رواية مالي وطن في نجد الا وطنها الفصل السابع والثلاثون 37 بقلم اديم الراشد
رواية مالي وطن في نجد الا وطنها pdf الفصل السابع والثلاثون 37 هى رواية من اجمل الروايات الرومانسية السعودية رواية مالي وطن في نجد الا وطنها pdf الفصل السابع والثلاثون 36 صدر لاول مرة على موقع التواصل الاجتماعى فيسبوك رواية مالي وطن في نجد الا وطنها الفصل السابع والثلاثون 37 حقق تفاعل كبير على الفيسبوك لذلك سنعرض لكم رواية مالي وطن في نجد الا وطنها الفصل السابع والثلاثون 37
رواية مالي وطن في نجد الا وطنها الفصل السابع والثلاثون 37 بقلم اديم الراشد
وعند الشباب
اللي انتهت سهرتهم ورجعوا وفالطريق
قال مؤيد: لحظه ابغى اتسابق معاكم
مطلق : تراك لك مده تدور الحرش
زيد: مؤيد تكفى وش وضعك تبي تتسابق بالليل ومع الطعوس والخرابات
حسين: خلوووه فسقان خلوه
هايف: ماعليك منهم وشد العزم يلا من يبي يتسابق
مطلق : انا
زيد: تسابقوا انتم يالثلاثه وحنا بنمشي
هايف: يا شين الشياب شيناه
حسين: لا بنتسابق كلنا بس مانيب راكض الا بمكافاه فالنهايه
مطلق : 500 للي يوصل قبل
حسين: لا خلوها 1000
هايف : ضامن الفوز يا الاخو
حسين : ان شاء الله
مؤيد: لا والله 1000 على ركض مستقيم
مطلق : صادق اقول اسمعوا اللي يوصل ويرقى الجدار ويطب في البيت هو الفايز
زيد:لا كذا انا منسحب
حسين: لا نبي نصمل
مؤدي: خلاص حنا الاربعه وزيد يحكم
مطلق : يلا يلا عدوا
رجعوا لوراء وهم كل واحد يربط ثوبه وعدوا وانطلقوا كل واحد يسابق الثاني
................••............
في الحوش عند البنات
بعد ما تعشوا واستانسوا قرروا يسهرون بالحوش حول النار
وكانت السوالف خفيفه لان ابو زيد وابو فايز نايمين والحريم الكبار بعد
وكانت السوالف حلوه مابين البنات وطبعا متوسطين الجلسه وكل وحده معاها عيالها
وفجاءه وبدون سابق انذارها صرخت نجد وسوسن مع بعض اول ما شافوا احد يطب من فوق الجدار
ومن بعدهم صرخوا كل البنات وانفجعوا البزارين وقاموا يبكون
طبعاً كله كوم واديم وسلمى اللي كل وحده شالت ولدها وهجت بدون ما تلتفت وراها ولا تشوف وش صار
وطبعا اللي طبوا هم العيال اللي ما توقعوا احد سهران بذا الوقت وبذا الطرف من الحوش لانه غالباً يكون مكان بعيد ولا احد يروح له بس البنات راحوا اليوم عشان يكونون بعيد عن العيال اذا رجعوا
وعلى هالصراخ الكل صحى والعيال يركضون وراهم على اساس يهدونهم بس مافيه فايده وطلع ابو زيد يركض وابو فايز وكل واحد معه عصاته
ابو زيد : علامكم علامكم
بسرعه قال هايف ينقذ الموقف: كنا جالسين وطب كلب علينا وانفجعوا البنات
ابو زيد: منين جاء ذا الكلب
مطلق : مدري من الخرابه الظاهر
العيال اللي انفجعوا بعد وهم كل واحد يلهث يحاول يلقط انفاسه
زيد: روحوا ناموا ماصار شي بنلملم الاغراض وندخل
دخلوا ابو زيد وابو فايز ولف هايف : انا بشوف ذا المهبل وش بلاهم
دخل هايف وهو يناديهم: شريفه ريوف نجد هييييه وينكم
طلعت شريفه بفجعه: وش فيكم من اللي طب علينا
هايف: حنا اللي طبينا وانتم وش مجلسكم هناك
شريفه: قلنا نبعد عن الباب اذا جيتوا ما تكشفون الحريم
هايف: حبكت ماشاء الله
نجد جت : هايف وش مخليكم تطبون من فوق
هايف ضحك : كنا نتسابق وراحت علينا المكافاه من الخرعه ماعرفنا من فاز
نجد: وانتم ما تعيشون الا بسباق وتحديات
هايف : مؤيد عاد المهم عسى مافيه احد منصرع ولا جايه شي
بدون سابق انذار طلعت سلمى اول ماعرفت ان اللي طبوا العيال اتجهت لهايف بغضب وهي تضربه على كتفه بكل قوتها
هايف: وجع علامتس
سلمى: حسبي لله عليكم بغيت اموت وولدي بغيت احذفه من الجدار من الخرعه
نجد : وينتس انتي اصلا اول وحده هجيتي ولا حتى ألتفتي لنا
هايف: يالللللله اخييييراً قدر الله وخلعت قلبتس اخييييراً
سلمى: ترا ماني محللتك
هايف: بموت يعني اذا ما حللتيني المهم اذلفي جيبي ولدتس خلنا نطقطق عليه شوي
سلمى: ماشاء الله وراء ما تطقطق على سميك الخبل اللي مثلك
هايف: سميي سبع مانطقطق عليه مثل ولدتس
سلمى: ها وخر عني وعن ولدي كفايه الفجعه
سكتوا على جية مؤيد: يا هايف خليهم ينادون سوسن لو سمحت
لف هايف بضحك بعد ما اخذ محسن: نادووا له حبيبة قلبه خلوه يتطمن يمكن يلقاها من دون قلب ولا مرارتها منفجره من الخرعه
مؤيد: اي يا حبيبي على بالك انها زيكم وحوش
هايف مر من جنبه وضربه وهو يضحك: بسم لله عليكم يا نواعم
طلع هايف وجات سوسن اللي كانت في عز صياحها اسرع لها مؤيد: اشبك يا سوسن ليش تبكي كذا !
سوسن : ايش لللي ليش تبكي كل هالفجعه اللي فجعتونا اياها وتبغاني اسكت ما ابكي
مؤيد: الله علييكِ يا سوسن والله هذا شي بسيط ما شفتي شي من الفجعه وبعدين عادي وشايفه كلهم انفجعوا محد جلس يبكي زييك
سوسن : ايش بأشوف بعد في شي ثاني
مؤيد: لا بس على وجهه المثال يعني
سوسن: الله يسامحكم بس
قرب مؤيد وهو يضحك وحضنها وهو يمسح على ظهرها: خلاص مافي داعي لكل هالبكي وبعدين قوي قلبك اشبنا ! وكمان ما قلنا العيون الحلوه ما تبكي
ابتسمت سوسن وهي تمسح دموعها: خلاص طيب بس انتم لا تفجعون العيون الحلوه ثاني مره
مؤيد : من عيوني بس خلاص روحي نامي ولا تخافي بس حبيت اتطمن عليك قلت اكيد خفتي
سوسن: يا حبيبي يا مؤيد
ابتسم لها مؤيد ورجعت تدخل سوسن وراح مؤيد عند العيال الللي كانوا في حالة ضحك على البنات وطبعا اغلب ضحكهم على خوف سلمى اللي ما توقعوه
وبعد ما اعتلى صوت ضحكهم هالمره طلع ابو زيد معصب وهو يهاوش وفي ثواني كل واحد ركض لفراشه وتغطى وكانت بتمشي السالفه على ابو زيد ويصدق انهم نايمين لكن خرب عليهم محسن اللي نسوه بالنص
ابو زيد : وجعٍ يوجعك انت وياه قم قم ود الولد لامه اللي دايخة مثلكم
محد تحرك بس فز حسين على ضربه ابو زيد بالعصا: مسوي نفسك راقد يالحمار قم اخلص
فز حسين واول ما اخذ محسن انفجر مؤيد يضحك وبعده هايف وهم متوقعين ابو زيد راح واول ماجلسوا اختفت الضحكه وهم يشوفون ابو زيد واقف بالنص
وبهدو انسحب كل واحد لفراشه ولا عاد طلع لهم صوت من الخرشه
.................••............
