جمان :بيجي وبيجيب شاهين.. وبيسعى يصالحنا.. وانا والله مابعد الحب اللي في راسي انطحن.. مابعد رضيت ياهادي..

هادي بعصبية:وعمرك ماراح ترضين.. تصدقين.. طيعي خيك وروحي تعالجي.. البلااا اللي فيك ماهو زعل وشيلة خاطر.. انتي شكلك نفستي.. وقريب تجنين..

جمان :شكرا ً على هالكلام الجارح.. ماهقيتها منك تعايرني ياهادي.. وانا اللي عريت جروحي عندك..

هادي بانفعال:سايرتك.. ودعمتك.. بس بناتك ياجمان.. بعيونهم غصه تذبح..

جمان تتهرب:فهد يبكي بقفل..

وسكرت..

هادي تعب من جمان وعنادها.. ومهددته لو نكبها وقال شي.. بتغير مكانها حتى هو مايدري وين تروح..

فاتح صفحة الاسماء.. وصبعه على اسم شاهين.. متردد..

ومشكلته.. الوعد والحلف..

جمان ما أمنته الا انها عارفه.. الامانه اللي عنده.. وانه مستحيل ينكبها..!

رمى الجوال ع الطاوله: اف جمان.. اف..!

*****

دخل مشاري غرفة سما..

تكتف.. ويراقب البوكسات.. والالعاب.. والغرفه.. اللي جهزت فيها جهه لسيف.. وواقفه على كرسي تعلق فريمات طفولية..

مع نزولها من الكرسي.. انتبهت له.. ببتسامه وحماس:

وش رايك مشاري.. حلو مكان الفريمات كذا..

ابتسم..

وهو يدخل..:

حلوه بس لو فيها صور احلى..

قالت:

لمن يجي عندي سيف.. وبسوي لنا صور سوا.. واحطها فيهم

مشاري.. موجعه قلبه على حماسها..

وخايف من النكسه اللي ممكن تصير لها.. لو مر الوقت اللي متفقين عليه.. ورجعوا سيف..

مسك كتوفها:

سما حبيبي.. بس لازم يكون عندك تقبل.. سيف ماراح يكون زي ماتبين.. يعني يمكن يعذبك.. لانو متعلق باهله..

ارتبكت.. واسحبت نفسها من يدينه.. :

انا بعلقه فيني.. انا امه.. بيحبني على طول وبتشوف.. اصلا ً احنا نحب بعض.. ولانسيت..

ليان جات وهي تنادي مشاري.. قال:

تعالي انا هنا..

دخلت.. وارتفعت حواجبها.. :

اففف يالحماس.. وش سويتي.. حسيت اني داخله بفرع لماماز باباز..

سما تشيل العلب.. :

ايه كلها تجهيزات عشان ولدي حبيبي..

ليان مدت شفتها.. وتوها بتعلق..

مشاري مسك ذراعها :

وش فيك تنادين..!

عطته اوراق.. :

هذي اوراق عطاني اياها ماجد.. من ابوه.. وصلها لابوي.. اذا بتشوفه..

خذها وطلع: تمام..

تلفتت ليان حولها.. وطاحت عينها.. على الملابس.. والماركات..

سما متسوقه.. حق امير صغير..

كل فلوسها حطتها بهالتجهيزات..

لسيف اللي مابعد جاا عندها.. شالت بدلة رسمية.. وشافت السعر:

سما لاتبالغين..

خذتها منها:حبيت اشوفها على سيف..

ليان وكاسره خاطرها سما:

اوك.. بس يمكن يتضايق.. مع الجاكت.. هذا قصدي.. خاصه صيف..

سما:

البدلة صيفية.. بس خذتها.. حق مناسبة او شي.

ليان تنهدت.. وابتسمت..:

والله حتى انا تحمست.. لولدك..

سما بحماس:

جد ليان..؟!

بحنية:

ايه جد.. ترى انا خالته.. ولاانتي نسيتي..!

ضمتها سما:

يارب يجي وننبسط معه..

******

زينه بعد ماتروشت ولبست جلست في الصاله.. وهم بره..!

تحججت داخل نفسها.. ان سيف بره..

ومهره مسوية فطور ..يفطرون..

فظلت تطقطق بالجوال على النت..!.

انفتح الباب.. وكان وراها مو بنطاق رؤيتها.. فكرتها عايشه..

مرتخية على الكنب ورافعه رجولها على الطاوله اللي قدامها...

نواف.. انتظرها تنتبه له.. ويوم مالتفتت.. قال :

قومي البسي عباتك بنطلع اشوي..

استعدلت بسرعة والتفتت :

هاا.. وش.. نطلع.. وين.. جدتي ماترضى..

رفع حاجب:

جدتك راضيه سئلتها قبل اجيك..

زينه تضب شعرها بربطه:

طيب ليش نطلع..

نواف: بنشري خبز من البقاله..

زينه بغباء: اما خلص.. تونا شارين.. لحظه اشوف الفريز..

وتوها بتروح.. :

تعالي.. بنت.. امزح..

زينه واصلا مربكها وجوده:

الله يهديك..

ورجعت بتقعد..

قال لها: قومي البسي عبايتك.. والله بطلع معك شوي..

طالعته بتردد..

سحبها قومها :

وش فيك مبلمه.. يلا..

بعد شوي..

طلعت.. وكان نواف ينتظرها جنب سيارته.. فتح لها الباب..

وزينه.. طالعته.. بعدين ركبت وسكر..

توترت اعصابها..

وعقلها يقارن ويقارن..

جا جنبها..

قال:نورتي سيارتنا يالزينه..

ابلعت ريقها :

نورك..

ابتسم وحرك.. ماعلق على نقابها.. ماقال غطي عيونك.. ماقال لها موشح ان ستر الحرمه بعباة الراس..

فتح جواله وحطه على اليوتيوب وعطاها اياه :

اطربينا على ذوقك.. الجوال مشبوك على مسجل السياره..

زينه:لاا.. ماعليش..مافي شي جاي في بالي..

زينه في بالها.. (لااوفر.. وبيعطيني جواله وهو مفتوح.. تعال ياعبد الاله يابو رموز وقفول)..

نواف :تسمعين لخالد عبد الرحمن..

زينه:ومن مايسمع لمخاوي الليل..

نواف شغل (رعش قلبي)..

وكل شوي يختلس النظر لعيونها.. اللي تطالع كل شي الا اهو.. كيف مبين خجلانه منه..

قصر الصوت :

قولي لي.. وش ودك نسوي عرس كبير.. ولامختصر.. ولا ودك نسافر..

زينه:عرس..!!. من جدك..

نواف:ايه.. وكل شي خاطرك فيه يصير..

زينه: خلينا مانسبق الاحداث.. يعني يمكن مانكمل وكذا..

رفع حاجب:مانكمل..!.. كيف.. يعني.. زينه لايكون انتي مفكره بعد ماصرتي لي بطلقك..

مربكها حماس نواف.. ومستغربه..!

ولاتبي تكون سلبيه معه..

يعني حتى مربكها ان امه مادرت الا بعدين..واللي صار بينهم اتصال وباركت ورحبت.. بس يمكن.. ماهي راضيه..

اكيد ماترضى..

ولدها.. ماتزوج قبل.. وزين وعلم ومركز..

وياخذني انا مطلقه..

قطع صمتها:

زينه..!

التفتت عليه بسرعه :ارحب..

نواف التفت عليها.. ياخي.. وش ذا.. وش هالشعور..

هو اللي ارتبك هالمره.. وتنحنح.. :

لابس.. قلت..نتخطى التفكير بالحفل.. ونخطط على شهر العسل.. وش تحبين.. اوروبا.. ولاشرق اسيا..

زينه لااا.. لاا..اوروبا مره وحده..وعبدالإله.. خذني جده في عز الحر والرطوبة..وظل يعشمني بيوديني مصر.. وتطلقنا قبل نروحها..

اطلقت ضحكه صافيه..

ونواف مستمتع بمد متسائل.. :اييييييه..!

زينه:فاجآتني صراحه بالشطحه..

نواف:ليه..؟!

زينه:طبعا ً نواف.. اهنيك على مواكبة الحدث.. وانك معطي جو.. للوضع الغريب اللي احنا فيه.. وفوقه تتكلم عن شهر عسل مخملي.. اوروبا اجل..؟!!

نواف :ورويسك الغالي..لاقعد معك بارياف انترلاكن.. ونتقهوا في هبات نسيمها.. ولامشيك في النرويج.. وتشبرينها.. والله لااوكلك من باستة الطليان.. واذوقك روتية فرنسا.. وش تامرين بعد فيه..

*لكم ان تتخيلوا.. اني انا تنهال علي كل هذه الوعود.. بعد جفاف عبدالاله.. نواف حلم جميل.. لكني.. فقط.. حذره.. من كل هذا الحماس.. وواجمه امام.. موجات جميلة.. لم تكن تستقطبني.. *

قربوا من نقطة تفتيش.. .. وقال:

قفلي حزامك..

*كنت مفهيه بافكاري.. مديت يدي بسحبه.. ومادري ماعرفت.. ماكنت مركزه.. نواف يميل بجذعه.. ويسحب الحزام بخفه ويقفله.. ويستعدل..

قلبي يرقع من تلامس جسدينا.. اخفيت اناملي حتى لايلمح رجفتي الغبية..

لاحظته كيف يكلم العسكري بأدب.. وينهي الحوار.. بعساكم ع القوة..

عبدالاله يلعن ويشتم.. مع انه معلم.. حتى لو ماعطوه مخالفة..

كذا عاده.. يشتم اللي في الاشارات.. الماره... البلديين.... لسانه زفر وبذيئ..

ولاستغرابي..

نواف كان ماخذني.. اطلع شريحة باسمي.. ودخلني الفرع.. والوضع كان عادي وانا امشي جنبه.. مع ان في موظفين وعملاء..

كان يضحك مع الموظف.. ويسئلني .. وانا ارد.. ويخيرني في الارقام.. والموظف يأشر على واحد..(ذا مميز) ..

نواف يشوفه.. ويقول :تحبين الاصفار..

زينه:عادي..!.

خذ مني بطاقتي الاحوال.. وعطاها للموظف..بدون مايغطي صورتي..

وبصراحه انفجعت..

عبدالاله.. كان مسكر صورتي بالبطاقه.. بقصاصة نوته.. ومايسلمها لاحد.. الا وصبعه ع الصوره..

انا لو بتخرفن..

من هالتناقض الرهيب..!.

رجعنا السياره..

ونواف مشتط يركب لي الشريحه.. بعدها سجل رقمه..وبادل الارقام.. وسجل اسمه بجوالي.. (حبيبي وجنبه قلب احمر) .. وضحك وهو يحط قلب فيه سهم..!

زينه:ايش حركات المراهقين هذي..!

وتوها بتاخذه سحبه.. :

ماتغيرينه..!

زينه:اصلا ً مو حلوو.. بطلع كذابه..

نواف مروق :طيب بيجي الليوم و بيصير صدق..

زينه:طيب عطني الجوال..

نواف:وعد..!

زينه:تمام..

اكملنا مشاوير صغيره..

اشترى نواف ايسكريم..وقفنا على جنب ناكله.. وخلاني افتح وجهي عشان ماعدم النقاب..!

خذني لماركت..

وظل يشري شغلات ويسئلني وش احب..

يعني باختصار..

كان نواف بس يبي يقضي الوقت معي..

قعدت اطالع العربه.. ملاها.. شبسات.. مكسرات.. كافيات.. كان واقف ينتظر دوره في المحاسبه.. ويشيل.. شوكلت وام اند امز.. مالتيز.. ويحطه.. خذ حتى بطاريات للرموت.. ومادري ليش.. بس كذا.. خذهم..!!

ابتسمت لاارادي وانا اتأمل نواف.. وكياتة نواف.. وحلاوة نواف..

الا اني حذره.. وخايفه من البدايات..!

.........

بعد كم يوم..

اليوم سيف ونواف بيفتحون الموضوع للعايله.. بعد ماحاولوا يستبعدون اليوم هذا..!!

بس بكره بيوصلون وليد ومشاري.. عشان ياخذون سيف لسما..

وليد دخله سيف بالصوره وعلمه كلشي.. واصر عليه يجي.. عشان يكون مع سيف.. خطوة بخطوة..

❤️

لان هو ماراح يقدر يروح ولايبي مهره تروح هالفترة..

لأن لو كانت موجوده مستحيل سيف بيعطي سما امه وجه.. ولاحتى بيظل عندها..!

نواف علم بلقيس كلشي و انصدمت وبغت تموت من صياح..!

بس قال لها لانه يبيها تطلع مع مهره لاي عذر من البيت.. وماتكون موجوده وقت اللي بيقولون السالفه..

لسعود وموضي..

لانهم خايفين من اي ردة فعل عكسية.. اول يوضحون كلشي..

تالي تجي مهره ويقولون لها..

لأن سيف مستحيل بيقدر يفشي اسرارها.. وهو يطالع عيونها..

هي بتنهار وتسكته..!

مايبيها تنجرح.. مايبي يأذيها.. بس كل شي بدون ارادته..!!

كانت في السياره.. مع السواق وبلقيس.. وسيف الصغير..

مهره باستغراب:

مادري وضعك غريب يابلقيس..

بلقيس شارده:هاا.. ليش..!

مهره:يعني الطلعه مالها داعي كلها.. وانتي مفهية بالسوق.. وبس اتصل نواف.. قلتي بنرجع..

بلقيس: طيب وش فيها.. تنفسنا شوي..

مهره بشك :لايكون امي الى الان ماهي راضية على ملكة نواف وزينه.. وهم يقنعونها ومايبوني اكون موجوده..

بلقيس ابتسمت بحنيه:

والله يامهره انها راضيه.. وامس رايحه شارية الشبكه لزينه.. وانا صادقه معك.. هي في البداية.. ردة فعلها غريبه شوي.. بس متوقعه.. لكن الحين وربي الأرض مب شايلتها بعد ماستوعبت ان نواف اخيراً ملك.. وان زوجته بنت ناس وكفو..

تنهدت مهره: الحمدلله.. بس وش فيهم.. سيف بعد اليوم.. ماهو عاجبني.. مادري.. مادري بلقيس.. قلبي قارصني..

بلقيس.. شوي بتبكي وهي تطالع سيف لاصق في مهره ويلعب بجوالها.. ومهره كيف حاسه ان في شي..

ربتت على يدها : مافيه الا الخير فديتك...!

......

وصلنا..

مادري احساسي غريب.. وعيوني ضايعه..وضعي اليوم.. مثل يوم وفاة ابوي..

كنت اقول لجديده.. قلبي كأنه يتفتت ولا أدري ليش..!

اليوم قلبي يتفتت وذايب ولا آدري ليش..

دخلت مع بلقيس..

كانوا في الصاله..

ضغطت على يد سيف ولدي بقوه..

وانا اشوف وجوه واجمه..

ودموع ..

في عيون امي موضي..

تحاول تخفيها..!

فارس.. ناظرني وحاول يبتسم.. بس عيونه غاصه بدمعه..

قربت منهم.. وبصوت يالله طلع:وش فيكم..؟!.. اهلي فيهم شي.. جمان.. فيها شي.. امي وش فيك..؟!

امي نزلت عينها لسيف الصغير.. وارفعتها لي.. ودمعتها نفرت مع الكحل..!

مهره بعصبية :

سيف وش فيكم.. يبه.. بلقيس.. انتي ماطلعتيني هالطلعه.. الا فيكم شي.. جديده فيها شي..

سيف قام خذها.. وقال :كلهم مافيهم الا العافيه.. في سالفة صارت تخصنا هنا في البيت.. تطمني الكل سليم.. وماحد مات ولاشي.. وش فيك شطحتي الله يهديك..

جلسها وجثى قدامها ومسك يدها وغمز لبلقيس عشان تبعد سيف.. وتشغله عن الأجواء..

بس شافت بلقيس انسحبت بسيف..تمسكت بمعصمه بقوه.. وبانفعال:

قلت لهم عن سيف صح.. قلت لهم..

سعود:اهدي يايبه..

مهره طلعت عروقها من جبينها.. والدموع تنحشر في عيونها وبانفعال:يالخااااااااين.. انت وعدتني..

سيف نزل عيونه.. وماعرف يتكلم..

رفعت عيونها لنواف وبكى وصياح:

نواف ليش ماسكته.. ليش خليته يقول.. مو انت وعدتني بعد وقلت هالشي بينا بس..

وقامت وقفت قدام سعود وبانهيار:

والله ولدي يبه.. لاتصدق هالاثنين.. يمه لاتصدقينهم.. يرضيك يقولون عنه هالحكي.. يرضيك يطلعون سيف ولد حرام..

ضربت رجلها في الارض:

ولد حلااال.. انا جبته.. ابوه عساف وانا امه..

موضي قامت لها مسكت وجهها ومسحت دموعها:

ولدك يايمه ويخسي حد يقول غير هالحكي.. اهدي.. وخافي على اللي في بطنك..

مهره بانهيار :

ليش يقوول.. ليش يخليكم تشوفون سيف بهالصورة.. ماله ذنب اذا ابوه غلط... عساف نظف فعلته فيني.. وانا قبلت.. سيف ولدي انا..

بكت وهي تجلس على الارض وتمسك صدرها وبمرار :

والله يايمه اني رضعته من صدري.. امه.. ان كنت ماولدته.. امه من الرضاع.. ماكذبت عليكم.. والله..

وحطت يديها على وجهها وتبكي..

سيف.. جلس قدامها.. بعد كفوفها عن وجهها :

مهره ركزي.. ماحد معترض.. فهمي الموضوع.. وليش فتحناه.. سيف ولد حلال.. مو نتيجة خربطه من عساف..

طالعته بصدمه..

وعيونها تهل دموع :

كيف يعني.. مافهمت..وش قصدك..

سيف بلع ريقه.. :

شفتي واحنا بلندن كيف جاك هاجس ان سما.. ام سيف.. لانها تحب عساف.. هو.. صدق.. سما امه.. ومو حرام.. عساف كان متزوجها.. وفي عقد في الموضوع....

وراح يكمل لها السالفه.. بالتفصيل.. وش بيسونه الحين..!!

*كانت الكلمات تخرج.. من فمه.. وتدخل الى اذني كالحديد المذاب..!

كيف تخرج سما وتطالب بابني..

كيف اعطي لابني لمرأه لااعرفها..

انا حتى الخادمه لااسمح لها ان تغسل يديه او فمه..

كيف يقنعني.. ببساطه انها شهران وسيعيده..!..

كيف يطلبون مني..

نزع قلبي وابعاده عني..!

كيف يكون الصبح صبحا ً.. وكيف يكون الليل ليلا ً.. الا بسيفي الصغير..

ستختل الدنيا والموازين..*

دفته بقوه من صدره:

والله ماتاخذه.. والله ماعطيها اياه..

سيف مسك يديها بقوه :

مهره.. قانونياً تقدر تاخذه.. ولو صار تحاليل واثبات نسب.. بتروحين في ستين داهية.. وعساف اللي سوا السالفه ماهو فيه عشان يشهد.. خوفي عليك والله...ولا والله ماخليها تشمه..

صاحت فيه :

شهالجوووور.. شهالظلم.. هي ماتبيه.. ماكنت اعرفها بس عساف كان يقول امه ماتبيه.. كانت تبيه يموت.. ليش تجي الحين تطالب فيه..

سعود بحنيه ووجع:

صلي على النبي يابوي.. تجزلي وصبري.. ويرجع لك.. كلنا معك..هي فترة امه ولها حق لانصير ظالمين.. فوق ظلم عساف.. ويتعذب بقبره..

نواف :

والله لو علينا.. ماحد ياخذه يامهره.. ماحد له حق فيه غيرك.. بس مايرضينا.. يضيع عمرك بسجن ومحاكم وقضايا.. وراجح واصل.. لو بغى يعقدها عقدها..

مهره قامت وطاحت عند حضن موضي:

يمه.. هم رجال مايفهمون.. انتي ام.. هاللحين فارس ماولدتيه.. بس ولدك.. يرضيك.. احد يشلعه منك وياخذه..

موضي باست راسها وهي تبكي معها:

بس يايمه لايجيك شي..

مهره ببكى يقطع القلب :

اذا هي انوجعت فاطلق.. انا اوجعني عساف.. اضعاف الطلق..

مدت كفوفها.. لموضي:

شوفي حروق زقايره.. في يديني عشان اسكت..

جسمي يمه.. كله اثر ضربه عشان اسكت.. انا كنت اطلق تسع شهور كامله.. انا ولدته من كرب وضيق.. ووحده..

كانت ترتجف وهي تتوسل وتبكي:

عساف عطاني اياه.. وقال لك.. قال ماحد ياخذه.. مسح على قلبي به..كافئني على صبري ابه..

صاحت مهره بقووه:

ابوووه عطاني ايااااه.. مالكم حق تاخذونه مني..

مالكم حق...

ضمتها مووضي وانهارت:

خاااافووووو الله... ياسعود شووفو حل.. آااااااه ياظلمكم ياعيالي وجوركم.. الله وكبر عليكم .. الله وكبر.. الله يحلك ياعساف.. ويبرد عليك.. الله يحلك ياعساف ويبرد عليك....

مهره كانت تبكي بصوت عالي.. مكتوم في صدر موضي..

تمسكت فيها وخايفه يجيها شي..

الكل.. منجمر..

فارس نزلت دموعه..

هو من سيف اللي تعلق فيه وبيروح..

ولامن مهره وانهيارها اللي يقطع القلب..

لحظة صمت.. وغصه..

ونحيب مهره..!

ذبحهم مره وحده..!

.....

بعد شوي..

وفي الدور الثالث..

بعد ماصعدت.. مهره لمكتب سيف وقفلت الباب..

انزوت على نفسها.. ماراحت لسيف..الصغير.. حست في لحظة غريبه..

ان سيف عقوبة..!!

كأن كل شي مؤلم هو.. حبته لحد العذاب.. دخل حياتها بوجع..

كان العثره قدام حبها وزوجها..!

انضربت عشانه..تزوجت عمه عشانه.. انطعن شرفها عشانه..

مهدده قانونيا ً وبالسجن عشانه..!.

مسكت بطنها..

من شدة الحزن الحين.. ممكن تفقد جنينها عشانه..!!!

ضمت ركبها بقوه وهي على الاريكه الوحيده في المكتب..

خبت وجهها..

وبكت بكت.. حد الجزع..!

سيف يضرب الباب :مهره افتحي..

مهره :سيف الله يخليك.. والله ابي اظل الحالي..

بخفوت:بس اشوفك.. مهره ابوي.. اوعدك هالشهرين بس.. اتفاقي معهم كذا..

مهره.. وفي داخلها.. ان تعلقت فيه امه ماراح ترجعه.. وان طلعت اوراق اثبات بتاخذه..

سيفي لي..

لي انا..

الكلام ماطلع من شفايفها.. بس صاحت بانفعال:

خلاص سيف.. اذا تحبني خلني اشوي.. والله ابي استوعب.. تعبانه سيف تعبانه..

سيف موجوع:

ياروح سيف وعيونه.. بسم الله عليك من التعب والوجع..

ضمت نفسها.. وبكت..

وسيف يسمعها..

اسند جبينه على الباب..

عزيّ للي جور الزمن عقد حجاجه

‏انبرى حالـ?'ه عقب ماهوب ضحُوك .

............

(نواف)...

حجم الضيق في صدري لايرحم..

خرجت..

وصوت مهره يطرق اذني.. نحيبها.. والظلم.. اللذي وقع عليها..

وكأني عساف..

وكل ذنوبي تفترسني..

لاادري..

لكن كاتوارد الارواح.. شعرت اني اختنق.. ومهره ترخي كفوفها.. تمدها.. بأثر جوري بها وسخطي..!

فتح ازرار ثوبه.. ودلك رقبته.. من زمان ماجاله هالشعور..

نفس الانفصام..

وكأن عساف يدخل جواته ويصير هوو..

مسك علبة مويه شرب منها.. وكبها على راسه.. ووجهه..

وهو يسوق..

ونحيب مهره وهي تردد كلماتها.. بأحقيتها بسيف.. تعرية اللي جاها منه وصار..!!

قام يردد:اللهم اني اعيذ عساف.. من ظلمه.. اللهم اني اعيذ عساف.. من سخط مهره.. ووجع قلبها.. الله يرحمك.. الله يبرد عليك..

وجدت نفسي.. عند الصرافه.. اسحب مبلغ.. واخر..

ذهبت الى حي فقير.. طرقت الابواب.. وزعت الصدقات عن روح عساف..

كنت بضعفي اطلب من هذه الارمله دعوه له.. ومن هؤلاء الايتام.. ان يقولو الله يرحم اخوك.. ومن هذا المُسن..

ان يترحم عليه.. بعدد حبات سبحة يده الألفية.. زدت المبلغ في حجره.. عله يصدق ويترحم بهذا العدد..!!

خرجت.. وقد ضاقت فلا تفرج..

امي قلبها كرب.. ومهره تسخط عليه بظلمه لها.. وسما انظلمت.. ونزع ورعها منها..

وقفت بشيشة بنزين..

عطيت العامل مبلغ يوازي راتبه..

فكرني غلطان..

رجعها..

قلت له برجا :هذا لك.. سوي دعاء.. اخو انا موت..

كم نصبح ضعاف.. ونلجئ لهم.. للفقراء والمساكين.. نجد سلوتنا في عطاءهم.. نطبطب على يأسنا بالإحسان اليهم..

ذهبت واشتريت عدد من كراتين المياه.. وضعتها امام باب مسجد مغلق.. فالوقت يقترب من منتصف الليل..

كنت اصارع.. دعوة المظلوم على عساف..

باغداق الصدقات عن روحه..!

مهما كان ظالم..

عساف نصف روحي..

لا اقوى ان يتعذب..!!

سلكت درب طويل..

لا أدري..

كيف وجدت نفسي.. على طريق زينه.. دون ان اتصل.. او ارسل شيء..!

.........

سيف بعناد يمسك بدلته:

ماما لبسني بجامة ميمه.. وخري..

بلقيس :

ماما نامت.. يلا سيف حبيبي.. لاتعاند..

دخل فارس الغرفه.. بعد ماكان فوق وحاول في مهره تفتح وتكلمه.. ولاقدر..!

شاف سيف كيف معاند.. ومجنن بلقيس..

تنهد :

سيف وراه.. لاتصير بزر..

تكتف بعناد:

ليش ماما.. راحت.. ليش ماتبي لبسني.. انا اقول ميمة.. ناديها.. ماتروح..

بلقيس بتعب.. وقفت.. وتكلمت مع فارس :

جنني.. يبي امه.. والمفروض ينام خلاص.. لاراضي يدخل الحمام ولايبدل..

فارس بخفوت:

بالله.. كيف سما النفسية بتتعامل معه..

بلقيس بعصبية وخفوت:

عيب فارس..

فارس بعصبية:

نفسية ومجنونة.. وماتصلح انها تكون امه.. يلعنها من وين طلعت ذي..

سيف يطالعه.. بقلق ومو فاهم..

فارس سحب البجامه من يد بلقيس :

خلاص اطلعي انا اعرف له..

بلقيس :

مادخل الحمام..

فارس :اوك ادخله..

طلعت.. فارس جلس على سريره.. وشرد.. ومغبون.. مقهور.

يتخيل مهره..!

قصتها..

معقول عساف سوا كل ذا..

ايش هالاجرام..

كيف عساف توأم نواف..!

مسك راسه بقوه.. ضربها وحرقها.. مهره.. ياحيوان مهره..!

ابوه قال تفاصيل.. موجعه..!

ابوه ونواف.. ظلموها بعد.. قبل مايكتشفون هالحقيقه..

اللتفت ولقى سيف رافع عيونه الكبار ويطالعه.. بصمت..

تنهد:ليش ماخليت بلقيس تبدلك..؟!

هز كتوفه:

ابي ماما.. بعدين نونو جديد ياخذ ماما.. انا لوحي..

سيف بغصه:

من قال تخليك بروحك..بس تعبانه ونامت.. خلك رجال وخليني اساعدك.. عشان بكره ماما تنبسط..

قرب وحط يده على ركبته:فالس افيك _(شفيك)

قام :مافيني شي..

بعد شوي كان فارس خذه الحمام.. وضبطه.. وجالس يلبسه بجامته.. وهو جالس يمه على سريره.. وبس لبسه بلوزته..

راح سيف ضمه بقوه..وارخى راسه على كتفه..

ضمه فارس..

سيف قلبه يرجف.. وكنه حاس باللي قاعد يصير..

ضل متعلبك برقبة فارس..

ربت على ظهره.. وداعب شعره.. وسيف يتحرك بوتيرة التهويدة..

لمن خدر ونام..

فارس ظل ضامه..!

كيف يعني..

كيف ياخذونك..

سيف الصغيرون حقي..!!

..........

وصل عند المزرعه.. طالع الساعه قريب من الثنتين..

نفخ واسند راسه على الدركسون..

علاقته بزينه سطحية..

هي ماعندها لهفه ولاحماس..

مر كم يوم من جاها هاك اليوم..

مابينهم الامكالمات قصيرة..

بس في هالوقت والضيقه يبيها هي.. يبي يشوفها..!

اتصل عليها.. ماردت.. كرر الاتصال.. وردت وشكلها نايمه:

هلاا..

ماتكلم..

طالعت الشاشه.. ورجعت الجوال لاذنها:

نواف..الوو..!

بهمس:آسف.. ازعجتك..

زينه :ولاازعاج ولاشي.. فقدت اتصالك اليوم.. ترى جد..

ابتسم وطلعت ابتسامته حزينه:

ويوم انك فقدتيني.. ورى مادقيتي..

زينه ذراعها على عيونها وبصوتها الناعس:

امممم.. لسى ماعرف اتصل عليك.. بس يعني تعودت على مكالمتك وصوتك..

بصوته الخافت:كويس.. تقدمنا شوي.. ع الاقل تعودتي على صوتي.. نقطه..

بتسائل قلق:نواف فيك شي...؟!

سكت شوي..

وبخفوت قال:زينه.. انا عند الباب....

استعدلت بسرعه :

ايييييش..؟!

قال:متضايق شوي.. وماجا في بالي الا انتي.. اما انك تفتحين.. ولا اعود..!

قامت بسرعه.. وطلعت من الغرفه :

وش تعود.. انتظر.. بفتح..

سمعها وهي تفتح قفول الباب الداخلي.. ونزل ينتظرها عند البوابه..

زينه تسرع في الظلام.. ناحية الباب..

قفلت الجوال..

وهي تقول: نواف..

رد:يلا افتحي..

شغلت لمبه..

افتحت القفل بصعوبة..بعد ضربتين برجلها للباب..

دف الباب ودخل..

طالعت شكله المرهق.. وازراره المفتوحه.. بقلق:

خوفتني نواف وش فيك..

فاجأها يوم ضمها.. وارخى راسه على كتفها :

خايف زينه.. خايف..

بتردد رفعت كفوفها.. وضمته:

وش منه خايف.. بسم الله حولك وحواليك..

همس عند اذنها :

الحين لو خفنا على ميت من عذاب الله وش نسوي..

زينه:ندعي له.. نتصدق عنه.. من اللي مخوفك حسابه يانواف..

حسته ضمها بقوه وتنهد بحرارة..

*نواف بحاجتي انا..

لجئ لحضني انا.. صورته الان تخلو.. من اي تظاهر.. وشكليات.. ومحاولات..

لاادري.. لكني ارى نواف بدون اعتقادتي.. عن تقربه..!

او تظاهره.. بالاقدام في علاقتنا..!

ضممته بدوري. اكثر.. مسحت على راسه.. وهمست :خلينا نروح الليوان.. ونسولف.. تمام...؟!..

وخر راسه :تمام..

وباس جبينها..

مشى معها.. لمن الليوان.. دخلت وشغلت النور..وقالت :حياك..

جلس.. رفع عيونه لها وهي تشغل التكيف..

انتبه انها لابسه قميص كات ميد.. وشعرها مفتوح..

وجهها ولانتفة مكياج..

التفتت :دقايق اسوي لنا شاي واجي..

وابتسمت..

*فكانت ابتسامتها مطمئنة لقلبي المعتل اليوم *

....

طلعت مهره من المكتب.. بعد ساعات..

البيت ساكن.. وهادي.. بعد ماقامت فيه القيامه قبل شوي..!.

ساكن.. كامهره الان.. كأنها ارض قامت فيها حرب..

فلم تبقي الا انقاض واشلاء..!

جفت دموعها.. جفونها حمراء ومتنفخه..

توجهت لغرفة فارس وسيف..

افتحت الباب بخفوت.. ودخلت..

فارس كان يلعب بجواله ببجي.. استعدل بس شافها..

مهره ناظرته.. وحست لو بتقول شي بتبكي.. فا توجهت لسيف.. النايم.. جلست جنبه..

وظلت كذا تطالع فيه..!.

لمست شعره وخده.. وظلت تناظره بصمت.. وشرود..

فارس بهمس:مهره.. بيرجع لك..

تنهدت.. وراحت انزلت عن السرير وجلست على الارض.. ثنت ركبها لصدرها :

فارس.. هو مو لي.. انا خذت شي ماهو لي.. وربي بياخذه مني..

نزل فارس.. وجلس عندها.. :

ماهو انتي اللي تقولين هالحكي.. سيف ولدك.. عساف رغم اللي سواه.. كان عارف ان ولده ماتصلح له ام غيرك..

مهره.. بشرود:

ماكنت عامله حساب هاليوم.. كنت خايفه من اهل عساف ياخذونه.. وتزوجت ابوك.. وتطمنت.. رقدت وامنت يافارس.. طلع عمك متزوج.. وعندها اثباتات.. ولو تسوي تحاليل.. بتوديني في ستين داهية.. ليه يصير فيني كذا..؟!

فارس :

مهره كلنا معك.. ابوي ماراح يتخلى عن سيف.. الاجراء اللي بيصير.. عشان يسكتون سما.. سيف ماراح يتأقلم.. يابنتي.. نسيتي ايش سوا وقت سافرتي مع ابوي.. وهو معنا ومتعود علينا.. كيف سما..

مهره مدت شفتها.. وابتسمت بغصه:

مابي افكر كثير في نفسية سيفي هناك.. ان بكى وعارض.. بيوجعن قلبي.. وان تأقلم وحب الوضع بيذبحني..

تنهدت :

يعني انت وسيف عيالي.. ولالي حق فيكم.. في اي لحظه تختفون من حياتي..الله يستر مايجي يوم بعد تبعد عني يافارس.. طبيعي.. هو انا امكم بس ماجبتكم..

حط كفه على يدها وبصدق متأثر :

مهره.. انتي امي..انا حطيتك بمكان نجود..انا علي برك لمن تشيب عيوني.. انا ولدك.. ولك حق فيني.. مثل اللي في بطنك وزود..

ابتسمت بحزن..

وهي ترفع كفها تحطه على خده:

الله لايحرمني اياك يمه..

قالت كذا.. بصوت مبحوح.. ومجروح..

ودمعه.. تنزل وتنصف خدها نصفين..

فارس راح ضمها:

اف مهره اف..

*****

دخلت زينه المجلس معها صينية شاي.. وتسالي.. لقت نواف منسدح.. وحاط ذراعه على عيونه..

نزلت الصينيه بخفوت..

رفع ذراعه واستعدل:

نام نواف اذا تعبان..

قال :مافيني النوم.. تعالي اقعدي..

جلست..

وصبت شاي مدته له:ايه..؟!.. اسمعك.. وراك..

رفع حاجب..وهو ياخذ البياله :

وش اللي وراي..

زينه:واضح انك روقت.. باين من اسلوبك الخبيث ونبرتك..

ضحك:

وين الخباثه.. ماقلت شي..!

زينه:

يعني مصحيني من النوم.. وواصل.. كن احد لاحقك.. وتقول كلام غريب.. وخايف على ميت من حسابه.. وش.. بتتكلم.. ولا انا اغراب..

شرد فيها وهي تشرب الشاي.. وهمس:

لو انتي اغراب.. ماخذني قلبي لك يوم ضاقت..

التفتت وعقدت حواجبها :

بسم الله عليك من الضيق..بعدوك..

ابتسم وحط بيالته:

تدرين.. نبرتك حنونه علي.. لاول مره..

زينه.. تشرب شاي :

انا كذا قلبي فضيخ..

فاجئها لما انسدح.. وحط راسه على فخذها.. ويقول :

فديت قلبك..

ورجع سكت وشرد..

زينه.. مستغربه..وش فيه..!

هي ماتعرفه صح.. ولاتعرف مشاكله.. ولاهمومه..!

بس ودها يتكلم.. مو هاين عليها.. نواف بالكم يوم اللي مرت بمكالماته لها.. مرح.. ويضحك.. ويحاول يسليها..

دخلت اناملها بشعره..

وداعبت راسه:

اسمعك.. ترى انا شاطره في الاستماع واحتواء الفضفضه..

نواف:وفاشله بالفضفضه.. ورمي همومك..

زينه:

كثر التشكي للمخاليق يشناك

يحط من قدرك.. ويفرح معاديك..

نواف رفع عيونه لها :

المخاليق.. ماهو نواف..

تعمقت في عيونه..وبهدوء :نواف اللي شهامته.. خلته يسوي شي غصب عليه..

نواف بالهجه فيها معاني :

من قالك غصب.. زينه.. انا ابيك.. واللي خلق عيونك الحلوات.. ابيك قبل يقولها سيف.. لاني مجبور.. ولا انا متمم شي غصيبه..

عقدت حواجبها :

هذا اللي مابيه.. لاتحسسني بشي اصلا ً ماهو موجود.. خلينا.. الزمن كفيل فينا.. بس لانكذب على بعض..

شرد في السقف.. : على هواك يابنت غازي.. انا معك.. ولو طالت دروبنا..

وخذ يدها وباسها..

تشبثت اناملها بيده اللي تمسكها.. وبالحاح حنون:

سولف.. قل لي.. وش مضيق صدرك اليوم..

تنهد.. :

بقول.. لاني محتاج وقفتك..

باستغراب :وقفتي..؟!.. كيف..

استعدل.. وناظرها:مو معي.. مع مهره..

بخوف ورجفه:بسم الله.. شفيها خيتي.. نواف تكلم.. وش صاير..؟!.

......

سيف جالس بره على احد الكراسي..

يدخن..

ضايق ومهموم.. كم مره يصعد ويحاول في مهره تفتح ورافضه..

جاته رنه.. رد:هلا ابوي..

فارس بهمس:يبه..بطمنك.. مهره نزلت.. جات عندنا الغرفه.. ونامت مع سيف..

تنهد :تمام حبيبي..

فارس:وانت نام يبه.. لاتظل كذا..

سيف:ان شاء الله ابوي.. تصبح على خير..

فارس :تلاقي خير..!

..........

اليوم غريب..

اليوم الأخير.. وبكرة سيف بيروح.. كما رُتبت الحجوزات..!

مهره.. بغرابة.. ووتيرة عجيبه.. كانت تجهز اغراض لسيف..

كانت تتكلم معه بحماس عن القادم..

تحببه.. انه بيركب الطيارة ويقابل صديقته سما..

لكنه فعلياً نساها..

حتى اسعفت ذاكرته بصورة.. كانت التقطتها لها..

سيف باعتراض:

مابي اروح.. انتي معي..؟!

مهره وتتحاشى تطالع وجهه..

وتنشغل في ترتيب اشياءه..

وتقنعه.. انها بتجي.. بعدين..

لكن كان الاقناع صعب..!

وكان الوضع صعب للبيت كله..

واليوم كأنه يوم جنازة..!

وكأن تحضير مهره.. لتلك الحقائب.. ماهي الايوم جمع ثياب متوفى..

سيتخلص منها.. من المنزل..!

لكن الكل..

