وقف عناد سيارته ونزل والتفت لوتين اللي نزلت ومشت تناظر واجهة المحل الكبير ولانت ملامحها من طاحت عيونها على الرفوف اللي امتلت بالأقمشة الملوّنة والأجهزة الخاصة بالتفصيل والخياطة

والتفتت لعناد بذهول: ليش جينا هنا؟

مد يده بدون ردّ وحوّلت وتين نظراتها ليده، ونطق عناد: قلتي لي بتخيطين لي جناح

وتين مدت يدها تشابك يدينه وابتسم عناد يمشي معها للمحل

دخلت وتين ولمعت عيونها تناظر حولها والتفت عناد لها بابتسامه: اختاري كل شيء تحتاجينه للمشروع

وتين عقدت حاجبها: بس المستودع

قاطعها عناد يتلمّس الأقمشة: ما عليك من المستودع حلّيت موضوعه، الحين ركزي على احتياجاتك

وتين ناظرته باستغراب: حلّيت موضوعه؟ وش سويت؟

عناد تسند بابتسامه: اذا اخترتي اللي تحتاجين علّمتك

وأشّر عناد يكمل كلامه: جهاز التطريز اللي كان عندك مثله هذا هو؟

وتين ناظرت الجهاز وتقدمت تناظر ورقة السعر بجنبه وعقدت حاجبها: غالي

عناد وقف خلفها يسند ذقنه على كتفها: أخذتك وانتِ أغلى منه ظنك ما بقدر أخذه؟

وتين تراجعت تناظره: تدري اني ما بسمح لك تدفع عني صح؟ لا بخصوص المستودع ولا بخصوص المنتجات

هز راسه عناد: أدري عن راسك اليابس بس ما تدرين عن راسي، اختاري يا بنت سلطان اختاري

وتين ناظرت حولها بحيره، معها مبلغ كسبته من المشروع ومعها مبلغ اللي أعطتها إياه الجدة حصة لكنها ما زالت تشوف الرماد في جَناحها وما زالت تعد خساراتها أكثر من أرباحها

وتين التفتت له: ما راح تدفع شيء! ما بتحمل خساره ثانيه

عناد نفى: لا تشيلين هم الخسارة، انتِ بوجهي

ارتفعت نبضاتها من تقدم عناد يعدم المسافة بينهم

ونطق يكمل كلامه: بدفع، وتخيطين لي جَناحي اللي وعدتيني فيه ولا وعودك تروح مع مهب الريح يا بنت سلطان؟

وتين ناظرته بدون ردّ، وابتسم عناد يفهم نظراتها ويدري إنها ما تطلب مساعدته بلسانها ولا تبيّن له حاجتها لكنه يشوف الشغف باقي بعيونها ويشوف آثار جَناحها المحترق بذراعها، يدري بإن قلبها ما زال بالمستودع بين أقمشتها وعباياتها وبقاياها

وتين نطقت بعد تفكير: بردّها لك وما راح تمنعني، كل اللي بتدفعه لي بردّه لك أول ما أكسب

عناد رفع حاجبه: ماهي عوايدك، أخذتي ولاعاتي وزقايري وما ردّيتيها

ابتسمت وتين ومشت تناظر الرفوف ومشى خلفها عناد يقلد صوتها: وتقولين "الشيء اذا أخذته ما يرجع"

التفتت له وتين بضحكة: تقارن ولّاعاتك بفلوس؟

عناد هز راسه: الولّاعه اشتريتها بفلوس اذا ما تدرين

وتين تلمّست الأجهزة تناظرها بتركيز: أجل لا تشتري مره ثانية

عناد ابتسم: ما بشتري، بس انتِ بتشترينها لي

وتين التفتت ورفعت حاجبها: أنا اشتري لك ولّاعه؟

هز راسه عناد وتسنّد: بعد ما نطلع من هنا نروح أقرب بقالة وتشترين لي وحده

وتين ضحكت: وتولّع بها زقاره؟

نفى عناد: بولّع بها شيء ثاني

التفتت وتين تسمع الجدّية بصوته: وش تقصد؟

عناد ناظر لمعة العسل بعيونها، عيونها اللي لمح انطفاءها ليلة أمس، وابتسم يجاوبها: بولّع في قلب اللي يضايقك

صدّت وتين تتسع ابتسامتها ومشت تكمل طريقها بين الرفوف

ومشى خلفها عناد يكرّر: اشتري لي ولّاعه!

