رواية مالي وطن في نجد الا وطنها الفصل الرابع والعشرون 24 بقلم اديم الراشد
رواية مالي وطن في نجد الا وطنها pdf الفصل الرابع والعشرون 24 هى رواية من اجمل الروايات الرومانسية السعودية رواية مالي وطن في نجد الا وطنها pdf الفصل الرابع والعشرون 24 صدر لاول مرة على موقع التواصل الاجتماعى فيسبوك رواية مالي وطن في نجد الا وطنها الفصل الرابع والعشرون 24 حقق تفاعل كبير على الفيسبوك لذلك سنعرض لكم رواية مالي وطن في نجد الا وطنها الفصل الرابع والعشرون 24
رواية مالي وطن في نجد الا وطنها الفصل الرابع والعشرون 24 بقلم اديم الراشد
في غرفة مطلق
وعند اديم بعد ما صلت وكلمت امها اللي تزن على بموضوع البيت طلعت متجهه لسلمى
ضحكت سلمى: هاه ما رضى الباشا
اديم : لا اصلا ما يكلمني
ام زيد: الله يهديتس انتي وياها بس
سلمى: يمه افزعي وادخلي واسطه انا ماعلي بس اديم مسكينه
اديم: سلموه وجع وش بلاي مسكينه !؟ وبعدين اخاف يعصب اذا دخلنا واسطات
سلمى: والله انا ابي واسطه ما تحمل ثقل مطلق وانتي يازوجته تحملي
ام زيد: ماعليه بكلمه
جاء مطلق وهو ينزل القهوه : امي ابوي يقول لازم انتي تسوين العشاء مخصوص
ام زيد : ليه !
سلمى: وش ليه اشتاق لاكل الغاليه محبوبته
ام زيد: بس يا بنت والله صدق ما تستحين
مطلق :المهم يا الغاليه يبيه قبل 8 عشان عمي مشعل
ام زيد : ابشر ابشر بس تعال ابيك
مطلق لحقها للمطبخ وهو من بين خطواته يسرق نظراته لاديم اللي كانت تتقهوى وهي تراقبه
مطلق: سمي امي
ام زيد : وش بلاك زعلان من سلمى واديم
مطلق : امي يا عمري واعليتس منهم خليهم لازم يعقلن هالثنتين
ام زيد : طيب يمه سوء الفهم وارد
مطلق : بس الشك مب وارد يمه
ام زيد: يا حبيبي انا وانا امك اول ماشفتها توقعتك رجعتها عاد وش عاد اديم زوجتك واللي تحبك واللي ما سوت كذا الا من غيرتها عليك وسلمى تخبرها خبله ما تبي شي يزعل اديم
مطلق : ادري يا حبيبتي ادري بس خليهم شوي
ام زيد: عشان خاطري لا تزعلني
مطلق : وانا اقدر ابشري يمه ابشري
ركضت سلمى وهي تنط عليه : تحيى الواسطه القوييييه ويحيى الثقيل الزعول
مطلق ضحك وهو يوخرها ومسك اذنها : اشوفتس تهبين ثاني مره بدون ما تفهمين ترا بعديها اول مره بس ثاني مره بقص لسانتس عشان نرتاح
سلمى: ابشر سمعاً وطاعه
مطلق ابتسم : ولا عاد تدرين ماظنتي بتلحقين على الثانيه
سلمى ناظرته بشك: ليه
مطلق ببتسامه: بيشغلتس الله
سلمى : وش يعني
مطلق : يعني وخري عني الحين
وخرت سلمى وهي ماتدري وش عندهم ينغزون من اليوم
اما مطلق كان متوقع اديم بتجي مع سلمى وتعتذر لكن ما جت وقرر يروح لابوه بس لف اول ما لحقته اديم تركض بضحكه : دقيقه ياخي ما يمدي رضيت الا وطرت اصبر طيب بنراضيك حنا بعد
لف مطلق بنص ابتسامه: اشوفه ماهمتس رضيت ولا ما رضيت
اديم : افا وش ذا الحكي يالمزيون ! انا ماهمني لكن ما يمديني انزل فنجالي الا وطرت
مطلق تكتف: طيب وهذاني وقفت
اديم ابتسمت وهي تلف مكان ما فيه احد قربته وهي تبوس راسه : يعني مانصير وقحين وندخل واسطه ونسحب على الاعتذار وهاذي حبة راس وسامحنا وبعدين تعرف انا ما تحمل اموت من الغيره مثل ما انت تغار انا اغار
مطلق عجز يكبت ابتسامه وضحك وهو يسحبها شوي بزاوية الحوش : ماني بمناقشك في سالفة الغيره هذا امر قاضين منه لكن كتعليق اول
قرب وهو يتكلم بصوت واطي ومكتف يدينه على ظهره : يوم تقررين تعتذرين لرجلتس المفروض ما تحبين راسه
اديم بنفس النبره: وش اسوي اجل
مطلق :اللي بتسوينه طال عمرتس كثير والامور الناقصه متراكمه
اديم : شلون يعني !؟
مطلق : اول شي قبل تعتذرين فيه ادمي جاب هديه واللي يجيب هديه يشكر ولا
اديم ابتسمت بعبط وهي ترجع تبوس راسه من جديد : صادق وهاذي بوسة شكر
مطلق : مصره تستعبطين !؟
اديم للحين تمثل العبط : ليه!؟
مطلق ناظرها بهدوء وقرب وهو يبوسها وانحبست انفاس اديم لكن ابتعد وهو يضحك وقال: هاذي بوسة العفو ويقابلونها بزيها من الشكر ويكثرون منها للاعتذار يضيفون عليها كم شغله اعلمتس اياها شوي
اديم تمنت انها ماعابطته وخرت وهي مرتبكه وابتسم مطلق : شغلنا معتس كثير وواضح بعلمتس كثير
اديم لفت وهي تشوف سلمى جت وراح مطلق يضحك
سلمى ناظرت بشك : ما تستحون مافيكم طب متهاوشين متصالحين ما تستحون
اديم : خيير انتي وش سوينا
سلمى: ما يحتاج تسوين شي يكفي ملامح وجهتس لو اني داريه ما سويت واسطات ارحم لي من هاللي اشوفه
اديم ضحكت: ادخلي يا دايخه ادخلي
سلمى: يااااا ربي حتى كلامه اخذتيه
ابتسمت اديم وهو تدخل جلست وهي تسمع سوالف الرجال اللي عاليه اصواتهم ومن بينهم سوالف مطلق
.................••............
بعد العشاء في بيت ابو زيد
افترقوا بعد ما اعلن ابوهم وقت النوم وههايف منسدح يناظر اصبعه ببتسامه
حسين: ياربي حمدلله والشكر اخبر اللي منكسر اصبعه ما يجلس يضحك
هايف كانت منسدح مقابل حسين بالمقلط : حسينوه اقولك فكني شرك
حسين ضحك: اقول هايف للحين تكتب قصايد في نجد
هايف ضحك: اكيد
حسين : صح اني مرتاح من ازعاجك وهواش مطلق من يوم رحتوا عني وصرت انام بلحالي بس ياخي اشتقت ياخي قلي قصيده
هايف : ترا من سوء المنقلب وردات الحظ اني اقول قصيده بنجد واناظر وجهك
حسين : يحصلك انت و وجهك احمد ربك والله اطلق من نجد
هايف : ياربي لا تعاقبه على كذبه يا ربي اخوي في راسه فكه
ضحك حسين اللي قرب وهو ينسدح على ذراع هايف ببتسامه وهو صدق اشتاق ينام جنب هايف اللي كان ماعنده مشكله يحضن حسين وينام عكس مطلق اللي مايحب احد يقرب منه ابد : صدق صدق قل شي
هايف : مانيب قايل قصيده بس بنغني
حسين : واذا جاء ابوي
هايف بضحك: لا ابوي من يوم طلب العشاء تسويه امي مب حولك
حسين: ياقليل الادب اص اص لا يسمعك
ضحك هايف وهو يدور شي يسلي به حسين ويتسلى به
بس ضحك حسين : يفزع لوضعك ابو نايف
هايق ضحك: في اي اغنيه يفزع
حسين: وشلون مغليك
هايف مد يده يهز حسين بضحك: عز الله جبتها وشلون مغليها يا حسين
حسين ضحك وهو يرجع ينسدح
على بداية هايف اللي يغني بشويش:شلـون مـا اغليـك وأنت الـذي علمتنـي حبــك يا هـاجـسي ... عشقـي عيـونـك
إسـأل وتلقـى الجـواب
دخلت سلمى وهي تدق اصبع بروقان: فـي ناظـر عيـونــي
فزوا هايف وحسين: منين جيتي
سلمى جلست بينهم وهي معها اكل : اول شي هايف شريفه سوت هاذي لك قبل تروح وقالت عطيه
هايف : يا لبيييه يا شروف
حسين: واثنين
سلمى: اكل معه انت
هايف : غريبهه ما خمدتي
سلمى: طفشانه قلت اجي اغير جو وتونا بدري
جلست تسولف معهم وفجاءه قال هايف : سلموه ودتس تعرسين
انصدمت سلمى وهي تناظره بذهول : خير من الشبعه ما عاد تعرف تسولف
ضحك حسين : والله معاد يفهم شي غير العرس
هايف ضحك: صدق وش ذا السؤال !
سلمى هنا حست بمغص من الظهر وهم عندهم شي
هايف : لا بالمعنى العام لو يجي احد يخطبتس بتوافقين
سلمى بضحك : مايبي لها يا حبيبي اكيد بوافق وافتك من وجهيكم
ضربها هايف برجله وهو يضحك : مغسول وجهتس بمرق
حسين: ماعليك منها هاذي ماينفع معها مقدمات اصدم عيشتها على طول عشان تستوعب
سلمى: وش بتصدموني فيه
حسين بضحك : ابد طال عمرتس مشاري صديق هايف يخطبتس وابوي شكله موافق وبتضفين وجهتس وانا بفتك من وجهتس وبعدها يعرس هايف وافتك منه ومطلق يشغله الله مع اديم ومحسن يعرس بعد وافتك وحزتها واعيش بسلام
سلمى طارت عيونها بصدمه : هااه
هايف حذفه بالملعقه : والله لجي اسكن عندكم وافقع قلبك
حسين: بيت عمك اولى بك ياخي
سلمى كانت مصدومه من سالفة مشاري وتناظرهم بصدمه
ولفوا هايف وحسين اول ما وضح سكوتها
هايف : والله انك صادق سكتت ليتنا قايلين من اليوم
سلمى: تستهلبون !؟
هايف حس بصدمتها وقرب : سلمى خلي عنتس كلام حسين واسمعيني ... وبدا يشرح لها السالفه
................••............