ومن بكره الصبح
كانوا الرجال مجتمعين بالمجلس كالعاده ووقفهم دخول فايز الهادي اللي جاي ياخذ ابوه وريوف : سلام عليكم
الكل التفت له بهدوء: عليكم السلام
تقدم فايز يسلم على ابو زيد بحراره والباقي سلام جداً بارد حتى مؤيد ضمه لهم وصار مايحتك فيه
وطبعاً نفس ردة الفعل من الشباب بارده محد عطاه وجهه
ابو زيد: اجلس تقهو يا فايز وانا عمك
فايز: قهوة دايمه يا عمي لكن والله عندي موعد قبل الساعه 2 لازم اكون فيه ومستعجل
ابو زيد : اجل براحتك
ابو فايز : انا جاهز عاد ام سلطان مدري عنها
ابو زيد: يا حسييين ناد اختك
وقف حسين ينادي ريوف اللي طلعت بعد وهي جاهزه
وراحوا وطلع فايز كأنه ما دخل ابد
زيد:مؤيد: متى بترجع
مؤيد : كالعاده بعد ما نتغداء
هايف: وييين ياخي ما طولت يوم بس
مؤيد: والله مثل ما قلت امس وراي سفر بكره وقلت اجي اتطمن عليكم واستانس معاكم واروح
ابو زيد : الله يستر عليك وانا خالك
حسين: انت كذا كذا مسافر اجازه اجلس يوم ماعليك
مؤيد : مره ثانيه المهم قولوا لي ايش تبغون هدايا
زيد: نبي سلامتك
هايف بمزح: لا والله مانبي سلامتك نبي هديه جزله
مؤيد: حسبي لله يا شيخ
مطلق بمزح : والله يقولون الديره اللي بتروح لها فيها مسابح زينه دور لي معك 100 مسبحه ولازم تكون كويسه
مؤيد التفت بصدمه: ليه يابابا 100 ليييه بتبسط فيها
مطلق ضحك: لا بقطعها على ظهوركم
هايف : قول وفعل وانا اخوك ترا للحين في ظهري علامة مسابحك الخايسه
مطلق : وش اسوي ما تفهمون
حسين: ايييييه ما نفهم غلطانين عليك ياخي
ابو زيد: اها بس خل عنكم الهرج الفاضي وترا المحل محد فتحه اليوم
كلهم التفتوا لحسين اللي يناظرهم بحقد ووقف وهو يدري انها بتطيح براسه واخذ المفتاح وطلع وطلع معه ابو زيد
اما الباقين طلعوا يفرون بالسوق لين يجهز الغداء
................••............
عند البنات
اديم اللي للحين وهي غرقانه باللحقوم وتتهاوش عليه هي ونجد
نجد: سوسن كل ماجيتي جيبي منه لان الله بلاني بأديموه ماتخلي شي
اديم: حرام عليتس انا اتوحم يعني ارحميني
ابتسمت بضيق بس كانت تحاول تبين عادي : حبيبتي توحمي براحتس لكن على مطلق وش دخلنا حنا كل شي تخلصينه
اديم: الله يسامحتس بس
سلمى: وهي صادقه يا اديموه
اديم: وش دخلتس انتي وياها سوسن اللي جابته تشبون انتم
سوسن بضحك: ايوه وش دخلتس
سلمى:افاا قلبتي علينا
سوسن: نسلك لها مسكينه حامل
نجد: حبيبتي هاذي تاكل عنها وعن ولدها وعن القبيله
سلمى: لا وبعد تخبي لمطلق
ناظرتهم اديم بطرف عين: حسودات
العمه حصه جت: سوسن يلا جهزي الاغراض بنمشي بعد الغداء
سوسن: جاهزه يا امي كلها
العمه حصه: الله يعطيك العافيه
سوسن: يعافيك
سلمى بهمس لاديم ونجد: شوفوا ياخي تقول لعمتي يا امي ما تقول خااالتي مثلتس انتي وياها
نجد دفتها : هاذي عادتنا يا امي انتي وبعدين خالتي صغيره ليش نكبرها ونقولها امي بعد
سلمى: خليتس انتي ماعليتس شرهه بعيد عنا شوي بس اديموه امي مرت عمها المفروض تقولها كذا
اديم: اذلفي بس اللي برتاح فيه بناديها فيه مالتس دخل انتي
سلمى: شكلنا بنزوج اخواني جداويات يعرفون السنع والذرابه
اديم : بعطيتس كوع احفر بطنتس
نجد اللي كان هالموضوع بالنسبه لها حساس وخايفه منه بس كابرت عليه وهي تقول : خاطري اهفتس كف يخلي مشاري يدور جداويه سنعه تدور وجهتس الضايع
سلمى ضحكت:يهبي حسيت انه قوي من الوصف
نجد ضحكت: اجل تسنعي
ام زيد : يا بنات تعالوا بننزل الغدا
وقفوا وراحوا لام زيد يجهزون معها
.................••............
في المحل
حسين كان ينظف وهو يفكر وبعدها التفت على ابوه بهدوء وهو وده يحكي بس مستحي
ابو زيد: تعال تعال وش عندك
تقدم حسين بفشله : ماعندي شي يا يبه
ابو زيد : عندك شي تبي تقوله قله دام مافيه احد
حسين اللي كان ما يأيد الحب وميول الحب ابد فا اول ما حس انه يشيل لغزيل شوي من الحب قرر انه يكلم ابوه مايبي يتغربل مثل اخوانه : لا بس اقول يبه الحمدلله انا الحين اشتغل فالمحل ولي راتبي و يعني وكبرت
ضحك ابو زيد : ياربي لك الحمد اخيراً نوى احد منكم يقول بتزوج مثل الناس الطبيعين ما يغربلني ولا يعلني
حسين بخجل: باقي ماقلت بتزوج يا يبه
ابو زيد : مايحتاج تقول هذا وجهك واضح عليه
ابتسم حسين بحرج : ايه عاد الكلام الاول والاخير لك الله يطول بعمرك
ابو زيد : وانا ماعندي مانع دامك تبي تعرس الله يتمم على خير نكلم امك ونخليها تشوف لك بنت الحلال
حسين كان يبي يقوله بس خاف انه يقلب الامور ووقرر يسكت ويخطط الامور مع امه : الله يخليكم لنا ويطول بعمركم
ابو زيد: امين ويوفقكم ويستر عليكم
التفتوا على جيت العيال وهم يضحكون
ابو زيد : بس وهذا شغلكم سردادي مردادي بين المحلات اللي يشوفكم يقول مالكم والي
عبود ركض وهو يجلس بحضن ابو زيد : جدي انا تعبت وهم ما وقفوا
ابو زيد : ايييه معلوم بتتعب واللي يمشي معهم يشوف الخير
مطلق : وراك علينا يا طويل العمر ما سوينا شي
هايف كان شوي حاط مسافه ومتحييز مايبي يدخل في اي جدال مع ابوه ويرجع يدخل بمواضيع تضيق البال
مؤيد: والله ياخالي انا ما أمل من سوقكم ابد واحبه
ابو زيد : اييه ماهو مثل اسواقكم تكسر الرجلين
زيد ابتسم: لا ابوي شايش اليوم
ابو زيد : يلا يلا يحترونا للغداء
طلعوا كلهم والكل ملاحظ ان هايف صاد شوي وحتى ابو زيد ملاحظ ومخلييه
................••............
الليل
بعد ما راح مؤيد وراح زيد بعد رجع ومعه شريفه روتين البيت اليومي لكن يفرق فيه حركة سلمى اللي تحيي البيت بحركتها ومطاردها مع ولدها
بعد العشاء كل واحد اتجهه لغرفته لكن هايف الصغير كان متعلق بهايف ولاهو راضي يخليه
مطلق : يا ابوك امش نبي ننام ماهوب وقت حبك
هايف كان حاط راسه على كتف هايف ومطنش وضحك هايف وهو يحضنه: خله خله ينام عندي
مطلق : اقشر لك يا رجال نومه عله
هايف: ماعليه عسل على قلبي وبعدين ترا فرصتك يا وحش صرف الولد معي وعش حياتك
مطلق ضحك: اعوذ بالله يالخباثه
ما رد هايف عليه وراح وترك مطلق اللي كان مبتسم ورجع لغرفته وهو منهد حيله دخل وهو يقول : عيا لا يجي قليل الخاتمه وقال هايف يبيه ينام معه
طلعت اديم بعد ما بدلت : ياشيخ مسوين فينا خير خلهم يتورطون فيه الليله انهد حيلي
مطلق : لا بدري على هدة الحيل ما الثاني بيشرف ووبيلعن خيرنا وحنا نضحك
اديم : يارب الجنه بس لا تذكرني خلني ناسيه
التفت لها مطلق وهو يبتسم بخبث : وش ودتس تنسين بالضبط يا حبيبتي
اديم اللي كانت جايه معها الحلقوم وقفت تناظره بتمعن وهي اللي صارت تفهمه من حروفه ولكن قربت وهي تدخل قطعه من الحلقوم بفمه : ليتني ادري من اللي مدرسك هالدروس الخبيثه
صد مطلق يضحك وهو يحاول ياكل اللي بفمه وبعد معاناه قال: مالي ذنب والله الذنب ذنب اللي بلشنا بزينها وهي ماهي حامل وحملت ودمرتنا بالزين زياده
ضحكت اديم وهي خلاص متعوده على مطلق اللي يلف الامور لسانه الحلو لف
...............••............
