ابتسمت حسناء تتكتف و توقف عند الدرج لما دخل بتار و ركضت له جود و رند و انحنى يضمهم مع بعض بـ ابتسامه

اعتدلت بـوقفتها لما شافته يتوجه لها و وقف امامها وهو يمد يده بيصافحها: نعيد زي الخلق؟

مدت يدها تصافح يده: ليه لا

ابتسم يرفع يدها و يقبلها و عضت طرف شفتها بـ خجل يوضح على احمرار وجهها

-

-المساء

رايحه معه لبيت ابو سالم و انهت عيدها عند اهلها

لفت عليه لما شغل احد اغاني عبدالمجيد عبدالله: صاير تسمع له هذا سحري؟

ابتسم ومد يده يمسك يدها: ما نقول انه سحر؟

ضحكت تفتح اصابعها عشان تشبكها بأصابعه و أكمل: عيون حلوه و خمس شامات

ميلت راسها تسنده على كتفه وهمست: بنطول بالطريق؟

سلمان: لا ربع ساعة او اقل و نوصل

سكت تناظر يدينهم اللي امامها و زادت بسمتها لما حست بـ ابهامه يمسح على ظهر ابهامها رغم انها حركه بسيطه لكن خلت قلبها ينتعش و سحبت جوالها تصور يدينهم عدة صور ثم حطته و رجعت تسند راسها على كتفه و تسولف له عن عيدها لين وصل قدام بيت ابو سالم وهو مبتسم و الفرحه تغمر قلبه وهو قاعد يعيش معها مرحله ما يعرف هل هي بدايات الهوى او هو مايل لها الحين و تخطى البدايات لكن يحس بـ شعور جميل يداعب قلبه و يخليه كل ما شافها ابتسم و زال همه

نزلت وراه تدخل البيت و توجهت لغرفته بسرعه عشان تعدل شكلها اول و بعدها تروح للحريم

وقفت تفصخ عبايتها و تعدل شعرها و اخذت عطرها ترش منه بكثره و ابتسمت بـ ربكه لما شافته مستند عند الباب و يناظر فيها بتأمل و اصبعه يمسح على ظرف شنبه ونطقت: على ذي النظرات لازم تجيب قصيده على فستاني الازرق

ابتسم يهز راسه: نقصد فيك ليه لا؟ هي القصايد ما تليق الا فيك اصلا

ضحكت وتقدمت بتطلع لكن وقفها يمسك ذراعها: وش سويتي فيني

رفعت حاجبينها بـ استغراب و اكمل: ضيعتيني

اشتدت كل عروق جسمها وهي تبلع ريقها ما تعرف ليه يجيها ذا التوتر و اكمل سلمان: صرت غريب فـ ديّاري و صارت عيونك هي الديّار

زفرت بـ راحه لما سمعت صوت جوال يدق و مشت بسرعه تطلع اوّل ما شافته يطلعه بيرد اما سلمان ابتسم وهو يرفع جواله و يشوفها تهرب، يفهم خجلها الواضح

دخلت مجلس الحريم و ارتبكت تشوف الكثير من اقاربهم و حريم الديره اللي ما تعرفهم

جلست عند البنات وهمست لها رويدا:طالعه تجنني

ابتسمت و شاركتها الهمس: وانتي بعد، الله يعين قلب سهم لو يشوفك

ابتسمت بـخجل بدون رد و ابتدا جو السوالف بين البنات و متعمقين يتكلمون

لفت ريم ترفع راسها لما نطقت وحده من البنات اللي ما تعرفهم: هذي اللي تزوجها سلمان؟هزت ريم راسها بـ نعم وهي مستغربه و اكملت البنت: الله يعينك حبيبتي

ريم: ليه

رفعت كتوفها تمثل حسن النية: لا بس انه يعني صعب تتزوجين واحد يحب غيرك لا تفهمين قصدي غلط بس احس انه اخذك عشان ينسى دانه وهم للحين يحبون بعض

سكتت ريم ترمش بـ صدمه وهي فعلاً عاجزه عن الرد واللي احرجها اكثر نظرات الكل لها اللي خلت النار تشب بقلبها، حولت نظراتها على دانه اللي نطقت: نوره لو سمحتي! انا متزوجه حاليا ما بيني شي مع احد لا تسوي مشاكل بكلامك ذا اللي ماله معنى

نوره: بسم الله شفيك دانه ما قلت شي ليه عصبتي قلت بس الحقيقه، اعرف ان القلب يحب بس مره؟

دانه: طيب واذا ما كان حب اصلا؟

نوره: اجل وش اللي كان بينكم من وانتي صغيره تقولين سلمان بيتزوجني وش تغير

دانه: كان تعلق ورعان وسمعنا انّا لبعض و كبرنا على ذا الكلام و لما كل واحد منا لقى اللي يناسب قلبه نسينا بعض تفهمين كذا ولا تبي طريقه ثانيه

وقفت ريم تطلع من بين البنات بعد ما حست ان الوضع جداً غلط و تواجدها غلط و سكوتها غلط و لو تكلمت بتكون برضو غلط مشت للمطبخ لانه المكان الوحيد اللي بيكون فاضي

دخلت المطبخ و اخذت نفس تشتت افكارها و شعورها و حرقة قلبها، شافت رويدا اللي تجدد القهوة و سلمان ينتظرها

ابتسم اول ما شافها: نوّر المطبخ بعد ما كان مظلم بوجه رويدا

كشرت رويدا تلف عليها: انت فالح بس فدعس مشاعري اجل خلي اللي نورت المطبخ تكمل

نطق لما شافها تطلع من المطبخ: وين وين يا زعوله ارجعي امزح معك

ضحكت رويدا تطلع من المطبخ لانها ما تبي تكون موجوده وهم مع بعض و تبيهم ياخذون راحتهم

