في بيت ابو زيد

وعند هايف بالقوه قدر يروح لزيد عشان خاطر امه ويقوله انه سامحه وييييا فرحة زيد اللي طار لهايف يحضنه بفرح وابتعد هايف بشويش : زيد انتبه انتبه يا زيد ادير لك ظهري وتطعني

زيد: افا يا هايف وش ذا الحكي وانا اخوك هذا ما ينقال لي يمكن غلطت بس ما اطعنك

هايف : زين

مؤيد جاء : هااايف بالله تعال معايا بروح البقاله والمجنون عند الباب

هايف ابتسم لمؤيد: جيتك يا حبيب قلبي جيتك

طلع هايف مع مؤيد للبقاله اول ما ابتعد شوي عنه مؤيد ركض هايف لنويصر وهو يضحك : نوويصر شفه يطقني

نويصر كان يحب هايف اللي كل ماجاء يوديه البقاله ويوسع صدره وتعلق فيه نويصر

مؤيد لف بصدمه لما شاف نويصر يركض له بجنون وصرخ برعب : يااااهاااااايف

انهبل هايف من الضحك على شكل مؤيد وبعد ما تمردغ مؤيد وصل مطلق اللي وقف بنص الطريق برعب وركض يوخر نويصر عن مؤيد اللي تمسك بمطلق : بعده عني تكفى

مطلق : وش بلاك وش مسويي له

مؤيد : مو انا اخوك المتخلف

لف مطلق يشوف هايف يضحك وهو يعطي نويصر فلوس يروح يشتري

مطلق : هايف وجع وش بلاك انهبلت

هايف جاء وهو يمسح دموعه بضحك: ضايق صدري وقلت اضحك شوي

مؤيد: تضحك على حسابي يا غبي

مطلق : ادخل ادخل

هايف سحب مؤيد يحضنه: لا والله نروح البقاله اول

طلعت سلمى راسها : انا بعد اشتري لي

هايف: زييين

اديم : ولاتنساني

هايف: طيب يامديره

اخذ هايف مؤيد اللي يكفخه وراحوا يضحكون

................••............

في بيت ابو نجد

عند نجد اللي كانت جالسه مع غزيل بالحوش وفزت اول ما سمعت ضحكت هايف وصوته

غزيل انتبهت : انتي للحين تحترينه

نجد : وشلون ما احتريه يا غزيل وانا تحملت كل هالغرابيل عشانه

غزيل: بس يا نجد انتي تدرين وش سوا ابوه فيه عشان يمنعه لو ابوه بيرضى رضى يومه طريح فراش

نجد : يا غزيل لو يروح عمري احتري هايف بحتريه

غزيل وقفت : بكيفتس يا نجد بس ترا من الحين اقولتس ترا بتحترينه سنيييييين

صدت نجد تنادي الخادمه تاخذها لغرفتها وهي تسلى بأصوات بيت ابو زيد ..................••............

في بيت ابو زيد

عند ابو زيد اللي كان جالس يسمع سوالف ابو فايز

ابو فايز : ابو زيد علامك وانا اخوك مانك على بعضك

ابو زيد : وس بلاي غير هالعيال اللي همهم للممات

ابو فايز : وش بلاهم

ابو زيد : هايف من صوب ومحسن من صوب عجزت اداوي واحد ويطيح الثاني والله اني من عادهم صغار اعلمهم ما يطيحون للحب وطاحوا وهذاهم كل واحد يمشي بجسد من دون روح محسن مقدور عليه لكن البلا هايف

ابو فايز : يا ابو زيد هايف انت بيدك تمرضه وبيدك تداويه وش يضرك لو زوجته نجد وترا هالقطاعه اللي مرت سنين ماهي نافعتن احد

ابو زيد: وش تقول انت ازوجه بنت مشعل اعطيه مشعل بيديني عشان يضمه له وياخذ ولدي مني

ابو فايز: يا عبدلله انت تعرف هايف مايبيعك ولا يبي يعصيك لا تجبره على شي مايبيه

ابو زيد صد بغضب: معصي والله معصي

جاء مطلق وهو ينزل قدام ابوه الحليب : سم يبه

ابو زيد: عطه عمك

عطاه مطلق وطلع وهو يشوف فايز جالس مع ريوف بأطراف الحوش ابتسم ومر تركهم

وجلس وهو يشوف زيد اللي جاء له مقبل يبشره ان هايف سامحه وابتسم مطلق له وهو يشد على ذراعه : اجل تعلم يا زيد ما تكسر احد يحتاجك

زيد : ان قاله الله بسوي اللي اقدر عليه واجمع هايف بنجد

مطلق : يارب

................••............

اما عند الحريم

كانت سلمى تعلمهم عن اللي صار لاديم وتضحك والكل يضحك ووقفت ام فايز واخذت اديم وهي تاخذ لطيفه معها واتجههوا لغرفة اديم

اديم : وش فيتس يمه

ام فايز : انهبلتي يا اديم وش فيك رايحه هناك وانتي يادوب تلملمين نفسك بعد الحرق اصلا وش يوديك عند الحيوانات لو وحده عضتك ولا رفستك

اديم : يمه حبيبتي وش فيها اذا رحت وانا مع مطلق ومستحيل يخلي شي يضرني بس كنا نضحك

لطيفه: يمه مدري كيف رحتي والله لو اموت ما اروح

ام فايز: لا يكون مطلقوه يخليتس تروحين غصب لها

اديم : يمه الله يهديك وش ذا الحكي اكيد ما يغصبني انا اللي رحت وبعدين انا بوسع صدري

ام فايز: توسعين صدرك عند نياق !؟ مجنونه انتي

اديم : يمه صح اخاف منها بس ولله سعة صدر حنا عشان عشنا بعيد نحسها غريبه

ام فايز : انا ما اعرف ذا الحكي خليك يا اديم بعيد عن هالاشياء وبعدين وش مخليه ينتظر للحين ما يشتري بيت لكم ولا تبين تجلسين كذا في ذا الغرفه لازم يكون لك بيت تاخذين راحتك فيه مب محشوره مع اهله

اديم : يا امي وش فيتس اليوم انا مرتاحه هنا ومابي بيت بالعكس مرتاحه معهم ومحد مأذيني عمي كل شي ابيه يقول تم وابشري وخالتي لو الود ودها ما تخليني احط يدي بشغله حتى سلمى مو مقصره معي وحسين وهايف وكلهم ومحسن اللي مأذي الكل مب مأذيني حتى

ام فايز: ما اقول فيهم شي بالعكس طيبين وينحطون على الجرح ويبرى لكن مطلق مقتدر ويقدر يفتح بيت وتعيشون فيه وعمك بعد يقدر يشتري لكم بيت مب احسن من هالغرفه

اديم : يمه انا مرتاحه بذا الغرفه ومرتاحه لا تشيلين هم

ام فايز: هذا فايز اخذ لريوف بيت ماقال شي

اديم: يمه وش دخلني في فايز وريوف

لطيفه اللي كانت قريب الشباك : يمه مطلق جاء

اديم فزت: تكفين يمه لا يسمعك تقولين كذا تكفين

ام فايز: ليييه خايفه منه كذا !؟ لايكون يسوي لك شي

اديم : لا يمه بس بيزعل وانتي تعرفين وش سوى في هيفاء عشان امه وابوه واكيد بيزعل مني

ام فايز : بيزعل كيفه هذا حق

سكتوا على صوت مطلق : اديييم

ركضت مطلق : هلا

مطلق : عندتس احد !؟

اديم : امي ولطيفه

مطلق : زين زين عطيني بس ثوب جديد بطلع

ام فايز طلعت : ادخل حنا طالعين

صد مطلق عشان يطلعون وهو ذا الايام معاد يستصيغ ام فايز ابد دخل بعد ما راحو وهو يشوف اديم ساكته وهي تجهز اغراضه لف لها : اديم فيتس شي!

اديم : لا عادي

مطلق :كنتس ضايقه

اديم اللي كانت تفكر لو سمع مطلق الكلام وش بيصير : لا بس عشان صحيت بدري واحس صابني خمول

مطلق : زين اذا قضيتي من الغداء انتي وسلمى نامي شوي

اديم اللي كانت تشوف وش كثر مطلق يردد عليها بطريقة غير مباشره انها تكون مع سلمى وتساعدها وتهتم معها بكل شي : ابشر

مطلق صد يلبس وهو متاكد ان ام فايز قايله شي بس مايدري وشو وخايف ان اديم تسمع لها لبس وطلع يخلص شغله وهو يفكر متى يروح عمه بس ................••............

في الشارع

عند هايف اللي ينتظر مطلق عشان يطلعون لف على صوت مطلق اللي ركب وهو يدق الطبلون : حرك

هايف : سكنهم مساكنهم علامك

مطلق : قد قلت لك اني ودي اذبح احد ؟!

