في المستشفى

وهم ياخذون نجد للغرفة العمليات مسكت يد هايف بقوه : هايف تكفى لا تخليني

هايف : لا واللي خلق هايف ما اخليتس لا تخافين انا معتس انتي بس لا تخافين لاتجهدين عيونتس

نجد كانت ترتجف غصب عليها وطلب هايف انه يدخل معها لين اقل شي يخدرونها وبعد ما غابت نجد عن الوعي طلع هايف وهو ماوده يطلع والحيييين بانت ملامح هايف المرعوبه جلس وهو ماله رجول تشيله

احمد : انت ما نمت !واضح تعبان

حط هايف يده على راسه: مايهم اني انام المهم نجد تطلع بخير

احمد : وكل امرك لربك

وقف هايف : بتصل بأخوي

ابتعد هايف وهو يدق

................••............

عند مطلق

كان مبتعد عن الكل كان بالعزبه بلحاله وهو ينتظر خبر من هايف اللي ارسل له ان عملية نجد اليوم

ولا حتى راح لاديم وولده كان مبعد بتوتره عشان محد يشك

فز اول ماسمع جواله ورد : هايف

هايف : دخلت يا مطلق

مطلق اخذ نفس: باذن لله ربي معها

هايف : يا مطلق نسبة نجاح العمليه 50٪

مطلق خاف من صوت هايف المنهار : يا اخوك لا تيأس ربي قادر انه يرجع بصرها لو هو 1٪ خلك قوي وتوكل على ربي

هايف : يا ليتك يا مطلق معي

مطلق تأكد انه مب بخير ابد : هايف يا حبيبي تعوذ من ابليس ان شاء الله ماتحتاجني اصبر اصبر وربي معك اقوى مني ومنك

هايف: والنعم بالله

مطلق : كم ساعه العمليه

هايف: مدري

مطلق : اسمع سكر كل شي عندك ودور لك مصحف جوالك جوالك فيه صح!

هايف: ايه

مطلق : زين سكر كل شي واجلس استغفر واقرأ لك كم سورة وربي بيعينك وخلك منتبه لجوالك ودق على طول علي وانا بنتظرك مانيب مبعد من الشبكه

هايف : زين زين

طلع هايف يتوضى وصلى بطرف المستشىفى ركعتين وبعدها ابتداء ينفذ وصية مطلق اللي كان كل نص ساعه يتصل ويتمطن

وبعد ساعات انتظار كانت شوي وتقتل هايف اللي كان يقرا بصوت شبه عالي عشان يبعد كل فكره من راسه وكان احمد جنبه وحزين عليه ويدعي ان الله يوقف معهم

واخيييييراً

طلع الدكتور وركض هايف واحمد وابتسم الدكتور لاحمد وقاله ( ان العمليه حمدلله عدت على خير والكل النتيجه متوقفه على نجد مايقدرون يعطون نتيجه وهي ماصحت )

ما طمنوا هايف ابد ابد وقالهم الدكتور انهم بينقلونها بعد نص ساعه للغرفه جلس هايف بضيق

احمد: يا هايف تأمل خير ان شاء للله بتكون النتيجه طيبه

هايف : يارب لا تخيب لنا تعب يارب

رفع جواله اول ما اتصل مطلق وقاله اللي صار

مطلق : ما عليه قو ايمانك بربك وان شاء الله ما بقى الا القليل خلك قوي

كان مطلق يحاول يدعم هايف حتى وهو بعيد وكان فعلا يحس هايف براحه اذا كلم مطلق اللي كان كأنه معه

وفي ذا الوقت ماسكت جوال نجد وهايف وكأن اهل نجد حاسين فيها شي

وفي ذا الوقت ماسكت جوال نجد وهايف وكأن اهل نجد حاسين فيه شي ويرد هايف ويقول : نايمه والوقت عندنا ليل عشان كذا مانرد

ومرت هالنص ساعه اللي مرت على قلب هايف اثقل من سنه

وركض للغرفه دخل وهو يشوف عيونها ملفوفه بشاشات كثيره قرب يبوس عيونها من ورا الشاش وجلس يكمل دعائه ( ياربي انت تدري اني ماقصرت واني مثل عيونها تكفى لا تحرمها امل عيونها وشوفها )

وانتظر وانتظر وانتظر وطال انتظاره وتعدي الساعات واحمد اللي كان ينتظر برا وهو على تواصل مع مؤيد اللي ماغاب عن الجوال ابد

وبعد شق الانفس تحركت نجد وركض هايف يقول لاحمد يستدعي الدكتور وجاء الدكتور وجاء كل الطاقم معه

ووقف احمد صاد عشان يترجم

وهايف اللي واقف جنب نجد اللي تهمس بأسمه

احمد بعد كلام الدكتور قال: هايف بيصحون نجد ويفتحون عيونها حاول تهدى

هايف : يارب توكلنا عليك

بدوا يصحون نجد وصحت وبعد ماصحصحت تمام قال هايف بيفتحون الشاش وبدوا يفتحونه شوي شوي شوي

وكل لفه تخطف من هايف انفاسه وكل لفه تزيد رجفت نجد اللي تشد على يد هايف

وغمض هايف في اخر لفه وبدو يبعدون الشاش والقطن ويمسحون عيون نجد اللي كانت خايفه تفتحها وقال احمد : ياهايف لازم زوجتك تفتح عيونها

جلس هايف قدامه: نجد لا تخافين افتحي عيونتس

بدت نجد تفتح وتسكر وتفتح وبدت تبان انوار الغرفه قدامها سكرتها بإنزعاج ورجعت تفتحها لكن هالمره شافت وجهه هايف اللي كان امنيتها تشوفه كانت عيونه حمرا وتعبانه ومهلوكه وتلمع وهو يناظرها بخوف

شهقت نجد ومدت يدها تتأكد واول ماحطتها على خد هايف تأكدت انها صدق تشوفه بكت : هايف انا اشوفك يا هاايف

بس قالت هالكلمه على طول احمد نقل لدكتور انها شافت وضحك الدكتور والطاقم لكن هايف كان للحين يناظر عيونها بصدمه وفي لحظة فرح انفجرت عيون هايف اللي كان هالهم على قلبه ثقيييل واخيراً نجد شافت ما اهتم للي حوله كلهم وقرب يحضنها واطلق العنان لعيونه خلاااااص خلاص انهد حيله وهو يحاول يكون قوي

طلع احمد وكل الطاقم وهو يتناقشون مع احمد لان هايف مب معاهم

نجد ماكانت مصدقه انها تشوف كانت تغمض وترجع تفتح عيونها وهي تحس بهايف اللي حاضنها ولا تسمع الا تنهيدات مكتومه حتى ماكان بكى صريح بكت معه وهي تدري انه يبكي فرح

ابتعد وهو يحاوط وجهها بيدينه مسح عيونه وهو يقول بلهفه : الحين تشوفيني يا نجد

نجد غمضت تبعد دموعها عشان تشوف زين : شفت رضا الدنيا شفت قرة عيوني

وخر هايف بفرح وهو يقول : ياربييييي ياااااربي لك الحمد حتى ترضى واذا رضيت وبعد الرضا اللهم لك الحمد والشكر يارب العالمين

نزل يسجد شكر ورجع يوقف وهو من هول الموقف ترجف يدينه رجع يجلس قدام نجد : والله ماعاد علي من هموم الدنيا شي دامي قدرت اوفي بوعدي

نجد : كيف اجازيك يا هايف

سكتها هايف اللي رجع يبوس عيونها بخفه : لا تجازيني ابد الا انتس تكونين بخير

قطع عليهم احمد يدق الباب وطلع له هايف يركض فرح حضن احمد وهو يشكره من قلبه وقاله احمد انهم بيرجعون يلفون عيون نجد كم ساعه عشان ترتاح وعلى ما يخلص هو الاجراءات

كان كل شي يقوله هايف ( ابشر وموافق ) وهو متشفق يرجع لنجد

ابتسم احمد يناظر عيون هايف اللي تنطق فرح كانت الدموع حايره فيها بفرح

ورجعوا يسكرون عيون نجد وكان لازم ترتاح عشان تقدر تطلع اليوم

..................••............

عند مطلق

قام يدوخ من التوتر وهو خايف مادام هايف طول ان نجد يكون فيها شي

كانت اديم تتصل ولا يرد عشان مايدق هايف ويحصله مشغول وبعد عنا دق هايف

اللي كان اغلب صوت بكي ورجفه وبكي وهو يبشر مطلق اللي كان جالس فوق السياره عشان الشبكه تجي كويسه ونط من فوق السياره بفرح: حمدلله يارب والحمدلله على سلامتها وقرة عيونك وعيون نجد

هايف ضحك وهو يمسح عيونه: الله يسلمك

مطلق : وكيف وضعها ان شاء الله انها بخير

هايف: بخير بخير بس رجعوا يخدرونها عشان ما تتعب عيونها وان شاء الله اليوم نقدر نطلع

مطلق : الله يبشرك بالخير ! وبتعلم الحين

هايف: لا ابد بكره بضف عفشي وارجع السعوديه ضاق صدري من ذا الديره واذا رجعت ونجد بخير نروح لهم كلهم

مطلق : الله يتم عليكم فرحكم يارب

هايف: امين

مطلق : عاد الحين روح وارتاح صوتك اختفى من التعب وانا بروح اشوف الدنيا من الصبح مختفي محد يدري ويني به

هايف : زين زين وانتبه ابوي لا يصلبك بالحوش

ضحك مطلق: تمون يا هايف تمون

سكر مطلق وتحرك متجه لديره وهو مب قادر يتحكم بفرحته

.................••............