نطقت وجد: الفندق يحتاج موظفين هنا فما يقدر ينقلك

صدّ سعود يتأفف بصوت واضح وعقدت وجد حاجبها

والتفت سعود: طيب دام ما يقدر ينقلني، قولي له يحطني بمنصب حلو ويستاهل، مساعد مدير أو مدير مثلًا

وجد نفت: أنت تدري الموضوع مو بهالسهوله وانت باقي متدرب قدامك شغل لازم تتعلمه

التفت سعود وطاحت عينه على مشاري اللي دخل الفندق

يمشي بخمول ويناظر خطواته بشرود يحس بثقلها على الأرض

ونطق سعود بصوت مرتفع: ولا المنصب يعطيه لصاحب الأولوية؟ مثلًا ولد أخوه و مدير التخطيط مشاري

رفع مشاري نظراته لسعود، ولانت ملامح وجد: سعود!

سعود ناظرها: ما قلت شيء غلط! كم لي وانا احاول اثبت نفسي ولا استفدت شيء لا نقلت ولا ارتفع منصبي وهذا ياخذ كل شيء وهو مرتاح! طالع من النهار وتوه يرجع تارك كل شغله متراكم على الموظفين

مشاري تقدم يناظره بحدّه: هذا اللي تقصده عنده اسم تعرفه؟

سكت سعود يناظره بغضب، وكمّل مشاري: مشاري آل منصور، وتدري إنه وصل آخر ذرة صبر فيه لو ما تبعد عن وجهه مسح فيك بلاط الفندق

وجد تقدمت بقلق: مشاري لا

سعود التفت لوجد بحدّه: لا خلّيه

قاطعه مشاري يلكم وجه سعود بقوه واختل توازن سعود يطيح بالأرض وتراجعت وجد تناظرهم بصمت

وتقدّم مشاري يمسكه من ياقته بغضب: لا يحتدّ صوتك عليها

مدّ سعود يده يلكم مشاري اللي اندفع يضربه بغضب، يلمّون الناس حولهم وترتفع أصواتهم بحدّه

ابتعد مشاري من حس بيد وجد تسحبه: مشاري خلاص!

مشاري التفت يناظرها بصمت و أبعد يده عنها وتراجعت وجد من حسّت على نفسها وعقدت حاجبها تناظر جمود ملامحه لأول مره

ومشى مشاري يتعداهم ويتجه لغرفته يحس بالغضب ينهش جوفه

بنفس الوقت وقف سعود بألم والتفت لوجد اللي تناظره بصمت

وناداها: وجد ا

قاطعته وجد: لا تكلمني لين تتكلم مع أهلي باحترام

سعود: أهلك؟

هزت راسها وجد: مشاري من ضمن أهلي، ما أرضى تتكلم عنه بهالطريقة خصوصًا قدامي

سكت سعود يشوفها تتعداه وتمشي مبتعده عنه وشدّ على يده بقهر

مشى مشاري بالممر الطويل يناظر خطواته بشرود

رفع نظراته وانتبه لتميم اللي يمشي بالجهه المقابلة له متجه لغرفتهم

وقف تميم وتلاقت نظراتهم ثواني…

مشى مشاري بالممر الطويل يناظر خطواته بشرود

رفع نظراته وانتبه لتميم اللي يمشي بالجهه المقابلة له متجه لغرفتهم

وقف تميم وتلاقت نظراتهم ثواني وصدّ مشاري والتفت يمشي مبتعد عن الغرفة تحت نظرات تميم اللي يناظر ظهر مشاري لين اختفى ومسح وجهه بتنهيده

كانت المره الأولى اللي يتخلّل فيها البرود والصدود علاقتهم

المرة الأولى اللي يتلاقون فيها بدون ترحيبهم المعتاد لبعض

دخل مشاري مكتبه يشوف تراكم أوراقه وأشغاله وجلس بتنهيده

فتح أزارير ثوبه الأولى يحس باختناق أنفاسه، وأخذ أوراقه يشغل أفكاره فيها يلاحظ ارتجاف الورقه بيدينه وخمول أطرافه

