جاها صوت صبحا : الحين يازوين .. وراتس تنططين فوق هالخيول وقاعده فوق هالسياج .. حتى لو يستوي ضنا بيطيح ..

زينه .. راحت نقزت وطبت بقوه على الأرض .. وهي تتحلطم ..بكلام مو واضح..

صبحا : زوين .. ووجع .. شتقولين ماسمعتس..

زينه تطقطق يدينها وتروح تسرج الخيل :

جديده .. لاتفتحين لي سيرة الحمل .. الله لايقوله..

صبحا بتوسل وهي رافعه راسها للسما :ياربي لاتغضب عليها .. سفيه .. بزر ..

ونزلت راسها لها وبانفعال: لاا عاد اسمع منتس هالكلام ..والله تنكتب لك .. واقعدي بكره من دكتور لادكتور لدهانه تدورين ريحة الضنا..

زينه بعصبيه : جديده .. فكيني من هالسيره عاد ..

وراحت ركبت الخيل بخفه ومرونه .. وضربته برجلها .. وراحت تمشي وتسرع بها ..

*****

في محل سيف ..

كان ماخذ مهره معه .. ومجلسها .. على كرسي المكتب ..

ضحكت بعصبيه:

توترت .. المنصب ثقيل ..

سيف ياخذ ملف .. ويروح جهة الكرسي المقابل :

خلينا ندلعك اليوم .. نسوي لك تعويض على مافات ..

مهره بنص عيون :يعني شكلي مثل اللي جالس على العرش والحاشيه اللي تديره ..

ضحك وهو يوقع :لا تميلحين ماراح اعطيك صلاحيات.. انتي في الإداره تنكه .. حياتك ماعرفتي تديرينها .. اعطيك المحل .. نقعد نشحت ..

مهره: بدينا بالمعاير ..

سيف يمد الملف للموظف : ماعايرتك .. بس ملاحظه انك كنتي متقبله .. اتهام يمسك .. وظاله ساكته ..

خذت كتلوج تتصفحه :

كل شي فدا ولدي ..

سكتت..

سيف شرد في وجهها .. ويتخيل .. كلامها ..:

لما مرض عساف .. وكان الدكتور قاله .. ان الكبد عنده تزداد سوء ..حاول ياخذني بالقوه .. وهو اللي كان معطيني الامان من هالناحيه .. دامني شلت ولده ونسبته لي .. كان خايف يموت واتزوج وينكشف كل شي ..

وجه مهره المنهضم وهي تقول :

رفضت..مافيني شي بغى عساف كازوج .. رغم اني اخاف عليه .. يكسرخاطري لا تألم .. وجوده معي ومع سيف يعطيني امان عن وحدتي ... بس ابد ماكنت متحمله .. اعطيه هالحق.. وهو اللي ماختارني الا عشان استر بلاويه .. واغطي كارثه هو مسويها ..مسكت غلط .. يبيني بالقوه .. عشان يمحي هالدليل .. ويوم انهرت وبكيت ورفضته .. طلع سيف وهو نتفه بو شهور من نافذة العماره وهددني يرميه .. والله ياسيف ماسكه من هدومه .. لو بس انفكت ازراره كان راح .. كان يبي يخوفني ..يبي يغصبني .. وعارف اني اضعف قدام سيف .. بغيت اموت .. الصوره والمنظر .. ذا .. انحفر بمخي .. جاني مثل الكوابيس .. داهمني .. حتى في شرودي .. اشهق فجأه .. واحسه طاح .. جنيت .. احيان يجيني شي يقول اصلا ً هو طاح .. وسيف اللي كبر معك وهم .. اقسم بالله ياسيف .. ما انسى هاللحظه .. مهما عشت ...

سئلها : وكيف اقنعتيه .. !

قالت : اقنعته لمن دخله من النافذه وخذته .. هو بعدين خاف من اللي سواه .. وتحسف .. قعد يسكتنا انا وسيف واحنا نبكي مثل المجانين ... راح اختفى ساعات ورجع .. وخلاني احلف اني ماتزوج غيره حتى لو مات .. وحلفت ... !

قطع شروده مهره وهي تلوح بالكتلوج :

حبي .. وش هالتعبير الحزين.. وش فيك ..

تنحنح وهو يهز راسه نفي :

ولاشي .. بطلع ادخن واجيك ..

طالعته مهره وهو يطلع ..

وسيف وقف بره .. وفتح ازرار قميصه .. حس فجأه انه اختنق ..

في بعض سواليفها سمعها .. البارح ونامو .. هالحين لما يسترجع .. !

كانت المواقف هايله .. مرعبه .. ومخيفه ..!

من الصباح .. وهو يحاول يرسم البسمه .. على وجهها .. يبي يسوي اي شي عشان يسعدها ..

ماقدر حتى يتركها في البيت ..

وجابها المحل .. !

مهما كان حاط في باله .. نظره سوداويه من حياتها مع عساف ..

ماتخيل كذا .. !

مهره ..تنهدت .. مسكت اعلى انفها بين عيونها باصابعها ..

سيف رغم .. قوته ..وعصبيته .. الا انها اكتشفت ان داخله حساس بشكل ..

ومن خلال معرفتها لشخصيته ..

تدري ان سبب شروده ونظرته المفاجئه ..

تقليبه لكلام البارح ..

واستياءه من نفسه ..

واحساسه انه شارك بهالظلم بشكل من الأشكال ..!

ابتسمت الموظفه جوانا وهي تلكز ارثر :

الا تعتقد ان مستر سيف .. يعيش في حالة متقدمه من الحب ..

ارثر ببتسامه .. وهو يفحص قطعه بيده .. :

لقد اذابت زوجته الجليد .. ارفع لها القبعه ..

شوي دخل سيف ..وهو يبتسم .. ومعه .. !

نوااااااف ..

مهره بس وقعت عينها عليه .. توسعت عيونها وهو يبتسم ..

وفجأه شريط نكباتها معه تنعاد ..

وهي تكب الرتوه عليه .. الحرق .. كلام المزرعه .. وقوفها في وجهه .. وهي ترفع بلوزتها قدامه .. شك سيف الهايل فيها وفيه .. وانه سعى لكشف كلشي .. وتبرءتها قدام سيف ..

كان وجهها يحمر ويحمر بإحراج .. ونواف وسيف يتوجهون لها ..

صاحت وهي تخبي وجهها في الطاوله :

اففف ... يا أرض انشقي وابلعيني ..

ضحكوا اثنينهم ..

ونواف يقول :

خلاص نسينا ..

مهره مارفعت راسها :

يمممممه ... لااااا...من جد اسفه نواف ..

نواف ضحك : انتي ايش آفه .. احد يسوي سواك ..

سيف وهو يضحك : والله حتى الافلام مايسون كذا .. انت ملاحظ انها حاشت الورع وجابته بجنسية امريكيه وسعوديه .. ايش هالجساره ..

رفعت راسها وبدفاع .. :والله عساف هو اللي سواها .. انا ..

وقاعده تتكلم بسرعه وتبرر ..

نواف كان يسمعها وببتسامه متأثره قاطعها :

مهره انا اسف .. عني وعن عساف .. وعن اي مضره جاتك .. من ارتباطك .. فينا .. جد اسفين ياخيتي .. واحنا عزوتك .. ماتضيمك الدنيا .. وهالسبع زوجك وانا اخوك ..

مهره سكتت ..

وماتدري شلون داهمتها غصه ..!!!!

(وكان ذاك النهار ..هديه من الرحمن ..اهداني الله سيف زوج كالجبل ورائي ..

ونواف .. اخا ً.. فعل المستحيل .. حتى لاتظلمني الدنيا أكثر .. )..

.......

مرت عدة ايام ..

فهد يقول لسعود :

ان لي خاطر عندك ياسعود .. تقل لي جمان وين .. خذها مني .. لو اخطى شاهين تراه عقل .. وصادق ..

سعود : مادري يافهد .. صدقني وان طمنت امها وبينت .. اني ادري وساكت .. بس وغلاة ابوي مادري .. جمان ميبسه راسها .. ومتعمده ماتقل لاحد .. وقاطعه الطرق ..ماتبي احد يتواصل معها ..

فهد بعصبيه :

ولدي ياسعود .. بيروح من يدي فقيده .. وضعه يدحدر .. بناته يسلون .. بس هو بيجن ..

سعود بتهكم وعصبيه :

يروح للي ضيع بنتي عشانه .. الوكاد يلقى فيها السلوى عن بنت الشيوخ يافهد ..

شب سيجار ونفخها وبتوتر :

من فينا مايطيش يا اخوك .. لين البنت ولاتكبر راسها .. لانضيع العيال ونزيد النار حطب ..

سعود :

والله يافهد .. ومع زعلي من شاهين .. الا ان جيتك غاليه ..ولو عندي علم .. قلت لك ..ادري انها بخير .. وطمنتني .. وقت اللي راحت .. وانها عارفه وش تسوي .. بس ماقالت لي مكانه والله يشهد ..

دخل فارس المجلس .. وبترحاب :

ابوي فهد .. ارحب يابعد راسي .. ياهلا ومرحبا..

وتقدم حب خشمه وراسه ويده ..

وفهد بشرهه :

عنبوك ماتستحي ..ماتسئل ولاتمر صار لك كم يوم .. ياخايب الرجا ..

ضحك وهو يقهوي جده :

والله اعذرني يبه بس عندي اختبارات وبس اخلصها .. ناوي امركم .. حتى تو داقه علي جدتي وغاسلتني ..

فهد : شوي عليك .. والله يبي لك عصي منقعات بملح ..

فارس : تموون يبه .. والله مقصر ..

رن جوال فارس .. رد .. وكان ابوه.. اغلب مكالمته: ايه .. ايه .. و وصل .. و بقوله .. و تم .. ولاتحاتي وقفل ..

سعود وفهد .. يناظرونه .. بشك .

ضحك بربكه: شفيكم ..؟! .. تراه ابوي ..

فهد: وأحد يكلم ابوه كذا .. وش كان يقول لك ..وماتبينا نعرفه ..

ضحك وبمد : وااال ..شسوء الضن ذا ..

رفع شاشة جواله :

يبي يتأكد اذا وصل لي التحويل .. شاشة جوالي مكسوره من وقت الحادث .. وعاد طالبه فلوس بشري غيره وبس.. !

سعود: هالحين راسل لابوك .. تبي فلوس الجوال ..لايكون انا متبري منك .. وحاذفك بالشارع ..

فهد : ياوالله الفشله .. طالب فلوس جوال من ابوك وهو باخر الدنيا .. واحنا فيذا .. انت ماتستحي ..

فارس توهق حك حاجبه : خيركم سابق .. والله.. بس انا الجوال اللي ابيه فوق السته الاف .. وبوفارس واعدني فيه ..عادي يعني ..المهم بروح ادخل .. لأن ابوي يبيني اصور له ورق ارسله له ..

وراح طلع من المجلس ..ونفخ ..وفتح رسالة التحويل اللي راسلها ابوه .. مبلغ كبير .. لأن يبيه يجي لندن في اجازة الاسبوعين ..

وفارس عادي يروح لحاله ..

بس ابوه هالمره يبيه يجيب سيف الصغير معه عشان يفاجئون مهره .. !

قاعد يفكر بيقدر يسيطر على سيف خلال الرحله والمطارات .. اوك تعود على رعايته بس السفر فيه مسؤولية كبيره .. !

وابوه مُصر ..

ونواف اصلا بلندن .. بلقيس دوام .. وامه مستحيل .. خاصه وضع جمان وبناتها .. وابوه سعود ماراح يخلي شغله خاصه بغياب نواف .. !

وهو يحس حيل موجوع على سيف والحاحه على مهره ..

وحتى مهره .. بين نارين .. مب عارفه تخلي ابوه وترجع وميته على سيف .. !

صعد غرفة ابوه .. وفتح الخزنه .. طلع جوازه وجواز سيف .. معاهم فيز .. مطلعهم ابوه قبل يسافر ..

صورهم .. بالجوال .. بوضوح ..

اليوم ابوه بيخلص الحجز ..

وقاله يخلي اقناع ابوه وامه عليه .. !

ارسلهم ..

وكلم : تهقى بقدر اسيطر على النتفه .. ؟!

سيف : ايه اثق فيك ..وبعدين هذا وقت جيتك يهون عليك تخلي اخوك وتجي عنه ..

فارس يطالع صورة سيف الصغير بالجواز :

يبه .. مسؤولية .. وامي بتسوي سالفه .. ماراح ترضى ..

سيف : خلك رجال .. وبعتمد عليك .. وسيف رشوته انك بتاخذه لمهره .. صدقني .. بيسلهم .. والرحله دايركت .. الرياض .. لندن .. بضبطك ..

فارس ضحك: الله يستر ..قلنا البيبي ستر حق سيف .. بس من قال لكم اني الماما حقته ..

ضحك سيف :

والله جاك اللي ينشب ببلعومك ..بحجز .. وبكلم جدك .. وخلك صامل .. على موقفك .. مو يرهبونك .. وتهون ..

فارس : خلاص تم .. دامك تبي كذا كم بوفارس عندي ..

سيف : بعد عمري والله ..

*****

*من قال ان جمان اذا اينعت في قلبي ..عليها ان تُقطف ..!

لكن ..

الست انا من ضرب جذعها ..بفأس الخيانه ..ضربت ضربت .. وهي ثابته .. وجذورها قويه . !

اليس ظلما ً اني حين جزمت ان جمان شجرة قلبي التي لاتقلع ..

تسقط بلمسه واحده .. محدثه كارثه ..

لاظل علينا .. ولا ستر .. !!

أين ظلك جمان .. تركتينا عرايا .. أين دفئك .. اين حنانك ونسيمك .. !

اين زهرك .. وندى صبحك ..؟!

اختلت الارض تحتنا .. فلم نعد ثابتين ..

ذهب الوطن.. فبتنا مشردين .. !

جوفي خاوي . وكلي ضائع .. ! *

شاهين في وحده قاتله .. في استسلام للحزن ..

جالس لحاله ببيته .. في الصاله ..

النور يجي له من ابجوره يتيمه جانبيه .. حاط كفه على صدغ راسه .. وسجاره مشعله ..

واغنية (مانسيت -فهد العميري ) ..!

تنساب من السماعه ..

تدق في قلبه وتجلده .. !

مانتبه لعيونه اللي انزلت منها دموعه ..

يتخيل نظرتها له..

وربكته .. لما كانت ماره وهو يكلم غاده.. لوح بالجوال وهو يقفله: ماكنت اقصد .. بس كانت ..

قاطعته: ماسئلتك .. استمر .. بس بيجي لك يوم ياشاهين .. واوعدك .. بتعض اصابعك لما تدميها .. !

تنفس بضيق .. وهو يبكي .. وينزل وجهه على كفوفه ..

كنتي تدرين اني احبك انتي .. !

جمان .. لاتخليني حرام عليك ..

جواله الصامت يهتز ع الطاوله محدث ضجه ..

رفعه : هلا يمه ..

سلمى: وينك مو ناوي تجي .. ؟!

غمض عيونه ونفخ يحاول يسيطر على صوته : بنام بالبيت .. لاتنتظريني..

بعصبية : شاهين تعوذ من الشيطان .. وتعال .. لاتقعد لحالك .. وتخلي ابليس يلعب عليك ..

غمض عيونه بقوه وبألم :

يمااااه .. ابيها .. شلون يعني ..

(مو وقت تعاتبه ولاتلومه يدري ويدرون ان هو اللي ضيعها ) ..

قالت بحنيه : بتجي ..اثبت انت .. لاتضيع نفسك وبيتك وبناتك ..

شاهين ضحك بسخريه مريره: واحنا ماضعنا .. البيت مقبره يمه .. اثاري جمان روحه .. طلعت منه ومات .. ورب الكعبه مات يمه ..

جاه صوت ديم :

بابا .. تعال .. جديده تقول انام وانا مابي .. انا انتظرك ..

غمض عيونه بقوه . ودموعه حاره:

هلا بابا .. نامي.. حبيبتي .. بيان نامت .. ؟!

ديم : ايه نامت .. انا ابيك تضمني ..بابا .. احنا ماكملنا قصة الثعلب ... يلا تعال ..

خذ نفس عميق . :

الحين اجيك .. ونكملها ..

ديم : ماراح انام ..

هو : لاتنامين ..لمن اجيك بابا ..

قفل .. وروحه تنهار . . !

جمان كانت تضحي عشان نفسية بناتها كانت تبيهم يكبرون في جو اسري .. طبيعي ..حتى لو تمثيل ..

لكن لما هاج طوفانها اغرقت حتى بناتها .. !

ردة فعل جمان في علم النفس وش يقولون عنها ياترى ..؟!!!!

*****

وليد ..بتفكير :

جمان اعقل من انها تسوي هالفعل .. ليه ماجات شكت .. ليه سكتت طول الوقت .. !

نواف واللي حكى له شاهين من خلال انهياره كل شي :

كانت متمسكه عشان بناتها .. والواقع انا اشوفها تمسكت في شاهين .. خالي تعرف جمان .. كيف حساسه .. ولاحبت حبت ..

سيف توه يعرف السالفه صح من نواف .. بعصبية :

كيف مالاحظنا .. كيف قدرت تخدعني .. نواف انا اعرف جمان من عيونها .. والله اعرفها .. حشا ثلاث سنين مكسوره .. واحنا لا احساس ولاضمير ..

نواف : هي تحب شاهين .. تكذب على نفسها .. انها تسوي كل ذا عشان بيان وديم .. وهي والله كانت خايفه على صورته .. خايفه ابوي يتخذ قرار ضده .. وياخذها من بين عيونه.. بس والله شاهين وضعه يوجع القلب.. غبي .. لحق مشاعر زايفه وطاح على صخر ..

وليد واللي متضامن مع جمان:

انا كنت ضد زواج جمان من شاهين ..هو خذاها لأن عمك يبي .. ومن باب ولد عمها اولى من الغريب .. ابوك فضله على كثير خطبو جمان بهاك الوقت ..

سيف ضغط جبينه:

وليد .. ابوي ماغصبها .. وشاهين كفو .. وشايف الوضع ..مادحدر الا بعد ولادتها بديم ..

وليد بتهكم :

ياشيخ .. مسمي بنتها على حبه القديم .. بذمتك ذا مصفي النية ..

نواف :

ولو سماها من باب الذكريات .. تعرف حب عيال الثمانينات اوفياء .. وطايرين بالعجه ..

ضحك سيف :

الله ياخووووذ عقلك.. اي وفاء يا** .. لو معوه ذرة وفاء راح تزوجها هي .. ولو انه وفي مانكب جمان .. ولو هو وفي لحبه القديم يروح ياخذوه الحين .. ماهو فضا له الجو .. صدقني شاهين في ديره والوفى بديره ..

نواف يضحك :

ترى مارضى على شاهين .. والله وفي بس غبي ..

وليد : اختكم مختفيه ياكلاب .. وماخذين الموضوع طقطقه ومزح ..

سيف : جمان ذيبه ماينخاف عليها .. الخوف كله على اللي بقوا وراها . .

نواف وروايح شهيه تجي من المطبخ :

الحين مهره حلفت ان هي بتعشينا .. بس واضح العشا بيصير سحور.. لو طالعين اصرف ..

سيف : الخلا بس...يحصل لك.. تاكل من طبخها .. ترى (بوزيد لاقام قومتن سرني بها) ..

نواف مات ضحك : واضح ان بوزيد حقك يالله يقوم ..

سيف : ماتطبخ الا اذا شتهت .. واذا طبخت وكلت اغيب ..

نواف : والله اثاري صبحا صادقه ..؟!

جات مهره : وش قايله عني صبحا .. اكيد ذم .. ماورا جديده مدح ..

نواف : والله كلام جدتك مطابق لكلام بعلتس . . ماطبخين الا لاشتهيتي .. وان طبختي بدعتي .. !

مهره ببتسامه :

يلا سموو .. اذا كلتوا احكموا .. هو ابدع .. ولاكلام جرايد..

وليد : وين ماريا .. عنك .. ؟!

مهره تضحك: تعرف هي مشاركه مسويه مافن .. وجالسه تزينها ..

نواف :

اما ماخلصت .. ترى كلها كب كيك ..

وليد يرقع لماريا: هي دقيقه وتحب الاتقان ..

قام سيف : ياشيخ .. ماريا تلقاها تتهاوش مع الكريمه .. والشوكلت ..

مهره رفعت حواجبها : بسم الله شدراك ..

سيف والجماعه يتوجهون للطاوله :

خبز يدي اعرفها ..

وليد ونواف فهو.. مع الطاوله .. والأطباق تلمع .. مهره اختفت في المطبخ مده .. بس اصدمتهم .. بالذائذ ..

باستا بالخضار .. محاشي.. وفتوش .. وسلطة .. وشوربه .. وشموع .. وورد ..

وليد : من جدك ..؟!

نواف : يعطيك العافيه .. والله ماتوقعت شي كذا ..

سيف متنومس .. وهو محوط مهره بذراعه ..باس خدها:

تسلم الأيادي ياعينه ..

نزلت عينها واستحت من جرءة سيف قدامهم ..وقالت :

حياكم الله على قل الكلافه .. حقكم ذبيحه .. بس عاد لارجعنا ..

وليد : لا.. كذا.. بقعد اشوف عيوب ماريا .. الحين ماشاء الله خلصتي كل ذا وهي عالقه بكب كيك ..

جاتهم صرخة ماريا :

لقد ذابت الكريمه كلياً .. اخبرتكِ .. اننا بحاجة لعجينة السُكر .. موووووره تعالي هناااا ..

مهره عضت شفتها : يالله ماريا عفست الدنيا ..

بتروح سيف مسكها وقعدها :

خليها تقفع شوكها بيدها .. اقعدي اكلي ..

وليد يناديها :

ماريا اتركيها وتعالي ..

ماريا بانفعال: لقد اخذت طاقتي ووقتي .. هل اتركها الان .. وليد.. ارييييييد حلاً...

نواف بدء ياكل : شكل ماريا والله اعلم .. بترقد عندكم .. عشان تخلص هالكب كيك ..

ضحكوا و وليد يقوم : لاتمسخر الحب .. تراها مجتهده ..

سيف ياكل :

ليت بو زيدك مايفكر يقوم ابد .. ذاك لاقام قومته ماتسر ..

****

دخل شاهين بيتهم ..

لقى ديم حاطه راسها على حضن جدتها .. وتلعب في الايباد وتقاوم النوم .. !

مانتبهت لدخوله لمن قال : ديمي ..

قامت بسرعه وتركت الايباد .. وركضت وطبت في حضنه ..

ضمها بقوه وهو يجلس بها ويقول لامه : هلا يمه ..

عقدت حواجبها .. وهي تشوف شكله التعبان .. عيونه الذابله .. :

شاهين ..! .. فيك شي ..

ماجاوبها .. وهو يبتسم لديم .. اللي حاطه اركبها على حضنه وتقول :

بابا .. انت تقول .. اذا مابكينا .. وصرنا ندعي الله بترجع ماما ..

شاهين وقلبه يوجعه :

ايه قلت ..وهذا انتي شاطره .. صايره ماتبكين .. وتدعين ..

حطت يدينها على وجهه وتطالع عيونه :

انا شاطره .. بس انت ليش تبكي بابا ..

راح ضمها.. وبنفي موجوع :

لا يابابا من قال ابكي ..افااا .. الرجاجيل ماتبكي ..

سلمى وغصه ملت حنجرتها .. تشوف كيف يقولها ويرجع يبكي من جديد على كتف ديم ..

"وكنت اعيذ ابني مليون من قهر الرجال ..! "

لكن شاهين مقهور ..

مذبوح ..

وعاجز .. !

تركت المكان.. ماتحملت تشوف وحيدها بهالحال ..

ديم انقلب الوضع وهي اللي صارت ضامه ابوها .. وتطبطب على ظهره وتمسح على راسه بكفها الصغيره .. وتقوله:

ماعليه بابا .. بكره تجي ماما .. وكلنا نضمها .. ونسوي حفله كبيره .. !

*ضعت بحزني في حضن ديم ..استنشقت رائحتها الناعمه .. والتي ورثتها عن امها .. لتثير عينيِّ الشقيتان بالدموع اكثر ..الليله انقلبت الآيه .. وصغيرتي احتوتني وكأني ابنها .. اليوم نمت ورأسي المثقل.. على فخذها .. تطبطب .. وتحنو واصابعها الصغيره تخلخل رأسي .. وكأنها تلقي تعاويذ خفيه ..

نمت .. نعم نمت وانا اللذي جفاني النوم ايام طويله ..* .!

شفت حلم .. او واقع من الماضي .. كنت بيت عمي سعود .. جاين من المدرسه انا وسيف ..كنا بمتوسط .. جمان دخلت بمريول كحلي .. وشرايط بيض ..

يمكن بثاني كانت ..

انا بالصاله لان سيف صعد يبدل..

وجهها فيه العبره .. دموعها حايره .. بس ماتبكي .. ذكرتني ببيان .. كانت ماتعرف تبلع ..

شاهين : جوني وش فيك ..

هي : مافيني شي ..

شاهين : حد قايل لك شي ..

هزت راسها نفي ..

شاهين : حد ضاربك .. طايحه ..ماكتبتي كويس ..

وتهز راسها بلا. ..

قال لها : طيب تعالي ..

جات عنده بصمت .. شالها .. وحاول يعرف وش فيها .. فجأه نامت ..

جات موضي.. : متى جات جمان .. ونامت بعد ..

شاهين : خالتي .. مادري شفيها منغبنه .. وفيها البكيه .. بس عجزت تقولي ..

*النتيجه ان جمان طاحت مسخنه ثلاث ايام .. والسبب ان طالبه اسمها رباب .. عضتها على كتفها .. محدثه عضه هايله .. ملونه ..على جسمها الغض ..

ولاتكلمت لمن شافتها موضي وهي تسبحها .. وخذوها المستشفى وعطوها ابر كوزاز .. مضاده للتسمم .. *

طابت والتقيت فيها .. سئلتها : الحين ليه يوم سئلتك ماعترفتي .. والله كان رحت مدرستك وكسرت سنون هالرباب بفمها ..

رفعت حاجب :

انا ماتبكيني رباب ولاغيرها ..

بعدها قالت بخبث :

انا سكت لأني انا باخذ حقي منها..

ثاني يوم ..

الإداره متصلين على موضي .. جمان عضت رباب في خدها .. وانتقمت .. اذا رباب عضتها واوجعتها بمكان ماينشاف .. هي حطت لها علامه ماتنساها طوول عمرها...

******

طلع سيف من دورة المياه .. بعد السهره الحلوه العائليه .. اللي قضوها سوا ..

عقد حواجبه .. ومهره منسدحه على جنب .. وساكته ..

فكرها نايمه ..

مر بياخذ جواله من الكومدينا جنبها .. لقاها مفتحه ..طالعها .. ولارفعت عينها عليه .. قال: ودامك مب نايمه وراك ساكته كذا .. !

غمضت وباين زعلانه :

هذا بنام ..

رفع حواجبه وبدهشه:

وش فيك .. ؟!

قالت بصد: مافيني شي .. تعبانه وابي انام ..

جلس جنبها.. وابتسم .. ورفع حاجب وهو يدخل يده بظهرها:

وش غير احوالك .. ؟!

بعدت ظهرها بقشعريره وهي تقول ببرود :

طلع يدك ...لاتلمسني ..

رفع حواجبه : اووووف ..

راحت تغطت بالبطانيه لراسها ..

سحبها: مهره كلميني ..

راحت جلست وبانفعال:

سيف انت وش اللي قاعد تسويه .. وفيه خطر عليك .. لا وكلهم يعرفون ..حتى ماريا .. وانا يوم رجعت من المطبخ الكل سكت وغيرتوا الموضوع .. قلت يمكن شي خاص .. ومابي احشر خشمي ..

بس لما مشو وليد وماريا .. وبقى نواف .. اوك انا صعدت .. بس نزلت عشان باخذ شاحني .. وسمعت نواف وهو يهاوشك ..ومعصب عليك .. على اللي انت تسويه ومستمر فيه ..

عقد حواجبه وبعصبيه:

مهره ذا شغلي .. ومالك صالح فيه ..مافيه خطر ولاشي ونواف يبالغ .. هو يعطي الشي اكبر من حجمه ..

مهره بانفعال:

لا مايعطيه اكبر من حجمه .. نواف محجم الخطر اللي انت فيه .. بس انت مب مقدره .. وش دخلك انت عاد بمهربين ..خل يهربون الدنيا .. مالله خلقك .. حارس على هالزفت ان كانها آثار ولا خرده ..

سيف بانفعال وعصبيه : مهره ترى ذا شغلي وتخصص دراستي .. انا فتحت الورشه قبل المحل .. انا متخصص بترميم القطع ذي ودراسة تاريخها قبل المزادات وقبل المحل .. هذا مجالي ..

مهره وهي مو قادره تتمالك اعصابها :

طيب .. الورشه آمنا بالله .. الامور رسميه .. ومصادر القطع معروفه .. وزارة الاثار تدعمك .. الشغل الخارجي .. ضد التهريب .. وش لك فيه ..

سيف بعصبيه :

ماهو انا اقوم بالشغل ذا مع الامن .. اطلع في مهام .. مع الجهات المختصه وعلي حمايه منهم .. شغلي مو عشوائي ..

اعتدلت وبغضب :

الكلام اللي كان يدور غير كذا .. في شخص انت جالس تحبط اعماله .. وبدون ماتدخل الأمن .. لانك ماتبيه يسجن .. مين .. ؟! ..

ضغط عيونه وهو ينفخ وماتخيل انها اسمعت كل ذا: مهره تعوذي من الشيطان ونامي .. ولاتحطين هالأمور ببالك ..

مهره بانفعال: يعني حتى واحنا بباريس .. اول ماوصلنا .. كان عندك سالفه مشابهه .. فيها لوحه ومعرض .. ومادري ايش .. سيف انت مو مستوعب حجم اللي تسويه ..

سيف بحده : وانتي وش عرفك بهالامور .. خلاص انسي الكلام اللي صار .. لأن الحكي فيه .. هو اللي بيجيب العيد بدري .. ولاتدخلين في شي مايعنيك ..

غصت بعبرتها ..وبلعت ريقها.. وانسدحت وتلحفت ..

غمض عيونه بقوه .. ويلعن اسلوبه الدفش ..

ظل شوي ساكت .. بس ماقام من جنبها ..

بعدها راح يهزها بكفه ويداعبها :

خلااص مهره .. لاتزعلين ..

ماردت ..

ابتسم وهي متشبثه بالبطانيه ومتخبيه :

مهره ..!!!!

ولاترد ..

مهره ..!!!

ولاترد..

مهره ..

مهره ..

ويهز فيها وهي ماتبي تعطيه وجه..

بعدها قام ويدغدغها .. انفجع وهي ماتضحك .. صاح فيها :

ياجثه .. ماتحسين ..

صاحت: انت الجثه ..ابعد عني يالمريض ..حفرت جنوبي ..

سيف : من جدك .. بتنامين وانتي زعلانه ..لاتبالغين .. ترى انا من سنين هذا شغلي .

بجمود من تحت البطانيه:

طيب .. ايش اسوي لك ..

توسعت عيونه : مهره لاتصيرين بزر ..

مهره : طف الابجوره بنام ..

قام .. عنها وراح جلس في الجهه الثانيه .. وراح خذ كتاب وافتحه .. وتسند ..

وكل شوي يطالعها .. وهي ماتبي تلتفت عليه ..

ابتسم : لو قلت لك نكته تضحكين ..

مهره : لاتكفى .. انت وتنكت ماتجي .. نهائي ماعندك حس دعابه ..

رفع حواجبه وضحك بصدمه:

ياخي الواحد يكون صريح بس مايجرح ..

مهره : وانا صادقه ..جد لاتفكر تقول نكته لانها بتصير بيض ..

سيف تسند : جرحك وصل ..

رجعت سكتت ..

خذ جواله وافتحه .. طالع الساعه .. وفتح الواتس .. وفتح صفحة زينه ..

ولقاها متصله ..

كتب لها : زينه الفزعه ..يا اخوك ..

ظل شوي وردت .. :

هلا ..؟! .. امرني..

كتب : اسف على الازعاج بذا الوقت .. بس شفتك متصله وانا متوهق ..

زينه قاعده لحالها بغرفتها .. : لاعادي انا مانام الحين .. خوذ راحتك ..وش بغيت ..

(وفي بالها لو يدري عبد الاله .. عن حوارتها مع سيف .. في بعض المواضيع اللي تخص مهره .. كان طعنها .. بس في بالها ينقلع .. )

كتب : زعلتها ..؟!

حطت فيس مصدوم: ولييييييييش ..؟! ..

كتب : يعني نقاش .. واحتد وازعلت .. المهم اختك قفل .. هي لو تبتسم .. تضحك .. يطيح الحطب .. بس ماش .. انا اصابعي عورتني وانا ادغدقها وهي تقولين جدار .. معقول .. ماعندها احساس .. ؟!

زينه حطت ضحكات شطولهم : ههههههههههههههههههههههههه هههههههههههههههههه.. ولا راح تضحك انسى ..

سيف: طيب كيف اراضيها ..

زينه: اعتذر ..

سيف :من جدك ..

زينه حطت ملصق واحد يطالع بنص عيون: وليه ماتعتذر ..الإعتذار من شيم الكبار ..

سيف: لا ما اقصد .. بنات غازي ايش جوكم .. الحين لو قلت اسف .. بيفك هالقفل ..

زينه بثقه: جرب .. مهره عندها عقده من كلمة اسف.. قلها وبتسكتك .. كررها بالحاح .. خلاص بيطيح الحطب .. بشكل انو بتهزئك على الكلمه او يمكن هي تتأسف منك ..

سيف حط ملصق يحك راسه وكتب :

والله مايندرى عنكم يابنات عبد الغني شربت ..كملنا والكامل وجهه اللي عندي سعاد وانتي مرايم .. وانا طايح الحظ نوح ..

زينه حطت ضحكه: ههههههههههههههههههههههههه هههههههههههههههههههههههه بموتتتتتتت .. يمممه سيف لما اللي مثلك يقطون .. احس عجبه .. كارثه ..

سيف حط نص عيون : انتي واختك وش هالفكره اللي حاطينها عني ...

زينه كانت تضحك صدق .. وحطت ضحكه : ورب الكعبه مب قصدي ... بس لما تخيلت ان اللي عندي بو خماس حسيت يمه بموووت وراحت تحط ضحك من جديد ..

وطلعت من الواتس وهي ميته ضحك ..

سيف يطالع الجوال بصمت ..

والتفت لمهره ..

وبهدوء : مهره .. آسف ..

حسها تحركت .. بس ماعلقت شي ..

قال : آسف ..

قالت بدون تطلع : خلاص طيب ..

ابتسم : اسف من جد مهره .. اسف ولاتزعلين .. اسف ياعين سيف اسف ..اسف ألف .. اسف مليون .. اسف ..

توسعت عيون مهره وصاحت .. وهي تجلس:

ووووووجعععععع....

ابتسم وعيونه في عيونها : اسف ..

طالعته بصدمه: خلاص وصل اسفك .. لاتعتذر..مب لذي الدرجه

سيف بخبث: يعني سامحتيني ..

مهره بتهديد: اسلوب الأسف الرخيص ذا لاتتخذه معي .. ماحبه ..

سيف حرك حاجبه: اهم شي جاب نتيجه .. !

مهره صاحت : جاب نتيجه لاسلوبك المعفن .. في الحوار .. بس ترى ماسامحتك على شغلك ذا .. انا احلم نعيش سوا .. انا وانت وفارس وسيف . ماتموت وتخلينا يتامى وراك ..

انصدم منها :

ايش هالفكره اللي مكونتها.. ماحنا في غابه ..

مسكت راسها بقوه .. وهي تحاول ماتبكي .. وقالت:

سيف انت تعرف ان ابوي مات .. بس تعرف كيف مات .. ؟!

استغرب من هالطاري .. : جدتك قد قالت انه حادث ..

مهره بانفعال: هذا اللي الناس تعرفه ..وكذا تسجل بملف وفاته .. سيف ابوي صار عليه الحادث وسيارته اصلا جديده .. ماتشتكي من شي .. بس تبين في التحقيق .. ان البريكات مخربه .. ومعطله .. وهذا سبب الحادث ..

انصدم .. وعقد حواجبه بذهول..

مهره دموعها تنزل :

اللي بقوله احنا دافنينه في عقولنا وقلوبنا .. حاجه قديمه وابوي تايب منها من سنين ..تاب منها بندم وقناعه..

سيف بحذر : وش مهره .. تكلمي ..

مهره بألم : ابوي في الماضي .. كان يشتغل مع ناس بتهريب الاثار .. مب سرقتها.. كان يهرب اثار طايحين عليها اهالي قرى وفلاحيين .. وماقدموها للدوله .. كان يساعد على تهريبها .. ويدفعون للفلاحين مبالغ كبيره .. تغنيهم .. ومن وجهة نظرهم هم لقوها وهم يستحقون قيمتها .. الجهه الثانيه تاخذها وترممها .. وتبيعها بمبالغ اقوى للمتاحف وللاثرياء ..وكان له نصيبه ..من البيعه ..

سيف يسمعها بصدمه واهتمام :

ماما خذت ابوي .. وهو معه .. وهو استمر لان ماكان يبي ينقصها وينقصنا شي .. لمن بعدين حس الامور تاخذ منعطف ثاني .. بدت الناس اللي معه تدخل في اشغال ممنوعه وبنظر ابوي حرام .. يسرقون الاثار .. ويبيعونها .. هنا مارضا .. وطلع .. نهائي .. بدت تنقص مادياته .. خاصه كان معتمد على شغله الحر .. اللي واحنا صغار نسمع فيه ومانعرفه .. الا ان تجاره وشغل حر .. راح خذ قرض كبير .. رهن البيت والمزرعه .. وبدا في مشروع .. ومره يخسر ومره يربح .. لمن خسر .. والبنك خذ البيت .. وجديده هي الوحيده اللي علمها بهاك الوقت عن شغله بعد ماتاب .. وهي اللي دعمته وارهنت معه المزرعه . عشان مايرجع له .. بس بعد ماخسر .. قاموا يحاولون ربعه القدامى يرجعونه وهو رفض .. وتمسك برايه .. رغم امي .. وتخليها عنه ..

سكتت مهره وهي تتنفس بصعوبه .. والم ..

سيف مسك كفها .. يشجعها ..

قالت .. :

وعشان مايضيعنا ولايضيع المزرعه تعب جدي .. اضطر يسوي شغله لمعارفه القدامى .. وعطوه قيمة الرهن .. وحرر المزرعه ..

غمضت عيونها ونفخت الهواء.. وكملت:

وعشنا .. كلنا نشتغل .. ونتساعد .. والمزرعه كبيره وتنتج .. قدر ابوي يفتح مكتب xxxx .. والحمدلله توسع الرزق .. خير المكتب الى الان يجينا .. ونصرف على نفسنا منه .. بس عيال الحرام ماخلوه .. وخاصه ابوي رغم انه متخرج من ثانوي ومامعه شهاده .. الا ان ذكي .. في المجال القديم .. وعنده معارف .. في كل محل .. ويقدر يدبر كل شي .. كانوا يبون من شغله .. ورفض .. وهددهم .. انه راح يبلغ .. عنهم .. هالشي علم جديده فيه .. وهذا اللي خلاها تعرف ان موته مب طبيعيه وانه احد متعمد .. جديده ذيبه .. طلبت انهم يفحصون السياره ويتأكدون .. وطلع فعلا البريكات معطله .. !

سيف في حالة صدمه وذهول .. ووجع على مهره .. وحزنها .. وألمها .. وهذا سبب خوفها وزعلها لما درت عن شغله ..

بلعت ريقها .. وطالعته وبتقويسه بفمها:

مابي احد يتقصدك مثل ابوي .. مابي يقتلونك ولانعرف حتى نقتص لك .. ابوي مات ولاندري من هدر دمه .. سيف الجرح ذا مايندمل .. وغلاتي عندك لاتفتحه من جديد ..

سيف ضمها بقوه ..

ومهره تخبي وجهها فيه .. تحاول تكتم عبراتها وذكرى ابوها .

همس بحنيه .. وهو يلعب بشعرها :

ابوي مهره ..

همست : وش ..؟!

قال : لاتبكين ..

رفعت راسها .. وتمسح دموعها : مابكي .. بس انت حرقت دمي ..

ضحك وهو يقرص خدودها ويحاول يداعبها ويغير مودها:

ياشكلك يخرفن وانتي تبكين .. ود آكلك .. ترضين ..

صاحت : يالمريض .. !

سيف بخبث : آسف..

توسعت عيونها : تعال.. انت .. من وين جبت مسئلة الأسف هذي..

سيف : العصفوره قالت لي ..

مهره وهي تستوعب : مافي عصفوره تنقلك تفاصيلي ذا الحين.. الا زيون ..مو كيفها تعطيك حتى نقاط ضعفي .. اكلمها اتهاوش معها ..

سيف : عاد كلشي ولا الزينه .. والله لو تقولين لها شي اعض خشمك ..

طالعته باستغراب .. وهو يطالع فيها انو شفيك .. بعدها ضحكت .. لمن دمعت .. ! ..

سيف بدهشه: الحين من المريض ..؟!

مهره : زينه الحيوانه .. حيييل متآزره معك .. والله وتتواصل معك .. مع ان لو يدري ولد سند ذبحها ..

سيف ويدري عن وضع زينه شوي من مهره:

وهي الى الان ماانحلت مشاكلها معه..

مهره : والى بكره..

سيف: ليه.. وش يلزمها تصبر.. تنفصل..

تنهدت مهره : هي تبي هالانفصال.. وجديده رافضه.. وسندس تبيها تخلعه.. وزينه مسكينه تناضل عشان كلمة جديده واصرارها..

عقد حواجبه: بس نرجع انا بشوف موضوعها.. واتفاهم مع هال**** ذا..

شهقت مهره : عييييييييب..

قال بنص عيون وهو ياخذها لحضنه:

اصلا اللي يسويه مايسويه الا واحد.. ***** كلب وماعنده ثقه بنفسه.. ناقص رجوله..

توسعت عيون مهره:

سيييييف.. من وين طلعت هالالفاظ..

باس جبينها وضمها : نامي نامي.. لا اسهب واطيح من عينك..

مهره بعدت راسها واضحكت: وين راح الجنتل الأوروبي..!

سيف غمز: نخبيه احيان.. ونطلع النجدي..

سكتت مهره شوي..

بعدين قالت بجديه: جد سيف.. يعني ممكن نقدر نحل قضية زينه.. ونساعدها.. وجدتي بالنص..

سيف قرص خدها:

لعيونك اسوي كل شي.. وجدتك ماعليك بالجيب.. كانت حايله بيني وبينك.. وعرفنا كيف نجيب راسها..

مهره بشرود: يارب نقدر..!

******

الصباح.. زينه.. في السياره بيوصلها عبد الاله عند صبحا..

قال وهو يحاول مايزعلها بس مايقدر :

اسمعك.. تضحكين باليل.. من معه..

زينه وعينها في الجوال تطقطق:

مع مهره.. تعرف بلندن توقيتهم غير توقيتنا..

عبد الإله:وزوجها مو يمها.. تتكلمين معها لهالوقت..

زينه وتحاول ترد بلامبالاه:

كانت سهرانه مع زوجها واخوه وخالهم.. فكانت تسولف لي وترجع معهم..

عقد حجاجه: مع اخوه وخاله.. شهالفوضى..

زينه بنص عيون: ومعهم زوجة خاله البريطانيه.. ماشاء الله عليهم متفتحين.. ويثقون ببعض.. ماعندهم تعقيدات..

عبد الاله بعصبية واستياء:

الا دياثه ومافيه غيره.. خير زوجتي تجلس معنا يارجال..

زينه: ترى هم في اوروبا.. مجتمع مختلف.. واقارب زوجها بمقام اخوانها.. تنقصك الثقه.. عشان توصل لقناعاتهم..

عبد الاله : قفلي الموضوع.. لانه رفع ضغطي.. بعد انتبهي ترجع مهره.. وتعلمك هالتعاليم.. ولاتقولك سلمي على زوجي.. اخذ لسانك واقصه..

زينه وعينها في الجوال.. تقول ببرود: طيب..

وهي كانت تختم حوارها الاخير مع سيف :

اللي كان كاتب لها (كثرت ديوني عندك يازينه.. الله يقدرني واردها)

زينه: اهم شي راضيتها.. واضحكت.. بس.. تم دينك..

كتب : الله يسعدك..

كتبت : ويسعدك.. انت مع خيتي.. سعاده ماتوسعها الارض..

وقفلت المحادثه.. برضا عن اللي تسويه..

لو مالقت السعاده اهم شي.. تسعى لسعادة مهره..!

اذا مالله كاتب تترتب حياتهم ثنتينهم..

على الأقل وحده منهم..!

عبد الاله : انتي وش شاغلك بهالجوال..

زينه تحطه بالشنطه:

قروب بنات الجامعه منزلين وظايف.. قاعده اشوف..

قال: فكينا.. من الوظايف.. وش ناقصك عاد..

زينه.. وتمتلي طاقه سلبيه.. تبي توصل مزرعتهم عشان تنام..

قالت: اسرع شوي.. تسبدي تقلب.. لا استفرغ في السياره.. وبعدين.. شفيك يالله تمشي..

عبد الاله بتناقض في شخصيته المعفنه : احب طريق المزارع.. وصوت الطيور على الصبح.. ياخ سبحان الله.. كن احنا بازلامسي..يا حلو الطبيعه..

زينه طقت الطبلون كذا مره.. وصلت كبدها وحموضتها.. وهي تقول : وقف.. وقف..!!

وقف على جنب.. وافتحت الباب.. واستفرغت لمن بغت تموت..

نزل وباللهفه يعطيها ماي.. : سلامتك حبيبتي.. وش ماكله وغثى عليك..

زينه تغسل وجهها.. ويعطيها مناديل.. ويقول : اكيد لانك مانمتي زين..

زينه قامت تبكي..

هو : وش مضايقك.. عادي استفرغتي.. كلن يستفرغ.. ولا يعني منحرجه مني.. فديتك اخذي راحتك..

زينه رجعت رجولها في السياره.. وسكرت الباب.. وخذت نظاره شمسيه البستها فوق النقاب.. وتسندت وضعية الصنم..

معقووووووووول..

في نااس زي عبد الاله.. ياربي لاتكثر من امثاله..!

*****

هادي مع بلقيس.. في المطار يودعون فارس وسيف..

اللي باصرار سيف الكبير.. قدر يقنع امه وابوه.. القناعه المتشيمه..!

انهم رضو.. بس اسحبوا مسؤوليتهم..

وسيف واثق بفارس..!

فارس وبيده الجوازات وشنطه على كتفه :

والله من جدها امي ماجات.. يعني زعلانه..

بلقيس.. وهي ترتب بدلة سيف :

لا تحاتي راضيه.. بس سوت هالحركات علكم تهونون..

هادي ويده على كتف فارس :

سبع وماينخاف عليك.. ولاهي اول مره.. الفرق يافارس معك مسؤولية صغيره.. وانت قدها..

ابتسم :

اتخيل شكل مهره لاوصلنا

بلقيس : ميـــته مسكينه عليكم..

هادي خذ الورق من فارس يتأكد.. من كل شي.. ويقول : انتبه.. تنسى شي منها هنا ولاهنا.. خليها بسحاب الشنطه.. معك قلم.. حق تعبي اوراق الهجره بالطياره..

فارس يطقطق مخابيه وبوهقه: يوووووه نسيته..

هادي طلع قلمه.. : خذ.. وفارس الورق الصغير يعطونك اياه تحطها على طول وسط الجواز حتى ماتضيع.. معك بطاقة البنك..؟!

فارس يشيك في بوكه :

ايه بطاقتي.. وفيزة لابوي.. ومعي مبلغ يورو.. قال لي ابوي اخذ معي..

هادي : ممتاز.. وجوالك لاتفضي شحنه.. وبس توصل طمنا..

بدت نداءات رقم رحلتهم.. حق التوجه للبوابه..

فارس توترت اعصابه..

وبلقيس تضم سيف وتبوسه..

ضمته بقووه:

الله يحفظكم..

فارس حس بلقيس تبكي.. راح ضمها ويداعبها:

برجع لك بلقيس.. انا وياك الصامدون في بيت سعود..

ضحكت من خلال دموعها.. وهي تتبادل معه بوسات خد:

كل من حولي ابتعد ومابقى حولي احد..

فارس باس راسها.. :

بجيك.. كلها اسبوعين وبرجع مع نواف..

بلقيس: تروح وتجي بالسلامه..

تركها وسلم على هادي..

اللي وصاه على كل شي ودعى له..

وسلم على سيف..

سيف تشبث بيد فارس.. ويلوح لهم... : مع السلامه ميمه.. (عميمه).. مع السلامه هاتي..(هادي)..

بلقيس وكل وجهها دموع.. ترسل لهم بوسات : الله يحفظكم فديتكم..

وراح فارس وهو متشبث بكف سيف.. واختفى بين المسافرين..

قلبه يرقع.. وخايف من هالأمانه..

وسيف قلبه يرقع ومبسوط.. انه بيروح حق ماما..!

التفت هادي عليها.... مد لها مناديل..

وبنص عيون: ياخي بيسافرون يتسيحون ليش تبكين..

بلقيس : انا يسافر الكل الا فارس..ولازم ياخذه ابوه هناك بالإجازات ويغثني..

هادي يمشي معها.. بيطلعون من المطار:

اقوول اهجدي.. وترى بيجي اليوم اللي بياخذه سيف معه.. ان خلاه كمل ثانوي عندكم.. الجامعه مايخليه.. اي والله حاله.. سيف يتشفق على ضناه.. وهي وامها محتكرينه..

بلقيس بعصبيه وانفعال : هادي الإنسان الطبيعي بحالتي.. يراشونه.. يهدونه.. يقولون بيرجع.. كلها كم يوم.. مايقولون له افقدي الأمل..

هادي : طيب تفائلي.. يمكن تكونين اعرستي بهاك الوقت..

وقفت ولمت قبضتها بقووه..

هادي حس انها ماتلحقه.. وقف.. ولا التفت..

بلقيس بجمود: جيب السياره.. انا بنتظر هنا..

هادي : ابشري..

وراح..

بلقيس تطالعه وهو رايح..

(تدري عن مشاعره.. ويدري عن حبها.. هادي محبوس في عقدة الفرق المادي.. والاجتماعي.. يشوف ان كا انسان مؤتمن على حلالهم.. ومالهم.. ويعرف بلقيس وش قد عندها.. لو يجي يتقدم.. ويطلبها.. بيكون طامع..

في باله.. مايبي يخسر ابوها بهالتفكير.. ولا تنهز نظرتهم..!..

عنده شعور ان بلقيس بنت ولي نعمته.. كيف ياخذ وحده اعلى منه ماديا ً واجتماعياً.. تفكيره مريض.. وهي اللي تدري ابوها شقد يحبه ويثق فيه..)

وقف بالسياره.. افتحت الباب ورى وركبت..!

حرك.. وظلوا ساكتين..

وبعد مده تكلم : افرديها ترى الطريق بيطوي.. ومثل هالطلعه ماتحصل الا في اصعب الصدف..

بلقيس بسخريه:

ليه نكذب على نفسنا.. اذا انت تشوف اللي احنا فيه شي مايستحق التقدم..

هادي:تعرفين شعوري وصدقه.. انا لو ماخذتك.. ماراح اتزوج ابد..

بلقيس ضحكت بسخريه مريره:

لااا.. بيض الله وجهك على هالوفاء.. مير انت اللي تبيني اتفائل بالعرس من شوي.. بالله عليك.. لو رحت في نصيبي واعرست.. كيف بالله.. جد هادي.. كيف بأعيش وانا ابيك.. انت كيف بتسلى وانا مع رجال ثاني..

قبض على الدركسون ويحاول يتمالك اعصابه:

وضعي صعب قدام هالموقف.. بلقيس لو بس ماني وكيلك.. لو مادري وش عندك وش ماعندك.. اول مايجي في بال الكل.. انه طمع فيها من خير ابوها..

بلقيس : ورب الكعبه تفكيرك.. سطحي.. انت بس لو تقدر ابوي.. وغلاك عنده.. ان كان عرفت ان ماهو اهو اللي يوقف بوجهنا..

هادي : ما انتي فاهمه.. خليني ساكت لأن المسئله عقيمه..

سكتت.. وتطالعه وهو يسوق.. معقول كيف يحبون بعض..!

وكل واحد عقليته وقناعاته بداهيه..!

معقول هادي الحاسم.. العقل الراجح في كل شي..

مايقدر يحل أزمتهم..!

معقول اتمنى امد كفي ويمسكها لي..

الا ان هالشي مستحيل وحرام..!!!!!!!

‏يجف الوقت وغيومي تحوفك

‏هقيتك في ظما هالشوق زادي

‏أنا اللي خايفٍ ..تبطي ظروفك

‏الين يصير هذا البعد عادي !

******

راجح بعصبيه يفك ازرار.. قميصه..!

والتلفون باذنه:

من طيب.. من اللي يعرف تحركاتنا هذي..عديت سالفة باريس.. بس الحين لا مو صدفه..

منصور بتوتر :

شكله ياراجح رجالك.. فيهم احد ماهو مضمون.. ماعدت تشتغل بذمه مثل الأول.. اذا ما انت قدها.. خلك على تجارتك.. واترك هالشغله كلها.. ماانت مجبور..

راجح بانفعال: منصور.. لاتشكك فيني..

منصور: ماشككت.. بس كنا غير ياراجح.. مافيه شغله تخرب ولا ماتتم من يعوض هالخساير..

راجح : خلينا نركز.. ونعرف بالاول من يسعى ورانا.. وان كانها جهات امنيه.. ليش ماوصلت لاحد من الرجال..

منصور: مادري.. انا مخي انشل.. انت ابحث بطريقتك وانا ببحث بطريقتي..!

راجح : تم.. في امان الله..

منصور: في امان الكريم...

قفل.. وحدق في صورة تجمعه بغازي من ايام زمان.. شال الفريم..

وهو يتخيل صولاتهم وجولاتهم في هالمجال ايام الشباب..!

*******

على الغداء..

سيف وهو ياكل :وش فيك محتاسه..

مهره وهي تدق من جوالها :من الصباح اتصل بفارس ومايرد.. كلمت امي موضي تقول طالع مع ابوي سعود للمزرعه وماخذين سيف.. والله واحاتي.. ليكون فيهم شي ولاسيف طب في المسبح.. وبلقيس.. كلمتها ماراحت معهم..

سيف برواقه: المزرعه غالبا ً مافيها ابراج..اكلي وعيني خير وفارس حريص على سيف.. لاتحاتين..

مهره متمسكه بالملعقه والجوال باليد الثانيه :

حتى تواجده صار له ساعات.. سيف واحشيني حيل.. ماعرف كذا.. لازم ابدء يومي فيهم.. طيب نبي نرجع.. تكفى سيف.. ابا عيالي..

سيف رفع عيونه وملعقة الشوربه في فمه.. شربها وقال :

تبين ترجعين احجز لك.. انا ماراح ارجع الا قبل رمضان..

مهره.. انغبنت.. وعلى طول تجمعت دموع في عيونها.. وقامت : الحمدلله..

سيف : وين ماكلتي..

مهره تضايقت : معدتي..بعدين باكل..ومادري بروح اغسل المواعين...

سيف بهدوء : نسيتي ان جولي جات... هي تغسلهم.. تعالي ابوي.. وش فيك انخطف لونك..

مهره بحيره وغصه:

انا اقلك ابي اروح لفارس وسيف.. تقول لي بتحجز لي.. كيف اروح واخليك..

سيف :طيب لاتروحين.. ظلي معي..

مهره جلست ع الكرسي وشكلها يكسر الخاطر: هذا اللي يقول لابغيت تحيره.. خيره..

سيف: اجل اغصبك..

مهره: لا.. تجي معي..

سيف : مستحيل.. ماقدر هالفتره..

مهره: طيب كيف.. اروح واظل كل هالوقت بدونك..

سيف رجع ياكل وبرواقه: وانا والله ابيك معي.. بس ماود اجبرك..

سكتت مهره وشردت.. وبين عليها الضيق..

سيف على طرف لسانه بيعترف لها انهم جاين بالطريق..

بس تعوذ من الشيطان..

.........

سيف في الطياره.. طفش :

فالس متى نوصل ماما.. واوبه..

فارس راسه على ورى تعبان :

نام.. عشان نوصل بسرعه..

ظل يسئل ويسئل.. وفارس يجاوبه.. بعدين قال :

خلاص سيف اسكت.. ولابينزلونا من الطياره..

سيف: ألوح حمام..

فارس نفخ..بإرهاق.. وفك الحزام له.. : يلا قوم..

راح معه.. ومطول باله.. ورجع.. وسيف بكياته يمد كفوفه:

ابي معقم..

ابتسم ..وهو يحط له.. وسيف يفرك كفوفه..

فتح له كيك وحليب..: يلا كلها.. عشان تنام.. ونوصل لأمك..

سيف والدافع الحماس لمهره.. طاعه وكل وشرب الحليب..

ونام..

فارس.. يعدل راسه.. ويغطيه عدل.. وينام بعد هو..

........

*وها أنا اتجاهل عقدة حاجبي الحياه في وجهي.. وابتسم.. سعيده.. رغم خوفي بانفلات سري من يدي..!

اليوم بلغ شوقي لصغيري منتهاه..

اعتيادي على فارس..

قلقي.. حين لم ارى ابناءي اللذان لم ينبتا في رحمي..!

شوقي لهم لم يكن شيئا ناعماً يعبرني.. بل احتدت اطرافه..لتئلمني..

تهت مع سيف قليلا.ً.. متناسيه عذابي اللذيذ..سيفي اللذي وئدته الحياه في قلبي.. فدفنته فيه حبا ووجعا ً..!

كانت واقفه عند النافذه وجا الليل..

سيف جاي من فوق : مهره ايش هالكآبه اليوم.. بيعيني في السوق..

تنهدت بغصه: اشتريك..

جلس قدام الاب توب :

كلمت ابوي وطمني على العيال.. خلاص لاتحاتين..

