رواية زاهية الشامة على الخد اليمين الفصل الاول 1 بقلم جمان بنت عبدالله

بسم الله الرحمن الرحيم

ثاني انطلاقه " زاهيه الشامه على الخد اليمين "

في احد ديار الشمال كان في ديره تسكنها العادات و التقاليد و الاعراف كانت تسكن فيها عايله اسمها عائله آل جراح و اللي بقى من العائله ذي اخوان اثنين ( سلطان ، ياسر )

ابو تركي ( سلطان ) : اب شديد بمعني الكلمه تحكمه العادات و التقاليد و الاعراف و عقله متحجرف نوعاً ما ، رجال كبير بالعمر و ما يحب الغلط

ام تركي ( مشاعل ) : ام حنونه على عيالها لكنها تعاني من مشكله جسميه و كلام زوجها ابو تركي ما تقدر ترفضه ولا تقدر تواجهه بسبب مشكلتها و ضعف شخصيتها

تركي : اكبر عيال سلطان عمره ٣٠ سنه متزوج من احد اقاربه و عنده ولد و بنت

ولده ثنيان عمره : خمس سنوات

اما بنته دُره عمرها : ثلاث سنوات

زوجه تركي ( خلود ) : عمرها ٢٥ سنه انسانه كل همها بيتها و عيالها ولا تتدخل بالغير و مافي مثلها

نواف : عمره ٢٧ سنه اخ حنون و طيب و الكل يشهد على اخلاقه و رجال بمعني الكلمه يحب انسانه و هي تحبه بينهم قصه حب من سنين و راح نعرفها مين هي بس نبدأ الاحداث

سعود : ٢٤ سنه بيت سر نواف و اقرب اخوانه لقلبه شخص فلاوي و يحب الضحك

مشعل تؤام سعود : صفاتهم تشترك كأنهم قدر و غطاه لكنه فضيحه مايبقى سر عنده عكس سعود

عبدالعزيز : عمره ٢٢ سنه شخص طموح و يحب العلم و الدراسه لكن ابو تركي هدم له كل الاحلام ذي

شريفه : عمرها ١٩ اخر العنقود و وحيده سلطان اخت حنونه على اخوانها و شخصيتها قويه

ننتقل لبيت اخو ابو تركي و هو ابو جابر ( ياسر ) : صفاته تشترك مع صفاه اخوه لكنه اهون منه بشوي لكنهم اثنينهم نفس الطينه و نفس التخلف متزوج ثنتين

الاولى ( مريم ) : الحقد يمشي بدمها و بعروقها انسانه خبيثه بمعنى الكلمه تكره زوجه ياسر الثانيه ( ساره ) و تكره عيالها رغم انهم عايشين في بيت واحد الا ان كل وحده بحالها

جابر اكبر عيال ياسر من زوجته مريم : عسكري عمره ٣٥ متزوج و ربي رازقه بعيال و بنت

بنته الكبيره : منيره

و ولده : ثامر

و اصغر عياله : احمد

و زوجته اسمها شهد : عمرها ٣٠ سنه ام مثل كل الامهات لا فيها خبث ولا فيها طيبه زياده

خالد : عمره ٢٧ سنه شخص عاقل و واعي عكس الرجال اللي كانوا بقريتهم و عكس تفكيرهم

فارس : عمره ٢٣ شخص مزوح و روحه حلوه و فلاوي و هو و سعد و سعود اذا جلسوا مع بعض الجلسه تكون مليانه ضحك

رغد : عمرها ٢٢ فيها من خبث امها و حقدها تكره اخوانها من ابوها لدرجه عادي عندها تذ/ بحهم

الهنوف : عمرها ٢٠ اصغر بنات ياسر من مريم حنونه و طيبه و تحب اخوانها من ابوها كثير و نقدر نقول بعد انها اقرب شخص لخالد و وصايف ( اختها من ابوها )

زوجه ياسر الثانيه ( ساره ) عندها ثلاث بنات ام بمعنى الكلمه حنونه و طيبه و كل همها بيتها و عيالها بنتها الكبيره ( اصايل ) : عمرها ٢٥ سنه اكبر بنات ياسر و اغلاهم بقلبه

وصايف : عمرها ٢٢ و هي و خالد و الهنوف اقرب ثلاثه لبعض و كل همهم يجلسون مع بعض و يسولفون بدون لا مريم تشوفهم و تخرب عليهم