وعند سلمى ومشاري

ما بقى احد ما بشره مشاري وحلفت ام فرج تعزم سلمى للعشاء وراحت سلمى منحرجه وهي كارهه وضع الغثيان لكن ام فرج يا زينها تهون على الانسان كل شي فيه

اما مشاري كان في عالم الطقطقه من العيال اللي رايحين جايين يطقطقون

قال ابو فرج من باب الضحك : والله يا مشاري مامداك توصل امس وش ذا الشوق لو اني داري من زمان مسافر عن ام فرج يمكن يكتب لي ربي ولد

الكل :هههههههههههههههههههههههه� �هههههههههههههههههههههههه ههههههه

مشاري:اذكروا ربي تكفون والله العظيم لو يصير لولدي شي لموت

سعود: بدري تتعلق فيه اصبري لين يجي مثل هالاخوان وتعرف ان الله حق

مشاري : هو مب تعلق بس الضنا غالي

مقبل : ايييه ايييه بدينا اجل من الحين ودك تنسحب مع ضناك

متعب : اذا قررت اتزوج بجي عندك اتعلم

مشاري ضحك : خلاص عاد يا اخوان

سعود :لا اصبر بعده ماجاء هايف اصبر

ابو فرج: الله يستر عليك ياهايف

الكل: امين امين

.................••............

عند اديم

كانت قالبه الدنيا ماتدري مطلق وين راح بالعاده من الظهر فيه والحين 5العصر ولا جاء ولا طل ولا يرد

واخيراً دق مطلق رفعت الجوال بخوف : مطلق ! وينك ! فيك شي ؟ صار لك شي؟! عمي فيه شي

مطلق : بسم لله عليتس ! اهدي مافيناا شي

اديم: اجل وينك ماجيت ! خفت عليك

مطلق: قلت بنام شوي واريح وانا بالعزبه وراحت علي نومه وتوي صحيت

اديم: الله يهديك

مطلق ضحك : بما اني لذا الدرجه غالي تعوذي من ابليس وتعالي بعد هالاسبوع

اديم: رجعنا على طير ياللي ، توك كنت متسامح وش زينك

مطلق: يابنت الحلال اشتقت لكم ! وعجزان اجي

اديم: لا تعب نفسك وتجي كل يوم يوم تعال ويوم ريح

مطلق : تدرين مقدر

اديم : صراحه يعني وانا مقدر عشان كذا تعال بس انتبه

مطلق ضحك ولكن سكت بهدوء على صوت هايف يبكي ورا اديم وضحك بفرح: هذا صوته !

اديم: ايه قلت لك صياح

مطلق : يا جعلني قبله

اديم ضحكت: طيب دامني تطمنت خلني اروح ارضعه لايصحي البيت

مطلق ضحك بخبث : ايه ترضعينه! خير ان شاء الله

اديم : انا صدمة عمري اكتشفت انك خبيث

سكرت على صوت ضحكه العالي وهي تضحك بحرج

اما مطلق دخل البيت بعد نوبة ضحك اغلبها فرحه

واستقبله ابوه بغضب: يا ولد انت وينك ولا خلاص خربت وصرت ناقع عند مرتك24 ساعه

مطلق :لا يبه الله يصلحك بس كنت بالعزبه وقلت اريح ونمت حتى مرتي ما رحت لها اليوم

ابو زيد : اصلا وشوله كل يوم وانت راز وجهك هناك الرجال يثقل يثقل

مطلق : يا يبه ماهي مسألة ثقل بس اتطمن عليهم

ابو زيد: عمك هناك وفايز هناك وزيد هناك خل الخبال عنك واجلس كل يوم وانت رايح جاي مع ذا الخط اشغلتنا واشغلت نفسك والمسلمين معك

مطلق : ابشر يبه ابشر

دخل وشاف حسين عند امه يساعدها ويسألها

ام زيد : وش طرا عليك غزيل الحين

حسين: اقصد يمه ! يعني غريبه ما تزوجت

ام زيد: ما كتب ربي نصيبها! وش تبي انت ولا معاد لك شغل الا تزوج البنات اللي ماتزوجوا رح الله يصلح قلبك لا يسمعك ابوك والله يقص لسانك

مطلق تنحنح يقلد صوت ابوه وانخبص حسين وتحرك بسرعه وقش الصحون وطاحت

مطلق :هههههههههههههه بسم للله على عمرك لا تموت

حسين: مطلق صاحي انت بغى يوقف قلبي

ضحك مطلق بغمزه قبل تشوفه امه وهمس بسرعه لما مر من عند حسين: بتقنعني ان قلبك بصدرك للحين

مر من عنده واتجهه يبوس راس امه اللي تسأله نفس سؤال ابوه اما حسين ما عطى كلام مطلق اهميه وطلع وهو يسأل عن غزيل فضول بس ما طرا له اي شي

..................••............

عند هايف

كان نايم بالكرسي اللي بجنب نجد لكن كان نوم متعب ماعرف يرتاح فيه صحى وهو يحس بصداع شاف نجد للحين ما صحت وطلع يدور له قهوه

لكن قابل احمد اللي توه واصل ومعاه كيس

احمد : هاه هايف كيف زوجتك

هايف: للحين ما صحت بس ان شاء الله بخير

احمد : اجل خذ

هايف: وش ذا

احمد : قهوه عربيه ، جبتها لك يقول مؤيد انك ما تحب القهوه السريعه

هايف ابتسم بحب: والله يا احمد جميلك علي كبير مدري وشلون اطلع جميلك انت ومؤيد ماقصرتوا والله

احمد : ما يحتاج حنا نعتبر اخوانك بعد ولا بينا جمايل المهمم تقهوى وعين من الله خير عشان ترتاح

هايف : الله يسعدك اخر خدمه ابيها منك تحجز لي بكره راجع

احمد : ابشر ، يلا انت بلحق على دوامي واعطيك خبر شوي وكلمني اذا طلعوا زوجتك

هايف: زين الله يوفقك

راح احمد ورجع هايف بالقهوه ودخل وجلس وهو يشم ريحة القهوه : ااااه يازين الرييحه يا ويلي ويلاه ياحبني لتس

طلع جواله وهو يتصل بالشخص اللي المفروض يشكره شكر الدنيا

جاه صوت مؤيد: اهلين هايف اهلين حبيبي

هايف : وشلون اجازيك يا مؤيد وشلون برد معروفك

مؤيد: لا لا تقول كذا والله بزعل منك ! ولا ناسي انت ماقصرت معي ابد وبعدين لازم اوقف معاك بوقتك العويص واكيد بيجي يوم احتاجك فيه

هايف اببتسم : ولله انك نعمه يا ابن العمه واحمد بعد ما قصر الله يوفقه

مؤيد: حمدلله على سلامة نجد والله يقر عيونها

هايف : الله يسعدك ويسلمك

مؤيد: متى بتروجعون !

هايف: بكره يعني قول بعد بكره نكون مستقرين ! اقابلك فالديره طيب ؟

مؤيد: مافيها كلام اكيد بجي

هايف: يلا اجل سلم على عمتي

مؤيد : فمان الله

سكر هايف ورجع يجلس يتقهوى براحه وهو توه يحس بطعم الراحه

ونزل فنجاله على صحوت نجد وراح ينادي الدكتور اللي بعد ما فحصها وتأكد انها بخير كتب لهم خروج وصار وقت يرجعون للفندق

وتقدم يساعد نجد اللي للحين مغطين عيونها

هايف : بنرجع مع تاكسي احمد بدوامه

نجد : مين ذا احمد

انصدم هايف وخاف فيها شي : نجد ماتعرفين احمد !

ضحكت نجد : مافقدت الذاكره ارتاح بس اقصد من وين تعرفه من يوم جينا وهو هنا

هايف: اشوى ، احمد صديق مؤيد مبتعث هنا وطلب منه مؤيد يساعدنا ولا قصر نجد : الله يسعدهم ويوفقهم

هايف: ايه ادعي لهم

طلعوا وبعد ما سردوا على هايف تعليمات الادويه كان احمد يترجمها لهم من الجوال

وبعد ما رجعوا الفندق كانت نجد للحين تحس بدوخه من البنج ولما شاف هايف ان الفندق هادي مافيه احد لف على نجد اللي مستنده عليه وشالها وشهقت نجد برعب : هايف وش فيك !

هايف: مافيني شي بس اشوفتس تعبانه

نجد : هايف لايكون تشيلني قدام الناس

هايف ضحك : لا ما انهبلت للحين ، مافيه احد وهذا حنا وصلنا الجناح

دخلوا وقرب هايف ينزل نجد بشويش : وحمدلله على السلامة وغدا الشر ان شاء الله

نجد : الله يسلمك لولا الله ثم انت وش كنت بسوي

هايف قرب يبعد عبايتها وحجابها وهو يحرر شعرها ببتسامه : ابد لا تقولين كذا ، المهم ابتلاء ياربي وعدينا منه

نجد :طيب ليه مقفلين عيوني !

هايف : عشان ترتاح بعد العمليه ولا تجهدينها

نجد: متى افتح عنها

هايف: بكره بس اول هالادويه ، ومثل ماسمعتي ادويه مكثفه

نجد : كل شي يهون دامني رجعت اشوف

هايف : حمدلله ، يلا تعالي عشان احط لتس القطره

ساعدها هايف تنسدح وحط راسها بحضنه وهو يفتح الشاش بشويش وغمض اول ماشاف عيونها حمرا من اثر العمليه رجع يقطر لها وسكرها

نجد : كيف عيوني !؟

هايف ابتسم وهو ينزل يبوسها: تذبح مثل عوايدها

نجد ضحكت:لا تسلك لي

هايف : والله اني صادق

نجد : طيب متى نرجع

هايف: بكره

نجد : يالله فيني تعب الدنيا

هايف وقف يقفل النور ورجع يرتمي بتعب : انا ميت منتهي مييييت

نجد : انت بذات لازم ترتاح ترا ادري بك ما نمت ابد

هايف ابتسم: انا خلاص كذا بخير

بعد ما غفت نجد اللي حتى صوتها كان ثقيل من البنج وهنا صار وقت هايف ينام ولكن كان لازم يصحى كل فتره عشان يعطي نجد الادويه

.................••............

