وفي السوق

كان هايف وابو نجد متوسطين الناس اللي يسألون عن التفاصيل وكان هايف يرد وكان على يمين ابو نجد واللي يشوفه يقول ولده

كل هذا تحت انظار ابو راضي اللي وقف وهو يأشر للعمال يقفلون المحل بعد ماكان يسوي جرد نهائي وهو مقرر يهجر الديره نهائياً

كان هايف يناظره وهو صح كارهه من كرهه لراضي بس ما قدر ما يرحمه عطى فلاح بيالة الشاهي اللي بيده وطلع متجهه له

هايف : سلام عليكم

لف ابو راضي يناظر هايف بهدوء : هلا وعليكم السلام

هايف : كيفك يا ابو راضي ان شاء الله بخير

ضحك ابو راضي باستهزاء: انا عايش ! انتم كيفكم مبسوطين

هايف حس ان كلامه مجوف لكن تجاهل وهو يقول : اشوفك تعزل ماودك تحضر العشاء

ابو راضي مد يده يخبط على كتف هايف: كثر الله خيرك والله يخليك ظلٍ ظليل على نجد لكن انا معاد لي بهالديره مكان !ولا لي بينكم وجود

هايف : بس حنا قبيلتك وربعك؟! وشلون مالك بينا مكان

ابو راضي : يوم عرفتوا انكم قبيلتي وربعي ؟! ماعرفتوا تحترون عشان خاطري وتقديرا لولدي لللي ما كمل سنه ؟ وانتم تزفون افراحكم وليتها كانت بعيد لا قدام عيني وترقصون على عرسك من ارملة ولدي وجاي تعلمني انكم ربعي وانتم مافيكم اللي قال ابو راضي للحين ماجبر عوقه !؟

اهتز هايف من كلامه لكن استفزه بجمله ( ارمله ولدي ) رفع يده ينهي الكلام: محد مستهين بحزنك وكلنا معك لكن على ذكر ( ارملة ولدك ) الظاهر انك اكثر انسان تدري باللي سواه ولدك ودفع نجد ثمن تعاني منه مثل معاناتك بالضبط ! وان كنت تلومنا إنا نزف الافراح !لازم تعرف ان اللي خسره راضي نجد كبييير كبيير وتعبنا لين قدرنا نتعداه ونعوضه ولا توقع بنعدي هالامر ببساطه ابد ( لكن ولدك والله يرحمه ، وانا اقول بدال ما تلومنا اعرف شي يريح ضميرك على كبر اللي سواه بنجد تراها مسامحته )

طلع هايف اللي ندم انه راح له يبيه يرجع معهم وتمنى لو خلاه يروح وبطقاق

اما ابو راضي كان كلام هايف كفايه عليه وهو للحين ماهو مصدق ان راضي سوا اللي سواه

ركب سيارته وترك كل شي خلفه وفي دكانه سبيل وصدقه لراضي

..................••............

وبالليل كان اجتماع الحريم بييت ابو نجد

واكتظ البيت بالداخل والطالع ودخلت غزيل تركض فرح وهي تحضن نجد : حمدلله على سلامتس والله اني بغيت اتوفى من الفرحه جعلها اخر اوجاعتس

نجد : امين يا غزيل يا حبيبتي

سلمى اللي وصلت من شوي وكانت تسلم وهي مبسوطه وتنتظر متى بتقولهم انها حامل

اما اديم كانت جالسه بطرف وهي تستقبل الحريم وهي متورطه من هالوضع اللي مالها خبره فيه

وهي كل شوي تحشرها وحده بمبلغ وتحلف على اديم اللي ماكانت تقدر ترد بس تقول ( الله يسلمتس )

.................••............

في بيت ابو زيد

كان الحوش كله مفروش والرجال كلهم هناك والشباب كلهم يشتغلون

وركض مطلق يمسك مؤيد اللي قرر انه يدرعم ويصب المويه بالطاسات وطبعا كان صعب على مؤيد طالما انه

ب (قربه) وفتحها وتسكيرتها صعبه يا دوب عيال ابو زيد يعرفون لها ومن جانب ثاني كان ابو زيد لو يشوف قطره وحده بس على الارض بيحوسهم والقربه بذات من عادات ابو زيد اللي ما تنقطع بالصيف

مسكه قبل يفتحها: يا ابن الحلال وش تسوي

مؤيد: والله اشتهيتها هالمويه وقلت اصبها

مطلق : تكفى يا ولد ابوي عيونه علينا فكنا من العبط مب وقته ودك بها ابشر اصبها لك بس لا تقربه وانت تعرف وش كثر غالي على ابوي وحساسه لو تطيح ولا شي بيمصع ابوي اذانيك

مؤيد : وريني طيب كيف اسوي !

مطلق اللي بحذر تام فتحها وصب المويه ورجع يسكرها

مؤيد: والله ماعرفت

هايف ضحك: ولا بتعرف لان هاذي يدرسنا عليها ابوي 10 سنين ويالله يالله فقهنا فيها وزيد للحين مايعرف وكل مره يأكل هواش من ابوي

مؤيد: يا حبيبي بلاها ! دام فيها هواش من خالي

حسين: يا عيال يلا يلا القهوه قضت

توزعوا يصبون القهوه

................••............

واخيراً هالليله شارفت على النهايه كانت حلوه حلوه مره نجد اللي طلب ابو نجد انها تنام عندهم ولا قدر هايف يرده وهو ماوده يبعد عن نجد بس ماعاد في يده شي

اما مشاري اللي اتجه لهايف وهو يعطيه السلسال : هاذي امانتك وانا برجع

ابو زيد : وين وين يا مشاري نم هنا

مشاري : الله يسلمك يا عمي بس والله عندي شغل من بكره بدري بالرياض يادوب ألحق

مطلق : لا تطلع مع الطريق وانت تعبان نم واصحى قبل الفجر وروح

مشاري : لا الحين مصحصح وان شاء لله تساهيل

زيد: اجل انتبه لنفسك

مشاري : ابشر

لف بهمس لهايف: ناد لي سلمى بسلم عليها واروح

هايف :هههههههههههههههه لا ياحبيبي حنا ماعندنا لقى احبه لو سمحت لا تخرب بنتنا

مشاري : ترا بمحطك بذا العقال اخلص

راح هايف يضحك ودخل بعد ما نادى واتجهه للمطبخ : سلموه روحي لرجلتس يبيتس

سلمى: وينه!

هايف: بالحوش الخلفي

طلعت سلمى وجلس هايف بتعب جنب امه وهو يشوف سلطان ولد ريوف وعنود بنت شريفه ورند بنت زيد حواليها وعبود جالس بعيد بضيق

هايف: خير عبود وش فيك زعلان

عبود وقف بزعل واتجهه لهايف يجلس بحضنه :كل البيت صار ازعاج وكله بزران

هايف ضحك وهو يبوسه: طيب ! مب المفروض تفرح بتستانس معهم وتلعب معهم

ريوف : يحق له يضيق بعد ماكان هو بلحاله ومدلل العايله والحين محتارين في البزارين ماشاء الله

ميثى بضحك: اوه الغيره عنده لا احد يكلمه

هايف : بس ابد ولا تزعل نروح الحين للبقاله وخلهم يجلسون هنا

عبود ضحك وهو يقول : ايه يجلسون بس هايف الصغير ناخذه

ضحك هايف: هذاك يا حبيبي ما يصير يطلع معنا اذا كبر ناخذه

اخذ عبود وطلع

................••............

في الحوش

كانت سلمى ومشاري واقفين ومشاري يوصيها على نفسها

سلمى: طيب اجلس لين نقولهم

مشاري :والله ماعاد معي وقت انتي تعلميني وش بيسوون

سلمى: زين انتبه لنفسك والطريق و...

كمل هايف اللي جاء وهو يضحك : واتصل فيني اذا وصلت وانتبه لعيونك والحريم وغض البصر

لفت سلمى بضحك وقال مشاري: وش جابك يالنحس

هايف: جيت افزع لاختي لا تلعب عليها بكلمتين

سلمى: ماعليه لا توصي تراي ذيبه

مشاري : اشوفتس قلبتي علي

سلمى ضحكت هايف: المهم ودتس بشي من البقاله مب اذا رجعت تقولين ابي

مشاري : ايه ياحبيبي وش وراك كل مابغت شي سووه وش فايدتك اخو

هايف مد يده يخبط كتف مشاري بقوه وصرخ واركضت سلمى وهي تمسح كتفه وطارت عيون هايف : اخسس يا سلموه

مشاري ضحك:خلاص ماعاد يوجعني شي

هايف: لا تحوم كبدي انت وياها

مشاري : اجل خلوني اتسهل

الكل : الله يستر عليك

وبعد ماراح قربت سلمى وسحبت يد هايف تعد عليها مثل ما تعود وهي توصيه باللي تبيه

وطلع هايف لكن قبل يروح رجع يناظر شباك نجد ببتسامه وخر عبود وهو ياخذ الحجر ورمى الشباك

................••............

