في بيت ابو زيد بعد التروايح وعلى الساعه 12

الكل كانوا مجتمعين بالصاله عشان يتابعون مسلسلهم واللي منسدح واللي جالس واللي يتقهوى واللي يلعب مع عياله

كان هايف منسدح بالنص تحت التلفزيون ويساره حسين ويمينه مؤيد

ومحسن جالس جنب امه وعمته حصه ويتقهوى معهم

اما مطلق جالس بطرف وهو يلعب مع هايف الصغير

وفي غرفه تفتح على الصاله كانوا هناك الحريم

وفي نص الحماس للمسلسل صرخوا العيال اول ما انقطعت الاشاره

هايف : حسسسسين قم تكفى سوه

لفوا على حسين اللي كان بسابع نومه

محسن: قم يا هايف انت بسرعه راحت الاحداث

هايف :ياللللله

وقف هايف وهو يقول : اذا صلح قولوا لي

مطلق: رح يلا

طلع هايف يضبط الصحن وكل ما حرك قال : هاااااه

وصاحوا : لااا

للمره الخامسه :هاااه

الكل : ضبط ضبط لا عاد تحرك ضبط

رجع هايف ورجعوا يتابعون بإنسجام ولكن في لحظة سمعوا صوت ابو زيد طفوا التلفزيون بسرعه وتفرقوا لان ابو زيد يهاوش على المسلسلات

ووتجمعوا على القهوه كأنه شي لم يكن لكن من حشرتهم جنب بعض واضح مسوين شي

ابو زيد: سلام عليكم

الكل : وعليكم السلام

ابو زيد : علامكم

محسن: مافينا شي

ابو زيد التفت لحسين النايم : وهذا علامه

ام زيد: تعبان وغفى

ابو زيد:هايف قومه ينام هناك

هايف: ابشر

وقف هايف يصحي حسين وخلاه يروح للمقلط ورجعوا للقهوه ولكن هايف رجع لسمييه بحب

وراح ابو زيد ينام لين السحور

.................••............

والعيال طلعوا يلعبون واما الحريم فرشوا بالحوش ينتظرون صلاة القيام

والساعه 1 بالضبط الكل كان هادي والديره كلها تعم بصوت الشيخ اللي قال ( صلاااة القيام أثابكم الله ✨)

وبعد هالاوقات الروحانيه رجعوا العيال للبيت

رجعوا هايف ومؤيد يتهاوشون على هايف الصغير وكل واحد يسحبه وهو يصيح

لين اخذه مطلق : ذبحتوه وجع

هايف: الله صار عنده ولد وابلشنا

مؤيد: من زينه ولدك يعني!

مطلق: خلوه يا رجال قطعتوه

راح مطلق وهو يضحك على نظراتهم واتجهه لاديم وهو يعطيها هايف الصغير : خذي يصيح

اديم اخذته وهي تحضنه وهي تحاول تسكته

مطلق اللي كان متكي على سريره : يمكن جوعان

اديم: ايه شكله

جلس مطلق ولفت اديم : طيب!

مطلق : وش !

اديم: مطلق يرحم اهلك اترك العباطه ولا تفشلني كذا ولا تناظر ترا ما عاد اتحمل صياحه

مطلق اللي ضحك وهو ناسي انها تنحرج منه اذا جات ترضعه : يابنت الحلال مانيب مناظر سكتي الولد لا تجي امي تغسل شراعنا

لفت اديم عنه ومطلق مازال يضحك وتوقعته يعابطها بس لفت على هدوء مطلق اللي انسدح وهو يحس بتعب من الظهر وهو يدور وكانت النيه بس ينسدح ولكن راح بسابع نووومه

ابتسمت وهي تناظره بحب وقفت بعد ما نزلت هايف تبي تلحف مطلق لكنه فز : وش فيه وش صار

اديم: بسم لله عليك مافيه شي

جاهم صوت هايف اللي كان جالس على السفره برا هو ومؤيد وابو زيد ومحسن وحسين النايم: ياااامطلق يلا اللحق السحور

ارتمى مطلق بضيق ووقف بتعب : تعالي لسحور

اديم: يلا

طلعوا لسحور وبعد السحور بعشر دقايق اذن الفجر وبعد الفجر الكل نام

................••............

وفي اهم الليالي ليلة العيد

على الفطور الكل كانوا مشغولين بالتلفزيون والكل ينتظرون المذيع يعلن

واخيرا (فأن المحكمة العلياء تقرر ان غداً الجمعة هو اول ايام عيد الفطر الفطر المبارك)

فزوا كلهم يضحكون وهم من غير اي تصنع تغمرهم فرحة العيد

والكل قام عن السفره والكل انتشروا يشوفون اشغالهم

وطبعا الشباب كانوا دايماً وابداً اخر شي يسوونه ينزلون يشترون ملابس العيد

اما ابو زيد وزيد وابو نجد وابو فايز اللي نزلوا مع عبود يشترون حلاوة العيد واغراض العيد

و البنات استنفروا ينظفون وهم متقسمين ناس تنظف المطبخ وناس تنظف مجلس الرجال وناس تسوي حلا العيد ومعمول العيد وفطايره واللي تغسل الملابس وتكوي وتجهز

واهل الديره اللي تضج بالسوق تكبيرات العيد وناس تنادي على الزكاة وناس تنادي على الحلاوة والرجال في سوق الرجال

كانوا العيال كلهم واقفين ويقلبون بالاغراض

مؤيد:شوفوا انا حبيت هالقميص

حسين: مؤيد خاطرك تعيد بقميص!

مؤيد: لا بس عشان ألبسه معاكم فالعزبه وكذا

مطلق : اسمع الله يرضى عليك خذ لك ذا الاسود راكد وضابط اما ذا الملونه بيقطعها ابوي على ظهرك

هايف لف وهو يقيس الطاقيه والعقال : عيال ضابطه!

حسين: الله يصلحك انت بعد وش ضابطة تراها طاقيه انت اللي تحس كبر راسك خذها

هايف اللي عفط العقال وهو يمحطه بس ولف حسين بغضب وضحك هايف: كذا مضبوط

مطلق اللي كان يفتش في الملابس الصغار: تعالوا شوفوا ذا يجي على هايف

مؤيد: يا رجل خاف الله بيبي عمره شهرين تلبسه ثوب

حسين : اكتشفت ان المشكله بأسمه والله

هايف رفع العقال: ودك بثانيه

فايز : اصلا مافيه قده

هايف : خله يكبر بس والله للبسه بشت اخيطه بيدي

مطلق: كفوو

محسن :يلا اخلصوا ترا باقي ورانا شغل وحلاقه

مطلق : اي يلا

طلعوا متجهين للحلاق اللي عليه زحمة الدنياا

.................••............

عند البنات

كانت سلمى جالسه وهي تسوي المعمول

ورجعت شريفه بعد : قسم الرجال قضينا منه سكروه لا يدخله أبن امه

لطيفه : ترا نامت عنود ونام سلطان ونام هايف

ميثى: تكفين يا لطيفه خذي رند معهم والله عجزت

لطيفه: هاتيها

طلعت ريوف واديم ونجد من المطبخ: وحنا قضينا من المطبخ خلاص كل شي جاهز لبكره

نجد: وش رايكم نودي كل اغراض الرجال المجلس ونلفها يصير بكره ما نحتاس فيها

ريوف: توني بقوله اجل يلا

اديم : يلا يلا

اخذوها ولفت نجد: ريوف انا بروح لامي بساعدها اذا جاء هايف وانا ما جيت قولي له

ريوف : ابشري

راحت نجد وهي تناظر الديره اللي صوتها يجيب السعاده

اديم: اجل عطوني هايف انومه جوا واخلص اغراض مطلق معاد فيه وقت

ام فايز : ليه وش اغراضه! ما اخذها للكواي

اديم: لا مطلق مايحب

لفت ام فايز وهي مب معجبها والكل لف بطنش لها

العمه حصه : انا وصيت زيد باغراض امس بسوي لكم لدو

سلمى: ايه تكفين يا عمه احس من كثر ما حكيتي بها ودي اذوقها

ريوف : خليني اساعدتس

ام زيد: شريفه الله يعافيتس شوفي اغراض ابوتس

شريفه: ابشري

لفت سلمى على اتصال شرح صدرها وهي ماهي متخيله وشلون بتعيد بدون مشاري اللي كان مضطر يعيد بالخبر وبعدين يجي

طلعت بعيد وردت ببتسامه: الو

مشاري : هلا والله بالملح والقبله

ضحكت سلمى: هلا فيك

مشاري: وش ذا الصوت الرضي والدنيا عيد

سلمى: على طاري العيد وش اخبارك الليله

مشاري : ابد هذاني قاعد اجهز اغراضي لبكره وبروح عند العيال وعيدنا في بيت عمي ابو فرج وطبعا مقبل راح لاخته ومتعب بعد بيروح لاهله ولا باقي الا انا وسعود

سلمى : ماعليكم عيدكم عامر مع ابو فرج

مشاري: هالعيد بذات لا تواسينا صح بعيد بلحالنا بس عاد كلنا ننتظر بعد مانعيد بكره نمشي الديره وكل واحد واحد شي متحمس له

سلمى: وانا بعد عندي شي انتظره

مشاري سكت وهو مبتسم: والله لو ما خاطرتس غالي علي وادري خاطرتس تعيدين بين اهلتس والله ما اخليتس تعيدين بعيد عني

سلمى ضحكت: يا رجال تعوذ من ابليس وبعدين حتى لو كنا عند بعض اكيد بننشغل عن بعض لين بكره فالاحسن نجلس كذا بشوق

مشاري: اوووه كلام كبير لكن يغفر لتس

ابتسمت سلمى وهي تقول لمشاري وش التحضيرات اللي تصير

................••............