اما في غرفة هايف
دخل هايف وهو شايل هايف الصغير معه : معنا ضيف اليوم
ابتسمت نجد ووقفت وهي تاخذه من كتف هايف بحب : والله صار هالولد ينافسني
هايف : لا يا شيخه لاا الله يسامحتس انتي في كفه والعالم كلها بكفه
التفتت له نجد وهي مبتسمه : لا تجلس تقول كذا ويصير ودي احضنك وابتلش بذا البزر
هايف اللي تقدم وهو يحضنها : وش عليتس من البزر اللي تبينه لا تخلينه بنفستس
نجد : وش ابي من الدنيا وانت فيها
قبل يرد هايف مد هايف الصغير يدينه له يبيه ياخذه واخذه هايف وهو ينسدح : تعالي تعالي سكري النور ووتعالي وترا حليبه معاه
نجد : اوه صار له دولاب عندنا على كثر ما يجي هنا
هايف ابتسم وهو يناظر بهايف اللي منسدح على صدره و يالله وش كثر يحبه ويغلييه ابتعد هايف عن صدر هايف وهو ينتقل مابينه وبين نجد واخيرا استقر بينهم وهو يحط رجوله على صدر هايف وماسك يد نجد اللي كانت تتأمله وهي ودها ان بداله ولدهم
وعجز ينام هايف الصغير وجلست نجد وهي تهزه وتغني له لين نام ورجعت تنسدح وهي تشوف هايف الصغير نام وهو حاط يده على وجهه هايف اللي ما تحرك وكان هادي عشان ما يصحيه قربت بتبعدها بس وقفها هايف اللي قال بهمس : خليها
وسحب يدها وحطها على قلبه وهو يرجع يهمس : خلي يدتس على قلبي لا تشيلينها
نجد وهي تحس بدقات قلب هايف : ابشر
ونام هايف بعد ونجد للحين تأمل المنظر وهي فيها ضيق ولكن كانت بنفسها تقرا على قلب هايف وهي خايفه يطير هالقلب من يدها وتتبدل الادوار ويجي يوم يكون فيها هايف نايم لكن في حضنه ولده وعلى قلبه يد زوجته اللي ممكن يتزوجها وتصير ام عياله
ارتعبت نجد من الفكره(لا ياربي دخليك ياربي)
................••............
اما عند حسيين
اللي وده يكلم امه بس وجود سلمى ماهو مريحه يدري بتفضحه في كل مكان
حسين: سلمى تكفين طلبتس قومي سوي لي شاهي ولا شي راسي مصدع
كانت سلمى بتقلب عليه ومثل سيناريو العاده وتقول ( لييه خدامه عندك! ) بس حنت على ملامح حسين اللي كانت حزينه وولكن تمثيل عشان يكسر خاطرها واول ما طلعت تبدلت ملامحه ولف على امه بسرعه: تكفين يمه اسمعيني ولا تعلمين احد ابد باللي اعلمتس به خليه بينا
ام زيد: بسم للله الرحمن الرحيم ابشر يمه قول انت بس
حسين: صراحه يمه انا كلمت ابوي وقلت اني ابي اعرس
ام زيد: قل والله ماشاء للله مبروك وانا امك مبروك
حسين ابتسم : يبارك فيتس بس اول اسمعيني
ام زيد: وش فيك
حسين: ابوي بيجيتس وبيقولتس دوري لحسين بنت الحلال
ام زيد: ابشر ادور لك احسنهم
حسين: لا تدورين يا قلبي ولا تعبين نفستس انا صراحه ودي انتس تخطبين لي غزيل اخت فلاح بس لا تقولين لابوي اني قلت لتس سوي كأنه انتي قلتي لي ولا تقبلين ابد بوحده غيرها وانتي اقنعي ابوي
سكتت ام زيد تناظر حسين بصدمه وابتسامه وضحكت: الله عليييك يا حسين اجل طلعت نغزات مطلق وهايف بمحلها
حسين: تكفين يمه لا يدرون ابد فكيني منهم بيغسلون شراعي بالطقطقه
ضحكت ام زيد : ابشر ابشر يا حسين بس علمني من متى وانت تبيها
ارتفع حسين ببتسامه عذبه: والله من زمان يمه بس الظروف لكن دامني الحين اقدر اتزوج ماني مخليها تطير من يدي
وعلى نهاية كلامه دخلت سلمى: ياااا سلام سلمم يا سلام وانا اقول وش عندك زابن وساكت وعيونك تدور اثرك حاب يالخاييس
حسين وقف وهو يسحبها : اص اصص سلموه فكينا من الفضايح وبعدين لا حب ولا خرابيط بس مابي امي تتعب مع البنات
سلمى: اخسسس يالبنات اللي صفوف ينتظرونك تخطبهم يا رجال ليتك ساكت تتعب فالبنات
ام زيد: سلموه اص ولا كلمه
حسين: لا يا انتي اللي بغوا يكسرون الخطاطيب بابنا اقول اص ويالله تكتب لمشاري الخير والبركه اللي اخذ اجر فينا وتزوجتس وفكنا منتسس
ام زيد: خلاص عاد
حسين: المهم سلموه لا يدري احد ابوي لو عرف بيحوسنا ويعيي علي
سلمى: مهبول انت من بعلم يعني
حسين: هايف ومطلق واذا عرفوا بيجلسون يطقطقون لين ابوي يكشفنا
سلمى: انسى اني ماعلمهم
ام زيد: يا حسين اخوانك اكيد بينتبهون لكن روح الحين نم وانا اشوف ابوك
تفرقوا وراحوا كل واحد ينام واتجهه حسين للمقلط وجلس بجنب الشباك وهو مبتسم وهو مهما تخيل يحس مايقدر يوصف حياته مع غزيل
.................••............
ومن بكره الصبح
وبعد الفطور كانوا جالسين يتقهوون بالمقلط وحسين اللي جالس ومجلس سلمى جنبه عشان ما تروح تقول للعيال
اما هايف ومطلق مثل العاده جالسين جنب بعض وهم يلعبون مع هايف الصغير
وابو زيد وام زيد بصدر المجلس وعلى يمينهم نجد واديم
مطلق بهمس لهايف: وش بلاه حسينوه مدبس سلمى جنبه
رفع راسه هايف يدقق : والله شكلها ماسكه عليه شي ولا يبيها تعلمنا
مطلق : ايييه اكيد ماتكون سلمى اذا ما طلعت خوافي المسلمين
قاطعهم ابو زيد اللي قال بصوت عالي : اقول يا ام زيد
ام زيد : سم
ابو زيد : ابيتس تشوفين وتدورين من معارفتس بنت حلال خلوقه ومحترمه ونسبها طيب
هالجمله من ابو زيد خدرت اطراف هايف وبردت ولفت الدنيا بهايف ودق قلبه و توقع 90٪ ان ابوه بيحطه قدام الامر الواقع لا شعوريا اتجهت عيونه لنجد
ونجد بعد ما مرتها هالجمله مرور الكرام بالعكس هزتها هز وتركت محسن اللي كان بحضنها ولفت واول ماشافت هايف يناظرها وعيونه حايره لا شعورياً حطت يدينها على ركبها وهي تشدها بخوف وانتبه هايف لها
ولكن كمل ابو زيد ورفع ستار الرعب وقال: نبي نخطبها لحسين
لف هايف بكل قوته يناظر ابوه ومد مطلق يده بشويش وهو يخبط على كتف هايف يطمنه والتفت له هايف بهدوء وابتسم
وارتاحت نجد وارتخت وهي تسند ظهرها لورا بهدة حيل وهي للحظة تخيلت انه بيقول هايف
ام زيد : ماشاء الله لا اله الا الله
مطلق : شعليييك يا حسيييين زواج وبيت وحركات
ابو زيد : اييه ماهو صار رجال وكبير ومسؤول
حسين ابتسم : عاد صار وقته
وقالت ام زيد وكأنها تفكر : اقول يا ابو زيد ورا ما نخطب له غزيل اخت فلاح بنت اجواد واجوديه ومحترمه وانت تعرفها وتعرف اخوها
ابو زيد التفت بتفكير : والله فلاح كفو ونسبه ينشرا والبنت اجوديه واذا انتم تشوفونها مناسبه لحسين انا ماعندي مانع
ام زيد: والله انا اشوفها مناسبه
نطت سلمى وهي تقول : اييي والله يبه اجوديه وعاقله وراكزه وابد كأنها مكتوبه لحسين
دقها حسين يسكتها قبل تخرب الموضوع وسكتت
ابو زيد : وانت وش رايك يا حسين
حسين ابتسم بحرج: اللي تشوفونه يبه ودام البنت منا وفينا ونعرفهم وناس طيبين واجواد اللله يكتب اللي فيه الخير
ابتدوا هايف ومطلق يغمزون وهذا اللي يخاف منه حسين وابتدوا يتنحنحون وحسين يرفع صوته يغطي على صوتهم
ابو زيد : اجل اجهزوا يا عيال وانتي يا ام زيد نبي نروح بعد المغرب لهم ونخطب وخير البر عاجله
مطلق : ابشر
ام زيد : لله يكتب الخير
سلمى بضحك: والله ما ندري لو انهم يعييون عن حسين
ابو زيد : وراهم يعييون
سلمى: اقول يعني يمكن
هايف لقط ان سلمى تبي ترفع ضغط حسين وقال : اا والله جايز اقول دامها صديقة نجد وش تقولين يا نجد تهقين توافق
كان هايف يغمز لنجد اللي فهمت وكملت على كلامه : والله مدري بس انا اقول دوروا غيرها
اختلف لون حسين وقال: ولييه
ابو زيد : ليه يا نجد وانا عمتس
نجد كانت تناظر هايف اللي مستمر يغمز لها تكمل : ا يعني اقول ما تناسب حسين
حسين فقد نبرة صوته اللي اعتلت وقال: ايييه لييييه!