عند نجد بعد ما جلست مع امها وابوها وهي مشتاقه لجلستهم طلعت بعد ما ناموا وبدلت ووقفت قدام مرايتها تمشط شعرها وابتسمت وهي تناظر المشط وهي تعودت على يدين هايف هو يمشطها وضحكت اول ما سمعت صوت الحجر فتحت الشباك مسرعه وهي مبتسمه وشافته واقف وعبود معه

ضحكت وهي تتكي على الشباك : رجعنا للايام الخوالي

ضحك هايف : اشتقنا يالقمرا

نجد ببتسامه : وانا اشتقت لك اكثر

هايف : الله يسامح ابوتس يا شيخه ولا وش له في تفريقنا

نجد : حرام عليك ، هم بعد اهلي ومشتاقين لي

هايف : ااه ياقلبي بس ، المهم ودتس بشي من البقاله

نجد ضحكت: ايه انت تعرف وش احب

هايف : ايييه يا كل ما احب انتي

عبود : يا عموو يلا

هايف : يلا يلا

راح هايف متجهه للبقاله وفي طريقه شرف نويصر اللي نشب له يبي يروح البقاله معهم ومثل العاده اخذه هايف

ورجع هايف ودخل عبود واتجهه لبيت ابو نجد وهو يأشر لنجد تنزل ونزلت نجد اللي فتحت الباب ودخل وهايف للحوش وهو مبتسم

اخذت نجد الاغراض وهي تضحك: وللله ياقصتي مع هالبسكوت قصه

هايف : اصلا صار بأسمي محد ياخذه بالبقاله الا انا

نجد : قايل لمطلق انت عنه!

هايف ضحك: ايه ايه وادري انه عطاتس واحد

نجد: تعجبني الفزعه حتى بالبسكوت

هايف لف يناظر: وين امتس وابوتس!

نجد: نايمين

هايف : زييييين زين

نجد : ليش !

هايف : لفي اشوف

نجد: وشو

هايف: لفي

لفت نجد وطلع هايف السلسال من جيبه وفتحه ورفع يده وهو ينزلها قدام وجهه نجد عشان يقدر يلبسها

ناظرت نجد بأستغراب : وشو ذا !

هايف : دقيقه

بعد ما سكره رجع شعرها عليه وهو يبوس راسها : انقزي لاقرب مرايه وتعالي

دخلت نجد المجلس ورجعت وهي تضحك بفرح: ما اصدق يا هايف ما اصدق تكفى بس يوم عطني يوم افكر انا وش اجيب لك كل يوم تجيب شي جديد

هايف استقبلها يحضنها: ابد والله لايق علييتس كأنه ما انخلق الا عشانتس

نجد : يجنن مره يجنن

هايف : يا حظه بس

نجد : انا للي يا حظي بالحب العذب هذا

هايف ابتسم : اصبري اصبري باقي شي من مبطي ودي اسويه معتس

نجد : وشو

هايف ناظر ساعته: اسمعي الساعه 1 خليتس قريب الشباك طيب

نجد : طيب بس وشو !

هايف : لا تفكرين بتشوفين بعيونتس

قرب هايف يبوسها وابتعد بعد ما ودعها طلع لبيت ابوه واستقبله مؤيد ومطلق وحسين

مؤيد: يا رجل الانسان قالك يبغى بنته تنام عنده ! انت وش دخلك تروح

حسين : بيبلش عمي مشعل والله

هايف : اقول اذلف انت وياه ازين بكيفي اروح اجلس بكيفي عزابيه لا يكلموني

مطلق : حلو جاء دوري ! الحين كم شهر وانت مرتز قدامها وهي قدامك خلاص ياخي عطو نفسكم مسافه ماينفع

محسن ضحك:اييييه صح يقوله اللي امس طاب مع زوجته النفاس حتى امي عجزت تطلعه

انقلب الموضوع على مطلق اللي يحاول يقطع الموضوت ويبين انه عادي بس ابتلشوه العيال بالطقطقه اخر حدود صبره انتهت بعد ما سحب عقاله وسكر باب المقلط وحشرهم كلهم

.................••............

عند اديم

كانت سلمى جالسه قدامهم وهي تاكل وتسولف

شريفه: الصدژ يا سلمى اشتقنا لصوتس بالبيت

سلمى ضحكت: ايييه قلت لكم

ام زيد: عز الله ياهو خلا من دونتس البيت

سلمى: راجعه لكم بقوه بعد

ريوف : ليه وش عندتس

وقفت سلمى ببتسامه : امي الموقره وعمتي حصه الحلوه وزوجات اخواني المزايين وخواتي السنعات ازف لكم خبر مانيب مصدقته ولاني مستوعبه لذلحين اني انا سلمىووووه اللي اصدع من البزارين ولا احب اصواتهم ولا احب بكاهم وممكن اصفق البزر كف يشل خده اذا ازعجني ايييه نعم بعد هذا كله اعلن اني بصير ام والله يعين عيالي علي ويعوض عليهم

الكل كان يضحك ومحد مصدقها من اسلوبها بس تخصرت سلمى: خييير ورا مافرحتوا

حصه: صادژه انتي

سلمى: ايييه ليه طايحه من عيونكم

شريفه: انتي طايحه من عين نفستس وقفت علينا

اديم وقف بضحك: امانه سلموه قولي الصدق

سلمى: وربي اني حامل وربي

وقفت ام زيد بضحك : في ذمتس

صرخت اديم وريوف وشريفه بضحك ماهم مستوعبين ابد ان سلمى ممكن تكون ام

اجتمعوا يسلمون عليها ويطقطقون ولكن وقفهم عصاة ابو زيد على الباب بغضب: وش ذا الصراخ

وخروا كلهم بخرشه وراحت حصه مستانسه: ابشرك ان بنيتك القعده بتجيب لك حفيد جديد

سكت ابو زيد يناظر سلمى بشك وقال بهدوء: صدژ

سلمى راحت له وهي تبوس يده باحراج: ايه

قربها ابو زيد بفرح وهو يضحك: الله يالدنييييا سلمى الملسونه تبي تصير ام

ام زيد : الله يتمم لتس يا سلمى ويسعدتس

جوا العيال على الصوت وهم خايفين ان ابو زيد قام معصب عليهم زيد: يبه يعورك شي

ابو زيد : لا

مطلق : اجل علامك صحيت

ام زيد : لكم بشاره ماتصدقونها

ضحك هايف وهو يناظر سلمى

مطلق : وشو يمه !؟

ام زيد ببتسامه: ابشركم سلمى حامل

اعتلى صوت ضحك العيال بصدمه زيد : امااااا عاااد

حسين : قلبيي ياويلي ويلاه بموت الحين متزوجه قلبي والحين بتصير ام قبلي

ابو زيد بحده: ماشاء الله ودك تصير ام

حسين تفشل: اقصد يعني بتجيب عيال

مطلق اللي تركهم وهو يضحك اتجهه لسلمى يحضنها: سبحااان الله يالدنيا والله اذكرتس وانتي بزر توتس جيتي ! اجل بيجي يوم وتصيرين ام

سلمى ضحكت: هي كذا الحياه

محسن: مبرووك مبروك واركدي خلاص خلي التنقز عنتس

الكل: مبروك مبروك

سلمى: الله يبارك فيكم

زيد: مانيب مصدق

ابو زيد : اجل مزوجينها عشان يحنطها الرجال

الكل كان كاتم ضحكته ومن مود ابوهم اللي بس يقصفهم

ابو زيد: يلا يلا كل واحد فراشه وانت مطلق مع العيال

مطلق ابتسم بفشله: ابشر

ابو زيد لهايف : وانت !

هايف: سم

ابو زيد: خف رجلك عن بيت ابو نجد ما كن احد له حرمه غيرك كل شوي وانت هناك

هايف : ابشر

راح ابو زيد والكل قام يضحك عليهم وانسحبوا العيال بعد نوبة ضحك وطقطقه على سلمى

................••............

الساعه 1

طلع هايف بعد ماشاف ان العيال ناموا وراح سيارته وهو يطلع البخاخ ورد الباب وطلع رمى شباك نجد اللي فتحته على طول :تاخرت

هايف: نشبت مع العيال ، المهم اللبسي وانزلي

نجد : ليييه !

هايف: يانجد انزلي

راحت نجد بسرعه ولبست وطلعت وهايف واقف عند بابهم

نجد : وين بنروح !