عند مطلق
اللي من بعد ما سكر الابواب اتجه لغرفته لكن وقف على صوت البسه اخذها وهو يناظرها دخل ببتسامه لاديم اللي اول ماشافت مطلق حست باحراج
بس انصدمت من انه جايب البسه
اديم : وش تسوي البسه هنا
مطلق جلس : حصلتها عند الباب قلت اجيبها
اديم جلست قدام مطلق وهي تناظر البسه بحب : يا زييييينها بالله يا مطلق شوف عيونها كيف حلوه
مطلق اللي كان يلعبها بسبحته وهي تنطط وكانت حلوه مره : شوفي اصلا كيف تلعب
اديم جلست جنبه: عطيني بالله بلعبها
عطاها مطلق وهو يراقب ضحكها الخايف
مطلق : انتي ليش تخافين من كل شي !؟ ترا ما تخوف
اديم لفت تناظر وهي مبتسمه : مدري بس ترا هذا قبل
مطلق : قبل وش!؟
اديم : الحق ينقال يعني قبل كنت اخاف بزود بس الحين ماعاد اخاف كثير
مطلق ضحك وهو يناظر البسه: يعني فادت معتس عيشة الديره
اديم اللي كانت يدها على كتف مطلق لكن مدتها تحاوط رقبته بجرءه غريبه عليها ولف مطلق يناظر بأستغراب بس قالت اديم : مب الديره يعني حنا كنا نجي لديره من زمان بس الحين فرق انك انت فيه واصلا اذا انت فيه ما اخاف من شي
في ذا اللحظات جمدت عيون مطلق القريبه من اديم وهو يناظرها بصمت ومر بقلبه شي حسه اوجعه اخذ نفس وهو ينزل البسه غمض يحاول يذكر كلامه وقال بيأس لما طارت حروفه : كيف ارد الحين ؟؟
اديم ضحكت وهي تبعد يدها لكن قال مطلق :دقيقه
وقف وهو يطلع البسه ويغسل ورجع : اييه وين وقفنا
اديم لفت بضحك: مدري كنت ناسي كلامك
ضحك وطلق وتقدم وهو يرفع يدين اديم لرقبته : اصبري احضنيني يمكن اذكر !
اديم غمضت بإحراج ككك على تسرعها اللي فالنهايه يورطها بس استجابة لمطلق وهي تحضنه
لكن قال مطلق اللي كان مستكن : الظاهر اني بنسى نفسي بعد ... 🌚
................••............
في المقلط
عند هايف وحسين كانوا متعجبين من صمت سلمى اللي بعد ماسمعت كل كلام هايف عن مشاري واخلاقه وقف وهي تاخذ الصحون وطلعت وهي في ذهول عمرها ما توقعت ان هالمشاري اللي موسوس فيه هايف يطلبها ولا توقعت انها بتزوج احد برا الديره
والغريب انا داااايم مستحيل يمر احد عندهم ما تشوفه بس مشاري بلحاله اللي ماشافته
انسدحت بفراشها بذهول وهي تقلب الموضوع براسها بصدمه عجزت تتقبل
عند حسين لف على هايف : وش بلاها
ابتسم هايف ورجع ينسدح: رغم اني من زمان ناسي صفة الحياء في سلمى بس صدمتني انها الحين استحت
ضحك حسين: الله يعينك يا مششاري
قبل يتكلم هايف انفتح باب المقلط ومعه صوت ابوهم وبسرعه تلحف هايف مسوي نفسه نايم وحسين مايدري كيف رمى نفسه على رجول هايف يمثل النوم
ابو زيد كان يناظر بغضب فيهم وهو مايدري نايمين او صاحين لكن من رميت حسين توقعهم نايمين وسكر النور وطلع وفتح هايف عينه واول ماشاف وجهه حسين انفجر من الضحك ماقدر يمسك نفسه وفز حسين يضحك على شكله
لكن اختفى ضحكهم اول ما رجع ابو زيد بغضب : تكذب علي انت وياه تكذب علي
فز هايف اول ما شاف العكاز وحسين فز معه وهو يدورون بالمقلط وابو زيد وراهم وانحاشوا وابو زيد يتحلف فيهم
وقفوا بالحوش وهم يسمعون ابوهم يقول: والله ان رحت انت وياه اني لكفر فيك امش امش انت وياه
هايف : يبه تعوذ من ابليس
ابو زيد : اعوذ بالله منك انت متى قلت نم انت وياه متى قلته ولا تبوني اسحبكم بكره
هايف : والله بننام الحين
ابو زيد : اعقب اعقب وانثبر انت وياه هناك بسرعه
حسين: يبه اخر الليل برد
ابو زيد : احسن احسسسن خلك هناك امش امش لف وجهك على الجدار وارفع رجلك
هايف : يبه تكفى ماحنا بمدرسه وبعدين تونا بدري
ابو زيد رمى عليه العصا ومسكها هايف بس صكت بأصبعه
ابو زيد:ان جيت كسرت راسك اخلص ولد ابوه ينزل رجله ولا يدخل
حسين انجلط وهايف اردى منه ويعرفون لو سوو شي بيلعن خيرهم والا يقدرون يتكلمون اكثر وهو معصب وقفوا كل واحد بزاويه ورفعوا رجولهم وهم ما عليهم الا سروال وفنيله
حسين لف لهايف بضيق : هايف وش نسوي
هايف : ابد يا الحبيب تصلب على الجدار لين يأذن
حسين : حمار انت ياخي برد وبعدين مقدر اوقف
هايف : ولا تقدر تجلس وبعدين خل الدلع مافي برد قوي
حسين : ايييه متعود حبيبي متعود عز الله اني ما عمري وقفت هالموقف لكن لنا الله
هايف ضحك وهو متعووود على ذا الوقفه وياما وقفها هو ومطلق : كله من وجهك
حسين : وجهي ولا ضحكتك الخايسه ما تعرف تضحك بشويش
هايف : لا تزعجني
حسين : انا وش خلاني اسولف معك عز لله ان ذا الحركه لك انت ومطيلق
هايف : اييه مطيلق تخرج وسلمك العهده
حسين : على الطاري تعرفني ما احب الهوا والبرد بالله دق على مطلق دور شي نلبسه والله بكره بمرض
هايف ماكان يحس بالبرد لانه ياما وقف فيه وياكثر الليالي اللي قضاها هايف بنفس هالموقف بس حن على حسين اللي من الهواء الطاير يمرض
هايف: وقف زين طيب بروح ادق على مطلق يطلع لنا شي
حسين : طيب
راح هايف لغرفه مطلق لكن قبل يدق تراجع ببتسامه خبث اول ما طرا له فكره مجنونه ورجع لحسين
حسين:هاه ما فتح !؟
هايف: ما دقيت اصلا
حسين : ليييه !؟
هايف ضحك: ابي اخلع عقله
حسين: وش بتسوي
هايف : من زمان والله ما وسعنا صدورنا وضحكنا ومقلبنا
حسين : ياا ليييل هايف ابوي من غير شي معصب فكنا لا يحوسنا اليوم
هايف : اص اص ما عليك انت بس توزى وانا اتصرف
حسين : طيب وش بتسوي
هايف :بروعه اخلص وخر لا يشوفك
حسين اللي ماله بذا الامور بس تورط مع ركض وهو يتوزى بمكان دافي وهايف اللي كان يدور حوالين غرفة مطلق وهو يناديه بأصوات مخيفه وكل شوي ينتقل لمكان بسرعه وكان هايف متقن الصوت المرعب
................••............
في غرفة مطلق
مطلق اللي كان يسمع الاصوات بس متجاهل
اديم : مطلق تسمع شي
مطلق : لا
اديم : مطلق فيه احد يناديك
مطلق : لا يا بنت الحلال انتي تخيلين
سكتت اديم ومطلق لكن فز على ضرب متكرر على الباب واظافر على الشباك وصرخت اديم
فز مطلق ومسكته اديم : وين بتروح
مطلق : بشوف من برا
اديم : واذا حرامي وبيذبحك
مطلق : الله واكبر يالحرامي اللي بيدق الباب اجلسي هنا اجلسي
اديم : يا مطلق تكفى لا تروح
مطلق : يا بنت مافيه احد اكيد العيال يستهبلون
اديم : بس العيال نايمين من بدري عمي مدخلهم ماشفته
مطلق : ما عليتس
طلع مطلق وهو يتلفت ومافي احد الدنيا سكووون ولا فيه ولا حس ولا صوت وباب بيت اهله مقفل معناته مستحيل العيال يطلعون بعد ما لف في كل المجالس والابواب ماحصل احد ورجع
اديم : هاه وش لقيت
مطلق : م.. سكت اول ما انضرب الباب وانفتح وصوت ركض وطللع مطلق يركض
اما حسين وهايف كانوا كل واحد متوزي ويضحك مر الوقت وانهبل مطلق اللي كل شوي يطلع يركض على الضرب واديم انهبلت تصيح
وعند هايف وهو متوزي لف وشاف امه مغسله جلال الصلاة حقها اللي كان ابيض كله ركض يضحك : الله عليتس يمه دايما فازعه
اخذه ولبسه وهو يدور الراس ونشب فيه
ومطلق اللي طلع وهو يشوف ظل ورا البيت وشي ابيض يطلع ويدخل ( وهو هايف اللي انكتم وهو يدور الراس )
ركض مطلق وهو يبي يتأكد جني ولا انسي وكل ماقرب سمع تمتمه سريعه ولف بسرعه وهو ياخذ عصا وضربه على اخر راسه وطاح هايف
ومطلق يسحب الجلال عنه وفز من صراخ حسين اللي جاء يركض : وش سوووويت ابك هذا هايف
مطلق : هااااه !؟ وش جابكم هنا يا دلوخ
حسين وهو يدور راس هايف وطلعه وهايف للي اغمي عليه من الضربه
مطلق : صاحي !!!
