختنق، رفعت راسها تاخذ نفس وتناظر شحوب ملامحها

احمرار عيونها وآثار السهر والتعب الواضحه فيها

وصلها صوت شدّاد العالي: وتين، حنين

غمضت عيونها، تدري باللي ينتظرها بعد دقايق

تدري بوصول الشيخ اللي جلس بالمجلس ينتظر

وجلس بجنبه خالد المبتسم، يعدّل ياقة ثوبه

وفي الصالة جلست فريدة مع نجلاء اللي ناظرت حولها: وين عروستنا؟

فريدة قامت لغرفة التوأم ودخلت تشوف وتين جالسة بمكانها نفسه، شارده بالفراغ وتهز رجولها بارتباك

ونطقت فريدة: وين اختك

وتين التفتت لها وتنهدت بملل: وش جابك؟

فريدة ابتسمت وتقدمت تناظرها باستفزاز: جيت اشهد على جحيمك

وتين ناظرتها بصمت ووقفت قدامها وارتبكت فريدة من نظراتها

وتقدمت وتين تسحب شعرها بقوه وصرخت فريدة بألم

وتين شدت شعرها: لك كم يوم فاقعه كبدي يا القرده لا تخليني احطك براسي

صرخت فريده تحاول تبعد يدها عن شعرها، ودخلت حنين اللي اسرعت بخطواتها تبعد وتين عنها

تراجعت فريده تناظرها بقهر: خالك والشيخ ينتظروننا

وتين رفعت صوتها: انقلعي عن وجهي

حنين مسكت ذراع وتين تهدّيها وطلعت فريده تقفل الباب خلفها بقوه

والتفتت وتين لحنين اللي نطقت: خلينا نطلع من هنا وتين تكفين، نروح أي مكان بس لا يتمّ الموضوع

وتين ناظرت حنين بدون ردّ، وناظرتها حنين بترجّي

ارتفع صوت الشيخ يردّد دعواته، يجهّز كتب الكتاب لخالد اللي أبتسم لشدّاد

وقام شدّاد ياخذ الكتاب وطلع للصالة ينادي: وتين

فريده فزّت وقامت نجلاء بابتسامه تسمع شداد اللي نطق: خليها تبصم

فريده اخذت الجهاز ومشت لغرفة التوأم ودخلت والتفتت وتين

ومدّت فريده الجهاز: ابصمي

وتين ناظرت الجهاز بيد فريدة بدون رد، وصدّت حنين اللي طاحت دموعها باستسلام

كرّرت فريدة: ابصمي

وتين ابتسمت بخفوت ونفت: قولي لشدّاد يستريح، ماني متزوجته

التفتت حنين بصدمه وجمدت ملامح فريدة اللي نطقت بغضب: تستهبلين؟

قطع عليهم صوت الباب العالي والتفت شدّاد للصوت باستغراب…

قطع عليهم صوت الباب العالي والتفت شدّاد باستغراب

استأذن شدّاد من الشيخ وخالد اللي يناظر بفضول

طلع شدّاد ورفع صوته: مين؟

وصله الصوت العالي: راجح

جمدت ملامح شدّاد اللي فتح الباب يشوف وقوف راجح ببشته قدامه وخلفه عياله وأحفاده، وطاحت عينه على عناد اللي واقف يناظره بحدّه

ونطق راجح: ما ترحّب بضيوفك يا شدّاد؟

شدّاد تراجع بارتباك: حياك حياك

دخل راجح ودخل خلفه حاتم اللي يناظر زوايا المزرعه وبجنبه بتّال اللي لبّى طلب أبوه وترك شغله وجاء عشان عناد

وخلفه تميم المبتسم ومشاري اللي عدّل شماغه

بنفس الوقت مشت فريده تطلّ من شباك غرفة التوأم

وعقدت حاجبها باستغراب، ومشت وتين تطلّ تناظر عناد اللي مشى يدخل بثقه مع الجدّ راجح

وقف الشيخ يتبعه وقوف خالد اللي عقد حاجبه باستغراب

شدّاد أشّر لهم: حياكم استريحوا

جلس راجح بصدر المجلس ويمينه عناد ويساره حاتم وجلسوا الشباب حولهم

وأشّر مشاري لخالد: افسح شوي يا الطيب

خالد تحرّك يفسح له وجلس مشاري بابتسامه يناظر جدّه راجح اللي تنحنح يتكلم بهيبته اللي اربكت شدّاد