هايف : بتشوفين الحين

مشى هايف وكانت الحاره هاديه والناس نايمه ولا فيه صوت ابد والسوق مسكر دخل وهو يشوف الدنيا ظلام ولا فيه نور الا خفيف من بعيد

طلع الكشافه

نجد : هايف والله خفت

هايف وقف وهو يناظر جدار بين محل ابوه وابو نجد : لا تخافين بس بكتب شي وودي اكتبه معتس ابيه شعار لنا

نجد ضحكت: امانه والله ودي اكتب

هايف :تعالي

فتح البخاخ وهو ماسك يد نجد بيده وابتدوا يكتبون على الجدار ( ‏سادة الحبّ العفيف العذب حنّا.) ابعدت نجد تضحك : يااازييينه الشعار ياهايف

ضحك هايف اللي يمسح يده : صح انه شوي شايف نفسه بس عاد اشوفه يكفي ويوفي

نجد : لحظه لحظه بصوره

نجد بدت تصور وبدا هايف يستعبط ويدخل بكل صوره واخيرا صوروا الاثنين معها وبدوا يجمعون البخاخات

واتجهه هايف لزباله بيرميها ونجد معه واول ماقرب هايف طلع شي كبيييييير مره وهو يصيح فيهم

ومع صراخه صرخت نجد اللي مسكت ذراع هايف بكل قوتها

وحتى هايف اللي انفجع ورمى كل شي بيده وهو يناظر وش ذا الشي لكن ما ميز ابد وش يكون بس اللي فهمه انه لاااازم يهج مسك ذراع نجد وركض وهو يقول : يا نجد لا تصرخيييين يا نجد

نجد اللي مب قادره تشيل عيونها من ورا وهي تشوف هالشي يركض وراهم : ورانا ورانا

وقف هايف قدام بيت ابو نجد ودف الباب اللي كان مردود ودخل نجد وماهمه نفسه واول ما التفت غمض برعب اول ماشاف نويصر هو اللي يركض وراهم دفه عنه بقوه وهو منهد حيله: نووىوويصر ! وش تسوي هناك

نويصر اللي ماعرف هايف ولكن بعد محاولات من هايف عرفه ووقف هجومه على هايف اللي ابعده وهو يهدي دقات قلبه : وش بلاك متوزي بالزباله

نويصر : معك حلاو

ناظره هايف بيأس: لا لا بكره اوديك الناس نايمه رح لبيتكم

نويصر فحط على هايف ورجع مع طريقه وجلس هايف ينظف ثيابه من الغبار وهو يحس من قوة الخرعه راسه ينبض

فتحت نجد الباب بشويش وهي اللي ماتت من الصياح: هايف فيك شي

وقف هايف والتفت لها وانفجع من دموعها ودخل وهو يسكر الباب : لا لا مافيني شي وش فيتس انتي تصيحين!

نجد : خفت والله خفت

هايف : بسم لله عليتس خلاص هدي ، ترا نويصر الخبل

نجد : وش عنده بالزباله

هايف: بعد ما تعرفينه الله يعينه ، ماينام مثل المسلمين ودايم في ذا الخرابات الله يشفيه

نجد : قلبي وقف

هايف غمض : خرب الوناسه الله يصلحه، المهم اطلعي اطلعي نامي بروح

نجد : وين بتروح !

هايف: بيتنا

نجد : لا والله ما تروح وتخليني خايفه كذا

هايف: نجد الله يصلحتس لو يشوفني عمي وش بيقول وبعدين خلي عمي ابوي لو جاء ما لقاني بيمصع اذاني ادخلي يا حبيبتي ما بيجيتس شي

نجد : شلووون انام والله لجلس مفجوعه ، اقل شي اجلس لين انام

هايف : اي والله ؟ واجلس داخل طالع كأني حرامي

نجد : والله مايدري ابوي اذا نام خلاص وبعدين تراك زوجي

ابتسم هايف لهالصفه وطلع مع نجد وقف على الشباك وهو متكتف : الله عليتس ! ماشاء الله على شباكتس على طول على بيتنا

نجد : اييييه هالشباك اللي قطع قلبي وانا اراقبكم من هنا ولا يفوتني ولا حدث من بيتكم

ضحك هايف : لا بس ماقصر كفى ووفى

نجد : يووه ياكثر ما تحمل

هايف : خليه خليه مفتوح وتعالي

انسدح هايف وانسدحت نجد معه ولكن في لحظه انفجر هايف يضحك اول ما تذكر اشكالهم ما استوعبت نجد اول شي بس بعدين انتبهت و صارت تضحك من ضحك هايف المكتوم

وبعد نوبة ضحك نامت نجد وطلع هايف واتجهه لبيتهم

واول مادخل وهو يمشي بشويش ارعبه صوت مطلق : هايف من وينك جاي

هايف : انا ادري قلبي اليوم انطحن من الخرعات

مطلق : وش فيك

هايف : اسكت تكفى لو بعلمك بتموت ضحك بس خلنا ندخل قبل يجي ابوي

دخلوا للمجلس وكان فراش هايف بجنب مطلق وجلسوا وهايف يعلمه السالفه وانفجر مطلق يضحك

مطلق: ههههههههههههههههههههههههه ههههههههههههههههههههههههه هههههه يا ذا رومانسيتك الخايسه يا شيخ احد يروح السوق اخر الليل ومعه اهله مجنون انت

هايف: مب رومانسيه بس هبقه وتورطت اخر شي

مطلق : نم نم والله ان ابوي قايلك ماتطيع

هايف: كم الساعه !

مطلق 3خلاص مابقى لصلاة شي

هايف : اشوى رجعت قبل ابوي يشوفني

مطلق انسدح وهو للحين يضحك وبدى صوت هايف يتلاشى من الضحك لين نام

..................••............

في طرف ثاني

كانت سلمى واقفه بقلق وهي تتصل بمشاري اللي تأخر مادق وولا يرد ومن ساعتين صابره بس عجزت تتحمل اكثر

وطلعت لهايف وهي خايفه وماتدري كيف توصلهم ومؤيد عندهم بس اكيد انه نايم

لفت جلال الصلاة ودخلت لهم وهي تكشف وفتح مطلق عيونه اول ماحس بالكشاف : من ذا

سلمى: اص قصر صوتك انا سلمى

وفز هايف: من من

سلمى: سلمى

هايف: وش فيتس؟

نزل مطلق الكشاف: وش جابتس؟ وبعدين مؤيد هنا ما تشوفين

سلمى رفعت طرف الجلال: هذا وشو ليه لابسته عشان مؤيد فيه فكنا ياخي

هايف: وش بلاتس ! تعبانه فيتس شي

مطلق : يوجعتس شي

سلمى: لا بس مشاري قال اذا وصل بيتصل والمفروض انه له ساعتين واصل ولا يتصل ولا يرد

هايف جلس: يمكن نام

مطلق :ولا راح عند اخوياه

سلمى بصوت متذبذب: بس بيدق

هايف جلس بتوتر من عيون سلمى اللي مغوررقه دموع : دقيقه يا بنت الناس لا توترينا

مطلق وقف وهو يمسك سلمى: وشوله الصياح ! تعوذي من ابليس ما فيه شي

وطلعوا من المقلط متجهين للغرفة مطلق اللي غالباً الشبكه فيها قويه وابتداء يدق على مشاري ومره ومرتين وثلاث مارد

وهنا بدا وجهه هايف يتغير ويضيق وسلمى ماسكه نفسها غصب لا تنهار

مطلق :سلمى اهدي لا يصير لولدتس شي .، تعوذي من ابليس وبعدين ماعنده رقم ثاني

هايف : عنده رقم الشغل بدق هناك

رجع هايف يدق ويدق بس مغلق وانهارت سلمى : والله انه فيه شي

قبل يتحرك هايف رجع جواله يتصل ولفوا كلهم وكان رقم مشاري

هايف: مشاري مشاري انت بخير

مشاري بصوت مليان نوم : اييه ليه

مطلق بغضب : وش بلاك ماترد

مشاري: عجزت اكمل الطريق وقلت اوقف اغفي شوي بس انها راحت علي نومه مادريت بنفسي

هايف: الللللللله... بس يهديك ياشيخ حستنا هنا

مشاري:وللله مادريت اصلا بالقوه قدرت اوقف

مطلق : وينك فيه الحين

مشاري: خلاص قريب الفندق

مطلق لف على سلمى: خلاص بخييير

هايف : سلمى اهجدي خلاص

مشاري : هااايف سسلمى فيها شي

هايف: ابد بغت تموت علينا تحسبك فيك شي

مشاري :لا اله الا للله عطني عطني اياها الله يسامحني بس

عطاه هايف وطلع هو ومطلق وهم شبه متنكدين

اما سلمى اللي من اول ماقال مشاري الو انفجرت عليه وهي تعاتبه بغضب وخوف

الغريب رغم الرعب اللي صار كان مشاري مبتسم : والله مادريت انتي بتحتريني اصلا ما توقعت بتروح علي نومه

سلمى: انت لا تدري لكن انا انهبل هنا

مشاري ضحك: بسم لله عليتس

سلمى: وش يضحك الحين !

مشاري: عاد تبين الصراحه والله دايم متعود اوقف وانا واقوم واقعد ما اعطي احد خبر ونسييييت ان فيه احد صرت اهمه ويخاف علي

سلمى :لا عاد تنسى ازين

مشاري :لا واضح من صوتس انتس تمصع قلبتس من الصياح

سلمى: لا ماصحت بس خفت

مشاري :هههههههههههههههههههههه ايه صادقه ما تصيحين انتي ،بس صدق هذاني دخلت الفندق وانتي روحي نامي تعبتي بكره اتصل فيتس زين وانتبهي على نفستس

سلمى اللي ميته تعب: طيييب

سكرت سلمى وهي مرتاااحه انه بخير وراحت تنام وهي للحين تحس برجفه من الموقف والخيالات اللي مرت عليها

..................••............