التفتوا كلهم يناظرونه وتدارك نفسه وسكت
سلمى: والله اخبرها ما تطيق حسين
احتدت ملامح حسين اللي انصدم
وقال ابو زيد : الله اكبر يا بنات ذا الزمن
حسين : اجل بكيفها ومانجبر احد علينا وبنات الناس واجد
انفجر هايف يضحك وفز وجلس جنب نجد وهو يقول : نمزح عليك نمزح
ضحكت نجد وهي تقول : امزح ياعمي بس ترا هايف اللي كان يأشر لي عشان اقول كذا
ابو زيد : والله !
نجد : اي والله واصلا غزيل والله اجوديه ولا عمرها سبة احد ولا كرهت احد بالعكس
هايف بضحك :واصلا حسين يشرف كل بنت يخطبها
الكل صار يضحك على وجهه حسين اللي رجع له الدم
وقال ابو زيد : اجل وعدنا المغرب
ومر هايف وهو يضربه بعصاته بخفه يبي يكسر حاجز المسافه بينهم وقال: وانت اعقل اعقل والله يرحم ايامك يوم بغيت تعرس وش سويت
ضحك هايف وهو يقول بكلام مبطن : مافيه شبه يا طويل العمر ماكل معرس هايف ولا كل عروس نجد
سلمى:اقتلوني عند الثقه
ابتسم ابو زيد وهو يهز راسه :انا بروح عند ابو نجد شوي وانتم لا تبطون واطلعوا للمحل
مطلق : ابشر يبه بنطلع الحين
واول ماطلع ابو زيد هجت سلمى وخروا هايف ومطلق لها مكان بينهم وجلست
وقال مطلق بضحك: غردي يا حبيبة اخوانها
حسين : يااللله
سلمى بضحك: خلووا كل شي على جنب ولا يفوتكم تمثيل امي وهي مسويه نفسها تفكر وتدور لحسين عروس ما كأنه امس ماسكها ويقول : يمه اذا سألتس ابوي قولي له غزيل
مطلق :هههههههههههههههههههههههه� �هههههههههههههههههههههههه ههههههه ايييييه اييييه انا قااااايل والله اني قايل ومعلمك بس ما تطيع
هايف يقلد حسين: بنات الناس واجد وهو بغى يموت علينا بنت حلال واجوديه مسوي انه ثقيل الخايس
حسين : يا حظكم لقيتوا لكم سالفه
هايف: يا حبيبي ما تعتبر سالفه هاذي لان اصلا حنا متوقعين من زمان وعارفين وخالصين بس ننتظر نقطة التنفيذ
مطلق : وانا هاقي فيك بتجي تفضفض لي وكل يوم استعد فالاخير سحبت علينا وسسيييده لرأس الكبير
سلمى: ذا الشايب مايعطي احد وجهه كل شي عنده اوامر وفرض
هايف: ولا عليك يا مطيلق ولا يضيق صدرك كل يوم بجي افضفض لك عشان ما تحس بالغربه
ام زيد ضحكت: سلمى ما قلنا لتس اسكتي ماتسمعين انتي
سلمى: مقدر يا يمه
مطلق: وبعدين وش ذا التمثيل يا ميمتي انا صدقت انتس تفكرين
اديم : ماشاء الله عليتس يا خالتي دارستها دراسه
ام زيد :ههههههههههههههههه عاد لعيون حسين ولا تجحدون انتم ترا مثلت معكم كلكم
مطلق : والله لو يدري ابوي ليتوطى في بطونا كلنا جمله
حسين التفت على نجد: وانا اخوتس بنصحتس نصيحه لا تمشين ورا هايف الخبل ترا بيوديتس في داهيه وتصيرين نذله زيه
ضحكت نجد : والله انا استانست على وجهك اللي صار اسود
هايف: وبعدين احترم اخوك الكبير هذا واحد واثنين لو اني نذل كان ياما طردتك من حضني ولا خليتك تنام
حسين: يارجال اذيتنا انت وحضنك ترا لولا البرد كان ما انقلبت وصلتك وصرت بحضنك
هايف: المهم اني احتويتك
مطلق : ايييه عاد انت ابو الاحتوى
ام زيد : قوموا قوموا على المحل يلا
مطلق وقف :اييه يلا يلا
وقف هايف اللي يبوس بهايف الصغير ومحسن وطلع مع مطلق اما حسين سبقهم بكم خطوه وهو مبتسم وهم يضحكون عليه
واستوت الطقطقه اول ماشافوا فلاح وغزيل بالسوق
..................••............
والمغرب في بيت ابو زيد
كانوا الرجال يجهزون عشان يروحون لبيت فلاح
حسين كانت ام زيد تبخره وتجهزه وهي فرحانه فيه وماهي سايعتها الفرحه
وحسين بعد كان جامد من برا لكن من جوا قلبه يرفرف
وسلمى اللي تجهز اغراض ابوها وهي مستمره في طقطقتها على حسين اللي كل شوي يضربها بمزح عشان تسكت ولا يفيد
اما في غرفة مطلق كان يجهز وهو مبتسم ان حسين ماضيع عليه فرصة عمره وبالعكس بدا فيها صح ولا تغربل انتهى وهو ينسف شماغه على كتفه والتفت ببتسامه لاديم اللي تقول : اشوفك بينمصع قلبك من الفرح
ضحك مطلق وتقدم وهو يجلس جنبها: اكيد اول شي فرحان لحسين انه دل طريقه وثاني شي فرحان انه ما تغربل وتعذب وعرف كيف يفكر
اديم : وليه يتعذب
مطلق : ابد طال عمرتس مسيرة اخوانه قبله كلها عذاب وغرابيل فا الحمدلله انه مختلف
اديم رفعت حواجبها وهي تقول : ياعمري عليك انت متعذب يعني في زواجك
لف مطلق يناظرها ببتسامه وهو يدري بها من يوم حملت وهي نفسيتها منقلبه وكل سالفه تدور عليها مشلكه : والله من ناحية اني متعذب فا انا متعذب لكن معذبتني وحده يقولون لها اديم ما تخاف الله فيني
اديم: والله وش مسويه فيك هالقشرا
ضحك مطلق واخذ يدها وهو يعد عليها: ا نبدا من عيونها اللي تشيل المسلم في مكانه وننتهي بكلامها وصوتها للي يخليني اندم على السنين اللي ما قضيتها معها اصلا اكرهه عيوني اللي كانت معميه عنها طول هالفتره
ضحكت اديم: يا سهل الكلام عندك وياكثر ما تلفه وتطلع نفسك بسرعه
مطلق : ابد والله لا اطلع نفسي ولا هم يحزنون انا مرتاح ومبسوط و اذا انتي عذابي عساني معذب عمري كله اديم : ماني قايله لك مثلك انك عذاب لا والله الا انت احسن نعمه يعطيني اياها ربي
مطلق : ياويلي ويلااه
ضحكت اديم وهي تشوفه يلف بسرعه ويجمع اغراضه يبي يطلع وهذا تصرف مطلق كل ما غلبته اديم بكلامها : متى بترجعون
مطلق : اذا رجع قلبي لمكانه
اديم : ههههههههههههه لا صدق
مطلق : مدري عن ابوي لكن انا معهم لين يعطون كلمه وبجي ادور النعمه هنا
ضحكت اديم : زين
مطلق : بس هاه تكفين ودتس تنفسين هاذي سلمى ونجد عندتس اغلسي شراعهم بس اذا جيت وخري هالنفسيه مره
اديم : والله مو مني من ولدك
مطلق : يلعن ابوه يا شيخه يلا يلا بلحق قبل يعصب ابوي
طلع مطلق اللي انفكت عقدته وصار يعبر عن مشاعره بأريحيه وسعة صدر اصلا طار جمود اخلاقه وصار وسيع صدر اكثر من هايف
................••............