ورفع كتوفه يأشر على القهوة: ضريبة المدح

سكتت لما فهمت و تقدمت منها تشوفها تغلي و سندت يدينها على الرخام تناظر فيها بـ هدوء متجاهلة وجوده فـ المطبخ

اخذ نفس يوقف وراها بالضبط و صار راسها و ظهرها من الخلف مقابلين وجهه و حط يديه جنب يدينها نزل لمستوى اذنها: هربتي قبل كمل اعترافي، نرجع لغرفتنا؟

تقشعر جسمها تغمض عيونها بـ عنف لأول مره تحس بكل ذي المشاعر لكن الحين خايفه تفضحها

ونطق سلمان يكشف كل مشاعره و ينسى كل الكبرياء و يثبت لها انه مال ولو انه الغصن اللي ما يميل ميلته و ميله الهوى: انتي صرتي وجهتي و كل اهلي صرتي شي ما اقدر اتخيل نفسي بدونه، صرت ما اشوف نفسي الا معك

دوّورها يلفها عليه عشان يستريح بالنظر لعيونها و تقدم يبوس عيونها الثنتين بدون تردد وناظر فيها بعيون توصف مدى ولهه و تقدم يقبل مكان كل شامه فـ وجهها

سند جبينه على جبينها يناظر فـ عيونها ما وده يتكلم وده بس تبقى ذي اللحظه و

↚

وده بس تبقى ذي اللحظه و ساوى وجهه مع وجهها لين التصق انفه بـ انفها يهمس: ريم

رمشت تناظر فـ قرب عيونه و قبل يكمل كلامه رفعت كفها تحط على فمه ونطقت بـ تردد: لا تستعجل يا سلمان

سكت يعقد حواجبه و أكملت: خلينا نفهم مشاعرنا اول، لا نغلط

ابعد وجهه يستغرب كلامها و يشوف التغير و التردد فـ عيونها وهمس: ليه

رمشت تنزل عيونه و اكمل: مو قلتي احبك ؟

رفعت راسها بـ صدمه تتذكر وقت قالتها بالسياره

سكتت لثواني تشوف الحيره فـ عيونه ونطقت: احبك بس انت ما تحبني

انذهل يشوفها تسكت بعد كلامها و اكملت وهي تبلع غصتها: تأكد اذا انت تحبني او انت للحين تحب بنت عمك

ابعد يدينه اللي كانت محاوطتها و ابتعد خطوه يناظر فـ وجهها: تحبيني بس تشكّين بحبي لك؟

لفت تطفي النار تحت القهوة وهي تنطق: لا تنسى انك نفسه اللي كان يقول مستحيل اشوفك بنظرة زوجة

لفت عليه و اكملت: انا وش بنظرك؟ بديل لها؟ ما تشوفني كزوجه و تقول انك تحبني؟

تقدمت تأشر على نفسها:تعبت من الإهانة بكل مره لازم يجي شخص يذكرني بنفس الكلام ، قبل اسابيع كنت خايف تقترب خطوه لي و الحين مندفع ليه؟

تذكر موقفهم عند الاسطبل و ناظر فيها بنظرات عجزت تفهمها: كل شي صار و للحين تظنين انك بديل

تقدم يمسك كتوفها و أكمل: ريم! انا بنفسي خليت جدي يزوجها لهزاع ليه؟ عشانك انتي طلبتي، هذا ما يخليك تتاكدين ان قلبي انغسل منها؟

لاحظ سكوتها و ابتعد يهز راسه: اجل اعذريني على اندفاعي

سكتت تشوفه يصد و يمشي يطلع من المطبخ واخذت نفس بتعب تحس بضيق ينتشر بصدرها، ودّها تفجره و تتخلص منه و من المشاعر اللي توجعها و مشت تطلع من المطبخ بـ ضياع ما تعرف وش تسوي ولا وين تروح

رفعت جوالها ترسل لـ رويدا لانها ما ودها ترجع لمجلس الحريم: وينك

وصلها رد رويدا بعد ثواني: رحنا نجلس بالغرفه الكبيره الحقينا

قفلت جوالها اخذت نفس تروح لهم و ابتسمت بـ هدوء تشوفهم مسوين جلسه لوحدهم جلست تنطق: هاجين؟

ترف: صراحه تكتمني كثرة الناس

نطقت رويدا وهي تصب لريم من القهوة اللي قدامها: هذي عاده عندنا لازم بكل مناسبه ننعزل عن الناس بمكان لوحدنا

نطقت نوير: يجماعه وحشتني حسناء يبنات ليتها جت

رويدا: اول عيد لها مع زوجها لازم تعيد معه

سكتت ريم تبتسم بـ هدوء وهي تسمع سوالفهم و ضحكهم ببال شارد و مشغول ورفعت راسها لما جتهم ريام تمشي بـ غضب-

ونطقت نوير: شفيها ريومه

ريام بغضب: حسبي الله فذي اللي اسمها نوره محد مفتك من السانها

ضحكت رويدا: وش قالت ذي المره

ربام: اول شي خربت الجلسه لما جابت موضوع دانه و سلمان و بعدها تكلمت عن حامد و اخر شي استلمتني انا تبي تعرف ليه انفسخت خطبتنا انا و رواف

