تقدم مشاري وحذّرته وجد: لا تقرب منه ويرفسك روّقنا!

مشاري رفع يدينه باستسلام: ما عاد بقرّب، لو يحبني بيجيني

تميم رفع حاجبه: لو بيجيك أنا اللي برفسك

ارتفعت ضحكاتهم، وابتسمت حنين تناظر تميم اللي التفت لها

وابتسم يمسح على راس الرعد ينقل نظراته بينه وبين حنين

أما في بيت الشعر

عند راجح، جالس مع حصة اللي تسولف له وتعدّد له أسماء المعازيم

وكمّلت حصة: شدّاد و فريدة

نفى راجح: شدّاد ماهو جاي

حصة بتفكير: بس انت تدري انه وليّ أمرها الوحيد والشيخ بيسأل عنه

سكت راجح، وكمّلت حصة: خله يجي يا راجح، ما يقدر يسوي شيء

راجح ناظر حوله، والتفت لها يهمس: واذا قرأ اسم عناد وعرف إنه ولد اخته؟

حصة: و ظنك شدّاد بيتكلم ويفضح نفسه إنه خاله؟ ما يقدر يقول شيء هالخوّاف

راجح بتنهيده: خوفي يتكلم و أنا ما ودّي عناد يدري إن شدّاد خاله، ما ودّي أشوف الخيبه بوجهه يوم يدري إن خاله هو عدوّه وهو نفسه اللي تخلى عنه وهو صغير

نفت حصة: شدّاد حتى لو شاف اسم عناد بيسكت من تهديدنا له، ألزم ما علي إن الزواج يتمّ و البنات ما عاد يجلسون عنده!

تنهد راجح، وناظرته حصة تكمل كلامها: بالنهاية الموضوع بينكشف سواء لعناد أو للتوأم

راجح عقد حاجبه: بينكشف بس ماهو الحين، لين أعرف الموضوع كامل عقبها بوقف بوجه شدّاد بالحقيقة كاملة

حصة: وعناد؟

راجح تسنّد وغمض عيونه: والله يا حصوص، ودي أقطّع روحي قطعه قطعه ولا أشوف الخيبة بوجه عناد

حصة نزّلت نظراتها بصمت، وكمّل راجح: ما ودي ينتكس مثل يوم كان صغير، تذكرين أول ما أخذناه جلس غيبوبه سنه كامله وعقب ما صحى ما تكلم أبد ولا انطلق لسانه إلا وهو أبو عشر سنين؟ تذكرين المعاناة اللي عشناها معه؟

مسحت حصة دموعها بتنهيده: أذكر

راجح: ما ودّي أرجع أعيشها

حصة ناظرته: فال الله ولا فالك، ما يصير إلا خير إن شاء الله، المهم البنات يطلعون من عند هالظالم ويجون قدام عيني

هز راسه راجح بالإيجاب، وقامت حصة وطلعت تبتعد عن بيت الشعر ورفعت نظراتها للإسطبل تسمع أصواتهم وضجّتهم

ابتسمت من لمحت ضحكات عناد اللي يلاعب صغير الخيل عناد، وصرخات حنين على ظهر الرعد وابتسامات وتين لها

طالت نظراتها وتأمّلها لهم، وانتبهت لعناد اللي لوّح لها

ووصلها صوت مشاري: صباح الليل يا حصوص

ابتسمت حصة ومشت باتجاههم تسمع مشاري: تغيب شمس وتشرق عيون حصة

وصلهم صوت راجح: ما تتغزل فيها وانا حيّ يا الخسيس

ارتفعت ضحكاتهم، وابتسم عناد يبوس راس راجح اللي طبطب على كتفه

وابتسمت حصة تتأملهم وحوّلت نظراتها للبنات تشوفهم يسولفون ويضحكون

وابتسم راجح، يكفيه من هذا كله وجودهم حوله، يكفيه إن هاللحظة ما تغيب عنهم ولا تغيب شمسهم.

يوم السبت - ٣:٠٠ م

فاحت ريحة النعناع بالغرفة، تسندت وتين على سريرها تشرب نعناعها وتناظر حنين اللي تستشور شعرها بشرود

حنين التفتت لها: أربط شعري كامل أو نصفه؟

صحت وتين من شرودها: لا تربطينه، حلو كذا

حنين انتبهت لرسالة وجد وقرأتها لوتين: وجد تقول لا تتأخرون تعالوا عندي من بدري ابغى نتجهز مع بعض

وتين هزت راسها وشربت نعناعها بدون رد

حنين ناظرتها وتقدمت تجلس جنبها: وش فيك؟

وتين نزّلت نظراتها لكوبها: ما أدري

حنين: تكرهين هالوضع صح؟ أعرفك

وتين ناظرتها: أكره إن زواجي و زواج عناد صار بهالطريقه!