في بيت ابو نجد

اللي كان هو بعد يجهز للعيد مع ابو زيد

اما ام نجد كانت تشرف على الخادمه تسوي كذا وتسوي كذا

دخلت نجد ببتسامه: يمه سلام

ام نجد: هلا هلا

نجد : توني فضيت قلت اجي اساعدتس

ام نجد: تعالي اجلسي ماعندي شي الا هالمعمول نسويه والتمر

نجد جلست قدام امها وهي تصب قهوه وابتدوا يسوون المعمول ونجد التمر ونجد تسولف لامها عن جمعة بيت ابو زيد

ام نجد : اسمعيني بكره اللبسي كل ذهبتس ترا كل الناس بتناظرتس وتناظر سلايفتس

نجد : يمه الله يهديتس وش له كل الذهب بلبس على حاجتي

ام نجد: انتي خبله بتفضحينا بيقولون هاذي ماعندها شي وابوها اكبر تاجر ذهب ورجلها في بنك وابوه تاجر بعد

نجد تبي تنهي الموضوع :زين زين

ام نجد بعد سكوت لفت تناظر نجد : اقولتس انتي كم لكم شهر معرسين!

نجد : 5 شهور ليه!

ام نجد : وللحين مافيه شي بالطريق !؟

نجد : شلون !

ام نجد: يعني ما انتي بحامل يا خبله!

نجد : لا يمه

ام نجد: وش تحترين هاه !؟ تبين لين ابو زيد ياخذ ولده ويزوجه

نجد: لا وشدعوه ! ليه يزوجه !

ام نجد: اكيد يبي لولده ظنى وهايف بعد يبي عيال وانتي عجلي عشان تربطين الرجال بالولد ولا يروح ولا يفكر يعرس

نجد بضيق: ابشري ابشري

لفت على اصواتهم برا وعرفت انهم جوا

ونزلت اللي بيدها: انا بروح هايف جاء الحين مايحصلني

ام نجد: اقول اجلسي ! وخلتس ثقيله لا تصيرين خفيفه تطيرين له من اول ما تسمعين صوته واذا ما حصلتس بيموت ! انتي في بيت ابوتس

نجد: يمه بس ما خلصت اغراضه

ام نجد: اجلسي

جلست نجد بضيق وهي قلبها يقرقع وماصدقت جاء ابوها بس جاء ومعه هايف تركت كل شي ووقفت طلعت ببتسامه : جيتوا !

لف هايف لصوت وابتسم ما توقعها انها هنا بس ما استغرب لان اكيد بتجي تساعد امها

ابو نجد: هلا والله ببنيتي

اتجهت له نجد وهي تبوس راسه: هلا فيك يبه

ابو نجد: ماهقينا نحصلتس هنا

نجد لفت تناظر ورجعت تناظر ابوها: ايه جيت اعاون امي

ابو نجد: اجل خليني ابدل واجي اساعد هايف

نجد راحت لهايف: وش بتسوون

هايف : في اغراض يبيني عمي اسويها معه لمبات وخرابيط

نجد : يعطيك العافيه

هايف : يعافيتس متى جيتي !

نجد: يعني من ربع ساعه

هايف: خلصتي مع امتس

نجد : ايه خلصت وبعد خلصنا في بيتكم

هايف ضحك وهو يناظر يدها اللي في اثار التمر وفيها تمره للحين ماسكتها : واضح مكروفه

ضحكت نجد : نسيت اغسل

مسكها هايف قبل تروح واخذ التمره : هاتي هاتي والله اني جوعان

نجد: والله اصبر اسوي لك شي

هايف : لا باكل هالتمره وفالبيت تصلحين

نجد: مافيها شي هنا

هايف كان يكرهه ياكل شي والسبه ام نجد: ادري بس مابي الحين

جاء ابو نجد وابتداء هو وهايف يشتغلون وجات نجد تساعدهم

ابو نجد: نجد امسكي السلم لهايف لا يطيح بكلم

قربت نجد تمسكه لهايف وبنفس الوقت ماسكه رجل هايف عشان مايطيح

وابو نجد يلف ويكلم عندهم وكانت نجد تناظر هايف للي ما عمره قال معرف شي بالعكس كل شي يشتغل فيه ويصلحه سرحت وهي تفكر في احتمال لو ماضحك لهم الحظ ولو ما تزوجوا وش بيصير فيها وبدون ما تحس مررت يدها على اعلى ساق هايف المنطقه اللي خلف الركبه واللي كانت بالنسبه لهايف منطقه يكرهه شي يلمسها ولا شعوريا ينتفض منها ولا كانت نجد تدري فز هايف وزلق السلم وانفجعت نجد ورجعت ورا وتعثرت بالكيس وطاحت وبالقوه تدارك هايف وضعه وهو يحاول يبعد نفسه عن نجد لانه لو طاح عليها بيكسرها كفايه السلم عليها

التفت ابو نجد وهو مصدوم من الدعثه وكل واحد طايح لكن بينهم شوي مسافه صح طيحة هايف قويه لكنه فز واسرع لها وجاء ابو نجد

نجد بعد توجعت بس اخف من هايف وبسرعه قامت تبي تشوف وش صار لهايف

والتقوا بالنص وهم كل واحد خايف على الثاني : فيك شي! فيتس شي ؟!

نجد: مافيني شي صار لك شي

هايف اللي كان موجوع بس عداه ووقف وهو يوقفها : لا بسيطه

ابو نجد: بسم لله الرحمن الرحيم وش صار !

هايف : بسيطه ياعمي تكيت على السلم بقوه وزحلق

ابو نجد: انتبه الله يرضى عليك وعسى ما اوجعك

هايف: لا لا

ورجع يكمل وهو كتفه وظهره بيتكسرون بس مايبي يحسس نجد

بعد ما انتهوا طلعوا متجهيين لبيت ابو زيد

لفت نجد تناظره ملامحه الجامده: هايف امانه فيك شي! اوجعك ظهرك وكتفك صح !

هايف : بسيطه يا نجد

نجد: وش خلاك تطيح انت !

دخلوا بيت ابو زيد وهم يشوفون مطلق ومؤيد يضبطون الحوش

اتجهه للغرفه بعد ما اخذ كيس اغراضه وجلس بوجع

نجد جلست قدامه :ما قلت لي

هايف اخذ يدها يمشيها لين صارت ورا ظهره : همزي كتفي وانا اعلمتس

نزلت نجد اغراضها وقربت تهمزه وهايف يقولها وش خلاه يطيح ضحكت نجد بصدمه: اول مره ادري

هايف : انا ناسيها وانتي ما تدرين عشان كذا انتفضت

نجد : اجل اسفه والله ما انتبهت

لف هايف ببتسامه: وش كنتي تفكرين فيه اول ما لفيت كنتي ساهيه

ضحكت نجد وهو تتكي على كتف هايف : كذا يعني جلست افكر لو ما تزوجنا وش صار ! معقوله اخليك تروح مني كذا

ضحك هايف بقوه نسته وجعه : والله صح انه كان مستحيل بس الحمدلله

نجد : حمدلله

وقفت وهي تاخذ اغراضه اللي جابها وتجهزها وطلع هايف يشوف ابوه وش يسوي ما دام صوته طالع كذا

اول ما طلع شافه متوسط الحوش ويقسم الزكاة

ابو زيد : هايف تعال يلا مع اخوانك وزعوها

اخذوها وطلعوا

ولف ابو زيد: يا بنات وينكم !

جات شريفه وريوف وسلمى واديم ونجد

ابو زيد : سلمى تعالي اخذي هالحلاوه ووزعيها

سلمى: ابشر

ابو زيد : والباقيات خذوا الفواكه هاذي وقسموها

الكل : ابشر

وقف ابو زيد على عصاته وراح يجلس مع حصه وعيال عياله حوله

ومر الوقت والكل يجهز ويعدل ويبدل

وقبل اذان الفجر بنص ساعه كانت حالات الاستنفار بكل البيت والهواش على الحمامات والاستشوارات شغاله وريحة عريكة وخبز ام زيد بكل البيت والقهوه والشاهي وصياح العيال وعبود يلاحقونه عشان يلبس وهو يركض بوناسه بمنشفته

مسكه حسين وهو يصيح: يا ولد استح واللبس

زيد : امسكه الله بس انه يصلحه

ابو زيد: عبود وانا جدك اخلص اللبس ترا بنروح عنك

عبود انحاش وهو يضحك لامه

وابو زيد اللي جالس بالصاله وهو يمشط شعره ولحيته

................••............

عند نجد بعد ما علقت اغراض هايف وانتهت كانت واقفه تسوي شعرها

وجاء هايف وهو لاف منشفته على خصره تقدم وهو يناظر بوجهه : تشوفين شي بوجهي غريب

نجد وقفت ولف وهي تمسك دقنه وتلف وجهه : لا وشو

هايف : ركزي

نجد: والله ما اشوف

هايف : شنبي فيه شي!

نجد : ا ا احس فيه واحد اطول من واحد

هايف : حسبي لله

نجد ضحكت: من محلق لك

هايف: الحلاق بس مدري وش فيه

نجد : وش بتسوي

هايف : عطيني عطيني بلبس واروح لمطلق يسويها

نجد : انا اسويها لك

هايف لف بضحك: اخاف تشيلينه كله واعيد بنص شنب

نجد : لا ماعليك

بعد تردد خضع هايف وهو مب مرتاح جلس وجات نجد بالمقص وهي تحاول توازي الموضوع بس اول ما قربت شنب هايف الكثيف ارتبكت يدها وخافت بس قوت قلبها وقصت طرف صغير بس انحرف المقص وابتعد هايف برعب وهو يحط يده على شنبه : طاااار الشنب

نجد ضحكت برعب وهي تناظر وركض هايف للمرايه وهو يدقق شنبه وتنفس براحه اول ماشافه ما اخترب كثير

نجد: اشوف

هايف ضحك بصدمه: يا ويلتس لو خربتيه حزتها والله لقص اذانتس

ضحكت نجد: اشوى يا ربي والله خفت شنبك كثيير

هايف : لا يكون مسويتها عمد !

ضحكت نجد: لا والله

اخذ هايف المقص وهو يضحك وطلع لمطلق ورجعت نجد تكمل

................••............