ترف: معليك المفروض الكل تعود عليها ولا يهمك كلامها

ريام: بس تقهر ياخي ملقوفه و غثيثه

رويدا: معك حق صراحه ما تنطاق

اعتدلت ريم بجلستها تنطق: مين ذي نوره تقرب لكم؟

هزت راسها بـ النفي رويدا: ما تقرب لنا بس من بنات المعارف وكذا

هزت راسها تسكت ونطقت ريام تلف على ريم: ليه ما رديتي عليها؟

رفعت كتوفها تزم شفايفها: ما عندي رد

ترف بـ استغراب: وش قالت هي

ريم: تقول متزوجه واحد يحب غيرك و مدري وش

رويدا: كيف تسكتين لها ذي ترا تتمادى اذا ما وقفت عند حدها

رفعت كتوفها تتنهد ونطقت نوير: لا يأثر فيك كلامها انتي عارفه نفسك وعارفه زوجك

هزت راسها بـ نعم و بعد وقت طويل انتهى يوم العيد و انتهى العشاء فـ بيت ابو سالم و بدا الاغلب يرجعون لبيوتهم

-

ريم، طلعت من الحمام بعد ما بدلت ملابسها و بلعت ريقها تشتت انظارها عنه و تتوجه للتسريحه

ناظرت فيه من لمرايه ياخذ بطانيه و يطلع من الغرفه بدون لا يكلمها و زمت شفتها ما تفهم سبب خروجه و طلعت بعده تتوجه لغرفة رويدا

دخلت بعد ما دقت الباب و شافت رويدا اللي منسدحه على بطنها بتعب و جلست اول ما شافت ريم: هلا ريم

توجهت لها تجلس جنبها بعد ما قفلت الباب: بغيت اتكلم معك

اعتدلت رويدا بجلستها تتربع على السرير و تأشر لها تجلس و جلست ريم: تفضلي ياروحي وش؟

ريم بـ توتر وهي ما تعرف كيف تفتح الموضوع: اء سلمان قبل شوي طلع و ما عرفت وين رايح

رويدا: قال منيف انهم بينامون كلهم بالمقلط مع بعض

اكملت بـ ضحك: بس سلمان حمار المفروض سحب عليهم وجاء عندك

ابتسمت بـ ضيق: رويدا تحسين سلمان يحبني؟

عقدت حواجبها من السؤال: ايه، ليه

رفعت كتوفها تنطق: مدري بس خايفه انه للحين يحب دانه، خايفه انه يبيني بس عشان ينساها

رويدا: تفكرين بكلام نوره؟

هزت راسها بـ نعم: اخاف انه ما يحبني صدق و اخاف اقدم له قلبي و انكسر بلاخير-

رويدا: هو يحبك!

سكتت تناظر فـ رويدا ثم نطقت: قاله لك؟

هزت راسها بـ نعم رويدا تتذكر حديثهم فـ المطبخ و كلام سلمان لها عن ريم: قال بالحرف انه صار عاشق مو بس حاب وانا طلعت من المطبخ عشانه

سكت تنزل عيونها و تناظر فـ يدينها بدون رد و اكملت رويدا: ولو ما قال انا اعرف ياريم انا من اول يوم شفته كيف يناظرك وانتي تفطرين معنا شفت انه شايف فيك عجائب شعوره

رفعت راسها تتنهد: لما طلعتي من المطبخ هو كان بيقول بس… وقفته لاني اعرف وش بيقول

رويدا: وش قلتي

ريم: كثير، بس قلت انه يبيني بديل

رويدا: انتي تحبينه

هزت راسها بـ نعم بدون ما تتردد و اكملت رويدا: وهو يحبك، لا تخربينها على نفسك و قفلي اذونك عن كلام الناس اذا انتي واثقه من حبك له خليك واثقه من حبه لك

مسحت وجهها بتعب: وش اسوي الحين هو ما كلمني و اكيد زعل

رويدا: انتي صديتيه تبينه يرجع يكلمك بنفس الوقت؟

ريم: سلمان ما يبادر بعد الصد

هزت راسها: تعرفينه و تعرفين شخصيته رغم ذا صديتي

ريم: خايفه ينتهي كل شي وخايفه اتمسك

ناظرتها رويدا بـ استغراب ما تفهم فوضة مشاعرها و تلخبطها هي ما تعرف اذا تخطي لقدام او ترجع لورا، تبادر او تكمل على صدها، تبعد اوتقرب، تصلح كل شي او ينتهي فـ لحظة،، ما تبي تعيد نفس حلقة الصد اللي تكون بينهم لانها تكوي قلبها و تحرقها

نطقت رويدا بعد سكوت: تبي تتأكدين من حبه؟

هزت راسها بـ نعم و اكملت رويدا: بيرجع يحاول واذا ما حاول امشي مع تفكيرك فيه-

جالس بـ شرود و الضيق محتل صدره من بعد حديثهم، هو يعرف انه غلطان و بشده على كلامه بأول زواجهم لكن الحين كل شي متغير

اخذ نفس يحط راسه بين يدينه بتعب و لف لما حس بشخص يجلس جنبه تنهد لما شاف حامد ولف يناظر قدامه لانه للحين ما تعدلت علاقتهم صح انه رافقه طول ايامه بالمزرعه و فترة علاجه من اللي هو فيه لكن الحين و بعد ما بدأ يرجع لوعيه لازم حامد بنفسه يصلح أخطائه

تنهد حامد ينطق: اخبارك ياولد العم

سكت يناظر قدامه بدون رد و لف على حامد: تعافيت؟

هز راسه حامد ثم نطق بـ هدوء: اعذرني

سلمان: اللي سويته ما تنسيه الاعذار

تنهد بـ ضيق و اكمل سلمان: بس اللي بيننا عمر ما تنسيه الاغلاط اللي سويتها

حامد: كل شي حصل كان خارج عن إرادتي و الحين صرت غريب بينكم وانتم اهلي؟

رفع كفه يحطه على كتف حامد: مب غريب بس انت ضريت الكل بكلام و افعال، امك ابوك اختك انا و اكثر شخص اذيته بنت سيف

بلع ريقه بـ صعوبه من الغصه اللي تتوسط حنجرته هو رجع له عقله بعد ما اخترب كل شي و صعب عليه