ثواني وانتبه لصوت الباب وفزّ قلبه يشوف وجد تدخل بيدها علبة الاسعافات الأولية

وابتسمت تتقدم تجلس قدام مكتبه: كيف سمحت لأحد يجلدك غير الرعد؟

سكتت وجد تشوف اللّا رد منه لأول مره تحاول استفزازه وما تلقى منه رد

نزّلت نظراتها تفتح علبة الإسعافات تحت نظرات مشاري يشوفها تعقّم الشاش وتمدّه له

ونطقت: ما أدري وش صاير لك وحتى تميم جاء من الخُبر وما شفته معك طول اليوم، وأدري ماراح تعلمني

أخذ مشاري الشاش من يدها بدون ردّ وناظرته وجد بتنهيده

وتسنّدت على المكتب بابتسامه: بس لا تتوقع انجذابي لسعود بيخليني اسكت له يعورك! تركته يتلوّى برا وجيتك أركض

ابتسم مشاري بخفوت، وكملت وجد: خلّه يعرف إن ميشو خط أحمر! إلا العشير

مشاري سكت ثواني ونطق: وش جذبك فيه؟

سكتت وجد تجهل الرد وكمّل مشاري: لا تحبينه، كان ودك تحبين حبّي أي أحد إلا هو

وجد ابتسمت تناظره ثواني ونطقت: انت دايم كذا

مشاري عقد حاجبه بعدم فهم: كيف يعني؟

وجد بضحكة: تتذكر واحنا صغار؟ كنت تزعل إذا حبيت شيء انت ما تحبه

صدّ مشاري، وكمّلت وجد: خليتني أحب كابتن ماجد وانا ما كنت أحبه!

ابتسم مشاري، وابتسمت وجد: خليتني أحب حليب الفراولة لأنك كنت تحبه، شنطة المدرسه حقت سبايدر مان تذكرها؟

هز راسه بابتسامه، وكملت وجد: اشتريت سبايدرمان لأنك تحبه!

نطق مشاري يدافع عن نفسه: كنت أبيك تشاركيني الأشياء اللي أحبها!

ضحكت وجد: وما زلت، كبرت على هالعاده وما زلت أحب كل شيء تحبه

سكت مشاري يحس بارتفاع نبضاته، وكمّلت وجد: لكن مشاعري لسعود شيء ثاني، قاعده أعيش وأجرب مشاعر جديدة علي ما ودّي شيء يأثر عليها

بلع مشاري ريقه بدون رد، وناظرته وجد: أبغى اكتشف هالمشاعر وحقيقتها بنفسي

مشاري نزّل نظراته للشاش: ما يستحقّك

مشاري رفع نظراته لها يكمل كلامه: كثيره عليه انتِ، ضعيف قلبه ما يقوى حبك، ما يحبك إلا اللي قلبه قوي

ناظرها ساكته تجهل الرد ونطق يغيّر الموضوع: عمومًا لو يعورك بعوّره، ولو يرتفع حسه عليك مره ثانيه كسرت فمه

ابتسمت وجد وقامت: يكفيه اللي جاه، كمّل شغلك بتّال من اليوم يسأل عنك

هز راسه مشاري يشوفها تطلع من عنده تتركه يشوف شغله

وتسنّد بتنهيده يناظر مكانها الفارغ وعلبة الإسعافات الأولية على مكتبه

مشت وجد متجهه لغرفتهم وانتبهت لتميم اللي تقدم باتجاهها

وسأل: وش فيه مشاري؟

وجد عقدت حاجبها: وش فيك انت؟ صاير شيء بينكم؟

تميم تنهد وكرّر سؤاله: وش فيه؟ متضارب مع مين؟

وجد مشت لغرفتهم: اسأله بنفسك

تميم مسك ذراعها: علميني طيب فيه شيء؟

وجد ناظرته ثواني ونفت: ما فيه شيء بس جرح بسيط

صد تميم بدون ردّ، ونطقت وجد: شوفوا لكم حل وضعكم هذا مو عاجبني ولا علمت عليكم أبوي راجح