عند مطلق

اللي كان منسدح وهو منوم هايف الصغير على صدره ويراقب اديم اللي كانت تستعد وهي مستعجله مره: بشويش لا تطيحين

اديم : ماعندي وقت يا مطلق مررره ماعندي وقت باقي على الاذان اقل من نص ساعه وانا ما سويت شي باقي شعري ومكياجي وملابسي وباقي هايف واشياء كثير

مطلق : بتخلصين بس بشويش

اديم رجعت تكمل شعرها وقفت على صوت الباب وهايف يدقه ومؤيد وحسين يطقطقون عليه

هايف: مطللق وييينك افزع افزع

وقف مطلق وهو يعطي اديم هايف وطلع : علامك

هايف: روح شنبي

لف وجهه مطلق يناظر فيه وضحك: من لاعب فيك انت

هايف: والله كنت شاك وانا عند الحلاق بس مدري وش بلاني انسطلت وجيت هنا وعاد يوم بغيت اضبطه خربته

مطلق : خبل انت ما تشوف يوم قاصه كذا!

حسيين: ياحرام يالشنب اللي عرض بطول على واحد ما يعرف يحلق

مؤيد: صراحه يا هايف شنبك هو الوحيد اللي معطيك هيبه

زيد: وهو صادژ لو على وجهك ما فلحت

هايف: اقول قم تقلع انت وياه قم

مطلق : تعال تعال عند نور واضح عشان اشوفك

راحوا بعيد ومطلق للحين يهاوش هايف اللي مل ولف: يارجال مب انا نجد اللي قصته

وخر مطلق المقص وهو يناظره بصدمه: خبل انت ! في راسك عقل ؟ هذا شنب يا ثور احد يخاطر بشنبه وليلة العيد ويعطيه حرمه تسويه ! وش عرفها هي بالقص

هايف: وش اسوي ياخي عجزت اردها

مطلق : الله من الثواره انت وخقتك الدايخه

سكت هايف وهو يضحك ومطلق يعدل له

وجات سلمى وهي تطل : خيييير وش تسوون

مطلق : تعالي تعالي انتي وينتس من امس مختفيه

سلمى : والله صراحه مالي خلق اشوف ولا زول رجال واتذكر مشاري ويضيق صدري

هايف : قايل لك قايل لك هاذي اسحب عليها

سلمى: اقول انت وين اطراف شنبك هاه من ناتفها

هايف: اقول مالتس شغل في شنبي خليه ياخذ راحته

مطلق : وش رايتس تنقزين تجيبين شاهي راسي مصدع والله

هايف: اي والله

سلمى صرخت وفجعتهم ولفو برعب : لا والله

هايف: وجع علامتس

سلمى: الحين مزوجينكم ليه هااه ! ومتخسرين عليكم ليه ! وبعدين ترسلون اختكم الضعيفه الحامل اللي روحها متعلقه ما تخافون الله انتم

مطلق : اص اص اللي يسمعتس يقول قايلين اذبحي ذبيحه

هايف: حبيبي هاذي المفروض يوظفونها بديوان المظالم على كثر ماهي تكبر الامور وتحس انك مدري وش مسوي فيها

سلمى: اها بس

مطلق : اقول تيسري سويه دامتس قضيتي

سلمى: انا ماقضيت بس قلت اتفقد الاحواال

هايف: لو انتس رايحه من اليوم كان خلصتيه

سلمى: خلاص بروح والله يسامحكم بس

لفوا عليها بضحك وراحت وهي تتحلطم ورجعت بعد 5 دقايق وحطتها وراحت تخلص

وافترقوا اول ما صدح صوت الاذان وكل واحد راح يلبس

..................••............

وانتهت فقرة الرجال والكل لبس والكل صاروا بالصاله وام زيد مثل ماعودتهم على السنه كانت تعطيهم تمر والعمه حصه تبخرهم

وابو زيد كان مخصص لكل واحد بشت الا محسن وحسين اللي مايحبون يلبسونه

وكان صوت ابو زيد فالبيت وهو يكبر وريحة العود ودهن العود

طلعت سلمى وهي لابسه عشان مؤيد وفايز وصورتهم وبعدها دخلت

وبدوا الرجال يطلعون وهم يكبرون وقابلهم ابو نجد اللي لا شعورياً ذكر الله عليهم وهو يشوف ابو زيد متوسط عياله اللي يشبهونه بهيبته وفخامته كانوا حوله مثل العزوه دخل معهم وهم يشوفون الناس يناظرون وهم كلهم متجهين للمصلى وصارت الديره تضج بصوت تكبيرات الرجال

اصتفوا يستعدون لصلاة وصلوا وجلسوا يسمعون الخطبه ومن بعدها وقفوا يصلون العيد

وبعد ما سلموا وقفوا وهم كل واحد يسلم على اللي جنبه ويعايده

واغلب العباارات كانت ( عساكم من عوداه ، ومن العايدين، ومن الفايزين ،وكل عام وانتم بخير )

وبدوا الشياب يعطون البزارين هالعيديات وهم يركضون بينهم

مؤيد: عطوني عيديه انا بعد

حسين : نصيحه من مجرب لا تقول ابي عيدية عشان ما ينفضك ابوي قدام الكل

هايف: حسيين خبرره

حسين: اللي اكلته من ابوي كثيير

مؤيد: خلاص يا شيخ ما نبغى عيديه

ابو زيد مر من جنبهم وهو يأشر لهم يطلعون وراه عشان يروحون مجلس الشيخ كبداية العيد

والكل اتجهوا لمجلس الشيخ ابو تركي

................••............

في الخبر

بعد ما طلعوا من الصلاة ابو فرج وسعود ومشاري طلعوا يسلمون على اهل الحاره وهم مبسوطين

واتجهوا لبيت ابو فرج ومشاري يصور مع كل شي ويرسلها لباقي الشباب وطبعا على رأس القائمه سلمى

اما سعود اللي صح كان يتواصل مع لطيفه ولكن ما كان يمون كثير او ما تعود انه بعد سنين الفراغ بهالسهوله بيدخل وحده لحياته وبتكون مكان زوجته

لكن كبدايه كان محتار هل يصور للطيفه او لا

لف على مشاري اللي يطقطق على ابو فرج اللي دخل يعيد على ام فرج ورجع له

مشاري : خير وش فيك تفتح الكاميره مليون مره وتسكرها وش متردد فيه

سعود اللي كان يفتح الحلاوه لحمود : ولا شي

مشاري بضحك: ودك ترسلها صورتك ترا عادي تلقاها تنتظر الحين

سعود : لا يا رجال والله احراج

مشاري : يا صديقي العزيز يا خبل ترا المفروض اللي ينحرج البنت مب انت وبعدين باقي على زواجكم يومين وانت للحين تنحرج عادي صور سيلفي ارسل لها وارسل عيالك عادي خلها من بدري تعرفكم

سعود : وخر بس وبعدين غريبه مانك لازق بالجوال تكلم حبيبة قلبك

مشاري : بحاول اني امسك نفسي وما اتصل واجلس لين اروح لها واعيد انا عليها

مشاري : الله يعطيني فضاوتك ياخي

سكتوا على دخول بعض الرجال ووقفوا يسلمون عليهم وراح مشارري ينادي ابو فرج واما سعود اللي قرر انه يرسل من باب كسر الروتين وبالقوه ارسل وجلس ينتظر الرد

اما مشاري ما صدق ابو فرج قال يلا بنمشي وبسرعه اخذ اغراضه وهو اول واحد ركب

وانطلقوا متجهين لديره

................••............

في بيت ابو زيد

كانوا مجتمعين بالصاله كل الحريم وهم يعيدون على بعض ما عدا اديم ونجد

وشريفه اللي عيدت عليهم وراحت بيت ابو تركي

واخيراً جو الرجال وازدحم الرجال وهم يعايدون عليهم

والكل يضحك من مؤيد اللي متحضن امه وهو يعيد عليها بجميع العبارات

هايف : وخر ياخي بنعايد حنا بعد

قربت العمه حصه لهايف وهي تسلم عليه ومن بعده باقي العيال

ولكن كانوا مستحين من بعض وبعد ما طلع مؤيد وحصه يكلمون ابو مؤيد طلعت ريوف وسلمى يعيدون على ابوهم واخوانهم ولا كأنهم متهاوشين قبل الفجر كانوا مستحين

هايف حضن سلمى: ماعليتس وانا اخوتس تصبري

ام زيد : بسم لله عليها وش فيك عليها

هايف : يمه مسكينه بنتس الحين كل واحد بيروح يعايد على زوجته واللي بتروح تعايد على رجلها وهي مسكينه صفي صفي مع حسين ومحسن

سلمى: وخر لا تقلب المواجع

ام زيد: عاد هي خذ كلام وتحلطم

سلمى: راعوني ياخي

مطلق : ماعليتس ارقدي للعصر يمدي مزيونتس وصل

سلمى وخرت عن هايف: صادق والله

ابو زيد : يا عيال عجلوا

محسن وحسين هم اللي كانو مستعدين يشتغلون اما زيد اتجه لغرفته مع ميثى وهايف راح لغرفته ومطلق بعد وريوف راحت تعايد فايز وعمها

اما ابو فايز واهله كانوا بالقسم الثاني

.................••............