راجح: وصلني كلام ما عجبني يا شدّاد

شدّاد عقد حاجبه بدون ردّ، وكمل راجح: تجبر بنت اختك على الزواج؟

جمدت ملامح خالد يناظرهم بصدمه، ونفى شدّاد: ما…

قاطعه راجح: تقهر يتيمه؟ هذي هي علومك يا شدّاد؟

صدّ شدّاد يحس بالإحراج من الموقف اللي انحط فيه قدام الشيخ و خالد

ونطق شدّاد: بس البنت موافقه

راجح هز راسه: بعد ما ذلّيتها وقهرتها

ناظرهم الشيخ بعقدة حاجبه يحاول يستوعب حوارهم

وكمّل راجح: عمومًا ما هو هذا موضوعنا، بختصر موضوعي لأن لو طوّلت كلامي معك بتزعل مني واجد

شدّاد بلع ريقه، والتفت راجح لعناد: جيت أنا وعيالي و ولدي عناد نطلب بنت اختك وتين على سنة الله و رسوله

جمد وجه شدّاد يناظر عناد اللي ابتسم بخفوت وعقد حاجبه خالد اللي ما زالت الصدمه واضحه بملامحه

راجح ناظر شدّاد: وش فيك ساكت؟

شدّاد حك جبينه ونطق: أبد نتشرف بكم بس…

قاطعه راجح: ولّا أقول لا تكثّر حكي، و لا تشاور البنت ولا تقول لها شيء لأن ما لك شور ولا رأي

جمد وجه شدّاد، وكمّل راجح: اللي ما يحشم البنت ما أحشمه

شدّاد رد: وش هالكلام يا أبو حاتم

راجح هز راسه: المهم جاك العلم والبنت رايها الأول والأخير لها، لا تمّت الأمور على خير بنجي أنا وزوجتي والبنات نخطبها رسمي وهي اللي تحدّد وقت الملكه واتركها تتجهز على راحتها ماهي بضاعه تبيعها وتجيب لها الشيخ في يومين

الشيخ صدّ يحك حاجبه باحراج، ونطق شدّاد: اعذرني يا ابو حاتم بس البنت لخالد و موافقه عليه

وقف راجح يتبعه وقوف عياله و التفت لهم: اسبقوني برا، عندي كلمة راس بيني وبين شدّاد

هز راسه حاتم ومشى يطلع ومشوا العيال خلفه

التفت عناد قبل يطلع يناظر شدّاد ويمسح على شنبه تحت نظرات شدّاد اللي احتدت ملامحه من حركته

و تقدم راجح بعد ما فضى المجلس، ونطق: قلت لك لا يطول كلامنا يا شدّاد

شدّاد نطق: ولا أنا ودي يطول يا ابو حاتم لكنك دخلت بيننا وسط ملكة الرجّال و تخطب لولدك وتبيني اعديها

راجح بحدّة: البنت لعناد، جاك العلم؟

شدّاد احتد صوته: ماني معطيكم

قاطعه راجح يضرب بعصاه الأرض بين كل كلمه ينطقها: قبل عشرين عام في ليلة سبت من شهر رجب

جمدت ملامح شدّاد، وسأل راجح: تذكر هالتاريخ ولا أذكّرك؟

بلع ريقه شدّاد وتقدم راجح يضرب بعصاه: تحسب بتمشي علي جيّتك لهالمزرعه صدفه؟ أقدر أجيب ماضيك بمكالمه وضغطة زر يا شدّاد، عندي علم بكل شيء وأدري إن البنات ما يدرون

رفع راجح عصاه يثبتها على كتف شدّاد يدفعه على وراء

تراجع شدّاد يسمع كلمات راجح الحادة: ترفع صوتك وتمدّ يدك عليهم، ما تصون الأمانه وتقهر يتيمه وتذلّها؟ طول هالسنين؟

همس راجح: أنا أقهرك، وأذلّك وأوطى على راسك هنا

تراجع شدّاد ينكر: ما ذليت أحد..

قاطعه راجح: البنت لعناد ولا لك سلطة عليهم من اليوم، ولا والله اللي رفع سبع ونزّل سبع ما يصبح الصبح الا وعلومك كلها وموضوع الحريق عند البنات

سكت شدّاد وصدّ بدون رد، وختم راجح كلامه: وباقي بيننا حساب ما انتهى! لا تحسب الموضوع بينتهي اليوم، تونا نبدأ يا ولد عبدالله

عند وتين اللي مشت تحوم بالغرفة بتفكير وحنين تناظرها بابتسامه

والتفتت وتين: لا تناظريني كذا

حنين بضحكه: الجد راجح والعيال كلهم تحت متخيله؟

وتين طلّت تشوف وقوفهم عند باب المزرعة، ورفع عناد نظراته لشبّاكها يلمح وقوفها وتراجعت وتين تختفي عن أنظاره

وهمست بتكرار: معتوه، معتوه والله معتوه!