عند هايف
اللي كان لاهي مع محسن ويلعب معه ونجد حوله تجهز اغراضه
نجد : يلا يا هايف بينادون وانت للحين تلعب
هايف جاء وهو شايل محسن بضحك: خبل ذا الولد خبل حتى له مثل امه دفش
اخذته نجد : خله عنك لاحق عليه واجهز
اخذ هايف اغراضه وابتدا يجهز وهو يضبط شماغه ولف على نجد اللي رجعت بعد ماعطت سلمى محسن تقدم وهو يقول : نجد تعالي تعالي اجلسي
نجد ناظرته بغرابه: وش فيك
هايف : بكلمتس بموضوع
للحظه طرا لنجد مليون فكره وفكره وجاء شعور انها ما تبي تسمع اللي بيقوله ولفت وهي تاخذ المبخره بتردد وخوف : هايف مافيه وقت عمي بينادي الحين ويعصب اذا ما خلصت اجهز على ما اجيب العود واجي
اسرع هايف يمسكها قبل تطلع: نجد وش فيتس ! وش صار لتس !ليه خايفه ؟
نجد بدت تراقب عيونه تبي تفهم منها شي بس كانت هاديه ما تدل على شي
هايف اخذ المبخره ينزلها بهدوء وهو يجلس نجد : نجد ماله داعي تخافين من شي وانتي تعرفيني
رفعت نجد يدها برجفه: عشاني اعرفك الله يخليك لا تكمل
كان هايف يناظرها بهدوء وفاهم خوفها وهو مثلها خايف لكن مايقدر يجلس كذا خايف اخذ نفس وهو يقول: يا نجد اسمعيني زين ولا تقاطعيني وافهميني
غمضت نجد وهي خايفه من اللي بتسمعه لكن ارعبها صوت هايف اللي قال بغضب : يااا نجد ارفعي راستس وناظريني لا تهربين مني وتخافين وكأنتس ما تعرفيني لا تحسسيني اني لهدرجه بسيط ولهدرجه بايع العشره وناكرها لا تجلسين خايفه وكأني ببساطه بأقبل انصاف الحلول واتركتس وراي وامشي وقلت لتس يا نجد مهما صار لا تفكرين في يوم اني ببيعتس مهما كان السبب لا تجلسين تناظريني كل يوم وانتي خايفه وكأنتس تنتظرين مني اجي واقول اسمحي لي يا نجد انا بتزوج
نجد سكتت وهي تشوفه معصب لكن هدت نبرة صوته اول ما شاف خيال الدمعه بعيونها ومد يده يمسحها قبل تنزل : اسمعيني زين لو جلست سنين عمري ومت واندفنت وانا ماجبت عيال اهون علي اني اتزوج غيرتس ولا توقعين اني بطيع احد وبتزوج عشان ولد ماهو ولدتس وانت امه مابيتس تخافين من كل كلمه وتصرف بالعكس ابيتس تكونين قويه معي ماتحسسيني اني عادي اسوي هالشي وامشي
نجد : انا ادري ما تسويها بس اخاف من عمي
هايف : اتركي ابوي على جنب مهما صار مايقدر يفرض علي شي وهو يدري اني اموت ولا اسويه يا نجد افهميني تكفين
نجد ابتسمت وهي تحضن هايف : والله اني فاهمتك والله
هايف : معناته خلاص انسي هالموضوع كله ولا عاد نفكر فيه ابد ابد ان كتب ربي ورزقنا كان بها وان ماكتب ماهي نهاية الدنيا وانا مكتفي بتس وانتي مكتفيه فيني وانتهينا
نجد: خلاص ابشر
ابتعد هايف وهو مبتسم : اجل اسمعي دام انتهى هالموضوع اجهزي الحين وانا بعد ما اجي من حسين نبي نمشي
نجد: وين!
هايف: مدري بنروح نتمشى بأي مكان بعيد بنرتاح من هالجو كله بس انا وانتي بعيد عن هالزحمه كلها ونسوي كل شي يطري لنا
نجد ابتسمت بفرح: اي والله صادق احس ودي اغير جو اجل خلاص اجهز لين تجي
هايف: وفكري بعد وين ودتس نروح
نجد : ابشر
ابتعد هايف بعد ما باس جبينها : ايه اضحكي يابعد عمرٍ مخاسيره معتس عندي غنيمه
نجد ضحكت : انا قايله بكتب فيك قصيده بس مدري متى
ضحك هايف وطلع وهو مرتاح انه قدر يبعد هالخوف ومايهمه ومهما صار مستحيل يبعد عن نجد ابد ولو كلفه هذا الشي اششياء كثير
↚
وفي مجلس فلاح
بعد ما اجتمعوا ابو زيد وعياله وابو نجد وخطبوا كان فلاح مصدوم ولكن فرحان ووقف وهو يقول : والله ياعمي نتشرف فيك وفي حسين ويعلم الله انكم اعز من عيوني وان شاء الله ان ربي كتب غزيل لحسين واني عطيتكم
ابو زيد: وانا ابوك يا فلاح الشرف لنا لكن خذ راي اخيتك وان وافقت الخير والبركه وان ما وافقت محد بجابرها
فلاح: ابشر ابشر انا استاذنكم
ابو زيد : خذ راحتك
.................••............
عند غزيل
جاء فلاح يناديها :غزيل غزيل وينتس وانا اخوتس
غزيل طلعت معها الشاهي : هذاني جيت وهذا الشاهي جهز
اخذه فلاح وهو يحطه: خليه الحين وتعالي عند امي
اتجهوا لامهم وجلست غزيل بحيره: وش فيك
ام فلاح: وش عند ابو زيد يا فلاح
فلاح ببتسامه: ابشرتس يمه جاي وبيخطب غزيل لولده حسيين
ام فلاح : قل والله
فلاح: اي والله وعاد جيت اشاور غزيل واشوف وش رايها
ارتبكت غزيل اللي قامت ذاكرتها تعيد مواقفها مع حسين صح كلها تفشل بس تضحك وتفرح ماعمرها فكرت بحسين وكانت مفاجأه لها
فلاح: وش قلتي يا غزيل
غزيل ابتسمت بفرح مخفي: اللي تشوفه يا فلاح انت ادرى بمصلحتي
فلاح جلس بركبه ونص وهو يقول : اسمعيني زين يا غزيل انا اعرف حسين مثل كفي واعرفه رجال كفو وابن حلال وبيحافظ عليتس ويسعدتس وماعليتس خوف دامتس عند عمي ابو زيد اللي بيحطتس بعيونه وتعرفين انتي بيتهم وتعرفينهم كلهم اجواد وطيبين
ام فلاح: اي والله كلهم كوم وام زيد كوم ثاني تبي تحطتس بعيونها
فلاح: وهذا مايدل ان ما وراتس احد ابد واعرفي اني وراتس واني سندتس وان تضايقتي من شي ترا مايهمني احد واهد الدنيا على اكبر راس واذا ما تبينه مانبي بجابرتس
غزيل : ادري يا خوي لكن انا ماعندي مانع
وقف فلاح بفرح: اجل مبروك مقدماً
طلع فلاح للمجلس وهو مبسوط وتقدم يقول : اجل ياعمي نقول الله يتمم على خير ويكتب كل خير
ابو زيد : ماشاء الله
الكل صار يبارك لحسين لللي زفر براحه : الله يبارك فيكم جميع
ابو زيد : وابد يا فلاح كل شي تبونه تراكم تأمرون واللي تطلبه غزيل تم
فلاح : ما نطلب الا سلامتك يا عمي
ابو زيد : وش قلت فالمهر
فلاح : المهر ياعمي انت ادرى هو نفس المهر اللي محددينه القبيله 50 الف
ابو زيد : تم وان شاء لله بكره وهو عندكم
هايف بهمس مازح لفلاح: ما ودك نعطيك مهر انت بعد وتجي تسكن معنا
فلاح دقه ببتسامه: والله ماهي شينه المفروض اخو البنت المتضرر له تعويض نفسي فالاخير بتاخذون اختي الوحيده
هايف: ههههههههههههههههههههههههه ترا فرصتك تستغل حسين ولو تقوله عطني عيونك عطاك
فلاح: ماعليك اوريك فيه
ابو زيد : والعرس يا فلاح متى يناسبكم
فلاح: اللي يناسبكم يناسبنا
ابو زيد: وش رايك بعد ثلاث اسابيع اخر هالشهر
سكت فلاح بتفكير بعدين قال: تم
ابو نجد : اجل الله يتمم لهم ويعمر بيتهم بالسعاده
الكل : امين
ابو زيد : وحنا نستاذن يا فلاح وبكره بيجونكم الحريم وتبلغهم امك باللي تبونه
فلاح: زارتنا البركه ياعمي وليتك جلست وتعشيت عندنا
مطلق ببتسامه: ماعليك يا فلاح الايام اللي بنتبطح عندك فيها واجد
فلاح ضحك: حياكم الله
هايف بضحك : ماعرفته وهو ذرب
مطلق : كأنه مستحي من حسين
هايف: وحسين مستحي منه ، الله يرحم حال الخبز اللي متهاوشين عليه امس
ابو زيد : يلا يا ولد
طلعوا وهم يضحكون على حسين اللي وجهه مبتسم بس من داخله متشقق من الفرح
هايف : حسين لو سمحت أبي السر اللي يخليك كذا جامد وكأنك ما صار معك شي
مطلق : انا معجب صراحه بجمودك انا ما سويتها والله
حسين: هذا الثقل يا حبيبي ما تعرفونه انتم ياللي كل واحد بيموت واحد على مرته
مطلق : اخس ياثقيييل اخس ياللي ما اهتز قلبك اقولك ليتك تسكت بس
هايف: شوف يا حسين انا اعرف انت ليه كذا ! ببساطه عشانك وانا اخوك ما وقف لك ابوي بحلقك ولا غربلك ومسح فيك البلاط وخلى اللي ما يشتري يتفرج وكل المسلمين يدرون بعلتك
مطلق : صادق والله فا انت تعتبر انسان مرفهه جداً
حسين: اعوذ بالله من عيونكم لا يقلب ابوي علي
هايف: لا ما عليك مايقلب عليك يا شبيهه فاهمين بعض وماشين
مطلق : لا بس ثمرت جلسة المحل وعلى الاقل انت مريت مرور الكرام من تحت يدين ابوي
حسين: صراحه حمدلله اني مانيب انتم كان منتحر من مده
مطلق : اللله يكتب اجرنا بس
هايف ضحك: المهم تراني ماشي الحين
مطلق وحسين: وييين
هايف : طاقه كبدي ودي اروح واغير جو في اي مكان
مطلق : اييه بس وييين بالضبط
هايف: مدري المهم بطلع وفالخط اشوف وين اروح
حسين: دامك ضايق كذا رح لمكه ولا المدينه
هايف : الظاهر انها الوجهه الاولى
مطلق : الله يستر عليك
دخلوا البيت على صوت ابو زيد: كان نقعتوا بعد ، ترا جايين بدري
مطلق :اجل تأخرنا يبه
ابو زيد: لا سلامتك ما تأخرتوا بس انا قلت اصب القهوه عنكم واريحكم
حسين بهمس : دامها وصلت لصبة القهوه واضح ابطينا بالحيل
هايف: انقز اخذ الدله قبل يهفنا بها
اخذ حسين الدله وجلس هايف وتنحنح وهو يقول: اقول يبه
ابو زيد : قل
هايف: ودي استاذنك من المحل خاطري اروح لمكه ولا المدينه ايام واجي
ابو زيد:لييه وش عندك
هايف: نغير جو ويمكن امر كم مدينه بطريقي
ابو زيد سكت بهدوء : زين وانا ابوك رح للمكان اللي تبيه لكن انتبه لنفسك ونجد بتروح معك !
