رواية زاهية الشامة على الخد اليمين الفصل الثاني 2 بقلم جمان بنت عبدالله

جلس عبدالعزيز و بدات تلبسه العدسات: نواف افتح الدرج اللي يم راسي تلقى بخور توني ماخذته من بنت عمي شوفه

تقدم يفتح نواف الدرج و ياخذ البخور ناظر الدفتر اخذه و فتحه و بدا يشوف رسماتها و يقلب بصفحات الدفتر و لمح عباره كاتبتها ( يالله عسى السنين الجايه كلها خير عن السنين الماضيه ) و راسمه تحتها سكر الدفتر بسرعه و رجعه مكانه و نطق : ذا البخور

ابتعدت عن عبدالعزيز بعد ما لبسته العدسات : اي

ناظرت سعود : ما راح يمدي اكوي شماغك رتب شعرك و عادي علشان نلحق

اخذ المشط سعود و بدا يمشط شعره ناظرته شريفه : عطني

عطاها المشط و بدات ترتب شعره و حط البخور على الفحمه نواف : اللي خلص يجي يتبخر

ابتعدت عن سعود و اخذت عبايتها تلبسها و تضبط نقابها و نطق عبدالعزيز: لو شروف مو هنا كان ضعنا

ابتسمت شريفه و هي تعدل نقابها و نطق سعود : اي والله

شريفه سمعت صوت ابوها ينادي : امشوا لا يقلب الدنيا

نواف : امي وينها

بلعت ريقها بضيق شريفه : ما تبي تجي

عبدالعزيز و هو يرتب شماغه : اكيد زوجه عمي الاولى مضايقتها

شريفه : مو اكيد مضايقتها

طلعوا و نطق نواف : والله لو انها مهي ب مره كان صدق ما خليتها

شريفه و هي تمشي : ما خليتها محد وقفني عنها غير امي

نزلوا تحت و ناظروا ابوهم الواقف منتظرهم : سنه وش تسوون فوق كم مره قلت البيت فوق ما تدخلونه

تنهد نواف : تأخرنا على عمي

ناظر ابو تركي شريفه : عيونك كنها مكحله

شتت انظارها شريفه و نطق نواف بحده : و ليش ما تكحل عيونها ليش في عزاء لا سمح الله ولا شي علشان ما تكحلها

ابو تركي : عساه عزاكم ستتكم مع امكم بعد

فتح عيونه نواف بصدمه : وش ذا الكلام يبه عيالك حنا عيالك

مشى قبلهم ابوهم و تركهم اللي مصدوم و اللي تضايق من كلمته و اللي فار دمه من اسلوبه و كلامه تنهدت شريفه تنهيده واضحه ناظروها اخوانها جالسه تمسح عيونها نطق نواف : لا لا خربت كحلتك

سعود : ناظريني اعدلها لك

مسح سعود على عيونها : وش ذي العيون الذباحه

ناظرها مشعل : غزال بالعيون و بالهيئة

ابتسمت و ابتعد سعود و التفتوا لصوت تركي و عياله اخذ نواف دُره و شالها و قبلها: وش تبين من البقاله

دُره بلغه اطفال : حلاو و مصاصه

اشر نواف على خشمه : على ذا الخشم

مشوا لبيت عمهم و نطق تركي : امي وين

تنهد نواف : بالبيت

سعود : الحيه مضايقتها

ناظر تركي خلود و همس لها : وش صار

خلود و هي ماسكه يد ثنيان و تمشي : عمتي مريم ضايقته بس اشهد بالله ان شريفه و انا ما سكتنا لها

عبدالعزيز: بس سؤال عمكم ذا وش لاقي فيها

سعود : اي يا عمي الحب اعمى اسأل الطير عنه

ضحكت شريفه بخفه : بس اسكتوا لا يسمعكم ابوي و تصير سالفه....