حسين : لا لايكون ذبحته
مطلق : لا ارفعه ارفعه
حسين : وين نوديه ابوي بيطلع
لفوا على صوت ابوهم سحبوه لغرفه مطلق اللي كانت ظلام
مطلق : ادييم قومي ادخلي
ركضت اديم برعب وهي تدخل جوا وحسين يناظر مع الباب : ابوي يدورنا يا مطلق
مطلق: افتح النور
فتحوا النور وهم يصحون هايف اللي ما صحى
ابو زيد : هايييف حسييييين اطلع انت وياه اطلع
مطلق : اطلع لابوي
حسين : بيقول وش دخلك هنا
مطلق وخر بخوف : الخبل هذا عيا يصحى
حسين : وش نسوي
ابو زيدد دق الباب : مطلللق
مطلق تورط ووقف وفتح الباب اول ما احتد صوت ابوه : هلا يبه
ابو زيد : وين الملاعين ! عندك ؟
مطلق : ايه يبه
ابو زيد : نادهم والله والله لربيهم
مطلق فتح الباب وهو يأشر على هايف اللي للحين بمحله : هذا هم
فز ابو زيد : ابك اخوك علامه
مطلق : سمعت صوت وطلعت احسبه حرامي وضربته
ابو زيد رمى عصاه وهو يسحب هايف يصحيه
ولف وهو يضرب حسين : انت وينك ورا ما تكلمت
اديم اللي كانت مصدومه وهي تسمع الكلام وماهي مستوعبه ان هايف هو اللي هبل بهم
بعد خمس دقايق صحى هايف بس عجز يفتح عيونه وهو يدري لو فتح عيونه بيلعن خيره ابوه
ابو زيد: وش ذا اللي لابسه
هايف كان متمدد بينهم وهو للحين عليه الجلال
حسين غمض : كان بيروع مطلق
ابو زيد: الله لا يعطيك عافيه انت وياه
هايف كان يحاول يصمل انه ما يتحرك وهو متاكد ان ابوه بيكفخه وكمل انه مغمى عليه ولكن ابو زيد ضرب حسين بيده وطاح حسين على اصبع هايف المكسور
ولا شعوريا صرخ هايف
كلهم لفوا على هايف اللي اول ما حس انه انكشف فز بينحاش بس تعثر بالجلال وطاح ومسكه ابو زيد اللي طاح فيه تكفيخ وهو يسحبه من شعره: انا عجزت فيك ياملعون الصييير ما تعقل انت ما تفهم
وهايف اللي يحاول يتفكك ومطلق فزع مع هايف يفكه من ابوه بس اول ما وخره هبده بكل قوته: انت خبل لو اني ضربتك وذبحتك وش بنسوي
هايف مايمديه يرد الا حذفه ابوه بالعصا: ليتك ذابحه وفاكني من هباله انا ما اقول اوقف وش خلاك تنقز على اخوك هاه
هايف : امزح معه يبه
ابو زيد : امش امش قدامي انت ما انت بعاقل ابد لين اوريك شغلك
لف على حسين وهو يدفه على هايف : امش معه
اخذهم ابو زيد وهى يوقف هايف وحسين دخله بعد ماكفخه هو بعد
ولف على مطلق : ادخل انت ونم يا ويلك اشوفك معطيه شي ولا حتى مكلمه
مطلق :ابشر
دخل ابو زيد واخذ مطلق النعال يرميه على هايف اللي مع كل اللي صار شاق الضحكه : مصعنا عقلك
مطلق : هييين والله لتنرد لك يا كلب
ابو زيد : خشششش يا مطلق
دخل مطلق اللي راح يطلع اديم : تعالي تعالي
اديم : وش ذا الاكشن
مطلق ضحك : مدري ليه ما طرا لي انه هايف من البدايه
اديم : اول مره يسويها
مطلق : اول مره يسويها وانتي فيه لكن ياما سواها فيني ولا تاب
اديم ضحكت: والله انه مجنون
................••............
عشر دقايق والكل استكن وهايف واقف بمكانه رافع رجله ويدينه بس فجاءه تذكر كل اللي صار وانفجر يضحك وبكل صوته وضحكت هايف كارثه كلٍ يدري بها
طلع ابو زيد على ضحكه وهو مرتفع ضغطه منه وعجز فيه عيا يسكت وطبعا هايف لا تورط ولا احد قاله اسكت معاد يعرف يسكت
سحبه ابو زيد معه لغرفته يجبره على النوم غصب معه
وانسدح ابو زيد وهو يسدح هايف بغصب جنبه وهايف كاتم ضحكته وام زيد صحت تناظر بصدمه وهي تشوف هايف جنب ابوه وابو زيد حاط رجله على رجول هايفف عشان اذا تحرك يحس به وعصاته على صدر هايف اللي بالقوه سكت
................••............
عند مطلق
اللي طلع يركض للمقلط وهو يدق على شباك فتح حسين : وش فيك
مطلق : ابوي وين ودا هايف
حسين : اخذه ينومه عنده
طارت عيون مطلق وانفجر يضحك:هههههههههههههههههههه� �هههههههههههههههههههههههه ههههههههههه هذا التعذيييب ولا بلاش
حسين : والله عرف كيف يكتم نفسه بس روح لا يجي يحشرني معه
مطلق رجع وهو ما زال يضحك وهو بس يتخيل موقف هايف
اديم : وش سوا فيه
مطلق : اخذه ينام عنده
اديم طارت عيونه: في ذمتك
مطلق : ما يعقل ذا الولد ابد ما يعقل
اديم ضحكت من هايف اللي رئيس كل الاحداث بالبيت انسدحت بتعب: صح انه هبل بي بس والله يجلس كذا يضحك ويوسع صدورنا احسن من ضيقه
مطلق سكت وهو مايحب الهبال بس من هايف غير اللي بس بضحكته يغير جوهم : اي والله انتس صدقتي اهم شي يضحك ما نبي شي غيره
................••............
في غرفة ابو زيد
عند هايف كان يحاول انه ينام لان خلاص ابوه بيذبحه وماصدق غفى الا رفسه ابوه يصحيه لصلاة الفجر
وجلس يناظر بتعب وجلست ام زيد: يا وليدي انت خبل ولا وش في راسك ما تعرف ابوك انت
هايف ابتسم وهو يبوس راسها وبضحك: ادري خربت عليتس بس وليدكم لازم تحتووني
ام زيد ضربته وفز هايف يضحك وراح هو يتوضى
ابو زيد : انت بتذبحني لا تضحك تسمع لا تضحك
جاء محسن يوضي وهو يناظر بضيق: وش بلاكم تهاوشون من الصبح
هايف: ولا شي
جو حسين ومطلق وهم بعد يضحكون من شكل هايف
وطلعوا يصلون وهم راجعين هالمره مطلق عجز يمسك نفسه لا يضحك على هواش ابوه وصف معه حسين ومحسن واخيرا استسلم ابو زيد لهايف وضحكه وهو يصد ببتسامه
ودخلوا كلهم وراح محسن ينام ومطلق الا هايف وحسين مسكهم ابو زيد عنده وهم دايخين من النوم
ابو زيد: امش انت شب النار يلا
هايف: مقدر اشيل الحطب يبه اصبعي يعورني
ابو زيد : عدها عشان اكسر الباقيات
راح هايف يشب النار قبل لا ينقلب التكفيخ جدي
ابو زيد : حسينوه رح جب القهوه والشاهي ولا تبيني اسويها
حسين: محشوم يبه
راح يجيبها وبعد ما كملوا كل شي
لف ابو زيد: رح ياهايف شف وين ابطى ابو نجد ما جاء للقهوه
هايف : ابشر
راح هايف لبيت ابو نجد وحسين راح يصحي سلمى تصلح فطور ................••............
في بيت ابو نجد
بعد الصلاة اتجهه ابو نجد لغرفة نجد كأخر سؤال وتأكيد
دخل وهو يشوفها جالسه بجلالها وهي تدعي وفزت برعب على صوت ابوها
ابو نجد: بسم لله عليتس يبه
نجد : خوفتني يبه
ابو نجد : لا تخافين وتقبل الله
نجد: منا ومنك
ابو نجد : يبه يا نجد فكرتي زين واستخرتي ! يا يبه مابيتس تجبرين نفستس على شي
نجد فهمت وقالت وهي تنزل راسها:ايه يبه فكرت وانا موافقه
ابو نجد وقف وهو يبوس راسها: الله يكتب لتس الخير وانا ابوتس واعرفي زين اني هالمره عطيتس الرجال اللي مستعد اني أمن له على روحي وتدرين بهايف من وانتي صغيره ما خلاتس
ابتسمت نجد بحب : ادري يبه
طلع وترك نجد اللي قالت للخادمه تفتح الشباك اللي دخل منه الهوى البارد على ريحة نار ابو زيد وهايف اللي يدق الباب وابتسمت بكل قلبها وهي تسمعه يسلم على ابوها : صباح الخير ياعمي ، ابوي يقول ابطيت ألحق معه القهوه والفطور
ابو نجد : هذاني جايك وانا عمك
دخل ابو نجد ياخذ اغراضه ورفع هايف راسه شاف الشباك مفتوح وابتسم وهو يتذكر منظرها امس ورجع وهو يغني
(يا نسيم الصَّباح سلِّم على باهي الخد
..نبهه من منامه قلَّه ..إنِّي على وعده بحبُّه مقيَّد ..حتَّى يوم القيامه )
رجع يضحك واختفت ابتسامته يوم قال ابو زيد : ادخل ادخل لا تسلم عليك العصاء
دخل هايف باحراج وهو يشوف سلمى تحط العود ببيت الشعر وتضحك عليه وحسين يجهز القهوه
وراح هايف يفتح اطراف البيت وهو مبتسم وابو زيد جالس قريب النار وهو معروف انه كل صبح اذا جلس قريب النار يغني بصوته بس على طريقة الشياب الاولين وبصوت شايب يشيل الهجيني
( يا ليت وقتٍ مضى ينعاد ..أيــــــــــــامنا مع لياليها)
وكانت افضل فقره في الصباح وينتظرونها عيال ابو زيد عشام فعلا يكون ( الصباح صباح خير بصوت ابوهم)
..................••............
في الخبر
عند مشاري اللي من صحى الصبح راح لابوه ودخل وهو يشرح له الموضوع
ابو مشاري : انت وش يجبرك تاخذ من بنات الديره وبعدين وش فيهم بنات الخبر وعندك الرياض ليه رايح لديره
مشاري : يا يبه هاذي البنت اللي ابيها ولايفرق معي اذا كانت في ديره ولا مدينه كل اللي ابيك تسويه تجي معي وتخطب رسمي واذا ربي كتب نصيب تكون حاظر في ملكتي
ابو مشاري : لا تتكلم معي بهالطريقه الغير محترمه وبعدين انت تدري مقدر اترك شغلي بالخبر عشان انزل لديره واخطب لك
مشاري : انت ابووي اذا ماخطبت لي من ببخطب ؟
ابو مشاري :خذ الشايب اللي انت تراعيه اكثر من ابوك
مشاري :من غير ما تقول عمي ابو فرج ماقصر معي بس الناس يطلبون ابوي
ابو مشاري : لا تقلق راحتي يا مشاري
مشاري : لا معليش يبه بقلق راحتك شوي يبه انا اطلب منك طلبي الاول والاخير وبعدها صدقني ما بقلق راحتك ابد ابيك تسوي لي شي واحد بس وبعدها ما بطلبك شي ابد
ابو مشاري : كم يبي لك وقت
مشاري : يومين
ابو مشاري : اشوف اشوف
طلع مشاري ماهو واثق في ابوه كثير
وجاء الحين دور امه اللي مايدري تستقبله ولا ما تستقبله .
.................••............
في بيت ابو زيد
بعد الفطور وبعد ما مطلق وحسين راحوا العزبه ومحسن المحل بدا هايف يمل وتوه يحس بوجع الضربه وينعس كان 90٪ هايف من هد حيله ونايم روحياً ولا يسمع ولا سالفة من سوالف ابوه وابو نجد وهو متكي بجنب النار
ابو نجد : وش بلاه هايف
ابو زيد: بلاه الخبال وانا ولد ابوي
ابو نجد : علامه!