وسكت مده ثم نطق: سمعت منيف يقول سافرت؟

هز راسه بـ نعم سلمان و سكت حامد يناظ رجوله يفكر: لو رجعت تقدمت لها بتوافق علي؟

سلمان: لا

تنهد من جوابه الصريح ونطق: طيب وش اسوي عشان اصلح اللي صار

سلمان: تقدر تصلح كل شي و ترجع حامد اللي الكل يعرفه بس بنت سيف ماظنتي بترجع تلقاها

رفع يده يحركها فـ شعره من حس بألم راسه رجع له من كثر التفكير، و لاحظ سلمان حالته و وضُوح تعبه: بس يمديك تحاول ما بتخسر شي

ما رد حامد وهو عاقد عاقد حواجبه ثم وقف ينطق: بسافر لها

سكت سلمان بدون رد و أكمل حامد: بخطبها عند خوالها ما بتركها

جلس سلمان لما مشى حامد يرجع للداخل و تنهد يعرف ان ارتباط حامد بأصايل صار شي مستحيل و حتى لو وافقت هي مستحيل جدهم يتقبل الاهانة اللي سببها حامد لها و يرجع يوثق فيه و يوافق عليه

اخذ نفس يمسح وجهه وهو من داخل ضايق على حامد لكن ضيقه ذا نقطه من بحر ضيقته على صد ريم له وبلع ريقه يتذكر موقفه كان ما بينهم مسافة ما بينهم غير انفاسهم يستغرب كيف بذي الفتره صار قريب منها حيل و الحين صارت تفصلهم فجوة اكبر فجوة الصدود و الخوف و النُفور يحس انه كل ما تقدم لها خطوه هي تبتعد الف خطوة و ترجع تحط حواجز-

ريام، مشت تطلع لـ السطح قبل تروح لبيتهم ذا اكثر مكان مشتاقه له لانه كان يضم خطاويهم بأخر لقاء لهم قبل يكتشفون اهلها كل شي و يبعدوهم عن بعض

اخذت نفس تفرك كفوفها ببعض وهي تناظر فـ هدوء الليل و سكونه

لفت بنتزل لما حست انها طولت لكن جمدت بمحلها تبلع ريقها لما شافت اللي واقف عند باب السطح يناظر فيها

اخذت نفس تهدي نفسها و غرست اظافرها بباطن كفها من تحررت مشاعرها تدفعها تسأل عنه بسبب الشوق اللي اكل قلبها

نطق رواف وهو يستند على الحيط: جيتي تشوفين اخر مكان جمعنا وقت كنا احباب؟

سكتت بدون رد و مشت بتنزل لكن استوقفها صوته: وين بتهربين يابنت زيد

لفت عليه تبلع غصتها ونطقت: غلط، اللي نسويه من البدايه غلط

سكت رواف بدون رد و أكملت ريام: بدينا بطريقة غلط و انتهينا الحين، مو غريب اللي حصل

تنهد يبتعد عن طريقها و مشت تنزل بسرعه و اخذ نفس رواف يحس بحريق داخله و وحشة وفراغ يسكن جوفه و قلبه من بعد ما ادرك ان دروبهم تغيرت يخوفه شي واحد وهو انه يزيد اصرار ابو حامد و يوافق على شخص غيره

↚

دخلت بيتهم بخطوات متسارعه تسابق دقات قلبها و دموعها اللي اجتمعت بمحاجرها

ولفت على صوت امها اللي نادتها من الصاله قبل تروح لغرفتها، تنهدت بتعب و مشت تدخل الصاله تشوف امها و ابوها جالسين يتكلمون و لفت عليها منيره بـ ابتسامه خافته تنطق: تعالي اجلسي

جلست بـ هدوء تستغرب ابتسامة امها و مدت لها منيره كيس: جابه هزاع

اخذت الكيس بـ استغراب و فتحته تشوف الجوال الجديد اللي بداخله و اخذت نفس ترجع تقفل الكيس ونطقت : تو تتذكرن ان ما عندي جوال؟ ولا اصلا ما تبون تخلونه عندي

منيره: ما نبيه يكون عندك

هزت راسها ترجع تحط الكيس قدام امها : اجل قولي لهزاع كثر الله خيره مابي منه شي

تجاهلت اسلوب بنتها ونطقت: انسي موضوع الجوال عندي شي اهم منه الحين

عقدت حواجبها بـ استغراب و لفت تشوف سكوت ابوها و هدوئه وهو يناظر بأمها ينتظرها تتكلم: وش في؟

منيره: اليوم لقيت جارتنا زمان عاليه تذكرينها؟ سألتني اذا انتي مخطوبه وقلت ان خطبتك انفسخت

سكتت يجمد وجهها بخوف من باقي كلام امها ما تبي تسمعه اذا هو نفس اللي فـ بالها و اكملت منيره بعد ما سكتت شوي: تدور لولدها على عروسه تقول انها خطبت له بنت خالته و ملك عليها بس بعد فتره ما حصل نصيب وطلقها

وقفت بدون مُقدمات تنطق: قصدك من الاخر؟

منيره: الحرمه تبي تخطبك له

ضحكت بسخريه و عدم تصديق ونطقت: وانتي قلتي لها حياك يأمي؟

هزت راسها منيره بنعم و جمد وجه ريام ما تفهم تصرفات امها-

ونطقت: يمه منجدك! تخططون وتحضرون خطبه وكل شي وانتم عارفين اني ما بوافق تبون تفشلون الناس او بتجبروني؟

منيره: ما بيتفشل احد ولا بنجبرك بتوافقي برضاك ولدها ولد ناس زينين و مافي بنت ترفضه