حنين سكتت، وكمّلت وتين: أكره إن كل شيء صار بتحدّي وعناد، كان المفروض عناد يحب ويتزوج ويبني حياته بنفسه وكان المفروض أنا أختار واتزوج اللي حبيته

حنين مدّت يدها ترفع خصلة وتين خلف اذنها: بس مو عناد أفضل اختيار؟ وقف معنا يوم تعبي وساعدك بمشروعك واليوم وقف بوجه شدّاد

وتين: طيب وهو؟

حنين بتساؤل: هو ايش؟

وتين: أنا افضل اختيار له؟

حنين ابتسمت: لو ما كنتي افضل اختيار ما كان جاء لين بابنا وطلب تتزوجينه

وتين: طلبني عشان يتحدى شدّاد

حنين هزت راسها: وانتِ وافقتي عشان تتحدين شدّاد بعد، نتحداه كلنا

والتفتت حنين تفلّ شعرها: وأنا مستعده اتحدى العالم كله معك، المهم نطلع من جحيم شدّاد

التفتت وتين تسمع الأصوات اللي وصلتهم من برا

وقامت تطل من الشباك تشوف سيارة شدّاد، والشاحنه الكبيرة والعمال اللي انتشروا بالمزرعة

وتين عقدت حاجبها ولبست عبايتها تنزل لهم وخلفها حنين المستغربه

وتين طلعت تناظر شدّاد اللي ابتسم بسخريه من شافهم

شدّاد: بنات اختي هنا! حسبتكم عند راجح

وتين ناظرت العمال: وش قاعدين يسوون!

شدّاد: اليوم سبت، سلّمت المزرعة للبلدية وبنقل كل اغراضي للدمام

حنين: واغراضنا! باقي ما رتبنا شيء

شدّاد بسخريه: ما تهمني أغراضكم أنا باخذ الأثاث اللي اشتريته بنفسي

وتين رفعت حاجبها، والتفت شدّاد للعمال: شيلوا كل شيء وحمّلوه بالسياره

دخلوا العمال ودخلوا خلفهم التوأم يشوفونهم يشيلون الأثاث الخاص في شدّاد ويشيلون كل شيء تأشر عليه يد شدّاد

وتين وقفت قدام غرفتهم تمنعهم يدخلون: اذا شلت أغراضنا خليتكم تاخذون الأثاث

شدّاد: وخري عن طريقهم، البيت لازم ينشال كل شيء فيه بعد يومين بيجون مُستأجرين

حنين وسعت عيونها بصدمه: بعد يومين! ما يمدينا نسوي شيء أبد

شدّاد ناظر وتين اللي ساكته: هذا اللي يصير يوم تبيعيني وتروحين لراجح، خلّيه يضفك انتِ واختك

حنين: طيب اترك غرفتنا احنا بكره نجي ونرتبها

قاطعها شدّاد: لا، اليوم والحين ينشال كل شيء!

وتين ناظرته ثواني وابتسمت: تسوي كذا عشان تكسرني؟

نفى شدّاد: هذا ولا شيء باقي حتى يدك أكسرها لك

وتين: طول عمرك وانت تمسكني مع اليد اللي توجعني، أوجعتني لكنك ما كسرتها

وتين تقدمت تكمل كلامها: أوجعتنا بيُتمنا، بطفولتنا ومراهقتنا، أوجعتنا بشوقنا لأمنا وتجاهلت سؤالنا عنها

عضت حنين شفايفها، وارتفع صوت وتين: لكن تبطي يا شدّاد ما كسرتني، أقطع يدي بنفسي ولا تكسرها

ضحك شدّاد بسخريه يكتم غيضه و قهره من كلامها

وتراجع يأشر للعمال: كملوا شغلكم

وابتعدت وتين عن الباب تترك العمال يشيلون أثاثهم

مشى العامل يسحب التسريحه وطاحت الأغراض تنتثر بالأرض

و تقدمت وتين تجمعهم: عطوراتي وجع!

والتفتت حنين للرفوف اللي امتلت بكتبها وتقدمت تجمعها

وأشّرت وتين: ألبومات تايلور خذيها

أخذتهم حنين تبعدهم عن يدين العمال اللي شالوا الرفوف يحمّلونها في السيارة

وقف سيارته وشال نظارته الشمسيه يناظر الشاحنه اللي امتلت بالأثاث

ثواني ودخل بسيارته لمزرعة راجح ونزل يمشي باتجاه بيت الشعر

وفزّت حصة اللي كانت جالسه مع راجح: بتّال!

ابتسم يحضنها ويسلم على أبوه اللي نطق: الحمدلله على السلامه

جلس بتّال بجنبهم: الله يسلمك يبه

حصه بمزح: وانت صرت ولد البحرين خلاص؟ ما عاد نشوفك الا بالمناسبات

بتّال بضحكة: لا خلاص أبشرك انتهى الشغل الكثير والفندق جاهز، باقي تشرّفونا

راجح ابتسم: ان شاء الله! تزين أمور الملكه ونطلع للبحرين

هز راسه بتّال وناظر حوله: وين الشباب؟

راجح: مشغولين مع تجهيزات الملكة، مشاري راح مع تميم يشوفون موضوع الذبيحة

بتّال: وعناد؟

حصة ابتسمت: عريسنا، راح يحلّق

بتّال هز راسه والتفت: ايه صح تذكرت، من شوي شفت المزرعة اللي جنبنا ينقلون عفشهم

راجح عقد حاجبه: ينقلون!