احتذا بمهره.. وكتم مشاعره.. وحاولو اظهار.. ان الوضع طبيعي..

وبتروح كم يوم وتجي..!

زينه جات مع نواف.. بعد ماقال لها كل شي.. والصباح قال لجدتها..

اللي ارتفع عندها الضغط ومايبي ينزل..

ماقدرت تجي.. وخلت زينه تروح عشان توقف مع اختها في هالظرف..

عيونها كانت متورمة من البكي..!

جات مع نواف عند غرفة مهره.. كان سيف طالع من عندها.. ووجهه تعبان..

زينه:اخبارها يابوفارس..

زفر بقوه وبخفوت:

اي اخبار يازينه.. ادخلي واقنعيها.. تاكل شي.. لايجي لها شي ولا اللي ببطنها..

زينه امسكت ضلوعها:

ياقلبي ياخيتي..

نواف مسك ذراعها:

تكفين زينه.. اصملي.. الورع بيرجع لها.. لايجيها شي.. والولد حي ومعافى..

همست :طيب خليني اشوفها..

دخلت لمهرة.. كانت فاتحه الاب.. وايباد سيف وتحط له بعض الاشياء..

همست لمهره:

مهره.. حبيبي.. كيفك..

مهره ماقامت تسلم.. بشتات وتوتر وعصبية:

كويس جيتي زيون.. وش اسم الاغنية الكويتيه القديمه اللي يحبها سيف.. ذيك اللي فيها ليلى اللي بخالتي قماشه...

زينه بحشرجة.. وهي تشوف اختها ونفسيتها اللي مو مضبوطة:

قناديل الأمل..اذا تقصدين اللي مع محمد المنصور..؟!

مهره مشتطه تبدا تطلعها:

صح هذا هي.. كلش راح اسمها من بالي..

قربت منها :

مهره..!

مهره تشتغل برجفه ع الاب.. وتقول:

ذكريني زيون.. بالشغلات اللي يحبها بعد.. تعرفين ذائقة سيف.. بس هم ماراح يعرفونها.. بتحطط له امه في شغلات انجليزيه وهو مايحب. !

زينه اجتمعت الدموع في عيونها وهي تاخذ يدها.. :مهره امي.. اتركي اللي في يدك شوي.. وجهك شاحب قومي اكلي شي..

مهره وكأنها شخص ماخذ حبوب لجه..:

ابي اخلص كلشي اليوم.. احس يوم مايكفي.. انا بجهز ملابسه.. ولاايباده... ولا بقنعه.. ولابشبع منه.. مايكفي زينه.. مايكفي.. وتقولين اكلي..

سيف واقف مع نواف جنب الغرفه..

حط كفه على جبينه وضغطه:

بتجن.. مهره بتجن..

نواف.. :هي تاكل شي ع الاقل.. لاطيح من طولها.. وش تحب.. خل اطلع اجيب لها يمكن زينه تقنعها..

سيف :لاتحاول.. مجربها انا.. ماراح تاكل الا اذا هي بغت..

وتوجه للدرج :بنزل.. احس تعبت.. قلبي يتواكل وانا اشوفها بهالحال..

نزل..مع نواف..

والوضع مأساوي.. ابوه ساكت.. ووجهه منحقن..

وامه رابطه راسها.. ومنجمره..!

وفارس.. وبلقيس..

في محاولات فاشله.. مع سيف.. اللي يبكي ويقول.. :

ماما ماتبيني.. تبي نونو جديد..!.. قولي رح مع شالي.. وليد.. طياره.. انا مابيهم..

كيف..

هذا اليوم سيمضي..!

*****

نزلت مهره.. بعد محاولات زينه..

واسمعت سيف يبكي.. ويردد نفس الموال..

حست صوته مزعج حيييل..!!

كان على طاولة الاكل.. وبلقيس تحاول تأكله..

اندفعت له واضربت الطاوله.. بكفوفها وبحده وعصبية:

سييف.. خلاااص انكتم.. اسكت.. صوتك كل مخي..ابلعهااااا....

بلقيس تناظرها وخافت من خزتها وعيونها :

مهره.. وش فيك..هدي..

موضي بتقوم.. تمنع مهره.. وصراخها على الولد..

بس سيف منعها..!

وفاجئهم سيف.. لما وقف ع الكرسي.. وضرب الطاولة زي امه وصرخ في وجهها.. :

انتي ووووااااانه.. خليني.. عشان نونو جديد..

صاحت فيه:

من اللي يخليك عشان النونو الجديد.. من.. انااا..؟!.. انا سيف اناااا..؟!!!!!..

صاح فيها :

ليش خليني اروح لوحي مع وليد.. شالي.. (ومشاري)..

مهره بانهيار وانفعال..توضح لسيف شي اكبر من مخه بس بسلوب يستوعبه:

لان ياماما.. اذا انت مارحت.. بيحطوني لحالي.. بغرفة ظلمه.. بيربطون يديني ورجولي.. بيخلوني جايعه.. مع الفيران والذبان.. تبي ماما يصير لها كذااا...؟!.. تبي ماما يضربونها.. ويحبسونها...

توسعت عيون الجميع من الشفافية.. اللي اشطحت لها مهره..

موضي مسكت راسها :يااااويلي..

سيف بهلع ضمها :

لاااا ماما.. مابي...ماما اتقولين كذا.. حاااف.. (اخاف).. خلاص والله الوح.. معهم..

مهره ضمته.. وبدون تبكي.. وبحزم :

كفوو ولدي.. كم يوم ونرجع مع بعض.. صح ولا..؟!

سيف يبوس خدها بقوه: الاا..

وشوشت في اذنه.. وابتسم..

بعدها حطت جبينها على جبينه:

وعد..؟!

قال:وعد..!

مهره تجلسه فوق الطاولة..

وتسحب الصحن.. وبخفوت:

خلاص خليه بلقيس.. انا أأكله..

حطت لقمه في فمه..

كلها..

والكل جلس بصمت وتوتر.. بعد الوضع اللي حصل..!

مهره وسيف.. المعاناة اللي اقترنت ببعض.. هي وياه اكثر اثنين.. يفهمون لبعض..

*كان سيف رغم شهوره.. الاولى.. قادر ان يفهم تقلبات مزاجي.. يصفو اذا صفيت.. ويتعكر معي.*

‏يا رب

غصنٍ بصدري

لو لمسته وقع ..

أرسل لي من الغمايم

ما يبلّه وأعيـش

وازرع بصوتـي ..

سوالف ما سقاها وجـع

من ضحكة الغيـم

ولا من حمام وريـش .

.........

سافر سيف..!

بين ألم الجميع.. وصلابة مهره.. اللي.. تلبستها من يوم امس..!

تقابلت مع وليد ومشاري.. ووصتهم.. عليه.. خذت وعود غليضه من مشاري.. ان الولد في امانته.. وانه ينصفها.. لو اللتوت سما في وعدها..

ابتسم مشاري.. :

مهره.. ارقدي وآمني..لو اللتوينا.. احنا ابوي بيرجعه لك.. هذا وعدي لك..!

مهره.. وماكانت مستوعبه حجم العلاقة اللي تكلموا فيها عن راجح وابوها.. بس قالت بعصبية:

مشاري..انا مو مستوعبه شي لامن الماضي اللي بين ابوي وابوك.. ولاشي.. انا علي من الحين.. .. لو سما خبصت نفسيتها.. سيف في ذمتك..

مشاري :

بعيوني..

التفتت لوليد:خالي امانه.. لازم تزوره. انت وماريا.. تشوفونه وتطمنوني عليه..

وليد:بدون ماتوصين.. انتي بس انتبهي لحالك.. يابنت تطمني لايجيك شي..

مهره بعصبية وصوتها طلع مرتجف:

انا مافيني شي.. بالعكس متفهمه..وذا شي اذا ماصار اليوم بيصير بكره..

سيف.. حسها مع الساعات تشحب زيادة.. وتظاهرها يضغط عليها اكثر.. مسك يدها.. واسند ذراعها..:

مهره.. ايش رايك نروح المستشفى..تشوفك دكتورتك..

التفتت بحده.. :

ليش مستشفى.. ترى مافيني شي..!.

سيف واحتار..

كيف..

كيف يتعامل مع مهره.. ونفسيتها الغريبه..؟!..

غادر سيف.. بعد عناقات مطولة وحبس دموع جامد من الجميع..

عشان مايبكونه..

ولايحسونه بصعوبة الوضع..!

واللي قلل من حدة الرحيل.. عند سيف.. ان نواف هو اللي حمله.. وراح معه المطار معهم هو وفارس..!..

مهره.. كانت واقفه.. متجزله.. من يومين.. بدون بكي.. ولااكل.. واعصاب على المحك..!

بس اسمعت صوت السيارة غادرت..

وكانت واقفه على الدرج الخارجي.. معهم..

اختل اتزانها..

وبسرعة مسكها سيف..

مع اصوات موضي وزينه الملهوفة..

مهره وعيونها شبه مفتوحه.. توقف مره ثانيه:

مافيني شي.. والله مافيني شي..

سيف بعصبية:

مهره.. اكلي لك حاجه.. ولاخلينا نروح المستشفى..

موضي:يايمه مب زين عليك.. تراك شايله روح.. انتي مسئولة عنها..

مهره.. بخفوت.. وكانها تسمع اصواتهم من بعيد:

بنام اشوي واصير زينه..بس تعبت مارتحت من امس..

زينه امسكت ذراعها الثاني :

عشاني مهره.. قبل تنامين اكلي اي حاجه..

هزت راسها نفي. :لمن اصحى..

وخذت يدها من زينه ومسكت ذراع سيف بكفوفها :

تكفى سيف.. خذني فوق.. احسني بنام وانا واقفه..

*كيف سأغفر لنفسي.. عودة ألمك هذا.. وشدته.. من مثلي يعرف هروبك من حزنك بالنوم.. من مثلي كان ينتظرك ساعات وساعات.. وانتي تعبري عن رفضك للحياة والعيش بالنوم الطويل.. *

خذها.. وساعدها.. دخل معها وصعدوا فوق..!

بلقيس انهارت بكي :

ياعمري يامهره.. والله ماتستاهل كل هاللي يصير فيها..

زينه تطالع حيث اختفت اختها:

الله يجبرك ياخيتي..

وتحشرج صوتها وهي تقول :آاااه عليك يامهير..آااه..

موضي وهي تبكي بعد:

الله يرضا عليكم يابنات.. تماسكوا.. عشانها...

جلست زينه على العتب.. وشردت في الارض.. بصمت..

*حلقي مر كالعلقم.. ذهاب سيف.. حزن مهره.. فقدي لصغيرنا الشقي.. اطفئ في قلبي.. حلاوة الحياة..

فجأه.. احسست.. ان الدنيا.. باهته.. وان كسورها بليغه.. وان الجبر مستحيل..

وان الحياة تضربنا مع كل التفاته.. وان الامل كذبة..

احتار الدمع ليس في عيني.. بل في حلقي..

وجه مهره الشاحب كالموتى.. لايفارق عيني.. ذهبت مهره لتنام..!

خفت.. خفت فعلا ً.. لو نامت مهره بهذا الكم من الألم..

هل ستصحو..!

ام سكتون كاجارتنا.. اللتي مات ابنها ونامت.. وماتت كمدا ً عليه*

موضي بحنية:

زينه امي.. قومي ندخل.. قومي بنتي.. لاتغتلقين هنا مب زين..

زينه تمسح عيونها:

ماعليش خالتي لاتحاتين.. روحوا انتوا ارتاحوا.. انا اروح الملحق..لمن....

قاطعتها موضي وهي تمسك يدها وتقومها:

اي ملحق لحالك.. البارح نامت معك مهره.. تعالي امي.. والله ماخليك لحالك..!

وخذتها معها ..

داخل كان سعود جالس بصمت.. بلقيس تمد له ادويته.. خذها.. ويقول:

اتركي علاجي.. واطمني على مرت اخوك.. مهره مب شلية ابد..

بلقيس:طيب بروح.. بس خذ علاجك يبه.. ضغطك مرتفع الله يحفظك لنا..روق..

زينه.. جلست..

تراقب الابو كيف تعبان ويحاتي مهره.. وبلقيس صعدت..

وموضي راحت تسوي له كركديه بارد عله ينزل ضغطه..!

بتردد ربتت على كفه:ماشتدت وتعسرت واستحالت..

ردد معها سعود بصوت رخيم:الا واستهلت وتيسرت واستهانت..

زينه:اذكر الله ياعمي.. شدة وتزول..

ابتسم وهو يحط كفه على راسها:

الله يرضى عليك يالزينه.. الظروف عاكست.. ولا.. دخلتك في هالبيت.. ياكبر قيمتها عندي.. تراك مرت الغالي..نواف شعرت جوفي.. سامحيني يبه..

زينه ماكان ناقصها الا هالصوت المتحشرج الحنين.. وهو يستسمح منها في اشد اوقاته صعوبة..

امتلت عيونها دموع:

الله يحفظك.. وياجعلك ذخر.. واصلني شعورك والله..لاتحط في بالك عمي..!.

سعود بتنهيده:

مهره ماتروح عن وجهي.. ولاهالصغير اللي راح.. يابنتي.. مادري انا ظالم احد بحياتي.. والله يعاقبني هاللحين.. على فعايل عيالي..!

زينه ابلعت ريقها.. وبغصه.. :

ولاتزر وازرة وزا اخرى.. مايجي منك الا كل خير ياعم سعود..

نزلت بلقيس وقالت لهم ان سيف يقول ان مهره نامت..

زينه جلست معهم..!

ربما وقوف زينه ووجودها معهم في هذا المصاب.. قربها منهم ..

وهم تعرفوا عليها اكثر..!

كانت مثل مهره.. مبينه متماسكه.. وكاتمه.. وتحاول انها ماتوضح دواخلها عندهم..!

لأن الوضع كان متوتر.. وموضي وبلقيس كل شوي يقيسون الضغط لسعود.. اللي ارتفع ومايبي ينزل..!.

........

رجعوا نواف وفارس قريب الفجر..

اشكالهم مرهقه وتعبانه..

البيت كلن في غرفته وغالبا ً نايمين..!

نواف.. راح الملحق.. دور زينه مالقاها.. اتصل عليها وماترد..

تسائل لايكون مشت..!

صعد.. ولقى فارس جالس بالصاله الفوقية.. ومسرح..!.

بخفوت:

وراه قاعد هنا.. قم نام..

فارس بضيق.. ابعد راسه على ورى:

مدقور نواف.. احس بدخل الغرفه واشوف فراش سيف.. صوته يرن في اذني وهو يبكي..!

نواف ربت على كتفه بقوه :

الله يعين ياعمك.. الله يعين..!

نزلت جنب عين فارس دمعه وهو يهمس :

الله يرحمك ياعساف..!. وش اللي سويته فينا..

..............

بعد شوي.. دخل نواف غرفته.. وهو يدق على زينه.. تفاجئ بجوالها يهتز وهو صامت ع التسريحة..

والغرفه ظلمه الا من ابجورة جنب السرير.. تلفت ولاشافها..

شغل النور..

وهو ينادي :زينه..!

انتبه لها جالسه ع الارض من الجهه الثانيه لسرير.. قرب لقاها تخفي وجهها بركبها وواضح تبكي..!

كانت عباتها على كتوفها.. ماشالتها..

همس :

زينه حبيبي..!

رفعت راسها وهي تمسح عيونها...ولارفعت راسها عليه.. وهي تحاول تخفي بكاها..

جلس عندها.. حط كفه على ركبتها:

زينه.. ناظريني..

رفعت عيون مجمرين له.. :خلاص راح سيف يعني..

هز راسه ايجاب :

ايه.. الله يحفظه.. ماجيت الا بعد ماطارت طيارتهم..

انهارت.. بكى بصوت :حبيب خالته النتفه.. ياربي كيف بنتحمل غيابه..!

نواف خذها حضنها وبحنيه وهلع:

زينه.. صلي ع النبي..

زينه تتكلم وهي تبكي :

حبيبي اهو.. ياربي بفقده.. كيف يصير كل ذا.. خايفه على مهره.. وخايفه عليه..

مسح على راسها :

الله معه.. ومهره قويه.. بتشوفين كيف بتستوعب الوضع وتعتاد..

زينه تتكلم وتفضفض.. عن سيف.. ومهره.. ومواقف..

ونواف محتفظ فيها عنده..

بعدت عنه.. بعد ماهدت.. بعد طبطبته واسلوبه الهادي..

قالت :

اعذرني نواف.. بس خالتي موضي.. وعم سعود مارضو اطلع الملحق.. قالت لي الوالده انتظرك هنا لمن تجي وتتفاهم معي..

ابتسم.. وداعب انفها:

زين سوت.. عاد انا بعد هالغباين محتاج.. حضن مزه انام فيه..!

زينه بتهكم توقف: ياشيخ..!.

نواف قام بسرعه.. وضمها من ظهرها.. وبشطانة:

ترى من جدي.. مامزح..

زينه ابلعت ريقها:

وش اللي ماتمزح.. نواف لايصير الوضع عيب عاد.. ترى يكفي اني كاسرة بروتكلات الخطوبة وقاعده بيتكم..

نواف يتكلم جنب اذنها:

انتي تقولين ماتبين عرس..؟!

زينه وقلبها يرجف لهالقرب: طيب..؟!

نواف:واشهار.. الكل يدري.. جوالي يستفرغ من رسايل التهنئه..

زينه:نواف لاتقعد تخربها.. ترى وضعنا غير مناسب.. للإيحاءات اللي انت قاعد تقولها..

نواف بهمس.. وانفه على رقبتها:

اي ايحاءات..؟!

زينه.. داخت خلاص.. بخفوت:

نواف..!.. خلاص بعد عيب..

همس لها: انتي زوجتي.. وانا واحد عاصم حالي.. خليني اجرب..

زينه.. حسته بيخرب الدنيا.. فقالت:

يعني لو اني مب مطلقه.. كان حطيت حدود.. بس يعني عادي.. ماتفرق.. صح.. هذا اللي تقوله جواتك..

بعد عنها نواف :

يلعن شيطانك كانك خربتي جوي..

تكتفت وارفعت حاجب :

يعني هذا نيتك.. يلا نخبص سوا.. واذا ماكملنا.. هي اصلا مطلقه.. ماضريتها..

نواف تركها وراح غرفة التبديل :

والله ولاجا في بالي.. انتي من وين تفكرين..

زينه.. وهي تحاول تلملم رجفتها.. :

يعني نواف.. احنا في هالسالفة.. وكذا.. معقول.. بندخل في مود ثاني..

طلع من غرفة التبديل.. وهو مدخل راسه بتيشرت وقاعد ينزله على صدره وبطنه.. ويقول:

سيف بصحه وسلامه وكل اموره طيبه.. لاتتحججين.. مو عندنا واحد متوفي.. واحنا بنكيف مع بعض..!

لمحته.. ونزلت عيونها بسرعه.. اففففف.. ايش هذا.. جسم نواف يوجع القلب رياضي ومفصل..!

جا عند التسريحة.. راقبته زينه وهو يتعطر.. بعدت عينها عنه:

الحين انا مافهمت اصرار خالتي موضي اني انتظرك هنا..

رفع حاجب ومر من عندها جلس ع السرير :

انا موصيها..وبعدين زينه.. خلينا واقعين.. اذا احنا ماراح نسوي حفل.. ليش مانختصر الوقت..

جلست على كرسي مقابله:نختصر ايش.. نواف ترى احنا ماخذنا حتى اسبوعين من ملكتنا الغريبه..

نواف وكان حيل خاطره فيه.. ومزاجه محتاجها.. ووجودها في غرفته فوق طاقته.. بس حاول يسيطر على نفسه.. وهو يشوفها قاعده قدامه.. ع الكرسي وحاطه رجل على رجل.. وتتلفت في كل شي.. ولاطالعه..!

سحب سيجار واشعلها.. نفخ دخانها.. اللتفتت باستغراب.. :

تدخن..؟!

نواف وهو ياخذ المنفضه على فراشه:

كنت اشيش.. ومع سفراتي الاخيره ماتحصل الشيشه.. وطحت في الدخان..

زينه بامتعاض :الله يهديك..

ضحك:زينه.. مب اشرب.. دخان.. لاتكبرينها..

زينه بنص عيون: طيب الله يهديك..!

قال:اللحين وراه بهالعباة.. بتمشين..؟!

زينه:والله ليت امشي.. بس احاتي مهره.. ود اطمن عليها بالاول..جد نواف احس وضعي ماله داعي.. ومتوهقه بعمري.. مب عارفه وين اقعد وين ارقد.. ايش رايك.. تشوف سيف واطمني عليها.. ثم توصلني لجديده..

طفى السيجار:

والله يازينه انك ماتستحين..!

توسعت عيونها:اناا..؟!!!!

نواف:ايه انتي.. اللحين.. انتي في بيتك.. وغرفتك.. وهذا حكيك.. قومي شيلي هالعباية.. وعيني خير.. وتعالي نامي هنا..

وطق الفراش جنبه.. :

زينه بهلع :من جدك..؟!.

قال:جربيني.. لو وضعي معك عابر وبس بستقل وضعنا.. بخربها.. ولو انا رجل تحطيني على يمناك يصبح عليك الصبح وانتي على حالك..

زينه انربشت :

وانا اذا نمت فيذا.. ماعلي منقود.. قم نواف دبرني بمكان ثاني..

نواف استرخى:

اي منقود.. انا زوجك.. واهلي يدرون عن وجودك..

قامت :طيب تمام.. نام انت انا ادبر نفسي..

راحت.. للباب.. لقته قافل.. اللتفتت بحده.. وبغيض وخفوت:

نواف.. متى قفلت.. قم افتح لاتستهبل وتوترني..

نواف:

الباب يقفل.. لحاله.. السستم عندي.. يعلق . مايفتح الا الصبح..

زينه في بالها:يالله.. احر ماعندي ابرد ماعنده.. وانا كل الامور معاكستني وضدي..

قالت تحاول تستجدي عطفه:

والله بروح اجيب فرشتي.. في الملحق.. وحتى شنطتي تحت....وببدل.. يعني مستحيل بنام.. وانا مافرشت..

قام.. وفتح درج.. طلع فرشاة جديده:

يلا اخذيها.. ولاتتحججين..

تنحت مكانها.. مدها:طيعيني زينه.. خلينا نقرب من بعض..كيف بنحب بعض كذا.. وانتي تهجين مني.. ولاتثقين بنيتي..

خذتها.. وهي تطالع عيونه..

فعليا ً هي تنجذب لنواف.. تحاول تبعد.. وماتبي تنغش في البدايات..!

بس الواقع.. ان قلبها اسفنجه جافه.. ونواف بحر هائل من المغريات..

زينه كأي بنت كانت عندها احلام وخيالات.. الا ان عبدالاله حرق الاحلام وشوه الامنيات.. وغيب من عينها كل معنى للحب..باتت خائفة من فكرة ان يتملكها رجل.. ويعشقها..!

فسخت عبايتها.. كانت لابسه لقنز اسودوبلوزه واسعه كات ورديه..

ابتسم :يعني هذا انتي بدلتي.. ليش الكذب..

راحت ناحية دورة المياه:

كنت اكذب.. عشان انزل..

لحقها.. اللتفتت واهتفت:

نواف..؟!..

فتح دولاب الحمام :بطلع لك معجون الاسنان..

خذته:عشت..

قرص خدها:يالبى اللي تتكلم نفس الشيبان.. عشت اجل..

اكتمت ضحكتها.. ودفته بره: خلاص نواف برررره..!

.........

بعد شوي..

كان نواف منسدح على جنب.. ويطالعها.

وهي في الكرسي المريح ثانيه رجولها.. وجالسه ومتلحفه ببطنيه صغيره طلعها لها من الدولاب..

كانوا يسولفون.. عن عدة امور..!

لما ابتسمت واشردت:

تصدق نواف عبدالاله كان يشك فيني في كل شي.. مايثق..بس قد مره شك حتى فيك.. يعني مادري هو جنيه كان متنبئ.. للي احنا فيه الحين..

نواف.. ضم مخدته.. وهو على بطنه:

مافهمت..

قالت :تذكر يوم اطلع.. من بيت جديده.. وقت انت جاي تاخذ سيف.. كنت انت بسيارتك بره.. تدري.. ان علق وقام يشرشحني.. يقول اخو زوج مهره.. ماوقف هالوقفه الا يبي يشوفك..

طالع عيونها مده طويله.. بعدها همس:

اتوقع انه المره الوحيده.. اللي صدق شكه.. وخوفه..

عقدت حواجبها :وش قصدك..؟!

قال بغموض:ولاشي..

زينه:ياليل.. ماحب هالحركات..

ابتسم:تعالي نامي.. وعد مالمسك..

زينه:مرتاحه انا بهالكرسي.. وبعدين بطقطق بجوالي.. مافيني النوم..

نواف بصوته الناعس:عنيده..!.

راقبته وعينه تروغ وينعس زياده وينام..

ظلت كذا تطالع ملامحه الهادية.. النايمه..

ابتسمت بحنية..

بعدها افتحت جوالها.. وراحت تفرفر فيه وهي مسترخيه كذا..!

*****

*شعرت به يتشبث بظهري .. اقدامه يعقدها في بطني .. واظافره تكاد تدمي صدري .. ويصيح بانهيار : ماااابي الوووح ماما .. ابيك مااااماااا.. ابيك مااااما ..

واحدهم يشده عن ظهري .. فينغرس سيف بقووه فيّ.. فاشعر به كالطعنات في كامل جسدي .. ظهري وبطني .. صدري .. وانا ابكي معه .. *

واحاول افتح يدينه عشان مايتعور من شدهم له واقول بانهيار :

لايوجعونك يمه.. باخذك منهم .. لاتتعور يمه ..

وهو ينغرس في جوفي .. حتى شعرت باقدامه .. فعلاً فتحت شروح هائله في بطني وادمتها ..

بكيت بخوف وهلع : فكني سيف .. اوجعتني .. اوجعتني ..

صاح متشبث فيني : ابييييييك انتي ماما .. مابيهم .. ابيكككك ...

صحت : فك سيف .. فتحت بطني ..

اتسعت عيناي وانا ارى دمائي .. تتخذ طريقها ..لتسري على فخذي وساقي وتقع في الأرض ..

لم اعد اسمع سيف .. لمست ظهري ابحث عنه .. وصدري .. وعنقي .. .. وكان اختفى ..

صحتتتتتت بصوت مزززق حنجرتي :

سيييييف ...يوووووووومه ... !

صوتي لم يتعدى الكابوس الهائل .. ولا حتى شفتاي الجافتان .. فقط فتحت عيني برجفه بسيطه .. وكأني اسقط من مرتفع ..

كنت غارقه في عرق بارد ..

كنت سأتحرك .. لكن منعتني ذراعي سيف اللذي كان يضمني .. وجهي كان مغروس في عنقه ..

لم تكن لدي طاقه .. لابتعد عنه .. آلام في كل جسمي .. مغص رهيب يقطع معدتي .. همست بوجع:سيف ..اصحى ..

تحرك شوي ..

بس صوتها كان خافت مره وماسمعه..

ابتعدت عنه..

وقامت.. وراحت لدورة المياه..

شوي تحرك سيف.. وتوعى..

واستعدل بسرعه وقت مااشافها..

وسمع صوت الماي بالحمام..!

تنهد..

وهو يطول على الابجوره.. ويقوم..

طق باب الحمام :

مهره..

بخفوت:هلا..

اطلق تنهيده..وهو يرجع الغرفه ويشغل النور يبي يشوف لها شي تاكله.. بسكوت او عصير.. بعد مانامت كل هالساعات..

مع النور انتبه للنقط ع السراميك.. من السرير لمن الحمام..

توسعت عيونه..برعب.. ترك اللي عنده وراح فتح باب الحمام بسرعه وبخوف :مهرررره..!

******

كان الصبح بدا يطلع.. وفارس في الصاله الفوقيه يتابع فلم.. ومو جايه النوم بعد التوترات اللي صارت..

لما انفتح باب غرفة ابوه وطلع سيف..

رفع راسه يطل من الكنب :يبه..!

سيف بعصبية:زين انك صاحي.. (رمى عليه المفتاح) .. شغل السياره سريع..وقربها..

توسعت عيونه وهو يشوف الدم.. في بلوزته ورقبته:

وش ذا يبه.. شصاير..!

سيف:مهره.. خشمها ينزف.. ومغيبه.. بسرعه يبه.. ولا احد يحس بشي..

قال كذا ورجع .. الغرفه..

فارس.. نزل بسرعه..

في ظرف دقايق..

كانو في السياره.. سيف يسوق.. ومهره ورى مع فارس.. كان ماسك فوطه تحت خشمها.. وراسها عنده.. وكانت واعيه.. بعدت الفوطه:

خلاص فارس وقف.. شيلها.. خلونا نرجع..

فارس بعصبيه.. شال الفوطه.. وشاف انه وقف:

وش ترجعين.. مهره وش فيك تبين تموتين..

ودت راسها على ورا ..ومسكت انفها من فوق :

تكفون خلوني ارجع.. والله دايخه.. مافيني حق قلق مستشفيات..

سيف يطالعها من مراية السياره.. صفراء ومالها لون.. ولاتكلم..

اعصابه فلتت.. من شافها.. جالسه بدورة المياه.. وخشمها يرعف..

هو اول مااشاف الدم.. نشف.. فكر ان البيبي صار له شي..

كيف كانت بلوزته ورقبته كلها دم. كيف رعفت وهي جنبه.. بحضنه ولاحس فيها..!

خذها.. وبالغصب شربها عصير.. كانت بحالة اغماء..

مهره بالحاح: سيف انا كويسه خلاص نرجع..

سيف :ماراح ارجع الا لمن اطمن عليك.. ودامك ماهو ماكله.. يحطون لك مغذي.. وشوفي مهره.. اذا انتي.. بتعاندين.. كل شوي بشيلك ويركبون عليك مغذيه..

مهره بتوسل وخفوت:باكل بس رجعني..

ومالت براسها على كتف فارس وغمضت..

فارس بخوف:.. وش فيك..؟!

حركت راسها:فيني النوم وربي الكعبه..

طبطب على راسها:تمام.. نامي.. بسم الله عليك..

سيف وقلبه يحترق..

ايش مدا الاكتئاب فيها الحين..تصحى وتنام.. تتكلم وتغفي.. ياربي الصبر..!

******

فتح نواف عيونه في الصباح..

واول مالمح..

وجه زينه.. وهي نايمه على الكرسي..

*تأملت عنقها الطويله.. نحرها.. وكل زينه يفقدني صوابي..

لكنها تستحق الصبر.. اذا كنت عاشق.. ونضجت واحترقت.. هي تبقى جديده في العلاقه.. خائفة.. وحذره.. ولا تلام*

قام.. وراح بعد الجوال من على بطنها..

ماهانت عليه كيف منثنيه كذا.. شالها.. ونزلها ع السرير.. ولحفها..

ظل يتأملها..

الحديث معها.. وتأملها.. وجودها.. يريق في قلبه انهار من عشق وجنون..

‏فاطمٍ قلبي عن الغير يا نشوة رجايّ

‏لا سمعت اسمك غدى فالمعاليق حركه

*******

في بيت راجح..

وصلوا..

سما كانت تراقب السيارة من النافذه الفوقيه وهي تدخل سور البيت..

كانت ماسكه الستاره برجفه وترغب.. ماهي مصدقه..

كانت خايفه ان مشاري يكذب عليها.. وانه صدق خذه..

شافت بيبان السياره.. يفتحون..

وينزلون مشاري ووليد..

ووليد ينحني داخل السياره.. ويطلع منها واهو حامله..

وسيف يتلفت حوالينه.. بدون تعبير..

حست الدموع تنزل من عيونها تباعا ً..

وهي تطلع من غرفتها وتنزل الدرج بسرعه.. وليان وابوها تحت.. وبالهفه وبكى :

بابا وصلوا.. اقسم بالله وصلوا..

راجح.. بتنهيده.. يشيل نظارته.. ويترك المكان ويدخل مكتبه..

سما عارفه ابوها زعلان.. رغم انه سوا كلشي عشانها الا انه زعلان..

مانتظرت تفكر او تتعمق في ردة فعل ابوها.. بسرعه افتحت الباب..

ومشاري يبتسم :وصل ورعنا ياسما..

سما.. تناظره بين يدين وليد..

وهم يدخلون..

ملامحها فيها تعبير فرح.. وبكى.. وتردد وحذر..

وسيف يناظرها.. بدون اي ابتسامه..

همست ملهوفه:سيف.. كمان ماي بيبي..

سيف تمسك في رقبة وليد..

مشاري غمز:سما.. ترى سيف مايعرف انجلش ابد.. ركزي.. لاتخلطين..

تداركت وهي متلخبطه:سيف حبيبي.. تعال..

التفت عليها.. ورجع ضم رقبة وليد..

ليان توترت من الموقف..

حست الصغير.. بيدقر سما المتحمسه..

وليد يداعبه:

هذا وصلنا لسما.. ماتبي تلعب معها.. مثل هاك اليوم..

سيف.. دخل وجهه في رقبة وليد:

آلي..ابي ماما.. ابي فالس..

وليد انوجع قلبه:بنرجع لهم يابابا.. كم يوم ونرجع..

سما قربت بتحاول تاخذه.. بس هو تعلق في وليد..

سما خلاص بتنهار بكى.. وليد.. راح جلس ع الكنب وسيف في حضنه.. :واللهي فللنا نوم.. بالطياره.. وسيف عاد ماخلا لاحد نوم..

سيف يدافع عن نفسه:نمت بس اسوي.. والله..

مشاري خذ سما وجلسوا..

بعد مااشر لهم وليد.. يعطونه فرصه ياخذ شوي ع المكان..!

في الطرف الثاني..

سيف يدخل غرفة في المستشفى.. ومهره حاطين عليها مغذي.. :

كيفك الحين..؟!

مهره :تمام.. والله سيف تبالغ.. ترى خشمي هذا سلمه مافي شي خطر..

ابتسم وهو يحط يده على جبينها:

نطمن.. وثانيا ً باقي ماخلصت المغذيه..

مهره بملل:خلصت وحده كامله ذي الثانيه.. وبعدين حرام.. فارس نايم على هالاريكه.. خطيه مو مريحه .. (مفهيه.. وتقط عراقي بعد.) .

جلس جنبها:شفتيه كيف تحمس وهو يسمع نبض الجنين..

مهره ابتسمت اخيرا ً.. :والله ماغير نفسيتي اليوم.. الا ضحكة فارس وهو مصدوم بالنبض..

باس يدها:

يعني حطي في بالك صاحب هالنبض مهم علينا كلنا.. انتبهي له يامهره..

طالعت وجه سيف بملامحها الشاحبه.. وعضت شفتها.. وبتردد:

سيف وصل..؟!. ولالسى..

طالع ساعته: اكيد وصل..

مهره:طيب كلم خالي وليد.. خليني احاكيه..

سيف:ابشري..

عند بيت راجح.. رن جوال وليد.. رد:

ارحب يا كحيلان.. اعذرني مادقيت.. تو واصلين بيت راجح..

سيف :ها بشر.. وش وضع سيف..؟!.

وليد يطالع سيف بحضنه:والله ناشب بحضني.. مابيضها..

مهره كانت تسمع وليد من سبيكر..

قالت:خالي خلني اكلمه..

وليد :من عيوني خالي..

عطاه الجوال.. :هاك كلم..

سيف حط الجوال بذنه وبس سمع صوتها شهق:ماماا..

مهره عضت شفتها.. :امي..!.

سيف تزحلق من حضن وليد وراح يمشي بالجوال بعيد.. كن مايبي يسمع.. احد وش بيقولون..

قدام نظرات سما المكسوره..!

وليد:ماعليه سما.. كل هالامور بتعدي.. الولد مستغرب.. ومانلومه..

ابتسمت.. وهي تحاول ماتبكي:شور وليد.. انا اصلا ً حاطه في بالي كل ذا ومهيئه نفسي..

ليان ابتسمت وهي تداعب خدها:

سما ولدك كيوت يهبل.. صدقيني نطلع به الملاهي.. ونهبل فيه ينسى مهره وسيف والسعوديه بكبرها..

وليد عقد حواجبه.. ومشاري نهرها:ليااان..!

ليان بلامبالاه:طيب انا شقلت.. ضروري.. بنحبب الولد فينا.. والا كيف بيظل..

وليد:ضروري سما ماتفرضين عليه الامومه.. او تغصبينه يناديك بها.. لمن يكون عنده تقبل..

هزت راسها ايجاب وهي مخنوقه.. وتشوفه بعيد منسجم بمكالمته مع مهره:

اصلا ً واضح ماعندي فرصه..

قفل سيف الجوال.. وجا عطاه وليد.. وفاجئهم لما راح لسما اللي كانت منزله راسها بعد جملتها المجروحه.. وباس خدها..

توسعت عيونها بعدم استيعاب.. وهي تطالعه.. والدموع تملي عيونها..

وصدمهم لما صعد على الكنب.. وضمها من رقبتها: ماما قولي.. ابوسك.. واعطيك حنان..

سما انهارت في دموع صامته.. وهي تضمه :

رووحي.. وش كثر حاجتي لهالحنان.. ياقلبي..

ابتسموا بتأثر.. وهم يشوفون سما تحتضنه بهالطريقه.. واصابعها النحيله في شعره الغزير.. وسيف واللي اقنعته مهره بطريقتها..

هاجد في حضنها.. ويطبطب بيدينه الصغيرات عليها..!

*********

مهره قاومت.. قاومت مابكت وهي تكلم سيف..

تكلمت معه بعقلانيه..!

والحين بعصبية تحاول تشيل الابره الفاضيه باليد الثانيه صاحت:

نادهم سيف خل يفكونها.. اختنقت.. ابي اطلع اتنفس..

سيف مسك كفها وبانفعال:اصبري.. لاتعورين.. خلاااص بناديهم..

فارس صحى على صوتها.. وابوه يحاول يمسك كفوفها.. وهي مو قادره تبكي.. وتصيح انها تبي تطلع وانها اختنقت..

طلع فارس.. نادا النيرس..

و جات وبانفعال من الدم اللي طلع من كف مهره.. وسيف ماسكها:ليش كدا هبيبي.. ليش..!!

سيف :خلاص سستر شيل..

الممرضه تفك اللزقات وباستياء:لاإلوها الا لله.. انتي بيبي.. سوي كدا..

مهره بعجله تفتح لاصق المغذي وبعصبيه:

اخلصي افتحي هذي ماني ناقصتك..

الممرضه انلبخت :بابا.. هذا تحليل.. حق مخزون سكر مافي يطلع..

سيف ياخذ اللزقه يحطها لمهره:انا اجي بعدين اخذه..

مهره برجفه:فارس ابوي.. عطني نقابي..

جابه لها.. وتحجبت ولبسته.. ومسكت يد سيف ووقفت..

ساعدها.. وطلعوو..!

مهره في السياره.. شردت من النافذه وسيف يسوق..

*اختنق.. اختنق.. والدنيا تكتم انفاسي.. ابني بعيد عني.. تفصلنا قارات... وقلبي ورب الكعبه واهن.. *

سيف يسوق ويتلفت عليها.. مسك كفها وضغط عليها..

*احسست ان يده تضغط ببروده على قلبي..! *

******

زينه وكان وقت الظهر ولانها صحت مالقت نواف.. كانت داخله الحمام توضت عشان تصلي.. طلعت وهي تمسح وجهها بمنشفه..

نواف دخل والجوال بذنه:

لابالعكس.. احسن.. يمكن تتغير نفسيتها عن البيت.. خلاص اشوف زينه ونجيكم..

وسكر.. وهي تناظره بتسائل..

بس هو ابتسم وقال:

يعني انتي من جدك بتروحين.. وتخليني..

