عناد تقدم يركب بجنبها: بطير معك، حتى أنا ما عندي جَناح

وتين ابتسمت تشوفهم يجهّزون القارب: بخيط لك جَناح معي ولا يهمك

مدّ عناد يده وناظرته وتين تحط يدها بيده وشدّ عليها من تحرك القارب وارتفعت ضحكات وتين تتلمس الرمل برجولها

ثواني وحسّت بارتفاعهم عن الأرض والتفتت لعناد اللي ابتسم يناظرها، ما يترك يدها ولا يبعد عيونه عنها

وصرخت وتين تناظر البحر والأرض اللي ابتعدوا عنها ورفعت راسها للسماء ولمعت عيونها تحس إنها فعلًا تطير بأجنحتها لأبعد مدى، حتى لو كان في الحقيقة برشوت وقارب، وحتى لو كان ما ردّها تهبط في الأرض كانت تحس إنها تنتمي للسماء ومكانها السحاب سواء اكتمل جناحها أو لا.

أما عند أصحاب الخيول، ضحكت وجد وهي على ظهر الخيل اللي مشى على أطراف البحر وتلمّست حنين برودة الموج برجولها

والتفتت خلفها تشوف تميم اللي لوّح لها وهو على ظهر خيله وقدامهم وجد اللي سبقتهم يركض بها الخيل وترتفع صرخاتها بضحكة

صوّرتهم هاجر بابتسامه، وجنبها تهاني اللي رفعت نظراتها للبرشوت بالسماء

ونطق مشاري يناظر أخواته: ليش ما ركبتوا الخيل؟

هاجر نفت: أخاف منهم

تهاني عقدت حاجبها: مقرفين

مشاري ضحك والتفت يناظر وجد اللي مشت باتجاههم

وجد: ميشو قول انك جبت الكاميرا الفوريه

مشاري دخل يده في جيب جاكيته يطلّعها: جبتها

وجد: صورني

مشاري رفع الكاميرا يصوّرها بابتسامه، وناظرت هاجر ابتسامة مشاري وهو ينتظر الصورة تنطبع، تلاحظ لمعة عيونه وفزّته من تناديه وجد

تدري به، وتدري بحبّه لها مثل ما تدري بحبّ تهاني لعناد طول هالسنين، تعاني بينهم وتشيل همهم وتلاحظ علامات الحب بملامحهم وتصرّفاتهم بدون حول منها ولا قوة

التفتوا لصرخات حنين اللي تمسكت باللجام بقوه و ركض بها الخيل بسرعه

عقد حاجبه تميم يشوف خيل حنين اللي طلع عن طوره وفقدت حنين سيطرتها عليه

تميم ركض بالخيل يوازي سرعة خيلها: تمسكي حنين

حنين ناظرته برعب: كيف أوقّفه؟

تميم: اسحبي اللجام

حنين سحبت اللجام بدون فايدة، وصرخ تميم: نطّي

تمسكت حنين برعب من تحرك الخيل بقوه يحاول يبعدها عن ظهره

وارتفع صوت تميم: نطّي حنين!

تركت اللجام ونطّت تطيح على الرمل تترك الخيل يبتعد عنها

ونزل تميم يركض باتجاهها يشوفها تلقط أنفاسها بصعوبة

تميم بقلق: جاك شيء؟

حنين مسكت رجلها بألم: لويت رجلي

تميم: تقدرين توقفين؟

هزت راسها حنين وقامت بعقدة حاجبها والتفتت لوجد اللي ركضت باتجاهها