مشت وجد ومشى خلفها تميم: طيب مين ضربه؟

وجد التفتت: ليه وش بتسوي؟

تميم: بكسر راسه ويده اللي انمدت عليه

وجد بتنهيده: لو فيك خير كان رحت شفت مشاري بنفسك

نطق تميم بيتكلم وسكت من انفتح باب الغرفة وطلعت منه حنين وخلفها هاجر

حنين فز قلبها من انتبهت لوقوف تميم اللي ابتسم لها بخفوت

والتفتت هاجر لوجد: زين جيتي! كنا طالعين ندوّرك

وجد بتساؤل: وين بتروحون؟

هاجر: بننزل للبوفيه ناكل، تجين؟

نفت وجد بخمول: ما اشتهي شيء أبغى انام

ومشت وجد بعد ما ودّعتهم ودخلت الغرفة تسمع صوت الهدوء وتناظر تهاني النايمه بمكانها والتفتت لسرير وتين الفارغ وعرفت إنها عند عناد

رمت نفسها على السرير بتنهيده وغمضت عيونها تسترجع أحداث اليوم

تتذكر سعود وثقل كلامه على قلبها، ما فاتتها نبرة صوته ولا فاتها مقصده من كلامه، تدري بإن هدفه الأول هو النقل و تحاول تساعده قد ما تقدر، تدري بإنه وحيد أهله و ودّه ينقل ويكون معهم لكنه زعّلها، وسعود يدرك إنه تمادى وزعّلها بتصرفاته

التفتت وجد لرسائل سعود لها واللي كانت

"نمتي؟ ابغى اتكلم معك بكره الصبح"

غمضت عيونها يمرّ في بالها كلام مشاري

"ما يستحقّك"

"كثيره عليه انتِ"

"ما يحبك إلا اللي قلبه قوي"

مشى عناد بالممر وبجنبه وتين بعد ما أنهوا مشاويرهم

والتفتت تسمعه يضغط على الولّاعه بتكرار، يراقب شعلتها بابتسامه

وتين: شفت بيدك ولّاعات كثير بس أول مره أشوفك مبسوط عليها!

عناد ناظرها: هذي غير، لأنك اشتريتيها لي

وتين رفعت باكيت الدخان بيدها: بس أخذت منك شيء ثاني، روح نام يا المعتوه

مشت وتين لباب غرفة البنات وناداها والتفتت له بفضول

ونطق عناد: غرفة ٤١١ نبَت فيها نعناع

وتين بضحكة: وكذا يعني بصدقك وأجيك؟

مد لها كرت الغرفة: بتجين، بطلب لنا عشاء ونتكلم عن المشروع

أخذت وتين الكرت منه، وكمّل عناد: اسبقيني، بروح أشوف مشاري وتميم

وتين بتساؤل: صاير لهم شيء؟

عناد بتنهيده: أول مره يتهاوشون، بشوف وش الموضوع

هزت راسها وتين ومشت باتجاه الغرفة اللي حجزها عناد لهم

ومشى عناد لغرفة العيال ودخل يشوفها فارغة وعقد حاجبه باستغراب، وطلع يناظر جواله ويدق على تميم ويتلفت حوله

مشى باتجاه مكاتب الموظفين والمتدربين ووقف مكانه من لمح تميم يتكلم مع اثنين من المتدربين

ووصله صوت تميم يسألهم بحدّه: اللي تضارب مع مشاري من هو؟

المتدرب: ما عندي علم عن اللي صار

تميم التفت للمتدرب الثاني بغضب: وانت؟ ما تعرف من هو؟

عناد قاطعهم يسحب ذراع تميم: معليش شباب امسحوها بوجهي

تميم التفت لعناد اللي يسحبه: وش اللي امسحوها واحد منهم متضارب مع مشاري!

عناد مد يده يضرب راسه: اللي متضارب معه انت يا غبي

تميم مسح على راسه بألم، والتفت عناد للمتدربين: وين مشاري؟

المتدرب: في مكتبه

سحب عناد تميم ومشى معه يتجه لمكتب مشاري

وقف تميم مكانه: ماني داخل

عناد سحبه بإصرار: بتدخل!