هايف ابتسم : لو انك قايل هالامنيه قبل يموت راضي قلت لك اذبحه بس من ذا اللي غابنك

مطلق : الحين بسألك وقلي صدق ولا انا مريض نفسي

هايف لللي مازال مبتسم : والله وانا اخوك انت مريض من زمان بس وش التطور اللي صار

مطلق لف وهو يضربه بالمسبحه : وجع وانا اخوك وجع

ضحك هايف : امزح معك قل وش فيك

مطلق : كيف تشوف ام فايز

هايف : ايييه ام فايز ، والله مدري عنها ياشيخ ما احتك بها ابد اللهم اني ارد السلام وبس لكن احسها كذا فيها غطرسه وتقول اختك الملسونه انها هه هه لها قلبات

مطلق :والله اني قمت اكتشف ان سلمى نظرتها فالناس ثاقبه اذا كرهت احد صدق يطلع فيه شي

هايف ضحك: ليه وش مسويه ام فايز

مطلق لف وهو يقول لهايف مواقفها معه اللي اغلبها شينه مره

هايف : وش بلاها ذا العجوز اللي يشوفها يقول تعيش على سطوح القمر ؟ خلها بس تولي ماعليك منها

مطلق : ماعلي منها انا كل همي اديم خوفي انها تسمع لها وحزتها حلها

هايف: لا يارجال اديم اجوديه ما تسويها ، يمكن هي احسن عيال عمي صح فايز احبه واحبه حيل بس لازم تطلع فيهم حركات اهل المدينه ونفسيتهم

مطلق : ماعليك من فايز هو بعد حليل ! بس مدري وش ورا امهم ذي

هايف: عساها بس ما تأذي ريوف

مطلق : انا اسأل ريوف واشوفها مبسوطه

هايف: ايه توني مسكتها واحسها مستانسه اللي مطمني ريوف يبان عليها لو فيها شي

مطلق : لا لا المشكله كلها عند اديم اكيد ان ام فايز ماتبيها تعيش بالديره ابد

هايف : خلك منها يا رجال لا تدخل هالامور براسك

مطلق : هذا هو المهم قلي انت وش بتسوي العشره الايام بدت تقضي

هايف : كلمت امي ودي انها تحاول في ابوي بعد وانا بكلمه قريب لاني خلاص بفطس

مطلق : اتوقع ان ابوي هالمره بيلين لاني اشوفه ينشد عن ابو نجد واجد

هايف: يارب يا مطلق يارب

مطلق : ما بترجع للخبر

هايف: باقي اجازتي مطوله ارجع ليه!؟

مطلق: ما تقول عرس وليد؟

هايف جمد : ا ا عرس وليد هنا بالرياض

مطلق : بالله عليييك ! زين زين

هايف : وتراه يعزمك بعد ويعزمكم كلكم

مطلق : علم ابوي طيب

هايف تردد ونزلوا وهم كل واحد معه فاس عشان يجمعون حطب لابوهم على حسب طلبه وهو ما يرضى احد يحطب الا هايف ومطلق حتى شرا يرفضه

هايف : لا ماني بقايل له

مطلق نزل الفاس وهو يشمر كمومه : ليييه ! وليد ذا مانيب مرتاح له بينكم شي

هايف : لا بس اهل البنت ابوي يعرفهم ومايحبهم

مطلق : منهم !؟

هايف تردد وهو بعد يرفع ثوبه وهو يدري انه لازم يقول لمطلق بس مايدري وشلون يقوله

مطلق : وش فيك

هايف اتجهه للشجره وهو يضربها بالفاس : تخيل ان من صدف الدنيا ان اللي بيتزوجها وليد وحده نعرفها

وقصتهم تشيب الراس

مطلق اتجهه لشجره الثانيه : ليتك تختصر ترا مالي حيل افكر

هايف : خلني اقولك السالفه !

ابتدا هايف يعلمه السالفه وهو للحين ماعلمه من البنت ووقف مطلق وهو يتكتف : من ذي اللي نعرفها !!! وتسوي ذا الحركات ! كل اللي نعرفهم بنات ناس وما يغلطون كذا !؟ وحتى لو قصة طليقها صحيحه !؟

هايف : ايه صدقت ! بس متأكد ان هيفاء !؟ من بنات الناس !؟ وقصتها صحيحه

مطلق اللي نزل يدينه عن صدره بصدمه : وشو !!! وش تقول انت

هايف : انصدمت ان هالبنت هيفاء ؟!

مطلق : هيفاء ماغيرها

هايف اخذ الفاس من جديد : اييه هيفاء طليقتك ! اللي ألفت مليون قصه وقصه عليك هي نفسها اللي كانت بتموت يوم طلقتها

مطلق احتدت ملامحه: وانت كيف رضيت انك تسكت ماتقول لوليد كل شي وشلون رضيت انه ينخدع !؟

هايف: انا اول شي انصدمت عجزت استوعب ودريت بعد ما كشف ابوي سالفة نجد وعجزت اتصرف وبعدها حاولت اقوله ومنعني مشاري وبعدها شفت شلون وليد متعلق فيها وماعنده مشكله لو يبيعنا كلنا عشانها وكنت ندمان بس اول ماشفت اهلها وشلون سوو نفسهم مايعرفوني قلت خلهم يولون وبكيفهم

مطلق اللي جلس مقطب حواجبه بضيق: مستحيل توصل فيهم الجرأه لذا الدرجه ، وبعدين مب حرام وليد ينخدع معها

هايف : يا مطلق ما ندري لو انها بتعيش حياتها صح من جديد وحنا مانا ناقصين مشاكل كيفهم ياخي

مطلق اخذ فتره وهو مب مستوعب كل شي قاله هايف وكان هايف يشرح له تفاصيل السالفه وكيف ان وليد عايش معها مبسوط لدرجة انهم ماعاد يشوففونه

وختم كلامه هايف : بعدين انا حنيت لوليد اكثر شي خاطره يفرح ويتزوج كفايه فقدته لاهله مابيه يعيش هالوجع بعد

مطلق وقف بضيق : مدري وش اقولك بس الله يهني سعيد بسعيده

هايف لاحظ ضيقه وحب يرفهه عنه : قل الله ياخذهم الاثنين

ابتسم مطلق بضيق : ماهموني فعلا بس حنيت لوليد من وجع الحقيقه بعدين

هايف: محد بيقوله وماتدري يمكن يعيشون حياه حلوه

مطلق : الله يسرها

رجع مطلق لفاسه وهو في ذهول كان متقبل ان هيفاء بتزوج اكيد بس ما توقع القدر بيجيبها قريبه كذا

اما هايف ارتاح انه ماعاد عنده شي يخبيه عن مطلق ولا قال الا يدري ان مطلق تجاوز هيفاء من زمان

................••............

في الليل في بيت ابو زيد

رجعوا مطلق وهايف وهم ينادون العيال ينزلون معهم الحطب ومونة البيت اللي قضوها

ركضوا كلهم الا فايز

ابو فايز: يدك مع العيال يا فايز

فايز : ماهو كثير يبه بيخلصونه

ابو زيد ناظره بطرف عيينه : الرباده لرجال مب زينه وانا عمك

وقف فايز بضيق وراح لهم يساعدهم ورجعوا العيال وجلس هايف كالعاده قدام ابوه وهو يعدد له كم جابو وش جابو بالضبط وهايف يعدد وابوه يراقبه بهدوء

وخلص هايف وهو يحط الفاتوره والفلوس اللي بقت قدام ابوه : جبنا كل شي بس الخضار والفواكه الجديد منها يوصل بكره وبروح اجيبها

ابو زيد : يعطيكم العافيه

تحرك هايف بيرجع وهو مستند على ذراعه بس وخرها بسرعه وبألم لما حس فيها زي الكهرب ولف يناظر وشاف مؤيد وحسين واقفين بضحك ومعهم عصا كهرب وفز هايف اللي يكرهها وهم يركضون وراه

كل اللي سواه هايف انه يهج وهم يلحقونه بضحكات شريره بسرعه تسلق هايف وهو ينط فوق البيت : اذلف انت وياه والله يا مؤيد لو يجيني شي والله لجيب نويصر واخليه صدق يمردغك

مؤيد : ايش قلت يابابا تجيب مييييين ! انا خلاص ما رح امشي الا معايا هالعصايه عشان تتربى انت واشكالك ياجني

مطلق : ههههههههههههههههههههههههه هههههه كنت بفزع لك بس دامك غلطان عليه احسن

هايف : انا حلفت وانت بعد يا حسين والله لوريك

حسين : انا والله دخل مؤيد بوجهي

هايف: بنزل افقع وجهك انت وياه

ابو فايز : يا عيال تراه مضر مب زين

فايز : خلهم بالله ينفضون ذا اللي ما خلى احد من شره

هايف : ماشاء الله الحين صرتوا كلكم ضدي وصرت انا الاقشر

محسن : تذكر وش سويت بهم امس بالليل

هايف اللي امس طفش العيال ولا خلاهم ينامون الا بعد معاناة

هايف: يبه افزع

ابو زيد : من ذبحته يديه محد بكى عليه خلك

هايف : يعني كذا هاه !؟ هين هييين اجل علي وعلى اعدائي

كلهم يناظرونه بإستهزاء وركض هايف اللي يدري ان ابوه بيلعن خيره بس ارحم من الكهرب اخذ خرطوم المويه اللي كان مشبوك بخزان المويه وركض وهو يفتحه ويوجهه عليهم

كانوا جالسين بأمان وهم ماهم متوقعين ان عنده شي يسويه لكن فزوا برعب اول ما نزل المويه عليهم مختلط بضحك هايف

رمى مؤيد العصا خوف انها تشبكه بالكهرب وهجوا كلهم وابو زيد يهاوش هايف : سكرررر الماء والله انك ان ما نزلت لطلعلك

هايف : بسكره اذا قلت اني في وجهك منهم

ابو زيد: ياااا ورع انزل

هايف : قل اني في وجهك

ابو زيد : طيب طيب

سكر هايف المويه وهو يشوفهم غرقانين ونزل يركض لين وصل ابوه اللي واجهه بضربه على ساقه بعصاته والكل يضحك

................••............