عند مطلق

اللي دخل ببشته وهو يدور بعيونه على اديم اللي رفعت راسها بعد ما عطرت هايف وابتسمت : وهذا بابا وصل

ابتسم مطلق اللي اقبل لهم وهو منشرح صدره بشوفتهم: ما شفتكم هناك

اديم رجعت شعرها ورا وهي مبتسمه : ما حبيت نعيد على احد قبلك

ترك هايف على جنب واخذ طريقه لاديم اللي ابتسمت مسك يدها وهو يقربها له احتضنها وهو يسلم عليها : كل عام وانتي معي وكل عام وايامي ما تخلا منتس وكل عام وانتي حبيبة عيون مطلق

ارتفعت نبضات قلب اديم اللي ترجف بفرحه وكأنها اول مره تشوف مطلق بعدت يدينه وهي تحضنه بحب : وانت بخيييير يا رب وعسى سنينك طوال وعساك تعيد كل عيد وعسى ايامي ما تخلا منك يارب

مطلق : امين امين

ابتعدت اديم وهي تبي تاخذ هايف بس وقفها مطلق

اديم : وش فيك

رفع مطلق يدها يدورها وهو مبتسم :مقدر على هالكشخه

ضحكت اديم وهي تبعد : عساها ما تعدت قوانينك

مطلق : لا لا اليوم على الحد بالضبط

اديم : حمدلله ارضينا غيرتك

مطلق ضحك وهو يبوس راسها : المشكله انتس حلوه بشكل تخلين الواحد يغار غصب عليه

وضحك وهو يتذكر اول ايام زواجهم : تدرين انتس مشغلتني من اول

اديم : ليه

مطلق نزل ياخذ هايف : اذكر مره لبستي فستان اشغلتيني فيه لاول مره في حياتي اشرب قهوه ولا احس بطعمها عيوني عليتس وانا ودي اسحب هالفستان وارفعه ولا اقول غطيه ولا اقول شي لكن عجزت وفوق ذا شايل هم ابوي لا يغسل شراعي وشراعتس ويالله ان هاليوم عدى

ضحكت اديم بفشله: حمدلله ما انتبهت لك ولا بموت

مطلق : حليناها الحمدلله ، المهم تعالي بنطلع لهم وتعيدين على ابوي قبل يجون الرجال

اديم : ابشر بس عطني البشت

نزل مطلق يده لاديم اللي اخذت البشت وعلقته ولبست وطلعت مع مطلق وهي تسمعه وهو يبوس هايف ويكرر : يا زين عيد جابك وانا ابوك

................••............

اما عند هايف ونجد

دخل هايف وهو ينادي : وين عيدي

طلعت نجد وهي تستعجل خطواتها لهايف اللي فاتح ذراعينه وهو يضحك اسرعت وهي تحضنه وحاوطها ببشته

هايف : تدرين اني في كل عيد اردد بيت حفظته وانا خايف ما يجي اليوم اللي بقول هالبيت لتس

نجد: وانا وش امنيتي في هالحياه الا اعيش على صوتك وابياتك ومايفرق قلتها انت ولا حفظتها المهم هي منك

ابتسم هايف وهو يردد البيت العريق والكبير عند الناس وبصدر هايف واللي يشوفه محد يستحقه الا نجد (ياعيد .. إلي صاحبٍ بالحب فاتنّـي

‏والحال مني قضى بعد .. وانا قاضي

‏ياعيد .. انا مولعٍ بصغـيّر السنّي

‏لو مبسمه سمّ قبّلته وانا راضي ♥) ابتسمت نجد وبعدت وهي تحاوط وجهه بيدها : عساني ما اعيش ولا يوم بدونك وعساني ما افتح عيوني ولا احصلك يا ليل نجد وصبحها وحياتها وكل شي حلو صار لها

ابتسم هايف وهو يناظرها بحب : ليتني اقدر اقول اللي بصدري كله لكن اكيد انتس تفهمين

نجد ضحكت : افهم افهم ، تعال يلا بنصور انا قلت كل لحظه حلوه لازم نوثقها

هايف : هاتي الكاميره يلا

اخذتها نجد وابتدوا يصورون وبعد شوي ابعد هايف وهو يضحك: خلاص اتوقع فللنا وانتي مارحتي تعيدين اهلتس ولا ابوي ولا احد

نجد: صراحه ماعيدت احد قبلك

هايف : يا خلفهم كلهم ،بس عمي الحين والله بيزعل علينا ويقول اخذت بنتي وسحبت علينا

نجد : لا والله خلاص بلبس وبنطلع الحين

هايف : خذي خذي بشتي علقيه

نجد : لا تكفى خله حلو والله عليك

هايف : والله لعيونتس مستعد اللبسه عمري كله بس الحين شغل واذا جيت ابوي وانا لابسه بيكفني به

نجد: بسم لله عليك

هايف : يلا لا تلهيني بالكلام المعسول خليه شوي

طلعت نجد وهي تضحك واتجهوا لبيت ابو نجد اللي سبقهم وجاء هو وام نجد

ابو نجد : هايف ماهقيتها منك

هايف ضحك: والله اني توني قلتها لنجد

نجد استعجلت وهي تسلم عليه؛ والله كنت انتظر هايف عشان نجي لكم

سلموا على ام نجد ودخلوا وهايف شايل ام نجد شيل

لكن هي ماهي كثير متصافيه معه

.................••............

الكل صاروا في بيت ابو زيد

وعند الحريم كانوا اغلب حريم الجالسين ويسولفون

وعند لطيفه كانت سارحه وهي تكبر وتصغر في صورة سعود وعياله

اديم:هذا سعود!

لطيفه: اييه

اديم: والله حلو ما عليه وواضح راكد

لطيفه: ايه هو ثقيل

اديم: انا سألت مطلق عنه بس ماعطاني شي واضح

لطيفه: مالقيتي الا مطلق تسألينه طبيعي مب قايل شي

اديم: لا بس هايف يقول لنجد طييب طيبة الدنيا

لطيفه: هايف عشانه طيب يحس كل الناس مثله

اديم: الشرهه على اللي يبي يطمنتس

لطيفه : تكفين اديم وخري متوتره مره

اديم : طيب طيب خلي هايف معتس انا بروح اساعد البنات

وقفت اديم وراحت اما لطيفه اللي ماتدري وش ترد على سعود وخصوصاً ان الوقت التنازلي اللي بيجمعهم بدا

.................••............

في مطبخ ام زيد كانت تقسم الفطور

والدنيا محتاسه وهايف اللي اخذ له صحن بطرف ومتربع وياكل

حصه: هذا وقتك الله يصلحك

مطلق : يا برد دمك يا هايف قم اشتغل

هايف: يا ناس جوعان ادوخ ادوووخ ابي اكل وبعدين اقوم وانتم توكم توزعون

مطلق : اخلص يلا

وقف وهو يبعد الصحن : خلصنا يا ابن الحلال وش بلاك عجول

مطلق : عندنا رجال فالمجلس وانت جالس

هايف: ترا العيال كلهم فيه

مطلق ما رد واخذ الاغراض وطلع

ولف هايف على امه : يمه بسألتس شي واحد جاوبيني وطمني قلبي

لفوا كلهم عليه وام زيد.: وشو

هايف: مطلق جلس ببطنتس 9 شهور مثل الاوادم والا ولد بالثالث من العجله

ضحكت ام زيد: الله يصلحك ياهايف ما تعرف مطلق

اديم بلعانه : هذولا الناس حركين مب الاموات الله لا يبلانا

هايف : يمممه منتسسس ماعرفتس وانتي حركه الله يعلم بس اقول وينه وليدي ما شفته من اليوم

سلمى جات وهي معها هايف الصغير: هذا هو خذه وريحنا من صياحه

اخذه هايف وهو يبوسه وفعلا سكت معاه لكن عطاه سلمى بسرعه اول ماجاء مطلق وشال الصحن وطلع ومطلق شبه معصب : بدري يالغالي

هايف: من عمرك يالغالي

طلع مطلق بعد ما اخذ باقي الاغراض

واتجهوا للمجلس اللي كان يدور فيه سوالف الشياب

وقال واحد من الشياب : اقول يا ابو زيد ورا ما تزوج محسن وحسين مع بعض

لفوا كلهم يناظرون محسن وحسين اللي كانوا واقفين بالطرف اليمين من السفره ويباشرون على الناس

رفع راسه محسن يناظره هالشايب وقبل يتكلم قاطعه ابوه وهو يقول : قريب قريب

مؤيد دق حسين بضحك: الله يا البزر بتزوج قبلي

حسين: الله يستر بس

مؤيد: ايش فيك

حسين: مافيني شي

تقدم هايف جنبه وهو مبتسم: يقول مطلق عندك خرابيط

حسين: وخر عني انت ومطلق ما يخربط الا انتم

مطلق بهمس : خله خله بكره بيجي على خشمه

هايف: وراك متروع هذا عرق فينا مافينا واحد تزوج طبيعي لازم تنحك وجيهنا حك

حسين: انا مانيب انتم

هايف : هههههههههههههههههههه طيب يالفارق

مطلق : ايه عاد عبدلله الصغير كيف تجي زينا ( يقصد انه مثل ابوه )

حسين ماعطاهم اهتمام وراح لابوه اللي يناديه

ولف هايف بضحك على مطلق: ما ظنتي ان عنده شي

مطلق: هايف لا تصير غشيم واضحه بس للحين مايدري اصبر لين يجي موضوع يهزه وحزتها يتحرك

هايف : اصبر علي انا اللي بحركه

زيد: وش عندكم انتم تساسرون

هايف: ابد

زيد: يلا يلا جيبوا العود ابوي بينفجر علينا

مطلق : ليه بيمشون

زيد: ايه خلاص الساعه 10

هايف: انا بروح اجيبه ذبحني انوم من اليوم احتريهم يروحون

مطلق بضحك: حبيبي ابو صيته بيقيل هنا

هايف: عشان يقيل هالمبخر فوق راسه

راح هايف مستعجل للمطبخ ودخل بدون لا ينادي ولكنه رجع اول ماشاف المطبخ مكتظ بالحريم وطرف الباب كانت بنت غريبه

وانتبهت له نجد وطلعت : هايف وش فيك !

هايف : ا ا كنت ابي العود ما دريت ان فيه احد

نجد:ماعليك انا اجيبه

رجعت نجد تجيب العود وهايف اللي ماشاف شي غير هالبنت اللي قريبه من الباب وهو واقف يدق اصابعه بتوتر سمع نجد تقول: صيته قربي عن الباب هايف وراك !!

