في بيت ابو زيد

طلع هايف لنجد مسرع وهو مايبي ابوه يغير رايه : نجد نجد

سلمى طلت من غرفتها وهي تضحك: ماهيب طايره ترا

هايف رماها بمسبحته: ادخلي بس لا اجي اعلقتس انتي وهالميداليه اللي معتس ( يقصد ولدها)

جات نجد وهي تضحك وهي تمد له قطعة حلا : بالله خلها ذا العجوز مالها شغل الا تراقب وتهاوش ، خذ هاذي مخبيتها لك من ساعه

ابتسم هايف واخذها :كل شي منتس حلو بس اسمعي روحي الحين اخذي كم غرض بنروح العزبه ونبات هناك

نجد : اما !؟ ليييش

هايف: ابوي وده نخيم بكره وقال اخذ نجد وروحوا نظفوا العزبه مع انها نظيفه بس انا ودي نبعد شوي عن الزحمه

قربت نجد وهي تناظره بهدوء:وش مزعلك !

هايف صد بنظراته: ابد ولا شي بس مليت من 6 شهور وانا روتيني واحد طقت كبدي

نجد : خلاص ايام وعدت وانتهت

هايف: يلا بنتظرتس برا

نجد : زين

راحت نجد ودخل هايف لامه ياخذ اغراض العزبه

................••............

في المجلس

اتجهه زيد لمطلق وهمس : اقول وش عنده ابوي !؟ مطلق : وش عنده !؟

زيد: كأنه يداري هايف ولا!

مطلق كان شاك ان ابوه قايل لهايف شي ولكن مرر الموضوع وقال: لا بس تعرف هايف يضيق بسرعه وغير كذا ترا 6 شهور وهو حاط كل حيله في البيت والمحل اكيد مل وابوي بيغير جوه

زيد: جايز

طلع هايف واتجهه لمطلق اللي التفت له ببتسامه: تعال تعال وش فيك وش صاير !؟نجد والعزبه وابوي !

جلس هايف جنبه وتكتف وهو يستند لمطلق : هذا اللي ما بغيته يصير

مطلق : لا تقول يكلمك في موضوع العيال !

هايف: ايه

مطلق : انا مدري قناعة ابوي هاذي لوين بتوصل مدري وش مشكلة اذا شاف الانسان تأخر

هايف: والله اني خايف ارجع ادخل مع ابوي في مواجهات مانيب قدها

مطلق : هونها وتهون وانا اخوك بعدين لا تخاف ابوي فهم شغله وانتهى ويدري انه مهما حاول ما هو مستفيد وترا للحين ما نسى حرب زواجك من نجد

هايف: ليته بس يعفيني من الحروب

طلعت نجد ووقف هايف : يلا انا بروح

ابتسم له مطلق : ريح نفسك ولا تفكر بسلبيه

هايف ابتسم :يسرها الله

طلع متجهه لنجد وركب ومؤيد وحسين يرمون عليه الحجر ويضحكون ويطردونه لكن انهى هبالهم بعد ما عطاهم تفحيطه انتشر منها الغبار على وجيهم

مؤيد: حسبي لله

مطلق : احسسسن انت وياه احسن

ابو زيد :ادخلوا ادخلوا لا يجينا نويصر

فز مؤيد وسكر الباب : اي والله بلاش يجي يضيع ملامح وجهي وانا على وجه زواج

.................••............

اما عند هايف

وصلوا العزبه ونزل وهو يناظر ساعته كان وقت انه يدخل الحلال بشبكهم ويحط لهم علفهم

وقفت نجد جنبه: تصدق اني ما اتذكر عزبتكم زين من زمان عنها

هايف: صح والله ترا ما عمرتس طلعتي معنا فيها

نجد: يمدحونها البنات

هايف: اجل تعالي معي وتراتس كل شي بسويه بتسوينه معي وخوف مابي خوف

نجد : لا اذا انت معي مانيب خايفه المهم حركات نويصر هنا لا تطلع

ضحك هايف: لا مجنن مافيه مجنن الا ان كان انا مجنونتس هذا شي ثاني

ضحكت نجد وهي مشتاااقه لضحكت هااايف الرنانه اللي من فتره وهي هاديه

رفع هايف ثوبه وربطه وهو يتنقل من محل لمحل ونجد ماسكه بذراعه تمثل القوه وانها ماهي خايفه من شي وبالحقيقه شوي وتدخل في هايف

هايف بضحك: وخري شوي بشيل الكيس

نجد : يعني بتوديه للغنم

هايف: ايه

نجد : اجل بنتظرك هنا

هايف ضحك وهو يناظر الابل وراها: متاكده بتنتظرين هنا ولا تمشين معي

لفت نجد وشهقت: لا والله بروح معك

رفع هايف الكيس ودخل ونجد وراه واول ما نزل الكيس كلها تجمعت حوله وبدت مرحله صراخ نجداللي كانت مغمضه نزل هايف وهو يشيله طلعها من بينهم وهو يضحك : افا هذا وانا اقول راعية ديره

نجد للي متعلقه برقبة هايف لفة تناظر وراه: يمممه يمههه وش بلاهم يركضون كذا والله فجعوني

هايف اللي نزل بعد ما باس خشمها : جوعانين

نجد: لا يكون بتروح لنياق بعد

هايف:اكيد بس انتي خليتس هنا عشان ما تصيرين زي مؤيد وتنكبينا

نجد: تكفى لا يجون

هايف: ابشري

راح هايف يركض بعععععيد وهم يركضون وراه ويوم ابعدهم عن نجد رجع وهو يضحك: لو تبين اوديهم للقمر ولا يجيونتس

ركضت نجد وهي تشوف غنمه صغيره تركض وراها: فكني من هاذي الله ياخذها

انفجر هايف يضحك ونجد تصارخ وتركض والغنمه وراها

هايف : ارمي اللي بيدتس يا نجد

نجد رفعت يده تناظر كان معها فطيره بس رمتها وهي ماعاد لها نفس فيها ووقفت جنب هايف اللي وخر الغنمه عنها: بعدين لا تركضين ترا تركض وراتس

نجد: ترا ماعادني جايه معك ابد

هايف: توني بقول تعالي بنحلب الحليب

نجد : لا يرحم والدينك فكني تبي رح انت

هايف: اجل انتظري هناك بالدكه واذا ودتس تصلحين لنا قهوه وشاهي بالمطبخ يا سلام

نجد : صراحه خاطري فيها على نار وانا معرف اسويها

هايف: اجل نظفي المكان وعدليه وانا بجي

افترقوا وكل واحد بطرف يكمل شغله وبعد شوي رجع هايف ومعاه الحطب

كان الجو على الغرووووب وكان المكان هادي وحلوو وابتداء هايف يشب النار ويعلم نجد تشبها

وقف وهو يأذن المغرب بصوت عالي حتى لو ما حوله احد بس يبي كل شي يشهد لأذانه

صلوا ورجعوا يجلسون ويصلحون قهوتهم وعشاهم وهايف جالس يقلب النار ببتسامه

نجد : دام الجو كذا عطنا قصيده كذا ترا من زمان ما سمعت قصيده طويله يعني ماهي ابيات

التفت هايف يناظرها وشافها جالسه قدامه وبيدها قهوتها رفع رجله يحطها على رجله الثانيه واتكى عليها وهو يراقبها بهدوء وقال

(‏كل ماضاقت الدنيا فـ عيني ، اجيتس

‏لأنتس النور .. و دروب غيرتس ظلام،

‏وأنتي جالسه وماسكه قهوتتس في يديتس

‏كل ماشفتها .. قلت هالحياه ، اهتمام،

‏أنتي حتى المطر يقدر يسلم عليتس

‏لأن ( يدتس ) خلقها الله تحب السلام.

لا شعوريا ارتخت يد نجد وهي تناظره بحب وابتسامه وطاح فنجالها وانكب فز هايف : بسم لله عليتس انكب عليتس

نجد : هاه لا على الارض

ضحكت وهي تناظره: بعد انت الله يهديك محد يقدر يتوازن معك

ضحك هايف بعد ما اخذ هايف فنجالها يجدده لها : انتي اللي طلبتي وانا قصيدي كله فيتس

ضحكت نجد وهي تتذكر اول موقف واول قصيده ايام غزيل تنقلها قصيد هايف : تدري اني كنت منشغله انا وغزيل نبي نعرف من تحب

هايف: هاه!؟

قربت نجد وهي تضحك وتقوله السالفه : بس يعني اشوى انه طلعت انا لان اذا كانت القصيده اللي سمعتها مب لي بموت

هايف: وش سمعتي!

نجد وهي تتذكر :فيها كذا هيام وشيوخ

غمض هايف وهو يشد على اسنانه بقهر: اما سمعتيها

نجد: ايه وقالوا انتشرت مدري وشو

هايف: هاذي الله يسلمتس اول قصيده وجلست ارددها عند فلاح ونشرها وحزتها جلست زعلان عليه اسبوعين

نجد: وانت ليه ما تبيها تنتشر

هايف : لانها فيتس وانتي لي انا لحالي ولا اقبل احد يردد هالوصف غيري

نجد : بالله قولها انت ترا سمعتها بصوت غزيل نكدت علي

رفع هايف طرف فروته: تعالي جنبي وانا انثر كل الدواوين لعيونتس

دخلت معه نجد وهي تسمعه يردد اول قصيده وهي

(هائما في عشق ربات الخدوري

‏بل فتاة دونها صام الهيام

‏مهرة يفتن بها الشيخ الوقوري

‏لم تقيدها المهاجر واللجام ‏

أيه أنت يامحطاتي وعبوري

‏يالحديث الممتلي بالأهتمام

‏الحرام أكتبك ولاتبان بسطوري

‏غير هذا الشي ماظني حرام .)