زينه:لازم.. هو الجيه عشان مهره ولانسيت..

بنص عيون :جاملي.!

زينه تطلع قلم حواجب من شنطتها.. وتحدد حواجبها وترتبهم وهي تطالع المرايه وتقول:

حتى لو ماقلت.. الواقع.. ان حنا قضينا الوقت اصلا مع بعض.. اكثر من مع خيتي..

نواف مستمتع.. وهو يطالعها.. وهي ترتب شعرها بمشطه.. وتضبه.. جا وراها وضمها.. وانفتح شعرها من يدها.. هتفت:نواف..!

طالعها في المرايا.. :

مهره تعبت.. وخذها سيف المستشفى...

بهلع وشهقه.. :خيتي..!

لفها جهته.. :لاتشوهقين. . ويجيك شي. . هي زينه الحين بس كان ضغطها نازل مره.. ونزل مع انفها دم كثير.. هي طيبه الحين.. وخذوها سيف وفارس للمزرعه. علها تغير جوها.. ويبوونا نروح لهم..!

زينه قلبها انخرط ويرقع يرقع :بسم الله وربي انرعبت..

حط يده مكان قلبها.. وحسه كيف ينبض..عقد حواجبه.. بخفوت:

زينه قوي قلبك مايصير كذا..!

******

اصرت مهره ان تعتلي الخيل وتركبه.. بعد ان ذهبت بها الى الاسطبلات..

كنت رضيت على ذلك.. بشروطي.. مع اني خائف عليها والله..

لكن..

كان الشرط ان تآكل حتى الشبع.. وقد فعلت..

احسست انها بحاجه مُلحه لذلك..

علا ركوب الخيل.. من طرق مهره في التنفيس.. كما تفعل مع النعاس والنوم..

كنت ارقبها وهي تتهادى.. على الحصان.. تركض به بخفه.. وتتعامل معه.. وكأنها انعزلت عن العالم..

ماتنفك الدنيا.. الا وهي تطعن في مهره.. مخلفه ندوب في معالمها الجميله..!

وجروح غائرة لاتندمل..

ذابله مثل ياسمينة شاميه.. متروكه بعد حرب..

ربيع مهره احترق.. وبات خريف..

جفت عروق الصبر.. ومات الحوار.. مهره صامته.. تمارس وحدتها دوني..!

رافضه ان يشاركها احد.. وحيده في المضمار..

نرقبها انا وفارس..

بقل حيله..!

ماذا نفعل بأنثى ثكلت ابنها..بمشاركة اخرى.. حقها فيه..!

مهره ضحية عشق عساف وسما.. الملعون..!

جا له اتصال.. وابتعد وهو يرد :

ارحب.. ياطليق الحجاج..

طلال: البقا يابعدي..

سيف:ها بشر..

طلال:مثل ماتوقعنا.. علاقة منصور براجح.. انه يستخدم قطع من راجح.. في غسيل الاموال.. ونسبة راجح.. تكون حلوه بالاضافه للقطعه نفسها.. يعني راجح يصير كأنه يأجر القطعه ويطلع منها ارباح.. ونفس الشي عنده دعم له كامعارف في المجال.. مثل اللي حصل في لوحة ادوارد بفرنسا..

سيف:يعني الحين راجح.. ممكن يطلع من هالقضيه.. لو اقدمنا في شغلنا ضد منصور..

طلال:الى الآن ممكن..ع الاقل لو تعاون معنا.. خاصه ان راجح مرت عليه فتره.. في تهريب الاثار.. بس بعد بحثنا والتحقيقات.. توقف عن هالشي.او على الأقل مافيه شي ضده قانونيا ً. من مده.. راجح بالفعل يشتري القطع والاثريات ويدفع فيها مبالغ جامده.. ومنصور.. هو اللي يشتغل فيها.. في تنظيف عفن فلوسه..!

سيف بعصبيه:كيف يطلع منها ياطلال.. شف الشي الوحيد اني مابي اكون سبب في اذية راجح او اني اغدر فيه..

طلال: راجح ذكي.. تعامله مع منصور نظيف.. والنسب اللي ياخذها.. تحول لحسابه.. عن طريق بيع بضايع من ماركته.. لمحلات منصور اللي عندنا بالسعوديه.. يعني مثلا يبيعه بضاعه تقدر بـ١٠٠ الف.. ومنصور يشتريها بمليون.. فيه عقود واصول..

سيف: اذا كذا ممكن.

طلال ضحك: مااشاء الله مهتم.. بهالحيلي.. ماهو صار جد ولدكم..

سيف بزفره:والله ياطلال.. اني باأحلام العصر.. شي مايدخل العقل..

طلال: واختك مافيه خبر عنها..

سيف : مافيه الا رسايلها لابوي.. كل بين فتره وفتره.. شاهين.. احسه لو يمسكها فرمها..

طلال:الله يلوم اللي يلومه.. والله لو ام عقاب تسويها فيني.. لاارديها برشاش افضيه فيها..

سيف :لله درها اللي متحملتك يالمتصحر..!

طلال:ايه ترى اللي اختك سوته ماهو شوي..

سيف :لاجيت للجد.. عايلتنا فارطه سبيكتها..والله يعين..

طلال:تنحل الامور..وموضوع ولد عساف.. لوتعقد احله لك بمعرفتي..لو عقدها راجح.. ولاشي.. اقدر اطلع زوجتك قانونيا ً.. من القضيه كلها.. لاتنسى ان وحده من الدكتورات بالسجن حاليا ً.. وممكن ناخذ منها شهاده.. بالوضع اللي صار كله..

سيف:والله في بالي هالشي.. بس الحين دام الأمور سلميه.. ننتظر.. ولانظلم بنت راجح.. الورع ولدها.. ولها حق فيه..

طلال: اصيل يابوفارس..

سيف :ماعليك زود..

طلال:المهم بجمع لك نسخ من عقود راجح مع منصور.. وبعض التقارير عن الاثار المستخدمه.. في موضوعهم.. ابيك تشوفها لي وتشيكها وتتأكد اذا راجح يمتلكها او لا..!

سيف:ابشر يابوعقاب..

طلال:بشروك بالجنه.. سلم لي على الوالد والشباب..

سيف:يوصل..

مرت الأيام .. وسما تلازم سيف.. طلعت به مع ليان.. ابهروه بأمكان الألعاب..

اشترت له كلشي يعجبه..!

سيف كان بطفولته.. طايره عيونه.. مو مستوعب وش يصير..

الا نقطة ان كل شي يطلبه ياخذه.. وهالأمر ماهو موجود عند مهره..

كانت تشتري له بس بحدود..

تتخذ معه اسلوب العقاب.. والحرمان والمكافئة..

بس سما.. كأنها تبيه يطلب بس..!.

سما بأنانيتها.. قامت تحاول تلهيه عن مكالمة مهره..

بس مشاري.. يجي ضدها وياخذه يكلم.. حتى فديو..

فكان احيان يبكي بعد المكالمه ويطالب انه يرجع.. واحيان يكون هو مستاء ومعصب.. وتتغير نفسيته لمن يكلمها ويصير ألطف..

راجح..

كان يراقب الطفل من بعيد..

ولايتقرب منه..!

اما سما فكان مايكلمها الاقليل.. وعتبه عليها واضح..

مشاري بس كان ملاحظ ابوه كيف يبتسم بحنيه..

ويشرد في سيف.. اذا كان يلعب.. او يحاول يداعب الكلب الكبير.. يلمسه لمسات خفيفه ويهج..!.

سما حبت الحياه مع سيف.. راحت تطمح.. وتسوي اهداف.. ارجعت للصحافه..!

الكترونيا ً من غير دوام رسمي..!!..

تستغرب من سيف احيان ينزوي.. بعيد.. تحت الدرج.. او بغرفة الملابس.. واحيان وسط دولاب التعليق.. يقعد فيه تحت..

والسماعات بذنه.. ويلعب بالايباد..

اصلا ً هو عنده.. ايبود صغير.. يشبك السماعات فيه.. وينام وهو يسمع..

وكانت دوم تحاول يخليه يشاركها.. ومايرضى يقول( بس حقي) ..!

فكانت معطته جوه.. وانو اكيد يسمع اغاني طفوليه.. متعود عليها..!

كان نايم بفراشها.. وكانت تشتغل ع الاب لمن وقت متأخر من الليل..

لمن قفلته.. وابتسمت بحنيه.. وهي تبوسه.. تعلقت فيه.. بشكل مو طبيعي..

حتى لو هو بعيد.. حتى لو هو يناديها سما وماهو ماما.. حتى لو ماحبها نفس مهره..

حتى لو ماشاف العوض فيها..!

سحبت الايبود الصغير..

كانت مبتسمه.. لما حطت السماعه بذنها.. وتوسعت عيونها.. وهي تشغل الصوتيات.. وتطالع سيف..

كان صوت مهره.. وهي تغني.. وهي تدندن.. وهي تغني له تهويده.. صوتها وهي تقرى له قرآن.. انصدمت..

ان طفل بعمر سيف.. جالس يسلك لها.. كل هالتسليك الجامد..!

ينام بحضنها.. ومافي اذنه وقلبه الا مهره وصوتها..

خذت الايبود وعيونها تجمر وتحترق بدموع قهر..

وتطلع من الغرفه.. حاولت تتمالك اعصابها.. وهي تنزل الدرج.. والبيت ساكن.. ولقت ايباده.. افتحته ع الصور..

صور عشوائيه.. وفديوهات.. سيف ملتقطها لمهره.. وفارس.. وعايلتهم..

وبعض الصور مهره تعطيه وضعيات.. وهو يصورها..

قفلت الايباد برجفه.. وتركته على الطاوله.. اما الايبود اخفته..

راحت عند ركن في البيت.. سحبت زجاجه برجفه.. ورجعتها..

قبضت على راسها بقوه:لااا سما.. لاااا.. لاتضعفين..

قاومت وقاومت...

وتركت المكان وطلعت الحديقه بره..!

****

مهره قررت الاعتياد..

ساندها الجميع.. تقوت بالصبر.. تكلمه.. ويسولف لها.. ويتكلم ان راح وجاء.. واشترى..

نوعا ً ما مطمنه..!

تقنع نفسها.. بالهدوء.. وراحة البال.. عشان البيبي.. اللي قام يبين ببروز بسيط في بطنها..

سندس..

مع انها تعصب على اي شي..

الا انها بهالسالفه اسندت مهره.. وجاتها.. وكانت لها قوة.. تكلمت معها..

عطتها الواقع.. خلتها تتفكر.. ان سيف بخير.. وانها بتجيب بيبي.. حرام.. تخاطر فيه.. باسلوبها وزعلها..

الكل كان خير داعم..!

وسيف مايتركها..

اليوم فاجئها.. لمن جاب تذاكر.. وقال :

وش رايك..

انصدمت:من جدك..؟!

سيف ببتسامه:فارس اجازه حرام تروح كلها وماطلع..

مهره بتردد :بس سيفي لو..

قاطعها:سيف ماراح يرجع الحين.. عارفه اتفاقنا معهم بمحرم.. والتواصل.. هذا الجوالات معنا..!

ابتسمت ودموعها تغورق. :

سيف والله لو ماانت معي مادري وش بيصير فيني..

فتح ذراعينه وهو واقف..:

قومي عطيني هاق.. وعطيني جو.. اللي انهوستي بالمفاجئه..عادي متقبل حتى لو كذب..

مهره قامت وهي تضحك وطوقته بذرعانها.. ضمها وباس راسها وهي تقول:

يعني لو تبي الجد المفاجئه تسطل..

وارفعت وجهها له.. باس شفايفها.. وحط انفه على انفها:

اتمنى انه ماهو تسليك..

مهره :والله من جد.. يمكن تغير المكان يفيدنا وكذا.. وفارس والله مسكين انضغط هالفتره.. ياعمري.. يعني حتى نادر يطلع لذياب وربعه..

سيف:اجل خلينا نجهز امورنا.. قدامنا اسبوع..

مهره تاخذ التذاكر.. وسيف ضامها من ظهرها:

بس وين..؟!

قال :المالديف..

مهره..بمحاولات فرح :وااوو عاد اسمع فيها وماشفتها.. ليت زينه ونواف يجون..

سيف :عن نفسي ماعندي مشاكل.. بس زينه هاللي موقفه اي تقدم مع نواف وقاعده بيت جدتك.. بتوافق..؟!

*****

باليوم الثاني - لندن ..!

كان راجح.. جالس تحت.. ومستغرب من بكى سيف المنهار.. وهو يهاوش..

مشاري.. كان جنبه.. وقدامهم بعض الاوراق.. يشتغلون عليها..

سمعوا سيف وهو يصرخ:

اطيني أقي اقي.. ماما شرته لي..

سما بنفي:

ماهو عندي سيف.. اسكت.. كل ذا عشان ايبود.. اشتري لك عشره..

سيف بنهيار:تجيبين عشر ارميهم باله.. ابي هذا.. اطيني اياه.. والله اكسر جوالش..

والنقاش محتد وسما معانده.. وسيف انفلت مره وحده..

راجح بخفوت:

شف اختك وش مسويه بالورع..!

وقف مشاري ع الدرج:

سماااا وش فيك .؟!..

جاء سيف ع الدرج ينزل بسرعه وهو يبكي بقوه وصوته يرن في البيت كله..

وصل لمشاري.. اللي جثى عنده:

وش فيك حبيبي.. وش مزعلك..!

سيف يأشر بيدينه بنفعال:

ايبودي.. اقي.. من ماما.. وانه (حيوانه) سما خذته..

مشاري :افففف.. يمكن انت حطيته بغرفة ليان.. ولا بره.. ندوره الحين..

جات سما.. وهو يضرب برجله الارض.. :

شاااااالي...! انا نمت.. ابود عندي.. قمت.. اشفته.. سما خذته..

رفع مشاري.. راسه لها بتسائل..!!!

و صدت بعصبيه..

عقد حواجبه:تستهبلييين..!!!

سما بعصبيه:عنده الايباد.. يلعب فيه.. ليش جهازين..

مشاري يحاول يمسك اعصابه وهو يوقف :

وانتي وش دخلك.. وش يستخدم وش يتعامل فيه.. سيف متعود على نمطيه.. لاتقعدين تعفسينها من راسك..

راجح يراقب بصمت..

لانه باعد نفسه.. عن اي شي يخص سما بولدها.. من جا..

سما بانجليزيه.. عشان مايفهم عليها سيف وبانفعال:

مشاري.. الا تلاحظ السماعه في اذنه.. طوال الوقت.. وينام بها.. البارحه بالصدفه.. عرفت انه يستمع لصوت مهره.. كيف بالله سأعلق هذا الطفل بي.. كيف سيفهم اني امه.. وهو يستمع لها طوال اليوم.

مشاري رد عليها بانفعال:

علييك اللعنه.. انتي تتعاملين مع طفل وليس قطه.. مهره امه.. لو وضعتي قدما ً في السماء واخرى في الارض.. لن تتغير هذه الحقيقه..

سما بزفره وضيق.. راحت لمجموعة الألعاب.. وتنادي سيف.. وتبيه يلعب فيها.. : الله ايش هالسياره الحمراء.. تعال سيف.. شوف الشاحنه..

جا سيف بانفعال.. قام ياخذ الالعاب ويرميها.. وباين يبي يكسرها:

مابيها.. يع.. يع.. ماحبك.. ماحبك سما.. ابي ماما.. ابيها..

سما مسكته وتحاول تهديه:ايش رايك نروح نشري كات صغيره.. في محل حيوانات جميييل..

دفها بقووه..

وراح توجه لراجح.. مع ان مافيه علاقه معه.. مسح وجهه ودموعه وبنظره قويه :

أمي(عمي).. انت.. الا.. ديب..

سما مافهمت.. ولامشاري..

مشاري بتسائل :وش اديبه..؟!

بس راجح ابتسم.. ابتسامه حلوه وفهم عليه.. قال:يخسى الذيب.. وش بغيت ياسيف..

سيف باسلوب يهبل :

قل لسما تطيني بودي.. ولاببكي لمن العيد..

راجح بحنيه مد يده:

تعال.. ياجدي.. وابشر..

جاء سيف وجلس جنبه.. ويطالع سما بتحدي..

وراجح حط يده عليه.. وبهدوء وأمر:

روحي جيبي هاللي يبيه.. ولاوالله.. واللي رفع سبع.. مايصبح الصبح.. الا الورع في حضن مهره..

سما توسعت عيونها :

بابااااا...!!!

راجح:لاتكثرين الهرج.. (وبأمر حاد).. هالحين..!

سما راحت وهي تتحلطم..

ومشاري :وش قالك هالبرغي وخذك بصفه..

ضحك راجح.. وهو يطالع سيف :

انتخى فيني.. يقولي لك ولا للذيب..

ضحك مشاري :

امااا قال كذا.. والله مب سهل.. اكيد تعاليم عمامه..

راجح بحنيه.. يداعب شعر سيف :

والله كفوو من رباه..

سيف كان شارد.. بالسجاده.. ورموشه فيها دموع عالقه.. وينتع ويشوهق من كثر الصياح اللي صاحه..!

******

باليل.. وفي بيت فهد بوشاهين..

سلمى تحوس في الصاله وماسكه جوالها.. يبس ريقها وهي تدعي وتطلب.. وتدق ع جوال شاهين وذاك مايرد..

فهد : اقعدي خيلتني.. لو انك خايفه عليهم مارحتي تطامرين بعرس ولد اخوك.. ومخليتهم مع الشغاله..

سلمى بانفعال:فهد.. الله يخليك قل خير ولا اسكت.. معهم شغالتين.. وش يدريني بتصير هالسالفه..

(اللي صار ان شاهين كان راجع من العمل.. وبناته كالعاده بعهدة امه.. دخل البيت فوق الثنعش... ولقى الشغاله تبع بناته.. بره.. وبحضنها ديم.. طايحه من الدرج ومتعوره.. شالها مع الخادمه ومعهم بيان.. للمستشفى.. ولما جات سلمى درت من الشغاله الثانيه عن اللي صار.. وعجزت تكلم شاهين ولايرد..)..!

بعد اشوي انفتح الباب..

ودخل شاهين.. شايل ديم وذراعها بجبس.. ووجها.. ماله لون من البكى.. وخدها في ضربه زرقاء..

سلمى باانفعال وخوف:

وش صار عليها.. وراك ماترد علي الله يهديك..

شاهين بملامح جامده نزل.. ديم ع الكنب.. وبيان جلست جنبها..

وقال للشغاله تجهز اغراضهم..

سلمى بعصبيه:

وين بتروح فيهم بهالليل..

شاهين بجمود.. وهو يعدل ذراع ديم المعلقه.. :

بروح بيتي خلاص انا انتبه عليهم ونونا معهم..

سلمى بشهقه:

الله وكبر عليك.. ترى البزر معرض يطيح.. يعني انتوا ماكبرتوا الا بطيحات وفلقات وشكثرها..

فهد:يجري يايبه.. وهذا البزارين.. الله يحفظهم..

شاهين بحده:

مأمنك عليهم يمه.. يومك ماتقدرين.. تمسكين نفسك عن مناسبات وعروس كان قلتي لي وخليتهم عند خالتي موضي..

سلمى بانفعال:

الله ياشاهين.. هذا مردك لي بعد هالشهور.. ترى لعلمك.. انا عن الربى وملاحق البزارين لي فوق الثلاثين سنه.. الا اني قابلتهم.. وسويت كل شي عشانك وعشانهم.. عاد اليوم عرس ولد خالك.. وجابوا بطاقات لهم.. وبناتك ابد مهب راضين يروحون.. الحين لاحضرت عرس ولد اخوي اطلع غلطانه..

شاهين بانفعال:

يمه.. ديم انكسرت يدها.. وضرب راسها بالأرض..سوو لها تصوير عله يكون تعور راسها.. وضلت فوق الساعه.. تتألم بيدين الخادمه.. ماحد تصرف.. لو صاير فيها شي..

سلمى وهي تجلس عند ديم.. وتضمها :

اووويه عليها نتفتنا.. بسم الله عليها.. لاتفاول..

فهد :

مقدر ومكتوب.. والحمدلله.. جات كذا.. اقعد وعين خير.. وانت اذا رحت ابهم بيتك.. وش بتغير.. خلهم حولي وحول امك.. انت في العمل وتغيب بالايام.. اعقل يابوك.. واطرد ابليس..

شاهين مخنوق.. قلبه ينعصر.. سب جمان داخله ولعنها.. وشتمها...

على الحاله اللي وصل لها هو وبناته..!

******

باليوم الثاني.. سيف مزاجه متعكر على سما وزعلان وحتى مانام معها..

باليل شال مخدته وراح غرفة مشاري.. ابتسم :هاا.. سيف.. وش؟! .

سيف يسكر الباب.. وباين مبتئس:

انام معك.. مابي سما..

مشاري رفع مفرشه له:ياهلا ومرحبا..

جا وحط مخدته.. وانسدح ومعطي ظهره له..

مشاري يداعبه:

طيب زعلان من سما.. بعد زعلان من مشاري..

التفت عليه:

لا.. مازعلت على شالي.. بس سما شليله(شريره)...

مشاري خذه بذراعه.. ويسولف معه ويقنعه ان سما تحبه.. وان مب قصدها..

بس قلب البعير داخل سيف مايبي يسامحها..

اليوم من الصبح.. لمن جا المسا.. وسيف مايكلمها ولايجي عندها..

والغريب انه يتقرب.. من راجح.. وحاسه هو اللي بينصفه لو سما كررت الحركه..

ظل كذا قاعد وساكت ويحرك رجوله بملل.. وراجح نزل نظارته على خشمه :

الى الحين زعلان منها..؟!

هز راسه ايجاب..

راجح: طيب سامحها.. تتوب..

سيف مايطالعه يحرك رجوله على وتيره وحده.. قال بغصه: انا ابي الوح بيتنا.. ماما واحستني..

راجح اندقر عليه..

وهو يحاول مايبكي.. ويمسح بكفه الصغيره عيونه.. ويرفع شعره عن جبينه..

قاله:ماتصلت عليها اليوم..

هز راسه نفي :شالي لاح.. مع جواله.. وسما انا زعلت عليها..

راجح خذ جواله : تعال جنبي.. الحين نكلم..

جا سيف ببتسامه حلوه: انت عندك لقم ماما أمي(عمي)..؟!

جلسه راجح جنبه:قل جدي ماهو عمي.. ونكلم..

سيف بتكنيشه وابتسامه بينت صفة اسنانه :جدي..!

حب راسه.. :عندي رقم عمك.. نكلمه ونكلم امك..

واتصل.. وسيف يطالع الجوال بترقب.. وحاطه سبيكر..

رد سيف:ارحب يابومشاري..

راجح :البقا..يبــ...

وقبل يكمل.. سيف بحماس :اووبه.. حبيبي..

سيف :ابووي..!

سيف الصغير :وحستوني ابيكم..

سيف:واحنا نبيك.. اخبارك.. واخبار سما ومشاري ..

سيف ياخذ الجوال من يد راجح:نمت مع شالي امس.. قال لي قصه.. قالي اميرة دفدع.. (الأميره والضفدع)..

ضحك سيف:اووه.. خليه يحفظك اياها.. عشان لما ترجع تحكيها لي ولامك..

سيف:وينها ماما.. ابيها..

جاه صوت مهره:سيفي..!

سيف وكالعاده من جا من يسمع صوتها يعطي شهقة شوق :ماما..حبيبي..

مهره :بعد عمري وقلبي..

سيف يحط الجوال على خده:يلا بوسيني..

مهره ترسله بوسات..

وسيف اخر شي حط الجوال على عيونه وقال :بعد بوسي عيوني..

ومهره تضحك ومعطته جوه وتقول:واحلى بوسات عيون لسيفي..

راجح يراقبه.. ببتسامه.. واستمتاع..

حاول يقاوم سيف.. ويكون حاجز من الصد بسبب سالفة سما وعساف..

بس ماقاوم.. سيف يدخل القلب وبقوه..!

******

في الصباح وبيت سعود.. موضي في مكالمه مع سلمى..

موضي:يالله رحمتك دويم عاد مافيها عمر عظم على جلده وانكسرت..

سلمى:ياختي.. الكسر يجبر.. والمريض يطيب.. والبزر معرض.. بس شاهين البارح غسل شراعي.. والله كنه ابوي وانا بنته.. مايستحي كلش..

ضحكت موضي :تستاهلين.. يومك بتروحين العرس.. كان جبتيهم عندي..

سلمى:والله استحيت على وجهي.. شايفه وضعك وهمك.. الا وش العلم عن ولد عساف..

تنهدت موضي:اموره ان شاء الله طيبه.. نكلمه ويسولف.. مطير قلوبنا ياسلوم.. ومهره عاد اللي زين مايطير عقلها.. ماغير شارده.. تحاكيه وتضحك.. ومن تسكر.. يتبدل حاله.. الله يربط بعقلها.. ويعقل على اللي في بطنها.. مضيقه صدورنا والله..

سلمى متأثره:سبحان.. اللي سخرها له.. صدق الأم مب اللي تولد.. الله يصبر قليبها..

موضي بتنهيده :اللهم امين..

لحظة صمت قالت موضي بعدها : مالهم حس البنات.. نايمات...؟!

سلمى:لاا.. احنا يالله اقنعنا.. التسلب ابوهم.. ماطلع ابهم بذيك الليول.. والحين من الصبح.. رايح بيته بهم.. مع نونا.. يبيها تنظف في البيت يقول لاينهجر..

موضي :هييييييه ياسلوم.. الله يرد راعية البيت له.. يا ان حال شاهين والبنات غابني..

سلمى:الله يسمع منك ياخيتي.. الله يسمعك منك..!

شوي الا غيرت سلمى الموجه:اسكتي.. البارح.. الهرشه عاليه.. مسويه تكميم..

موضي:احلفي.. وعساها ضعفت..

سلمى :والله راح نصها.. وصابغه الاشقر والثلجي وحاشه شوشتها.. مثل الصبيان.. صايره بعمر العشرين..

موضي:اجل محميد بيخق..

سلمى:ويه مالت عليها وعلى حظها.. هي ماحورفت الا يوم اعرس عليها.. عشان تقهره.. وهو ماغير خامر مع هالمصريه..

موضي تضحك:يحن يحن.. وبعد لاشافها.. تزهزت.. عاد مسكينه عاليه قلبها طيب وفضيخ..

سلمى :والله اتمنى ذلك.. هي ماخرب عليها الا قلبها.. اجل امس بس طقوو.. حبك ذبحني محمد.. رقت على المسرح ترمح.. مااش.. ماجازت لي..

ضحكت موضي :تحبه.. شدراك انتي..

سلمى: حبتها القراده.. وش فمحميد ينحب.. لازين اخلاق ولا شكل. ولاماده.. مايذكرني الا با****..

موضي تضحك وزين ماشرقت بالشاي:

حسبي عليك ياسلوم.. بسك قرض بالاوادم..

وراحت سلمى.. تعطيها احداثيات الزواج بالتفصيل..!

*****

في بيت شاهين..

البنات يراكضون ومبسوطين في البيت.. بعد غيابهم عنه..

والخادمه تشتغل وتنظف الغبار..

وشاهين.. جالس في الصاله ومشغل مسلسل اجنبي.. يتابع..!

كان شارد ولامركز.. بعد حادثة ديم.. حس ان شعور بداخله.. ضد جمان..

حس وده يطحنها.. يذبحها.. لاامه ولاموضي مسئولين..

جمان اللي رمت كلشي ورى ظهرها واهملت الكل.. اسلوبها اناني.. وحقير..!

وبين سرحانه والغضب بداخله..

جاو بيان وديم ويتلاحقون.. والشغاله تصيح وراهم..

اللتفت عليهم.. وانصدم لما شاف ملابسهم كلها الوان... وجبيرة ديم كلها ملطخه وهم يضحكون..

صاح فيهم.. بغضب هايل من فكرة انهم خربو شي من لوحات امهم.. :بيان.. ديم.. وش ذااا..

وقفوا ثنتينهم.. وهم يكتمون ضحكاتهم..

نونا :بابا.. هذا بيان وديم.. سوي خراب غرفة مدام جمان..

تركهم وركض لمرسمها بسرعه..

ودخل.. لقاهم كابين الالوان.. وماسكين لوحه فاضيه عاجينها.. ولاعبين في لوحة ملاحظات.. شايلين الدبابيس من نوتات وصور..

شاهين.. بربكه وعصبيه يرفع الالوان.. ويلملم الفرش.. ويشيك ع اللوحات اللي ع الارض لو صادهم شي..

ونونا جات.. بنب وفوط تنظف :سوري بابا.. انا فوق مافي شوف بيبي..

شاهين يرفع الورق والصور ويرجعها بلوحة الملاحظات..

وبيان وديم..

جاوو وهم يتأسفون.. :اسفه بابا.. احنا نلعب..

بيان :نبي نرسم زي ماما.. اسفين بابا..

وراحت تشيل صورة من الارض.. وتتملغ على ابوها اللي مو راد عليهم.. :شف بابا صورة ماما معها صديقتها الحلوه..

شاهين.. سحب الصوره.. وبزمره:بيان اطلعي مع اختك.. لاشوف وجهك..

وتوه بيعلق الصوره.. انتبه ان في شي مكتوب وراها..

كان مكتوب..

*اورتساي - ايطاليا..

مع اخت لم تلدها امي.. عندما تختلف الجنسيه والديانه.. ويظل يجمعنا الوفاء..

في ضيافة صديقة عمري.. راشيل كرو.. وحاطه تاريخ..

والواضح ان التاريخ.. بايام دراستها بايطاليه..*

فهى شاهين وهو يكرر قراءة المكتوب..

وكأن بين الزحام.. وبين الضيق يخرج الله فرج..!

اتصل على واحد.. رد:

قصي.. قرية اورتساي بالشمال الايطالي.. في عليها طيران داخلي ولاكيف..؟!

قاله قصي خط السير وان اغلبه بيكون سياره.. في ريف الشمال..

شاهين :طيب تمام.. احجز لي اقرب شي..

قصي:ايشبك.. البارح جيت من روما.. حُط لك خيمه بايطاليا وخليك فيها..

شاهين :اقصر الهرج ياقصي ابا اروح راكب.. مابي اروح بدوام..

قصي :افففف..

شاهين.. :وضبط اجازتي حق السنه.. لاني مادري متى بخلص من شغلتي..

قصي :من عيوني التنين..

شاهين :تسلم لي ياغالي...

قفل.. وهو يطالع صورة جمان.. اللي تجمعها براشيل.. بمكان ريفي..!

..........

زينه كانت في غرفتها..

وترتب بعض المشتروات.. اللي خذتها حق جهازها..

ابتسمت وهي تناظر قميص نوم واحمرت.. : ياحليلك يانواف..

كانوا يسولفون مع بعض بالجوال..

وزينه تختار شغلات من موقع تسوق..

وراسله جزمة توريها نواف اذا حلوه..

شوي الا رسل لها رابط.. وكتب ذا حلوو..

كان راسل..

القميص هذا..

يومها كانت بتموت ضحك من الاحراج.. بس تماسكت :

شكلك دخت مع هالعارضه..

نواف :عليك بيطلع احلى.. اطلبيه..

زينه ضحكت :لا مابيه..

نواف:هين..اكسري بخاطري..

طلبته وهو مايدري..!

جاها اتصال:هلا جديده..؟!

صبحا:ها تعشتي..

زينه وهي ترتب الشغلات:ايه الحمدلله..

صبحا: اقفلي البيبان عدل ولاتفتحين لاحد..

زينه:جديده ماهنا الا الخير.. انتي انتبهي لخالتي رحمه.. وعظمي لها الاجر..

صبحا :ليتك جايه كان ابرد لي قلب.. بقعد احاتيك..

زينه:يوووووه.. ياجديده.. ترى عيوش هنا..

صبحا:عويش مندعسه مع رجلها.. بدويرتهم اخر المزرعه.. والله لو يصير لك شي ماسمعتك..

زينه بطفش:ياربي جديده.. شهالفال.. خلاص روحي.. وسلمي عليهم..

وقفلت منها..

وهي تتحلطم..

ياخي وش فيهم.. كانت مكلمه مهره من شوي.. وقالت لها ذيك.. (ياخبله.. انتي تدرين.. ان مضاوي بنت خالي فلاح.. مقطوع سرها مع هاله اخت عبد الاله.. والله تقول يمه انك ماجيتي العزا.. وانك لحالك ويجيك.. الكلب.. ماهو مهدد ينتقم منك..وترى هاله شايله عليك بقلبها)

زينه قالت لها يوووه انتي خيالك واسع.. خلاص قضينا منه الله لايرده..)..

شردت وهي تتفطن بكلام مهره.. وتتعوذ من الشيطان..!..

ناظرت الساعه وحده بالليل..

فجأه اسمعت صوت يخرش عند نافذتها..

ارتجفت برعب..

وهي تقوم تتأكد من النافذه.. كانت مقفله.. طلعت من الغرفه.. وتأكدت من باب الصاله.. ماكان مقفل.. بسرعه قفلته.. كم قفله.. وراحت تتأكد من النوافذ..

وهي تتحلطم برجفه.. :حسبي الله على شرك يامهير كانك جبتي لي الوهم..

وتوها بتتحرك بترجع لغرفتها.. الا حست شخص يسحبها.. ويسكر فمها بكفه.. ويمنعها.. انها. تصرخ..

توسعت عيونها.. برعب.. وحست انها النهايه..

........

بلندن..

مشاري مع عزيز وحسين وياسمين..

كان يقول :

كذا فجأه تبي تكوش عليه.. هي لو بودها.. مايتصل على مهره..

حسين:شوف صاحبي.. الطبيعي هيج.. سما كانت تضن ابنها مات دون تشوفه.. فجأه يطلع عايش.. يعني هي زين ماتحوطه بقرشه وتناظر فيه..

ياسمين :بس سما.. من وجهة نظري.. ماهي عارفه كيف تتعامل معه.. سيف باين ذكي.. وترى تصرفاته ماهو عشوائية.. يعني اهنيه.. على اخفاءة لصوتيات مهره.. لان في شي بداخله كان مقتنع.. ان ممكن احد يحرمه منهم..

مشاري :والله ياان هالسيف ياخذ القلب.. يعني احنا تعلقنا فيه.. كيف هي..

حسين بدفاع:هذا الولد مال مهره.. مو مالكم.. لاتتعلقون بزياده فيه.. بكره تسوها قضيه ان احنا احق فيه..

عزيز:انا اصلا ً اشوف الوضع اللي صار ماله داعي.. سما المفروض تصرفت بعقل.. وخلت الوضع مثل ماهو.. واذا اللتقت بسيف.. تخلي هالامومه ذي بداخلها.. اهم شي هي مطمنه عليه.. وذا شي ابوه يبيه.. عساف كان عنده بعد نظر..

مشاري بنص عيون :قصدك ان اختي فاشله..

ياسمين :انا فهمت وش يقصد عزيز.. سما نفسيتها مو مستقره.. واذا دخلت في مجال العمل تشوفها ماتشوف الا العمل.. يعني انت تقول انها راجعه للصحافه.. لو تعمقت مثل اول.. نقوول لسيف *وبتلحين* (سلم ع الشهده اللي معاك) ..

وقامت تضحك..

مشاري يتصنع الغضب.. يمسك رقبتها.. :

ياسمين ماسمح لك ياتبن.. الا سما عاد..

تبادل معها..

نظره..

ولتبتلعه غابه ياسمين الغريبه.. وهي تبتسم..

ارتبك.. وترك رقبتها..

وضرب الطاوله:ماصارت عشى.. بطني يغرد..!

........

بيت راجح..

سما بعد محاولات فاشله لاسترضاء سيف.. جلست بلابتوبها فوق تشتغل..

وسيف ظل بالصاله تحت يتابع افلام كرتون بالتلفزيون..

راجح جاء وشافه بالصاله..

جلس.. يتصفح كتاب وهو يمه..

خلص الكرتون.. وانقلب سيف لان منسدح على الارض..

والكلب الكبير قريب..

ظل يناظره..

وكالعاده قام يحاول يلمسه ويبعد يخاف..

وراجح ملاحظه الى الان مو جارع لان الكلب ضخم..

ترك الكتاب..

وقام له.. :تعال جدي.. المسه.. مايعض..

سيف يضم يده :حووف شكبره..

راجح نادا الكلب.. وقف قريب.. منه.. ولمس راسه.. :شفت مايسوي شي..

سيف حاول يجرب.. بس يبعد

ويمد يده..

ويوخرها..

الا فجأه نبح الكلب في وجهه..

سيف برعب وهلع.. يدخل في صدر راجح :

الله لعنه.. حوفني (الله يلعنه خوفني)..

راجح بضحكه.. صافيه.. شاله.. :

ماااش ياولد.. طلعت خواف..

سيف :

انا مااحاف.. اركب صان.. والعب مع الدجاجه.. وحلوف.. وعندنا قطاوة.. وسلحفاه.. بس كلب شالي حوف..! (بس كلب مشاري يخوف)

راجح.. وقلبه.. يعصيه.. ويندفع لهذا الطفل..

جلس وخلاه بحضنه..

وظل يسولف معه وراجح..يسمع له ويسولف..

سما طلت من الدرابزين فوق تبي تطمن عليه..

شافته كيف قاعد مع ابوها كذا.. وابتسمت..

كانت الصوره جداً شيقه وجميله..!

مهره بعد مكالمتها من زينه.. كانت ختمتها وهي على اخر درجه..وهي تقول(انا اكلمها واعزيها.. الله يصبرهم.. انتبهي لحالك واذا عيوش مانامت خليها تجي عندك..)..

في الصاله كانوا سيف ونواف وفارس..

سيف:وش صاير من متوفي..

مهره:اخو زوجة خالي فلاح.. وجديده رايحه عندها.. وظلت هناك.. عشان تكون حولها بايام العزا..

نواف عقد حواجبه:زينه معها..؟!

مهره:لاا.. هذه اشغلتني الله يهديها.. ماراحت.. ماتبي تصادف.. خوات عبدالاله وامه..

نواف بعصبيه :تستهبل.. طيب ليش ماقالت لي اتصرف.. ماتوب اختك.. الحين ابن الكلاب ذاك جرع وصل لها هنا ببيتنا..

نواف بانفعال وهو يوقف:

من جدها.. وش قعدها الحالها..

سيف:يارجل.. وهو وش يدريه انها لحاله.. اقعد بس.. الدنيا مو فوضى..

مهره:والله الوضع وضع انو ممكن يدري.. لان عزا بالعايله.. ولو وحده من خواته بتقول زينه ماجات.. هوبا بيدري انها بالمزرعه..

نواف.. شال مفتاحه.. وجواله :الله يلعنه..

سيف بدهشه:وين..؟!

نواف:بروح لها.. بس مهره لاتقولين لها شي ممكن..

مهره ابتسمت:ممكن..!

فارس بضحك:يلعن ابوو الحب شيسوي بالواحد..

خلاهم نواف وطلع..

مهره:ياحليل نواف.. والله شكله صدق حب زوين..

سيف وفارس تطالعوا..

مهره:شهالنظرات.. وش فيكم..

فارس :نخاف نقولك وتفتنين..؟!

مهره بتسائل:وش.. قل فارس..

سيف باسترخاء:ان درا عمك بيعلقك.. ويصلخ جلدك..

ضحك فارس:والله لساني ياكلني.. مهره بقولك.. بس امانه ماتقولين لزينه شي..

مهره :اييييييه..؟!

وخر لها فارس.. كلشي يعرفه عن حب نواف لزينه.. بالزمان والمكان وكلشي..

ومهره مصدومه.. من هالحقيقه..! :

طيب ورى مايقول لها..

سيف:على قوله لغايه في نفسه.!.