توسعت عيونها و اشرت على نفسها: وانا؟ انا ماني بنت ناس! عشان تسوين كذا بدون علمي

منيره: ريام لا يطول لسانك لك عين تتكلمين بعد اللي سويتيه

غمضت عيونها بصبر و لفت على ابوها اللي نطق: اذا تنتظرين ولد ابو سيف ما عاد لكم نصيب! برفضه بكل مره يرجع يخطبك وافقي على نصيبك اللي جايك الحين وعيشي حياتك

بلعت غصتها و اقتربت منه تنطق: ليه صرتو قاسيين؟ ما تنغفر الاغلاط؟ ايه انا غلطت اعرف واللي سويته مو شوي بس انت ابوي؟ ابوي اللي مدلعني ولا يقدر احد بوجوده ينزل دمعتي، ابوي اللي ما عمري شفت منه نظرة قساوه ليه تعاملني الحين كأني غريبه و مو بنتك اللي ربيتها؟

زيد: لانك نسيتي كل تربيتي لك و تعبي عليك و طاوعتي الشيطان و رحتي تكلمي رواف

اخذت نفس و رفعت كفها تمسح دمعتها اللي خانتها و هزت راسها تلف على امها: ولدها اقرب له يتوسد القمر من يتزوجني و ما بوافق عليه لو تجبروني ماني موافقه

منيره: ريام!

سكتت بدون رد ولفت على ابوها تنطق: اسفه على تربيتك اللي ضيعتها

همست بصوت خافت يغلفه البكاء و الغصه: بس وحشني ابوي اللي اعرفه!

لفت تطلع لغرفتها بعد ما خلصت كلامها و اول ما قفلت الباب انفجرت تبكي و تسمح لـ مشاعرها بالخروج و النزول مع دموعها بسبب شعورها و غرابة الوضع عنها و تحس انها بغربة وهي بين اهلها اكثر ناس حنونين عليها امها و ابوها صايرين ذا تعاملهم معها

-

-

دانه، مشت مع اهلها لانها بتقعد عندهم بالديره و ابتسمت تجلس قدام شباك غرفتها اللي يطل على بيت جدها، تحب عيشتها هنا وتتذكر ايامها بذا البيت وذي الغرفه

صحت من شرودها على صوت جوالها اللي وصلته رساله و فتحتها تعقد حواجبها تشوف رساله من هزاع "قفلي الستاير لا يمر احد يشوفك!"

بلعت ريقها و رفعت راسها تناظر و جمد وجهها لما شافته واقف يناظر فيها و استوعبت انها مشغله اللمبه و يمدي اي احد يشوفها قفلت الشباك و مشت تجلس على سريرها تكتب: تمام

رفعت شعرها خلف اذنها تشوفه يكتب و بعدها يسكن و فهمت انه قاعد يكتب و يحذف و ارسلت بدون تردد: بتقول شي؟

وصلها رده بعد ثواني: بتنامي؟

زمت شفتها ما تفهم سؤاله: ليه

ارسله لها: ابد بس ما جاني نوم و قلت اطلع اتمشى فـ الديره، تجين معي؟

اتسعت ابتسامتها من طلبه اللي كان بخاطرها تتمشى بالليل بحكم انه شي ممنوع عندهم هنا وردت عليه بسرعه: اكيدوقف قدام بيتهم ينتظرها و خرجت له بعد مدة قصيره ولفت يناظر فيها: نطلع بالسياره ولا مشي

دانه: مشي

تقدم يناظر الطريق الفاضي من الناس و الليل ساكن ما ينسمع غير اصوات صراصير الليل و صوت الهواء ونطق: يلا

مشت معه وهي تناظر الطريق الهادي و رفعت راسها تشوف السماء اللي تزينها الغيوم الممزوجه مع سواد الليل بشكل جميل و رفعت جوالها تصور السماء ثم لفت عليه تنطق: هزاع عادي

عقد حواجبه يهز راسها بمعنى ايش ونطقت: عادي ترفع يدك كذا ابي اصور

رفع يدها بالطريقه اللي تقول و رفعت هي بدورها يدها تشبك اصبعها الصغير مع اصبعه الصغير و تصور بالطريقه اللي كانت فـ بالها

ولفت عليه لما نطق: نمر على البقاله؟

هزت راسها بـ نعم تبتسم بخفه و اكمل: بس كلاب زيدان بذي الطريق تعالي نروح من الطريق الثاني

هزت راسها بالنفي تنطق:اذكر ان كلابه يدخلهم بالليل اكيد مب موجودين

مشو متوجهين للبقاله و أول ما اقتربوا من بيت ابو زيدان اللي كانو ينظنون ان ما قدامه شي جاهلين ان الكلاب نايمه قدام البيت ولا انتبهوا لها بحكم ان الشارع ما فيه إنارة

وقفت تجمد مكانها وقت حست بالكلب اللي هم جنبه يصحى من نومه على صوت خطواتهم و وقف بسرعه ينبح وكان نباحه سبب فإن باقي اصحابه يصحون

رمشت يطيح قلبها لما سمعت نُباحهم و صرخت تتمسك بيد هزاع اللي تراجع للوراء و سرعان ما ركضت لما نطق: اركضي اركضي

ركضت معه وهي متمسكه بيده و تصرخ لا شعوريا كل ما حست أن الكلاب تتقدم منهم لدرجه انها ما انتبهت على جزمتها اللي تركتها بالطريق وهي تركض من الخوف و وقف هزاع بسرعه لما شاف عصاة بالارض و رفعها يأشر على لكلاب بتمثيل انه بيضربهم وهي للحين متمسكه بيده و دفنت وجهها بكتفه لما شافت الكلب اللي نبح بشراسه و بان شكل اسنانه حست بهزاع يرمي العصاة و يلم ذراعه الثانيه عليها يضمها، تنهدت براحه لما حست ان صوت الكلاب اختفى دليل على انهم تركوهم ورفعت راسها تناظر فيه مبتسم كأنه يكتم ضحكته و ابتعدت عنه تناظر رجولها اللي تغبرت حافيه و رفعت راسها تناظر فيه بصدمه لما استوعبت وسرعان ما انتشر صوت ضحكته بصوت عالي و ضحكت معه تمسك راسها و اهتزت اكتافها بسبب ضحكها و تقدم هزاع يبلع ريقه يحاول يكتم ضحكته ونطق: وين تركتيها؟