لف وهو يقول : حمدلله اجل دامني قدرت اعلمتس بها وقدرتي تبانين بسطوري

نجد : ليتني شاعره والله اكتب فيك قصيده ما صارت

هايف : ولا تكتبين ولا شي كفايه على صوتس

سكتت نجد ورجعت تسمع لهايف بس تذكرت وقالت :هايف بقولك شي بس ابيك تفهمني ترا من فتره خاطري اقولك واخاف من ردة فعلك

جمد هايف والتفت نزل يده من كتفها واوجعه قلبه :وشو!

نجد كانت متردده بس قالت : يعني اقول لو نروح لمستشفى

هايف:ليه فيتس شي! يوجعتس شي

نجد : لا بس يعني صراحه انا خايفه يعني من مده افكر لنا مدة متزوجين ولا حملت للحين ف أقول يمكن الحادث له تأثير يعني نسمع قصص كذا

صد هايف بانزعاج :نجد لا توسوسين وبعدين ترا بدري علينا وبعدين لو تأثرتي من الحادث كان تكلموا لا تزعجين نفستس وتفكرين كذا

نجد: لو نروح نتطمن يعني ما رح ارتاح انت تعرفني

اخذ هايف نفس وهو يرجع لنار : ابشري اللي تبين نروح لكن ولا مخلوق يخلق يدري

نجد: لا ما رح اقول لاحد ابد

هايف كان شايل هم ابوه اللي لو حس ان فيه مشكله او اقتنع ان نجد ممكن تطوول ما حملت حزتها بدون اي نقاش بيفرض عليه الزواج ويجبره على شي هو ما يبيه وبذا الموقف بتطيح اوراق هايف كلها

.................••............

في بيت ابو زيد

بعد ما استعدوا الكل لطلعه بكره جهزوا اغراضهم بسيارات بحيث انهم يصلون الفجر ويمشون

افترقوا كل واحد راح ينام

وفي غرفة مطلق اللي دخل بعد ما تجاكر مع مؤيد وكان يضحك التفت على صوت اديم : اوووه المزاج عالي والضحك رنان

تقدم مطلق وهو يحضنها: وحتى لو ان الدنيا منقلبه فوق راسي ومزاجي سيء يكفيني اني اشوفتس وتطير هموم الدنيا

ضحكت اديم : ايه هذا كلامك لكن اشوفك مده ساحب علي

مطلق : افا والله والله لو انشغلت دايم انتي في بالي لكن عاد انتي اعرف بالظروف وخلينا من الظروف اللي تنتهي اذا ضحكتي يا أمّ ضحكه تفج القلب وتقسّمه نصين

حطت اديم يدها على خدها وهي مبتسمه: المفروض اني انحرج بس والله في الحقيقه اشتقنا للكلام المعسول

مطلق اللي كان واقف ينزل ثوبه ابعد الثوب وهو يقول ببتسامة خبث : ايه اشتقنا واشتقنا بعد الاشياء ثانيه غير الكلام وبعد اشتاق مطلق لاديم

طارت اديم فرح وخجل وهي فعلا اكتئبت من حال مطلق الحزين وفرحانه انها رجعت له الحياه

اقبل مطلق لها وهو يشوف الدنيا بضحكة اديم ويشوف ان اجمل اوقاته اذا انتهى يومه وصار يسابق الساعات عشان يكون معها ومعها تختلف موازين مطلق وتنحرف

.................••............

في الخبر تحديداً بشقه الشباب

كانوا كلهم جالسين بصمت حول وليد وفجر الصمت مشاري اللي قال: وليد ! ما تشوف ان حزنك عليها اخذ وقت هي ما تستاهل ربعه

وليد التفت بغضب : هه غريب امرك تشوف ان وضعي ما يستاهل بس هايف كنت تركض له ومعه في قصته وتعطيه الحق في كل شي رغم اني اقرب لك بس تشوف اوجاعي ما تستاهل

مشاري : ولييد لا تقلب الامور لمصلحتك!؟ انت تدري وش اقصد

متعب: بس يا شباب لا تكبرون السالفه وهي تافهه

مشاري : لا ماهي تافهه وصار وقتنا نناقشها ! وبعدين يعني ؟! بتجلس ميت كذا عشانها! اذا هامتك مره ارجع لها ولا تجلس كذا

وهنا وقف وليد بغضب: تراني ساكت لك ومعطيك اعذارك وانت اللي تدري من البدايه وساكت وتاركني اغرق بمستنقع مؤامرات هايف الزفت واخوه

مشاري : خبل انت ! مريض في راسك شي!؟ اي مؤامرات ترا محد درا عنك ! وبعدين مب انت اللي حطيت رجل بالارض ورجل بالسماء ولا رضيت تزوج الا هي ليه جاي ترمي غلطاتك عليهم

سعود : وبعدين يا وليد ترا من البدايه قايلين لك هالبنت ما تصلح لك انت اللي ماطعت

وليد ضحك باستهزاء : ايييه ايييه تجمعوا على راسي حزب هايف

مشاري: تكلم مزبوط احسن لك

مقبل : اهدو يا جماعه كذا ما بنوصل لحل ! وبعدين مشاري دامكم عارفين من البدايه ليه ما قلتوا ! ليه سكتوا

متعب؛ احنا نبي تفسير اللي سويته انت وهايف

مشاري جلس وهو يمسح جبينه: بداية الموضوع هايف ماكان يدري انها هي نفسها طليقة اخوه

ألين رحنا نخطب وحزتها عرف البيت و اختبص وما دخلنا معكم وهو يسأل وش جاب وليد لهيفاء ، اصلا ماكان مصدق ان هيفاء هي نفسها اللي تكلم وليد يعني رغم انها طليقة اخوه وماسوت معهم خير ابد مع ذلك ما اساء الظن فيها اخذنا فتره نحاول نحصل حل او شي بس ما فيه فايده ووليد متعلق فيها مره وبعد ما اهل هيفاء جحدوا هايف رغم انهم يعرفونه قرر يسكت عشان وليد ينبسط بحياته فالنهايه ماعاد لهم شغل بهيفاء وهاذي حياتها لكن شوي شوي بدت الاحداث تطلع من يدينا وغير كذا وليد علاقته مع هايف دايم مضطربه ولا يبي يزيد الطين بله.. لكن هالزفت ما جلست بحالها وصارت تضايقهم وغير كذا سحبتك من بينا ولا دريت بنفسك والحين جاي تعاتب !؟ وتحط اللوم علينا انت اللي مسكر عيونك يا وليد

وليد: برافو والله عرف كيف يخليك تناصره ها الهايف

متعب : وليد انت تعرف هايف زين فلا تجلس تحسس من امور راحت

وليد : ايه هو حبيب قلبكم لكن اسمعوني المكان اللي هو فيه انا مانيب فيه

مشاري : فالنهايه انت الخسران

اخذ اغراضه مشاري وطلع زعلان من وليد

.................••............

عند هايف ونجد

اللي تركوا عشاهم يجهز وبدوا يمشون

التفت هايف : تسابقين!

ناظرته نجد: من جدك!

هايف ضحك :ايه

نجد:وين طيب!؟

اشر هايف: هناك

وابتدا يعد هايف انطلقوا على رقم ثلاثه ونجد تركض بكل حيلها وهايف يتراخى عشان تسبقه وقبل توصل نقطة النهايه اسرع وهو يضحك وسحبها وهو يرفعها فوق : اجل بتسبقيييني

نجد :نزلي اول شي وبعدين انت البطيء

هايف : ماني بطيء بس حطيت كل حيلي في ركضي وراتس عمري كله

نجد: بس استاهل

هايف: اي والله تستاهلين يا نجد

نزلها وهو يلفها بيدها وتدور نجد وهي تضحك ويضحك قلب هايف بضحكتها

شهقت نجد: العشاء !

ركضت تشوف العشاء

وبعد ماتعشوا انسدح هايف:اااه ياربي من زمان عن نوم العزبه

نجد: صراحه جابت لي النوم مررره احس خلاص مقدر اقاوم اكثر

هايف : هاااديه وهواها حلو

نجد: طيب وين ننام !

هايف:في الخيمه

نجد : ظلام الخيمه

هايف: ليه من متى ننام بالنور

نجد : بلا عبط بس اقصد كيف افرش

هايف مد يده: تعالي قوميني اشوف

قربت نجد تسحبه لين وقف معها واتجهوا للخيمه وهم من زمان ما جو لها

وبدوا ينفضون ويرتبون وفجاءه صرخت نجد:هايف عقرب كبيييره

هايف لف برعب: وينها!

نجد : هذا هي قريبه

ركض هايف يجيب شي يقتلها : نجد اطلعي بشويش

طلعت نجد تركض وذبح هايف العقرب : من زمان ما نظفنا وهذا هي جت

نجد: والله ما انام هنا

هايف : وين بتنامين !

نجد: تكفى هايف دور مكان غيرر ذا

هايف: نجد كل اللي فيه نفس الوضع الا اذا ودتس نفرش برا وننام

نجد: لاااا برا بعد كلاب

لف هايف يدور بعيونه و ابتسم: تعالي تعالي هذا والله اللي اشتقت انام فيه

ناظرت نجد باستغراب: لا تقول حوض السياره

اخذ هايف اللحف وهو يفتح الحوض : والله ياهي نومه فيه ماتحسين بنفستس وغير كذا مرفوع ولا بيجيتس شي فيه

نجد: واذا اوجع ظهورنا

هايف اللي كان مشغول يعدل الالحف ووقف وهو يرفع نجد عنده : انا ظهري متعود وانتي اصلا تنامين بحضني فا ما بيوجعتس شي

ابتسمت نجد: واذا جانا شي!