مهره: مادري.. اليوم وقت حسيت.. كيف مو قادره اوصل لهم.. خفت يجي يوم كذا.. وادورهم مالقاهم..

سيف : مايجي هاليوم وخشمي يشم الهوا..

التفتت عليه :كنت في سيف.. صرت مع فارس وسيف.. الحيوان كيف طاوعه قلبه يمر اليوم ومايكلمني.. حد ينكب عفش امه كذا..

سيف ابتسم وطالع الساعه: اكيد لهى مع ذياب.... وماعرف يكلمك..

طق الجرس..

عقدت حواجبها : من تتوقع..؟!

سيف : افتحي.. اكيد نواف..

خذت شالها لفته على راسها.. وراحت..

سيف يراقبها..

افتحت الباب.. اشهقت..

*.. اتسعت عيناي بذهول .. وانا ارى وجهاً.. اشتقته.. وابتسامه احببتها.. فارس واقف بملابس شتويه.. وانا انظر بصدمه.. *

صاحت بانهيار : من جدك..!!!!!!!

دخل وشايل شنطه : دخليني بموت من البرد..

مهره بدون سيطره.. صاحت وهي تعانق فارس اللي طاحت الشنطه من يده : وحشتني امي وحشتني..يابعد روحي ..

راحت تلمس راسه.. يوم تركته كان بشاش ومتعور.. :ياربي لك الحمد والشكر.. يابوووي يافارس.. والله ان ردت الروح فيني..

سيف قام.. ومنتشي بالحظه.. ومتحمس لبقية المفاجأه..

فارس ضمها.. وحب راسها.. ورجع ضمها: واحنا اشتقنا لك..يمه..

مهره تبكي.. ومب عارفه تسيطر على نفسها..

فارس مسك وجهها ومسح دموعها :

بنت مو كذا..

سيف : هي كذا في شدة الحزن.. تجف عيونها.. وفي الفرح شلالات ماشاء الله..

صاحت فيه : والله كنت تدري ومخليني.. طول اليوم مثل الفزاعه اترزز في كل قرنه واتصل..

سيف عانق فارس وهو يضحك :

مابغيت اخرب المفاجأه.. مادريت مير ان فارس ماخذ قلبك كذا..

مهره جات سحبت فارس من حضنه :

قل لي كيف سيف.. شلون خليته من ينتبه له ذا الحين.. اكيد بيبكي.. كان جبته معك.. فارس كيف طاوعــ...

جاهم صوت سيف : مااااماااااا.. وحستيني..

شهقت ويدها على فمها.. ..

سيف وفارس قدامها..

اتصنمت ومب عارفه تلتفت.. وعيونها تهل دموع.. وتحرك شفايفها:

صدق..؟!

سيف بحنيه :ايه صدق.. ماقلتي تبينه.. جبناه..

فارس : ولدك نقص عمري بالرحله..

نواف : تبين ولدك ولا ارجعه..

التفتت ونواف كان شايله.. نزله..

خرت على ركبها.. وسيف.. ينطلق مثل الحلم الخاطف.. اللذي بات في حضنها وتحقق..

مهره تضمه وتشمه وتبووسه..

بللته دموع.. : آااااااه يممممه.. يابعد روحي.. ياقلبي..انت..

جلست على الارض.. وهي في حالة من عدم الاستيعاب.. تشبع اضلاعها منه..!

تستنشقه في روحها.. وهي اللتي جفت بدونه..

وماتت بخوفها من فقده..

سيف انهضم : انا جيت انتي تبكين.. والله ابكي.. الحين لمن تجي الشمس..

ضحكت وهي تبكي وتضمه بقووه :

يممممه نتفتي.. امووووت فيك.. احبك.. ياربي لاتحرمني منه ولاتوريني يووومه..

سيف ونواف.. في حاله من الغصه.. والذهول.. كيف يتشعب هذا الصغير.. في مهره.. كيف اتاها كاربيع مفاجئ..

داهم خريفها وتطاير اوراقها..!!

كيف سقى ذبول اطرافها.. فاتفرعت تتشابك فيه وكأنها تخشى ان تفقده من جديد..!

حين اختارها عساف واصر..

هل كان يعلم ان لمهره قلب طبع سيف كالشامه في بطيناته..!

******

مُستلقيه على فراش ارضي كله وسايد.. قدام نافذه مشرقه بصباح عذب..

تتلوى بوجع..!

تعتصرها الوحده كأفعى ضخمه.. تضغط على ضلوعها.. قلبها.. وتخنق حنجرتها..!

*مُخضبه بالشوق..

يندلع فيّ الحنين.. ولا أجد مايطفئه..

مصابه بگ ياشاهين..

وموصومه بعشقك حتى أموت..

اعاقبك بي..

واعاقبني على صبري..

ساديه في تقطيعي لذاتي..افترسني واقطع اطرافي اللتي قد تودي اليك..

ياوجعي اللذي لايشفى..!!

انت الملح اللذي ترسب في اهدابي.. والعلقم اللذي مكث في بلعومي..!

اُجابهك بسيف امسك نصله.. يدميني قبل ان يؤذيك..

انا المهاجمه.. في حرب براية مركوزه في صدري.. لا انتعل الا كبريائي.. في ارض كلها شوك وألغام..!!

اغض بصري عن جثث من اضحي بهم في سبيل وجعك..

بيان حبي.. وديم روحي.. يانور عيني اللذي خفت..ياقلبي اللذي تفتت برحا البُعد..!

اصابعي تشتاق لخصلاتهم الناعمه..

وصدري يحن لرؤسهم وتحدياتهم من يحتضني اولاً..

عناد بيان.. حنان ديم.. صوت بيان الحاد وقوة الأنا.. انصهار ديم في ضعف شعورها..!

وجه ديم الملطخ بالشوكلا..

وبرسيج بيان في رفض كل مايوسخ ثيابها..! *

ابتسمت وعيونها مليانه دموع.. مع طواري تناقضات بناتها..

اعتصرت معدتها من قوة الألم.. وهي تحاول تجلس..

وارتماء غادة في حضنه.. داهم مخيلتها.. كاسهم سام يشطرها نصفين..

تسندت على الكرسي وراها ومدت رجولها قدامها..

*موجوعه..وحيده.. كاموال عراقي مبحوح وحزين.. كالقيط نتج عن حب ثم رُمى.. سقطت كمأذنه شامخه.. هُدمت ..

انا الفاعله والذاهبه والمتخليه.. لكني.. انا الوحيده.. والمتعذبه.. والذائبه..

وبين لطم مشاعري.. ونحيبها.. رف في جوفي.. كالفراشه..كامصابيح حوانيت قديمه في حي متهالك وفقير.. كأنه يعزيني.. ويلفت انتباهي.. (اني معك)..!

استعدلت.. وتلمس بطنها.. في ترقب.. يمكن كانت واهمه.. ولسى ماتحرك..

لكن جنينها.. قام بحركه خافته ثانيه..

توسعت عيونها ووجها ينفرد ببتسامه: ياربي لك الحمد والشكر..

راحت احضنت بطنها..

تستشعر هذا الأمل العاصف..

كنزها الثمين..

كانت في عيد زواجهم حضرت باقة ورد.. وظرف.. كان فيه صورة سونار ونتيجة تحاليل الحمل اللي اخفته بالشهور الأولى..

وكان نتيجة ليله بالإكراه من شاهين.. عرفت وسكتت..

تصالحت معه.. وكانت تبي تخلي الخبر هدية صلحهم وزواجهم..

كان حملها بيكون أيقونة البدايه الصافيه الجديده معه..!

لكن وبعد اللي صار.. احلفت انه مايستحقه.. وماراح تخليه يشوهه مثل ماشوه ميلاد ديم..

ابعدت..

ماراح تعطيه الحب بشكل طفل..

ماراح تنوله امنيته بفهد صغير..يشيله ويأذن له ويتمم له..!

*ربما فهد جاء من إكراه..

لكني لن اعطيه له برضا..!

لست انا من اعيش بصورة أم لأطفاله..

بينما يتوه في عشق لعينه..

يعلنها في وجهي..

كاروح شريره لاتُقمع ولاتُطرد.. *

ارتجفت بنتشاء.. وهي تتحسس صديق وحدتها.. وتحاكيه..

كانت خايفه لان المفروض تحرك من قبل.. وكانت في حالة مأساة لانها تفكر الجنين مات ببطنها وخايفه تروح المستشفى وتواجه الموقف..!

شردت في البعيد..

الدعم والثبات جاها من رب العالمين..

بكويك بنفس السيخ اللي احرقتني فيه ياشاهين..

اني على هالأرض وماتلقاني..

مثل ماكنت معي بغرفه.. ولا ألقاك..

ذق يامووت ماذوقته الناس..!

..........

في گل صبح ابتدي أحبك من جديد

وين النهاية وأنا گل يوم ارجع ابتديك

في صباح جميل.. سيف الصغير على طاولة الفطور.. ومهره تحضر الطاوله مع جولي..

فارس واقف يحورف في شغلات فوق المدخنه : ابا اصادر هالنمر.. جاز لي..

مهره بسعاده : حلالك ابوي.. شل اللي يعجبك..

سيف نازل قال : اقول خله مكانه.. مايطلع من البيت ذا..

فارس رفع حاجب :

مهره عطتني اياه..

سيف : انت ومهره وماتملكون لي ..

سيف يحرك رجوله.. وهو على الكرسي : وانا اوبه..

سيف جا باسه : عاد انت.. راس المال.انت المكسب الصافي ..

سيف منتشي..

وفارس يطالع بنص عيون ومتكتف :

واللهي عيب.. يبه ترى ماجا لي اخو لسى عشان تنسفني كذا..

سيف راح له وضمه وهمس في اذنه: استح.. تغار من ولد عمك..

فارس وهو في حضن ابوه :انتبه لتصرفاتك معوه.. ترى هاا.. مثل ماجبته ارجعه.. انت ابوي انا.. لي انا.. جايك من اخر الدنيا.. عشان تبوس سيف بالأوله..

سيف باس خده : صغير ولازم ندلعه.. اكبر يافارس..

توجه لطاوله : اكبر عند الكل الا عندك.. راعي مشاعري ولابدخل في حالة عزله واكتئاب..

سيف : ياااساتر..!

مهره جات تحط باقي الفطور وتقول : وش فيك امي.. وش هولا تدخل في اكتئاب..!

فارس :

التفرقه يامهره.. توجع القلب.. انا اشهد ان قلبي مجروح وينزف..

مهره بشهقه تبوس راسه: وويه بسم الله عليك جعلني قبلك..

ابتسم وبنص عيون : تصدق يبه.. نبادل.. خوذ سيف جعله عافيه.. وانا تاخوذني مهره.. والله ماهي شينه..

ورفع عيونه : مهره تبنيني.. وببر فيك..وبتبرا من ابوي وبعقه.. ايش رايك..

ضحكت: تم تبنيتك.. بس وش فيك على ابوك.. سيف وش مهبب..؟!

يشرب قهوته : كل ذا لأني بست سيف بالاول.. فيها شي..؟!.

مهره تجلس : ايه فيها..المفروض تبدا بالأكبر.. اول انا.. ثم فارس.. واخر شي سيف..

فارس بتهكم : لا عز الله افلحنا..

سيف برواقه : ايش رايكم.. نكنسل هالعاده السيئه.. دامها بتسبب صراعات داخليه.. بينكم..

سيف الصغير خرج عن صمته وهو يحط كاس الحليب:

ماما.. انتي قولين تنامين معي.. انا نمت.. وانتي هجيتي.. ياكداااابه.. وين لوحين خليني..

توهقت..

وفارس فقع ضحك: ايه شفتها وهي تهج.. وين رحتي يامهره وخليتي سيف لحاله..

سيف بهدوء وهو ياكل :

نومتك خلاص.. وجيت خذتها عشان تنومني.. ماعرف انام الا بحضنها حتى انا..

فارس انصدم من ابوه..

واحمر وجهه.. وضحك : اف. عيييب يبه..

مهره وهي وجهها ولع : سيف وش فيك..!!!

ياكل بهدوء.. ويطالعهم بفهاوة.. : وش قلت انا..اثنينكم كبار وبالغين.. ليه اللف والدوران..

وطالع وجه سيف اللي فوقه علامة استفهام: وهذا فاهي مايدري وين ربي قاطه..

مهره تضحك بارتباك وتقرب الصحن من فارس : كل امي.. ابوك مادري وش به ضارب سلك براسوه...!

*****

بعد مادرى مشاري ان فارس وسيف الصغير.. جاو.. اصر ان يجتمعون بمزرعة ابوه.. وينبسطون سوا..

كان وقت العصر..وهو مع سما هناك..

كانت جالسه على احد المقاعد الخارجيه وضامه رجولها..

وشارده..!

وتسمع مكالمات مشاري..وهو يعزم الشله..

بيجي نواف.. وهي اللي تدري انه توأم عساف والتقت معه قبل..!

بس ماشافته من سنين.. اخر مره شافته قبل مايتوفى اخوه..

وبتجي مهره زوجة وحبيبة عساف.. ومعها ولده..!

كيف تكون طعنتك موجوعه بقدر رحيلك ياعساف..

كيف تزوجت وانجبت..!..

كيف كنت غبيه.. كيف لم استوعب غياباتك.. وغموضك..!

كيف اصبح العالم من حولي مخيف.. وانت الأمان..!

تبسمت وانت تخون..!

أأتمنتك نفسي وانت عبثت بها..

غرورك لم يشفع لي كبوتي.. عاقبتني وانجبت من غيري..!

ظل اسمك معلق في الدنيا يحمله طفلك كما كنت تتمنى..!

انا اللذي خسرت.. وكسرت انفي كما اقسمت..

كنت شاهقاً ياعساف.. كبرياءك يجعلني انكمش..!

مات طفلي كما تنميت انا..

وعاش طفلك كما اقسمت انت..!

: سما.. معقوول ماتسمعين..

هزت راسها من شرودها العميق:

سوري مشاري.. والله مانتبهت.. وش فيك..؟!

مشاري : بيجون سيف ومهره..الحين ومعهم فارس وسيف الصغير ولد مهره.. بتنبسطين معهم..

سما تنهدت.. : ماحب الأطفال يوترون الوضع والمكان.. مشاري شكلي برجع البيت..

(سما من تبع عقدها .. الطفوله والاطفال.. تحسها اشقى مرحله في الحياة.. مرت فيها.. فصار عندها اصرار انها ماتنجب.. ومو بس كذا.. تتوتر لما يكون في المكان بزارين.. خاصه لو كانوا حركين واشقياء.. كله تحس انه بيطيح او ياذي نفسه.. *سما بختصار مجموعة عقد نفسيه)..!!!!

مشاري وهو يخلط لها شوكلت بالحليب ويعطيها اياه :

بالعكس ظلي.. الحين انتي تحبين مهره وتنبسطين معها.. بتحبين ولدها..

خذت الكوب وشردت..

مهره حبوبه وتنحب.. وحيل علاقتها بسيف منسيتني انها كانت زوجة لعساف..!

بس لما اشوف ولدها منه.. كيف ياربي..!

اصعب شي ان تعاتب ميت..

دفن بحلوه ومره..

تمسكت في الكوب بقوه.. خافت يطيح من رجفتها..!

وقفت :بتمشى شوي..

داعب انفها المحمر: تمام حبيبتي..

راحت.. وخيالها يجمح لبدايتها مع عساف.. كانت في امريكا وكما نوهت سابقا انها كانت تشتغل في الصحافه.. وخاضت في امور مع سياسين.. وحاولت فضحهم..

ولما حاولوا يوصلون لها.. وحتى حاولوا اغتيالها.. استبعدت تلجئ لابوها.. لانه بيرجعها عنده وهالشي ماكانت تبيه..!

تواصلت مع عساف.. و كان على علاقه بابوها.. وكان راجح معطيها رقمه.. ورقم كذا شخصيه بامريكا ممكن يساعدونها..!

عساف كان المرجح بحكم انها تعرف سيف ووليد وهو يقرب لهم..!

وحتى هو قد شافته .. حتى ماكانت تذكر هو ولاكان نواف..!

وكان اللقاء..

تذكر عيونه القاتله.. كيف حدقت بها.. تذكرهم وكأنهم العيون الوحيده.. اللتي ملكت اقوى حفارة تنقيب.. عن انوثتها المدثوره..!

لقاءنا الاول كان في بار..

ولم تكن مرتي الأولى في مثل هذا المكان.. فأنا برغم من شرقية ابي.. اللتي حكتها ونحلتها السنون.. اميل لعرق امي.. اللتي ماتت قبل ان تُسلم حتى..!!

تعارفنا.. صافحته.. حكيت له.. واخذت منه قسم غليظ.. الا يخبر ابي.. او احد بشيء.. فقط اريده ان يخبأني لفترة..!

وخبأني.. في قلبه.. وبيته.. وحتى سريره..!

عيونه الجريئه.. كانت تحدق في تفاصيل لم اكن اعرفها بنفسي..!

لم يغفل عن فكي الحاد.. وتروقتي البارزه.. اتساع عيني ولونها البني العتيم.. كان يتلمس رمشاي.. بطرف اصابعه..

كان يخبرني انها تصيبه في مقتل..

كان يسند كفه على خده.. وانا على ظهري.. يبتسم بخمول العاشقين.. ويقول : ود اعد حبات خالك بعنقك ووجهك.. بس تعرفين ليه مابي اعدهم ..؟!

: ليه..؟!

: اخاف تطلع بوجهي ثواليل..

هي بدهشه: واااات..؟!

ضحك: ثواليل.. كل علومك ماش..يبي لي اعطيك كورسات بعلومنا وسلومنا وامثالنا وكذب اولينا..

استعدلت : عساف ترى افهم عليك.. واحكي سعودي.. بس عاد لاتبالغ.. واصير مافهم.. وش اللي قلته..

(اذكر شرح لي.. ان من المعتقدات اول.. ان الواحد لاعد النجوم.. تطلع له ثواليل.. وراني صورتها بقوقل.. انقرفت.. بس ضحكت بسعاده يوم فهمت انه يشبه حبات خالي.. بنجوم السما)..!

مهما كان عساف محط نقد.. لكن.. كان شخصيه استثنائيه..!

لايشبه احد..

على الاقل انا لا اجد من يشبهه..

ردود فعله مفاجئه.. غير متوقعه.. لكنه احبني بحق.. وعشقني واقع..!

لم يكن هاوي وابتلعني ورمى عظامي للكلاب..

كان مسؤول..!

خاف بشرقية حاده علي وعلى سمعتي..

*في ليلة غاب عقله وعقلي.. بسِم نستهويه انا وهو.. شربنا حتى ثملنا.. حكينا معا في السياسه والدين.. في العائلة وعنجهية الأباء.. في التفرقه بين الأبناء.. اخبرته اني مستحيل ان انجب.. واخبرني.. ان مناه ان يرزق بطفل.. ويعطيه حتى يرضيه.. احتد النقاش.. ان كلينا.. غير منطقي.. انا لا اريد.. لأني اتذكر طفولتي المعاقه.. والخذلان واليأس.. لن انجب طفل مثلي.. اما يحمل صفاتي الوراثيه.. او يسقط من شي ويتعوق.. حتى الان لايوجد مايثبت.. من كان السبب الأعظم في سجني في كرسي بعجلات.. هل الجينات ام السقوط..!!

بعكسي عساف.. كان يريد ان ينجب.. ليمد بجذر اسمه في الدنيا.. وقال انه سيقوم بشجره خاصه لعائلته.. يفكر بانجاب عشره.. سيعاملهم بدمقراطيه.. لن يمنعهم من شيء.. سيعطيهم كل شيء.. لهم الحق في الاختيارات.. فقط سيكون داعم.. ويتفرج لانجازاتهم.. لانه يرى ان والده احتكره.. كان يريده مثل نواف.. يقارنه دائما به.. ومن وجهة نظره.. هذا ما أفشل مخططاته ومشاريعه..!

حلق بالكلام.. الى حيث حرية الإنسان.. حتى في اختيار دينه.. ومن يعشق.. كيف يأكل وكيف يشرب.. من يخالط.. ومع من يعيش..!

وصلت بنا الطرق.. للعشق والغرام.. حدثني عن ثنائيات فرقتهم الطرقات..

وان العشق أعلى مراتب الحب..!

هلوستنا.. وهمساتنا.. زادت من مسببات الأثم..

لعب الشراب لعبته.. وجاذبية كلينا.. وكانت ليله.. تجردنا من كل شيء.. اولها الخوف من الله..!!..

في اليوم الثاني.. بعد النشوه.. والقهوه المره.. اللتي ازاحت بعض من ثمالة البارحه..!

كنت اهيم عشقا..

وعساف كان ثائرا لاعناً.. يسب نفسه ويعتذر..

اخبرته اننا عشاق ولايقلق اكثر..!

كان حاسماً.. جادا ً.. اقسم انه يحبني فعلاً.. ولست نزوه.. كان محافظ علي والشراب هو اللذي لعب بعقله..

واخبرته اني اصدقه..

ذُهلت وهو يتصل بالسفاره ويتكلم عن كيفية عقد القران..

ربما بعقليتي الأوروبيه.. لم اكن اريد الاستعجال.. لكن بعقليته الشرقيه. اللذي يتملص منها.. وهو قابع فيها حتى النخاع.. لم يرضى ان اظل يوما بعد ماحدث وانا على غير ذمته..!

في تسائل مخيف لذاته..

ماذا لو مت اليوم في حادث.. سكته.. ماذا لو علم احد وتركتك تتمرغين بتراب فعلتي..

كلماته مازالت احفظها..

نعقد اضمن.. ولو ماعجبك الوضع ننفصل.. بس عشان ضميري سما.. انتي مانتي بنت هوى وبنت ليل.. والله اني صاينك.. من يوم دستي ارضي ونخيتيني.. بس الله يلعن الشيطان..)..

وتزوجنا ببساطه..في السفاره..!

انا بحريتي.. لم اجد اهميه في اخبار احد..

وهو كان جذر مقطوع.. مستحل الغربه وحده..!

عدنا للشقه.. ونتأمل العقد بأيدينا وضحكنا حتى الهلاك..

بالليل.. فتحنا شمبانيا تناثر رذاذها في كل مكان.. واحتفلنا بطريقتنا الخاصه الملتويه.. بهذا الزواج الديمقراطي البحت.. اللذي لايمت لمجتمع اباءنا وجدودنا بصله..!

******

نواف بالفندق.. منسدح.. ويتأمل السقف..

تسلطت صورة زينه ذات الثواني مخيلته..!

*دائما كان يسبق اخوته علميا ً وعمليا ً.. في رضا والديهم..

في المكوث في يمين والده.. والحضور له..

لكن عاطفيا ً.. فاهو بطيء كاسلحفاه متحصنه بقوقعه تضخمت بفعل العمل والطموح..

مابال امرأه متزوجه اصلا.ً.. محرم علي التفكير قدر أنمله بها.. تتباهى في رأسي..

ممتطيه خيلها..

متلثمه بشماغ كالصبيان..

مابال ارتكاز ظهرها على الحصان.. يبهذل حصوني.. ويضرب في قوقعتي الحصينه..*

استعدل.. وهو ياخذ قارورة ماي ويفرغها بجوفه.. غمض عيونه..

وسقوطها وسيف يقفز لاحتضانها.. يحضر في عينه..

فتح عيونه وصوتها وهي تقول : جديده انا بمشي تبين شي..!

نفخ بتوتر : اطلعي من مخي..

*مابالها علقت في ذاكرته.. بهذه الطريقه المزعجه..كل مايشعر به انطباع صورتها.. لاشعور.. ولا حتى امنيه ان يصل اليها..!..

استبعاد تام لفكرة الإقتران بها..

لكن صورتها.. .. ارتفاعها الشامخ على الحصان.. كفها الممسكه بالجام...كفها الاخرى على ظهر سيف الصغير..

شعرها يتضارب مع قوة الهواء في جدال خرافي..*

نفخ بتوتر..

دله عنها.. تناسى صورتها.. وانشغل بمصيبة جمان وسفرته وقضية مهره.. بس ليه اليوم ارجعت تداهمه كذا..!!

رمى علبة الماي الفاضيه من بعيد في زباله.. وارتفع رنين جواله.. رد : هلا..

سيف : وراه مالك بيان..مختفي..

نواف متضايق :توني صاحي.. سهران البارح ملجلج..ماعرفت ارقد..

سيف : وش فيك..

نواف يشب زقاره ينفخ دخانها :

ابد.. حايس بموضوع اختك.. مادري سيف احس جمان طولتها.. يعني قلنا قرصة اذن.. بس شكلها من بيعة اسهمها.. مطوله الشرده.. ولاهي ناويه تتواصل معنا..

سيف: ابوي يدري صدقني.. ولا ماكان حاط ببطنه بطيخ صيفي.. وهجد..

نواف:اعرف ابوي ياسيف.. صدقني حده معها.. الرساله اللي يقول خلتها مع هادي.. وبس..!

سيف وسوس: لاتقوله..

نواف :لو يدري على الأقل قال لي انا.. تعرف ابوي وحرصه على تأمين كل شي.. ونظامه فالوصايا.. والضمانات..

سيف : يمكن العلم عند هادي.. دامه.. ضبطها..

نواف بتفكير عميق : قلت لك.. لو الموضوع وصل لأبوي.. قال لي انا.. بس اذا الموضوع بصدر هادي.. انا اشهد ان مايدري فيه احد..!!!

سيف: المهم قم صحصح احنا متوجهين لمزرعة بومشاري.. ننتظرك..

نواف:ارسل لي مشاري.. بقوم اتروش.. واشوف وضعي..

سيف : تعال لاتقعد تخاوي ابليس..

نواف قبل يقفل:يصير خير..

* البارح تأرق في جمان..

واليوم صحى على صورة شامخه تمتطي حصان..! *

*****

هادي بعصبية:

ام بيان الله يرضى لي عليك لاتصلت ردي.. ولاوالله لي تصرف ثاني معك..

جمان: الله يهديك ياخيي والله كنت نايمه والجوال صامت.. اعذرني..

هادي: لاتصمتينه.. تراك بذمتي لمن ترجعين.. ولا بحط العلم عند عمي واخوانك..

جمان : لاوالله ماتسويها.. خلاص توبه.. الجوال كله عام..

هادي : سويتي مواعيدك بالمستشفى اللي ارسلت لك عنوانه..

جمان: ايه.. وخذت بكج كامل على المتابعه عندهم.. وحتى الولاده..

هادي بتوتر يفرك جبينه: ام بيان ارجعي قبل ولادتك.. لاتصعبينها.. وترى شاهين مذبوح.. وانا وقفت على الموضوع.. هو صدق اللي قاله.. شفق عليها.. ووقفه انسانيه بوفاة امها بالمشفى ومامعها احد.. لاتاخذين الامور..

قاطعته: قفل الموضوع..

هادي : تراك مب محجمه الوضع والله لو تجيك الولاده لحالك.. تموتين انتي وبزرك..

جمان بعصبيه : هادي..!.. لاتفاول..

بعقلانيه: مافاول.. بس ذا واقع.. واشوفك تبالغين.. عاقبي زوجك وانتي بحضن امك وابوك.. ليه تمتحنين عمرك بغربه ووحده.. تراك تظلمين نفسك وبناتك.. والله بوفهد مايستاهل.. نادم ياجمان نادم.. وانا اللي اعرف الرجال من نظرات عيونه..

جمان بصلابة:ماهمني.. تقول ندمان.. ماندم الا وقد فات الفوت ياهادي.. ولافات الفوت على قولهم ماينفع الصوت..!

*****

بعد شوي.. بالمزرعه.. مبسوطين.. سما جالسه بعيد.. عن القروب.. في الأجواء النهاريه الخارجيه..

اللقت نظره سريعه على سيف الصغير..

حاولت ماتدقق ولاتحدق.. ولاتبدي لطف وابتسامات مجامله قد تغدر بها وتجعلها تبكي..!..

وهذا الطفل ايقونة خيانة عساف.. اللذي تمناه وانجبه من غيرها..!

مشاري شايل سيف.. : مهره مايشبهك.. كله التوم التعيس..ابوه وعمه..

مهره تصف علب كيك صلحتها قبل تجي :

كلن يقوله..!

سيف يرمي حطب في مشعل كبير:

تعالي ياسما.. خليك قريبه من المشب.. برد عندك..

ردت باللطف وبانجليزيه:انا ارتدي قطع كثيره من الملابس.. سأستمتع.. بالتأمل قبل المغيب..

مشاري بمداخله مايمل منها: سما عربي..!

بخفوت: ابشر..

سيف الصغير ومشاري شايله :شفت كلب كبير هناك.. يخوف..اووبه قولي مايعض ..

مشاري ضحك: وشوو.. اوبه.. من اوبه

فارس :ابوي.. خلاص علقت معه اوبه لانه يسمعني اقوول يبه..

مشاري متخرفن على سيف وكيف مأنق بملابس شتويه:

مايعض تبي اجيبه لك..

سيف : لا مابيه.. انا ابي جاجه.. اصان..

وشهق.. : بيتنا .. شفت سندووووووب حلوووووو.. (ويأشر بكفوفه وهو يضمهم) صقيييير..

ضحكت مهره: ليتك شايفه.. اول ماشافه.. تمنيت اني سنجاب ومنبهر فيني..

فارس : الخبال مايمرح بالخلا.. ظل يلاحق به.. مثل اللحوج اللي يلاحقون الضبان والجرابيع..

سما التفتت.. بعد مافهمت ولاشي من جملة فارس.. وبصدمه: فارس شتقول..؟!. مافهم عليك..

فارس حط كفه على فمه ومسوي مصدوم : أو أم جي.. احجي فارسي اني.. كيف اترجم ياسما.. حسستيني اني اتكلم المهريه..

سما :وضح لي.. تراي سعوديه مثلكم.. بس انت تتكلم بشكل صعب..

مشاري غمز له وهمس: فارس بسط لسما.. انا فاقع مرارتها.. ابيها تتكلم عربي.. اكثر حكيها انجلش..

بدا فارس يشرح لها.. وفي داخله يحس سما تنكه مع انها ذكيه بقوه..!

سما حاولت تلتهي بفارس وتسمع بعض مصطلحاته وتعيدها معه.. وماتبي عيونها تروح لسيف الصغير..

ماتبي تركز على الخيبه والقهر..

ماتبي تذوق العلقم.. اللي قدمه عساف بطبق صادم.. وصلها بعد وفاته..

ومن خلال تحاشيها.. له..

وقعت عينها على نواف..

وهو ينادي : يامشاري.. ياعيال..

*كان دخول نواف مربك..كل لمحه منه قلبت موازيني.. وهزتني.. لمحاته اللتي خطفتني من ذاتي.. آااااه ياعساف.. كنت عاشقه مجنونه بك.. *

هي ثواني وتلاشى الشبه..

وعدت للواقع..

احسست ان نواف لايشبه عساف ابداً..

ذاك الشغوف.. المشاغب..

ذاك المجنون.. اللعوب..!

نظراته اللتي تصوب نحوي كاسهام تتراشق نحو قلبي..

ابدا لايشبه نواف..!

مذ سمعت عن تواجد نواف بلندن.. وانا اتحاشى تواجدي معه في مكان.. خوفاً من الشبه.. لاني كنت اعرف رغم اني لم اللتقيهم معاً.. انهم نسخه والغالب يخطئ بينهم..!

لكني تعجبت..

كيف يقولون انهم توأم متطابق..

انهما متطابقان لمن يعرفهما سطحياً.. لكني وقد غصت في دواخل عساف.. ارى ان احدهم في الشرق والاخر غرب.. *

قاطعتها ايماءته.. بتحيه: كيفك ياسما..

ابتسمت : الحمدلله..!

مهره كانت تحدق فيها.. تحاول تشوف مدا ردة فعلها.. وهي اللي متيقنه من اسلوب سما في الكلام عن عساف انها تحبه..

حاولت تلقى شي مختلف.. وهي تناظر نواف..

بس سما رجعت لشرودها..

وبس قطعته وهي تلتقط قطه صغيره مرت عند رجولها.. وتحطها بحضنها.. وتمسح عليها بحنية..!

*لو كانت تحب عساف.. كان اهتزت من وجود نواف..

مثل رعبي لما شفته.. وفكرته عساف..

يمكن لانها تدري عن مسئلة التوآم.. وانا كنت اجهل.. يمكن..*

همس لها سيف: وانتي مسويه مكتشفه الذره.. شوفي سما.. لاعبرت نواف.. ولا هزها شوفة ولد عساف.. واضح ان مابينهم حب.

مهره بهمس: غريبه..!. احس في شي غلط.. صدقني البنت هذي مفهيه.. المفروض ردة فعلها غير..!

سيف يعبث في المشب وبخفوت:

مافاهي الا انتي.. نواف يختلف عن عساف..في عدة نقاط..

مهره بنص عيون : بالشخصيه والاسلوب والادب والاخلاق..ولا الخشه وربي نفس الخشه..!

سما شارده وتداعب شعر القطه.. وهي تبعد امتار بسيطه عن القروب وجالسه على عتبه رخامية..

لما سيف كان يلعب.. وانتبه للقطوه عندها.. قرب منها.. وهي مو حاسه..

حط كفه لتلامس يدها مع شعر البسه.. ويقول: حلوووه كتووووه..

ارتعشت وقلبها يخفق بشكل مخيف.. مع قرب الصغير..

عينها على انامله.. وهو يمسح على البسه..

تسارعت انفاسها.. وبدت واضحه.. وكأنها ركضت كيلوات دون توقف..

سيف ينزل راسه.. ويطل بوجهها وبخفوت : افيك..؟! (وش فيك)..

رفعت عيونها.. له.. لما هذا الصغير اشعل كياني كما يفعل والده..

مفاصلي ترتجف.. وكآني كبرت في السن فجأه.. اصبحت كهله.. عجوز..لا استطيع حتى رفع كفي نحوه..

لما اشعر ان قلبي اُقتلع.. وان صدري به جاذبيه تفوق الجاذبيه الارضيه..!

ابتسم..

ليخلع من عمري سنين..

ابتسم..

ورف قلبي..

كاحمامه..!

ابتسم..

وگأنه ترياق واكسير حياة..!

خيل لي.. ان الصغير عليه هاله من النور.. بعث في نفسي دفئ يشبه دفئ الآيات القرآنيه اللتي ينفثها والدي احيانا على رأسي.. لو عجزت المسكنات والمهدئات على كبح جماح انهياراتي..!.

نعم.. كأن في عينيه.. قل هو الله احد.. والفلق والناس..

اغرقني بنعيم الكوثر.. واعاذني من كل مايؤذيني..!

مايحدث في كياني غريب.. والاغرب.. روحي علقت في حنجرتي..

اريد ان اهمس.. اتكلم.. لكني ابتسمت وعيناي تتبلل بدموع غريبه.. . وانا اللتي لا اقرب الاطفال ولا ألاطفهم.. اخذته بتردد لحضني .. طوقته..

ضممته.. وارخيت ذقني على كتفه..

شعرت اني ارمي ثقال السنين فوق اكتافه..

هذيت في داخلي : لما رحل والدك وتركنا.. لما ايها الصغير..!

سيف باستكنان عجيب ظل بحضن سما..

وهي مغمضه على كتفه.. وتستنشق ريحته..!

خيل لها انها ليست المره الأولى..!

هلوس عقلها الباطن.. انها حضنت هذا الطفل كثيرا.. وجدته في تجويف روحها..

هذا لأنه ابنه..!

هذا لانه أخ فقيدي..

لا اعرف تقدير الأعمار.. لدا الأطفال ابداً..

لكن ربما ذاك المتوفى..

كان سيكون قريب من عمره..!

ترى حين دفن عساف ابني.. مالأسم اللذي اطلقه عليه..!.

*******

مر اليوم بالمزرعه.. واجتمعوا الشباب.. تعالت ضحكاتهم.. وسوالفهم..!

سما بشكل غريب.. امضت اليوم مع سيف.. لعبته.. ورته شغلات بالمزرعه..

كان شكلهم يجنن لما هو يقول كلمه وماتفهمها ويجلس يعيد فيها.. ويبيها تفهمها.. وهو اللي مو عارف ينطقها صح.. ولاسما اللي متمكنه كويس في كل المصطلحات.. لما يلجئ لمهره وبضجر: ماما.. اكول لها دُبعه ماتعرف..

سما بتسائل وابتسامة متشوقه: بالله مهره وش يعني والله مافهمت..

مهره ببتسامه: قبعه ياسما.. كاب..

سما بضحكه شفافه :طيب كاب اسهل ياسيف.. وش فيها القبعه..

سيف بكياته: ابي احط السندوب فيه واخبيها على راسي.. عسان اوديه سوفه ديون..

سما : مين ديون اللي متشوق ياخذ السنجاب لها..؟!

مهره بحنين : اختي زينه..!

نواف ورغم انسجامهم في البالوت.. اسم زينه تفلتر من كل الكلام.. ليعبر محدث صفير في اذنه..

ويسمع مهره وهي تقول وتجاوب سما: اكبر مني بسنتين..

ولما قالت سما: جميله مثلك.. ومهره تقول : واجمل مني بعد.. هذي زينه.. مايشابهها أحد.. زينة شكل.. زينة روح ياسما.. ليتك تشوفينها..!

فعلاً نواف لعن نفسه على التركيز في الجُمل..وكيف شرد عن اللعب.. وحسين بخبث يداعبه:

مِن شافونيّ اضحك بالچذب كالوا عليّه تعافه !

مخفيّ الحزن جوة الگلب! همزيّن محد شافه..

عليِك الله وامان الله نواف تحجي.. هسا تريد تقنعنا ماوگعان بالحب يالجلب..

ضحكوا الشباب..

ومشاري : نواف ذيب.. محصن.. گلنا بنوكع الا هو..

نواف بنص عيون لحسين :

خلينا الحب لك ياحسين.. سنه تحب وسنه تبكي على الفرقا..الله يبعدنا عن مصابك..!

سيف : من الخبله اللي تعرف حسين وتستمر معه..

حسين: اي ارقصو على جراحي والّلوجع.. نعنتن الله عليكم.. اني وفي.. بس ماطيح الا بناس زبالة..

مشاري بعبث:لو تطيع شور اخوك.. خلك سطحي ولاتتعمق.. وش عاد الناس لقت من الحب الا العذاب..

سيف يزيح باصابعه السيجار عن فمه : اعقب يامشاري.. الرجل شريف ونيته ارتباط وزواج.. ماهو مثل اللي يتنقل بين الزهور.. خلك اسد وبطل حركات النحله.. يارخمه..

ضحك نواف :

الا بجوازك يامشاري حاط مسلم ولامسيحي على الوالده..

مشاري :جوازي سعودي يا**.. اسلام اباً عن جد..

حسين: هسا الجواز الاخضر عرفنا انك مسلم بيه.. وجواز اللبريطاني وش حاط..

مشاري : انت وش شايفني ياحيوان.. ماشي ومعلق الصليب على رقبتي.. توني مصلي معكم ياكلب..

نواف يوزع الورق : الإسلام ماهو بس ديانة تعلقها بالجواز يامشاري.. فيه حلال وحرام.. وتجاوزاتك.. تحت مسمى الحرية.. تراها محرمات..

مشاري بعصبيه : لاتعكرون جوي.. تراي مبسوط.. واطلعوا عن اطار الجدية وخلكم بالمزوح..!

ياسمين كانت منشغله على جنب في تنظيف قطعة اثرية.. بمواد ريحتها مره قوية.. لفت انتباها الحوار..

وبحب مخبى داخل قلبها لمشاري.. تعرف كيف يتوتر من المواضيع هذي.. وتدري عن محاولاته في كبح نفسه الأمارة بالسوء.. ومايقدر.. بحكم البيئه والمكان اللي عاش فيه والعادات اللي اكتسبها من مجتمعه ومن امه..!

ياسمين : سيف.. عطني وجه اشوي..

سيف وهو يفرد الاوراق : ماخلصتي..

ياسمين..: فيه تكلسات عالقه.. وخايفه احط عليها نشادر.. يعدم الرسم على التحفه..

سيف : جيبيها اشوف..

قامت.. حط سيف الورق ومسكها بقطعة قماش..

قال : حاولي تذوبينها.. حطي عليها حمض عضوي.. الستريك كويس..

حسين : انتي صعبتي عليج اللأمور ياسمين.. اني اشوف اللتوحفه.. اللي يكون قالبها نحاس.. يكفي تنظفيها بلخل والليمون..

ياسمين توسعت عيونها :

خل وليمون.. من جدك.. مادري شايفها دلة رسلان.. هذي حقت عجوز.. وقعتني على ورق حتى ارجعها سليمه.. لو تلف فيها شي تبي تعويض..

سيف : ترى ينفع احيان.. بس حسين باين القطعه كانت مخزنه بشكل غلط ومكان رطب.. يعني حتى الوانها انعدمت..

مشاري عقد حواجبه ورحمها حتى بالإجازات تشتغل :

ياسمين اتركيها ماهو وقتها.. انبسطي.. لاحقه على الشغل..

ابتسمت :لما انجح في ترميم عشر قطع اثرية.. ويعطوني المختصين تقيمات حلوه.. بطور من نفسي وبيعطيني البوس منصب بالورشه..

ضحك سيف : يابنت لاتحمليني ذنبك.. انبسطي اليوم اجازه..

ياسمين تاخذ القطعه: ماراح اخذ المنصب الا بتعبي سيف.. ماراح اصعد بالواسطه..

وقعت عين مشاري على اصابعها المتأثره بالمحاليل واظافرها كيف متغير لونهم وهي تتركهم وتروح..

ابتسم سيف :والله ياسمين شعله..ماشاء الله عليها..

(ياسمين تشتغل في ورشة سيف.. تخرجت من نفس جامعته.. كان حاضر كاعضو في لجنة بالجامعه.. يطلعون على تجارب عمليه لشغل الطلاب.. لما تعرف عليها واعجبته ثقتها بنفسها..ومثابرتها وشغلها.. عطاها كرته.. ووعدها بوظيفه بس تتخرج.. وهذا اللي حصل)..!

دخلوا فارس وعزيز.. وشايلين علب البيتزا.. فارس :لاتقولون خالي وليد وماريا مشوا..

سيف : ايه مشوا.. دوامهم مبكر بكره.. وانتوا طولتوا بالعشا..

فارس يحط العلب على الطاوله :

المطاعم بعيدة عن مزرعة عمي راجح..

مشاري : لو مسوينها باربكيو افضل.. انتم ماتحمسون..

مهره: برد بره ورعي يمرض..!

سيف راح لفارس : فالس جبت لي بتاتس.. فارس ياخذ علبة وينحني له ويفتحها : ايه شوف.. يلا تعال اقعد واكلها..

وجلسه ع الكنبه وقرب منه طاوله صغيره ورتبه وفتح له الكاتشب...

عزيز : هو ماعطلنا الا هالبطاطس.. مافيه بمحل البيتزا.. رحنا خذناه من مطعم ثاني..

سيف يداعب شعر سيف : يستاهل العنوه.. ذا السمي..

سيف رفع راسه له بتكشيره وابتسامه وهو ياكل..

مهره والاطار الذي تعشقه.. فارس كيف مهتم بسيف.. وسيف كيف يحن على سيف.. الثلاثي اللي تموت فيه شردت فيهم.. وقلبها يردد ياربي لاتحرمني منهم.. *

في نهاية السهره..

سيف كان نام.. في حضن مهره.. فارس بعد مالبس جاكيته وقبعته جا عندها : هاتيه..

سيف عطاه مفتاح السياره: شغل السياره ابوي.. والتدفئه انا اشيله..

خذ المفتاح وطلع..

مهره حركت رجلها : اففف نامت رجلي.. حمله بخفه وحطه على كتفه.. وكانت مهره مدفيته.. مسك يدها وساعدها توقف.. :لاتنومينه على رجولك يعورك..

لبست جاكيتها وبهمس: يعني سيف بعد هالفرقى ود انومه بداخل ضلوعي مو بس حضني..

سيف باغتها وخاصه مايمهم احد الاغلب مشى مسكها من خصرها وهمس في اذنها :

عساك ع القوه.. بس خفي لاابتلي فيك وفيه..

ضحكت وهي تبعد عنه.. وتشيل شنطتها..

جات سما معها كيس.. مدتها لها: مهره سيف جمع ريش الطاوويس.. اخذيها.. لايصحى ويدورها..

ابتسمت وهي تتبادل معها بوسة خد:

حيل انبسط معك ياسما..

ابتسمت : وانا بعد.. جيبوه دايم.. خلاص صار صديقي..

ابتسم سيف :ابشري.. وانتي تعالي له. ياسما لاتخلين..

راحت وراه .. وطالعت وجهه سيف النايم.. ومسكت يده وباستها : كيوت..!.

.......

يتبع .....

بعد شوي في السياره.. فارس ورى.. والسماعات بذنه.. ويكلم ذياب واتس..وفي صفحة ثانية بلقيس..

راس سيف على حضنه..

مهره كانت شاردة من النافذة.. تبعثرت شوي من مشاعر سما لسيف..

وكيف مشاري متعجب.. وهو عارفها ماتجي صوب الأطفال.. وش معنى سيف..

في زاوية شك انحصرت..

ماذا لوو؟!..

وهل ممكن تكون على علاقة عميقة بعساف والنتيجه سيف..

ولو هي امه..

هل هي على علم.. وان وجود سيف عندها بتفاق من عساف ومنها..!

لا مستحيل..

هي بس لاطفته.. لانه ولد عساف اللي حملت له مشاعر بيوم من الأيام..

بس الواقع.. سما مستحيل تكون ذوق عساف..!

عساف كان شقي.. لعوب.. مليئ بالحياه..

عكس سما تماما.ً..!

وكاجتهاد من ابليس.. دس لها موقف مشاري لما جات سما تاخذ من الحلى اللي مهره مسويته.. منعها: ماتصلح لك.. خوذي شي ثاني..

مهره باستغراب : ليه.. وش فيها..خليها تذوقها؟!

مشاري : فيها فول سوداني.. سما معها تكسر فولي..!

مهره انقبض قلبها وهي تتخيل الموقف ويزداد انقباضها.. لانها تدري ان سيف ولدها معه ذات التكسر من وقت انولد..

قطعها من التفكير.. انامل سيف وهو يقرص خدها وبخفوت وصوت دافي : وش فيك شارده.. وش الطواري..؟!

تنهدت وابتسمت : ولاشي..

مسك ذقنها ولف وجهها له.. وناظرها ورجع للطريق : ولاشيك.. فيها اشيا كثير.. اعرفك يامهره من حسك..

ضحكت وهي تمسك يده : فيني النوم بس.. صاحين بدري ومن متى واحنا نهجول..

سيف :اكيد مافيك شي..

مهره ومحتفظه بيده:اكيدين..

خذ كفها وباس اناملها.. وظل متمسك فيها.. ويسوق بصمت..!

*حين لم يفلت سيف كفي.. اعطاني دعم روحي اني معك.. مهما تعمقت وساوسك وخوفك.. يدي لن تتركك ابدا.ً*!

*****

*لا تجادلني في حقوقي بك انت لي وانتهى!.. *

ياسمين كانت تغسل بعض الادوات.. لما مشاري وقف عند فتحة المغاسل واسند كتفه :

ياسمين انتي لما تطلعيني من وهقاتي.. تتعمدين.. ولا الله خلقك لي مخرج..

مارفعت عينها:

مادري وش تتكلم عنه..الحين ورا ماخليت عزيز يوصلني.. شقتي قريبه من شقته..

وبعصبيه قالت:اففف ليتني جايه بسيارتي افضل..ماحب انربط بمكان..

قرب منها ويراقب رجفة يدينها وتطيح الاداة بالمغسلة.. رفعتها واسحبت الفوطه وتنشفها وهي تصفها بالعلبه المفتوحه..

مشاري بشقاوة جا وراها.. وهمس قريب من اذنها: جيسي ماجاوبتيني..

ياسمين مستمره ترتب اشياءها :

مشاري ابعد واترك مسافه تعرفني ماحب هالحركات..

مشاري :طيب انا احبها كيف..؟!

ياسمين : مشكلتك..

قفلت اشياءها بعصبيه.. والتفتت حاولت تبعد عنه بس حاصرها..

بغضب:مشاري وش فيك.. ماخذ شي..

طالع عيونها.. :ماهي اول مره حد يزبد لي في اسلوب حياتي.. والقاك تنقذين الموقف..كلهم ماينتبهون.. بس انا مركز..

ياسمين:عادي يعني.. يمكن لاني اعاني من نفس مشكلتك.. ويوجعني النقد.. ومكتفه.. لاني عارفه اتغير.. ولاعندي القناعه..ابوي سعودي وامي من هنا.. ومسيحية...في اشياء مقتنعه انها عادي.. وهم مصرين انها عيب وحرام..

مشاري قرب من اذنها ويهمس: ليتهم يفهمون مثلك عاد..

دفعته من صدره قبل يبوس خدها.. لما داعبت انفها ريحة الواين من فمه:

انا افهمك.. بس ماشوفه صح..انا اقصى اخطائي اني ما اتحجب.. واختلط في العمل وفيكم كأصدقاء.. بس مشاري العلاقات اللي انت فيها حرام.. والشرب حرام..الشغلات هذي مو بس حرام كبائر.. ولاتقول ماتقدر تقطعها.. تقدر.. دامك مسلم قدام الله.. ليت تحترم ديانتك..ولاتقول البيئه.. هذا سيف سنين هنا ولاعمره شرب..!!

مسك معصمها ورفع كفها بالجدار وبانفعال من بين اسنانه : ياااسمين..!!!

لاتقارنيني بأحد.. سيف مايسويها.. بس هذا عزيز يسويها.. وليد ياخذ مزاجه احيان وهذا هو خال سيف اصابعك ماهي سوى..

بعصبية:هذا انت قلت خاله.. وهالشي ماخلاه يقتدي فيه.. ويسوي مثله.. فا انت لاتعلق اخطاءك على بيئتك.. ابوك لبرالي وامك مسيحية.. بس انت ايش..؟!..

مسك معصمها بقووه وبعصبية:

ياسمين ريلاكس بيبي.. وش فيك شطحتي.. لاتستشرفين على مخي..

بان الألم في وجهها وهي تكتم تآوه كاد يطلع من شفايفها.. وتحرك كفها تبيه يفكها..

عقد حواجبه..

وهو يرفع عينه لكفها المرفوعه.. ويمهل ضغطه.. وهي تسحبها..

بخفوت متوجع ونادم:ما انتبهت آسف..جد ياسمين سوري..

احبست دموعها وهي تشيل اشياءها وتطلع للصالة الجانبيه..

جلست على الكنب.. وهي تسحب كنادرها وتفسخ شبشب الحمام.. دخلت رجولها بالجزمه.. وقبل ماتربط الخيوط.. كان جلس قبالها ومسك كفها : اتركيها..

تلفتت بعيونها وبعصبيه: وين سما لاتقول مشت..وظليت انا لحالي..

مشاري يطالع حروق وانتفاخات طفيفه في كفها ومعصمها ببرود: ماانتي لحالك.. انا معك..

حاولت تسحب يدها :ياشيخ..!

تمسك فيها من جهة سليمه: ياسمين اركدي.. سما هنا.. بس طالعه فوق مادري وش عندها.. والحين قولي لي.. عاجبك هالحروق.. بزر انتي..

ياسمين : بقفل الحمض وصاد يدي.. تخف.. ماعليك..

فاجئها لما خذ مرهم جنبه.. وارغمها تفرد يدها وهو يوزعه..

بخفوت موجوع يناظر حروق المحاليل فيها.. واظافرها كيف قصيره.. ومعدومه..:جيسي وش حادك..تدرين اني اقدر اساعدك بوظيفه ارقى والطف.. وسيف ممكن يتقاضى ويمسكك منصب بدون هالضرر ذا كله..

ياسمين تطالع كفها: مابي اصعد على ظهر احد..انا لما وافق ابوي اظل هنا.. وعدت نفسي ابني نفسي بنفسي.. ما احتاج دعم... وسيف ماهو مقصر معي بشي.. المفروض ما استقل عطاءه لي واطالب بأكثر..

مشاري وعينه على وجههاوكفها ببطن كفه: وابوك يرضيه كذا..

رفعت عيونها: ابوي عصامي.. ومع اني ابتدي من الصفر وانجز واحقق..وبعدين انا اخترت اعيش مع امي هنا.. وابوي الزمني اني اثبت نفسي..

مشاري بتهكم : لما يجيكم ابوك.. مايشوف ايدينك.. راضيه اناملك الناعمه تنهري بالمحاليل ومواد النحاس والحديد..

سحبت كفها منه وبعناد:ويبوسها بعد.. ويفتخر فيني.. مشاري ماسمح لك تلوم ابوي.. لو عنده ماديات كفاية دعمني اكثر من دعمه اللي يجيني. بس عارف الحياه كيف غاليه هنا.. وانا وحده مااستغني عن امي.. وامي مارتاحت بالسعوديه.. ولاانا ارتحت..

مشاري :شوفي من رايي الحياه مع ابوك بتكون افضل.. عن قناعة اقلك حياة البريطانين جديه وجافه وعملية بحته.. بعكس البيئه مع ابوك.. جربي بالصيف.. روحي عنده و..

قاطعته : لو رحت.. جدي قايل يبي يزوجني.. لعبد الرحمن ولد عمي.. عشان يحدني على الجلسه هناك..لان شايف ابوي ماهو شاكمني..ومقعدني عنده..بيضغط على ابوي ويسويها..

مشاري بغضب: نعم..!!!! . من باقي يفكر كذا..

ياسمين :جدي ماقدر على ابوي.. يبي يجرب حضه معي.. قم خلينا نمشي.. امي ماراح تنام الا لو جيت..

قالت كذا ورفعت جزمتها على الطاوله تبي تربطها.. بدت وبانت لمحت الم بوجهها..

مشاري مسك خيوط جزمتها وربطها بخفه.. واشار لها بالثانيه ورفعت رجلها..

بخفوت وهي توقف: ثانكس..

مشاري في لحظة صمت.. شال جاكيتها.. وساعدها ويحاول ان الكم مايصيد جروحها..

سحبه قدامها واللتقت عيونهم..

عيون ياسمين خضراء شفافه.. تقعان فوق بشرة برونزيه..

شكلت مزيج متنافر لذيذ كالقهوة والسكر..

بشعر متموج.. بني او رمادي.. او اشقر.. غريب وكفى..!

ملامحها بريئه.. هادئة..!

ابعدت عيونها عنه.. وهي اللي تغرق في مشاري.. تعرف محاسنه.. اكثر من نفسه..

قلبه الاأبيض الصافي يلامس روحها..!

رغم شقاوة طباعه وانفلاته..

لفت شالها حول رقبتها.. واغلقت شنطه جلديه فيها التحفه والاغراض.. وشالتها على كتفها:

يلا مشاري.. شوف سما..

بخفوت :تمام..

*****

يوم جديد..

صبحا بتحقيق: ودامها رحلة علاج مثل ماتقولين وراه ماخذتس معوه.. الوكاد انه تسذوب وش فيه يعالجه بمصر..

زينه : ومن قالك جديده ابي اخاويه.. رايح مع ابوه.. عاد وش بيعالج وش يدريني.. يمكن عقلوه المصدي..

صبحا تتوقف عن هز منسف مليان حبات عدس : لايكون جايه الخبيث هو عندهم وراثه الله يكف الشر ويدفع البلاء..

زينه تكب سطل ماء على البلاط.. : مافيه خبيث..لو المرض اعمى مادخل لعبد الاله جسد.. عوذة.. تهرب منه حتى الجن والعفاريت.. من شين نفسه واطباعه..!

صبحا:هالحين انتي وراه ماتسنعين وتدورين لك مدخل مع رجلتس.. والله ماعلموكم الاولين.. رجالهم بجيوبهم.. تشوفينه رجال ترعد الرجال من طاريه.. ولاصار تحت جناحها..كنه بزير.. يدور الحضن والدلال..

زينه تجمع الماء بشطافة:

والله ياجدة هذوك الرجال.. مب عبد الاله.. المهم ابيك عون.. ترى ابي اخلص من انفصالي فيه.. قبل يجي.. وابيك تخاوين للمحكمه.. تواصلت مع محامي وعرضت مشكلتي.. قال لي اني طالعه من ذمته..باقي اخلص الأوراق بالمحكمه..وان الله وفق.. خلصها الشيخ بطلاق.. ولاعاد خلع.. وعندي كل شي رسايل جوال مطلقني فيها.. كم مره اخذ تقارير من المستشفى حق ضربه المريض..وعاد في اشياء.. بخليها بنفسي.. ان عقدها الشيخ قلتها.. وبيحكم لصالحي..

صبحا تطالعها بفجيعه وهي تحط المنسف جنبها.. :

لابالله ما انتي صاحيه.. اعقلي يازوين.. واركدي.. وحتى فلاح ماهو رايح معتس ولاصاير والي.. مايرضى على سند وعياله بشي.. حطي عقلتس براستس.. ودامه بعيد.. ادمحي الجفا.. وخلي هالمركب يسير..

زينه رمت الشطافه بجزع :

يلعنه مركب اللي يسير فيني بعبد الاله.. جديده يشك فيني.. يطعن بشرفي.. ماطيقه..ماهو حتى شخص عادي وماحس بمشاعر تجاهه.. الا شخص اكرهه وماواطنه.. عاد سايرتك وقلت بكره تزين... وبكره يتغير.. بس عاد تعبت وانا ارتب اعذار برف مايل.. ياجده عبد الاله عوج.. وانتي اعرف الناس انه اهله زوجوه عشان يعقل.. ويكف رجله عن خرابيطه وسفراته..

صبحا:وهماه قعد ولاعاد سافر.. من بعد ذاك الحادث الغبر اللي صار عليه بسفرته قبل يملك عليتس.. انتي عاد لاتصير رجلتس بالارض وراستس بالسما.. وتعلين عليه.. يا امك انسي الماضي.. والرجال يحبك.. ولا اهقى انه راجع بدروب الشينه..