هايف في كل فرصه يحصلها يحاول يوصل لابوه ان نجد قطعه من روحه ومستحيل يكون في مكان بعيد عنها وهو فعلا من يوم تزوجها للحين ماعمره راح لمكان بدونها : اكيد يبه نجد خوية دربي في كل مكان
ابو زيد : اجل الله يستر عليكم
هايف وقف يسلم على راسه : اجل ادع لنا
ابو زيد : الله معكم
اتجهه هايف للبيت يسلم على امه وهو يعلمها التفت لسلمى: وانتي ما ودتس تطسين لبيتس
سلمى: جالسه على قلبك يا لاخو وبعدين دامك بتطس انا كذا مستانسه وبعيش براحتي
هايف : يممه يا الغيره اللي فيتس
سلمى: لا تقول اغار منك عشان ما اموت
جاء حسين : يا حبها للهرج يا ناس
سلمى: وش تبي انت بعد
حسين: منقذ حياتنا برا يحتريتس
هايف : مشاري فيه
حسين: ايه هذا هو عند ابوي
قبل يطلع هايف ركضت سلمى تسابقه تبي تروح لمشاري قبله وركض هايف اول ما تنتبه لها وهم يركضون وكل واحد يدف الثاني وصلوا وهم ماهم حاسين
ابو زيد : هييييه وش بلاك وانت وياها
ضحك مشاري ووقف: ابد مايصيرون سلمى وهايف اذا ما تناقروا
اتجهه هايف لمشاري ببتسامه وهو يسلم عليه بحراره : اشتقنا لك يا ابو محسن
مشاري : تشتاق لك العافيه وينك ياخي وينك صرنا ندورك دواره
هايف : ابد والله يوم جيت انت والله اني كنت تعبان ويعلموني العيال انك جيت وعاد والله اني ودي بشوفتك
مشاري: سلامات وش فيك
هايف: سخونه تمر وتروح
مشاري : المهم انك طيب
هايف: وش اخبارك وش علومك وعمي ابو فرج والعيال
مشاري : كلهم بخير بس عتبانين عليك
هايف:: والله اني مقصر بالحيل
مشاري ابتسم لسلمى اللي واقفه بقهر تناظره وهو اللي نساها بشوفة هايف واشر لها بشويش تجي وابتسمت سلمى
واول ما وقف ابو زيد وراح شوي وبيجي انطلقت سلمى لمشاري تسلم عليه
هايف : يهب يا وجهها ما تستحي بنتنا ذي
مشاري : خلها ياخي وش تبي فيها ترا يكفي انها متاخره 5 دقايق ما سلمت علي
هايف: ياربي ترحمني بس
سلمى : وش حارق رزك يا حبيبي
هايف : وخري بس
مشاري : وينه محسن
سلمى: نايم
مشاري : افااا ليه ما خليتيه يستقبلني
هايف :يا رجال اريح لك انه نايم لو جلس يستقبلك بيدعسك ويمر ما درا عنك
مشاري ضحك: يا زينه والله ، يلا يلا يا سلمى عجلي بنمشي
هايف: اجلس تعشى يا ولد
مشاري : بالعافيه وراي كم شغله
هايف: وانت عمرك كله مستعجل
ابتسم مشاري وقرب وهو يهمس لهايف : لا تحلف ولا تصر مسوين لاختك مفاجأه لا تخربها
هايف سكت شوي وبعدها ضحك اول ما تذكر ان اليوم ذكرى زواجكم التفت لسلمى اللي واضحح انها ناسيه ولا درت بالتاريخ
هايف لمشاري : والله ياهي هاجه بها ولا درت بك
ضحك مشاري : ابد انا مستانس عليها كذا
هايف : الله معكم
طلعوا وسلمى ناسيه ومشاري مبتسم يدري انها بتذكر في وقت غلط وتنجلط كان يسمع سوالفها واخبارها وهو ماسك يدها
مشاري : يعني الحين خلاص انتهوا اخوانتس تزوجوا كلهم
سلمى: ايه خلاص
مشاري :الحمدلله ان لي فيكم نصيب
سلمى ابتسمت: الحمدلله مليون مره
لفت سلمى باستغراب اول ما وقفوا : وين !
مشاري : البيت بعيد ومالي حيل له اقول نبات هنا ازين
سلمى شكت في كلامه وبدت تذكر وشهقت : ووالله اني كنت ذاكره والله العظيم مدري كيف نسيت
ضحك مشاري : احسسسن شي انتس ناسيه عشان ما تروح مفاجأتي خساره
سلمى ضاق صدرها : يا مشااااري
اخذ مشاري محسن منها وهو يحاوط كتفها بضحك وحنيه: يا عيونه
سلمى : والله مدري كيف نسيت لهيت مع حسين
مشاري : ماعليتس يا شيخه ولا حصل شي بالعكس هذا من حظي لانتس لو تذكرتي بتصيرين عارفه كل شي تعالي تعالي ندخل الفندق وبعدين نتفاهم
كانت سلمى متفشله ان مشاري ذاكر ومجهز وهي ناسيه دخلت وهي مثل ما توقعت لمشاري اللي مستقبلها بكل حب رجعت لمشاري اللي كان منحني بينزل محسن بشويش قبل يصحى لكن ابتسم اول ما حس بيدين سلمى اللي تحضنه من ظهره
نزل محسن والتفت لها وهو يحضنها : لا تكبرين الموضوع وبعدين قلت لتس مليون مره اني مابي لا هدايا ولا ابي احد يحتفل فيني بالعكس انا اللي بحتفل باليوم اللي جمعني أجمل انسانه ولا ابي شي الا انتس معي وانتس تجلسين على ما انتي عليه كذا مثل ماعرفتس حبيبه وطيبه ومليانه حياه ابيتس كل ما حسيت ان الدنيا اظلمت علي اجي عندتس وتنقلب دنياي جنه انتي هدية السنين اللي والله لو يعطوني الناس أعمارهم فدا ما يسون سلمى ابد
غمضت سلمى وهي ما عاد تدري وش ترد لكن متأكده ان مشاري جاها دعوة والدين
.................••............
عند هايف ونجد
بعد ما ودعوا الكل وطلعوا لطريقهم وكانوا ماشين بالليل والقمر بنص الشهر والقمرا تنور طريقهم والخط ظلااام ونجد اللي مستنده على كتف هايف وهي تناظر القمرا من فتحة السياره العلويه
التفت هايف وهو يقول : وييين وصلتي خليتس معنا
ضحكت نجد وابعدت : لا بس على كثر ما قطعنا الطريق بالليل مع ابوي وعلى كثر ما راقبت القمرا ماعمري ملييت من اني اشوفها يعني وانا احب السفر فالليل وعاد وش اجمل من انه يجتمع الليل اسم وصفه
مد هايف يده يبعد نقابها وطرحتها وهو الطريق بري وفااااضي : الليل والله هالجديله والقمرا والله ذا الوجهه يا كحيلة العين يا ام وجهٍ تفاصيله حليَّه
اخذت يده اللي على شعرها وهي تبوسها
هايف: اقول انا قلت لو نروح اول شي مكه ولا المدينه نريح انفسنا هناك وبعدين نروح للي ودنا نروح له
نجد: ايه كنت بقوله بس سبقتني
هايف: اجل نبي نروح مكه اول شي
نجد : زين
على هالمنوال كملوا طريقهم واحيان يسمعون لابو نوره واحيان كثيره يسكرونه ويغنون هم لين وصلوا وجهتهم
................••............