نفى تميم وتراجع ومسكه عناد يسحبه بكل قوته وفتح الباب يدخل مكتب مشاري اللي رفع راسه وفزّ من انتبه لتميم خلف عناد

عناد ابتسم: ارحب استاذ مشاري عسى ما قاطعناك

تميم صدّ يناظر حوله، و نفى مشاري: حياكم

عناد جلس والتفت لهم: تركتكم شوي ورجعت لقيت كل واحد يسوي نفسه ما يعرف الثاني

سكت مشاري ونزّل نظراته لأوراقه، وكمّل عناد: وانت مين مفقّع وجهك؟ هذا كله من تميم؟

مشاري لمس ملامحه: وش فيه وجهي؟

تميم أشّر: الجرح اللي في حاجبه ما هو مني، انا بس عطيته وحده في خشمه

عناد التفت لتميم: ومبسوط؟

سكت تميم يزمّ شفايفه، كانت تعابير الندم واضحه بملامح تميم وتصرفاته، يشدّ على يده بغضب كل ما لمح حالة مشاري وجرح حاجبه وكدماته الخفيفة

عناد التفت لمشاري: قوم عطه وحده في خشمه وتراضوا اخلصوا علي

مشاري نفى: تنكسر يدي ولا أمدّها عليه

قطع عليهم صوت جوال عناد ووقف يناظر اسم بتّال

والتفت لهم: تراضوا وحلّوا مشكلتكم!

مشى عناد يطلع من المكتب و ردّ على بتّال ووصله صوته: هلا عناد

عناد: سم

بتّال: كلمتك بخصوص سؤالك عن شدّاد، بحثت عن أبوه عبدالله

سأل عناد: وش لقيت؟

بتّال: عبدالله ما عنده غير شدّاد، ما عنده بنات

عقد عناد حاجبه: كيف يعني؟ و خواته؟

بتّال: ما لقيت شيء عن خواته، عبدالله مات وشداد توه صغير، يمكن أم شدّاد تزوجت عقب وفاة أبوه

عند وتين اللي جالسة بالغرفة تنشغل بجوالها بملل وتنتظر عناد

التفتت لصوت الجرس وقامت تفتح الباب

طلّت براسها تشوف الفراغ حولها، ونزّلت نظراتها من انتبهت للظرف اللي على الباب وأخذته باستغراب

قرأت المكتوب عليه واللي كان "خاص لوتين"

عقدت حاجبها ودخلت تفتح الظرف بفضول…

تميم رفع نظراته لمشاري اللي يحاول يشغل نفسه بأوراقه

ونطق تميم: مين اللي تضاربت معه؟

مشاري ناظره: عشان تروح تضربه؟ ماني معلمك

سكت تميم ثواني ونطق: ما قصدت أضربك، أعماني الغضب يوم شفت صورة وجد معك وقلت لي إنك تحبها

أبعد مشاري نظراته عن تميم بدون رد، وكمل تميم: وجد دايم تردّد لي "انت ومشاري واحد" تشوفك مثل ما تشوفني وتحبك مثل ما تحبني

هز راسه مشاري: أدري

تميم بتنهيده: وجد ما تخاف من شيء من صغرها وهي تحب بصوت عالي، تبيّن حبها لكل شيء تحبه بدون خوف

بلع مشاري ريقه يفهم كلامه، وناظره تميم: و هي لو تحبك كان قالت إنها تحبك

وقف تميم من مكانه ينهي كلامه: بس وجد تشوفك مثل أخوها، لو استمر وضعك كذا بتخسرها، وتخسرني

انقبض قلب مشاري يشوف تميم يصد ومشى يطلع من المكتب بهدوء، وسنّد راسه وغمض عيونه بتنهيده

قرأت المكتوب عليه واللي كان "خاص لوتين"

عقدت حاجبها ودخلت تفتح الظرف بفضول وجلست تناظر محتواه

وارتعش قلبها من شافت الصورة واللي كانت صورة قبر يغطّيه التراب

وانتبهت للكلام المكتوب خلف الصورة واللي كان

"مكان أمك اللي دوّرتي عليه كثير، دعواتك لها بالرحمة"

وارتجفت يدينها تشد على الصورة بقوه ووصلها صوت الباب

ودخل عناد اللي نطق: تأخرت عليك؟ طلبت لنا عشاء و..