دخلوا بيت عمهم و توجهوا الرجال يجلسون بالمجلس و دخلوا خلود و شريفه داخل عند البنات و بدوا يسلمون و نطقت ساره زوجه ياسر الثانيه : مشاعل وين

شريفه : تعبانه شوي تركناها بالبيت

حطت مريم رجل على رجل : دامها تعبانا امكم وشوله ( ليش) جايين عندنا و مزعجينا

ابتسمت شريفه لمريم : جايين عند عمي ياسر و عمه ساره

ضحكت مريم : في بيتي

شموخ بحده : بيت ابوي قصدك

ساره همست لشموخ : بس وش قلت لك مو قلت لا تكلمينها

مريم : طلع لسانك

اصايل وقفت تحاول تهدي الوضع : بنات سوينا جلسه بالغرفه اللي بالسطح تعالوا نتقهوى فيها

وقفوا البنات و توجهوا للسطح و همست وصايف : زين ما سويتي اصايل

الهنوف : لو ما تدخلتي كان قامت حرب

تنهدت شريفه : سكروا الموضوع

شموخ : بنات نبي رقص عاد

شريفه دخلت الغرفه : تكفين المره اللي طافت بغينا نروح فيها

جلسوا البنات و نطقت الهنوف : نسكر الباب و نقصر نبي نستانس

وصايف : خلوا الرقص شوي عندي لكم شي

التفتوا لها البنات و طلعت المجله من من تحت كنب الجلسات الارضيه و رفعتها لهم : شوفوا وش جبت

صرخوا البنات بحماس و نطقت شريفه : من وين جبتيها بدون تغبيش

اصايل و هي تشرب من القهوه : صادقه من وين ابوي و عمي يصادرون و يشرفون على كل شي و اي صوره بنت يغطونها بقلم اسود

تنهد شريفه : صدق من وين

ضحكت وصايف : صبركم علي

شموخ بدات تغني :

صبرك على هذا قليل

مهما ترا من تضحيات

هذا قليل

خل السهر لعيون من حبك

خل العيون اللي لها عشقي يبات

ضربتها وصايف بخفه على راسها بالمجله : بس خالد عبدالرحمن

شربت من القهوه شموخ : حدك عاد و خلصينا الحين من وين جبتيها

الهنوف بدات تقص البنات بسبوسه : خالد صح اعترفي

اصايل : صح من غيره يجيب لي

شريفه قربت بحماس : وش كاتبين عن انغام

صفقت اصايل : علوم و اخبار تعالوا

قربوا البنات و بدات اصايل تتصفح المجله و البنات يشوفون معها اشرت الهنوف : بنات هيفاء ناظروا فستانها

اخذت المجله شموخ و صفرت : يالبيه اوففف العالم برا عايشه و حنا هنا

شريفه كملت : هنا حتى البجايم يحرمونها علينا

انسدحت شموخ بحضن شريفه : تخيلي نتزوج انا وياك اثنين تجار او دكاتره او اي شي المهم نطلع من الديره ذي اخخخ يا حلم الايام الشداد

اصايل ضحكت : المشكله كله خيال مستحيل يصير

تعدلت شموخ و تأففت : ترقصون

طلعت الجوال من صدرها ناظرتها اصايل : مهربه كل شي انتي

غمزت شموخ : افا عليك تحسبين خواتك قليلات

وصايف وقفت : حطي شويخ من ارض مكناس

حطت شموخ الاغنيه و بدوا يرقصون شموخ و وصايف مسكت شموخ يد شريفه : يلا شروف

وقفت شريفه و بدات ترقص و البنات يعززون لها و يصفقون

العيال كانوا جالسين برا بالجلسات الخارجيه و يشربون شاي نطق عبدالعزيز: تروحون للحلال نشوف ولاده وضحه

فارس : اهجد تو خالد مكلم الراعي يقول طلق كذاب

ضحكوا العيال و نطق خالد و هو يشرب من الشاي : لا صدق خلونا نروح دام جمعه ولا فاتحين البقاله ولا شي وش يجلسنا

وقف نواف : امشوا لا يجون الشيبتين و يصدعون روسنا خلوهم منشغلين مع تركي و جابر

رمى عليهم المفتاح خالد و وقف : شغلوا السياره و انا جايكم بجيب غرض من اختي و اجي

مشى خالد و دخل البيت سمع اصوات امه و زوجه اخوه بالمجلس و بعض الاصوات صعد فوق و نسى ان بنت عمه موجوده صعد للسطح مسرع وقف من لمح من الشباك الكبير اللي كانت ترقص بشعرها الاسود الطويل و الكثيف و فستانها الكحلي و خواته حوالينها يصفقون و هي تتمايل و تحرك شعرها و اكتافها مع كلمات الاغنيه شافها عدل و شاف ملامحها و ترسخت في باله الملامح اللي كانت تجذب كل شخص حتى لو من بعيد سرح فيها لوهله و نسى سبب جيته و نسته كل شي و كأن العالم توقف من حوله و كل تركيزه و انظاره عليها ما عرف ذي مين ممكن تكون بنت عمه او زوجه ولد عمه او بنت ما تصير له لكن ما ينكر انها اخذت عقله من اول ما شافها بلع ريقه و صد ينزل للعيال نزل لهم و هو حاله مقلوب فوق تحت ناظروا العيال و نطق مشعل : يلا وينك