هايف: مابيجيتس شي وانا فيه وبعدين جربي

رضخت نجد وهايف انسدح : وبعدين وش ازين من انتس تنامين وانتي تناظرين القمر والنجوم والليل

انسدحت نجد وهي تستند لصدره : انا الليل معي بس يكفيني اشوف النجوم والقمر

هايف:القمر بعد موجود يعني ما بقى الا النجوم نعدها

سكتوا وهم يناظرون بهدوء وضحكت نجد : دامك الليل وانا القمرا على قولك اجل عيالنا هم النجوم

ضحك هايف بغصه: ان شاء الله عيالنا على عدد هالنجوم

استمرت سوالف وهي تدرج ما بين الذكريات والامنيات وغفوا على هالموال لين فتحت نجد عينها على صوت مكتوم مرعوب وشافت ارعب شي ممكن تشوفه في حياتها

حاولت تكذب عيونها بس ماكان فيه مجال للكذب وهي تشوف فوق راسها بالضبط راس غريب مو باين من الظلام شي مرعب وله شعر يتحرك مع الهواء مدت يدها بشويش تدق هايف عشان يصحى بس ما تحرك ولا صحى وحاولت بس ما صحى واول ما بدىى يقرب هالكائن الغريب صرخت بكل صوتها وفز هايف مفجوع وهجت الناقه اللي كانت فوق راسها مفجوعه

ونجد مسكره عيونها تصرخ جلس هايف على ركبه بفجعه وهو يهزها: نجد نجد نجد علامتس نجد

فتحت عيونها نجد برعب : فيه شي في شي كان فوق راسي

فز هايف يناظر وغمض اول ماشاف الناقه هاجه جلس وهو يمسك يدين نجد اللي ترجف: بسم لله عليتس بسم لله عليتس لا تخافييين راحت خلاص راااحت

نجد قربت تتمسك بهايف وهي ميته صياح: وشو ذا وشو ذا

هايف : ناقه يا بنت الحلال وخافت وهجت خلاص

نجد : فجعتني والله فجعتني

هايف حضنها وهو يمسح على ظهرها برعب: بسم للله عليتس سمي بالله خلاص ونامي راحت خلاص

نجد : واذا رجعت

هايف : لا ماهي راجعه هي متعوده ان يكون بالحوض خبز ولا شي تاكله وياما سوتها فيني وعادي تصيحين عليها تروح معاد تجي

نجد ماردت وهي تبكي : وين نروح كيف انام تكفى خلنا نرجع البيت

هايف : نجد الله يهديتس ليه نرجع البيت والله خلاص راحت ولا عاد تجي

نجد : والله معاد يجيني نوم انا ادري شوف شوف قلبي طلع

هايف اللي كان فاتح عين ومسكر عين من قوة النوم وكانت نومته حلوووه :ماعليه يا عيوني انتي اقري الاذكار والمعوذات وبتروح الروعه

نجد : يعني بترجع تنام هنا

هايف : تبين ندخل الخيمه!؟

نجد: لاااا

هايف : ننزل الدكه!؟

نجد: لا بعد

هايف رجع ينسدح وهو يسحبها لحضنه : اذكري الله وعيني من الله خير ونامي والله مايجيتس شي وبعدين انا معتس

نجد : واذا فتحت عيوني ولقيتها مره ثانيه

هايف : وش اقول انا اقول معاد هي راجعه ولا تدرين

سحب اللحاف يغطي راسها ولا باقي الا وجهها اللي كان جهة صدره يعني ما تشوف شي فوق ابد ولفه عليها بذراعينه وهو يشد عليها : سوي كذا ولا وتشوفين احد الا انا

نجد رجعت تهدا وهي تحاول ما تفكر ورجع هايف ينام لكن كل 5 دقايق يصحى على تحركات نجد اللي عجزت تنام وهي توسوس وكل شي تحرك تشوف صاحي ولا نام وهو يكرر نفس الكلمه: صاحي معتس ماعليتس

وهو في سابع نومه وعلى هالحال لين غفت نجد بالقوه

ومشى الوقت بهايف ولا صحى ولا حتى صلى الفجر ولكن فتح عيونه بقوه على الصوت اللي جاي من بعيد شوي يقول : هااايف يا هااايف

وصوت ثاني يقول : الظاهر للحين نايييم

انقطع نفس هايف وهو كأنه فاقد الذاكره ويتعرف الصوت لكن شد على اسنانه او ما عرف صوت ابوه وابو نجد وابو فايز والدنيا فجر تورط مايدري وش يسوي كيف يقوم ولو جو وشافوهم بالحوض نايمين التفت لنجد وهو يشوفها غاطه بنومها للحين حمد ربه ان السياره قريبه مره من الخيمه سحب يده بشويش عشان ما تصحى نجد لكن بالغلط شد على شعرها وصحت برعب وصرخت وهي ماتدري وش يشد شعرها رجع هايف بسرعه وهو يسكر فمها: اص الله يرحم والدينتس انا هايف هايف

نجد التفت برعب وهي تبعد يده : وش تسوي وش فيك

هايف : اص اص ابوي والشياب هنا

واول ما انتهى هايف من كلامه سمع صوت السيارات : يالليل جو كلهم انزلي انزلي بشويش لا احد يشوفتس وحاول ترتبين الخيمه وصلي ترا ما صلينا

انسحبوا ودخلوا الخيمه وهايف يوضي بسرعه وطلع ورا الخيمه يصلي وهو يرجف من البرد

رجع ياخذ اغراضه : استعجلي هاه

نجد : واذا طلع لي شي

هايف : لا يا حبيبي ما بيطلع لتس شي

اخذ شماغه وهو يحطها على راسه ويعصبها وطلع وابتدت نجد تنفض بعد ماصلت وهي تحاول ترتب اي شي قدامها

اما هايف كان يمشي على التراب البارد وهو من قوة البرد قلبه ينتفض اسرع لهم وهو يسلم عليهم : صبحهم الله بالخيير

ابو زيد: صبحت بالنور ، وينك يا طافي النار وانا اقول بجي وشوف النار من 10 متر واثرك راقد

هايف : لا مانيب راقد كنت اضبط الفرن لنجد جوا

ابو نجد : وعاد عسى نجد ما بهذلتك تراها اول مره تجلس بعزبه

هايف ضحك: لا الله يسلمك ويعافيك

ابو زيد : يلا يلا شب نارك وخلص

وبسرعه قام هايف يشب النار ووصل مطلق واديم وشريفه واقبل مطلق لهايف يساعده

................••............

اما البنات دخلوا عند نجد المحتاسه

شريفه: وش فيتس ضايعه

نجد جلست بتعب : والله ضايعه صدق

اديم وقالت بضحك وخبث : وش بلاتس تعبانه وحالتس حاله !؟ وبعدين وينكم من امس ما رتبتوا هااه! ولا ذابحكم الحب

شريفه ضحكت: اديم ناقصتس سلمى عشان تكمل الخباثه

نجد ضحكت : الله لا يعطي عدوتس خيير وينا وين الحب ما قعد رعب في حياتي ما مر علي امس

شريفه: ليه !

وقفت نجد وهي ترفع ملابس هايف اللي بدلها ورماها على طرف لكن التفت على ضحك البنات: يا شييييينتس انتي وياها

اديم: وش الرعب هاه اللي شفتيه!؟

نجد : اديموه وش ذا الانحراف ما خبرتس كذا

ضحكت اديم :والله انا كنت ربع خبيثه وطحت على سلمى وصرت نص خبيثه وصدمني مطلق وصلت فل خباثه

شريفه: جو الباقين واحمدي ربتس ان امي تكفلت بالفطور

ازدحمت العزبه بالناس وفعلا انقذوا هايف من هم الفطور

وكان هايف جالس جنب النار وهو يحس انه بردان يحس البرد بقلبه لانه توضى وطلع برا على طول

وغير كذا نايم ببرد ولا تلحف زين

ابو زيد : قم يا هايف انت ومطلق عطونا حليبكم وشوفوا حلالكم

كان ود هايف يصيح بس قام واخذ فروته وطلع مع مطلق اللي يتمشى بثوبه عادي

قرب مطلق وهو يحط يده على كتف هايف: علامك انت ! وش ذا البرد اللي طرا لك فجأه وانا اخبرك اخر من يحس بالبرد

هايف : ايييه تكفى ضمني احس البرد في قلبي اعوذ بالله وش ذا لا نوم زين ولا جو زين

ناظره مطلق وانفجر يضحك: ضمني وبرد ونوم خايس وش مخبص طال عمرك ! خل الفسقه تنفعك

دفه هايف وهو يضحك: والله انك فاضي

مطلق ضحك : طيب ياللي مانك فاضي

هايف التفت له وهو يدري ان تفكير مطلق ابحر في امور ثانيه وبدا يعلمه بخوف نجد اللي مره عقرب ومره ناقه ومره مدري وشو وانه عشان كذا ما نام

مطلق : اقول والله انك وانا اخوك خبل برد موووت تنام بالحوض مجنون وبعدين كان نفضتوا الخيمه مضبوط ونمتوا فيها مالكم ومال هالاكشن

هايف : اصلا لو ما يصير في حياتي اكشن ما اصير هايف

كملوا طريقهم لكن لحقهم مؤيد وفايز وزيد

................••............