عند البنات

كانت لطيفه مع اديم يناظرون جوال امهم ويتناقشون في شي عندهم وقفت سلمى وهي تغمز لريوف وطلعوا

ريوف : وش فيتس تغمزين

سلمى: لا بس مليت من جلست الجوالات قلت تعالي بكره بتروحون ما شبعت منتس ريوف : اي صادقه

جت شريفه: وين رحتوا !؟

سلمى: تعالوا اجلسوا بنسولف

شريفه جلست بتعب : نادو البنات

سلمى: خليهم مع امهم وبعدين لطيفه تفلسف بالحيل راسي يعورني منها

شريفه: ماخبرتس تكرهينها

سلمى : ما اكرهها بس كل ما اقول شي تقول مب كذا وتصححه ازعجتني

ريوف : صادقه فيها ذا الحركه بالحيل

شريفه : اصبروا باقي ماعلمتكم عن ام فايز بغت تنهبل يوم قلت لها اديم راحت معهم العزبه

سلمى: ليه علامها!؟

ريوف اللي عارفه طبعها: ايه ايه ما تحب على قولتها الحيوانات

شريفه : لا يكون تقولتس شي

ريوف : لا وش دعوه بس يوم طلعت في بيت لحالي ارتحت قبل يجيني منهم جلطه

سلمى: ماعليتس منهم ابد خليتس في رجلتس وولدتس

ريوف : هذا انتي قلتيها

سلمى: والله اديم تفرق عنهم صح خوافه بس عادي عندها الامور ومتماشيه مع اوضاع مطلق الصعبه

شريفه: ومطلق بعد ما يقصر مع اديم

سلمى: في هاذي صدقتي

شريفه: اسمع ابوي اليوم يسأل عن لطيفه لا يكون بيزوجها محسن

سلمى: مدري بس لا لطيفه بتوافق ولا محسن

ريوف : ايه اذبحيها لطيفه عشان تزوج محسن ما تبي الديره ابد

سلمى: والله ياحبيبتي اذا تزوجت محسن بتنجلط وتجلطنا خليها تروح بس

شريفه: طبعا ابوي اذا قال كلمه انتهى

قطعوا سالفتهم اول ماجت اديم : بنات وش فيكم جالسين هنا

ريوف : ابد نشم هوا

اديم :اجل سلمى عمي ينادي وعطيته فراشه وفراش ابوي والباقي معرفها

سلمى: انا بقوم اعطيه

اديم : وانا عاد بنام احس خلاص انهد حيلي

شريفه : كلنا اصلا

راحت اديم لغرفتها وهي تشوف الحوش فيه مويه من هايف ضحكت وهي تشوفه للحين يتهاوش مع مؤيد وحسين دخلت وهي ما توقعت مطلق جاء بس شافته منسدح وهو شبه غافي

مطلق اللي بالقوه فك نفسه من حرب المزح وقرر انه يروح ينام وهو يحس بتعب اليوم ابد مانام ودخل بعد مابدل انسدح وهو يفكر في اللي قاله هايف اليوم ويفكر لو ام فايز تقلب مخ اديم عليه اخذ نفس يناظر الساعه واديم باقي ماجت غمض وهو يقول ( مالك حظ ابد يا مطلق كل ما قلنا رسينا على بر تطلع لي عله من تحت الارض)

قربت اديم مستغربه وقالت بهمس : مطلق !؟ نمت

فتح مطلق عيونه النعسانه: نص ونص ، كأنتس تأخرتي ابوي من ساعه يقول نوم

اديم : ايه على ما خلصت كم شغله مع لطيفه جيت وانا خلاص طفييييت

راحت تبدل ورجعت وهي تنسدح جنب مطلق بهدوء وهالمره كااان هدوء وكل واحد يفكر بصمت في عواقب تفكيره اديم كانت تراقب الغرفه على النور الخفيف وهي تفكر بكلام امها اما مطلق كان في حرب وهو يد اديم اللي على ذراعه وكان يتردد في باله سؤال مخيف ( هل بيجي يوم بتختفي هاليد من بين يديه !؟ وممكن يوم من الايام يصحى يدور اديم ولا يحصلها )

وغفى وهو على نفس هالافكار واديم مثله

...................••...........

في الحوش

. هايف اللي بعد ماغسل ابوه شراعه وخلاه ينظف المويه من وراه هو و مؤيد طلع وهو يتجهه لعزبة فلاح وده يوسع صدره شوي دخل وهو يحصلهم متجمعين ووقفوا يوم شافوه يسلمون عليه وجلسوا

حميد: هايف وراك صاير نحيف وحالتك حاله الناس يروحون للمدينه يسمنون وانت عكسهم

ابتسم هايف بضحك: فقدت ذبايح فلاح ومشوياتك

فلاح : ابشر ابشر الحين ينزلك مشوي يبري العله

هايف : لا لا بكره الحين شبعان

حميد : غريبه جاي ذا الحزه دايم ذي حزة نومك

هايف : ماعاد عيني تعرف تنام بدري

فلاح بضحك: ليه علام عينك

حميد بضحك: اكيد انها تشتكي الهوى

هايف ضحك ولف يناظر حميد: وش توصيها به اذا اشتكت

حميد : انا ما اوصي عيونك وصها انت ولا بكيفك

اعتدل هايف وهو يضبط النار وقال: بوصيها واسمع وصاتي

فلاح: قل وبنسمع

هايف :

‏لا تشتكي يا عينُ لا تشتاقي

‏لا تكشفي للناسِ عن أوراقي

‏صبراً جميلاً لانكسرتي بِـ الهوى

‏حتى ولو كُسِرَت بدربِي ساقي

‏لا تحزني لا تنحني لا تنثني

‏بل إدفُني الآلام في اعماقي

حميد صفق : ايييه هاذي الوصيه ولا بلاش

فلاح : صح لسان شاعرنا صح لسانه

ابتسم هايف لتعليقاتهم وهو يحاول فعلاً يصبر صبراً جميل ويمسك هالوصية بقوه

................••............

في طرف نجد

ما كان في كثير احداث كان هدوء بس كانت تعد اللحظات والدقايق متى تمر هاليومين وينتهووون من كل شي يخص راضي وايام راضي متى تنتهي هالعده متى تقدر ترجع لهايف جلست وهي تفكر وشلون بيقدر هايف يطلعهم من هالوضع وكيف بيرجع لهم لكن كانت متاكده ان هايف اللي قضى عمره كله يدور حلول لمشاكل نجد اكيد بيحصل حل

.................••............

من بكره الصبح في بيت ابو زيد

عند مطلق تحرك لما حس بهوا باارد اجتاحه سكر يده اليسار اللي نام وهي بيد اديم بس حسها فاااااارغه فتح عيونه شاف الشمس طلعت ودقق بنظره على الطاوله اللي قباله اللي كانت دايم مليانه باغراض اديم كانت فاضيه رفع عينه للمرايه وهو يشوف انعكاس التسرحيه وكانت فاضيه واخيرا وجه عينه لمكان شنط اديم وكانت فاضيه واغلب الغرفه فااضيه فز برعب وهو ينادي بصرخه: اديييييييم

كانت عيون مطلق مفتوحه بذهول وهو يتلفت حوله حتى انه ما قدر ييقوم من مكانه

اما اديم اللي صحت من بدري ولما شافت الاغراض مغبره قررت تمسحهم واللي ينغسل تغسله وعشان ما ينزعج مطلق شالت كل شي للحمام عشان تاخذ راحتها

بس فزت برعب اول ما سمعت صوت مطلق المرعب اللي يناديها طلعت بركض : مطلق بسم لله عليك وش فيك

لف مطلق : وينتس ! وين اغراضتس ؟ وين بتروحين

اديم انصدمت من شكله : جمعت الاغراض عشان امسحها وانظفها تعرف 4 شهور جالسه ما تنظفت

مطلق بشك : وين الشنط!؟

اديم : مسحتها ودخلتها وش فيك مطلق !

مطلق اللي حس ان يده اليسار ثقيييله حسها تخدرت اوجعه قلبه للحظه لما فكر وش ممكن يصير وش يسوي لو فعلاً راحت اديم ورجع يعاني

انسدح بتعب وهو يحاول يستجمع نفسه قربت اديم بخوف : انت تعبان فيك شي ! انادي هايف

مطلق : لااا

اديم : طييب وش فيك

مارد مطلق اللي يحاول يضبط نفسه قبل تنتبه اديم لرجفته وخوفه

وسكت اديم جوالها اللي دق وردت : هلا يمه

ام فايز: وينك ماجيتي اليوم لا يكون فيك شي

مطلق اول ما سمع صوت ام فايز تكهرب لف لاديم وهو يأشر لها تسمعه

بعدت اديم الجوال :هلا

مطلق : لا تروحين لمكان !انا تعبان

اديم : ابشر

رجعت اديم للجوال : لا يمه بس مطلق تعبان مقدر اخليه اذا تحسن جيت

ام فايز : وش فيه

اديم اللي ماتدري وش فيه : مسخن شوي

ام فايز: زين

سكرت اديم وقربت وهي تجلس جنب مطلق مدت يدها لراسه اللي كان معرق : وش يوجعك !؟ مسخن!

مطلق اللي حس ان افضل شي يقول انه مريض ولا يبي اديم تدري وش كثر خايف من روحتها

اعتدل مطلق اللي حط راسه على رجول اديم :ايه ايه

اديم : دقيقه بجيب لك دوا

مطلق: لا مابي شي

مد مطلق يده اليمين يضغط على يده اليسار اللي توجعه

اديم : توجعك يدك

مطلق : ايه

قربت اديم وهي تهمز يده وهي ما تدري بالضبط وش فيه :يمكن معك سخونه داخليه عشان كذا يوجعك جسمك

مطلق : مدري وش يوجعني يا اديم بس خليتس قريبه

اما مطلق اللي تخدر تماما وهو وده يقفل الباب ولا عاد تطلع اديم لامها او لاي احد ارتاح كثيير بمجرد انه شافها حوله وهو يسمع تمتمات صوتها تقراء عليه ................••............