التفتوا لصوت الباب ودخول فريده اللي ناظرت وتين بعصبيه: وش سويتي!

وتين عقدت حاجبها: نعم؟

فريده تقدمت بحدّه: وش اللي سويتيه وتراجعتي عن الزواج فجأه وخليتي نجلاء تطلع مع اخوها ويكنسلون كل شيء؟

وتين تنهدت بملل وجلست على سريرها: يا عمري عسى ما زعلوا بس؟

فريده بحدّه: رحتي تكلمين الولد من المزرعه اللي جنبنا؟ رميتي نفسك عليه يا الرخيصه

وقفت وتين بغضب وتقدمت بتضربها ومسكتها حنين: وتين!

وتين مسكت العطر القريب منها ورمته بقوه يصيب فريده اللي تراجعت بألم وطاح العطر ينتثر زجاجه على الأرض

وصرخت وتين تقاوم حنين اللي ماسكتها: ما الرخيصه إلا انتِ عشتي سنين عمرك ترمين نفسك على شدّاد لين وافق ياخذك

فريده ناظرت الدم اللي نزف من خشمها وتقدمت بغضب تحاول تضرب وتين

ووصلهم صوت شدّاد العالي: خلاص!

التفتت فريدة وبكت تشتكي: شدّاد

قاطعها شدّاد يناظر وتين بحدّه: تجهزي، راجح وأهله جايين يخطبونك لولدهم عناد باكر

فريدة عقدت حاجبها: شدّاد! وش قاعد تسوي؟

شدّاد ناظرها: مشينا فريدة

طلع شدّاد وطلعت فريدة تلحقه مستغربه تغيّر حال شدّاد

وجلست حنين على السرير تناظر الفراغ بذهول وتستوعب اللي صار

وتنهدت وتين تهدّي غضبها من فريدة والتفتت تناظر الزجاج بالأرض وشهقت: لحظه هذا عطري!

مشت بتلحق فريدة بعصبيه ومسكتها حنين: وتين ريحيني تكفين مو وقتك!

وتين بغضب: عطري اللي أحبه انكسر على راس القرده

حنين مسكت وجهها بين كفوفها: عناد خطبك وتين خلي العطر على جنب

وتين سكتت تناظر حنين بدون رد، ونطقت حنين بغرابه: كنتِ عارفه انك بيجي؟

وتين عضت شفايفها وصدّت، وصرخت حنين: يا سخيفه!

ضحكت وتين تشوف حنين تاخذ الوساده وترميها عليها

ومسكت وتين الوساده ونطقت: جاني أمس وقال لي، مع إني رفضته لكن كنت عارفه إنه بيجي

حنين سألت: وكيف عرفتي؟

وتين رفعت أكتافها: لأنه معتوه

حنين هزت راسها: حتى انتِ صايره معتوهه مثله، ما تلاحظين؟

ابتسمت وتين بخفوت ونزّلت نظراتها للزجاج تشم ريحة عطرها اللي فاحت بالغرفة

وعقدت حاجبها: ما كان ودي الموضوع يوصل لهالدرجة، ما كنت ابي عناد يورّط نفسه معي

حنين براحه: يتورّط معك ولا تتورّطين مع راعي الخراب ذاك

ونطقت حنين تكمل كلامها باستغراب: بس كيف شدّاد وافق بكل سهوله؟

عند راجح اللي جلس يتوسّط الصالة يشوفهم ملتمّين حوله

ونطق يلفت انتباههم: باكر تجهّزوا

ابتسمت الجدة حصة اللي كان عندها علم عن الموضوع من راجح

وسألت غالية: نتجهّز ليش يبه؟

راجح ناظر عناد: بنخطب لعناد

جمدت ملامح تهاني، ونطقت وجد بصدمه: مين!