******

توسعت عيونها وتبي تصرخ..

وذراعه القويه تحوطها..

همس في اذنها :

انا.. يافالحه.. انكتمي ولاتصرخين..

وشال كفه..

وهي بذهول :نـ.. نواف..!

هدها.. والتفتت عليه وبصياح:خبل انت.. بغى قلبي يوقف.. ورب الكعبه..يبست..

نواف بانفعال:ودامك خوافه وماتعرفين تتصرفين.. وش مقعدك لحالك..

زينه بانفعال:عاد وانا وين قاعده فيه ترى بيتنا.. وترى مالك اي حق نواف تدخل بهالاسلوب وترعبني..

نواف واللي كان معصب اصلا منها:

والله ترى بنفس الاسلوب اللي انا دخلته.. ممكن اي احد غيري يدخل.. ترى انتوا بمزرعه.. وعندكم عزا.. ومجتمعكم صغير.. لو الكلب عبدالاله سواها وش كنتي بتسوين..

زينه وهي تتحرك بانفعال :ماراح يسوي شي.. خلصنا منه.. وانتهينا.. ذا مب مبرر لك تجي بهالاسلوب.. اففف نواف.. اففف..

شافها كيف راحت جهة كرتون مويه محطوط على جنب.. وخذت علبه فرغتها بجوفها وهي ترتجف..

وافتحت ثانيه.. ارشحت وجهها ورقبتها.. وظلت كذا سانده كفها في جدار وكنها تبي تسيطر على نفسها..

ظل يطالعها كذا.. ورحمها.. كيف خافت راح لها حط يده على كتفها:

طيب زينه نعتذر.. ومنكم السماح..

بعدت كتفها.. وهي ترمي العلبه على الارض.. وتركته بالصاله.. ودخلت غرفتها.. وسكرت الباب..!

.....

بعد اشوي..

راح فتح عليها .. ولقاها.. قاعده ترتب.. وتحط باقي الاكياس في الشنطه بعصبيه وتقفلها..

ابتسم.. على مودها وشكلها وهي معصبه عليه.. سكر الباب..

وهو يتلفت في غرفتها.. مرتبه ترتيب.. اللي ولاغلطه مع بساطة الاثاث.. الا ان كلشي فيها يلفت الانتباه.. تركها.. وراح يتأمل في تفاصيل غرفتها وعالمها..

تأمل.. لوحات النسيج.. على الجدران.. وكلها تحمل توقيعها المطرز تحت اللوحات..

ارفف عليها شموع وكتب اغلبها انجليزيه.. وتخص الصوف والنسيج..

شال فريم من على الكومدينا.. فيه هم الثلاثه بعمر صغير..

ابتسم.. على جمال الصوره.. وكيف سندس في الوسط وتحاول تحاوطهم ثنتينهم..

شال فريم ثاني.. فيه صورة ابوهم..

الا سحبته منه:

من سمح لك تلعب في اشيائي..

نواف رفع حاجب:

انتي وماتمتلكين لي..

زينه بسخريه وهي تحط الفريم: ياشيخ..!!

راح عند الرفوف.. : غرفتك.. تشهي للقافه..

سحب كتاب وتصفحه..

زينه بانفعال:نواف احر ماعندي ابرد ماعندك.. والله ولاكنك صفقت دمي.. جاي وتعثي بغرفتي.. بكل رواقه..

هو بنص عيون.. والكتاب بيده:

ليش ماقلتي لي انك لحالك..؟!.. وليش اصلا تضلين لحالك..

زينه :ولييييش اقولك.. وبعدين ادري لاقلت بتجي.. وانت قايلي انك صاحي من خمس الفجر..ليش اشغلك واخليك تمسك درب انت في غنى عنه..

نواف بعصبيه:عنبوك قاعده بمزرعه وش كبرها لحالك.. انتي ماتخافين..؟!

زينه بانفعال:وش يخوفني.. حد يخاف من بيته..! نواف انت شايف شكلك..باين عليك التعب.. لو صاير لك شي بالطريق.. جيتك كلها مافيها سنع..

نواف حط الكتاب.. وقرب منها:طيب ليه ترجفين...

زينه بانفعال :ارعبتني..البيت على انو فاضي وتمسكني كذا.. شعر راسي وقف..ورب الكعبه الى الان احس الدم يغلي.. في عروقي..

كانت تتكلم بدون تطالعه..

حضنها.. وخذ راسها على صدره.. وحبه :

آسف ياروحه.. آسف ياقليبي.. آسف ياعين جدي.. انا غلطت.. بس هي جات كذا يعني بفاجئك..

زينه بتنهيده.. :والله وفاجئتني..

وزفرت..

همس لها:بتسامحيني اللحين.. ولاكيف؟!..

حوطته هي بيديها.. واستكانت على صدره..

مما اثار دهشة نواف..

*اغلقت عيني.. كنت جفلت من افكار مهره.. وامكانية مجيء عبد الاله.. والانتقام مني بتفكيره المريض..!

ازفر واتنهد الصعداء..

ونواف يتواجد معي كاملاك حارس يرسله ربي لي..!

طوقته اكثر.. عله اكثر صدر آمن لي في الحياه.. نعم..!

نواف يفرض نفسه فرضا ً على قلبي..

حبه فرض وعشقه واجب.. وكله مباح..! *.

بعدت راسها.. عنه..

وراحت خذت زجاجة ماي فاضيه.. :

بروح اجيب مويه.. تبي شي.. اجيب لك..

نواف :لا ياعينه ابيك انتي ..

طلعت بسرعه من الغرفه.. وسكرت الباب..

نواف بعد تعب اليوم كله..

ماتردد.. انه يرمي نفسه على سريرها..

اخفى عيونه بذراعه..

*ولذة تسري في عروقي.. رائحتها.. عطرها حولي.. انتشيت لشعوري اني على وسادتها.. وألامس شرشفها..

كيف لو نمت في حضن زينه.. اففففف...! *

دخلت..حطت الماي.. طالعها.. وهي احمرت وهي تشوفه متمدد مكانها..

رفع حاجب: لاطالعني كذا.. مثل ماخليتك تنامين في غرفتي.. لازم تستضيفيني بغرفتك..

زينه : يالله بدينا.. في حركات البزارين..

نواف:والله مانام في الليوان.. مانام الا على فراشك..

زينه : خلاص انا بروح غرفة مهره..

استعدل:عاد كذا بعتبرها طرده..

جلست ع طرف السرير..:خلاص نواف نام وريح شياطينك..

حط كفه تحت راسه:تصدقين طار عني النوم..

انتبه لصندوق خشب على كومدينتها.. مغط عمره واسحبه:الله شهالانتيكه..

وحطه قدامه.. يتفحص الزخارف..

ابتسمت:ابوي كان جايبه من تركيا..وتراه قديم.. النقوش اللي عليه عثمانية..

نواف فرك يدينه ببعض.. :اكيد فيه مقتنيات..

افتحه.. وهي تطالعه ورافعه حاجب.. لقى تجراف قديم.. ورسايل ورقيه.. وشعر.. ملفوف بطريقة انيقه ومربوط بشريط احمر.. شاله كان اسود.. ولقى تحته نفسه اشقر.. نواف:

شعرك..؟!

ابتسمت:ايه.. وذاك شعر مهره..مصيبتنا في متوسط..كنا نشوف قصات البوي في المجلات ودايخين عليها.. قصينا لبعض..وجبنا العيد.. خبينا شعرنا بالعشه..عن جديده.. وصرنا دوم لابسين قبعات.. ودرت جديده من تالي.. ياهي جلدتنا يانواف.. الله يرحم ابوي.. جا وهي تهوشناا.. ومارضاا وتهاوش معها.. تعرف وش سوا..؟!..

نواف :وش..؟!

زينه شردت:حلق شعورنا.. ورتبها.. بالمكينه.. لان كان الوضع شي طويل شي قصير.. والله ياجديده كان بيوقف قلبها وهو يحف عند اذانا بالموس..

ضحك بصدمه:من جدك..

مدت يدها داخل الصندوق.. وطلعت مجموعة صور.. دورت بينهم..

وطلعت وحده.. رفعتها له..

هي ومهره.. بقصات ولاديه خفيفه وثقيله من فوق .. وحلق في اذانهم..

توسعت عيونه.. :

اجراااااااام....

زينه:حلو صح..!

خذ الصوره من يدها.. :شف وقفة الثقه.. ايش هالصياعه يابنت..

ضحكت:والله طول بسرعه.. بس كنا حبينا الوضع.. وقلنا لابوي يسويه لنا من جديد ومارضا..

نواف يطالع الصوره.. ويطالعها :

زينه.. ورب الكعبه.. تاخذين العقل..

عضت شفتها ونزلت عينها..!!

في تلك الليله..

تسامرنا.. لم امنعه من تقليب اشيائي واسراري.. وذكرياتي..

تصفحنا دفتر ذكرياتي القديم.. وكتابات صديقات المدرسه.. ضحكنا..حتى الهسترة..

على سذاجة العبارات.. وغزل الطفوله..

وعلى كلمة (اكتب لك بالمقلوب ليدوم الحب في القلوب)..

(واكتب لك بالرصاص ليدوم الحب والاخلاص)..

والكلمه اللتي تواجدت في اغلب الصفحات..

(الذكرى ناقوس يدق في عالم النسيان)..!

رسائلي مع خواتي..

اغلبها رسائل اعتذار.. او مخططات شيطانيه..!..

او طلبات.. نسردها انا ومهره.. لسندس.. لتكون المتحدث الرسمي مع جدتي..!!

اول رسالة حب تلقيتها..

كانت..

من احمد اخو صديقتي دانه.. قرءنا الرساله معاً.. كيف كان يعدني بالزواج.. وانه لن يتزوج احد غيري.. كيف يصفني بالاميره والجميله والسندريلا..

كان احمد حين ذاك في سادس.. وانا رابع..!.

تزوج احمد.. ونسى وعده.. من طالبه سعوديه.. درست معه في كندا..!

ضحكت:الكلب عشمني.. وراح لغيري..

ضحك :ياكلبه.. وتقولينها في وجهي..

زينه افرطت من الضحك.. :انت شايف القلوب اللي راسمها.. يحق لي.. اتعشم..!

نواف طالع القلوب المسروده على السطور هز راسه:ماقول الا ليتهم ارقدوا..

زينه:حرام عليك.. الولد عويشق وحبيب..!!

نواف بنص عيون.. يطالعها وهي تضحك.. دااااخ خلاص.. وقام يلعن الشيطان..

قام يلملم الاشياء .. :طفي النور.. خلاص وصلت من النوم..

شالت الصندوق رجعته مكانه:نومة العافيه.. قصرت النور وهو انسدح.. وانقلب من الجهه الثانيه.. وقلبه يخفق.. وزينه وقربها.. خطر..

ظل مغمض.. ويحصي تحركاتها.. ويخمن بتظل ولا بتطلع من الغرفه..

كانت تطقطق بجوالها.. ظلت كذا.. بعدين..

حس فيها وهي تغطي الشمعات العطريه وتطفيها.. وهي تشيل الشاحن..

زينه من صمته وسكونه فكرته نام..

النور خافت..

وشيطان نواف صاحي.. فتح عيونه بخفوت.. وهي تشيل بلوزتها ..

*انفرط عقد نبضي.. ضجيج في كياني.. لايهدء.. ارقبها وهي تستبدل ثيابها.. وترتدي قميص ناعم ومريح..

توزع عطرها في معصميها.. وعنقها وعظمتي ترقوتها..!.

ويرتفع ضجيجي اكثر..!

هل سأعدي هذه الليله سلاماً.. ام سأضرم ناري واحرق غزالتي هذه..!!

شعرت بها تجلس ع الطرف الاخر..

تسائلت.. هل ستثق.. وتنام بجانبي..

ام تخرج وتنزوي في مكان لا اصله..

لكنها فعلا ً استلقت.. وهاهي تسحب جزء من البطانيه.. لتدخل فيها.. وتلامس اقدامها اقدامي..

اثنين وثالثنا يجلدني.. انها زوجتي.. ولست ملام..

كنت سألتفت.. وآخذ منها كل شي اشتاقه..

كنت سأقتل البدايات اللتي تخافها..سأخطوو خطوة عنيفه في علاقتنا.. وقد امزق ثقتها.. .. لن احتمل..

في النهايه انا رجل..

ورجل قد عثى العشق فيه وارهقه..!

لكن قبل ان افعل..

توقف فيّ الزمن.. وزينه تتسلل الى ظهري.. كاوزخزة ابرة.. تجلعني استفيق.. من وسوسة ماأنا كنت مقدم عليه..

تضنني نائم..

تتسلل الى كلي بحركات حذره..

تدس ذراعها تحت عنقي..

والاخرى تحت ذراعي.. وكفوفها على صدري...

انفاسها تلهب عنقي..

ومافعلت كل هذا الا ضنها اني نائم ولااشعر..

ثقتها تربى وتكبر..!

الجمت نفسي هواها..

يكفيني..

اننا نتقدم..

في غرفتي.. نامت على الكرسي..

واليوم بجانبي..

والقادم مع زينه اجمل..!

تشبهين الطهر بايام الطفوله

‏والصباح بوسط الاحياء القديمه

*******

في الطياره.. وبادرجة رجال الاعمال.. شاهين يجلس.. ويرتب وضعه..

مضيفه تضحك:اووه كابتن.. هل يعجبك الذهاب كاراكب..غير لائق بك ابداً..

ضحك وهو يشيك.. على الخدمات حوله:

لأقيم خدمتكم للركاب كاترين..

مر الكابتن خلدون:ياواد قوم ع الكبينه.. شكلك غلط هينا ياشيخ..

شاهين:اعتقني ياخلدون.. الرحله هذي محتاج اريح راسي.. اصلاً مافيني اركز في شي..

خلدون:انت ادرى بوس..

وتركه وراح..

كاترين:اي خدمه كابتن..

ابتسم:لنقلع.. اولا ً.. ثم امتنحنكم جيدا ً عزيزتي..(وغمز بعينه)..

ضحكت وراحت..

شاهين.. كان متوتر.. واعصابه تتواكل.. وكان الطاقم كل شوي حد جا يداعبه.. ويمازحه..

وهو مب حوول شي..!

فتح كتاب.. جايبه معه.. وبداخله صورة جمان وراشيل..

يحاول يرتب افكاره..

يرسم خطة.. بحث في القريه.. وده الساعات تطوي ويوصل بلمح البصر..

غاضب منها.. ومشتاق..

عنده كلام كثير..!

عنده عتب.. وعنده توضيح.. وعنده زعل.. وكم هائل من الشتايم والسب..

تنهد بحرقه:

اللهم هون علينا سفرنا هذا واطوي عنا بعده.. اللهم انت الصاحب في السفر.. والخليفة في الأهل ،اللهم اني أعوذبك من وعثاء السفر ،وكابة المنظر وسوء المنقلب في المال والاهل".

ظل يردد دعاء السفر ويستودع بيان وديم.. ويستودع جمان..!

ولاعلم له بقطعه من صلبه.. تنتظره..

لايدري عن فهد.. ولا حتى لديه اي تخمين..!

عندي عشم مثل الكفوف الباردة ورا الهشيم

‏عندي أمل مثل الندى فوق الغصون اليابسة

******

في الصباح بيت سعود..

بيان:لاخالي مالبس بدلة العمل..

سيف يتقهوى:غريبه على شاهين.. بالعاده لو بيسافر.. من غير عمل يقول..

فارس:شكله لقى له وحدتن شق ورايح يعرس عليها بدال جمان الجحود..

سيف:عمتك يا **.. ماتستحي..

فارس :وانا صادق.. انا لو حرمتي تسوي لي كذا اخلعها..

ضحك سيف:انت تطلق.. هي تخلعك..

مهره.. واللي مبسوطه ببنات جمان.. ضحكت:

علمه على مصطلحاتك يابو ماضي معفن..

سيف يضحك:

اشتقت لهالسوالف..

مهره بتهديد:هااا سيف هاااا...

ضحك وهو يقرص انفها:فديت خشيمك.. اللي ختم علي كل شي.. ماعاد بعده احد..

ديم جات.. بعد بحث:وينه حبيبي سيف.. ابي العب معه..

انخطف لون مهره.. وحاولت تبتسم:

رايح عند خالته.. كم يوم ويجي..

وفارس شال ديم في حضنه.. ويبي يغير الموضوع:

وش هالالوان على جبيرتك.. ليش وسختيها من اول ليله..

ديم تتكلم بانفعال: لعبنا في الوان ماما.. وبابا.. هاوشنا انا وبينون.. والله فارس قام مايكلمنا وقال قلعوا بره..

ضحك:قال لكم انقلعوا.. قلعتكم.. ليش تلعبون باغراض امكم..

بيان اللي كانت شارده.. قالت:مسكين سيف صار ماعنده ام زينا.. اكيد قلبه يبكي.. زي انا وديمي..احنا كلنا مسكينين.. !

لحظة صمت تعلقت عيونهم في فم الصغيره.. وجملتها اللتي كانت ناعمه كالسكين.. قاتله كالسم..!

*******

رن جوال نواف.. حاول يتجاهله.. وهو غارق في النوم..

فتح عيونه بخفوت.. وبينقلب ياخذ جواله.. وتنبه لثقل على يده ماهو معتاده..

ابتسم.. وزينه نايمه في حضنه.. مندسه في صدره.. كنها طفله صغيره.. :اففففف.. يالله الجنه..

اصر المتصل..

راح سحب ذراعه.. وانقلب للجهه الثانيه..

توعت زينه مع حركته وصوته:

هلا مها..

مها:صباح الخير..

هو :صباح النور..

مها:يوووو نايم.. آسفه نواف ع الازعاج.. بس الساعه تسع.. فكرتك صاحي..

نواف:ازعجتيني وخلصتي.. وش بغيتي.

مها:ملف الفواتير.. اللي سلمها المقاول امس.. انت خذته.. ابيه عشان اوديه المحاسبه نخلصه..

نواف:ماهو عندي..خذه هادي.. وترى شوفي في غلط في اسعار الحديد.. كلمو علاء يتأكد.. عنبوهم كل ذا ضريبه..

مها:ترى في ضريبه ١٥ بالمئه.. ممكن تكون هذا سبب الزياده..

نواف:لا.. مستلمين الحديد قبل تطبيق القرار.. لايقعد جمال يسوقها علينا.. تأكدوا.. قبل التحويل..

مها:ابشر.. انا اشوف الوضع..

نواف:عساك ع القوة..

وقبل يسكر:ايه مها.. لاخلصتوا موضوع الملف اخذيه لابوي يوقعه.. تراي ماوقعته.. لاني شككت فيه..

ضحكت:ياخي مافيه ثقه بالموظفين.. جمال سنين.. يشتغل مع العم بوسيف..مستحيل زايدها من راسه..

نواف:انا عاد كذا اشك حتى بثيابي.. تأكدي.. وارسلي لي ع الواتس العلم..

مها:ماراح تداوم..؟!

نواف:لا... ابوي عنده خبر..

مها:تمام.. في امان الله..

هو:في امان الكريم..

قفل ورجع الجوال.. اللتفت على زينه.. اللي تطالعه نظره غريبه..

ارتفعت حواجبه:من متى صاحيه..؟!

قامت من الفراش وهي تقول بتهكم :من الوو مهاا..؟! (قالتها بتقليد)..

ضحك وباستغراب:وش فيك تقولينها كذا..؟!. تراها موظفه عندنا..

لملمت شعرها :والله حتى لو انها مديرتك في الدوام.. وش هالوقت الغلط اللي تتصل فيه.. وبعدين اتوقع.. ان ماحد له حق انه يسمع صوتك اللي توك قاعد فيه من النوم.. الا.. زوجتك..!!!

توسعت عيونه وبضحكه.. وهو واقف قدامها:

ليتك يامها داقه من زمان..؟!

اسحبت منشفتها الصغيره.. ونفضتها بقوه.. وهي تعطيه نظره معصبه..

وتتركه وتروح دورة المياه..

نواف بخرفنه:

يااااعمري.. وش هالوجه الجديد..

*****

بعد اشوي زينه معه بالسياره.. قالت:

طيب انا مشتهيه تميس بالسكر.. كيف..؟!!

نواف.. بنظاره شمسيه.. اللتفت طالعها:

هالحين انا بفطرك بره.. عشان اراضيك.. تبين تميس..

زينه:عادي يعني.. مو لازم الفطور يكون كونينتال.. عشان نتراضى فيه.. ممكن يكون تقليدي.. وحسب مشتهى المعده.. وبعدين لازم نتشارك فطور بوريالين قبل نتشارك فطور بو مية ريال.. ولا..؟!

نواف :ماااشي تميس.. تميس.. وتبين معه فول..عدس.. عريكه.. شي..

زينه:لااا ماحبه.. بس خبز.. وبدليك مطعم ثاني ناخذ منه معجنات.. وحمص..

نواف مستمتع حده.. وزينه تقول :

روح يمين.. هناك ذيك البناية في خباز التميس اللذيذ..

*نزل نواف.. وانا ارقبه.. واغازل جاذبيته.. داخلي.. شكله الواضح.. وهو يزاحم الزبائن المتواضعين من عماله.. وبسطاء.. ويطلب لي مااريد.. ابتسمت..وقلبي يخفق سعاده في صباح اصحو فيه.. معه.. وعطره عالق في اوردتي.. وصوته يعثو بعقلي.. ظللت ارقبه.. واحصو تحركاته.. حتى خرج.. بكرتونه.. فوقها الخبز.. *

جاء جهة بابها.. وافتحت له.. حط الخبز الحار في حضنها.. وبخفوت يداعبها وهو يقرب من وجهها:

ماقول الا ليتني.. تميس.. وتشتهيني..

شهقت.. :نووواف..!!!

ضحك.. وهو يطلع ويسكر بابها.. ويركب..!

هناك.. قريب.. كان شافه وهو يدخل المخبز.. واعرفه.. ظل ينتظره بالسياره.. ونيته له قشره..

شافه وهو ينحني عليها ويضحك..

واشتعل.. احترق..

كان مريض بالغيره عليها وهي عنده..

كيف وهي مو في يده..

كيف وهو يملكها شخص ثاني..

كيف ونواف يهمس ويضحك.. ويقترب كذا..

منها..!!!!

*****

في حدث غير متوقع..

نازل يجيب مشروبات للفطور.. من بقاله ...

وهي بالسياره.. وكانت تحط اغاني وتختار.. ومبسوطه.. وتدندن..!!

لما انفتح باب السياره.. وسيل من الشتايم اللي ماتنقال.. وهو يمسك معصمها ويحاول يسحبها..وكأن زوجها الى الان.. وشايفها تخونه مع خويها..

زينه برعب.. تحاول تتشبث بأي شي:هدني يالمريض.. اتركني.. وكانت تصرخ وتنادي (نواف)..

عبدالاله:نستك النعمه انا.. ساكبه بسيارة هالـ****.. وتجولين بالديره.. يالـ*****.

زينه:زوجي ياحيوان زوجي.. اتركني.. لاتفضحني.. الله ياخذك ..

قدرت توصل للهرن ودعست عليه..

بهالحظه كان نواف طلع.. انصدم وهو يشوفه يسحبها كذا..

زي ماكان يسحبها عند بيتهم..

كانت مو في ذمته.. وبغى يذبحه..

كيف الحين..

خلال ثواني نواف كان يضربه بجنون.. يضربه بنية القتل.. كان مو مستوعب.. وهو بحالة هستيريا.. وهو راميه ع الارض.. ويركله..وينهال عليه بسيل من السب والقذف والشتايم..!!

وعبدالاله اللي ببداية الهوشه كان طلع سكين.. وحاول يطعن نواف.. تحرك وانجرح ذراعه جرح شطوله..

وزينه تتمسك فيه وهي تشوف الدم في تشرته.. وحالة عبدالاله اللي اعجنه:

لااايموووت خلاص تركه.. لاتبتلي فيه.. نواف.. خلاااص...

فيه مجموعة رجال.. جاوا وحاولوا يفكونهم..

نواف بعد عنه.. بعد ماتقدم رجال كبير في السن :

ياولدي.. انا في وجهك لاترد هالشيبات.. خله.. هو غلط واحنا شهدنا..والعذر منك ومن الشيخه..

زينه اعرفته.. :ياعم عبدالرحمن.. تكلم مع ابوه كانك تمون عليه.. يفكني من شره.. انا حاشمه الدم اللي بينا.. ومابي اقطع المواصيل بشكوى وسجون..

الشايب:على هالخشم..وامسحيها بوجهي.. والله يرحم من رباك.. وانت ياولدي.. تعوذ من الشيطان.. وبعض العقول ترفع وكبر عقلك عنها..

نواف.. كان من الغضب.. مو عارف يرد رد عدل..

مسك ذراع زينه.. وفتح باب السياره.. ركبها..

وركب جنبها.. وشخط بالسياره.. مخلف صوت مزعج..

زينه تجمع مناديل.. وتحطها على ذراعه.. اللي مايبي الدم يوقف منها..

كل عروقه وعضلاته بارزه.. وهو يصرخ فيها:

زينه بعدي.. لايجيك شي بعد انتي..

زينه:وانا وش سويت..

نواف بانفعال:يومك قاعده بمزرعتكم لحالك.. وش كنتي بتسوين لو ولد الـ*****.. ذا متهجم عليك..

زينه سكتت.. وهو يكمل :

والله لاانهي مستقبله.. يا في السجن.. يافي مصحه نفسيه.. ولد الحرام.. اللقطه.. من يضن نفسه..

وصاح :وين جوالي..؟!!!

زينه نفخت.. وهي تبي تلملم اعصابها.. وعطته جواله من شاحن السياره..

خذه.. وسحب مناديل..

مسح جبينه ورقبته..

وهو يتصل برقم: ارحب يابوسلطان..

فواز :هلا بطليق الحجاج..

نواف يحاول يكون طبيعي:

يارجل ماكنه عندك اقارب.. طلال نشوفه اكثر منكم..

فواز:توني جاي من امريكا.. ثمان شهور كامله وانا هناك..

نواف:بشر تخرجت المدام..

فواز:ايه ابشرك.. ولله الحمد..

نواف :مبروك يابعدي.. الفال لساره تلحق امها وتصير دكتوره..

فواز :بعمرك يابوسعود... وش فيك.. اتصالك وراه بلا.. صوتك مب شلي..

نواف :ادري ان المجال ماهو مجالك.. بس صايره معي سالفه.. (وقال له عن الوضع اللي صار)..

فواز:دحدر المستشفى.. وخذ تقرير.. ارسله لي.. ولو فيه شهود عرفتهم ولازوجتك.. ارسل لي اسامي..بتواصل مع شرطة منطقتكم ومالك الا اللي يسرك..

نواف :كفوو بخوالي والله..

فواز :لاتشيل هم ..

نواف:بيض الله وجهك.. بس اسمع فواز.. تراه مب المره الاولى.. يعني الرجال ماهو ناوي يرسيها على بر.. عطيته فلكه عدله.. الحين.. بس والله لو تكررت ببتلي فيه.. والله لاروح قصاص بسبابه..

فواز:اعقل.. ولاتقول هالحتسي.. مايسوى عمرك.. انا بتصرف.. بس ارسل لي معلوماته مضبوط..

نواف:عساك سالم يابوسلطان.. جعل عمرك طويل.. سلم لي على بوتركي والشباب..

فواز :يوصل.. ياسنايدي..

قفل منه..

راقبته كيف عاقد حجاجه.. كيف فكه مشدود.. وعروقه نافره..

وقف عند مستشفى.. ونزل.. زينه.. طفت السياره وقفلتها ولحقته..

كانت في حالة توتر وعصبيه من كل شي صار.. ووضع نواف.. والغضب والانفعال.. المخيف اللي هو فيه..

وعشان وضعه والنزف.. تعاملوا مع الحاله سريع..

الدكتور بدا ينظف الجرح.. وزينه واقفه.. على بعد بسيط.. وعينها عليه.. والدكتور:

دي بلطقه..هوا شايف نفسوو فين.. سلاح ابيط..ليييه.. ليه.. ايه الهمقيه دي..

وهو ساكت.. ومتجهم.. وبدء الدكتور يسوي له غرز.. وبان الألم على وجهه..

قربت منه.. حطت كفها فوق كفه..

ومع شكة الغرزه الثانيه.. تمسك بكفها.. وضغط على اناملها..

ظلت جنبه.. لمن خلصوا وحط له الدكتور الضماد..

جابت تشرته خذه منها.. لبسه.. وهو يوصي الدكتور ع التقرير..

وكنه اهم شي عنده بجية المستشفى التقرير.. اكثر من علاج الجرح...!

****

زينه تشوفه.. وهو يجمع اغراضها بعشوائية.. في شنطه فاضيه غير الشنطه اللي جامعه فيها اغراض زواجها.. بانفعال:

نواف ايش هالتصرفات.. انت اشتكيته.. وخلاص.. وبكلم جديده ترجع اليوم..

نواف بغضب :لا اسمع صوتك زينه.. والله ماتقعدين بعيده عني يوم..اخلصي بدل ماانتي واقفه شيلي اغراضك.. ترى توني مسوي خياطه بذراعي..

قامت تاخذ الشغلات اللي تبيها.. بتردد..

لقته يتصل على جدتها وبعد السلام والسؤال.. وتعظيم الاجر.. قال لها انه بياخذها معه.. ويبدو ان الجده اعترضت على التوقيت.. وكذا..

بس نواف بصرامه:

مالك لوا ياجده.. بس الزينه معي.. ولو بننتظر الظروف تزين.. كل شوي بيصير شي.. وانا والله ماعاد بي حيل على بعدها ..

زينه كانت تستمع.. وهي تشيل بعض الشغلات اللي تخصها..

قفلت سحاب الشنطه يوم اسمعته يقول:

في عيوني ياجده.. ابشري.. في امان الله..

قفل.. وسحب شنطتها الكبيره.. وطلع..

زينه منقهره منه..

ومن تصرفاته..

بس خفف عليها مسئلة انه ماقال للجده اللي صار عشان مايشغلها ويضيق صدرها..

البست نقابها.. وخذت الشنطه الثانيه واطلعت.. ووصت عايشه ع المكان.. ولحقته بره..

راحت له وهو فاتح شنطة السياره.. ويبدل تشترته اللي كله دم بواحد نظيف..

خذ اغراضها منها وركبهم .!

شوي وكانوا في الطريق.. وبعد لحظة صمت وهدوء.. وقف عند كوشك قهوه.. وطلب لهم شاي.. كان ينتظر..

لما رفع حاجب.. وابعد راسه ورى وهو يطالعها بنظره جانبيه..

وهي صاده.. وباين زعلانه..

ابتسم.. بدون يتكلم..

وهو مايبعد عيونه عنها..

نبهه العامل... استعدل وهو ياخذ اكواب الشاي والماي..

تالي مغط عمره.. وخذ من السيت اللي ورى كرتونة التميس.. عطاه اياه.. :

بوس ممكن تسخين مكرويف..

تردد الفلبيني..

غمز له :سوي حراره وشيل عشرين ريال..

زينه طلعت عن صمتها وهي تلتفت والعامل ياخذ الخبز منه :

هالحين انت شاريه بريالين وبتسخنه بعشرين.. وش يصير لك جُحا..

ضحك : مشتهى الحب ذا.. والله لو اسخنه بألفين..

زينه بنص عيون:سكنهم مساكنهم.. اركدت شياطينك..؟!

عض شفته.. وبنبره حلوه:

والله ان كانك بجنبي ومخاويتني.. للدربٍ ماينقطع.. وبتظل شياطيني هايجه.. ادخل النار..!!.

زينه غرقت في عيونه..

وردت داخلها "اللهم عمرا ً.. لايفنى.. مع عينيك يانواف..!"

ـ الجفا ممنـوع ياسمح المحيّا

والعذر مرفوق والشرهه قديمه .

بعد كم يوم..

كنت امتر واشبر تلك القريه في الريف.. وعقلي لايستوعب.. لوكانت باورتساي فعلا ً.. اي تفكير شيطاني جرها لذلك..

تواجدها في قريه من هذه المنطقه.. من ممكن يخطر في باله..!

اغلب البيوت مملوكه للاهالي..

السياح قليل..

ولمن يستهوي فعلا ً.. الريف هذا والمنطقه..

تعبت.. منذ ايام.. وانا اخرج لساعات..

وماحيلتي الا تلك الصوره..

ومعلومة انها هاوية رسم..!

اضناني الحنين.. وشب في قلبي نار غضب لايرحم..

عزت عليا نفسي.. وانا ابحث عن زوجتي.. بين زحام بشر.. لايمتون لنا بصلة..!

كنت ازداد عصبيه..

حين اسقط فريسة بين فكي اللغه..

فأنا لااعرف من الايطاليه.. الا بضع كلمات.. تساعدني في طلب من مطعم.. او حجز في فندق.. فالعاصمه روما وميلان فيها الكثير من يعرف الانجليزيه ولايجهلها..

اما هنا فالغالب يتعبني.. مثل العجوز اللتي اريتها الصوره.. وتكلمت وتكلمت.. بشكل موسع..!

لكني لم اصل لنتيجة..

الواضح انها عرفت وجه الشقراء راشيل..

وايضا وجه جمان..

لكن هناك خطب في الموضوع ولبس لم تستطع ايضاحه لي..!

حاولت ان اجد احد يترجم.. لكن السوق كان اغلبه.. لايعرفون غير الايطاليه..

اللعنه عليك جمان..!!

وعلى وضعي هذا..

كأني فأره.. في مصيده..اتخبط.. في مأزق ولااستطيع الخروج..

دخلت اورتساي.. وقد اغرتني الجبنه..!

ابتلعت الطعم ولااستطيع النجاه..!!

انتي هنا..

الواضح ان وجهك مئلوف.. لكن لااحد يدلني اين..!

تقدمت نحو محل قهوة.. اقبلت على زوجين.. شابين.. واضح انهم سياح..

سئلت.. وانا اريهم الصوره..

دققوا فيها...

البنت باللغه ثانيه.. تتكلم مع اللي معها.. وهي تشير لصورة جمان..

وهو يأيدها..

طلعت من شنطة الظهر تبعها.. رسمة متقنه.. بالرصاص.. لها..

استأذنها وهو ياخذها..

دقق في التوقيع j.s..

قلبه قرب يطلع من مكانه.. وهو يسئلها.. : عن المكان.. اللي التقت فيها..؟!..

ردت بانجليزيه ثقيله:

انها من يومين.. شافوها وهي ترسم عند نافورة حديقه... تتوسط القريه..

سئلها عن اي معلومات ثانيه.. :

لاادري اين مكانها بالضبط.. لكن لفتت انتباهي وهي ترسم.. وجه رجل عجوز.. يعزف الناي.. سئلتها لو ترسمني.. لم ترفض..رسمتني بل ورفضت ان انقدها حق الرسمه.. لقد كانت امرأه جميله.. بعينان حزينه.. ابتسامتها.. تعلق في الذاكره.. اليس كذلك مارك..؟!

ابتسم الشاب الهولندي:

نعم.. انها لطيفه جدا ً..

شكرهم.. وتركهم..!!

تمر الايام ومو عارف مكانها وين..!

بس الأكيد انها موجوده في هالمكان..

راح عند مطعم قريب.. يطل على النافوره.. طلب له اكل.. والعصر قرب يخلص وهو ماتغدا الى الان..

كان يتلفت بيأس.. في وجيه الماره.. ويدقق في صورة راشيل.. ويدور في اشباهها من الشقروات..!

هناك.. عند مجموعة طيور.. كانت تنثر مجموعه من الحب.. والحمام ينزل ويحل ويلتقطها..

حدق في ظهرها..

شي جذبه لها..

بشيال جينز.. وشوز الوانه ناعمه..

تعقد ايشارب باللوان صيفيه على راسها بشكل تروبان.. ويطل شعرها الاسود من خلاله..

اسواره ناعمه في معصمها..

تلمع مع ارتفاع يدها ونثر الحب..

وقف من الكرسي.. وقلبه يخفق بشده..

تفاصيل مايجهلها..!

تحركات جسدية يعشقها..

مشى بضع خطوات.. وتوقف.. لما شافها تتوجه لعربية بيبي.. وتنحني تعدل مفارش الطفل.. وتروح..

احبااااط هاااائل.. زلزله..!

ماهي جمان..

بيجن..

والله بيجن..!

تهاوى على الكرسي بالطاوله الخارجيه.. واشعل سيجار نفثها بحرقه والم..

عن مجتمع حزن الشوارع و ناسه

‏أخذت لي ، في طارف الليل منفى

‏في خافقي طفلٍ كسى الشيب راسه

‏وفي عبرتي ، شيخٍ على الناي يغفى

******

في المالديف..

وفي فيلا خاصه.. بشاطئها.. وخدماتها.. مهره بفستان ميد ابيض ناعم.. ونظاره شمسيه.. تبتسم.. وهي تشوف سيف وفارس.. بشورتات وواقفين بوسط الماي على قارب صغير قريب. .. ويصيدون سمك..

فارس بانفعال:ورب الكعبه صدت..

سيف : شكلها نشبت سنارتك في حصى..

فارس يشدها.. ويلف البكره:

بوفارس..علي سقف الثقه.. عشاكم اليوم من صيدي..

مهره تضحك:ياخوفي.. نقضيها على تونه يا امك.. ماصدتوا الا سمك صغار كنها حراسين..

فارس:نذر.. اجدع لك سمكه كيلوين.. واقصها من النص واسويها دفتر..

سيف.. يسحب سنارته:لا والله ابوك اللي جاب العروسه..

مهره بترقب.. وفارس.. وهم يشوفون سنارة سيف تهتز.. وهو يسحبها..

وصرختهم اثنينهم بحماس..

لما خرج السناره وبنهايتها.. سمكه كبيره..!!

مهره تجيب السطل سريع.. وهي تدخل في المويه.. :وواووو.. ماشااء الله وشكبرها..

سيف ينزلها بالسطل..

ومهره تضحك مع المويه اللي ترش بوجهها..

فارس :العن امها وش كبرها..

سيف وهو يمسك السمكه عن تنط.. قال:ها فارس وش صار على صيدك..

سحب السناره وباحباط.. :

مااش.. طلع قبقب..

سيف علم مهره وش تسوي عشان ماتهج السمكه الحيه الى الان.. وقال وهو يشيل السطل الثاني وفيه سمكات:

لف السنارات.. واطلع من الموية.. جسمك تحرق.. ياتبن..

مهره تطالع جسم فارس:

اي والله وش فيك صرت خرايط..

رفع نظارته على شعره ويطالع ذرعانه:

تان هذا تان. حالف.. مارجع السعوديه.. الا وانا برونزي..

مهره تحط منشفه على كتوفه:

رح تروش وحط لك كريم اي برنزي.. يبي لك ميبوو.. احترقت حسبي على شرك..

شال مع ابوه الاغراض.. :والله نواف والزينه بتفوتهم هالانعام..

سيف :وقت عشانا توها تقلع طيارتهم..

مهره:يوصلون بالسلامه.. ان شاء الله..

فارس تقدم عليهم دخل الفيلا..وبيده شايل سطول الصيد..

وسيف طوق مهره.. :ها حبيبي.. مبسوطه..؟!

مهره تبوس خده وببتسامه:

ياجعلني مابكيك.. وش لون مانبسط وانت معي..

لعب بشعرها:عمري...

مهره ضحكت مع الوخزات اللي تحس فيها ببطنها..

حركات توها تركز معها.. من سافرت..

وكانت تحس فيها قبل ومع الحزن مو متنبهه هذي وش..

سيف :وش فيك..!!

خذت كفه على بطنها :بنتك.. تغااار مني.. قلت عمري وراحت طقتني..

سيف بضحكه:عمري بنتي.. ولاتزعلين.. ياعين ابوك..!