ومن بكره الكل

فز على صوت ابو زيد اللي يصحيهم

وقاموا كلهم وهايف للحين يتسحب ولكن فز اول ماشاف زبيريات ابوه اللي شطفت من فوق راسه وطاحت قدامه جلس والتفت وهو متأكد انه ابوه

بس ارتخى اول ماشاف مؤيد اللي لابس بشت ابو زيد ومعه عصاه ويقلد ابو زيد : يادافع البلا من ذا الولد ، قم قم قيلة القيله

وقف هايف وركض مؤيد وهايف وراه ومسكه اول مازحلق مؤيد وطاح ونط عليه هايف وهو يطقه

لكن هالمره رفع راسه صددق اول ماشاف رجل ابوه قدامه واول ماشاف ابوه وخر عن مؤيد بفشله

ابوزيد :عجيييب والله الواحد ماعاد يستحي

هايف:نمزح يبه

وقف مؤيد بفشله وهو يمد البشت لابو زيد اللي اخذه بغضب ورماه على حسين : وده جوا يغسلونه ويكوونه

حسين: ابشر

عطاهم ابو زيد نظره وراح وتركهم ورجعوا يتهاوشون

لين فرقهم زيد: خلاص يا هوه ماصارت

جلس هايف اللي لابس سروال وفنيله وهو يتحسب على مؤيد اللي يضحك لكن لاحظ ان الكل يناظر ذراعه

نزل هايف عيونه يناظر يده وانصدم اول ماشاف اثار اظافير ويد على ( عضده) رفعها يناظرها باستغراب لكن تذكر نجد امس من خوفها كانت شاده عليه بقوه ولا انتبه انها اثرت

محسن بضحك مكتوم: ابوي وشو قايلك امس ؟

هايف رفع راسه : وشو!

محسن: مب قايلك لا تروح بيت ابو نجد

هايف بإحراج : ياااااا ثقل الطينه يا شيخ ، من قالك اني رحت

زيد بخبث: لا تظلمه يا محسن شكلها قطاوة مطلق اوجعت يد هايف

مؤيد قرب يناظرها بضحك: لا يا رجل هاذي يد القوارير

مطلق :هههههههههههههههههههههههه� �هههههههههههههههههههههههه ههههههه وش قواريره

حسين : الظاهر بدال ماهو رفقاً بالقوارير القوارير شلعوا يده

هايف كان يحاول يكتم ضحكته: اقوووول يا سامج انت وياااه يا ابو تفكير منحرف والله لو ماتعقل لقوم بالعقال

كان يتمنى هايف ان تهديده ينفع بس ابد كملوا طقطقه عليه

.................••............

الظهر رجعت نجد لبيت ابو زيد واستقبلها هايف المبتسم على الباب

هايف: يا مرحبا هاه كيف نمتي امس

نجد : والله ماصحيت الا الصبح

هايف : ايه يحق لتس يالمفترسه

نجد :هاه!؟

رفع هايف كمه بضحك: وش ذا !؟

نجد شهقت: هذا مني

هايف : ايه امس يوم تصيحين

ضحكت نجد بفشله وهي تناظره يده بصدمه: والله ماحسيت

هايف ضحك بخبث: عاد والله انا داري لكن العيال ابد مامشت عليهم

نجد حطت يدها على وجهها بفشله: يااااويلي يافشلتي والله

هايف: ماعليتس منهم

نجد: وش بيفكرون الحين

هايف : ويفكرون زوجتي وش عليهم

رجعت نجد تناظر يده بصدمه لكن عادت العاده الحلوه للبيت ورجعت سلمى على مداهماتها دقت الباب وهي متكيه : هاااااااايف هايف هاااااايف

هايف : ياااااهاه يا ازعاج يا صجه يا لجه وش تبيين تراي مب نايم امس والسبه انتي

دخلت سلمى : الله اثرك يومك غاطس عندك نجدوه ليتني داريه وادرعم

هايف: يقالتس ما درعمتي الحين

نجد : وش عندتس شايشه علي

سلمى: والله تراي ما اشوش عليتس الا عشان هايفوه

هايف سحبها من اذنها بشويش : ترا مشاري اللي شاده الظهر فيه مب فيه طيب عشان ما امصع اذنتس اعقلي

سلمى: فك لا تطيح ولدي

نجد: اخس يالولد اللي بيطيح من اذن

سلمى: تعرفين هذا ولد مطنوخ

هايف: خلي الهرج الواجد وش فيتس جايه !

ريوف جت: سلمى مب مرسلينتس تنادين للغداء وجلستي تسولفين

هايف دفها بشويش: حسبي لله عليتس ملهيتنا عن غدا شروف

سلمى: يموت الحين يا حبك للعيشه

طلع هايف وهو يضحك وطلعوا نجد وسلمى

................••............

بعد الغداء فالمجلس التفت ابو زيد

ابو زيد : من منكم بيصوم رمضان عندنا

زيد: انا اول اسبوع ان شاء الله عندكم

هايف: والله يا يبه انا ماظنتي بكون فيه تعرف بكره تقضي اجازتي ورمضان بعد يومين لكن ان شاء الله اخر الشهر

ابو زيد: وانت يا مؤيد

مؤيد: لا ياخالي ما اقدر والله تعرف رمضان جده مانقدر نسيبوه لازم رمضان هناك ان شاء الله قبل العيد بيومين

ابو زيد: اييه زين لا تسيبوه

الكل ضحك على تقليد ابو زيد لمؤيد اللي كان يضحك معهم

محسن: للحين ما اعلنوا رمضان يا يبه

ابو زيد : هو يابعد بكره يا عقبه

مطلق: الله يبلغنا الشهر لا فاقدين ولا مفقودين

الكل : امييين

.................••............

وفي هاليومين

ابتدوا الناس يجهزون لشهر الكريم

ورجع هايف وسلمى ونجد للخبر

وشريفه وريوف واديم لرياض والعمه حصه ومؤيد لجده

وصفى ابو زيد وباقي عياله وابو نجد

في بيت ابو زيد كان مطلق واقف فوق حوض الجمس وهو ينزل مقاضي رمضان

وحسين ومحسن وزيد قدامه ويساعدنه

وابو زيد اللي جالس على وهو معه ورقه ويحسب ويشوف وش الناقص

نزل مطلق بعد ما خلص : كل شي موجود يبه

ابو زيد : الفيمتو كم كرتون

مطلق: اربعه

ابو زيد : يلا ولموا الكراتين عشان نقسم حق الجيران

ابتدوا ينشرون الكراتين ويقسمون

وكانت من عوايد ابو زيد قبل رمضان يشتري المقاضي وكل بيت من جيرانهم يجهز له كرتون بسيط فيه بعض المقاضي ويرسلها

وبعد ما انتهوا حملوها على السياره وابتدوا يوزعونها

.................••............

في الخبر كانت هالعاده بعد عند ابو فرج

وكل الشباب متجمعين بحوشه ويقسمون

هايف : الحين ابوي الظاهر قد وزع فالديره

مشاري: والله ياعمي الله يكتب اجرك

ابو فرج: لاني عارف وش كثر هالمساعدات توسع صدور ناس حتى لوهم مب في حاجتها لكن حق الجيره

متعب : والله عاد حظي اني اساعدك بذا المعروف

ابو فرج: مقبببل اترك الاكل يارجال واشتغل

متعب : ترا كنت مسالم واشتغل كله من هايف جايب كل اكل بيتهم لي

سعود :هههههههههههههه عاد تدري انه يصفي اكلهم عليه

مشاري : ايييه اي شي باقي شوي وينتهي مدته يجيبه لك

هايف: افاااا لا والله لا تصدقهم بس اذكرك بالاكل الزين

مقبل: لو اشك شك واحد بس انك تسوي مثل قالوا بدفنك بالشوربه اللي قدامك

هايف : والله نصابين ماعليك منهم .

ابو فرج : خفوا يلا امسى علينا الليل

متعب بهدوء: ما تدرون عن وليد

الكل ناظره بهدوء مشاري : لا ليه فيه شي

متعب: لا بس اني مستغرب وشلون يغيب كذا

مقبل وخر الصينيه: اشوف سنابه بخير ومبسوط من ديره لديره مادرا فينا

ابو فرج: خلوه بيجي يوم ويعرف وش خسر

سعود: الله يهديه بس

هايف كان ساكت وهو يحس بذنب نوعا ما فهم مشاري اللي اقبل ياخذ الكرتون وهمس: ماعليك منه انت مالك ذنب لو هو مايبي ماكان قدرت عليه

هايف : الله يصلحه

بعد ما زوعوا الاغراض رجعوا ينتظرون السحور

في الخبر في بيت ابو فرج

وتحديداً في مطبخ ام فرج

كانت نجد وسلمى وام فرج يتساعدون

سلمى: يممه احس بكتمه

ام فرج: اتركي الشغل لا تعبين نفسك

سلمى: مب مسألة شغل

نجد: علامتس اجل

سلمى: جالسه اتخيل بيت اهلي ودي اني معهم ضايقن صدري اني مب معهم

ام فرج: يا سلمى هذا حال الدنيا يا بنتي انتي الحين عندتس مشاري ومشاري يبي له اهل بعد

نجد : ماعليتس بنروح نهاية الشهر لا يضيق صدرتس

سلمى: اللي مصبرني ان هايف معي

نجد : حاولوا تعودون ترا هايف بعد ضايق بس بالقوه اهديه

ام فرج: ماعليه تهون ان شاء الله حنا بعد اهلكم

نجد وقفت وهي تسكر على القدر: يلا السحور جهز

ابتدوا يحضرون واتصلت نجد بهايف يجي ياخذ السحور

وجاء هايف الهادي واخذ الصحن وهو يعطيه مشاري وبعد ما نقلوا كل شي وتسحروا كل واحد راح بيته

................••............