حصة جاوبت: وتين

وقفت تهاني ومشت تصعد للغرفة وناظرتها فاطمه بغرابه

ولحقتها هاجر بهدوء، وكمّل راجح: الموضوع صار بسرعه، لكن جاكم العلم

حصة هزت راسها: أبرك الساعات ووتين بنتنا وعناد يستاهلها

غالية نطقت رغم عدم استيعابها للموضوع: الله يتمّم لكم يا حبيبي يا عناد

بتّال طبطب على كتف عناد اللي ابتسم له

ونطق مشاري: قولي عقبالنا يمه

حصة بضحكة: عقبال أفرح فيكم كلكم وأولكم مشاري

وجد بتتكلم وقاطعها مشاري يأشر: ادري وش بتقولين وفّريه لنفسك

ارتفعت ضحكاتهم، وابتسم عناد بامتنان يناظر راجح اللي هز راسه وغمض عيونه بهدوء يطمّنه، ما خاب ظن عناد براجح ولا خابت هقواته يوم وقف قدامه ليلة أمس وطلب منه وتين بعد ما سرَد له أفعال شدّاد وإجباره لها بالزواج

وسَرد له رغبته بالزواج بدون تردّد، يعلّمه إنه اختار درب الوتين يتحدّى شدّاد وياخذها بعناد، يعاند الظروف والغُربه واليُتم معها، مع بنت سلطان.

دخلت تهاني غرفتها ودخلت خلفها هاجر تشوف انهيار تهاني اللي مشت ترمي أغراضها من على تسريحتها على الأرض بغضب

وصرخت بقهر: سوتها الخبيثه!

هاجر عقدت حاجبها: تهاني اهدي لا تسمعك أمي!

تهاني بجنون: كيف اهدأ هاجر كيف؟ ما سمعتي وش قالوا؟ الخبيثه طول الوقت تتلصق فيه وخلته يخطبها

هاجر نفت: عناد هو اللي راح وقال لأبوي راجح يخطبها له، عيب هالكلام!

تهاني بقهر: هذا الزواج ما راح يتم وتشوفين

هاجر رفعت حواجبها: وش بتسوين بتمنعين عناد يعني؟ تهاني خلاص استسلمي كم لك وانتِ على هالسالفه

تهاني لمعت عيونها: من صغري حبيته وما تكلمت ولا نطقت سنين وأنا كاتمه حبه بصدري، وتجي هذي تاخذه مني بكم اسبوع!

سكتت هاجر وصدّت بتنهيده وجلست تهاني تغطي وجهها وتبكي بقهر

بنفس الوقت جنّ جنون شدّاد يسرد لفريده اللي صار

شدّاد بغضب: هدّدني بموضوع الحريق

فريده بصدمه: وش يعرف بالضبط؟

شدّاد جلس على طرف السرير يمسح دقنه بتفكير: ما أدري بس الواضح لي انه يعرف كل شيء ويدري ان البنات ما يعرفون

فريده بقلق: كيف عرف كل هذا؟

شدّاد هز رجله وناظرها: بس أنا أوريك فيه، تهديده لي وموضوع زواج وتين من ولده الخسيس والله ما يعدي على خير

فريده جلست جنبه ومسكت ذراعه: ولو فضحنا عند التوأم وانفضح كل شيء وش بنسوي؟

شدّاد نفى: ما يهمني، المهم أدمرهم وأخليه يندم انه يحط راسه براسي بالذات ولده عناد

فريده مسكت يده تثبّتها على بطنها: لا تنسى مستقبلنا شدّاد! لا تتورط معهم اتركهم بقلعتهم وخلنا نعيش براحه

شدّاد ناظرها: دام راجح تكلم عن موضوع الحريق ماهو تاركني ولا أنا بتركه لين أنهيه بنفسي

في المستودع

جلست وتين على مكتبها تشغل نفسها عن أفكارها اللي سهّرتها، يشغلها عناد وفكرة خطوبته لها وسط كل هالأحداث

فكرة وقوفه قدام شدّاد وجلوسه مع خالد بنفس المجلس

تتذكر كلماته لها اللي تردّدت بمسامعها مثل الصدى

"تزوجيني، تزوجيني يا بنت سلطان"

"ما تبين تعرفين أمك؟"

"اقهريه، تحدّيه واجبريه على شيء ما يودّه، وأنا بوجهك"

"تدرين انك بتقهرينه وبتطيرين بجنحانك اللي تخيطينها وبتلاقين أمك بعد كل هالغياب، بتقهرينه"

"اشفق على نفسي أنا لو ما كنت حربك وسيفك و نارك اللي بتهزمين بها شدّاد"

"موافقة؟"

صحت من شرودها من وصلها صوت الإشعار والتفتت لجوالها تشوف اشعار الطلبات ورسائل المتجر

وانتبهت للرسالة بين كومة الرسائل واللي كان محتواها

"يا بنت سلطان"

ابتسمت تقرأ اسم حسابه واللي كان مخاوي الليل وعرفت صاحبه

وردّت عليه "يا المعتوه ليه ترسل هنا"

عدّل عناد جلسته يمسح على راس قطوته بحضنه بيده، وبيده الثانيه يرد على رسالتها "أعياني الفضول طول الليل، وش ردّك؟"