وراح بايس مهره على بطنها..

.......

في بيت راجح وبعد مكالمة فيديو بين سيف ومهره..

انهار يوم عرف انهم في البحر..

يعني تخيلو طفل ويشوف امه وابوه واخوه في بحر ومسافرين وناكبينه..

انهضم وقام يبكي..

ويمشي في البيت.. وهو يسب ويشتم.. مع ان مهره.. مابينت له ولا اللي معها..

بس سما كان عندها خبر بسفرتهم..

بعد ماقفل قالت..:

ماقالت لك ماما.. انهم مسافرين للبحر شوف فارس كيف مبسوط.. ماما خذت النونو الجديد.. وفارس وتركتك.. ليه كذا يامهره..!!!!

كتم كتم.. وحاول يكذبها.. وهو يقول:

سما انتي كدابه.. والله كدبين..

سما تفتح سناب.. فارس.. :ماكذب حتى شوف..

سيف تجنن من شاف الفله والفديوهات.. وسيف وفارس يسبحون وصوت مهره.. يمهم.. وهم يصيدون سمك.. وضحكهم..

تقوس فمه وتقوس.. وانهااار..

حتى ليان.. استنكرت فعل سما:

انتي من جدك.. لاجد سما تستعبطين.. تراك تضرين نفسيته..

سما هزت كتفها.. :بالعكس.. لن اتوانى عن ابعاد.. مهره تلك من عقله.. انه ابني انا.. لي انا..

فتح سيف المكتب على راجح وبملامح باكيه:

جدي..

راجح بحنيه:جدي..؟!. وش فيك من مزعلك..

سيف:سما تقول ماما راحت سافرت في البحر.. ورتني جوالها.. فارس واوبه يصيدون سمكه.. اناا مايحبوني.. مايودوني..

وانهار وهو يعرك عيونه..

راجح.. ثارت شياطينه.. واستوعب على طول اللي سوته سما..

وهو يجي ويشيله.. ويطلع فيه من مكتبه.. وراح الصاله.. وكان مشاري نازل من فوق.. وواقف بالصاله وبحده:

ليش يبكي اجل.. انا فوق وسمعته.. وش مهببه هالمره..

ليان تقوله وش صار.. وقطعت كلامها..

مع صوت ابوها الحاد الغاضب.. باسم سما..

بارتباك.. تطالع سيف بحضنه.. وضام رقبته:

وش فيه بابا.. لايكون ازعجك سيف..

نزله راجح على كرسي..

وبانفعال حاد.. :والله ياسما.. لو استمريتي.. تكيدين ضد مهره.. وماانتي حاطه مشاعر هالصغير.. في الحساب.. والله ماتشوفينه ولاتشمينه.. الا لاملى الشعر وجهه..!!

حي ميت.. ماطولينه..

سما باستنكار :بابا.. وانا شسويت..

راجح بصوت زلزل البيت:

عارفه وش سويتي.. والله واشتغل عقلك.. اللي نايم سنين.. وحطيتي شره باولد عساف..

سما بعصبيه:ولدي بابا ولدي..

لوح بسبابته:اوووص.. ولاتقولينها عنده.. الورع ولد عساف وامه مهره.. وبيض الله وجيهم ان كانهم عطوك اياه.. من باب.. الخوف من الظلم والظليمه.. ولاانتي.. يوم ابوه نفاك من الامومه.. كان عارف بلاك.. عارف انك ماتصلحين حتى تربين جرو صغير...يابنت الكلاب.. بس انا اللي ماعرفت اربيك..

مشاري :صل على النبي يبه وحصل خير..

راجح بغضب مب عارف يسيطر عليه:

انا الغلطان يوم سعيت لك في رجعته.. ولا عقليتك.. هذي ماتقدر حتى تحب نفسها.. لاتمتحنيني ياسما.. وارجعه قبل حتى تقضي المده اللي اتفقنا عليها..

سما بانفعال وعصبيه:

من ترجعه له.. لاهله وهم مابغوها الا من الله.. رايحين.. يتمشون بالمالديف.. والوضع عادي وطبيعي عندهم.. وكأن مهره.. كانت تبي الفكه.. وتحررت..

مشاري بعصبيه ودهشه:وانتي تبين البنت تقعد تبكي.. وتلطم.. البنت دخلوها المستشفى من فرقا ولدها.. سيف.. قاعد يحاول باللتي.. يحفظها واللي ببطنها.. وان طلع وسفرها.. وش يدخلك تقهرين الورع.. خبله انتي..

ليان تكلمت:تفكر انها لاسوت كذا.. بتاخذ سيف بصفها وتكرهه بمهره..

راجح باستياء واشمئزاز:

ياعزي عليك يابومشاري على هالخلفه.. ويافري جيبي.. هذا اللي خذتوه من الغرب.. النجاسه والغدر..

ومسك يد سيف وهو يطالع كل شي يصير بدموع عالقه.. :قم جدي.. قم..

سما بتحذير.. وعصبيه:انتبه بابا.. تسوي شي.. والله تخسرني.. قلت والله.. وقلت لك اهله مو في السعوديه اصلا ً..

راجح بتهكم.. يتوجه للباب. :

والله مايصعب علي اخذه لهم حتى لو انهم بالقمر..

سما ماتت خوف.. وهي تروح لمشاري:تكفى مشاري تصرف.. رح لايسوي.. شي.. الله يخليك.. والله ماعيدها.. بس لاياخذ سيف عني..

مشاري طالع شحوب وجهها وشفايفها:

انتي لو تعقلين شوي.. كان احنا بخير..

وخلاها ومشى..

........

كافي تعب ياضيقة الصدر تكفين

صكي زراير هاجسي .. واعتقيني

غصيت في العبره مثل حد .. سكين

قومي عن ضلوع الصدر وارحميني

مهره على كرسي على البحر.. منبطحه على جنب وشارده.. مع صوت الموج.. ولحظات الغروب..

مكالمتها لسيف.. عورت قلبها..

خلاص ماعاد تطيق بعده..

كان يسئل بفضول عن صوت البحر.. وعن فارس.. ليش مو لابس بلوزه..!

ويسئل انتوا وين.. وش تسون..

ابتسمت بدمعه..!

فعلياً ماناقصهم الا هو..

سمعت صوت خطوات تقترب منها.. لقته فارس.. جاي بكوكناتا.. فيها مزاز..

وباليد الثانيه كاسه كبيره شفافه مليانه فواكه استوائيه.. رفعت عينها له بدون تتحرك..

بخفوت:

كيف جسمك الحين..

ابتسم :حطيت من الكريم اللي عطيتني.. وبرد.. قومي.. جايب لك تصبيرات.. قبل العشا..

استعدلت.. وهي تمسح دموعها.. وتشتت نظرها.. وتلفتت :وين ابوك..؟!

فارس:راح لادارة المنتجع.. يبي يأكد حجز الفيلا اللي جنبنا.. ويجهزونها.. عشان نواف..

فارس لاحظ ملامحها.. وضيقها.. حط الشغلات اللي بيده.. على الطاوله وقعد جنبها.. :

وش فيه.. ليش البوز.. ذا الحين..

ضحكت.. وهي تمسح دمعه:

ولاشي.. هواجيس..

فارس مسك بطنها بلطافه:شكلها سدن ملعوزتك.. هااا.. هااا.. يالشينه.. وش مسويه..

ضحكت :

خلاص سميتها سدن..

فارس:عاجبن الاسم.. ان ماسميتوها سدن.. انا بناديها فيه..

مهره:تم ياابوي..مايسميها الا اخوها..

فارس عطاها الكوكناتا.. :اشربي.. لذيذ.. يسرسح

خذتها مهره:

يسلموو ياحيي..

******

على ظهر يخت.. فخم.. سيف يطالع بانبهار :

السفينه تتحرك جدي.. الله..

راجح.. وحوله رجاله.. ومن ضمنهم هاشم.. الاقرب والأوفى.. :

ايه ياجدي.. انبسط وتبي نصيد سمك نصيد..خلهم يجهزون السنارات ياهاشم..

هاشم ببتسامه:انتا تامور امور عمي..هسا نجهز كول شي..

وداعب شعر سيف:كون ابرك اللساعات.. نچوف فيها عمي سيف..ويطلب منا شي..

سيف عيونه تتلئ ع البحر..

وهاشم اللتفت لواحد: قاسم يابه.. جهز عدة اللصيد.. وجيب العدة مال الصغير اللطالبها منا عمي ابو مشاري..!

قاسم نزل في غرفة.. شوي ورجع.. ومعه.. جاكت سيفتي حق الغرق..

عطاه هاشم..

جثى يلبس سيف..:ليش هذا..؟!

هاشم يقفله ويرتبه:

هذا.. حتى وانت تصيد يسلم لي عُمرك.. ماتطيح ويعورك اللبحر..

اللتفت على راجح يطالب بترجمه.. ضحك :

يابابا.. اللي بيصيد سمك لازم يلبس كذا..

سيف:فالس.. فاسخ ثيابه وهو يصيد.. ليش انا اللبس هذا زي البلونه..

راجح:فارس.. عاد اكيد على الشاطي.. ولااحنا بنعمق.. يابوك.. عشان اطمن عليك..

سيف مافهم كل شي..

الا ان راح يتحرك في اليخت بانبهار..

هاشم:شلون على موعدنا مع منصور عمي تريد نلغيه.. لو نأجله.. لوگت ثاني..

راجح:لا ياهاشم.. خلنا على موعدنا.. هو بيجي باليل..

هاشم :هسا انت تقول تريد تظل باليخت مع اللصغير..لمن باجر..

راجح:ايه.. ماعليك.. سيف اموره طيبه.. اللحين يتعب من اللعب وينام..

.....

باليوم الثاني..

شاهين.. في رحلة بحثه..

انتبه لمحل.. لبيع عدة الرسم والا صباغ.. بواجهه زجاجيه..

دخل وسئل حرمه منهمكه في ترتيب بضاعه جديده..

جاته.. ومافهمت عليه.. طلع لها الصوره.. شافتها.. وبحماس تشير.. لصوره:راشيل.. راشيل كرو..

سئلها بالهفه.. وين تسكن..

فهمت من اشارات يده.. انه يسئلها عن السكن..

والحرمه تقوله ان راشيل مسافره..

وتشير بيدها.. زي الطياره وتقول انها ببرلين..

اصر انه يبي يعرف مكان بيتها..

نادت ولدها.. جا من سلم جداري وواضح ان يشتغل بالسقيفه تبع الكوخ..

قالت له..

وجا الولد ذو السابع عشر.. وقال بانجليزيه سليمه:

راشيل سافرت.. لكن توجد صديقتها العربيه في المنزل..

نبضه.. عروقه.. مشاعره.. تفجرت.. تعرق جبينه.. من فرط..الشعور.. والوصول.. بخفوت:

هل انت متأكد..؟!

وعطاه الصوره:هذه..؟!

الشاب :نعم.. نهاية الاسبوع الماضي.. اتت للمتجر.. واشترت.. مستلزمات للرسم.. انا اوصلتها لها.. بنفسي..

شاهين.. :اذا ً.. ارجوك.. اوصلني للعنوان..

الشاب طالع امه.. وسئلها..

الحرمه طالعت شاهين وكنها تبي تستشف خيره وشره.

بعدين هزت راسها ايجاب..

وشوي كان شاهين يمشي مع الشاب.. اللي يتوجه فيه لبيتها..

*تضخمت المسافه.. المتر اصبح كيلو..والثانيه ساعه..هل حقا ً سأجد متمردتي.. اللتي اختفت شهور مخلفتنا ضحايا.. بعدها..

توقفنا.. بعد.. ان مرت ساعات افتراضيه بالنسبه لي.. لكن الحقيقه هي عشر دقائق تفصل المتجر عن المنزل. الحجري.. المحاط بحديقه مليئه بالورد.. واغصان مزهره تتعلق في النوافذ.. وعشب ينبت.. في كل مكان.. حتى فوق القرميد..!

اشار الولد ان هذا البيت..

وتركني وذهب..!!

تقدمت ببطئ.. لحاجز هش للحديقه.. مجرد باب صغير.. مفتوح.. وضعت كفي.. ليُفتح بمرونه..

ظللت اقف.. كأني لا اصدق..

اني سأطرق الباب وتفتح جمان..!

وانا افكر كيف سأطرقه..

كيف سأمشي الخطوتين الفاصله بيني وبينها..

كيف.. لو رأيتها..

هل اضمها.. ام اهشم عظامها على فعلتها بي..

غاضب.. وبي شوق عاصف..

وكلي تناقضات..! *

خرجت طفلتين شقروات.. وهم يتكلمون الايطاليه وباين يودعون جمان اللي ردت عليهم بنفس اللغه...

مروا من خلالي.. كافراشات خرجتا من عنق الزجاجه..

الزجاجه اللتي تخبئ زهرتي السامه..!

زهرتي الشائكه..

صوتها مزق بقايا روحي..

نبرتها.. ولو انها تكلمت باللغه اخرى..

تقدمت والباب تركته الطفلتان شبه مفتوح..

وبما ان راشيل مسافره والطفلتان.. اللتان كما يبدو تحشوان وقت فراغ جمان ووحدتها.. قد ذهبتا..

وضعت كفي على مقبض الباب..

لينقبض قلبي وجمان.. تخاطب احد.. ذكر.. بنداءات.. اخترقت عروق قلبي وادمتها:

يلا حبيبي.. اصحى.. حياتي.. قلبي.. يعني ماصحيت من هذرة البنات.. وش فيك.. وش صاير اليوم..

وباين انها تركت الصاله.. وراحت مكان ثاني.. وهي تكرر كلمات مرحه..

*استبعد فكرة الخيانه.. واستبعد ان جمان تفعلها.. ومستحيل.. اصلا ً.. تحب غيري..

يمكن الجزاء من جنس العمل..

لاا.. لاا.. الا طهرك ياجمان مايتجنس..!

فتح الباب بخفوت.. ودخل في الصاله الهاديه..

غير مصدق بالكارثه.. انها مع رجل.. غيره..

ولو ثبت.. سيقتلها.. ويقتله.. سيمشي في جنازتها.. ويعترف بفعلته.. سيطبع فقدها شامه في قلب عمه.. الذي ايدها..وآمن بها.. ودعم فعلتها..!

قبل ان يقتلها..!..

سيعذبها.. ويلعنها.. سيقتلها ويمثل في جثتها.. سـ.....

وقطع كل ذلك..

فهد وهو يناغي.. ويتحرك في فراش ارضي.. وسط الصاله..

سكر الباب بدون صوت..

واصابته رجفه.. وهو يشوف كفوف الصغير واصابعه تتحرك.. لفوق.. ورجوله تتمغط بعد نومه باين طويله..

حس انفاسه بتنقطع..

وهو يتقدم اكثر نحو الطفل الصغير..

عجز يستوعب اللي صاير..

عجز يجمع قطع البازل وتطلع الصوره..

وقف بالضبط عند فراش فهد.. بطوله الفارع..

والصغير مثل الارنب.. عند رجوله..

*وملامح فهد تترجم لي قصة انتقام جمان.. اتسعت عيني.. وانا اجثو بركبتي.. بجانبه.. لم اميز هو ذكر او انثى..

لكن ملامح فهد.. ولونه.. وعينه..

مازالت امي تحفظ لي مئات الصور وانا صغير..

فهد.. انا في طفولتي..

عليك اللعنه ياجمان..

عليك غضب من ربي لايرحمك..!

كيف فعلتيها بي..

اي سواد في قلبك..!

شاله بحذر.. حط كفه ورى راسه.. اغمض عيونه وشم رقبة الطفل.. لاتمتلئ عينه بحمم دمعية.. احرقت اجفانه..!

جمان كانت في المطبخ.. جات..

شهقت بهلع.. وهي تشوف الشخص اللي معطيها ظهره..! وشايل فهد بهالطريقه..!

ماعرفته.. في بادئ الامر..

شاهين كان اكثر نحافه.. شعره كان طاول وعاقده بمطاط..

هي ثواني.. بسيطه.. حتى ابتلعتها جاذبيته وكيانه..اللتي وان نكرتها عينها.. لاينكرها قلبها..!!

وهو يلتفت ببطئ.. مع شهقتها..

كانت لحيته طاوله بشكل مرتب..

ناحف.. اهمل نفسه.. متغير كثير عليها.. عظمة وجنته بينت.. سواد جفونه..حالك كاظلمة ايامه بدونها..

مااستوعبت وجوده..

ولاوقوفه..

ولافهد بين يدينه..

يناظرها.. بكل عتب الدنيا.. وبكل عشق مرضي مر على قلوب البشر..!

******

سما تهاوش :لاا أوفر.. والله.. ياذا هالولد.. اللي تعلق في الكل الا فيني..

ضحكت ليان:عاد من كان بيتوقع انه بيسوي هالعلاقه مع بابا وبيكشت فيك..

مشاري مسترخي على الكنبه.. ويحرك جواله.. وتوه مقفل من ابوه وقاله انهم حتى الليله مب جاين :

والله ياسما.. سيف.. شكل جوه عالي مع ابوي.. من ضحكه يالله سمعت ابوي وش يقول..

سما بانفعال:

وانا يتبكبك عندي ويدور مهره..

مشاري:خلينا واقعين.. سيف يتأقلم معك وبدء يحبك.. بس انتي.. من تطلعين انانيتك في انك تكوشي عليه.. تبدا اخلاقه تشين..

سما بعصبيه:اف.. اف.. هو اهم شي مارجعه.. وش يحس فيه بابا.. بهالتصرفات..

في اليخت..

راجح شرد في سيف وهو يتعلق بذراع هاشم.. ويحاول يوصل للكوره بيده الثانيه.. وطرى عليه الوضع البارح..

هو ومنصور.. في طاولة بعشاء فاخر.. على ظهر اليخت..

راجح :فكني يامنصور.. تهريب.. تعرفني مهون.. ودخلتي معك في تهريب لوحة ادوارد.. والله عشان العشره.. مابغيتك تتوهق..

منصور رفع حاجب:

العمليه فشلت.. لاتحطها برصيد خدماتك لي.. خسرت فيها مبلغ.. يبي له تعويض..

راجح بعصبيه:فشلت بس بأقل الخساير.. انت تدري لو طاحوا علينا وش كان بيصير.. والله مايفكنا من السجن.. الا عزراييل..

ضحك منصور:

مااش ياراجح.. رق عظمك وصرت تخاف..

ضرب راجح الطاوله:

خليني انظف ملفاتي وحياتي.. مابقى في العمر كثر مامضى.. وعملية فرنسا.. كنت حاسبها الاخيره.. معك.. لاتطولها يامنصور.. وكثير اللي يشتغلون معك..

منصور برواقه.. واسلوبه الفخم:

تعرف ان الشغل النظيف.. والسنياروهات النظيفه.. عندك.. وعند ذيبان.. الله يرحمه.. ولاتسوي فيها اخر عمليه معي.. وتروح ماراح خويك...

عقد راجح حواجبه :

وش قصدك..

منصور.. يشرب من الكاسه قدامه:

ماقصد شي.. لو انه عايش.. وماطلع من شغلنا.. كان الدنيا تتحرك على طقة اصابيعه..

راجح مارتاح.. وحس انه منصور هدده تهديد مبطن.. :

منصور للمره المليون.. اسئلك.. انت لك يد بموتت غازي..!

منصور بضحكه:

مات موتة ربه.. حادث.. ياراجح.. بقى هذي اتهمني فيها.. لاتنسى انك اتهمتني اني حرضت زوجته واني تسببت في الانفصال عشان حبيتها..

راجح يستند ع الكرسي:

والله انت بذرة شياطين.. وهي ارض خصبة.. اسئل الله ان عيالكم.. مايطلعون عليكم..

منصور بعدم اهتمام:

اسامه متعلقن في عمه... قاطعني ولد الكلب.. وباسل.. لاحقه.. بس خل اروق وادخلهم الكار صح..

راجح هز كتفه:عمري ماشفت اخطائي صح.. وعمري ماتمنيت مشاري يمشي على خطاي..

منصور يشرب بقية الكاسه:

قلبك ضعيف.. ليته زي عقلك.. كان عينا خير..

طلع في ذيك اللحظه سيف يعرك عيونه.. مشى لعند راجح:جدي..!

طالعه منصور.. وهو يشيله بحضنه:عين جدك..

سيف :انا قمت مايمي احد.. اخاف..

ضمه راجح.. وسيف يرجع ينام من جديد..

منصور يحدق فيه.. :

هالولد.. منهو عليه.. متى صار عندك حفيد ياراجح..!

راجح ماتمنى.. سيف يطلع.. ولامنصور.. يدري عن وجوده..

نادا هاشم.. :خذ الورع لفراشه..وخلك عنده.. لايخاف لحاله..

منصور بضحكه:

ليش ماتثق فيني..

راجح بخفوت:وين وصلنا بكلامنا..

قطعه من حبل خياله.. سيف وهو يضم رجله.. :

قول هاسم نروح صان..

ضحك وهو يشيله:قضينا البارح في البحر.. والليله نروح المزرعه.. ابوي سيف وش يامر فيه بعد..

سيف يعانقه ويبوس خده:

يابيبي ياجدي..

******

لحظه قاتله..

صمت مطبق..

شاهين يحتضن فهد.. وهي واقفه.. صاحت بحده:

وش جابك.. كيف وصلت لي.. لو ابيك كان رجعت..

شاهين بصدمه:

انتي وش.. جدار.. ماتحنين.. مالينتك الايام.. راسك اليابس ماكسرته الوحده والغربه..

جمان بعصبيه :

مابقيت فيني شي يحن.. ولابقيت شي يروف ويشفع..!

قالت كذا وهي تصد وتتحاشى شوفه..

شاهين بانفعال.. :

هذا وش.. هذا وش.. ياجمان.. ..!

وكان يقصد فهد..

ناظرته ببرود وبنص عيون وبتشفي..تبي تشوف حجم فعلتها فيه:

هذا فهد .. هذا فهد يابوفهد..

طالعها بصدمه وكفوفه ترتجف بالصغير..

عرف من اول ماشافه.. بس الحقيقه وهي تطلع من لسانها.. مره..

تبعاتها كثير.. كيف حملت فيه بوحده.. كيف ولدته.. من كان معها فاوجاعها.. من مسح على راسها.. وقال لها "هانت".... كيف عانت ماحولها احد.. !!

فهد سمي ابوي.. حلمي.. وحلم جده..!

فهد فرحه كبيره للعايله..

كيف اختصرتها.. واحتكرتها.. وش هالحقد ياجمان..!!!!!

رفعت حاجب.. وبنبره شامته لكنها اخرجت مهتزه.. مُعذبه.. : ماكنت تستاهل تدري بحملي به.. لاني حملت به غصيبه.. بالضبط باليله القشرا بعد ماجينا من زواج سيف.. خبيت هالشي داخلي.. ..وبعيد زواجنا.. جيتك بظرف.. وبه نتيجة التحليل.. قلت.. هذا هدية عودتك الحميده لي.. وهذا صافي النيه..

من بين اسنانها:

رحت لهاااا.. خليتني بعيدنا.. خليتني..ورحت.. شفتها غاده بحضنك تدور عزا امها فيه..

وبحده وغضب وانفعال.. :

منهي غاده تحلل لها شي لي.. منهي غاده..اللي مانسيتك اياها.. منهي غاده عشان اصبر لانك متعلق فيها..حبك القديم..!!!!!!!

خرا عليك وعليهاا..

كانت تتكلم.. وتوصف الوضع وشعورها.. بحده..

اعتاد شاهين منها التجاهل..

ماتواجهه...

دوم تبين انها ارخصت فيه لغاده..

ودايم تعطيه شعور.. انك اشبع فيها..

سدح فهد على الكنب.. وراح قرب لها..

بعدت وهي تمد كفوفها بتحذير :

لاتقرب مني.. خلك بعيد.. ماتحملك شاهين.. ماتحملك..

وقف شاهين ورمى كفوفه بيأس:

ليش ماقلتي لي وقتها.. ليه ضميتني وانتي تطعنيني من ظهر.. ليش ماتواجهين..ليش تجمعين في قلبك.. لما اسود ضدي.. وماخليتي فيه ذرة رحمه علي. ..

جمان بحده.. وزعل:

ماذكرك فيني.. ولاانبهك ماتخوني.. انا بنت سعود..عندي كبر وعزة نفس.. والله يغطونك ياشاهين.. ويخبون عليك..

صاح فيها:بس انتي تدرين.. ان اللي صار عارض.. وانك انتي بقلبي..ويوم وعدتك من تالي.. كنت عند وعدي.. احبك جمان.. واللي رفع سبع مافي قلبي غيرك..

ضحكت بتهكم ومرار :

قال كيف عرفت انها كذبه.. قال من كبرها..!!!!

شاهين بغضب:

وش تسمين صبري عليك.. حد يرضى.. مايدري مرته وين.. اي ارض تتوسد.. واي سما تلحفها.. عزت علي نفسي ياجمان.. لاسئلوني بناتك.. ولا ادري وش اقول.. رحت لابوي حمدان.. بالعيد.. اعايده.. مالقاك معي على العاده.. تدرين وش قال يوم كذبت انك تدرسين بره.. قال والله من الدياثه.. مخلي حرمتك لحالهااا..وغيره وغيره.. والله لولا كبرك بقلبي.. ان كان طلقتك غيابي.. ومارديت الشور لاحد..

جمان بضحكه.. مريره ودموع:

لاااا تقصر.. انت منتهي بافعالك فقلبي من زمان.. وش تبي من حرمه تسمعك تهمس لغيرها.. تطلع في المقاهي مع غيرها.. غاده ياشاهين كانت تطالبك تطلقني.. عشان ترتبط فيك.. متخيل ان وحده ماتسوا.. تناطحني فيك.. وتقول يا أنا ياهي.. وصبرت.. وقلت بناتي.. وقلت يحبني.. وقلت.. بكره يصفى ذهنه ويرد لعقله.. بس انت تغرق زياده..!. ..

لاانت سفيه وبنعقلك.. ولامسحور ونقرا عليك.. كنت عاصي على بصيره.. تدوس على قلبي وتمشييييي..!

شاهين بصياح:وراس فهد اللي ماذنت في اذنه لين الحين.. اني يوم وعدتك كنت قد الوعد.. وكان مافي عقلي ولاقلبي الا انتي..والبنت دقت علي.. في ظرف اقشر.. امها توفت.. ان كانها طبت في حضني.. من حزنها.. ولا والله.. ماكنا نسويها.. علاقتنا فيها حدود.. ولا انا بايع عاد الدنيا والدين..

مشت بانفعال وامسكت راسها :

لاتبرر لي.. قلبي محترق.. ولايبرد حرتي فيك شي..

حطت كفوفها على جدار.. ونزلت راسها تحاول تسيطر على نفسها..

نزلت دموعها.. تكلمت بانبره مهتزه:

كنت صغيره.. وكانت نجود.. تجنني وتحضنك.. وتقول اخوي ولي بروحي.. كنت انقهر.. وادفها.. ماكنت افهم.. والله ماكنت استوعب.. بس كنت اغار.. احد يقرب منك غيري..

التفتت بحده:

كنت بزر واغار من اختك.. كيف تبيني اتقاضى وانا زوجتك وغاده تضمك..!

حضنك ماسخى فيه الا لبناتي..

اشرت على صدرها:

كسرت شي في قلبي ماينجبر.. والله وكسرت كل شي ومابقيت شي..

شاهين.. حاول يحط يده على راسها.. بس بعدت..

قال لها بحده:

تركت غاده وصفيت.. من وقت وعدتك.. انسي موقفها عند المستشفى.. سامحي عشان نعيش.. سامحي.. مابقى فيني حيل بدونك..

جمان بانفعال وصوت حاد:

باقي..باقي في قلبي غل عليك.. باقي فيني حب ماطحن.. باقي فيني زعل يكفي لسنين قدام.. ياشاهين..

شاهين بضحكه ساخره ومرار:

اكثر من انك تفجعيني.. بان جاني فهد.. اكثر من انك تجلديني.. في اني مااذنت في اذنه.. ولاتممت له.. اكثر من انك خذتي مني حق اني ابشر الدنيا بقدوم سمي ابوي..

جمان:شوهت علي.. ولادتي بديم.. وصمت بيان بعار اسم غاده يومك استغفلتني فيه.. حلفت.. ان ولادتي بفهد ماتجيسها.. ولاتعرف عنها ولاتفرح فيها.. اوجاعك.. اقترنت بعيالي ياشاهين.. حتى اعياد ميلاد.. مااسوي لهم.. كل ذكرى ولاده ذكرى شينه منك..!

انوجع قلبه.. يبي يضمها.. يبي يلمسها.. يبي يعلمها انه غلط.. يبي يوصل لها وش قد ندم.. كيف عاش الوهم مع غاده..

وكيف كانت حقيقه مضببه في عمره..!

لكنها رافضه.. انه يقرب.. كانت تبتعد.. مخلفه قدامها حاجز وهمي مايقدر يتجاوزه..

حس بمدا صعوبة..

كسر المسافه..!

جمان مجروحه.. وتقيحت جروحها بالبعد.. والوحده والوجع..!

كانت تقول كلشي بخاطرها ماكانت تقوله.. وكان يتكلم معها بكل شي بخاطره..

اصواتهم تحتد.. وترتفع.. احبالهم الصوتيه مُره ومالحه..!..

انهت الحوار.. بشكل عاصف : حتى فهد اشبع فيه مابيه.. مابي شي يذكرني فيك.. مابي شي يربطني فيك.. يالخاين..يالكذاب..!

وراحت في غرفه.. وسكرت الباب وقفلت.. وانهارت في بكاء مرير..!

بكت.. كما لم تبكي من قبل..!!!!!

بكت بنحيب مرير..

انفجرت كابركان كامن.. من مكابره.. وضغوط.. وكبت وألم..!!!

وجوده قدامها كان فوق طاقتها..

الشوق يذبح والعنا ماله حلول

و الدمع يفضح والمكابر مصيبه

******

وبشاطئ المالديف..

مهره وزينه قاعدين.. والليله قمره.. وصوت الموج الهادئ يعثي في اجواء الليل وصمته..

والأختين يتبادلون السوالف..

زينه بضحكه:لا.. هو خذني من بيتنا.. بهالاسلوب الهمجي.. وانا مارضيت اعطيه على جوه.. فانمت بغرفة ثانيه وقلت له.. دام ماراح نسوي زواج.. اقل شي دام ناوين نسافر.. يكون زواجنا لاسافرنا..

مهره تضحك:حرام عليك.. والله نواف مايستاهل هالتغلي..

زينه بجديه.. اعتدلت في جلستها:مهره انتي فاهمه شعوري.. انا خايفه من هالتجربه الثانيه.. خايفه من انبهار نواف فيني.. يكون كله فقاعه.. وتختفي.. بعد ماياخذ اللي يبيه..مابي اكون حاجه سهله ووصل لها بكلمة في مجلس.. وانتهى فيهم الحال.. باليله.. يكتشف بعدها انه بس كان مبهور بشكل وحده فجأه صارت زوجته..

مهره واللي افهمت ان نواف لسى ماصرح بمشاعره الاوليه مابغت تحرق عليه هالكرت.. ولاتقوله..

بس قالت:لايروح عقلك.. لهالشي بس.. زينه انتي مو من اللي الواحد يعشق قشورها.. انتي روحك تنحب.. واصرار نواف وتعلقه فيك صدقيني.. اعمق من اللي ببالك..

تنهدت :وش تقولين عني انا اجل.. نواف دودهني.. ياختي.. وش هالمراجل.. وش هالحنان..انا مابي نواف شي يبتدي وينتهي.. انا ابيه عمر.. يامهره.. نواف العوض اللي نسمع فيه.. انه من رب العالمين..

شردت مهره:

اجل لاتضيعين عمرك وايامك الحلوه.. على اي خوف.. ولاماضي.. ابعدت سيف.. ماخليته يقرب مني.. تمسكت بماضي.. ومخاوف.. كسرته.. وزعلته.. الرجل اللي يحب صدق.. لاتشحين بنفسك عليه.. لاتضيعين نفسك وتفاصيل مع زوجك.. عشان ماضي ولى وانتهى..!

وابتسمت بحنيه:

وانتي صبرتي يازينه.. عيشي الحلوه والمره مع نواف..لاتضيعين ايامكم بالبعد.. ومخاوف ماتودي ولاتجيب..!

زينه شردت في البحر وتفكر بحكي مهره..

لما جاتها رسالة واتس..

افتحتها لقتها.. من نواف ابتسمت.. وهي تحط السماعه.. وتسمع الرساله الصوتيه.. بصوته.. :

يقول بن قضعان

قد طلبت الله وأنا بين زمزم والحطيم

شوفتك ي اغلا ثنيه ليا صرتي ربـــــاع

العيون تجوع لك جوع والله العظيم

والعشاء ب عيونك السود وعيوني جياع

إن عطيتي مايرد الكريم إلا اللئيم

وإن بخلتي قلت تكفين والدنيا متــاع

أقبلي مثل التباشير في وجه الكريم

وارحلي مثل التعازي على موت الشجاع

احمرت.. وضحكت:اففففف.. نواف..!

مهره بشطانه:وش راسل.. هالمراهق..؟!

زينه..وهي تحاول تزيح الخجل عن ملامحها :ابيات.. فيها شغلات مبطنه..

مهره بضحك:ياعمري اللي مستحي.. زوين.. والله يافجيعة نواف لادرا ان اللي تتهرب.. قامطه اصلا ً.. من ليلتها الاولى..

زينه خبت وجهها:خلاص مهره.. تكفين..

جاتهم نحنحة سيف..

عدلت زينه حجابها..

مهره ببتسامه ونظره حلوه:

قلنا روحوا فلوها.. بس عاد مب ساعات..

ضحك وهو يبوس خدها.. :

كسرنا بعض في البلياردو.. وقلنا نعطيكم مجال تحشون فينا..

مهره :اووووه قطعنا فيكم تقطيع..

سيف :محللين ياعينه.. ها زينه.. اعجبك المكان..!

ببشاشه:مره.. حبيت..الاجواء خرافيه..

وبتسائل:وينه نواف..؟!

سيف:في البار مع فارس..

توسعت عيونها:باار.. وش باره..؟!

ضحك:لاتخافين.. رايح يشري دخان.. قفلت البقالات.. نواف ماعليه خوف..

تنهدت:اشوااا..

زينه قامت..:استأذنكم انا..تصبحون على خير..

سيف:تلاقين خير..

مهره:نوم العافيه ياقليبي..!

.......

بعد شوي..

دخل نواف.. الفيلا الخاصه فيهم.. توجه للغرفه.. ولقى زينه متغطيه كلها وباين نايمه..

ظل كذا يناظرها.. ونادها ولاردت..

راح تروش..

لبس ترنغ.. وراح سوا له كوب شاي.. وخذ بكت الدخان.. و فتح بوابة الشرفه..طلع..واشعل سيجار..!

كان متوقع يجي يلقاها تنتظره..

بس يمكن نامت بعد تعب السفره..!

ظل شارد..!

لو تعبانه.. لو مرضانه.. ماتخليني..

وش ذا يازينه..!!

زينه كانت اصلا ً صاحيه.. وحاسه بكل حركه سواها..

وحست من خروجه في الشرفه بحجم الاحباط اللي جاله..

زاحت المفرش.. وراحت مشت لمن عنده..

حس بخطواتها ولا اللتفت..

تسللت تضمه من ظهره.. وتسند خدها عليه:

ماكنت نايمه.. كنت انتظرك.. بس قبل تدخل استحيت من لبسي.. واندسيت تحت فراشي..

ابتسم وبنص عيون:

ماتدرين انك دقرتيني..!

باست كتفه:آسفه..

طالع القمره.. وبخفوت:

زينه.. قلبي.. زينه ياللي جننتيني.. ومابقيتي فيني عقل.. انتي وش مفكره.. حبي لك وشفقاتي.. وليد لحظه.. تفكريني طاير بالعجه..

اسكتت.. تسمع له..وهي ضامته..

همس بنبرة الذكرى:

شفتك على الفرس.. يوم جيت بسيف لزراعتكم.. وسرقتي عقلي صورتك عجزت امحيها من مخي..

توسعت عيونها..

وكمل بتنهيده:سبيت نفسي.. ولعنتها.. كيف احط عيني على وحده في ذمة ثاني.. تالي.. انتي جيتي.. عشان سلامة امي.. انبهرت فيك.. وانتي تشيلين الذبيحه وتدقيني بالحكي انا وسيف.. صوتك.. بحتك.. كانت تطلع من فمك.. وتغزي قلبي.. وتفكك صواميل جنوني..

تذكرين يومك تطلعين في المطر.. من ملحق الضيوف.. كنت واقف عند مكتب ابوي..ماهي عادتي استرق النظر.. ولااشوف وحده ماتحل علي.. بس لخمتيني.. ضيعتي مبادئي.. فيك شي شدني حد الجنون.. كنتي تتسربين من عيني لقلبي.. انتي كذا.. الاعجاب فيك ينزل على الروح.. ماتكفيه العين والله..

زينه تسمع.. وقلبها يخفق.. ويخفق.. من تصريحاته..

نفخ الدخان.. وبخفوت وضحكه قصيره:

تعرفين وش شعوري يوم دريت صدفه انك تطلقتي.. حسيت اني عقدت عليك.. حسيت انك صرتي لي.. دامها حره.. والله ماتدخل في ذمة احد غيري..

كنتي تمشطين الجده.. وجيت صدفه.. مادريت انك معها.. وشفتك.. يوم طلعتي.. وناديتي مهره.. وشكيتي انها هي اللي تطل من فتحة الباب.. كنت انا.. وكنتي تشعبتي بخاطري اكثر..

طفى سيجاره.. بزفره:

كنت اسمع اسمك.. والمدح فيك.. طاريك يهز عروق قلبي.. ماكنتي حاجه عابره.. ولااعجبت فيك اعجاب مراهق طايش.. سكنتيني ناضج.. وخذتي مكان ماسبقك فيه احد..!.

زينه تخبي وجهها بظهره اكثر.. صدمها.. بكل هالحكي..

ابتسم وكمل ببحه:

يوم حطك سيف بوجهي.. وخلاصك.. برتباطك فيني.. كنت مثل اللي مابغاها الا من الله.. اللي ابيها.. بقدرة قادر بتصير لي..وش كنتي تضنين..لو انها غيرك كملت.. لاوالله ماحد يجيبني على وجهي.. كنتي انتي.. وعشانها انتي انا تممت.. وكملت..

زينه تضمه اكثر.. وبصوت خافت.. :

نواف شسوي فيك.. شسوي فيك..!

ابتسم:حبيني مثل ماحبك..

زينه بهمس:منتهين منها..

رفع حاجب.. :تعالي قابليني.. وراه.. شوي وتدخلين بظهري.. كل ذا حياء..

زينه :طيب دامها ليلة تصاريح.. وبنكشف الاوراق.. انا معي...شي اخفيه..

سحبها.. وناظرها.. ولبسها.. اللي طير الباقي من عقله.. باس كتفها.. وبخفوت:

وش.. كنتي مثلي.. حبيتيني قبل نتزوج..

زينه.. وقشعريره تسري بجلدها.. من بوساته..

كتفها.. رقبتها..

غمضت عيونها.. بقوه.. وبخفوت رمت القنبله عليه:

نواف.. انا بنت..

توسعت عيونه.. وطالعها وهو يحفر كتوفها:

وش.. وش.. والله ماسمعت..

فتحت عيونها بخفوت:

وهذا سبب علم عبدالاله معي.. كان عليل.. ومايقدر على علوم الرجال مع زوجته.. انا بنت يانواف..

ضمها بقووه حتى حست ان ضلوعها بتدخل في بعض.. وهو يرفعها من الأرض.. ويهمس لها بكل عشقه وحبه..!