صيته لفت بذهول : مادريت عنه

ناظرتها نجد بحقد وهو تستعجل اديم تجيب العود

اما هايف انصدم ان هاذي صيته بنت ابو صيته مستحيل يذكرها كانت تفجع كيف صارت كذا

صحى من هواجيسه على صوت نجد اللي تناديه : وش فيك ما تسمع

هايف هز راسه بضيق: لا بس خلاص بموت نوم

نجد : خلاص بيروحون الحين وتنام

اخذ هايف العود وراح وهو يبخرهم وعيونه على ابو صيته ( الله اكبر عليك يا ذا الشايب النحس اجل هاذي بنتك سبحان الله )

رفع شماغه ابو صيته بسرعه واهتزت المبخره

بالقوه تمالك هايف المبخره لا تطيح على ابو صيته اللي انطلق يهاوش كعادته لكن هالمره تجاهله هايف ووقف بطرف

مطلق : وش بلاك بغيت تحرقه امزح مب مقيل هنا

هايف : هو اللي سحبها

بدو ينسحبون الناس وجو البنات ينظفون المجلس ولف ابو زيد بغضب على هايف: علامك انت بغيت تحرق الرجال ما كفتك رجله

هايف: يا يبه الله يهديك هو اللي سحبه

ابو زيد : هو اللي سحبه والا انت اللي اكلته بعيونك كم مره علمتك تجوز عنه

هايف: ابشر ابشر بجوز عنه ولا يزعل ابو صيته

في المطبخ

دخلت سلمى وهي تقولهم وش صار بين ابو صيته وبين هايف

التفتت نجد وهي للحين حاقده على صيته رغم ان مالها ذنب : وليه هايف اكله بعيونه ! يعني وش صار

ريوف : يوووه يا نجد ما تعرفين عداوة هايف وابو صيته كلٍ يعرفها

سلمى: بس صراحه ما توقعت هايف بيسكت عنه دايم يقوم الدنيا ويقعدها

ريوف : واضح ماله خلق له تشوفين عيونه كيف يبي النوم

نجد : انا خلصت شغلي كله وعاد بروح انام مره احس خلاص تعبت

ريوف : كلنا خلصنا يلا خلونا نريح

سلمى: يوه متى يجي العصر

اديم ضحكت: نامي وبتصحين وبتلقينه

نجد : صح متى بيوصل مشاري!

سلمى: يوصلون تقريبا 12 الظهر ويقول بنريح ونجي العصر

ميثى: طيب ازين عشان ترتاحين وتريح عيونتس شوفي كيف حمرا

سلمى: اي والله يلا يلا بنام

رجعت حصه وهي تضحك: والله العيال مساكين محذفين بالمقلط

سلمى: مسرع !

ادييم: تعبانين اكيد ! كلهم يا عمه ناموا

حصه: اي مطلق من التعب نايم وهو جالس وقومته وراح لغرفته

اديم : زين انا بعد بروح

سلمى: نجد يرحم امتس خذيني معتس غرفتس دام هايف مع العيال مقدر اتحمل صياح البزارين

نجد: تعالي

طلعوا متجهين لغرفة نجد

وبعد نص ساعه كان البيييت فااااضي فاااضي والكل في غيبوبه تامه ومب بس البيت الا الديره كلها

.................••............

في المقلط كانوا العيال فعلا محذفين

حسين نايم عرض بنص المقلط ومؤيد حاط مخدته على رجول هايف ونايم

زيد وعبود بطرف ومحسن في طرف وفايز بنفس طريقة حسين ونصهم منزلين ثيابهم ونصهم بالثياب

صحى هايف على وجع رجله سحبها من تحت راس مؤيد وهو متنكد ورفع راسه وهو يشوفهم حايسين بكل مكان والمكان مزحوم وحر وقف وطلع متجه لغرفته عشان ينام براحه

.................••............

في غرفة نجد

نامت سلمى من اول ما حطت راسها لكن نجد كانت تتقلب شوي ولفت على الباب وكان هايف اللي شايل شماغه وثوبه وجاي بسروال وفنيله

جلست باستغراب : هايف مب كنت عند العيال ؟

هايف نزل اغراضه وهو يهمز رجله: عجزت انوم مؤيد نايم على رجلي تخدرت حسبي لله على راسه

نجد:ههههههههه ضاقت المخدات !

هايف: مؤيد ماعنده مشكله في شي ، من ذي اللي بجنبتس

نجد : سلمى منحاشه من ازعاج البزارين كانت تحسب انك بتنام هناك

هايف : لالا معليه خليها تنام وخري لي انتي ولا حطي لي فراش تحت

نجد : مافيه والله فراش تعال هنا

بعدت نجد ودخل هايف معهم وهو بالقوه يتكلم من قوه النوم كان ساكت وهو عيونه تسكر لا شعورياً بس الكارثه اللي كان هايف يسكر عيونه اجبارياً عنها هي طيف صيته اللي من صبح الله عجز يروح من باله

اما نجد كانت تراقب عيون هايف اللي هالمره نام بدون مايناظرها لا كان يناظر فوق وهو كل شىي يهز راسه بإنزعاج

مدت يده تمسح على كتفه: يوجعك شي !

هايف بصوت ثقيل : لا بس حلمت حلم يفجع ومابي اذكره

نجد : بسم لله عليك

مرت نجد وهي تمسح عليه وتسمي وسحب يدها هايف بغرابه وهو يحطها على قلبه: سمي هنا

وفعلا نام هايف وهو مرتاح كثير كون نجد جنبه وقريبه لقلبه

ونامت نجد وهي مادرت بشي

................••............

قبل اذان العصر في غرفة هايف

تحركت سلمى وهي تبعد شعرها فتحت عيونها بشويش وفجاءه فتحتها بقوه اول ماشافت كتف ابيض معهم وشافت ذراع رجال جلست برعب وهي تناظر وهذا اللي كانت خايفه منه شافت هايف نايم معهم وانخبصت وانحرجت رغم انهم كانوا نايمين عادي وكل واحد معطي ظهره الثاني فزت وهي تحس بحرارة الدنيا وقشت قشها وهي تحاول ما تركض وطلعت وهي تسب نجد اللي ما صحتها

دخلت بيتهم وشافت الشياب والعجايز جالسين يتقهوون وحوالينهم البزران

ابو زيد: سلمى من وينتس جايه وانا ابوتس !

سلمى :كنت نايمه عند نجد

ام زيد: مالقيت هايف مع العيال هو هناك

سلمى: ايه جاء مادريت عنه

ابو زيد: ضايقه عليتس الغرف وانا ابوتس ! حاشرتن الرجال ومرته بغرفتهم

اقرب مخرج لسلمى قالت: وش اسوي يبه وحمت على البيت والبزراين قلت اروح هناك ومادريت انه بيجي

دخلت سلمى بسرعه وهي تدعي على نجد

واول ما شافت الساعه انجلطت زود وقامت تركض ترتب شكلها وهي تدري مشاري بيجي بعد الصلاة على طول

................••............

في بيت ابو فرج اللي بديره

صحى مشاري قبلهم كلهم وهو متقطع جوع واول ما جلس شاف حمود وعزيز صاحين وسعود في سابع نومه

وقف وطلع وهو يتنحنح عشان ام فرج اللي صح كانت مثل امهم بس عاد تتغطى منهم

ابو فرج: تعال يا مشاري

طالع مشاري ومعه العيال : مسهم بالخير

ابو فرج وام فرج: هلا يا مساء النور

مشاري : بشروني قولوا فيه شي ينأكل

ام فرج: تعال تعال سويت لكم كبسه خفيفه بس وينه سعود

مشاري :نايم

ابو فرج: اجل رح قومه لين يحهز الغداء وترا ما بقى على العصر شي

مشاري : امسك عزيز اجل

عطا ابو فرج عزيز وحمود اللي صايرين ينادونه (جدو) وكانت تفرق تفرق مع ابو فرج

فالمجلس دخل مشاري وهو يشوف لطيفه راده

ضحك وجلس عند راس سعود وقال : سعووود قم قم شكل زواجك بيتفركش

فز سعود اللي نومه خفيف : هاااه

مشاري اللي كان يقرا من الجوال بضحك: تقول لطيفه مالت عليك وعلى عيالك ما اشيف منك الا عيالك

سعود : في ذمتك

سحب الجوال من مشاري اللي وقف وهو يضحكك : بسم لله على قلبك ياقلبي انت تقولك "بسم لله عليهم والله يخليك لهم ويخليهم لك وكل عام وانتم بخير"

يمه منها ودها تقول بسم لله عليك معهم بس الكبرياء

سعود : اقول انقلع دور مرتك مالك شغلك بحريم الناس

طلع مشاري يضحك بعد ما لبس وبعد الغداء طلعوا للمسجد وطول ماهم بالمسجد والناس تسلم عليهم وتعايدهم وهم مبسوطين بهالاجواء اللي اشتاقوا لها

................••............

في بيت ابو زيد

بالقوه صحوا العيال وسحبهم ابو زيد للمسجد ولكن الغريب ان هايف ساهي

مطلق : وش فيك

هايف: مصدع

مطلق : اصبر نصلي ونرجع وانا بضبط القهوه بنفسي راسي يدور من قوة الصداع

هايف رفع راسه وضحك: ابشرك عمي ابو فرج وصل

اسرع لهم هايف يسلم عليهم ويعايدهم

ونشب فيه مشاري هايف : وش بلاك

مشاري بهمس: كأني اشم ريحة عطر سلمى

هايف: يعععع يععع منكم هذا عطري يا موسوس

مشاري: يا رجال والله اني وسوست صدق

هايف ضحك:هي كانت نايمه عندنا اتوقع نشب فيني

مشاري: قلي كذا من البدايه ، بس وراها عندكم !؟

هايف غمز له بلعانه وركض للصف الاول بعد ما قال: نعطيها دورس

وقف جنب ابوه وهو يضحك ومشاري للحين مصدوم

والتفت على مطلق اللي يناظر باستغراب وراح وهو يوقف جنبه: ولدكم ذا غاسلين وجهه بمرق انتم

ضحك مطلق : لا تشره عليه اذا فيه نوم يجيب العيد سلام سلام

مشاري: والله انه مريض

كبروا وصلوا العصر وبعد ما فاضوا

كان من عادات الديره بعد عصر العيد يجتمعون الرجال بالمخيم واللي بيقول شعر ومسابقات وسعة صدر

والحريم بعد يجتمعون ببيت ام تركي بيت الشيخ

والكل راح المخيم الا هايف ومشاري راحوا بيت ابو زيد

................••............