رفعت كتوفها وهي ترفع نقابها تمسح اثار الدموع و تنهدت بضحك: مدري

ابتسم يتأمل ملامح وجهها مدري: خلينا نرجع

هز راسه ونطق: انتظريني هنا ثواني

هزت راسها بالنفي تمسك ذراعه: لا هزاع بيرجعون لك خلينا نرجع

سكت يناظر فيها تعترض على روحته و فصخ نعاله يحطه قدام رجولها، ورفعت راسها تناظر فيه و هز راسه يأشر لها: البسي خلينا نرجعدانه: وانت؟

رفع كتوفه يحط يكتف يدينه وراء ظهره: ما بيجيني شي البسي انتي

ابتسمت له تناظر فيه ونطق بـ استغراب: وش فيك؟

هزت راسها بالنفي تكتم بسمتها: ولا شي، شكرا

بادلها الابتسامه و لبست جزمته ثم تقدم يمسك كفها ونطق: يلا نرجع

هزت راسها بربكه من مسكته ليدها بطريقة حنونه يطمنها من خوفها و مشت معه راجعين للبيت

-

↚

صباح اليوم الثاني مع برد خفيف و هبوب ينعش الروح و صوت عصافير توقف على اطراف الحيوط و ديك الجيران اللي يزعج الحاره بصوته العالي

مع ذي الاجواء ابتسمت تجلس جنب رويدا و فايزه بالحوش الخلفي ابتسمت تسمع حلطمة رويدا اللي ملكتها بعد يوم و تبي ترجع بأسرع وقت

و فزّ قلبها توقف بسرعه لما سمعت صوته ينادينها و وقفت تمشي لمصدر صوته و شافته يدخل غرفتهم بعد ما شافها تتوجه له

اخذت نفس تدخل و تشوفه جالس و بعثرة شكله توضح سهره امس و لعب الهواجيس فيه، رفع راسه يناظر فيها: قلتي لسهم تبين تجي عندهم؟

سكتت تفهم ان سهم علمه ونطقت: ايه

زاد استغرابه و وقف ينطق: وانا وش؟ ليه ما تقولين لي انا اخذك و ارجعك

فكرت يدينها ببعض ورفعت كتوفها ما تلقى جواب: مدري

اقترب منه خطوات و فرق كفوفها يمسكهم ونطق: ريم افهمك

رفعت راسها تناظر بعيونه و بلعت ريقها ترمش تنتظره يمكل: بس مابي نعيد الجفا و الصد لانه يتعّب اذا ما يتعبك انتي انا يهلكني

سكتت تحس كفوفها بين كفوفه و عيونها مقابله عيونه و همست: بينهينا الصد؟

هز راسه بالنفي: ما ينهيني صدك انتي، والله لو تبعدين الف خطوه بتقدم بألفين مثلها، لو تتشتين عن طريقي بكون قدامك انا وجهتك وانا مكانك

رمشت تشوف تملكه فيها و فضحه لنفسه ، نطقت: اوجعك و ما تتوب؟

هز راسه بـ نعم: احب الوجع دامه منك اوجعيني، ولو انتي ذنب ما أتوبك ولا بعرض عن دروبك

عضت طرف شفتها تحس ان مشاعرها بتفلت منها و تنتثر بالمكان لما نطق بوضوح: انتـي أجمل ذنُوب قلبي، لا تتركيني

بلعت ريقها تلاحظ كلمتها اللي تقول له "لا تتركني" يقولها تفهم شعوره و حاجته لها مثل حاجتها له و يبقون مالهم الا بعض و محد يفهمهم كثر ما هم يفهمون بعض و واضحين بعيونهم

اقتربت منه تترك يدينه اللي كانت تشد على يدينها و رفعتها تحاوط بطنه و تحطها على ظهره تضمه و ابتسم يرفع يدينه لظهرها يبادلها الحضن ونطقت: لا تتركني سلمان

سلمان: ما أتركك ولا يمكن يجي شي يفرقني عندك، الا اذا كان موتي

رفعت راسها بسرعه تحط جبينها على فمه ما تبيه يمكل طاري الموت و اتبسم بخفوت يقبل جبينها و ابتعدت عنه تنطق: بتوديني لهم الحين؟

سلمان: ليه مصره تروحين لهم توك راجعه من عندهم؟

ريم: بساعد امي-

طلعت من بيتهم متوجهة لبيت جدها و فـ يدها اكل مرسلته امها و اول ما تقدمت من البيت رفعت عيونها تشوف هزاع و مشعل اللي قدام الباب يتكلمون و ابتسمت بخفوت تنزل عيونها لما شافت هزاع يناظرها تتذكر ليلة امس و دخلت البيت

لف يناظر مشعل اللي يتكلم له مُدة: وش قلت انت

تأفّأف بغضب: هزاع عقلك و عيونك وين طايرين لي ساعه اتكلم

ضحك ينطق: طيب عيد اسمعك

-

وصل قدام بيت اهلها بعد مدة وهي مستغربه صمتهم فـ السياره كانت تتوقع انه بيتكلم بسوي اي شي لانه ما يحب الصمت يطول بينهم

ولفت تشوفه يدعك ما بين عيونه وهمست: انت بخير

هز راسه سلمان بدون ما يلف عليها و رفعت يدها تحطها على كتفه: سلمان تحس بشي؟ شكلك تعبان من طلعنا من البيت