برا عند الشباب

كان ابو زيد ماسك كل العيال ومستغلهم في انهم يغسلون الزل وواقف هو وابو فايز بطرف

حسين اللي واقف بالنص ومعاه مكنسه : يبه قوم مطلق معنا

زيد: اصلا غريبه انه ما قام للحين

فايز ضحك: وش يبي فيكم بالله

محسن: خلوه ينام الحين هو اللي بيرفع الزل كله

ابو زيد: وش تبون فيه انتم خلوه

حسين : ودي انه يجي عشان نخلص بسرعه لان اللي بيشتغل مع هايف ومؤيد ما يخلص الا بعد 10 سنين

كلهم لفوا لمؤيد وهايف اللي من ساعه يغسلون بوحده لكن التغسيل بجهه وهم بجهه يا يطشرون المويه على بعض ولا يزحلقون بالصابون وطبعاً غرقانين بالكلام

ابو زيد: هاااايف

لف هايف بخرعه ومسك مؤيد وطاح هو وياه

ابو زيد : قم قم انت وياه اخلص اخلص سنه على وحده اخخخلص

قاموا وهم يضحكون وهالمره بدوا صدق يشتغلون ويغسلون

ابو زيد لف لحسين : روح شوف وينه مطلق وراه ابطى

راح حسين يدق على مطلق اللي كان مايبي يطلع اليوم ابد لاي مكان طلعت اديم وهي تقول لحسين ان مطلق مريض ولا هي الا ثواني وجوا كلهم واولهم هايف لغرفة مطلق ومن حسن حظ اديم انها خلصت ورتبت قبل يجون

وفز مطلق بإحراج من دخولهم كلهم

هايف : مطلق علامك وش فيك وش يوجعك

مطلق: تعب بسيط

ابو زيد : تحتاج المستشفى يودونك العيال

مطلق :لا يبه

ابو فايز : وش يوجعك

مطلق : سخونه وراحت

هايف كان يعرف مطلق لو انه مريض وش بيكون وضعه يدري انه بيقول مافيني شي وبيقوم يكافح المرض وابد ما يستسلم له شك هايف بالوضع بس سكت وطلعوا اول ماجت ام زيد اللي خايفه على مطلق وبعد شوي ماجاز لمطلق انه يكون تحت الشفقه بس اصر انه يسوي نفسه مريض عشان اديم ما تلحق تجلس مع امها ولا تلعب عليها امها إفكارها

................••............

بالقوووه قضت هاليومييين

وما صدق مطلق ان عمه يروووح بيتهم صح يحبه بس خلاص ماعاد له طاقه يتحمل ام فايز

اما هايف اللي انقضت هاليومين وبالنسبه انشلع قلبه لين انقضت وهي اخر يومين بعدة نجد وصار لازم انه ينهي هالقصه اللي هدت حيله

كانوا جالسين بصالة بيتهم وهم كالعاده ساكتين وابو زيد جنبه الراديو ويسمع الاخبار زيد رجع لبيته وشريفه بعد

كانت القهوه تدور بينهم بهدووء مطلق اللي متكي جنب امه واديم بجنبه

وسلمى وحسين جالسين يحلون كلمات متقاطعه ويتهاوشون عليها بهدوء ومحسن كعادته خلال هالاربعه شهور يقلب بالجرايد اما هايف جالس جنب امه وهو يقلب في راسه وشلون يبدا تنحنح وهو يقول بعد ماخلصت الاخبار : يبه

ابو زيد: هاه

هايف : ودي احكي معك بموضوع

ابو زيد اللي كان يدري ومتأكد ان هايف بيفتح هالموضوع والباقين تركوا كل شي وصاروا يناظرون هايف

ابو زيد : قل وش عندك

هايف : عندي نجد يبه

ابو زيد : يا ولد انت ما تخاف ربك يا ولد ما تخاف ربك ذبحتني وعليت قلبي خلاص ماعاد فيك طب اقولك اسمعني زين انا ما زوجتك اياها وهي بنت عند ابوها مب عاد بزوجك الحين وهي ارمله وليتها بس ارمله كفيفه كفيفه

هايف: عايفها يا يبه عشانها كفيفه هذا شي مب في يدها

ابو زيد: الله يشفيها لكن علمتك وافهم العلم نجد ابعد عليك من نجم السماء

هايف : يبه يببببه الله يرحم اثنين جابوك لا تحدني على اقصاي انت تعرف الموت ارحم لي من اني اخلي نجد

ابو زيد : لااا انت واضح انك معاد يقنعك الطيب

وقف ابو زيد وهو يدق بعصاته كتف هايف : خلك على ما تبي لكن اعرف يا ابوك يا نجد

انهى ابو زيد كلامه وطلع وهايف يناظره بإنكسار وصدمه

مطلق : هايف الله يهديك ليتك احتريت شوي

محسن: لييه ما صبرت

وقف هايف بغضب : صبرت لي تكسرت ضلوع صدري لكن خلاص لييين هنا وخلاص

مطلق فز وهو يمسكه: وين بتروح

سحب هايف يده منه : فكني يا مطلق

طلع هايف بغضب وهو خلاص تعب تعب حيل من هالوضع اتجهه لسوق وهو عيونه على محل ابو نجد

................••............

في الصاله

عند مطلق اللي لف لحسين : ألحقه لا يسوي مصيبه

طلع حسين ومطلق راح لابوه بغضب : يبه الله يهديك يا يبه اللي انت تسويه حرام

ابو زيد: حرمت عليك عيشتك انت وياه

مطلق : يبه خاف الله فيه يا يبه ما كفاك اللي صار فيه تبي موته

ابو زيد: اقول اص بس انتم خلاص شختوا وصرتوا ماعاد يهمكم كلامي لكن علم اخوك يحط عقله براسه ترا ماعاد لي حيلة فيه واذا كل همه العرس من بكره ادور له وحده تناسبه ويعرس ويريحنا

مطلق انفجر: يا يبه الدنيا ماهي كلها عروس وزواجات الدنيا ما تنحل كذا والقلوب ماهي بيدك ولا تحسب ان هالحل مشى علي بيمشي على هايف واعرف ان اهون على هايف تذكييه ولا تبعده عن نجد وقبل تقسى على قلبه انتبه لقلبك يبه ولا تحسب ان محد يشوف اهتمامك لابو نجد وحبك له كلنا نشوف لكن الكبرياء ما ينفع لو تجاهلته سنين وشهور ما تقدر تجاهل عهدكم لبعض رغم ان كل واحد لاهي بحياته لكن كل واحد يحن لثاني ابو نجد يسأل عنك من بعيد وانت بعد تسأل عنه لكن بيوتكم قبال بعض بس محد يتجرا يبدا بالسلام لا عاد الله ارض ولا عادت دنيا تفرق بين الاصحاب

لف ابو زيد يطالع مطلق بحده ولكن مطلق ماعاد يقدر يسكت قال كل اللي بقلبه وابتعد وطلع يدور هايف اللي مايدري وين راح

.................••............

في السوق

عند هايف اللي وصل محل ابو نجد وهو خلاص زهق دخل والكل يناظره بإستغراب وبالعاده عيال ابو زيد ما يجون هنا تقدم هايف لابو نجد : عمي مشعل ابيك بموضوع

نزل ابو نجد اللي بيده يناظره بإستغراب : سم

هايف : ابيك برا ماينفع هنا

وقف ابو نجد وطلع مع هايف الللي كانت خطواته عجله وسريعه ابتعدوا عن السوق وحسين يراقبهم

وقف هايف وهو يضغط على يدينه بتوتر : عمي لين متى !؟ لين متى بتجلس انت ابوي ومتقاطعين لين متى وانتم كل واحد يحن لثاني بس تكابرون

ابو نجد صد بضيق : لا تحرك جروح منت بقدها يا هايف حاولت في ابوك لين طحت ما رضا

هايف : بس انت بعد ما قصرت به

ابو نجد: اذا جاي تحسب اغلاطي روح لابوك ازين

هايف : لا لا لا مانيب جاي ابد احاسب احد انا جاي ودي ألم الشمل

يا عمي انت تحسب إنا مستانسين بوضعنا والله ضايقين ودنا لو نرجع مثل قبل والله نشتاق لأيام كنا نطلع من البيت نركض نستقبلك جاي اشتقنا نطلع بنقصه من غدانا لكم واشتقنا نصحى الصبح على صوت سوالفك مع ابوي واذا تأخرت نركض لبيتك نناديك يا عمي مشعل ابوي يقول ابطيت ما جيت للقهوه اشقتنا لكل شي يا عمي

ابو نجد ماكان ناقص ابد عتاب هايف صد يتمالك نفسه : تقدر تقنع ابوك بذا الحكي

هايف : انت قل تم وابشر باللي يقنعه

ابو نجد وجته فرصه من الله : تم يا هايف تم

ضحك هايف بفرح وهو يبوس راس ابو نجد بدون شعور : ابشر ابشر رح عند عزبتنا وبجيب ابوي بجي

ركض هايف بفرح وهو يلتفت لابو نجد اللي فرح بفرحة هايف بس امله في ابو زيد ضعيفف

حسين اللي يناظر هايف بصدمه وركض وراه وقابلوا مطلق بالطريق ومسك هايف بخوف : وش بلاك وش فيكم وش صار

حسين: مدري طلع من عند ابو نجد كذا

مطلق : هايف وش سويت ؟!