ابو زيد : طير عقله اخوه امس وبغى يذبح نفسه ورفع ضغطي
ضحك ابو نجد وهو يسمع ابو زيد يقص عليه اللي صار
ابو نجد : ودك انفضه لك
ابو زيد: ودي
ابو نجد : اجل اسمع ... ورفع صوته يقول : وابشرك يا ابو زيد اني عطيت نجد هايف وفي الوقت اللي يناسبكم جيبوا الشيخ وتعالوا ملكوا
وفعلا ضرب الكلام بصدر هايف اللي ماسمع شي الا هالجمله وانتفض وهو مفتح عيونه على الاخر :وشو وش قلت ياعمي
ابو زيد وهو يخفي ابتسامته: وش بلاك يا ولد
هايف: لا بس سمعت عمي يقول شي
ابو زيد: يسولف ولا تبيه يسكت خلك عند نارك بس
ابو نجد ابتسم وهو يشوف ابو زيد يشر له انهم بيلعبون بأعصاب هايف شوي : شكلك وانت تنعس تحلم يا هايف
هايف رجع يجلس بخيبه وهو ما استنكر لانه دايماً يحلم بنجد : شكله
ورجع هايف يتكي وهو روحه ذايبه نوم ورجع من جديد يسمع ابوه يقول بصوت واطي : تقول انكم وافقتوا على هايف
هايف رجع يعتدل : يبه وش تقولون انتم
ابو زيد يمثل الغضب: وش رايك تحقق معنا
هايف: لا يبه بس اسمعكم تسولفون بموضوع يخصني !
ابو نجد بضحك: ابو صيته يخصك!
هايف حولت عيونه من الصدمه ورجع يجلس ( لا حول معقوله انا انهبلت الا والله انهبلت حسبي عليك يا مطلق ضربة راسي وطيرت عقلي وانا للحين ما اعرست )
صد ابو نجد بضحك وقال ابو زيد : اجل يا ابو نجد دام بنتك وافقت على ولدنا بكره ولا بعد نبي نكتب الكتاب
هايف هالمره مسك راسه وهو متوقع انه من كثر ماهو شايل هم قام يوسوس لان ابوه مستحيل يطقطق عليه كذا وابو نجد بعد
ابو زيد ضحك وهو يقول : تعال تعال باقي ما انهبلت
هايف رفع راسه بقوه : تكلمني يبه
ابو نجد : ايه يكلمك تعال يا نسيبي
هايف توه الحين صدق يحس بدوخه وجلس وهو يحاول يتسوعب
لكن فز على صوت ابوه : بتجي ولا نقول ولدنا ما يبي
فز هايف : لا والله الا ابي
راح لهم هايف وهو يضحك وجلس وهو يسمع ابو نجد يضحك على اصبعه: اجل اول تضحياتك اصبعك بنخصمها من المهر عشانك
هايف ضحك وهو يبوس راس ابو نجد وفي صوته رجفه: والله اني كلي فدا مب بس اصبعي
ابو زيد : ماش خفيف وانا ابوك مافيك طب
ضحك هايف وهو يبوس راسه ابوه ويده وفز بفرح
ابو زيد: وين وين
هايف :ببشر امي
ابو نجد ضحك: اركض اركض
راح هايف مسرع يدور امه وهو يحس خطواته من الفرحه تتفاوت وعجز يمشي
ووجهه احمر وخنقته عبرة الفرحه : ييييا ييييييممه
فزت ام زيد اللي كانت نايمه: يا ولدي تبي تذبحني كم مره اقول ناد زين
هايف جلس وهو يمسح عيونه بفرح: ابشرتس يمه
ام زيد : وشو يمه
هايف اخذ نفس وعيونه تلمع : تو عمي ابو نجد يقول ان نجد وافقت
ام زيد : والله والله
هايف : ايه ايه
ركضت سلمى وهي تقول : وش وش
هايف : وافقوا
صرخت سلمى بفرح وام زيد اللي خمت هايف وهي تزغرط بفرح وهايف اللي اكتضت مشاعره بصدره ويحس برجفه شلت اطرافه هو ثباته الوحيد على الارض انه في حضن امه والا بيغمى عليه
حسين دخل وهو ينزل اغراض العزبه :وش بلاكم
سلمى : ابشرك مّن الله على هايف وبيعرس
حسين: في ذمتس
سلمى: اي والله
حسين اتجه لهايف يحضنه وهو يضحك لو دارين منومينك بحضن ابوي من مبطي
ضحك هايف وهو يبعد : ماعاد ابي حضن احد ياخي
ام زيد: افا يالجحود
ضحك حسين وهو يحضن امه: خليتس منه يمه واحمدي ربتس بيفكتس ربي من اخبل عيالتس
ام زيد: بسم الله عليهم مهبول تفاول على اخوانك
حسين: ماني بفاول بس خلاص هايف الخبل بيعرس وسلمى الخبله بعد بتفارق واعيش انا وياتس عيشه هنيه
ام زيد لفت تناظره : هاه من قالك سلمى بتعرس
حسين : ايييه يمه بتعرس
هايف : والله انا اللي ببتلش مالي فكه منها
سلمى اللي خربوا وناستها وهي ماصدقت تنسى: ليتك تسكت انت وياه
مطلق دخل وهو يضحك: اوووه هايف افا يوصلك مثل هالخبر الزين ولا تجي تسلم علي ولا تعلمني
تقدم هايف لمطلق وهو يضحك وهو يحضنه بفرح: توني بشرت امي
مطلق : مبرووك مبرروك
الكل: مبروك
هايف: الله يبارك فيكم
ام زيد: ومتى الملكه يمه
هايف: مدري يمه
سكتوا على صوت عصاء ابوهم اللي جاء
ولف ابو زيد يناظر هايف اللي يحس انه مرتبش : ولد وش بلاك بتطير اركد واثقل الرجال مايصير خفيف الثقل صنعه
هايف : ابشر
مطلق بهمس لهايف : ابوي من امس يمسح بك الارض تمسيييح ههههههههههههههه
هايف بنفس الهمس : الله فوق لكن معذور ما مصع قلبه الحب ولا نفضه ولا يعرف ان الثقل مب بيدي
ابو زيد .: ارفع صوتك وانت تكلم انت وياه وش عندكم تساسرون
هايف: ولا شي
ابو زيد لف على ام زيد : زهبي عمرتس يا ام زيد عشان تروحين السوق وتخلصين امورتس
ام زيد: ابشر بس متى الملكه
ابو زيد: بكره ولكن ماهي كبيره عشاء بينا وبين ابو نجد وكتب كتاب وخلصنا
هايف : ليه ماهي كبيره يبه !؟
ابو زيد: ما يبي ابو نجد يقول عائليه افضل
هايف كان وده يفرح بس قال مو مشكله المهم يرتبط اسمي بأسم نجد الباقي هييين
ابو زيد: من العصر يا هايف تاخذ امك واختك وانزلوا وشوفوا وش تبون
هايف : ابشر
ابو زيد : حسين انت خلك والم نبي نطلع للعزبه بس بعد الغداء
حسين : ابشر
وجلسوا وهم مستانسين وابو زيد يكلم زيد وابو فايز ومؤيد يجون بكره
وبعد هدوء كانت سلمى جالسه بين هايف ومطلق وحسين يعلمها وش صار امس في هايف وهي بدورها تطقطق عليه
وجاء ابو زيد وهو يقول : ام زيد سلمى وينكم
هايف دق سلمى بضحك: جاتس الموت
سلمى بلعت ريقها بخرشه: وخر يرحم امك
مطلق : وش فيه
حسين : ابشرك امس طلع فيها حياء وبغت توفى يوم قلنا لها عن الخطبه
مطلق طارت عيونه بضحك: احلىىى وين اللي تبي لها واحد تشيل حزامه وين اللي بتهج عنا
سلمى نزلت وهي تقوول بشويش : هي صح انا مابي الا فرقاكم بس شسوي تعرفوني حياويه
رفسها هايف بضحك: مقطعتس الحياء مقطعتس
ام زيد:بنت امشي ابوتس ينادي
راحت سلمى ولف حسين على مطلق : وينها ام البس مالها حس اليوم
هايف ومطلق : ام البس!؟
هايف : ايييه صح اديم وينها
مطلق تذكر وسحب عقاله : اديم هاااه ! زين انك ذكرتني ياكلب
هايف: بسم لله علامك
مطلق : ابد ما سويت شي انت ما تخاف الله
هايف: وش فييييييه
مطلق : امس توني اتذكر اكفخك ، اول شي مروعني ومروع اديم المسكينه وثاني شي لو اني يوم ضربتك مت وش نسوي حزتها هاه وثالث شي مالك نيه تعقل
انفجر هايف يضحك: يممممه منك كل بتقنعني خايف علي
حسين: وااااضحه وصريحه كله عشان اديموه متروعه
مطلق : اص انت لا اكفخك
حسين : والله
وفي لحظات انقلب المجلس مطارحه ومصارعه
................••............
في غرفة ابو زيد
وعند سلمى كانت جالسه جنب امها وهي تسمع ابوها يقول : اسمعن زين امس خطب مني خوي هايف مشاري وطلب يد سلمى والرجال انا اشوفه كفو وهايف يعرفه زين ويمدحه وهو ماقصر مع هايف ابد ولا معنا وفزعاته واضحه وبينه ومقتدر وربي معطيه ومحافظ على صلاته واللي ابيه الحين الراي
ام زيد : ان كنت تشوفه رجال مالنا كلمهه بعد كلامك
ابو زيد : وانتي يا ام لسان ولا غدى لسانتس الحين
سلمى وهي تحس بحر وبرد وكتمه وكل شي : الللي تشوفه يبه
ابو زيد: اجل على بركة الله
ضحكت ام زيد بفرح وفزت سلمى وطلعت لكن لقت قدامها معركه وقفها ابو زيد بصوته : وجعٍ يوجعك انت وياه
تفرقوا العيال بسرعه عند بعض وهم اللي انقطع زراره وللي شوشته انتفشت وحالتهم حاله الوحيد الثابت هو مطلق اللي ما اخترب فيه شي
ابو زيد : عجيب والله انا اربي عيال ولا ثيران
طلع وهو يستغفر وهم ساكتين وقال حسين بضيق: يمممه مطلق قطع زراري
مطلق : عشان معاد تلقف
لفوا كلهم على المطبخ وشافوا سلمى ترتب بهدوء
وضحك هايف : يا مكملها بالعقل يالله
حسين: عزلله صدقوا يوم قالوا زوجوها وتعقل
مطلق : سلمىووه هاه ! مستانسه الحين
ام زيد : اص انت وياه اص وخروا عن بنتي
هايف تخصر وهو يضحك: لله توها صارت بنتس ومن اللي كل يوم نفرقهم من التكفيخ
ام زيد : لمصلحتها
مطلق بضحك: ايييه مثل ابوي يوم حجرك تحت رجله لمصلحتك
هايف : ياااااا خف دممك
حسين بضحك: يا شين الثقيل اذا بيخفف دمه
مطلق ناظرهم بطرف عين واشغله دخول اديم : سلام
هايف ضحك :ايييه ياشين الثقيل اذا ارقل ( يعني صار خفيف)
مطلق هبده وراح هايف يضحك وهو ماسك كتفه بألم: وعليكم السلام يا مروعه
اديم :عز الله مانت بناجي من الدعاء اللي جاك حسبي لله عليك احد يسوي اللي تسويه
هايف: والله اخبر مطلق على كثر ما سويت فيه ما طق خبر لكن شكرا لتس لانتس زبطتي المقلب
مطلق : يا رجال انت منتهي والله يا نويصر ما يسوي سواتك
هايف ضحك: هههههههههههههههههههه ماعليه الحركه بركه
حسين توه تذكر وانفجر يضحك : يووووه مطلق تذكر وجهك يوم فتحت الباب عن ابوي
مطلق ضحك ولف هايف وهو يضرب حسين : وانت ياثور ضاقت عليك تطيح الا على اصبعي المكسور
حسين ضحك: مانيب اللي كسرته والله
ام زيد: يا هايف اعقل يا حبيبي ترا اخر شي بتموت من ورا هالمقالب
هايف جلس وهو يضحك: ابشرتس خلاص من الحين ماعاد اني بنايم عندكم حتى
مطلق : اخس يالخسيس وش ذا الجحده
حسين: وصخ وصخ
اديم راحت لسلمى مستغربه من هدؤها: وش فيتس مريضه!؟
سلمى بهمس : اي والله مريضه بس اصبري بعلمتس لكن لا يشوفوني اخوان الفلس
اديم : لييه
سلمى : وينهم
اديم : فالصاله
سلمى : اجل اسمعي تخيلي تعرفين مشاري
اديم : اييه
سلمى: يخطبني من ابوي وابوي موافق
شهقت اديم : في ذمتس
سلمى: ايه بس قصري صوتس ترا شووني من اليوم شوي
ضحكت اديم بفرح وهي تنط عليها تحضنها : وانتي موافقه
سلمى: والله كلهم يمدحونه وانا معرفه بس اذكر كيف فزع مع هايف وهذا يكفي
اديم دقتها بضحك: يا لبييييييه بتعرسين يا سلموه بس مابيتس تروحين عني
سلمى: وانا بعد طلعت كذابه مقدر افارق اخواني
اديم : ههههههههههههههههه من اللي كل صبح تقول وين اللي يفكني منكم
سلمى: والله اني خرطي
اديم ابتسمت وهي تشوف مطلق داخل يأشر لها تسكت: ايه يعني طلعتي تحبينهم
سلمى مادرت ان مطلق جاء: خبله انتي اكيد احبهم اخواني ذولي يعني انتي ما تحبين فايز
اديم : اكيد احبه
سلمى: خلاص
اديم ضحكت وهي تشوف مطلق يقول : ألحقوا يا عيال الاعترافات هنا قويه
سلمى لفت بإحراج: يالليييل دروا الحين وش يفكني .