وعند ام زيد

كانت تستعجل البنات عشان يلحقون الجمعه ويلحقون يروحون لام فرج

وقفهم صوت هايف اللي يضحك مع احد بالحوش وبعدها جاء : ياااا سلمووه يا المزيوونه عاد عيدتس يا سلموه

طلعت سلمى وهي تضحك وهي ترقص بضحك لعانه في هايف: عيد وحب هاي الليله الناس معيدين

هايف : اقول اطلعي لا اجي احوستس

سلمى: معليش ناسيه وين اروح

هايف: والله؟

سلمى ركضت بضحك: لا تذكرت قلبي دليلي

مسكت ام زيد هايف اللي كان بيلحقها :خلها يا هايف تبي تقهرك

سحب هايف نعاله وهو يضحك ورماها عليها

................••............

فالمجلس

مشاري كان واقف لكن قبل توصل سلمى وصلت قبلها نعال هايف ودخلت وهي تضحك

وضحك مشاري : لازم تحارشينه

بعدت سلمى شعرها عن كتفها وهي تضحك: حاسديني ياخي

مشاري : تعالي تعالي خلي الدنيا كلها وتعالي توني يزين عيدي انا

ابتسمت سلمى وراحت لمشاري اللي فاتح ذراعه ببتسامته العذبه

حضنها وهم يعايدون بعض وخرت سلمى باحراج: لا يجي هايف وحزتها وش يفكنا منه

مشاري ضحك : عاد هو له ساعه لسانه متبري منه

سلمى: جالطني من صبح الله ، بس خلني اجيب القهوه

مشاري: اجلسي اجلسي مابي شي ابي اسولف معتس شوي ونلحق المخيم لا يفصلون علينا

سلمى: اجل خلني بذوقك المعمول اللي سويته وحلاوة عيدنا

ابتسم مشاري وبدت سلمى تباشر عليه ومع ذلك كانت تسولف له وتسولف

مشاري: والله اني لي عشره ايام فاقد هالصوت اللي عساه ما ينقطع

سلمى غمضت بحرج: الله يصلحك قلت لك لا تسوي كذا وانا اسولف والله تضيع سوالفي

مشاري : وش اسوي اشتقت لتس

سلمى : يعني وانا والله صح كانت نفسية الحمل ضاربه بس 90٪ يعني من بعدك

مشاري: انا ممنون للعيد اللي مخليتس تعترفين

ضحكت سلمى ورجعت تسولف ومشاري مستمتع وينتظرون لحظة هجوم هايف

................••............

اما هايف كان كالعاده ياكل

وهو يشوف امه تجهز ونجد بعد جاهزه وهي جالسه معه وهي مستغربه سكوته

وكان مشغول بصحنه وكأنه يحاول ماينشغل الا فيه وهو يتصدد عن زاويه فالمطبخ ما يناظرها

نجد هنا بدت تضيق وبدت تحس وضعه اختلف

وقفت بتطلع ولف هايف: وين بتروحين

نجد : اشوفك ساكت قلت اخلص لين كم شغله لين تخلص تفكيرك !

هايف: وش تفكيري

نجد: مدري مشغول من اليوم

اخذ هايف الشاهي ووقف وهو يشتت نظره : وش يشغلني يعني بس تعرفين توني صاحي من النوم وصداع والحين مخيم

نجد : من متى صرت تضيق من المخيم كنت تروح اول واحد

هايف: مانيب ضايق بس عشان ما نمت زين

نجد : اصلح لك قهوه

هايف ضاق صدره زود على نجد اللي تحاول انها تعرف وش فيه وهو مايبي يبين لها وماكان منشد لصيته ولا فكر فيها بس ما يدري وش علتها ثبتت بمخه

لف وهو يشوف محد فيه رفع يدها يبوسها: لا يعطيتس العافيه مطلق بيسوي القهوه فالمخيم انتي روحي انبسطي مع الناس وانتبهي لا تخسرين

نجد ابتسمت: لا ما عليك واذا راسك بقى مصدع تعال واخذني نرجع سوا للبيت لا تخليني وتروح

هايف حس بكلمتها فيها شي بس ما حب يبين شي ونجد كانت ترمي عشوائي بتشوف هل يتحسس او يمشيها

لكن حسته هادي وقال : ابشري وشكلي بجي حتى لو ما فيني شي دامي بجلس معتس

ابتسمت نجد: بعد عمري لكن يلا روح لا تتأخر

طلع هايف وهو اول مره يحس انه متوتر من كلام نجد اتجهه للمجلس وهو هالمره ما هاجم ابد بالعكس دق الباب من برا وهو يقول : عجل يا مشاري

وطلع وقف عند الباب وهو متضايق

مشاري لف على سلمى: بتطيح السماء علينا دامه ما داهم

سلمى: مدري

مشاري: يلا انا بروح وانتي روحي انبسطي وانتبهي هاه لا تحمسين وتذكري انتس حامل

سلمى:ماعليك الكل حارسني

مشاري: قواهم الله يلا فمان الله

طلع مشاري وهو يناظر هايف اللي متكتف وهو يناظر الجدار اللي مكتوب عليه بهدوء

مشاري : خير وش ذا الوجهه

هايف ولا شي بس راسي مصدع بنلحق على القهوه

مشاري: متهاوش مع نجد!

هايف: لا الله لا يقوله

مشاري : اجل

هايف: والله مافيه شي

سكت هايف وهو يحاول يدفن السيره كلها ووصلوا للمخيم وكان عامر بالقصايد وجلس جنب مطلق اللي صب له قهوه وهو شاك فيه

................••............

في بيت ام تركي

كانوا كل الحريم مجتمعين ونجد بتنفجر وهي حاسه ان انقلاب هايف من ورا راس صيته وصارت بس تراقبها بقهر

سلمى: علامتس تخزينها من ساعه !

نجد: بموت يا سلمى قلبي مولع

سلمى: بسم لله وش فيه

نجد : تخيلي اليوم هايف دخل بالغلط المطبخ وكانت هالزفت صيته عند الباب وشكله شافها االمهم هو متلخبط من اليوم وصاد وتحسينه يفكر ولا هي عادت هايف اللي كل يوم

سلمى: وش يعني!

نجد: المشكله مدري وش يعني اخاف يفكر فيها

سلمى: ودتس اعطيتس كوع يرجع ذاكرتس ، خبله انتي هايف مات وحياء عشانتس وتبينه بعد ذا كله يلتفت لصيته الخايسه

نجد: ادري ما يسويها بس الشيطان شاطر وفوق ذا هي الكلبه يوم عرفت انه فيه صارت تميل على الباب

سلمى:ماعليتس منها المفروض ماتفكرين اصلا وتكونين واثقه

نجد وقفت وهي تشوف صيته : خليها علي اوريها شغلها الحين

واستغلت نجد لحظة الرقص وزحمة عند الباب واتجهت لها بغضب ودخلت بين الزحمه وبكل قوتها دفت صيته اللي زلقت مع الدرج وطاحت على حافة الدرج وانكسر سنها وقامت تصيح والناس تجمعت وراحت نجد ببتسامه وجلست وهي كأنها ما سوت شي

شهقت سلمى ولفت عليها : وش سويتي

نجد: احرقت قلبي وقلت انتقم

ضحكت سلمى: يمه منتس

نجد : بقى بس اشيلها من راس هايف قبل يتأثر بها

سلمى: والله انتي فاضيه من قالتس انه اصلا حطها براسه

نجد: يا بنت الرجال منقلب منقلب مره واخاف ابليس يزين له الامور وحزتها اموت انا وانا واثقه بهايف بس ابليس شاطر ومقدر اخليه كذا

سلمى: لو اني منتس اللعن خيرهم الاثنين

نجد : لا صيته خليها تولي بس هايف اعرف اتصرف معه بدون ما يشك اني ادري وبدون ما الفت انتباهه لها اكثر واوريه اني غيرانه منها

سلمى : نجد انا مصدومه منتس عمري ما توقعت انتس قويه كذا

ضحكت نجد : وش اسوي بحافظ على زوجي

سلمى : كفو عليتس

وطلعت صيته من الحفله واستمرت الحفله عاديه ونجد تفكر وشلون بتقنع هايف

.................••............

وعند الشباب

كان هايف يشارك بالمسابقات ومستانس وتقريبا بدا ينسى ورجع بعد ما اخذ المكافآه اللي يتسابقون عليها

وانتبهه لابوه يناديه

راح وهو مستغرب : سم يبه

ابو زيد : اجلس هنا

جلس هايف : وش فيه

ابو زيد : والله ان سويت لابو صيته شي لاوريك شغلك

هايف :هاه وش اسوي له ! ليه تقول كذا

ابو فرج: يا ولدي علامك تخزه من يوم جلست وانت اكلته بعيونك والرجال اشتكى لابوك

لا شعوريا بهتت ملامح هايف : لا خييير وش اسوي به هو اللي يحتك ولا ناظرت فيه ولا شي

ابو زيد: انا اشوفك واعقل ازين لك يا هايف

وقف هايف اللي احتدت ملامحه وهو ما انتبهه انه يناظر ابو صيته وهو اصلا في ذهووول من الموضوع كله

جلس جنب مطلق بضيق

مطلق : انت وش علتك هاه وش بلاك منقلب

هايف: مافيني شي بس ابوي يهاوش كالعاده

مطلق : وش الجديد ابوي 24 ساعه يهاوش وانت تضحك وش المشكله الحين

هايف : شكلي بروح البيت راسي مصدع ما عاد اتحمل اي صوت زياده

مطلق : اجلس للعشاء طيب!

هايف: مابي

طلع هايف والكل مستغرب انه طلع

ابو فرج لابوزيد: كأنك ثقلت عليه شوي

ابو زيد : لا خله خله ما عاد اتحمل مشاكله مع ابو صيته زياده

ابو فرج: وراه راح طيب ماتعشى !

ابو زيد : ماعليه وان راح قدامه مرته تسوي له عشاه

رجعوا لجو المخيم اما هايف اتجهه لبيت الشيخ عشان ياخذ نجد

................••............

في بيت الشيخ ابو تركي

كانت شريفه شغاله مع حمولتها

واتجهت للباب اول ما سمعته يدق :من

هايف: شرووف!؟

شريفه : هايف وش فيك !

هايف:نادي لي نجد بالله بنروح البيت

شريفه: ماحطينا العشاء للحين!