ومن بكره في الديره
انتشر خبر زواج حسين من غزيل وعلى هالاساس بدوا يرتبون لزواج حسين وبدا ابو زيد يفكر وين بيسكن حسين وصار الترجيح ان مطلق بما انه الكبير لو حب انه يطلع لبيت بلحاله ويترك الغرفه لحسين
وهذا الاختيار بالنسبه لمطلق ازمه نوعاً ما وهو ماوده يبعد عن امه وابوه ولا وده يبعد عن هايف بما انهم تعودوا على بعض كثيييير ولكن هالقرار مب له لحاله
اتجهه لاديم ودخل وهو يشوفها تكلم امها جلس ينتظرها تسكر وهو يلعب مع هايف الصغير
التفت اديم : غريبه وش فيك راجع ذا الوقت
مطلق : لا ابد بس تونا نسولف في موضوع حسين ووين بيسكن ومن هالأمور واقترح ابوي علي إن اذا حبينا نطلع في بيت بلحالنا بما أن عايلتنا شوي شوي تكبر ونخلي هالغرفه لحسين
اديم اللي من حركة يدين مطلق اللي يمسح بها على راس هايف عرفت انه مايقدر يبعد ابد عن امه وابوه وهي اصلا بعد ما تقدر : وانت وش قلت!
مطلق : ما قلت شي للحين قلت اشوفتس قبل يمكن ودتس تطلعين بلحالتس يعني بنتشاور للحين
اديم : لا تكفى يا مطلق مانبي نطلع يعني انت تعرفني مقدر اجلس بلحالي من دون يعني ما اشوف خالتي واجلس مع نجد واخر الاسبوع نتحمس لناس اللي يجون لو اجلس بلحالي والله لنجن بعدين حتى انت ما تقدر تبعد عن عمي وخالتي ما تشوفهم كل صبح وما تكون قريب منهم
ابتسم مطلق برضا ان اديم نفس رايه : اي والله انا قلت كذا بعد ابد مانيب متخيل اني بعيش في بيت ثاني
اديم : طيب وش بتقول لعمي
مطلق: ابوي اقترح ما قال اطلعوا وللحين بيشوف هايف وانا متوقع 90٪ ان هايف بيطلع بلحاله
اديم : لييه !
مطلق : يعني هو اصلا تعود من بداية حياته وهو عايش بلحاله واتوقع انها بتجي له حجه يهج من اصرار ابوي على موضوع العيال
اديم: لا ياربي ما يروحون ولله بموت من الطفش وانا ماصدقت انهم يستقرون هنا
مطلق ضحك: والله براحتهم ، اجل خليني اكلم هايف واشوف وضعه
اديم : زين
..................••............
في مكه
عند هايف اللي توهم منتهين من عمرتهم وكل واحد جالس بهدوء ويدعي باللي بقلبه وقف هايف اتصال جواله
رفعه وهو يقول : هلا يا مطلق
مطلق : هلا فييك وينك!فاضي!
هايف: في الحرم الحين بطلع ليه وش فيك !
مطلق ؛ زين اذا طلعت كلمني بعلمك بشغله
وقف هايف يأشر لنجد تطلع وطلع وهو يبعدها عن الزحمه وهو للحين يكلم مطلق:قل وش فيك !
مطلق : ابد الموضوع هو ان ابوي يدور لحسين مكان يسكن فيه فا قالي اذا ودنا يعني نطلع لبيت بلحالنا ويكون حسين في مكان واحد منا وانا والله مالي نيه اطلع ابد لا انا ولا اديم المهم اني بشوفك اذا ودك يعني تطلع او يشوف ابوي وش يسوي مع حسين
هايف سكت بهدوء : والله مدري يا مطلق يعني انا لو بطلع بطلع عشان الموضوع اللي انت عارفه
مطلق : ايه انا بعد توقعت كذا
هايف : بس تدري اصبر شوي بشوف وضعي وارد لك
مطلق : يلا ولا تبطي
هايف: زين
وصلوا الفندق وجلس هايف بتعب وهو رجله توجعه : وش ذا التعب ياربي
نجد : اصبر اجيب لك مويه حاره تهدي رجولك
رجعت نجد بعد شوي وهي تقول : هايف تعال
وقف هايف اللي كان يقلب الموضوع براسه : وين المويه !
نجد : ابد ما حصلت شي اجيبه فيه عبيت البانيو شوي اصلا حتى انا رجولي توجعني بحط رجولي معك بعد
ابتسم هايف : اييه كذا ازين بعد
جلسوا على اطراف البانيو وهايف للحين يتوجع من رجوله والتفت وهو يقولها اللي قاله مطلق وكان متوقع ردة فعلها انها بتطلع بس صدمته اول ماقالت: انت ودك تطلع !
هايف: المهم انتي ؟
نجد: اذا علي تكفى ما نبي نطلع يعني انا طول عمري كنت اتمنى يعني اعيش معكم وفي بيتكم وفي بيت كله حياه ومبسووطه مره وبعدين اروح لبيت بلحالي وش اسوي !وغير كذا حتى انت ما بتقدر تاخذ راحتك وكل مكان تروح بتجلس شايل همي اني بلحالي
هايف : بيني وبينتس ما توقعتس تقولين كذا يعني قلت الحين ودتس تكونين في بيت هادي مثل ما تعودتي لكن دام هذا كلامتس انا بعد ماودي اروح مكان والله يا ايام الخبر كانت تطق روحي وبعد ما رجعت هنا وشوفة امي وابوي كل صبح ومطلق وولده مالي خاطر افرط فيها ابد
ابتسمت نجد : اصلا بينهار مطلق وهايف الصغير لو رحنا
هايف: الحق اني اشتقت لهم والله
نجد : نرجع لهم ان شاء الله
وقف هايف وهو يبعد رجوله : خلني اكلم مطلق
طلع وهو يكلم مطلق وبعد شوي اختفى صوته وطول ما رجع وطلعت نجد تدور عليه وحصلته نايم
ابتسمت وهي تحب هالصفه في هايف انه ماعمره جهز نفسه ينام دايم نايم بالغلط ولا بدون ما يحس
.................••............
في بيت ابو زيد
رجع مطلق وهو يقول لابوه انهم مالهم خاطر يطلعون
حسين : يبه انا عندي راي ثاني
ابو زيد : وشهو !
حسين: خاطري تعطيني بيت محسن اللي اشتريته له واللي هو الحين مسكر
نزلت راسها ام زيد بحزن ومد مطلق يده يمسح على ظهرها
ابو زيد: وش تبيه في وانا ابوك واذا ودك ببيت اشتري لك غيره
حسين : لا يبه انا ابي ذا البيت
حسين كان في كل فرصه يقدر يحيي ذكر محسن فيها ما يقصر ورغم انه اكثر من تأذى من محسن بس هو اكثر واحد تعبان من وفاته وحزين ومو متقبل
ابو زيد هز راسه بضيق: اللي تبيه يا حسين رح له بكره انت ومطلق وشوفوه وش يحتاج
حسين وقف وهو يتدارك نفسه : ابشر يبه
طلع حسين اللي حزين ووبعدها بدت تفكك الجلسه شوي شوي
................••............
وعلى هذا القرار
بدت التجهيزات الرسميه وبدا يجهز بيت حسين رسمياً والكل مشغول في التجهيز لزواج حسين والايام تمر
في هالايام قدر هايف انه في اسبوع يغير روتين حياته اللي اتعبهم وتبدلت في اسبوع احوالهم وتغيرت نفسياتهم ورجعوا لديره وهم مرتاحييين وراضين ومنعكسه هالراحه حتى على ملامحهم
....................••............