ناظرهم ولا عطى رد و نطق سعود : ولد

خالد استوعب : اي يلا نواف وين

ضحك فارس : راح يشوف حبيبه القلب

ركب خالد السياره و حاله مقلوب شغل المسجل مشعل على اغنيه سريت ليل الهوى كان خالد يغني مع كلمات الاغنيه و هو سرحان و يحرك و يقلب مسباحه بيده :

سَريت ليل الهوى لِين إنبلَجْ نورَه

‏امشي على الجَدي و تْسامِرني القَمْرا

‏ طعس و غَدير و قمَر و نجوم منْثورَه

‏وانفاس نَجْد بَها جرح الدَّهر يَبْرى

بالبقاله عند نواف فتح الباب و سمى و معه بريق الشاي و بيالات اخذ بسكوت و تقدم يجلس مكان الكاشير يشرب من الشاي و يسمع اغاني من المسجل لمحها تمشي من بعيد و ماسكه يد اخوها فيصل بعد الشاي و سكر زرار ثوبه و عدل شعره دخلت نور و سلمت بصوت هادي : السلام عليكم

نواف : وعليكم السلام

دخلت مع فيصل و بدات تاخذ اغراضها : فصول جيب الايسكريمات اللي تبيهم باخذ لي غرض و اجيك

فيصل و هو ياخذ من الحلويات : طيب

ابتعدت عنه و ناظرها نواف مقبله له ابتسم بخفه و ناظر عيونها و عرف انها تبتسم تحت النقاب طلعت ورقه من محفظتها و عطته بسرعه ابتسم نواف و همس : مشتاق

ابتعدت و هي مبتسمه بغرور فتح نواف الورقه الصغيره و قرا كلامها :

شوفتك ترد روحي

شم ريحه عطرها على الورقه و حط الورقه بجيبه من سمع صوت فيصل : ما جبتوا ايسكريم الفراوله

ناظره نواف : موجود جايك اطلعه لك

وقف و مشى لهم عند الثلاجه ناظرها تناظره و ناظر فيصل : موجود ايسكريم الفراوله كل يوم نجيب منه للغوالي

فتح الثلاجه : نحطه ورا علشانه بس مخصوص لناس معينه

طلع الايسكريم و اعطاه فيصل : كافي ولا بعد

ناظر فيصل اخته : كافي

هزت نور راسها و ابتعد نواف يجلس مكان الكاشير شغل اغنيه لأبو نوره و بدا يغني معها :

لاشفتها قلبي خفق عمري نطق

رددت بنشوه اسمها و اخذني فوق

هذا اللي خذيته منها

حطت الاغراض على الطاوله مع فيصل و بدا يحاسب نواف و هو يدندن : ٣٠ ريال اسجله على الحساب ولا تعطيني

فيصل : لا معنا فلوس بنعطيك

ناظر فيصل نور : عطيه

فتحت محفظتها و طلعت الفلوس و مدتها له ناظر بناجرها الذهب اللي بيدها و مناكيرها الوردي ابتسم بخفه و اخذ الفلوس طلع الباقي و عطاها و لامست يدينهم بعض و بعد يده نطق فيصل : يعطيك العافية نواف

نواف : الله يعافيك نورت البقاله والله

طلعت نور و هي ماسكه يد فيصل و توجهوا لبيتهم و كمل نواف يشرب الشاي دخل ابو تركي و ضرب عصاته بالارض : وين اخوانك

نزل بيالته نواف : عند الحلال اكيد

ابو تركي : وش مجلسك هنا مو قلنا الدكان ما ينفتح الجمعه

تنهد نواف : نترزق الله يبه

جلس ابو تركي و صب له نواف شاي اخذ بيالته و شرب من الشاي : ما تعرف تسوي شاي رخمه انت