وعند البنات

كانوا يسولفون وطول الوقت وسلمى واديم يحشون بنجد اللي شايفتهم وتحذفهم بكل شي ولا يطيعون

ووقفت نجد بضحك وسحبت المخده اللي بجنبها وهي تبي ترميها عليهم وتحركت بسرعه لكن فجعتها صرخت ام فايز والكل انفجع واول مالتفتوا على مكان المخده كان فيه داب( ثعبان) بالضبط فالمكان اللي طول الوقت وهايف يحوم حوله من امس وكان يبي ينام هناك الكل هج الا

اديم الللي كانت اذا خافت ما تعرف تتحرك ابد ولا قدرت تقوم ورمت هايف على ام زيد وهي مفجوعه

وكان قريب منها مره وصار قدامها ولا قدرت حتى تحرك وام زيد تناديها بخوف : اديم اديم وانا امتس اطلعي اديم اطلعي مع الباب الثاني قبل يجيتس ادييم

اديم كل ما قرب زاد بكاها عللى الصامت وهي لازقه بالزاويه والداب قدامها

الكل يناديها بس ما قدرت تحرك

وطلعت نجد وشريفه يركضون وينادون الرجال وهذا على جيت العيال والتفتوا على صوت نجد اللي تصرخ: مطلق هايف ألحقوا ادييييييم بيقرصها الداب اركضوا

نجد كانت تبكي وفجعتهم وشافوا ابو زيد وابو فايز والكل يركض ورا شريفه ونزل مطلق الحليب وركض هو وفايز وباقي العيال وقفوا قريب مايقدرون يدخلون واديم كاشفه

دخل مطلق وهو يشوف ابو زيد يقول : اديم خليتس في محلتس

ابو فايز: لا تبكين يا بنتي

نزل نظره مطلق واول ماشاف حجم الداب بردت اطرافه واديم تناظره وتبكي طلع وهو مختبص و عطاه حسين الفاس ورجع مطلق : اطلعوا وابعدوا على البيبان اطلعوووا

ابو زيد : اطلعو يلا

طلعوا الكل ولا بقى الا ابو زيد ومطلق حتى ابو فايز طلع والعيال عند البيبان عشان اذا طلع يذبحونه

مطلق اللي كان خايف على اديم وهو يقول : لا تحركين ولا تبكين ولا تطلعين صوت ولا تناظرين ناظريني هنا

كان يحوم حوالين اديم وهي ترتجف ومطلق اللي احمر وجهه وعيونه وهو خايف اي تصرف خطاء يروح اديم من يده اول ما رفع الفاس كان يسمي ولكن صرخت ام فايز تبكي : طلعووووها لا تخلونها عنده طلعوها فايز ألحق اختك

بصوتها وكلامها شتت انتباه مطلق اللي ضرب الفاس على طرف الداب وانتبه لهم وكاش ولف بسرعه على اديم وصرخت اديم بفجعه من منظره لكن صرخ مطلق من صراخها وهو بدون وعي يقول لام فايز : الله ياخذ عمرتس

وقبل يوصل اديم الداب من رعب مطلق اللي سيطر عليه ضربه بالفاس ولا اكتفى بضربه او ضربتين صار يضرب عليه بشكل هستيري بدون ما يحس بنفسه

وصارت اديم خايفه من فاس مطلق اللي يطلع وينزل قدام عيونها وهو مب حاس بنفسه

ابو زيد اللي انفجع من فجعه مطلق وسحبه ويبعد الفاس : خلاااص خلاااااص مات مات وش بلاك

ناظر مطلق الداب مقطع تقطيع رمى الفاس ووجهه احمرر ويدينه ترتجف ومعرررق وعروقه بازره من كل مكان كان زي المقروص مايدري وش يسوي سحب اديم من الزاويه يتفقدها: جاتس شي سواء بتس شي يوجعتس شي

اديم كانت تبكي من الرعب وتهز راسها ( لا )

نسى مطلق نفسه ونسى الناس احتضن اديم بذراعه وهو يسمي عليها وصد ابو زيد وقال بصوت عالي ينبهه مطلق : يلا يلا انتهت السالفه

انتبه مطلق وابتعد شوي وهو ياخذ المويه من شريفه عطاها اديم وطلعوا برا وهو يحط لها التكايه تجلس عليها لين تهدى كان عندها وهو يهدي واول ماشاف ام فايز كأنه شايف ابليس التف حول اديم وهو يقول بصراخ عشان الكل يبعد : وخروووا من هنا ابعدن عن الخيييييمه يلااااا

بصوت مطلق الغاضب وخروا كلهم وقالت سلمى بحده وهي ماسكه ولدها ومرت من قدام ام فايز : يقول وخروا

رجعت ام فايز معهم وهي اول مره تنرعب من صراخ مطلق ومن كلامه اللي قاله لها بالخيمه

الكل اتجهوا لدكه وقال هايف : مطلق ابعدوا شوي نبي ننفض هالزفت لا يطلع فيها شي بعد

مطلق : دوروا زين وانتبهوا

اخذ اديم واتجهه لسياره وهو حتى ولده ما يتذكره

فتح الباب وسيارته صاده عن الكل واول ما صاروا بطرفه سحب اديم وهو يحضنها برعب وقلبه يدق يدق برعب ورجعت اديم تصيح وهي ترتجف

مطلق : بس بس تكفين لا تبكين والله اني بغت تروح روحي من الخرعه

اديم: بغيت اموت يا مطلق والله حسيت بيوقف قلبي من الخوف

مطلق : بسم لله عليتس جعله بعدوينتس عمرتس طويل ان شاء الله

اديم حطت يدها على راسها: وين هايف مدري وينه وديته من خوفي

مطلق التفت وشافه مع امه : هذا هو مع امي المهم انتي بخير كل شي معوض

سكتوا شوي وهم يحاولون يهدون ولفت اديم تناظره: وانت بغيت تذبحني بهالفاس

التفت مطلق يدقق كلامها وتذكر وضحك بهدو: وش اسوي انهبلت انجنيت مدري وش كنت بسوي بس ما كنت ابيه يجيتس

وقفت اديم تحضنه : الله يخليك لي سند

مطلق شد عليها : والله لا يخليني منتس

لفوا على صوت سلمى اللي تنحنح : اقول ابوي يناديكم يقول بيقرا على اديم لكن شكلي بقوله ييجمعكم ويقرا عليكم

ضحك مطلق : عز الله مرتاحين منتس لنا مده

اديم بضحك: حتى وانتي نفاس المفروض ما تطلعين بالبرد تراكضين ورانا

سلمى ضحكت: اهبي يا وجهتس لسانتس للحين يلوط اذانتس والله لو اني صاير في اللي صاير فيتس لتوب واعتكف ومعاد اكلم احد

مطلق : اقول اذكري الله وضفي وجهتس قبل اجي بالفاس لتس بعد

سلمى :هههههههههههههههههههههههه� �هههههههههههههههههههههههه ههههههه على طاري الفاس وش بلاك بغيت تذبح ذا الخبله مع الداب شكلك تدور الزله

لكن معليك انا حاسه فيك وانا اختك اديموه ما ينصبر عليها

اديم : تكفى توطى ببطنها

مطلق : من دون ما توصين

تحرك مطلق لسلمى اللي انحاشت وهي ماهي مراعيه امر انها نفاس ابد

رجع مطلق ياخذ اديم اللي للحين تحس رجولها نايمه من الرعب

................••............

اما عند العيال

رجعوا للخيمه ونفضوها نفضوها فووووق تحت وطلع شي وطلع راح نص الوقت يمقلبون بعض كل شوي واحد رامي على واحد شي ومروعه

وبعد مجزره في الخيمه طلعوا وهم يسمعون ابو زيد يقرا على اديم عشان ان كانت منفجعه تهدا مطلق جالس جنبها وولده بحضنه

جاء هايف وهو يضحك : اقووول اديم ماشاء الله عليتس وش ذا الحظ

ناظرته اديم بحقد : الله لا يحطك مكاني

حسين : اقول يا ام هايف ترا هالنحس ماجاتس الا من ولدتس اللي مسميته على ابو النحس ذا

اديم : شكرا لك من القلب يا حسين كفيت وفيت عن ردي

مؤيد : اشبنا يا هوه اشبكم على هايف والله هو جمال عايلتكم وبعدين هو صادق اش هذا 7 ارواح ماشاء الله عليك كم كارثه مرت عليك ماصار لك شي

العمه حصه: يا ويييلي اذكرو الله على البنت

مطلق : تكفين يا عمه شوفي شغلتس معهم ترا عجزت انا اكاافح فيهم

فايز بغضب من كلام مطلق اللي قاله لامه بالخيمه : لا ماشاء الله لحق بها الفارس المغوار في كل كارثه

انتبه مطلق لنبرته بس طنشه وقال لعانه : الله لا يخليها ولا يخليني

ارتفع صوت العيال ضحك وتصفيق الكل يضحك

لكن فايز وامه كانوا معصبين وانتبه ابو فايز اللي سحب فايز بطرف: وش فيك

فايز: يبه مطلق تمادى كثير وسكتنا له حيل

ابو فايز : وش سوا هذا جزاه منقذٍ اختك

فايز: اختي زوجته غصب عليه ينقذها انا اتكلم على كلامه اللي قاله لامي

ابو فايز: وش قال!