ضحك مطلق وهو يشوف هايف اللي جاء يضحك وهو يقول : افا بس وحنا نحبتس بعد يالخبله
مايمدي سلمى تعترض الا خمها هايف وهو يدور بها
وحسين يصفق ويغني بضحك ( اللعبي جعل السعد فالتس اللعبي جعل السعد فالتس )
صفت ام زيد معه وهي تصفق وتضحك وهايف قلب اللف رقص ويستهبل على سلمى اللي ثانيتين استحت وبعد انهبلت معهم
.................••............
في الطرف الثاني
جاء ابو نجد اللي قالهم ان بكره الملكه
وقامت ام نجد بغضب تجهز وهي ما تبي ذا الزواج مب عشان شي عشان نجد ما تتزوج وهي عمياء
اما نجد كانت في قمة وناستها وهي ودها لو تشوف هايف الحين لو تشوف حالة ابو زيد
لكن كل شي يهون قدام انها بكره بينتهي هالعذاب وتجتمع مع هايف
↚
في الخبر عند ابو فرج
جاء مشاري بعد ماطلع من عند امه وزي ماهو متوقع قالت ما تقدري تجي
جلس مشاري عند ام فرج وابو فرج بضيق
ابو فرج: ولا عليك دام ابوك وافق خلاص هانت
مشاري : يا عمي الله يهديك وش اللي هانت وش بيقولون الناس امه ماتبي تحضر خطبته
ابو فرج: وش بيدك ياولدي ماتقدر تغصبهم
ام فرج: ولا عليك ها مانك تقول اني امك خلاص اروح معك واخطبها لك واشوف هاللي راضي عليها ربي يوم انها بتزوج مشاري
ابتسم مشاري لام فرج: وللله اني ما اطلع من جزاكم
ام فرج؛ ماعليك يا وليدي بس اضحك انت وهونها وتهون
لف مشاري على صوت جواله وابتسم: حتى انها هانت
وقف وهو يرد : هلا هلا بهايف
هايف: هلا بنسيبنا
مشاري وقفت مشاعره على هالكلمه :يعني
هايف ضحك: يعني زوج اختي ولا لها معنا ثاني
مشاري : هايف تراني صاير دلخ اشرح زين
هايف : ابد كلمت ابوي وعلمته كل شي من الالف للياء وتعرف ان شهادتي عند ابوي قويه
مشاري ضحك: واضح يا ابو شهاده الله من الخرطي
هايف : اي والله خرطي المهم بعد مناقشات قال ابوي اجل معاد يحتاج تجيب ابوك وتخطبون مره ثانيه بس جب ابوك وملك والله يوفقك
مشاري اللي طاح من فوق قلبه هم: في ذمتك
هايف : والله يعني الحين انت خلاص نسيب رسمي
مشاري: والله اني اختبصت مدري وش اقول
هايف: ولا تقول ولا شي انت يا مشاري تنشرى بالذهب
مشاري : الله يسعدك يا هايف
هايف: علمني وش صار مع ابوك
مشاري : كلمته ويقول خير وامي طبعا ما تقدر
هايف : ما عليك ابد تعال وازهل
مشاري : انت وش صار عليك
هايف : اييييه اني داق ببشرك بشايري اليوم واجد
مشاري : قول يا وجه السعد
هايف ضحك: ابشرك خلاص بكره بكره بالضبط ونجد تنكتب زوجة هايف بن عبدلله بن زيد
مشاري ابتسم بفرح: يااااااا جعلها اول الخير يا اخوك والله يتمم لك على خير لين نشوف عيال هايف بن عبدلله بن زيد
هايف: امين يارب امين
مشاري: ايه وعطني اخبارك
هايف :ايييه ماعلمتك
مشاري : وشو
هايف: تخيل وليد جانا الديره
مشاري اختفت ابتسامه : لا تقول
هايف بدا يشرح له الموقف وهو دايخ من ذيك الذكرى
................••...........
. في بيت ابو زيد
سلمى اللي بعد حالات الهبال المضحكه راحت تكتب اغراض امها اللي تبيها في ورقه
ومطلق اللي كان جالس قدام بيت البسه وهو يحط لها الاكل لف على يدين اديم على كتفه ابتسم : وينتس عنها المسكينه ذبحها الجوع
اديم : للحين ماقدرت اجيها اخاف والله
مطلق : ماينفع كذا لازم تعودين
رفعها مطلق يحطها بحضن اديم اللي كانت جامده وهي مغمضه ومطلق يضحك عليها وبعد فتره تعودت اديم انها تمسكها
اديم : لو تشوف امي كيف عصبت يوم درت عن البسه !؟
مطلق اخذ نفس من طاري امها:ليه!؟
اديم : امي ما تحب الحيوانات ! لكن اخر شي اقتنعت لكن بعد شروط
مطلق هز راسه بهدوء : ماعليه
اديم حست انه في كل مره تجيب طاري امها يسكت ما يرد على شي : فيك شي
مطلق : لا ، المهم بتروحين معهم السوق ولا
اديم ابتسم وهي توخر البسه : بروح بس مابروح الا معك
مطلق ابتسم : ابشري ابشري نوديتس ليه ما نوديتس
سلمى جت : يا سلام سلم وانت نقعتوا عند هالبسه ولا جازت لكم جلسه الحوش الخلفي
مطلق : يا متى تزوجين ونفتك
سلمى: تحسبني بروح واخليكم لا والله معصي ببني غرفه جنبكم ونسكن فيها
مطلق : عشان اهدها على راستس
سلمى : هين هين المهم قوموا للقهوه
وقفت اديم ومد مطلق يده لها تقومه معها
سلمى: خييير يالحبيب تحسب انك خفيف لا تكسر ظهرها
مطلق : الثقل ثقل القلوب يا ام لسان
اديم ضحكت بعد ما وقفت مطلق تبي تقهر سلمى: ولا فيه اخف منك على قلبي
سلمى: وووووع ياربي
مطلق ضحك وهو يحضن اديم لعانه في سلمى بس جت ام زيد ووخر مطلق
سلمى: ايييييه تربى انت وياها
ام زيد : مطلق ابوك يبيك
مطلق : يلا يلا
................••............
العصر
رجع هايف واخذ امه وطلعوا يجهزون
وهايف منمصع قلبه من الفرح وكل شي وده ياخذه
ام زيد : يا هايف خل ذا وش تبي به
هايف: مع الاغراض يمه
ام زيد : انت خبل وانا امك احد يعطي عروس في ملكتها شريط !؟
هايف نسى وغلط : يمه هالشريط اكثر شي تحبه نجد
ام زيد : وشوو!؟؟؟
هايف تورط: امزح امزح
ام زيد اخذته وهي تحطه بغضب : حطه وامش
بعد عناء خلصت ام زيد بعد ما جلطها هايف بالاشياء اللي ياخذها ورجعوا للبيت
وهالليله عجز هايف ينام من فرحته وهو يدور بالحوش بلحاله رغم انه ما نام من امس بس فرحته طيرت عنه النوم وهو وده يوصل شعوره الليله لاديم طلع من البيت يراقب ويفكر كيف بيوصل لنجد مشاعره اخذ نفس اول ماشاف القمر وضحك ( ياليتس يا نجد تشوفين بس ابيتس تشوفين فرحتي بس )
ناظر يده وهو يشوف الساعه متاخره شوي وهو متأكد نجد اكيد ما نامت .................••............
في بيت ابو نجد
نجد كانت نفس شعور هايف عجزت تحس ودها تصرخ من الفرح ولكن ماتدري كيف تعرف حال هايف فزت وهي تسمع صوت باب ابو زيد
نادت الخادمه وهي تقولها تطل وقالت لها الخادمه ان فيه واحد يمشي برا وبعد ما وصفته تأكدت نجد انه هايف ونزلت نجد للمجلس اللي تحت وهي تقول للخادمه تفتح الشباك وتسكر الباب وتروح بعد ماقالت لها ان هايف جالس عند باب بيتهم
وكان هالشباك نازل يقدر يسمعها هايف وتسمعه
ونجد اللي تدري ان ابوها وامها اذا ناموا خلاص ما بيصحون الا الفجر ..................••............
عند هايف
وهو جالس يدندن ويناظر القمر فز على صوت همس ينادي : هااايف هااايف
فز هايف وهو يدور الصوت وسمعه للمره الثالثه وقال بهمس : نجد !؟
نجد اللي كان بينها وبينه ستاره ابتسمت : ايه
ابتسم هايف بكل قوته وهو يتلفت ماكان في احد بالشارع واغلب البيوت اللي جنبهم مهجوره جلس بمكان يقدر يسمع فيه نجد وتسمعه : يا بعد الدنيا والله اني من اليوم ادور مدري كيف ابي اوصلتس
نجد نزلت راسها بخجل : كنت اسمع صوتك كل صبح بس مدري كيف اقولك وانا وضعي الحين حرج ومايسمح
هايف : افا عليييتس والله وش وضعتس حرج لا حرج ولا شي بس هو القمر كذا مايطلع دايم
ضحكت نجد : الله يجبر بخاطرك اجل انا قمر!؟
هايف ضحك : أنتي قمر من يوم كنتي صغيرة
أنا أذكرتس كنتي حديث الصبايا
وشلون أجل هالحين وأنتي كبيرة
أكيد صرتي تفتنين المرايا .