اما اخر العنقود ( شموخ ): عمرها ١٩ هاديه و كل همها نفسها ولا لها دخل بالغير و خجوله جداً و بنفس الوقت فيها قوه و قريبه من شريفه بنت عمها

ننتقل لبيت ثاني و هو بيت جيران ابو تركي كان بيتهم جنب بيت ابو تركي بالضبط و اسم الاب ابو فيصل : كان واعي و يختلف نوعاً ما عن الرجال اللي بعمره

اما الام : ف كانت كل همها سمعه بيتها و فلوس زوجها و انها تطلع بنتها بأحسن مظهر قدام الناس

كان عندهم بنت و ولد بنتهم الكبيره ( نور ) : عمرها ٢٣ سنه كل همها تتزوج و تفتك من شغل البيت و امها

فيصل : عمره ٧ سنوات جاء بعد سنين لعائلتهم و قريب من اخته مره

بعد شهر و نص راح تفتح قصتنا و تنفتح اول صفحاتها و نعرف حكايا ابطالنا السريين و كيف القدر راح يجمعهم مع بعض كونوا قراب و كونوا بخير و الى اللقاء و القاكم في موعدنا المحدد ١٢ اغسطس ٢٠٢٤

" زاهيه الشامه على الخد اليمين "

ياويلي قلبي لادعي الشوق طاريه

‏صوب الشمال وطوع الحب غالين

‏امشي علي كيف المشاعر وراعيه

‏واعطيه قلبي والغلا والشرايين

نفتح اول صفحات قصتنا و نقول بسم الله بين وقتنا ذا و بين زمان ما تحددت متى صارت القصه او انفتحت لكنها قصه تجمع عصرين و جيلين جيلنا ذا و الجيل القديم و في احد ديار الشمال ديره تسكنها العادات و التقاليد و الاعراف كانت تسكن فيها عايله يسمونها عايله آل جراح و في بدايه الفجر و قبل لا يأذن دخل ابو تركي على عياله الاربع اللي كانوا نايمين بالمجلس بطريقه ارعبتهم و صرخ بصوته و هو يضرب على الباب بعصاته : صلاه قوموا و خلوا النوم عنكم

صحى نواف و بدا يفرك عيونه و بصوت نايم: يبه الله يهداك صلاه الفجر بعد ساعه خلنا شوي

مشى ابو تركي و بدا يضربهم بعصاته: قوموا قامت قيامتكم تقل حريم ما غير منجحرين ( نائمين او بالاصح داخل الفراش ) بالفراش

صحى عبدالعزيز من ضرب ابوه و صحى سعود : يبه يعني النوم بس للحريم ما ننام اي والله تجيني النوده ( النومه ) بالبقاله اذا ما نمت

كمل يضربهم و صرخ : قوموا خلصوني

وقفوا العيال و صحى سعود مشعل و طلعوا برا و توجهوا للحمامات ( الله يكرمكم) فتح نواف المويه و كانت بارده بحكم بروده الجو كأنت اشبه بالثلج بعد يده : بارده ذي

عبدالعزيز مد يده : توضوا لا يكفر فينا ذا

سعود مشى : اذلف زين صاحي انت اتوضى بمويه بارده

ابتسم نواف : شريفه اكيد جالسه تسخن مويه

بعد يده عبدالعزيز عن المويه البارده : امشوا لها

مشعل : و من اللي كان بيتوضى بمويه بارده

عبدالعزيز : مليون مره قلنا له حط سخان ما يحط

قلد سعود طريقه كلام ابوهم : و شوله سخان لو انكم رجاجيل صدق كان توضيتوا

ضحكوا على تشبيه سعود و فتح نواف باب المطبخ ناظر شريفه اللي كان تصب المويه الدافيه بالابريق ناظرها نواف : يا عسى زولك ما يغيب والله بدونك حنا ولا شي