في بيت هايف

دخل وهو يرمي المفتاح وجلس

جلست نجد جنبه بهدوء: وش فيك

هايف:لا مصدع بس

نجد : علي يا هايف

اخذ هايف نفس: ضايق من وليد وضايق ودي بجمعة ابوي واخواني

نجد :يا حبيبي يا هايف ابوك واخوانك بتروح لهم بس لا تضيق وهنا بعد اهلك ولا مب انت اللي رافض تروح الرياض عشانهم

هايف: الا بس عاد حنيت لهم والا على الديره انا مالي وطن في نجد الا وطن نجد

ضحكت نجد : لا من يوم بديت تغزل وضعك تمام ! لكن وش مشكله وليد

هايف: ابد قمت اضيق احس اني لو قلت له عن هيفاء كان ماقطعنا

نجد : ياهايف وان قلت له وش بيقول اكيد بيضحي بكل شي عشانه على قولتك يحبها وبعدين بيقول وش سكتك من البدايه وحزتها بيقطعكم بعد فا خله دامه رايح بدون مشاكل

هايف: والله ماعاد ادري وش اسوي لكن الله يعين

نجد : ماعليك ويلا ترا ماعاد بقى شي للفجر ويأذن خلني اجيب لك مويه عشان تجهز لصلاة

طلعت نجد وجلس هايف يفكر لكنه شال وليد من تفكيره بس كلام نجد اللي 90٪ منطقي

.................••............

في بيت ابو زيد

بعد ما تسحروا مع ابو نجد وام نجد والكل راح لبيته يستعد لصلاة الفجر

مر حسين من الصاله يركض للمطبخ

مطلق : بسم لله عليك وش بلاك تراكض

حسين : بيأذن وانا ما شربت مويه

محسن : وش ماشربت توك مخلص جيييييك

حسين: والله بكره بموت من العطش

مطلق : تراك فاهم الموضوع غلط يالطيب ترا مانك بعير تخزن

حسين: اتركني ياشيخ

ام زيد : يا حسيييين تراك بتوجع بطنك من الماء

عبود : انا بعد بشرب كثيير

زيد: عبود انت ما تصوم ولا تشرب كثير ترا ما احد فاضي لك شوي

جاء ابو زيد اللي كان يقرا قرآن : يلا يلا نبي نروح المسجد نلحق مع المسلمين

طلعوا كلهم ولا بقى الا ام زيد وميثى اللي كانوا يستعدون ببعض الاشياء للفطور بكره

..................••............

ومن بكره العصر فالخبر

في بيت هايف اللي ما تعود ابد انه ينام طول نهار رمضان وكان ابوه يهاوش عن هالعاده يادوب ريح بعد الدوام وصحى وكان جالس بالصاله ومثل ما تعود انه يقراء جزئه اليومي اللي تعود ان ابوه يجمعهم بعد العصر ويقرون

وكان يقرا بصوت شبه عالي وهو يسمع صوت نجد اللي تطبخ قدامه بالمطبخ وكان باب الشقه مفتوح وهي وسلمى داخلين طالعين يجهزون الفطور عشان اجتماعهم في بيت ابو فرج

بعد ما انتهى وقف واتجهه للمطبخ ونجد وسلمى يتهاوشون

سلمى: يا بنت مانبي عليها فستق نبي لوز

نجد : ما احب اللوز عليها

هايف: وش فيييكم

سلمى: اسمع علمنا الصدق ولا توقف من زوجتك ضد اختك

نجد: هايف بالصدق لا توقف مع اختك ضدي عطنا رايك الحقيقي

هايف: لحول الله وش السالفه !

نجد:المهلبيه ازين عليها لوز ولا فستق

هايف : ا والله كلها ما تفرق بس الفستق ازين عليها اللوز حطوه على الكريمه

سلمى: اااه يا قلبي اااه هاذي تاليها نسيت اختك اللي من لحمك ودمك وقفت مع زوجتك لا حول لا قوة الا ببالله الله يعوضني

ضربها هايف بضحك: سلموه اللهم اني صايم بس من متى شفتيني اكل المهلبيه عليها لوز!

سلمى لفت بشويش :هو والله صدق بس عاد اوقف معي

نجدد: ماشاء الله عليتس انا اقول روحي لمشاري ازين

شهقت سلمى: يا ويلي

هايف اللي كان يفتح القدور لف : علامتس

ركضت سلمى: نسسيت السمبوسه فالزيت

ركضت هي ونجد لسمبوسه واول ماصلوا رجعت نجد اول ماشافت مشاري بالمطبخ

هايف: وش صار على السمبوسه

نجد: مدري مشاري هناك

هايف بغضب شوي : وانتي الله يصلحتس رايحه بدون جلال ولا شي

نجد: وش دراني

طلع هايف متجهه لبيت سلمى: هييه وش صار على السمبوسه

مشاري اللي صحى من النوم على ريحة شي ينحرق رمى الملعقه: ابد اليوم بتاكل سمبوسه سوداء

هايف:هههههههههههههههههههه� �هههههههههههههههههههههههه ههههههههههه افااا يالرفلا فضحتينا فالرجال

سلمى: ترا بس 4 حبات انحرق خليتوا هالحافظه المليانه وقفتوا على اربع

مشاري: انا اول مره اشوف احد يقلي ويروح يسولف

سلمى: ماشاء الله قلبت علي وعشان قمت اخر العصر على شي ينحرق وانا من الظهر احوس وانت نايم

مشاري . يعطيتس العافيه ما قلنا شي بس عاد انتبهي لو ماصحيت واحترق البيت

هايف قرب وهو يخبط مشاري على ظهره: خير يالنفسيه وش بلاك على سلموتنا واذا احترقت عساه الفطور يحترق كله ولا تضيق سلمى

سلمى: اي كفو افزع

ضحك هايف: ترا مافزعت الا عشان لقيماتس الفنانه

مشاري ضحك وهو منفس لانه جوعان : ايه افزع افزع ورح اجهز ترا مابقى شي

طلع هايف وهو يضحك ورجع مشاري يعتذر لسلمى اللي رضت بسرعه وهي اصلا ما زعلت

.................••............

في بيت ابو فايز

كان الوضع عادي

كان ابو فايز جالس على التلفزيون يسمع لشيخ

وفايز منسدح ويلعب مع ولده

فالمطبخ ام فايز وريوف ولطيفه يجهزون الفطور

اما اديم كانت جالسه بغرفتها تنوم هايف وهي تنتظر مطلق بعد المغرب بيجي

.................••............

في بيت ابو زيد

بعد العصر كانوا متعودين على الحلقه اللي يسويها ابو زيد ويجمعهم كلهم بالمجلس وكل واحد معه مصحفه ووكل واحد يقرا صفحه

وبعد ما انتهوا بدت ام زيد تناديهم عشان ياخذون الصواني اللي من فطورهم مجهزينها للجيران

وكانت العاده بالديره كل واحد يطلع صينيه فيها من الفطور ويوديها لجاره وبهذا الوقت من العصر كل الديره تقريبا طالعين وكل واحد معه شي لجاره

وكانت الجملت المردده بينهم رمضان كريييم

.................••............

في مطبخ ام زيد

اللي كانت تحضر وميثى تنقل لسفره

ودخلوا العيال بعد ماوزعوا

مطلق : بقى شي يمه

ام زيد: ايه الله يعافيك هاذي صينيتين وحده لبيت ام فلاح وغزيل وحده لبيت ام خلف

مطلق لف لحسين بطرف عين: انا باخذ صينية ام خلف حسين خذ حقة ام فلاح

حسين ناظره بحقد واخذها وطلعوا ومطلق للحين يدقه بالكلام وافترقت طرقهم وهم يشوفون زيد ومحسن يستقبلون من عند الجيران

راح حسين وهو يتحلطم من تفكير مطلق ولكن مثل العاده غزيل اللي جايه مسرعه وهي معها صنيتها لبيت ابو زيد واول ماشافها حسين اختبص ولا عرف يوقف وتصادمت الصواني وطاحت

حسين اللي جلس يلملمها وهو يتلفت بضيق : مدري متى بتشوفين

غزيل: لا والله من اللي مدرعم مب انت

حسين: عاد وخري

غزيل : الصينيه ثقيله عجزت

حسين : لحووول راح الفطور

غزيل: موديه لمن

حسين : لكم

غزيل: وانا جايبته لكم

حسين: اشوى اشوى اجل اسمعي نبي نشيله ونذبه للقطاوه ولا من شاف ولا من درا

غزيل : خلاص هات المواعين اغسلهم وارسلهم

حسين : يلا يلا اعتبريه وصل وسلام

راح حسين وهو مايبي يصدق افكار مطلق االلي يلمح لها

اما غزيل اخذت المواعين ورجعت وهي ناقده على حسين

.................••............