نجد مدت يدها لقلبها بفرح واخيرا رجعت تسمع هالكلام من هايف ماقدرت ترد وهي تحس بلخبطة مشاعر
حس هايف انها ضاقت وقال : لا تضيقين يا قمراي هانت بكره بس وبتصير زوجتي وحزتها كل ضيق بينقضي
ضحكت نجد بفرح : احس اني بحلم
هايف :والله ولا أنا اصلا مابغيت اصدق
نجد : حمدلله اللي فرحنا بهاليوم وانت بعد ما قصرت اللي سويته مب بسيط
هايف ضحك: اذا ما تعبت عشان حلمي الوحيد ! اذا ما تعبت عشان نجد؟ اتعب عشان من
نجد سكتت وهي تحس هالحب الكبير من هايف لازم تجازيه بحب الدنيا لكن قالت بضيق : هايف ترا مالي حيله بكل اللي صار
هايف اعتدل على ضيق صوتها وانكسارها وهو مايقدر يلف ولا يشوفها : نجد لا تقولين كذا ! انا ادري انتس مستحيل ترضين وادري بعد انهم اجبروتس والا ماكان هاللي ما ينذكر مد يده عليتس وضرتس
نجد : راح بخيره وشره
هايف : اآآه ليتني بس ماسكه والا لطلع عيونه والله
نجد ضحكت: خلاص لا تكدر خاطر بشي راح ، وبعدين زين انك ما مسكته
هايف انقلب صوته :هاه ؟ وش اللي زين اني ما مسكته ولا شفقانه عليه
نجد بضحك:لا وش شفقانه عليه اقصد لو انك ماسكه وانت بذيك الحاله والجنون بتذبحه وحزتها كل شي بيضيع
هايف:عز الله انه يستاهل الذبح ، المهم ما ودي اني اروح ابد لكن الساعه تأخرت واكيد ان ابوي بيصحى يصلي الليل واذا ما لقاني عز الله بينحرني ولا ابوتس يصحى وحزتها بينحرني هو بعد
نجد ضحكت وقال هايف بصوت متقطع وهيمان: ايه اضحكي يا لعنبوها دنيا تزعل نجد
انحرجت وهي تمسح جبينها
هايف: طيب خلاص انتي روحي وروحي بشويش وانتبهي من الدرج ولا تطيحين واذا وصلتي غرفتس افتحي الشباك وسكريه ولا سوي اي يدل انتس وصلتي بخير
نجد : على طاري الطيحه يقول ابوي امس انكسر اصبعك عندنا
ضحك هايف: مب بس اصعبي منكسر عندكم الله يستر لا اموت بس قبل كنت اخاف اموت وانتي ما صرتي زوجتي والحين صرت اخاف اموت من فرح انتس بتصيرين زوجتي
نجد لا شعوريا : يا ويلي! انت من المجنونه اللي تخليك ولا تبيك
هايف اوجعه قلبه من الخقه : مابي مجانين ابيتس انتي
نجد سكتت وهي ودها تخمه من الفرحه
هايف : خلاص خلاص روحي يلا
راح هايف يوقف عند بيتهم ونجد اللي كانت تقريبا حافظه بيتهم وطلعت صح تعثرت بس المهم توصل بخير وتقول لهايف انها وصلت
وبالقوه لين وصلت شباكها وفتحته وسكرته وابتسم هايف وهو يدف الباب بيدخل بس طلع مسكر ولا معه مفتاح
غمض بضيق : يووووه
راح يدور على البيت عشان يطب وطلع يتسلق لين وقف فوق الجدار وشاف ابوه يصلي وطب بسرعه خايف يشوفه ابوه وحزتها وش يفكه اول ما وصل الارض عجز يوقف وهو ياخذ نفس وقف وهو يركض للباب ودخل وهو يتجهه للمقلط جلس وهو يحاول يهدي نفسه وهو ابد ما سوى جهد بس مايدري ليه مب قادر ياخذ نفسه مد يده لقلبه يحاول يهدي دقاته
لكن عجز اختنق ووقف يفتح ازاريره وراح لشباك يفتحه لكن ما فاد اختنق هايف اكثر وبدا قلبه يدق بقوه وراسه يدور لا شعوريااً طلع لصاله وهو يوقف عند الباب بحيث يجيه هوا اكثر لكن ما فاد
فز على صوت امه : هايف وش مصحيك يمه ، وش بلاك من وين جاي ليه يالله تنفس
هايف لف بصوت مخنوق : ماجيت من مكان بس احس بخنقه
ام زيد : بسم لله عليك وش فيك
هايف كان وده يرد بس انفاسه ما تساعده وهو ياخذ انفاسه سريعه
ام زيد: يا ويلي وش يوجعك يمه وش يوجعك
هايف كان يضغط على صدره اللي فجاءه صار يوجعه بشكل كبير : مدري يمه قلبي يوجعني
ابو زيد جاء بعد ما صلى: هايف وش بلاك وش مصحيك
ام زيد : مدري يا ابو زيد مدري
هايف جلس وهو يد على صدره ويد ماسك فيها يد امه
ابو زيد قرب وهو مستغرب : هايف وش اللي يوجعك
هايف بانفاس سريعه : مدري يبه مدري يوجعني صدري
ابو زيد مد يده يحطها على قلب هايف اللي كان يدق بكل قوه وسرعه
ابو زيد : انت مسوي شي !؟ صاير شي
هايف : لا لا
ابو زيد : اطلع اطلع برا اخذ نفس جيبي له مويه
طلع هايف برا وهو جالس على ركبه برجفه وابو زيد مستغرب: انادي مطلق يوديك المستشفى
هايف هز راسه : لا
ام زيد جت وهي تعطيه المويه
وبعد 10 دقايق دخلوا لصاله وهايف بدا يهدى وهو مايدري وش صار له
وهو منسدح على رجل ابوه اللي حاط يده على قلب هايف ويقراء عليه
الحال ان هايف اتعب قلبه كثير، يومين مانامها وغير التفكير والتوتر والقلق والجهد
واستمر هالحال لين بدا هايف يخف وبالقوه وقف يصلي الفجر ونام بتعب
وابو زيد يناظر بحيره : وش بلاه ذا الولد
ام زيد: مدري بسم الله عليه
لفوا على صوت مطلق اللي اذن الفجر وصحى والغريبه ابوه ماصحاهم ولا يسمع لهم صوت وانصدم اول ماشاف بالصاله وهايف للحين على رجل ابوه ونايم وام زيد قدامه
مطلق : يبه فيكم شي علامكم!؟
ابو زيد: مافينا شي وش فيك انت مروع
مطلق: ابد ماجييت تصحيني وخفت فيك شي
ابو زيد:ماشاء الله رجال متزوج وبعد سنين بتصير ابو تبيني اصحيك كل شوي
مطلق صد بتوتر : علامه هايف
ابو زيد: مرتفعه حرارته
مطلق ناظر بشك وهو يدري ابوه مهما سخنوا مايجلس يداريهم كذا لكن فكر انه ( لهايف غلا خاص )
ابو زيد: قم قم قوم حسين وتوضوا يلا بنلحق قبل يقيم
مطلق : ابشر
راح مطلق يصحي حسين اللي صحى وهو مستغرب ان مطلق اللي يصحيه : وابوي وين
مطلق : برا يحتري يلا اخلص
حسين: غريبه ما صحاني
مطلق : امش بنطلع بسرعه مافيه شي
طلعوا متجهين للمسجد وبعد مارجعوا تقدم مطلق : يبه وش فيه هايف اكيد مب مسخن
ابو زيد لف يقول لمطلق اللي صار ومطلق مفجوع
مطلق : لييه وش فيه !؟ ليه ما صحيتوني اخذه للمستشفى
ابو زيد : عيا يروح
سكتوا بذهول ومطلق يتذكر اذا صار شي ممكن يسبب ذا بس ابد مافيه
اما ابو زيد كان في ذهول وكان التفسيير الوحيد اللي صاير مع هايف عند ابو زيد اللي كان توه يحس ان ذا كله ممكن بسبب حب نجد والا فرحته بإجتماعه مع نجد
رجعوا وجلسوا كلهم يراقبون هايف لكن بعد شوي تفرقوا لاشغالهم .................••............
شوي شوي بدا يجي ابو فايز وزيد اما العمه حصه اعتذرت هي ومؤيد لبعد المسافه وقل المدى
والغريب ان هايف للحين نايم ولا صحى بالازعاج اللي صاير والازدحام والناس اللي رايحه جايه
مرت اديم وهي شايله القهوه بس وقفت بإستغراب : سلمى وش بلاه هايف نايم بالصاله اصلا ليه نايم للحين المفروض انه من 7 يصحينا
سلمى وهي معها ثياب هايف : امس تقول امي تعب عليهم وقال ابوي خلوه يرتاح
ريوف : ايه يرتاح بس ما قلنا شي بس مب معقوله الساعه 4 وهو نايم والملكه بعد المغرب وفوق ذا على كثر الازعاج ما صحى
شريفه: خلوه بيصحى ولا يصحيه ابوي
................••............
في بيت ابو نجد
عند نجد كانت جالسه بغرفتها قريب الشباك وهي فرحانه لكن امها ماكانت فرحانه كثيير حتى في تجهيزاتها كانت تراعي انها تسكت الناس وتسوي تجهيز يليق ببنت تاجر الذهب مب عشانها فرحانه في زواج نجد
كانت نجد تعيش تحت اثر ليلة امس بفرح وهي من اللحظه اللي صحت فيها ما غاب صوت هايف عن خيالها ابد وكيف يوصيها على نفسها وحريص عليها
لكن الغريب انها من الصبح تسمع اصوات اخوانه والكل بس صوته ما سمعته .................••............
في بيت ابو زيد
ابو زيد وقف اول ما شك في نوم هايف وهو مب مرتاح من عقب ما صار امس تقدم وهو يدخل الصاله وكان هايف على نومته امس ماتحرك
ومطلق للي كان وده يصحيه بس متردد وهو واقف مع حسين والبنات يناظرون بهدوء
ابو زيد : وش فيكم
مطلق : بنصحي هايف
ابو زيد دقق النظر بتردد قال: قومه
نزل مطلق لمستوى هايف وهو اول مره يخاف انه يصحي احد
مد مطلق يده يهزه : هايف هاااايف هاااايف
ما تحرك هايف ابد ولا صحى رفع راسه مطلق يناظر القلق بعيونهم ورجع ينادي بس ما صحى
لكن هالمره صرخ مطلق برعب :هــــااااااااايــف
شهق هايف اللي فتح عيونه بتعب ( من قوة تعبه مايحس شي وكان غاطس بأحلامه اللي فيها انه تزوج نجد وانتهى )
لكن صحاه صوت مطلق المرتعب :هايف فيك شي
هايف اللي ناظرهم بهدوء لكن تجاوزتهم عيونه وثبتت على الساعه وفز لكن مسكه مطلق: وش فيك
هايف: كم الساعه تأخرنا تأخرنا
ابو زيد: ما تأخرت اركد اركد
مطلق : علمني الحين ! انت بخير ! فيك شي ! يوجعك شي
هايف مد يده لقلبه : لا ما يوجعني شي
حسين : طيب ليه تعبت امس !