سعود تقدم يقبل راسها : يا بعد حيي و ميتي و خيي يا شروف

شريفه ابتسمت : تعالوا توضوا بسرعه قبل لا يجي و يهاوش

تقدموا الاخوان و بدات تصب لهم المويه و هم يتوضوا ناظرت نواف : اي وش اخبار الطيره

ضحكوا اخوانه و نطق : انزاحوا ( ابتعدوا ) دوري بالوضوء

بدات تصب له المويه و نطق : طيرتي بخير بس هقوتك ابوي يرضى

مسح وجهه نواف و نطقت شريفه : جيرانا و النعم فيهم كلمه

سعود قاطعها : انتبه انتظره يروق

ضحك مشعل : ذا متى روق

تنهدت شريفه و ناظرت عبدالعزيز: دورك افصخ نظارتك

فصخ عبدالعزيز نظراته و بدا يتوضى ناظرته و نطقت : لا تطلع له بالنظاره لا يكسرها لك مثل ذيك المره

كمل عبدالعزيز يتوضى : والله ما اشوف بدونها و يحسب اني حريمه ابوكم ذا الواحد ما يعرف وش يقول عليه

دخلت ام تركي تقدموا العيال لها و قبلوا راسها حركت يدينها بلغه الاشاره : ابوكم راح يعصب لا تتأخرون ينتظركم

آشر نواف على خشمه و حركت يدينها شريفه : تبين مويه دافيه

هزت الام راسها بالنفي تنهد سعود و بلغه الاشاره : لا تتوضين بمويه بارده

ابتسمت ام تركي و هزت راسها بالموافقه ناظرت شريفه : انا انتظرك داخل

اكتفت شريفه بهز راسها و طلعت الام اعطى عبدالعزيز نظارته لشريفه : خليها عندك

شريفه اخذتها : اي وش مشتهين على الفطور

مشعل و هو ينشف وجهه : اللي يريحك سويه و لو بيدنا خليناك مات..... قاطع كلامه صوت فتحته الباب و كان ابو تركي : حمير انتم الحمامات برا وش مدخلكم

نواف : المويه بارده كيف نتوضى

ابو تركي : والله لو انكم رجاجيل كان توضيتوا لكن مافي شبيه لكم غير الحريم

نواف بحده : يبه وش ذا الكلام رجاجيل و كل واحد مننا عن مليون رجال

طنشه ابو تركي و ناظر شريفه اشر على بجامتها اللي كانت بنطرون واسع و تيشيرت : ما تستحين على وجهك طالعه قدام اخوانك كذا كم قلت اللبس ذا ما اشوفه من وين تجيبينه

بلعت ريقها شريفه : مافيه شي لبسي بعدين اخواني مو احد غريب

ابو تركي : و قص يقص لسانك ذا قليله ادب تردين بعد لبسك ذا اشوفه بالزباله ( الله يكرمكم) بس ارجع

ناظر العيال اللي كانوا يناظرونه بحده : و انت وياه على الصلاه يلا

طلع ابو تركي و ناظروها اخوانها ضحك سعود : المهم ان طقم بجامتك ذا قوي

ضحك مشعل : طالعه كأنك خباز من وين جايبه البجاما

اشرت على عبدالعزيز و ضحكت : اخذته منه

نواف حاوط كتف عبدالعزيز : اخس بدلات و بجايم من ورانا

عبدالعزيز : هي وحده اشتريتها و خليتها عند شروف علشان لا يشوفها

ابتعدت عنهم من سمعت صوت ابوها : يلا روحوا جالس يصرخ

نواف : بعد الصلاه بالسطح مثل كل يوم

اكتفت بهز راسها ناظر ضيقتها نواف و رجع انظاره لأخوانه : شروف زعلانه

ناظرتهم : لا لا ليش ازعل

سعود : بقول لك نكته

نواف : اي قول لها

سمعت صوت ابوها : روحوا له مو ناقصين مشاكل

نواف قبل راسها : نخلص صلاه و نجيك نتفاهم

اكتفت بهز راسها و طلعوا العيال ناظرهم ابوهم : لا كان جلسوا زياده بعد

تنهد نواف : كنا نتوضى و شفتنا بعد

ضربه على رجله بالعصاه : كم مره قلت اصواتكم ما ترتفع

ناظره نواف بحده و عقد حواجبه و همس له سعود : امسك نفسك نواف

صد نواف و مشى يمشي قبلهم مسرع و مشوا العيال و توجهوا يصلون الفجر و التقوا بالطريق بعيال عمهم ياسر ناظر سعود فراس و مشى له : حيك ابو الفرس