هز راسه بالنفي و أبتسم لها: مافيني شي بس مصدع شوي

ناظرت فيه ونطقت بعدم اقتناع: اذا تحس بشي علمني

هز راسه و حرك بعد ما نزلت ياخذ طريقه لبيته بدون ما يرجع لبيت اهله لان حتى هم بيرجعون و عقد حواجبه يحاول يركز بالطريق رغم الألم اللي يضرب راسه و الخمول اللي صاب يدينه بعد ساعات وصل قدام البيت و وقف يسند راسه على الدركسون ما يعرف كيف وصل و اخذ نفس يرفع راسه لكن سكنت ملامحه يشوف رجال اول مره يشوفه فـ حيهم و الغريب انه كان واقف قدام بيت سلمان و يدور حوله كأنه يبي شي من هنا و نزل بسرعه يتوجه للبيت و الرجال اول ما شافه جاي نحوه مشى بدون كلام يتوجه لسيارته

عقد سلمان حواجبه يخاف انه واحد من اصحاب ذياب و مشى خلفه بخطوات متثاقله ينطق: هيه انت

ما رد عليه الرجال يبتعد لسيارته ونطق سلمان بصوت اعلى: اكلمك يارجال

توقفت خطوات سلمان يحس انه نفذت كل طاقته و رفع كفه على راسه يحس بالارض تدور حوله و تعثّر بخطواته يحاول يقرب من الجدار و يتمسك فيه و التفت ما يدرك شي لما طاح على الارض يشوف الضباب يتشكل قدام عيونه و يسمع صوت الرجال اللي كان يبتعد عنه و رجع له ينطق بخوف: سلمان سلمان قم فيك شي؟-

عند بيت زيد،

وصل حامد قبل اهله عشان يلحق يجهز لـ سفرته قبل يجون و رفع جواله يناظر فـ رقم سلمان وده يتصل و يسأله اذا اللي يسويه صح و يفكه من حيرته لانه الشخص الوحيد اللي تعود ياخذ برأيه

و ضغط على رقمه يتصل و سُرعان ما عقد حواجبه لما وصله صوت رجال يتأكد انه مو سلمان: السلام عليكم

حامد: عليكم السلام

الرجال: تعرف صاحب الجوال؟ مدري وش صار بس اغمى عليه بالشارع و اخذته للمستشفى، ضغطه مرتفع اذا انت احد من اهله تعال عنده

وقف بسرعه يطلع من البيت وهو يكلمه عشان يقول بأي مستشفى و انطلق يروح لهم

-

-

بمكان ثاني، الخوف يسيطر عليها تناظر فـ أميره اللي تتكلم فـ الجوال و لفت عليها بعد ما قفلت و مشت تجلس جنبها ونطقت: يمه محسن يقول انه بخير بس كان تعبان و اترفع ضغطه و سبب له كذا

تنهدت براحه تمسح وجهها بكفوفها اللي ترجف و همست: الحمدلله

تنهدت اميره تنطق: لمتى؟

لفت عليها عفاف تهز راسها بـ استغراب و اكملت اميره: لمتى بتقعدي كذا تاخذين اخباره من بعيد و من الناس

سكتت ترجع تناظر قدامها و اكملت اميره: ثلاثين سنة وانتي ما عمرك لمستي ولدك بيدك ولا عمرك سمعتيه يناديك امي ثلاثين سنة وانتي مسلوب منك حق تشوفين ولدك او تتعرفين عليه ليه؟

تقدمت تمسك يدين عفاف: تمثلين قدامنا انك صابره و ما يهمك شي وانا كل ليل اسمع صوت بُكائك وانتي تشوفين صوره؟

رفعت يدينها تمسح وجهها و شتت انظارها تنطق: ما بتفهمين علي يا أميره انا اوجعته بتركي له ما اقدر ازيد وجعه برجوعي

اميره: هو يبي يشوفك اكيد ما بتوجعيه و يمكن يفرح

هزت راسها بـ النفي عفاف: ما اقدر انا اعرف اعرف اللي عاشه من صغره و اعرف انه بيسبب له كرهي بس ما عندي حول، ما اقدر افتح جروحه مره ثانيه اعرف انه ما بيتقبلني و رجوعي ما بيسبب غير المشاكل

تنهدت توقف : انتي ودك ترجعين بس خايفه

سكتت تناظر الفراغ بدون رد

-

-

قعد يعقد حواجبه من المكان اللي يتواجد فيه ورفع عيونه يشوف حامد اللي دخل ونطق: وش في

حامد زفر براحه ينطق: وراه ضغطك مرتفع وش فيك

رفع كتوفه ونطق يتلفت: مين جابني

حامد: مدري اتصلت عليك و رد واحد يقول انك طحت بالشارعسكت يحاول يتذكر اخر شي حصل بعد ما اغمى عليه و انعقدت حواجبه اكثر يتذكر نداء الشخص له بأسمه يثبت له انه شخص يعرفه و رفع راسه ينطق: وينه اللي جابني

حامد: راح اول ما وصلت عطاني جوالك و مشى

وقف و تقدم حامد بسرعه يسنده: وين رايح!

سلمان: برجع للبيت وش له اقعد هنا

-

-

حسناء،

ابتسمت تحط اخر لمساتها و تفرد شعرها و وقفت تناظر فـ شكلها بـ اعجاب و غمزت لنفسها من لمرايه: مزه

فزت لما سمعت صوته عند الباب ينطق: انشهد

زفرت براحه لما شافته بتار ولفت تطلع عقدها بتلبسه: خرعتني!