فايز: دعاء عليها يبه قال الله ياخذ عمرك وتبيني اسكت له

ابو فايز: متى قاله !؟ مستحيل مطلق ما يقوله !؟

فايز : قاله اول ما نادت امي اديم

ابو فايز: يافايز كبر عقلك وانا ابوك ولا تهدم بيت اختك ومطلق اكيد ما يقصد اكيد انه في لحظة غضب واكيد ما درى انها امك وبعدين ترا كلنا توترنا وانت تدري لو ما لحق عليه كان اديم في خبر كان

فايز: لا تبرر له يبه

ابو فايز: بس يا فايز واسمعني زين اقصر الشر وفكني شرك وكلنا نعرف امك كيف تعامل مطلق ومع ذلك ما عمره اذى اختك بالعكس شايلها شيل وعيال عمك ما تلقى مثلهم فلا تاخذك العزه بنفسك وانت الغلطان والانسان بساعة الغضب ما يفكر اترك الحزازيات وركز في بيتك

تركه ابو فايز ورجع لهم وهو يشوف سيد الحديث مؤيد وهايف اللي يتناقشون مع ابو زيد وابو نجد ويحللون كل سالفه تمر ويضحكون وكان فعلا يتوسع صدر هايف بجية مؤيد اما مطلق كانت عينه على اديم ويلتفت لها كل دقيقه وكل شي يمدونه عليه يعطيها اياها حتى ولده مب راضي يعطيها اياه عشان ترتاح

والعصر

بعد ما الكل هدا من الرعب والشباب شيكوا على كل شي وتاكدوا من سلامته انتشروا يتمشون حوالين العزبه وقربت نجد لاديم : هاه ركد قلبتس

اديم : ايه الحمدلله

ضحكت نجد : هذا ذنبي يوم اعلمكم وش صار معي البارح وتضحكون وتفكرون بانحراف

اديم :خلااااص توبه بأحسن الظن في كل الناس

ضحكت سلمى: عز الله حوبتس يا اديم وبعدين تعالي شوفي الانحراف اللي صار عند سيارتهم مسويه مرتاعه وتبي تهدى ومطلق مقروش الدنيا فالاخير نسأل الله السلامه

ضحكت نجد:ههههههههههههههههههههه� �هههههههههههههههههههههههه هههههههههه ايييييوه ايييوه ما توفرون ياخي

اديم: اذلفي انتي وياها وبعدين ترا سلموه نصابه وكل اللي صار اني حبيت اني اعبر عن امتناني لتضيحه مطلق واحضنه

نجد: يمممه منتس

سلمى: اقول اسمعوا بعد دام الوضع راكد وش رايكم ننادي هايف ونخليه يفحط بنا

اديم: هييييه انتي خبله ، انتي ناسيه وضعتس ترا مالتس اسبوع والده وعندتس ولد

نجد: تعالي يا بقره وين ولدتس

سلمى : والله مدري مع امي ولا عمتي حصه

اديم : يا قهرررري منتس

سلمى: ياللليل المهم وش قلتوا ترا ما احب اطلع العزبه وانحبس

اديم : على طاري التفحيط والله يا مطلق فحط بنا مره قسم بالله حتى هايف انخرش

سلمى: اما ! مطللق يفحط هاذي كبيره

نجد : اي والله وحاسنا بعد

سلمى: طيب رشحوا واحد نروح معه

نجد : هايف دام مؤيد فيه انسييييه مب فاضي لنا ولكن مطلق اتوقع لو تقوله اديم بيقول تم طلباتها اليوم مجابه

اديم : اييه خلينا نقول لمطلق بس ترا بيغسل شراعتس انتي

سلمى: قومي بس قومي دوريه

طلعت اديم تدور على مطلق اللي كان قريب ما يروح بعيد وهو للحين تحت تأثير الموقف

................••............!

عند الشياب

كانوا جالسين وهم يسولفون عن الماضي

وجالس عندهم مطلق

وباقي الشباب كانوا يتمشون التفت مطلق على جيت عبود : عمو اديم تبيك

وقف مطلق وراح لها : اديييم وش فيتس !؟ صار شي

اديم : لا لا مافيه شي بس وش عندك يعني وش تسوي

مطلق : ما اسوي شي جالس

اديم مدت وهي تمسك يده عشان تبعده عن انظار الرجال وتاخذ راحتها بالكلام شد عليها مطلق وهو يدفي يدها البارده بيده : قولي وش عندتس !

اديم : يعني بما انه عصر وطفش كذا يعني ودنا نغير جو يعني

مطلق : وين تغيرين جو!

اديم: مب انا لحالي انا والبنات كلنا حنا سولفنا لسلمى عن التفحيط وعاد مسكينه ودها تجرب

مطلق : صاحيين انتم سلمى! مب تعبانه والله تغسل شراعنا امي

اديم : ما بتسوي شي بتجلس بس

مطلق :لا لا سلمى لا

جت سلمى من بعيد : هاه وش صار

مطلق رفع يده يناديها: تعالي تعالي

جت سلمى : هاه

مطلق سحبها من اذنها: انتي خبله ! عقلتس وين! فيه ادميه بعقلها توها والده من اسبوع وتسوي سواتس

سلمى : فك اذني اول شي ترا ماصدقت تعدل وبعدين وش سويت انا !

مطلق : وش ما سويتي كل شي سويتيه والحين بتروحين تفحطين يا الاخت

سلمى: ياللييل مسوي سالفه يعني ترا عادي ماني ميته

اديم : خلها ذنبها على جنبها

التفتوا على صوت هايف ينادي مطلق : هيييه مطلق عندك احد

التفت مطلق لاديم : تغطي ، تعال تعال

جاء هايف : خير وش عندكم متجمعين

مطلق : تعال بالله اسمع اختك المهبوله وش تقول

هايف : ماهي غريبه عليها بس وش تخربط

مطلق قام يسولف لهايف اوضاع سلمى التفت لها هايف بضحك: سؤال بس ولدتس وينه!

لفت سلمى تناظر خيمة الحريم وضحكت: الظاهر مع امي

هايف: الظاهر يعني ما تدرين وينه!؟ تبيني اشكيتس لمشاري اقول تعال انقذ ولدك اللي يتمشى مع المسلمين

سلمى: يا رجال ولدي هب رييييييح نشمي ماعليه من الظروف

هايف :ايه ايه اقول ربي راحمه ان ابوه مشاري والا والله يضيع ويدج

سلمى: المهم بس بتودونا

مطلق : انتي لا اقلبي وجهتس عند امي وخليها تعطيتس عريكه وعصيده وحلبه تنفعتس

سلمى بضحك : والله مدري من النفاس انا ولا انت

انفجر هايف يضحك وركضت سلمى تخبى وراه عن مطلق

هايف: اقول اسمع قلهم كلهم نطلع نتمشى شوي هناك عند الضلع( الجبل ) بس هاه خلنا شباب شياب وعجز مانبي

مطلق :انا جايبك عون تصير فرعون

هايف : خلها تستانس ياخي ما صاير لها شي يلا روحي وعلمي نجد والباقين

انتشر الخبر بين الشباب والبنات وحطوا البزارين عن امهاتهم وطلعوا الا فايز اللي رفض الطلعه ورفض ان ريوف تطلع معهم بعد

فالسياره التفت مطلق : وين ريوف !؟ شريفه: ولدها مسخن وجلست معه

سلمى: وش فيه توه بسم لله عليه

اديم صدت بضيق وهي ما تدري وش فيه قالب على مطلق

نزل مطلق وهو حاس فايز له يد اتجهه للخيمه ينادي : ريووف ريوووف وينتس !

ريوف :هلا

مطلق : جيبي ولدتس وينه!؟ ريوف : مسخن يا مطلق ونايم

مطلق : توه مافيه شي! لا تقولين فايزوه مانعتس

ريوف ماكانت تبيها تكبر بين فايز واخوانها اللي لو حسوا ان فايز ما نعها بيحوسون الجو : لا لا وش دعوه بس صدق سلطان تعبان

سكت مطلق فتره يراقبها وهو يدور الزله على فايز تحرك وهو يقول : زين زين

وقبل يتحركون لحقتهم ام زيد : سلمى معكم !

مطلق : ايييه اييه

ام زيد: نزلها نزلها يا ويلي تبي تذبحني هالبنت

مطلق : معلمتس انا هيا انزلي

طلعت سلمى راسها من عند مطلق : يممممه علامتس

ام زيد : وين بتذلفين انزلي انزلي

سلمى: يمه الله يخليتس بلا فضايح بنفلها شوي ونجي

مطلق: اقول انزلي انزلي

هايف جاء: ورا ما تمشوون !

سلمى: هايف تكفى افزع امي بتنزلني

لف هايف بضحك: علامتس عليها يمه

ام زيد: ما يصير يمه تروح

حصه : والله ماعمرها صارت انتي ام انتي مخليتن ولدتس من صبح والحين بتروحين تطعسين

سلمى: الله واكبر ما بيصير لي شي وانتم ما تقولون حملتوا وولدتوا طبختوا الذبايح وكنتوا تكرفون وتسوون كل شي ماعندكم مشاكل ودلع خلاص انا بعد زيكم

هايف ضحك وهو يصفق: اهبي مطول لسانتس صرفتي نفستس في اقرب شي

مطلق : احرقت كروت امي وعمتي

هايف راح لامه وهو يبوس راسها: خلاص خليها تروح وان فتحت فمها وقالت فيني شي أللعني خيرها

ام زيد: ها انتبهوا لها

هايف : من عيوني

العمه حصه ضحكت بدون ما تنتبه وقالت: والله لو هي نجد نفاس تخليها سنه بلحالها ما تحرك

التفت هايف ببتسامه بسيطه وحاول يشتت الموضوع وقال بضحك يبعد هالموضوع: عاد نجد نجد وسلمى سلمى

سلمى: ودي ارد عليك بس عشانك توسطت لي بسكت

راح هايف ببتسامه وتحركوا ما عدا ريوف اللي جالسه تراقبهم بهدوء وضيق وهي تدري من يوم صار فايز يتصرف كذا بتعقد الامور

................••............