اخذني من غبر الأيام و محال الفصول

‏ولقني حضنك .. من الجايرات وضمّني

............

*ويهز عرش قلبي.. قربها..

اغلقت الباب.. ولم احاول اقتحام.. بكاءها.. وهدرها لآلام احتقنت في ضلوعها..!

كنت اسمع انتحابها.. وارى كم خلف صمتها من تصدعات وكدمات في جوفها..!

جمان.. واعرفها لاتريد اقترابي الآن..!

ولو انها على خبري القديم.. منذ طفولتها وحتى يوم تركتني..

فالأفضل ان يهدء ضجيجها..

ويخفت حريقها..

تركتها وانا احاول تجاهل سبها.. اللذي يعلو بين الحين والآخر علي..

ونقدها الطاغي على شخصيتي..

واتهامات جارحه.. سيدها الخيانه.. والكذب..!

ابتسمت.. وكل قلبي يشرع ابوابه لفهد..

اللذي يمص كفه الصغيره..

وتعلو عيناه فهاوه عجيبه..

حملته..

رحت ادردش معه.. يبكي تاره ويهدء اخرى..

وانا اقف وامشي به واعود احتضنه..!

شاهين يرفع حاجبه.. وهو يلاحظ خد فهد.. وقرصة نامس:

يابوك.. المكان هذا ماهو لك.. ريف وبعوض..بس وش انسوي في امك.. الهاجه.. اللي ماتستحي..!..

وضحك بخفوت..

كأني نائم..

وان لي ولد.. اضغاث احلام..

كأني متعاطي..

لااستوعب اني وجدتها اخيرا ً..

ومعها فهد..

ضللت اتأمله.. واتحسس شعراته الخفيفه نزولا ً الى وجنته..

عدت اتكلم معه.. حتى اعلن علي الحرب.. ورفع رايات البكاء في الميدان.. *

مرت فوق ساعتين.. والظلام حل.. وجمان مو ناويه تطلع..

والولد جاع..!!!

تلفت بوهقة حوله..يبي يتصرف.. من غير مايلجئ لها..!

.......

حبايبنا وش الدنيا بلاكم

ملاه الشوق قلبن ماسلاكم

يضيق بهالفضا بعض الليالي

اللي دور نديم ومالقاكم

فلاتقولون يمكنه نسانا

حرام الضن في اللي مانساكم..

سمعت من قبل عزف مهره.. ودندنة عودها.. ترجمة آهاتها تقاسيم..

اوصلت رسائلها لي عبر تلك الآلة..

لكن للمره الاولى توصل لي حجم ألمها بأغنية.. اسمع صوتها المجروح.. وهي تغني.. نبرة مهره في ذاك المساء..

كانت مالحة..

نبرة مهره مليئة بالندوب..ترددات مهرة الصوتية بها بحة.. حارقة..!.

هل مر بكم صوت مليئ بالتقرحات.. صوتها مريض وبه حمى..

مهما كابرت وضحكت..

تعلقها بسيف الصغير.. ليس شيء عابر ويسلى عنه..!

تعلقها تولد من مأساة.. وغالبا ً العلاقات اللتي ترتبط في ازمات.. تلتئم الجروح بها..

سيف قابع في مهره..

ليس قلبها فقط..

بل حتى مسماتها الجلديه.. .

سيف موجود بعروقها.. اراه هناك.. متعلق في قناتها الدمعيه..!

ردتت مهره الاغنية.. مع صوت موجات البحر الليليه..

سكون..!

يخالجه شعورنا المبحوح..

وزينه اغرقت عيونها بدموع.. وببتسامه حانيه:

اللحين قلنا لك غني.. شهالاختيار الزفت مهره.. عدمتي الجوو..

ضحكت مهره:

اللحين مجتهده.. وصوتي وصل لادراة المنتجع.. وهذا ردك..

سيف ضم كتوفها ويخفي المه بصعوبة:

صح كلك.. ويازين صوتك.. غني جعل مايغني غيرك..!

فارس كان متلاهي بالجوال.. بس كان بصعوبه يبلع ريقه.. من الغصه.. اللي جاته بعد صوت مهره...

نواف يشوي ويقلب الاسياخ..

شرد..

وانغبن..

يطري عليه كل شي وقت نبش في الحقايق..

لاتلام.. لاتلام.. في ألمها وتملكها.. وحقها..!

احترقت اصابيعه وهو يشيل الاسياخ ويرميها في الصحن.. وبحده:

فارس قوم يامال الوجعه.. ساعدني وشل هالاسياخ احترق الدجاج..

فارس قام وبانفعال:

هو انت قلت تعال وانا طنشت..

سيف حاس بالاجواء اللي مكهربه من غياب سيف..

قال وهو يقوم :

نواف وراه..

نواف يصب ماي على يده:مافيني شي.. بس اكلوا عشان احط باقي الشوي.

سيف:اتركها انا اكملها..

وبدء يكمل هو..

وزينه تطالعه وبنظرات يعني "وش فيك" ..؟!

اشار بحاجبه.. على مهره.. وكنه يبي يطمن عليها..

هزت كتفها يعني "مادري" ..وان شكل نفسيتها ماش..

نواف طقطق مخابيه.. ومالقى الدخان..

سيف رمى البكت حقه عليه.. وبهدوء مايسمعه الا نواف:

هد يابوي.. تراني مثل اللي واقف بين الغار والنار.. ان وطى احرق صدره وان ارتفع ضرب الغار راسه.. لاتزيدها علي وتقلب سحنتك بعد انت..

نواف بخفوت وعصبية:

ترى الوقت اللي راح كفايه.. المفروض نرجع ولدنا.. انت شايفه لاكلمناه.. وش لون يتكلم..

سيف:

في شغل انا بادي فيه.. يخص الكبار.. راجح طرف فيه.. ولاادري وش رد فعله.. لو درى اني ضده.. انا مابي اضره.. بس ان صار ضرر.. مابيه يلوي ذراعي بسيف.. خل يقضي الوقت اللي اتفقنا عليه.. واجيبه بدون شحنات..مابي راجح يدري اني طرف في اللي بيجيه هو وربعه..!

نواف بعصبيه :

وانت بتخلي زوجتك تنهري من الهم والحزن عليه عشان تكمل شغلك..تخلي سما تقعد فوق راسها وتدندل الرجلين بشماته.. انت ماسمعت عزيز وش يقول.. عن سما وكيف تحاول تبعد مهره باساليب قذره عن عقل سيف..

سيف يقلب الشوي :٠

والله يانواف الي يدوس على طرف ثوبها..أشق له صدر ثوبه.. بس انا ماقدر انكب طلال وانا وصلت معه لهنا.. وسما خلها تشبع من ورعها.. ومهره انا كفيل بوجاعها..!

هي فتره.. وبجيبه.. بس تعرفني.. لابديت في شغل اكمله..

نواف بتهكم وعصبية:وانت وش يدخلك بهالمجال.. تدري انك ممكن تروح بخرايطها.. ومن بيقول مات عشان الوطن.. انت حتى مالك مسمى وظيفي في هالمجال..

سيف بشرود في الجمر:

وان بعدت عن وطني.. له حقه علي.. خليني اخدمه بطريقتي..

نواف:والله ياسيف لو صار لك شي.. من ورى سوالفك ذي.. لاذبح طلال بعدك ووسده اللحد. .. كانه ماغسل مخك الا هو..

ضحك سيف:ترى مارضا على بوعقاب..

نواف وهو يرمي السيجار ويدوس عليها:

الله يلعنك انت وهو.. كان ماحد بيجيب العيد الا انتوا..

فارس.. وكان يستمع بتركيز.. ومسوي نفسه يتشاغل باشياء ثانيه..

انرعب من فكرة ان ابوه قاعد يخوض في مياه خطره..

تسائل (وش السالفه.. وش اللي قاعد تغامر فيه يايبه)..!!!!

مهره وهي ترتب صحن لفارس.. نادته:

فارس.. تعال اكل..وش فيك مفهي..

ضحك وجاء لها :اففففف قمتي تجهزين صحني زي بو فارس..

مهره بأمومه وهو يجلس جنبها.. نزلت راسها على كتفه.. لان يدينها.. فيها اكل:

وان ماجهزت لولدي العود من اجهز له..اكل جعل عيني ماتبكيك..

زينه ببتسامة:

والله يابختك يامهير.. ولد هالكبر جاهز ومجهز..

فارس ابتسم.. وهو ياكل.. ويلقي نظره بشرود على ابوه.. والقلق.. اخذ منه ماتخذ..

جاء سيف ونواف وبيدينهم باقي المشويات.. حطه سيف ع الطاوله..

الا رن جواله.. افتحه.. وبترحيب:

حيالله الهايت.. انت ماتقولي انت وين ذالف..

شاهين بسعاده ماقدر يخفيها:

البشاره يالعشير.. البشاره..

سيف:بشر..وش العلم..

شاهين:لقيت اختك.. وهذاني عندها..

توسعت عيون سيف: تقوله صادق..؟!

كل العيون انتقلت تبحلق فيه بفضول.. حرك شفايفه. (انه لقى جمان)

وسيف اللي حطه سبيكر..

وهو يقول :

وازيدك.. ماهي بروحها.. لقيتها.. ومعها فهد..

بصدمه كلهم يناظرون.. وبانفعال نواف:

وش فهد.. من فهد..عمي فهد وش وداه عندها.. وليه ماقال من الأول..

ضحك شاهين:

وش تبي انت.. من وين طلعت..

نواف :قل لي.. اخلص.. وش فهد.. شارب شي.. يالـ**.. تراي شاك فيك.. ماتخلى.. بعد خاين وسكير.. كملت..

سيف سحب جواله من نواف:

اتركه.. وكلمني.. كيف تقول معها فهد.. تقصد عمي..!

فارس :ابوي فهد بالسعوديه.. مايطلع منها حتى جوازه منتهي.. من ثلاث سنين ماجدده..

شاهين.. :انتوا وش بلاكم.. ماكلين فلفل.. ماهو فهد ابوي.. فهد ولدي.. فهد بن شاهين.. جمان يوم سافرت كانت حامل.. ومزينة الفعول.. ماقالت لاحد..!

نواف وفارس بصوت واحد :وشهوووووو..!!!!!

سيف بذهول:ياااوجه الله..!

مهره وزينه يتبادلون نظرات الصدمه..!

(حكى لهم شاهين تفاصيل.. ووصاهم مايعلمون الشيبان.. عشان يفاجئونهم عن موضوع فهد)..!

سيف:وامورها هي.. طيبه.. عساك راضيتها..

تنهد شاهين :نقول ان شاء الله.. على الزعل.. ماجد جديد.. قلبها علي شايل.. وماضنتي.. بترضى بسهوله.. بس احنا لقيناها.. وكل رزق يجي بوقته وانا اخوك..

سيف :ماعليه ياكحيلان.. خلك مثل الجمال اللي لابركت.. تشيل حمولها.. وينها هي ابا اكلمها..

شاهين :ماحولي الا الشبل.. هي خلتنا.. وقفلت على نفسها.. وخليتها.. لما تطخ وتجينا..

نواف:اجل الله يستر عليك.. بتقعد تنتظرها.. لمن معطر الشوارب.. يدخل المدرسه..

ضحك شاهين:

لحووووول..

سيف بضحكه:بس تهدا كلموني.. واحشتني.. طويلة اللسان..

شاهين :ابشر يالعشير..

انهوا المكالمه..

وسيف بزفرة ارتياح.. :

حمل وانزاااااااح.. مابغيناا نعرف مكان هالعاصية..

نواف:السؤال اللحين.. ابوي يدري..انها كانت حامل.. وولدت لحالها..

سيف :لاوالله ماهقيت..!

مهره :ياااقووو باسك ياجمان..

فارس:ذيبه.. ادبت خالي.. اللحين ان شاف زول حرمه.. هج عشر امتار عنهم..

ضحكوا..

وسيف:انا اشهد انها خذت حقها بدق خشوم..

******

حست بهدوء خارج الغرفه..

يشابه هدوء روحها.. اللي اللتف بداخلها.. محتوي الفوضى والضجيج..!

ماعادت تسمع صوته وهو يلاعب فهد.. ولانبراته الموجعه لروحها..

اختفى صوت فهد وبكاءه..!!

امسحت دموعها.. ولاقدرت تمسح.. من ملامحها.. الحمره وانتفاخ العيون..

مشطت شعرها.. ولمته بربطه..

وافتحت الباب واطلعت..

ولأن الباب في الصاله على طول..

عيونها وقعت على طوله الفارع.. متمدد على الاريكه الواسعه..

وباين مستغرق في نوم عميق..

قربت ولقت فهد نايم فوق ذراعه.. بالجهه الثانيه والمصاصه طايحه من فمه..

ومحدثه انفراج بسيط في شفتيه..

بالضبط كاشفتي شاهين..!!.

ابتسمت بحنيه..

بعدها انتبهت ان مغير ملابس فهد.. ومن العده الموجوده على الطاوله اعرفت ان مسوي له رضعه..

ظلت كذا واقفه..تتأمل تفاصيله..

اشتقت.. ورب الكعبه اشتقت..

وشاهين.. كالنائم.. بعد سفر طويل.. من هم وحزن وقهر..

نائم.. كمن صعد لقمه بعيده.. وانهكه الوصول..!

نائم بعد ان اضناه السهر ايام وشهور..

على وجهه غبرة عناءه..

ونتائج فعلتي به..!

تأملته وانا استعيد كل كلمه وحرف.. قالها..

من اول واعلم انه يحبني لكن حب معتل بسم افعى.. تنفث فيه كل يوم..

وكنت ابخل بالترياق..

واتركه يتلوى بعيدا ً.. بتجاهل.. ورفض..

اليوم شاهين لي.. وحدي..

رأيت في عيناه حجمي..

وجدت في تغيره تدهوره دوني..!

نومه بالطريقه هذه اشعرتني.. انه الان نام.. بعد ارق كاد يوصله للجنون..!

شاهين نومه خفيف.. يشعر بأي حركه وخطوه.. وبأي احد صامت يقف عند رأسه..

لكنه لايشعر..!

خالداً..بعذوبة رمشاه اللتي لاترف..

تحرك فهد.. وهو يقطب ملامحه استعداداً لنوبة بكاء تعرفها..

انحنت بتاخذه قبل يزعج ابوه..

حس شاهين على طول ومسك ذراعها بتأهب..

وهو يفتح عيونه بنعاس.. وعاقد حواجبه:

وين بتودينه.. خليه جنبي..

بخفوت:

باخذه ارضعه.. بيبكي وباين جوعان..

ترك يدها.. وهو يغمض من جديد:

رضعيه وجيبيه هذا انا انتظره..ماراح انام..

ارتفعت وبين يديها فهد.. طالعته.. وهو يتحرك ماخذ وضعية الجنب ويكمل النوم.. (اي تنتظره.. واضح..!)..

استغربت التعب اللي هو فيه كيف معمق كذا..

خذت فهد وراحت.. . وهي ترفع جسده الصغير.. لوجهها وتشم بشوق ريحة شاهين عالقه فيه..

استغرقت تستنشق فهد..

متعلقه بذرات اللتصقت فيه.. وتاركه الاصل يبعدها امتار..

ومكابره تروح تعانقه وتشفي غليل الاشواق والوله..

اسدحت فهد على سريرها وببشاشه.. وهي تشوفه مصحصح:

شفت بابا.. نمت عنده..بعد عطاك ننا..

وضحكت وهي تنتبه كيف مقفل طقطقات بدلة فهد.. فتحتهم :والله مادري استحول ابوك.. وش ذا..

راحت تقفلهم من جديد وهو يتحرك بمرح ويصدر اصوت تهبل..

حسته فرحان ومستبشر..

جمعت رجلينه وبوستهم.. :

مبسوووط يالهيس.. ماكنت ماليه عينك..

*******

وبعد قليل وانتصف الليل..

فهد نام.. وغطته.. هي انسدحت وعجزت تنام.. وفكرة انه موجود وقريب..

راحت افتحت الباب بخفوت..

واطلعت تشوفه.. وهو مستغرق في نومه الغريب..

ظلت واقفه..بتردد وتكذب على نفسها.. انها بتشيك عليه لايكون مريض على هالنومه..

مدت كفها لجبينه.. ولمسته..

ظلت منحنيه..

تمشط ملامحه المتعملقه في قلبها.. بعينيها..

انفاسه الهادئه تلهب كفها و ذراعها..

بضراوة..

ارتبكت وتوها بتبعد.. بس ماحصلت الا يد شاهين تتشبث في معصمها..

ويطالعها بنص عيون..

حاولت تفلت يدها:كمل نومك.. انا قلت بشوفك عدل على هالنوم.. حشى ميت..

شاهين بخفوت ومتمسك فيها:

يمكن توني انام نومه عدله.. بعد ماسهرت شهور..

جمان برتباك:

طيب تمام.. نوم العوافي..اتركني.. شاهين اترك يدي..

سحبها بحركة مفاجئة وطاحت على صدره.. :

والله ياجمان.. ماني تاركك.. ولاناوي اترك يدك..

وفجآه وجدتني علقت في خيوط العنكبوت..حاصرني باطرافه..

وتخاذلت.. وعطره يهرول لجوارحي.. ويثير خدراً وخنوع..!

اللعين.. كيف لعب في الأماكن بخفة..

لاكون مستلقيه على تلك الاريكه وهو فوقي..

ويبتسم بخبث :

والله ياانك لعبتي فيني لعب يابنت سعود..

دفته بخفه من صدره.. :

شوي عليك.. ماجاك شي بعد..

مسك معصمها وثبتها:

وانا كبدي والله.. فايحه.. وابي شي يبردها..

جمان ارتبكت.. بس بتحدي :

بعيده عن شواربك.. ابعد.. ماني ناقصه هبالك..

مسك معصمها الثاني.. واحتكرها ورفع حاجب.. :

هبالي..!.

وقرب بيبوسها.. لفت وجهها.. لتقع قبلته على خدها.. وهمس:مو مشكله.. حتى خدك مشتاق له..

حاولت تفلك يدينها.. :شاهين ابعد مو طايقتـ..

لف ذقنها غصب: ولاانا طايقك..

وراح بايسها بقووه..

لمن ادمى شفتها..!

*هكذا.. حبنا.. عنيف.. خلافاتنا مصائب.. ردود فعلنا.. مخيفه.. ونتصالح.. رغما ً عن انوفنا..

هل رأيتم عشقاً.. مريض كهذا..!! *

ما هقيت السيف الأملح ينثلم من ياسمينه

‏لين عنت خيل فتنتها علي والله نصرها

*****

مستغرقه في نومي.. وكأني بين بياض غيم.. وسرب حمام..!

محلقه كارشية.. طارت فارتفعت.. فاخف وزنها اكثر..!

يتخلل برزخية حلمي الغريب عطره.. وانفاس حاره.. وجسدي يعلو ويهبط فوق ضلوعه..!..

فعليا ً لاادري ما أنا فيه فعلاً.. حلم.. علم.. او مت وارتفعت روحي..

لااعرف طريقاً للاستياقظ.. ولااجد ميناء.. ارخي به سفن حيرتي..

ضللت هكذا..

حتى بدءت اسمع صراخ ونحيب من بعيد.. وبعيد.. كأنه ياتي من ارض حلمي.. بدئت اركز سمعي.. على الصوت..

وفجأه بدءت اهوي من وسط الغيم..وقبل ان ارتطم فتحت عيني..

وبدءت استوعب..

الشمس تلوح بامنزل راشيل.. من النوافذ الكبيره وكأننا استضفناها داخله..

وانتبهت لجسدي وجسده...

واشتباكنا الغريب.. كاسلاك سماعه.. لم اعرف اين بدايتي ونهايتي.. ولامواقع اطرافي فعلا ً.. يدي نائمة تحت جسده.. ونصف ضلوعي يكاد يسحقها بضغطه..

انتبهت لصوت فهد.. يبكي بشكل مخيف.. من الغرفه..

وانا معجونه فوق الاريكه.. مع الكلب شاهين..

ماتدري كيف اسحبت نفسها.. من جنبه ودفته بقوه..

وهي تصيح :فك عني.. نسيت ولدي.. الله يلعنك ياشاهين كان ماورا قربك خير..

نطت من الكنب ومع حركتها العنيفه.. طاح شاهين وصقع راسه الطاوله..

وهي تختفي.. وصوتها بس وهي تسمي على فهد..

دخلت لقته يبكي وينتحب.. ودموع.. ووجهه شاحب من كثر ماصاح.. باين يبس ونشف ريقه..

شالته :امي امي.. بسم الله عليك..

ضمته وتهدهد فيه.. وهو منهااار..

جاء شاهين ويحك شعره:وش فيه..

هي وتحاول ترضعه من صدرها:

شاهين وش فيك متبلد.. عنبوك ماسمعته وهو يصيح.. الولد يبس..

يرضع اشوي ويرجع ينهار..

وشاهين قرب ويحاول يهديه.. باصوات.. وتطهبل..

وفهد انهار من جديد..

جمان رمت علبة المناديل عليه:اسكت واللي يرحم شيبانك.. الورع حساس وماهو متعود على صوت احد غيري..

شاهين خذه من يدها:خليه يهدا بعدين رضعيه.. لايشرق..

وقف فيه وقام يتحرك بوتيره.. هاديه.. ويرفعه بكفوفه.. ويمرجح فيه..

وبخفوت :قومي جهزي مويه دافيه.. خلينا نروشه.. تهفت شياطينه..

جمان:بسم الله على ولدي من الشياطين..جبه انا اعرف له..

بعد فيه.. لجهة دورة المياه.. :

لو ولي العهد طالعن علي.. شوفي وش بيهجده..

وبحذر راح فتح بدلة فهود..

وبدون توتر من شاهين.. كان الصغير عريان على كفه.. وهجد نوعا ً ما.. وشاهين يقربه من المغسله.. ويصب عليه ماي دافي..

جمان تراقب النتفه كيف استكن عند ابوه.. وهو يروشه ويتكلم معه..

اول مره ينهار عليها بهالطريقه..

خذ الفوطه من يدها.. وضم جسد فهد بصدره العاري.. ولفه بالمنشفه..

وهو يضحك.. ويسولف معه..

*ابتسمت لااراديا ً على جمال الصوره.. كيف استطاع شاهين امتصاص هيجان فهد..كما يفعل من قبل مع بيان وديم *

بعد قليل..

كانت تضمه وهو ملفلف.. ويرضع منها ونام..

شاهين طالع من دورة المياه ويجفف شعره.. ولابس الملابس اللي كانت عليه..

اختلست له النظر..

وشافته يلبس شرباته وكنادره..

وبثقل:وين.. ماتبي تفطر..

شاهين بهدوء:اغراضي بالفندق.. بروح ابدل واسوي شيك اوت.. واجي..

بدهشه وتهكم: يمكني مابيك تقعد عندي.. ليش تسوي شيك اوت..

وقف وخذ جواله من على الطاوله:

ماهو بكيفك..وحاولي تلملمين اغراضك.. بنبات الليله.. وبكره.. بنمشي على روما..

سكتت..

وقال :اوراق فهد سويتيها ولاباقي..

قالت:معي اوراق المستشفى.. وسويت تبليغ هنا.. بس كل الاوراق يبي لها تخليص في السفاره.. عشان نقدر نسوي له جواز.. وانا ماعرفت اروح روما..كنت تعبانه.. طول شوال.. وهالفتره اجلت لاني ماقدر اسافر بفهد لحالي..راشيل كانت بتجي بعد اسبوع وبتروح معي..

قرب منها وباس راسها:

مو مشكله.. نخلصها...

قال كذا وتركها ومشى..

وقلبي يخفق.. وصفير خلوو المكان منه بعد ان اغلق الباب ضايقني..!

بعد شوي..

سيف ببتسامه حانيه وهو يكلمها بالجوال:

حلال علينا.. كل اللي سويتيه.. اجل الحزن بعيونك ولا اشوفه..والله لو ادري وقتها.. كسرت ضلوع شاهين ضلع ضلع..

ضحكت بحشرجة دموعها:

ياجعلني مابكيك.. يابوفارس..والله يالكم وحشه تهز جبال..

سيف:عجلو باوراق السبع.. ترى زواج بلقيس ماباقي عليه شي..

جمان تمسح دموعها من زاوية عينها:

اكيد.. ياعين اختك.. واخبار مهره.. والله صوتها ضيق صدري..مب الاوليه..

سيف اللي بعد بالجوال.. بعد ماكلموها كلهم.. تنهد:

خليها على ربك.. كلها نتايج فصول اخوك الله يحله..

جمان:لاصراحه هواايل.. عجايب ياهالعساف.. على كثر.. فصوله..بحياته.. ولاتجي بقطره بعد فصوله.. بموته..!

سيف:انتي قولي لي.. من دعمك ورتبك في امورك.. يعني حتى موضوع انك رايحه وانتي حامل.. ماغامرتي الا في ظهر ساندك ومعبد لك الطريق..!

جمان اللي طالعت شاهين.. وهو في الحديقه الخارجيه مع فهد شايله.. :

ليش واثق.. يمكن انا رتبت الامور.. وراشيل رتبتني هنا..

سيف بجديه:ولو.. . اعرفك جمان.. انتي اول لاجيتي تروحين.. ماتعرفين حتى تخلصين الفيزا والتذاكر.. احنا نسويها.. فما بالك رايحه وشاطحه بالارياف.. مين..؟!.. ابوي.. ولاتبون تعلمون..

سكتت شوي.. وبخفوت:بقلك بس لاتعلم احد.. عشان خاطر ماحد يزعل منه كيف صمل.. وحافظ على وعده وحلفه..!

سيف:ايييه..؟!!

جمان بهمس:هادي..

توسعت عيون سيف.. :ويدري بالتفصيل وين ساكنه.. وكذا..

جمان ببتسامه:وهو اللي رتب.. مواعيد الحمل.. ومستشفى الولاده.. والسفر الداخلي.. وكل شي.. سيف انا محلفته على المصحف.. والله واثبت انه رجال كلمه.. مع ان هاوشني كثير.. على تطويلتي.. بس وفى.. ولاعلم..

سيف بضحكه ودهشه:وتهقينه ماقال لبلقيس..

جمان:لا ماقاله.. لوقايل كان ماسكتت بخور المواقد..

ضحك :والله يا ان هادي.. رجل والنعم..!

********

مرت الايام على ابطالنا..

واليوم الشباب وبيان وديم رايحين يستقبلون.. شاهين وجمان في المطار..

ديم تتحرك بحماس.. وتركض بعيد وتجي..

سيف شالها:

لاتضيعين ديم.. اعقلي..

هي وعيونها طايره:وينها ماما.. خالي.. انت تقول نزلت طيارتها وينهااااا..

قال:لازم يخلصون اوراقهم اصبري..

بيان اللي متشبثه بيد نواف وساكته.. وعينها على جموع الناس.. تبحث بصمت وعيون ملهوفه.. لزول امها..

ومن خلال تركيزها.. ويدها عرقت بيد نواف.. طالعها..وبخفوت:

خالي روقي حبيبي..

بعصبيه:مافيني شي خالي.. انا ساكته.. ديمي بس ازعاج..

فارس همس له:اسكت لاتنطق..

*انتهينا من الاجراءات.. وكلي لهفه لبناتي.. عدت للوطن وقد كنت وطن ورحل..

نعم وطن شاهين وبناتي..

مرت بهم ايام.. بلاهوية.. ولااستقرار.. ولا حتى اثباتات..

هل تصدقون اني تركتهم كالبدو الرحل.. كالاجئين.. لااصدق.. اني فعلتها..!!

وان مرت بي ايام وليالي.. لاارى عيناي شقياتي..

خرجنا من صالات القادمون.. فهد يحمله شاهين.. وانا فقط ابحث بعيني.. عنهم.. هناك.. بين ايادي احبابي..

تضببت الرؤية.. وانا ارى انفلات بيان وصرختها :

والله ماماااا... جااااات ماماااا..

انطلاقها تلتها ديم الي نزلت من سيف.. والحقتها..

جمان.. جلست على ركبها.. افتحت ذراعينها..

لينغرس في صدرها قلبين..!!

احتضنتهم بشوق وجنون.. وهي تبكي بانهيار :وحشتوني.. وحشتوني ياامي..

ديم وهي تتشبك فيها لدرجة الالم :

وين رحتي ماما.. والله والله احنا نبيك... والله كنا نبكي انا وبينون.. واحنا ندور عليك.. والله ماخليك تروحين ثاني.. حتى لارحتي حمام اروح معك..

جمان وهي تبوسها وتشمها وحلف الصغيره المتكرر حولها اشلاء:آسفه.. ياامي.. انا اسفه.. والله ماترككم.. يابعد روحي..

ديم تشوهق وتبكي بانهيار.. لدرجة الهستيريا..

وبيان فقط ضامه رقبة جمان.. بتملك.. ودموع.. تنزل بدون صوت.. وهي تشم شيلة جمان.. اللي جلست فيهم على الارض.. وشاهين واخوانها يحاوطونها.. عن عيون الناس..

شاهين:ديم بابا.. اهدي.. خلاص ماما جات..

ديم تحط كفوفها البارده على وجه جمان.. ودموع:والله ياماما.. مشتاقه لعنونك ووجهك..

ابتسمت جمان وهي تبوسها بكل مكان ..

وراحت حركت بيان.. بذراعها:

بياني.. حبي.. وريني وجهك اشووف..

بيان برفض:

مابي..

وراحت تشم امها بقوه:

الحين اشوفك وابكي..

ضحكت وهي تبعد ديم شوي.. وتعدل بيان:

كلنا بكينا.. ليش ماتبكين..

وشافت وجهها..

توسعت عيونها..

بيان بجدايل.. مجدوعين على ورى.. لاأثر للغره اللتي طالت..

راحت خدودها..

ملامحها.. انعمت اكثر مع نحف وجهها..

لمست جديله منها.. :

ياحلووك بالطويل..

بيان وعيونها تزخ دموع بكثافه وبتأنيب موجع:

شلون ياماما رحتي وتركتينا..!!!

عتبها.. طعنني من الوريد الى الوريد.. وانا احضنها بقووه:

سااامحيني يمه.. تكفين..!!

وانتحبت بيان.. اللي تكابر.. على البكى.. تبكي بصوت عالي وهي تعانق جمان بعنف وقوه..

بعد لحظات.. سيف انحنى وفك بيان عنها.. ورجول جمان ماعادت تطاوعها.. مو عارفه توقف..

مسكها من كتوفها وشدها ووقفها:

قومي ابوي.. مو عدله قعدتك كذا..

جمان بانهيار ترتمي على صدره.. وتبكي..

سيف ضمها وباس راسها.. وابتسم:

قرت عينا فيك.. ياخلف ابوي.. مبروك ماجبتي يالغاليه..

جمان ببكي وهي تخبي وجهها بصدره:

سيف انت لعني.. وسبني.. مثل ماتسوي.. انت لومني.. لاتمشيها كذا..

عدل شيلتها.. اللي تراخت.. ونزلها على وجهها:

والله مايلومك احد ولايخطيك.. وانا موجود..

جمان وهي متشبكه فيه:

كلهم كلموني الا امي.. امي زعلانه حيل ياسيف.. زعلانه وزعلها كايد..

داعبها:

ماعليك.. نراضيها..

نواف سحبها وضمها:واااحشتني يالعاصيه..

ضمته..:

ياقلبي يالمعرس.. مابغيت تدخل القفص..

ضحك نواف وهو ياخذ يدها يبوسها :

اثاريك انتي مقبسه علي.. ليتك هاجه من زمان.. عشان اخذ هالزينه..

شاهين كان جاثي وبيان وديم يطالعون فهود بدهشه وانبهار..

جمان اتركت نواف وبشوق.. راحت لفارس.. اللي فتح ذرعانه :وحشتيني وحشتيني.. ياعمه..

ضحكت وهي تضمه وماقال لها ياعمه الا من قو الشوق:

ياعين عمتك..وروحها..

فارس وعينه تلمع بدمعه.. باس جبينها.. وراسها.. وخدودها:

يمممه باكلك.. باكلك..

******

كان وصول جمان.. صاخب.. بعكس ذهابها المتسلل الهادئ..

دخلت السيارتين.. وسعود.. واقف عند الباب.. معاه فهد.. بوشاهين..

وسلمى والبنات متغطيين..

سعود ويرفع الرشاش .. وهو يهلي ويرحب.. بقدوم بنته وشعرة جوفه..

سيف وهو يعبر بالسياره يقول لشاهين :امسك فهود لاتنزل ابه.. واضح ان بوسيف بيفضي كل رشاشه.. لايتروع الولد..

شاهين:ابك خله يتعلم على سلوم الرجال وعلومها..

جمان:لاشاهين اصبر.. وش سلومها وفعولها.. .. توه الولد.. مافي اذانه غير تغريدات الطويرات نجيبه عند هالرشاش اللي يرعد..

قطعت كلامها وهي متأثره:

ياعمري ابوي وعمي طالعين بره.. ياجعلني افداهم..

شاهين :والله مادمرك علي الا هم.. ولا المفروض يستقبلونك بعقله على ظهرك..

وصلها صوت ترحيب ابوها وهو يرمي في الهوا..

افتحت الباب... والسياره ماوقفت عدل.. وارتمت في احضان ابوها.. باست راسه وخشمه ولحيته.. ونزلت على كفه :

ارضى علي يبه.. ارضى علي.. ياجعلني قبلك..

كان ضامها بذراع.. وهي تبعثر دموعها وشوقها على صدره..

اللتقط نواف السلاح من ابوه.. اللي عانق جماان..بكلتا ذراعيه.:راضي عنك يايبه.راضي.. ومزين الافعال يستاهل ماجاه.. وان رجع وعادها.. يبشر بطب مني يبري العله..

ضحكت.. وهي تمسح دموعها.. وعمها يأيد ابوها :

انتي جيتي.. والله يابنت سعود.. ان ضامك هالهيس.. مايبرد كبدك فيه الا انا.. لااقص اذنيه وارميها لتسلاب الضاله..

راحت حبت راسه وكفه:ياجعلك ذخر ياعمي..

شاهين جاء وشايل فهد.. :

هذا وانت مادريت انها جابت سميك هذا حكيك.. وشلون بعد لو تدري..

صدمه.. في وجه الشيبان وسلمى.. اللي كانت جمان تسلم عليها وتبوس راسها.. وهي تتشبث فيها:

تقوله صادق..!!!.

شاهين وهو يمد فهد لابوه:

سميك.. يبه.. سم عليه.. وخله يحب خشمك..

فهد بدهشه.. وفرحه.. وبلعثمه متأثره وهو يلتقط الصغير:ماشااء الله.. مااشاء الله.. بسم الله عليه.. وحوله..

تهالك..

سعود على كرسي قريب.. من هول المفاجئه وهو يردد :

ياقووو باسك يابنت سعود.. ياقووه..!..

بعد ماسلمت عليهم كلهم.. بالهفه تشبثت في مهره:وين امي مهره..لاتقولون طلعت من البيت..

ابتسمت وهي تدخل معها.. :

ماطلعت.. بس راحت قسم النساء..تعرفين شوي زعلانه..

جمان وهي ترمي الشيله على كتوفها.. :ام سيف ماتمزح.. زعلانه وزعلها كايد..

اللتفتوا جهة الباب على صوت بلقيس المنهاره على شكل فهد..

غمزت لها مهره:

في شي تتشفعين ابه.. روحي لها.. وفالك الرضا..

توجهت جمان.. لقسم النساء.. افتحت الباب.. بخفوت.. على الصاله الكبيره..

*وجدتها هناك.. على كرسي منفرد.. تقبع شامخه.. متشاغله بهاتفها.. وكأن مايحدث من قدومي لايعنيها..

بل سمعت خطواتي.. ولاترفع عينها..

امي وحنانها البالغ.. وجفاءها الأبلغ.. مع الزمن اخذت جفاء ابي واعطته حنانها..!..

ابي وضع لي الاعذار..

اما هي.. وضعت بي ألف عله واهمال..

بخفوت دامع:

يمه.. انا جيت..

مارفعت عينها..وبجفا :لاهلا ولامرحبا..

توسعت عيون جمان.. وهي تجثي عندها.. وتمسك كفوفها:

يمه تكفين... سامحيني.. والله اللي صار غصب عني.. شاهين ذل قلبي وهامتي..يعني يرضيك اظل كذا ولا ارد اعتباري..

امها بجفا:وتعاقبينا كلنا.. والله مالك عندي عذر..

جمان بحرقه وتملي كفوفها قُبل :

بلقى معك لي عذر.. اما بيمين القلب ولايساره.. انا جمانك يمه..مايظل قليبك شايل علي..

موضي بنفس الجفا:والله ماعرفت اربيك.. على هالفعله السودا.. والله..

كثفت بوسات على كفوفها وبترجي:

خدي تحت رجلك يمه.. ربيني من جديد.. بس تكفين.. الا زعلك..

طالعتها موضي كيف تترجاها.. وجمان شخصيتها ماتشابهها الاهي.. تكابر وماتتذلل لاحد.. حتى لها ولاابوها..!

تدري موضي انها ماطاحت تحت ارجولها الا تبي الرضى ونادمه..

امسكت نفسها.. وبعتب :

يومك عزمتي على فعلك.. مامر بخاطرك بناتك.. ماوجعك قلبك عليهم.. ماحطيتي في بالك حالهم ويتمهم دونك..

بكت جمان بنحيب:

والله يايمه موجوعه.. وقلبي متقطع.. لاتزيدينها علي.. ترى قلبي ماعاد به قوه وحيل..

موضي بقسوه:شفتي وجيهم.. كيف ضعفت.. شفتي يد ديم كيف معلقه ومكسوره.. دريتي عن شهادة بيان وكيف انجحت بالدف.. ياعمري عيونهم ضايعه.. ودموعهم قريبه.. انتي وش ياجمان.. وش.. ماتحسين.. كيف طاوعك قلبك على عيالك... كيف عشتي.. كيف مرت الايام وانتي ماتحنين على صوتهم حتى..

جمان بنحيب وهي تتشبث وتخبي وجهها بحجر امها:

انذبحت يمه بدونهم والله.. الايام كانت ماتمر الا علقم وحنضل.. مر يمه مر.. بس انا كنت مجروحه وقلبي محروق..

صاحت فيها :

الأم تدوس الشوك .. تتجرع الضيم والظلم ولاتكسر ضناها.. ماانتي أم ياجمين.. ولاعرفتي وش الامومه..

جمان تأشر على صدرها:

ام يمه ام.. ماذبحني الا عيالي وماصبرت على شاهين الا في جلايلهم..

صاحت امها فيها بقهر :

روحي لمرت اخوك تعلمك.. وش الامومه.. روحي شوفي اخوك وش فعل.. فيها.. واصبرت عشان ورع ماطلع ولانبت من روحها.. ذيك ام ولا انتي تهبين... دستي على روسهم وصلبتي طولك..!!

وبتسائل متهكم:اثبتي وجودك.. رفعتي هامتك.. خذتي حقك.. سامحتي رجلتس.. سامحك هوو.. روحي له عساكم بألف عافيه.. والله يهنيكم.. بس والله ان روحي وخاطري.. قافلن عليتس..

جمان انهارت.. وهي تستسمح منها.. مهره كانت تسمع.. مسكت ضلوعها بقوووه.. مع كلام موضي..

جاها صوت سيف:

وش فيك؟! ..

بخفوت موجوع:

ياكبر زعل امي ياكبره..ياعمري جمان ماتت بكى..

ابتسم بخفوت :ماعليك.. نراضيها.. روحي فهد عند خالتي سلمى جيبيه..

مهره:تمام..

دخل :خفي عليها يمه.. تراها جاتك فرد وجيتها جماعه..