تقدم منها بسرعه يسحب العقد اللي بتلبسه و حطه ناظرت فيه بـ استغراب لما حط علبة باللون الاحمر العتيق ونطق: جايبه عشان تلبسيه اليوم

نزلت انظارها تفتح العلبه و تبسمت من شكل العقد اللي كان فخم لفت عليه لما نطق: تبيني البسه لك؟

سكتت تناظر فيه ما تلقى رد و ضحكت بربكه لما رفعه و مشى يوقف خلفها، وغرست اظافرها فـ باطن كفها لما حست فيه يلم شعرها للجهة الثانيه و يلبسها

و ابتسمت ترفع اصابعها النحيله تتلمسه عليه و تنعجب فـ اختيار بتار و ذوقه الراقي

و بلعت ريقها لما حست بـ انفاسه تقترب منها و انتفض كامل جسدها لما وقعت شفاته عند عنقها يقبلها برقه و ابتعد بـ هدوء يناظر فيها من لمرايه يشوف وجهه المحمر و الصدمه تتشكل عليه ورفعت عيونها للمرايه تناظر فيه يناظرها و مشت بسرعه تبتعد عنه و تطلع من الغرفه وهي تاخذ عبايتها

وخرج بعدها يشوفها واقفه مع البنات تعدل غرة رند ونطق: خلصتوا؟

هزت راسها بـ نعم وهي تشتت انظارها عنه و أكمل: يلا

-

↚

كانت جالسه مع اهلها من وصلت

اخذت نفس تناظر جوالها ما وصلتها رساله منه ولا اتصل عليها، تحس بتغيره رغم انه رجع بادر لكن وضح عليه انه ما عجبه ترجع تروح لبيت اهلها

تنهدت ترسل لـ رويدا عشان تطمن نفسها: سلمان رجع لكم؟

قفلت الجوال تحطه ولفت على امها وسهم اللي مشغولين بالتخطيط و رجعت لفت على الجوال لما وصلتها رساله من رويدا: لا

رفعت حاجبينها بـ ذهول كانت تظن انه عند بيت جده عشان كذا مشغول عنها ورجعت ترسل لرويدا: ما تعرفين وينه؟

رويدا: لا والله ما اعرف بس اذا تبين ادق عليه اسأله؟

ريم: اي تكفين

دخلت محادثة سلمان بعد ما ارسلت لرويدا تشوف اخر الرسائل بينهم و ترجع تقراها بشغف و ارتسمت ابتسامه خافته على وجهها تعيد نفس الفويس اللي ارسله ليلة العيد و تركز بنبرة و كمية المشاعر اللي تحملهاردت لما وصلها اتصال رويدا: هلا دوده

رويدا: دودة بعينك ما تستحين

ضحكت بدون رد و اكملت رويدا: زوجك صار شايب كل ما تعب ارتفع ضغطه تو كلمتها وكان معه حامد يقول توهم رادين من المستشفى

عقدت حواجبها تسمع حديث رويدا بقلق ونطقت: وكيف حاله وش جاه؟

رويدا: الحين احسن الحمدلله

هزت راسها تقفل و وقفت بسرعه تحط جوالها بشنطتها و اخذت عبايتها تتقدم من سهم: سهيمي تكفى قم رجعني البيت

اتسغرب سهم وكذالك ام فارس اللي نطقت: علامك يابنتي بترجعين بذا الوقت عسى ما شر

ريم: لا يمه بس سلمان تعب شوي

سهم: اجل خليه بكرا ترجعين كيف نروح بذا الوقت وانا نعسان

ريم: سهم تفكى ابي اروح

ام فارس: يابنتي نامي و بكرا ياخذك له

هزت راسها ونطقت بـ اصرار: يمه ما اقدر سهم تكفى من جابني هنا شفته مو بخير بروح اشوفه

سهم: يا ريم افهمي الطريق ليل بمسك خط سفر عشانك انتي خايفه على سلمان؟؟ كلميه و تطمني و كبري مخدتك ماني طالع الحين

هزت راسها تنطق بغضب وهي تمشي بتطلع: اجل اقعد بلقى مع من اروح

لفت عليه ام فارس لما طلعت: قم الحقها لا يصير لها شي تعرف اختك اذا عنّدت

حوقل بصوت عالي و وقف ياخذ مفتاح سيارته و طلع بعدها ينطق: البسي نقابك بسرعه

لفت عنه تتوجه لغرفة فارس: ارتاح استاذ سهم لا تتعب نفسك

زفر و مشى يلحقها: الحين بتقولين لـ فارس يوصلك؟ ذا العن منك احلق شنبي لو يوصلك

لفت عليه تنطق بغضب: حل عني اذا ما تبي تشوفك رويدا بكرا بدون شنب

ابتسم يتكتف، يشوفها تطق باب الغرفه و وقف على الجنب ما يشوف من بالغرفه يشوف بس وقوف ريم قدامها

واخذت ريم نفس لما فتح فارس ينطق: عسى خير؟

ريم: فارس سلمان تعبان و ما عنده احد الحين و سهم مو راضي ياخذني

كان بينطق لكن تقدمت مشاعل بـ استغراب تتكتف: انتي متى تقعدين عند زوجك و تفكينا من شوفتك

كشرت ريم: انطمي مشاعل ماني رايقه لك

رفعت حواجبها بـ ذهول ولفت على فارس تنطق: تسمع قليلة الادب وش تقول

لف لريم اللي نطقت: مو جايه عشان اعلق معك، فارس بتوديني؟

ابتسمت مشاعل بمكر و نطقت وهي تحاوط ذراع فارس بذراعها: فارس لا تروح

عقد حواجبه يلف عليها و اكملت: مشتاقه لك ياروحي و بتطوّل اذا رحت خليك معي اليوم وهي تدبر نفسها

ريم : يع انتي ما عندك اخلاق؟

لفت عليها مشاعل تبتسم و تهز راسها بالنفي

و اكملت ريم: مشتاقه له وهو كل يوم قدام عينك بلا سخافه