في بيت ابو فرج

كانوا كل الشباب مجتمعين كالعاده الا مشاري

التفت ابو فرج: وينه مشاري

سعود : بيجي بيجي

دخل مشاري : سلام عليكم

الكل : وعليكم السلام

وصل مشاري لابو فرج وباس راسه وجلس بطرف وهو حتى ما كلم وليد نهائياً ولا سأل عن حاله ابد

ابو فرج همس لمتعب: صاير شي بينهم!؟

متعب: حاميه بينهم عشان هايف وليد يقول ان هايف متأمر عليه هو ومطلق ومشاري معصب من ذا النقطه وزاد عليها وليد يقول ان سعود مشاري احلاف هايف وساكتين لسواياه عشان زوجاتهم

ابو فرج: لا والله

متعب: اي والله

التفت ابو فرج وهو يشوف وليد صاد بضيق عن مشاري اللي ما حسب له حساب وهو يوري عيال سعود صور ولده

ابو فرج: مشاري تعال جنبي

وقف مشاري ببتسامه وجلس : جيتك بوريك أمير الشباب كلهم

ابتسم ابو فرج لصور محسن الصغير : الله يخليه لك وانا ابوك

مشاري: اميين

التفت ابو فرج: ولييد تعال هنا

قرب وليد ولف ابو فرج عليهم بغضب : وش ذا الهواش والزعل اللي بينكم

صد وليد: خلني ساكت يا ابو فرج وخلها بالقلب تجرح

مشاري وقف بإنفعال: الله اكبر علييييك يا شيخخ وش اللي جارحك هاه !

ابو فرج: مشاري اجلس

جلس مشاري وهو ينزل جواله بغضب : شوف يا وليد اذا بترمي غبائك وعميانك على هايف اسكت ازين لك

ابو فرج: يا وليد وش فيك على هايف ! وش مسوي بك

وليد: كل اللي سووه وتقول ما سووا شي

ابو فرج: ما سووا شي بالعكس سكتوا يبونك تعيش حياتك بالطريقه اللي تحبها بدون ما يخربون عليك بالماضي ولكن يوم شافوك تغرق ويوم شافو انها ما تصونك قرروا يفتحون عيونك والمفروض تشكرهم ما تقلب عليهم

ضحك وليد: بتقنعوني الحين انهم بيصونني بتقنعوني ان مطلق ماله يد وانه ما سحب هيفاء له عشان يخرب حياتها من جديد

متعب : ودامك تشوف انهم ظالمينها ليها صدقت فيها ليه طلقتها !

سكت وليد وبعدها قال: لا توقع بعد كلامهم بخليها على ذمتي

سعود بهدوء: لانك تدري وواثق ان كلامهم عنها صح وانها هي الغلطانه ولا ما سويت اللي سويته ولا تجلس تناقض نفسك

ابو فرج: وليد لازم انك تترك هالتفكير

وليد: مانيب تاركه واذا زعلانين على هايف وودكم تكونون معه اقطعوا علاقتكم فيني

وقف مشاري بيأس: انت خالص مافيك طب

طلع وليد بغضب ووقف مقبل اللي يشوفه غلطان لكن مهما كان وليد صاحبه من زمان وقريب منه مايقدر يخليه لكن تعب منه وصار وقت انه يبعده ويبعد معه عن هالمشاكل : اتركوه علي فتره ويرجع لكن انا بطلع للجوف عند اختي مرضها تقدم ولا اقدر اخليها و90٪ بستقر معها هناك ووليد بحاول معه يجي معي

وقفوا العيال وابو فرج بضيق:عسى مافي اختك امر خطير

مقبل : ان شاء للله فتره وتعدي لكن انا معاد لي حيله اجلس بديره وهي بديره وخلصت اموري وماشي

متعب بضيق: ماشي ماشي نهائي

مقبل هز راسه بضيق: ايه لكن بجيكم مانيب قاطعكم

ابو فرج: الله يسهل لك واذا تبي شي وانا عمك ولا احتجتوا شي

مقبل : ادري والله ماتقصرون ويلا مع السلامه

طلع مقبل بعد ما ودعهم وهو ضايق على حال اخته اللي تعاني من ( جرثومة الدم) واخذ وليد معه وطلعوا للجوف

اما الشباب جلسوا بضيق يناظرون ابو فرج

مشاري : دام هذا اللي صار والدنيا تفككت انا بعد لي فتره افكر في موضوع واحتمالية اني انفذه كبيره

متعب: خير يا مشاري!

مشاري : اخر فتره وبعد موت محسن الله يرحمه وانتقال هايف لديره معاد قدرت سلمى تتعايش مع الوضع بالرغم من وجود لطيفه الا انها دايم ضايقه وودها تكون قريبه من اهلها وشفت بما ان شغلي هالفتره راكد انقله لرياض وانقل هناك كلياً يعني استقر بالرياض وابدا احيي شغلي هناك وغير هذا تكون سلمى قريبه من اهلها

متعب: وش بلاكم قمتوا تفككون

ابو فرج: وكذا بتخلى الخبر علينا

مشاري التفت لهم: انتم ماعندكم شي بعد اشغالكم ما تلزمكم تجلسون بالخبر ولا لكم احد هنا يعني انت ياعمي عندك بيت فالرياض تقدر تستقر فيه وتجيب اشغالك معك ومتعب بعد يقدر بمكالمه وحده ينتقل لفرع البنك بالرياض وسعود بعد وزوجة سعود اهلها بالرياض يعني لو نستقر هناك بيكون ازين

الكل سكت وهم يحسون كلام مشاري منطقي لكن مستصعبين طلعتهم من الخبر ابو فرج: بنفكر بنفكر

متعب : الله يسسرها يلا انا بروح اخلص كم شغله

سعود : وانا بعد تاخرت على البيت

ابتدوا يطلعون شوي شوي وطلع ابو فرج يراقب حارتهم الللي كانت صحيح قديمه شوي وبدوا سكانها يتغيرون وبدت تغير عليه وبدا هو يفكر بالانتقال لرياض

.................••............

في العزبه

وفي احد الجبال كان تحدي التطعيس قاايم وتعزيز الشباب وصراخهم وحماس البنات وصراخهم ومن بينهم سلمى تصرخ: اخخخخخس يا مطلق طلعت طاااره وتعرف تطعس وكاتمنا هالسنين كلها

التفت لها مطلق وهو يضحك: وانتي تخلين احد يعترف بمواهبه

سلمى: يااااويلي يالغرور

وقفوا تحت الجبل ونزل مطلق مع الشباب

مؤيد: في مسابقه يا شباب لشباب بس مانبغى اعداد كبيره

ضحك زيد : يا رجال ترا كلنا على بعضنا خمسه

حسين: فيها جايزه!؟

مؤيد: فيها ألف

سلمى:ودكم اشارك معكم

حسين : اقول انثبري

هايف: يلا يلا وشهي المسابقه

مؤيد: شايفين قمة الجبل

العيال: ايييه

مؤيد: نتسابق اول واحد يوصل له ألف واذا وصلنا كلنا اول واحد ينزل ويوصل له الف

اديم بهمس لمطلق : حنا بنطلع معكم مع الجهه الثانيه

مطلق : اصبري شوي شوي

صفوا العيال وشريفه تصورهم وكل واحد مربط ثوبه

ويعد زيد والبنات يشجعون وانطلقوا وكانوا بالمقدمه هايف وحسين ومطلق اللي متعودين على ذا الامور اما زيد ومؤيد اخر الناس ومؤيد احسن من زيد شووي

وكان الوصول من نصيب حسسين اللي وقف وهو ينقز بضحك: بارك الله فالعزوبيييه اللي تخليك بحيلك

هايف: ان ما استحيت على وجهك صفقتك كف اخليك تنزل بالمقلوب

وصلوا بتعب وهم يسمعون البنات يشجعون حسين

مؤيد: انا اعترف اني غلطت في اختيار الجبل

مطلق : اوووه اعوذ بالله وش هذا انهد حيلي

حسين : الله لا يهد لنا حيل

رماه هايف بالحجر : اص اص

زيد: بس والله حلو من فوق من زمان ما رقيت الضلع

هايف: الله يسقي الايام اللي نتسابق عليه

مطلق التفت للبنات تحت : نناديهم دامنا رقينا مره وحده يرقون معنا

زيد: اييه ايه

هايف: بس مايقدرون يرقون مايعرفون

حسيين : خواتي صقرات يعرفون بس حريمكم مشكله

مطلق : تعال تعال نجيبهم زيد امش

هايف: مؤيد حسين صدوا لطرف الثاني ولا اجلسوا ترا بنتوزع على الجهات تعرفون الطلعه صعبه

مؤيد كان منسدح بتعب: انا ميت اصلا

مطلق : حسيين تعال مع شريفه وسلمى لا يصير فيها شي

نزلوا كلهم وكل واحد اخذ زوجته وحسين اخذ خواته وكل واحد راح لطريق لانه يعرف المعاناة مع الطلعه

اديم بالنص معاد قدرت تطلع وجلست بتعب: مطلق تكسرت رجولي تكسرت معاد اقدر

مطلق : هذا الجبل اللي بترقينه شفتي

اديم : اصبر نرتاح شوي

مطلق : ما يمدينا نبي نلحق قبل المغرب

اديم : طيب بحاول

التفت مطلق ماشاف حولهم احد رفعها وهو يشيلها: لا تحاولين خليتس علي

طلع بها مطلق اللي ماكانت اديم تشكل عليه حمل ابد بالعكس كان يطلع بخفه واديم مستانسه وقبل يوصلون نزلها: يلا كملي بنفستس

ابتسمت اديم وهي تطلع ومطلق وراها

................••............