سكت من انتبه للظرف بيدها وتقدم يشوفها تناظر الفراغ بجمود

جلس جنبها باستغراب: وتين؟

رفعت نظراتها له وانقبض قلبه يلمح الانطفاء في عيونها

يدوّر لمعة العسل اللي يحبها، لكنه ما يشوف غير احمرارها

أخذ الظرف من يدها يناظر محتواه ووسع عيونه بذهول

وتين نطقت: أمي ميته

ناظرها يسمع نبرة الأسى بصوتها لأول مره، يلاحظ ارتجاف رمشها

و كرّرت وتين: أمي ميته، أمي ميته طول هالوقت

ضربت وتين صدرها بتكرار تحس باختناق أنفاسها وثقل جوفها، عاشت حياتها تنتظر أمها و تتخيّلها، فكّرت في مُختلف الاحتمالات وتقبّلتها وكان احتمال موت أمها ضئيل لكنها تستبعده في كل مره تفكر فيه، تثق بإن أمها حيّه وراح تقابلها بحياتها، تعيش على قيد الأمل وتستمد قوتها من فكرة وجود أُم بحياتها ولو إنها وهم

وتين ضربت صدرها باختناق: قال لنا شدّاد إنها تركتنا وراحت ما دريت إنها ميته من الأساس

عناد تقدم يمسك يدينها يمنعها تضرب نفسها، يحس بارتجاف جسدها وبرودة يدينها رغم احتراق جوفها

عناد نطق: ناظريني

ناظرته ولانت ملامحه من انتبه لدموع عيونها العسلية

صورة قبر أمها كانت الشرارة اللي سبّبت انفجار رُكامها، كتمت داخلها واختنقت بدُخان جوفها ليالي طويلة ونزلت دموعها بعد ما منعت نزولها سنين، وانهارت قواها واستسلمت تبكي بصوت مسموع لعناد اللي سحبها يحضنها بكل قوته

ونطقت وتين بين دموعها: تخيلت لقاءنا كل ليلة، تخيلت ملمس يدينها وحضنها، تخيلت صوتها وملامحها وعشت عمري كله وأنا انتظرها

ابتعد عناد يمسك وجهها يناظر انهيارها بين يدينه

وكملت وتين ببكاء: ما صار اللي تخيلته، ما صار يا عناد طلعت ميته

نزّلت راسها تسنده على كتفه وبكت بعلوّ صوتها، تحس بإنكماش قلبها داخل جوفها، تلفظ آلامها على هيئة دموع حارقه وكأنها جمر اشتعل داخلها سنين طويلة

غمض عناد عيونه ورفع راسه يبلع عبرته، حاوطها بيدينه يحضنها ويسمع شهقاتها اللي أوجعته، اعتادها قوية ما تبيّن ضعفها لأحد كانت تبهره قوتها وتتناغم مع قوّته وعناده لكن منظر دموعها قدامه هدّ حيله ونهش جوفه، تفقده صوابه ويرتعش قلبه كل ما زاد بكاءها

ثواني و تراجع يلمّ وجهها بين كفوفه يناظر انسياب دموعها على خدّها وبلَل رموشها، مسح دمعها بأصابعه تضيع منه الحروف والكلمات ويهدّي انهيارها بلمساته، ذاق طعم الفقد وبكى جنب أمه بين النيران ويعرف مُرّ شعورها و حسرتها

التفت يناظر الظرف ونطق: مين أعطاك إياه؟

وتين مسحت وجهها تاخذ نفس: لقيته عند الباب

التفت لها عناد يناظرها ثواني، وتقدم يشوفها تناظره بخمول

مسك طرف فكّها و قرّب يبوس عينها وغمضت وتين تتحسّس حنانه و مواساته لها بطريقته، التفت يبوس عينها الثانية وابتعد مسافة قليلة يناظرها مغمضه عيونها يسيل منها بقايا دمعها

مسحه بإصبعه وهمس: حلفت يمين لأضيّق حياة اللي يضايقك

فتحت وتين عيونها تناظره بصمت، وكمل عناد: قلت لك بولّع في قلبه!

نزّلت وتين نظراتها ليدينها من حسّت فيه يحط الولّاعه وسطها ويشد عليها، ونطق: نولّع فيه مع بعض

في الدمام

نطقت فريدة: متأكد من اللي سويته يا شدّاد! انت تخرب اللي بنيناه سنين

شدّاد ناظرها بغضب: حاولت اكسرها وما فاد! ما يكسرها غير حقيقة موت أمها

فريدة بقلق: اذا عرفت موت أمها يمكن تعرف كيف ماتت!