سلم عليه فارس و سلموا على باقي العيال: حيك نباك الا اخوكم شفيه

ناظروه كيف صاد و عاقد حواجبه و نطق سعود : ما تعرف عمك لازم كل صباح خناق

خالد : الله يهدي عمي هو و ابوي نفس الطينه

عبدالعزيز : عمي اهون منه بمليون مره حتى نظاراتي سوا لي سالفه عليهم

تنهد فارس : يا عزتي لكم و لنا

صفر سعود لنواف التفت لهم نواف و مشى لهم ناظره خالد : كيفك

نواف كمل يمشي معهم : الحمدلله

فارس : شفيك عاقد حواجبك فلها و خله خلاص تعودنا عليهم

نواف : وش اللي تعودنا اذا عبدالعزيز سوا له سالفه على دراسته و هدم له احلامه و المسكينه شريفه حتى قميص و بنطرون مانعها تلبس قدامنا

مشعل : لا تقول اسم اختي

نواف بحده : شريفه شروف و ليش ما اقول اسمها حرام

فارس : عيب يا ولد تقول اسم عوراتك

خالد حاوط كتف نواف : لا هو عيب ولا حرام التفكير ذا حطوه المعقدين و هو صادق اخته لها اسم ليش يخبي اسمها

نواف كمل : و افتخر فيها بعد و انا اخو شريفه

فارس : اي و انا اخو رغد و الهنوف و اصايل و وصايف و شموخ

ضحك سعود : لا يسمعك ياسر و يدفنك تحت الارض

تركي من وراهم : لا يسمعكم كلكم و اتركوا السوالف عنكم

التفتوا له و ناظروه مع جابر يمشي و نطق فارس : صوتنا عالي

ضحك تركي و ناظر جابر : شرايك نجيب لهم ميكروفون اسكتوا لا يسمعون و يتوطون في بطونكم

تنهد نواف : مو عيشه ذي قسم بالله تقل حيوانات حابسينا داخل القفص

جابر : ما اقول يا عزتي لخواتي ولا حنا نطلع هم وين بالحسره

تركي همس : قربوا

قربوا العيال و كمل : اي احد يبي يتزوج يهج من الديره ذي

ضحكوا العيال و كمل تركي : و انا صادق ذاك اليوم ساعدت ام ثنيان و لبست دُره جزمتها الله لا يوريكم جلس اسبوع ناقد علي

جابر : اقول لك يقول لي شعندك متبربص عند حرمتك حرمتي بعد والله ذولي الواحد لا يتزوج ولا يحب عندهم

سعود : وقفت على الزواج هي اذا شروف قلب الدنيا فوق تحت علشان عرف انها ترسم

خالد : ذولي مو صاحين والله انا اشك بعقلهم شي

جابر : الله يعينها و يعين خواتي

صرخ ابو تركي : بدأت الاقامه تمشون على بيض

اسرعوا العيال بمشيهم و همس فارس : جمعه الجمعه الليله عندنا الله يسترنا بستره

تركي : انتم بس ادعوا تعدي الليله على خير

دخلوا المسجد وجلسوا على ما تبدا الصلاه التفت نواف لفيصل و ابو فيصل من دخلوا و سلموا رد عليهم السلام ناظروه العيال و ضحكوا و همس جابر : الا متى مقرر الزواج

تنهد نواف و بدا يلعب بشعره : الله اعلم

فارس : انتظره يروق

ضحك عبدالعزيز بعلوا صوته : ذا متى روق

ناظره ابوه بحده و قمط العافيه و بلع ريقه همس تركي : وقفوا و خلوا الكلام الحين تبدا الصلاه........

وقفوا العيال و اصطفوا جنب بعض و بدوا يصلون كانت علاقتهم حلوه و كلهم على قلب رغم فارق السن الكبير بينهم و بعد الصلاه خرجوا من المسجد و نطق ابو جابر : لا تنسون تجيبون البضاعه اليوم

خالد : اي خلاص انا و عبدالعزيز نروح نجيبها شوي بس تشرق الشمس

ابو تركي : لو انكم رجاجيل عن حق كان رحتوا و جبتهوا بعز الليول مهو مثل الحريم رايحين بالنهار

عبدالعزيز بأنفعال : استغفرالله وش دخل ذا بذا

تأفف و مشى يسبقهم للبيت و مشوا وراه اخوانه ناظر تركي ابوه : يبه مو كذا

ابو تركي بحده : وش تبيني اسوي تبيني اخليهم نفس جيل هل وقت لا يعرفون السنع و لا التقاليد