التفتت جمان له:انا في وجهك يابوفارس توسط لي.. امي مسوده الخاطر علي..

صدت موضي..

وجمان توقف وتضم ذراع سيف :

يمه جبت لك جاهتي وشيوخي اعرف ان سيف كلمته عندك ماتنزل..انا اخطيت.. ومنك العفو..

موضي بجفا:ماحنا بساحة قصاص.. روحي اذلفي.. مع جاهتك.. واطلعوا بره..

ضحك سيف :افااا..

جمان بسرعه:الا يمه.. اذا مارضيتي.. فا انا اعتبرها قضية دم.. وش بغيتي.. ديه..والله نسوقها لك سوق....

انتبهت لهمس مهره عند الباب..

اللتفتت وراحت.. بسرعه خذت منها فهد ومهره تقول :

هذا اللي بيجيب الضايعه..

ابتسمت جمان بتفائل..

وراحت لامها وهي صاده بالجهه الثانيه.. وحطت فهد بحضنها.. وبخفوت:

هذا ديتي.. عاد اذا مارضيتي..

وقبل ماتكمل.. موضي عينها في حضنها.. توسعت عيونها..وكأنها جليد وذابت..وهي تمتلي بالدمع وجمان تتركه وموضي تلتقطه بسرعه عن يطيح :

وش ذااا.. وش ذااا.. يالله رحمتك..

جمان بفرح وتضحك:ولدي يمه.. فهد ..مايقولون من طول الغيبات جاب الغنايم.. وهذي غنايمي..

موضي رفعت عيونها وبدموع:

لا اسمع حسك وتضحكين بعد. .. تستهبلين.. وش هالخبال يابنت سعود.. سيف.. ذا ولد..انت شفته..ذا منهو عليه.. هو لها ولا جايبينه تدودهوني..

ابتسم :ايه يمه.. ولد هالخبله..يومها راحت كانت حامل..

جمان :ايش رايك بالانتاج بس..!

انهرتها موضي:قلت لتس انطمي ياجمين.. دام النفس عليك طيبه..

مهره سحبتها وبخفوت:

عطي سداح فرصه.. واضح واسطة هالنقطه.. اقوى من واسطة طوال الشوارب..

موضي ضمته.. وهي تشمه.. وتسمي عليه.. وتصلي على النبي..

وكل مافي خاطرها..

كيف.. كيف كانت لحالها.. بهالمسؤلية.. والوجع..!

سيف رفع حاجب:

نقول طاح الحطب..

موضي بتنهيده وكبرياء:

بس قل لها..ان عادت هالفصل.. لاازوج شاهين.. شيخة قوم..!.. اذا هي بنتي.. فاشاهين ولدي..

ضحك سيف:يعني رضيتي..

رفعت عيونها لجمان وهي تناظرها ملهوفه:

جابت لنا رضاوة ماتنرد.. نستنا قشر الافعال..

جمان راحت ضمتها وباست راسها وخدودها:

ياااااابعدهم..!!!!

مهره وسيف يناظرونهم ويضحكون.. وجمان كنها طفله وهي تجنن موضي بالبوسات في كل مكان..!!

*****

مرت الأيام.. وهذا بعض الاحداث فيها

واقترنت الاعياد..

بمناسبات هادي وبلقيس..

بعد عيد الأضحى تم زواجهم.. في حفل باهر.. وفخم.. يليق باحباب سعود.. ومن توجهم بنفسه.. بذاك الرابط..

بلقيس قلبها يخفق..

في زفه اسطوريه.. هادي هناك ينتظرها.. وهي تعبر.. كالملكه.. بين ابيها وسيف ونواف وفارس..

*حقاً الحياه..تصدمنا.. كنت اضن.. اننا قصة مستحيله.. وان عشقنا سيظل صعب المنال.. وسيقتل في كل ليلة..

لكنها طالت واستمرت.. وانا تمسكت.. كاشهرزاد وهي يخرج عليها الصباح.. فاتسكت عن الكلام المباح..

شهرياري.. رهاني..وقد فزت به..! *

*****

سيف الصغير وتأقلمه الواقعي مع سما وعايلتها..

راجح حبه.. لدرجة كبيره..

مطبق مقولة مااعز من الولد الا ولد الولد..

دخل مشاري مكتبه في البيت.. وسيف يلعب بمجوعة سيارات على الأرض.. ومسبب فوضى بالمكان.. وراجح عينه عليه.. ضحك:

لا يبه.. سيف صنع المعجزات.. العاب وفي مكتبك.. الله يرحم ايام تطردني فيها.. خايف على هالتماثيل اكسرها.. ولااصيدها..

راجح :خله يسوي اللي يبيه.. فدا رجوله.. ماحد فيكم مثله.. لامنطوق.. ولا سلوم.. الولد ماخذن قلبي يامشاري..

جلس على الكرسي جنب المكتب ويحط رجل على رجل:

وانت عشان كذا رافض امه تعلمه انجليزي..ماتبي كلامه يتغير..

راجح لوح بيده :يتعلمها لاكبر.. لايقعد يخلط ويعيد امجادكم..

جا سيف مد سياره.. طايح كفرها:

شالي.. سلحه لي..

حاول ماضبط:منكسر.. مايركب..

بتوسل:تكفى شالي..

ضحك راجح:الحين بذمتك.. لاقال تكفى.. مثل لاقال بليز..

ضحك مشاري :لااا بومشاري.. ماانت صاحي..

******

سيف رتب بيته.. على ذوق مهره.. وغير كلشي .. عشان يستقرون فيه مع فارس.. وسيف والطفل الجديد..!

مهره جالسه وهي تجلد كتب فارس..

سيف دخل بعد ما انهى مكالمه.. وشافها.. :

مهره خليها لاتعورين.. من متى وانتي ثانيه نفسك عليها..

مسحت جبينها وببتسامه :

احس فيني طاقه عجيبه.. ابي اسوي اي شي.. متحمسه.. حبيبي.. قربت رجعت نتفتي..

قرص خدها بخفه:

مهرتي.. تعودي.. ترى سيف بيصير بينا وبينهم... يعني مابيك كل مره تسوي بحالك مثل هالمره..

ارتجفت يدينها بالمقص.. الا انها كملت:

خله يجي.. تالي لكل حادث حديث.. ايش رايك نروح احنا.. وانت بعد عشان تشوف شغلك.. ماكنك بعدت عنه واجد مع هالظروف..

سيف:

ارثر مهتم بالشغل.. ومتابع الوضع كله انا من بعيد.. وياسمين.. معطيها صلاحيات في الورشه.. وتنقل لي كلشي اول بأول.. اول تولدين وتقومين بالسلامه.. بعدها نروح..

مهره بعصبيه:

سيف.. تكفى.. ترى والله ماعاد اصبر.. والله حتى لو نروح بيت بومشاري.. زياره.. وماخذه الا بيوم اللي اتفقنا عليه..

سيف بحزم:قلت لك لا.. مهره.. انتي شايفه وش صار لك في رجعتنا من المالديف.. تكلفتي مع الطيران والرحله.. ماراح تسافرين مكان.. الا بعد ولادتك.. واعقلي.. ولاتوجعين قلبي بهالموال..!

مهره بنرفزه.. ترتب التجليده بالمسطره :

ان سكتنا قالوا تكلمي.. لاتحشكين.. وان قلنا اللي في خواطرنا قالوا اقفلي هالموال.. بس صدق ماتحرق النار الا واطيها.. وش عليك مبرد.. ولدك عندك.. وانا اللي قلبي على ولدي نار..

قلبت الكتاب وتسويه من الجهه الثانيه:

يعني وش صار لي واحنا راجعين.. عشان رجولي انتفخت.. ترى حتى اللي ماهي حامل يصير لها كذا..

سيف بضحك وتهكم:

بس عاد ماتصير رجولها ماتدخل في نعولها..

رمت انبوبة التجليد عليه:

عشر ساعات وانا مدندله رجولي.. شوي اذا اتفخت وماتفجرت..

ضحك وهو يصد رميها بذراعه..

وهي ترفع ساقها.. :والحمدلله.. شفني عودت على حالي.. بس قل ماتبي توديني.. تخاف اولد هناك وتبلش بي..

سيف:طيب تمام.. نزليها لايجيك شد..

مهره تهاوشه:لاتعاملني كني مشلوله.. ترى حامل..

سيف يصب له فنجال:

ليتك تعاملتي مع حملك.. مثل باقي الحريم.. مادري كيف بتطلع بنتي..!.. هو من زعل.. وبكى.. واكتئاب.. ولا من ركض.. وسفر..

مهره وهي تقصص التجليد:

بتطلع قمر.. على امها..

سيف رافع حاجب.. ويتأملها كيف تسولف وتتحرش وهي تقصقص..

ظل يحدق في رموشها نازله..

يوم حسته ساكت رفعت عينها عشقه.. وبشقاوة :

ولا لايكون ماتبيها تشابهني..!

ارتشف من فنجاله وابتسم:

حضها جايها.. من دعوة بعرفه.. لو اطلعت تشابهك..

توقع نظرات دلع وخجل..

الا انها واجهته بنص عيون وبنظره حاده.. وباتهام:

سيف انت وش مخبي هالايام.. وش هالمكالمات والطلعات.. اللي ماهي في اوقات سنع.. وش عندك..؟!

سيف رفع حواجبه.. :

لايجيك شك اني راجع لمسايري..

مهره بتهكم:عارفه قدري عندك.. وعارفه غلاي .. انت فاهم وش اللي اقصده..يابوفارس..؟!

تغيرت ملامحه بعصبيه:

وش قصدك..!

مهره وهي تنهي كتاب وتحطه مع الكتب:

الشغل اللي حذرتك منه.. وراح عمر ابوي باسبابه.. فكرتك وقفت من هالامور بس الظاهر..مالك خاطر.. الا لمن تروح في هالسالفه ارواح..

سيف بانفعال:

مهره.. في امور مابيك تدخلين فيها.. ولاحتى تشورين علي فيها براي..

قامت وبانفعال اكبر:

سيف ذولا ناس مايخافون الله.. ان كانك معهم ولاضدهم.. ان عرقلت لهم.. نسفوك.. وان كنت معهم ووقفت شغل ذبحوك... لاتامن لاحد..!

(تقصد المهربين..)..!

سيف ووصل فيه الغضب.. من كلام مهره وتدخلها في الموضوع من بين اسنانه:

قلت لك قفلي الموضوع.. لايدخل فارس.. ولاتفتحينه ثاني.. لايصير عاد علم جديد..

مهره واقفه قدامه:

والله ماقفله.. دامني حيه وماوسدت اللحد.. ماراح اتركك تروح مراح ابوي ياسيف..

انقطعت السبحه بين اصابعه.. وتبعثرت على الأرض مخلفه.. اصوات متناغمه..

وقف قدامها.. بطوله الفارع.. وبخفوت:

انا بهالدرب من سنين.. وليد وهو وليد.. مادرى عنه الا تالي .. لاتجيني.. بعد هالسنين.. وتناقشيني في شي.. حتى ابوي ماسمحت له يتدخل فيه..

طالعته بتحدي:

لاني ابوك.. ولاوليد.. انا مهره ياسيف.. واذا كنت بهالدرب ومو خايف على احد.. انا وثلاث في رقبتك هالحين..

بعصبيه :مايجيكم شي.. انا عارف كيف اشتغل.. اسمي غايب في كل شي.. وماحد يوصلني..

دخل فارس من الباب الخارجي..

سيف بهمس غاضب:خلينا نفض هالسيره هالحين..

مهره بسخريه وخفوت:

والله ياهالدنيا تلعب فينا مثل الهوى والمراجيح.. والله يستر من الجاي ياسيف..!

تركها وطلع..بعد نظره حاده.. لعيونها..!!

فارس باستغراب:وش فيكم.. جيت بوقت ماهو مناسب..

مهره وهي تجلس نص جلسه وتلتقط حبات مسباحه في كفها:

مافي شي ابوي.. قل لي شالوا الاسياخ من رجل ذياب..؟!

فارس ينحني معها ويلتقط الحبات :

ايه..شالوها الحمدلله..

تنهدت :الله لايعود لكم شر ياعينها..

فارس يطالع حبات السبحه.. الغاليه.. ويرفع عينه لها:

وش فيه ابوي.. كنه معصب..

جلست على الارض وتربعت وشردت.. :

تضايق لاني اقوله نبي نروح لندن.. بس..!

فارس ماصدقها.. وهو يحط الحبات في يدها.. :

هالشي ماراح يخليه يعصب..

مهره شارده..

من يومين قال بيروح عنده مزاد في دبي.. وراح.. ومن شوي وهي تشيل ثيابه لقت ورق تذاكر.. لجده.. ماطلع من السعوديه اصلا ً..

وهذا ان دل على ايش..

على امور قاعد يخفيها..!

قاطعها فارس من شرودها: مهره.. وش..؟!

ابتسمت :قم عطني التحفه اللي جنب الشاشه.. خل احط فيها مسباح ابوك.. ولد المهراجا.. فرطها وراح..

جابها.. وحطتها فيها.. مد يده وساعدها توقف..

حطت يدها تحت بطنها وتأوهت..

مسك ذراعها وبقلق:هااا..!

مهره بمحاولة ابتسام:مافيني شي.. ابوي.. لاتصير خريش على طول تتصروع.. تعال ساعدني خل اخلص كتبك

فارس توه ينتبه.. انها سوت اغلبهم.. بصوت عالي:

وشهولا جلدتيها.. بزر انا..

جلست قدام الكتب وبنص عيون:

احفظ لكتبك.. شل هالقراطيس وتعال نكمل الباقي..

......

سيف بره.. بالحديقه الخارجيه..

يدخن بشرود..

قبل يومين بجده...

احبطوا الدوله عملية غسيل اموال.. تخص منصور.. بس مع الأسف ماقدروا يمسكون اي ممسك عليه..!

الناس اللي تحته هم شالوا الاتهام..

طلال احتاجه في العمليه لان السلعه.. عباره عن عقد المفروض انه اثري.. وعلى اعتباره كنز..

ويقدر بالملايين..

الوضع كله توقف بين البايع والمشتري والايداع..

لمن يتأكدون من السلعه..

سيف وهو يفحصها..

بعدسه في عينه.. واضاءة..

وبحضور طلال.. وناس من فريقه.. وبعد وقت..

قال ببساطة:

مزور..

عقد طلال حواجبه:

طيب لو قلنا ماهو اثري مقلد بجواهر ولا.. يعني كم تكلفته..

سيف مد شفايفه:

العقد فضه والفصوص الخضراء زمرد حقيقي بس من ابخس الانواع.. الفصوص البيضاء ولاوحده فيها الماس كلها زركون.. كله على بعضه تكلفته.. ان شد حيله ثلاث آلاف ريال..بس واضح ان مصنع على يد خبير.. لان بصراحه ولاغلطة.. من الأصل..باستثناء المواد..لاحظ من هنا كيف معطي الفضه لون صاير بالفعل كأنُ انتيكا..

شال الورق :وحتى المزاد وموعده خطأ.. سوثبيز سوت مزادها بفرنسا ب١٤ مارس.. هنا مسجل ٢٦.. البايع والمشتري داخلين في القضيه.. ختم واحد من الاختام في الورق صحيح.. واكيد وخذ بالرشاوي.. الباقي تزوير..

طلال بتفكير:الغريب انه ماستخدم قطعة اثرية صحيحه هالمره.. خابر انت ياسيف.. القطعه الفرعونية.. قبل فترة كانت هي.. واوراقها كلها صحيحه..

سيف:الواضح.. ان راجح ماعاد يدعمه.. راجح القطع اللي معه صحيحه ويشريها.. ومن عشق مجنون في المجال انا اعرفه.. منصور.. يسوي فيها بيعه.. وهمية.. وتالي ترجع الملكية لراجح..

واحد من الموجودين:ومنصور يعجزه يشتري القطع هذي.. ويسوي فيها الامر ذا..

سيف يوضح:

القطع هذي تكلفتها بالملايين.. يعني العقد الاصلي من هذا.. منباع ب١٢ مليون دولار.. والمبلغ اللي يبي يحوله منصور بعمليته ١٣ مليون .. لو شرا القطعه وش استفاد.. ولاشي.. هو مايبي القطعه يبي المبلغ بحسابه بس.. ناهيك عن كم الرشاوي.. عشان يخلص العمليه ويصفى على المبلغ بحسابه..

طلال :برايك.. ليش ماشاف هاوي جديد نفس راجح.. واستثمر معه..

سيف :منصور حذر.. واللي بينه وبين راجح عمر وثقه.. مين بيشري قطعه قيمتها فوق عشره مليون وبيأمنها عند عصابة.. ياطلال المهوسين في المجال هذا.. تراعي قطعها اكثر من عيونها..

رجع سيف يدقق في القطعه :بس والله محترف اللي اشتغل هالعقد..

رفع طلال صورة حقيقية للعقد :

انت متخيل انه عبر من مطار فرنسا..

سيف ببساطة:ماحد فحصه.. واضح ان الرجال.. راشي الدرب صح.. هذا جاي على انه مشتريه.. من فرنسا.. والبايع استلم.. ابي افهم.. كيف مر هذا.. بمبلغ كبير كذا..

طلال :الواضح ان في له احد مساعده ومنزلها بالطياره قبله.. بنفتح تحقيق.. على كامل الطاقم..

تنهد سيف.. وهو ينفخ الدخان..

من سنوات.. يعرف طلال.. لجئ له في بعض الامور في مجال الاثار وكذا..!

من بعدها سيف حب الشغله.. ومستحيل يرده في اي طلب ممكن يساعد في القضاء على شبكات.. او خاينين للوطن..!

بطبيعة شغله ومجاله في فحص الاثار والقطع النادره وعمرها..

تلجئ له بعض الجهات.. في بعض الامور في اختصاصه..

بس الشغل مع طلال غير..

يحس انه يسويه من قلبه..

ويسويها من اجتهاد شخصي.. مالها علاقه بالورشه والعمل..

للسرية المهام..

الشغل ضد منصور صار له شهور..

ماراح يتخلى عن الموضوع الحين.. ابد..

مرتاح نوعاً ما ان راجح مبتعد عن العملية..

بس متوتر.. شوي..

وخايف الأمور تاخذ منحنى ثاني..!!

ماينسى.. ان عقاب ولد طلال كان بيروح فيها برصاصه.. انتقام.. من ابوه..

ارعبته الفكره.. وهو يطالع مهره وفارس من الزجاج العاكس داخل البيت..

*****

صغيري يتعلق في صدري الآن.. اعتاد حضني.. ونحن نمضي الشهر الثالث معا ً..

اضمه.. اكثر.. اريد ان ادخله في اضلاعي.. اليس ثمرة حبي مع عسافي فقيدي..!

كيف تمنيت اختفاءه..

كيف سعيت لقتلك في بطني..

كيف عشت بدونك.. ولم اشعر انك فعلا ً على قيد الحياه..

كيف ينوه والدي انه اقترب وقت رحيله..

في كل قانون وشرع..

الحضانه لي..!

من هي مهره غير انها زوجة ابيه.. واصبحت زوجة عمه..

فعلياً صغيري مع الوقت تعلقني..

حتى لو لم يخرج امه الروحيه من خاطره..

حتى لو ألح باشتياقه..

حتى لو لم يسلى عن اتصاله بها.. وسؤاله عنها

لو انفردنا في عالم وحدنا..

لن يجد غيري..

سيتعلق بي اكثر.. ولن يستطيع احد نزع روحي مني..

تشبث سيف فيها وهو نايم..

وكان ينادي بماما..

تدري انه ينادي مهره..

هو الى الان مايعرف انها امه ولايناديها الا بسما..

بس لما يهذي بها بمنامه..

قلبها يبكي..

حتى لو كان يقصد فيها احد غيرها..

يطالبوني بالمستحيل بتركك..

همست:ماحد يقدر ياخذك مني..!

*******

منصور بثورة:

القطعه كانت ولاغلطه.. ولاغلطة ياراجح.. ولعلمك مر من مطار فرنسا.. سلاما ً.. مع انهم فحصوه.. من اللي ملتم عليه طلال.. ويخرب علي شغلي..!

راجح.. شارد.. ويدري انه سيف.. سيف عقليه فذة في مجال القطع والاثار..

وبما ان هو اللي عرقل تهريب لوحة ادوارد.. هو كان سبب في تخريب عملية غسيل الاموال.. لمنصور.. الحين..

راجح بهدوء:

تحصل يامنصور.. بس انت ماتعودت على النكبات.. في ثغرة..هي اللي اعدمت الموضوع.. ويسلم راسك.. اهم شي ماصابك شي..

منصور ضرب الطاوله.. :

٤٩ مليون ريال.. راحت كذا..المبلغ تصادر.. والاغبياء انسجنوا.. والدنيا انحاست.. وكله منك..

راجح مد شفته.. وبنفس الهدوء:

لاتحملني خطاك.. انا بعيد عن المسئله كلها هالمره.. ولاانا بحاجه غسيل اموال.. تدري ان تجارتي نظيفه من سنين..قبلها اشتغلت على تهريب الاثار.. وقضيت منها.. انت ماكتفيت يامنصور.. رحت تتمادى.. في بلاوي.. جرتك لغسيل الاموال.. اللي والله بتجرك لحد السيف..

منصور بانفعال:

لاتسوي نفسك الشريف العفيف.. من اللي يساعدني في التخطيط.. من اللي كان يعطيني القطع النادره.. ويتمم لي الشغل النظيف.. انت ياراجح.. انت..

لوح راجح بيده:

هذا من باب الرفاقه.. ماتهون علي يامنصور.. بدينا من الصفر انا وانت وغازي.. وبنص الدرب.. كلن سلك له طريق.. وانت انحدرت في طريق مايل مرتن وحده..

منصور بانفعال:

انا طريقي اختصر لي كل شي.. الثروه اللي عندي اضعاف ثروتك.. كنت محتاج ارقى الثريا بسرعه.. ووصلت.. رجعت نوير..لقلبي.. بعد ماخذها غازي وغرها بوسامة زايله وكم قرش.. جمعهم وطارن.. حبيتها قبله.. ودارت وارجعت لي انا..

راجح بسخرية :

لاترافع بقضيه خسران فيها يامنصور.. ان كانها ارجعت لك فابخشم الريال.. ولا كلنا ندري.. بحب نوير وغازي.. .. يومك على فقرك مابغتك..بس نوير من طينتك.. الغايه عندكم تبرر كل الوسايل..!

منصور ومايحب هالسيره.. اللي يضربه راجح بواقع زوجته وواقع ارتباطهم في بعض :

ماعلينا من الماضي.. اللي ابيه الحين.. ليش شغلي اللي يخص القطع النادره والقديمه ينعدم.. انت تعرف ناس في هالمجال.. اللي يتعرفون على الصحيح من المزور.. دور لي في الموضوع.. ابي اعرفه عشان ابلعه العلقم..

راجح بانفعال:انا معارفي بلندن.. القطعه انمسكت بالسعودية.. فكني.. ورح قفع شوكك بيدك..

رفع منصور حاجب :

تراي مانسيت.. ان لوحة ادوارد ماراحت الا بثغرة من عندك.. يعني اللي كشف اللوحه ماهو بعيد من معارفك ومعارف رجالك..

صاح فيه:

وانت بتخون فيني على تالي العمر يامنصور.. يعني انا ببيعك..

قام وبالهجه هاديه كلها تهديد:

يمكنك ماخونت فيني.. بس في احد ثاني ماتبي تخون فيه بعد.. بس والله ياراجح.. ان كانك تدري.. من اللي قاعد يلعب فيني وساكت.. لاانسى عشرة السنين.. وعاد انا شين.. لانسيت..

راجح بخفوت غاضب:

تهددني ..؟!!.. والله و بتطلع لك جبل عالي مانت قده..

منصور ببتسامه تخفي الكثير:

مزوح يابومشاري.. تدري انك راس المال والمكسب الصافي..

راجح وهو يوقف وبجمود:

ماعاد ينفع رقع الثوب والشقوق كثرت..

عقد حواجبه:

يعني..!

راجح:ماعاد لي شف بمقابلك يامنصور.. خلنا نحفظ اللي كان بينا.. قبل ندوسه في الايام اللي بتجينا..

.......

يوم الجمعه..

بلقيس في غرفتها تسوي.. ويفي.. وتتجهز.. عشان زوارة بيتهم..

ابتسمت وهي تسمع صوته.. مع انفال:

ماهو اليوم ياانفال.. بودي بلقيس بيت ابوها.. وبروح اخلص شغله..

انفال :يعني كيف ياهادي.. تونا بالحمد.. اشوف بلقيس صارت الاوله.. وانا حذفتني.. من القايمه..

ضحك وهو يجننها:

عاد ذي.. بلقيس ياغنايمي..لاتقارنين نفسك فيه.. ترجح كفتها ويخرب الميزان..

صاحت :بعد..!!!... هين ياهادي.. صدق انك بياع عشره وقلاب نعل..

فصلت بلقيس السلك وهي بتفقع ضحك وهادي يقول :

لاازم تقتنعين.. اني الحين متزوج وماعدت عزابي وفاضي لك بس ولطلابتك..

انفال بقهر :والله براڤووو ياولد ابوي.. لو ندري ماعرسناك.. جوالي مايشتغل له اسبوع.. الفلوس عندي.. ودني بس اشريه..هادي لاتقهرني فوق قهري..

هادي برواقه:

بسم الله عليك من القهر.. خليها الاحد يقولون بيجيبون عروض جديده..

افتحت بلقيس الباب.. :

وانا اقول كذا انفال.. تعالي معي بيتنا.. وخلي جرير بعدين..

توسعت عيونها:

وشهووووو....!!.. حتى انتي يابلقيس.. اقول عاد.. ليته يرجع الزمن.. ان كان ماسويت اللي سويته..

هادي :وش قصدك..

انفال وخلاص بتبكي صاحت:

مانب قايله وش سويت.. بتوديني.. ولا والله لاخلي رجل النور ولارجل ضحى يوديني.. واخليهم ينقدون عليك يالأخو العاق..

بلقيس بنعومة:

هادي حبيبي.. ترى زوارة اهلي ماقدر اتأخر عليها..اذا بتنشغل.. اخلي السواق يجيني..

هادي رفع حاجب وبتخرفن:تامرين امر.. ابوي.. لو تتعطل كل اشغالي..اخذك أول ياملي..

انفال تطالع فيهم وعيونها متوسعه..

ومستنكره اسلوبهم الحقير معها..

خلاص بتبكي..

عاد هي كلشي ولاهادي يتغير عليها..

توها بتفر تروح.. الا مسكتها بلقيس:

لحظه لحظه نفوول..

وفقعت ضحك:وش فيك.. عصبتي..

انفال تحاول تتفلت:

لااا ياشيخه.. اجل تمسحون فيني الأرض واظل واقفه..

هادي:واحنا وش قلنا.. بوصل حرمتي.. بيت اهلها وبروح عندي شغل.. اعقلي.. ولاتقلبينها حزازيات..

صاحت فيه وهي تحاول تفك ذرعان بلقيس:

والله لو هو جوالك المكسور ماقلت كذا.. بس غيروك العواذل وانا كنت مفكرتك الذهب.. هديني.. بلقيس..

بلقيس غمزت لهادي وهي تكتم ضحكتها:

امسكها هادي.. لاتفضحنا مع خالتي.. بتصدق اني فريت مخك.. وانا عاد وش حليلي.. مابي الا الستر..

انفال خلاص نرفزت وهادي يمسك ذراعها.. ويسحبها.. ويدخلها معهم الغرفه.. ويسكر الباب..

هي وتكتم البكي :

افتح هالباب.. لاوالله اذبح نفسي..

هادي بشبه ابتسامه:

يابنت اعقلي.. لاتفشليني.. كل ذا عشان جوال..

انفال تحاول توخر يده عن الباب.. :

البلاء والله ماهو في الجوال.. البلاء في اسلوبك الوسخ معي.. اول ماترضى يظل الشي بخاطري ولاتجيبه.. والحين مير.. ولاكنك تسمعني..

بلقيس وراها:

ويعني انا غيرته..

سكتت.. وعيونها تلمع.. وتعض في شفتها ماتبي تبكي..

هادي:قولي لي كم معك فلوس..

انفال بعبره:

مابي اروح.. خلاص.. انا اعطي الفلوس ضحى وتجيب لي.. خلاص بعد.. افتح الباب..

هادي:طيب انتي قلتي جوال اللي تبينه ب٤٧٠٠.. ومامعك الا ثلاث آلاف .. ماتكفي.. اصبري جمعي فوقها...

انفال انصدمت..

يعني حتى مايبي يزيدها.. سحبت كفه.. :افتح هالباب.. الحين.. لا انادي عاد امي تتفاهم معك..

بلقيس بشقاوة وهي ورى انفال:

على مقالبك فينا.. ماتحملين المقالب.. والله من جدها بكت..

خذ هادي كرتونة الآيفون من بلقيس..

وبدون سابق انذار لصقه على وجه انفال:

هدية..مابي منك ولاريال..

توسعت عيونها.. . وهو يحط العلبه بين كفوفها..

تصنمت وتناظر العلبة.. وناظرته ودموع.. صامته..

هادي:عاد ماحصلت اللي تبين جبت لك بو خمس آلاف واشوي..

رفعت كفوفها والكرتونه بيدها على وجهها وعيونها وانهارت بكي..

مسك يدينها وهو يضحك:

هيييييي انفال.. ماهو كذا عاد..

بلقيس:شكلنا ثقلنا العيار..

ضمته.. وهي تعتصر خصره:

والله لو تتغير علي أمووت هادي والله اموت..

ضحك وهو يضمها:

من يغيرني.. بلقيس.. تراك تزنين على هالجوال من جهه وهي تزن علي من جهه.. يعني لاتخافين.. داعمه لك ماتغيرني عليك..

انفال ببكى:

انا داريه عنها.. والله لو ماعرفها صح ان كان ماخطبتها لك..

بلقيس وهادي يطالعون باستغراب..

بس ماعلقوا..

وهادي يحاول يهجدها.. ويروح يجلس معها.. ويفتحون الفون..

سكتت وهي تطلعه بحماس وتضحك.. هادي :شغليه انتي عشان يتبارك..

شغلته واضافة ايميلها..

وافتحت الكام.. وصورتهم.. وهي تضحك:

عشان يتبارك صح.. اول صورة للجميلين حقيني..

بلقيس تلملم الكرتونه.. وتحطها بالكيس.. :

والحين قولي لي.. كيف تقولين خطبتيني لخوك.. هالحين ابوي هو حذفني عليه.. وش دخلك.. بالموضوع..

انفال حركت حواجبها وبخبث:

والله لو عم سعود خالتي قماشه.. ان كان قال الهام وشفافية.. وصدقنا..

هادي عقد حواجبه:لايكون انتي اللي كنتي قايله لعمي سعود عن حبي لبلقيس..

قامت.. وبمكر.. وبحاجب مرفوع:

الله الله..

توسعت عيونهم.. بصدمه.. :شلوووووون..

رفعت انفال الجوال:

استاهله ولاماستاهله..!!

سحبها هادي وقعدها.. وبلقيس من الجهه الثانيه..

هادي بذهول :قولي لي كل شي.. من اوله لاتاليه..

طالعتهم اثنينهم ببراءة..

بعدين انفجرت ضحك..

******

دخل نواف المطبخ.. بعد ماسئل عن زينه وقالت له امه انها هناك..

قرب وداخ على ريحة القهوة العربيه.. وروائح شهيه ثانيه..

لقاها واقفه.. ترتب معمول في صحن فخم.. ابتسم على تركيزها.. في شغلها.. :

اساعدك..

رفعت عينها له وضحكت.. وارجعت ترتب:

بالله.. وش بتسوي.. بتشيل الصحن للصاله.. يلا..

جاء عندها:ع القوة..

هي :يقويك..

ناظر شغلات مجهزتها.. :كنك معطيه الجماعه وجه..

قربت قطعة معموله بفمه وكل منها:ايش رايك حلو..؟!

نواف.. خذ باقي القطعه من يدها:لذيذ.. تسلم الايادي..

غطت المعمول :يسلمك روحي..

راحت وبيدها ترمس.. نواف.. شافها.. وهي تفت الزعفران والهيل فيها..

ابتسم.. ومن خلال العشره معها.. يعرف انها لاقامت تطبخ ولاتشتغل بالمطبخ.. ماتتكلم.. وتظل مركزه في شغلها.. ولاتعطيه وجه..!

وجهها جدي.. وهي تعطي العامله.. الترامس.. عشان توديهم.. وتقول لها شتسوي في باقي الشغلات..

ومتجاهله وجوده..!

رفع حاجب..وهي تطلع صينية موالح من الفرن.. وبس حطتها على الطاوله الجانبيه..

تلفت ومالقى احد.. راح باغتها.. بضمه من ظهرها..

شهقت: نواف.. شهالطفاقه..

باس خدها بقوه:انتي ماتستحين.. واقف ولاكنك تشوفيني..

زينه بضحكه.. وهي تشيل الموالح.. الطوليه.. وتصفها بزجاجات كرستالية:

تعرف ان التركيز عندي مايتوجه الا لشي واحد..

لاتشغلني وخلني اخلص.. عشان البس..

نواف وضام خصرها :ماراح اطلع الا بك.. خليها جودي ترتبها..

زينه ترتب فيها بسرعه:لا انا بكملها.. يلا روح نواف وبجيك..

بخبث راح تحرش فيها اكثر.. وهو يقول :

ماروح الا معك.

نقزت مع حركته.. ولسعها الطبق..

رفعت صبعها.. :اححححح..

نواف يفكها :بسم الله عليك..

وراح خذ صبعها.. :بسيطه..

وباسه..

دخلت موضي واصبع زينه على شفايفه وبشطانه:ماتجوزون انتوا من هالافعال.. الا لمن تصكم هالعاملات عين.. وقعدوا..

زينه وهي تبعد :والله امي تعرفيني.. عاقله وش حليلي.. بس نواف يجيني المطبخ ويحوسني..

موضي تشيل المعمول :اصلا ً انا خابرته.. ماكنه العازف عن العرس واللي طلع عيني..

نواف مسك يد زينه:

عاد مو كل عرس عرس.. ولا كل بنت زينه يايمه..

موضي مستمتعه على ها لكبلز ..

واللي صفوا معها في البيت..

وتجنن فيهم دوم وتتحرش:

طيب اترك يدها.. ماخلصنا شغل.. وراك متعلبش فيها كذا...

نواف يسحبها معه:

كملي الشغل مع فلبينياتك.. ابي زينه.. وعندها اصابة عمل.. احترقت..

توسعت عيون زينه..

وموضي :الله اكبر.. وش اصابته ابوي.. خل البنت تساعد امها.. وانت يلا اذلف تيسر.. مجلسك..

نواف:ماحد جاء بالمجالس.. بصعد مع زينه فوق.. ولاتزيدينها يمه ترى ماخليها تنزل الا بكره..

وقبل ترد.. طلع معها..

وموضي ماسكه ضحكتها.. :شف التسلب.. استخف مره وحده..

جات العامله.. عطتها موضي الطفرية:اخذيها جودي.. وارجعي رتبي الموالح كلها.. واخذي منها للمجلس.. والصاله..

جودي:مدام زينه.. سوي..(ماترضى لهم يكملون شغلها)

موضي:مدام زينه صعدت.. تلبس.. كمليها انتي ياجودي.. وعجلي..

بعد اشوي وبعد ماجتمعت العايله..

مهره جات مع فارس..

لان سيف انشغل.. وماكان موجود..

وقاهرها.. على هالحركات والغموض.. واصلاً هي متكهربه معه.. من ردة فعله هاك اليوم يوم عصب عليها.. وانه مايبيها تدخل.. في شغله..

وقفت جنب فارس وهو يشيل صحن من المقعد الخلفي.. وتوها بتاخذه.. قال:

خليها.. انا بدخلها..

سكرت مهره الباب..

وتوجهوا للباب الداخلي.. قالت:

لاجاء ابوك المجالس.. عطني خبر..

هو:ليش هو ماكلمك..

سكتت..

فارس قبل مايدخلون:مهره .. ماانتي طبيعيه انتي وابوي.. صاير شي..

همست:لا مافي شي.. بس ابي اطمن لاجاء..

بسخريه:طيب.. دقي عليه انتي..

هي بعصبيه وتفتح الباب:يوووه فارس خلاص لاتعطيني خبر ولاهو يعطيني..مابي منكم شي..

ضحك:والله هالكرشه عامله عمايلها فيك.. ضاربه فيوزاتك مرتن وحده..

دخل يسلم على موضي وعماته..

وهي وقفت تشلح عباتها.. وتعلقها..

لابسه فستان حمل مره ناعم وميدي.. وشعرها طاول لانهاية ظهرها.. رابطته بربطه ناعمه مشجره.. ومجوهرات ناعمه جدا ً تليق بشكلها الحالي..

دخلت..

جمان كانت تتوجه لها.. تلقفت بطنها.. بين كفوفها وبانهيار :

يااااعمري.. تفوووووووزين بأكيت حامل شفتها بحياتي..

ضحكت مهره:

عززي.. عززي.. لهالبطه..

ضمتها وسلمت عليها :يازينها بطه اللي بتجيب لنا بنت سيف..

فارس يقلد مهره.. يحط يده عند بطنه:

آاااه.. شكلي بولد.. بالسابع..

وكرر الحركه:اووووحححح.. سيف شكلي بموت قبل اولد..

ورفع يده :فارس.. امسك يدي.. جلست على الارض وتوهقت..

توسعت عيونها وهي تشد شعره :

حيواااااان.. ومسوي فيها تتروع.. وانت قاعد تمسخر علي..

كلهم يضحكون..

وفارس يبي يوخر يدها عن شعره:

والله انك خابصه قلبي.. كل اخاف تولدين واتوهق فيك.. اتركيني مهره.. لااحوس بطنك..

مهره تركت شعره وراحت تسلم على موضي:

بذبح ولدكم يمه.. اصبري عليه..

ضحكت موضي.. :

تركيه.. يخاف عليك من الهوا الطاير..

فارس يتمسكن:

شر مرت هالابو.. مخليتني سندريلا.. من اصحى وانا اكنس واغسل.. واشطف.. ماتصحيني للمدرسه.. الا برفسه.. تقطني من السرير.. عنيفه وتخوف.. قاعده تهددني.. ارجع اسكن عند امي موضي.. ولا بتخليني اسكن بغرفة السواق..

بلقيس وهي تضحك :

لااا يامهره.. عطيناك اياه لحم.. وبترجعينه عظم..انتبهي له.. يتيم.. كسبي فيه اجر..

مهره بنص عيون.. :

من اليتيم..!!.. ماخذ حقه دبل ومدبل..

فارس ياخذ فهود من بلقيس:عجلي بس جيبي لنا شي كذا ألعب فيه.. يازينه الطلياني.. وبانبهار:ورب الكعبه صار يشبه امي..

جمان ابتسمت:

ايه حيل احسه صار يشبه نجود الله يرحمها..

موضي :عاد يانعومه.. لاصار يشبه عمته..

ابتسمت مهره بشرود..

وهي تراقب فارس.. كيف يدقق في فهد.. ومبسوط بملامح امه فيه..

جمان:وين الزينه..؟!

موضي:ياعمري ماصعدت الا من شوي تتزين..ماقصرت وهي تسوي لكم هالضيافه..

مهره رفعت حاجب:

بعد وتغطين عليهم يمه..

موضي:وانا صادقه.. شوي وتنزل لكم.. تقهوو.. وخلوها براحتها..

مهره توسعت عيونها:بنات ملاحظين ان امي.. تسوي تغطيه لزوين والخديوي.. خايفه عليهم من العين..

بلقيس:الله يرزقنا.. بس..