اما هايف ونجد

كانت نجد تحاول وتطلع والاصعب انهم جاين بجهه صعبه وحجرها حاد

وطاحت انقطعت جزمة نجد وتورطت: تكفى بننزل خلاص

هايف بتعب: وصلنا ماعاد بقى شي

نجد : معاد اقدر اطلع

هايف نزل جزمته يعطيها اياها ولفت نجد: وانت

هايف ضحك وهو يمد يده لها عشان يطلعون شوي شوي : ماعليتس مني انا ولد الصحراء ما يفرق معي هالضلع رقيته عشرين مره حافي واموري طيبه

نجد : طيب يا ولد الصحراء امسكني لا اطيح

قرب هايف وهو يحط يده من ورا ظهرها ويطلع فيها لما وصلوا وهو منتهين

................••............

لكن زيد اللي سيء جدا في الطلعه وميثى اردى منه وتعنوا وتساعده ويساعدها لين وصلوا وهو خلاص ميتين

اما حسين كان بين شريفه وسلمى ولا تعذب معهم لانهم متعودات

وصلوا الكل للقمة وكان منظرها جميل على الغروب

التفت مؤيد: والله لو اني قادح لاسوي زواجي هنا

مطلق : اي حبيبي عشان ترقص على راس الف جني وجنيه

شريفه: سم بالله يا مطلق

هايف كان جالس يطلع الشوك من رجله وهو يضحك: الله يا مؤيد لو تسويه هنا صدق كان نص الجماعه محذفين بالوادي

زيد : والله مكان رهيب بس صعب

ضحك زيد والتفت يناظر هايف ومطلق : توني ايقن انكم منتهين يا الاثنين

مطلق : خير وش سوينا بك

زيد: تذكر انت وياه كل ما سويتوا مصيبه عند العزبه وعزم ابوي يلعن خيركم هجيتوا هنا وابوي يعجز يرقى وراكم

ضحك هايف : اييييه يا حبيبي ايييه لكن هالفله ما نفعتنا وحنا كل مغرب راجعين للبيت كعابي

حسين : انا اموت واعرف وشلون تنزلون بسرعه

مطلق : من هنا تعالوا تعالوا

طلوا كلهم مستغربين ونزل هايف بشويش بضحك: شوفوا من بعد هالحجر بيجيك تراب لين تحت يعني فيه مجال واسع عندك

نزل معه مطلق وهو يضحك: يا اذا كنا مستعجلين ننزل ركض

هايف : واذا ما ورانا شي نتدربى ( نتدحرج)

زيد: شكله اسهل

هايف : اصلا بننزل الحين لان خلاص معاد معنا وقت المغرب بيأذن

مطلق: وان جلسنا لين الاذان عز الله ما سلمنا

تجمعوا البنات حول بعض بخرشه وقال مؤيد: الله لا يعطيك عافيه

هايف : يلا يلا البنات تعالوا بتنزلون يمديكم تنزلون مشي

سلمى: معصي نبي نركض

مطلق : يا مريضه انتي بتطيحين

شريفه: سلموووه

طنشتهم سلمى وطبت عند هايف وصد مؤيد ورفضت ميثى تركض معهم ونجد وشريفه وسلمى واديم الا بيركضون

زيد: لحظه لحظه انا بنزل من ذا للطرف انا وام عبود بلاش نتكسر

حسين: شاطر اخوي العاقل

راح زيد ووحسين ومطلق وهايف صادين تحسبا لاي طارئ يمكن تطيح وحده وتكشف

اما البنات كانت متعت انهم يركضون من مكان مرتفع وكله تراب ناعم ومن سرعتهم ولا وحده تقدر تسيطر على نفسها بالعكس تحس رجلها تضرب بظهرها ومع ذلك يضحكون لكن تعثرت اديم بالنهايه وطاحت وطاحت عليه شريفه وفوقهم سلمى لكم نجد عجزت توقف ولا ردها الا نهاية الجبل طايحه وكان صوت ضحكهم معبي المكان وقاموا كل وحده تنفض التراب عنها

شريفه: يا ويلتس يا سلمى من امي

اديم: الله يستر عليتس بس لا يصير لتس شي

سلمى: ما صاير لي شي تعالوا نطلع هالخبله اللي ندفنت

راحوا لنجد اللي ما زالت تضحك بمكانها وهي مندفنه وطلعوا بضحك

وطل هايف: وخروا بننزل يلا وخروا

وخروا وهو يناظرون كيف بينزلون لكن العيال ما نزلوا ركض لا نزلوا يتدربون( يتدحرجون) وكل واحد يصفق الثاني بسيقانه لكن مؤيد دعسهم كلهم وهو يصارخ وحسين وقف بالنص يضحك لكن جاه مطلق مسرع ودعسه وتمسكوا بعض وطاحوا ورجعوا يتدربون

اما هايف كان الاخير وكان بلشان بسيقانه للي ما بقى حجر ما صفقت فيه ووصلوا وووصل هايف النهايه وهو من كثر ما تصفق وضحك بلع نص التراب

واخيرا وصل زيد وقرروا يرجعون بعد هالمغامره ومؤيد يغسل اذنه وخشمه اللي دخلوا فيها التراب ويسبهم ويضحك اما هايف كان توه يحس بوجع ظهره من الحجر لكن مطنش

مطلق كان اول مره يفلت نفسه قدام الكل كذا والكل مستغرب منه

وحسين وزيد يضحكون على مؤيد وهم بعد اردى منه لانهم ماعندهم مهارة مطلق وهايف

لكن البنات اللي اول مره يجربون هالشي كانوا يتحلطمون مستانسين

لكن الكل خايف يصير لسلمى شي

................••............

في العزبه

عند ريوف اللي كانت جالسه ورا الخيمه بضيق لفت على صوت فايز : ريوف وش تسوين هنا ! بلحالك

ناظرته ريوف وصدت : وين تبيني اروح ! ومع من اجلس

رفع راسه فايز بضيق وهو مهما حقد على مطلق فالنهايه ريوف مالها شغل جلس جنبها : ريوف لا تحسبين اني رجعتك لعانه فيك لا والله بس تروحين هناك وش تسوين !؟ ومعهم مؤيد بعد

ريوف ضحكت بستهزا: من متى مؤيد يزعجنا هاه ! وكلنا ندري ان مؤيد بالنسبه لنا اخو نشوفه بهالطريقه وهو بعد يشوفنا كذا ومثل ميانتي على اخواني امون عليه لكن قول انك مستلعن لمطلق

فايز : تكلمي معي كويس هذا واحد اثنين اخوك ما يستحي على وجهه وصار لازم احد يردعه

ريوف : وش اللي ما يستحي على وجهه وش سوا لك هاه !؟

فايز: لا والله كلامه مع امي هذا ما سوا شي ولا انتم على غيركم حرام وعليكم حلال ! ولا ترضين اني اسب امك

ريوف : اول شي مطلق ماهو منتبهه انها هي كل تركيزه مع اديم والداب وهذا كلام مطلق من دهر

ووقفت بغضب : واذا على امي امي ما تدخلت بحياة احد ولا استحقرت احد ولا ضيقت على احد

فايز وقف وهو يفور : نعععم وامي مضيقه على من ان شاء الله

ريوف : فايز ماله داعي تسوي نفسك ما تشوف وانت شايف امك وشلون تتعامل مع مطلق ومب بس امك حتى انت واللي يشوفكم يقول ذابح لكم احد

فايز : اقصري صوتك يا رييوف احسن لك ومحد نط على اخوك من الباب لطاقه لكن مطلق المتنح وما يبي على الارض احد غيره ويبي يسيطر على اديم الخبله وعلينا

ريوف : يووووووه بس عاد ذبحتونا ياللي مافيه مثلكم وبعدين افهم لو تحفر الارض تحفير ما تحصل مثل مطلق يداري اديم ولا تقدرون تحصلون عليه زله لكن مشكلتكم انه بدوي

فايز هنا انفجر وسحبها من يدها وهو يصيح فيها ويهزها: اقول انطمي ازين لك والا والله لتشوفين شي ما شفتيه وتراني ساكت لكم كثير واشوفها طالت وشمخت

زعزع الكلام صوت هايف اللي كان وصلوا وجاء يتطمن على ريوف ولدها بس اول ماشاف اللي يصير والكلام

قال بغضب : نزل يدك لا اكسرها لك

لفوا كلهم عليه وقرب هايف بغضب وهو يسحب يد فايز عن ريوف ورماها وهو يقول : قبل تفكر تمد يدك عليها اعرف انها بتنكسر فاااهم

فايز : اقولك وخر يا هايف وخلك بعيد ازين لا تعقد الامور اكثر

هايف اللي كان واقف ووراه ريوف : انا اللي بعقد الامور دام هذا اسلوبك

فايز: شي يخصني ويخص زوجتي انت وش دخلك

هايف التفت على ريوف بهدوء : لايكون مانعتس ماتجين معنا

قبل تتكلم ريوف اتجهه هايف لسلطان اللي يلعب حط يده على جبينه وكان بخير التفت لفايز بغضب : انهبلت انت بعقلك

ريوف : هايف اهدأ تكفى والموضوع مب زي ما انت فاهم

فايز : لا ترجينه خليه يفهم زي ما يبي وش بيسوي يعني

هايف انطلق على فايز وهو يشده بياقته بغضب : اسمعني زين يا فايز انا ساكت وحاشمك من حشمة عمي ولانك ولد عمي لكن توصل فيك المواصيل تسوي هالحركات صدقني ما احشمك

فايز دف هايف : لا تشد حيلك بالحشمه ترا حنا بعد ساكتين وحاشمين عشان عمي ولا انتم مانكم كفو حشيمه

اتسعت عيون هايف بصدمه من كلامه لكن من سوء حظه انه مطلق وحسين بعد جو

اسرع مطلق : خييير وش صاير

التفت فايز بغضب وهو يعدل ثوبه : ريوف تحركي قدامي

مسكها هايف : ماهي متحركه وش بتسوي!