تنهد تركي و دخل البيت مع ابوه اللي صرخ : الساعه ٦ القاكم صاحين و فاتحين البقاله

التفتوا عليه العيال و همس نواف : زين يجي منه بالعاده من ٤ الفجر فاتحين البقاله

سمعه ابوه و ناظره بحده : طبع النجاسه اللي ماخذه من خوالك ان ما خليتك تنساه ما اطلع انا سلطان و صدق اللي قال الكلب يبقى كلب ما يبين بعينه شي

فار دمه و برزت عروق يده مسكه سعود من يده : هدي و خلي الليله تمشي على خير يا نواف

مشى ابوهم و تركهم نفض نواف يده : لو انه مو ابوي كان لي حساب ثاني معه

تركي : روحوا ناموا و استهدوا بالله و اتركوه خلاص

مشعل : اي خلاص تركي مو شايف الحال اللي حنا فيه

تنهد تركي : شايف و كلكم شايفين بس تعودنا خلاص

نواف : امشوا عند شريفه

تركي : بروح اكمل نومتي

سعود : روح لا تنود ( تنام ) و انت بوسط شبك النياق ولا عند الكاشير و انت تحاسب للزباين

مشى تركي و مشوا العيال للمجلس الصغير و كانت امهم جالسه بجلال الصلاه و شريفه حاطه راسها على حضن امها و تمسح على شعرها رفعت انظارها مشاعل و حرك يدينه نواف بلغه الاشاره: تقبل الله صلاتك

ابتسمت له امه و بأشاره : تبون فطور

سعود : قهوه

ناظرتهم شريفه و تعدلت بجلستها و ناظرت امها : تبين قهوه

هزت راسها بالنفي : ابي اكمل انام

وقفت امهم و جمعت سجادتها و طلعت ناظرت شريفه نواف و كملت تفصخ جلالها : وضعك مو عاجبني

تنهد نواف : نبي قهوه

نزلت جلالها شريفه و عدلت شعرها : اي يلا الحين اسوي لكم

عبدالعزيز: بس خليها شماليه

سعود : اي نبي شي يصحصحنا

مشعل ابتسم : بنروح نرتب المكان فوق و تعالي بس لا تطولين عندنا لك مفاجأه

ابتسمت شريفه : وش هي

مشعل : اي ن...... حط يده نواف على فم مشعل : شروف تكفين حطي مع القهوه كاس مويه عطشان

عبدالعزيز: بساعدك

ابتسمت له شريفه : تعال

مشى معها للمطبخ و حضنت يده : قولي وش عندك

دخل معها المطبخ : ولا شي

ضحكت شريفه و هي تطلع بن القهوه : عزوز اعرفك قولي وش عندك

حك راسه عبدالعزيز : بعد اسبوع تخرجي

عقدت حواجبها و هي تحط بن القهوه بالدله : تخرج

هز عبدالعزيز راسه و التفتت له و تركت القهوه على النار : تخرج وش عزوز

بلع عبدالعزيز ريقه : من الجامعه

تكتفت شريفه : عزوز اشرح لي

تنهد عبدالعزيز : طيب مو ابوك اقصد ابونا ما يبينا ندرس و نكمل بالجامعه

هزت راسها بضيق : اي

عبدالعزيز: و انا قبل ٤ سنوات انقبلت بالجامعه

شريفه : اتذكر و قال لك ما راح تداوم و اسحب اوراقك معرف وش و صارت سالفه و كان راح يطلق امي

عبدالعزيز: اي و ماسحبت اوراقي و كملت

ناظرته : كيف كملت

عبدالعزيز: اونلاين من الجوال و كل ما اروح مع خالد ناخذ البضاعه للبقاله اروح اختبر