واخيييراً بكره صار وقت العوده

وبالمطار انتهى مشوار احمد معهم واتجهه له هايف يحضنه بحب وامتنان

هايف: ادري مهما قلت مانيب موفيك حقك بس انا اتمنى منك تقبل هالهديه

نزل احمد عينه يناظر الظرف وصد بضيق: يا هايف انا فزعت معك لانك امانة مؤيد وبنفس الوقت اعدك اخو مابي هالرسميات ابد وانا مابي تقابلني بذا الظرف وتحسسني اني استغلك

هايف: لا لا والله ادري انك ما تقصد كذا وانك تدور مصلحه لكن ودي ارد لك شي من معروفك علي

وانا ودي اعاونك بغربتك

بعد معاناة قبل احمد الظرف وهو منحرج وودعه هايف وطلع لطيارته وهو مرتاح بشكل ما تخيله

..................••............

عند سلمى

اللي كانت تحاول تقنع مشاري انهم مايتصلون على اهلها ويبشرونهم لا يروحون لها

مشاري: وشلون تقدرين تنتظرين الخميس ! انا ودي اقولهم

سلمى: ننتظر هايف واذا جاء نروح كلنا

مشاري: هايف رايح يتمشى يعني رجعته مجهوله

سلمى: ما اتصلنا فيه طيب!؟بس المهم تكفى اذا بشرتهم ابي اشوف وجيهم

مشاري: زين براحتس

سلمى بتردد: ما بتبلغ ابوك وامك

اخذ مشاري نفس : اكيد لكن لازم اتصل فيهم مدري وينهم الحين بالسعوديه ولا برا

سلمى باستغراب: شلون تقدر يا مشاري! معقوله تقدر تجلس يوم بدون ما تكلمهم ! بدون ماتسمع صوتهم ماتدري وينهم !؟ الحيين ! فيهم شي ؟ وش متعبهم !كيف قلبك يرتاح

مشاري : لا تكلميني يا سلمى كذا ! لا تحسسيني ان الذنب ذنبي

انا ما قصرت انا حاولت ولا تفكرين اني مرتاح بوضعي لكن انا انهد حيلي ! كل يوم اتصل يا مغلق يا مشغول يا محد يرد ابد

ولا كنت اكتفي بأتصالاتي لا كنت اروح لبيت كل واحد ويا يبه امرني ويا يمه سمي ،لكن وش كنت اواجهه محد فاضي لي جالسين معي بس جسد لكن ابد مب معي انا اسأل وانا اجاوب وانا اتكلم مع نفسي

ما كنت مستوعب ان هالفجوه بتكبر لين صرت عادي ما يفرق معي اليوم اللي ما اكلمهم فيه

سلمى الدنيا ماهي زي امك وابوك ابد ! تراي ما جلست هالسنين كلها ما تزوجت عشان يمكن تصلح الامور مع اهلي يمكن يتغير شي بس ابد مافاد

نزلت راسها سلمى : انا ادري اني غلطت يوم تكلمت كذا بس انا ماني متخيله

مشاري وقف يبعد الاوراق : لانك ابد ما تعودتي انك تكونين بعيد عنهم ! لانك تعرفين على كثر ماهو ابوك عصبي وقاسي شوي وعلى كثر ما تخافون من زعله تعرفون بعد انه يحبكم وانه مستحيل يرتاح يوم ما يكلمكم او يشوفكم حتى وانتم كبار واغلبكم تزوجوا بس هذاك تقولين يقوم نص الليل يشقر عليكم وكأنكم للحين بعينه اطفال ! فيه فرق يا سلمى وفرق كبير بين انك تعيشين مع اب مهتم كل هالاهتمام !وبين انك من يوم وانتي صغيره تنقليين بين بيت ابو مهمل وام تداري خاطر زوجها وانتي ضايعه بالطوشه وتكبرين نفسك بنفسك وتهتمين انتي بنفسك وتدارين نفسك

صعب تقارنين وانتي اللي لو تخافين من اي شي تبين تنادين ابوك وامك وتنادين مطلق وزيد وهايف ومحسن وحسين وخواتك كلهم بتناديهم ومايحتاج تنادين بالاسماء يكفي تقولين اه وبيحضرون كلهم .. لكن الاصعب ان اخوانك كثير وتستنجدين بالغريب .

ندمت سلمى انها تكلمت ماعرفت تسوي شي لانها هي مب مقتنعه بذا القطاعه ولاهي مستوعبتها

انسحب مشاري بهدوء وهو يتضايق من ذا السيره والطاري

وقرر يطلع يهدا شوي وبعدها يرجع

.................••............

عند هايف بالطياره

هالمره نايم بالطياره براحه هو ونجد

وفتح عيونه على صوت المظيفه تقولهم ان الطياره بتهبط واربطوا الاحزمه

صحى هايف نجد وهو يساعدها لانها للحين عيونها مسكره كحمايه لها

ولا قال لأحد يجي ياخذهم ورجع لبيته وهو ينتظر اللحظه اللي الكل بيعرف فيها إن نجد شافت

دخل العماره وهو متوقع يقابل مشاري ولا سلمى بس مافيه احد دخل الشقه وحتى الخادمه ماكانت موجوده

نجد : هايف متى بنقولهم ! متى بنروح لهم

هايف : اذا فكينا الضمادات عن عيونتس

نجد : متى ؟

هايف : بعد ما تنتهي هالقطره

نجد: ايش! يعني اسبوع

هايف ضحك : لا لا ارتاحي اصلا مابقى الا قطرتين وبعد ساعتين نقدر نشيلها

نجد :اشوى

هايف : طيب الحين جوعانه !

نجد : لا بس ودي اقوم اخذ شور احس بتعب بس مدري كيف وضماد

هايف :تعالي انا اساعدتس

دخل وهو يقول لنجد ترجع بس شعرها ورا وبعد حالات ضحك قدروا ينجزون ويجهزون

هايف: يلا اخر قطره

نجد : احس بفرحه لدرجة قلبي بيطلع من كثر ما يدق

هايف:والله اني ادري وش تحسين بالضبط بقلبي مثله

وكانت اخر قطره فعلا ووخر هايف الضمادات وهو يناظرها ببتسامته العريضه الفرحانه

واول ماشافت نجد ناظرت فوق وهو راسها بحضن هايف كالعاده وشافت هايف اللي يدينه محاوطه وجهها ومبتسم ضحكت وهي تناظر حولها فزت وجلست وهي تناظر بضحك قوي ولفت وهي تركض لهايف وحضنته وهي تضحك بفرح : يالله يا هايف الحين بشوفك قريب الحين بشوف بيتنا بشوف سيارتك بشوف كل شي يجمعني بك اقدر اسوي كل شي ياهايف

ضحك هايف : اي الحمدلله يا نجد شفنا هالنعمه

كانت تضحك وابتعدت عن هايف وهي تدور بالغرفه ببتسامه وكانت مرتبه وحلللوه مره وهي تدري ان كل زاويه بالبيت اختاروها بعيون هايف واحساس نجد مرت تناظر اغراضها بفرح وزادت ضحكها اول ماشافت صورتهم بزواجهم وهايف اللي معلقها اخذتها وهي تناظرها بفرح : يووووه ياهايف عمري ماتوقعت اني بشوفها ابد

هايف قرب وهو يناظر الصوره بضحك: شفتي كيف كنا حلوين

نجد : اللله وربي زي ما وصفت بالضبط بالضبط ، وحمدلله كان شكلي حلو

هايف : افا بس انتي حلوه بكل حالاتس، واتركي الصوره كل تفاصيل الزواج مصورينها يعني شوي بنسهر عليها كلها

نجد : يالله ياهايف والله اني نسيت الدنيا ، متى بس نروح الديره بس ودي ارجع اشوفها من جديد

هايف: تدرين اني متحمس لروحة الديره ودي اشوف الفرحه اللي بيفرحونها

نجد: تكفى بنروح بكره

هايف : ان شاء للله الحين خلينا نشوف سلمى وابشرهم وبعدها خير

نجد . ايه ايييييه سلمى سلمى الحين بشوفها زين بشوف هالغاليه سلمى

هايف: ما تعرفينها

نجد: الا بس ابي اشوفها زييين يعني بشوفها بعيون هايف اللي كان يحكي عنها

هايف ابتسم : اجل يلا

نجد: لا تقولها على طول خلنا نطقطق شوي عليها

هايف: ابشري الحين تعالي نشوف بيتنا من زمان ابي اوريتس اياه

ركضت نجد معه وهي كل مكان ينفتح كانت تضحك على الذكريات اللي اختاروها فيها وهايف يحاول يوصف لها كل شي

نجد : تدري صح اني كنت احلم بكل شي بييتنا وبكل شي بس كنت ابد مابي الا مكان يجمعنا لكن الحين بيتنا مره حلو

هايف كان مبتسم وهي يراقب فرحة عيونها وطريقة كلامها اللي كان غير غير مره تنحنح

ومد يده يمسك يدها : من اليوم اللي يدي مسكت فيها يدتس وحنا كل شي بحياتنا حلو

ضحكت نجد : تصدق حتى هالملامح اللي بوجهك تمنيت اشوفها لو خمس دقايق وانعمي مره ثانيه المهم شفت وجهك

هايف لف وهو يحك دقنه بضحك: كلمه غزل زياده ماني مسؤول

لفت نجد بضحك وهي تناظر شكلها وكانت هالمره اخر مساعده من هايف لها وهي تشوف حتى بترتيب شعرها معتني لفت تناظره بحب كبييير وهي ماهي قادره من الفرح تهدي ابتسامتها

هايف: نطلع!

نجد : يلا

طلعوا متجهين لشقة سلمى ....

................••............