ضحكت بتهكم مرير :

والله لو بيده ياجده.. كان ماخلا خرابيطه..(ورفعت عيونها وكنها تناجي ربها) بس ياربي لك الحمد والشكر يالمنصف انت.. اللي ضربت عبدالاله.. في الشي اللي يماري فيه بحرامك.. ويهايط فيه ومايخافك.. ياربي كانوا يدرون انه هاتك حدودك.. وخذوني طاهره اخافك.. وحلت بيني وبينه بقدرتك يارب العالمين..

الجده عقدت حواجبها : انتي وش تقصدين.. وش في بطنك يابنت غازي..؟!

زينه حطت عيونها بعيون جدتها.. وبجدية:

وش ضنك ياجده اني ماعرف بالحلال والحرام.. واني عارفه ان طلقات عبدالاله علي واقعه..انا قاعده لانه الرجال مافيه يقرب مني.. ولافيه ياخذ حق الرجال من حرمته.. ياجده عبد الاله من صار عليه الحادث ذاك.. وهو جاته اصابة.. يعني لافيه من الرجوله علومها ولا سلومها.. وسلامتك..

واشاحت وخلت جدتها.. تحط يدينها فوق راسها من هول الواقعه.. :وووي وووي.. الله واكبر.. الله عليك ياسند.. ماخذ بنتي لولدك ال******... الله لايحلك ولايبيحك لا انت ولاولدك..

واسترسلت وهي تتفطن بالفاجعه:

المقروووووود شبيسوووي بعمره..

وصاحت بانهيار : زووووووووووين...!!!!!

******

في المساء وبعد المغرب.. صحى هادي.. بصداع قوي..جلس وسحب جواله والقى نظره ومالقى اي رسالة ولامكالمة من بلقيس..!

من يوم المطار وهي حامقه عليه.. وشايله نفسها..

لقى مكالمة من نواف.. اتصل عليه..

نواف: وينك يارجل تعبت وانا اتصل عليك..

هادي يفتح حبتين بنادول.. ويشربها مع ماي :

نمت.. هلكت.. ابوك قاعد يحط حرته بالشغل.. اليوم من صباح الله بموقع البني..شوي ويشيل طابوق مع العمال.. ويليص اسمنت..

ضحك نواف :اف..وش فيه.. مجتهد بزيادة..

هادي : ترى ماهو مزح نواف.. عمي سعود محترق دمه على وضع البيت.. وكلكم ما انتوا حوله..

نواف بتبرير : طيب هادي انت تدري.. اني مافلحت بشغلة امريكا.. وهنا لقيت اللي نبي واحسن من هناك.. بخلص شغلتي مع المكتب وبجي..

هادي دعك جبينه:والباقين يانواف.. ترى عمي ساكت وضاغط على اعصابه.. وروحة ام بيان قصمت ظهر البعير..

عقد حواجبه:هادي.. تبي تقنعني ماعندك خبر عنها.. ترى هالشي ماهو داخل راسي ابد..

هادي بكذب متقن:

لو ادري كان بلغت عمي.. ماراح اخليه كذا على نار..

تنهد نواف: وهالخبله.. من جدها حد يخلي عياله ولايسئل..

هادي طالع ساعته:بقوم اصلي المغرب قبل يطلع الوقت.. وش فيك داق..

نواف : ارسل لي نموذج عقد عمل pdf.. كان عندي وضيعته..

هادي يقوم : تمام.. سلم لي على الجميع..

نواف : يوصل..

توضى وصلى كان يلبس ثوبه.. لما سمع صوتها المبحوح وهي تلاسن بحده..

خذ جواله واشياءه وقبل ينزل الدرج سمع صوت انفال الطفولي بغضب: والله لو قلت لك ادفعي لي ريال هذيك الساعه اعترضي..

عايلة هادي.. امه..

هو الكبير.. بعده النور متزوجة وعندها ثلاث عيال.. وبعدها ضحى برضو متزوجه وعمرها عشرين سنه..

والجعدة(انفال اصغر خواته بسادس).. كبرت على يده بعد وفاة ابوه..

سمع النور تهاوشها: منك لله.. تدرين ان هادي ماراح يردك..وتستقلينه..

ضحى : انفال.. استحي على وجهك عاد.. ماراح تلبسين كل هالكنادر اللي اخترتيها.. الثنتين نايك متشابهات.. شيلي وحده وخلي وحده..

النور بانفعال:ماهو بس النايك ياضحى.. انتي شايفه حاطه بالسله اربع..اديداس لحالها بست مية.. غير الترنغات.. عنبوك الفين وست مية بطلبية نمشي.. وش هالزود..

انفال بلسانة : النور.. ادحري ابليس عاد.. هذا انتي ماتشرين لعيالك الا كل شي زين ماحد جا قالك شي.. لاتدخلين.. ولو جيت طلبتك شي.. اضربيني بجزمتك على راسي..

النور بغضب :

ياحيوانه لما هادي مايرد لك طلب.. المفروض تقدرين ذا الشي ماتزيدينها.. ياخي فكرو فيه.. متى بيجمع له شي.. متى يكون له كم قرش ويعرس.. ويشوف هو حياته..

انفال تمد الأيباد لضحى وتتجاهل النور:وش احط هنا.. ضحى.. ابيه الدفع عند الإستلام..

النور: ضحى لاتطاوعينها.. وين امي.. ماحد يعرف لك الا هي..

وصاحت تناديها..

الا هادي نازل الدرج :تصلي بالصالة الفوقيه.. لاتشغلينها.. وش فيك..؟!

النور تسلم عليه خد..

بعدها ضحى سلمت عليه وحبت راسه : شلونك ياخيي..

هادي : زين.. الحمدلله.. اخبارك مع التعب..

ابتسمت ..وهي تمسح على بطنها:الحمدلله زينه.. ويسلم عليك محمد..

قرص خدها :الله يسلمك ويسلمه..

ضحى نحيله بقصه بوي وملامح دقيقه شكلها كنها طفله حامل.. بفستان كيوت..

التفت لانفال وكانت ماتقل كياته عنها بس بشكل اصغر.. :وش فيكم على غنايم اخوها.. ازعجن حسها واصل لفوق..

تكتفت واسكتت..

والنور بمحاولة انها تحل المشكله بدون مايتدخل وتزيد ضغطه:

ماعليك.. هوشة خوات.. وتنحل.. تعال خذ لك من هالحنيني تو امي مسويته وخذ فنجال قهوه..

هادي سمع الحوار وعارف المشكله.. وماوده يكسر كلمة النور لانها الكبيره.. ولا وده يكسر خاطر هاليتيمه.. اللي امانيها ومباغيها فرض بالنسبه له..

خذ فنجال القهوة.. من يد النور : وين عيالك..

النور وهي تتبادل نظرات مع انفال:راحو مع ابوهم لجدتهم.. بيجيبهم بعد شوي..

وكملت حوار العيون مع الحواجب مع انفال اللي صاحت بنفاذ صبر : الا.. باخذهم كلهم..

النور : تخسين..

هادي حط الفنجال : وش اللي بتاخذين يا انفال..

انفال بصوت دفاعي :

هالحين انا قلت لك بطلب من نمشي.. وانت وش قلت..؟!

هادي : قلت طلبي اللي تبين ..

انفال: سمعتي.. قال طلبي اللي تبين.. ماقال بكم اطلب.. يعني لو اطلب بعشر الاف.. انا واخوي ننجاز..

هادي ضحك : خليها وش فيك عليها..

النور محترق دمها: هادي خف من دلعك لها.. ياخي البنت بنت حمد جافل.. والعيشه بنت عبد اللطيف جميل.. اربع كنادر بطلبيه وحده وكلها نايك واديداس.. ليش.. مشاركة بالمارثون.. وبيدك البيرق.. اقصاها بتصورين فيها بسناب يا افنان الباتل..

ضحى :لا جد تماديتي ياقشر الشمسي..

هادي مد يده لها:جيبي ايبادك اشوف وش طالبه..

جات قدامه.. وعطته اياه.. وظلت واقفه في وجهه.. ويد على خصرها وعيونها معه في الايباد

هادي :هذول مره كنهم نفس بعض..

انفال:هذي زيجها فسفوري اخضر.. وهذي كحلي..

هادي.. : اختاري وحده..

اشرت :خلاص هذي..

هادي :وهذي ليه..؟!

قالت: هذي برادة مويه موضه.. شوف الكرستال عليها.. محلاها..

الغاها :نفوول.. المطبخ مليان..

تضايقت :بس ماعندي هاللون..

هادي: ماهو لازم..

دخل رقم بطاقته.. وارسل طلبيتها.. .. وقال: خلاص.. دفعتها.. لاجات بس استلميها..

راحت عانقته.. وبوست خده : اموووووووت فييييك.. ياهادي.. رح جعلك تصير مليونير..

النور: والله كلفت يوم شلت بس شوز وبراد..

خذ فنجاله ومده لها :

زيديها بردت..

ضحى شردت فيه.. وتدعي بقلب مبتهل له.. وهو اللي يفني عمره عشانهم..!..

*****

فارس بالصاله واناره خافته يتابع فلم.. وسيف على الأرض منشغل بمكعبات شاريها سيف له..

وكل شوي يجي لفارس يبي يعدله شي.. وهو يركبها وعينه في الشاشه..

سيف يهاوشه: فالس حطا حملا هنا.. بيضه هنا.. اتخرب العابي..

فارس بضجر يستعدل ويوقف الفلم..ويركبهم لسيف :

وش بلااااك اشغلته امي.. المفروض انت تركبها.. يعني حتى اللعب العب عنك سيف..

سيف يطالع شعر فارس.. بانبهار.. :فالس ابي زيك..

باستغراب:وش اللي زيي..

اشر على راسه:سعرك.. (شعرك)..

فارس وهو منسجم بالفلم.. ويده فيها مطاط ربط شعره..ضحك:

وانت ابد مطبق معي حتى لو ادخل جحر ضب دخلته وراي..

سيف يترجاه:سوو لي فالس.. ألجووووك..

ضحك وهو يطلع مطاطه ثانيه بيده.. ويجمع شعر سيف اللي وقف بهدوء وربطه..

وراح يمهله ويضبطه..

وجات مهره وهي شايله صحن..ضحكت:

شمسوين بعمركم..

فارس ينهي التسريحة لسيف.. ويلفه لمهره:

يخسي مالوما عنده..

سيف :سرايس ماما..

مهره:حلو.. تعال اشرب حليب شوكلت..

عطته.. وعطت فارس كوفي.. وقربت صحن كيك.. منهم..

فارس :وين ابوي مختفي.. من وقت اللي جا من العمل..

مهره: في مكتبه.. بروح اشوفه.. تكفى فارس انتبه لسيف لايدلق الحليب على الكنب..

فارس: تمام..

وارجعت المطبخ..

سيف كان في مكتبه..

كان مرجع راسه على ورا.. ويفكر ويحاول يربط الاحداث..

مهره كيف تقول ابوها كان من مهربين الاثار.. ايش الصدفه.. اللي خلت عساف يوصل له.. استحالة صدفة..!

واستحالة حد يعرفه عساف.. من ديرة مهره وشاير عليه..مثل ماقالت مهره قبل..!

الموضوع مو هنا..

اليوم سيف رايح لراجح في البيت..عندهم نقاش في مزاد بيفتح..

فدخله بمكتبه في البيت.. ولاهي اول مره..

بس اول مره تلفت انتباهه الصوره على المكتب.. ببرواز قديم.. و تجمع راجح بشخص شافه من خلال صور مهره..!!

ممكن شبه..

ممكن..

وش يجيب صورة غازي عند راجح..!!

بس معقول اذا اجتمعوا في نقطة تهريب الاثار..

معقول راجح يكون سبب مقتل غازي..

مستحيل..

لا مستحيل..

تاريخ راجح.. مافيه قتل ابد.. يلحق الماده.. وطايح بتهريب الاثار.. بس ماهو يقتل..!

غرس اصابعه براسه.. وزفر.. وبعدين اللي بيقتل احد.. بيرز صورته بمكتبه..

واصلا ً يمكن مو هو.. يمكن يشابهه..

اعوذ بالله..منك ياراجح..

الله يشهد مابي اضرك..

والله يستر ماتغرق نفسك اكثر..

تنبه لمهره وهي تطق الباب.. افاق من شروده على ابتسامتها الجميله واسلوب دلعها الخاص :

اللي ماخوذ عقلك..

ابتسم وهو يعتدل : من غيرك ماخوذ كلي..

راحت له وحطت صحن الكيك والقهوه على المكتب..

وحطت يديها حول سيف وانحنت وارفعت حاجب:والله اشوف غيري.. يلعب رايح جاي بعقلك..

سيف ببتسامة جانبية متسند ورافع حاجب :

لاتشكين بغلاك وانتي اعرف الناس فيه..

باست خده وهي تبعد وتقول :

واضح ماتبي تعلمني..

مسك ذراعها وسحبها.. جلسها في حضنه:وين..

مهره :بنزل عند فارس وسيف.. واخليك تعوفر مع مخك الشاطح عنا اليوم..

سيف :صدقيني محتاس في الشغل.. بس.. قولي لي كلمتك زينه اليوم.. قالت لك وش سوت..!

مهره :اسكت مصدومه.. انا.. كيف يرمي عليها اليمين كذا.. وظاله معه...

سيف :هي زين تكلمت اخيرا ً.. كلمني المحامي.. مسئلتها خالصه.. شرعا ً.. طالعه من ذمته.. باقي يخلصون اوراقها بالمحكمه..

مهره:واذا رجع عبد الاله من السفر..كيف الوضع..

سيف :هو مايقدر ينكر.. الطلاق واقع.. بيحل الموضوع.. باكمال الاجراءات.. ويمكن يضغط على زينه.. بانه يرجعها.. بعقد جديد..

مهره بقلق: ومستحيل ترجع له..صح..!

ابتسم وهو يداعب شعرها:ماعليك بنكون رجعنا وانا اللي بوقف بوجهه.. حاليا ً المحامي نايف كفو وبيحل المسئلة بطلاق نهائي.. ويكون حكمه.. مايقدر يرجعها الا بمحلل..

توسعت عيون مهره: من جد..

سيف :ايه.. تفكرين الدين والاحكام لعبه.. على كيف امه طالع نازل فيها.. طلاق.. فوضى..

مهره ببتسامة واسعه:

ورب الكعبه انت خطير.. ياشيخ زوين ساكته.. وصاخه.. كيف سحبت منها هالحقايق..

سيف ضحك..وارتشف من القهوه.. :

ماخلقنا الا لحل العقد يابعد حيي..

بصدمه :ياويلي.. بيعلي خشمه علينا الحين..

بنص عيون:لايكون عندك اعتراض لاسمح الله..

حوطت رقبته وهمست وهي قريبه:

لا ماعترض.. هو استرجي.. وانت اللي حليت عقد وشفرات فيني كانت مستحيله..

سيف بهمس وابتسامه:

مالشدايد.. الا اهلها.. واحنا اهلها يابنت غازي..!

‏لا هوى قبلك .. ولا أمل بعدك

لا سما إلا عيونك ..

ولا ثرى إلا في وعدك

انتي كل الناس وحدك

من ملك ضحكة عيونك

وابتسام الفجر فيها

ما بقى في الدنيا ناس

ولا بقى أرضٍ يبيها

إنتي يا عمري الليالي

كلها قربك وبعدك.

............

ضحى تلبس عبايتها..

وانفال محتاسة وودها تقول شي..

ضحى:وش فيك.. قولي قبل امشي..

انفال:الحين انا صدق ضاغطه على هادي.. النور تقعد ترمي علي كلام مثل السم.. اني انانية ومادري ايش..ضحى احنا مب فقارا..

ضحى تحط جوالها بالشنطه.. :نفول.. انا معك.. ان راتب هادي كويس.. وراتب ابوي.. بس انتي تدرين ان هادي دفع دم قلبه بهالفيلا .. وراح يظل يدفع اقساطها سنين قدام..عشان مين.. عشانا وعشانك وعشان امي.. طيب لما هو يقصون من راتبه ذاك المبلغ للبيت.. ويجي يدفع لك في طلبياتك هالكثر.. هو متى يجمع له شي لنفسه.. يعني انتي ماتتمنين هادي يتزوج.. وينبسط..

انفال بندم : الا..

ضحى : تراه اكبر مني بثنعش سنه.. وانا شوفيني عرست وببطني بيبي.. والنور اصغر منه.. وعيلت..وانتي بيجي اليوم اللي تكبرين.. وتتزوجين.. قد طار العمر بهادي..

انفال بانفعال:

لاتقعدين توجعين قلبي.. انا مستحيل اتزوج واخلي هادي..وان شاء الله يتزوج.. وانا اللي برقص بعرسه.. رجلتس ورجل النور ماهم احسن منه يعرسون وهو يقعد..

ضحى تربط نقابها:ياطول لسانك..

انفال بكبرياء ودقره : هالحين شلون يلغون الطلبيات بنمشي..

ضحكت ضحى على انفال.. على قشارتها الا انها على طول تندقر خاصه لكان الشي يمس هادي..

قالت:ماعرف والله.. وهادي دفعها بالفيزا.. خلاص.. عافيه نفول.. بس خفي بالايام الجايه..

قامت وبعصبية :

يووووووووه.. الحين نبي نصلح هالخطأ كيف..

ضحى بضحك : كثري استغفار..

شالت فازا :روحي انقلعي لرجلك.. لاافتح راسك بهذي..

ضحى طلعت.. وهي تضحك..

وانفال بصرخه جلجلت البيت :

يوومه.. وراحت تكرر النداءات.. وافتحت باب الغرفه على امها.. اللي هتفت:

وش فيك.. شصاير..

انفال: هالحين ابي الفين.. من ورثي كيف اسحبها..

امها باستغراب:وش تبين فيها..

انفال:ابيها.. بشي خاص.. لوسمحتي يمه.. ذا ورثي لاتناشبوني فيه.. وش تبين فيه.. وش بتسوين فيه.. والله يمكن بتبرع.. ببني مسجد بنقلادش.. والدين يقول شمالي المفروض ماتدري يميني وش عطت.. فاخلصي وعطيني قريشاتي..

امها:الله والورث.. اللي بتبنين فيه مسجد.. روحي فرشي اسنانك.. ونامي دام مشوا خواتك.. مانب فاضيه لك..

انفال:يمه..!!!!.. انا اكلمك ابي الفين.. وانتي تقولين نامي.. والله لاشتكيكم.. عند الأمير محمد بن سلمان واقول.. مايعطوني حقوقي..

امها:وش تبين بالألفين..؟!. فلوسك بالبنك.. والبطاقة مع هادي..

سكرت الباب وقربت من امها :يمه.. انتي شفتي هوشتي اليوم مع النور.. عشان الطلبية.. المهم.. ذا الحين انا متحسفه.. وابي اساعد هادي بقيمتها.. ودي الغيها ولاعارفه كيف..

ابتسمت وداعبت شعرها وقعدتها جنبها:

تبين الصدق ولا ولد عمه..؟!

انفال بخفوت: ابي الصدق اكيد..

امها:غلط اسلوبك مع اختك.. وغلط انك ماطرا في راسك شي تاخذينه.. دام اخوك فاتح يده لك.. ولايقصر.. المفروض..تقدرين هالشي.. ولا تزيدينها..

نفخت انفال:يمه ترى ببكي جد.. خلاص ماعاد ابي هالطلبيه.. ولاعدت متحمسه لها.. وعطيني فلوس لا ابيع بكره سوارتي.. واعطي هادي فلوسها..

ضحكت ام هادي : الله اكبر.. خلاص امي ماله داعي.. عافيه هالطلبيه.. وخلاص دام دفعها اخوك..هو توه مستلم.. لو ماعنده.. ماخلاك تاخذينها كلها.. لا تأنبين نفسك واجد وروحي نامي..

انفال تتنهد.. وتزفر.. والتفتت :طيب يمه عطيني خمس مية.. واخصميها من مصاريف العيد..

وبعد نقاش مع امها.. عطتها خمس مية وراحت انفال غرفتها.. سحبت حصالة.. جمعت اللي فيها لقتهم ست مية وعشرين .. شالتهم ورتبتهم لانهم من عدة فئات.. وحطتهم بظرف.. واكتبت فوقه :

انا اسفه ياعين اختك.. اصير انانيه مع الكل الا معك.. حبيبتك نفول..

وطلعت فتحت جناح هادي بخفوت.. كان نايم.. لانه يداوم بدري.. وهم الطلاب باجازه..

مشت بشويش..

حطت الظرف جنب جواله.. وقفت تناظره وهو متعمق في النوم..

ضمت قبضاتها كنها تطالع ارنب ولا قطو وبانهيار صامت : كيووووووووتتتتتتت...

وراحت باست خده وطلعت.. بصمت مبالغ كنها حرامي بفلم كرتون وسكرت الباب بشويش..

*****

في صباح منعش..

سلمى اسمعت ضحكات شاهين بحديقة البيت.. مع بناته..

طلت من النافذه.. ابتسمت.. وهي تشوفه جالس على الارض وديم فوق كتوفه..

ويشقلبها ع الارض .. وهي تضحك..

وبيان تجي تنط وترميه على ظهره وتطيح فوقه انها هزمته..

وديم تساعدها..

وضحكاتهم تتعالى..

*هل ولد البعد الجفا ياشاهين.. هل غفى عملاق الشوق في صدرك.. هل انطفئت نار الهوى.. وتبلد احساسك.. *

طلعت لهم.. وبصوت عالي :

وش ذا الصبح الزين.. يا امك.. عسى هالضحكه ماتنطفي..

شاهين ببتسامة:ولا ينطفي حسك يمه..

وقف ديم على رجولها: قومو سلموا على جده..

ركضو ناحيتها.. وضمتهم وبوستهم..

وشاهين جالس ع الارض.. ذراعه مهمله على ركبته اللي رافعها..

شرد فيهم.. وامه تقول لهم :دخلو قولو لشملا تطلع الفطور بره.. الجو زين..

ركضو للداخل..

سلمى وهي تجلس على كرسي قريب.. :

الله يجبرك ياعين امك.. زين اللي قدرت تطلع من اللي انت فيه..

قام وهو يضرب ثيابه عن الغبار وبالهجة غريبه :

يقول البدر يايمه

من تعنى لوصلك لاترده كسير

ومن تباهى بهجرك أتركه للعنا

بيان وديم بحاجتي.. وغيرهم ماعاد يهمني..

طالعته بشبح ابتسامة.. وفي خاطرها :

تكذب على مين يا امك.. ماقول الا الله يجبر كسرك.. ويبرد قلبك..

في بقعة بعيدة.. كانت في حديقة بيت راشيل..

تقف امام لوحة..

بجانبها طاولة مليئة بالالوان والفرش.. زجاجه مليانه حلويات ملونه..

صحن صغير فيه بسكويت.. وزجاجة مربى وكوب شاي سبحت وسطه نحله.. جعلت جمان تترك افطارها.. وتكتفي بالرسم على جوع..

اسمعت ركض جاي ناحية البيت.. التفتت.. ببتسامة للبنتين وهم يعبرون السور.. وينادونها .. :جيجي سنيوا.. بونجورنو..

ردت عليهم بالايطاليه اللي تتقنها.. بحكم دراستها سنين في ايطاليا..

جمان تتبادل معهم الحديث.. وهم يتكلموا بحماس.. تعودت على البنتين وتعودو عليها يشبهون بناتها في العمر بس..

البنتين شقروات.. جدا.. بعيون زرقاء.. وبشره بيضاء بخدود حمراء..

وحده منهم.. حضنت جمان.. وحطت اذنها.. على بطنها.. :الم يتحرك اليوم جيجي..

جمان.. تداعب شعرها:انه كسول.. قليل الحركه.. تعالي ليندا.. قد يتحرك اذا عانقتيه..

قربت الصغيره وكانت خجوله..

ضمت بطن جمان..

وابتسمت :هناك شيء ينبض..

راحت جمان تداعبهم ويضحكون معها.. بعدها افتحت زجاجة الحلوى.. وخلتهم ياخذون..شكروها ببوسات.. وودعتهم..

جلست على الكرسي ومسكت بطنها.. كانوا بيان وديم بيتجننون.. على التطورات هذي..

*ماهذا الصد ياجمان.. ماهذه القسوة اللتي استوطنتني.. كيف امسك زمام جفائي.. كيف اسامحك ياشاهين.. كيف افقد ذاكرة ضممت فيها امرأه غيري.. كيف اقطع مشهد بات محفور كاخندق في عيني *

*****

كان ينشف وجهه.. لما رن جواله.. رد وحط الجوال بذنه وعيونه تتعلق على الظرف ويشيله:

هلا عمي..صبحك الله بالنور..

سعود :صبحك الله بالرضا والسرور يبه.. ها خف راسك..

هادي وهو يفتح الظرف ويشوف الفلوس فيه:

ايه وهذا بجيك.. مسافة الطريق بس..

سعود: يابن الحلال انا داق اطمن عليك.. انت من ارسلت هالرساله انك تعبان وبتتأخر.. وانا والله احاتيك.. اقعد ارتاح.. لاتجي ولاتمر..

ابتسم :يخليك لنا.. مافيني الا العافيه.. شوية صداع.. وزال.. جايك ماخليك..

سعود :على هواك ياولد حمد.. بس الله يرضا لي عليك.. لو تعبان لاتجي.. والشغل حق اليوم خالص.. ماعندنا شي مهم..

ضحك هادي ويداعبه:وش عندك ماتبين اجي.. لايكون بوه بربسه بالمكتب...

سعود : افااا ياذ العلم.. اقوول تعال خل امصع اذانيك يالهيس..

ضحك :تمام.. فمان الله..

هادي :فمان الكريم..

حط الجوال.. وطلع الفلوس اللي تضم حتى فئات العشره والخمسه والخمسين.. و٥٠٠ قطعه..

لبس ثيابه.. وحط عقاله على راسه والشماغ على كتفه وبخ له عطر وشال ظرف انفال وطلع..

فتح غرفتها وماشافها..

نزل.. لقاها قدام الشاشه.. تتصفح نتفلكس.. باندماج.. والطاولة مليانه شبسات وتغميسة زبادي.. وكولا..

قال :فطرتي.. ولاتاكلين كل ذا على معدتك الفاضيه..

رفعت عيونها له.. :الا كلت مع امي.. وشربت حليب بعد..

قرب منها ورمى الظرف ع الطاولة :خذي فلوسك.. ورجعيها بحصالتك.. ترى الخير واجد.. وانسي كلام النور و ضحى..

قامت بانفعال:

هادي.. بليز.. لاتوترني وتخلي ضميري يجلدني بذا العطله.. اتعوذ من الشيطان وخذ الفلوس.. وبجمع من جديد..

تجاهلها.. وهو يلبس شماغه..وعقاله..

انفال بانفعال: هادي.. رجاءً خليني اعتمد على نفسي واكون معتصمه.. لاتخربني بهالاسلوب وتخرب اعتصامي.. بليز..

نسف شماغه وقال:بتكونين وش.. مافهمت..

زفرت.. :بصير معتصمه.. انت تدري ان راعي محلات باجه حق الحب المصري والقهوه.. كان يبيع في بسطه.. والحين شف.. محلاتوه تارسات السعودية كلها.. والله لاصير معتصمه زيه.. واروح ادفع طلبيات النور وضحى وحتى انت ازوجك على حسابي ياعزوبي السالمية..

هادي ببرود: عصامية..ع صا ميه.. انطقيها بالأول عدل.. ثم يصير خير.. روحي سوي لي اسبريسو..قبل امشي..

توسعت عيونها بسعادة وبانهيار : OMG... تبي اسوي لك بيضه بعد..

هادي :لا قهوة بس.. يلا افلحي.. تأخرت على عمي سعود..

انفال بخرفنة:اصير لك اسبريسو.. وكابتشينو.. اصير لك ستار بوكس.. يا قلبي انت..

راحت وابتسم.. كيف تكون الحياه بدون خبال انفال..!

دخلت على امها المطبخ.. وراحت عند آلة القهوه.. ركبت المرشح.. وفجأة صرخت بقوووه :

انتي وش متنسية فيه يومك حامل بهادي.. قولي لي وش.. متنسية.. فييييه...؟!!!!!!!

نقزت امها اللي كانت ترتب الثلاجه..

وانفال تكمل بانفعال يهبل : متأكدة بااااسكن.. باسكن.. والله يمه والله.. لو تموتين ماجبتي.. حلو زي هادي ثاني..

ام هادي :يابنت اللذين.. انتي حالفة تجلطيني.. متى دخلتي المطبخ..

انفال.. تختار احلى واحسن كوب..من درج الأكواب :

القمر طالب مني اسبريسو.. في كوب هارودز شاريته انا خصيصا.. لهادي.. لاتقولين كسرته شغالتك يمه..

امها تجيبه من الفترينا:لا هذا هو.. خلي اخوك ينتظر بجيب له فطور..

انفال تنفخ الرغوة بالاله : هو يقول تأخر على عمي سعود.. وبيمشي.. بس يبي قهوه..

نادت امه: ياهادي.. لاتعدي الا فاطر..

هادي بصوت مرادف:قهوه كفاية.. بفطر بالمكتب..

نادت : قلت لك.. الفطور جاهز.. اقعد مكانك..

مرت انفال بالقهوه.. مضبطه الصحن وحاطه صبعين كندر وهي اللي ماتندي لاحد شي من اغراضها..

جات الصاله.. وكان هادي يسقي الزرايع الداخليه.. بعلب مويه مفتحه بالصاله..

حطت القهوه ع الطاوله:

يعني حلو.. وكريم.. وحنون.. ومهتم بالزرع والبيئه.. انت المفروض يسونك سفير لكل شي زين..

ضحك: بالله..!.. ليت الكل يشوفني بعيونك ياغنايم اخوك..

انفال: تعال.. اشرب قهوتك.. قبل مايروح القلب اللي مسويته لك بالرغوه..

جاء وضحك وهو يشوف القلب المنخبص فوق سطح الاسبريسو :والله يتعب دوز من بعدك يانفول.. اقدع بارستا..

جلس وشال الكوب..

افتحت الكاميرا :نزله اشوي.. ايوه كذا خل يدك هنا.. طالع النافذه

. ايوووه بس..

هادي :لاطلعين وجهي بسنابك..

صورت وتوريه :بس دقنك.. شرايك..

شرب قهوته:زوينه.. ولو اني ماحب هالحركات..

هي تضبط الصوره وتحط عليها كلام.. :عاد انا احب هالحركات..

اسرقت لها بيت..

"‏اخوي اتنومس فيه واجاهر في غلاه

‏هو عضيدي في الليالي وسندي"

وحطتها بالستوري..

بعد شوي.. كانت بلقيس تفتحها.. حدقت فيها بشرود..

*مُنهك الحب المقطوع فيه الأمل.. وخاصه لو كان ذاك الامل يقطعه طرف يائس.. متشبث بفرضيات واعتقادات..!

هادي بارع في تكفين حبنا..وتشيعه جنائز لواقع هو صوره واقتنع به..

آاااه منك ياهادي.. كيف اتجاوزك.. وحبك اميال وغارات لا استطيع قطعها..

ولا انت ذكريات وصور تتلف وتحرق..

انت بت في شي لو احرقته..احترقت كلي معه.!*

******

بعد ايام..

راجح عينه تتوسع.. وهو يطالع المقطع.. اللي قدروا يوصلون له.. بطريقة ما..

سيف وهو يقوم بعملية الفحص عن اللوحة في باريس..

قبض راسه.. وهو يعيد المقطع.. هو من سيف اللي عرف ان هو يخرب شغله.. ولا ان سيف عرف عنه النقطه السوداء هذي..!

كان مايبي احد من قروبه النظيف يدري عنها..

ولا خوفه من انه يدري منصور عن سيف ويحاول يصفيه..

تمتم وهو يفيق من ذهوله :هاشم.. المعلومات هذي في احد وصلها غيرنا..

هاشم (عراقي) :والله ياعم بومشاري لهسا.. احنا أول ناس اوصلنا للمعلومات..بس اللعلمك.. هاذ سيف عنده حصانة.. من الانتربول.. في شغله بالأوروبا.. باوع ليش ماستخدم حصانته.. بالشُغله هذي.. يعني حسب توقعاتي.. سيف مايريد اذيتك.. يعني حط هالشي قودام عيونك قبل گول شي.. تريد تساويه..

راجح: منصور لايوصله علم.. سو كل شي ياهاشم.. وادفن هالمعلومات.. انا اتفاهم مع سيف.. بس خل منصور ورجاله بعيد..

هاشم :تومر امر ..

وراح مد اوراق له : فدوا عمي اطلع على هاي الاوراق.. مو تنساها..

راجح:خلاص خلها ياهاشم.. وخلني لحالي..

طلع..

وراجح.. حس بصداع قوي.. رغم انه داخل بهالمجال وشغوف فيه.. بس مستحيل يبيع العشره.. ومستحيل يتسبب بقتل احد.. فاكيف سيف.. منصور داهيه وآفه.. هو الراس الكبير.. وهو اللي يدير كل شي من فوق مع اجانب ومافيات..

زفر بتوتر.. ويفكر كيف يواجه الموقف..!

*****

هادي راجع من صلاة الفجر.. صعد غرفته.. جواله كان ماشاله..

لقاه يضوي ويهتز وهو في الشاحن راح شاله وابتسم لما لقاها بلقيس.. اللي منقطعه عنه فتره..

رد : مرحبا..

صوتها الباكي اللاهث منهاره وهي تقول :

هادي تعال تكفى.. امي كانت تصلي بالصاله.. وجيتها ع السجاده ماتتحرك.. مادري وش فيها.. هادي.. شالها ابوي مع الاسعاف.. وراحو.. هادي امي يمكن ما..

قاطعها بعصبية:اهدي بلقيس.. لاتفرضين شي مو زين..

بلقيس.. ببكى:والله ماسامح جمان واخواني.. والله ماسامحهم.. لو صار في امي شي..

هادي طلع وهو يكلمها :تعوذي من الشيطان.. اشربي موية واهدي..

بكت:هادي قطعوا قلب امي عليهم.. كل واحد لاهي.. وهي بس جالسه تبكي وتحاتي.. الله لايحلهم لاصار فيها شي.. وجمان الحيوانه بتأدب رجلها وهي ضربت بالكل عرض جدار.. امي هادي امي.. وجهها ماكان فيه لون.. تكفى تعال.. ابوي لحاله مامعه احد لايصير فيه شي..

كان يسوق ويتمتم:

انا قريب.. خلك بره.. لاتطلعين الشارع.. لمن اوصل..

"‏صوتك حضن لمّة أهل وبيوت طين يااارب صوتك والحياة الي معه "

*******

وليد وهو يطلع اوراق وجواز :لم استطع ان اكلمها .. هي تحت الأجهزه مذ يومين. لا آدري قد يكون اصابها مكروه بلقيس كلامها غير واضح..

ماريا تحاول تهديه: ستكون بخير..الآخبار السيئة تصل بسرعة.. اهدء وليد..

وليد بتوتر.. يطلع صور شخصية : اللعنه كيف لم انتبه ان جوازي يحتاج تجديد.. لكنت ذهبت مع سيف والجميع.. اليوم..

ماريا :لن يأخذ وقت طويل وعدك سلطان في السفاره.. انه سيقوم بتجديده بسرعة..

وليد متوتر بشكل اول مره تشوفه ماريا كذا جلس على طرف السرير: لم ارها مذ اكثر من سنة ماريا.. انها اختي الوحيده وكل ماتبقى لي.. كيف اهملتها هكذا.. لن اسامح نفسي لو حدث لها شيء..

ضمت راسه :

اهدء حبيبي.. لن يحدث شيء.. ستكون بخير..

*****

في صالة الإنتظار.. مهره تتأمل وجوه الثلاثه.. .. كيف تشابهت في الغصه.. وهالة الدموع اللتي لاتسقط..

سيف جالس..وسيف الصغير ماسك يده وهو واقف قدامه.. ويضحك وسيف يداعبه..وهو اصلاً مخنوق..

فارس ساكت.. وكل شوي يمسح رمشه.. مهره مسكت كفه وهمست :

فارس امي..ماهنا الا الخير..صل على النبي..

هز راسه بنفي وبخفوت مخنوق:

مافيني افقد امي ثاني.. لو يصير في امي موضي شي.. والله اموت..

مهره: مافيها الا العافيه ان شاء الله.. هي بخير ياعميري.. وبتشوف..

فارس بنفس الخفوت:لو هي بخير كان كلمتني.. يقولون عليها اجهزة.. والله اعلم يامهره.. مايكون صاير لها شي ومايبون يقولون لنا واحنا بعيد..

ضغطت على يده :

لاتفاول..ادعي لها واحسن الضن بالله..يقول الله عز وجل انا عند ضن عبدي بي. خلك متفائل ان بنوصل وهي بخير.. نسيت يومك افترضت هالفريضات على ذياب.. وفي الاخير هذا هو بخير..ابليس يصور لنا اشياء ويشطح فينا.. واحنا ضعوف.. ياقليبي..

تمسك بيدها.. ورجع لشروده..

طالعت ساعتها.. وهي تلقي نظره على سيف.. اللي يبتسم لسيف.. وهو في عالم ثاني..من وصل هالخبر وهو في حالة غصة وصمت مهيبه ورهيبه..

صوت نواف وهو يرد على شاهين ويقول بعصبيه:

بالمطار لسى..

وبعدين يقول :احلفك بالله شاهين.. امي على الدنيا ولاصار فيها شي.. قلبي ماكلني اقسم بالله..

شاهين :نواف تعرفني على بلاطه وماراح الف وادور.. عمتي تعبانه.. واليوم سو لها قسطرة وانجحت.. في العناية لانها مافاقت الى الان.. على وصولكم ان شاء الله تكون صحت..

نواف بغضب :الحيوانه بلقيس.. العبت باعصابنا.. الا تبي تشككنا ان امي..

وماكمل الكلمة.. وابوي يقول انها بخير.. ويقول لاتطيع بلقيس لانها شايله عليكم وزعلانه.. ولاعرفت من اصدق.. وهادي نفس كلام ابوي..

شاهين: خذها مني.. عمتي ان شاء الله بخير..هدو وتراكم في رحلة طويلة.. مايصير تقضونها وسوسة..

نواف :الله يسهلها.. خلكم مع ابوي ياشاهين لاتخلونه..

شاهين: لاتوصي..كلنا حوله..انتبهوا لحالكم وتوصلون بالسلامه..

قفل نواف..

رفع سيف عيونه:وش يقول..؟!

نواف:كلام شاهين يطمن.. وحتى سولها قسطره بالقلب.. نجحت الحمدلله.. بس مافاقت الى الان..

مهره:مالها شر ان شاء الله.. كثفو دعاء وانتوا مسافرين.. دعائكم مستجاب..

نواف:اللهم ان استودعناك امي.. ياربي خذ من عمري واعطيها..

فارس برجاء:الله يحفظها ومانشوف فيها مكروه..

مهره ابتسمت ومسحت على راسه وربتت على يده اللي بكفها..

وسيف يطالع ساعته ويتنهد بحرارة.. وصمت..

رغم المتر اللي بينهم.. الا ان مهره حست زفرته حرقت روحها..!

يارب أجعل يومها بعد يومي

يارب لا تحرمني منها وأنا حي

امي هي الدنيا وقوة عزومي

من دونها عمري يساوي ولاشي

******

نرجع ليوم تعب موضي ونقلها للمشفى..

لما بلقيس نزلت مع هادي وتعبر الممرات وهي تبكي بعد ماخذ المعلومات من الرسبشن..

كان وراها لما همس بحدة : بلقيس.. ركزي.. ماهو يمين.. خلك معي..

التفتت ببكى وانهيار:ياربي هادي استعميت.. وين.. وين امي.. ابوي ماشوفه..

همس بحنية:بلقيس.. ابوي اهدي..

واشر نهاية الممر على اليسار : هذا عمي سعود هناك..

رحمها كيف ترتجف.. وتركته وهي تسرع لابوها..

سعود كان واقف ينتظر..

يعصب راسه بشماغه ومسوي عمامه..

راحت اندفعت لحضنه :

يبه.. شفيها امي.. وش قالوا هي حية.. تتنفس..

ضمها وبمداعبه وغصه:

حيه وبخير.. انا متفق مع امتس ماتموت قبلي.. ماتذوق موييضي الموت الا مقضيه حدادها علي..

انتحبت : بسم الله عليكم يبه.. عساني مابكيكم.. لاتقول كذا.. لاتقهروني فيكم..

ربت عليها.. وبصمود يحرق صدره:

اهدي يبه.. امك بخير..

هادي :وش صار عمي.. وش قالوا..

جلس وبصوت متلعثم غريب على شخص سعود الشامخ دوم :

يقولون انسداد بالشريان.. هي فاقت.. تكلمت شوي..تبي عياله.. تهاذي بعياله ياهادي..كلم سيف ونواف..لاتخوفهم بالراحة ياابوك.. خل يتحركون في جيتهم لامهم..

بلقيس تتمزق على لعثمة ابوها وكيف مخنوق.. قالت بغضب:

وخايف عليهم يبه.. لايخوفهم.. يلعنهم.. هم اللي جلطو امي..هم والكلبه جمان..

سعود بخفوت:يايبه كل واحد بشغله.. اعقلي يابلقيس عن اخوانك لاتحملينهم الذنب.. وذا مقدر ومكتوب..يعني هم بيرضيهم اللي امك فيه..

انهارت بلقيس وهي تشوف ابوها يدور مناديل من جيبه.. ويطلع مجموعه.. ويسحب واحد بيدين ترجف.. ويمسح عيونه..

جثت قدامه ومسكت ركبه.. :يبه لاتكفى..صل على النبي..

هادي قرب وبصوت عبر من خلال بلقيس قبل ابوها:لااله الاالله ياعمي .. لااله الاالله..الخاله ام سيف بخير..انت ماتؤمن بالله..

بتنهيده مهزوزه:

ونعم بالله..!

*اهتزت اركانه بسقوط موضي.. رفيقة كل لحظة.. .. تعلم الحياة معها.. كبروا ..جابهوا شقاوة الشباب معاً.. اعتكزوا بعضهم في كل هزة من الدنيا.. عدو الشعرات البيض في رأسه عدا ً حتى خالطت السواد..سخرت منه وهم يخطون عتبات الخمسين( يالشايب) وهو (عيرتني بالشيب وهو وقار.. ليتها عيرتني بما هو عار.. بيغزاك الشيب يامويضي وبحط على راسك ثلاث.. ضحكها.. احنا ماتشيب روسنا وراثه ياسعود.. وعاد في الزين.. لو اصك السبعين بظل وش زيني غزال) .شريطه مع موضي ليس ومضه.. ولالحظات.. مواقف لا بل تاريخ..."عسى حسك مايطفي ياخلف كل غالي" *

*****

نرجع للوقت الحالي..

دخل مشاري البيت.. وشاف سما جالسه وقدامها علبة هدايا كبيرة.. فيها رسومات طفولية..وترتب فيها مجموعة من الألعاب سيارات صغار طيارة الوان ودفاتر تلوين..!.

عقد حواجبه:طلعتي لحالك..؟!

ابتسمت وهي ترتب الالعاب:ايه مشاري..بكره بنجتمع في المزرعة.. وباخذها معي لسيف.. اكيد بيحبها..

(طبعاً سما في الايام اللي فاتت صارت بينها وبين سيف الصغير لقاءات.. ومره تعلقت فيه)..

جلس مشاري.. ع الارض يمها ورفع لعبة..

حاول يكون لطيف ومايصدمها:

سما.. ليتك جايبتهم قبل.. مابي احبطك.. بس سيف فاملي كلهم مشوا اليوم.. يعني ارجعوا السعودية وطبعا سيف الصغير معهم..

توسعت عيونها وهي تحدق بالالعاب.. وهبط قلبها بنبضه عنيفه..

بخفوت وعصبية:ليه.. كيف راحوا.. انا تعلقت بسيف.. ماودعته.. طيب ماعطيته الهديه.. عشان ماينساني.. مشاري بينساني..

ابتسم بحنيه.. على مشاعر اخته الغريبه اتجاه سيف:

ماراح ينساك.. الولد حتى هو تعلق فيك..

بدت تجتمع الدموع في عيونها وهي تشيل الاشياء اللي قدامها وتجمعها بالاكياس وهمست برجفه.. ودمعتها تطيح:متى بشوفه ثاني.. ليش راحوا كذا..

مشاري :امهم بالمستشفى.. جايتها نوبة قلبية.. اضطروا يروحون قبل يودعون احد.. حتى احنا ماشفناهم.. ياسمين قالت لي.. لان سيف بلغ ادارة الورشه والمحل.. قبل يمشي..

رحمها كيف شاريه الالعاب وفجأه قال:

سما.. وليد بيروح خلال ايام يمدينا نرسل هديتك لسيف..

رفعت عيونها.. وتمسح دموعها بسبايتها:

جد..؟!.

ابتسم :ايه جد.. خلصي ترتيبها وانا اخذها لوليد..

راحت ضمته وبحماس :حبيبي مشاري..

وضمته اقوى وحماس ومشاعر كانت غايبه عن سما مذ زمن :احبگ..

مسح على شعرها:وانا احبك ياعين اخوك..!

******

هادي كان شارد.. وفي حرب داخليه.. وده يقول لجمان.. وترجع عشان امها..

ومتخوف من كلام جمان الاخير.. ان الدكتوره ماطمنتها على الجنين.. وحذرتها من اشياء كثير منها السلالم والسفر الطويل.. وشيل الثقيل وخلافه..

الليوم الخاله موضي افضل..

لا اجيب العيد في الثانية..!

ود اتكلم واطمنهم عليها.. ويطري عليه كفه فوق المصحف.. اللي طلعته جمان قدامه وحلفته عليه يحفظ سرها لمن النهاية..!

وخلال زفراته وضيقه..

رن جواله رد وهو يمشي بممر المستشفى ويداعبها:

هلا يابكاية..

بلقيس: اف ماطحت الا بلسانك عاد..

ضحك:فيه انسان عاقل يبكي يومين متواصله.. ياشيخه اختفت عيونك.. اناظر من النقاب ادور العيون الناعسة.. مابقى منهم شي..اختفوا.. بح..

هاوشته:

تمسخر ياهادي.. يالمتصحر..يالثلجة.. ياخي انت ماتعرف تواسي ابد..

هادي :ودي وودي لكن كيف تحقيق ودي.. عيا زماني لايجيني على الكيف.. ياشيخه.. كيف اواسيك وعم سعود فيذا..

بلقيس:وصلتوا عند امي..

قال:ايه.. امي والبنات عندها.. وانتوا مطولين..

بلقيس :قدني تروشت.. ورتبت لي شنطه لاني بظل مع امي مرافق.. باقي ارتب اغراض لامي.. ونشيل القهوه ونجي.. خلي البنات وخالتي لايمشون..

هادي :لا خلاص بنرجع.. النور مخليه عيالها وضحى تعبانه ماتقدر تطول..

بلقيس:لاتقول.. حسافة.. خل انفال وخالتي طيب..

هادي :يوم ثاني فديتك.. تعبان وربي مافيني ارجع لهم...

توقفت عند (فديتك) كلماته البسيطه القليله.. اللتي تفلت احيان.. تلامس كل بطينات قلبها..

همست:اخلي السواق يرجعهم..!

هادي يمازحها بجدية:

شغل المعزبه مانبيه..

هتفت:والله مو قصدي شي.. يالنفسية..

هادي يجننها وكنه زعل :السواق.. اجل..!.

هتفت:هادي.. والله مو قصدي.. ياخي لاتخليني احسب كل كلمة وتصرف معك..

ضحك:امزح ياعينه.. حتى لو انك معزبتي وعمتي.. احبك يابعد الدنيا..

سكتت مصدومه.. من الكلمة اللي يشح فيها هادي عليها.. ومايقولها ولاينطقها..

سگون.. وانفاسهم اللتي تطفوا حارقة.. تكاد تلتهم الاثير.. وتتكثف في اذن الاخر..

همس لها:في امان الله..

وقفل..

ظلت تطالع الشاشه بصدمه.. وتأثير الكلمة يسري في عروقها.. محدث تنمل لذيذ في اطرافها..

آاااه منك ياهادي..

ومن كوراثك الجليدية في قلبي..!

ظلت كذا شارده.. تحت تأثير الكلمة.. بعدها تنبهت انها بوسط غرفة امها..

وعبايتها على كتوفها.. والمفروض تحط بعض الاشياء بالشنطه..!

راحت ترتب بعض الادوات الشخصيه.. وملابس.. لان موضي من فاقت قبل كم ساعه وهي متذمره من لبس المشفى.. واستاءت من ازراره اللي تفتح.. اختارت لها بلقيس بجامه بازرار اماميه.. وروب قطني.. ابتسمت وهي تلصقه بوجهها وتستنشق ريحته..

تحمدالله.. على افاقة امها وتحسنها..

تدور بعيونها على الخزاين وترتيبها ونظامها.. وريحة العطور الفرنسية اللي تقفز من ثيابها..

تمتمت بدموع وكنها تمازحهاوهي تاخذ تروبان واشارب من احد الادراج.. :

يعني يامُسرفة.. كل هالبراندات.. والفاشن..كنتي ناويه تروحين وتخلينها..!

حست بغصه.. بين اشياء موضي.. ورجعت لها نوبة البكا من جديد.. وهي تتخيل وجهها وهي طايحه على سجادة الصلاة..

راحت تمسح عيونها وتقفل الدرج والخزاين السحب.. وتطلع من غرفة التبديل.. وتحطهم بالشنطه وتقفلها.. سحبت مناديل.. نشفت عيونها وانفها.. وطلعت بسرعه..

وعند الدرج اسمعت صوت ابوها واخوانها بالصالة.. (يعني وصلوا) ..!!!!!

نزلت..وبعكس اعتيادهم على بلقيس.. قالت بسخرية وتهكم :

حيالله اخواني.. الحمدلله على سلامتكم ياعيال موضي..

وجوهم تعابه من الطريق.. سيف الصغير بحضن جده..

سعود باللهجه ذات مغزى:سلمي على اخوانك يابلقيس.. وخلونا نمشي لامك..

نواف طالعها نظره على فوق والفنجال بيده.. وكانت واقفه ومتكتفه.. قال:

اقسم بالله حاشم ابوي.. ولا والله ود ادخل هالفنجال بعينك..

سيف ساكت ومن منطلق حاشم ابوه ماقال لها شي..

لان بلقيس لعبت في حسبتهم خلال اليومين.. ماتطمنهم.. وتقول لهم كلام يثير شكهم ان امهم توفت..

بلقيس بلهجة ساخره:ليه خفت على امي.. بسم الله على قلبك ياروحها..تبي احرق لك ملح.. ولا اجيب لك منقوع مره..

توسعت عيون فارس.. من اسلوبها.. ومهره تطالع يد سيف اللي ماسكه الفنجال..وزين مايتفتت بيده..

تدري ان بلقيس نقصت عمره..وعمرهم باسلوبها.. وهي تقول تسببتم في امي وذبحتوها.. وبعدين تقول لاعايشه.. وتلتوي معهم عشان.. توجعهم مثل ماوجعوها في امها..

سمعها وهي تتكلم.. باسلوبها الساخر المنغبن.. وابوه يحاول يقفلها معها..

بس بلقيس ماهي ناوية تسكت..

وقف وبحدة رمى الفنجال عن يمين بلقيس وطشه على الرخام.. وبحده زلزلت المكان :

ابلعيهااااا.....!!!

حست صرخته كفختها على وجهها..

وهي تنقز بارتياع..

سعود:لاتلومها يبه.. هي موجوعه على امكم..

صاح بانفعال وغضب وهو يلتفت لابوه ويأشر عليها:

وهي امها لحاله.. يايبه لعب فينا ابليس ألوان.. هي تقول حكي ان امي غدت.. وانت تكذبها.. ونقول ابوي يبينا نرجع ومايبي يفجعنا بالغربة.. كل ذا يطلع منك يابلقيس.. والله حتى لو حنا اعداءك.. انتي تعرفين وش الموت.. تعرفين الفقد عشان تلعبين فيه..

صاحت وعيونها تمتلي دموع:اعرفه لما لقيت امي طايحه على سجادتها زي الجثه.. اعرفه لما اشوف ابوي.. يصد ويخفي دموعه.. اعرفه بشحوب امي وهي تهذري وتناديكم..

صاح فيها :

ماتعرفينه بلقيس.. ماتعرفينه..خذو امي الاسعاف.. وهي حية.. وابوي قالك انها عايشه.. انتي ذبحتيني وانا هناك..(ضرب صدره) :انا اللي اعرف الموت و الفقد.. لما افوق من حادث.. ويقولون نجود ماتت..لما اقول ابي اشوفها ويقولون دفنوها.. اعرفه لما اروح امريكا واستلم جثة عساف..ولما يكون معي بالرحلة وماهو جنبي.. محمل بتابوت.. اعرفه لما تقلبين علي المواجع.. وانا بعيد وبوصل لشخص ميت.. انتي وش اللي بين ضلوعك.. ماعندك احساس..

الجميع سكت بغصة قدام وجع سيف بصوته.. بلقيس بدموع كثيفه ونحيب:

سيف انتوا انانين حتى في تعاملكم مع اوجاعكم.. ماتفكرون بأمي وابوي.. انت يوم فقدت نجود.. هربت....كونت حياة كامله بعيد.. عساف لما تمرد وعارض ابوي.. راح شال نفسه وسافر لمن جمرها ومات بالغربة.. جمان اللي ماتخاف الله..راحت وتركت كل شي وراها.. تروحون متى ماطرا لكم.. شلت نفسك مع زوجتك.. ورحت.. لاسلام ولاطيب خاطر.. ونواف بعدك... شوي الا شلعت قلبها وخذت فارس وسيف.. وقبلكم عاد.. كبيركم اللي علمكم السحر.. خالي وليد.. ولاكنه عنده اخت..

انتوا ماتدرون.. انتوا تشتت اوجاعكم الغربه.. بس ماتفكرون عن قلب امي الذايب.. وراكم.. عن لسانها وهو يلهج دعاء واستيداع..

صاحت بغبن ودموع:

ايه.. اعترف اني بغيت اوصل لكم هالوجع والافتراض.. لأنه لو الله ستر هالمره.. بكره بيصير.. لاضليتوا توطون قلب امي وتمشون..

سيف بنظرة حارقه لبلقيس.. اشر بسبابته بتحذير وبخفوت:

ولالك اي مبرر.. ولا سبب في الدنيا يشفع لك تصرفك.. بس والله طحتي من عيني..

قال كذا وتركهم وتوجه للباب :

اللي بيجي معي انا بالسياره..!

******

مهره في السيارة ماسكه يده.. وتختلس النظر لملامحه الجامدة.. وصمته..

همست تداعبه:طيب خلاص فك العقدة..

مارد.. بس ضغط على اناملها..

مهره:يعني لاحظت نحشت فارس وسيف.. راحوا بسيارة عمي مع نواف..

سيف بخفوت وهو يدير الدركسون في اللفه :كان رحتي معهم..

مهره:بالله.. الحق علي والله.. اقول مابي اخليك لحالك..وفي النهاية طلعت حاشرة نفسي..وقف بتصل على فارس يوقفون واركب معهم..

ضغط على يدها.. :

ماهو كيفك..

ابتسمت وتداعبه وبالحاح:يعني تبيني معك..حتى وانت معصب وقافل.. قول.. قول..

ارتسمت على وجهه شبح ابتسامه:مهره اهجدي..

داعبت ذقنه بيدها الثانية :

قلب قلبي هالابتسامة.. سيفي.. عمري.. لاتلوم بلقيس.. ولاتشيل بخاطرك منها.. مقهوره على امي موضي..

سحب نفس طويل وتنهد:

قهرتني.. ماهي حركاتها.. بلقيس هادية.. عاقلة.. . انا بالعادة اتقادح مع جمان.. وتشوفين بلقيس تهجدها وماترضا.. ذا الحين.. هي النتفه تحط راسها براسي.. لا والله اللي عينا خير.. اي والله واقفه بوجهي وتبي تعلمن الصح من الخطأ..

مهره:خلينا واقعين سيف الانسان طاقة.. وبلقيس تقدر تقول انفجرت.. وهذي ردة فعل انتقامية لما حست ان امي ببصير لها شي بسبب تصرفاتكم وغيابكم..

تنهد :خلاص مهره.. مابي اتكلم في الموضوع.. راسي مصدع..

سكت شوي.. بعدها تمتم بسب وشتم للشوارع المزحومة.. وهو يبي يوصل لامه بسرعة..!

*****

في غرفة المشفى.. اجتمعوا كلهم..

اشرق وجه موضي ببتسامة عصت الشحوب والمرض.. وهي تقول بخفوت:

عسى بس ماروعتوهم ياسعود..

بلقيس واقفه متسنده ع الجدار.. عضت شفتها..

وسيف جالس عند رجولها.. ويضغط بتهميزات حانيه على رجولها:

لايمه لاتحاتين..جينا واحنا ندري انك بصحه وعافيه..

طالعتهم موضي.. نواف ماسك يدها ويبوس فيها.. وفارس عند راسها وماسك نفسه عن الكلام..

ورجعت تطالع سيف وهو يتحاشى يطالعها ولمساته على رجولها.. :

والله وجيهكم تقل غير هالكلام..

رفعت عينها لمهره :

وجه مهره مثل الليمون.. كنه وجه وحدتن طارح..

قربت وابتسمت وهي تبوس جبينها وخدها:

تعب السفر يمه.. زينه انتي الحين..

موضي بحنية: والله دامكم حولي.. اكيد زينه يا امي..

قالت كذا وحست بنقطه طاحت على وجهها.. رفعت عينها بهلع لفارس :وووي وووي.. شهاللي امطر علي..عنبوووكم ذاا ورعي مغبون..

وجه فارس كله دموع.. وبعبره:حرام عليتس يمه.. كذا تسوين فينا..

وراح وقف وصد وخبى وجهه بكفوفه وهو واقف..

وراح يمسح دموعه.. ولاهو عارف يحضنها.. من الشغلات على صدرها..

موضي تبي تستعدل.. تمسكت بيد نواف.. :

عدلني نواف..

بدهشه:شفيك يمه.. خلك مكانك..

بحده.. بس الصوت طلع ضعيف :قومني نواف..

بمحاولة لتهدئتها:اصبري ارفع السرير..

مهره وقفت قدام فارس وكانت تهمس له وتبتسم..