هايف لف وهو يضحك بفرح: ابو نجد يا مطلق رضا رضا يتصالح مع ابوي بس قال اقنع ابوك

مطلق : تقنع ابوي بووووش !؟

هايف : انهم يتصالحون

مطلق : انهبلت انت هايف وش سوووويت يا هايف ابوي بيذبحك

هايف : انا ماعاد لي حيل يا يتصالحون يايدفنوني

وانتهينا

تركهم هايف وراه وركض لابوه دخل وفزت ام زيد: هايف بسم لله يمه عليك وش فيك تضحك كذا

هايف : بتفرج يمه بتفرج وين ابوي وييينه

محسن : انت انجنيت يا ولد !

راح هايف للحوش الخلفي يدور ابوه ولفت اديم بهمس : سلمى لا يكون هايف انجن

سلمى: ياويلي شكله والله

في بيت ابو زيد

عند ابو زيد كان واقف بضيق بعد كلام مطلق وهو خلاص تعب وهو يخفي عنهم لكن انصدم من هايف اللي جاي يركض وجلس على ركبه قدام ابو زيد وهو يمسك يده : تكفى يا يبه تكفى اذا كنت تغليني وان كان لي خاطر عندك لو مقدار ذره اسمعني

ابو زيد: وش اسمع !؟

هايف : يبه تكفى عمي مشعل وده يصالحك وانت بعد ودك ترجع لصاحبك بس ما تدرون كيف لكن تكفى يبه تعال معي واسمعه اخر فرصه يبه تكفى قابله وكلمه وحاول تخلص من هالقطاعه وانا اوعدك اذا رحت وكلمته وما تصالحتوا ماعاد اطري نجد ابد تكفى يبه تكفى هو قالي رح واقنع ابوك نتفاهم وهو ينتظرنا بالعزبه يبه

ابو زيد اللي انصدم : وش تقول انت رايح تترجاه يصالحني

هايف : لا ولله ما ترجيته بس قلت له انكم تجلسون وتكلمون بس

ابو زيد اللي رفع يده بقهر وهو وده يكفخ هايف كف بس تمالك يده ووقف وهو يدري انه مستحيل يصالح ابو نجد لكن اخر حل عشان يفتك من موال نجد : زين زييين امش قدامي وانت بعينك بتشوف هاللي تركض عشانه وش بيسوي بك

انجلط هايف ما توقع ابوه يخضع بهالسرعه لا شعوريا جات له رجفه ووقف وهو يقول : ابشر

جاء مطلق اللي يركض وحسين وهم يشوفون ابوهم طلع وهايف معه ركب مطلق معهم بصمت ولف ابو زيد: وانت معه بعد

مطلق اللي مايدري وش مخبص هايف بس مهما كان بيوقف مع هايف : مانيب تاركه يبه

طار هايف للعزبه وهو يحس ان قلبه بيفجر ضلوعه وكانت الصدمه ابو نجد قدامهم وقفوا ونزل ابو زيد ومسك مطلق هايف بقوه: وش انت مسوي ! وراك جمعتهم وش بتسوي !؟

هايف : بيتصالحون طيب غصب بيتصالحون

نزل هايف ومطلق لكن لف ابو زيد وهو يرفع عصاته : وخر انت وياه بعيد

انصدموا لكن سحب مطلق هايف وراحوا بعيد وهم متكتفين

مطلق : هايف متأكد انهم بيتصالحون متاكد ان هذا الحل

هايف لف وعيونه تلمع ارتباك : ماعاد بيدي الا هالحل يا تزين يا تنقلب مجزره

تكتف مطلق يراقب ابوه وابو نجد اللي واقفين بعيد عن بعض شوي لكن كل واحد وله هيبته بالارض

ابو زيد اللي كان واقف وقفته اللي عهدها ابو نجد وقفه قويه بحق وهو متكي على عصاته وهو يناظر ابو نجد اللي بنفس الوقفه يتشابهون وبنفس العز وبنفس الهيبه ولكن ابو نجد لييين شوي

طال سكوتهم بس تقدم ابو نجد : قلت لي كلمه يا عبدلله كنت تخافها بس اشوفها تنطبق عليك “ قلت يا مشعل اخاف يجي يوم ابعد عن الطريق الصح ولا احصل احد يردني له “

ابو زيد : للحين انا في طريق الصح لكن لقيت احد يبعدني عنه

ابو نجد : ما شبعت من القطاعه !؟ ما شبعت من الكبرياء

ابو زيد: اذا شبعت من الذهب والكذب والغدر انا شبعت

ابو نجد صد وهو يضحك بحزن : شبعت من سنين يا عبدلله لكن انت وش يدريك

ابو زيد : جيتك يا مشعل قبل سنين وقلت لك مانيب باحث وراك ولا بسألك ليه سويت كذا لكن الشي الوحيد اللي يرجعني اوقف قدامك اسالك ؟! هو ذا

اشر على هايف المتكتف وابتسم ابو نجد : هو اللي قدر عليك فالنهايه

ابو زيد : ان كان عندك شي بتقوله قله

ابو نجد : ايييه يا عبدلله عندي 10 سنين من عمري وعمرك فيها كثييير بقوله

ابو زيد كان ساكت وهو مب مقتنع ويشوف اي تبرير لمشعل تافه

ابو نجد اللي تعب وقرر انه يقول كل شي لابو زيد وابتداء يفصل له اللي صار معه

وهايف مطلق واقفين وهم مب قادرين يسمعون شي

هايف : ليه ماجلسوا وش يقول ابو نجد طول ذا الوقت

مطلق : مدري ياهايف مدري الله يستر بس

ابو زيد اللي اتسعت عيونه بذهول من هول ما يسمعه وهو يراقب انكسار ابو نجد بقهر تقدم هو يشده بذراعه بقهر : مشعععل يوم تعاهدنا يا مشعل تعاهدنا لو تنهد الارض فوق روسنا ما فينا اللي يغدر بالثاني امنتك على حياتي واهلي ومالي وكل ما املك وانت بعد ! تعاهدنا اقل شر يصيبك ولا يصيبني نوقف مع بعض فيه ونكون عووون تعاهدنا نوقف مع بعض في كل شي ليييه ؟!ماجيت وقلت يا عبدلله هذا صار لي ليه نسيت ان لو صار لك شي بنتك ومرتك برقبتي امانه كيف نسيت اني اعطيك عيوني لو بغيت كيف طاعك قلبك تغدرني وانت اخبر الناس بي ؟! كنت لك سند وللحين انا لاخوي سند

ابو نجد بإنكسار : انت بعد وراك عيال لو قلت ادري بك بتروح وتدخل نفسك في كوارث ومصايب انت في غناء عنها والله ما طاعني قلبي لكن اجبرني اجبرني واتعبني وانا والله ماعاد في ذمتي من هذاك الذهب شي

ابو زيد : علمتك من قبل قلت لك مال الحرام مايدوم قلت لك انتبه نصحتك وش اللي استفدته الحين ؟!راضي بحالك وحالي وحال بنتك رضيت الحين

نزل راسه ابو نجد بحزن: لا تنبش جروحي يا اخوي تكفى السنين علمتني قيمتك وقيمة كل حرف قلته

ابو زيد احتار انقلبت موازينه معاد يدري وش يقول وش يسوي التفت يناظر هايف اللي يراقبهم بضيق وخوف

ابو نجد : أطلب اللي تبي يا عبدلله وابشر باللي تبيه ان قلت لي رح بروح وانت قلت لي عود اخو تراني للحين اخوك

ابو زيد اللي في صدره عتاب كثييير ولكن اختصره يقول : لو بحكي وبقول بتفجر ضلوعك بصدرك يا مشعل لكن ماعاد بينا الا حبل واحد يا انك ترفعه وتبني كل شي انهدم بذا الحبل يا انك تقطعه وينتهي كل شي

ابو نجد وشو ؟!

ابو زيد : تزوج بنتك نجد هايف

لف ابو نجد بذهول: وشهو ! نجد

ابو زيد: ايييه نجد هذا هو اخر مابينا يا تزوجها لهايف وحزتها اضمنك ما تغدرني يا تعيي وينتهي كل شي وانت لك قرار وفكر

لف ابو زيد وهو ينادي هايف ومطلق اللي جو يوكضون: سم يبه

ابو زيد : يلا لا بنعود للبيت

هايف اللي كان يناظر ابوه ويناظر ابو نجد بتوتر ووده يفهم وش صار وش قال ابوه عشان ينقلب وجهه ابو نجد صحى على صوت ابوه : هااايف يلا

تحرك هايف بتردد وركب وهو خايف من الخيار الصعب

تحرك مطلق وهو يراقب ملامح ابو نجد البارده

وقال هايف: يبه وش حصل !