ابتسمت له بفرحه : صدق عزوز صدق كملت

هز راسه و هو مبتسم : كملت و راح اتخرج بكالريوس علم نفس

تقدمت تحضنه بفرحه : مبروك فرحت لك من قلبي عزوز

أبتسم عبدالعزيز : الله يبارك فيك

ابتعدت عنه و هي فرحانه لأخوها : اخواني يعرفون

عبدالعزيز: بس خالد

اخذت دله القهوه من على النار و حطتها بالصينيه : مين خالد

اخذ الصينيه و شالها و مشى معها : ولد عمي ياسر شفيك

هزت راسها : اها بتقول لأخواني عن تخرجك

دخل معها السطح : اكيد

كانوا جالسين ناظرهم نواف : حيكم

جلست شريفه : الله يحيك

حط عبدالعزيز صينه القهوه و بدا يصب لهم اخذت فنجالها شريفه و بدات تشرب و نطق عبدالعزيز : بتكلم بموضوع

نواف نزل فنجاله : وش صاير

تحمحم عبدالعزيز و ناظر شريفه : ساعديني

ابتسمت شريفه : عزوز بيتخرج

سعود : اي خليه يتخرج

استوعب سعود : تخرج وش

مشعل عقد حواجبه : صدق تخرج وش

شريفه : من الجامعه

نواف : سحبت اوراقك انت

هز راسه بالنفي : كملت بدون علمه و بعد اسبوع تخرجي و رسمياً راح اصير دكتور نفسي

باركوا له اخوانه و نزلت انظارها شريفه لفنجالها بضيق رفعت راسها من نطق سعود : عاد يلا الحين تعرف لنا عله ابوك و عمك

شرب عبدالعزيز من القهوه : الا ذي عجزت اعرفها

ناظر نواف شريفه : شفيك يا بعد الدنيا

ناظرتهم و الدمعه بعينها هزت راسها بالنفي ناظرها سعود : بخلي عزوز يجيب لك غير البجامه الوحده عشر بجايم

ابتسمت بضيق تنهد نواف وقف و جلس جنبها : علشان الموضوع ذاك

ناظرته و هزت راسها بالنفي و نطق سعود : كذابه شروف نعرفك متضايقه علشان ذاك الموضوع

بلعت ريقها و نزلت انظارها لفنجال قهوتها اخذ فنجالها نواف و مسك يدها : يا بعد الدنيا كلها تبين اكلمه لك من جديد و يساعدنا عبدالعزيز نخليك تنقبلين بنفس جامعته

ناظرته و ابتسمت بضيق : ما ابي اخيب من جديد كافي اني فرحت مرتين اني راح انقبل و خابت توقعاتي

تنهد نواف : ليش مو تبين تصيرين محاميه مو ذا حلمك

شريفه : الحلم ذا منهدم من زمان و خلاص ما صرت ابني احلامي لاني ادري انها راح تنهدم

مشعل : افا يا شروف ما تنهدم والله و حنا ورا ظهرك

نواف : نرجع نبنيها لك من جديد

سعود حاوط كتفها : سوي اللي تبينه و حطينا بوجه المدفع ما عليك من احد

ابتسمت لهم : عساني ما انحرم منكم بس خلاص هدمته من زمان ذاك الحلم ولا ابي ارجع ابنيه بنيانه راح يكسر قلبي و يضايقني

حط نواف يده بجيبه : في حلم رجعنا بنيناه لك من جديد

ناظرته : اي حلم

طلع المفتاح من جيبه و عطاها : وقفي

مسكت المفتاح و وقفت : وين نواف مفتاح وش ذا

وقفوا معها اخوانها و قربوا من الحافه حقت السطح و اشر نواف : تعرفين البيت ذا

ناظرت البيت من السطح و بعدت شعرها خلف اذنها : مهجور

سعود : اي عاد يقولون ان صاحبه البيت رسامه و فاتحته مرسم لها

عقدت حواجبها : طيب

ضحك مشعل : و مفتاح البيت عندك يعني

عبدالعزيز ابتسم : يعني وش

ناظرتهم يبتسمون : يعني وش تبوني اتعرف عليها

ضحك نواف : شروف صحصحي اخذنا البيت من اصحابه و اشتريناه لك

سعود : و انا اشتريت لك اللوح

مشعل : ضبطت لك المكان و نظفته

عبدالعزيز: و انا عاد اشتريت الالوان و الاغراض

نواف : و انا حطيت له فيه اثاث بسيط

ضحكت بفرحه : قولوا والله كذابين لا تكذبون

ضحك نواف : و المفتاح اللي بيدك وش

تقدمت تحضن اخوانها بفرحه : عساني ما اخلا منكم

بعدت و مسحت دمعتها و هي مبسوطه ناظرها نواف : يا بعد الدنيا تبكين

ابتسمت و ظهرت اسنانها : مبسوطه

سعود : عاد اول رسمه لنا نبيك ترسمينا

شريفه بفرحه : ابشروا على ذا الخشم

العيال : عليه الشحم

جلسوا و نطق سعود : عاد نبي خميعه على الفطور الليله بالمناسبه ذي ولا يا عيال

نواف : اي مع سمنه و شاي يالبيه

شريفه ابتسمت: خلاص فطور اليوم خميعه

سمعوا صوت طق بالجدار صفر مشعل : قوم طيرتك.........