عند سلمى

اللي كانت ضايقه من ضيق مشاري اللي رجع وهو يضحك ويسولف بس باقي تحس فيه قهر خصوصا بعد ما عطى امه وابوه خبر بحمل سلمى بس كان الرد (و الله ! الله يبارك لك )

ابتعد مشاري اللي كان جالس جنب سلمى وقف متجهه لباب مستغرب من بيجي ذا الوقت

واول مافتح الباب طارت عيونه بإستغراب: هايف! وش رجعك وش فيك ! صار شي احد فيه شيه

هايف كان مبتسم : لا ابد بس رجعت حسيت انك مزعل سلموه

ضحك مشاري : دامك تسيمج مافيه شي اجل ادخل ادخل

ضحك هايف وهو يقول نجد تدخل دخل بزاويه عشان يقولها وين الصاله

وابتعد مشاري بس فاجأتهم سلمى اللي جت تركض برعب وهي وما تشوف الزاويه اللي فيها هايف

سلمى طلعت تناظر بلهفه: سمعت !

مشاري : وشو؟

سلمى: صوت هايف .. ضحكت هايف

مشاري شاف انها مب متأكده وضحك : افا انهبلتي وش بيجيب هايف ، ماهو مسافر ؟

هايف سكت بضحك وواستكن بالزاويه وفهم ان مشاري بيمقلب سلمى

سلمى رجعت تطل وهي تشد على يدينها: لا والله سمعته انا اعرف ضحكت هايف ! مب معقوله اني اتوهم بعدين من دق الباب

‎مشاري : اللي دق الباب الحارس ، بعدين وش جاب لتس ضحكت هايف شكلتس مشتاقه له مره

‎سلمى رجع بيأس وضيق: والله اني اشتقت له قليل الخاتمه

‎وصرخت اول ما حست احد رفعها فوق وصرخ مشاري معها وهو يعرف هايف اذا مسك سلمى ينسى انها بنت ويمزح معها بدفاشه وخاف على حملها

‎نزلها هايف برعب : وش فيكم

‎سلمى شهقت : هااايف انا داريه انك هنا

‎ضحك هايف وهو يحضنها: صرت قليل خاتمه الحين هاه

‎سلمى: يعني من سبك حبك

‎هايف رفع يده بيدقها بمزح بس مسكه مشاري : اصبر اصبر تعوذ من ابليس واترك الهبد

‎هايف بطقطقه: لييييه الاخت صارت حساسه

‎سلمى لفت بضحك: وينها نجد بس

‎هايف: هذا هي

‎راحت سلمى وهي للحين مادرت وسلمت على نجد ببتسامه:وش ذا الروحه السريعه ما اشتقنا لكم

‎نجد ضحكت: ما سمعتس ترا

‎سلمى : حمدلله على سلامتكم

‎هايف: الله يسلمتس

‎مشاري: غريبه وش رجعك

‎هايف : خلاص خلصنا

‎سلمى: مجانين انتم طاقين اخر الدنيا عشان يوم

‎هايف: هاذي لناس الرايقين المطافيق مثلتس وشرواتس ينثبرون

‎كان مستحيل هايف يمزح مع سلمى بدون مايطقها بمزح او يسحب شعرها او ينرفزها

‎مشاري : يا رجال فكنا من مزح اليد

‎هايف: وشوله!

‎مشاري ابتسم وسلمى تراقب ملامح هايف وقال مشاري : لازم ما توجع ولد اختك

‎سكت هايف اللي رفع حواجبه يحلل الجمله واتسعت عيونه وضحك بفرح ولف على سلمى اللي صارت تضحك بقوه : في ذمتس !

‎سلمى: والله بس من الحين اعلمك مانيب مسميته هايف ! كفايه مجانين اثنين

‎هايف اللي انمصع قلبه من الفرحه وصرخ وهو يضحك: يا ربي وش ذا الايام الزيييينه وش ذا الاخبار اللي تنعش اجل يا سلموه بنصيرين ام ههههههههههههههههههههههههه ههههههههههههههههههههههههه هههههه يووووووه ياربي قلبي قلبي يوجعني

‎اسرع يحضن سلمى اللي كانت تضحك من ضحكه وهي تدري انه بيفرح بس استغربت كمية هالفرح

‎هايف: كنت بجلطكم وجلطتوني

‎مشاري ضحك بصدمه: لييه تنتظر شي انت

‎نجد كان بعيد بالصاله وتشوفهم بالممر وهي اول مره تشوفهم بهالوقفه اللي مستحيل هايف يجي عند سلمى ومشاري مايجلس يسولف معهم من الباب للممر لين اخر شي المجلس وكانت تمنى تشوفهم وشافتهم ومشاري اللي ماتوقعته كذا وسلمى وفرحة هايف كانت نجد توها تحس بالحياه

‎هايف: لا بس ان شاء الله

‎مشاري : اجل وش بتجلطنا به

‎هايف لف يناظر نجد وماحب يخرب مفاجأتها لسلمى وضحك: بجيتي يعني

‎مشاري : تعال المجلس وبنتصل بعمي والعيال يجون

‎هايف: يلا

‎اتجهوا للمجلس وراحت سلمى لنجد وهي تمد نجد ليد نجد ومسكتها : نجد تعالي معي للمطبخ بسوي القهوه

نجد ابتسمت وهي تشوف سلمى وهي تساعدها بقلب وحريصه عليها

وجلست نجد تسولف وهي تشوف شلون سلمى فرحانه فيها وتساعدها بكل شي

وقفت سلمى وهي تجهز الاغراض ووقفت نجد معها وتمد يدها للفناجيل تصفها ولفت سلمى باستغراب

وضحكت نجد وهي تناظرها : وش فيتس

سلمى كانت تعرف ان اديم كانت تناظر بفراغ عمرها ما ناظرتها بالضبط زي هالمره وكانت عيون نجد شوي حمرا

سلمى: انتي فيتس شي!

نجد ضحكت : فيني اني اشوف اجمل انسانه

سلمى ماطرا لها ان نجد تشوف ولفت بضحك: بالله ! صرتي مثل هايف يعني

نجد ضحكت: لا ابد انا صدق اشوفتس ، وحتى انتي

سلمى ضحكت وماصدقت : دريتي اني حامل

قربت لها نجد وهي تحضنها بفرح : وربي فرحت لتس وربي الله يتمم عليتس يارب

هنا سلمى صدقت شوي وبعدين قالت بشك: نجد وشلون ملابسي

ضحكت وهي تناظر ملابسها: وردي

وهنا رمت سلمى السكين وصرخت بكل صوتها وفرح وهي ماهي مصدقه ان نجد تشوف ولا جلست عند نجد ابد طلعت من المجلس تركض وهي تنادي : هاااايف

فز مشاري برعب ومسكه هايف بضحك: اصبر بسم لله عليك مافيه شي مافيه شي

مشاري : هايف وخر تسمع الصراخ

هايف ضحك وهمس: اسمع بس هذا يعني ان نجد قالت لها ان رجعت تشوف

ماركز مشاري كثير وهو عيونه على الباب بس لف بقوه: وشو ! تشوف !؟

سلمى دخلت وهي تركض وراح هايف يركض يمسكها بضحك: سمي بالله لا تنطين

سلمى من قوة الفرحه كانت تضحك: هايف كيف كيف نجد رجعت تشوف كيف!؟

هايف ضحك: اجلسوا سمو بالله واجلسووا بشوف نجد وارجع اعلمكم السالفه

رجعت سلمى لنجد وهي تحضنها بفرح : والله والله انشلع قلبي من الفرحه

نجد: ياقلبي ياسلمى

سلمى حطت يدها على راسها من قوة الفرحه: ماني مصدقه وشلون وشلووون

نجد: هايف يقولتس !

هايف: نجد اشرحي لها وانا بروح لمشاري

جلست سلمى ونست القهوه وابو القهوه وهي تسمع التفاصيل من نجد اللي قالت لها كل شي حتى حالات هايف وتعبه اللي واضح وهنا صاحت سلمى وكان ردها مثل رد مشاري اللي وقف بذهول يناظر هايف : انتم مجانين وشلون تروحون تسون مثل هالعمليه ما تقولون لاحد لو صار لكم شي وش بتسوون

هايف: مشاري قلت لك التفاصيل وبعدين قلت ما اشغل احد ولا اعطي احد امل وانا خايف انها تفشل وبعدها نفسية نجد تضرب

مشاري: ماني مصدق ماني مصدق

دق الباب وقف هايف يفتح وترك مشاري يستوعب الموضوع ودخلت ام فرج لنجد وسلمى وهي بالعاده تسلم على نجد وهي جالسه بس استغربت يوم وقفت

سلمى ضحكت بفرح: يا خالتي ابشرتس نجد رجعت تشوف

شهقت ام فرج بفرح: ورببتس

نجد وقفت تبوس راسها بفرح وهي ماصدقت تشوفها: ايه الحمدلله

ام فرج حضنتها بفرح: مبروك ياحبيبتي مبروك! وشلون وشلون مب كنتم مسافرين

نجد: اعلمتس الحين

في بيت مشاري

فالمجلس دخلوا العيال مستغربين تبلد مشاري ورجعت هايف

ابو فرج: مشاري علامك وانت ياهايف وش رجعك

ضحك متعب: لايكون عطيناك عين ومستدعي هايف

مقبل ضحك وهو شايل حمود : لا يكون بس عازمنا تاخذ اثرنا ترا مانيب شارب شي ولا باكل شي

هايف ضحك:ههههههههههههههههههههه� �هههههههههههههههههههههههه هههههههههه

ابو فرج: يا عيال وش فيكم

مشاري اشر على هايف : لا ابشرك اللي بتعطونه عيون هذا هو

سعود : لا تقول نجد حامل انت بعد ؟

هايف ضحك : لا هي بشاره عن نجد بس مب حمل

ابو فرج: اجل وش

هايف ابتسم: نجد حمدلله رجع لها بصرها

فزوا كلهم مستغربين ويسألون ( شلون ! متى ! وش صار )

وكان عتبهم (شلون هايف يروح مايبلغ احد ! لو صار شي ، لو احتاج شي ) بس غفر له عذره وفرحتهم بنجد

وحلف ابو فرج الا يسوي عشاء صدقه ويعزم اهل الحاره

وضحك هايف: ماتقصر يا عمي بس انا بعد بسويها بالديره ولازم تجون

مقبل: اجل خلها قبل عرس سعود عشان نكون بالرياض

مشاري : بس عرس سعود بالمدينه

سعود : واذا ! يسويها بالديره قبله بأيام نحضر بالديره ونرجع

هايف: مب هم المهم الحين بكره اذا رحت الديره وش بيسوون

مشاري: مني انا ابوك بكسر رجلينك عشان ماعاد تروح ماتقول

متعب: هذا اذا مازعلوا اهل نجد بنتهم تخضع لمثل هالعملييه ولا يدرون

هايف: ماعليكم علي علي

الكل كانوا فرحانين لنجد لدرجة نادوا من ورا الباب يتحمدون لها بالسلامه

.................••............