نواف بحده : يبه ماني رخمه وش الكلام اللي صاير زايد عن حده ما كنت كذا وش غيرك

حط ابو تركي البياله على الطاوله : ما تغيرت هذا اني من عمر جدي و انا كذا

تنهد نواف : بكلمك بموضوع

ابو تركي : خير ان شاء الله وش في بعد

نواف تعدل و التفت لأبوه : بتزوج

ضحك ابو تركي : تتزوج انت

نواف : اي بتزوج و بتزوج بنت جارنا ابو فيصل

ناظره ابوه : وش عرفك في بنت ابو فيصل

نواف بنكران : ما اعرفها بس اختي تمدحها و تمدح اخلاقها

ابو تركي : مو من ثوبنا البنت

نواف : يبه ابيها ابي اتزوجها

وقف ابو تركي : مد لحافك على قد رجليك انت عارف ابوها وش و حنا وش

نواف بحده : وش ذا الكلام يبه اقولك ابيها ابي البنت ما علي من ابوها

ناظره ابوها و ضحك بخفه : ليش ابوها راح يرضى واحد مثلك زوج لبنته ابو فيصل من اكبر تجار الديره صاحي انت سكر ذا الباب ولا اشوفك فاتح سيره بنت ابو فيصل من جديد و اذا بتاخذ ، بتاخذ وحده من ثوبك علشانك الكلام ذا

طلع ابو تركي و بحده نطق نواف : ماخذها ماخذها طرق بعد

وقف نواف و طلع من البقاله و سكرها و توجه يمشي عند العيال .....

عند العيال بالحلال كانوا جالسين يشرفون على ولاده ناقه خالد و خالد مو معهم سرحان و باله مشغول باللي اخذت عقله برقصها صفق سعود : ولدت ولدت

انتبه خالد لهم و قرب يمسح على وضحه : وش لون الحوار( صغير الناقه / الجمل )

فارس : ابيض

خالد : بعدوه عن امه لا تسوي به شي

سعود ربط ثوبه : انت شعلامك ( وش فيك ) اليوم سرحان و بالك مو معك

مشعل تسند على الشبك : اي صح ولاده وضحه عاد الليله غريبه منت مبسوط

ابتسم خالد : مبسوط

التفت للعامل : غسل الحوار و عطي وضحه اكل

العامل : حاضر

التفت للعيال : تشربون شاي

سعود : اشربوا انتم شوي و جايكم

مشوا العيال و جلسوا حط ابريق الشاي خالد على النار و نطق مشعل : وش بتسميها

تنهد خالد : والله مدري

فارس : الا ما لاحضتوا شي ابوي و عمي الفتره الاخيره هاديين

مشعل : اي هداوه و اليوم الصباح مزعل شروف و قبل شوي يدعي علينا

خالد : صادق الفتره الاخيره راكدين عكس قبل

اخذ بريق الشاي مشعل و بدا يصب : انا بس ابي اعرف وش اللي غيرهم

قدم الشاي للعيال و نطق خالد و هو ياخذ بياله الشاي : الله وحده يعرف ما عليه فتره و ينكشف كل شي

ناظر فارس نواف جاي لهم من بعيد و اشر له : حياك في شاي

نواف مشى لعندهم و نطق لفارس : انزاح شوي

ابتعد فارس و جلس نواف بضيق ناظره خالد : علامك يا خوي حالك مو على بعضه

تنهد نواف : كيف بيكون على بعضه و ابوي يقول لي منت متزوجها

خالد ربت على كتف نواف : استهدي بالله يا اخوي كلمه مره ثانيه و اذا شافك معزم اكيد راح يوافق

تنهد نواف : راح يوافق ما اخذ بنت غيرها ذي نور عيوني

غمز فارس : غزل و حركات الله الله

ضحكوا العيال و نطق نواف :ولدت وضحه

خالد و هو يلعب بالرمل : ولدت ولدت

ناظر نواف العيال و همس : شفيه ذا

رفع عبدالعزيز اكتافه بعدم المعرفه و نطق نواف : صبوا لي شاي

صب له مشعل و بدا يشرب صفق عبدالعزيز من ناظر خالد يبتسم و يحرك الرمل اللي تحته : وين رحت بتفكيرك

ناظرهم و هو مبتسم بخفه : لا ولا شي بس اختي قالت لي كلام و كذا خلاني انبسط

نواف و هو يشرب من الشاي : اي عسى دوم

سمعوا صوت الاغاني و التفتوا لسعود اللي كان واقف و يصور بأحد البرامج مع الناقه اشر فارس : مصدق نفسه انه مشهور