اذن المغرب

والكل اجتمعوا على سفرتهم وكانت البدايه على كل سفره

(« ذهب الظمأ وابتلت العروق وثبت الأجر إن شاء الله »

في بيت ابو فرج بعد ما الكل افطروا حطو قهوتكم بالحوش وهم مقابلين مسلسلات بعد المغرب

ومقبل وهايف طايحين بصحن اللقيمات

متعب: بس انت وياه لا يرتفع السكر عندكم

هايف: لا تكلمني يا متعب هاذي لقيمات ما اقاومها ابد

سعود : الراحه حلوه ياهايف اشوفك هه بديت ترجع وتسمن

هايف: والله ماعاد عندي شي يشغلني والاكل ماهو موذي

مقبل: والله انك صادق

مشاري : عطوني معكم وجع

ابو فرج: خلو الحلا واكلو فواكه شوي وشلون بتصلون التراويح من الثقل

هايف انسدح : والله خلاص ماعاد اقدر اقوم خلوني استريح شوي لين يأذن

متعب: اقول قم تبي تموت انت

سعود: قم قم كنس الحوش يمكن تخف

هايف: خلوني اتمتع بالتسدح لو اني فالديره كان واقف بدلتي فوق روس الجماعه واقهوي

مشاري: ااه ليتني اصورك لعمي ينفضك

هايف : وخر بس

رجعوا كلهم ينشدون لتليفزيون واغلبهم متسدحين من التخمه

في الديره كانوا اغلب الجماعه بعد الفطور مجتمعين في حوش ابو زيد ومثل ما قال هايف كان حسين ومحسن واقفين بالقهوه وزيد اللي جاء معاه العود ويبخرهم

في المطبخ نادت ام زيد مطلق: خذ وانا امك رح بخر المسجد نكسب اجر

ابتسم مطلق : الله يستر على هايف كان اكثر واحد حريص على هالشي

ام زيد : الله يوفقه ويسعده يارب

مطلق : عطيني يمه بلحق قبل يطفي

اخذ العود واتجه للمسجد يبخره تجهيزاً لصلاة التراويح ولا كان مطلق لحاله كان اغلب اهل الديره جايين بعد اللي يكنس واللي يعطر واللي يوزع المصاحف

................••............

في الخبر

كان هايف يمشي بالعود على ابو فرج والعيال يبخرهم وبعدها طلع مثل ما تعود للمسجد وابتداء بهالعاده اللي تعودها

كانوا الشباب يناظرونه وهو فيه كثير عادات طيبه ما تركها هايف حتى وهو بالمدينه

وهذا يدل ان التربيه والغرس من الصغر له فايده ...

وفي مطبخ ام فرج كانت نجد وسلمى يساعدون الخادمه لانهم متعودين ان بين رمضان والمواعين والكرف علاقة طرديه

وام فرج جالسه وهي تقسم الباقي من الاكل

.................••............

في بيت ابو فايز

الاغلب طلعوا يصلون التراويح

واديم بكل حماسها كانت تجهز القهوه تنتظر جيت مطلق

وبعد ما انتهت الصلاة دق الباب وركضت وهي تفتح وكان ابوها ومطلق ابتسم وهي ترد السلام

ودخل ابو فايز ومطلق اللي دخل وراه وهو مبتسم وهو مقدم اديم قدامه عشان تدخل ويده على ظهرها

ابو فايز: ماشاء الله زهبتي القهوه يا اديم

اديم : اييه

اخذتها وهي تصبها وكانت تراقب عيون مطلق اللي عيونه تنتقل ما بينها وبين هايف

ابو فايز: الله يخليه لك يا مطلق ياهو بسم لله عليه له حس الظاهر بنفقده اذا راح

ضحك مطلق وهو يحضنه : لا معليك يا عمي انت بس امر فالوقت اللي تبيه واجيبه لك

ابو فايز: يلا هانت كلها اسبوعين وهو عندك وترتاح من عناء الطريق

مطلق ابتسم ورفع راسه يناظر اديم: الله يسهل

ابو فايز: اجل وانا عمك انا بروح اريح شوي ماغفيت عقب الفطور وراسي يعورني وانت اجلس لسحور لا تروح وترا فايز بيجي الحين

مطلق : كثر خيرك ياعمي لكن مقدر اتاخر ان شاء الله مره ثانيه

ابو فايز : اللي يريحك

راح ابو فايز وقف مطلق واخذ الدله من اديم ونزلها : تعالي اجلسي اعرفتس بسم لله عليتس سنعه

ضحكت اديم: هذا جزاي اقهويك

مطلق : طفحت من القهوه وانا جاي اجلس معتس

ابتسمت اديم وهو هي تبعد شعرها : كيف يومكم عسى ما تعبتوا وخالتي ان شاء الله ما تعبت

مطلق : لا والله الحمدلله خفيف واشوى ان ام عبود فيه تساعد امي

اديم : يلا هانت اسبوعين اجي اساعدها

مطلق: ايييه هي بس متى تقضي هالاسبوعين طلعت روحي والله

اديم : لييه

مطلق لف يناظرها بهدوء : سلامتس

تاهت اديم للحظه وهي تناظر عيون مطلق الهاديه لكن صحاها مطلق اللي ضرب خشمها بمسبحته بشويش : وخري عيونتس ازين ترا مانيب ناقص

ضحكت اديم ولفت على دخول ريوف اللي جات تسلم على مطلق وقف مطلق يستقبلها ببتسامه

ريوف : كيفك وكيف الديره وامي وابوي

مطلق : حمدلله مثل ما عهدتينا

ريوف: عسى امي ما تعبت

مطلق: لا ان شاء الله عندها ام عبود

ريوف : اصبر تكفى بحط لك اغراض تاخذها معك

مطلق : اييييه نسيت اللي معي دقيقه امي ارسلت لكم بعد اغراض ونسيتها

راح مطلق يجيب الاغراض وعطاها اديم وريوف اللي جايبه معها اغراض

مطلق: اديم عطيني مويه

اديم: ابشر

راحت اديم ولف مطلق على ريوف : انتي قولي لي وشلونتس عساتس مرتاحه ما تضايقتس ذا العجوز

ضحكت ريوف : لاماعليها ماشيه امورها

مطلق : اتركيها واهتمي بيتس ورجلتس وعمي

ريوف: ماعليك انا منتبهه

مطلق اللي رجع يده لجيبه وهو يطلع منه مبلغ وقبل تحلف ريوف حلف هو: خذي بس هاذي هديه مني لتس ولسلطان واذا بغيتي شي علميني

ريوف: ما تقصر وللله وفايز بعد مايقصر وعمي

مطلق: ادري محد مقصر بس انا اخوتس واقبلي الهديه

ابتسمت ريوف لمطلق لللي مستحيل يجي ويروح ما يعطيها شي

وراحت ورجع مطلق للمجلس يسلم على هايف عشان يمشي وجات اديم: لا تقول بتروح

مطلق : ودي اجلس بس العيال عند فلاح عندهم عشاء وبلحق عليهم

اديم : بكره اذا جيت حط في بالك بتعشى معنا

مطلق : خير ان شاءالله ، اسمعي خذي هذا مصروفكم وان كنتي بعد بتنزلين السوق انتظريني

اديم: لا تعب نفسك انا بنزل مع امي منها اكون مع لطيفه ونجهز لزواجها والعيد

مطلق :زين بس لا تخلين هايف مع الخادمه

اديم: اكيد لا توصي

مطلق قرب وهو يسلم عليها : يلا فمان الله

اديم ابتسمت اول ما هاجمتها ريحة عطر العووود من مطلق المختلطه بعطره القوي اللي يرسم شخصيته الصعبه

وابتعد مطلق وطلع واديم للحين تراقبه وهي ماهي مستوعبه ان في يوم من الايام كانت تكرهه وكانت ممكن ترفضه رجعت على صوت هايف اللي يبكي

.................••............