قبل زواج حسين بأيام
مثل ما تعودوا بدوا الكل يجون لبيت ابو زيد
وبدت المخيمات تنصب واجواء الفرح تعم
وفي مخيم الرجال في طرف كان متعب واقف وهو ورافع هايف على كتفه عشان يعدل اللمبات
وفي طرف مطلق ومشاري اللي يعدلون الزل ويفرشونه
وفي طرف حسين وزيد اللي يشيكون على الكهرب واموره
اما فلاح وحميد وباقي الشباب كانوا يجهزون باقي الامور
وقدام المخيم بمسافه كانوا الشياب فارشين فرش وجالسين عليه يراقبون الاوضاع
وبدون سااابق انذار اعلن نويصر الهجوم على المخيم واتجه لمتعب مسرع ودفه ولا توازن متعب اللي طاح وطاح هايف من كتفه على الارض بحركه معاكسه
والكل فز يركض بإتجاه هايف اللي ماعاد قدر يتحرك ابد
ابو زيد ركض وهو يرفعه: هااييف هاااايف
متعب قرب يضرب خد هايف : وووولد هاييف
غمض هايف عيونه بألم وفتحها بشويش وهو يشوف الكل فوق راسه
مطلق : هاااايف فيك شي
هايف بألم: لا لا مافيني شي
ابو نجد رفعه من يده بيعدله بس غمض هايف بوجع وهو يقول : لا لا لا لا تحركوني تحركوني خلوني خلوني
ابو فرج: بسم لله عليك وش يوجعك وش فيك
هايف اللي كان يحاول يتحرك بس ظهره متصلب
زيد : ننادي اسعاف
ابو زيد: وش اسعافه ان شاء الله ماهو محتاجه
هايف:لا ما احتاجه بس اصبروا علي شوي
مشاري : هايف خلنا نرفعك بشويش يمكن ألمك من الطيحه بس
هايف : زين زين
مطلق : اذا يوجعك بالحيل لا تحرك
هايف: لا معليك
جاء مشاري من يمينه ومطلق من يساره وهم يرفعونه لين اسندوه لكن ما زال هايف متصلب
والتفت مطلق بغضب على نويصر وهو يقول : حسيييين خذ هالادمي من قدامي لا اذبحه
حسين ابعد نويصر قبل يسوي كارثه بعد كفايه هايف
ابو نجد: تحتاج مستشفى
سعود : انا اقول لازم يروح المستشفى ازين
قبل يعترض هايف قال مطلق: بيروح وهو رجال ان شاء الله
مشاري جاء معه السياره : يلا
واخذوه والكل واقف يراقب اللي صار وبدوا يحللون وشلون طاح
.................••............
اما عند غزيل
كانت نجد عندها وهي تساعدها
نجد : غزييل ودي اسألتس شي
غزيل : وشو
نجد: اانتي تعرفين حسين قبل
غزيل ابتسمت: ما اعرفه مره بس يعني كنت اصدفه احيان بس ماعمري خطر لي اني بتزوجه
نجد : اجل وش خلاه يحبتس كذا وهو مايعرفتس
غزيل : وش عرفتس انه يحبني!؟
نجد: واضح
غزيل : والله يا نجد ماعمري فكرت وانصدمت والله اصلا كل مره نتصادف يكون موقف يفشل بعد عاد دامتس تعرفينه يا نجد طمنيني لانه من بعيد جامد مره
نجد: والله هو طيب بشكل ما تخيلنه صح يختلف عن اخوانه مثل عمي يعني بس حبيب والله
التفتوا على جية وحدة من الحريم وقالت لهم للي صار وفزت نجد برعب : وش صار له بالضبط
الحرمة: مدري يقولون ماعاد يتحرك
شهقت نجد بخوف :وين عبايتي وينها
غزيل: اصبري يا نجد إن شاء الله مافيه شي
نجد: وش اصبر له وخري عني
اخذت نجد اغراضها وطلعت ولقت في وجهه ابوها : يبه وش فيه هايف
ابو نجد: مافيه شي وانا ابوتس طاح وان شاء الله بسيطه
نجد: يقولون ما يتحرك يبه
ابو نجد: لا يا ابوي يكذبون طيحته بسيطه بس قال مطلق بيوديه عشان يتطمن عليه
نجد قامت تصيح وهي تفكر انه فعلاً هايف انشل او صار له شي
ابو نجد: تعالي تعالي روحي عند امتس ومافيه الا العافيه
وراحت نجد مع ابوها وهي خايفه ان هايف يصير له شي
.................••............
في المستشفى
كان مطلق ومشاري مع هايف اللي كل ما فكر يتحرك ينقطع نفسه
ودخلوا عند الدكتور اللي جلس فتره يقلب هايف ويكشف عليه وبعدها اشعه وامور كثيره
مشاري: وش طلع معك يا دكتور
الدكتور: لا الحمدلله كنت خايف انه يكون متضرر بس حمدلله كل شي بخير وظهره سليم مجرد الآم من اثر الطيحه
مطلق : طيب الحين وش بيصير
الدكتور: ولا شي بكتب له دوا يخفف الآم عنه ومرهم وان شاء الله يومين ثلاثه وهو زي الاحصان بس عاد لازم يرتاح
مطلق: حمدلله حمدلله
هايف: طيب وراه حركتي صعبه
الدكتور:بسيطه ياهايف في النهايه ترا انت طايح على ظهرك ودامه تعبان بيصعب عليك كل شي وانت لا تشد على نفسك لين تحس انك احسن وحتى المشي خل احد يساعدك
مشاري : حمدلله هانت هانت
اخذوا ادوية هايف وطلعوا وهايف مقهور من نويصر : عسى بس اطيب قبل العرس
مطلق : وحتى لو طبت انتبه لظهرك ونويصر ذا بطلع بروحه
مشاري : حرام يا رجال مريض وحالته حاله
مطلق : ااااه بس
................••............
فالمخيم
الكل وقف ماعاد اشتغلوا ينتظرون خبر
وماصدقوا وصلوا مطلق ومشاري وشافوه بخير
وانتقلوا كلهم لبيت ابو زيد
اللي انفجعت ام زيد وهي تشوف هايف جاي سانديه العيال: هااايف علامك يمه
مطلق: يمه الله يخليتس مافيه شي بجي واقولتس الحين وش فيه بس ورانا رجال ادخلي ياحبيبتي
دخلت ام زيد وهي خايفه على هايف اللي مستحيل تمر ايامه من دون مصايب
ابو فرج : لا تخلونه هنا يا عيال خذوه لمكان فيه مرتبه مريحه عشان ظهره
هايف :ماعليه بجلس هنا
ابو زيد: وش تجلس تسوي اصلا بنرجع للمخيم كلنا وانت اجلس لا تتعب نفسك
ابو فايز: وخلك مرتاح ترا الظهر حساس
مطلق : : لا ما عليه ان شاء الله خفيفه يبي لها راحه بس
ابو نجد : خلوني اشوف لكم الطريق
بسرعه نادى ابو نجد نجد تفتح الغرفه عشان يكون هايف فيها وجهزتها له ووقفت بالطرف وهي ما تشوفه وكان منحني ومغطين عليه مشاري ومطلق ودخلوه لسريره وحطوا ادويته عنده وطلعوا
ابو نجد: مثل ما قلنا خلك مرتاح
ابو زيد : وانتي يا نجد وانا ابوتس هاذي ادويته شوفيها واذا بغيتوا شي ارسلي لنا
نجد: ابشر ياعمي
طلعوا كلهم ورجعوا الرجال للمخيم الا زيد اللي دخل لامه وخواته يطمنهم ان هايف بخير
عند نجد اللي جلست جنب هايف بخوف : بسم لله عليك وش يوجعك الله يوجع هالنويصر الزفت
هايف: لا تدعين عليه مسكين وبعدين انا بخير بس عشاني انقلبت عكس تعور ظهري
نجد: حسبي الله فجعوني
هايف بضحك :بسيطه بسيطه راحمني ربي من كرف العرس
دق الباب ووقفت نجد تفتح وكانت ام زيد وسسلمى وشريفه وريوف والعمه حصه
ام زيد: بسم لله عليك وانا امك وش فيك كل شي صاير فيك شي
شريفه: حصنيه يمه تكفين
سلمى بمزح: لا تحصنونه ولا شي هذا من الشحوم اللي مثقله عليه في اول مطب انقلب علينا
هايف ضحك: هين خليني اقوم واعلمتس وش تسوي الشحوم
العمه حصه: سلامات وانا عمتك سلامات
هايف : الله يسلمكم
ام زيد: وش قالوا لك يمه
هايف: يا يمه والله شي ماينذكر بس رضه خفيفه ويومين واطيب
نجد : ان شاء الله بسيطه
العمه حصه: اجل هذ ادويتك وانا عمتك وارتاح
هايف : مرتاح يا عميمه
ام زيد : بسم لله عليك نجد يمه اقري عليه وانت تحطين له المرهم
نجد: ابشري ياخالتي
سلمى : وانتي تقرين انتبهي لا تطلع جنونه
هايف اخذ الكرتون وهو يرميها عليها وصرخ: اااه حسبي للله
ام زيد ضربت سلمى: خلييه حتى وهو مريض تبين تحارشينه
سلمى: الله يسامحتس بس
طلعوا وام زيد تهاوش سلمى اما هايف كان يضحك عليها
نجد:وش تبي اجيب لك
هايف: ولا شي ابي بس انام هالمهدئ مدوخني
نجد:ابشر بس اول المرهم
بدت نجد تحطه المرهم وهي تقرا عليه مثل ما وصتها ام زيد وحزتها نام هايف اول ما ارتاح
.......••............
وطول اليوم
وكل شوي يجي واحد يتطمن على هايف ويرجع وطول اليوم ونجد جالسه عنده ما راحت مع عشاء الحريم وطول اليوم وسلمى ترفهه عن هايف بكلامها للي كل شوي تجي على اساس تحارشه بس بالحقيقه تجي تبي تطمن عليه
لكن الصدمه ان ام نجد اللي بدت تخف مع هايف شوي وتتقبله جات تتطمن عليه وتسلم وهذا الشي طير نجد من الفرحه
وانتهى هاليوم اللي كان اغلب احداثه مرتبطه بطيحة هايف