هايف : مدري يمكن عشاني ما نمت
ام زيد: لا تتعب نفسك يمه
هايف: ابشري
وقف هايف وهو مستعجل زيد : هايف بشويش على نفسك لا تستعجل كل شي جاهز باقي بس انت تخلص وبعدين هدي لا يرجع قلبك يوجعك
هايف : طيب طيب
وقف هايف اللي ماكأن احد حذره وهو ياخذ ثيابه ايه صح كان يحس بألم بس ما اهتم
طلع وهو ينشف شعره ولف على مطلق اللي دخل وهو يسكر الباب : الحين تبي تعلمني وش صار امس
هايف: ماصار شي
مطلق : هايف لا تستهبل علي
هايف: والله ماصار شي غير اني طلعت امشي برا ويوم رجعت ابوي يصلي والباب مقفل واضطريت اطب ويوم وصلت الارض وانا منتهي
مطلق : هايف اركد اركد تراك بتذبح نفسك
هايف: خلاص ازمه وعدت
دخلت سلمى وشريفه وريوف وام زيد لهايف
ام زيد: هاه امي يوجعك قلبك للحين
هايف وهو يبوس راسها: انا بخير دامتس على راسي
شريفه: لا بخير يمه بخير اليوم خلاص بيطلع من قائمه العزاب
هايف ضحك: ايييه وش ابي اكثر
سلمى : تبخر تبخر وانا اختك تبخر
هايف بعد ما تبخر لف عليها يضحك: انتي بعد تبخري وانا اخوتس تبخري
سلمى لفت بإحراج وطلع هايف متحمس وهو يسلم على عمه وفايز وجلس ولف ابو زيد : هايف اضبط نفسك
هايف ابتسم : من عيوني
فايز بهمس وهو يضحك: لو درينا ان قلبك بيوجعك من الحب من زمان مزوجينك
هايف ضحك: الله ينصرني
ابو زيد : يلا يا عيال اجهزوا اجهزوا
................••............
في غرفة مطلق
عند مطلق اللي بعد ما تطمن على هايف راح لغرفته ودخل وهو يشوف اديم تجهز وابتسم وهو بذا المنظر تذكر اول مره شافها يوم زواجهم واول مره قررت انها تستوطن قلبه
اديم : صحى هايف!؟
مطلق : الظاهر بيصحى هايف وانا باخذ وجع القلب عنه
اديم بفجعه تركت كل شي بيدها : ليييه وش فيك وش يوجعك
مطلق اللي هالمره حب انه يختبر خوف اديم عليه : مدري يوجعني قلبي
اديم ما انتبهت لطيف ابتسامته وهي مفجوعه: من ايش !؟ اصبر اجلس اجلس
مطلق : امسكيني امسكيني
اديم ركضت وهي تسنده وحط مطلق يده من ورا كتفها على اساس يستند عليها وهو بالاساس يحضنها
اديم : وش اعطيك دواء !؟ فيفادول ولا وشو
مطلق : ما يحتاج دواء الدواء انتي
اديم توووها تستوعب ورفعت راسها تناظره: شلون !
مطلق ضحك : ابد اشوف وش كثر تخافين علي
اديم :انا اخاف عليك وانت ما تخاف الله فيني لكن هين والله لو تموت ما اهتم
مطلق : افا ! هذا جزاء اللي يحبتس
اديم لفت ببتسامه عذبه وهي تاخذ نفس : ما يمديني حتى ازعل بس بسألك
مطلق : سمي
اديم : الحين انت صدق كنت كذا لطيف مره يعني قبل اعرفك كنت كذا
مطلق ضحك: والله هذا انا من زمان بس توني اسمع اني لطيف
اديم: دامك كنت كذا ليه كنت ما احبك !
مطلق تكتف : الاجابه الاولى بجاوبها عن مطلق اللي اللي يحبتس بما اني توني دريت اني لطيف منتس هذا يعني اني صرت كذا معتس والاجابه الثانيهه عن مطلق مع الناس وهذا يعني اني اكيد مانيب جايتس وانا ما تزوجتس ولا اعرفتس واقول احبتس
اديم غمضت بقوه بحب : خلاص بس استسلم انا ومدري وش اقول
مطلق ضحك وهو يحتضنها : ولا تقولين شي بس خليني انا اقول وانتي اضحكي
اديم كانت تناظره بهيمان وهي ماهي متصوره كيف كانت في يوم تكرهه رجعت على مطلق اللي شد خشمها بخفه: شبعتي وانتي تناظريني
اديم وخرت بإحراج
مطلق ابتسم : ما اقول لا تناظرين ناظريني جعل مايناظرني غيرتس بس مب الحين لان ابوي ينادي
اديم ضحكت وهي تعطيه ملابسه وراح مطلق يلبس
................••............
اخيرا اخييرا جاء المغرب
والكل راح لبيت ابو نجد والشيخ وصل وبدا هايف يرقع قلبه بس كانت نظرات ابوه عليه وكل شوي يأشر له يركد بس بتهديد
اما نجد اللي كانت جالسه مابين البنات وهي تسمع كلام ام زيد اللي يدخل القلب ولا هي منتظره ابد الا اللحظه اللي بتبصم فيها انها قبلت زواجها من هايف
..................••............
في مجلس ابو نجد
عند هايف بعد ما عطاهم بطاقته وكل شي ما صدق انه يسمع الشيخ يقول لابو نجد : هل تزوج ابنتك نجد بنت مشعل من هايف بن عبدالله
ابو نجد : نعم زوجتها منه
لف الشيخ على هايف : هل تقبل الزواج من نجد
هايف اللي اتسعت ابتسامه وبصوت يرجف : قبلت
يالللله ياششعووره بهالوقت اخذ القلم يوقع وهو خلاص بيموت من الفرحه واخذ ابو نجد الدفتر ودخل وراح لنجد اللي جابتها امها ومسك يدها ابوها وهو يبصمها وبعدها رفع راسه يبوس راسها: الف مبروك يا يبه
نجد: يبارك فيك
شدت نجد على اصبعها بفرح ورجعت وهي تشوف الكل يزغرط والكل اقبل يسلم عليها بفرح
لكن همس في اذنها صوت يضحك ويقول : ياسعد عينه هايف فيتس
ماكانت تدري من بس سلمى رجعت مبتسمه وهي تشوف فرحة نجد واضحه
وطلعوا يسلمون على هايف اللي كان جالس جنب ابو نجد ومبتسم
ابو فايز: ومتى ان شاء الله العرس
هايف لف يناظر ابوه اللي كان متورط يخاف يعجله وما يناسب نجد ويخاف يأخره ويموت هايف عليهم من زود الحب
زيد بهمس: يبه علامك
ابو زيد اخر حل وصله قال: هايف يحدد عرسه
هايف طارت عيونه وضحك بورطه: والله يا يبه لوعلي الحين بس عاد انتم كبارنا
ابو نجد ضحك وقال ابو زيد : 3 اسابيع يا بو نجد
ابو نجد : تم
لف هايف يشد على يد مطلق بفرح ومطلق مبتسم له بفرح
وكان هايف وده يقولهم بدخل لنجد بس يدري لاهي من عاداتهم ولا تقاليدهم واصلا بيكفخونه
................••............
عند الحريم
كانوا مشغلين سماعتهم بفرح واديم تصور وام زيد اللي لبست نجد شبكتها وفتحت يدها وهي تحط الدبله بيدها ببتسامه : الدبله عاد ماهي من اختصاصي يلبستس اياها رجلتس
نجد نزلت راسها ببتسامه وهي تشد عليها وبعدها بدا الرقص مع ذلك سلمى ابد ما خلت في خاطر نجد انها تجلس ما تفرح
ومسكتها هي واديم وهم يرقصون معها وهذا اكثر شي اسعد نجد انهم ماعتبروها عمياء ابد
وجلست نجد بعد تعب وهي تضحك وجلست سلمى جنبها
ونجد للحين ماسكه الدبله بيدها
سلمى بهمس : ادري انتس بعد تحبين هايف مثل مايحبتس وما تبين احد ياخذ مكانه ويلبتس هالخاتم غيره
نجد لفت بخوف : انتي سلمى
سلمى :ايه
نجد سكتت باحراج وقالت سلمى بضحك: لا تخافين ترا كل بيتنا يدري ان هايف يحبتس بس اني انا لحالي ادري انتس بعد تحبينه لاني شفتكم مره من الشباك
نجد شدت يدها بضيق وضحكت سلمى : ادري ان هايف الحين وده بعد انه يلبتس الدبله
نجد : وش تقصدين!؟
سلمى بهمس :اقدر اناديه اذا تبين
نجد بتوتر: وين !
سلمى : سطحكم فيه احد!
نجد: لا
سلمى:اجل نناديه فوق
نجد بخوف: واذا كشفونا
سلمى: علميني كيف بس يرقى فوق ومحد يشوفه
نجد : اصلا الدرج بالطرف لو يرقى محد يدري
سلمى: اجل انتي قولي بتروحين لغرفتس شوي واطلعي وخليتس هناك وانا اجيب هايف واجيتس
انصدمت نجد من سلمى ما توقعتها تساعدها بس سلمى كانت فاهمه زيين حال هايف وودها تسعده وتفرح قلبه بعد هالسنين وتفزع له بما انه خلاص صار زوج نجد رسمي
طلعت نجد وسلمى تخطط كيف تنادي هايف
................••............
عند هايف
كانوا بالمجلس بس اشغله عبود يناديه معه
زيد ضحك: عبود يا ابوك خل المعرس مايبي يخرب برستيجه ويروح معك
ابو زيد : رح شف وش عنده
هايف : لا خله اكيد شايف له قطو ولا شي يبيني اشوفه
طلع هايف اللي ما توقع ابد انه يحصل سلمى عند الباب تنتظره
هايف: هيه وش جابتس ترا مهب بيت ابوي
سلمى: المشكله ماتخلي احد يفزع معك
هايف : وش قصدتس
سلمى: تعال بخدمك خدمة عمرك
مسكته وهي تلفت وقالت: بسرعه أرقى فوق السطح وخلك هناك وانتبه
هايف : لييييييه !؟
سلمى: ارقى يلا
دخل هايف وهو مايدري ليه يرقى وقف يناظر الحوش بإستغراب وينتظر ................••............