عند مطلق

اللي رايح بنفس الطريق لبيت عمه وهو صح مل من هالمشاوير وطفش من وضع بيت عمه وام فايز بس عشان خاطر اديم ونزل ودق الباب وهو فرحان ورايق لاخر درجه

فتح عمه وهو يرحب فيه ويهلي ويبادله مطلق نفس الحب

ابو فايز : ادخل ادخل هذا هي اديم بالصاله وانا بقولهم يزهبون القهوه

دخل مطلق مبتسم وهو يشوف اديم واقف ببتسامه اول ماسمعت صوته وهي شايله ولدها : يا اهلا اشتقنا ياهوه يومين ماشفناك

اقبل مطلق يسلم عليها بضحك : هلا فيييتس ، لكن لا تطرين علي الشوق تراي اتناسى مابي اشتاق فعلاً وحزتها ياحبيبة عيوني الديره تجمعنا

ضحكت اديم : على طاير الديره ليه ماتجي خالتي معك !

مطلق : والله اليوم عندها شريفه ولا كان ودها تجي

اخذ مطلق هايف الصغير وجلس وهو كل شوي وده يرفع راسه ويبشر اديم بشوف نجد بس مايقدر

وجاء ابو فايز وجلس وهو يسولف مع مطلق اللي كان يتمنى انه مايروح عشان مايخرب مفاجأة هايف

وبعد شوي استأذن ابو فايز وراح

ولف مطلق بضحك: ايييه

اديم ضحكت: ترا من ساعه وانا حاسه فيك شي ! التبوسم ذا مب لله

مطلق: اسمعي اسمعي وش رايتس تاخذين ولدتس وانا اتيسر

اديم وقفت وهي تمسك ذراعه: والله والله ماتروح لين تقول

مطلق : انتظري يابنت الناس

اديم :مطلللق ترا بموت من الفضول

مطلق : طيب فكي ذراعي وخذي هايف وبعدين اقولتس

اديم اخذت هايف وركض مطلق بضحك: دقيقه بكلم واجيتس

اديم :مطلق والله بزعل اذا ما قلت

مطلق يحاول يكون جدي بس ضحكته مخربه: اثقلي عاد

اديم : بكيفك بكيفك

طلع مطلق وهو مقرر يقولها لكن لسبب واحد ( انه ممكن ترجع معه اديم )

اخذ جواله ودق على هايف يبي يقوله انه بيقول لاديم

وكان رد هايف الضاحك:خذ راحتك بس انتبه لا تقول لاهلها

مطلق ضحك: انا ليه بقولها عشان اقول انكم بتجون بكره واخذها معي

هايف: يعني بتنفذ كلامك طيب غصب بتاخذها بعد اسبوع

مطلق ضحك:مب سالفة تمشية كلام بس والله كرهت اجي لبيت عمي

هايف: المهم لاتجبرها

مطلق :خلاص يلا وانت رح استانس مع نجد

سكر هايف وهو يضحك

ورجع مطلق ببتسامه لاديم : تعالي تعالي بقولتس

اديم: لا مابي اول رفضت

مطلق رفع حواجبه بضحك: فكرت ورضيت

اديم كانت تبي تعاتبه بس خانتها كلمتها :يعني بس عشانك رضيت ماهمك ازعل او لا ماعاد ابي اعرف في ستين داهيه

مطلق رجعت له حدت نبرته: ادييييم! خير ان شاء الله ؟ وش ذا الاسلوب

اديم انخرشت : ماقصدت والله بس كنت بعاتبك

مطلق : انا تقولين لي في ستين داهيه!

اديم: انا ما اقصد انت اقصد ان الخبر ما همني

مطلق هنا عصب :خلصنا لا فيه خبر ولا بطيخ

نزلت اديم هايف : وش فيك زعلت والله امزح والله

مطلق كان ساكت بس ماتركته اديم وهي تحاول تراضيه وما حب مطلق يكبر والموضوع تافهه : حصل خير لكن انتبهي

اديم: ابشر ،طيب صدق وش الخبر

رجع مطلق يبتسم على هالخبر: تدرين ليه هايف مسافر!

اديم :يتمشى

مطلق : لا

اديم: اجل

مطلق : راحوا يصلحون لنجد عمليه عشان ترجع تشوف

شهقت اديم: في ذمتك

مطلق ضحك: ايه وابشرتس انها صلحتها والحمدلله رجع لها نظرها وهذا هي بخير وبالخبر وبكره بيجون الديره

وقفت اديم وهي حاطه يدها على قلبها بصدمه وفرحه : في ذمتك يا مطلق في ذمتك

مطلق : وربي

اديم كانت تضحك بصدمه: يعني خلاص نجد تشوف الحين

مطلق : ايه حمدلله رجعت تشوف وانتهت همومهم اللي مثقله عليهم

ضحكت اديم وهي تسحب يد مطلق لقلبها بضحك: بالله شوف وش كثر قلبي يرقع من الفرحه

مطلق رجع يسحب يدها ويرجعها لقلبه: وش رايتس انتي تشوفين قلبي وش كثر يرقع وتعبان وترجعين معي

طارت عيون اديم بخجل وضحك: مطلق ويين !توني مالي اسبوع من ولدت وبعدين امي بترفض

مطلق صد بضيق: خلي لي امتس على جنب ! انتي ترضين! وبعدين بكره هايف ونجد بيجون واكيد الكل بيجتمع

اديم : بس مدري ؟ مايصير انا بفتره نفاس

مطلق : واذا ! امي هناك موجوده وشريفه بعد ! واذا قصدتس علي ماعندتس مشكله ما رح اضايقتس وبطلع انام برا وتاخذين راحتس وكل شي بيكون عندتس

اديم ماقدرت وهي تناظره وشلون يحاول يقنعها وواضح انه ماعاد يتحمل يجي هنا اكثر ويكابر على نفسه عشانها

مطلق حس انها ممكن ترفض ولا عاد قدر يجبر نفسه يقنعها اكثر من كذا وكأنه بيموت اذا ماهي فيه ومااعاد يقدر ينزل كبرياءه اكثر وهو مطلق اللي ينحسب له مليون حساب

مطلق رجع لوراء : زين اجل براحتس ، المهم اكتبي اللي تحتاجينه عشان اجيبه الحين لان مدري اقدر اجي بكره او لا

اديم صدت بضيق : زين

ما توقع مطلق انها ما تبي الروحه معه لذا الدرجه وضاق شوي ووقف يجمع اغراضه وهو بيده الثانيه هايف النايم

وينتظر اديم تجيب ورقة الاغراض

اديم حاولت انها ماتروح بس ماقدرت تفرط بمطلق وهي كل يوم يتعنى مع ذا الخط ويتعب عشان يشوفهم وودها تحضر معهم هالاسبوع الاحداث وتعطي امها ولطيفه مجال يكملون دبش لطيفه اللي ماخلصوا منه للحين عشان اديم

ورجعت لمطلق معها شنطه لهايف : مطلق اترك هايف وتعال دقيقه

نزل مطلق هاييف: وش فيه ، مقدر اجي

اديم :مقدر اخذ شنطتي ثقيله

مطلق قطب حواجبه : شنتطتس!

اديم ضحكت: اييه بروح معك ولا ماتبي

ناظرها مطلق بشك بس اول ماشافها تضحك صدق واستعجل خطواته لها وهو يضحك: لا عاد صادقه !

اديم : يعني شفت انك صادق بس عاد اسبوع وارجع

مطلق ابتسم: ماهي مشكله المهم ارتاح اسبوع

اديم : انت خذها وانا بروح اقول لامي ولطيفه

اخذ مطلق الاغراض واخذ هايف وراح لسياره ينتظر وهو متحضن هايف بحب

واديم اللي اول ماقالت لامها انهبلت ام فايز : يعني مصر يمشي كلامه وانتي بقره وراه اللي يقوله تمشين وراه

اديم : امي حبيبتي انا رحت عشان بس تاخذون راحتكم وترتبون براحه ماتشيلون هم احد

لطيفه: مين قالك إنا متضايقين منك

اديم: ادري مب متضايقين بس بعد مابي اقلقكم وانا بس اسبوع وارجع وبعدين حرام رحمته كل يوم رايح جاي مع ذا الخط اللي يخوف اخاف يصير له شي

ام فايز: من طلب منه يجي كل ليوم لا حبيبتي يبي يطغيك على امك

اديم غمضت بضيق: يا امي والله مايقصد شي بس لان هالايام بيجون هايف ونجد الديره بعد وخلاص نجتمع كم يوم وارجع

ام فايز: الله ياهايف ونجد يججون ولا يروحون وش عليك انتي لكن اسمعي ان طلعتي وانتي نفاس مع الباب لا ترجعين تكملينها عندي خليه هو يسوي لك كل شي

اديم شهقت بصدمه: يمه

لطيفه: يمه الله يهديك وش له داعي هالكلام بتروح اسبوع وترجع

ام فايز بغضب: انا تكلمت وخلاص ياتجلس مره وحده او لا ترجع لي وهي نفاس

اديم : يمه

ام فايز : سمعتيني يا اديم

هنا انهارت اديم وشلون الحين بتقول لمطلق ماعاد بترجع وشلون بتصرف كانت تناظر مطلق من الشباك فرحان بهايف وهو يلعبه وامها معصبه وزعلانه

لطيفه تبي تساعد اديم: يمه يا حبيبتي ترا اديم صادقه احنا قرب الزواج وصار لازم نطلع كل يوم ورانا اشياء كثير واديم اغلب وقتها لوحدها فأحسن شوي تروح اسبوع واحنا نخلص لين ترجع وهي كذا ولا كذا بترجع عشان الزواج اصلا بعد اسبوع

اديم : ايه يمه

وبدت لطيفه تحاول في ام فايز لين رضت وركضت اديم تبوس راسها وهي ماقدرت تعصي امها وطلعت بفرح وهي تمسح دموعها لانها كانت بتنهار لان الموضوع بيكبر ركبت :تأخرت عليك

مطلق ابعد هايف عن صدره وهم مبتسم : بسيطه اشغلني حبيب امه

اخذته وهي تضحك: حبيبي والله

مطلق لف بضحك: منهو ذا !