ريوف بدت تخاف : هايف خلاص

حسين : هاايف وش فيه !

فايز سحب يد ريوف بقوه واوجعتها وهنا ما تمالك هايف نفسه وضرب فايز بكل قوته على ذراعه وانثنى فايز لكن ارتفع بغضب وبحركه غير متوقعه سدد لهايف ضربه قويه على كتفه اللي للحين متضرر من اثر الرصاصه ارتخى هايف بوجع وهو ماسك كتفه بألم وهنا تقدم مطلق بغضب وهو يلوي ذراع فايز اللي ضرب بها هايف : الظاهر مالك نيه ترسيها على بر

ابتداء فايز يقاوم وهم كل واحد اقوى من الثاني سواء مطلق او فايز

وركضت ريوف تنادي ابوها يحل الموضوع وجاء ابو زيد مصدوم من اللي صاير

ابو زيد : هيييه ولد ولد انت وياه وش بلاكم

ابو فايز : يافااايز ابعد ابعد ازين لك

ابعد مطلق بحضور ابوه واتجهه لهايف اللي للحين صاد بوجع لكن كابر على نفسه والتفت لفايز بحقد

ابو زيد : خييير خيير انت وياه ! وش ذا اللي يصير بزران انتم بزران ..! تطاقون

ابو فايز : وش صاير

هايف بحده: ان ما قصرت يد ولدك يا عمي عرفت انا كيف اقصرها

ابو زيد : احشم عمك وانت تكلمه عجيب والله

اجتمعوا الكل على الصوت واتجهه هايف بغضب لابوه يعلمه وش صار

وقال فايز بتحدي :لو تقول اللي تقوله هذا شي ما يخصك ولا احد شكى لك ريوف زوجتي وانا وياها نتجازى

مطلق : خلك ساكت بس خلك ساكت ومسألة انك ترفع يدك عليها هاذي للحين ما تصافينا فيها

ابو زيد : انا اتكلم انت وياه

ابو فايز: فايز لايكون صدق رفعت يدك على ريوف

فايز: ولو رفعتها محد له شغل

اتجهه له ابو زيد بغضب : الظاهر انك طااايش ومعاد في راسك عقل لكن والله لو ادري انك مديت يدك على بنتي والله

ريوف : لا يا يبه ما مد يده علي

هايف : ريوووف لا تغطين عليه

ريوف قربت تفهم ابوها انه بس سحبها وهذا من غضبه ولا له نيه يضربها

مطلق: وزود على ذا مانعها تروح وتجي معنا

فايز : تروح معك وين يا حبيبي !؟؟ للهيصه للي مسوينها بالجبل وقلة الحيا والتربيه ولا بتعلمها على طول لسانك واسلوبك الوصخ

ابو فايز: اقصر لسانك يا فايز

ابو زيد اشر لمطلق يسكت وهو يناظر فايز بحده : كل هذا يا فايز كل هذا

فايز: معليش يا عم بس اعذرني عيالك تمادوا حيل

ابو زيد : وش اللي سووه فيك عيالي يوم هم تمادوا علمني وانا اخذ حقك

التفت فايز يناظر حوله وبدا يخبص بالكلام ويرمي اتهامات مالها شغل الا بمطلق واديم وامه وكل اللي قاله هو ماله شغل فيه

لف مطلق يضحك باستهزاء وقال ابو زيد : للحين اسألك يا فايز وش سوو فيك انت اترك اديم ما شكت لك حال

فايز : اذا ضر اختي يعني ضرني وزي ماهم شايشين عشان ريوف انا بعد شايش عشان اختي

ابو زيد : وين اديم تعالي يا اديم تعالي

طلعت اديم وهي متوتره وضايقه من الوضع : سم

ابو زيد : بنشدتس وانا عمتس وعلميني بالحرف ولا تخبين شي وان كان مطلق مزعلتس بحرف بس علميني قوليلي كانه ضرتس بشي واحد عشان اتوطى في بطنه وانتي تشوفين قولي لي : عمره مد يده عليتس

اديم : لا يا عمي ما يسويها مطلق

ابو زيد : رفع صوته عليتس !

اديم : لا محشوم

ابو زيد : عمرتس طلبتيه شي وعيا يجيبه ولا تأخر فيه

اديم: لا والله

ابو زيد: علميني لو هو مضايقتس بشي لا تخافين

اديم : لا والله ياعمي انت تشوف بعيونك وتدري انه ما يقصر

ابو زيد: بارك الله فيتس

التفت لفايز: وش اللي انت شايفه يافايز يضر اديم علمني اذا تعرف شي ولا قالته اديم

فايز لف بتخبط : كل شي يسويه وتشوفه ما سوى شي ! وياعمي للحين ما نسينا سالفه ولادتها ومنعه لها ما تجي تولد عندنا ! وغير قلة ادبه مع امي

ابو زيد : فاااايز اعرف وش بتقول وخلك رجال وشغل الحريم اتركه ولادتها موضوع بينها وبين رجلها انت مالك شغل

مطلق : وبعدين اذا انت مسوي هوليله ومنزعج من كلام تقول اني قلته وانا ما اذكر ابد ما قلته وحتى لو قلته قلته بغضب ولا دريت اني اللي تكلمت امك لكن مع ذلك اعتذر لها وهذا كللللله كوم وانك تحشر نفسك في حياتنا وانا بسمح لك هذا حلم ابليس فالجنه

ابو فايز: مايصير هالحكي يا عيال انتم اخوان وعيال عم مايصير كل هذا في قلوبكم على بعض

ابو زيد صد بغضب : فايز ماعنده شي يشكيه لكن يا سلطان اعرف اني ما ارضى الغلط على بنتي واذا مشكلته مع مطلق هذا مطلق يتصافى معه لكن ماياخذ ريوف بذنب مالها فيه دخل انا مالي دخل بحياته زوجته ويتصافون تروح او تجلس هذا مب همي لكن لو ادري انه ضرها بذنب هي مالها فيه ذنب حزتها بيصير لي تصرف ثاني

ابو فايز : لا يا ابن الحلال الموضوع بسيط وسوء التفاهم كبر ولكن ان شاء الله لحظة غضب وتمر

تقدم فايز وهو يبوس راس ابو زيد : اعذرني يا عمي واسمح لي بأخذ زوجتي وامشي

ابو زيد : الله معك

التفت لريوف يأشر تمشي وراحت ريوف تجيب اغراضها وهي تبكي وقبل تركب اجتمعوا عليها اخوانها

زيد: ريووف لا تبكين

حسين: اذا ما تبين تروحين معه والله ما تروحين ماعليتس من احد

ريوف : لا لا بس اني ما بغيت هالامور تكبر

هايف:خليها تكبر واللي ما يحترمتس وانا اخوتس مانتس في حاجته

ريوف: لا تفهمونه غلط هو اول مره يعصب كذا ولا تراه ما يرضى علي

مطلق مسك يدها يشدها وهو مثبت عيونه بعيونها: اسمعيني زين لو فكر يعيد اللي سواه وعلق عليتس مشاكلي معهم دقي علي بس وانا اعرف اتصرف

ريوف : طيب

هايف: امسحي دموعتس ولا تبكين لاحد محد يستاهل دموعتس

مسحت ريوف وجهها وعطاها هايف سلطان وراحت بعد ما سلمت عليهم وابو فايز بعد راح هو وام فايز

واول ما وصلوا الرياض طلعت ريوف لبيتها ولكن ابو فايز ما ترك الموضوع يعدي واجتمع بفايز وامه وهو معصب

ابو فايز بصراخ: معجبك اللي سويته يا استاذ

فايز : يبه لا تحط اللوم علي انا بعد ترا كله بسبة ولد اخوك مطلقوه وماكتفينا بمطلق وصف معه حبيب قلبه

ابو فايز : وانت وش دخلك في مطلق من شكى لك الحال !؟ جتك اديم تقول يا فايز افزع قالت لك شي

ام فايز: مو شرط تقوله كلنا نشوف كيف عيشتها

ابو فايز: انتي بذات اص ولا كلمه كله من تحت راستس ما ارتحتي لين قلبتي حياة بنتس وولدتس

ام فايز: يا سلام طلعنا حنا غلطانين

التفت ابو فايز لفايز : اسمعني يا فايز محد جبرك تزوج ريوف انت اللي فكرت وقررت وبعدين جيت وقلت يا ابوي اخطبها لي وانا ما تكلمت لاني مابي ادخل هالمشاكل مع اخوي وعيال اخوي فاهمني ولا لا وان دريت انك مسوي لريوف شي انا اللي بتصرف معك سمعتنيي !؟

فايز : سمعت يبه سمعت

لف لام فايز: وانتي اسمعيني زين والله والله والله لو تدخلين بحياة اديم مره ثانيه ولا حتى لسانتس يطب لسان مطلق ولا تضرين ريوف وتخربين حياتهم والله والله لتطلعين من هالبيت وما ترجعين

انصعقوا من هالتهديد الصريح وطلع ابو فايز وتركهم وراه

كان فايز يدري انه غلط مع ريوف وانه بتصرفه الغضبان خرب اشياء كثير

طلع وهو يحاول يهدا عشان يرجع بعقل صافي