هايف: ماعليه نتعشى بالبيت

شريفه: يوجعك شي

هايف : لا

حست شريفه انه معصب وقررت تنسحب راحت لنجد تناديها وطلعت نجد وهي خايفه من رجعته من العشاء طلعت وهي تشوفه متكتف ويناظر الارض

نجد : هايف زاد عليك الصداع

هايف: ايه

نجد : تعشيت!

هايف : لا مالي نفس

نجد : لا لك نفس بس نرجع البيت اصلح لك عشاء

تحركوا متجهين للبيت ودخل هايف للغرفه ونجد راحت تصلح العشاء

وابتداء هايف يضييييق من وضعه هذا اللي ما حبه وهو صح ما فرقت مع صيته ولا فكر فيها ومستحيل يبدل نجد بصيته بس كان مذهول يذكرها يذكرها كيف كانت يعرفها لين عمرها 14 وهي شينه متى صارت كذا حتى امها واخوانها يعرفهم كانوا عاديين وشلون وصلت لهالمرحله كان مجرد ذهول عند هايف وكان فعلا يعاني من صداع وكان يراقب ابو صيته لانه يحاول يطلع الفروق

رجعت نجد وهي معاها العشاء وجلست قدامه وهي تتعشى معاه وتحاول انها تسحب الكلام منه وعرفت وش صار مع ابو صيته

نجد اللي تصرفت بذكاء وقالت : ايييه على طاري ابو صيته تخيل وش صار اليوم

هايف اللي رفع راسه با نتباه وهو يمسح يدينه بعد ماغسل : وش صار!

وقفت نجد وهي تاخذ المواعين الفاضيه على طرف واتجهت لهايف وهي تجلسه وعشان تضمن انتباهه جلست وراه وهي تسوي لراسه وكتوفه مساج وكانت تلاحظ ان اعصابه مشدوده

وكانت حريصه انها ما تبين غيرتها من صيته وكانت لازم ما تهز الثقه بينهم

قالت بكيد : تخيل مدري شلون طاحت صيته اليوم ويا مسكينه انكسرت سنونها

رفع هايف حواجبه بذهول : اماا تكسرت تكسرت

نجد : ايه تكسرت بس القهر انا تعبت عليها تعب الدنيا وركبتها بدم قلبها وما تهنت فيها

هايف: اللي انكسر سنونها التركيب!؟

نجد: ايه مسكينه ترا كل سنونها تركيب ومالها فتره لكن الحظ وش تسوي به

هايف : لا لا مسكينه وشلون طاحت !

نجد حست انه انصدم وكملت : والله هي الله يهديها حشرت الناس على المرايه يعني مو معقول كل خمس دقايق ناطه للمرايه ذبحت وجهها بالمكياج صراحه انا يوم شفتها الصباح انصدمت ماهي صيته اللي نعرفها لكن جينا وهي تسوي مكياجها بغيت اهج عساك ماتشوفها بدون مكياج تروع ، انا والله ما أيد البنت اللي تحط هالكميه من المكياج يعني وشوله عدسات ورموش وكنتور وخرابيط والله تغير الملامح وتغش

هايف التفت لها وهو كأنه يقارن شي براسه : وش يعني ذا كله

نجد : يعني تصغر خشمها وتضبط فكها وخدودها تنحتها نحت وحواجب وحوسه

هايف : بالله هذا كله مكياج

نجد: ايه مكياج

رجع هايف يثبت ورجعت نجد تهمزه وهو مصدوم ( اني والله داري ان صيته ماهي بصايره كذا الا من خرابيط اجل كله تصنيع اشوى ارتحت بغيت اموت من الصدمه )

ارتاح هايف اللي كان نص اللي مشغله الفضول لكن بسرعه بعد كلام نجد تبدلت صورة صيته لشكلها وهي صغيره وكان كل هالتفكير صدمه فقط لا غير

نجد : راح الصداع

هايف : يعني

نجد هنا انجنت يوم تأكدت انه فعلا كان يفكر فيها صح انا شالتها من باله بس انحرق قلبها

لفت بهدوء وهي ودها تصييح فيه من القهر

هايف : وش فيتس

نجد : ولا شي

هايف : نجد!

لفت نجد وهي تحاول تكافح غيرتها لانها ما تبي تخرب كل شي سوته وتسوي بينهم مشكله وهم اكبر من ذا الشي : والله مافيني شي

هايف: انا اعرفتس اكيد فيه شي

حاولت نجد تسكت بس عجزت وقالت : حتى انا اعرفك يا هايف

هايف قام يشك انها تقرا افكاره : قولي وش عندتس وارتاحي من الصبح تلمحين

نجد : مدري عنك مختبص من الصبح ولا ادري من وش

هايف: وش يعني بيخبصني !من النوم

نجد : يا ذا النوم ياهايف ترا مرت ايام ما تنام الا ساعه ما اختبصت

هايف : يعني ؟!

نجد : يعني تراني اثق فيك يا هايف لا تمشي ورا افكار ابليس وتخرب كل شي

هايف غمض بضيق : تراني اكرهه الالغاز وش افكار الشيطان اللي بمشي وراها

نجد: من يوم دخلت المطبخ وانت حايس بعمرك ! وش صار

هايف قرب وجلس قدامها بضيق: يا نجد حنا اكبر من كذا وحتى لو على قولتس احتست تدرين اني ما يملى عيني الا انتي ولا اشوف الا انتي وانتي كوووم وحريم الدنيا كلها كوم

نجد : اكيد احنا اكبر بس الله يخليك خلك بالك من نفسك لا تخليني افكر غلط ابداً

هايف : نجد وش اللي فكرتي فيه!؟ من عقلتس تفكرين اني ممكن افضل احد عليتس ولا عيني تروح لغيرتس

نجد حست انها ظلمت هايف بس فهم هايف قلق عيونها وقال : انا مانيب اخفي عليتس شي صحيح اني كنت مشغول ومذهول بس ما كان بالي اني اقارن احد فيتس

نجد دق قلبها برعب: وش مشغول فيه !

هايف قرر انه يغير الموضوع ويشغل نجد عن سالفه صيته لانه اصلا ما شال صيته من ارضها وكان اغلب تفكيره فضول ومن هي صيته عشان تحل محل نجد او يفكر فيها وقال وهو يبعد نظرته عنها : ا افكر في حسين اليوم فالمجلس قعد واحد من الشياب يشور على ابوي يزوجه وعاد مطلق شاك فيه يحب وهو ينكر ونبيه يعترف قبل لا يورطه ابوي مع وحده مايبيها وحسين يكابر

نجد : تتكلم جد انت !؟

هايف : ايه ليه !

نجد : وبتزوجونه صيته!؟

هايف : وش جاب صيته الحين ! لا يبي ثانيه

نجد : اها طيب الله ييسر

هدا هايف شوي وهو ابد مايبي اي مشكله بينها وبينه

لف عليها وهو يشوفها شوي ضايقه وقف وهو يسحب يدها: قومي قومي ابيتس

نجد : وين !

هايف: بنروح مكان

ضحكت نجد: لا يكون بس مثل المره اللي فاتت

هاي ضحك: لا بس خذي جلال وتعالي

اخذت نجد وطلعت مع هايف اللي حط السلم وطلعوا فوق البيت وكان الهوى حلوو ونسناس مسكها وهو يساعدها وجلسوا فوق

هايف : يا لبيييه يا ذا الجلسه من زمان عنها

نجد : اذكرك اغلب وقتك اشوفك فوق

ضحك هايف : ترا اغلب جلساتي فيها يامطرود من البيت ولا بشوف غرفتس اذا نورها مشغل او مطفي واعرف انتي صاحيه ولا نايمه

ضحكة نجد: يا كثر العناء يا هايف ! وليه تنطرد من البيت

هايف : يعني من مشاكلي ، يا فاقش يا مفقوش يا مشتكي علي احد ولا معلمين ابوي علي ولا نايم عن صلاة لين من الله علي بالعقل

ضحكت نجد وهي تستند على كتفه: بالله احكي لي عن مصايبك واضح ما كنت تقصر

هايف : اكبر مصايبي هي مصيبة ابو صيته صح انها اقواها لكن ما عمري ندمت عليها وودي لو امسكت الحين وادفه من فوق عماره

وكمل هايف يسولف لنجد ونجد يا تضحك او مذهوله من اللي يسويه

.................••............

رجعوا من المخيم

وبدوا يتحذفون من التعب وسلمى راحت مع مشاري

وكانت اول ليالي العيد متعبه متعبه لكن جميله

اما ابو فايز وعياله مشوا لرياض وبكره اليوم الوحيد اللي بيفصل بين زواج سعود ولطيفه

................••............

ومن بكره

مثل العاده الفجر والكل صاحي وابو زيد يسحب فيهم

ابو زيد : يلا يا مطلق شب نارك وانا ابوك واعجلوا بفطوركم

مطلق: ابشر ابشر

جاء مطلق باللحم واغراض المقلقل وابتداء يسويه

والكل مجتمعين بالحوش

وحسين يسوي القهوه والشاهي ورجع محسن ووهو معاه الخبز حار وهايف يشوي كبده ووقف وهو يقسمها عليهم

ووصل لنجد وهو يعطيها اخر شي بقى

نجد بهمس: انت ما اكلت!