شدّاد قاطعها: ما هو ذنبنا كيف ماتت! ذنب البزر ولد عايشة

فريدة بتنهيده: واذا انكشف موضوع الورث اللي خبّيناه سنين؟ كل هالخير والغنى اللي احنا فيه منه، تبي تخسّرنا كل هذا؟

شدّاد نفى: وتين ما تقدر تسوي شيء

فريدة: اعترف يا شدّاد ، وتين قوية و الحين صار عناد معها

شدّاد سكت ثواني ونطق: هذي المشكلة، عناد معها

تسنّد عناد على السرير يحاوط وتين ويشدّها بحضنه أكثر

سنّدت وتين راسها على كتفه ورفعت الولّاعه بيدها تضغط عليها بشرود، تحس بذقن عناد على راسها ويدينه تتلمّس حروق ذراعها

ونطقت وتين: متى نروح؟

عناد: متى تبين؟

وتين ضغطت على الولاعة تناظر شُعلتها: بكره

عناد هز راسه بصمت، وثبت ذقنه على كتفها: ناظريني

رفعت وجهها له وناظر عناد هدوء ملامحها بعد انهيارها وخمول عيونها اللي يدوّر فيها لمعتها في كل مره يناظرها، وكأنه يعيش وسط لمعة عسلها ويموت من يلمح انطفاءها، تنهد يسمع صوت الهدوء بينهم بعد ما تركها تبكي وتنهار بحضنه

ونطق عناد: لازم أعلمك عن شيء

وتين ناظرته بفضول، وكمّل عناد: سألت عن أمك الله يرحمها، ووصلني كلام إنها ماهي اخت شدّاد الشقيقة، أمك تعتبر اخته من أب ثاني

وتين بذهول: كيف عرفت؟

تلمّس عناد خصلاتها يرفعها خلف اذنها: طلبت من بتّال يبحث وعرفت منه، كنت أبي أدور أمك عشانك

وتين: عشاني؟

عناد ناظر لمعة عيونها، وابتسم بخفوت: عشانك، وعدتك قبل زواجنا وقلت لك بتلاقين أمك وكنت ناوي أحط معلوماتها بين يديك بنفسي، بس…

قاطعته وتين تحاوط رقبته وتحضنه بصمت، و شد عليها يفهم ردّها ويحس بشعورها، تدري بإنه يحاول عشانها ويحارب معها وتدري بإنه يوعد ويوفي بوعده عشانها

غمضت عيونها تحس باندماج نبضاتها مع نبضاته الواضحة وغمض عناد عيونه يشمّ ريحة عطرها دقايق وناظرها تستسلم لنعاسها وتعبها وتغفى بحضنه بهدوء.

يوم جديد أشرقت شمس صبحه بعد ظلام الليل وعتمته

مشت وجد تتجه لمكتبها تنجز شغلها الأخير في فرع البحرين

انتبهت لوقوف سعود اللي ينتظرها وتذكرت رسالته ليلة أمس

تقدم سعود من شافها: توقعت ما راح تداومين عشانه أخر يوم

نفت وجد: لازم أداوم بتّال بيزعل لو غبت

هز راسه سعود يلاحظ برودها معه، ونطق: اسف

وجد ناظرته بدون ردّ، وكمّل سعود: تماديت أمس وقلت كلام ما ينقال لكن انتِ تدرين عن ظروفي وبُعدي عن أهلي

وجد رفعت نظراتها من انتبهت لمشاري اللي يمشي خلف سعود بمسافة بعيدة متجه لمكتبه، ووقف مشاري يناظرها واقفه من سعود

ما كانت منتبهه لكلمات سعود لها، كانت تناظر مشاري ونظراته المُربكه لها، تتذكر كلماته أمس وتتكرّر بمسامعها مثل الصدى

"ما يستحقّك، كثيرة عليه انتِ، ما يحبك إلا اللي قلبه قوي"

ما أبعدت نظراتها عن مشاري، يناظرها وكأنها النظرة الأخيرة

يدرك سبب وقوف سعود معها بهالوقت ويدري بإنه أخر يوم يجمعها مع سعود بنفس المكان، ويدري بإن سعود ما راح يضيع الفرصة

نطق سعود: وجد أنا مُعجب فيك

سكت سعود يشوفها شاردة تناظر خلفه، والتفت يتبع نظراتها وطاحت عينه على مشاري اللي صدّ من التفت سعود ومشى يكمل طريقه….