بتّال: ايه، استغربت ليش ينقلون مو اليوم الملكه؟

فزّت حصة: المفروض البنات يجون لوجد الحين!

مشت حصة تطلع من بيت الشعر بخطوات متسارعه

و صرّ راجح على أسنانه وغمض عيونه يهدّي نفسه

ورفع جواله يتصل على شداد اللي ناظر مكالمة راجح وتغيرت ملامحه

التفت للعمال اللي قربوا ينهون شغلهم: خلاص، مشينا

التفتت وتين تشوف العمال ينسحبون ويغادرون المزرعة

وطلع شدّاد بعد ما ناظر التوأم وابتسم بسخريه يركب سيارته

حنين ناظرت الفوضى اللي عاثت بغرفتهم وتنهدت

و جلست وتين على الأرض بتعب حاضنه ألبوم تايلور وتناظر الفراغ

ونطقت حنين: خفت يدخل المستودع ويشيل عباياتك ومكتبك

وتين: ما بسمح له!

التفتت حنين تشوف مكالمة وجد: تأخرنا على وجد

ردّت ووصلها صوت وجد: انا عند الباب جيت بسيارتي

عقدت حنين حاجبها: ايش!

وجد نزلت من السياره ومشت للباب: جيبوا اغراضكم وفساتينكم مافي وقت يالله امي حصوص تنتظرنا

حنين شالت شنطتها والتفتت لوتين: اتركي باقي الأغراض بكره نجي نشيلها

وتين رفعت حواجبها: ولو جاء شدّاد ياخذهم؟

حنين: بيجي ياخذ ألبومات تايلور وشتلات نعناعك مثلًا؟

وتين مشت تطلع: عشان اقطع يده

أما في مزرعة راجح

فتحت حصة باب الغرفة المخصصة للضيوف واللي كانت مجهّزتها تنوي تستقبل التوأم فيها

وخلفها غالية اللي بخّرت الغرفة: ينقل الأثاث في يوم ملكة البنت! هذا ما عنده ضمير؟

حصة: قلعته! بناتي بيعيشون عندي من الليلة سواء ينقل ولا ما ينقل

وصلهم صوت حاتم: صار المكان ملجأ كل من هب ودب عاش عندنا

غاليه نبّهته: حاتم!

حصة أشّرت بعصاها: اطلع ماني رايقه لك

حاتم تأفف ومشى ينزل للصالة اللي جهّزتها حصة

تنتشر في زواياها ألوان الورد، يزيّن مدخلها الاستقبال والمرايا الضخمة والسجّاد الاحمر اللي امتد على طول المدخل ينتهي بالكوشة الراقية اللي انتثر حولها الريش الأبيض

وابتسمت حصة تناظر التجهيزات، مثل ما كانت تبي

تبالغ باختياراتها، و تبالغ بفرحتها وحبها لعناد

وحبها للتوأم ولوتين اللي دخلت مع وجد ووقفت مكانها بصدمة تناظر المكان

وتقدمت حصه تحضنها: هلا بعروستنا

وتين ناظرتها بعدم استيعاب ونطقت بصدمه: ليه كل هذا!

حصة مسكت ذراعها تصعد معها: أبي نفرح كلنا وش اللي ليه!

وتين بلعت ريقها تحس بالثقل والعبء على قلبها

اختارت طريق الزواج بعناد عشان تتحدى خالها لكنها تشوف فرحة حصة وتجهيزاتها له وحماسها

حصة: تزيّني يا بنتي، جماعتنا وأقاربنا كلهم بيجون الليلة أبيك الأجمل بينهم

وتين عضت شفايفها باحراج: تكلّفتي يا أمي حصة

نفت حصة: اللي سويته ولا شيء! قال لي عناد إنكم تبونه بسيط وما تبون زواج وسويت لكم الملكة عن عشر زواجات

سكتت وتين، وكملت حصة: بتنزفّين الليلة، بتلبسين الدبلة وبتجلسين على الكوشة، ونفرح كلنا

وجد ابتسمت: وبتطيرين، الكوشه كلها ريش من توصياتي

ضحكت حنين وابتسمت وتين بامتنان لوجد وتقدمت تحضن حصة اللي ضحكت تطبطب على ظهر وتين

ووصلهم صوت هاجر: مجتمعين وما ناديتوني!

وجد: توني كنت بناديكم، وين تهاني؟

تهاني اللي جالسه على سريرها تناظر الفراغ بصمت

التفتت لصوت الباب ودخلت هاجر: التوأم وصلوا، قومي تجهزي لا تخلين أمي حصوص تشك فيك أكثر من كذا