هايف: مابيها كليها انتي بالعافيه عليتس

نجد : يعافيك

ام زيد وقفت وهي تتجهه لهايف وتعطيه حقتها : خذ انا مابيها

هايف : والله يمه مابيها لو ابي اخذت من نجد

ام زيد: اص اص اعرفك تحبها بس عشان ما بقى لنجد شي عطيتها حقك

هايف ضحك : كشفتيني اجل ، بس يا عيوني والله مابيها

ام زيد : بكيفك اجل

مطلق : هايف تعال ساعدني

وبعد تقريبا نص ساعه وريحة المقلقل بكل مكان وبدوا يحطون هالفطور اللي يفتح النفس والكل اجتمع عليه والكل يثني على طبخ مطلق اللي ما يفوز احد عليه

وبعدها افترقوا للقهوه وفي الكل حول القهوه بس هايف حول البزارين ويلعب مع عيال زيد وهايف الصغير

مؤيد: سيب البزوره يا شيخ وتعال تقهوى

هايف: اتقهوى وانا هنا ما عليك

مطلق : هات عنك وقرب لا تجلس تصروع شوي علينا

زيد: تعال لاحق على البزارين والشقاء

جاء هايف وهو في حضنه هايف الصغير : يا زينه من شقاء ياخي

ام زيد : الله يرزقك الذريه الصالحه يا وليدي

الكل : امين

ابوزيد: ابو فرج راح الرياض

هايف: ايه مشوا الفجريه يادوب يخلصون ويمكن اروح لهم الحين

ابو زيد: كلكم روحوا وافزعوا وشوفوا وش يحتاجون

هايف: ابشر

لف هايف على نجد تأشر له وقف وراح

نجد : دامك بتروح لسعود اجل بروح عندي امي

هايف:ايه ماعليتس روحي

نجد : بس انت بتبات هناك

هايف: لا بنرجع

نجد : زين

طلعت نجد لبيت اهلها واديم قامت تجهز عشان تروح معهم لرياض والعيال كلهم بدوا يجهزون

ومشوا لرياض ولا باقي الا ابو زيد وام زيد حصه وحسين ومحسن

وطبعا قضوا يومهم يسيرون على اهل الحاره واللي ماعايدوه يعايدونه ................••............

فالرياض

عند مشاري وسلمى

للي تعود مشاري انه كل صبح يصحى ويحصل سلمى تصيح " بسبب الغثيان اللي تكرهه "

جلس ولف لها بضيق: سلمى ما قضينا من هالغثيان

سلمى: وش قضينا تراني توني بعز الوحام

مشاري : متى بس تولدين والله والله لو دريت انتس بتحملين وتنفسين كذا كل صبح ما بغينا ذا الحمل

سلمى : طيب وش رايك تكفى تقوم وتخلص ونطلع احس اني مخنوقه من هالمكان

مشاري : ابشري ابشري

وبسرعه جهز مشاري وطلعوا ولف: طيب اوديتس بيت عمتس

سلمى : لا لا فكني

مشاري : طيب خلينا نروح نفطر وبعدين نشوف وين نوديتس

سلمى : لا توديني لمكان ، انا بجلس معك انت بس مابي مكان مسكر

التفت مشاري وهو يضحك: ضربتي مشاعري يا بنت الناس ماعاد ادري كيف بتكون ردة فعلي

سلمى اللي من يوم صحت وهي بس ودها تناظر مشاري وفعلا كانت لافه تناظره لدرجة انه صابه حالة ضحك وصار بس يضحك من ملامحها

.................••............

اما عند سعود

كانوا كل العيال عندهم ويساعدونه باغراض العرس وكل ما يلزم سعود

وكانوا معه من الحلاق للبيت للفندق والحجوزات وكل واحد منقسم على شغله

.................••............

اما مطلق واديم

كانت اديم تبغى تروح السوق ونزلت هي ومطلق

وكان العصر وهم يدورون مطلق شايل هايف وقفوا ينتظرون محل يفتح

وهم ينتظرون التفت اديم وهي تحس احد يناظرهم وفعلا كانت هيفاء اللي جالسه بجنب وليد اللي يتكلم معها بس هي مب معاه

سوت نفسها ما شافتها وهي تقرب لمطلق

ولف مطلق : وش فيتس!؟

اديم : ولا شي بوقف جنبك

مطلق : احد مسوي لتس شي

اديم : لا لا بس كذا بستند عليك تعبت

رفع مطلق حواجبه بضحك وهو يتلفت شاف كرسي ومد يده بحركه عفويه على ظهر اديم : تعالي اجلسي هنا

ولا درا انه جاء على الوتر الحساس وجلس بالضبط قدامهم وجلست اديم وجلس جنبها وهو يعطيها هايف اللي نام

واول ما رفع راسه وشاف وليد وكأنه تكهرب وتذكر كلام هايف عنه انه قطعهم عشان هيفاء

وحاول يتجاهل بس اول ماشاف نظرات هيفاء الصريحه له اللي ما استحت انه جنبها زوجها وتناظره بكل قوة وجهه وقف وهو وده يروح يعطيه كف وده يقوله كل شي كل الحقيقه

ومع وقوف مطلق الملفت طارت قلوب

قلب اديم اللي خافت انه بيروح لهيفاء

وقلب هيفاء اللي ودها انه يجي

اما وليد اللي انتبه لمطلق ووقف ببتسامه مجامله واتجهه له وهو يسلم عليه وكان مطلق جامد

وابتدا وليد يسأله عن احوال الشباب

ولف مطلق بجمود : انتم كم سنه كنتوا مع بعض

وليد: سنين والله

مطلق: سنين ! وراك خليتهم يومك تعرفهم سنين ! عشان مرّه ؟؟

وليد: نعم !؟ وش تقول انت مطلق لو سمحت!

مطلق : انت تدري ان اليوم زواج سعود !؟

وليد اللي كان يدري بس صد لانه مايبي يحضر

وضحك مطلق : ودي ألومك بس ماعليك ملامه بس بقولك شي بقلبي يقرقع ، ترا هاللي تركت الدنيا عشانها ما تستاهل تبيع اخوياك عشانها وتبيع ابو فرج اللي كان لك بمثابه الابو

وليد : لا انت زودتها !

مطلق : لا ابد ما زودتها ! هذا حق المعرفه اللي اعرفها فيه خلك فطين ومالك عز الا بعز ناسك واهلك

تحرك مطلق بس مسكه وليد : تحسب انك بترمي كلامك ذا وتمشي انهبلت في عقلك انت !؟ من وين تعرفها هاه ؟

مطلق نزل يده بغضب : اقصر يدك واقصر لسانك وهاللي ما حشمتك جنبها ( كانت طليقتي ؟) هاللي زيفت لك قصص وامور واخذتك وجابتك واعزلتك عن كل الناس حاولت اني ما تدخل بس مقدر اسكت وانا اشوفها ما حشمتك ولا حشمة عرضك

انسحب وتركه واتجهه لاديم وهو يقول : يلا

اديم: مطلق وش صار

مطلق : ادخلي المحل اللي تبينه

اديم: ماعاد ابي شي

مطلق : لا تنرفزيني انتي بعد وادخلي

اخذ هايف ودخلت اديم وهي ترجف من الخوف وعيونها على مطلق الواقف بمحله ومعه هايف بسرعه سحبت القطعه االلي جت عشانها وحاسبت وطلعت

اما وليد كان مذهول وهو يناظر هيفاء ويناظر مطلق اللي واقف بشموخه المعتاد وهو صاد عنهم

رجع لهيفاء وهو مصدوم: وش يقول ذا !؟ وش يخربط

هيفاء: يكذب عليك

وليد بهمس غاضب وهو يحاول ما يصرخ: كلمه وحده قوليها: كنتي طليقته!؟

بكت هيفاء واتجهت لمطلق وهي تحسب عليه وطلعت واسرع وليد وراها وهو يداري صوته وخطواته والناس تناظر

ركبوا السياره والتفت وهو يصيح: انطططقي

هيفاء: اييه كنت وش بتسفيد !

مسك وليد راسه بصدمه: وش قصده انك ماحشمتي عرضي !؟ وش مسويه يا هيفاء وش مسويه

هيفاء ماردت وهي تبكي

اما وليد انهبل ونزل يركض بيرجع لمطلق لكن طلع مطلق من المول

................••............

اما مطلق

ركبوا وهو ساكت وهو يمسح جبينه بغضب

عجز يتحمل تصرفات هيفاء اللي مستحيل تتصرفها انسانه عاقله وشلون وهو على ذمة رجال تسوي كذا

اديم اللي ندمت انها نبهته انهم فيه ندمت انها تكلمت

عجزت تكلمه وهي للحين تخاف من عصبية مطلق اللي رفع جواله وهو يتصل بهايف اللي رد وهو يضحك ؛ هلا

مطلق : هايف قابلني عند بيت عمي بسرعه

هايف: وش صاير

مطلق : اخلص

سكر وهو ينزل الجوال لحضنه بغضب مد يده للمنديل وهو يمسح جبينه اللي كان من غضبه يتصبصب عرق

................••............

من شقة الشباب

طلع هايف وهو منخبص وخايف من صوت مطلق اتجهه لبيت عمه ووصل وهو مايدري كيف وصل وقف وهو متكتف

اخذ نفس مرعب اول ماشاف سيارة مطلق المسرعه ووقف وهو يقول لاديم تدخل اتجهه له هايف : مطلق وش فيك ! ولدك فيه شي؟ اديم فيها شي

مطلق : لا

هايف: علامك اجل !

مطلق : وليد

قطب هايف حواجبه :صار له شي !؟

مطلق مسح وجهه بيدينه وابتداء يشرح لهايف وهو معصب : عجزت يا هايف اسكت واخليه يروح معها كذا هذا وهي جنبه ما استحت اجل من وراه وش بتسوي !؟ ما كان لازم نسكت من البدايه عليها ! كان المفروض نعلمه من البدايه ولا نخليه يستسلم لها كذا الرجال منعمي يا هايف منعمي

مسك هايف راسه : وش بنسوي الحين!؟ بيجي وبيقول ليه سكتوا !؟ بيجي ويقولك وش سوت يومها ما حشمت عرضي !؟ وش بتقول له !؟

مطلق: وش وش بقوله ؟! بقوله كل شي بعلمه بكل حركه هي سوتها

هايف: ليتك ما تكلمت

مطلق:حاولت اني اخليها واقول بالطقاق لكن هي اللي جنت على نفسها

هايف غمض :لا حول ولا قوة الا بالله

دق جوال هايف ورفعه وكان وليد : وش اقوله !

مطلق : قله يجي

هايف : اه يا ربي

رفع هايف الجوال وهو يقول : هلا وليد

وليد : وينك!؟

هايف : تعال في ... احتريك انا ومطلق

وليد : زين

سكر وهو يقول : صوته ماهو بخير يا مطلق

تكتف مطلق : ايه ادري ، هاللي ما تخاف الله ما تخلي احد بخير اسأل مجرب يا هايف اسألني انا

ابتعدوا عن بيت ابو فايز وهم ينتظرون وليد