عند سلمى ونجد

كانوا بشقة نجد وهو يتابعون وهايف ومشاري مع الشباب يلعبون كورة طايره

سلمى: ياربي يالعجز اللي فيني وربي مب قادره افتح فيني نوم

نجد: نامي طيب

سلمى: مافيني اروح البيت

نجد : ليه تروحين نامي هنا

سلمى: لا وين يجي هايف وانا هنا

نجد : يممممه من يستحي سلمى ما اصدق والله لو يدري هايف ليضحك بيدينه ورجلينه من الصدمه

سلمى ضحكت: لا عاد بس يعني الواحد ينحرج شوي ترا مطلق واديم ذابحيني

نجد : ههههههههههههههههههههههه ايييه يعني انتي بهالدرعمه تكافحين الحياء

سلمى: اي والله مجبورين اذا اخواني مايستحون

نجد : تكفيين تراتس مشيبه روس اخوانتس ،وبعدين ترا ماهم كذا الا معتس ولا شوفي يستحون من شريفه وريوف بس انتي يمونون

سلمى: والله مشكله هالميانه اجل خليني بنام

انسدحت سلمى وطلعت نجد ترتب

وبعد نص ساعه رجع هايف اللي دخل وهو مهلوك : نجد

طلعت نجد وهي تناديه بشويش : تعال هنا

هايف تأقلم على طول وقرب وهو يهمس مثل همسها: وش فيتس

ضحكت نجد : سلمى نايمه وخفت تصحيها

هايف رجع طبيعي : بسسسس خبصتيني ، اروح احوسها الحين

نجد مسكته: لا تكفى ضعيفه يالله نامت ، تقول مستحيه انها تنام هنا وتجي وتحصلها

هايف: اخسسسس سلمى تستحي

نجد : صدق او لا تصدق

هايف ضحك بخبث : وهقوتس لييه مستحيه ؟! شايفه شي اجل

نجد طارت عيونها بصدمه : يا ويلي انا ما الومها تستحي دامك منحرف كذا

ضحك هايف ورجع على صوت الباب

هايف: انتظري مشاري اكيد يدورها

راح وفتح : هلا

مشاري: وينها سلمى

هايف : هااه سلمى! ليه وينها مهب في بيتك

مشاري : ياليييل شوف بتسوي ظريف وتمقلب مب وقتك

هايف: والله ماهي هنا

وخره هايف بتمثيل: دور زييين

مشاري انفجع ورجع للبيت وهو يركض ويدورون وهايف بالقوه ماسك ضحكته

واول ماشاف مشاري انهبل ضحك: امزح والله عندي

مشاري : تستهبل ياخبل

هايف انحاش وهو يضحك: ترا يوم حلفت اقصد ماهي هنا عند الباب

مشاري: والله ياهايف لوريك بس اصبر ، نادها اشوف

هايف : والله نايمه تبيها تعال اخذها مالي خلق اصحيها وهي يالله تقوم

مشاري: لا وللله

هايف : والله

مشاري: هيا وخر

وخر هايف يضحك وهو ما توقع ان مشاري بيتجراء ويشيل سلمى قدامه توقعه بيصحيها بس انصدم وتفشل وصار يضحك بقوه

مشاري كان منحرج بس من القهر طنش هايف وهو يدري انه بينحرج كذا اخذها وراح الشقه وسلمى مادرت

اما هايف صفق الباب وهو يضحك

وطلعت نجد:وش فيك

هايف : كل مالي اكتشف ان سلمى تزوجت واحد نسختها

نجد: ليه وش سوى

هايف مر وهو يعلمها بالسالفه ونجد تضحك: يا ويله من سلمى

هايف: اييييه طيب سلموه بتستانس الا بتلقاها حجه تقهرني بها

نجد: يا حبكم للعبط ياخي

هايف : نتسلى

دخل هايف يتروش بعد تعب الكوره وطلع وهو ينسدح بتعب على رجول نجد : تذكرين مره همزتيني

نجد ضحكت وهي تجفف شعره: اييه يوم كنت ماشوف

هايف : اييه الحين طال عمرتس ابي تهمزيني متكسر تكسير

نجد : ابشششر كم هايف عندي

هايف : يابعدهم كلهم ، اسمعي نبي مطلع الديره بالضبط يوم 15 الشهر

نجد : ليه

هايف : ودي انام بالسطح وطبعا بتنامين معي

نجد ضحكت: وييين تخيل والله فشله عمي واخوانك يشوفونا

هايف: ما احد يدري يا بنت الحلال ما احد بينام برا هذا اذا ناموا حنا بنكون فالسطح مب فالحوش

نجد: اهم شي مايطلع علينا نويصر

هايف ضحك: ااه يا نوصير الله يسامحه بس

واستمرت هالسوالف على هالنمط

................••............

وعلى هالروتين الرمضاني الجميل عدت اليوم واليومين والاسبوع والاسبوعين

وهم عايشين اجواء رمضان الجميله الروحانيه الهاديه

ومن طقوس رمضان المتعبه هو الركض بالاسواق تجهيزاً للعيد

واخيييراً بالنسبه لاديم اللي كانت وهي تجهز كانت تستعد لرجعتها بعد النفاس

وكانت هاليوم تنتظر مطلق اللي بيجي ياخذهم

ختمت شكلها بروجها الاحمر الملفت واتجهت لهايف وهي تعطره وتعدل ملابسه

ولبست عبايتها وطلعت كل اغراضها عند الباب

ورجعت تسلم على امها ولطيفه

وابتسمت على رسالة مطلق يقولها انه برا

وطلعت وهي تشوف مطلق متكتف عند سيارته وراح ياخذ الاغراض لكن وقف وهو يبوس هايف ولف على اديم بهمس : ضروري هالكعب اللي يرن بقلبي

اديم لفت بإحراج : يعني

مطلق : اركبي اركبي

اخذ كل الاغراض ورجع يركب وهو مبتسم ولا كانت اديم بلحالها كاشخه كان مطلق بعد

اديم اللي كان من قوة احراجها تحاول تفتح مواضيع: هايف جاء

مطلق : بكره بيجون

اديم : احسبهم اليوم قلت اشوى ألحق على سهرة البنات

لف مطلق وهو رافع حواجبه : والله ! ومن قالتس بتسهرين مع البنات اليوم

اديم تفشلت: مافهمت

مطلق : والله ما اجلس شهر وشوي امتر هالخطوط عشان تجين اليوم وتروحين تسهرين مع البنات خافي الله يا بنت الناس

اديم :لا مب قصدي بس توقعت كذا يوم نوصل يكونون هناك وبتجلس مع هايف واخوانك

مطلق: لا لا ولا حتى بنروح الديره

اديم : وين اجل

مطلق بضحك: بنعتمر

اديم لفت بصدمه : اما عاد ! ليه ماعلمتني

مطلق : ليه ! وش فيها

اديم: لا يعني يس كاشخه وكعب ماينفع لمكه

ضحك مطلق ضحكه لخبطت اديم :والله انتس اجوديه

اديم بشك من ضحكته : لييه ؟!

مطلق : ابد سلامتس المهم لا تضيع كشختس يا جعل ما يكشخ الا انتي

لفت اديم وهي تحس انها تعرف هالشارع وغمضت بضحك واحراج اول ماشافت فندق زواجهم

مطلق : عطيني الولد وشرفي يا حبيبة عيوني

اديم نزلت بحرج وهي تمشي جنب مطلق اللي ما توقعته ابد مرتب كذا كانت فعلا مصدومه من التجهيز

وهي لا مره طرا لها من كثر ما حفرت في راسها امها ان مطلق بدوي طعس مستحيل يفاجأتس بيوم من اليوم او يرتب كذا

لكن انصدمت مدت يدها ليد مطلق اللي ماد يده لها وهو كأنه يقراء افكارها....🌚

.................••............

عند هايف ونجد

اللي توهم يرجعون من السوق رمى هايف الاكياس بتعب وارتمى على السرير

نجد : يمه انكسر ظهري

هايف: حمدلله قضينا

نجد: حمدلله ، بس انت ماخلصت

هايف: لا انا ثيابي قد فصلتها وبكره اخذها بطريقي وباقي الاغراض اروح مع مطلق ونخلص

نجد : زين ، يالله للحين ما خلصت الشنط ولا جهزت شي

هايف: اول شي شوفي هاللبس اذا مضبوط

نجد اخذت الاكياس ودخلت تبدل وتلبس وهايف لجنة تحكيم وبعد عرض متعب اخذت الملابس العلامه الكامله من هايف

نجد : يعني كذا خلاص

هايف: خلاص بس باقي هالفستان انا اقول خليه هنا

نجد : ليه !

وقف هايف وهو يوجهه نجد للمرايه: انتي تشوفين هالفستان يصلح لحريم!

نجد ناظرت الفستان اللي صح كان ماسك مره واغلب ظهره مفتوح : يعني اذا على ظهره شعري يغطي

هايف كان واقف وراها وهو يناظر الفستان بتمعن : افتحي شعرتس اشوف !

فتحته نجد ولف هايف وهو يصفق : والله لو مدري وش يصير ما تطلعين لهم كذا

نجد : ليييه

هايف : يعني ما تشوفين انتي

نجد كانت متعوده على هالطريقه فاللبس ولا عمرها فكرت ان مثل هاللبس ماينفع لانها تششوفه بنظرة بنت وحتى لو شافت احد لابسه مايفرق معها : صح شوي ضيق بس عادي

هايف ابعد شعرها ومد يده يمررها على ظهر نجد :يعني عادي يكون ظهرتس مكشوف

نجد : قلت لك شعري

هايف ضحك : خير ان شاءالله ، شوفي يا حبيبي لو ودتس بهالفستان مره اللبسيه قدامي لانه اذا ما تشوفين فيه شي انا اشوفه ينشششف الريييييق

التفت نجد تناظر هايف بخجل لكن ماطاولت نظرتها له وهي ما تدري هالفستان قد ايش خبص هايف

.................••............