ابوزيد : اسكت مابي اسمع لك حس ! قلت يا ابوي كلمه وهذاني كلمته

هايف : ايه كلمته بس وش قلت له وش قال لك

ابو زيد بغضب : عشان ما تقول ابوي ما نصرني وابوي ماعطاني فرصه ولا وقف معي هذاني خطبت لك نجد منه وصار كل شي بيده يا يزوجك ويرجع كل شي يا يرفض وحزتها لو تجيب طاري نجد ذبحتك

هايف لف بكل قوته يناظر ابوه وفز يناظر مطلق اللي وقف بجنب البيت بذهول وماهم مصدقين ابو زيد

مسك كتف ابوه بصدمه: والله يببه والله صدق خطبت نجد

ابو زيد : تحلف ابوك يا ولد

راح ابو زيد وتركهم ولف هايف لمطلق وهو صوته يرجف ببتسامه وفرح : مطلق تسمع اللي اسمعه هو صدق يا مطلق تكفى يا مطلق قل انه صدق تكفى

مطلق ضحك وهو يحضن هايف : اييييه ايييه يا هايف ايه ان شاء الله اخر صبرك الفرج ان شاء الله

هايف اللي كان بالقوه يمسك مطلق وهو بيده رجفه لف يناظر بيت ابو نجد وهو مانه مصدق ركض لامه وهو يناديها بفرح: يممممه يممممه

طلعت ام زيد مرعوبه ومعها اديم وسلمى ركض هايف وهو يمسك بيدينها بفرح : يمه افرحي يييمه اخيرا يمه ربي استجاب لي ابشرتس يمه بينلم الشمل ابشرتس يمه انها فرجت ابوي خطب لي نجد يمه

شهقت ام زيد بصدمه وهي خايفه ان هايف انهبل :هايف بسم لله عليك يمه

مطلق ضحك وهو جاي من بعيد: لا تخافين ام زيد هايف للحين بعقله

ضحكت ام زيد بفرح ونطت سلمى تحضن هايف هي تزغرط واديم تصفق بفرح

مطلق : بس بس بتفضحونا انتم

هايف : خللللهم خلهم يغنون ويرقصون خل الدنيا تفرح خل نجد بكبرها تشهد ان عيوني نالت ما بغت

محسن : بس للحين ابو نجد ما رد

هايف راح وهو يشد كتوفه بفرح: مستحيل عمي يرفض ومستحيل نجد تعيي دام ابوي سهلها تسهلت

لف هايف وهو يحضنهم كلهم ومن قو فرحته بغى يخم اديم بس انتبه لما سحبه مطلق : خيير يا ابوي فتح عيونك

انحرجت اديم اللي وخرت وهي كانت جنب سلمى وضحك هايف: مادريت ما دريت وين جوالي وين جوالي

ام زيد: وش تبي بجوالك

هايف: ببشر مشاري

حسين طارت عيونه : مشاري يدري ؟؟؟؟؟

هايف ناظره ببتسامه : الدنيا كلها بتدري يا اخوك ولا تحسب اني طايح بالخبر من شهور ومحد درا بي لو لا الله ثم مشاري كان دفنتوني من شهور

مطلق ابتسم : بشويش على عمرك لا تطيح

طلع هايف يدور لشبكه وهو ينتظر مشاري يرد وهو وده يصييييييح بكل صوته ويعلم الدنيا

رد مشاري : هاايف اخيرا تذكرتنا

ابد ماقدر هايف يمسك ضحكته وهو يضحك بفرح: مشاري وش بشارتك وابشرك يا مشاري

مشاري من ضحك هايف ضحك: ابشر بالبشاره بس فرح قلبي

هايف : ابشرك ابوي رضا اخيرا رضا

مشاري: في ذمتك الحمدلله خلاص يعني انتهت مشكلته مع ابو نجد

هايف: مب بس رضا الا خطبنا نجد يا مشاري

صرخ مشاري برعب ووقف وهو يقول : احلف احلف قول والله وربك ياهايف انت صادق لايكون انهبلت ياخوي

هايف اللي مستمر بضحكه: الا والله ما انهبلت الا صادق

مشاري : علمني علمني وش صار بالضبط

هايف : بعلمك بس مب الحين خلني اخلص شغله وبرجع لك

مشاري:احتريك وانا بروح ابشر عمي ابو فرج

هايف : زييين زييين

سكر هايف ونزل وهو تبدلت دقات قلبه من قلق لفرح يوسع الدنيا واهلها كان همه بس يبشر نجد بس وشلون يبشرها كيف يبشرها وقف وهو مايبي احد غيره يبشرها

.................••............

في الخبر

عند ابو فرج ومتعب وسعود جاهم مشاري يركض : ابشركم ابشركم

ابو فرج فز : بسم لله علامك وش فيك

متعب : انت ما تقول بتنام

مشاري : وش نومه يا متعب وش نومه ماعاد فيه نوم

ابو فرج: ولد انت وش علتك انطق

مشاري : ابو زيد وابو نجد تصالحوا

ابو فرج: وش وششش من قالك ومتى دريت وكيف تصالحوا

مشاري : مدري مدري بس هايف توه مكلمني

سعود : قالك تصالحوا !؟؟

مشاري : قال ابوه رضا وتكلم مع ابو نجد واكيد دامه رضا معناته تصالحوا

ابو فرج: اللله يبشرك بالخير ما بغوا يهتدون

متعب : طيب و ش صار

مشاري : اصبروا بشارتي ما قضت

مقبل : بشارة وش

سحب مشاري منه الاكل وهو ينزله: الخبر الاحلى فالخُبر كلها ونجد كلها هو انه

ابو فرج: يا مشاري انطق

مشاري : هايف خطب نجد

صرخوا كلهم بصدمه : في ذمتك

مشاري : ورب البييت

ابو فرج انهار :ياربي لك الحمد ياربي لك الحمد

متعب ابتسم بفرح: اخيرا ربي هدى ابوه ورضا

مشاري : لو تسمعون صوته تقول مبشر بالجنه

مقبل :اكييييد اكيد انشلع قلبه المسكين ولا بقى مصيبه ما صارت له من ورا هالحب اكيد بيفرح

ابو فرج: يارب تتم عليه فرحته يارب

متعب:طيب وشلون وش صار من توها البنت امس قضت عدتها

مشاري: مدري يقول شوي يعلمني التفاصيل

سعود: مايبي لها اكيد معاد فيه صبر ولا يتحمل مخاطره جديده

ابو فرج : المهم ان عبدلله طاح اللي في راسه ورضا

مشاري : هذا هو اذا عدينا من ابوه خلاص هانت

................••............

في بيت ابو زيد

عند مطلق اللي كان يراقب هايف ببتسامه:وش فيك مب صار اللي تبيه وش بلاك متوتر

هايف: ودي يا مطلق اعلمها ودي ابشرها ودي اقولها هذا وعدي بس كيف

مطلق : هايف دام ربي فرجها لا تخربها اصبر ايام وتعدي وعلمها بكل شي عندك لا يكشفك ابو نجد وحزتها وش يحلها وتضيع منك ولا تقدر تسوي شي

هايف : زين زين

مطلق : تعال ادخل

هايف : لا خلني هنا البيت ما يوسعني

مطلق: هايف انتبه

هايف : زين

دخل مطلق اللي يحس انه راح عنه هم جبال وضحك اول ماشاف سلمى واديم يرقصون على اغنيه بالراديو

مطلق : كنا شايلين هم هايف لا ينهبل ولقينا ناس تنهبل عنه

اديم اللي وقفت اول ماشافته راحت له وهي تضحك: والله يا مطلق خلنا نفرح ما بغينا نفرح فيه

سلمى ركضت وهي تمسك مطلق : انت بعد ارقص تراك تسحبت معه لين قلت امين

مطلق سحب ذراعه وهو يضحك: انا جهودي لين هنا وخلاص طاح مني عشره كيلو من كثر ما ركضت اليوم فكيني

سلمى : بكيفك

راحت وهي تقوم امها معها رغم ان الاغنيه ماله دخل بس يرقصون عليها واديم من يوم دخل مطلق ما رقصت استحت وفضلت انها تصفق

سلمىى: امممشي ارقصي

اديم : تعبت كملوا انتم

مطلق كان جالس وهو مبتسم ووده يقول ارقصي معهم بس استحى وفضل انه يراقب بهدوء وهو يدعي ان سلمى تسحبها غصب عليها

ودخل حسين وانقذ اديم لكن قال مطلق يبيه يروح : حسين شف هايف وين لا يتهور ويجيب مصيبه

حسين: ايه انا بس اركض ورا هايف مدري من الكبير

مطلق : روح يا رجال روح

اعتدل مطلق اول ما تغيرت الاغنيه وهالمره كانت اغنيه تناسب الرقص وهالمره عاد قامت سلمى وهي تحلف على اديم اللي انحرجت ومطلق مستانس لكن صدمته سلمى اللي نشبت له هو بعد يرقص لكن وقف مطلق يسلك لها وهو بس واقف بجنب امه وسلمى منطلقه ترقص واديم ضاع كل شي منها وانحرجت من نظرات مطلق لها وماصدقت وقفت الاغنيه وجلست

سلمى: بموت تعبت احد يبي مويه

الكل : لا

ام زيد: ابوك وينه

مطلق: مدري راح

ام زيد: خلني اشوفف

راحوا ولا بقى الا اديم ومطلق اللي لف لها مبتسم

واديم اللي حسته بيضحك عليها لفت تناظره : لا تضحك ياخي انا معرف ارقص و احد يناظرني كذا

مطلق مازال مبتسم : وشلون يناظر !

اديم :مطلق لا تستهبل

مطلق : وبعدين اذا كل هذا ولاتعرفين اجل لو بتعرفين وش بتسوين بي

اديم لفت بإحراج وهي كانت تشوف انها ماعرفت ترقص ابد بس مطلق يشوفها شي خرافي

قرب مطلق اللي مد يده يمسك خصله طاحت من شعرها : شكلي اخليها فقره رسميه ،احس اني بديت احب هالفقره

اديم : لا تكفى والله اني ما اعرف ابد

مطلق ضحك وهو يشوفها رافضه الفكره : لو يدرون العقّال اني اول مره اشوف زوجتي ترقص بيقولون مايستاهل يتزوج

اديم لفت وهي تناظره بصدمه : لا والله الزواج عندكم رقص بس

مطلق اللي كانت نظراته لها مربكه : لا والله مب رقص بذات عندي ماهو رقص بس عاد الله يجبر قلب سلمى ورتني ان عندي زوجه محترفه مع اني مبطي عن ذا المسأله

( كان يقصد مطلق انه ماله بالرقص ولا يهتم له بس انها شدته لكن طارت لهيفاء واتسعت عيونها اكيد انها ترقص له ولا وش خلاه يقول مبطي )

لا شعورياً لفت تناظره: وشلون مبطي !،

مطلق :مبطي يعني من زمان

اديم : ايه فهمت بس وش قصدك انك من زمان عن الرقص

مطلق انتبه لها وابتسم بخبث : قصدي واضح

اديم ما كانت تبي تكشف له انها تفكر في هيفاء ويتذكرها ولفت وهي تاخذ الجوال وتقدمت وهي تمد يدها لمطلق : تعال معي شوي ابيك

مطلق ؛وش فيتس !