اديم ناظرته بضحك : اكيد انت

مطلق ابتسم بس ابتسامته كانت هاديه اول ما لمح لمعة الدمعه بعينها وفهم ان امها اكيد سوت سالفه صد ما حب يضغط هو بعد وهو يدري انها مابيدها حيله على امها ولا وده يخيرها بينه ويين امها

اخذ نفس وهو يسمع صوتها تلعب هايف وهو كل ماله يحقد على ام فايز

.................••............

في الخبر وعند هايف

وكان طول الوقت كل شوي يطلع ويرجع وهو وده يحتفل مع نجد بهالمناسبه بس ماكان يدري وش بيهديها

مشاري رجع بعد ما ودع الشباب : هاه وش تفكر فيه

هايف : اسمع اقترح علي هديه

مشاري ضحك : لنجد

هايف ابتسم بحرج: ايه

مشاري: تبي عاد الصراحه انت اهديتها اغلى شي يوم اخذتها تعالج

هايف: لا يا مشاري انا ما اهديتها هذا واجبي كيف تبيني ارتاح وانا اشوفها متضايقه من شي

مشاري سكت وبعدين قال :يعني وش تحب هي

هايف :ناسي مع هالعجله

مشاري : انت جهزت يعني

هايف ضحك: ايه بس ننتظرر الهديه واخاف نجد تطلع للبيت

مشاري : والله مدري يا هايف انا قسم الهدايا فاشل فيها

هايف : يعني حتى مايمدي ننزل السوق ونلف

مشاري : كم الساعه !

هايف:10

مشاري : قم قم

هايف: والبيت

مشاري : هي مامعها مفتاح صح !

هايف: ايه

مشاري: قفله وامش

قفله هايف وطلعوا وابتدوا يحوسون وهم مابين عطورات واساور وساعات واشياء كثيره ممكن تنهدا

هايف : طيب وش ناخذ بالضبط

مشاري : بيأس صراحه صلب مخي!

وقف هايف فجاءه وهو يناظر بتعليقه شدته كلياً

سحب مشاري ووقف : بشويش ابي كتفي

هايف :تعال بس

دخلوا وهاايف يسأل عن السلسال وكان عباره عن ( سلسله ذهب فيها تعليقه جحر كريم ابيض وفيها ينكتب الاسم بذهب كانت حلوه حلوه واول ما شاف هايف ماقدر مايتخيلها على نجد ) واول ماطلب اسم نجد ماكان فيها

مشاري: طيب لو نطلب وحده بأسم نجد

صاحب المحل : دقيقه

هايف لف عليه بمزح: وش دخلك تقول اسم زوجتي

مشاري : هاوي تكفيخ

ضحك هايف: اامزح

ورجع صاحب المحل : مافيه

ضاق هايف وهو يحاول يحاول قالوله لازم طلب وبالقوه اقنعون تجهز بكره وبعد ماحاسبوه طلعوا وهايف ضايق

مشاري:خلاص ياخي بكره عطها

هايف: لا ابي الليله بكره بالديره بمشي الفجر

مشاري : ماعليك اجيبها لك

هايف: لا تطق مشوار عشان سلسال

مشاري: انا اصلا بجيب سلمى بكره الليل امر واخذها واجي

هايف : اشوى اجل

مشاري : بعد عاد الحين خذ ورد شي

هايف : والله نسيت يعني

مشاري: انا بفهم حب 17 سنه شلون عايشه وانت دايخ كذا

هايف ضحك: حبيبي حبي انا كله تضحيه وجدران وتكسير وحالتي حاله

مشاري : والله انك صادق

اخذوا الورد وطلع هايف يركض وهو وده يفاجئ نجد ويبسطها وبعد ما رتب المكان بطريقته رجع ياخذ نجد من عند سلمى اللي مابغت تفكها واللي يوزها مشاري لين اخر شي كفخهم هايف وتركوا نجد اللي جات تضحك : شفيهم

هايف : ولا شي بس انتظري

مشاري وسلمى كانوا على باب شقتهم يطقطقون على هايف ويحاولون يطلون على الشقه ونجد واقفه بطرف ومنحرجه وبعد ما دخلها هايف بحشره عشان ماينفتح الباب ولا تشوف سلمى رغم انه مب ذا الاحتفال بس يبي يقهر سلمى اللي ماكانت تدري وش السالفه بس مشاري يقولها تطقطق عليه

وبعد مادخل هايف لفت سلمى بضحك: وش فيه!؟

مشاري : للله يخلف عليتس ادخلي ادخلي يعني كل ذا ولا فهمتي

سلمى: وشو

نزل مشاري يرفعها وهو يضحك : تعالي بس نامي ماعليتس منهم

ما ركزت سلمى فيهم وهي للحين تعيد خبر شوفة نجد وتضحك فرح فيه

................••............

في شقة هايف

نجد اللي عجزت تشوف وهايف مسكر عيونها وابعد يده وهو يضحك اول ما فتحت نجد وشافت التجهيز البسيطط لكنه كان شي كبييير بالنسبه لها لفت لهايف اللي كان يضحك بحرج : صح ماهي مرتبه بس يعني استعجلت وحست شوي

رجعت له نجد وهي تضحك بعيون مليانه دموع: انت بلحالك تكفي وجودك يسوى الدنيا واللي فيها ، ماخليت لي شي اسويه لك كل شي حلو سويته انت! لو برد لك هالفرح وش اسوي

هايف بمزح: مدري فكري بعدين ، المهم تعالي الحين اجلسي بنشوف شي مع بعض

نجد جلست كفايه عليها هالترتيب يفرحها اتجهه هايف للابتوب وهو يوصله بالتليفزيون وشغله ورجع يجلس جنب نجد وهو يحتضنها

وضحكت نجد اول ما انتشر الصوت بالغرفه وهو صوت فيديو زواجهم وكان هايف حريص انه يصور كل شي من اللحظه اللي ابتدت فيها مراسيم الزواج هايف بدا يصور

كانت نجد تشوف كل شي كأنها حاضره كل شي مصور حتى الكواليس التافهه

من اول لحظه ليييين وصلوا للحظة الزفه وبدا قلب نجد يدق وكأنها تعيش هاللحظه كانت جامعه رجولها لصدرها

ويدها على خدها وهي تحس انها ترجف

هايف اللي كانت عيونه تنتقل مابين الفيديو ومابين عيون نجد وهو يبتسم على ايام زواجهم وكان ودده انه مصور لحظاتهم بعد زواجهم لين هاليوم

وبعد ما انتهت هالفيديوهات رجعت نجد تضحك وهي تمسح دموعها وهي ملاحظه اهتمام هايف فيها حتى بالفيديوهات

هايف اللي فهم كل شي ودها تقوله بس من قوة فرحتها مب قادره

هايف:بس بس لا تقولين شي انا فاهم والله اني فاهم بس امسحي دموعتس خلاص مانبي ابد شي يبكي

وانتهت هالليله اللي كانت كلها ذكريات حلوه ومليانه حب سواء من هايف او من اهل هايف

.................••............

في الديره في بيت ابو زيد

كانوا ابو زيد وام زيد وشريفه ومحسن وحسين

جالسين يتعشون وحسين كل شوي يلتفت على العنود اللي بحضن ام زيد ويلعبها

ابو زيد : انت ورا ما تاكل مثل الاودام

حسين: هاه ! اكل يبه

ابو زيد: ان التفت مره ثانيه بصقعك بهالعظم على وجهك

حسين: ابشر ابشر

وسكتهم دخول مطلق المبتسم وهو شايل هايف : مسيتوا بالخييير يا جدانه وعمانه

فزت ام زيد بشهقه: يا ويلي وراك جايب الولد مع البرد

مطلق : معه امه يمه

دخلت اديم: سلام

وقفوا كلهم مستغربين جيتهم

ابو زيد : هلا يا ام هايف ادخلي ادخلي عن البرد

حسين ومحسن اتجهوا لمطلق يسلمون على هايف

ام زيد ناظرت مطلق بزعل وتوقعته اجبر اديم تجي عشان كلامه بالمستشفى

شريفه راحت لاديم: هلا فيتس هلا

اديم : هلا يا شروف

شريفه: تعالي جوا عشان تاخذين راحتس

اديم: ابشري

دخلوا ولف ابو زيد بغضب

ابو زيد : مطلق ! عسى مافيه شي ؟! ماهم بيجلسون عند اهلهم لين تقضي ال 40

مطلق عطى امه هايف : ايه يبه بيجلسون هنا اسبوع ويرجعون

ام زيد : يا امي توها البنت تعبانه وانت جايبهم مع هالخط وهالبرد مايصير

مطلق بانزعاج: يمه الله يهديتس مافيه لا برد ولا شي وبعدين ترانا بعز الصيف وبعدين وش فيها اذا جو هنا اسبوع !

ابو زيد: مافيها شي اهلك وانت بكيفك لكن عسى مافيه من الامور شي!