في بيت سلمى

اللي كانت تستعد انها تروح مع هايف ونجد وكانت مخلصه اغراض السوق من بدري

كانت ترتب شنطتها وهي تسولف مع مشاري اللي كان يقيس ثيابه للعيد

سلمى : بتجي لديره صح

مشاري : اكيد مايبي لها قاريٍ يقرا ، تبين العيد يمر ولا اجي اعيد عليتس ما بعد انهبلت

ضحكت سلمى: اييه اشوى

مشاري : بس هاه مثل ما وعدتيني تعقلين وتتركين محارش العيال تراهم ينسون انفسهم مع المزح

سلمى: افا عليك انساهم ابوي واقف لهم عندي

مشاري :الله يقويه

سلمى: المهم عاد انت اذا جيت يرحم والدينك دق مابي اختبص مثل هاذيك المره

مشاري: ابشري على خشمي

سلمى بعدت وهي ترجع تجهز اغراضها ولفت باستغراب: غريبه مالهم حس نجد وهايف

مشاري :ما اتوقع رجعوا من السوق

سلمى : عااد نجد ناسيه اغراضها عندي خلني بشوف هم فيه او لا

مشاري: لا ما اظن انهم جو انا موصي هايف باغراض لو جاء بيناديني

سلمى:اجل انا جعت تبي اسوي لك معي شي

مشاري: تكفين سوي كل شي الا اللقيمات ارحمي كرشتي اللي انفجرت

ضحكت سلمى: ماعليك ما تأثر مزيون ماشاء الله

ضحك مشاري وراحت سلمى تخبص اللي يطلع بوجهها وهي ما ودها تخبص بالحيل مافيها تنظف من جديد وهي بتسافر

................••............

في الديره في بيت ابو زيد

كانت ريوف وشريفه موجودين وهالمره كانت سفرة السحور جماعيه بما ان ميثى وزيد مب فيه

ابوزيد : وينه مطلق

ام زيد: راح يقول بيجيب اديم

ابو زيد: ليه ما انتظرتوا بالسحور

ام زيد: يقول لا تحسبون ماراح الا متأخر ولا يمديه يوصل قبل الاذان

ابو زيد : اجل الله يسترعليهم، وهايف متى قال بيجي

حسين: يقول بيوقع بكره ويجي يعني قبل الظهر هنا

ام زيد: وسلمى معه

ابو زيد: مشاري بيجي

شريفه: لا تقول عنده شغل

ابو زيد: زين

بعد السحور افترقوا وشريفه وريوف ينظفون بالمطبخ وهم يستعدون للفطور الكبير اللي مسويه ابو زيد بكره وكان الكل بيكون موجود بما او العيد باقي له 7 ايام

................••............

ومن بكره

جاء هايف وجاء مطلق وجت العمه حصه وجاء ابو فايز ولكن فايز وامه ولطيفه ماجوا ينتظرون قبل العيد بيومين ويجون لان زواج لطيفه 3 ايام العيد

وبكذا يكون بيت ابو زيد مكتظ بالناس

ومن الظهر كل البنات اجتمعوا بالمطبخ وهم يتساعدون

اما الرجال كانو بغيبوبة النوم وتعب الطريق

ولكن في ثواني نفظهم ابو زيد يقومون ويجهزون

وتقريبا كان كل واحد يمشي ولا هو طايق الثاني وبعد ساعه اتفكت العقده وبدوا يصحصحون ويسولفون وكانوا يسمعون لسوالف مؤيد عن رمضان جده وهايف ورمضان الخبر

وبعد ما صار الحوش جاهز ناداهم ابو زيد للحلقه وجلسوا متعودين وجاء معهم ابو نجد

.........••............

وفي المطبخ

وخرت سلمى بضيق من ريحة اللحم

ام زيد: وش فيتس

سلمى: تكفين يمه مقدر اكمل احس بغثيان من ريحة اللحم

شريفه: روحي طيب هناك انتي اصلا يالله بنفستس اجلسي مع البزارين

اديم: روحي يالسنعه ترا علمتنا نجد بالسمبوسه

سلمى مرت نجد وضربتها: انتي فضيحه

ضحكت نجد: عشان ما تهدديني

ريوف : الظاهر من الكوارث انكم اجتمعتوا

شريفه: لا تنسين هايف معهم

ام زيد: الله يعينه مشاري عليكم

سلمى ضحكت: صح كان يستغرب بس الحين صار اخس منا

سلمى رجعت تجلس بعيد وهم يعطونها البسيط

وبعد شوي صار وقت هجوم العيال على للمطبخ وهم اغلب اسألتهم ( وش سويتوا ! ليه ماسويتوا ! السمبوسه ماتكفي ! وين اللقيمات )

ام زيد: يا عيال الله يصلحكم اللي سويناه خير وبركه

شريفه: ترا ما احب هالحركه يحرم والدينكم احترموا إنا في المطبخ من الظهر

مطلق : ما قلنا شي ترا عشان تعصبون

هايف: هاذي الشعيريه من سواها

ريوف : اديم

هايف : اووووه يا ويلنا شكلنا بننسى الشعيريه من السفره

حسين: هههههههههههههههههه بيموت محسن اذا طلعت شينه

اديم ؛ لا والله ؟ اقول هايف فكني منك ترا كفايه علي سمييك

هايف ضحك: ايييه كفو خليه يلعن خيركم

مطلق ضربه بالملعقه الخشب: كأنك فليتها يالطيب

سلمى: بالله يا مطلق كفخه تراه من تالي ماعاد يقدر الاخوه

هايف : الله يا سلموووه الحين صرت ما اقدر من مادحتس عند مشاري يومتس سودتي وجهي وحرقتي السمبوسه

سلمى: يا ذا السمبوسه

حسين : عشان تعرفين محد بيستر علىيتس الا اخوانتس

سلمى : واااضح تسترون اصلا كله من هايفوه وخبلته ما بقى احد ما درى

ام زيد: وهم اللي قالوا لتس تصيرين رفلى

الكل :هههههههههههههههههههههههه� �هههههههههههههههههههههههه ههههههه

سلمى : ايييه ايه يمه انتي بعد تعالي علي معهم ! ترا هم السلق اللي مناديني اسولف عليهم لكن هين الايام تجيبكم

مطلق : افا والله ماعليتس منهم وانتي اخت مطلق احرقي الدنيا بكبرها ماعليتس

سلمى رمت السكين ووقفت تدق تحيه : والله ارفع لك كل الاحترام والتقدير واعتذر عن مابدر مني في سالف الأوان وليتني جلست عندك يا ابو هايف ولا رحت عند ذا الخايس

مطلق : بشويش يا خلبه في بطنتس ادمي وبعدين اعلمتس ما تطيعين

سمعوا صوت ابو زيد اللي تنحنح وركضوا كلهم بيطلعون لان لو شافهم ابوهم لعن خيرهم

مطلق : الباب الخلفي يا مهبل

وقبل يطلعون قال ابو زيد : انت وش عندك هنا انت ويااه

لفوا وهم مبتسمين: نشوف وش فيه وش مافيه

ابو زيد: كم مره علمتكم !

اسرع له هايف قبل يمسح فيهم البلاط قدام زوجاتهم وهو يبوس راسه: روق الله يخليك لي بس جينا نشوف وش يحتاجون والحين بنطلع نوزع

حسين اخذ السفر وشطفهم مسرع قبل يتهزاء واخذ مطلق التمر وراح وهايف نزل للفاكهه والكل يضحك

وقبل الاذان ب 10 دقايق الكل وصل والسفره ممدوده وابتداء الامام يدعي والكل يأمن

وااذن والكل اجتمع وكان نويصر جنب هايف ومؤيد اللي ماهو مرتاح لنوصير اللي بالقوه يسيطر هايف عليه

وبعد الفطور والصلاة كانوا عيال ابو زيد ومؤيد وباقي الشباب بنفس ما تعودوا يباشرون على الناس وابو زيد جالس بينهم وهو الا يغصبهم ياكلون

هايف :مطلق خذ القهوه بروح المسجد

مطلق : باقي وقت

هايف : بروح اتروش واجهز يا دوب اخلص

مطلق ابتسم وهو يخبط كتف هايف : فاقدينك المسجد واهله

ابتسم هايف : والله اني اشتقت لهم

اتجهه هايف لغرفته بعد ما نادى نجد تجهز اغراضه

وبعد ما طلع وقف يضبط شماغه وجات نجد مبتسمه وهي معها العود وقربت تبخر هايف المبتسم : اووه يا كثر مانيب مشتاق لتروايح بمسجدنا

نجد : ايه يقولون سيرتك بالمسجد عامره

هايف: الحمدلله هذا من فضل ربي

نجد : الله لا يغير عليك

هايف : امين

طلع متجهه لامه اللي مثل العاده تنتظرهم بمبخرة المسجد اقبل عليها مبتسم وهو يبوس راسها: جعلها يدين ما تمسها النار

ام زيد: امييين وياك يا حبيبي

هايف : عطيني يمه

اخذها وطلع مسرع للمسجد وهو يسلم على اهل الديره ودخل المسجد والكل يناظره

ضحك ابو ثامر : اخيراً ما بغيت تعود علينا يا ولد الخبر

ضحك هايف وهو يمرر عليهم العود : هاذي الدنيا لكن هذاني جيتكم

ابو تركي : عوداً حميداً ياهايف

ابتسم له هايف اللي ثبت المبخر بزاوية واعتدل واخذ مصحفه