وفارس مو عارف يسكت يمسح دموعه.. وتنزل زياده..

سعود بمرح:اثاري قلبك رهيف.. يافيرس..

رفع نواف السرير لموضي.. افتحت ذرعانها: تعال امي تعال.. شفني مافيني شي..

التفت فارس.. وبوجه كله دموع:ابي المك واحشر نفسي بحضنك يمه.. بس اخاف اعورك..

ابتسمت : تعال يابعدهم.. قربك يخليني اطيب مايعورني..

فارس بطفولة.. راح ضم موضي.. ويتحاشى يصيد الاجهزه والاسلاك على صدرها..

سيف بتحذير: انتبه ياورع.. جدتك..

فارس يبوس خدود موضي وراسها :فديتك.. يعني ذمه بدون موضي شيصير فينا..

سيف صغير :وانا ابي ابوس جديدة..

التفتت عليه:يممممه يمه قليبي ..

شاله نواف :بس بوسه صغيره..

باس جبين موضي..

اللي رد لونها وهم حولها ويحوفونها حوف..!

*****

وبعد ماانتهت الزيارة.. ومشوا..بلقيس.. قاعده ترتب مكانها بصمت.. وحاسه بالذنب.. ويتردد في اذنها كلام سيف..

وكيف تجاهلت اوجاعه.. وهي اللي تعرف كيف الموت شكل تعرجات وعراقيل بحياتة..

رنت في اذنها كلمتة(بس والله طحتي من عيني)..!

وانمغصت.. وانوجعت..

موضي وهي تبدا تخدر.. بعد الابره:

بلقيس.. وش فيك.. ماانتي عاجبتني..

حاولت تبتسم:ولاشي يمه.. معطتك جوك مع عيالك.. قبل انفرد فيك..

ابتسمت وهي ياخذها النوم فعلاً.. :الله لايحرمني منكم امي..الله يحفظكم ولااشوف فيكم مكروه..

غفت.. وبلقيس تناظرها.. عدلت الشرشف عليها.. وقللت النور.. كانت ترتب الطاوله.. وهي حاسه بغصه..

لما انفتح الباب بخفوت.. رفعت عينها.. كان سيف..

حاول يتحاشى عيونها وهو يدخل ويحط اكياس على الاريكه.. فيها تسالي.. وكيك.. وعصاير..

وبيده الثانيه.. شاحن ايفون.. وشاحن متنقل.. حطه ع الاريكه.. وبدون يطالعها:استخدميه.. لاتخلين جوالك يشحن عند الممرضات.. وهو في صور لك واشياء تخصك..

(الغصه ترقى وترقى في حلقها.. هي نست شاحنها.. وسيف لاحظها وهي تطلع بجوالها تشحنه عند الممرضات.. تعنى ورجع.. مع انه تعبان حده..)..!

التفت بيمشي..

وراحت بسرعه له.. ووقفت قدام الباب.. في وجهه.. وبدموع:سيف آسفه.. والله آسفه..

نزل عيونه لها.. وظل يناظر فيها وهي تتكلم ومو حاطه عينها بعينه..

قالت:كلشي ولازعلك يابوفارس..

كملت وهي تبكي وتتعبر :انت تقول اني طحت من عينك.. كيف طاوعك قلبك تقوله..

ابتسم وهو يناظرها.. وهي تتحلطم وتبرر..

اخيرا ً رفعت عينها له:خلاص عاد سامحني.. قوول شي..

فاجئها وضمها لصدره.. وقال:

وش تبين اقول..تدرين ان ماحد قدر ينشف دمي مثل ماسويتي.. ..

همست:انا.... ؟!

قال:لاني خابر ان حركات الخباثه هذي ماهي لك.. وعارف ان قلبك مايشيل ولاهو اسود.. وبس والله.. يشهد الله اني ماوصلت.. وحاط واحد بالمية ان امي عايشه..

بكت وهي تخبي وجهها بصدره: آسفه.. ياربي انا شسويت..

باس راسها وبحنية :تمونين.. يالنملة..!

........

بعد ايام..

مقتطفات لابطالنا..

*هادي في الجوال:هي زينه الحين.. وطلعت من المستشفى..

جمان بعصبية وخوف:وليه توك تقول لي..

هادي :لو قلت لك كنتي بتجين..؟!

صاحت:اكيد.. بجي.. ذي امي.. وتراها فوق كل شي..

هادي بجمود:عشان كذا ماقلت لك.. وانتي معطتني خبر.. عن صعوبة حملك.. الحين هي بخير.. وتقدرين على الاقل تتصلين وتسمعينها صوتك.. اخوانك كلهم جاو...

ارتبكت :واذا لزمت ارجع.. مابي اولد عندهم.. مابي اعطي هالفرحه لشاهين..

ضحك هادي بتهكم وقهر:توك تقولين امك فوق كل شي.. وش جاب طاري شاهين..

جمان بتوتر :هادي.. لاتضغط علي..

قال بخفوت:تحبينه.. والى الآن.. وهو محور تفكيرك.. واللي يحب مايضر نفس ماتسوين.. سلمي بمشاعرك.. وتنازلي ياجمان..

توسعت عيونها بصدمه والتزمت الصمت..

وهادي مانتظر منها رد..

قفل الخط..!.

******

شاهين مبين نفسيته مطنشه ومبين مبرد على مشاعره..

واللي يشوفه يقوول نسى وسلى..

وحاط هالمثل رد لگل من يطعن في مصداقية شعوره الحالي من عافنا عفناه ولو كان غالي)..

كانوا بيان وديم.. منسدحين على الارض.. يتصفحون ثلاث البومات قديمة.. حاطتهم سلمى عندهم.. وراحت تخلص الغداء..

نزل وجلس وهي يصب له قهوة :

وش عندكم.. من وين جايبين هالصور..

ديم منسدحه على بطنها وعينها في الالبوم :جدي وجدتي.. عروسه.. سوفها بابا.. تجنن..

وسحبت كم صورة خذتها لشاهين.. ابتسم على جو صور الزواج.. امه صغيره.. بملامح طفولية.. وشعر اسود مسدول.. وفستان موديل قديم وطرحة.. وكمية ذهب..يالله.. وابوه.. باين من زقرتية زمان.. ببشت.. وملامح حاده.. ولا اي ابتسامة.. كل واحد على كنبة.. كأنهم مايخصون بعض.. ولا بينهم اي نظره ولا ابتسامة..

جات امه.. وبيدها ترمس شاي ترج فيه..

ضحك شاهين:

والله من اشوف صور عرسكم اسئل نفسي هالسؤال.. ليش مقندبين يمه كذا.. احد مهاوشكم قبل الزفه..

حطت الترمس.. وببتسامة مرحه:

والله ياولدي من الفهاوة.. ابوك قالوا له لقينا لك مره قال ياله تم.. وانا ملكو علي وبلغوني من تالي.. ولاادري وش المصيبه اللي دردمون فيها..عاد مثل ما انت شايف حسينا بالوهقه.. على هالكوشه الغبره.. ويعني مسوين مثل المصرين زفه.. ولا ترى اهلنا مايرضون بالديره.. الرجال لحال والنسا لحال.. يجيها يصفق عيشتها بغرفة النوم..والله ياشاهين.. عرسٍ مبارك.. ياانا وابوك مانقدر نعيش يوم بدون بعضنا.. اي والله ان قلبي معلق في ابوك.. وعينه ماتشوف غيري..

ضحك شاهين :واحنا شوفة.. وخطبة.. وتمعشق.. وزفة وشهر عسل.. ولا صلحنا..اي والله يمه راحت البركة..لا انا فقلبها.. وانا ماعدت اشوفها شي..

امه و ماتصدق هالكلام.. رفعت حاجب وكنها تختبره:

اجل دام هذا قولك.. خالتك عندها بنتها.. المَّها.. تذكرها.. طيوبه وبتحن بناتك.. واطلقت وماتوفقت مع رجلها وماعليها عيال.. نخطبها لك.. حنينة ياشاهين (وبتأكيد مبالغ) حنينة..

شاهين يتجاهل كلامها.. ويطالع مجموعة صور جابتهم بيان: قفلي الموضوع..

سلمى تاخذ صور طلعوهم البنات تدخلهم بالالبوم.. : بعد عمري موضي.. والله هدتها هالطيحه..

شاهين بخفوت:موجعن قلبي عليها..

رفعت له صورة وهي تضحك:شف الصوره كلنا جميع.. والله احمد ربي ان ابوك كان مفهي.. ولا كان انشلعت عينه على موضي..شف شزينها..

ضحك وهو يشوف الصوره.. هم زواجهم كان بليلة وحده ابوه وعمه سعود.. ومن بياض النية.. الزفه كلهم سوا مع حريمهم.. :

هالحين عمتي موضي ورى على موضة الاوربين وانتي يمه مسوينك كنك من الصعيد..

ماظل ذهبه الا ولبستيها..

سلمى تتحسر:ايه مير انت خابر خالتك موضي من الرياض متمدنة..شفها ماغير تاج وعقد الماس.. كانت شايفه عرس ديانا بالتلفزيون وتقلد.. وانا حريم الديره هولو فيني الله يحلهم.. لبسوني ذهب جهازي كله..وامي بعد ذاك الحين شالت منه.. عن الحسد بعد.. مو عشان الاطلالة..

شاهين يتأمل الصورة.. :

بس والله جميله ..

ضحكت:ايه عليك من الملامح.. لاتركز في التهاويل..

شاهين بمرح:يعني يمه.. الا انه زواج تقليدي.. بس جدتي مزنه.. عرفت تختار..ماوهقت ابوي وعمي نفس الأولين..

صبت شاي وارفعت البيالة تشوف اذا خدر :

جدتك.. عارفه عياله.. ذوقهم صعب.. وتسلاب.. كانو زقرتية.. وشايفين حالهم.. مافي شي يرضيهم.. ورايحين ومسافرين وشايفين.. لو ماختارت شي يملي عيونهم..ماستقروا ولاقعدوا..

شاهين:حكيمة..!!

بيان رفعت صوره : بابا هذي ماما صح..

طالع الصورة وصبع بيان على بنت صغيرة جالسه يم شاهين.. وبنت صغيره بعمر السنه بحضنه..

قال:لا اللي جنبي عمتك نجود الله يرحمها.. امك اللي بحضني.. هي كانت الصغيره.. وقتها..

طالع الصوره بحزن وحنين وشرود..

وبيان تقول :عمتي نجود زي ماما..

سلمى:ايه اول يفكرونهم خوات..حيل متشابهات.. الله يرحم عمتك.. ويرد امك سالمة..

شاهين مازال يدقق في الصورة وملامحهم.. وطفولتهم.. تمتم بغصة:

انا ذبحتهم ثنتينهم.. نجود بالحادث.. وبعدها جمان باسود افعالي....

سلمى عطت بيان الالبوم:روحي امي مع اختك.. الصالة الثانيه شوفو الصور..

طاعوها.. ومسكت ذراعه :

شاهين يمه.. دورها.. الزمن كفيل يطيب الجروح..

تنهد :ذبحتها بجروح ماتندمل.. واجرحتني.. بجرح تقيح مايطيب.. يايمه لا انا اللي سويته فيها شوي.. ولا اللي سوته فيني ينغفر.. ماعاد ننفع بعض ولا نتأمل في بعض ..

سلمى:ترى الحب يمه.. فوق كل شي.. ويسوي المعجزات..

زفر وقام:الا قصتنا العقيمة.. ذي مالها علاج يمه..

وتنهد ببتسامة وحزن:ليتني مثل ابوي وعمي.. يوم شفت الحلا والزين.. نسيت كل ماضي وكل حرمه.. ان كان ماحد غلب جمان يمه.. بس كنت غبي..لا ملا عيني زين.. ولاشبع قلبي حب ودلال..

وتوجه للباب:بروح المجلس عند ابوي.. لاخلص الغدا.. نادينا..

وطلع..

وقف في الحديقه ورفع صوره فيها عمه وابوه بالعرس.. وموضي وامه..

في هذا اليوم.. وبشقاوة اخوان.. ابوه وعمه.. تعاهدوا.. ان كل واحد يزوج بنته لولد الثاني.. كانوا في علم الغيب.. مانخلقوا.. ولاصاروا..

بقدرة الله سيف عشق نجود وتزوجوا قبل حتى يكبرون صح..!

وبنفس القدرة تزوج جمان وقلبه معلق بثانية..

وقدر الله وماتت نجود.. وفقد سيف مشاعره وكل الحب معها..

وانا تعلقت بجمان.. وباللي قبلها.. سيف بعشقه ووفاءه.. تزوج زوجات عابثه وطلق.. وتزوج مهره وحبها صدق ونسى نجود..

وانا اللي كنت مفكرني ماحب جمان.. عجزت اتزوج غيرها.. ابها وبدونها.. عجزت.. اسويها وربي..

يعني الحين من گان عاشق صدق.. سيف ونجود.. ولا انا وجمان..!!!!!!!

‏لا هاج موج البحر واحتار مجدافي

من لي عوينٍ على الشدات غير الله

*******

قبل يومين من الان.. وقبل تطلع موضي من المشفى..

سيف ومهره معها.. ومهره تعدل ازرارها بعد ماشالوا منها التخطيط.. موضي : الله لايكشف لنا ستر.. كل شوي دالعين جيبي مركبين هالبلاء..

ضحك سيف:

والله لو اني من ابوي.. كان ذبحتك.. فوضى يتكشفون على الحلال..

مهره بضحك:انت ماشفت ابوي سعود وهو يطلع ويتحلطم..

موضي:عاد هو يبالغ.. حريم ممرضات..

مهره تداعبها.. وهي تعدل الروب:ولو تستري يامره.. الدكتور اللي سوا العملية رجال.. وشاف هالزين والبياض.. هسه كيف ابوي سعود بيمحي النقطه السوداء ذي من عقلوه..

موضي تحمر باحراج:اسكتي لاتذكريني.. لا ودكتور مزيون وصغير.. قد سيف .. انا في ذيك الحاله وسعود يقول مافيه دكتوره..

ضحك سيف:ومبسوطه تقولين مزيون.. والله الطيحة ضربت في مخك ياموضي..!.

طق الباب وتحجبت مهره بسرعة.. وحطت نقابها..

وموضي لفت شيلتها :اصبري يمكن ابوك..

سيف:تغطي يمه يمكن الدكتور..لو ابوي كان دخل..

حطت طرف الشيله على وجهها..

وسيف:حياك..

فتح الباب.. وهو يتنحنح.. ليخترق صوت تلك النحنحه فؤاد موضي..

وهي تفك الشيله وبانفعال ودموع سريعه :وليـــد..!!!!!!!!

وليد وهو يتوجه لها:خلف ابووي..

انتهت الكلمتين بحضن انهياري باكي.. من موضي ووليد.. تخلله العتب المحبب والشوق..

وليد يبوس كفها وخدها وراسها :

ماجوره يالغاليه..

مهره بدهشه :يالله خالي وليد بالثوب غير..

سيف يتمسخر:شوفي ازراره مفتحه.. وحاسر.. هذا خال.. مايعرف يرسم..

التفت وليد..:ياكلب.. كنت مستعجل.. يادوب تروشت ولبست..

سيف يتبادل معه سلام خشم.. ويشد قماش الثوب من ذراعه:فصل لك ثياب.. ضاق عليك.. فوق السنه.. مالبستهم..

وليد يطالع الثوب :لاتقوله.. متنت..

مهره تضحك :يبالغ.. ماعليك منه.. كيفك ياخال..

وليد بصدمه:يابنت ماعرفتك بالنقاب..بتغشين مني فيذا يعني..

مهره فكت نقابها واكتفت بالحجاب: لا...بس فكرناك الدكتور.. ماجات ماريا.. معك..

وليد يجلس عند موضي:

فكرت اسوي لها اوراق زياره بس بطول المسئلة.. خليتها.. وجيت..

وبوله:شلونك ياخيتي.. بشريني عنك... الله لايبين غلاك ياموضي.. اوجعتي قلوبنا..!

(لما ننتظر ان تحل مصيبه.. او كارثه لأحبابنا لنظهر الغلا.. لما لانستطيع ايصاله قبل ذلك).!!

*****

زينه تكلم سندس :

لازم بنروح نتحمد السلامه.. لام سيف.. واصلاً نبي نشوف مهير.. ميته عليها..

سندس :اي والله الكلبه عزت مع هالسيف.. انا بشوف.. اذا قدرت جيتكم هناك.. بس متى بتروحون..

زينه: يمكن بعد بكره كذا...

سندس:واخبار نفسيتك بعد.. ماتم الإنفصال...

زينه:اسكتي وربي فرحتي ماتشيلها الأرض.. يمه هم وانزاح.. واهم شي ان خلص الاجراءات.. حاول يتلوى بس ماعطيته فرصه..

زينه:ايه خايف تفضحينه.. انتي بالله عليك كيف كنتي ساكته على هالبلاوي.. وش صبرك..

زينه :خلاص سندس راح بخيره وشره.. ماعاد ابي اسمع طاريه..!.

سندس:الله يعوضك خير.. يازوين ويجيك ذاك الأمير المطنوخ.. و يستاهلك..

زينه:يابنت الحلال.. مانبي عوض.. نبي راحة البال.. والله يامقابل صبحا.. وهالنخيل.. ابرك من ابرك رجال..

ضحكت:عاد لاتتعقدين.. ياخيتي.. توك صغيرة.. والأطخم المقدر لك.. قاعد يدور عليك الحين..

زينه:والله ياسندس.. اللي تجرب الرجاجيل في عبد الاله.. ماعاد تطري العرس..!

****

سيف يلعب بالألعاب اللي ارسلتهم سما له..معاه ديم..

مهره تمشط بيان وترفع شعرها بمطاط لانه طول:تصدق بس قلت له انها من سما عرفها.. ويقول ليش ماجات مع وليد..الكلب.. قهرني..

سيف وهو يشتغل على الاب:طيب وين المشكله.. من جدك غيرانه من سما.. ترى هي افرضت محبتها عنده.. باسلوبها معه..

مهره تنزل غره لبيان :ماهو غيره سيف..

والتفتت :سيف قم شيل هالالعاب قبل تجي جده مزنه.. وتقول ليه بيتكم وسخ..

سيف ضحك:والله غلا موضي اللي جابها..لها وحشة ام فهد..

مهره :متحمسه اشوفها.. يعني متخيل الى الان علاقتي بجدتك.. مكالمات..

سيف :بتحبينها.. على جوك..

مهره:عاد العجز والجدات لعبتي..

وابتسمت لبيان.. وهي ترتب فستانها.. وتعطرها..:لبسي معاضدك وخواتمك..عشان تكمل الكشخه..

بيان باستها:شكرا خاله مهره..

مهره ببتسامة واسعه :بعد عمري عفوا ً..

وطالعت ديم : ديمي لبستي ذهبك..

رفعت كفها :ايه خالتي.. سوفي خاتم.. سواره..

مهره بانهيار:يمممه هاليدين ينوكلووون..

سيف اختلس النظر لها.. كمية امومة في مهره.. وهي بعدها ماصارت ام..

لمحته وهي ترتب مشوط بيان وديم قالت:شهالنظره..؟!

قال:عارفه الكشخه اللي بتصلح لجدتي مزنه.. فساتين وذهب..

ضحكت :لو كانت النفسيه زي صبحا.. بتشوف بيان وديم ترند.. طبعا ً وسيفي عاد شفه ثوب.. وطاقيه..لازم نحترم ذائقة الجدات.. عشان نروقهم ولايتسخطون..

سيف :حستي البزارين بهالملابس..

جاهم صوت الباب يفتح ونواف : ياعيال..

مهره حطت عليها شال.. وسيف :حياكم..

وصلهم صوت حلطمة الجده: ذا عتب..عنبوكم.. بنرقا ونلقى المهراجا.. من عمرك ياسعود هيس.. حاط عشرين عتبة عشان ماجيكم..

فارس:مادرينا جديده كان حطينا لك درج متحرك.. ولاممشى كهرب نفس المطارات..

مزنه:تطنز..ياولد التسلب.. عاد دام ابوك سويف ماعليك شرهه..

وخطت داخل وهي تتكى على عكاز رباعي..

ضحك سيف وهو يجيها:

حااااقدة على سويف.. مادري بايق حلاالتس.. يامزنه..

وفجع مهره وهو يعانقها.. وزين ماطاحت.. وتضحك وهي تضرب كتفه :خف علي يالسلوقي لاطيح.. مافيني شدتك..

مهره عيونها تلمع على شوفة سيف بشكل الحفيد.. وهو يضمها بشوق وحماس ويشمها ويداعبها:

يازينك يامزنه.. مشتااق لتس.. يالووووووه ياريحتس.. ود تسكن بجوفي..

*وضعت كفها المجعده خلف عنقه.. وانزلت رأسه.. وسيفي ينحني طواعية.. كان صغير.. واذا رأته انحنت وقبلت خده..

سيف الآن يفوقها قامة بمراحل.. وهي تثنيه لتقبله كما كانت تفعل.. *

وسيف يداعبها ويهمس:ترى زوجتي تغار.. ماترضى احد يبوسني الا هي..

همست الجده بخبث:والله دامها.. خلت سنك يبان وتضحك.. نخلي لها الخد وراعيه..

سيف يرجع يبوس خدها : عاد انا ماعزا عن خدك.. لو تخليتي انتي..

ضحكت.. وهو يساعدها ويأشر لمهره:

وهذي مهره ياجدة.. تعالي وراتس مفهيه..

مهره وعيونها تلمع :جديده..تهبليييييين.. تهبلين.. كل اسمع صوتك وابي اشوفك.. ويقولون انك حالفة ماتصورين..

الجده :وووي وووي.. وش هالزين..هذا مهره.. هذا بيض الصعوو اللي نسمع فيه ومانشوفه..

مهره تبوس كفها وخدها وراسها.. : والله الزين منك وفيك يابعد راسي..

مزنه:الله واكبر عليك ياسيف.. كم شهر ماخذها.. ماجبتها.. اشوفها..

سيف بنص عيون وهو يمشيها لصالة :تعرفيني ماحب الديره.. ولا احب اجيها..

مزنه:ايه فالح تطارد في ديار الانجليز..ياقليل الخاتمه..

سيف وهو يساعدها تجلس ويبعد عكازها:

عاد تقارنين ديرة الانجليز.. بديرتكم..

الجده باسلوب لاذع :يقولون عنز الشعيب.. ماتبي الا التيس الغريب..

مهره قفلت فمها بكفها وكتمت شهقتها..

وفارس :اوووه شيت..

ونواف فقع ضحك :والله مايعرف لك الا مزنه.. هي اللي تمسح فيك البلاط رايحه جايه..

سيف :مزنه.. خفي.. عشان نحافظ على الاحترام بينا..

الجده ولاعليها:اقول قم.. خل امك تجي.. قلبي عليها ولا الضوو..

سيف :ناديها.. وبتسمعك.. في الغرفه تحت..

طلعت موضي ومعها سعود.. كان ماسكها وهي تمشي ومبتسمه:

ارحبي يمه ارحبي.. نوور البيت..

الجده وبانفعالات غريبه سريعه.. دموعها نفرت.. وهي تلوح لموضي.. بكفها.. باسلوب اقشعر له بدن مهره :حييك حيك.. حيك ولاااازال فيك.. آيوووه ياموضي عساني ماذووق حرتس.. ياجعل يومي قبل يومتس.. قالوو مويضي طايحه.. وطاحت عزومي..

موضي ولانها ماتقدر تنحني جلست جنبها.. وضمت راسها وباسته:

الله يطوول لنا بعمرك.. يالغاليه..ارحبي وارحبي.. يالشيخه..

*تبادلتا حديثا ًوترحيباً وغلا.. عجيبه علاقتهم.. اذا قارنتها بعلاقة جدتي صبحا وامي...لكني اراها واقعية.. اذا تذكرت معاملة امي موضي لي.. *

******

*نامت ديم في حضني..ثرثرت هذه الصغيره.. اشعلت في قلبي الوجع..

تركتني امي وانا في عمرها.. ابتعدت وطال بعدها..

اخبرتني ديم عن شوقها.. واحلامها بجمان..كيف يعيد التاريخ نفسه.. لكن بتغيرات طفيفه.. واسباب واهية.. والضحية امثالي انا وديم.. قلبها ينبض بسرعة.. اشعر به كاعصفور مبتل يكاد يخرج من مكانه وهي تلتصق باضلاعي..!

رمشاها الطويله حزينه وكسيره.. مهما لعبت في النهار وضحكت..ستنطوي باليل وحيدة يلازمها الفقد في قوقعة .. لايطرقها الا احلام متقطعه..بعضها حضن يتلاشى.. وقبلة بدون ملامح.. ورائحة حبيسة داخل روحها الصغيره..

اعرف ان من ضمن تلك الاحلام .. نداءات.. باسمها.. واوامر اشتاقتها.. ديم نامي.. ديم لاطيحين.. ديم لاتوسخين ثيابك..!

احلام ديم.. شفافة.. تنطبع في عيني.. تتكرر من طفولتي.. انا.. باختلاف الأسماء فقط..

اخفيتها بشالي..!

عندما انتقمتي ياجمان من شاهين وحققتي رغبتك في استرداد كبريائك المطعون..!

الم تفكري في اشلاء حربك

انهما ليس الا بيان وديم..!

وان طال بعدك.. لن يزد قلوبهم الا نحولاً.. وشخصياتهم انكساراً.. عيون مهزومه.. وضحكات مغزولة من تصنع.. وكذب.. *

الجده مزنه بهمس وعتب:الحين يابلقيس.. جمان ورا تاركه بناته.. وطايرتن تلاحق ورى الرسم والخرابيط..

بلقيس فاجئها السؤال.. ارتبكت وابتسمت:

جده تعرفين جمان.. طموحها يعانق الثريا.... تخلص هالدوره وتجي.. وبناته هذا احنا حولهم وخالتي سلمى..

الجده:يايمه العيال ينكسرون بدون امهم.. يوم انها عزمت كان خذتهم..معها.. ولاقعدت وقضبت ارضه..!

بلقيس :بيان تدرس جده.. ماقدرت تاخذها..خلتهم مع ابوهم وهو راضي..

الجده بتهكم وفراسه:

لاوالله مهب راضي.. هالروحه من ورى خاطروه..

مهره ارتسمت في وجهها شبح ابتسامه وهي مستمره في لمساتها على ديم النايمه على صدرها..

وبلقيس بتبرير:شلون يعني ياجده.. الا تطلعين جمان غلطانه.. وانتي داخله بعقل شاهين وكاشفه الغيب عنه..راضي وراضي وهو اللي موصلها المطار..

الجده :الخلا بس.. اشوف طالت وشمخت ياحبة النقل ترادين..انا اللي اعرفه وليدي.. يوم شفته اليوم مب الاولي.. شاين وناحل.. ياقلبي قلبه.. عاد هو وحيد فهيد.. ان طولت اختك وهملته. . ازوجه شيخة شيختها.. وخلي هالأصباغ تنفعها..

توسعت عيون بلقيس :جده شهالتحيز.. مع الأولاد.. لا والله اللي عينا خير.. دام هذا حكيك..

مهره وبلقيس كانوا جالسين مع الجده في غرفتها.. باليل.. والشباب سهرانين بره مع شاهين.. وسعود وموضي نايمين..

بره كانت جلسه شبابية..

شاهين:وين البنات بمشي..

سيف: وين يارجل اجلس صل الفجر وبعدها تيسر..

شاهين:وقت ثاني بروح يمكن اغفي شوي عندي رحلة الصباح..

سيف وفعلياً متأزم عشانه:

تزل ياولد العم.. تزل..

ببتسامة باهته:الله يعين وانا اخوك..كلم يانواف خل البنات يطلعون..

نواف:خلهم.. مبسوطين فيذا.

شاهين:ماعرف انام الا بهم.. اخلص تأخرت..

فارس :ديم نايمه عند مهره..

قام سيف :خلاص اجيبها.. شغل سيارتك..

دخل وقال لبيان وكانت تتابع التلفزيون:قومي خالي البسي نعالك.. ابوك بيمشي..

قامت:وديمي.. نامت بغرفة جده كبيره..

سيف ابتسم وهو يجلس نص ركبه ويداعب شعرها: خليها عندنا طيب..

بيان وهي تلبس جزمتها:

بعد ماما مو هنا.. وديم تنام هنا.. وبابا.. عنده رحلة الصباح.. بيان.. شتسوي.. تموت..

ضحك وهو يضمها:يابعدهم.. وش خليتي من امك انتي..

همست في اذنه.. وهي تعانقه:خالي.. جب ماما.. وااااحشتني.. بموت لو ماشوفها..!

شعر بهمستها كالأبره.. اللتي تسللت لقلبه بنعومة وبطئ شديد واحدثت تسريب هائل من الوجع. في داخله. .!

نحن الكبار.. موقنين انها بخير..

وبخبرتنا في الحياه نعتاد على البعد..

وعلى أمل بعودتها.. لاننا نعلم.. انها لن تهاجر حتى المشيب..

لكن..

كيف للصغار استيعاب.. الحدث وابعاده..

انهم فقط يتبعثرون. ويفقدون.. ويتألمون.. وتمرض دواخلهم.. ".

همس :ان شاء الله خالي.. ابشري..

وقف .. والقى نظره عليها.. بعدها على سيف النايم على الكنبة.. وطرى عليه فارس وقت كان صغير وجا له بعد فترة.. وشعره مهمل وطويل..

مشى بخطوات متثاقله.. لغرفة جدته.. والقى نظره على ديم النايمه عند مهره..

احنا ياعيال سعود.. الأسوء.. في الابوه والأمومه.. الواقع اننا ننجبهم عشقاً ونتركهم يتامى..

مهره عقدت حواجبها.. وهي تشوفه واقف.. وباين مخه مشتت..

الجده:وش بلاك مضيع..بسم الله على عقلك..

توجه لمهره:مافيني شي.. هاتي ديم ابوها بيمشي..

مهره: طيب حرام بيضيع نومها.. خلها..

خذها:ابوهم يبيهم.. وقومي اخذي سيف لفراشه نايم بالصاله..

قال وكذا وراح..

بلقيس باستغراب: وش به متعكر..

مهره هزت كتفها: مادري..

الجدة:والله العالم.. ان بحوركم عميقه ياعيال سعود.. كل واحد بقلبه.. ونه وونين..!

بلقيس: الله يكافينا شر الون والونين ياجده..!.

من يحضن الليل لين أحلامنا تدفى ؟

‏للدرب وحشة مثل ما للسهر عثره..!!

.......

في يوم جديد..

وقف ايوب عند بيت سعود..

وراح ينزل الاشياء من شنطة السيارة.. نزلت زينه..وراحت عند نافذة صبحا :وش فيك ياجدة رقدتي.. انزلي..

صبحا:بروح لبنت عمي جواهر.. ساعة زمن.. ثم اجي.. لاتدري اني وصلت فيذا ومامريتها..عاد وش ينجيني من نقدها ولسانها..

زينه توسعت عيونها:

وش ينزلني الحالي.. جديده وش فيك تمترين هاشمي..الله يهديك.. يكفي ماوصلنا الا المسا..وش يدخلني الحالي..

صبحا تطل من النافذه : انتبه يا ايوب.. لقراش الليمون.. لاتنكسر..

والتفتت لزينه:كلمي اختس.. وتجي تشيل معك.. ماهنا سنع يابنات غازي.. وهقتكم بريال..

زينه بعصبية وخفوت.. وايوب يدخل الاغراض عبر البوابة.. :

جديده.. ماتسوينها فيني وتمشين.. ماحلت لك جواهر الا ذا الحين.. خلاص اجي معتس ونرجع سوى..

صبحا:وهالاغراض من نخليها له.. الذبيحة بتخيس.. يكفي الطريز.. لمن وصلنا..دخليها خلهم يحطوها بالفريز..

زينه ضربت نافذة جدتها :وانتي شايفه الناس عليها قاصر جايبه ذبيحة..

صبحا:الواجب واجب...ذي ذبيحة سلامة ام سيف..

ركب ايوب.. وصبحا تقوله: روح بيت ماما جواهر يا ايوب..

زينه بغضب:والله لو ادري بتنكبين عفشي ما خاويتك ياصبوح..

صبحا:عنبوك قاطتس لقطه عند مسجد.. بيت اختك بروح اسوي الواجب وارجع.. دام ايوب معنا.. بيرجع ومب راجع لنا الا في خير..

والتفتت :يلا يا ايوب..

وراحو وخلوها..

دخلت من البوابة الكبيره وهي تتحلطم.. وتشوف الاغراض اللي حطهم ايوب..شنطتين صغار لها ولصبحا..

كيس كبير فيه ذبيحة.. سلة فيها قهاوي.. سله فيها مرطبنات ليمون مخلل.. كيس كبير فيه صحن ضخم باتشي.. وباقة ورد..

طبعاً الورد وباتشي.. هدايا زينه.. ولا التهاويل الباقي من صبحا..

توهقت تدق على مهره وذيك ماترد.. تطالع الفيلا قدامها والنوافذ الضخمه.. مافيه احد يمر.. ولا في صوت..

ولاهي عارفه تطق الباب الرئيسي.. الداخلي.. ولاتدل باب المطبخ الخارجي.. حسبي الله على ابليسك ياجديده.. كانك دخلتيني في العيد من اوسع ابوابه.. ومهره التبن ماترد..

تلفتت مافيه احد بالحديقة.. وفي مجلس خارجي.. وشكل انواره مشغله.. انربشت.. لايكون فيه رجال.. واحد يطلع.. دقت دقت على مهره.. وتسب فيها بداخلها..

راحت بتردد اتصلت على سيف.. شوي رد وبترحاب:

مرحبا.. ها.. وصلتو..؟!

زينه بخفوت :بوفارس.. انا بره ومتوهقه.. جديده نزلتني مع شوية اغراض وراحت تقضي مشوار.. ومهره ماترد.. شوفها لي الله يرضى عليك..

فجأه وهو يتكلم.. طلع من المجالس.. ويقفل الجوال..

زينه توترت.. وهو يرحب فيها:

حيالله الزينه.. نور البيت ..ارحبي..

نزلت عيونها: البقى.. يابوفارس.. الحمدلله على سلامة الوالدة.. وسلامتكم..

سيف ببتسامة:الله يسلمك.. ورا تأخرتوا..

زينه بارتباك.. لانها اول مره تكلم سيف مباشر:

ايوب راح يغير زيت السياره وتأخر علينا.. والحين جديده.. راحت لبنت عمها.. ساعة وتجي.. الله يخليك .. نبا نشيل هالاغراض للمطبخ..

توسعت عيون سيف :وش ذا.. عزبة.. ليش الكلافة الله يهديكم..

زينه:والله مافيها من حقكم..هذي هدايا سلامة الخالة موضي..

طلع نواف في ذيك اللحظه وباين كان يضحك ويمسخر فارس..

لما سكت وهو يشوف الموقف..

وموفاهم شسالفة.. بس لوهله فكرها مهره.. بالعباية والنقاب نفس الهيئة.. ضحك:

وش عندها مهره بتهج.. ولابتكشت على هالعفش..

زينه تمنت الارض تنفلق وتسحبها بوسطها.. ثم ترجع تتقفل من جديد..

وسيف يقول بمرح :هذي ماهي مهره اختها.. تعال ياكحيلان شل العفش دخله داخل..

تقدم نواف.. ورايح عن باله ان البنت هي زينه.. اللي ثبتت بمخه ايام وليالي..

وقال: ذبيحة..؟! كلم الشغالات يشيلونها.. ثوبي ابيض لايدمر..

سيف كذلك:عساس انا لابس ثوب كحلي.. شيله نواف..عيب عليك انا اخوك الكبير..

نواف :انا بشيل كلشي الا هالشي.. خاف الله سيف.. توني سابح..

زينه.. ماكان ناقصها الا هالحوار.. هي معصبه من جدتها ومن مهره ومن الطريق والوهقه..

وهم عاد دمهم حار طالعين على جدتهم..

راحت رفعت عبايتها شوي من تحت وربطتها.. عند رجولها.. ورفعت اكمام العباية.. وبشيمه وحده.. رفعت كيس الذبيحة:

علمون وين باب مطبخكم...انا اخذها... لاتلطخ ثيابكم.. بس ياليتك يابوفارس تشيل صحن الحلى.. واخوك يشيل الورد.. والباقي خلوه ارجع اشيله..

سيف ونواف.. حسوا بجبل طاح عليهم وفلقهم نصين من الفشيله والاحراج..

سيف بسرعة راح لها:نزليها يالزينه.. مزوح.. وش فيك الله يهديك.. شينتي الأخلاق علينا..

نواف هنا..من سمع اسمها..

حدق.. ودقق.. في كفها وهي تنزل الكيس.. حدق في عيونها.. اللي تطل من النقاب.. قامتها وطولها.. رزتها.. وصوتها..

اذاً هذي زينه..!

زينه بتنهيدة:ماهو قصدي يابوفارس.. بس واصله من طريق.. وجديده رافعه ضغطي.. ابي بس درب وادخل الاغراض.. مب عدلة ادرعم في البيت..

شال سيف الكيس.. وشال القهاوي باليد الثانيه.. البيت بيتك.. دفي الباب برجلك وادخلي.. روحي وحنا بنجيب الاغراض..

قال كذا وتوجه للباب الخلفي تبع المطبخ.. نواف بصمت وربكه يشيل باقي الاغراض.. وجاته صرخة سيف وهو طالع من المجالس :ديوووووووون..

وجاها يركض.. كان بثوب ابيض..

زينه بوله وشوق تلقفته:ياقلب زيون ..وعينها..

وكيف تطالع بوجهه وبشوق بالغ:

يمه صاااار رجال..صاروا يروحون لندن ويسافرون..وانجي نتحمدلهم السلامة..

سيف يعانقها.. بقوووه..

ونواف يشيل الشغلات ويروح وهو يسمع كلامها وشوقها لسيف الصغير:محلاك بالثوب.. انطعن.. جعلني قبلك.. شهالملح يارووح زوووين..!

*****

بعد شوي دخل سيف الغرفه..

كلشي مشغل.. ومبخرة العود على التسريحة.. نادا:

مهره..!!

ردت من غرفة التبديل: عينها..

ابتسم.. وهو يروح لها..:وش عندك مانزلتي.. وصلوا جماعتك..

دخل عليها وهي متوهقه بسحابها.. قالت:سيف تكفى قفله لي.. عقدني..

ابتسم وهو يقرب منها..

*اقترب وامامي ظهر مهره.. واشياء كانت تخفيها "اعتدتها..وقبلتها".. حتى انسيتها وجعها منها في يوم مضى..

امسك قفل السحاب.. واعيد في ذهني يوم زواجنا.. وعصبيتها.. وانفعالها..

كيف كانت مرعوبة من فكرة ان تستدير واغلق ثوبها..

اغلقه الان وعيني لاتفارق لونها الذي اعشق..اصعد بعيني لعنقها.. وشعرها اللذي ترفعه بكفها.. لتمكن اصابعي من العبور.. اقفلته ببطئ..كم من الاميال قطعناها في علاقتنا.. كم اقتربنا يامهره ونقترب اكثر.. *

باس خلف عنقها.. وتركت شعرها على ظهرها.. وهي تقول :وش عندك صعدت..

سيف:ابد.. شلت ذبيحة جايبتها جدتك ونقطت على ثوبي..جيت ابدل..

مهره باللهفه :وصلوا..

سيف وهو يفتح دولابه:ايه بس جدتك تركت زينه ومادري وين راحت وبترجع..

فسخ ثوبه.. ومهره تشوف نقاط الدم ع الثوب ضحكت:

غريبه عليك.. صراحه..

هو:وش الغريب..؟!

مهره تاخذ حلق من الخزنه المفتوحه :انت لالبست وسكبت.. ياويل احد يصيدك ولايوسخك.. يعني ماانسى سيف يوم مسح الشوكلت ببدلتك بلندن..

سيف يطلع ثوب ويلبسه: لاتذكريني..والله لو انه مب سميي كان كل كف فر وجهه..

مهره تمازحه:وعساك حشمت اهلي وماقلت لهم شي..

سيف يطلع معها من غرفة التبديل:وانا اقدر اقول شي.. زينه فشلتني انا ونواف.. فصلت.. وبغت تشيلها هي..

ضحكت:زيون عاد مسالمة.. بس اكيد ضغطتوها..

قالت كذا وهي تشيل كبكاته وتجي تركبهم له..

سيف:المهم نزلي عندها.. عصبت لانها اتصلت عليك وماتردين..

مهره :جوالي نسيته بالصالة..

سيف منزل عيونه عليها.. كيف تهتم تسوي له هالتفاصيل.. تقفل الكبك.. وازرار ثوبه.. تبخ عطر من اختيارها..

منسجمه وهي تحط العود بمعصمها وتروح تاخذ منه بظهر سبابتها.. وتحطه منه تحت اذنه..

وعلى دقنه وترجع تاخذ وتحطه على شنبه وهي مبتسمه ومتحاشيه عيونه.. لما حست بنظرته الذايبه لها.. :لاتناظرني كذا..ارتبك..

رفع حاجب:بالله..

مهره تداعبه :يعني اشوي..

وتوه بتعطر نفسها بالعود..

مسك ذقنها.. وفاجئها وهو يمسح خده برقبتها..

وهمس:كذا احسن..

*ويعرف كيف يعشقني باحترافية.. فأذوب فيه حتى نخاعي.. ياربي سيف... ولاتحرمني اياه*

*****

يومين مرت.. بجتماع الاحباب.. الجدات مزنه وصبحا مره تآلفوا.. وسواليفهم عن المعارف.. (تعرفين ام فلان بنت فلان اللي ولدها كذا وهكذا.) .!!

حتى توصلوا لبعض المعارف المشتركه..!

فلك ان تتخيل كمية الاندماج.. كانهم مكتشفين انهم الخوات اللي ضاعوا عن بعض سنين..

زينه.. حيل تغيرت نفسيتها.. بعد الكبت والاوضاع وقضية الانفصال..!

ظلوا هي وجدتها بضيافة بيت سعود وكانوا مجهزين لهم الملحق الخارجي..

انتهى اليوم.. الثاني..

نواف كان بمكتب ابوه في الدور الأرضي مع سيف والاغلب نام لأنها ليلة دوامات..

سيف فرك جبينه:عجزت اربط.. صورة غازي براجح.. بوصول مهره لعساف.. مستحيل صدفة..

نواف:

بس لاتنسى نقطة ان عساف يعرف راجح.. وقد حتى تسلف منه مبلغ على ايام مشروعه الفاشل..

سيف ينفث الدخان :طيب يعرف راجح.. ايش وصله لمهره.. وبعدين مهره ماتعرف راجح لاماضي ولاحاضر.. لما يحط شخص صورة رجال بمكتبه مايقرب له.. فأما انه صديقه بشكل عميق.. او شخصية معروفه ويحترمها.. غازي ابو مهره مو معروف.. يبقى انه صديق راجح.. بس اخوك.. وش دخله..

نواف :والله ياسيف.. الواضح انه عساف كان متواصل مع راجح.. وبينهم اشياء اعمق من اللي ظاهره لنا.. يعني انت وضحت لي ان سما بنت راجح.. تواصلت مع عساف.. وساعدها هناك..خلينا واقعين.. سما اعرفها انا وعساف.. بس معرفتنا فيها سطحية مو مثلك يعني نعرفها شكلاً فقط.. بس دامها الجئت له.. اذا ابوها ناصيها له..

سيف :طيب وكيف وصل لمهره.. وغازي متوفي يمكن من ثمان سنوات.. او اكثر..

نواف بتفكير:يمكن راجح اقترحها.. اقول يمكن.. يعني مثلا عساف سائله لو يعرف بنات وكذا..

سيف بتفكير :لا ماتوقع..راجح باين مايعرف مهره ابد..

نواف:الامور هذي..بتبين مع الوقت.. بس حالياً طعني.. واطلع من سالفة راجح.. لاانت تبي تضره.. ولا انت قد الامور اللي ممكن تجيك من ورا هالناس.

سيف :انا وضحت لك.. ان طلال كلمني..لأن هدفهم منصور.. ومنصور هذا مو بس شغلته هالاثار.. امور كثير.. تحته عصابه.. راجح مجرد فرع صغير يعني تهريب الاثار مو الهدف.. مجرد خيط يبون يمسكون فيه منصور.. انا من خلال الشغلات اللي عطاني طلال.. توصلت ان راجح في السالفه.. ووضحت اني مستحيل اضره.. ولعلمك انا من رجعت هنا وانا ناوي اطلع من هالشغله.. واقفل بابه..

نواف : حلو.. ولاتفكر كثير.. انبسط ياخي.. والباب اللي يجي منه الريح سده واستريح..

قام :الله يسرها.. مب نايم انت..؟!

نواف :لابخلص هالملف.. بكره عندي اجتماع.. واحضر له..

سيف:على القوه يبه.

نواف:يقويك يابعد حيي..!

طلع سيف.. ونواف رجع انغمس في شغله..!

زينه.. في الملحق.. كانت تتقلب ومو عارفه تنام.. تطالع جهة جدتها.. نايمه بعمق..!

وفي داخلها:هذا وماتعرف تنام الا فمكانها.. والله انا اللي استويت ولاني عارفه ارقد..

قامت وطلعت الصاله.. وانتبهت للبرق من النافذه.. وصوت الرعد.. بعده ذرات مطر..

*انه موسم السريات..

العابرات..

النهايات..

والبدايات..!

دائماً المطر يثير في قلبي الحنين.. لاشياء اعلمها.. وكثيره اجهلها..!

وقفت انظر من النافذه.. لسلاسل المطر... تلدها السماء..وتبتلعها الأرض..وتبكيها اوراق الشجر..! ويشيعها قلبي.. بشعور غريب.. لاادري ماهو..!

شردت في حبات المطر..

وطرء علي عنوان كتاب فيصل خرمي

(الحظ لايطرق باب الجميلات)..

تهكمت لنفسي.. هل انا جميله.. حتى لايطرق الحظ بابي..

لاأريد جمالاً.. اريد حظا ً..كنت استاء حين آكل تفاحة وفي جوفها دودة..

او اذا انتعلت حذاء وبداخله زجاجه..

او اذا شربت الشاي وحرق لساني..!

وكنت ألعن حظي..

ليت سوء الحظ.. ظل على تلك السخافات.. ولم يجرح عبدالاله اخلاقي بشكه.. وكرامتي بضربه.. واعصابي بشخصه الذي لايطاق..!

امتحنني ربي لأعلم سوء الحظ كيف..

ماذا الان..؟!

الى أين يادنيا..!

مذ اصدرت المحكمه ورقتي وانا اجدول بعض الاهداف.. تبدء بوظيفه... وكيان.. ورفض تام لأي زواج.. فقد خرجت من الأسر باضرار جسيمه.. وقلبي اصابه هدم.. يصعب ترميمه..!!

اضاء البرق..

يكسر صفحة السماء..وكأنه فتتها وستقع اشلاء.. واغرت زينه للخروج.. وخاصه الحديقه والمنزل في حالة سكون تام والكل نائم..!

نواف.. كان قفل ملفه وهو يسمع المطر طالع الساعه ثلاث بعد منتصف الليل.. طفى انوار المكتب عشان يشوف اضاءت البرق من باب الشرفه والنوافذ الكبيره المطله على بره.. ونواف اصلاً عاشق للمطر من زمان..!

ماقاوم..

فتح الباب وطلع والشرفه مسقفه.. والانوار تبعها مطفيه..

قدامه ساحة الحديقة.. باضاءتها الأرضيه الخافته.. والعشب المنتشي بالماء.. وقف ويدينه على السور.. يستنشق رائحة المطر وعبيره المختلط بالشجر..!

والبرق يقذف بنوره.. مهشم الظلام..!

عقد حواجبه.. وهو يشوفها تمشي هناك..

كانت في مستوى النور الخافت وهو في العتمه والظلام..!

اوقفه الاستغراب.. والوقت.. وعدم الاستيعاب.. ثم الفضول.. (البنت اللي تمشي قريب من الملحق.. اكيد زينه) ..!

*قفز الشيطان على اكتافي ليسحق مبادئي في تلك اللحظه..امام تلك البسيطه.. اللتي تمشي حافيه..ساقها ينتهي بخلخال صغير لمع في الاضاءات الأرضيه.. بقميص قطني ترفعه قليلاً. . اقدامها تطي الماء وتبعثره..!

استغفرت وانا اتذكر الملكة بلقيس وهي تكشف عن ساقيها.. وحين ضنت ان القصر لجي.. زينه تطي في اللجه وقلبي قوارير الزجاج اللتي تتكسر..!!

لماذا هذه المحرمه.. لماذا تلك المعقودة في ذمة رجل آخر.. لماذا مشاعري اللتي حنطتها باقوى مواد الحفظ شيوعاً..تخون توابيت قلبي وتخرج.. التصقت في عيني فارسة على حصان.. واليوم تبلل عجاف سنيني.. باقدام حافيه.. وماء يغمرها..

من تكون زينه..!

هل كانت قريبه مني في حياة اخرى.. هل شعوري الغريب هذا دلالة على وجود تناسخ الأرواح.. كما تعتقده الديانات الاخرى..!

وان انجذابي ليس الا عملاق كامن في روحي الماضيه..!!

استغفرت..

وانا الذي اؤومن ان الروح كيان مستقل..واحده تولد وتعيش وتموت وتحاسب وحيده.. كما سأحاسب على اختلاس النظر لانثى ليست من حقي.. غافله.. ولم تراودني حتى عن نفسها..!

اضاء البرق..

ولااريد ان ينحسر الظلام..

لااريد ان أكف عن النظر لزينه وانا استغفر من لذة اللحظه..واستعيذ من شر ماوقع في قلبي..!*

زينه تفرد اكفها للمطر.. وترفع وجهها وهي مغمضه.. والسماء تلطمها بنعومة..برشقات تغرق شعرها.. وتفاصيل وجهها..!

ونواف.. لايمتنع.... كأنها حلم..

ويذكر الاستيعاذ ولايريد ان ينطقه ..!

تمر البسملة والأستغفار في شفاهه ويبتلعها..

لايريد ان تتضبب الصوره.. ولايصيبها تشويش..

اقسمت ان قلبي يعقوب الأعمى وزينه قميص يوسف اللذي رُمى في وجهه..فاهو اليوم بصير*

التفتت زينه للملحق.. وشكل جدتها تناديها...

راحت ناحية الباب.. واضاء البرق..

التفتت وقت حست احد واقف هناك..

نواف تدارك بسرعه لصق بالجدار وتخبى..

عقدت حاجبها.. وهي تحدق..

لمن ضوا البرق ثاني..

وماشافت احد..

جفل قلبها..

واسرعت تدخل الملحق وتقفل الباب..!

تنهد.. هو.. ودخل المكتب.. وقفل.. والسريات اتت السنه لتعصف بقلبه وكيانه.. وتقتلعه.. كاشجرة ضخمه كانت راسية.. لكنها كسرت كاغصن جاف..!

مطرةٍ فاضت على الدنيا شذاها

‏كنّي اللي قبلها مانيب عايش

‏روحي اللي مدري مني من خذاها

‏ردّها طقّ المطر على الدرايش

****

سعود بتردد:موضي اليوم ماصحيت الا اشوف رسالة بالايميل من جمان.. تطمنا وتقول...

قاطعته وهي تمد كفها:

مابي اسمع عنها شي..

سعود:يابنت الحلال.. مهب زين زعلك منها.. فكري فيها.. ماخذها عن بناتها الا الشديد القوي.. وماتصرفت تسذا الا يوم غزر.. ..

هي بصد وجفا:

تعقب.. الأم لو تصير مداس ماتخلي عياله يتامى وتروح.. لو ضامها شاهين تجي لي وتشكي.. يااصلح بينهم.. ياكلن يروح بحاله.. بس اللي سوته بنتك..يفشل ويوطي الراس..

سعود ومايبي يضغط عليها بعد تعبها.. ولاماهو راضيه حكيها عن جمان:يهداك الله..بس شاهين غلط.. ويستاهل القرصه اللي جاته..

موضي بعصبيه :لا والله مايستاهل ولد فهد.. هو رجال والشرع محلل اربع.. ولو يبي يغدرها حط فوقها اللي عاجبته ويبيها.. وهذا وفضى له الجو.. ماسواها.. لأن اصيل.. وبنتك بياعة العشرة..

سعود:مابي ازعلك وانتي تعبانه.. بس شاهين وهي عينتين في راس.. واللي سوته.. انا معها فيه.. هي صبرت وفي الاخير يوم تمادى عرفت كيف تداويه..!

موضي:قم ياسعود افطر.. وقفل سيرتها تراها ماتجيب لكبدي الا المر..

قالت كذا واطلعت.. تنهد.. ويدعي ان الله يحفظ جمان اللي موراضيه تصرح وينها فيه.. بس لاظلت ارسلت له ايميل وطمنته عليها..

ويدعي ان الله يحنن قلب موضي عليها.. ولاينزل غضب الام فوق راسها وهي بغربه. ووحده..!

******

سيف لابس ثوب وجالس يلبس كنادره ويكلم مهره النايمه:

ليتنا مامدحناك.. وانا اقول ماطلع الا مفطرتني..

مهره بنعس وضجر:ياشيخ.. لكل حصان كبوه.. وبعدين وش عندك شغل فيذا.. ماانت شغلك بلندن..

سيف يحط شماغه على كتفه وعقاله براسه.. :

قايل لك بقابل واحد.. وده يسوي عقد معنا..ويستورد عن طريقنا لمحله..!

مهره تتحلطم.. وقالت:خله بس تعال ارقد..

وارجعت نامت..

سيف مو عاجبه ان بيروح وماقامت.. قام يسوي ازعاج بالعطور والغطيان..

وهي ولاتحس.. طق الباب.. وسيف ينادي:ماما افتحي باب.. انا جوعان..

راح فتح له وابتسم:هلا يبه..

واقف يدعك بعيونه شعره منكوش.. سرواله ساق فوق... والثاني تحت..

ومجرد مافتح.. دخل وهو يقول :ايش تنامين.. قومي..

سيف:والله جاك اللي ينفشك..يالفسله.. مخليه عيالك وبوعيالك من غير فطور..

مهره وهي تحس ان سيف جلس على ظهرها ومع جلسته مشع شعرها صاحت:

سيف طلعه بلا لعانه عاد..

ضحك:الله..!!!.. انا مايخالف.. حتى سيفك.. مب قايمه عشانه..

سيف ينطط على ظهرها ويلح :قومي قومي..

حطت كفها على جنب وجهها.. مع الشعور اللي حسته..

اعصابها فلتت وحست بترمي سيف على السراميك...

لاحظ سيف صمتها.. وانها حيل تضايقت ومب متحمله.. مزح.. بينت ملامحها وهي مغمضه..!.

ومهره.. ومزاجها وتعبيرها من خلال النوم.. يمكن فيها شي..

راح شاله. :

خلاص سيف.. ننزل الحين ونشوف جده موضي مسويه فطور..

استسلم.. وسيف يطفي الابجوره.. ويطلع ويسكر الباب:واروح لديون..

سيف:اذا زينه صحت اوديك عندها..

سيف وذرعانه ملتفه على رقبة سيف:

ايش ماما زعلانه..؟!

سيف ينزل الدرج:ماهي زعلانه.. بس فيها النوم اشوي وتقوم..

سيف:ايش فالس لوح مدلسه.. ماوديني..؟!

سيف :بعدك صغير.. يبه..!

وظل سيف يثرثر وسيف يجاوبه.. ومستغرب من مود مهره الغريب..!

*****

شاهين الجوال باذنه.. :وش قالك..؟!

الرجال:المعلومات اللي وصلنا لها انها بايطاليا.. وماطلعت منها..

شاهين وقلبه ينبض بشكل متسارع.. الا ان صوته راسي ونبراته هاديه:طيب ابي معلومات اكثر.. كيف ممكن تجيبها لي..

الرجال:والله يابوفهد.. ما أضمن لك.. بس هذا يعتمد عليك.. انت قلت انها دارسه بايطاليا.. ممكن تدور مين اصحابها.. السكن اللي كانت عايشه فيه.. جيرانها.. لو في اقارب.. او زمالة هناك.. تتواصل معهم.. وممكن توصل..

شاهين :تمام... بيض الله وجهك ياعبد العزيز والله ماراح انسى وقفتك معي..

عبدالعزيز: حاضرين.. في الخدمه وانا اخوك..

اغلق..

وشرد..

كانت ايطاليا.. ولندن.. من تخميناتهم.. في جلسته الاخيره مع سيف ونواف..

سيف قاله:ايطاليا.. لانها جلست فيها سنين بسبب دراستها.. تقدر تقول بلدها الثاني.. جمان مارست حتى الرسم.. كاهاوية.. عند النافونا وتريفي.. وكانت ترسم سياح بأريحية وكنها.. وحده من الشعب.. واكيد عندك فكره.. انها كانت تتنقل بالاجازات.. لانها تحاول تطور من نفسها.. يعني جمان مجالها واسع هناك ومعارفها كثير.. اما لندن.. ممكن تلجئ لها.. لاني ووليد حولها.. حتى لو مابينت نفسها.. في ناس ممكن تستند لهم وقت تضيق بها..

نواف:لأني اعرف جمان غامرت هالمغامرة.. بس تظل حاطه سابور حولها..حتى لو مايدرون عن وجودها.. اهم شي هي تدري..!

افاق من شروده..

ماغفل وماتوانى عن بحثه عنها.. حتى لو كذب على الجميع انه سلى ونسى..وعافها!!

عندي عشم مثل الكفوف الباردة ورا الهشيم

‏عندي أمل مثل الندى فوق الغصون اليابسة

.........

قبل صلاة الظهر.. في حديقة البيت والاجواء الحلوه بعد مطر البارح..

طلعت مهره..

وكانوا بالجلسات الخارجيه الجدات مزنه وصبحا.. وموضي وزينه تقهويهم.. مهره بنشوى:

يالبيييييه شهالجوو..شكلها ممطره..

زينه وهي تضحك وتبوسها:

الدنيا اغرقت البارح..ماخليتي لاحد نوم يالشينه..

مهره:بالله.. فاتني.. ليش ماصحيتوني..

سلمت على الباقين..