ضحكوا العيال و ضحك خالد : الحين تنطحه الناقه

مشعل بصوت عالي : حديث بداوه انت تعال لا تنطحك

نزل جواله سعود مشى لهم و هو لاف شماغه على راسه و رابط ثوبه مشى بطريقه مضحكه و هو يغني :

عم يحلم قلبي برجال طفران و درويش الحال

يعيشني بأوضه صغيره ما فيها غير حصيره

و مابدي فراطه ولا مال خلي الغيري الفراطه

نواف بحده : ارفع علومك وش الاغاني ذي

خالد : امش عدل مثل الرجال

ضحك سعود و مشى عدل : نمزح عاد شديتوها علي

نواف : خر*ا على الشهره اذا بتخليني كذا

جلس سعود و هو يضحك : مزحه

مشعل : ابك يا شينها من مزحه

سعود قلب عيونه : لحول خلاص قلنا نمزح

نواف و هو يشرب الشاي : الحين انت مقتنع انك بتشتهر بالطريقه ذي

سعود : نعم و بقوه بعد

وقف خالد يتركهم : عندي استلام سلام

العيال : عليكم السلام

ركب خالد السياره تعوذ من الشيطان و يقول لنفسه: تعوذ من بليس يا خالد و انسى اللي شفته

التفت لجواله من جاء اتصال و رد عليه : اهلا حضره الفريق وليد

وليد : بخصوص ماجد

خالد و هو يسوق : اي بس اوصل المركز اشوف اخر التطورات مع الشباب و نرجع نفتح الملف من جديد

وليد : ابيك تجي الحين و بسرعه لان رصدنا مكانه

خالد اسرع : يلا نص ساعه بالكثير و انا عندك

سكر الاتصال و اسرع خالد وصل البيت و طق الباب فتحت له الهنوف و نطق : شوفي لي طريق

الهنوف : تعال

دخل معها و هو يسمع اصوات البنات العاليه و سوالفهم و نطق بصوت عالي و حاد : قصروا اصواتكم واصله لي برا

شموخ بصوت عالي : طيب

وصايف : اذني انبطت القاها من اخوك ولا منك

ضحكت شريفه : كملي السالفه اصايل

بدات تكمل لهم سالفه صديقتها اصايل و مشى خالد لغرفته مع الهنوف ناظرته و عرفت ان فيه شي : فيك شي

خالد : لا بس وراي شغل

الهنوف ابتسمت : فروس يقول ان وضحه ولدت

ضحك بخفه خالد : لحق يقول لك

الهنوف : اي ارسلت له وينكم كنا نبي نجلس بالحوش و قالي نشرف على ولاده وضحه خلنا من ذا وش بتسميه

خالد : مين

الهنوف دخلت مع خالد غرفته : خالد الحور شفيك

طلع بدلته خالد : الهنوف مو وقت سوالف كذا بعدين نفكر وش نسميها اطلعي ببدل

تأففت و نزلت لعند البنات بدل خالد بسرعه و نزل و هو يركض بعد ما لبس بدلته و قبعته و ركب السياره و توجه للمركز

عند البنات كانوا مجتمعين بالمجلس الصغير و نطقت اصايل : بنات V60

دخلت الهنوف بقوه ناظرها شموخ : شفيك

جلست جنب شريفه : خالد سألته وش بتسمي الحوار راح طردني

ابتسمت شموخ : جاه حوارجديد

هزت الهنوف راسها و نطقت اصايل : خليك من الحور تبون نسوي قهوه

شريفه : لا لا الفعاليه ذي شبعنا منها

ابتسمت الهنوف : عندي فعاليه جهنميه

التفتوا لها البنات و قربوا و نطقت : كيرم

وافقوا البنات يلعبون وقفت الهنوف : يلا وحده تجي تساعدني و الباقي يجهرون المفرحات

وقفت شريفه : جايه معك

مشوا يصعدون يجيبونها و نطقت الهنوف : بغرفه خالد امشي

شريفه : عادي ندخلها

الهنوف : اي امشي بعدين كذا ولا كذا مشى للدوام

شريفه : اقول لك شي

الهنوف فتحت باب غرفه خالد: قولي

شريفه دخلت و ناظرت الغرفه و نطقت : سر بيني و بينك اخواني اشتروا لي بيت

فرحت الهنوف : بيت