اديم : مطلق عطني يدك

مد مطلق يده لها ووقف وراحت اديم للغرفه وهي منجلطه من تصريحه الواضح وابتدت غيرتها تقتحم كل جزء منها اما مطلق مايدري وش سوا بالضبط بأديم كان محتار في تصرفاتها طلعت اديم سماعاتها الصغيره تكفي مسامع الغرفه مو مره عاليه وشبكتها بالجوال

وجلس مطلق وهو يناظر بعدت اديم طرحتها وجلالها وهي تعدل شعرها وتقدمت له : يلا

مطلق : وين !

اديم : ما تقول انك مبطي عن الرقص نرجعك لساحات يا سيد

مطلق ضحك: لا لا انا مالي شغل بذا الامور ارجعي لساحات بلحالتس

اديم : لا والله انا اخترت اغنيه تقدر ترقص انت بعد عليها ولازم تقوم معي مب تجلس تناظر

مطلق مسك يدها وهو يلفها على نغمات بداية الاغنيه: مثلي المفروض كل شي يسويه انه يجلس ويتأمل النعمه اللي عنده

اديم تلقائياً كانت تدور كل مالفها مطلق لكن وقفت وهي تضحك : يا تشاركني يا اطفيه

مطلق تركها وهو يقفل الباب عشان ما تداهم سلمى وتخرب ابو الجو وابتسم : نشاركتس ليه ما نشاركتس

والمشاركه اللي كان يقولها مطلق هو انه وقف وهو ماسك يدها لكن اديم اللي انهبلت من كون انه ممكن يتذكر مواقف هيفاء صارت ترقص بكل شي يجي لعقلها

ومطلق اللي ما طرت له هيفاء ابد وناسي مواقفها ولا عمره شاف رقص هيفاء الا مره ولا يتذكره بعد لكن كان مبسوط جدا بغيرة اديم اللي بدون ما تنتبه كانت جداً فاتنه

.................••............

في السوق

عند هايف اللي طلع للقهوه وجلس مع فلاح وهو يفكر كيف يوصل لنجد بس ما يكشفه احد بدون ما احد يدري كان يسمع سوالف فلاح وحميد وهو يقلب الفنجال بهدوء بس لف على فلاح اللي قام وهو يناظر غزيل اللي جت للمحل اللي جنب القهوه وكان يبيع اجهزه واشياء وسمعها تطلبه ( مسجل ، راديو)

فلاح: وش تبين به مب شريت لتس واحد!؟

غزيل : ايه شريت بس نجد وصتني به مسكينه ماعاد تقدر تطلع ، تسلى به

فلاح : زين زين

لف فلاح : انا بروح

هايف فز : مع السلامه

راح هايف للمحل وابتسم اول ماطرت له فكره لو يموتون محد بيكشفها دخل المحل وهو ينادي الهندي : غلام تعال هنا

غلام :دقيقه خلص زبون

هايف :تعال شوف هذا بعدين روح

سحبه هايف سحب وهو يروح فيه لاخر المحل : غلام اسمع قول لها تجي بعد ساعه

غلام: ايش هذا ككلام ! ليش!

هايف : يا صديق انت كلام انت نزل بضاعه جديد

غلام ناظر هايف بغضب بس نشب له هايف لين قال لغزيل تروح وتجي بعد ساعه لف هايف : اسمع 10 دقيقه بروح وبجي لا تبيع هذا مسجل طييب

غلام: يا ربيييي خلاص مافي بيع الحين بعد ساعه بيع

هايف ضحك وطلع وهو يرفع ثوبه وركض طالع من السوق لبيتهم

وكان السوق ما يبعد ابد عن البيوت كان على طرف الديره وكانت البيوت شعبيه والسوق شوي قديم وصل بيتهم اللي كان تقريباً افضل البيوت دخل وهو ينادي : سلمى سلمى

طلعت سلمى : وش فيك

هايف: تعالي تعالي اسمعي عطيني شريط

سلمى: شريط وش !

هايف : الحين يوم رحت للخبر عطيتس الشرطان حقت المسجل وقلت وزيها

سلمى : اييه ايه دقيقه

راحت سلمى وجت معها شريط واحد : خذ

هايف : عطيني االمسجل

سلمى:وش تبي به

هايف: سلمى هاتييييه

عطته سلمى واخذه هايف وقابله حسييين : يا قدمك ياخي من عاد يسمع شريط ومسجل

هايف: ياخي وش تبي هااه وش تبي انا قديم علي غبار تطلبني شي !؟ حسين: انا ما اطلبك شي بس محسن يبيه

هايف : قله مع هايف شوي وبيرجعه

راح وتركه هايف وهو يحطه في ثوبه وعض ثوبه وهو يتسلق فوق البيت عشان ياخذ راحته

حسين : الله يشفيك يالخبل انا وانا مراهق ماسويت سواتك

هايف: اذلف يا حسيين

راح حسين وجلس هايف مبتسم صح معاد احد يسمع ذا الاشياء ولا احد يدور الشريط والمسجل بس هايف يحب كل شي قديم ويحتفظ فيه واليوم خدمته هالاشياء دخل الشريط ببتسامه وهو يشغله يبي يسمع وش فيه لكن جت على الجرح الاغنيه وصدح ابو نوره وكأنه يوصف حال هايف :

الأماكن كلها مشتاقة لك

والعيون اللي انرسم فيها خيالك

والحنين إلي سرى بروحي وجالك )..

وقف الشريط وهو مبتسم :ايه هاذي هي البدايه في كل شي

بعد هالمقطع من الاغنيه ابتداء هايف يسجل صوته بالشريط « وقبل ما ابدا بأي شي قبل ما تكلم بطريقتس اللي تحبينهاا بعلمتس بشوقي لتس وقالها عني ابو نوره "ماهو بس انا يا نجد الاماكن كلها مشتاقه لتس " انا للحين مدري كيف مريت من 5 الشهور اللي فاتت مدري كيف قلبي تحملها والله اني كنت خايف وهالمره صددق مريت في مقطع ابو نوره وهو يقول (رجع يشغل الاغنيه على المقطع)«وصرت خايف لا تجيني لحظة يذبل فيها قلبي وكل أوراقي تموت»( رجع يسجل صوته )

ااه يا نجد لو تدرين وش كثر خفت ولو تدرين باللي صار لي كلامي كثير يانجد لكن المهم عندي اني افهمتس اني والله مادريت وماعرفت ان راضي خطبتس ولا عرفت شي الا بيوم العرس واللي حصل معي هو...(شرح لها هايف كل شي صار) وختم يقول: ادري انتس كنتي تنتظريني لكن انا اوعدتس ماعاد اخليتس لاحد وانا عشاني وعدتس انا قدرت اجمع ابوي وابوتس واكيد تصالحوا لكن اللي يهمني ان ابوي خطبتس لي من ابوتس وننتظر رده اكيد بيجي وبيقولتس لكن انتبهي لنفستس لا يشك بشي قبل يقولتس انا اسألتس وانا ادري انتس بتضحكين وبتبكين لكن اضحكي وان م قدرتي تضحكين

‏انتي اجمل وجهة وانتي باكيه «انا اطلبتس يا نجد .. تتزوجيني ؟!»

سكر الشريط وهو فرحان انه اخيرا قدر ينطقها بارتياح رجع يسمعه وهو يدقق الكلام ونزل بعد ما انتهى وشاف حسين وعطاه المسجل وطلع مستعجل لمحل غلام وصل وهو يناظر الساعه شاف غلام يرتب المسجل :هاه ما بعته

غلام: انت كلام مافيه بيع

هايف ابتسم : زين عطني

اخذه وهو يدخل الشريط فيه وسكره لف على نظرات غلام : انت اس سوي

هايف: هديه زبون

جت غزيل وهي مستغربه وجود هايف بس اخذت المسجل وراحت وهو فيه الشريط تشقق هايف من الضحك وهو يبوس راس غلام طلع 500 وهو يعطيه

غلام: اش هذا انت مجنون

هايف : هديه هديه

طلع هايف وهو يحس انه يمشي على الغيم

................••............

في السوق

ابو زيد كان جالس بالمحل وهو هاااادي ويفكر بقلق من كلام ابو نجد وش اللي صار مع مشعل وش هالقصه اللي تحير كل شي في حسابات ابو زيد انحاس واحتار ما يدري كيف يقرر اموره كان ينتظر رد ابو نجد اللي بيحدد كل شي وبيشوف ابو زيد اذا مشعل باقي يثق فيه او لا

.................••............

في الطرف المقابل

ابو نجد اللي كان جالس في محله بصمت وهو يفكر بتردد يعرف ابو زيد في ذا الامور دايم صبور وكيف رضا بعد هالسنين كيف خضع

ابو نجد :و كيف يطلب نجد وهو يعرف نجد كفيفه وتوها مخلصه العده: وش النيه يا عبدلله وش تبي تسوي ؟! بتنتقم مني في بنتي ولا بترجع ثقتك بي ببنتي

................••............