وموضي:نوم العوافي امي.. نامي وريحي راسك..

صبحا:مهير.. وطير.. ورى نايمه ولاقابلتي رجالك في قومته.. وش هالعلوم الشينه..يابنت غازي..

مهره تاخذ صحن مطلعته معها فيه جبن مالح وطماط:

مادري فيني نوم ماهو طبيعي.. راسي ثقيل.. اقوم وارجع ارقد..

موضي باحماس:يمكنك حامل مهره.. كيف ****.. متأخره عليك.. شي..

مهره فهت والصحن فوق كفها ارتجفت. :

وش حامل يمه.. بسم الله شهالطاري..

زينه بوناسه:يمكن ياقليبي.. شفيك مصدومه..

صبحا:المفروض تعرفين.. يوم حملتي حبة الزرار.. وش صار معتس..

مهره ويرجف قلبها.. هي ماجربت الحمل ابد.. ولاتدري وش يصير.. بس المتعارف غثيان.. مافيها.. وتأخر ال****.. هي عادي كذا.. مو منتظمه عندها..

كلت جبنه بالشوكة:لاماتوقع.. نوم بس ونعاس.. وعادي النوم يتلخبط عندي مو شي جديد..

مزنه:وراااه انربشتي.. وانتي ماتبين الحمال..؟!

مهره :ماهو قصدي ياجده.. بس تونا وش حماله..

مزنه وبدون قيود:وش توكم يابنيتي.. يقولون الأولين دامها تحت الفحول ماتحول.. وان شاء الله انه.. ..

شرقت مهره.. وموضي تضحك وتعطيها الماي :

يمه شفيك.. الله يهديك وش هالكلام..

صبحا:وهي صادقه ام فهد.. روحي سوي لك تحليل.. والله يرزقكم الخلف الصالح..

مهره تحط الكاس :مابي اسوي تحليل.. مافيني شي.. خلاص انسوا.. من بكره بقوم من الفجر.. حشى.. طولت في النوم سوتوني حامل.. بكره أولد..

ضحكت زينه:وش فيك قمطتي ياملي.. والله حتى لونتس بكريه.. يالجبانه المفروض تفرحين..!

مهره تاكل بصمت.. ليش كانت مستبعده الفكره... *ممكن تكون حامل ليش لا..!

تلخبطت مشاعرها..

طفل لي ينمو في احشائي.. ابوه سيف..!

ياربي .. *

حاولت تنفض الفكره..* مستحيل.. اكون حامل بس لاني اطول في النوم..!

ولا ابي احلل..

جد مابي لاتأكد ولا انفي هالشي*

*****

انفال تكلم هادي جوال وهو بالعمل :

والله والله ألف ورق عنب.. اجل انا غايبه وش هولا.. لاني سمعتك تقول مشتهيه.. والحيوانه ضحى مسويه التعبانه.. اللي ماتقدر تلف..

هادي :تستهبلين.. والترجيع الصبح.. والمغص..

انفال ماسكه الجوال بكتفها:تمثيل.. دخلت اصبعي بحلقي.. ورجعت.. بس تكفى هادي لاتقول لامي.. والله.. عشانگ

هادي :تصدقين.. مابيه.. سديتي نفسي.. يالشيطانه الكذابه..

شهقت:هادي.. هذا حقي مابي اخليه بخاطرك.. يالجميل انت يالسكر..

هادي:والله انتي تبين تشبكين الخميس بالويكند.. ولا انا ماجيت في بالك..

انفال:ورب الكعبه.. وعيوني اللي بتاكلها الدود.. انا غايبه عشانك..

هادي :تمام.. اجل بكره ماتروحين عزيمة عمي سعود في المزرعه.. وقضيها لف ورق عنب..

طاح الجوال من اذنها.. وشالته بفجيعه وعجته بالحشوه:

ماتسويها فيني يالشيخ ياولد الشيخ.. ياللي جدك شيخ.. واختك نفول شيخه..!

هادي:روحي روحي حشي.. مانب فاضي لك.. يالكذاابه..

وقفل في وجهها.. ..

انفال شهقت وتطالع الجوال:يعنننننني انا شضاااااااابه..!!!!!!!!!!.. هادي يقوول ان اناااا شضااااابه...!!!!

*******

دخل سيف جاي من بره.. وهم في الحديقه.. زينه تغشت.. ومهره تناديه:تعال.. تعال سيف.. انت اللي تقدر تتفاهم مع صبحا..

جا وسلم.. :علامك ياجده..

صبحا:ابد اقول الديار طلبت اهلها.. وهم يقولون اقعدوا لعشى بكره..

سيف:مالك لوا بس ماتروحين الا حاضره ..

موضي:وراه عنيده ياام غازي..نبيك معنا.. ونعرفك على جماعتنا..

سيف:وش عندك عاد ببيتك.. بتتوقف اعمالك.. اقعدي بس الله يجزاك خير..

صبحا:ياولدي.. من قام عن خبزته احترقت.. لازم اشوف مكاني والمزرعه من اتركها له..

سيف باقناع:ايوب هناك.. وماشاء الله عليه فاهم وعارف..

صبحا.. عنيده واعجزوا يقنعونها..

قالت مهره:اجل زوين تظل..

الجده برفض:زوين تركب قبلي بالسياره.. ان خليتها.. متى ترجع.. ومن يرجعها.. ماخليها تمسك درب مع ايوب لحاله..

سيف :انا ومهره نرجعها.. وخلاص عاد.. لاتزيدين الرفض ياجده.. ترى انا ماطلبك ..لاترديني..

زينه انحرجت..

وموضي قالت:ايه يا ام غازي.. دامك ماانتي ظاله.. تحضر زينه.. وانا والله ودي اهل مهره كلهم يحضرون..بس انتي ميبستن راسك ومستعجله..

زينه نقزت مهره بكوعها وبخفوت:بمشي.. وش يقعدني بدون جديده خبله انتي..

مهره بهمس: اقعدي وبنفلها..

(ورضت الجده.. وهي متردده وماودها)..!

******

"جمان"

*معقول اليوم كيف اجتاحني الحنين.. حتى ظل كبريائي.. طريقه..!

كدت اموت حين حاولت تشغيل مقاطع لشاهين وبناتي..

وابى الهاتف..

خرجت وكأن لديا طفل يختنق واريد انقاذه..وها أنا اقف بتوتر وانفعال..

وخبير الكترونيات يتفحص الهاتف..!

يجب ان ينجو.. فابتلك المقاطع والصور اصبر نفسي واعزيها..!.

ظللت ادعو الا يُحذف مشهد شاهين وهو يغني عراقي من اجلي..

ولاصورته وهو نائم ببدلة الطيران..

ولا وهو يضحك.. وبيان وديم يلعبون معه ويرتمون فوقه..

دعيت الا افقد مقطع بناتي وهم يغنون لي اغنية في عيد الأم.. حفظتها اياهم بلقيس..!

خفق قلبي بقووه.. صوتيات لشاهين..يرسلها حتى في ايام الزعل (أحبك والله العظيم)... صرخته العابثه(جمااااان ياروحي).. (بالجنوبي.. احبششششششش واموووت فيششششش)..

انحقنت عيونها دموع.. وهي تعض سبابتها.. وتستفسر.. اذا بيضبط..

ابتسم:نعم.. اجريت له بعض التحديثات.. اذا كنتي قلقه هكذا.. عليك.. بالاحتفاظ بكل مايخصك.. باذاكرة خارجيه..

تنهدت.. وتنفست الصعداء..

وهي تقول :سأشتري ذاكره..

طلع وحده..

خذتها.. وكل مافيها يرجف.. يالله.. كيف الجوال اليوم شكل لها حياة.. وكأن شخص يحتضر..!

(‏بدُونك مانيّ بخِير اكابر وبقِلبيُ الفِ غصّه.)

******

گان طالع من الدوام.. بطريق رجعته للبيت.. ولانها تعرف وقت طلعته.. اتصلت.. رد ....بلقيس بضحك متواصل.. وهي تقول:هادي وش فيك مع انفال..

هادي:ليه.. مكلمتك..!

بلقيس منهاره ضحك.. :سنابها.. يهد دموع.. يالله تتحلطم.. وتشكي.. الواضح انك ماانت راضي تجيبها بكره العشاء..

هادي:خليها تنقلع الكلبه..

(وقال لها اللي حصل)..

بلقيس:حرام عليك.. هي نيتها عشانك.. لاتكسر خاطرها..

هادي:انتي لو شايفتها الصبح بتموت...اصفقت امي وهي تتشهد..

ضحكت :يالله نفول توسع الصدر.. مايخالف هادي.. عشاني.. جبها..

جا له اتصال.. طل في الشاشه.. انفال تتصل.. رجع لبلقيس:والله اذا سبعين مره دقت اشوي.. كل ذا عشان بكره..

بلقيس :ياعمري.. هي مستعده.. وحاطه لنا بالقروب وش بتلبس.. وتهاوش ضحى والنور عشان مايتأخرون بكره.. يعني حرام هادي.. بتمرض صدق لو ماجات..!.

هادي:يصير خير.. بس خليني انشف ريقها شوي..!.

******

باليوم الثاني..

من بدري بيت سعود كلهم راحوا المزرعه..زينه مره تغيرت نفسيتها مع الجميع.. وقضوها سهره باليوم اللي قبله هي ومهره وبلقيس والجده مزنه..

اللي حيل جايزين لها.. وحيل تثني على تربيتهم هي ومهره..! وهم كيفوا معها.. وخاصه انها سهيره عكس جدتهم..!

نواف الكتوم.. وماحل في قلبه.. وحصل.. وقت درى ان زينه ظلت. شعور انتشاء غريب.. وكأنه يبي يتعرف عليها اكثر.!

مع العلم.. مايدري ابدا ً عن موضوع انفصالها..!. ويأسه قدام هالعلاقة يوازي الإثارة في موضوع جديد على قلبه..

انفال.. ومع ان هادي.. كان ناوي يجيبها.. الا ان خلاها لمن بكت وهي تتوسله ياخذها معهم..خلاها تعتذر من امها ومنه.. وخلاها تلف ثلاث علب ورق عنب عشان تاخذها معهم.. ولفت..

كان يصورها وهي ماتدري.. رابطه راسها.. وقدامها قدر حشوه هايل..

وهادي يصورها وهي ماتدري.. ويرسلها لبلقيس.. ارسلت له:يالظااااالم.. ذي نفول دلوعتك..

هادي كتب:دلوعتي اوك.. بس كذبها اطلعه من عينها..

بلقيس :طيب خلاص خلها تقوم مسكينه ترتاح بتجي وهي طاقه بهدال..

هادي :لاتدافعين لاخليك تجين تلفين معها..

انفال صاحت فجأه:شايفني مخبز.. لاااا مخبز.. تعبت.. تعبت..

هادي نهرها :كملي.. بدون تذمر.. لااهون ..

انفال ضحكت بتسليك: تهوون.. لا يانظر عيني الفها والف معها ست علب بعد.. واذا ودك افتح مشروع مفرزنات لرمضان..افتح.. مره مُسلي..

هادي برواقه ويطقطق في الجوال:كافي بس لعزيمة عمي سعود.. غيبي بكذب.. مره ثانيه.. والله افتح لك مشروع.. والارباح..نشتري فيها اغراض البيت..!

*****

جاء..الليل.. وامتلت المزرعه بالاقارب والاصدقاء.. سعود اقام هالوليمه لسلامة موضي.. وبعد ماتحسنت ولله الحمد..!!.

مهره كانت مع النساء لما رن جوالها ردت:هلا امي.. صحيت..؟!

فارس:ايه.. وينك..

مهره:تحت.. وش بغيت..

فارس :تعالي تكفين.. لبست.. وابي عطر.. وكبكات..من حقين ابوي دبريني.. ماجبت..

مهره: دقايق.. الحين اجيك..

عطت صحن الحلى لزينه:وزعي زيون.. بروح لفارس.. يبيني..!

موضي: توه يصحى.. الأمير.. كان كمل رقاده..

ضحكت :اعقلي امي عن اميري العود.. يصحى متى مايبي.. جعله نوم العافيه..!

لُجين من بنات العايله تهمس:من جدها.. ماينه على فارس.. كبير وخاط شنبه.. وهي صغيره..!

اروى:زوجة ابوه.. الشرع يقول عادي.. انتي وش تبين..

لجين بقهر :ما احب هالحركات والتميلح..!. واضح انها ماهنا سنع..

بلقيس اسمعتهم :اعقلي يالجين.. تراه سيف مايرضا.. بالهوا الطاير يزعجها..ولابكلمة تزعلها..

لجين:الله واكبر.. الحين الزواج كان مثل الاولين رجال وبيحفظ مرت اخوه وعياله وش صار..؟!.

بلقيس بخبث:عاد القلب وعشق..وزوجته وماعليه ملام..

اروى:من جدك.. سيف حب.. بعد نجود..!.

بلقيس بضحك:أووووووه.. هالمهره سوت المعجزات يا اروى..!

زينه سمعت بعض الكلام.. وكانت منحنيه تمد القهوه لمزنه.. :سمي ياجده..

مسكت كفها:

لاتسمعين لحتسي هالمقروده ويضيق صدرتس.. ذي (ألجين) مابها سنع على امها شينة لسان وحسود..

ضحكت زينه :يابعد راسي ياجده.. والله ولاكني سمعت.. بلاك شايله هم..

مزنه: ايه يمه.. ويقولون لتس مايهم الذيب **** النعاج.. اسفهيها.. السفيه حقه الحقران..

زينه بغت تموت ضحك.. والجده وامثالها..!

حبت راسها:

يمه.. يازين اللي تشتري خاطري..!

مزنه تضحك:روحي جيبي لي من ذيك الحلاو.. جازت لي..

زينه:جده.. عادي يعني.. عشان السكر..

مزنه:جيبي بس.. ألعنبوو السكر.. خل احلي ريزي.. واللي يطيح من السما تلقفه الأرض..

زينه تجيب الصحن:انا اشهد انك بايعتها ياجده..

مهره صعدت لقت فارس واقف عند غرفتهم.. متسند ورافع رجله على الجدار ويطقطق في الجوال..

رفع راسه وابتسم:اوووووه.. وش هالزين..!

مهره تفتح باب الغرفه وتضحك:جد عاد.. حلو..

فارس يدخل وراها:

ايييه.. بتحرقين كبود بنات العايله عاد خابر لجين بنت عمي زياد تبي ابوي..

مهره التفتت توسعت عيونها:اثاريه كذا..

فارس وهو يروح ياخذ عطر من التسريحه..ويرش.. الا تروش فيه.. :ليه.. قايله لك شي..

مهره وهي تجلس نص ركبه عند شنطه فيها اغراض :ماقالت.. بس عوذه نظراتها.. احسها مو طايقتني.. وطول الوقت رافعه خشمها..ماجازت لي..

قامت بسرعه..

واختل توازنها..

داهمتها دوخه.. وحست بطيح..

فارس بسرعه مسك ذراعها.. وبقلق:مهره وش فيك..

افتحت عيونها وهي تحط كفها على جبينها.. :مادري.. يمكن لاني جلست وقمت فجأه..

انفضت راسها :

مافيني شي.. خذ الكبكات وانتبه لايضيعون.. يعصب علينا ابوك..

واضحكت :ترى فصوصهم من الاثريات..

التقطهم من كفها.. ومسك يدها.. جلسها:

انتي اجلسي الحين.. اكلم ابوي ياخذك المشفى..

مهره:لا.. حشى.. لاتروعه بس.. والله مافيني شي..

فارس:اجل نضلوتس الحريم.. ياكرهي لذا الجمعات..

مهره:الله اكبر.. جدتي تتكلم مهب فارس..

صدمها لما حط كفه على راسها:بقرا عليتس.. لاتحركين..

مهره بضحك:من جدك.. مافيني شي..

كان بدا يقرا سكتها:هشش لاتلخبطين..

سكتت..

*واراقب فارس وكفه على رأسي.. واطلب من الله ان يرزقني بره.. ينفث على رأسي ويحصني.. وصلني شعوره.. خائف ان تصيبني عين فعلاً.. يالله يابراءة فارس.. وقلبه الحنون..)

خلص.. وراح لبس الكبكات :بنزل.. بس اذا حسيتي تعبانه كلميني ولاكلمي ابوي.. تمام..!

مهره:وانا اقولك لاتحاتي اموري طيبه.. بس فارس امي.. انتبه لسيف.. تشبك فابوك وطلع معه..

فارس يحط عقال على راسه: ماعليك..

وطلع ومهره وراه تقفل.. قال: مافي احد بوجهي..

مهره تنزل معه :لا كلهم بقسم النساء..

*****

من احداث هذا العشاء..

وليد طالع من مجالس رجال.. وماحد لاحظ عصبيته.. الا سيف.. لحقه..

وليد متوجه.. لساحة فيها سيارتهم..

سيف:وليد وقف.. من جدك..بتمشي.. ماانت صاحي..

وليد فتح باب السياره ورمى شماغه وعقاله وبغضب:خلني امشي قبل اتهاوش مع ابوك..

سيف بعصبيه:وليه.. تراه مثل هالخطبات تجري.. واما موافقه ولارفض..

وليد يطلع علبة ماي يفرغها بجوفه :عاد اذا ابوك ماتاب من زيجة جمان.. لايتوب.. ترى عمك فيصل.. هاللي قاعد يخطبها لولده شبيب.. نفسه ولده حمدان اللي ثور فيك يالسبيكه.. دام عندكم حمية بدوان.. حق ايش ترضون..

سيف بانفعال:واحنا رضينا.. هو قطها كلمة.. دعابه حتى مب خطبه.. قال اللي جمعنا بهالعشا.. يجمعنا.. ان شاء الله بملكة شبيب وبنتك ياسعود..

وليد رمى العلبه بقوه:

خلاص اجل بكره ابوك يملك عليها..ترى مخوخهم متحجره.. شف لو قاعدين ومكملين السيناريو تلقى ابوك قال اخذها بعباتها..

سيف: عنبوك انت وش شايف ابوي.. تراه مازوج جمان الا بموافقتها.. ويوم قالت تبي شاهين.. اعقل.. وماراح يصير شي الا اذا بلقيس رضت..!.

وليد يولع سيجار.. ينفخ دخانه: والله لوقف عظم لهالخطبه.. مهب كيفهم.. جماعتك.. خذو وحده وضيعوها.. وياخذون الثانيه.. راس مالي هالاخت وعياله.. انعنتن الله على قبيلتك من راسها لاساسها..

سيف ماقاوم انفجر ضحك.. :

شفيك شبيت.. هد ابوي هد.. انت شايط والظاهر بُعد ماريا لاعب فيك..!

*****

داخل.. عند الرجال.. تمنى انه ثار مثل وليد وخرج.. تمنى انه لطم فم الشايب اللي قاعد يخطب..

تمنى انه وقف بوجه سعود وقال (انا اللي ابيها ياعم سعود.. من مثلي بيحبها ويموت فيها)..

لكنه ساكت..

وارتشف فنجال القهوه.. وهو مابرد.. دفعه واحده.. لينزل في معدته.. مثل الزقوم..!!.

لم اكن على استعداد..

ان اسمع.. كلمات طلبك وخطبتك.. ووجه عريس مترقب ومبتسم.. وينتظر رد والدك..

سعود :الله يكتب اللي فيه الخير..!!!!

****

انتهى العشاء.. والكل غادر.. وبقت عايلة سعود.. ظلوا عشان يكملون فعاليات باليوم الثاني..!

والليل واسراره.. وسوالف اخر الليل.. وتنهيدات الابواب الموصده..!

سعود وهو يتلحف:هو كلام سطحي.. مافيه شي اكيد..

موضي بانفعال : والله ماعرس بنتي..لأي واحد من عيال فيصل.. اذا انت نسيت ان ولده بغى يذبح سيف انا ما انسى..

سعود بتنهيده متضجره:ذيك سالفه قضت مع الزمن.. طيش شباب وحمدان كبر وعقل.. وعرس وعيل.. وولدك الله عداه الشر.. ويبقون عيال عم ياموضي..

موضي :اقفل السالفه ياسعود.. واذا رجع كلمك قله اي شي.. بتكمل دراستها.. ماتبي.. عازفه عن الزواج.. بنتي ماعطيها شبيب..

سعود بجزع :لحوول.. خلاص موضي.. خلاص.. لو ادري ماقلت لك هالسالفه.. انا الغلطان.. اخذي حذيانك واضربيني على راسي..

موضي بالعثمه:ووي محشوم.. هو انا شقلت.. مجرد نقاش..!

.....

هادي دخل البيت.. وانفال تتكلم وتعلق.. ومبسوطه..طول الطريق ماسكتت.. وهو عقله مو معه.

امه :هادي يمه وش فيك.. وش شاغلك..

هو ببتسامة باهته :ولاشي.. النوم لعب فيني.. يلاتصبحون على خير..

امه:تلاقي خير امي..

انفال:وانت من اهل الخير..

صعد وطلع جواله اللي تركه صامت.. لان بلقيس تتصل..

مسك الجوال.. وجاه اتصال.. راح عطاها مشغول.. وكتب لها واتس:حولي الجماعه ماعرف ارد.. واطمنك وصلت..!

وارسلها وقفل الجوال.. فك ازرار ثوبه.. وحس مخنوق.. شي واقف في حلقه مثل العمود..

فرك صدره.. ويحاول يطلق آاااه..

مسك راسه بقوه.. حسه بينفجر.. كل عروق راسه تشكلت وتضخمت.. واصبحت مثل خيوط نار.. تحرق جمجمته..

دخل الحمام.. فتح الماي وراح يرشح وجهه وراسه..!

كان اليأس في العلاقه صعب..

لكن قطع الأمل..كان كارثي..!!

شربت من مّر كاس الصبر شرب الضمان

‏وعزّي لـ كبدٍ تحط الصبر مشروبها

‏ويا حر كبدي وياصبري وطول الزمان

‏ويـا قّو وجه الحياه وما اشين اسلوبها

‏غديت مثل الغريب اللي جفاه المكان

‏في ديرةٍ ساقه الحظ الردي صوبها

******

متربع على السرير وراسها في حضنه.. وضاغط عليه من الجهتين..

ومهره مغمضه وتقول:اضغط بقوه سيف..

قال :اعورك.. يابنت قومي نروح المستشفى..

مهره:لا يضبط الحين عادي يجيني دوار احيان..

وابتسمت وهي مغمضه:ماشاء الله يديك ترسل ذبذبات في راسي..

سيف :عساها زينه بس..

مهره لسى مغمضه : الا عدمتني مره وحده.. قمت اشوف زغلله..

وخر يدينه وصاح فيها:زغلله.. من جدك..

ضحكت:رجعها.. امزح معك.. يدك فيها الشفا ياحج.. ترى والله خف. .

سيف بقلق:اكيد..؟!

افتحت عيونها:اكيد فديتك..

ابتسم:خرشتيني.. ياشيخه..

مهره وهي تستعدل: تصدق فارس قرى علي قبل يجيكم المجالس..ياعمري روعته..

سيف:خاف عليك.. شوفي فارس من يوم كان صغير.. وبعد مافقد امه.. صار عنده قلق.. واذا صار خايف على شخص.. امي تقوله حصنه.. والله يحفظه.. يعني كنت اروح واسافر وارجع.. وفارس يودعني بقرايه.. ويستقبلني بتحصين..

مهره توقفت عيونها على وجه سيف..

وبخفوت:

ياربي بصيح.. بقوم آلمه.. حبيبي اهو..

وبتقوم.. قعدها:

نزل.. بيسهر مع نواف.. ماجاله النوم..

جلست..

وقاموا يسولفون عن العزيمه والضيوف.. لما قال سيف : وزينه عساها مبسوطه..؟!. في بالي والله..

مهره ببتسامه:على طاري زينه تتوقع.. من اكثر شخصيه متآلفه معها.. من بيتكم..

سيف:من.. بلقيس..؟!

مهره:لااا جدتي مزنه..

ضحك:بالله..

مهره تلوشن يديها:وربي لو تشوفهم خويات.. طول العزيمه سوى وحش وسوالف.. وتبادلوا ارقام بعض.. لا وازيدك.. زينه بتنام معها تحت بالغرفه..

سيف:ياحليلها.. الله يسعدها ويعوضها.. والله اللي مثل زينه ماودك تنغث..

مهره مسكت يده وتوزع فيها لوشن:تخيل.. الكلب عبد الإله.. غاثها.. يدقدق ويرسل.. ويقول كلام مثل وجهه..

سيف بانفعال:وشهو.!! .. وليش هي ماحضرته..

مهره:حضرته.. بس كل شوي جايها من رقم.. لا وارقام دوليه كل شوي مطلع له شريحه.. لانه في مصر..ويقعد يرسل ويفصل..

سيف بعصبيه:وش يبي.. ماقضى..وش اللي يقول..

مهره بتردد :اقلك شي..بفجعك.. بس انا مادريت عن الوضع هذا الا بعد طلاق زينه..

عقد حواجبه.. :ايه..؟!

قالت له.. الاسباب.. اللي خلت عبد الاله منفس.. واللي خلاه يتعامل مع اختها كذا..

سيف يسمع ومصدوم..

لمن قالت مهره:والحين هو يعني بيتعالج.. ويبي يعقد عليها من جديد.. يفكر زينه ميته عليه وتنتظر الشاره..

سيف مصدوم..

ومهره ضحكت :اللهم لاشماته.. بس والله يستاهل.. ذي عقوبه من رب العالمين..

سيف يطالع فيها.. بفهاوه.. بعدين تكلم.. :

والله انكم تفجعون يابنات غازي..

مهره بدهشه:ليه..؟!

سيف ضحك: ياانكم عقوبه على رجالكم.. ولا ان عليكم حجاب..

مهره بتفاخر:احنا علينا حجاب من رب العالمين.. مايجينا الا اللي يستاهلنا..

******

قبل شوي في المجلس الخارجي.. بروحه.. منسدح على الارض على فرش السدو.. ورافع رجوله ع الجدار.. ويفكر باليوم وقت امه وجدته معه بالسياره.. طريق المزرعه..

الجده وهي تقول:والله يامرت سيف دخلت قلبي.. هي واختها.. ماشاء الله تربيه وعلم..

موضي :ايه الله يحفظهم.. جدتهم ربتهم.. ولا امهم.. من زمان خلتهم.. ولاتدري عنهم.. يادافع البلاء.. خذت رجل معوه فلوس وخير.. وحطت رجلها.. ماتعرفهم الا بتلفون.. ولابالمناسبات.. اختهم سندس بعد دكتوره.. خذها واحد من حايل.. والله يايمه كل وحده تقول الزود عندي..

مزنه:والله ضايقن خاطري على هالزينه.. هالحين.. رجلها عمي يومن طلقها.. وش عاد لقى عيبٍ في هالزين..

طبعاً هو زين.. ماطلع جلد.. مع المعلومه اللي كانت خطيره لقلبه وعقله..!

جدته تتمسك في المسكه اللي فوقها وتتشهد وتسمي..

عدل السياره :وراه جده..بسم الله عليك..

هاشته:انعتن الله على هالوجه.. بغينا ننقلب..

ضحك :حشى.. تراه اعرف اسوق.. بس انتي خايفه على عمرك..

موضي:تركد نواف.. شفيك امي.. تعبان..؟!

نواف :مافيني شي..بس لفيت حسيت راعي الشاص بيحذف علي..

الجده بنفعال:حذفوا عدوك في بير ماله قاع.. انت اللي حذفت ماهو اهو.. شايفه الدرب.. يامال اللي مانب قايله..

ضحك :ووووول.. عصبت ام فهد.. خلاص كملوا. اي وش كنتوا تقولون.. من اللي اطلقت..؟!

الجده:عليك الله واكبر.. ويوم ان اذانك مشرعها علينا.. ورى مسكر عويناتك.. حلايا عيون الحصني..!!

ضحك لمن دمعت عيونه :الحين عيوني حقات الشواهين تقولين عنهم حصني..

الجده تفتح شنطه في حضنها كيوت.. وتطلع علبة ماي.. : السكر السكر شكله طق الخمس مية.. يبس ريزي..هو انتوا جايبني من الديره تباطيتوني..

ضحكت موضي :الله الله.. بسم الله عليك.. لانتسبب فيك جعني افداك..

وبعد ماهجدوا.. ارجعوا يسولفون عن زينه.. و فهم ان عبدالاله هو اللي مايستاهلها.. وانها هي بغت الطلاق.. وان سيف ساعدها في المحامي.. وماخلاها الا لمن تطلقت..!

وفكر.. بما ان سيف سعى لهالشي.. بهالشكل.. اذا ً الطلاق كانت اسبابه مقنعه..

والبنت كانت في ضيق واذى..!

افاق من شروده..

على رنين جواله رد :ارحب..

فارس :صاحي..؟

نواف :ايه تعال..ماجاني النوم..

شوي الا فارس جايه.. :اسكت عجزت ارقد.. وش فيك منسدح تسذا..

نواف يستعدل :اهوجس..!

فارس :وش فيه..

نواف :ركب القهوه..بالمشب.. خل نقضي على صحون هالكنافه والبقلاوة.. وانا بروح اجيب شاي تلقيمه من المطبخ..

فارس :تلقيمه.. وقهوه.. واللي قايل بيقعد من الصبح.. ننزل للخيل.. متى بنرقد..

نواف :ماعليك.. النوم للرخوم.. وجب البلاستيشن في سيارتي.. بصقعك فيفا..

فارس وهو يركب القهوه :

خل عنك فيفا الحين.. خلنا نكمل لاكاسا دي بابل.. ابا اشوف اخر موسم ماكملته..

نواف وهو يطلع عويدي.. ويحطه بالدله وهو واقف :انت ماذابحك.. الا طوكيو.. يالكلب..ذوقك **

فارس بسلوب مغازل: ألعن امهاااا..

نواف صقعه بالفنجال :

اعقب يالسلوقي..

ضحك.. :رح انقلع..على الاقل اخق من خلف الشاشات.. ماهو مثل.. اللي رافع سيقانه على الجدران.. وشكله واقع..ويفكر..

نواف صقعه براسه باصابعه:

كمل القهوه.. ولاتدخل عصك في شي اكبر منك..

توسعت عيون فارس:وشهووو..!!!!!!.. يعني فيه.. تحب يانواف.. من وراي..

طلع نواف.. بدون يرد عليه..!.

وصيحت فارس تلحقه:مصيري بعرف.. ماعديها..

******

دخل نواف البيت.. وكان متوجه للمطبخ.. لما انتبه للباب المرود.. تبع جدته.. والنور مشغل.. ابتسم.. وهو يروح ناحيته.. ناوي يتحرش فيها.. دامها صاحيه..

الا.. سمع صوتها.. (زينه)..: شوية عناية ويرجع يطول..

مزنه:يقولون لك يابنيتي.. مايصلح العطار.. اللي عطبه الزمن..كان علي قرون.. شطولهن.. يتهول فيهن كل من شافهم.. بس حتوو.. وبقت هالبلابص..

ضحكت زينه:كلهم خير وبركه..

مزنه:والتسلب سيف يقول قصيه سويه مثل عجز الانجليز..

زينه :والله بتطلعين كيوت ياجده.. فكري فيها.. ترى بوفارس رايه سديد..

اختلس النظر..

مزنه على سرير.. وزينه وراها وتحزم راسها بالملفع.. :كذا زين ولا اخففه..

مزنه:لا زين.. انفخت راسي بنت احلام.. انا هاجه من الديره.. وهي ماخلت سالفة.. ولاشارده ولاوارده.. الا صبتها باذني.. هالبنت رادو.. عاد امها ربيتها.. على العقل.. وماتنقل حتسي.. بس هالحماره طالعتن على اهل ابوها..يموتون في السوالف والعلوم..

زينه تنزل على فراش على الارض:بزر ياجده.. لاتواخذينها.. ومتحمسه لك.. وتفكر انها تزين روحها لتس..

نواف يلعن دناءته.. وانعدام اخلاقه..

*كالشياطين.. استرق السمع والنظر.. غير عابئ.. بشهبٌ قد ترجمني.. وتسحقني.. فالقليل.. يكون لي مساحات من الشغف.. ثم كيف تكون هذه الأنثى.. كالكتاب.. اللذي تبدءه ولاتستطيع ان تغلقه... انا في اشد الفصول تشويقاً.. ان اعرف ان هذه العاثيه في عقلي حُره.. ومُتاحه..!!..

اراقب ضحكتها مع جدتي.. وبساطة اسلوبها.. تمشط شعرها.. بجانب رأسها.. وتجدله بتراخي.. وتنهيه بعقده بخصله من شعرها ذاته.. *

مزنه:يايمه روحي ارقدي في غرفة بلقيس فيها سرير جمين.. لاتقطين عمرتس بالارض تسذا..

زينه.. :وش فيها.. ترى الارض تمتص الطاقه السلبيه.. وياجده ابي انام معك ولاانتي ماتبين..

مزنه تنسدح:الا ابيك وابيك وابي اللي يبيك.. يازينك.. انتي اللي يقولون عنها خذت نصيبها من اسمها..

زينه :الله يرزقني على كثر ماتمدحيني ياجده.. ريشتي طلعت والله.. ماعلمتك صبحا احنا نمدح في نفسنا وهي تكسر مجدافنا..

قامت زينه طفت النور وهي تسولف مع الجده..

وفجأه حست انها اسمعت شي بره الباب..

عقدت حواجبها وانتبهت انه مردود..

راحت وافتحت الباب.. وتلفتت في الظلام اللي يغطي الصاله.. ونادت :مهره..! ياتبن.. انتي فيذا..

ماحد رد..

الجده:هي مهره نزلت..

رجعت وسكرت الباب.. :

سمعت تطقطق.. قلت يمكن نزلت.. وتبي تروعنا.. بس ماشوفها..

مزنه:اكيد الهوى.. درايش الصاله مفتوحه.. تقلقع البيبان..

زينه تجلس في فراشها.. وتفكر بشك وبخفوت: يمكن..!!

انسدحت وتلحفت.. وجفل قلبها.. يوم قربت من الباب..

حست ان فيه احد..

بلعت ريقها.. وهي تسمي.. وتتعوذ من الشيطان..

آن قآلهآ الله يعتدل كل ، مآيـل

ولابد آلليآلي آلسود يظهر قمرهآ ..

..........

قبل تطل زينه وتسمع الحركه اللي كان مصدرها.. انو فارس دخل لما تباطى نواف.. وشافه واقف عند باب الجده..

توسعت عيونه.. لانه يدري ان زينه موجوده وقال وهو يجي عنده: نواااف..!!!

مع غفلته نقز وصاد الباب.. وانتبهت زينه..سحب هو فارس وسكر فمه.. وتخبى عند ممر جانبي..

لمن سكرت زينه..!!!

وراح طلع وهو مقفل فم فارس اللي بغى ينجلط.. وماتركه الا في المجلس..

صاح : يالمريض.. شفيك تطل ماتدري ان اخت مهره نايمه مع جدتي.. مو عيب عليك.. حسبي الله عليك يا نواف.. ياقواة عينك.. واقف بكل بجاحه تقز..

نواف كزه وقفل فمه.. وجلسه على التكايه وركى عليه :يا** انطم فضحتنا..

فارس بيبعد يكمل يهاوش..

قفل فمه.. وبعصبيه :هشششششش.. هشششش.. ابلعها وبفهمك..

فارس عيونه متوسعه.. ويأشر بهم.. فكني..

ارخى عنه..

فارس.. يعدل تيشرته:ايه.. فهمني... ولو ان مافي لك اي مبرر.. بالحركه البايخه هذي..!.

نواف بكل جديه:البنت عاجبتني..

وتنهد وهو يجلس عند المشب:ومادري ملخبطه عقلي وقلبي.. وماهو اليوم ولا امس.. من يوم نروح هاك اليوم بمزرعتهم.. وناخذ سيف لهم..

فارس عاقد حواجبه ويتذكر.. وجاء قعد قباله: يعني انت شفتها.. يوم جينا نطلع وهي راكبه الحصان..

نواف بزفره:شفتها.. من يوم شرد سيف ولحقته.. واللي خلق عيونك يافارس.. عجزت اطردها من عقلي.. وشفتها واحنا طالعين.. والله وحاولت ابعدها.. وتمسك براسي زيادة.. وبعد جيتها بيتنا.. وانا مثلي مثل المراهق.. اللي يتشوف الفرص.. وانفض على الطاري.. مادري ياعمك.. مادري وش صار بي..

وتوني اليوم عرفت انها انفصلت عن زوجها.. يعني تقدر تقول.. ابيها بالحلال.. افكر فيها من هالناحية.. ماني بعشق بالحرام.. ولا انا قليل اصل.. بشوفها كذا..

فارس :بس ترى اللي فهمته.. هي ماتبي العرس ابد..

رفع راسه.. وبدهشه:وليه..!..

حرك كتوفه:انا اسمع ابوي ومهره يتناقشون.. ايام كنا بلندن عن سالفتها.. السافل زوجها.. كان نفسيه.. يضربها.. ويهينها..

توسعت عيون نواف وخفق قلبه:افاااا..؟؟؟

فارس:ايه.. وكان يشك فيها.. لو يسمعها تضحك مع خواتها بالجوال.. سحبه وسمع اذا اختها ولا.. ينزلها عند جدتها ويدق يسئلها اذا هي يمها.. والبنت مسكينه متربيه.. تقول مهره.. حيل اثرت الامور هذي بنفسيتها وخلتها تعاف الرجال.. وبس تبي تعيش بهدوء.. بزراعتهم..

نواف بأمل:لا ماعليك.. لو جاها واحد كفو بتوافق.. حكي مأخوذ خيره.. وتوها طالعه من تجربه..

ضحك فارس :ومين الكفووو..؟!!.. لايكون انت.؟! . ياوسيع الوجه.. حد يقز ضيوفه ياحيوان..!!

نواف يصب قهوه بفنجال:

خلك رجال.. ولاتتصيد الزلات.. وانا نيتي بيضه.. والله يشهد.. خل نخلي البنت تهدا نفسيتها.. وتطخ.. تالي نشوف.. اللي علينا..

ومد الفنجال لفارس.. اللي ارتشف منه وقال:

ع القوه.. ياشاروخان..

نواف بنفاذ صبر:الله يلعن هالخشه.. وانا ماطحت الا بلسانك..

ضحك فارس ويحرك حواجبه:

والله.. لا ابتزك.. لااطلع التقزقز من عينك..

شرد نواف.. في نقطه..وظل صافن..!

فارس :اييييه..!!!.. وين وصلت..

نواف.. كان يفكر بمهره وزينه.. وكيف الماضي الزفت مع رجالهم..

عرف مهره صح..!

ومن شعوره بزينه.. حاس كيف البنت بريئه وبسيطه.. وناعمه..!..

فارس:نواف.. اكلمك..

هز راسه وزفر:ذا الحين اللي مثل الزينه ينضرب..!!!!

توسعت عيون فارس وبصدمه : افففففف..!!!!

مالك شبيّه الا البخت لا اقبل على الحظ الردي

‏ولا لك مثيل الا السحاب الممتليّ عشق ومطر !

..........

صباح اليوم التالي..

سلمى ام شاهين على طاولة الفطور.. مع فهد.. قالت:

والله ماشاء الله ماقصر سعود في هالعشاء.. تجمل.. وتستاهل ام سيف الجماله..

فهد : الحمدلله اللي الله قومها بالسلامه.. تسببو فيها عياله.. ويوم طاحت جاو مثل المجنن ملهوفين عليها..

سلمى :عيال سعود.. مادري ينولدون وتلقفهم الشياطين.. من صغرهم شر.. وفي كبرهم.. عند وروس يابسه.. يادافع البلاء..

فهد: الله يهداهم..

سلمى: وجمان لاحس ولاخبر.. والله يافهد.. ان بغيت الصدق.. الحال ذا مايسر.. ابد.. البارح نقول للعايله رايحتن تدرس.. ومطاوعين اهلها في هالكذبه.. اللي والله ماكلها الا هالفقير ولدي..

تنهد فهد.. :وش تبين اسوي ياسلمى.. والله انها لو اطلعت في الشارب.. وان نزلت في اللحيه..

سلمى:يافهد.. حالة ولدك ماتسر..

فهد :وش اللي بيدي.. اسويه وماسويته.. الامر متروك لولدك.. وذا فعل يده.. هو اللي كان قرصه في ناره وعينه على جاره..

شاهين نازل مبدل للعمل.. مر عندهم سلم وخذ زيتونه كلها:

ماعندكم الا هالشاهين..تقرضون فيه..

سلمى:اقعد اكل.. وش عاجلك..

شاهين ياكل وهو واقف:بطلع.. مافي وقت.. الله يخليك يمه.. بس يرجعون بيت عمي من المزرعه اخذي البنات..بيان عندها اختبار الاحد..

سلمى:وش عليها..؟!.. ماقالت لي..

شاهين:كلمت بلقيس.. بتذاكر لها هناك.. بس جيبيها عشان تنام بدري.. نومها متلخبط..

سلمى :ماعليك.. لاتحاتي..

حب راسها وراس ابوه:توصون شي..

فهد:سلامتك يبه

سلمى.. امطرته بسيل من الدعوات والاستيداع..

......

في الخيمه نايمين على فرش السدو.. نواف متكتف ووجهه على المساند..

وفارس.. راسه على مسند عند رجول نواف.. والمكان ظلمه.. ومافيه تكيف.. الاجواء كانت حلوه هاك الوقت من السنه..

نواف..

تسلل لاذانه صوت من بعيد.. فكره حلم.. فكان مستعذب الصوت والدندنه..

عود.. وصوت اثير يغني على. المقام العراقي والموشحات..بشقاوة واحبال صوتيه تطرب وتضحك.

*ان شكوت الهوى فما انت منا (آاا ياعين) فاحمل الصد والجفا يا معنى

تدعي مذهب الهوى ثم تشكو(آااا ياعين)اين دعواك في الهوى يا معنى

قم من النوم واطرد الهم عنا(آااا ياعين) يا غزالا اذا مشى يتثنى*

بره وفي جلسة كراسي عند الفيلا.. فطور وشاي.. ومهره بالعود اللي خذته من سيارة سيف..

وزينه تغني.. وتستهبل.. على سيف الصغير وهو نايم على الكرسي ومو راضي يصحى..!!!

بلقيس تضحك:

يابخته انتوا تصحونه كذا..؟! .بيدلع زيادة وينام..

ضحكت زينه.. وهي تدقدقه:

هارون الرشيد.. مب سهل..

سيف مندعس جنب مهره ومو راضي يصحى..

مهره تضحك :بيدخل فيني..

سحبته زينه:من قلب زينه مين..؟!

بنعس:سيف..

زينه :من عين زينه مين..؟!..

يندعس في حضنها: سيف..

زينه:سيف اذا ماصحيت بمشي.. برجع لجديده..

فتح.. ويطالعها وعينه منكسره:

تلوحين جديده.. تخليني.. والله اهطك..

ضحكت:تطقني يالتسلب..!.

بلقيس:ياقواة عينك.. حد يطق خالته.. قم.. عشان تصحي بيان وديم..

قعد ويعرك في عيونه:وين فالس..؟!..

مهره: فارس بالخيمه رح صحه...نايم مع بابا نواف..

نزلته.. زينه وراح توجه لباب المجلس.. القريب..

زينه :من جدك..؟!.

مهره.. تاكل قطعة بسكوت:وش..؟!

زينه بقمطه:في احد نايم هنا.. وانا قاعده.. آلعلع..

بلقيس تضحك:ياشيخه.. عادي نايمين.. نومن ثقيل.. لو تقوم الحرب ماصحوا..

مهره:مايسمعون ماعليك.. واذا اسمعوا.. عادي..

زينه تهاوشها:يالبازع ياقليلة الحيا.. انتي كلش.. صرتي ماتستحين..!

في الخيمه.. جاهم صوت طق سيف وينادي.. :فالس.. افتح باب.. فالس.. قوم..

وتكرر النداء..

ونواف مطنش ورجع نام بعد ماسمع صوت زينه وهي تغني..

اما فارس بس استوعب.. ان سيف يطق.. قام بسرعه.. واول شي فكر فيه.. ان سيف طالع لحاله وخاف يطيح في المسبح..

فقام بحركة سريعه.. وطمر في الظلام.. وصقع في صحن البيالات.. اللي انطشوا.. وصاح:الله يلعنك يانواف.. حد يرقد في ظلمه كذا..

نواف راقد.. ولاكنه صار شي..

وفارس سحب جواله شغل الفلاش.. عشان مايدوس ع الزجاج وهو يقول : يلا جيتك حبيبي..جيت سيف جيت..

فتح الباب.. وسيف رافع راسه ويطالعه.. ويأنبه:ايش رحت مانمت معي في الغرفه..

جثى فارس.. وهو متعومس من الشمس.. وابتسم وهو حاط ذراعه فوق عيونه:

انت نمت.. وانا ظليت لحالي.. نزلت يم نواف شفنا فلم ونمنا..

سيف يعانقه.. :نروح حصان.. اووبه ودينا..

سيف لمح مهره..وهي تطالعهم.. وجنبها بلقيس و زينه متغشيه بشال..

قال:ودامك صاحيه.. ورى جاي يطق لحاله.. نشفت.. قلت طالع لحاله.. وبيطب بالمسبح..

مهره باستمتاع :يالبى.. احبك لاصرت مسؤول..

ابتسم فارس :صحى ابوي..

مهره:ايه داخل..

بلقيس :وين اللي بيروحون الاسطبلات.. والله انت ونواف.. ماينوخذ عليكم.. كلام الليل يمحيه النهار.

فارس:اخوك الزلابه ماخلان ارقد.. تراه من الساعه ثنتين لاست واحنا نكفخ قهوه وشاهي تلقيمه..

بلقيس:طيب صحه هالحين احدعش.. ابوي كلم بوخالد بنروح معكم.. بيفضون لنا المكان..

فارس اخفى ابتسامته الخبيثه:وانتي مهره بتجين.. واختك..!..

مهره:ايه بنجي.. نتفرج..

فارس:تجون تركبون..؟! تفرج مانبيكم..

زينه :واحنا شعرفنا ياحافظ.. اركب اطيح على وجهي..

مهره.. اللي واكبت زينه على طول :يكفي نشوفكم يالفرسان الثلاثه..يلا صح نواف.. ابوك يبي يرجع هنا قبل المغرب..

فارس.. واللي شاف زينه على الخيل ويدري انهم يكذبون :بصحيه واجي.. اخذي ولدك..في زجاج.. مكسور.. بلقيس..خلي احد يجي يكنسه..

دخل الخيمه وسكر الباب.. وشغل النور وبحماس وخفوت:قم نواف.. قم.. ان ماقمت بيفوتك نص عمرك..

بتذمر:طف النور يا**..

فارس جلس عنده وهزه :ماتبي تروح الاسطبل.. نواف يضب نفسه:روحوا انتوا..مافيني تعبان..

ضربه فارس على صدره:حبيبتك بتروح..

نواف ماستوعب على طول.. الا فتح عيونه:

حبيبتي..!!!!!!!!!... زينه بتروح..

فارس :ايه.. قم عشان تغازلها وتميلح.. وانت فوق الحصان.. عشان تعلمها ان بينكم شغلات مشتركه.. قوم يلا..

نواف.. استعدل: والله ان كانك تكذب.. ياويلك..

فارس:افااا عليك.. اضبطك..

.......

دخلت بلقيس.. كانت تمشي في المدخل.. واسمعت امها تقول :

وليد وراه ماظل هنا وش مرجعه لحاله..

سيف:هو من سمع عمي فيصل وهو يخطب بلقيس لشبيب.. وهو اخلاقه ***مره وحده طلع وهو منغث..

سعود بهدوء:وليد وش مفكر.. بنترك عيالنا يحبون ويتمعشقون ويتزوجون بدمقراطيه على قوله..

دخلت بلقيس وبنفعال وعصبيه.. :

مين مين.. مين اللي خاطب مين..؟!.

مزنه:عنبوتس عيب سوي نفستس ماسمعتي.. عرز (عرق).. الحيا انقطع.. مرتن وحده..

بلقيس بانفعال:جده.. ماهنا مكان للعيب.. تراه انقال بلقيس في هالبقعه.. ماني حاشره نفسي في موضوع مالي علاقه فيه..

موضي:كلام عابر.. ومافيه شي رسمي..

بلقيس بتسائل منفعل لابوها:ولايكون عشمتهم فيني..

سعود عقد حواجبه:وش تنقدين ولد عمك فيه.. واذا تممت.. ورحبت.. وش اعتراضك عليه..

صاحت:انااا مابي اتزوج ذا الحين..!..

سيف:طيب اهدي بلقيس.. ماحدن غاصبك على شي..

مزنه:وليش.. المصاصه بفمها.. عشان مانغصبها.. امك يوم هي قدك عندها سيف.. ونواف وعساف رحمة الله عليه.. وولد عمك ماشاء الله عليه عقل وثقل ووظيفه سنعه...هماه يشتغل بصيدلية الديره.. دختور الله لايضره .. هو اللي من اخوانه..من صغره.. طينة جنه.. لايشرب ولايدخن.. وحتى الفجر يصليها بالمسجد.. مير امتس داعيه لتس لوخذتيه..

بلقيس بعصبية وغضب: وانا سبيته ولاذميته.. جده مابيه.. ولا ابي اسكن في الديره.. ولا ابي اعرس اللحين.. يبه دق عليهم اللحين.. وقل لاحد يفتح هالسيره ثاني..

سيف لاحظ يديها ترجف.. قام مسكها وخذها بذراعه:طيب خلاص.. وش فيك عصبتي كذا.. انتهى الموضوع.. ماتبينه..ورويسك الغالي ماياخذك..

دخل فارس وشاف الوضع..

ومزنه تقول بعصبية :قلة حياء ودلع ماسخ.. ولا البنية عيال عمامه أولى فيها..كل وحده لسانها وش طوله..

فارس :وش فيكم.. من مزعل بلقيس..؟!

موضي:مافيها شي.. خذها واطلعوا فوق.. بدلوا.. عشان تروحون للخيل..

سعود بحده:اصبري ياموضي.. قبل تصعد تعطيني سبب واحد مقنع.. يخليها رافضه شبيب..

*وتضخم قلبي وهو ينبض بصوت يكاد يُسمع.. سببي (هادي) .. ذاك اللذي تربى في جوف قلبي.. كبر وبلغ وشاب في قلبي.. هادي كهل عاجز في أوردتي.. عليا بره.. حتى لوكان عجوز رافض عنيد.. لايمكنني الفرار منه.. كأنه انفي.. هو انفي حتى لو كان أعوج..*

تصلبت نظرتي في وجه ابوي..مايشوف هادي بعيني..؟!!!!

سيف :خلاص يبه.. خلينا نأجل هالموضوع.. ولاتضغط عليها..

سعود:اصبر ياسيف..

واشار بسبابته وبانفعال :عمتس طلبتس وانا قلت له خير.. وانا ماني من اللي يقول القول وينفلق منه عشرين قول..شبيب رجال والنعم.. ان كان عندتس سبب يقنعني.. ولامارده..

فارس طالع جده وتوسعت عيونه :

يبه سعود.. تكفى.. بلقيس ماتصلح لشبيب.. كلش مايتوافقون..

سيف عقد حجاجه.. وخذ بلقيس عند الدرج.. :اصعدي.. وبدلي.. وانت يا فارس..

اصعدوا.. وسيف جلس بهدوء:

يبه.. قفل هالموضوع..

سعود:وانتوا من متى احد سمع فيكم قولي..

سيف برجا:انا فوجهك..

دخل نواف.. وسلم.. وحس الوضع متوتر.. اشر بعينه لامه يعني شسالفه..

اشرت بشفايفها.. (بلقيس).. وسوت بصبعها حركه يعني خاتم.. فهم على طول لان كان موجود وقت الكلام..

سيف:مافي كلمه تعلى على قولك.. بس الا الزواج مافيه غصب.. ان اقتنعت.. ولاانتهى..

التفت نواف لابوه.. وقال: عسى فاتحين موضوع بلقيس..ومن جدكم تناقشون فيه..!

سعود بعصبيه :جاك الثاني..

نواف:واضح الرفض.. وانا رافض.. عاد ابوي صدق تصالحنا مع عيال عمي فيصل.. بعد سالفة ال**حمدان.. مع سيف.. بس والله لو عندي عنز ماعطيتهم اياه.. عشان اعطيهم بنتنا..

مزنه طق سكرها مليون :

اياااا التسلاب... ياعيال التسلاب.. هذا قولكم على ولدي وعياله...

نواف ولاهامه:والله ياجده.. كلمتن تستحي منها بدها.. وعمي ماعندنا له شي.. اذا سيف بيجامل.. وبيجيكم بالتفاهم.. انا مانساه وهو غارق بدمه.. واولهم عمي فيصل نقز قال خطا ومب متعمد.. وشبيب جاي يشهد يقول حمدان بيصيد قمري.. والله القمري اللي صابوه قمرينا.. اللي يبي يصيد قمري تراه بالسما ماهو على الأرض..

سيف اخفى ابتسامته.. وموضي بحمية:

ايه والله انك صااادق يانواف..

مزنه :حسبي الله عليكم.. سكري طق.. ياليهود يالحاقدين.. ولد عمك يامال اللي مانب قايله..واخوك بصحه وعافيه وش خليت للزير اخو تسليب..

نواف :عاد انتهينا ياجده.. وتراه عمي فيصل يحرج ابوي.. انا ادري ان ابوي بداخله ماوده.. صفا صفا صفا.. بس عاد مايعطيهم جعدته..!!

زفر سعود بكل قوته:قفلوا الموضوع.. ولاحد يتكلم فيه ويبدي راي.. موضوع بلقيس عندي.. وانتهى...انا اللي ارفضه ولا اوافق عليه.. وان صار فيها اقناع.. انا اللي اعرف لبنتي.. واطلعوا منها يالاثنين..

وقام وطلع فوق..

سيف طالع نواف وضحك :والله كفوو يالامير.. طلع الانجلللليزي طلع.. هذا وتوك قاعد من النوم الله لايضرك..

نواف غمز وصب له قهوه:اعجبك..

مزنه معصبه:وانت الحين جاي فازع.. وتطري سالفة حمدان واخوك.. الظاهر انك نسيت يومك تبط راس شاهين بهاك الحصاه.. بس الجمل مايشوف عوجة سنامه..

نواف مد كفه:رجاءً ياجده.. عاد شاهين ونجود لادخلونهم في عيال عمامي الثانين.. هالاثنين مابينا وبينهم الا وضح النقا.. واذا نسيتي اذكرك.. تراه كنا نقط الحصا بالسيل وحاشت شاهين.. ماهوب صوبته زي بعض الناس.. وكلها تسع غرز.. وردت دامجة شاهين احسن من الاول..

نواف يشير لسيف:ماهوب مثل هالضعيف.. تونا معرسينه..فرحانين فيه.. بدل مايطير شهر العسل.. دخل عمليات.. والفشقه تسري.. وهم يشرحون.. انتي اصلاً ياجده ماجاك السكر الا في الحادثه.. المفروض.. انتي اللي تقولين لا.. ماتجين توسطين..

موضي قرصته ومن بين اسنانها:خلاص.. انطم.. بتزعل جدتك..

سيف صب لها ماي.. ومده لها.. :روقي.. ومب صاير الا المكتوب.. وقومي.. روحي معنا على الاسطبلات.. تونسين وتتسلين..

مزنه تشرب وبعصبيه وانفعال : مابي اروح مع هالتسلب مكان.. غثني.. طويل لسان.. قليل الخاتمه..

نواف :افاااااا.. عاد كلشي ولامزنه..

مزنه : وانت خليت فيها مزنه.. لاحشمتني ولاحشمت ابوك.. بس اشبع بختك.. بعرسه اللي احسن منها.. اي والله.. مير الزينه طلعت من عدتها..

توسعت عيون سيف..

ونواف بغى يشرق بالقهوه..

سيف :هدي هدي ياجده.. مالك لوا بس انسي الموضوع..

نواف بانفعال:وانتي طقها ولحقها الله يهداك.. بلقيس مارضت.. تاخذين له اخت مهره.. شفيك جده تمترين هاشمي..

سيف بحزم:وبعدين ياجده.. بلقيس.. اناقش ابوي.. وكلمتي ماتعلا كلمة ابوي فيها.. بس زينه اخت مهره.. ماحد يجي صوبها..

موضي :وليه.. ترى شبيب مايعيبه شي.. رفضي له عشان سالفتنا القديمه مع بيت عمك.. اذا زينه بتوافق..وهو بتعجبه.. ليه توقف بنصيبها..

سيف عاقد حجاجه وبين اسنانه:

زينه وقبلها مهره.. مروا باول تجربه.. سودا.. ان كاني طلعت مهره.. من اللي كانت فيه.. ماني بحاط الزينه.. الا عند رجال يستاهلها..وعيال عمي عارفتهم انتي.. اطباعهم حاده.. وانفسهم زفره.. البنت ماهي برجا حظ يايضبط يالا..!!.

مزنه بتفكير بكلامه:ان شافها.. والله..ان...

قاطعها سيف: قفليها ياجده.. عشان مازعلك ولاتزعليني.. زينه اليوم معكم بكره بتمشي.. ومثل رفضي اجيب مهره الديره لاني كارهها.. زينه.. اختها.. يعني اختي.. ولي كلمتي عليها..وهي وثقت فيني وعطتني حق التصرف.. باهم قرار بحياتها.. فاماتدخل الديره زوجه لعيال عمامي.. دام راسي يشم الهوا...!!

(للتوضيح.. لان سيف هو اللي ضبط موضوع طلاق زينه.. مع المحامي.. عن بعد.. بالتوكيل اللي سوته له.. لما رفض فلاح يروح معها..)..

نواف اللي هبط.. من الفكره..!

التفت سيف عليه.. قاله :وانت بتقعد تتقهوا اقعد.. احنا ماشين..!.

نواف طمر:هالحين اركب السياره..!

******

كافي تعب ياضيقة الصدر تكفين

صكي زراير هاجسي .. واعتقيني

غصيت في العبره مثل حد .. سكين

قومي عن ضلوع الصدر وارحميني

في نادي.. واسع.. فيه شباب.. يدربون على اجهزة رياضه وشيل اثقال.. هادي كان واقف يشرب ماي وكل وجهه وشعره معرق..!