مطلق : لا يبه

ابو زيد : عطني ولدك

اخذ مطلق هايف وهو يعطيه ابو زيد اللي كان يلعب معه ومحسن وحسين عنده

وسحبت ام زيد مطلق وطلعت به

مطلق : وش فيتس يا يمه

ام زيد : عسى بس ما كبرت بينك انت وام فايز

مطلق : لا يمه لا قلت اديم تعالي وقالت طيب برضاها ماغصبت احد

ام زيد: ايه يمه تكفى لا تخرب بيتك بنفسك

مطلق : ابشري

ام زيد : خلني اشوف اديم

راحت ام زيد لاديم وراح معها مطلق

ام زيد : هاه يا بنتي عسى ماتعبتي

اديم: لا يا خالتي حمدلله

ام زيد : اصبري بسوي لتس شي ينفعتس الحين

شريفه: خليها يمه انا جالسه اسويها

مطلق : يمه انتي ارتاحي

ام زيد: مرتاحه ماعليه ، اجل بجيب لتس فراش ترتاحين

اديم: لا ياخالتي لا تعبين نفستس انا شوي واروح غرفتي

ام زيد : معصي مافيه لا غرفه ولا هم يحزنون بتنامين عندي هنا اشوفتس واتطمن عليتس

مطلق : ليه يا يمه ! هي مافيها شي تقدر تنام بالغرفه

ام زيد لفت على مطلق بحده : تنام بلحالها بسم لله عليها

مطلق : لا وش بلحالها انا عندها

ام زيد بطرف عين : قل والله بتنام عندها؟ اقول قم قم وانا امك عند ابوك بس

مطلق رفع حواجبه بتعجب: وليه ما انام

ام زيد : مايصير ، وخلك من ذا الحكي وروح

راحت ام زيد ولف مطلق على اديم : الحين اسبوع بتجلسين ! وكل واحد ينام بمكان

اديم : مب كنت تقول عادي تنام برا

مطلق تورط : ايييه بس عاد ما توقعت صمله ، وبعدين ليه ما انام عندتس

اديم: مدري اسأل خالتي

مطلق : انتظري

طلع مطلق لامه وهو اول مره يصر على هالموضوع

ام زيد : يا مطلق وش بلاك انت وش صار لك ! ماعمرك نشبت كذا !

مطلق : لا بس ودي اعرف ليه !يعني ماجبتهم عشان ينامون بعيد عني

ام زيد: مافيه شي يا يمه بس من عرفنا الدنيا مايصير تنام عندهم لين تنتهي وبعدين لو فكرت بتشوف انها مسكينه تعبانه وتحتاج احد حولها ويساعدها وانت وانا امك بتحط راسك وتنام ولا تدري عنها حتى لو يصيح الولد بتضيعون فيه يالاثنين

خلها عندي ازين ، انام عندها واشوف وش تحتاج وش ما تحتاج

مطلق : اجل انا بعد بنام معكم

ام زيد : الله يصلحك بس

راحت ام زيد ورجع مطلق ياخذ هايف من ابوه واخوانه وخصوصا ان ابوه اعلن وقت النوم

والكل راح ينام واديم نامت في احدى الغرف مع ام زيد

وجاء مطلق بفراشه وشريفه مصدومه من مطلق

لكن مطلق من فرحته بولده واديم مايبي يبعد ومن باب ثاني ومستعجل ينام بجنب ولده

ام زيد : يعني مصر

مطلق : ايه

ام زيد انسدحت وهي تضحك : اديم وانا امتس نامي ماعليتس منه

اديم كانت تضحك على مطلق اللي فراشه بجنب سرير هايف واخذت اديم هايف تبدل له وترضعه وهي تحمد ربها ان ام زيد موجوده عشان ما يجلس مطلق يستظرف عليها

وهذا اللي قاهر مطلق انه مايقدر يلتفت ويطقطق وبهالوضع تسكرت الانوار والكل نام

ولكن بعد ساعه صحى هايف يصيح وصحوا الكل الا مطلق مادرا فيهم الا بعد فتره صحى

مطلق: وش فيكم

ام زيد : ماشاء الله عليك بتصحى عليهم وهذاك مادريت عن شي

مطلق جلس وهو عين مفتوحه وعين مسكره: مادريت وش بلاه يصيح

اديم : شكله فيه مغص

مطلق : نوديه المستشفى

ام زيد : هات هات ، مايصير كل شوي تودونه المستشفى ذا شي طبيعي جيبيه يا اديم

اعطتها اديم وجلست قدامها ومطلق جالس جنبها وهو ميت نوم

وام زيد اللي نيمت هايف على بطنه على رجلها وهي تمسح على ظهره : اذا صار له مغص سوي له كذا

اديم : ابشري

بعد بكى شوي نام هايف ولكن نام مطلق قبله وهو ماقدر يتحمل النوم

وبعد شوي صحى هايف يصيح مره ثانيه وهالمره جوعان وكل شوي كان يصحى ويصيح وهنا ما تحمل مطلق اللي شال فراشه وراح للمقلط مع حسين ومحسن

.................••............

ومن بكره في بيت ابو زيد

اللي صحى العيال لكن مطلق اللي مانام الليله زين عجز يقوم

ابو زيد : حسيين رح ناد ابو نجد للقهوه

حسين:زين

محسن: علامه مطلق نايم بالمقلط ولا صحى

ضحكت ام زيد: توه جديد

شريفه بضحك: امس قرر انه ينام مع هايف الصغير لكن عجز يتحمل الصياح وانحاش

ابو زيد : نايم مع اديم!

ام زيد: عجزت فيه مايطيع ، لكن يستاهل

ابو زيد : الله اكبر يالرجال معاد فيه رجال الواحد بيموت لا راحت الحرمه عنه شوي

ام زيد : انا بروح عند اديم

ابو زيد : شريفه عطينا الولد نصبح عليه

شريفه: ابشر

راحوا يجيبون هايف وبعدها جاء ابو نجد وام نجد للقهوه

وابتداء اجتماع القهوه واخيرا صحى مطلق على صوت هايف واخذ تهزيء من ابو زيد اللي مستغرب الخفه اللي صايبه مطلق من تالي

................••............

عند هايف ونجد

صحى هايف وهو اول مره يصحى على صوت نجد المرح :هايييييف يا قرة عيوني صحصح

التفت هايف ببتسامه: ياصباح النور والسرور

نجد قربت وجلست وهي تتكي على صدره : مب قلت امس بنطلع بدري لديره يلا تأخرنا

هايف :كم الساعه!

نجد: 7:30

ورجعت وهي تضحك: وترا ما مشطت شعري للحين لازم تصحى معي كأني ناسيه وشلون امشطه

ضحك هايف : لا ابد انسيه للابد هذا من اولوياتي يعني لا احد يقرب له ابدد

نجد : يلا اجل

وقف هايف وهو اول مره يصحى ويحس انه خفييييف

وبعد ما تروش وجهز طلع يدور لنجد لكن اتسعت ابتسامه وهو يشوفها لاول مره من زواجهم تكون مجهزه الفطور وواقفه ببتسامه رضا وهي فرحانه انها اليوم بدت يومها مبسوطه انها بتسوي ابسط واجباتها لهايف

هايف ضحك وتقدم وهو يبوس يدها: يالله تسلم يديها يالله ، ايييه ايييه هذا الصباح اللي يوسع الصدر

نجد سحبت هايف يجلس ببتسامه وجلست جنبه وهي تقرب له الفطور: ماتدري وش كثر فرحانه

هايف : الله يديمها يا حبيبي

بدت نجد تجهز كل شي لهايف ومايحتاج يمد يده هو ويسوي شي كل شي تعطيه قبل يطلبه

وبعد هالفطور اللي يسوى الدنيا ركضت نجد تجيب فرشاة الشعر واعطتها هايف : الحين بشوفك وانت تمشط شعري

قرب هايف يمشطه وهو يضحك وهو يقول : لا ترا الحين تحسن أدائي قبل الله لايوريتس ياهو يفشل

نجد ضحكت: كنت حاسه وانت كل شي تفتحه وترجع تمشطه ولا تجي تصلحه

هايف: بس كنت احاول

نجد ضحكت: بس ماعليك منك حلو

وبعد هالتجهيز والروتين اليومي لهم اللي كان يفرق بشوفة نجد اللي اخذت كل اداور هايف وهي بدال ماكان يساعدها هي الحين تقدم له كل شي

وطلعواا متجهين لديره

هايف : اليوم من يوم صحيت وفي راسي اغنيه هي اللي المفروض اسمعها عمري كله

نجد : وشهي

ارتفع صوت هايف اللي يردد ببتسامه وضحك

( اليوم يمكن تقولي يا نفسي أنك سعيدة

تشهد على صدق قولي دقات قلبي الجديدة

تسعة وعشرين عام ضاعت وسط الزحام )

سكت وهو يضحك: اي والله اني راح من عمري29 عام وانا اركض في ذا الحب اللي عساني ما فقده

ضحكت نجد : يعني انت بذلت عمر اكثر مني بس السطور الجايه تراها لي توصفني انا

ضحك هايف ورجع يغني وتغني معه نجد

(ليلي ونهاري وقلبي أصبح يحب الظلام

وأنا في درب الهلاك ظهرت لي ياملاك

غيرت مجرى حياتي شفت السعـادة معاك)

نجد:يااا اللله ياربي لا تغير هالسعاده

هايف : امين

وكملوا الطريق يسترجعون الاغاني ويغنونها ويضحكون رغم النشاز اللي يمر احيان

.................••............