بحكم ان الجدار بينهم و بين الجيران خفيف و السور حق السطح قصير كانت كل ما تبي تكلمه تطق على الجدار ، وقف نواف و مشى لناحيتها كان الجدار قصير و من خلاله كانوا يراسلون بعض اعطته نور الورقه فتحها و قرا : كيفك نواف اشتقت لك من زمان ما شفت زولك

صفر نواف : القلم بسرعه

رمى له عبدالعزيز قلم اخذه و بدا يكتب : والله اني اصير بخير بعد ما ارسل لك الليله العصر بشوفك بالبقاله

مد لها الورقه اخذتها نور قرتها و كتبت : خلاص العصر اشوفك بس نواف موضوعنا طول صار لنا خمس سنين على الحاله ذي متى نتزوج

مدت له الورقه و قراها تنهد و كتب : قريب بنلتقي يا نور العين و ان قاله الله و التقينا على خير والله حقي من الشوق والله لأخذه

كمل و كتب قصيده :

لولا الحياء و عاداتنا و التقاليد

وسلومنا و أطباع جدك و جدي

لأقول أحبك قدام الأجاويد

ولا همني من عارض اليوم ردي

و أجيك أنا كلي بليا مواعيد

تمد لي يمناك و أمد يدي

تضحك لنا الدنيا ونرجع مواليد

ننسى زمانٍ كان ضدك و ضدي

اشوفك العصر على خير

عطاها الورقه و جلس جنب اخوانه ناظرته شريفه و ابتسمت : اي كيف طيرتك اليوم

نواف ابتسم : بكحل عيوني بشوفتها العصر

سعود صفر : اخس حركات

وقف عبدالعزيز: بروح اشوف خالد نجيب البضاعه

شريفه : انتبه لنفسك

مشى عبدالعزيز و نطقت شريفه : روحوا ناموا وراكم يوم طويل

انسدح سعود و حط راسه على رجل شريفه : خلينا ما شبعنا من سوالفك

ناظرت السماء : تتوقعون راح يجي يوم و نطلع من الديره ذي ولا يتغير فكرهم

تنهد نواف : حلم مستحيل يتحقق

مشعل و هو ياكل من التمر : ما تدري وش اللي ربي كاتبه

شريفه بفرحه : صدق باخذ بنات عمي للبيت شوي و بنشوفه

نواف : لا شروف خلي الموضوع بينا بعدين قولي لهم

شريفه و هي تلعب بشعر سعود اللي كان مغمض عيونه و يسمعهم : ليش راح ينبسطون لي

مشعل : عدل كلام نواف خلي شوي تستقر الاوضاع و ربي يكتب لك الخيره بالبيت و بعدين قولي

سعود : صح لا يوصل الكلام لأبوي و تنقلب الدنيا خليها بينه الحين

شريفه : طيب

ناظرت سعود : قوم نام داخل عن البرد

تعدل سعود و ناظر اخوانه : تنامون

نواف : روح انت بتعلل ( اسولف ) مع شريفه

وقف مشعل : جاي معك

ناظره نواف : اكتم اسر عاد لا تفضحنا

سكر مشعل فمه و نطق سعود : عندي خل يجرب بس يقول يشوف وش يصير

مشعل ابتسم لشريفه: خلاص ما راح اقول علشان شروف

مشوا و تركوهم حاوط كتفها نواف : اي يا بعد الدنيا كيف الدنيا معك

شربت من القهوه : الحمدلله

نواف : مو ناقصك شي

اكتفت بهز راسها و ناظرته : شكراً نواف عارفه ان الفكره منك

قبل راسها : اختي و اميمتي انتي اقل شي اقدمه لك

سمعت صوت جوال نواف : جوالك