اما سلمى
اخذت نجد وطلعوا ونجد ما تدري ليه مرتبكه وليه خايفه مع انه اول لقى بينهم وهي زوجته ولقى بالحلال
سلمى وقفت وهي تهمس : هااايف هايف رقيت
هايف طل وهو للحين ماشاف نجد : ايييه يا خبله وش بلاتس مطلعتني سطح الناس تبين تجيبين كارثه
سلمى: والله انت محد يفزع معك الخايس خايس وانا اختك
هايف : اخلصي يا بنت ترا ابوي اليوم عيونه علي
سلمى اخذت نجد وهي تمسك يدها: خذ امسك
انهبل هايف اول ما شاف نجد سحبت سلمى يده وهي تحط يد نجد فيها
سلمى: امي عيت تلبس نجد الدبله
لف هايف بصدمه: هااه ليه !؟
سلمى ضحك بمياعه: تقول يلبسها رجلها
دق قلب هايف لهالصفه والكلمه لف يناظر نجد وهو يشد على يدها اللي ترتجف وطلعت سلمى
ماعرف هايف وش يقول ماعرف كيف يضبط مشاعره وعبرة الفرحه اللي فجرت صدره
حمد ربه ان نجد ما تشوف عيونه اللي غورقت بس كانت تحس برجفة يده وصوته
نجد كانت منحرجه ومرتبكه فتحت يدها وهي توريه الدبله
وابتسم هايف اللي للحين مانطق معها ولا حرف اخذه وطاح منه بربكه ونزل يرفعه ولكن اول مانزل عيونه تسللت دمعه سريعه دمعة فرح مربكه هزت هايف اللي بسرعه رفع يده يمسحها
مد يده يدخل الخاتم بأصبع نجد لللي هنا بكت لا شعوريا حضنها هايف وهو مايبيها تبكي : لا تبكين يا عيون هايف
نجد : كيف اخفي دموعي في مثل هاليوم اللي انتظرته كثير
هايف ابتسم وهو يغمض بفرح :كيف بنخفي دموعنا دامي ملكتس ، كيف ابين اني عادي دامتس صرتي حلالي
رفع يدها يبوس باطنها لكن اقتحم هاللحظه سلمى اللي جت تركض : هايف يدورونك العشاء جاء والناس استنفرت
ابتعد هايف يمسح عيونه: وين وين
سلمى: شف لك حل ما تقدر تنزل
هايف : وين اروح الحين
نجد : في ماصوره ورا تقدر تطب منها بس انتبه
هايف ابتسم بخفه: والله لو تبين اطب من فوق جبل لطب لعيونتس
سلمى: يااااا لييل مب وقت حبك يالاجودي اخلص ابوي بيعصب
رفع ثوبه هايف وهو ينزل مع الماصوره وسلمى تراقبه لين طب وهو يعدل ثوبه وراح يركض من بعيد وراح للباب الخارجيي
لفت سلمى على نجد ببتسامه : يلا ننزل
نجد : يلا
نزلوا
................••............
عند الرجال
لقوا عبود ما لقوا هايف معه
لف مطلق وهو مستغرب اختفاءات هايف ولا توقع انه بيكون عند نجد
ابو زيد: وين راح ذا الولد
هايف جاء : سلام
ابو زيد: انت وينك انت
هايف تورط :رحت ابي لي فيفادول
ابو زيد : ليه علامك
هايف : بخير بخير بس صداع
ابو نجد : تعال تعال اجلس هنا جنبي
زيد: ايييه بدا الدلع والدلال
ضحك ابو نجد وهو يخبط على كتف هايف اللي كان متوتر من ريحة عطر نجد اللي يدور حوله وهو خايف ان ابو نجد يشمه
اما مطلق كان يراقب ويقيم شكل هايف اللي كثير احيان يبتسم ويسرح ويناظر بيده
وبعد شوي طلعوا ابو زيد واهله وكل واحد اتجهه لفراشه ينام
وهايف اللي جالس ببتسامه وهو يحس انه يعيش احداث بعييده واماني جديده
فز على صوت مطلق: لو تحلف الحين لين تموت ما اصدق تبي تعلمني وش فيه والا اغسل شراعك
هايف ضحك: وش فيه مافيه شي
مطلق : تستهبل انت ،اول شي يوجعك قلبك ! وثاني شي تختفي مدري وين تروح والحين شاق ابتسامه وجالس!؟ تلعب على من انت ؟
هايف لف وهو يتربع : يعني شف انا من زمان ادري ان سلمى فزعه واقدر احط روحي على كفها وآمن لكن اليوم فزعت لي فزعه ماصارت فالتاريخ كله
مطلق : ماشاء الله خبله فزعت لخبل مدري وش النتيجه
هايف : بتجلس تزبد مانيب قايل
مطلق : قل قل
هايف : اسمع اجل شفت يوم عبود ناداني ...وكمل
ومطلق اللي يناظر بطرف عينه : مهبل انتم !صاحين في روسكم مخ !
هايف : ليييه !
مطلق : يعني انا شفت ناس تمون بس مثلكم ماشفت طالعين بيت الناس وراقين سطحهم ومتعاونين على بنتهم وجايبنها لسطح عشان دبله مصاخين انتم
هايف ضحك: هي صح إنا وسيعين وجهه لكن عاد نجد راضيه
مطلق : اااايه يا نجد لازم ترضى المسكينه اذا انت وسلمى متجمعين عليها
هايف: يا اخوي خل كل شي وركز نعمت بشوفتها
مطلق : رغم انها شوفتن من دون علم ابوها ورغم انها مب من عاداتنا بس اهم شي طمنت قلبك اللي بغى يوقف والسبه نجد
هايف : يا جعله فدا والله
ابو زيد : هايف مطلق يلا وين النوم
هايف :ابشر
مطلق سحب اذن هايف: تسمع وش يقول! يقول نوم مب تجلس الحين تبوسم وترفرف لين يجيه قلبك الضعيف ازمه وحزتها تروح لابوي يقرا عليك
ضحك هايف : طيب طيب فكني
افترقوا كل واحد يروح لمكانه لكن رجع هايف يدقق النظر وضحك وهو يقول : فااااايز يا لبى قلبك نوم يلا نووم بعدين حبو بعضكم
فايز اللي كان كالعاده قبل ينام لازم يجلس عشر دقايق مع ريوف ضحك : خلنا حنا ورح انت وراك احلام تحلم بها
ابو زيد: قم انت وياه قم
فزت ريوف اول ماسمعت صوت ابوهاا ودخلت ودخل فايز مع هايف وهم يضحكون
................••............
من بكره الصبح في المقلط
كانوا كل العيال نايمين هناك بإستثناء مطلق
فزوا على صوت ابو زيد يصحيهم وهو يدق بعصاته فالباب
كانوا تقريبا كلهم جالسين بس عشان ابو زيد يشوفهم صحوا
اول ما لف ابو زيد رجعوا كلهم بشكل تلقائي ينسدحون بس هالمره وقفوا برعب اول ما صرخ ابو زيد : وجع يوجعك انت وياه
طلعوا كلهم بنفس الوقت وهاالمره صار ازدحام على الحمام وبالقوه خلصوا
وطلع هايف وهو منتعش اتجهه للمطبخ وهو يقول : صبح اميمتي بالخيييير والرضا والسرور
ام زيد لفت وهي تضحك : هلا امي صبحك الله بالنور
هايف قرب يبوس كتفها: اللللللله وش ذا الفطور يا ام زيد واضح اليوم رايقه
ام زيد : وكيف ما اروق وانت ربي طمن قلبك
هايف : يابعد الدنيا يا ام هايف
سلمى بدقه: صبح اخيتي بالخير يارب واسعدها وفرح قلبها يارب
شريفه بضحك: كل اخياتي يارب
ريوف : امين يارب
هايف :اوف اوف اشوف بناتس زعلانات يمه
ام زيد : صبح عليهن كود يرضن
هايف راح لهم وهو يبوس راس شريفه : صبحتس الله بالخير يا اخيتي الكبيره
وبعدها اتجه لريوف وهو يصبح عليها وبعدها راح لسلمى
سلمى: صبحك الله بالنور
حسين دخل واتجه لامه يبوس راسها: صبحهم بالخير
سلمى: اكتشفت ان حسين الوحييد الذرب اللي يصبح علينا كلنا ما نقول له صبح
حسين: وليته يثمر فيتس
ام زيد: ايييه وليدي ذرب من يومه
حسين : عشاني ذرب ابوي يقول وين الفطور
هايف : جيبيه يمه اوديه
اخذه هايف وطلع وهو يشوف زيد اللي جاي يصبح على امه ومحسن بعد ومطلق
................••............
اما عند نجد
اللي اول ما صحت كانت مبتسمه على احلامها الحلوه
لكن لفت برعب على صوت امها: قومي يا نجد يلا اجهزي بنرجع المدينه
فزت نجد وجلست : ليه !؟
ام نجد : وراتس عرس ولا ناسيه يادوب تجهزين من جديد ولا نسيتي انتس وديتي كل تجهيز زواجتس الاول للجمعيات
نجد : يمه خلاص مابي اتذكر اي شي من الزواج ذاك
ام نجد : معناته فزي اجهزي وراي شغل
نجد : طيب
طلعت امها وابتسمت نجد وهي توقف وهي تتحس لين وصلت عند الشباك فتحته وهي تسمع اصوات اهل الديره والعيال يلعبون وكل شي
لكن االمميز بكل صبح هو ان ريحة نار ابو زيد منتشره بالجو كانت تسمع اصواتهم وهم ينادون
ولفت تجهز وهي مرتاحه
.................••............
في بيت ابو زيد
عند هايف بعد الفطور كان واقف يصب لهم القهوه
ابو زيد: انت بتمشي!
هايف: وين امشي
ابو زيد : للخبر
هايف: لييه !؟
ابو زيد : الحين انت تملكت ولا لا
هايف: ايه
ابو زيد : اجل ضف عفشك ورح شف وظيفتك ولا تبي تنقع لين يفصلونك ازعجتني بتوظف وبتوظف والحين جالس هنا
هايف: ايه بس
ابو زيد: لا بس ولا شي زهب عمرك وتوكل على الله وباقي وراك عرس يبي له شغل
العيال كانوا يضحكون على وجهه هايف المنصدم
ابو زيد: لا تموت ابو نجد بيروح بعد للرياض
ابو فايز : ههههههههههههههههههه بشويش عليه يا ابو زيد
هايف تطمن : ابشر يبه ابشر
زيد: وين بتسكن يا هايف
هايف كان متورط كيف يقول لابوه انه شاري بيت بالخبر بفلوس الاراضي اللي اخذ قرض عشان يشتريها : بالخبر
ابو فايز: اجل يادوب تلحق وتدور بيت وتأثث وتشوف امورك
هايف: بسيطه ان شاء للله
مطلق بهمس : ابوي مايدري عن البيت
هايف: لا اصلا من ذيك الايام ماجاب طاري الاراضي ولا الصحوك مدري ناسي ولا مطنش
مطلق : مدري بس خلك ساكت عشان مايحوسك تعرف ابوي مايحب الدين
هايف : بسيطه
فايز: ليه ما تجي الرياض وتريح راسك عند اهلك واهل البنت
هايف: لا مانيب مخلي عمي ابو فرج والعيال وضحك: وبتلحقني سلمى يصير يا سلام
ابو فايز: الا صدق وش صار مع مشاري يا ابو زيد
ابو زيد : كلمني ابوه ويقول الاسبوع الجاي بيملكون
ابو فايز: الله يوفقهم يارب
الكل : امين