المدرب :هيك بتتمزق عضلاتك هادي.. لما بدك تزيد الوزن بالتدريج.... بتفش خلئاتك بالحديد.. بكرة مابتئدر تشيل حتى لتر الماي..

ارتسمت على وجهه ابتسامه باهته:ماعليك بوس.. ارتاح كذا..

المدرب يضغط ذراع هادي:ايِّ دخول على المساج.. لعد الفلبيني يفصفص لك عظماتك.. يكسب فيك سواب..

هادي ضحك: ماشي.. لاتشيل هم..

راح المدرب.. وبقى هادي.. وهو يمسح وجهه وشعره بفوطه..

شال جواله.. ماكلمها ولاكلمته ولاصار بينهم مواجهه عن خطبة البارح..!.

ولاناوي يكلم..

ورغم زحمة دواخله.. الا ان مانسى جمان.. تعبانه هالايام.. وحتى كان بيتصرف ضد رغباتها.. الا انها طمنته وقالت له ان راشيل بتجي عندها.. لمن تولد..

طلع عند مسبح خارجي.. وجلس على كرسي واتصل عليها.. ردت وصوتها كان خافت وتعبان.. :هلا هادي ارحب..

بقلق:وش فيك زايد عليك شي..

جمان:لاكنت مغفيه.. طلعت الصباح ارسم عند المزارع.. ونعست..

هادي :جمان لاتعبين نفسك.. خلاص خلك مكانك.. بترسمين في البيت.. انتي تعاندين.. بس والله لاانكبك.. وتشوفين عمي سعود ولا رجالك يطق عليك الباب قريب..

جمان بتحذير:ماتسويها.. هانت.. خل اولد وانا بتفاهم مع ابوي..

هادي زفر:جات خويتك..؟!

جمان:ايه وصلت البارح.. انتوا اهم شي.. اخباركم.. امي احسن اللحين..؟!.. بناتي.. ماشفتهم هادي..

قال: كلهم تمام.. وامورهم طيبه.. بيان وديم شفتهم البارح بمزرعة ابوك.. مسوي عشى لامك.. والكل حضر..

تحشرج صوتها:ليه ماصورتهم.. ابي اشوفهم..

هادي : والله كنت ناوي.. بس زحمه.. ومابغيت شاهين يلاحظ.. لان تعرفين من البدايه شاك اني اعرف مكانك.. فاماحبيت ادخل بدوامه جديده معه.. والنتيجه تحليفك لي.. اللي والله لو كنت عارف نتيجته ماحلفت..

جمان:ادري اني قالقتك هادي... بس شسوي مال الشدايد الا اهلها..

تنهد بحرقه: مامن شدايد يا اخوك.. ولت الشدة.. ومابقى منها شي..

باستغراب: وش فيك .. صاير شي..!

شرد.. لمده..

بعدين تكلم كنه بيغير الموضوع.. وهو في صلب الموضوع اللي موجعه.. :

شكله بيصير عندكم عرس قريب.. ابشرك..

جمان:لاتقول.. عزم نواف..

هادي:لاء.. بلقيس..

جمان باستنكار:وشو..!! شلون.. ومين..!

هادي:البارح عمك فيصل.. تكلم فيها لولده شبيب.. وابوك واضح لاينه اذنه.. وعلى قولهم ولد عمها واولى من الغريب..

فاجئته جمان: وانت هادي.. انت.. شرايك بالموضوع..؟!

عقد حواجبه.. واستغرب كلامها.. بس مايبي يبين شي.. : انتوا خواتي.. واتمنى لكم كل خير.. وشبيب ماعرفه والله.. الا كاشكل واسم.. اذا هو كفوو.. الله يوفقهم..!.

سكتت جمان شوي.. بعدها تكلمت :شاهين تزوجني وكان يحب وحده.. وظلمني.. حبني صدق.. بس ظلت بينا.. لمن ضعت وضيعت بيتي.. شبيب بيحب بلقيس.. لانها تنحب.. وهي بتحاول ترضيه.. بس بيظل الحب القديم.. بينهم.. وبيحرقهم.. هادي الزواج هذا مستحيل يتم.. لاتنعاد قصتي في بلقيس.. عودها ضعيف.. وتنكسر..

هادي توترت اعصابه.. من كلامها المبطن.. :وش قصدك جمان.. خلك واضحه..!

جمان بدون لف ولادوران:لاتتغيشم هادي.. ادري انك تحب بلقيس.. وبلقيس تحبك.. بس انتوا اغبى اثنين حبوا بعض في هالدنياا..!

وكان تصريحها صادم له..!

صار بينهم حوار.. احتد وهدا..لمن انهوا الاتصال..

جمان على سرير ابيض في مستشفى.. جات راشيل معها ورقه:

هل انتهى السيروم..!

جمان تجلس وتحاول تشيل الكنولا.. :انتهى وهذه الممرضه لم تأتي..

راشيل مسكت يدها.. :اتركيها.. هل انت مجنونه..!

نادت السستر وجات شالتها.. وقالت لها لازم تجي تكمل ابر الحديد.. وتسوي تخطيط للبيبي..

(جمان تعبانه خاصه مع نفسيتها.. بس عنادها ماادري وين بيوصلها)

راشيل تساعدها تلبس البالطو وطالع في وجهها الشاحب وعيونها الغايره في دموع ماتنزل.. وقالت:جمان.. ستقتلين نفسك والطفل هكذا.. لما تكابرين اتصلي بزوجك.. واصلحي الامور..

جمان مب عارفه تتكلم.. بتبكي.. راحت تحط جوالها بشنطتها.. وتعطي راشيل البطاقه :راشيل اصرفي الدواء ارجوك سأنتظرك بالسياره..

وطلعت..!!

الشوق يذبح والعنا ماله حلول

و الدمع يفضح والمكابر مصيبه

............

في الاسطبل الكبير.. اللي كان قريب من المزرعه..

كانوا الشباب والبنات فيه.. مع البزراين بنات جمان وسيف الصغير..

وانواع الوناسه وركوب الخيل....

بلقيس بغضب داخلها.. على هادي.. وعلى هالموضوع الجديد..

موجوعه من ابوها.. كيف كان معصب اليوم.. وكأن يبي يجبرها..!

زينه كانت قدام احد الخيول الاصيله.. ومعها الثلاث بزارين.. وتضحك معهم.. وهي كل شوي ترقي واحد فوقه..!

مهره.. متسنده على سياج.. ترقب سيف فوق احد الخيول.. وكان خاطفها من نفسها بنظره حالمه.. وتتخيل.. من شوي وقت ركبت السياره.. لما نادتها موضي.. عند الفيلا..

ونزلت لها.. راحت وسيف يراقبهم باستغراب وامها تهمس لها ومهره تضحك..

ارجعت..

سيف بفضول :وش تقول..

مهره:لا بس توصيني على البزارين..

سيف بتكذيب:بالله..!

مهره قلبها يخفق.. كانت موضي تحرصها.. دامك موضامنه نفسك لاتنطين فوق الخيل.. وتديفشين عليه.. تطيحين ولاشي..

ضحكت: من جدك يمه.. مافيه شي.. ماحس اني حامل كلش..

موضي قرصتها على ذراعها: اعقلي يامهره ولابنادي سيف واقوله..

مهره:لاتكفين.. والله مابي اقوله الا لما اتأكد..

موضي:اجل انتبهي وبس نرجع تروحين تحللين ولااقلها تاخذين منزلي..

مهره بوستها:تمام.. دعواتك..

افاقت وسيف يقرب منها بالخيل.. ورفع نظارته على راسه:وش سالفتك الليوم..؟!

ضحكت:وش.. تجيك التهايم وانت نايم..

مد كفه: تعالي اطلعي معي..؟!

مهره:اخاف اطيح..

سيف بصدمه.. ضحك: ياشيخه.. من اللي يطيح.. مفكرتني غشيم فيك.. وانا اللي شايف صورك وماضيك.. ولانسينا صورتك وانتي متعلبشه فوق نخله.. تعالي بس..

مهره مسكت كفه: ياربي الواحد يبي يصير رقيق ومايخلونه..

وقبل يسحبها.. كانت بخفه تدوس على مكان القدم اللي فيها رجل سيف.. ويدها في اللجام.. وتركب..

حوطها بذراعيه وضرب الخيل برجله..كان يمشي فيها.. راسه عند راسها.. يداعب انفه عطرها والعود..

ومهره تحس بنشوه رهيبه.. وسعاده.. من قربه .. ولو تكون حامل.. يالله..!

قالت :ذكرتني بابوي.. كان يمشيني على الخيل كذا..

كانوا يتهامسون..

لما جاهم صوت نواف وهو يمشي موازي لفارس:الله يرزقنا.. يافارس..

مهره:اللهم لاحسد..

فارس واقف بالخيل ويصورهم بجواله:ورب الكعبه شكلكم يصلح نركب عليكم شيله غزليه..

مهره عطت وضعيه :وكذا كذا فارس..

صورها وهو يضحك: بحطك خلفيه للجوال..

سيف مشى معها..!

نواف منقهر.. وزينه بعيده تلاعب البزارين.. ولاراكبه هي..

فارس:ورب الكعبه انك تجحفلت.. مفكر اللحين بتشوفها.. تروكض على الحصان مثل هاك اليوم.. البنت ثقيله.. ومسويه ماتعرف..!

نواف:حضي واعرفه.. **..

******

مر الوقت.. وقبل المغرب.. الكل اجتمع عند طاوله في الاسطبل.. خارجيه.. كانت موضي راسله لهم كيك ومعجنات وعصاير..!.

بلقيس رتبتهم مع فارس..

مهره جات.. وكانت بيدها عباية ملفوفه.. حطتها جنبها..وخذت قطعة كيك..

سيف:وين الزينه.. ماجاعت..! لايكون مستحيه منا.. نقوم ونخليكم تاخذون راحتكم...

مهره.. :خليها تفش خلقها شوي.. قبل نمشي..تجري بالخيل في المضمار.. دام فضى المكان هناك..

نواف.. يسمع حوافر الخيل تضرب في الارض.. بس مو في مجال رؤيتهم ابد..

انقهر.. يبي يتصور روعة المنظر.. ماكانت تمشي في الخيل.. ولاتجري.. الصوت كان واضح.. ان وحده قلبها قووي...!

تصارع الريح في ركض مجنون على ظهر حصان..!

فارس بغى يفقع ضحك على نواف وجهه المحبط.. اللي لو احد دقق فيه انفضح..!!

*****

بالليل كانو يركبون السيارات ويحملون اغراضهم..

والحريم كلهم بعباياتهم...

زينه.. سلمت عليها موضي.. ودعت لها.. وقالت:روحي يازينه عساك لتوافيق وسعاده وهنا..مالها حد.. سامحينا على القصور.. والله ماودي تمشين..!!

زينه :الله يسعدك ياخاله.. ماقصرتوا والله.. بيض الله وجيهكم..وعاد زين صبحا تجملت.. نروح قبل ينزل علينا الغضب..!!

بلقيس تضمها:زيوون عاد مو تروحين وتقفلين بابنا بطين وعجين.. تراك دليتي الدرب.. وميزانك والله نفس مهره بقلوبنا..

زينه:حبيبتي والله..!!..

التفتت على مزنه تمشي بعكازها.. مع الخادمه.. راحت عندها.. واشرت للخدامه انها هي بتوصلها للسياره..

زينه وفعليا ً جاتها العبره بمرح مغبون: ها صديقتي.. ماتبين تودعين اشوفك تصيددين..!!

الجده تمشي معها : يالزينه انا ماهوب اصلاح مع الوداع.. قلبي خريش.. والله العالم اتعودت عليتس يمه..

زينه: بحرق جوالك اتصال وانتي بس.. اطري عليك اضغطي رقم خمسه ويطلع رقمي..

مزنه:عسى عيني ماتبكيك.. يازينك..

زينه:اي سيارة بتركبين..؟!

مزنه:سيارة نويف.. هي اللي بالارض.. ولاسيارة سعود ان رقيتها شفت مصر..

زينه تضحك: الله اكبر..

مزنه:ايه ماقوى ياأمك.. لارقيت.. بينزلوني منها في المستشفى.. بتشهد..

ضحكت: بسم الله عليك.. انتي تبالغين تبين تكشخين في هالبورش..

نواف واللي اختطف كل حركه.. من زينه وكل ضحكه وصوت..

وكأنه يبي يخزنها كاوداعية..

هم بيمشون.. وهي بتركب مع مهره وسيف بترجع لديرتهم.. فكان توديعها للجميع.. موجع له بالذات.. ومايدري كيف تضخم هالشعور بداخله .. وكيف تعملق اكثر مجرد مادرى عن انفصالها..!!

زينه سفطت عكاز الجده بعد ماركبت سندته على السياره.. وراحت بوستها وحبت يدها:

جده حبيتك.. الله لايجعله اخر لقى... ادعي لي جده..ادعي لي بقلبك النظيف.!!

نواف اللي مر خذ العكاز.. عشان يحطه بالشنطه.. سمع صوتها المبحوح والمجروح بكلمتها

(ادعي لي ياجده)..

امطرتها مزنه بسيل من الدعوات المصفصفه.. بسجعات وبلاغيات.. عجيبه غريبه..!.

ادخلت فيها كم من اسماء الله الحسنى.. وذكرت تشبيهات من بلاء الانبياء.. وفرجهم..!.

نسجت اسم زينه.. في وسط الدعوات..

ماجعل زينه تنهار داخليا ً..!

وتروح تضم راسها وتبوسها..وتكرر(آمين.. آمين.. آمين)..!

وسكرت الباب.. وهي تحاول ماتبكي وتضيق صدرها:بروح لاتأخر.. على سيف ومهره.. عاد ياجده لاتنسيني..!

وتوها بتتعدا نادتها.. ارجعت والجده فسخت خاتم ذهب من خواتمها فيه فص احمر..وسحبت يد زينه:لبسيه.. مهب مودرن على المودا.. بس تذكري مزنه فيه...

شهقت زينه وهي تسحب يدها:لاااا جده..يزهى عليك والله.. ماحتاج شي يذكرني فيك.. خلاص انطبعتي بقلبي..

مزنه بانفعال:ان لله وان اليه راجعون..

نواف اللي كان قريب من السياره:اخذيه لاتزعلينها..

التفتت عليه.. بعدين عليها.. ومزنه:ماتبون الا الفالتيل واللي مادري شسمه.. مايجوز لكم خواتم العجز..

ابتسمت زينه.. ومدت يدها :والله مب قصدي.. ياربي شهالصديقه.. نازرت علي.. لبسيني انتي اياه..

مزنه لبستها.. وبتغزل: ويه شوفي شزينه على يدياتك.. روحي فالك دبله.. لامير اطخم يقدرك ويحبك..ومايشوفك الا انتي..!..

اكتفت انها باست كفها..

وراحت بسرعه لسيارة سيف..

اللي ينتظرها مع مهره..

عشان يتوجهون لديار صبحا..!!

نواف راغبها حتى اختفت.. وزفر بتنهيده..

عظيمه كنها قصرٍ تعلى نايفات السور

‏ورقيقه كنها وردٍ تفتح وسط بستانه

****

في طريق الرجعه.. زينه تطالع خاتم الجده.. يالله يالجدات.. وحب الجدات..!!.

الجلسه مع مهره واهلها والجده مزنه بالذات نفعتها كثير..!

مهره.. تداعبها:زيون.. الجده.. كيفت معك..ياشيخه اكلتي قلبها..!!

سيف وهو يسوق :شوي وتشيلك بشنطتها.. مب سهله عجيزنا..

ضحكت زينه:

ياحبي لها..

سيف بهدوء:زينه ابوي.. البيت بيتك.. ماتضيمك الدنيا وانا موجود..

زينه:عسى عمرك طويل يابوفارس..

مهره مبتسمه.. ومبسوطه.. ضمت سيف النايم في حضنها..

وسيف التفت جهتها.. وحس وش تبي تقول.. ابتسم وغمز لها بعينه..

قُومي تعزوي بي إذا مالك أخوان

‏ترى المحب.. يكون عزوة حبيبه

*****

باليوم الثاني.. بالنهار.. سيف في الصاله.. يذاكر لفارس رياضيات..

عصب عليه.. شب سيجار :وش فيه مخك تنح.. والله لو اشرحها لسيف فهم.. معقوله فارس..

فارس ضحك:يبه.. شوي شوي.. لأن انا ماجي بهالاسلوب.. وفعلاً.. الوضع معقدني.. فتعال لي بالين...

سيف يمسك الدفتر.. ويحل المسئله.. ويتدرج فيها.. وهو يشرحها نطقاً.. وانها سهله.. ومايبي لها شي..

فارس بتناحه:مافهمت..

سيف بانفعال: لأنك حمار...!!

نزلت مهره.. بهدوء.. وجلست.. وظلت ساكته..

استمروا في الصراع مع المذاكره.. وهي صامته.. وتطالعهم..

فارس وهو يضحك :مهره شوفيه.. ماعرف كذا..

سيف منفعل:لاتضحك.. ياحيوان.. كيف بتختبر فيها بكره..

مهره بخفوت:ماجاء سيف..

فارس :اكيد بتمسكهم امي سلمى لمن العشاء بعد..

مهره بخفوت وصوت مرتجف:كويس.. عشان يشبعون من جده مزنه.. وماتظل تنام هناك..

سيف عقد حواجبه.. ورفع عينه عن الكتاب: وش فيك..؟!.

مهره وكنها تنفي عن نفسها تهمه: مافيني شي.. ليش..

سيف بنص عيون وتدقيق:

عجين يدي.. والله فيك.. قولي وش صاير..

فارس يطالعها:

وش فيك مهره... وش فيك.. ؟!

مهره.. بربكه ولعثمه.. :شوفوا انا مب متأكده.. لازم اروح المستشفى..

سيف بقلق:تعبانه..!

مهره بنفي :لا لا زينه انا.. بس شكينا.. يعني انا وامي موضي.. وجداتي.. وكذا.. ان. يووه شلون اقول...

فارس بنفاذ صبر :وليش يشكون معك.. تراهم موسوسين.. اكيد قلتي صداع قالوا سرطان..

سيف بترقب.. وكأن فهم وش بتقول..

طلعت جهاز التحليل :امي جابته لي الصباح..

وطالعتهم.. بنظرات.. حماس وقلق.. وسعاده :

انا شكلي حامل..

فارس بنفعال وصياح :اووووماااااا.. من جدك..

سيف قام وجلس ع الطاوله قدامها..

وخذ الجهاز منها :هو وش يطلع لاصار حمل..

مهره بلعت ريقها : خطين.. هو طلع خطين..بس مادري.. احس مو صدق..

سيف يحدق في الجهاز.. ورفع عينه لها.. حدق فيها وفي بطنها.. ويدينها ترتجف.. :

طيب انتي ليش خايفه.. ماتبين..

مهره سكرت فمها.. وعيونها تمتلي دموع.. وبمشاعر جياشه:

خايفه اروح المستشفى ومايطلع صدق..!!..

سيف راح ضمها.. وهي تبكي وتقول :ياربي يكون صدق.. اففففف مب عارفه اعبر..

فارس واقف ومتشنج.. وردة فعله عجيبه وهو يقول :

يالله شهالصدمه.. يعني اللحين لما تجيبين ولد ولابنت.. يصير اخوي.. اخوي صدق.. ولد سيف بن سعود..

ابتسم سيف..

هل بعد السنوات ذي كلها..

يصير عنده طفل غير فارس..!!!!

مهره وهي تمسح دموعها وبخفوت مبحوح وسعاده:

ايه فارس.. تصدق.. والله انا لسى.. مب مصدقه.. سيف يمه مستوعب كيف السالفه كيوت..!!

سيف مستوعب حجم عدم تصديقها وفرحتها.. يمكن الكل مايقدر حجم مشاعرها.. لانهم يفكرونه الطفل الثاني لها..

مو مستوعبين.. ان حمل مهره هذا الفرحه الاولى لها..!!

سيف باس جبينها وكفها.. ومسح دموعها.. :

ياربي.. كيف النعم تجي تباعا ً.. الحمدلله عليك.. وعلى العطايا اللي تجيني بسبابك..!!.

.....

وتمر الأيام..

وتمضي بابطالنا..

والآن شعبان..

نبذه عن بعض الأوضاع..!

*مهره حملها سيطر على الاجواء.. والكل فرحان.. الطفل.. اللي كسر قاعدة سيف..بأنه يخلف من غير نجود..!

وطبعاً قبله مهره اللي غيرت كل حياته.. وازاحت كل الحزن والهموم.. اللي كانت مشوهه داخله..!

*شاهين عرف ان جمان بإيطاليا.. وضبط جدول رحلاته.. انُ يكون اغلبها على روما.. بحث في كل مكان يعرفه وزاروه سوى.. خاصه.. ان شهر عسلهم كان هناك.. بس عجز..

زار مكان دراستها..حاول يطيح على اي شي ممكن يوصله لها.. لكن..!

الوضع كان استحالي..

ابوها واخوانها.. حاولوا يساعدونه.. بأي شي يعرفونه.. بس ماوصلوا..

خاصه ان جمان عاشت حول الأربع سنوات هناك.. وكانت لها علاقاتها.. وتنقلاتها.. بحكم دراسة الرسم..!

*جمان.. ترسل احيان لابوها ايميل.. تطمنه.. بس ماكانت تتجاوب مع اي ايميل سؤال.. او محاولة اقناع في الرجوع..

باتت سجينه في عناد مرضي.. ومتشبكه بطفل.. كالبنيان الآيل للسقوط.. حذرها الاطباء.. ان حملها صعب.. واوصوها بالابتعاد عن كل مايثير عصبيتها.. او غضبها..

وشاهين..

لاتجد له.. الا كل حنق وغضب ورغبه بالافتراس..!!

*هادي وبلقيس.. وعجز هائل في المواجهه.. موضوع بلقيس معلق..عند ابوها..!

وهادي مقتنع.. دام ماقام بهالخطوه قبل.. ايش صورته وهو يقطع الخط على ولد عمها.. ويقنع نفسه.. ان ذا افضل لها..!..

احسن من الناس تاكله بانه طمع فيها.. وانهم يثيرون الجدل بالفارق بينهم..!

بلقيس كانت غاضبه منه.. و ماعادت تتواصل معه.. ووصلت لنتيجه.. ان قطع العلاقه مع هادي افضل حل..!

حتى لو ماتزوجت شبيب..

*زينه.. تعيش براحه وخفه.. ومايعكر صفوها.. الا الحاح عبد الإله.. ورسايله.. انه يبي يرجعها.. وابوه تواصل مع جدتها.. والجده رفضت.. هو حاليا ً.. بمصر.. ومن جد يتعالج.. هي تتمنى له كل خير بس بعيد عنها.. عدم يأسه فيها مقلقها..

__في صباح جميل.. الخوات في مزرعة صبحا.. مبيتين.. وفالينها.. والجده اللي كانت معودتهم على الحنه في شعبان كاطقس شعبي..

مهره صاحيه الصبح..

وتستفرغ بالحمام..وتبكي.. وتهاوش.. لانها كانت رافضه الطبوقه والجده اصرت.. ومع الوحم ريحة الحنه لعبت بحسبتها..

وسندس تضحك عند الباب.. وتطق:

طيب خلاص فتحي يازبده.. لايغمى عليك..

مهره:بموووت سندس.. الشرهه مب عليكم على اللي يطيعكم.. ريحة الحنه بكل مكان.. شسوي.. شسوي..

زينه تطق:طيب اطلعي.. اخذي ليمون.. تخفف لوعتك..

مهره تصارخ :مابي شي.. مابي شي.. انتي متخيله اتمضمض.. والحنا بيدي.. ارشح وجهي واشمه..شهالحاله..!!!!!

وشهقت:.. خشمي قام ينزل منه دم..

انصفقت وجيهم..

وسندس تطق :فتحي.. ياتبن..مهير فتحي خلاص..

زينه:بعدي عن الباب.. بشوته..

افتحت.. وحاطه فوطه بخشمها.. ووجهها اصفر.. :سندس.. من جد انا تعبانه.. حاسة الشم تلفت.. والتذوق.. والدنيا.. انا ابد مو طبيعيه..

خذتها وجلستها على الكنب :زوين جيبي ثلج. ومويه بارده..

راحت..

وسندس جلست مقابلتها وماسكه الفوطه بخشمها.. :

قولي لي يومك حامل بسيف.. وش كنتي تاكلين اول ماتصحين وترتاحين.. فكي ريقك..

مهره ارتبكت مع السؤال.. :

يعني اي شي..

سندس :كيف اي شي.. نساتك ماكانت كذا..

مهره ارتبكت اكثر.. ومسكت الفوطه.. وبعدتها:

كنه وقف..

سندس :انتي وها الرعاف.. يادافع البلاء..

جات زينه.. وجايبه بسكوت ناشف..مع ماي :

اكليه.. اخبر حماتي.. من تحمل وهي تقرش بسكوت شاي..

سندس :خليها تولي.. بسوي فيه حلى.. لاتخلصه علينا..

ضحكت زينه:انتي خلي هالفقيره تاكل شي.. تالي فكري بحلاك.. ياعمري خيتي..

مهره تاكل البسكوت.. بشكل مزري..

زينه.. :أووويه عليك.. يامهير.. تكسرين الخاطر..

سندس قامت:مساخه ودلع.. مسويه عمرها بكريه.. نست.. الفار اللي قاعد يعثي ببهارات صبحا..

نقزت زينه: لاتقووولين.. ناشرته تبيه يجف..عشان تطحنه..

سندس برواقه:والله هو وغنى بره شكلهم طحنوه.. قبلها..

ركضت زينه طلعت بره..

وسندس التفتت وعقدت حواجبها.. على مهره اللي انسدحت.. وحطت ذراعها على جبينها:

مهره.. لاطاوعين نفسك كذا ماتاكلين وتنامين كثير.. بينزل الدم عندك.. تعالي على نفسك..وتقوي..

مهره بدون تناظرها:بالعكس اكل.. متى ماخفت اللوعه..

سندس :ياشيخه.. ملاحظه من امس واليوم مافي بطنك الا خيار وطماط وملح.. شوفي ترى رجالك.. جايبك.. على الله تشتهين.. عند جديده وتاكلين.. شكل الحاله زادت..

ابتسمت والتفتت:

اي والله زادت.. كيف اشتهي الزاد.. وانا بعيده عنه.. مايمر.. مايمر..

توسعت عيون سندس وبصدمه من مهره العاشقه: ايااااا بنت اللذين.. طلعتي داجه.. خفيفه. وطايره بالعجه.. استحي ثقلي..

مهره تستعدل وبوجهها الشاحب ابتسامه جميله ونظره حالمه:

احبه احبه سندس..شوفي انا ربي ابتلاني قبل.. عشان يكافئني بسيف..

دخلت زينه وابتسمت.. ومهره تقول:

سيف عطاني الحياه.. جبر كسري.. جمع قلبي اللي تقطع ألف قطعه.... عوضني في غازي فقيدي.. ونوير اللي ينقال انها امي.. بداخلي صرت اترحم على عساف.. اقول ربي حطه بطريقي سبب عشان يوصلني سيف.. جد.. الحمدلله على سيف حتى يبلغ الحمد منتهاه..!!

زينه :الله يخليكم لبعض.. احلى اثنين وربي..

سندس بنص عيون تجنن مهره:

مااااجزتي لي.. وانتي متخرفنه وصايره خريش.. لااازم اقعد وافهمك.. التوازن..

ضحكت :خلي التوازن لك.. متسلطه على مشيعل.. انا اعرف لنفسي ولرجالي..

دق جوال مهره ع الطاوله..

سندس تطالع الرقم والصوره الفتاكه اللي طلعت لسيف مع الرنه :

زيووون تشوفين اللي انا اشووفه.. اصلا ً مهير ماضيع علومهاالا هالزين..ولاا..؟!

قاطعتها مهره وهي تضحك وتشيل الجوال من جنبها:

تقلعي لاتغازلين رجلي..ترى مارضا..

زينه فقعت ضحك:لا.. لا.. فات بو فارس اعترافات.. وغيره وتملُك...

افتحت الجوال وهي تقول ومتعمده تجلط سندس:هلا حبيبي..

سيف صوته توه صاحي:حبيبي.. جديده..!!

مهره : ايه من يوم ورايح بغير اسمك من سيف لحبيبي.. كيفك يابعد عمري.. ياقلبي انت..

سيف طالع شاشة الجوال.. بعدين رجع لها:

وش فيك مهره تعبانه..؟!..

مهره: ياعين مهره..قلبي.. امر.. لبيه.. اشتقت لي..

سندس قامت..ماتحب هالكلام ابد.. ومهره تدري عشان كذا تغيضها..

راحت ارسلت بوسه لسيف: وهذا القبله الصباحيه.. نرسلها عبر الاثير.. دام مافي لايف..

صاحت سندس فيها: اثقليييييي اثقلي ياملي.. شنوحك.. خفيفه..الله يخلف عليك..

ضحكت....

سيف :وش فيها الحايليه ماهو جايز لها الحكي..

مهره:ابد..!

طلعوا وخلوها لحالها تكلمه..

مهره سكتت شوي..

وسيف:وين راح لسانك..

مهره:كنت اغيض سندس وراحت..

سيف :يعني حكي.. مو من القلب..

مهره:اذا انت القلب.. وش لك بخرابيط اللسان..

سيف بصوته اللي يتخلخل بخلايا مهره:وحشتيني...!

اعترف لـ الليالي اني : بديت أدمنه

‏مستعد اشتريه .. و من سنيني أبيع

‏صوتك الناعس يلخّص فصول السنة

‏قلّي آحبك ، احبك هي أخت الربيع !

......

هادي في المكتب مع سعود.. وكان يشتغل على اوراق..

لملمهم بملفات.. وحطهم على المكتب :

عزلتهم مثل ماتبي..وكلهم لهم نسخ في الهاردسك..

خذهم تصفحهم.. وقال:نواف ماجاء..؟!

هادي :لا راح موقع البني..بيشيك عليهم ويجي..

سعود:عساكم ع القوه يبه..

هادي يدخل قلمه في مخباه:يقويك.. ياسنايدي.. تبي شي..

سعود :ابيك تكلم سعد البوفريح.. مابي احرجه ابيه في شغله..

عقد حواجبه :سعد ماغيره.. الدكتور..

سعود:ايه هو..جس النبض.. فيه وظايف صيدله بالجامعه.. محاضر شي.. ولا بمستشفى التخصصي.. هو عنده علاقات ويعرف..

هادي باستغراب :اعذرني على لقافتي ياعم سعود.. بس منهو اللي تبي له وظيفه بالصيدله..؟!..

تنهد وهو يحرك قلمه بين اصابعه :شبيب ولد اخوي فيصل..

*واجتاحني اعصار قاسي.. حطمني.. من ذكر الأسم.. بصوت خرج متلعثم رغم عني *..:

وش به هو مايشتغل..

سعود بهدوء.. :الا بس ابي اشوف له وظيفه بالرياض.. راتبها وميزاتها افضل.. واذا هو شاري بلقيس.. بيجي.. يسكن فيذا..

هادي بعصبية طلعت غصب عليه:

ياعمي.. الرجال ماراح يرضى.. تمشيه البنت على ماتبي... لاتطرح هالفكره بيتضايق..

سعود هز كتوفه:

ويمكنه يبي يطلع من الديره.. بلقيس.. حاطه العقده بالمنشار.. وتقول ماتبي الديره.. نجيب شبيب عندها ونشوف وش تقول..

كان بيده قلم رصاص.. ضغط عليه بابهامه لمن كسره.. وبصوت طلع مخنوق:

اللي تشوفه طال عمرك..!..

*خرجت من المكتب.. واشعر ان رخام الممرات يهوي امامي قبل ان تطئه قدمي.. تشعبت الانوار.. فلم اعد ارى جيدا ً.. لوهله نسيت اين مكتبي.. اسطفت الابواب امامي..فاتشابهت..خُيل لي اني سجين بعدة ابواب ولا احدهم يفتح.. مسجون ياربي واسئلك الفرج.. كيف يآتيني العذاب بصورة ان تُخطب امامي.. ثم تختلق الاعذار.. لتنهي هذه الخطبه.. ثم يُطلب مني ان اسهل الامور لتتم هذه الزيجه.. *

دخل هادي مكتبه وقفل الباب وفتح ازرار ثوبه.. فرك حنجرته.. كيف ضيعتها كذا..كيف اتنازل عن بلقيس..شهر مر بدون صوتها.. ماني طايق نفسي.. كيف يمر العمر بدونها..!

كيف تصير اقوى مني وترفض..

وانا اضعف من اني اطلبها..!!

تهاوى على كرسي مكتبه..

مسك جواله.. اصابعه ترتجف.. دخل القائمه.. عجز يطلع اسم سعد..!

راح لرقمها.. اتصل.. بالوقت ذا تكون بالجامعه..

جاها الاتصال.. وكانت مع صديقاتها..

كانت غاضبه منه.. حانقه.. زعلانه زعل مو طبيعي..

عطته مشغول..

نفخ واعاد الاتصال:ردي بلقيس.. ردي.. كلميني..

وعطته مشغول..

خذ تحفه.. ورماها ع الجدار كسرها..

نادر يطلع من طوره ومايقدر يسيطر على اعصابه..!

اوك قاطعين بعض.. بس لما دق عليها لازم ترد.. تخيل تتزوج ومايقدر يتصل عليها..

تخيل يدور صوتها مايلقاه..

حس بيجن..!

ردت اخيراً.. وبثقل: هلا..

هادي بانفعال:حيالله عمتي.. زين رديتي طال عمرك..

بلقيس:انا بالجامعه.. وش بغيت..

هادي بنفس الانفعال:سلامة عمرك.. اللي خابره لاماعرفتي تردين ترسلين اي زفت.. حتى لو نقطه..

بلقيس مشت بعيد وطلعت عن المبنى:

انت اللحين شهر.. ساحب علي.. ومن يوم العشا.. والسالفه.. اتصلت عليك وسافه.. وجايني يوم طرى عليك وتبيني هوبا ارد..

هادي ضرب الطاوله:ماحب هالاسلوب.. تكلمي عدل..بلقيس كلميني مضبوط لاتجننيني..

بلقيس بجمود:هذا اسلوبي.. قل اللي عندك ياهادي.. لاني بدخل القاعه..

قال:ابوك يبي يرتب ولد عمك.. هاللي خاطبك.. ويبي يجيبه فوظيفه برياض.. ويبيني اكلم دكتور في الجامعه.. عشان يضبطه..

بلقيس وباقوى ماعندها مثلت البرود :طيب..؟!

توسعت عيونه بدهشه:

بلقيس.. اذا كان عذرك العيشه في الديره.. بيسهل عليك.. الامور.. وش عذرك التالي..

بلقيس بهدوء:وليه اخطط على اعذار.. ليه ارفض.. ليه انا بظل وقف..مهما حططت اعذار ابوي بيذربها ويعدلها.. ليش اعني نفسي.. من انتظر..انتظر واحد بايعني باعذار تافهه.. انتظر واحد مايبي يضحي بشوية افتراضات هو بانيها بعقله..

ارتجف الجوال بيده:

بلقيس..انا بشوف حل.. اصبري.. لاتوافقين..

حست بجمره في حلقها.. همست:

مضطره اقفل.. لايوكلني الدكتور حرمان.

قفلت الجوال..

خلت هادي في حالة ذهول.. وصدمه..

والله هذا اللي ماعملت حسابه..!!

بلقيس بعد ماقفلت انهارت في البكا.. جات صديقتها :وينك انتي.. بتبدي المحاضره..

بهلع:وش فيك.. وش صاير..

بلقيس :منور انا بمشي.. تعبانه..

منيره:وش فيك.. اهلك فيهم شي..

بلقيس تدق على السايق: رشيد تعال الجامعه..

رشيد :اوك..

قفلت.. وراحت بسرعه وهي تبكي.. بدون ماترد على منيره اللي تناديها..

يقول :

مادام صار الوصل ماهو بودّه ،

‏الله .. معاه .. وكثر الله .. خيره !

‏ㅤㅤㅤㅤ ㅤㅤㅤㅤ

‏ما راح يعرف قيمة اللي فـ يدّه ،

‏إلا ليا من صار .. في يد غييره

اما هادي.. كان في وضع ضياع.. نسف شماغه.. وراح جلس نص ركبه.. يجمع زجاج التحفه..

كان يفهي ويشرد..

نبرتها البارده..

يأسها منه..

*تخنقني التغيرات.. ويعتصرني التخلي.. افلتتني بلقيس.. لآقع في هاويه.. اسفلها نتؤات حاده.. لن تبغي مني شيء ولاتذر.. *

دخل سعود.. وعقد حواجبه.. وهادي شارد.. وبيده الزجاج.. انتبه ليده تنقط دم وهو ولافي الدنيا..

ناداه.. اللتفت.. :هلا.. عمي..

سعود:وش بلاك.. يدك مجروحه..

طالع يده والزجاج جارحه وقف.. ورمى القطع بزباله.. :ماعليك.. صغير..

وراح حط مناديل..

سعود:وش كاسر.. ذا مب الدرع اللي على مكتبك.. وش جابه عند جدار..

هادي: كنت بلمعه وطاح مني..

سعود بشك: .. بتقعد على الارض وتلمعه.. وش فيك ياهادي وش صاير يايبه..

ارتبك وبغصه: عمي اذا تأذن لي برجع البيت..

سعود:رح يبه.. واذا تبي اجازه كم يوم ريح..

رد وهو يلملم اغراضه:عساك سالم..

قبل مايطلع من المكتب.. : جاي مكتبي كنت تبي شي..؟!..

سعود وكنه تذكر: ايه صح كنت بشوفك.. كلمت سعد..

هادي بكذب: كلمته.. يقول مافي حاليا ً.. الوظايف بالجامعه تنزل بداية السنه الميلاديه..

سعود:والله انا توقعت كذا..بس قلنا ندق حصاته..

هادي وخايف كثر الكلام يخذله :

هو كل الوظايف كذا.. يعني حتى بالتخصصي.. بيكون نفس الشي..

سعود: خلاص انا اتصرف لاتشيل هم.. رح ارتاح وسلم على الوالده والبنات..

هادي : يوصل..

وطلع.. وكأن عزرائيل يطارده..!!

*بلقيس كل اشيائي.. كل املاكي.. حبي الحصري.. كيف تتسرب من يدي.. افر من سجن.. واصل الى معتقل.. تكتفت يدي.. والله اشعر ان اطرافي تعقدت بجنازير ثقيله.. *

******

سيف نايم وجواله عند راسه ماصمته... لآن قبل ينام كان يكلم مهره.. اللي بيت جدتها هالايام..

رن.. وتنبه على طول.. رفعه.. ودقق في الشاشه.. باستغراب..

ورد بصوت ناعس :ياسمين..؟!.

ياسمين :آسفه سيف على اتصالي هالوقت..

عقد حواجبه وهو يتنبه للوقت.. واستعدل:وش فيك.. صاير شي بالورشه..

ياسمين :لااا.. الامر مايخص الشغل.. ركز معي.. اذا حولك احد.. خلك لحالك..

سيف بدا يقلق :وش صاير ياسمين..

بتوتر:مشاري كان يمي من شوي..وماقولك متضايق شرب لمن فصل عقله.. سيف قال كلام غريب.. يعني مشاري عزيز علي.. بس مستحيل اسمع هالحاجه ومانبهك..

سيف:وش يقول..اذا شي يخصني تكلمي..

ياسمين باللعثمه وربكه:مادري.. بس تكلم انو سما اخته منهاره ومحاوله تنتحر.. وانها تقول ان فترة هي بامريكا.. تزوجت اخوك عساف..وانها جابت ولد.. يعني هو يقول مب انا بس تقول ان سيف ولد مهره ولدها..

توسعت عيون سيف وهو يوقف وبعصبيه وانفعاااال :

ايييش..؟!!!.. ياسمين لايكونك شاربه مع الكلب مشاري... مستوعبه.. تسمع اذنك اللي يقوله لسانك..

خلاص بتبكي:سيف.. وربي هذا اللي سمعت.. وراجح درى.. وواصله في بيتهم للشيطان الرجيم.. وراجح مايبي يسوي شي الا لتأكد..

سيف بحده:

وش بيسوي يعني...فوضى.. ماهنا احد..

ياسمين تحاول تهديه:

انا ليه قلت لك..تكلم مع مهره.. لازم تكونون ملمين بالوضع.. اقل شي اذا سما متأكده ودخلوا القانون بيطلبون تحاليل دي ان اي.. وخلاص بيثبت ان ولد مهره..شكل سما مختلطه عندها الامور... انا والله قلت عشان تتهيئون للموضوع.. ومايأنبني ضميري.. عشانك..

سيف:طيب ياسمين.. اخليك اللحين.. وخلي اللي صار بينا..تمام؟!

هي:تمام ولايهمك..!

قفل منها..

وظل يفكر.. ويروح ويجي.. وش هالمصيبه.. من وين طلعت سما..

طلع .. وراح لنواف.. دخل غرفته وهو نايم.. ناداه.. وهزه:نواف اصحى ابيك..

فتح عيونه.. وبعين وعين يطالعه:بسم الله.. وش فيك.. امي فيها شي..؟!

سيف بعصبيه:لا مافيها الا العافيه.. المصيبه والله من اخوك.. الله يرحمه ويغفر له.. مادري مفاجئاته متى تخلص..

استعدل نواف وبتوتر:وش فيه.. شلون يعني مافهمت عليك..

قال له سيف اللي صار..

ونواف بفاجعه:بنت راجح.. سما.. معقوول..؟!!!

سيف جالس جنبه وارخى راسه على كفوفه في لحظة صمت.. من وقعت عليه مصيبه..

سيف:يعني اذا كنا نضنه مخربط ومخلف سيف وملصقه بمهره.. لا هو متزوج.. واذا فيه عقد.. ممكن مطالبه بتحاليل.. والنتيجه عاد بتطلع ان مو ولد مهره.. نواف انا خايف عليها.. والله تموت.. سيف روحها المعلقه...

نواف: اصبر ولاتسبق الاحداث.. مارح نتكلم في الموضوع مع اي احد.. لان راجح ممكن يقفله من عنده دركاً للفضايح..

سيف:وممكن يتكلم ويطالب فيه خاصه لااصرت سما.. ومثل مافهمت انها محاوله تنتحر.. يعني ممكن يضعف قدام اصرارها.. اللي مطير مخي.. كيف..!!.. اذا هي زوجته.. ليه مالموا بلوتهم.. وهي اذا ان ورعها توها تدري.. ولاعندها خبر.. من قبل.. طيب لما احنا بلندن كانت.. متآلفه مع سيف.. تدري.. الا شكلها تدري..

نواف:ماأضن.. والله لو تدري وبعد اندماجها معه.. ماخلتكم تاخذونه..

سيف:ماتوقع.. عساف.. ماترك اي شي يدل على هالسالفه.. قم.. خلينا ندور بجوالاته القديمه.. ايميلاته.. عندي اجهزته بالمكتب فوق..

قام نواف اللي طار منه النوم..:وانا عندي مفكره قديمه فيها بعض المعلومات اللي كنا نسجلها انا وياه.. باسوردات وسبلنغ ايميلات.. خل اشوفها واجيك..

سيف قبل يطلع.. :بنتظرك فوق..

........

مهره هذيك الليله كانت تتقلب ومو عارفه تنام.. ويوم اخيرا ً خذها النوم..

شافت منام.. وسيف على ذراعها.. وكأنه احد سحبه بقوه.. وهو متمسك بثيابها..

افتحت عيونها بسرعه.. وقامت مفزوعه.. يوم مالقته جنبها..

هزت زينه بقوه :زيوون.. سيف.. وينه.. كان نايم جنبي... اصحي زيون..

قامت مرتاعه:

بسم الله عليك.. مهره.. شفيك.. سيف نام مع آسر وغنى بغرفة سندس..

جلست جنبها وهي ترجف.. وتتذكر.. انفخت وهي تحط يدها على صدرها:

يووووه كيف نسيت..

افتحت زينه علبة ماي :شربي وصلي على النبي.. الله يهديك.. ماتخلين هالحركات.. وانا افكرك عقلتي بعد ماعرستي..

مهره تشرب ماي :والله ماعدت اتروع على سيف زي اول.. اصلا ً في البيت ينام مع فارس ماهو معي.. بس راح عن بالي كلش.. يمكن لاني متعوده انومه جنبي هنا..

زينه تداعب خدها:سمعتي سندس وش قالت.. لاتنومينه جنبك يرفس بطنك.. اللحين فيه روح ثانيه معك..

لمست بطنها وبدهشه:تصدقين انسى..

قامت وبتطلع من الغرفه.. زينه:وين..؟!

مهره:بروح اشيله اجيبه يمي.. منخلع قلبي عليه.. ابيه جنبي..!

وطلعت.. زينه تطالع الباب.. وشردت..

مهره تخوفها.. بعقدها اتجاه سيف.. من وقت راحت لندن وخلته فكرت هالعقد فكت.. بس وش فيها اليوم..!

هي من اول.. وبعد ماجات من امريكا.. كانت ماتنام الا متشبكه فيه.. واصلا ً تنومه فوق صدرها..!

وكله الجده وسندس يحذرونها..

لأن كذا حتى هو بيتعلق فيها بشكل ان يأذيها بسن الروضه والدراسه..!

*******

سيف في مكتبه بالدور الثالث وطلع من خزانه عنده.. علبه حجمها متوسط.. فيها جوالات.. هاردسكات.. وفلاشات.. تخص عساف.. كان جمعهم.. وقت راح يستلم جثته..

وتحاشى يفتحهم..

والتكشف على حياته واسراره.. وحتى بعد مادروا عن مهره وزواجه..

المعلومات كلها خذها.. من جهات حكوميه.. وظل متحفظ هلى فكرة ان يفتش باشياءه..

اولا ً مرحلة يوم درى انه متزوج.. ماحب يشوف ويتكشف على زوجته..

بعدها تزوج هو مهره..

وماحب يوجع قلبه بصور او مقاطع.. تضم مهره بعساف.. ولا ان يشوف اخوه بأي شكل مع الأشكال مع الانثى اللي خذت قلبه..

شبك بعض الجوالات بشواحن..!

وشرد في وضع مهره وقت حرمها من سيف.. حزنها الصامت.. استسلامها للألم.. توقف الحياه بالنسبه لها.. خضوعها للنوم.. وبعدها عن اي وسيلة للحياة..

كيف كانت راضيه باتهامه.. بس ماتصرح بحقيقة ان سيف مو هي انجبته..!!

سرح في وعوده لها.. من اول ماعرفها.. لمن عرف هالحقيقه.. انو ماحد يقدر يحرمها من سيف..

كيف الأمور اللتوت كذا..

كيف الدنيا تتشقلب على مهره..

كيف مايقدر يحميها.. من تباعات زواجها من عساف.. واللي تظل تأذيها كل شوي..!

افاق من شرودة وجمرة السيجار تكاد تحرق اصابيعه..

طفاها..

ودخل نواف.. بيده كوبين قهوه شايلهم من العروه واليد الثانيه مفكرتين..

وفاتح الباب بكوعه..

حط الشغلات ع الطاوله.. :سيف.. لو عساف كان حريص على ان ماحد يدري عن هالحقيقه.. ماتوقع.. حافظ شي عنها..

سيف وهو يشغل واحد من الجوالات :احنا نشوف.. قبل مايتحرك راجح في شي.. مع اني اتمنى تكون كذبه.. وان مخ سما شاطح.. او اي شي.. بس مايكون سيف ولدها..

نواف انتبه لجوال مشبوك في الشاحن.. عليه غلاف مكتوب عليه نواف..

حس بغصه..

وهو ياخذه.. ويقول بخفوت :تذكره سيف ذا..جابته جمان من شهر عسلها.. يوم لخبطت بيني وبينه وعطت كل واحد اسم الثاني..

ضحك.. وكل عيونه دموع.. :

جنناها انها بشهر صارت ماعاد تميز بينا.. وعساف مسك غلط خذ اسمي.. وانا خذت اسمه.. الله.. ياااآيامك ياعساف.. والله انه ترك فجوة من بعده..

سيف يطالعه.. بروح موجوعه.. :كنتوا مجنين الخلق سوى.. كنتوا واحد يانواف.. ومن تغيرت دروب عساف.. وهو شاطح مره وحده..

نواف مسح عيونه :الله يرحمه ويحله.. خذ لك قهوه وشغل الاب خلينا نشوف هالفلاشات..!

*****

نرجع بالوقت.. لسما وايش صار معها وكيف اعرفت هالحقيقه..

كانت ومن راح سيف.. تحس بشعور غريب.. بتعلق غريب.. ومشاعر فقد.. حبته حيل.. وكانت ماتدري.. كل هالتعلق.. لأن ولد الشخص اللي كانت تحبه..!!.

وضعها النفسي حلو.. صار عندها تفائل بالحياه.. تطلع وتجي وتسوي رياضه..!

حتى ليان صارت تطلع معها.. وتتسوق.. ومشاري وراجح حيل داعمينها في الوضع هذا..

في يوم كانت في غرفتها.. مشاري.. تحت يلعب مع راجح بلياردو..

ضحك :غلبتك.. يبه.. مافي امل

راجح : انا مب مركز...في اشياء بالعمل شاغلتني..

مشاري :العذر اللي تعلق فيه كل اخطاءك..

راجح رفع كوره وهو يضحك :

لاتخليني اطير جبهتك ياولد الكلب..

كانوا يضحكون..

لما اسمعوا صوت انهيار سما من فوق وبكا.. وليان تناديهم : بابا.. مشاري.. تعالوا بسرعه..

صعدوا بسرعه.. بخوف وقلق ..

وفي نص الصاله الفوقيه:

طلعت سما منهاره.... وتقول كلام ملخبط مافهموا منه شي.. اهم شي كانت في حال يرثى له..

(الحوار بكتبه بلهجتنا.. لكن في الواقع سما كانت تقول شي عربي شي انجليزي)

ارتمت في حضن ابوها :

بااباا.. ابي ولدي..انا عندي ولد.. والله عندي ولد صغير.. خذه ابوه وقال لي انه مات.. انا صدقت.. صدقت.. انا صدقته.. وهو كذب علي..

راجح مصدوم.. مذهول.. والحال ذا حال مشاري وليان..

صاح فيها :

وش ولد ياسمااا.. جنيتي.. خلاااص مابقى فيك عقل..

صاحت وهي تبعد عنه:

ماني مجنوونه.. انا صاحيه..بابا.. ولدي عند مهره.. سيف الصغير ولدي انا.. ماهو ولدها..

بذهول مشاري يمسك.. كتوفها.. يحاول يهديها:

سما حبيبي.. ركزي.. انتي حبيتي سيف.. ولاطفتيه مو معناته تنسبينه لك.. ترى عنده ام وعنده ابو..

سما وجهها كله دموع.. وبانفعال دفعته :

لاتكلمني كني مجنونه.. مشاري مهره تكذب .. سيف ولدي انا وولد عساف.. انا تزوجت عساف بامريكا وكلكم ماتدرون.. الفتره اللي كنت مارجعت فيها كنت حامل..

وكان كلامها مثل القنبله على الجميع.. ليان بصدمه:

سمااا... ياهوووو.. وش زواجه.. كيف متزوجه عساف.. تستهبلين..

راجح زين مانجلط.. وسما تمسح دموعها بشكل مزري :

لاتستخفون بعقلي.. انا اعترف لكم.. وماهمني شي.. انا مقتنعه ان اللي صار ماهو خطأ.. الخطأ.. اني كنت مجنونه.. وعساف واحد اكثر مني جنون..

(في ذاك الليوم.. سما طلعت من دورة المياه.. وبشكل هادي.. :طلع بوزتف ..

هو بسعاده:احلفي..

وراح ضمها وشالها وبسعادة وحماس:آكلك.. آكلك..شهالخبريه الحلوووه..

سما ارتجفت وحاولت تبتسم :نزلني عساف.. بليز لاطيح..

نزلها.. وتحرك في الشقه بسعاده وحماس كان يقول.. :لازم نسوي لك مواعيد.. عند دكتوره شاطره.. وتتغذين مضبوط.. مايصلح وضعك واكلك القليل ذا..يالله شهالوناسه.. ودي ابشر الخلق كلهم.. وطبعا ً الولد بسميه سيف.. لان اخوي نواف بيسمي سعود.. مايصلح عاد توأم ونصير اثنينا بو سعود.. البنت بكيفك سميها اللي تبين...

قاطعته بحده: عساااف انا مابي الطفل.. ابي الحق انزله.. لاتحلم كثير..

عقد حواجبه.. :ايش ايش ماسمعت..

خافت من حدة نظرته:ايه انا قايله ماراح اخلف.. ومستحيل.. وترى ماعندي اي واحد في المئه تقبل للفكره فلاتحاول اقناعي.. وشف لي عيادة او دوا انزل هالشي قبل يكبر واتوهق فيه..

صاح فيها بانفعال:

بكيف امك تنزلينه.. وهو لك لحالك.. ترى انا ابو اللي في بطنك.. ومتزوجين.. ماهو حامل انتي سفاح..

سما بانفعال:مااايفرق.. انا متخذه هالقرار.. عيال مستحيل اجيب..مسؤولية انا مو قدها.. عساف لاتصعب الامور علي.. اذا انت حيل خاطرك تسوي اطفال واسرة.. عادي.. نطلق وتزوج.. وسوو اللي خاطرك.. جب عيال حتى لو عشرة..

مسك ذرعانها وزين ماحفرهم باصابعه وبحده :

اسمعيني سما.. عقلك هاللي راكب مرجوحه ورايح جاي فيها ماهو علي.. ولاني سهل وبداريك.. حملتي.. وبيكتمل هالحمل وبتولدينه..

صاحت:ماااهووو كيفك... مابيه.. انا ماحب الاطفال.. ولا اتخيل يكون عندي بيبي.. ماراح احبه.. ويمكن اضره.. انا ماكنت صاحيه جسديا ولانفسيا عساف.. .. حاليا ً انا مايشغلني الانفسي ووظيفتي.. وكيف اعيش الحب معك وبس.. نهااائي... الطفل مو وقته..

عساف بغضب عارم : يااااشيخه.. ولما كنتي تستمتعين بالحب وجالسه تعيشينه.. وش مفكره.. ماورا هالشي.. الا ذا الشي..

سماا بعصبيه انهارت :

عساف افهمني.. مابيك تزعل.. بس خلاص ساعدني انهي هالمصيبه..

بانفعال:اساعدك.. تذبحينه..

انفعلت:ماكتمل عشان اذبحه.. هو حاجه مانفخ حتى الروح فيها..

عساف بتحدي.. :بيكتمل وبيصير روح.. ولديه وانا اخذه.. ماتبينه.. انا ابيه..انسي انك تنزلينه ولو حاولتي بس حاولتي.. والله لا اجيب العيد فيك انتي واللي خلفوك.. وتراني واحد بايعها..

حدقت فيه وبانفعال وغضب : ان شاء الله يموت في بطني ولايطلع على الدنيا.. مابيه.. ولاهو عناد عاد..

سكت وحدق فيها ووجعه قلبه:تدعين عليه.. من جدك تتمنين يموت..

سما باصرار وتحدي :لو عقدتها.. اي والله ابيه يموت.. شي انا مب متقبلته.. ماحد يقدر يجبرني عليه..

في ذاك الليوم قالها..وماكانت مستوعبتها :

طيب ياسما.. بتكملين هالحمل.. وفي آخره لك اللي تبين..

كملت الحمل.. قفل عليها.. مع هيلين الدكتوره اللي يعرفها.. وسافر باول شهر.. ورجع.. ويوم تعدت مرحلة الاجهاض.. كانت تطلع معه ويجيها.. وتأقلمت على الحمل.. بس كان كل ماسئلها..تقول الى الان ماتأقلمت.. وانها كل يوم تتمنى انه يطيح.. وتكرر عقدها من الطفوله والاطفال..

فكان يبتسم ويربت على راسها ويقول (الله يسهل) .. وكانت تستغرب من ردوده.. الوديه المستسلمه..

بس كانت مفكره ان مايبيها تتضايق.. عشان الحمل وكذا..

وقت كانت بتولد جاب لها هيلين ولدتها بالشقه.. غيبت.. وكانت الدكتوره ضاربتها منوم... صحت والبيبي ماهو موجود وصدمها يوم قال انه توفى..

من وقتها.. ضرب سلك براسها.. لانها حست انه مات بسبب رفضها له وامنياتها انه يموت..

انهارت واعصفت الدنيا فيها..

عساف ماخلاها.. كان اغلب الوقت معها.. لمن هدت.. بس كانت نفسيتها بالواطي.. وتشرب.. وتجرح نفسها.. وصايرت سايكو.. لدرجة ان وضعها.. خلاه يزيح فكرة ان يرجع لها سيف ابد.. كانت سما مب صاحيه..!!!!

وهو داخليا ً.. يحبها.. بس مقتنع ان لاهو ولاهي قد طفل..

الواقع انهم انجبوه بعشق وطيش..!

ولما تعمق بشخصية مهره.. وحُبها لسيف.. أيقن.. انها الوحيده اللي ممكن تحفظ ولده.. اما سما مستحيل..!

ممكن تضيعه.. ممكن تتركه بشارع.. او بار..

سما غير جديره بالأمومه ابداً..!!!))..

وضحت سما لاهلها كل شي.. وكيف كلمتها هيلين بعد هالمده..وانها حولت لها مبلغ وقدره.. عشان تعترف لها بمكان ولدها لو كان فعلا ً حي..

راجح بعد ماسمع كل شي.. تكلم :

وانتي مفكره.. بتكسرين الدنيا...وبجي مثل الكلب اذرب لك وارجع ورعك..

سما طاحت عند رجوله وهو جالس :ابووس رجولك بابا.. ولدي.. والله ابيه.. انا مرضت عشانه.. انا كنت بصير مجنونه.. لاني فقدته.. كيف ترضى ولدي ينسب لغيري..

مشاري بحده:

سما هو منسوب لأ بوه.. وعند اهله.. لاتفتحين جروح على الخلق وتفضحينا..