في بيت ابو زيد

عند هايف اللي دخل البيت وهو ياخذ المطرقه ومسامير ورقى فوق البيت على اساس انه بيصلح شي

ام زيد: هايف وش تسوي عندك !

هايف : فيه شي هنا انكسر وبصلحه

ام زيد: تو ابوك جايب عمال الاسبوع اللي راح وكل شي زين

هايف : امي يا قلبي ادخلي وخليني

ام زيد : الله يصلح حالك ان كاني عجزت فيك

دخلت وتركت هايف اللي ماكان بيصلح شي بس كان بينبه نجد لا يكشفها احد كان مرتب له كلام عل هيئة لغز بحيث لو سمعه احد مايفهم وش يقصد ولا يدري وكأنه يغني

وكان يبي اول شي يسويه يغني لين يدري ان نجد تسمعه

ابتداء يدق المسامير بخشبه معه وهو ينادي بصوت تقدر تسمعه نجد وهو يلحنها :

ابطت القمررررا على الليل الكسير

وبقى هايف يردد هالبيت يبي نجد تسمعه

..................••............

في بيت ابو نجد

عند نجد كانت جالسه بلحالها تنتظر غزيل تجي فزت وهي تسمع صوت ندا وقفت وهي تتحسس الاغراض وجات الخادمه : نجد تبغين شي

نجد : وديني عند الشباك واطلعي وسكري الباب

الخادمه مسكت نجد وودتها لشباك : افتحها

نجد : لا خلاص روحي

راحت وسكرت الباب وبعدت نجد عن الشباك وهي تفتح درف الشباك اللي كان على النظام القديم

وهي مطرفه عشان ما يشوفها وهي تسمع صوت اللي رد روحها

هايف اللي وقف وضحك وهو يشوف يدين نجد وهي تفتح الشباك وعرفها من تخبطها بالهوى ضاق على حالها بس فرحته فيها اكبر واول ما تأكد انها تسمعه

رجع يردد لغزه االلي حرصه انه مايكون بقافيه ويكون معقد شوي واللي يسمع ما يفهمه وكانه خثاريژ وقال وهو يلحنه يبي يوصل لنجد معناه

( ابطت القمرا على الليل الكسير

واستعد الليل لمرسول الاغاني

في الشريط ارسل عتاب له كبير

في امانات الغزيل و رابع سطور الاغاني)

كان يقصد بشطر الاول ( انه نجد ابطت عليه وهو كسير ومحتاجها )

وثاني شطر قصد ( انه استعد وهو يرسلها مرسولهم المعتاد وهي الاغاني )

وشطر الثالث شرح ( انه ارسل عتابه في شريط )

واخر شطر وضح لها كيف ارسل المرسول ومن وين تبدا رسالته عشان تنتبه (وقال انه ارسل الشريط مع امانه غزيل وهو المسجل وانه بعد السطر الثالث من الاغنيه بتبدي رسالته )

وكرر يرددها وهو كل شي يطل اذا فيه احد او لا وابتسم وهو يشوف غزيل وصلت ودخلت بيت ابو نجد

اما نجد كانت تسمع واول ماقال الليل والقمرا فهمت انه بيقول شي وسكتت بحيره لكن لفت اول ماسمعت صوت غزيل اللي دخلت وهي تقول : نجد تاخرت بس طلع قلبي غلام لين عطاني المسجل وهاذي امانتس عندتس وانا بروح

نجد اللي كأن احد كب عليها مويه اول ما فهمت كلام هايف وضحكت بفرح وهي تقول : غزيل عطيني المسجل يا غزيل

مدته غزيل لها وهي ما تدري وش صار : خذي هذا هو وترا غلام عطاني معه شريط يقول يجي معه هديه

ضحكت نجد وحارت دموعها بعيونها وهي تحتضن المسجل وطلعت غزيل وتركت نجد للي ماعاد تبي من الدنيا شي ابد وهي تسمع صوت هايف يعيد ويكرر

قدمت وهي تتحسس الشباك ورفعت يدها بالمسجل وهي ما تدري اذا هايف شافه او لا بس تدعي ان هايف يشوفه

ابتسم هايف وهو يغمض بإرتياح انها فهمته وسمعته ووصل لها الشريط

غير البيت وهو يقول يبي يوصل لها انه شافه : شايفتس الله يرضى لي عليييتس

نزلته نجد بضحك وهي فعلا تبكي فرح وتضحك بذهول من هايف اللي ماعمرها توقعت هالفكره منه ابد

نادت الخادمه تشبكه لها وبعد ماشبكته وطلعت ضغط نجد الزر واشتغلت الاغنيه وهي تعد لرابع سطر وبدا صوت هايف وانهارت نجد وهي تسمع كل شي

................••............

في بيت ابو زيد

عند مطلق اللي طلع بعد موجة حب عاشها مع اديم في ساعات حس انه انقطع عن الدنييا وصار فوق الغيم لكن رجع على ضرب هايف على السطح : هييييه وش عندك فوق

نزل هايف اللي يرقص : نحمد لله جت على ما نتمنى

مطلق : والله بلشنا بك ان وافق ابوي مشكله وان ما وافق مشكله ! الحين وش مسوي بك السطح تدقه

هايف : عشاني مبسوط واحبه وعشاني احبكم كلكم

مطلق : الله يشفيك وانا اخوك

سكتوا على دخول ابوهم ووخروا عن الباب وهايف شاق الابتسامه عجز يتحكم بنفسه

ناظره ابو زيد بطرف عين : درينا ان عندك سنون وتعرف تضحك اضبط عمرك ياولد ازين لك وش بلاك صرت خفيف

مطلق لاول مره يحس انه بيتفجر من الضحك وماصدق ابوه راح ومات ضحك على هايف اللي ما كأنه تهزاء ابد كان يضحك وجت سلمى وهي معها صحن العشاء : يلا يلا عشاء

هايف ركض وهو ياخذه عنها : هاتي عنتس

سلمى: ياربي ليتنا دارين من زمان خاطبين لك

هايف ضحك ودخل سلمى: وينها اديم ناداها للعشاء

مطلق : زين

رجع مطلق لاديم ببتسامه : سلمى تنادي للعشاء لا تأخرين عشان ما تذبحتس

اديم : افا تذبحني وانت فيه

مطلق ابتسم بخقه: هو اكيد لا بس كفايه سحبنا عليها

اديم ابتسمت وطلعت وهي تروح لسلمى اللي اول ما شافتها غسلت شراعها ................••............

في بيت ابو نجد

نجد عجزت تسكر الشريط عجزت كانت تسمعه وتعيده ما بغت تسمع هالحكي من هايف بس خافت ابوها يجي بأي لحظه طلعت الشريط وهي تخبيه تحت السرير وبعدها بلحظات جاء ابوها : نجد يبه ما نمتي

وبعدها بلحظات جاء ابوها : نجد يبه ما نمتي

نجد اللي ماهي قادره تسيطر على ابتسامتها: بنام شوي يبه

ابو نجد: الحين وشلونتس طيبه

نجد: بخير يبه بخير

ابو نجد سكت وهو يناظرها بهدوء وكلام ابو زيد ينعاد عليه وقف بحيره وطلع بدون ما يقول شي

اما نجد استغربت سكوت ابوها وطلوعه كذا بس ابد ما ضاقت وهي متوقعه بيقولها قريب بس لازم تهيء نفسها قبل ابوها يشك بشي

................••............

هاذي الليله بذات

اللي اول مره هايف يحط راسه وينام وهو يحس قلبه داخله يرفرف وابتسامته ما اختفت مرتاااح والدنيا كلها بخييير

وهو نفس هالشعور بقلب نجد اللي توها من بعد شهور عنا تحس ان روحها من الفرح مب قادره تنام وهي ودها ترد على هايف بس شلون ترد مابغت تخاطر ابد وهي تجمع كل الحكي لليوم اللي بينكتب تحت اسمها زوجه بس مب لراضي لا ( زوجه لهايف )

.................••............

من بكره الصبح في بيت ابو زيد

صحى هايف قبل حتى ابوه يصحى وهو يشب النار ويزهب القهوه ورايق ومستعد لكل شي

طلع ابو زيد وام زيد على ريحة النار والقهوه وصوت هايف يغني (ليالي نجد مامثلِك ليالي

غلاك أوَّل وزاد الحب غالي

ليالي نجد لِلمحبوب طيبي

أمانه نور عيني ياليالي

حبيبي ولا ذِكرت إنَّه حبيبي

دريت إنَّي حظيظ وزان بالي

على شانه تهاونت المصاعب

أذوق المر لأجل رضاه حالي)

ضحكت ام زيد : ايييه ليالي نجد ذبحتها بالسهر وش عندك صاحي بدري

هايف تفشل اول ما شاف نظرات ابوه وتقدم يبوس راسه وراس امه : ما جاني نوم قلت ازهب القهوه والفطور لين تصحون

طلعت سلمى برعب: يمه من مسوي الفطور ! هايف

هايف: ايه ايه يلا جيبي سفره ونادي العيال

حسين اللي كان من اشغاله يشب النار ويسوي القهوه بس فز اول ما شم ريحة النار مفجوع لا يكون تأخر الوقت بس شافه توه بدري وانجلط زود اول ماشاف هايف صاحي وهو دايم اخر من يصحى

حسين : الله ينصرتس يا نجد

ابو زيد : بس انت وياه تراني مالي حيل اجاهد الفجر

سلمى بذهول : بروح لمطلق اصحيه ومحسن

................••............