في الديره الكل كانوا بمجلس ابو زيد

وحديث المجلس ولد مطلق واغلب رجال الديره جايين يشوفونه ويباركون له

وفي بعد هالزحام قال ابو زيد: محد منكم كلم هايف

مطلق: الا يبه طيب ومبسوط ويسلم عليك

ابو زيد: اه يا ذا الولد انفصخ عقله مره وحده

محسن: خله يستانس يا يبه

ابو زيد: ايييه يستانس في ديره الكفار ، ليت ربي يبرد قلبي ويطلع لي واحد منكم مثلي لكن وييين

سكتوا كلهم وقال ابو نجد :كلهم خير وبركه يا رجال

ابو زيد: حمدلله بس ، المهم يا مطلق خلص امورك تراك باقي ماسويت تمايم ولدك

مطلق: ابشر ابشر

قطع هالنقاش صوت هايف اللي دخل مبتسم: ماشاء الله مجتمعييين

فزوا كلهم يسلمون عليه ومطلق مبتسم

ابو نجد: مسرع ماجيتوا يا هايف

هايف : عجزنا نصبر فالغربه

ابو زيد : معلمك ماتطيع

باس هايف راسه بضحك: الله يخليك لي بس

حسين: الغربه تزين الوجيهه كذا ، ثاني مره بروح انا كود اني اصير مزيون

هايف ضحك: الراحه وانا اخوك تزين والا الغربه الله لايردها

ابو نجد: وينها نجد

هايف: بتجي

مطلق : محسن حسين تعالوا ابيكم شوي

طلعهم مطلق عشان نجد تدخل لابوها

ابو زيد: وراك تناظر كذا

هايف : اصبروا بوريكم شي بس هاه اقصروا اصواتكم عشان ما يجون الحريم

طلع ينادي نجد وابو زيد وابو نجد مستغربين

ودخلت نجد وهي فيها رجفه ابعدت نقابها وهي مبتسمه واتجهت لابوها وهي تناظره

وهايف واقف ورا تقدم ابو نجد يبي يساعدها بس كانت تناظره الا واللله تناظره

رمى مسبحته من يده وهو يحط يده على راسه بذهول : نجد يانجد يا ابوتس

نجد ركضت له تحضنه وهي تبكي : يبه ابشرك يبه رجعت اشوف

اعتلى صراخ ابو نجد المنذهل وهو يحضن نجد

وابو زيد اللي كان منصدم ويناظر هايف وهو يقول: ماشاء الله لا اله الا الله

تقدم له هايف مبتسم : ابشرك يبه نجد رجعت تشوف

ابو زيد : اشوف اشوف الله يقر عينها يارب

وخرت نجد عن ابوها اللي ما تمالك نفسه وبكى فرحه بشوفة بنته الوحيده اللي ظلمها كثير

وجلست نجد تمسح دموعه : يبه خلاص تكفى لا تبكي المفروض تفرح

ابو نجد : ابكي فرحان فيتس يا عين ابوتس

نجد: حمدلله يبه تكفى لا تببكي دموعك غاليه

ابو نجد: وشلوون وشلوون رجع لتس نظرتس

نجد لفت تناظر هايف بفرح: كله بفضل الله ثم هايف

هايف : ياعمي تعوذ من ابليس ترا بالقوه نسكت نجد

ابو نجد وقف وهو يحضن هايف بكل قوته ويشكره : انت سويت شي ماقدرت انا اسويه انت جميلك علي كبييير يا ولدي كبير

نجد راحت تسلم على ابو زيد الفرحان لها

هايف: ماسويت ياعمي شي هذا واجبي ولازم اسويه وحمدلله اللي قدرني اسعد نجد حمدلله

ابو زيد: كفو يا ولدي يا هايف يعلم الله انك رفعت راسي والله يجزاك خير يارب

هايف: الله يسعدكم

ابو نجد: قل وش تبي بس واقولك ابشر وش تامر عليه يا هايف

هايف باس راسه: ابي سلامتك وابيك بصحه وعافيه ولا بتعطيني شي اغلى من نجد

ابو زيد :حمدلله حمدلله

ابو نجد رجع يبوس راس نجد بفرح: قلتي لامتس

هايف: للحين ما احد درا غيركم ، الحين بنقول لهم

ابو زيد : بشوويش عليهم لا تروعهم

هايف : لا معليك

طلعوا متجهين للقسم الحريم وابو نجد واقف بفرحه وابو زيد يسلم عليه ويتحمدله بسلامة نجد وهو مب مصدق ابد

................••............

عند الحريم وصلهم خبر ان هايف وصل

بس مستغربين وش رجعه

وطلعت ام زيد وشريفه له واقبل هايف يسلم عليهم ببتسامه

ام زيد: هلا فيك يمه ! وش فيك رجعت عسى مافيك شي

هايف: ابد يا حلوة اللبن بألف خير

شريفه: مب تقول مسافر بعيد !

هايف: ايه بس ماقدرت اصبر من شوقي لتس

ضحكت شريفه: يااا عوبك

هايف : عندي لكم شي حلو بس ونادوا ام نجد

ام زيد: ياربي يا حبيبي ، وين نجد

شريفه رجعت مع ام نجد وسلم هايف على ام نجد اللي كانت تناظره باستغراب : وين بنتي ؟!

هايف : يا نجد

دخلت نجد اللي كانت ترتب شكلها وكان اكثر شي لفت نظرهم انها تمشي بلحالها وتناظرهم كلهم وهايف ما ساعدها

وسلمت عليهم كلهم والكل مصلب من الصدمه وهايف متكتف ببتسامه

نجد ابعدت وهي تضحك: وش فيكم!

شريفه ما استوعبت : ا مافيه شي

نجد ضحكت وهي تضم يديها لصدرها بفرح: ما تشوفون شي

قربت ام نجد برجفه: نجد يمه ! انتي تناظرينا صدق

ام زيد لا شعوريا رفعت يدها قدام عيون نجد وتحركها ونجد تضحك: اشوفتس يا خالتي واشوف امي واشوف شروف واشوف الدنيا كلها

هايف ابتسم: ابشركم نجد تشوفكم ورجع لها نظرها

زلزل الدنيا صراخ ام نجد المصدومه اللي حضنت نجد وهي تبكي ونزل هايف راسه ببتسامه وهو اول مره ما يشوف ام نجد مبالغه

ام زيد اللي ماعاد تدري من الفرحه الا انها قامت تزغرط بفرح وشريفه تضحك

واسرعت ام زيد وهي تمسك هايف بفرح: قول والله يمه

هايف: والله يا حبيبتي والله

ام زيد حضنت هايف بفرح وهي تضحك: قرة عينها وعينك يا حبيب امك وحمدلله على سلامتها

هايف: الله يسلمتس يا قلبي

شريفه اسرعت تسلم على هايف وهي مصدومه

وبالقوه بعدت ام نجد عن نجد وراحوا يسلمون عليها

واديم اللي كانت تسمع الصراخ وهي فرحانه وعيونها مغورقه من المشاعر وهي ماهي مصدقه للحين لبست وطلعت وهي توقف بفرح : هايف حمدلله على سلامة نجد

هايف ابتسم لها بضحك: الله يسلمها ام هايف الغشاشه

ضحكت اديم وهي تدري انه يقصد انها تعرف

راحت نجد لاديم وهي تحضنها بفرح وهنا صاحت اديم اللي ما قدرت من فرحتها ما تصيح وانسحب هايف عشان ياخذون راحتهم وطلع وهو يشوف ابو نجد للحين متأثر واتجهوا له حسين ومحسن يسلمون عليه

مطلق : توكم مسلمين!

حسين: لااااا هذا حضن فرح

محسن: حمدلله على سلامة نجد

هايف: الله يسلمكم

ابو زيد: تعال تعال تبي تعلمنها وش صار بالضبط

هايف : ابشروا بس ننتظر احد بيوصل

هايف اللي كان متصل بزيد يجي ويجيب ريوف معه بما ان فايز وعمه مشغولين مع ام فايز ولطيفه عشان الزواج

واتصل بمؤيد وعمته يجون

وبعد ساعه الكل كان موجود والكل ماهو مصدق والكل فرحان

لكن هايف اللي ترك الكل اول ما وصلوا واتجه لمؤيد وهو يبوس راسه ويحضنه وطال هالحضن اللي كان يتخلله كلمات شكر وامتنان من هايف لمؤيد اللي انزعج وابعد هايف بضحك: ماتعودت عليك محترم ياخي سيبك ما هالكلام ولا اسمعك تعيده

هايف ضحك: حبيبي والله

مطلق اتجهه له وهو يسلم عليه وقبل يتكلم ويشكر مؤيد فهم مؤيد وقال مؤيد: هالمره انا بقول اسكت لا تقول شي

حسين: ههههههههههههههههههههههههه ههههههههههههههههههههههههه هههههه شعلييييه يا مؤيد اشوف تزبد لاخواني

مؤيد: ايوه ايش تبغى انت

ابو زيد : تعالوا المجلس

هايف : لا نبي نجلس هنا بالحوش الجو حلو ، وصراحه انا ودي كلنا نجتمع عشان اقول اللي بقوله

وفي ظرف 10 دقايق انطلقوا العيال يفرشون والكل جلس وكان هايف لحاله اللي واقف وابتداء يقولهم كل شي عن العمليه وصح الكل عاتبه بس عطاهم تبريراته

زيد : الحمدلله اجل هم ياربي وانزاح والله يديم راحة البال

هايف اللي اول مره يفصح عن ابياته الشعريه قدام الكل : امين امين

واليوم بقول بيييت ياربي للك الحمد قدرت اقوله وانا اعنيه فعلا ومتأكد منه

( ما علي من عقب يومي ذَا خلاف ‏ولا على كتفي من الدنيا ثقيـل"

اختلفت الردود مابين ( صح لسانك ، والله يتمم عليك الراحه ، والله يزيدك من فضله )

جلس هايف بعد ما انه انهى اخر كلامه وقال : وان شاء الله اليوم بيكون فيه عشاء لسلامة عيون نجد

ابو نجد : هاذي يا ولدي ابي اطلبك اياها انت كفيت ووفيت وخل الباقي علي

هايف سكت شوي بس قال: اجل تم

واخذ بحضنه هايف الصغير وهو مبتسم

مطلق : عاد دام هالايام ياربي لك الحمد ايام فرح باكر ان شاء الله نسوي تمايم هايف

الكل أيد لهم وبعدها افترقوا والرجال والحريم وكلٍ رجع مجلسه

وبعد الغداء طلعوا العيال يعزمون على العشاء

................••............