انهارت بكي وصاحت:لاتقول كذا مشاري.. وربي مقهوره.. كيف يحب مهره اكثر مني وانا امه.. كيف يتعلق فيها ولايعرفني.. ايش هالظلم..

راجح.. وعذابه لحال بنته..

والعذاب الأكبر كيف دخل بنت غازي في هالأمر.. والظلم والمكايد..

عساف يوم راح يجس النبض عن مهره..

كانت ضايقه فيه مع سما..

وراح تزوجها هو وظلمها هالظلم..

وواضح من تعلقها وكتمها لهالسر تعلقها بالصغير..

كيف تجيني سما وتبيني اضرها..

افاق على صياح سما :

تكفى بابا.. انا ماطلبت منك شي الا هالشي.. تكفى وقف معي.. واخذ ولدي.. ابيه..

صاح فيها بحده وغضب :

لعنة الله عليك وعلى عساف.. وعلى من رباك ورباه.. انا ماضر مهره.. لو مارضت ماضرها..

مشاري وليان عقدوا حواجبهم.. وهو يقول :

انتوا تدرون منهي مهره.. مهره بنت خويي غازي.. اللي والله.. لو طلبني عمري عطيته اياه راضي.. الولد لها وبيظل لها.. الا اذا تنازلت عنه برضاها..!!!!

توسعت عيونهم.. ومشاري يصيح : ايشششش..؟!!!!!!

سما بتهور.. تروح تسحب زجاجه وتكسرها وتحط شوائبها الحاده على رقبتها.. :

ماااعلي بنت مين.. او اي زفت.. تجيب ولدي.. ولا والله اذبح نفسي..!!!.

*كان تقليب اجهزة عساف وحساباته.. كاتقليب جمر ملتهب في قلبي انا وسيف..!.

عودنا عساف على البعد..

فاعندما مات.. كنا اعتدنا عدم وجوده..وغيابه احسن الينا.. في شعورنا انه غائب وليس متوفى.. لكن حين.. رحنا نتصفح يومياته.. وتصويره.. ومايلتقطه لنفسه من سنابات وثرثره.. كل شيء كان يجلدنا بسياط الفقد والذكرى..

اوقفتنا مقاطع عتبنا عليه.. غضبنا كيف اودى بنفسه..

على ضياعه.. وعناده.. وغروره بنفسه..!.

اعلم اني اخفف عن الجميع فقد عساف بشكلي المستنسخ منه..

لكن انا وحدي.. يختل اتزاني كل ماتعمقت بفكرة وفاته..! *

استوقفهم مقطع كان يصور مهره وهي ماتدري.. كانت حاطه سيف على فراش ع الارض وهو يبكي.. وهي منهاره بكي ضامه رجولها ومخفيه راسها.. على ركبها..

سيف الغصه عنده اكتمت انفاسه..

عساف يقول :طيب كلميني مهره..مهره.. الووو..

رفعت راسها وبانهيار:مابي اكلمك.. مابي.. يالظالم ياللي ماتخاف الله..

انصدموا من ضعف مهره.. وعظامتها البارزه..هالاتها السوداء.. وضعها صعب..!!!

سيف برجفه:ماتخيلت كذا.. ماتخيلت مهره وصلت لهالمرحله....!

عساف ضحك:وش فيك منفسه طيب.. طفل يبكي عادي..؟!

مهره بانهيار وانفعال:عساف من امس يبكي.. صدقني هو طفل ويحس ويبي امه.. اكيد فاقدها.. هو كان ببطنها تسع شهور..

بهدوء رد عليها:

كل هالامور مافيها منطقيه.. انتي احن عليه من امه.. هي كانت تبيه يموت.. وانتي تبينه يعيش.. هي رفضته.. وانتي تقبلتيه.. انتي امه..انتي امه وبس... لو كررتي علي حكي.. امه وامه.. والله لارميك من النافذه انتي معه..

صاحت فيه :عساف يدينه ثلجت.. رجوله بارده.. والله شكله بيموت.. ومايرضع..

عساف ببرود :امس رضع منك.. بس انتي خوافه.. اليوم رجعتي تبين تعطينه من حليب الصيدليات..

انصدم نواف :وشهووووووو... شيقوووووول.. رضعته.. كيف.. شلون.. يستعبط..

سيف وقف المقطع وقاله.. عن اللي علمته مهره.. وكيف رضعت سيف فعلا ً..

ونواف مصدوم :واللحين يطلع لك احد يطالب فيه.. والله يهبون.. ماحد ياخذه..

سيف :احنا لسى مافهمنا.. اذا هو فرقه عن امه بارادتها ولا لا..!!

رجع شغل المقطع ويحاولون يستشفون اي شي عن موضوعه مع سما..

حط الجوال وراح عندهم..

شال سيف اللي ميت صياح.. وابتسم وهو يخمه:يااااعمري.. كنه قطوووو..

مهره بفزع : لايطيح منك..مسكه عدل ووووجع..

عساف بشكل لطيف شايله بين كفوفه.. ويحركه ويمرجحه.. ويسوي حركات واصوات بفمه.. وسيف سكت..

عساف:شفتي.. مايبي لها شي الله يخلف عليك.. هذا سكت..

مهره متوتره.. :طيب خلاص عطني اياه..

عساف.. فجأه مسكه من تحت اباطاته.. وشهره ناحية الكاميرا.. :سيف شف سميك.. بعدين ضحك.. وهو يقول :نواف ماكني رفيكي وهو شايل سمبا..على التله..

ضحكوا نواف.. وسيف بغصه.. وكأنه يدري ان هم اللي بيشوفون المقطع..

غمز عساف بعيونه.. بعدها قال :هذا سيمبا حقي.. للطلب والاستفسار.. ان اي.. ان اي.. 1987..

عقد نواف حواجبه.. مهره.. اسحبته منه.. :ماهو لعبه لايطيح منك..

وطفى عساف الكاميرا..

نواف بسرعه فتح الايميل.. :ذا ايميلنا المشترك..

سيف :اي ايميل..؟!

نواف : ذا اقدم ايميل سويناه.. كنا نسجل فيه بالمنتديات.. والمواقع وكذا.. قبل ماكل واحد يسوي ايميل خاص.. حرفي وحرفه وسنة الميلاد.. اكيد حاط شي يخص سيف فيه..!!..

....... وفعلاً..!!

افتحوا الايميل.. وكانت فيه رسايل محفوظه.. مرسلها عساف عليه..!!!

........

في الصباح نزلوا من المكتب.. وفارس كان طالع من غرفته.. توه صاحي.. عنده مدرسه..

باستغراب:وش عندكم.. جاين من فوق.. مانمتوا ولاتوكم صاحين..

سيف خذه بذراعه :لا سهرانين ماجانا النوم..

فارس يحك راسه:وتبين اصدقك.. نواف كان ينود واحنا بالصاله.. قولوا وش صاير..

نواف يفرك عيونه بارهاق :

اقصر الهرج.. واذا نزلت قل لابوي اني بنام اشوي.. مب جاي المكتب الا عشر ولاحدعش..

فارس بشك:قل لي يبه.. وش صاير..؟!

سيف :مو صاير شي ابوي.. جلسة اخوان.. نتبادل الهموم والاسرار..

توسعت عيون فارس وهو يقول لنواف: لايكون قلت له عن...

قاطعه نواف.. :رح افطر.. عشان يمديك تبدل.. يلا بابا..

فارس ضيق عينه :هين اللحين سويتوا فيها الاخوان اللي انا طالع منها.. والله ماعديها..

سيف مسح وجهه بكفه.. دايخ.. ومصدع.. من كل اللي شافوا وسمعوا.. : خلاص فارس لاجيت نتفاهم.. معك مصروف ؟!

فارس :ايه عندي..طيب تعالوا افطروا معنا..

سيف:لا يبه هني.. ابي انام ماشوف الدرب..

سلم فارس على ابوه. :نوم العوافي..

ابتسم له.. :الله يحفظك ياعين ابوك..

نزل.. وتركهم..

دخل نواف مع سيف اللي ناداه.. وسكر:اللحين نوقف الموضوع كله.. اهم شي صرنا على درايه بكل حاجه.. ويمكن راجح مايفتح الموضوع من الاساس..او يأجله..

نواف :من وين طلعت هالسالفه والله ماعملنا حسابها..احنا بجمان.. ومصيبتها.. تجينا سالفة سيف..امي بيوقف قلبها..

سيف:يارجل امي مقدور عليها.. مهره.. مهره اللي ماراح تعدي هالسالفه عليها سلاما ً.. الله يصدهم عنها لمن تولد.. وتقوم بالسلامه..

نواف :ولو افتحوا هالقضيه.. انت مفكر بنعطيهم ولدنا..

سيف يشب سيجار ينفخ دخانها.. وبتفكير :

قانونيا ً ولو اثبتت التحاليل ان ولد سما تقدر تاخذه.. خاصه بوفاة الاب.. ولو راجح بيلعب ع الثقيل.. ممكن يستخدمون ورق نسبة سيف لمهره.. ضدها.. يعني ممكن يدخلها بقضية تزوير..واختطاف وبلاوي.. يعني لو راجح لوى ذراعنا.. انا ماتنازل عن مهره ولا ادخلها.. في قضايا.. سببها اخوك الله يرحمه..

نواف :والحل.. تراه ولد عساف.. يارجل تعلقنا احنا فيه مب بس مهره..

سيف يلوح بالسيجار.. :

في خطه براسي.. ارتبها ان شاء الله.. رح انت ارتاح قبل تداوم.. وخل كل شي بوقته..

نواف:الله يعين يااخوك..

******

وتهاوى شعبان.. وتفلت.. كما عهدناه..

انساب بنعومة الحناء على كفوف مهره وانبهاري بها وهي تفردها.. لي..وتريني اياها على استحياء..

لتطرب قلبي بضحكه اطلقتها منبهرا ً.. :

ياحليلك ايش حركات الجدات هذي..؟!

مهره بعتب تطوي كفها:ماعجبك..!

فردتها لها وبدهشه واعجاب :يجنن.. حبيته..

قبلت باطن كفها..

مهره بوناسه.. بتاخذ يدها:زين اعجبك..

تمسكت فيها:عيب.. تعطيني يدك فيها هالخير.. وارجعها خاليه..

مهره :وش.. يعني.. تكفي البوسه..

طلعت من محفظتي... ماتوفر وحطيته بيدها..

مهره تضحك:كذا بحني كل اسبوع.. والله اصير تاجره..

ضميتها.. اريد ان اخفيها.. عن ظلم العالم فيها.. عن اذى اقترانها بعساف..عن الآثار الجانبيه.. لذاك الزواج..

عن مكالمة راجح لي وكيف يريدني ان اتفهم.. وان سما في وضع سيئ..

راجح اتى بدبلوماسية..بهدوء واقناع..

طرح لي وعرى علاقته القديمه بغازي.. وانه من تسبب بشكل غير مباشر في اقحام مهره.. في كل ذاك..

واقسم انه لن يؤذيها.. حتى لو اضطر لأذيت سما..

لذلك علي تقبل اوسط الامور..

وهو لقاء سما مع سيف.. واخذها له فترة.. يطبب جروحها ويرد ولها.. وتعالج نفسيتها اللي منفطره من فكرة موته..

رفضت..وبينت له تعلق مهره المجنون فيه.. واني مستحيل ارضى ان يضرها شي..

بطن لي راجح تهديد.. بسيط.. بلزومية تفهم الامور.. بدل اقحام القانون.. اللي بيصيب.. مهره اولا ً..

ضخم عندي فكرة التفهم وخاصه.. ان الامر ماراح يكون فيه اي اعلان.. وان رسميا ً.. وبالاوراق.. سيف راح يظل ولد مهره..!. سما راح تكون امه بشعورها بس واشباع رغبتها في ضمه.. واحتضانه.. حتى لو كل فتره.. تاخذه شوي..!

ضايقني الوضع حيل.. وخفت عليها.. تناقشت مع نواف..واقنعنا راجح.. وبالتعاون مع مشاري اللي قام بدوره باقناع سما..

ان نأجل كل شي لمن بعد العيد.. تكون مهره.. عدت مرحلة الآشهر الاولى بالحمل..

انساب شعبان وتلاشى.. كاضوء عيني بلقيس اللذي خفت.. ذهب يلف ضحكتها وحضورها.. فكانت منزوية غالب الوقت في غرفتها.. متحججه بكل شيء.. الا زواجها بشبيب..!!

فابدت غريبه.. في ايجابتها لابوي عن موضوع الزواج..( سو اللي تشوفه)..!

شعبان موجع.. كالألم في قلب شاهين لاستقبال الشهر الفضيل بدون جمان..

ذابل كاعيون بيان وديم.. وانعدام حماسهم لكل شيء.. حتى نجاح بيان اللذي اختصر في ورقه انها نجحت وستنقل للصف الثاني..

شعبان السنه غريب.. بحفلة بيان.. اللتي لم تضحك.. ولم تبدي اعجاب في اي هديه.. واكتفت بانتقاد التورته.. وان لونها لم يعجبها..!!

شعبان مخيف..

وطفلتان لم تثرهم الهدايا.. ولم يجاملونا بتمزيق اي تغليف..

شعبان موحش.. كانفور امي من جمان وغضبها الكبير منها.. وزعلها.. اللذي يتعملق ويتغذا من وحدة الطفلتين.. وضعفهما الواضح.. ونقص الفيتامينات لدى ديم..!

وحدة بيان.. وشعورها الغريب بالمسؤولية اتجاه ديم.. فاتكون كالضبعه اتجاه اي احد يوجهها.. او يعاقبها..!!

هادي يهلك نفسه في كل شيء..!

احترق كاليالي شعبان.. اللتي لاتآتي الا تنطوي.. هادي ينطوي كالزمن..

ينفرط كالعقد الثمين..

صامت كاليلة حاره.. رطبه.. لانسمه تحرك في قسماته شيء..

لكنه يذوب ذاتيا ً..

ومن حوله يختنق..!

امه.. عائلته.. وابي اللذي لايعجبه حاله...!..

..........

وفي ليلة التحري ام هادي جات مع انفال كاعادتها من سنين..!..

تبارك الشهر لموضي..

ويتسامرون.. ويخططون.. لرمضان..

مهره بعد مراقبه لترندات تويتر:

خلاص بكره مكمل لشعبان.. على قولهم دخلوا الدجاجه مافيه سحور..

موضي ضحكت:والله كنت حاسه..

ام هادي :اجل انا مرقت الكبيسه.. لاني ناويه اجي فيذا.. باقي بس اكبس الرز..

ضحكت موضي:

ماشاء الله ماتعوقين.. وشهولا عاد.. يعني لو رمضان ماراح اطلعك الا بعد السحور..

ام هادي : يابنت الحلال.. واخلي ضحى.. بولدها متوهقه فيه.. النور بتمشي.. عنها..

مهره بخرفنه :يمه نقطه ولدها كيووووووت..

ام هادي:يلااا قطته عليك.. هي افتكت.. وانتي قدامك المشوار طويل..

مهره:اللحين متى يطلع بطن ياخاله.. بالعيد تطلع لي كريشه..

ضحكت :اي كريشه بالعيد..؟!.. يالله على عيد الاضحى..

مهره عيونها تلمع :حماس.. بلقيس نبي نطلب ذا التيشرت.. اللي في نونو يطل من بطني..

بلقيس شارده..

حركت يدها قدام وجهها: بلقيس.. ابوي.. وراك..؟!..

تنبهت :هاا وش قلتي مهره.. سوري والله فهيت..

موضي تطالعها بتدقيق ولاهو عاجبها حالها..

وام هادي :وش فيه الزين.. وش بلاك يا امي.. وش مكدرك ماهو عوايدك..

ارتسمت على شفايفها ابتسامه باهته:يمكن احاتي هالنتايج..

انفال اللي كانت ماسكه يد ديم وتحط لها مناكير:

يعني لو انا احاتي النتايج ممكن بس انتي بلقيس.. مستحيل.. يعني اكذبي بحاجه ثانيه.

ضحكت.. واستغربت مهره القريبه منها.. من الدمعات المحشوره بعيونها وهي تقول:

وش فيني يعني.. هذا اقصى همومي يانفول..

انفال بخبث:

العبي غيرها.. وقامت تنفخ على اظافر ديم وتقول.. :مادري شفيكم.. كلكم.. انتي متغيره.. وهادي متغير.. وامي تتهاوش مع هادي.. وضحى البكايه.. كل مابكى ولدها تبكي معه.. والنور مسويه الكبيره.. وتهاوشنا كلنا حتى امي..

موضي تضحك:وانتي يانفوول اللي ضايعه بالطوشه..

انفال تغمز :ماعليك ياخالتي.. انا ادري عنهم كلهم وش فيهم..

موضي مبسوطه عليها : نورينا.. علمينا..؟!..

انفال تتهرب بخبث:ظروف الحياة..

مهره تضحك:نفوول.. فلسفتك حلوه بس كلها خراط..

انفال وهي تقفل المناكير:لاتقولين خراط لا انادي ولدك احط له مناكير..

بلقيس:فضحينا.. لبسته هذاك الليوم تاج.. هاجوا علي هي ورجلها..

انفال:ماعلمتك انا.. لاعبه بصهيب وبراء عيال النور لعب.. ذاك اليوم مكيجت صهيب صار كنه مولان..

ضحكوا كلهم :حراااام عليك..

......

جا هادي بياخذ امه.. وقف بسيارته.. عند البوابة.. وماتصل عليها.. اسند راسه على ورا.. في لحظة استشعار.. لوجودها بالداخل وهو قريب منها الان..

في لحظة قل حيلة.. في انه وده يقدم على خطوة.. فعليه.. بس اصبح الوضع حرام كيف يخطب على خطبة شبيب..

واصلا ً لو سواها..

راح يقابل بالرفض..

سعود باين متحمس لشبيب حيل..

ظل مغمض..

وتعبان..

الدنيا ارهقته..

وحاس بوحدة رهيبه..

وشوق هايل يعصف به..

تنبه..

على صوت طرق على النافذه.. اللتفت لقاه سعود..

فتح النافذه بسرعه: هلا عمي..

سعود بعتب: نايم..؟!.. تعبان ادخل وارقد بالمجالس..

هادي يفتح الباب وينزل ودلك رقبته بيده :

لا مب نايم.. بس جسمي مدقدق.. توني جاي من النادي.. باخذ الوالده وامشي..

سعود:والله ياهادي ماانت عاجبني هالايام.. فيك شي.. تبي شي.. ناقصتك حاجه.. ترى انا موجود..

حب جبينه:خيرك سابق.. عسى عمرك طويل..

سعود:ضاغط نفسك بالشغل.. وهالنادي.. اول من يداوم واخر من يطلع.. وش بلاك.. تحب..؟!

هادي وسعود اصابه في مقتل.. اطلق ضحكه.. مجروحه.. باختناق الدموع بعينه:

ياعمي انا وين والحب وين..؟!..

سعود : والله ياولد حمد.. بعيونك شي كبير..

تنهد هادي.. وزفر :

خلها.. خلها ياعمي بقلبي تجرح.. يقولون لاتطلع وتفضح..

سعود عطاه نظره:على هواك.. يمكني مب قدك.. تقولي اللي بقلبك.. شايب وش عرفه بهمومنا يالشباب..

هادي ببتسامه :

والله انك للكبيره قبل الصغيره.. بس ياعمي هذا هادي.. الجمره اللي بجوفه تحرقه.. ويعجز يطلعها ويرتاح..

رن جواله.. رد: ايه جيت يمه.. اطلعي..

سعود خلا رشيد يفتح البوابه.. وقاله :

دخل سيارتك.. خذ امك من داخل..

قال كذا ودخل..

وهادي ركب سيارته والحقه.. وقف عند البيت داخل..

نزل يوم شاف سيف ونواف وفارس بره..

باسطين بجلسه ارضيه ويتقهون..

سيف: اقلط ياهادي.. ماغاب لك نجم.. وراه قاطع العاده..

هادي.. ويسولف معهم سريع وهو واقف..

في نافذه قريبه.. متخبيه عند الستاره وتناظره.. كم قطعها الشوق له..

واعتصرها الحنين..

وشلها العجز..

راقبت لمحاته وشحوبه.. يتشابهان في ذلك..

كنهم مصابين بداء.. يذيبهم ويستفحل بهم.. وبيموتون جميع..!

سعود وبس شاف ام هادي وانفال طالعين.. سلم بصوت جهوري:

حيالله ام هادي.. منورتنا

نزلت العتب :يحييك ويبقيك ياخيي.. بيت عامر بحسك وحس ام سيف وعيالك..

سعود:وين..؟!.. توه بدري..

ام هادي :بدري من عمرك.. بروح لهالبنت.. قبل تمشي اختها عنه.. ماطلع من البيت الا تختل الدنيا ..

سعود:عساك ع القوه.. الله يخليك لهم ياخيتي..

انفال جات حبت راس سعود.. وهو يبتسم لها ويلاطفها..

والشباب.. بصوت عالي سلمو على ام هادي.. بميانة.. وردت عليهم.. بميانة اكبر..

تبادلو الحديث..

بصمت من هادي.. وكأنه غير موجود.. وشعوره.. انها تناظره من جهه.. ومو عارف من وين..؟!

فكان مكتفي باستناده على السياره.. ويطالعهم وكانه معهم في الكلام والواقع ماكان يرى الا شفاه تتحرك.. مايسمع شي..!!

سعود وفجأه:مير يا ام هادي.. لاطلبناكم القرب.. ترضون..!.

ضحكت:تبي انفال لنواف.. خذها بعباتها.. والجهاز علينا بعد..

ضحك مع الشباب.. اللي يفكرون الحكي مزح..

وهادي ماشارك في الضحك..

بثقل دمه الحالي اللي مو مخليه يستوعب اي نكته او ذبه..

سعود:ماهو مزح ياام هادي..انا عندي ولد هيس.. يبي قربي ومب عارف يطلبه مني.. قلت انا اجي واعطيه..

كلهم ماستوعبوا..

وهادي عقد حواجبه.. وقلبه يرقع يرقع.. ونشف ريقه..

والتفت سعود:

هادي..ابا اخطب لك بلقيس مني.. تبيها..؟!..

*ويجري الله سحابا ً.. ويعصف بها رعدا ً وبرقا ً.. حتى تهطل غيثا ً.. على ارض قحلت.. وتفطرت جفافاً..

ياربي.. هل هو بري بأمي.. ام هي دعوة يتيم كفلته.. ام عامل في الطريق اطعمته.. من رفع كفوفه.. في مرور ملك.. وقال ربي فرج كربه..

هل هلال عمري... قبل هلال رمضان....وانفتحت لي الابواب.. *..

بسعادة عارمه.. قلبه يكاد يكسر ضلعه ويخرج.. يطالع سعود:

من جدك عمي..؟!.

سعود:قل تم قبل أهون..

هادي.. حب راسه وكفه.. :تم.. تم.. ومليون تم..

الشباب مذهولين.. من الوضع.. والاسباب ومو فاهمين شي.. الا.. ان تصرف بتفكير من ابوهم.. وهادي يستاهل.. وماحد فيهم يعترض..

ام هادي ماقدرت تكتم.. زغرودة فرح.. خلت قلب بلقيس يختلج.. وهي اللي تشوف.. ومو سامعه شي..

لمن فارس دخل ركض.. لهم.. مهره :

وش ذا الزغاريد.. شسالفة فارس..؟!

بلقيس جات..

وفارس بانفعال:

ابوي بيزوج بلقيس لهادي.. خطبها له مادري خطبه لها.. اهم شي.. وهادي قال تم وخالتي ام هادي.. متحمسه.. وكذا..

توسعت عيونهم بدهشه..

موضي :

هاااااه.. شفيه ابوك...شسالفته..؟!

مهره التفتت لبلقيس.. وشافتها ماسكه قلبها. وتتنفس بسرعه.. وبرجفه:

احلف فارس..؟!

رد عليها :ورب الكعبه هذا اللي صار..

موضي.. بعدم استيعاب.. خذت لها شرشف صلاة.. :

والله عاد هادي.. ينتصلى على ثوبه.. مير ليت.. عشان يقفل سيرة ولد فيصل..

وطلعت بره..

اما مهره.. قربت من بلقيس.. وفهمت شعورها.. والامنيات اللتي تمر عبر رجفتها.. وتتحقق في دموع عينيها..

مهره ببتسامه وشقاوة:يالشيطاااانه.. هذا اللي تبين..

بلقيس راحت ضمت مهره وانهارت بكى.. وبخفوت:احبه من سنين يامهره.. احبه..

ضمتها مهره واضحكت.. :والله كنت حاسه ان بلواك حب.. الله يسعدك يابعد روحي..!!

‏أحسب ايام العمر راحت عليّـه

‏مادريت ان أجمله في ما تبقى

‏أشكر أيامي على كبر .. الهديه

‏أثرها لا من بغت تعرف تنقّى

‏جابتك من نور برقٍ شعّ ضيه

‏صبّ غيثه بين الأضلاع وترقى

........

هادي وامه بالسياره وانفال ورى فاتحه النافذه.. غمز لها سعود:

عاد لاعطيناكم بنتنا تراها امانه يانفول..

بحماس تأشر على عيونها :

هناااا هنا ياعمي سعود..

سعود:تسلم عيونك يا ام حمد..

***

قبل كم يوم..

انفال بصوت خافت:اول شي اذا اي احد جنبك لايدري اني انا انفال اللي اكلمك..

سعود ببتسامه:تمام.. اتفقنا.. انا لحالي.. وش تبين تقولين.. ومسويه كل هالاجراءات الامنيه ياعمك..

انفال: لحظه بتأكد اذا باب السطح مقفل..

بدهشه:وش مرقيك بالسطوح.. و شسالفتك ترى بديت اقلق..

تكلمت بصوت متأثر:انا بطلبك طلبه.. واول مره اطلب احد غير هادي وامي.. بس حاجتي عندك ياعمي سعود وماحد يقدر يسويها الا انت..

سعود :عيوني لك.. انتي تدرين عن غلاكم عندي ولاتبين اقولك..

انفال:والله ادري عمي.. ولاني ادري.. كلمتك.. والله لو غيرك ماكلمته.. والله.. لاني بجيب العيد..

سعود :قولي اللي عندك يابنت.. وش قاصرك.. وش ودك فيه..والله وش مابغيتي جاك..

انفال:ابي اخطب بلقيس.. لاخوي هادي..

انصدم سعود.. وفكره تصرف طفولي منها.. وقبل يرد.. انفال بسرعه.. :وانت قلت وش مابغيت جاني.. ولاغيرت رايك..

سعود وهو مدهوش:انفال ابوي.. انتي عارفه وش تقولين.. هادي يدري عنك.... فاهمه معنى اللي تسوينه.. يايبه.. ذا شي يخص الكبار.. ذا قرار ياخذه هادي..مايصلح انتي تتصرفين فيه..

انفال.. : طيب انا بقولك اللي عندي.. وانت بعدين بكيفك.. بس هاا عمي.. مو تزعل من هادي.. امانه..

سعود:مازعل انا من هادي.. ولامنك.. هادي ولدي الرضي.. وشهولا ازعل منه..

انفال:عمي.. هادي صار له فتره ماياكل زين ولاينام.. وكل ساكت ويعصب بسرعه..

وراحت انفال تسولف له بشفافيه.. عن هادي ووضعه من بعد العزيمه.. لمن سمعت حواره مع اختها النور..

((امه كانت تقول له بغضب.. :وليش ماتتزوج وش ناقصك.. والله الماده ماشاء الله هذه بيدك.. والبيت شكبره.. مافيه الا انا وانفال..

هادي بانفعال:عاد يايمه انا اعطيكم كلشي.. والله لو تبون لحم اكتافي.. بس خصوصياتي.. ماحد له حق يتدخل فيها.. حتى انتي يمه..

ام هادي بانفعال:

انت شايف عمرك..صكيت الثلاثين وحداني.. تكرف وتشقى.. ترجع لاحرمه تلفيك.. ولازول يتحراك.. دخيل الله بنية حلال.. تشوف شتبي.. شودك.. شاللي في خاطرك.. عنبوك..انت صخره.. مالك نفس..مثل هالشباب..

هادي بغضب :انا **.. بس لاتفتحين هالسيره معي.. ولا ابي اي كلبه تكون معي.. واذا اثقلت عليك.. انا اطلع واقعد بشقه واعيش عيشة العزاب..

الام بانفعال:شف شيقووول.. اشق جيبي..انتف عمري..

النور:صلي على النبي يمه..وش بلاكم.. توكم شحليلكم.. وبادين السالفه مزح وش جاكم..

امه بغضب :لانه يالنور مب صاحي.. انتي شايفته.. لاياكل ولايرقد..يشتغل ويكرف..يجي ويروح يذبح عمره بالنادي.. ويقول هو طبيعي وعدل.. يخسي.. والله ما انت بشلي ياولد بطني..

ضحك بتهكم وسخريه:ترى انا طول عمري كذا لاتسوين يايمه ان ارهقتني العزوبيه..

ضحى:الا هادي.. انت صار لك شهر.. زايد في وضعك ذا.. يااخوي والله مانحس بالدنيا.. الا لاضحكت عيونك..

طالع ضحى.. توها والد من اسبوع.. مايدري شكلها التعبان.. وولدها بيدها.. حسسه بغصه.. كيف طلع من طوره يمها.. وضحى حساسه.. وعلى طول تتأثر.. قرب منها وحب راسها.. :

آسف ضحى.. ضغطتني امي.. لاتتضايقين.. وانتي ترضعين ولدك..

على طول امتلت عيونها دموع:

ياعمري.. انت لا تتضايق.. ماعليك مني.. انا زينه..

خذ جواله ومفتاحه وطلع..

ولحقته نور.. وبدون ماحد ينتبه الحقتهم انفال..

توجه للبايكه.. وفتح قفول السياره..

والنور تمسكت فيه وتتحلف فيه:

والله ماتطلع وانت زعلان..

هادي :مافيني شي.. بروح افرفر بالسياره.... ضايقتن بي..

النور:والله ماتروح.. قل لي هادي.. انا اختك.. صديقتك.. بفهمك.. وش فيك.. وش الهم اللي بقلبك..

تنهد.. باختناق.. ورفع راسه..

النور بالحاح:منهي.. منهي اللي عجزتك وعجزت فيك.. من اللي في بالك.. تزوجت.. ماتت.. وينها..

ضحك بتهكم وتضيق فيه اكثر..

النور بااصرار:قول وزيح هالجبل من قلبك.. كم لك وانا اشوف الحب والعجز بعيونك.. مين ياهادي.. مين اللي عاثيه بقلبك..

هادي يحاول يزيحها:بعدي يا النور.. لا زعلك..

النور متمسكه بثوبه من جهة صدره :والله ماوخر الا قايل الا بخاطرك.. هادي.. تكلم..

مسك كتوفها بقوه ومن بين اسنانه:

بلقيس يالنور.. بلقيس بنت عمي سعود.. وماطولها.. بيني وبينها بحور ودهور..

توسعت عيونها:

وليش تقووول كذا.. هو انت بتلقى مثلها وهي بيجيها زيك.. ليش ياهادي وش يمنعك..

ضرب صدره بكفه: ضعفي وخوفي وهالكبر اللي خايف يكسر.. بيقولون طمعان فيها.. وفي ابوها.. النور.. ليتني ماشتغل عند عمي سعود.. وليته مامسكني كلشي.. ليتني ماعرف اسرارهم.. ولا حساباتهم.. انا وبلقيس بينا فرق.. وبينا ماده.. وكلام ناس..ابيها ورب الكعبه مافي خاطري الا هي.. وهي تبيني.. بس.. مقيد.. ومربط..

النور بانفعال:

خبل انت.. لايكون انت تشحت بالشارع.. تراك في خير ونعمه.. وشهادتك شكبرها.. وعمي سعود والله والله مايفرقنا عن عياله.. هو يشوفك مثل سيف ونواف.. بس انت مع الاسف.. ماعديته مثل حمد رحمة الله عليه..

هادي بغبن:ذا عمي سعود وماحد يشكك في غلاه.. وان طلبته ماردني.. بس الناس بتاكل وجهي.. وبيقولون عطاه وكبره وسواه وطمع زياده..

النور بغضب: وانت وش عليك من كلام الناس.. انت عليك بنيتك.. بموافقة البنت وابوها.. ليش تبني ردود فعل من فراغ.. ليش انت تنتظر تروح من يدك.. ثم تلطم وتقول ليت وياليت..

هادي بحزن الدنيا:وهذا بلى ابوك ياعقاب.. ياالنور بلقيس خطبها ولد عمها.. وعمي سعود شكله موافق.. وانا من يوم خطبها وقت عزيمتهم.. وانا الدنيا قافله بوجهي.. وقاطع اتصالي ببلقيس.. مالي وجه.. والله مالي وجه.. ماستاهلها.. هي كانت تقول قرب.. وانا ابعد.. هي تقول يصير.. وانا اقول ماينفع.. آااااه ياالنور.. كان غباين الدنيا.. اللتمت وقعدت ببلعومي..!!

انتهت انفال من رواية الحادثه لسعود باسلوبها.. وحفظها للموقف.. و اللي حاولت قد ماتقدر تنقله بحذافيره..

وكان في حالة ذهول وقهر..

من هادي.. وضنه.. وسكوته.. ومهابته من الاقدام..

انفال :وانا اطلب منك بلقيس لهادي.. والله ياعمي ان النور هاوشته.. وحلف انه يحبها ويبي يتزوجها وحتى يقول مابيني وبينها الا وضح النقا.. مادري وش تعني.. بس حبهم اسلامي.. ها ياعمي.. تردني..

ابتسم سعود.. على اسلوبها ونقاوتها.. وكيف وصلت بعمرها الصغير اللي كبار ماقدروا يوصلونه..

يوم لاحظته سكت.. :وش فيك عمي سعود.. ما انت راضي..

سعود :راضي.. ودامك طلبتيها..لهادي.. جاته بعباتها..

انفال:كيف.. يعني.. وضح ياعمي سعود لاتجنني..

ضحك:خلاص موافق.. بس هااا.. المكالمه هذي خليها سر بينا.. وخليني انا اضبط الامور بطريقتي..

بحماس وسعاده :يالبى يالبى ياعمي سعود.. والله انك كفووو

*****

سعود في غرفته.. مرتاح من اللي سواه وصار..

وماتصادف مع بلقيس الى الان..

توه بينسدح..

الا طق الباب..

: حياك..

انفتح الباب ودخلت بلقيس.. بخطوات بطيئة.. وتشابك يديها..

ومو قادره تناظره..

جلس على فراشه.. وفسخ ساعته.. وحطها على الكوميدينا.. وبالهجه مبطنه:

لايكون بعد ماتبينه.. وتحطين فيه ألف عيب.. مثل شبيب..

بلقيس ساكته.. وحاسه ان اللي سواه ابوها بمعرفه منه بقصتهم..

سعود طالعها.. وهي منزله راسها.. وابتسم.. بس اخفى ابتسامته.. وبلهجه هاديه فيها تهديد وعتب :

والله يابلقيس.. الله ارحمك انه هادي.. لو غيره.. ان كان...

بسرعه راحت طبت عند رجوله.. ومسكت يده:

والله مابينا الا وضح النقا.. والله يخاف علي وصايني.. والله يبه..

حط كفه على راسها :

الله يبارك لكم.. هادي ماانتوا اغلى منه عندي.. بمقامكم.. مثل ماوصيته عليك.. اوصيك عليه.. بيصير هو وليك وتاج راسك.. ولو هو متحسس من شغلة وش عندك وماعندك.. صيري الشاطره.. ولا تخلين هالشي يبين بينكم..

بلقيس بصدق :والله يايبه مابي شي.. مابي من الدنيا الا هادي..

سعود بمداعبة واستنكار: عجيييييييب..!!!!!

بلقيس خبت وجهها بكفوف ابوها.. وانهارت بكي..

...........

ومر رمضان..

بدعاء صادق من نواف.. كما يسر لهادي.. خطبة بلقيس.. ييسر له خطبة زينه وترضى..

عجز يطلعها من عقله.. فكانت تكبر وتتضخم في قلبه وخياله..!

مهره وتعبها من الوحم.. رغم حماسها.. وشوقها للمولود..

سيف الصغير.. وعصبيته وانفعاله كل ماقالوا امك بتجيب نونو جديد..

فارس.. وروعة الفكرة.. واهتمامه بمهره.. من تقول اشتهت شي يجيبه..

سيف وقلقه عليها.. واحتواءها.. وحتى محاولته في ابعاد سيف عنها ساعات طويله.. ياخذة المزرعه في نهار رمضان مع الشباب..!!

عشان تتعود على بعده بشكل تدريجي..

هادي وبلقيس والحب اللذي يعانق السحاب.... عتب.. وبشرى وسعد.. بعد انقطاع الامل..

انتظارهم للملكه اللي حددها سعود ثالث العيد..!؟

وفي اخر يومين.. من رمضان..

شاهين في بيته.. مر فيه بعد التراويح.. وجالس.. متوحد مع نفسه.. كاعادته لحب يهرب من كبرياءه.. وغروره..!

كان في الصاله يدخن.. وحاط قدامه لوحه لها.. وكان يحاورها كانها هي..

يقول لها كيف عجزته.. كيف عرف هي بدوله وعجز يوصل لها..

كيف سب الزمن.. وحضن غاده.. كيف لعن يوم وفاة امها.. وكيف ذنوبه تكبر.. كل ماسب الدهر..

كيف الشهور.. سنين..!!

والشيب طلع في راسه..

معقول..

انتي.. جمان.. فيك جبروت.. تذبحين انسان..!!

والله انك ذبحتيني..!

شوهتي بيان وديم..

انتي بكامل قواك العقليه.. يومك تذبحينهم..

راحت الوانهم ياجمان..

كل شي فيهم باهت ورمادي..

نفس لوحتك هذي..!

وانتي ترسمينها.. كنتي تحلفين.. ترسمينا زيها وبالوانها..!!!!

ارتفع رنين جواله.. نفخ الدخان.. وحاول يتجاهله..

لكن عقد حجاجه وهو يشوف رقم دولي ينطرح على الشاشه..

شاله ورد..

وبشكل عاصف مخيف.. صوت جمان متألمه.. تصيح وتبكي :شاهين.. شاهين.. تسمعني..الوووو

وقف وبذهول ولهفة الدنياا:جمااااان..!! اسمعك.. وووينك..

جمان بصوت باكي.. موجوع:بمووت ياشاهين.. وبتطويني الغربه.. امانتك بيان وديم.. وتراني مسامحتك والله سامحتك..

شاهين يصيح فيها :ابلعيهااااااا... وينك.. وووينك وش صاير عليك..

بكت منهاره:ادري ان حبك لغاده طيش وتماديت فيه وادري انك تحبني.. الشيطان دس لحظة غاده وياك في وجهي.. وكبر الزعل براسي.. شاهين ابي اشوفك واشوف بناتي قبل اموووووت...

ذاب قلب شاهين وهي تصرخ بألم وكانها مصابه.. صاح فيها:وووووين مكانك... وووين.. قولي لي...

انقطع الخط..!!! .......

.....

لابل هو كان غفى وصحى.. والمكالمه ليست الا حلم..

قرب يجن..!!

لا جن فعلاً..

هذه اشاره.. هي فيها شي.. اكيد صاير عليها شي..

طلع من البيت وركب سيارته..اتصل على سيف.. وطلب منه يلتقون حالاً..

في تلك الليله وبالتعاون مع سيف تواصلوا مع طلال.. لان بجهه امنيه مختصه بالامور الخارجيه للمملكه..

واللي فهمه شاهين ان طلال محاول يبحث عن وسيله للوصول لها.. من خلال تدخيل سيف له بالموضوع.. والنتيجه. مافيه حجوزات باسمها ولابلاغات.. ولا حتى شريحة اتصال باسمها..

وجمان فعلا كانت تتعامل باسم راشيل في كل شي..

باستثناء المستشفى.. واللي كان من ضمن مقاطعة القرى.. واللي ماكان ممكن احد يتوقع وجودها بذا المكان.. اللي كله ايطالين ومافيه حتى سياح..

*جربت الشلل في اعنف انواعه.. انتابتني نوبات جنونيه.. كسرت علني افرغ غضبي.. هل داهمها لص.. هل احد هاجمها.. هل سقطت وانكسرت وهي وحدها.. هل هي مجروحه.. وستنزف حتى تنضب دماءها وتموت.. كيف صور لي ابليس احتضار جمان في ابشع صور..

باختصار امر الان بحاله.. لاااتمناها حتى لعدوي!*

كان يذبل كل ماطريت الفراق

كيف فارقني وفي بعدي حيا ؟!

ليه صدقته وهو حتى العناق

في قناعاته أكاذيب وريا !

كنت أحبه مادريت ان النفاق

تعشق اللي موّتك حزن وعِيا !

كان فارق يشبه أحزان العراق

كنت وجروحي معه شِبه اغنيا !

أنتمي له كل ماهالكون ضاق

وانتفي منّه ويكسرني الحيا !

ليته اهداني بعد هذا انعتاق

من تفاصيله انا بحاجة ضِيا !

.........

في طلتك صبّح لك العيد بالخير

‏وهلّت بك أزهار الصباح النديّه..

صوت تكبيرات يملئ الأجواء.. من بعد صلاة الفجر..

بيت سعود.. نشاط وحماس للعيد.. استعداد للصلاة..

العود يشتعل..

في كذا مبخره.. بالصاله.. وغرفة سعود وغرفة سيف بيد مهره..

وهي حاطته تحت غترته..

ابتسم:يازين هالعيد فيك والله..

مهره بضحكه:هذا وانا لسى ماتزينت..

سيف قرص خذها :

حلووه بكل حالاتك..

اللتفت لسيف اللي شالته مهره واسدحته على سريرهم في محاولات منها تصحيه.. :

والشيخ ماهو رايح الصلاة..

مهره تروح له:الا سيف امانه اخذه.. لبسته.. باقي بس الشماغ..

سيف بعدها عنه:خلاص لاتقعدين تشيلين فيه.. تراه كبر.. يعورك..

شاله ووقفه ع السرير :سيف بابا اصحى.. عيد..

حاول يفتح عيونه وماقدر وقاط راسه على كتفه.. حاول يصحيه وماش..

ضحكت مهره:يمه لابغى النوم..

سيف:كيف الحين..؟!

مهره: هو متحمس ومعشمه نواف.. ومن البارح مجهز عدته ونعوله.. اذا ماراح بيتأزم..

شاله سيف على كتفه.. :عطيني نعوله..

مهره جابتهم.. سيف طالعهم وبتهكم :هذي ميداليات ولانعل..

ضحكت :لزوم الثوب والشماغ..

جاتهم نداءات فارس من تحت..

سيف:يلااا الولد سابق ابوه.. والسبايب انت وولدك..

مهره تودعهم:ياجعلكم من عايده ياسنايدي..

......

شاهين..

واعيادي السابقه.. كانت مختلفه.. بغضب جمان وصدها.. واستمتاعي بتعويض كل ذلك مع غاده.. والهروب من جفاءها.. لضحكة الاخرى.. ولقائي بها..

وفنجاين قهوة.. نكرعها.. في مقهى..يضمنا معا ً..

نتبادل الهدايا والعيادي..

وسلفيات..تكررها غادة معي.. متحججه انها ماتضبط بالحجاب..

العيد اليوم غريب..

كاروحي..الضاله..

كأنها روح متوفى مديون..

تائهة بين السماء والارض.. لاتجد ملفى.. ولاتجد من يسد دينها..

فتنام بسلام..!

معقول حتى ابليس.. لايزين غاده لي.. لأذهب اليها واعوض بعض الفراغ بداخلي..!

كيف كانت غادة شيئ لااستطيع التخلي عنه..

وكيف اجهلها الان وكأنها شيء لم يكن في قلبي ابدا ً..

انفتح الباب..وهو يحط العقال على راسه.. ودخلوا بيان وديم.. بفساتين ناعمه حلوه فخمه.. اختارتهم لهم مهره وبلقيس.. بعد تسوق لساعات بالبنتين.. عشان يحسسونهم بالعيد واستعداداته..

ضمهم وملوا وجهه بوسات..

ابتسم.. وهو يدور العوض في ملامحهم..كيف خلدت جمان.. تفاصيلها.. في كل لمحه.. ولفته.. وسمره شهيه..

باس ديم.. وعض خدها..وهي تضحك ومبسوطه :

يلا بابا نروح بيت جدي.. خالتي مهره.. تسوي لنا مفاجآه..؟!

داعبها:وش طيب.. حتى انا ابي مفاجأه..

بيان :انت كبير.. مافي لك.. بس احنا..

وقف :وجدتكم جهزت..

بيان:لا باقي.. بتجي مع جدي.. مانبي ننتظر بابا.. يلاا..

ابتسم بحنيه على حماسهم..

ويقدر لمهره وبلقيس استماتتهم لاسعاد الثنتين :يلا ابوي.. مشينا..!

******

بعد صلاة العيد..

امتلئ قلبي بالبهجه.. في عيدي الاول مع سيف روحي..

تراقص قلبي مُطلق ضربات متلاحقه.. كاطقطقات الاساور.. اللتي حشى بهم معصمي.. كاعيديه..

لاادري متى اشتراهم.. ولاكيف خبئهم.. حركتهم بيدي:يجننون..!

مهره متأنقه.. بفخامة..بالوان يعشقها سيف عليها..

عايدها.. وقلبه هذه الايام يحترق.. كل مارأى سعادتها.. وشعر بقلبها يختلج.. على ضلوعه..

كان ضامها همس:الله يسعدك يامهره.. عسى ضحكتك ماتنطفي..

شعور داخلي.. غريب.. حست بخوف.. ونبضاتها ارتبكت..

خاصه مع رجفة صوته.. وتنهيدته الحاره ..

حاولت تبعد : سيف وش فيك.. ؟!

باس جبينها.. :احبك.. بس..

طالعته بنص عيون:تراه رمضان كله.. باليوم.. كذا عندك فصلات تربكني..

سيف يضحك.. ويرتب شماغه:ياشيخه..!

طلع لها فلوس عدة فئات.. :

خليها معك عيادي.. يجون الجيران.. وبزارين عمامي..

ابتسمت وهي تاخذهم.. :لاخلا ولاعدم ياحيي..

العيد اليوم يتراقص.. كادخان المبخره في يد بلقيس.. وهي تختبئ في الممر والجوال بذنها وتهمس:

ولا في الحلم.. بقدر تشوفني اليوم..

هادي:تراه خلاص ملكتنا بعد يومين.. نعتبرها نظره شرعية..

بلقيس تضحك:احلف عاد..؟!

هادي:انتي ملاحظه اني بتزوجك بدون نظره.. اخاف تغشوني..

بلقيس راحت دخلت غرفة جلوس وسكرت وانفجرت ضحك:

فيك خير رح قل لابوي.. وشف وش يقول..

هادي:تكفين منعيني.. الا عمي سعود.. ياشيخه.. هو لي وجه اطلبه.. المهم انتي رتبي الامور وخليني اشوفك.. انا بيتكم.. مالك عذر..

توسعت عيونها.. بدهشه من جنون هادي واندفاعه.. اللي مو ملائم لشخصه.. :

طيب بتحجب ونكلم بعضنا سناب..

هادي بعصبيه بارده: مع السلامه..

وقفل في وجهها وبلقيس تضحك.. :ياحليل هادي صاير عويشق..وولهان..!!

هادي حيل يبي يشوفها وملهوف.. حبهم سنين.. بس ماكان يشوفها.. الا بالنقاب.. هي مره وحده اللي شافها.. وانفتن فيها.. وكانت من سنين..

كانت في ثانوي.. وبمزرعتهم.. كان في المجالس.. توه جاي.. .. دخلت وهي ميته ضحك.. وتسكر الباب.. ومانتبهت لوجوده.. كان نواف جايب كلب بوليسي.. ولاحقها..انحاشت.. وازبنت.. في المجلس ومن الخرعه كانت في حاله هستيريا من الضحك.. وهي تقول :نواف يا**.. بعده.. والله كان بيعضني..

نواف:فتحي.. انتي متى تتعلمين لاانحشتي من الكلب يلحقك.. امداك لمحتيه وحطيتي رجلك..

مسكت قلبها تتنفس بسرعه وتضحك:

والله اللي ماوقف له.. خلاص روح وده.. خل اطلع.. ورب الكعبه.. اركبي تتصافق..

ضحك نواف : والله خوفك كوميدي.. اركبك تتصافق وميته ضحك.. فتحي وخلك رجاله..

هادي اللي قاعد بهدوء..

مخفي كل مااعتمل في نفسه.. من اعجاب.. ببلقيس اللي عرفها.. خاصه من صوتها..

بلقيس وهي تطق القفل وتلتفت داخل المجلس:اي والله زين ماعض مـ**..

وقطعت الحديث يوم شافته واشهقت : هادي..!

انصفرت.. من الوهقه.. الكلب بره.. وهادي داخل.. ونواف عند الباب.. والله يستر..

هادي.. بدون تعليق.. طلع من النافذه.. وهي واقفه مثل الصنم..

اسمعته.. بره عند نواف.. يسلم عليه ويسئله عن ابوها.. وكنه توه جاي..

من ذاك اليوم.. في شي وقع في نفس الاثنين..

هادي انفتن فيها كاشكل وضحكه وصوت..

وهي انفتنت فيه كيف تصرف.. رجولته برودة اعصابه.. وشخصيتة الواثقه.. مارتبك.. ولاتوهق.. ولا قض البصر.. تعامل كنها انسانه معتادها.. والوضع طبيعي..

تطورت العلاقه.. مع شوفه وحيده يتيمه.. لملامحها..

ظلت بلقيس متمسكه.. وهو ظل صاينها مايطالبها بشي..

بس اليوم هادي.. ومع شعوره انها صارت له خلاص.. ميييت على الشوفه..!!

ظميان من مثلي من الناس يظما!

وانا على احلى الينابيع حارس

******

تحقق هدف من اهدافي لهذا العيد..

استطعت..

ان اخرج شهقات طفولية سعيدة.. من افواه بيان وديم..

وقد جهزت لهم طوقين ورد.. احضرهم فارس.. وخبئهم كامفاجئة..

الفكرة راودتني وقد تذكرت انبهاري انا وزينه.. عندما البسنا والدي اياه..

اتذكر انتشاءنا وشعورنا اننا من اميرات ديزني..

اراني وزينه..

في بريق عيني الصغيرتين..ذاك البريق الذي ما ان يشع حتى يخفت..

وتلك الرغبه في السعادة.. والمكافحه في كبح الحزن..

سندس كانت تختلف.. حادة كاصبحا.. قوية.. لاتكسر..

عكسي تماما وزينه..

قوتنا.. تهتز امام مشاعرنا.. وفقدنا..!

وبس حست مهره.. ان البنتين.. بتختفي ابتساماتهم.. قالت بحماس:

يلااا يلاا المفاجئه الثانية..

فارس بتسائل.. يأشر :وش..؟!

مهره تشيل كيسه كبيرة..

الا بدخلة سيف.. جاي من المجالس.. وهي تقول: نطلع ونشب طراطيع..

سيف بذهول: طراطيع..!!!!!

مهره تفتح الكيس وتطلع اكياس وكراتين:ايه طراطيع.. عيد.. عيد..

فارس بحماس وانفعال:ويلووووموني فيك.. ورب الكعبه جوووي..

سيف قرب ومهره ع الكنب.. وتنبش الكيس وفارس معها يستكشف.. انفجع:

من وين جايبتهم.. بتسوين مهرجان..

مهره.. :اللهم لاحسد.. لاتقول كذا بعدين يطلعون فاسدين..

سيف يطالع الكميه:مين شراهم انتي ولافارس..

فارس وهو يطلع كرتون:مهب انا يبه.. انا رحت جبت البارح الورد.. مهره جابت هالاكشن..

مهره تضحك:ايه هذول ممنوعات.. مو اي احد يبيعهم..

ورفعت راسها لسيف :شفت يوم كنت عند جديده بشعبان.. شريتها من السوق الشعبي حق الحريم.. والله ياخلصت ميزانيتنا انا وزوين على الطراطيع..

سيف يطالع البزارين مجتمعين حولها هي وفارس وحضونهم مليانه.. :

والبزارين.. يامهره اعقلي.. تراني قابطك بعقل..

مهره تطلع قرطاس :البزارين جايبه لهم نجووم الليل وثوم.. يجلسون على العتب.. يطالعون وانا وفارس نشبها..

وراحت عطت بيان وديم وسيف على عود .. وشبتهم بالولاعه..

وثلاثتهم تعالت صرخاتهم وهم يفرونها : هييييييييييييييي....

سيف:استغفر الله العظيم.. اشوي بيمتلي المجلس رجال.. اقعدي وبالليل نشبها..

مهره بوناسة:فيه فيه كرتون ثاني لليل.. بنشبه لاوصلوا جديده وزوين..

سيف :والرجال..؟!.

فارس:يبه تو الناس.. مايجتمعون الا فوق التسع.. توها سبع ونص.. قد خلصنا لاجاو..

مهره:وبعدين احنا بنروح الساحه اللي ورا البيت.. خلاص سيف لاتعقدها..

وراحت تغمز بشكل مبالغ وتأشر على بنات جمان:

عشان البزارين يفرحون.. عشان يستانسون..

سيف بنص عيون :

والله لو على البزارين.. مابيهم يلعبون بذا الطراطيع خطر عليهم.. بس عشان بزاريني الكبار.. نقول الشكوا لله (يقصدها اهي وفارس)..يقولون يرعى الحشيش بسنا الجت..

ارسلت له بوسه من بعيد:بعد قلبي والله..

وراحت تجمعهم وتحطهم بالكيس:يلا يلا فارس البزارين متحمسين..

وهو معها ع الخط :يلا يلا لايجيهم احباط.

وشال الكيس :احنا بره يبه.. تعال انت ونواف..

مهره تحط شالها على راسها:

ايه لازم تجون كلكم..

وراحت عند الدرج وباعلى صوتها:

يلااااااا يابلقيس.. تراه العيد.. مب يوم عرستس..

سيف يطالع فيها وبحماسها باستمتاع.. ويرجع يطالع بسيف وضحكاته..

وشكله بالثوب والشماغ اللي تخرب.. وقلبه يوجعه.. والوقت يقرب.. لإعادة الحق لاصحابه..

جثى قدام سيف.. وراح يرتب شماغه.. ويركز العقال بوسط راسه..

ويطالع جيبه الفوقي والفلوس طالعه منه.. داعبه بخفوت:

اوووه كم جمعت ..

طق مخباه.. :عندي فلوس واااجد.. اوبه.. انت عطيتني واحد.. بابا عطاني ثلاثه.. جدي.. عطاني اثنين.. فارس عطاني.. كثييييير.. كلهم.. عطوني فلوس.. اشتري لمبرديني..

ضحك سيف :

لمبرغيني مره وحده..

سيف يطلع فلوسه.. وسحب خمس مية بينهم هي اللي من سيف.. وقال: اوبه انت تعطيني بس واحد.. ليش..؟!.

سيف وقلبه موجعه اليوم على سيف وصاير حساس جهته:

تراها وحده بس اكبر من باقي الفلوس كلها..

سيف طلع ثلاث خمسينات.. :

شف بابا عطاني ثلاثه..

سيف تفاعل: افاااا.. وانا ابن ابوي.. مايغلبني نواف.

طلع خمسينات جديده من مخباه مدهم: خذ اللي تبي منها..

سيف بكياته:بس اثنين..

وسحبهم..

ووجهه ينتشي بسعادة..

وسيف غصته تكبر..

*تعلقت بسيف فعلاً..يناديني بابوه.. وانا هذا شعوري له.. من حملت مهره وانا احس بيصير عندي طفل ثالث.. كيف لو راح سيف.. بفقد نداءاته.. وابتسامته.. وعثرات كلماته.. لما يقول اوبه..تضحك لي الدنيا *

مهره وقع نظرها على سيف.. وجهه بتعبيره الغريب.. وهو يرتب فلوس سيف ويحطها بمخباه.. ويبتسم له.. ويبوس جبينه:

نشوف اخر اليوم كم يصير معك.. اذا تكفي حق المبرغيني..

عقدت حجاجها وهي اللي صارت تحفظ سيف.. مهما اخفى:

سيف وش فيك..؟!. صاير شي..

قام وعطاها ظهره عشان ماتشوف لمعة عيونه.. :

اخلصي فارس طلع لايشبهم عنك.. وانتبهوا للعيال.. لايقربون..

مهره شردت في ظهره وبخفوت: تمام..

*******

في قرية في الشمال الإيطالي.. ومن بيت راشيل الحجري..

كانت ترتفع صوت تكبيرات العيد.. من الشاشه.. اللتي تعرض البث المباشر للحرم المكي..

جمان من اسمعت الشيخ يكبر وهي دموعها ماوقفت..

*بالامس خرجت من المستشفى.. بعد ولادة عسيرة.. كدت اذهب ضحيتها انا اوصغيري.. اليوم عيد أُمتي.. كأن ربي ارسل العيد ليكبر.. ويكبر.. ويمتلئ جوي ذكرا ً.. على عظمته وقد خرجت..بمعجزه كما خرج يونس من بطن الحوت.. في ظلمات ووحده..

قر عيني بعدها يعقوبا ً..رموا بوجه بقمصان..!

ولادتي.. وحياتي.. ولطف ربي بطفلي كانت معجزات..!!

ضممت فهد قلبي.. ودموعي تبلل قطنياته البيضاء.. استشعر عظمة الله في حفظه لي.. وقد نزل باكسجين قليل.. وقلب كاد يتوقف..

بن حميد يبدء خطبته.. وقلبي يرجف.. وخلاياي ترتعد.. من المقدمه.. وذكر الله كثيرا.. هل ماحل بي عقاب.. من ربي.. سخط امي.. اللذي يذكره والدي في رسائله...

جفائي على شاهين.. وبناتي..

وزاد بكائي..

وضعفي وآلامي.. من الولادة تزداد..

ولادتي لفهد.. كانت مؤلمه.. وكأنها عشر ولدات.. في كل طلقه.. كنت اطلق على بناتي وفهد..!!

في كل صرخه..

كنت خائفه.. من الموت وحدي.. وشاهيني.. اللئيم ليس معي..

كنت مرعوبة من فكرة موتي.. وان يضيع ابني في الغربه..

من فكرة ان يموت ولا اجد من يجمعني من ارض الفاجعه..!

تخيلتني ثكلى.. مجنونه.. في طرقات.. لن تحضني.. ولن تبر فيِّ..

وجدتني اطرق الابواب وابكي ابناءي.. وليس لي عقلا ً.. يرتب الامور ويصفصفها..

مرت بي لحظات رئيتني جازعه..

حتى لااذكر من الدين شيئ يطبطب على روحي.. المخضبه..

كنت ارى وجوه القابلات الطيفات.. زبانية..كنت على يقين.. ان احد منا سيموت.. ودعيت ربي.. في جوف الطلق وكربه..

ان متنا فا معا ً.. وان عشنا معاً..

واحد.. لن يسلم..

فاياربي حمدا ً.. حمداً.. وشكرا ً.. وسجود شكرا ً حيث اذهب.. وابقى..

اشم صغيري.. واعوض جوفي الفارغ.. منهم.. من شوقهم.. وحنيني.. الجارح لهم..!. *

ياربي الليوم العيد..

من زين بيان وديم..

كيف لبسهم.. قصوا شعورهم ورتبوا غراتهم ولا.. هادي.. قاهرني.. يتحجج بكل شي ولايصورهم..

شعرت بغصه..

وانا افقد في هذ العيد اهم ركائزه..

وجه سعود.. وبوسة كفه.. وريحة دهن العود يلصق بوجهي..

موضي.. والزين كله.. وفخامة البس والرزه..

اخواني.. ياجعلني قبلهم..

بوفارس وعياديه وخيره..

نواف وبوسته لراسي ولو اني اصغر منه..!

بلقيس.. وزينها..وحضنها وهي تعيد علي كن سنه عن بعضنا..

فارس.. ياجعلني افداه.. وكيف العيد مايبدى عنده الا لاجيت البيت..!

غصتني تتضخم.. وفقدت شاهين كيف يعايدني بالقوه.. رغم رفضي له.. يضمني قسراً.. ويفترسني قبلاً.. ويملئ كفوفي عيادي.. وينتظرني لنذهب..!

ابتسمت واحس بفهد يصحى ويحرك يدينه الصغار.. ناظرته ودموعي تنزل :

امي.. امي.. ياحلوو العيد فيك.. يمه..

يتحرك بلطف وكفوفه الصغيره تلمس وجهها..

فهد امنية شاهين.. ومع ان بناتي يشبهوني.. فهد صار شبيهه هو.. وياحي الشبه حيه..

ضحكت.. ويغزل لي الشوق حريرا ً.. يلتحف به قلبي.. وانا اتخيل.. شاهين.. لاشافه..!

ادري اني عاقبته.. واوجعته.. وبكيته.. وجننته..

ادري انه صافي لي انا..

وعلمته ان الله حق..!

بس مادري كل اتخيل شاهين لو رجعت يذبحني على هالفعله..!

ابي ارتب ردة فعله لو درى ان جبنا فهد..

ومن قال بوريه فهد.. ينقلع..

وراحت ضمته: فهد لي اللحالي..!

وبتملك.. تضمه اكثر..

فوق شينك ياشاهين.. احقق امانيك.. والله مارجع يالخاين.. يالجلف..

*واتخبط بين قسوة ولين.. وشوق وفقد.. بين غفران وسخط..

كل مالنت.. وهزني الشوق..

يداهمني صوته الهامس لغادة.. وهو يحاكيها سراً ولايريديني ان اسمع.. اسمها على شاشته.. تتصل وفي اي وقت..

خروجه.. لرد.. للقاء.. للشوق.. لحبها الملعون اللذي لم يعرف طريقاً ليتخلص منه..!

تمرجح قلبه بيني وبينها..

واخيرا ً حضنٌ يصخب في عيني كل مااتخيله.. اللعنه عليكِ غاده..

واللعنه عليك شاهين..!!!

مِن علَمك،حكِي القسْى,من قال لك حُلو الغيَاب؟.

******

الشباب في المجلس..

وصوت الألعاب الناريه وصرخات البزارين.. مسويه لهم جوو..

نواف مد فنجال لسيف ويضحك:

اثاري حرمتك قاضيه مرتن وحده..

سيف:شاريه بسطه كامله.. ولاالليل يخلصون...

جاهم صوتها:فارس ماهو كذا.. ارميها.. بوسط الأنبوب..

وصراخها.. :يلاا هج هج..

ضحك نواف:قم نطلع يمهم.. جوهم حريقه.. ماهو مثل جونا نايم..

سعود عيونه من فوق نظارة القراءه والجوال بيده:

اذا ودكم ومستحين .. قوموا.. دام مافيه احد.. هادي عندي موجود راح يجيب امه ويجي..

نواف: والله مايندرا عنك يابوسيف.. هو تقوله صادق.. ولا تمسخر علينا..

ضحك : لا والله صادق.. بس ماهو تنسون نفسكم.. واقعد ازعق لكم زي البزارين.. عمامكم.. والجماعه على جيه..

نواف :اجل قم سيف.

سيف متثيقل..

ونواف سحبه:قم..

ــ اقبلوا عليهم وسيف راح جهة مهره وهي جالسه تضبط صاروخ ع الارض.. ومانتبهت انه جاي.. شبته وقامت تركض.. وصدمت فيه..

مسكها...

وانفجر الصاروخ فوق مطلق صوت قوي.. والوان جميله..

ماشافته مهره..

رفعت عينها لسيف بالنظاره الشمسيه..

ورجولته واناقته الطاقيه في نهار هذا العيد..

بوسط خرفنتها..

سيف يأنبها: هذا علمك.. وشهولا تروكضين.. والله يامهير بتعورين وماحد ماكلها غيرك..

مهره انصدمت.. وفقعت ضحك..

سيف يشيل نظارته:وتضحك.. انتي شفيك ناسيه انك حامل..

مهره مستمره تضحك: متتتت متتتت... اول مره تقولي مهير.. طالعه من فمك زي العسل..

سيف بخفوت:مهره ابوي انتبهي.. لاتطيحين ولاتلتوي رجلك.. ياقلبي تحملي لاتجيبين العيد بورعنا..

مهره تبعد وهي تعدل شالها :

يعني كيف.. مااشب طراطيع.. مايصير عيد..

سيف :شبي عسى مايشب غيرك.. بس الهون احسن مايكون.. شبي اشيا.. مافيها ركيض..

فارس يضحك:

امسكي نجوم الليل نفس بلقيس والوراعين..

سيف يروح ياخذ المجموعه من يده :

وانت بدل ماتعقلها تستفزها.. يلا دورنا انا ونواف..

فارس توسعت عيونه.. وابوه.. يرفع ثوبه.. ويجلس نص ركبه.. وهو يرفع شماغه شرينبو..

ويبتدي يشب معهم هو ونواف..

مهره قلبها يرقع مع اصوات الالعاب الناريه.. وسيف يضحك من قلب..وهو يستعيد اعياد كانت.. وشقاوة..

نواف وفارس.. بلقيس..

بنات جمان وسيفي كاحلوى العيد يتلونون.. بضحكات وقفزات.. وصرخات تشجعنا..!

من قال انك عيد بأي حال عدت ياعيد..

فالعيد.. باشخاص تطوقنا.. كاحلقات ورد تجملنا.. عيدي اليوم مختلف..

وكأني ملك.. والسعاده تجدد لي البيعه..!

سيف حانت منه التفاته.. لها وهي شارده ببتسامه فيهم..!

شوفتك يوم العيـد حاجه عظيمه

‏تكفي عن كثار الفرص والمواعيد

‏مافيه غيرك يعطي العيد قيمه

‏عيدي معك لاجيت عيدين في عيد

........

بعد اشوي.. والمجلس مليان.. شاهين جاله اتصال.. وقام بيرد..

سعود:لاتبعد ياشاهين.. الغدا بيحط.. يبه..

شاهين: موجود يطول لنا بعمرك.. بس برد على العمل..

قال كذا وطلع ورد..

كانت الاداره.. ويكلمونه.. عن جدول رحلاته بعد اجازة العيد..

ولو عنده نية في تغير الوجهات..

شاهين:لاا.. ياقصي.. خلينا.. الفترة هذي على روما..

قصي :طيب واذا مازبطت..

شاهين : حاول لو ماضبط.. عادي.. بروح فيها كامسافر..

ضحك:ياشيخ يمين بالله.. اينتا موصيبه..

شاهين :هذا اللي عندي ياقصي.. ياتتساعدون معي.. يا انا ادبر نفسي..

قصي :ابشر بوس.. انا بسوي اللي عليا.. والباقي على الله..

شاهين :ع القوة.. ياسنايدي..

قصي :يقويك.. ياقلبي..!

وقفل الاتصال.. تنهد.. وشب زقارة نفخها بحرقة..

ولسان حاله يقول..

ياضعف قلبي معك على اتخاذ القرار

‏على كثر ماخذلتيني عجزت اتعض

‏انتي وانا مانشابه غير ( ليل و نهار )

‏نروح نفس المكان ومانلاقي بعض !

............

مقتطفات من بقايا يوم العيد..

سيف ونواف.. واحساسهم المثقل.. باقتراب موعد رحيل سيف عنهم..!

القطعه المتبقية من عساف.. والظل الباقي بعده.. نواف كان صعد يجيب شغله من فوق..

نزل ولقى سيف متخبي تحت الدرج.. وفارد عيدياته ويعدهم..

(الموقف عادي.. بس وشفيني ببكي..)

راح قرب منه..

ورفع عيونه له.. :بابا اتقول لا احد انا هنا.. ملحي اخذهم (الصلحي ولد الجيران)..

انحنى عنده.. :يخسى ياخذهم.. الله.. شهالفلوس.. صارن اكثر من فلوسي..

سيف يحط الفئات فوق بعض.. باستمتاع :

بعد عيد.. اصير عندي.. كثييير فلوس اوبه يشتري لي لمبرديني..

ضحك نواف :

والله خوش..طيب عطني وحده..

خذ ريال معدني :هاك.. هذا..

نواف خذه:يابخلك.. عطني اللي عليها بابا عبدالعزيز..(واشر على الخمس مية)

سيف برفض:لااا هذا من اوبه.. ماما قالت خشها لي.. انا بكيت..والله تاخذها.. ابكي.. مررره..

نواف :خلاص الريال يكفي.. يقولون خذ من البخيل لو القليل..

جات بلقيس.. :من جدك تطالبه بفلوس.. عض قلبي ولاتعض رغيفي..

سيف :ميمة والله اطيته..

نواف يرفعه لها:عطاني انتبهي تنقدين عليه.. والله يا انها عندي تسوى مال قارون..

وحب راسه.. وماتحمل راح ضمه.. واستكن راسه جنب راس سيف..

بلقيس لما حست نواف طولها.. وحسته متأثر وبهمس:نواف..!!

طلع صوته مرتجف.. :اشووف عساف فيه والله.. اشتقت لعساف يابلقيس.. والله اشتقت..!!!

امسكت قلبها.. وحسته بينفر من مكانه..وبخفوت:نواف ابوي.. صل على النبي..!

*******

بوقت الغداء..

وموضي تشرف على الصحون والذبايح.. مع الشباب..

مهره وبلقيس.. يجهزون السلطات.. والعاملات.. يشيلون وياخذونها بقسم النساء..

نواف يعطي فارس صحن.. :طلعه ولايطيح..

فارس :ليش سيف العساف.. فارس فارس بن سيف..

نواف وهو يرجع يجهز صحن :والله مادري من اللي قط الصحن العيد الماضي..

فارس وهو يروح :عاد درج لي السلك.. اليوم شيكت على الدرب كله..

بلقيس :ياربي شهالحوسه.. يمه.. ليه ماتسونا بمطبخ بره وتفكونا..

موضي :ابوك مايحس بالعيد.. الا بطبخة البيت.. بملكتك.. سويه باللي تبين..

خلصوا تقريبا ً..

ووصلوا الاكل بمجالس النساء والرجال..

مهره وهي تشيل بقايا الاواني بالمغسله..

انتبهت لسيف واقف.. ويسوي شي بصحن..

جات القت نظره..

لقته منسجم يقطع لحمه.. بالشوكه والسكين.. بترتيب.. ويحطها فوق صحن رز..

توسعت عيونها :اووووماااااا.. شتسوي.. ذابحك الاتيكيت.. الناس قدها خلصت..

سيف ضحك:ماهووو لي.. ذا لفارس..عشان تقويمه.. لايتوهق بسلوت اللحم..

مهره انهارت.. :ياااااااجععععععلني فارس ياشيخ..

سيف وهو مبتسم.. ومركز مع ترتيب صحن فارس:تبين اسوي لك..

جاا فارس :ها يبه خلص غداي.. تراي ميت جوع..

سيف يحط شريحتين ليمون فوقه:ايه يبه اخذه هني.. ياجعله عافيه..

فارس :عشت يابعدهم.. يلا تعال.. عاد..

سيف :جاي..

فارس ضحك على مهره:وش فيك..؟!

مهره:كيوووووووووت...

فارس :وانتي لين اللحين.. تنصدمين..

مهره:تفجعوني والله.. لازم بين فترة وفترة تطلعون بشي جديد..

سيف:من عمره وهذا سلمي معه.. خاصه بالاعياد.. وهو صغير.. عشان مايغص.. وكبر.. وصرت اسويه عشان تقويمه..

فارس :وحتى لاشلته بتسوي لي.. والله مب حلوو العيد الا بهالصحن..

مهره:اقوووول كنك اشغلته رجلي.. ورا ماتقصه لحالك..

فارس يحرك حاجبه:

الغيره..! ماهو حاصلك..

وراح.. وهو يضحك..

سيف :روحي تغدي.. ترى وجهك اصفر..

مهره بتعب:اكيد لاني مواصله.. خلاص ابي انام..

سيف :لاتنامين الا لاكلتي..

ابتسمت:تمام..

******

بعد الغدا والشاي.. صعد سيف معاه فارس.. وقبل مايتوجه لغرفته :

فارس حط راسك ونام.. لاتقعد تهجول.. والناس راقده..

فارس واصلا ً طاقه البهدال:تراه عصر.. صارت اجبارية الغيبوبه الجماعية..

سيف :انت شايف وجهك.. ارقد.. ابوي.. وعين خير.. لاتشغلني..

فارس :تطمن ونام غرير العينين.. اصلا.. ماشوف الدرب.. حدي بسبح وارقد..

سيف :صل..بالاول.. بيأذن..

فارس دخل غرفته :ماشي..

وبس دخل.. لقى على فراشه ترنغ جديد..وعلبة مغلفه عليها كرت.. :كل عام وانت بخير ياقلب امك.. (ميمتك مهره)..

وقف يحدق في الكرت..

اليوم العيد بمهره مختلف.. حاولت ان تسعد الجميع وتعوض النقص..

حركت الاجواء.. بكل مااستطاعت.. ونجحت.. في اضفاء السعاده.. وكسر روتين.. العيد وخموله..

فتح العلبه وابتسم..

ساعه جميله رقمية.. شبابيه وعلى جوه..

خذ الترنغ.. ويستغرب من التفاصيل.. اللي تحرص مهره عليها..!

مايدري ان مهره.. اكثر وحده كانت تعاني من فقد التفاصيل..!

وده يروح يشكرها.. بس اكيد نامت..!

تمتم:ياحبي لك والله..!

سيف لما دخل الغرفه.. ارتفع حجاجه..

مهره منسدحه نص وهي متسنده على ظهر السرير.. و مابدلت..

وسيف نايم على صدرها.. بثوبه.. وهي تطوقه بذراعها..

كيف..

كيف بيفتح معها الموضوع.. كيف يفرق الاثنين من بعض..

*اقتربت والدنيا تحشر نفسها في بلعومي.. مهره حتى لاتكترث بحمل وطفل.. تنيم سيف..فوق بطنها.. تحمله على الدرج.. تضعه على ظهرها وتركض لتضحكه.. كيف بالله.. سترضى.. كيف ستقتنع *

مسك سيف وتوه بيشيله.

تمسكت فيه.. وافتحت عيونها متروعه..

سيف بحنية:بسم الله عليك.. بشيله بفراشه..لايعورك..

اسدحته جنبها.. وضمته:

مايعورني كذا.. خله سيف.. ابيه..

وارجعت نامت..!

رفع راسه.. ومسح وجهه بكفه.. بحيرة.. والم.. كيف.. وش بسوي..؟!

ياربي..ألهمني..!!

.......

بلقيس قبل تنام...

جاتها رساله..

افتحتها.. وابتسمت :

يـ اللي ما توجد فـ الصبايا وصوفك

‏زينك هو اللي هازمً نخبة الغيد

‏ويلي على شوفك ولمست كفوفك

‏ومقابلة جيدك يا منتوقة الجيد

‏ماني معدي العيد من غير شوفك

‏لكن وعدنا ثالـــث العيد

.........

.........

اليوم ملكة بلقيس..

ومن امس زينه والجده.. موجودين عشان يشاركون في الحدث هذا..

والجده ام فهد.. جات.. والوضع كان مختصر.. خاصه اغلب الشخصيات من الديره ماحضروا.. زعلانين..

كيف سعود رفض شبيب.. وعطاها لهادي..!!

الجده طبعا ً في حياد.. ولان الجد.. مايقدر يجي صحته.. مش ولابد..

فاجات هي..

وطبعا ً لقاء زينه وام فهد كان يهبل.. بالأحضان وكنهم سنين ماشافوا بعض..

وكانوا متفقين على اللقاء.. في الملكه..!.من خلال مكالماتهم..

بالمغرب..

زينه فوق عند مهره يكشخون بتوتر:هو من رجع من مصر وهو مستلج على مخي.. جوالي كرهني فيه..

يوم العيد.. جا على الباب يطق وصرفه ايوب قال ان حنا بيت خالي فلاح..

مهره حطت الروج على التسريحه وبعصبية:

قايله لك.. خليني اقول لسيف يتفاهم معه.. وانتي ماتبين.. بس خلي اليوم يخلص هالعشاء.. وبقوله عن سوالف هالتسلب ذا..

زينه بقلق:

تكفين مهره.. خلي الامر بيني وبينك.. مسكين سيف ماقصر.. ماهو مجبور فيني هو.. يتمشكل في جاهي..

مهره: عنبوتس انتي من وين تفكرين.. اجل بتظلين يلحق وراك هالخُليت..

زينه بعصبية: مصيره يمل.. وييأس..!

اتصلت بلقيس وردت مهره:ارحبي..

بلقيس: مهره تعالي استشاره في المكياج..

مهره:يلا ثواني..

قفلت وخذت شالها:دقايق.. وبجيك..

طلعت..

اشوي الا جات زينه رساله.. من عبد الاله:.

شفتي تجاهلك وكلابتك والله لاطلعها من اللي خلفوك.. انا بره بيت اختك.. والله وفالتها.. وطلعات.. وتعيد.. وانا اتواكل على نار..

توسعت عيونها.. وقلبها وقع برجولها:

وين بيت اختي.. تستهبل..؟!

قال:مااستهبل.. هذا انا عند بوابة بيت مهره.. بتطلعين تكلميني مثل الأوادم.. ولا والله بدخل بهالرشاش.. واهذك انتي.. واللي حولك..

زينه ركبها تصفق.. صفق..

وسيقانها ماعادت تشيلها..

جاها عمى مفاجئ.. ماتشوف..

شتسوي..

شجابه..

ياربي ذا خبل.. يقتل احد...

يالله لاتقلب فرحة هالناس.. دم وصياح..

الله ياخذك ياعبدالإله.. اخذ عزيز مقتدر..

لبست عباتها وشيلتها.. وطلعت.. وراحت تركض نازله تحت..!

مزنه كانت في الصاله.. نادتها.. وزينه ولاسمعتها.. طلعت وسكرت الباب..

مزنه تنادي.. الكل.. ولا احد حولها.. الكل يتجهز.. قامت تتواكل :

الله يستر وش صاير على هالبنت.. لايكون سامعه شي ولاشي..

زينه طلعت بره ومشت لمن سيارته.. وبانفعال:

انت ماانت صاحي..وش جايبك فيذا..

عبد الاله:

اكلمك ماتردين.. ارسلك وتكشتين..اوصل لبابكم وتصرفوني.. جيت لشغلاتكم بهالرشاش.. وقالت انك هنا..

زينه بانفعال وخايفه احد يشوفهم.. :

الله لايحلك ياعبد الاله.. على هالجنون.. اللي تهده فوق راسي.. عنبوك رايح مروع عايشه.. شاللي تبيه.. تطلقنا.. وطلاق باين..انتهينااااا..

داخل.. نزلت مهره.. وهي تنادي زينه.. شافت مزنه :جده زوين مانزلت..

الجده تقول :جيتي والله جابك.. الزينه نزلت واطلعت تركض ووجهها مايبشر بخير.. وازعق لكم وماحد راد علي..

مهره انخرعت:

ليش طالعه.... بره يمكن جاو رجال....

الجده:وجدتك ماهي بالملحق.. رقت تصلي ومانزلت..

مهره راحت بسرعه.. تغطت بالشال وافتحت الباب.. وتدق على سيف ومايرد.. وزينه ماترد..

شافت يمين يسار.. مافي احد..

الا نواف طالع من المجالس وهو يكلم جوال:

توجه المزرعه.. بنعقد فيذا والعشا هناك.. وحرص على بولافي.. وعزوز..لايخلون يجون..

اشرت له.. واشر بعينه.. :وش فيك..؟!

مهره باصرار بدون صوت تاشر بفمها:تعال بسرعه..

سكر وجاء :وش فيك.. مهره.. وش مطلعك..

مهره بعصبية : زوين اختي طلعت تركض...شافتها جدتي مزنه.. هي ماكانت بتطلع تدري انه بيجون رجال.. بس مادري شفيها.. تكفى نواف.. ...

وتوها بتكمل.. اسمعت صوت عبد الإله.. الحاد بره..

برعب :صووت عبد الاله.. نواف تكفى.. اطلع.. اطلع لزوين.. لايسوي فيها شي..

نواف مانتظر باقي كلامها..

راح يركض..

بره عبدالاله ماسك معصمها..بيد واليد الثانيه رشاش وبانفعال :

تعالي معي.. والله ماخليك.. احبك..ياكلبببببه ماتفهمين..

ومع طلعة نواف.. كان ابو عبد الاله واخوه ينزلون من سياره ثانيه.. وكانوا لاحقينه.. يوم دروا بنيته..

وابوه بصياح:انهبلت.. ياعبيد.. هدها لاتفضحنا..

زينه برعب وتتفلت وهي تبكي:عمي انا فوجهك.. خله يتركني..

نواف وبدون اي مقدمات وقبل لااحد ينتبه لوجوده.. كان طير وجه عبدالاله بلكمة..

فك يد زينه..بعدها..

نواف بحده :ادخلي داخل..

وكمل ضرب فيه.. زينه ماتحركت وهي تبكي.. :

معه سلاح .. انتبببببه..

نواف.. كأنه شيطان تلبسه.. وقت شافها تبكي وتتفلت وهو يسحب فيها..

صاح فيها:قلت لك روحي داااااخل..

عبد الاله.. بغضب وهو يدفع نواف ويضربه :

ومن انت عشان تقولها تدخل ولاتطلع.. زينه اركبي السياره قبل اطشر مخك..

راضي اخوه مسكه.. ودفه:حمااار انت..

نواف بغضب لزينه :ادخلي ماتسمعييين..

توها بتركض داخل..

الا صوت عبد الاله.. رافع ..سلاحه عليها.. :

والله افضيه بقفاك.. اووووقفي...

زينه وقفت.. وكلها ترتعد.. وتوها بتتحرك ترجع.. مع اصوات الاقناع.. من ابوه واخوه يحاولون يهجدونه..

وبس لفت نفسها.. ماشافت الرشاش.. شافت ظهر نواف.. اللي وقف وقال بحزم وخفوت :

تحركي.. مايجيك شي.. وانا هنا..

عبدالاله بصياح:

والله ابتلي فيك.. والله امسحك.من الدنيا..

انتبهت لسلاح اللي رافعه نواف.. واللي كان في حزامه تحت ذراعه.. وقال:

لاتكثر محلوف في شي ٍماانت قده .. ضب نفسك وروح.. الحشيمه لهالشيبه.... ولا والله افضي هالفرد براسك..

زينه اللي مو عارفه تتحرك.. : لاتستفزه تراه خبيييل..

بخفوت من بين اسنانه.. : زينه..ماتسمعين ..

وتوها تحركت.. وجه عبدالاله سلاحه عليها.. وتحرك نواف.. يصده عنها..

وتوه عشق ..

طلعت صوت طلقه..

صرخت زينه وقفلت اذانها..

والكل اللتفت على سيف اللي اطلق رصاصه بالهوا..ووراه فارس..

وتالي وجه سلاحه لعبد الإله.. وبحزم وحده:

زييينه..ادخلي البيت..

انحاشت بسرعه..

سيف بهدوء غاضب:

ارم سلاحك ياعبد الاله..

عبدالإله:وان مارميته..

سيف :

افضي هالفرد فيك.. ودمك هدر.. واطي ارضي وبسلاحك وتتهجم على بناتنا.. والكاميرات ماليات البوابه.. والله يابوعبد الاله.. حتى ديه فولدك.. مادفع..انصحه.. اذا يسمع كلامك..

عبدالاله بلع العافيه.. وخاصه سلاح سيف من جهه وسلاح نواف..

ابوه : يايبه تراك سودت وجهي.. حط هالسلاح..لاتجيب لنا بلاء حنا في غنى عنه..

راضي اسحبه منه..

وعبدالاله ماعارض..

بس قال:طيب.. ابي زينه..

سيف حرك شفته.. وبحزم:

ذا امر منتهين منه.. زينه طلعت من ذمتك.. وانتهى.. يومها بيدك ضيعتها.. تجي اللحين تبيها.. ماعندنا لك شي..

جا سعود.. على صوت الرصاصه ويسئل شالسالفه..

فارس وضح له الوضع..

عبد الاله بنفعال:ما انت وليها.. عشان تحكم وتتكلم في شي يخصها..

سيف :الكلام مع السفيه ضايع ياعبد الاله.. وانت راعي طويله..

سعود :يالربع.. اليوم احنا عندنا مناسبة زواج وقران.. حياكم.. احضروا.. وادحروا ابليس.. ولو عندكم شي تتناقشون فيه.. في المجالس..

وتكلم مع الابو :ياخوك انت الكبير وعلى عينا وراسنا.. تفضلوا حياكم..

عبدالاله يمسح خشمه من الدم :

مابي ادخل لكم بيت..ولاعندي معكم كلام.. اذا زينه ماهو طالعه.. تجي جدتها وانا اتفاهم معها..

نواف تحرك.. بيلطمه..

بس سيف مسك ذراعه وبهدوء:

ياعبدالاله.. تفضل.. المجلس.. وخلونا نحط النقاط على الحروف.. قبل تمشون.. لازم ننهي هالسالفه لأنها مسخت..!!!.

.......

بعد شوي باحد المجالس..

المجموعه اللي كانت بره وزياده عليهم صبحا..

طلعت بعد ماجاتهم.. زينه..

داخل البيت..

و تنفسوا الصعداء.. بعد مادرو ان الاوضاع هجدت.

بالمجلس..

صبحا:يابوراضي.. الحاله ذي ماتسر.. والبنت سمعه.. وطلعت من ذمة ولدك.. اللي سواه سواد وجه.. فشلنا عند نسايبنا.. والله لولا خيط القرابه اللي بينا.. ان كان كلمت الشرطه شالوه..

بوعبد الاله:صلي على النبي ياام غازي وامسحيها بوجهي.. والولد يحبها ويبيها.. وماسواه الا من عشق.. ويقولون الحب عمي.. وانا اخوك..

نواف.. وده قام طحن الابو قبل الولد..

سيف ساكت.. ساكت ويسمع الحوار.. وسعود.. بعد.. معطي الطرفين حق التفاهم..

بره في المجالس الثانيه فارس واقف عند شاهين وهادي.. ويقول السالفه..

شاهين :من وين جاي.. ذا.. من داعش..

فارس :والله يصلح.. ياان شكله.. مجرم.. مجرم..

هادي :يعني ومابغى يسوي تمثلية.. العاشق المتيم.. الا في ملكتي.. زين ماوصل الشيخ كان هج..

شاهين ببتسامة :

هذا كل همك.. ياهادي..؟!

هادي:لايطولونها معه..بيأذن العشاء..

في المجلس :

سيف بعد صمت.. تكلم بهدوء:

طيب وان قلت لك.. ان البنت اليوم ملكتها.. وبتدخل في ذمة هالرجال..

واومئ براسه لنواف..

اللي انلخم.. وانصدم.. بس حافظ على تماسكه وملامحه..

ونفس الشي سعود..

اللي مايدري ليه تصرف سيف كذا..

وصبحا.. كانت بتشخط صوت (وش هوووو.) . بس اسكتت..

وكلهم خلوا الدفه يديرها سيف.. رفع حاجبه وبهدوء يكمل.. ووجه عبدالاله.. طلع فيه كل انفعال :

اليوم عندنا ملكتين اختي على هادي.. وملكة نواف.. على الزينه.. واللي انا عارفه ان طلاقك لها طلاق حرمها عليك.. ماتقدر تعقد عليها.. ابد.. الا لمن احد يحللها..

عبدالاله قام مثل الثور الهايج.. امسكوه ابوه واخوه:ماااهوووو كيفكم.. اذبحها.. ومايخوذها غيري...

صبحا قمطت خاصه شايفه الرشاش ع الطاوله.. راحت بتسرع تقول :يحللهاااااااا... الله يهديك اقعد.. اقعد.. يحللها..

عبدالاله ينوفخ.. واللتفت على صبحا وكنه ينتظر توضيح..

وصبحا ماعندها ماعند جدتي غير انها قالت هالكلمه خوفاً من الاسلحه.. اللي متسلحين فيها عيال سعود عشان عرس بنتهم.. والرشاش اللي شطوله على الطاوله..

نواف خرج عن صمته.. قال بستياء:

احللهاااااااا..؟!!!!.. ليش وانا تيس مستعار.. عيب ياجده.. مايخوفك وتقعدين تقطين خيط وخيط واحنا اشناب نذري عنك..

ورفع راسه لعبدالاله.. وقال:

البنت طلعت من ذمتك.. وبتدخل في ذمتي.. بتصير حليلتي.. وشعرة بوجهي.. وخط احمر.. ان تعديته.. بيني وبينك هالسلاح..

وحط المسدس على الطاوله..

سيف صدمه نواف..

على قوة الرد..

وسعود متنومس..

قال:وانا اقول.. اقعدو شاركونا.. والزواج قسمه ونصيب يابوراضي..!.

*******

داخل.. زينه ترعد.. ولاصقه في الجده..وذيك تسمي عليها..

موضي تشربها ماي : زينه امي.. خلاص.. ماهنا الا الخير..

زينه واسنانها تتصافق:مافيني شي.. تكفون لاتحس بلقيس بحاجه ثم تتكدر.. ونعكر جوها..

موضي:هي فوق ماهو حولنا.. لاتحاتينها.. انتي سمي بالرحمن.. والحمدلله.. اللي الله سلم الجميع..

مهره تهاوشها:

زيوون انتي بقره.. شمطلعك له.. لو ذابحك.. ولاهاج ابك..

زينه تبكي.. :ورب الكعبه هددني.. يدخل فيذا ويسوي سالفه.. ياربي انا شجابني.. ليتني ماجيت..

مزنه ماسكه كفها:

يابنتي.. حصل خير..ويمكنها خيره.. يتفاهمون معه كود يهون عنتس.. ويخلي هالعلوم الشينه..

موضي.. :قومي اللحين.. ترتبي.. وعدلي مكياجك ومالك الا اللي يسرك..

مهره كانت تطالع من النافذه.. تنتظر وش بيصير.. الا قالت:

وصلت خالتي ام هادي والبنات..

زينه بسرعه قامت.. :

انا بروح هناك.. ارتب نفسي واجي.. تكفون لااحد يحس بشي..

واختفت في احد الغرف..

موضي تأثرت:ياعميري.. هالزينه.. حسبي الله على من رعبها تسذا..!!!

****بعد اشوي.. كانوا بالصاله..

لما نادا فارس :مهره..!!.

قامت راحت له..وعند الباب.. :ها فارس.. وش صار ..؟!

فارس:يقولك ابوي.. ادخلي انتي وزينه غرفة النساء وافتحي له الباب..

مهره بقلق:وش صاير..

فارس هز كتوفه.. :مادري.. علمي علمك..

بره وفي جهه في الحديقه.. سيف ونواف..

سيف:نواف ذا القرار مافيه رجعه.. ماجا في بالي الا انت.. ماهو بعدين تقطها براسي..تبي نأجل الملكة واشوف مخرج..

نواف بحزم وحمية:الليله نملك.. لايمشي ابو راضي الا حاضر.. ونقطع هالعرق ونسيح دمه..

ابتسم سيف :كفووو.. كفو يالعشير..

جا فارس :مهره وزينه.. باحجرة النسا..

سيف:انا اروح واتكلم معها والله يكتب اللي فيه الخير..

اختفى سيف.. عنهم وفارس توسعت عيونه.. :

وووجع نواف.. ووجع.. والله وجاك يامهنا على ماتتمنى.. يالساحر..

نواف قلبه يرقع.. وقام يتحرك بتوتر وعصبيه.. :

عساها بس توافق.. والله.. يافارس كل مافيني يرعد من الحماس..

فارس:ومسوي فيها التضحيه.. وطاق الصدر وانت بتمووووووت..

....

بعد اشوي..

وبعد ماقال سيف اللي حصل لزينه ومهره..

زينه بصدمة:

لا يابو فارس.. اعفيني.. بيض الله وجهك انت واخوك وابوك.. بس ماهو حل.. لا انا ناويه اتزوج بعد تجربتي.. ولااخوك مجبور.. ياخذ مطلقه بأول فاله..

مهره بعصبية:سيف وش فيك.. ترى ماهو حل.. وضعي انا وانت مختلف.. عن نواف وزينه.. الزواج ماهو حل لكل عقده..

زفر سيف.. :مهره خليني اتفاهم مع زينه.. اطلعي منها..

مهره بانفعال:

سيف.. ماحنا موضع تجربه ياتصيب.. ياتخيب.. نواف.. ماتزوج قبل.. ومتشرط وعال قلب امي على العرس.. تجي في قعده.. ترمي اختي عليه.. مايصلح..وماهو نلعب حذف احصي ابها تلقف ماتلقف..

سيف بنفاذ صبر وحده :

مهره.. انا اشوف شي انتي ماتشوفينه.. زينه انتي ماتبين الخلاص من عبد الاله هذا هو الحل.. هو قاعد يتبجح وباليك لأن شايف ان مالك ظهر..

زينه بعصبيه :

انا ماتزوج بدق الصدور ياسيف.. اخوك له حق يختار وينصى اللي يبيها.. انا اطلع لعبد الاله واتفاهم معه..

سيف بهدوء.. يحاول يقنعها:

زينه وانا اخوك لاطولينها.. وهي قصيره.. انا كفيلك.. ان ضرك هالعرس.. انا اللي احله..

زينه :ماني برجا زواج يابوفارس.. والله ضاقت فيني.. ولاهقيت رجال في الدنيا يبل الريق.. عبدالاله كرهني.. بالزواج وطاريه..

سيف :نواف غير.. وانا اضمنه..

زينه:والله اللي تلدغه الحيه.. يخاف من جرة الحبل.. يابوفارس..

انتهت من جملتها.. وانصدمت بعقال سيف في حضنها.. رماه وقال:

طلبتك يازينه.. طالبك قولي تم ولاتكثرين الهرج.. قولي تم وماجاك عندي..!!.

وارتجفت كفوفها.. وقلبها يخفق بقووه.. وعينها على عقاله.. سيف وقف وقفات معها ماحد وقفها.. واخرها.. وقفته قدام عبدالاله.. من شوي.. هو واخوه..

من فترة وهي شعورها بسيف انه اخوها الكبير.. اللي ماجابته امها..

حست بضائلة لو ترد طلبته..

بخفوت :

تم يابوفارس.. تم ولااردك....

............

تمت ملكة هادي وبلقيس..

وكما هو مخطط.. العايلتين بس في البيت.. بعدها حفلة الشبكه والعشاء بالمزرعه..!

داخل ارتفعت اصوات الزغاريد..

وهم يضمون بلقيس ويبوسونها..

وهي تحس نفسها بحلم..

وماهي مصدقه..

زينه اللي كانت في حالة شرود وقلبها يرقع.. يرقع..

مع كل هالفعاليات والتبريكات..

والامور اللي صارت وقالها لهم سيف.. ماحد يدري فيها لسى..!

الا الرجال وهم..

ضمت بلقيس.. :الله يوفقك ياروحها.. ياجعلها زواجة العمر والدهر..

بلقيس تمسكت في يدينها:

عقبالك ياقلبي.. فالك اللي يستاهلك ويقدرك.. ياربي نفرح فيك قريب..

ابتسمت زينه.. وراحت ابتسامتها..

وهي تنسحب من كفوف بلقيس.. وتنسل.. مثل خيط الصوف من الشال..

تاركه المجال للباقين..

راحت انكمشت.. وتحاول تتوازن..!!

هادي بعد ماتلقى تبريكات الرجال.. نواف خذه.. : حظوظ.. هاللحين.. انا اصير ظل ليلتك.. وانت اللي تقوم بكل الأدوار..

ضحك هادي:

وش رادك عاد.. سوو فعاليات.. تونا..

نواف:يابن الحلال.. ماينفع..البنت تبي كذا..

دخلوا من باب.. على موزع..

نواف:بلقيس..!!

جاهم صوتها:هلااا..

هادي وقلبه يخفق مع (الهلاا) ..

نواف:حولك احد..؟!

بلقيس:لاا.. الحالي..

هادي بخفوت:نواف تكفى.. ابي ادخل الحالي.. ممكن..

رفع حواجبه وبشطانه: لاااه.. وانا اطالع.. وانقهر..

هادي: تكفى..!

نواف بنص عيون: مااشي.. ولاطولونها.. بنحرك للمزرعه..

هادي ببتسامة:على هالخشم..

طلع نواف.. هادي عدل شماغه.. قدام المرايا الكبيره.. ثواني يحاول يسيطر على نفسه.. بعدها تنحنح.. برجولة.. اربشت بلقيس..

وهو يخطوو داخل الغرفة..!

*الا تحطم سنين العشق والهيام.. هذا الخجل.. اللذي كسر عيناها للأرض.. حين رأتني.. ثم رفعتهم من جديد لي..

لطالما صبرت نفسي بتلك العينان.. وكبر عشقي من خلالهم..

تأملت بلقيس..

وهي لي..

شرعا ً..

حلالاً..

بدون حاجز ولاستار.. ولاخمار..

تقدمت خطوة نحوها.. وعيناها ظلت في عيني.. كنا قد اذهبنا المقدمات.. ونضجنا.. ومابيننا اكبر الان من بضع كلمات..تقال لاذهاب الخجل.. وطرد الحياء الأولي..!

انا الآن لايطفئ نار قلبي.. الا ان اضم بلقيس بقوه لأضلاعي..

وقد فعلت..!..

كنت اتبارى مع عقلي.. ان هذا اليوم لن يأتي.. كنت في قناعة من صعوبة الوصول..

كان احتضان بلقيس.. امنية صعبة المنال.. انا اججت صعوبتها بأفكاري.. وقناعاتي..

اما وهي بين ضلوعي.. الآن..

كيف كنت سأفرط بها..!!! *

بلقيس

غمضت عيونها.. وهي تتشبث بثوبه من ظهره..

*الطريق اللذي امتلئ بالأشواك.. وقد مشيته حافية..

التشبث بهادي كان مثل

التشبث في حزام ناسف..!!

التمسك.. والايمان به..

رغم الابواب المقفلة..

اليوم انتصاري..العظيم..

اليوم كسبت رهان قلبي عليه..

كان قلبي يتشبث به.. رغم قناعاته العقيمه..!.

حتى لو ابي كسر مخاوفه بإقدامه..

في النهاية..

كان هادي يلزمه قوة الاقدام..وابي كان خير داعم..

عناقنا الصامت كان به كلام ابلغ من كل لفظ وحرف *

*******

❤️

انتهى اليوم.. بطوله واحداثه..

رجعوا من المزرعه.. وزينه كان حيل ودها ترجع.. مزرعتهم.. بس الوقت متأخر..

والكل تعبان..!

في غرفة سيف..

مهره كانت ساكته.. شالت العقد والحلق..

وواقفه تفك البنسات من شعرها..

وسيف يراقبها بشبح ابتسامة..

وهي زعلانه..!

قبل يمشون للمزرعه.. وبعد حواره مع زينه.. صعد غرفتهم فوق.. وهي لحقته.. وبعصبية:

سيف بلا جنون.. الزواج ماهو لعبه.. وزينه ماهو برجا طلاق ثاني يقفل حضها..

سيف راح فتح خزنة.. ويطلع اوراق فيها توكيل زينه له اللي سوته وقت مسئلة طلاقها.. وكان مُطلق.. فيه انه يقدر يزوجها..

مهره.. تتحلطم.. وتلوب..

وسيف يحاول يركز.. يقرى التوكيل مضبوط.. لأن كلم الشيخ وقاله ممكن..

مهره بعصبية:انت ملاحظ انهم حتى ماخذوا تحاليل.. مايعقدون الا به..

سيف:الشيخ.. من ربع ابوي.. وقال بيسوي العقد.. ويضيف نتيجة التحاليل.. قبل توثيقه بالمحكمه..

مهره بعصبيه:وكل شي له حل عندك.. سيف كيف تقترح هالاقتراح.. نواف ماتزوج من قبل.. وبكره يشوف زينه بنقص..

سيف يطلع مبلغ ويرتبه فوق بعض :

والله على كلامك.. زينه ماسبق لها الزواج الا بالورق.. ولاانا غلطان..

توسعت عيونها.. وصاحت:

نواف مايدري عن هالشي..

قال:بالعكس.. هذا يدل ان الولد شاريها باللي هي فيه..

صاحت:وش شاريها.. ماهو انت اللي تكلمت.. وجبرته فيها..

سيف يروح عند التسريحه وياخذ صندوق فخم فيه زخارف .. بوسطه مسابيح.. كبهم.. وحط الفلوس.. ورفعه.. :

مهر زينه..

مده لها :استلمتوا..؟!

مهره مصدومه منه.. ومن اذنه اللي مقفلها عن اي شي تقوله..

راح رفع يدينها وحط الصندوق بيدها :

استلمتوا... ايه استلمتوا.. انا نازل.. لان طلعت صلاة العشاء.. وبيبدون الملكه..

وخلاها ونزل..!

***كمل مراقبه لها.. وهي تمشط شعرها.. وترفعه بمشبك.. بدون تطالعه..

راح قال : مهرتي.. وراه ماتعطين وجه..

ماردت..

سيف:ورب الكعبه.. ان ذا الشي سويته.. وترى مقتنع ان نواف بيحب زينه وهي بتحبه..

مهره عطته نظرة صامته بحاجب مرفوع..

ضحك : لاتناظريني كذا.. يعني جد مهره وش جاب نواف لعبدالإله..فرق السما عن الارض.. وبعدين لعلمك نواف حده متحمس.. ومبسوط.. والله لدرجة انا استغربت..

مهره.. ظلت ساكته..

سيف تكلم:

يعني هي جات كذا.. والخيره فيما اختارها الله.. ماتدرين.. هالاثنين مكتوبين لبعض.. والله حطني سبب في طريقهم.. والله اللي اللهمني اقول هالكلام..

مهره عضت شفتها.. وكلام سيف منطقي.. قالت بخفوت ورجفه:

بس خايفه نكون ضغطنا على زينه.. وهي تاكلها..

سيف مد يده لها.. وجات جنبه.. خذها بذراعه وباس جبينها:

ورويسك مايجي لزينه مضره.. انتي بس لاتضيقين صدرك.. وروحي شوفيها.. وشوفي خاطرها.. وعطيها من الكلام الزين..

مهره :طيب وامي وجدتي مزنه.. الى الان مايدرون..

سيف:من اصبح أفلح.. بكره.. نفتح لهم الموضوع..

مهره:بيعترضون.. لان نواف ماعرس قبل وزينه مطلقه..

سيف:ليش انتي تسبقين الأحداث..!. امي وجدتي يحبون زينه.. ويشرقون بطاريها واسمها.. واذا اطلقت.. ذا شي مايعيبها..

مهره.. تنهدت:طيب.. انا بروح اشوفها..

راحت بدلت سريع.. وتوها بتنزل.. نادها :

شيلي مهرها عطيه اياه.. وقولي لها.. حقك مابعد جاك..

مهره شعورها متلخبط.. ماتدري تتفائل ولاتخاف.. تتكدر ولاتفرح..

شالت الصندوق.. وطلعت من الغرفه..!

*******

نواف هذيك اليله.. مو مصدق..

كيف صارت..

كيف استوت..

معقول الواحد ينام ويصحى بيوم.. ومايدري ان بذا اليوم بيتزوج..

وان البنت اللي ماخذه عقله وقلبه من شهور..

فجأه تصير حرمته وحلاله..

طيب يبي يشوفها..

يبي يلتقيها..

يبي يتكلم معها..

بدون مايكون يطلطل بالخفا..

ولا انه يتصيد الصدف..

كان ينشف شعره بعد ماسبح..

راح دق على سيف..

رد عليه:

وانت مانمت..؟!

نواف بتوتر:

سيف عاد مثل ماحطيتني بذا الموقف.. ضبطني..

سيف بهدوء:

يعني..؟!

نواف بطفاقه:

ابي اشوفها.. هادي.. لصق ببلقيس.. بالبيت والمزرعه.. زين ماشالها بيتهم.. وانا قاعد.. حتى رقم جوالها ماعرفه..

سيف:

ماشاء الله.. وانت ليش مستعجل على كل ذا.. عساس.. العرس شي انت ماتبيه وماهو عامل حسابه.. والبنت مو مستعده نفسيا ً.. ولاتنسى امك ماقلنا لها شي لهالحين..

نواف بعصبيه :

طيب وصار واعرست.. لازم اقل شي.. اشوفها.. وامي بكره بنقول لها.. تكفى.. قل لمهره ترتب لي الوضع..

سيف:

مهره تحت عندها.. واعقل.. وادحر ابليس.. ماهو وقته.. حبه حبه.. لأن زينه شايفه انه زواج وقتي.. ومارضت الا مثل ماقلت لك اني ضغطت عليها بطلبتي..

نواف:

طيب ابي رقم جوالها..

سيف برواقه:

رقمها ذا.. بنلقيه.. عشان مايدقدق عليها.. ذاك الخبيل.. شريحتها عندي..

نواف بانفعال:

هين ياسيف.. اواريك..

وراح قفل في وجهه..

سيف رفع حواجبه ويطالع الجوال وضحك :

وش فيه.. خفيف.. هالحين مايبي العرس.. وراه طار بالعجه..

......

في الصباح..

نواف صحى وبدل وجالس يتبخبخ عطر.. لما فتح عليه سيف الباب..

ابتسم:

والله ريحة العطور.. ماليه الممر..

نواف كان عليه ثوب وحاسر.. :

سيف لاتقعد تحجر علي.. ها قلت لمهره.. ترتبني مع الزينه..

سيف رفع حاجب.. :

الزينه.. ها..؟!

نواف ياخذ مسباح..

وسيف قاله:اهجد.. ترى البنت وصلت بيتهم..

توسعت عيون نواف وبقهر:

من جدك..؟!. تمزح سيف..

سيف بهدوء:

لاوالله مامزح.. حتى مهره معهم.. البنت ضج عليها المكان ومحتاسه بعمرها ومن اللي صار.. وراحت..

نواف بانفعال:

وانا ماشفتها.. ولاعندي خبر.. سيف اوك.. انا مشيت على اللي تبيه.. بس شوية احترام يا اخي..

سيف مستغرب.. وفي نفس الوقت مستمتع:

اقصر الهرج.. امي وامي مزنه تحت.. بدل ماتراهق.. تبي تشوف شكل حرمتك.. تعال ننزل ونفاتحها بالموضوع..

وطلع وسكر الباب..

ونواف يتواكل..!

******

في مزرعة صبحا..

وبعد مكالمة من سندس..

هزئتهم ولعنتهم.. على هالفعله..

والحين الجوال عند الجده..

سندس:والله ياجديدة.. تستاهلين جائزة نوبل.. لهالزواجات الخرائية.. لزيون ومهير..

صبحا:يابنت انتي قل حياك مرتن وحده.. شيلي نعولتس وتعالي حذفيهم علي..

سندس:رايحه تباركين ملكت بنتهم.. وعطيتيهم بنتنا.. جده وش فيتس.. وشنوحك تمترين هاشمي..

صبحا:

عاد انا هالزواجه.. لالي ناقة فيها ولاجمل.. سيف اقنعها وهي اللي قالت تم.. ويا امك.. زوين.. دامها تطلقت من وجه الحصني ذاك.. يبي لها رجال وظهر.. مهبووول ياامك.. جاين بسلاحوه.. يرعد ويبرق.. زين ماقلب هاك العرس عزا..

سندس بغضب :تجي الشرطه وتشيلوه.. ماهو تروح تعرس لاخطبوها.. ولا نصوها.. بس سيف قاله.. تقولون تم..

مهره :جديده.. خلاص قفلي.. سندس بترفع ضغطك.. ولاراح تقتنع..

سندس اسمعتها:

والله كله منك يالسوسه.. سويتيها قبلها.. بس يوم الله وفقتس.. مع بعلتس.. ماهو شرط تضبط.. مع طايحة الحظ زوين..

زينه انهارت نفسيا ً.. وهي تسمع.. ولاهي قادره تتكلم..

عيونها تجمر وتجمر.. والغصه.. تخنقها..

لمن بعدين انهارت وقامت تبكي..

وراحت فرت بالمزرعه..

صبحا:مهره يمه.. الحقيها.. لاتسوي في نفسها شي..

وقالت تكلم سندس:وانتي روحي لعيالتس.. وقولي خير ولاسكتي..

وقفلت الجوال.. ورمته على المساند..

وزفرت:

ياقرادة حضتس ياصبحا.. اجل هذا خطبه وملكة.. حتى الهنود اللي يعبدون البقر ماسووها..!!!.

*******

في صالة بيت سعود..

سيف ونواف..

كانوا يشروحون اللي حصل..

وناوين على التدريج.. في الطامه..

يعني.. وصلوا لموضوع ان نواف بيتزوجها.. وان سيف.. حطهم بالموقف ذا قدام الرجال..

وكانت ردة فعل موضي الغضب.. والاعتراض..

نواف بمحاولة اقناع:

يمه ابي ارضاك.. هماك كنتي تلحين تبين اعرس..ويوم عزمت تزعلين..

موضي بانفعال:

عاد كذا ياولد سعود.. تاخذ مطلقه وتكون اول بختك..

الجده مزنه: ولدك ماهو احسن من النبي.. ياموضي.. ماخذ الا عايشه بكر..

موضي بصد وعصبية: عليه الصلاة والسلام..لااحنا نوصل مواصيل النبي يمه.. ولا مطلقاتنا صحابيات..!

بلقيس :يمه.. ترى انتي اكثر وحده كنتي دايخه على زينه.. من شفتيها بخطبتنا لمهره ولاتنكرين..

موضي بانفعال:

مانقد على البنت بشي.. الله يشهد.. انها زينة خلق واخلاق.. وان شاء الله تاخذ اللي يستاهلها.. بس عاد.. ماهو نواف..

سيف بتهكم:والله يايمه.. انك تترفعين على النعمه.. ترى بنات غازي.. الله سافطهم بطيب اصل..متربيات صح وصابرات..ان رضت فيه زينه.. هذا والله من دعواتك له انه الله يرزقه ببنت حلال..

موضي بنص عيون:

انت خذت مهره لانها ارملة اخوك.. وماكانت اول بختك.. واطلع منها ياسيف.. تراك اللي زرعت هالفكره براس اخوك وشوشته..

نواف بحده : ماني امعه يمه.. سيف يشوشني.. انا اللي ابيها..

سيف :وبعدين انتي وش هولا معقدة الامور.. ترى احنا اللي وهقنا زينه.. بموضوع هالخطبه وقلنا كلمة رجال.. في ذاك الوضع.. زينه ماتبي العرس فايحه كبدها من ذاك العوج.. فترة ماجاز لهم الوضع.. مثل مالله شرع الزواج حل الطلاق..

موضي توسعت عيونها:وانتوا تلعبووون ياعيال سعود.. هو الزواج والطلاق عندكم لعبه.. من انت عشان تاخذ البنت وتعرضها لطلاق ثاني..

الجده مزنه : والله ياولدي يانواف لو ذقت هالزينه.. بتحرم عليك بنات حوا بعدها..الصدر عامر والبطن ضامر.. والجيد يالله من فضلك..

شقة عينها مثل الغزال.. والخد اسيل ياامك.. والشعر ليل.. البنت خذت اسمها يانواف زينه وخذت الزين كله..

نواف بنص عيون : اشكرك ياجده على الشفافية.. ماكنك بالغتي في الوصف.. ترى سيف قاعد..

موضي بانهيار : وانت هنااا.. وهي حلت عليك.. وصارت لك.. شفيكم انتوا استخفيتوا..

الجده ضحكت ولاعليها من موضي :

ياخلف جدي يانواف غيران على حرمتك.. وانا وش علي من سيف وهو ماخذ اختها..وماتقل عن الزينه بشي.. بس مهره خذت الشقار.. وخلت لزينه سواد العين والشعر.. الشهاده لله..بنات هالغازي ماخلن للبنات من الزين شي..

موضي بعصبية :

يمه تكفين لاتقعدين تدخلينها براسه.. عنبوكم انتوا على قول سلمى آلدكم.. وتلقفكم الشياطين.. كل واحد شاطح شطحة ابليس.. حتى انت يالعاقل.. بعد الحنه على هالعرس والصبر.. تروح تعرس بدق صدور وحكي مجالس..

سعود كان جالس.. ويقرى اخبار.. في الجوال وملتزم الصمت.. لأن سيف قال لازم نمهد..

رفع عينه ونظارة القراءه على خشمه:

وانتي وش معارضه هالعاقل فيه يامويضي..

موضي بانفعال:

وانت عاجبك.. ياخذ مطلقه.. باول فاله.. ماظل بنت..ماتحاليت عليها وابي اخطبها له.. في النهاية.. تسذا..

سعود شال النظاره:

عيب ياموضي.. عندك ثنتين.. والدواير تدور.. والله.. لو تلفين البيوت.. من اعالي الحمايل.. مالقيتي لعيالك مثل بنات غازي..وقبلها مهره.. ولاتنكرين انها سوت لسيف.. اللي ماحد سواه..

موضي تحاول تتمسك في موقفها :

انا ماهوو راضيه على هالعرس.. لو تحط رجل بالسما يانواف ورجل بالارض.. ماني راضيه..

نواف بانفعال وعصبية:

والله عاد يايمه ذا شي.. احنا قضينا منه وخلصنا.. واذا يهمك امري.. تتقبلينه.. وترضين فيه..

موضي:شلون يعني يانواف.. بتعصي امك.. عشان كلمة قالها اخوك..

نواف وهو يوقف :

لااا يمه.. لأن الوضع اللي صار امس.. كله رتب له القدر.. البنت لعلمك في بالي.. ومن شهور.. لاسيف يدري.. ولاهي.. وانا والله ابي الفرصه وازمتها تفك واخطبها..

سيف طالعه بدهشه.. ويفكر.. انه بس اقناع لأمه..

نواف بنفس الانفعال:

لاطالعني كذا سيف..ورب الكعبه.. هي البنت اللي بخاطري.. وودي بها.. لمحتها بمزرعتهم يوم خذت سيف هاك الليوم وانتوا مسافرين.. ومن يومها وهي ماخذتن عقلي.. وكلكم تطرونها.. وتمدحونها.. كبرت بقلبي.. وماغير اسمع ان هاك الكلب عقدها من العرس.. ويوم والله تيسرت.. وهالذيب سنع لي الامور.. لاتقفلينها بوجهي يمه تكفين..

موضي وكلهم يطالعونه بصدمة..

موضي بانفعال :وانت بنيت حب وخرابيط من لمحه.. وين الثقل والعقل..؟!!

نواف بعصبية:طارن.. مع هالعنقا عاد.. ولا نطولها يمه.. ترى امس عقدت على زينه.. وصارت زوجتي.. وحليلتي.. على سنة الله ورسوله..

موضي رفعت كفوفها على راسها.. :عليكم الله واكبر.. عليكم الله واكبر.. وجاي الحين تبي الرضا..

نواف:ماخذت انا وحده من الشارع.. ولاخذت قليلة اصل ودين.. عشان ماترضين.. خذت وحده لو حطت في مويه عكره صفتها..

مزنه.. بتبهور:

الله عليكم.. تعقدون عليها.. لاباركنا لها ولا قمنا لها بواجب .. تجي تحضر حفلة بلقيس حاله من حال المعازيم..

سيف :هي مارضت.. قبلت بالملكة.. بعد طلبتي والله ياجده رميت عقالي عشان ترضى.. وبعدها.. قالت لااحد يدري اليوم.. ان كان الناس بتعترض.. مابي اخرب ليلة بلقيس.. وان كان الناس بترضى.. ماتقاسم ليلتها معها.. هي ماتبي شي يشوش خطوبة بلقيس..

سعود:ان اشهد.. انها تربية شيوخ..

موضي.. وقدام كل هالكلام والاعترافات.. مالقت شي تقوله.. تركتهم وصعدت فوق..!

فارس نازل.. وشكله توه صاحي.. :

وول وش فيها امي *** معها..؟!. قلتوا لها..

بلقيس:وماشااء الله حتى انت تدري.. معلمينك الدرس..ماقلت شي..

فارس جاء سلم على ابوه وجلس جنبه :

انا اللي ادري عن كل شارده ووارده.. حتى ادري ان نواف يبيها قبل الفلم الهندي حق البارح..

سيف صقعه على راسه من ورى:

وساكت ياكلب..!

نواف :وتكلم.... لو انا ماقلت لهم.. والله لااطحنك واجيبك لابوك بسحلة..