جمان:ان حبتك عيني.. ماضامك الدهر.. الله يخلف علينا.. ماحد يسوي لنا اجواء.. ولا احد يعتم علينا.. من نزبن مع هالرجل.. اللي يبكي واللي يطق الباب.. بس ماقول الا حظوظ..

توسعت عيون موضي.. وهي تلوح بكفوفها:

كش عليكم... عليكم الله واكبر..!.. ذكري الله انتي وياها..

بلقيس بضحكه:خافت على الكناري حقينها.. قومي اخذي غسول فناجيلنا يمه..

قام فارس وعطى فهد لجمان:بطلع انتوا ناس فاسخين..

قامت مهره الحقته:دقيقه فارس..

وراحت توشوش في اذنه..

بعدها وشوش في اذنها..

جمان :الحين هذا سندريلا ومرت ابوها..

ضحكت بلقيس:عياااره..

مهره وعيونها متوسعه لفارس:

اهاا فروس عشاني..

بشقاوة:اوعديني تسوين لي محاشي نفس امس وبشري..

مهره :خلاص تم..

سحب شعرها وهو بيطلع:اجل انتظري مني ألوو..

******

❤️

بلندن وبيوم امس..

راجح بغضب وانفعال:كيف اتركت البيت.. وشلون مب لاقينها..وانتوا وينكم فيه عنها..

مشاري بعصبيه:

هي طلعت العصر.. انها بتمشي سيف بالحديقه.. وهي اصلا ً تطلع فيه هالطلعات.. من وين بيجيني انها مبيته النيه تهرب فيه..!

راجح بصياح:

وانتي ياليان.. تبيني اصدق انك ماتدرين.. عن نوايا اختك.. وفعولها..

ليان :واللهي مادري بابا.. وش تبين احلف لك فيه.. مادري.. اوك انا معها..في انها احق بولدها.. بس .. صدقني.. ماقالت لي شي..

راجح: والله لو اعرف انك تدرين وساكته.. والله لاانسى انك بنتي.. وامسح فيك الأرض.. وهذا انا قلت والله..

توسعت عيونها وبانفعال:بابا.. انت ليه معصب كذا.. ولد وامه وراحوو سوى.. انت تبالغ..سما مسكينه حسوا فيها.. معقول تولد الطفل.. وتعطيه لمرت ابوه.. فكر فيها.. لاتصير متحجر عشان كلمة قلتها لسيف.. لو احد بياخذ منه فارس ماراح يرضى..

اخرسها كف صارخ من راجح.. علم في خدها.. وبجمود :

زيدي في الحكي شوي..اذا ناويه اقص لك لسانك..

طالعته بصدمه.. وعدم استيعاب.. للضربه الأولى من ابوها..

مشاري بذهول :يبه..!!

مد كفه يسكته:اسمعوني عاد زين.. ان ماطلعت الكلبه اختكم.. هاليومين.. لايصير شي ماتندم عليه لحالها.. كلكم.. بتاكلون الاصابع ندم..

وراح وهو يكلم:

سويت اللي قلت لك ياهاشم.. يلا جايكم بالطريق..

خلال الزواره.. وجمعة البنات داخل.. والشباب بره.. ارسلت مهره لفارس:ها كلمت ابوك..

كتب :مايرد.. عجزت..

مهره بعصبيه كتبت:وش فيه يعني.. من الظهر طالع..فارس تكفى.. شف كذا نواف.. لاتقول انا اسئل بس يمكن يدري هو وين..طمني.. تراي قاعده على جمر..

فارس حط ضحكه طويله:اكذب عليك..

ورسل لها صورته..في المجلس.. وهو ماسك عصا سعود.. ومندمج مع الجماعه..

مهره قلبها انخرط.. :

حسبي الله على ابليسك يافارس.. كانك خبصته قلبي..

فارس :بسم الله على قلبك.. المهم لاتنسين المحاشي..

مهره حطت ملصق معصب:انقلع.. ماراح اسوي لك شي..

زينه.. مدت قهوه لها:

اتركي هالجوال.. وسولفي وراه..وش فيك يامهير ماعاد تعرفين السنع..

مهره قفلت الجوال.. :

يووه زوين.. لاتسوين الحين السلفه اللي تحشر في مرت حماها.. تراي اختس ..

ضحكت زينه:

يقولون يمشي المركب بحريم الرجل.. ولايمشي بحريم الحما..اخذي قهوتس وقابلينا..

بلقيس :الحمدلله ان ماعند هادي اخوان.. مافيني حق تحديات ولامقارنات..

ضحكت مهره:انتي يكفي عليك انفال.. مرة رجل مب حماه..

بلقيس بضحكه:اسكتي اسكتي.. ياختي انفال صاير عندها فوبيا اني اكوش على هادي ويكشت فيها..

موضي:يحق لها البنت.. انفال.. من وعت على الدنيا وهادي ابو واخو.. لاتسوين بعد انتي فيها حركات غيره.. وتبين تاخذينه بصفك..

زينه:ايه انتبهي.. ترى الدنيا دواره..

جمان:واللي ماترضينه على نفسك.. لاترضيه على غيرك..

توسعت عيون بلقيس:الله أكبر.. الحين تحسسوني اني باكل حق اليتيمه وبحرمها من اخوها..

مهره ضربت كتفها:ماعليك منهم..جلديها.. لاتخلينها تلعب عليك..

جمان:ياشيب عيني يافارس.. يمه انا اقول رجعي ولدنا بحضنك..عشان نطمن عليه.. لاتخلينه تحت رحمة هالقشرا..

مهره بنص عيون وهي تسحب الدله وتصب:

فارس.. بعجنه اليوم.. وامصع اذانه.. يصبر علي..

زينه وهي تضحك:

وش فيك عليه.. شمسوي..

مهره بنص عيون ترتشف من القهوه..

زينه بنظرة عميقه لها:انتي وش فيك.. ماانتي شليه.. بعيد عن فارس والمزوح.. وضعك ماهو عاجبني..

مهره رافعه حاجب.. وتشرب قهوه:

ليش وش فيه وضعي.. ترى انا من جيت من المالديف والايجابيه عندي مليون..

ابتسمت لها وعينها بعينها.. وفاهمه ان مهره متوتره..:الله يزيدك من الايجابيه.. ويطمن قليبك ياخيتي..!

بعد اشوي جاهم صوت سيف.. وهو يطق الباب:

يا ولد..

زينه خذت شال.. حطته عليها..

ومهره..و خفق قلبها.. مع الصوت..

وتسب نفسها.. الحين زعلانه عليه.. وشهولا هالرعشه لمن اسمعت صوته..

وبعدين ليش ماتدخل مع زينه في شالها وتختفي عن عيونه..

ودها حطت رجلها ودرجت لزينه.. وقت قامت من جنبها.. يعني بتفضي المحل له عشان يجلس..

مهره بحقاره.. شالت ديم اللي تلعب في بيالة شاهي.. وهي تدقدق خواصرها وتقول:

انتي ماتقولين لي ليش انتي عسل كذا..؟!

ديم تضحك.. :انا مربى.. انتي عسل..

جلستها جنبها مكان زينه.. :آكل لسانك آكله..

سيف انتبه لها ورفع حاجبه..

جمان وبلقيس .. قاموا سلموا عليه.. داعب بلقيس وقرص خدها:

محلوه مع العرس يالنتفه..

بلقيس وردت وبتكنيشه:بالله..!

قال :ياحضه هادي فيك..

وانحنى يبوس راس امه.. والقى السلام على زينه:اخبارك ياام سعود..

زينه:بخير.. جعلك بخير..

وانتهى من سلامه بقبلة راس لمهره اللي جالسه ومتشاغله مع ديم..

ارتجفت.. بس مارفعت عينها.. وهو يجلس جنب جمان..اللي حركت حاجبها.. وبخفوت ميلة راسها:

واضح انك مزعل الحلوين..

سيف بخفوت وثقل:

تدلع..!. ولامافينا شي..

جمان بنفس الخفوت:والله لو انك مو غلطان فيها.. مادنقت وبست راسها..

سيف بتحذير:جمان..!

قاطعتهم موضي.. وهي تسولف لسيف.. وسيف يندمج معها بالسوالف..

ومهره اللي حاولت.. تبدي.. ان مافيه شي..

بس تتذكر.. حركاته وغموضه.. وغيابه.. الغريب.. واللي واضح بيجيب العيد باسبابه..

وتصد تلتهي بأي شي..

جمان لكزته بكوعها:

انت ماتستحي.. الحين هالعيون الشواهين.. تزعلها..

سيف ابتسم واخفى ابتسامته.. وطنشها.. مارد عليها..

جمان تتحلطم وهي حاطه كفها فوق فمها:

انا دارية.. انت نوف وهيا ويخبون عليك.. يالجاف.. قل لها شي.. داعبها.. اكسر الزعل والحاجز ياحظي..

سيف يمد الفنجال لبلقيس.. وهي تصب..

ومطنش جمان..!!

مهره.. قامت من المكان.. وراحت المطبخ.. واقفه تشرب ماي.. بتوتر..

كلشي فيها يتواكل..

هو من غيابه طول اليوم..

ولا من سيف الصغير.. ماحصل تكلمه من امس..

وحتى يوم اتصلت..

ماحد رد عليها وطمنها...

وسيف.. الحين.. باس راسها.. وجلس.. وتجاهلها تماماً..

هو افضل يتجاهلها..

لأن لو كلمها هي بتتجاهله..

احيان تحس انها ماتفهم سيف.. ولاردود فعله.. ولاتصرفاته..

كانت مواجهه الكاونتر وتشرب من الكاس وترجعه.. لمن حست فيه يدخل وبخفوت:

تراها ماهي حلوه الزعله ياقلبي.. ماحبيت ان جمان تلاحظ.. وتحشر لي بالكلام..

التفتت وبنص عيون وهي تشرب من الكاس:

انا طبيعيه.. انت اللي فوق راسك البطحا..

رفع حواجبه..

هو جايها يعاتب.. ومع نظراتها الطفوليه.. ووقاحتها لقى نفسه يخق..

حاول مايبتسم.. وقرب منها:

المفروض لو صار شي بينا.. يظل بينا مو حلوه نحسس اللي حولنا.. بشي..

مهره بلامبالاة : ماقلت عند احد شي.. ولاحسست احد بشي.. انت جيت تحب راسي.. ناوي يعني تربكني.. واقوم اعطي نظرة حياء.. وتبوسم.. كني مب زعلانه.. لاعيني...ماتلوي ذراعي.. ببوسات راس عند اهلك..

قالت كذا وتكتفت واسندت جذعها..

رفع حاجب ويراقبها والواقع ان مهره تلعب على اوتار حساسه بهالنظرات..

قرب منها وحط كفوفه على الكاونتر.. وهي بينهم:والله شايله يابنت غازي.. كبر خاطرك على شي مايسوى..

عينها على ازرار ثوبه.. ماتبي ترفع راسها وتلتقي عيونهم:

والله لما تقول لي انك في دبي.. وتطلع في جده.. المسئله فيها انَّ.. ولما اشوفك تكلم.. مكالمات غريبه وسريه وحذره.. اعرف انك مخبي بلاوي.. ولاتقول شغل.. اعرف شغلك المعتاد.. وانت تكلم آرثر.. ياسمين.. وحتى وليد وماريا.. انا ماجهل شغلك في المعرض ولا الورشه.. ولاحتى المزادات.. بس الوضع المشبوه ذا.. يذكرني بسالفة اللوحه بفرنسا..

نزل راسه عند اذنها وهمس:

كلها شغل.. مافيه شي مشبوه.. ولافي شي خطر.. انتي بس لاتخلين الشيطان يلعب عليك..

دفته مهره بعصبيه.. وبخفوت عصبي :

الشيطان عشعش بمخي.. انت مع الحق ولا.. لما انت تبطل عمليات سرقة او تزوير.. وتكون في صف الشرطه باوروبا.. وتجي هنا.. وتقول انك بمزاد بدبي.. الا تصير في جده.. وتواصلك الغريب مع هاللي اسمه طلال.. لاسمعت طشار كلام احس انك تغرد خارج السرب... في شي ماهو واضح.. وتجي تقول لي لاتخلين الشيطان يلعب عليك..

قابل ثورتها ببرود اعصاب.. ومسح على راسها.. بكفه:اهدي ياقلبي.. احنا مو في البيت..

توسعت عيونها:سيف ماتقدر تقول توضيح بسيط... تراي زوجتك..!!!

استمر.. يمسح على شعرها وبخفوت:

ماعندي اي توضيح.... في امور... واسرار.. مايشيلها اثنين.. تفسد..

رفعت عيونها له.. وبحزم.. وصوت خافت:

دام كذا.. اجل ماعاد لك فيني حاجه..

عقد حواجبه:

وش قصدك..؟!

مهره وهي تحدق بعيونه.. وبهمس لاذع:

نطلق.. وكل راس يرتاح من وجعه..

مسك خصلاتها بقوه.. وحدق في عيونها.. :

والله لو جرت هالكلمه على لسانك ثاني..لايصير شي مايعجبك يامهره.. لاتخلين شي تافه يخرب بينا.. اعقلي وخليك اكبر من كذا..

عيونها لمعت بدموع.. وقبل ماتعاتب.. وتتكلم.. باسها .. وسكتها...

نزلت منها دمعه حاره..

خايفه عليه.. بجنووووون..!!

حسوا بصوت احد يدخل المطبخ.. وتو مهره بتجفل تبعد.. ضمها..

وبحنيه يداعبها.. مغير الموضوع اللي يتكلمون عنه:

ماعليه هانت.. ترى راح الكثير وباقي القليل.. انتي قومي بالسلامه.. وكيفك سوي عملية تجميل لبطنك..

انصدمت مهره.. وزين ماعضت كتفه.. كيف حول سبب زعلها لموضوع تافه حيل..

وصوت موضي وهي تشيك على العشاء تقول:

هذا اللي شايله همه.. لاتخافين يا أمك..تروح لاولدتي.. مشد ورياضه وتنمسح الكريشه..

دفته..

وعطته نظرة انها بتذبحه.. وهو غمز بعينه..

بعدت مهره عنه:صدق امي..؟!

هي :ايه.. هذا انا علي خمسه والحمدلله.. شوفيني غزال.. انتي بس لاتفكرين بهالشي.. فكري باشياء حلوه..

سيف:انا بطلع المجلس.. عجلوا بالعشاء يمه تراه دوخنا الجوع..

موضي بحنيه:يخسى الجوع يا بوي.. يلا ربع ساعه ويطيح العشاء..

هو يتوجه لباب المطبخ الخارجي:ع القوه ياعينه..

وطلع..

ومهره تطالع مكان اختفى..

(واكثر ما أخافه مصير اسود.. وظلام.. ماذا. لويحدث له شيء؟!. .. كسوري مضاعفه.. بفقدأبي.. وامومتي الناقصه لسيف.. وهاهو ذاك الشاهق في روحي.. يعبث متجاهل اني اموت دونه..! )

******

مشاري رجع راسه على ورى.. وبنبره مخنوقه:

ابوي شعره ويجن.. تصرف سما ماعملنا حسابه ابد.. ان جيتي.. من وعدنا لسيف.. ولا من تعلقنا فيه وبالذات ابوي..

مسك جبينه بقوه:

ماعمري شفته بهالحاله..

خذت ياسمين الكاس من يده.. حطته على الطاوله ومسكت كفه:

سما ماراح تبعد كثير.. بترجع.. وهي اللي بتقول اخذوه لاهله.. سما مهما ابدت من مشاعر.. بس الواقع ماتتحمل.. ولاتحب تكون مسؤولة.. وانانية.. هي حبت الوضع وانتوا كلكم تشاركونها مسؤولية سيف.. بس لحالها ماتقدر..

مشاري بتعب وهم:

خايف على الورع والله.. جيسي.. سما لو جاتها نكسه في نفسيتها تنسى نفسها في الاكل والشرب.. انا اخلط لها الحليب والشوكلت.. واجيبه..كيف بالله.. لو يلذع عقلها.. ولاتشرب ومعها هالصغير.. هذا اللي مجنن ابوي..

خذت بالشوكه قطعة من الاكل قربتها من فمه.. لانها شايفته طول اليوم ما اكل.. :

بتلقونها.. مشاري.. اكل عشاني.. واترك هالكاس لان ماراح يحل شي..

بضيق صد بوجهه: ياسمين.. تكفين..!

مسكت ذقنه ولفته وحطت القطعه بفمه:

ماهو على كيفك..

وبصلابه:عمي راجح.. قوي.. وعنده معارف ومصادر.. بيجيبها.. وانت خلك رجال وقف معه.. لاتحرق نفسك في شي لايودي ولايجيب..

ابتسم بعيون ذابله:

والله تعودت عليه.. كيف سما تهرب به كذا.. مايحق لها والله..

كانت فاتحه شاشة جوالها..

لما انتبه وعقد حواجبه.. واسحبه:

انتبهي تقولين لسيف شي..

هتفت:ماراح اقول.. خبله انا..

هو يمشي صبعه ع الشاشه.. :

انتي كلش تعلمين به لسيف عارفك..

سكت فجأه.. وهو يطالع.. الاستديو اللي كانت فاتحته.. كان مليان صور له ولايدري متى التقطتها..

طالعها بصدمه..

وهي اسحبت الجوال برتباك من يده.. :

أكل مشاري.. عشان نمشي.. تأخر الوقت..

طالعها.. وهي تناظر الجهه الثانيه.. وضامه كفوفها..

مخه مشوش..

تعبان.. من الوضع اللي هم فيه وعصبية ابوه..

كلمها هي..

يوم حصل له وقت باخر هاليوم الثقيل..

ماكان يبي يشوف الاياسمين..

*هناك اشخاص.. نتقبل ان يرونا.. في بؤسنا.. وسوئنا.. وحين يدنو منا الألم.. ياسمين تستطيع ان تسمع مني موجات مكثفه من الهموم.. والشكوى.. وحتى التفاهات..

ياسمين تعارض شربي.. لكنها الوحيده اللتي تتحمل مزاجي السيئ لو اكثرت..!

الوحيده.. اللتي اتقبل منها ان توقفني عن الشرب.. وتأخذ الكأس..

لو حاول غيرها..

سيكون عليه تحمل محتوى الكأس في وجهه..

لما صوري بكثرة في هاتف ياسمين..!!

ولما اصلا ً صورها تملئ هاتفي وهي لاتدري..

الواقع اني مهوس بجمال ياسمين ولونها..

على مايبدو لدينا نفس الهوس..!. *

همس:جيسي..؟!

اللتفتت ببطء:وش؟!

بعيونه الذابله ومخه اللي شبه واعي.. : احب عيونك.. لاتناظرين بعيد.. ناظريني انا..!

حدقت في عيونه..

واطلقت تنهيدة حاره

*أنتِ الملاذ لغربتي لا من شعرت إني وحيد وأنتِ البلاد الامنّي اتوه ألجالها * "اقتباس"..

.......

دخل راجح مكتبه في البيت..

مسك راسه.. وضغط على جبينه..فك ازرار قميصه..

وارتمى على اقرب كرسي..

زفر بقوه.. واليوم مر في بحث عقيم عن سما..

اعتدل وهو يسحب سيجار يحطه بفمه..

وتوه يدور الولاعه..

طاحت عينه على سيارة صغيره على الأرض..

ليداهمه صوت سيف:جدي.. شف المبرديني.. حقتي..

ترك السيجار.. وقام التقطها من الأرض وبخفوت:

كنت شايل هم روحتك عند عمامك.. مادريت ان البلاء اللي تنام في حضنها كل يوم.. مير الأوله امان ياجدك.. بس امك هاللي عقلها ضارب..بتحفظك..؟!!!

آااه ياجدي كانك غصه بالقلب توجع..!.

شال السياره.. واودعها رف.. مع مجموعه اثرية..

وظل يطالعها..

تأثير غياب سيف..وخوفه عليه.. يستفحل داخله..

مايثق بسما ابد..

ولابتصرفاتها.. ولابطريقة تفكيرها..!!

*******

بعد مارجعوا.. من بيت سعود..

ولحظات الصمت في السياره..!

مهره صعدت..

وهو ظل تحت..

كان يدخن.. وجالس على كرسي الحديقه..

لمن دخل فارس بسيارته.. ووقفها..

نزل:فكرتك نمت..

سيف بهدوء:معودك انام قبل تحضر..

فارس:شدعوا يبه ترى بيت ابوي سعود قريب.. وقلت لك بخلص الفلم مع نواف واجي..

طفى سيف السيجار:

وانا ماعجلتك.. بس ماعرف انام الا لاجيت..

فارس ببتسامه ينحني يضمه.. ويبوس خده:

ياجعلني فدا مواطيك يابوفارس..

قام معه.. وهو يداعب شعره.. ببتسامة باهته بدون تعليق..

دخلوا الفيلا..

سيف:قفل الباب معك..

فارس قفل والحقه على الدرج.. وهو يقول :

يبه وش فيك مع مهره..؟!

ابتسم وهو يصعد معه:ليه قايله لك شي..

فارس مد شفته:

لا.. صرت اعرف مهره حتى لو ماقالت شي انت اختفيت طول اليوم.. وهي تتواكل.. وحتى يوم دقيت العصر ماترد علي.. ولا المغرب.. مشينا بيت ابوي سعود وانت ماترد..

سيف:هذا انت تقول دقيت.. هي ماكلمتني..

فارس مسك ذراعه.. وهم بالصاله الفوقيه الواسعه:

ترى هي تحدني وتلح.. وانا اتصل.. حتى واحنا بيت ابوي سعود.. ماهجدت الا يوم صورتك لها بالمجلس وانك وصلت..

حرك حاجبه: اهاا.. يعني كذا..!

فارس :يبه لاتصير انت والزمن عليها. . يكفي ورعها.. البعيد.. والله تكسر الخاطر.. وكله تحاول تبين عكس اللي فيها..

سيف رفع راسه وضغط جفونه باصابعه.. وزفر:

وش تبي هالحين يافارس..؟!

فارس:تراضيها..!

سيف بضحكه خافته مرهقه:

ماتبي..!.هي ميبسه راسها علينا..

سيف:انا مادري ليش.. اصلا ً هالزعل.. بس شف خاطرها.. يعني يبه.. انا بعلمك.. انت سيد الفاهمين..

سيف باس راسه :

لاتفكر في الموضوع..تصبح على خير ابوي..

فارس:تلاقي خير..

سيف وبعد مادخل الغرفه..

القى نظره على مهره النايمه.. او تتظاهر بالنوم..

ماقال شي تركها وراح دورة المياه..!

مهره شارده بعيونها بالجهه الثانيه.. تستشعر حركة جنينها.. اللي شكله مو عارف ينام.. ولايرتاح من قلقها وتوترها..!

حست فيه.. وهو يجي جنبها.. ويدخل بالمفرش..

ولا اللتفتت..

الغى نظره عليها..

ببجامه حريريه سودا.. وشعرها ع المخده.. كيف يقاوم زعلها.. انحنى وباس ذراعها.. وهمس :

ترى كثر الصد.. يولد الجفا..

مهره بهمس :وكثر الاسرار.. تولد الشك..

اسند كوعه عند راسها وصار قريب منها :

مهره.. ترى الشغل اللي انا فيه قانوني.. ويخص طرف من امن الدوله..

عقدت حواجبها وهي تسمع له بدون تلتفت..وكمل:

انا دوري يخص مجالي.. ولأنها عمليات سريه.. صعب اصرح في الشغل.. ولاتقولين.. انت مو ضمن الأمن.. انا اقدر افيد وماراح ابخل بهالشي.. تذكرين يومك تبين تعلقين لي بروش باليوم الوطني.. تذكرين وش قلت لك..انا حبي للملكه ماهي بعلم اشيله ولا بدبوس اعلقه بجيبي.. واصباغ ارشها على سيارتي.. انا دمي مقدم لهالديره.. واي شي اقدر اسويه.. راسي يفداها..

ظلت تسمع له.. وهو يداعب ذراعها .. بانامله.. :

مارحت دبي..كنت بجده صدق .. وكنت هناك عشان افحص عقد على انُ اثري.. مستخدمينه بعملية غسيل اموال.. و النتيجه.. العقد مزور.. انا لاسويت الشغله هذي.. تضنين فيها خطر علي ولاعليكم...؟!

انقلبت.. على ظهرها:

يعني بالله عليك سيف مايجيك شي من ورى هالأمور..

ابتسم واشار بالنفي:مايجيني شي بأذن الله..لاني شايل سلاح واحارب بالميادين..ولااحد يمسك علي ممسك.. شفتي احد يتقصد صايغ ذهب.. لاشيك على القطعه ان كانها ذهب ولافالصو..

مهره بنص عيون.. على قطته الساخره.. :

والله صايغ الذهب.. بيشيك معضد ولا حلق.. ملحوش بدرج عجوز ميته.. ولا لاقينه طايح بالشارع.. ماهو عقد المفروض بملايين.. ومزورينه رواعي مخدرات وغسيل اموال..

ضحك بخفوت.. وهو يداعب شعرها وخدها:

كلها نفس الشي..

مهره ترفع يدها لخده.. :

لاتوجعني فيك ياسيف.. ترى هالقلب ماعاد به طاقه..

باس انفها وهمس:لاتوسوسين..الوضع ماهو صعب مثل مارسمه خيالك..

طوقت رقبته بذراعينها وضمها.. خبت وجهها عنده.. :

مادري وش بعد ينتظرني من عذابكم ياالسيفين..

عقد حواجبه:

ليه ماكلم سيف اليوم..؟!

مهره بهمس:لا.. ولاحد رد علي.. بس قلت يمكن نفس هاك اليوم يوم طلع مع بومشاري على اليخت.. كان مافي ابراج..

عقد حواجبه اكثر.. وهو يربت على ظهرها وبخفوت:شكلُ كذا..!!

*****

بعد صلاة الفجر..

سيف طلع من المسجد..وراح يمشي متوجه لبيته القريب.. وهو يتصل على احد الأرقام..

رد:هلا يابوفارس.. أُعذرني يابه..

وقف سيف وبعصبية:

وش صاير ياهاشم.. اتصلت علي امس.. واختفيت.. صاير شي...

هاشم :شگلك..اريدك تهدا.. وماطيش..

سيف بعصبيه:وش.. تكلم.. راجح تورط مع منصور من جديد.. تكلم هاشم.. انا عارف ان ورى غطستك بلاء..

هاشم:لا الموضوع ماله علاقه بمنصور.. باوع.. هاذ الله يسلمك.. سما.. لحشت الولد سيف وهُربت بيه.. لوين..لهسا ماعروفنا شي..

توسعت عيون سيف:ايـــش..؟!!.. شلون يعني.. ووينكم عنها.. ومن متى ومن معه..

هاشم:اهدا بوفارس برضاي عليك عيني.. كافي.. عمي ابو مشاري.. شوي ويوقف قلبه.. من تصرف سما.. اگلك طلعت بيه ع العصر هيج.. جان ودها تمشيه بالبستان..والبنت راحت ولارجعت.. تگلك فص ملح وذاب.. اتاريها مبيته اللنية.. وتاركه مكتوب.. وشارده..

سيف بغضب وعصبيه:

والله لااحرقها.. هي وابوها.... انا مأمن عندهم ولد اخوي.. ماهو قطو.. ياهاشم..كيف تركوه معها..!!!

هاشم :ابو فارس انتبه لكل خطوة تخطوها.. ماتنسى انا معك بس مو ضد عمي راجح.. ماريد تلوي ذراعه.. بشي احنا تسترنا عليه..

سيف كان دخل سور بيته من بين اسنانه:

والله.. والله لو ماطلعوا سيف.. لاانسف بكل مبادئي والعشرة.. واقطع كل المواصيل اللي تشفع..

هاشم بعصبية :ابو فارس.. مو هيج.. لاتخلين اندم وصلت لك هاي الخبر..

سيف :انا بجي خلال هاليومين.. وقل ان شاء الله توصلون لسيف قبلها.. ولا بتصير علوم ماحد حط لها حساب..

وقفل الجوال..

تمتم بغضب وذهول:الله يلعنك ياسما على هالفعله السوداء..

شب سيجار.. وهو يتصل على وليد.. وماريا.. بس مايردون..

ارسل رساله لوليد انتبه لجواز سيف واوراقه.. انتبه تعطيها او ياخذها احد منك لأي ظرف..الكلبه سما انحاشت بالورع.. ان اطلعت من بريطانيا الجن الأزرق ماراح يلقاها)..

ارسلها.. ورمى السيجار وداسها..

ودخل البيت..

ايش هالكارثه.. طيب واللي احترق جوفها من فراقه.. ووعدي لها..كيف لوطالت المسئلة..

وخلال ماهو واقف محتار..

جاه صوتها الهادي على الدرج :

سيف..!

رفع عيونه لها.. وهي تنزل.. وعليها شرشف الصلاه.. منزلته على كتوفها..

*تتهادى في قلبي والله..

كفاك يادنيا جرحاً.. في انثاي الأثيره.. *

ابتسم وبخفوت:كنت بجي واصحيك تصلين.. شكلك صليتي وخلصتي..

ابتسمت:حسيت فيك وانت تسكر الباب وقمت.. شكلك مانمت صح..؟!

خذها لحضنه وباس جبينها:

لا والله مانمت..

عقدت حواجبها:سيف وش فيك..

ضحك :وش فيني..؟!

بشك:مادري.. ترى كنت عند البلكون وشفتك دخلت السور وتكلم احد.. ماسمعت.. بس باين انك معصب..

رفع حواجبه:اشوفني صاير تحت المجهر يابنت غازي.. وتراقبيني من الدرايش والبلاكين..

ضحكت:والله مو قصدي.. بس كنت افتح الستاير.. عشان الشجر الداخلي وشفتك..

راح معها الدرج وهو محوطها بذراعه.. :

تعالي ننام.. خلاص ماعاد اشوف..

*****

منصور يدقق في الشاشه.. والمقطع اللي قدر يوصل له اخيراً:

وهذا نفسه.. هو سيف خوي راجح و مشاري..

رائد:ايه.. واخو نسيبهم اللي تزوج بنته.. ومات..

منصور بتفكير:يعني الورع الصغير اللي شفته مع راجح باليخت.. يصير هالكلب عمه..

رائد:عليك نور..

منصور:اسمع يارايد.. ابيك تعرف لي كل صغيره وكبيره عن ولد هالحرام.. والولد الصغير.. حطوا عينكم عليه.. لانه الحجر اللي بيصيد لنا كل العصافير..

رائد مد شفته:هالوقت صعبه.. من مصادري.. عرفت ان البنت مختفيه بورعها.. وراجح قالب الدنيا ولاهو لاقيها..

منصور بتهكم:راجح مايلقاها.. ماهو منصور..!

(وكان المقطع اللي طاح عليه بعد شهور من البحث.. سيف وهو يفحص اللوحه في المعرض)..!

طلع سيف من مطار هيثرو..

وكان ارثر ينتظره جنب سيارته الروز..

سلم عليه.. ورحب فيه.. وخذ الشنطه.. ركبها بالسياره..

ارثر:دعني اتولى القيادة ياسيدي.. لتو وصلت من رحلة طويله..

سيف.. يتوجه لباب السايق:لن اذهب للمنزل..هناك عمل يتوجب علي القيام به.. هل تريد ان اوصلك..!

ارثر بتنهيده:لا مارت احضر سيارتي..

سيف :حسناً.. الى اللقاء..

قفل الباب وانطلق بها..

دعك عيونه بارهاق..

ويستعيد.. كل اللي صار قبل جيته..

مهره بعصبية:

لااا اكيد في ولدي شي.. كم يوم.. ماكلمته.. والحين انت بتروح.. وش سيف وش..!!

سيف بهدوء:

صدقيني صايره عندي مشكله بالورشه..مضيعين قطعه..وعليها مشاكل..

مهره.. وهي تمسك ضلوعها:

لابالله ماهي قطعه اللي ضايعه.. شي يقولي.. قطعة قلبي هي اللي ضايعه... اكيد صاير بسيفي شي..

ابتسم.. ووجهها بين كفوفه وباس جبينها:

لايشطح مخك لشي الشين.. سيف بخير.. وقلت لك انهم طالعين فيه برحلة كروز.. وداعية..وبجيبه معي..

مهره وعيونها تغرق دموع:

ليتني اصدقك وارتاح.. خذني معك..قلبي نار..

سيف ضمها:

ماغامر فيك..مهره انتي بالثامن.. صعبه..انا بجيبه لك..

بتوسل.. وكنها تبي تكذب قلبها:

يعني اكيد سيفي مافيه شي..؟!

مسح دموعها بحنية:مافيه شي..

سافر وماحد يدري هناك عن السالفه الا نواف.. ومهره اللي مهما سلكت.. واضح ان قلبها عارف وش صاير..!!

توجه لبيت راجح..

وصل..

وطق الجرس.. افتحت الخادمه..

عقدت ليان حواجبها وهو يسئلها عن راجح..

جات.. :سيف..؟!.. حياك..!

دخل وباللهجه جافه:وين ابوك..؟!

طالعته كيف وجهه مرهق..

وكيف لبسه كاجوال.. وازرار ياقته مفتوحه.. مستحيل مايفز قلبها مع وسامة سيف.. بجميع حالاته..

ابتسمت.. وتذكرت موضوع سما.. وباللعثمه:

تفضل.. اروح اناديه هو بمكـتـ...

قاطعها وهو يدخل..ويدفها.. ويتوجه لمكتب راجح.. :انا اروح له..

لحقته ولانها تدري مشاري كلمه وعطاه خبر باللي صار :

سيف لحظه.. ترى بابا تعبان.. وضغطه متذبذب..

فتح المكتب.. بعنف..:

مسيك بالخير ياحافظ الأمانه.. ياوافي الوعد..

رفع راجح عيونه بهدوء له..:

ماله داعي ياسيف هالكلام.. اقعد وعين خير ونتفاهم..

ضرب سيف الطاوله وبغضب :

وش عليه.. على بنتك اللي شالت الورع والله اعلم باراضيها.. هالحين صار حبيب.. وصارت تبيه.. لعلمك ياراجح.. عساف تارك تقاريرها.. وهي كم مره تحاول تجهضه.. حتى الكحول تشربها.. تبيه يموت..

راجح.. بوجه تعبان:ماني غشيم فيها..

سيف بكل انفعال وغضب:

لا والله غشيم.. بنتك كم مره تحاول تنتحر.. وتراجع عند اطباء نفسين.. المفروض فاهم انها غير مؤهلة..حتى انها تخطي بالشارع لحالها مع طفل..بس والله ياراجح.. لو صار لسيف شي.. والله لاتروح رقاب.. واولهم انت ..

ليان بانفعال دخلت:

خير سيف..احترم نفسك.. ماسمح لك تتكلم مع بابا بهالأسلوب.. تراه ماله ذنب واكثر واحد تعبان من تصرف.. سـ.....

مد يده يسكتها وبدون يلتفت :

لاتكلموا الكبار.. لاأحد يتدخل بينهم..

راجح بصرامه:

اطلعي ياليان.. وخذي الباب معك..

طلعت وسكرت الباب بقوه..

راجح عقد حواجبه:

تهددن ياسيف.. تراني ماهو غافل.. بشغلك ضدي.. ولاتفكرني ساكت عجز.. لا والله ماسكتني الا العشرة اللي بينا..

سيف واللي ماتفاجئ.. ان راجح معه علم..عنده خبر من هاشم:

تدري ان اقدر اوديك بداهية.. عرقلت كل شي.. لخاطرك يابومشاري ماانت ارخيص عندي.. بس والله لو ماطلعت سما.. لاتتخيل اني بصير الكفو اللي مايسحبك..

عقد حواجبه ومن بين اسنانه:.

لاتستفزني ياسيف.. تراك غالي..

ضحك بقهر وسخرية:

لايكون بتحطني بالقايمة السوداء عند منصور عشان يشطبني.. مثل غازي.. تراها ماهو غريبه عليكم..

استوقفته جملة سيف والطاري :

وش قلت..؟!.. وش جاب طاري غازي هالحين..

سيف بسخرية يشير للصور.. على المكتب.. واللي فيها غازي بصحبة راجح:

كنت اسمع باللي يقتل القتيل ويمشي بجنازته.. بس والله اللي يقتل قتيل.. ويرز صوره.. بكل مكان.. هذي جديده علي..

توسعت عيون راجح وهب واقف وبانفعال وغضب:

هوب سيف هوب.. لاتفكرني وقعت وبتكثر سكاكيني.. اهملت سما ايه.. وماصنت امانتك يحق لك تخوني.. بس تجي تنبش ذكرى خوي عمري وتتهمني فيه.. لاوالله اقص لسانك من عرقه.. غازي مات حادث..وماكان بيني وبينه الا وضح النقا..

سيف بخفوت مثل السم وعيونه في عيون راجح:

هذا اللي بلغك فيه منصور عقب ماذبحه وعطل بريكات موتره.. افتعل له هالموته.. يوم بغاه بشغل.. ورفض.. واصر.. وكان بيبلغ...راح زاحه من دربه.. مثل مايبي يوصل لي اللحين ويزيحن من طريقه..

راجح حس بشوك بيده اليسار.. وحرارة في كل جسمه..

وجبينه يعرق ووجهه يحتقن.. وبصعوبة:

انت وش تقول..تسمعه اذنك اللي يقوله لسانك..

سيف ضرب الطاوله بقبضته:

مهره قالت لي.. والعلم من جدتها.. بس الملف تقفل انه نسب للعطل بالسياره.. بس الواقع السياره جديده وماتشتكي من شي ابد.. البلاء والشكوى من الحاح جماعته القديمه اللي ماتعرف ام غازي من اسماءهم احد...ولاقدرت تدين اشخاص بعينهم.. نبشنا الاوراق القديمه وحققنا.. وماكان فيه طرف.. الا انتوا ياجماعته.. انت ومنصور..!!.. غازي مقتول ودمه على الأرض.. ماحد خذ بثاره.. بس عيب على وجهي الشنب.. اذا ماجبت منصور على وجهه..!!

واستدار.. بيمشي.. استوقفه صوت راجح.. اللي كان شارد في الصدمه:

انت تدري.. منصور.. وش يصير لمهره..

عقد حواجبه بدون يلتفت وقال:

مهره ماتدري عن اسامي.. ذا شي انا ادري به..

راجح:منصور رجل امها.. ابو اخوانها.. اسامه وباسل..

اللتفت بحده.. وصدمه..

تمتم راجح:

واللي رفع سبع.. ماكنت ادري انه مقتول..كنت اشك واسئل منصور.. بس ينكر.. ويسخر.. وكنت استبعد.. ماهقيت انه واطي لذي الدرجه.. هو خذا مرته بأول العمر.. وخذه روحه بآخره.. والله وكشر الوجع بوجهي نابه..

سيف طالع راجح كيف متأثر.. وموجوع.. وهو يسحب صورة غازي ويتكلم وكأنه يسمعه..

*اتضح لي ان علاقة راجح بغازي كانت اكبر حتى من علاقة الأخ واخوه.. للمره الأولى اشوفه بهالحال.. وكأن قضية سيف الصغير تقلصت عند راجح قدام كارثة قتل غازي اللي مايدري عنها *

اطلق تنهيده حاره وبألم متهكم يخاطب الصوره :والله من كبرها ياغازي ماعاد يوسعها حساب..!!

*****

الأيام بعد اليوم..

كانت الأصعب لسيف..انشل تفكيره في البحث عن سما وسيف.. بالتعاون مع راجح.. ورجاله..

راجح من عرف وش سوا منصور.. وهو يبي يتفضى له وينسف فيه..

بتقديم كل الأدله اللي عنده ضده..

للحكومة..!

بس كان مايبي يلعب بالنار.. وبنته وحفيده برا نطاق حمايته..

سيف واللي كانت اتصالاته لمهره عباره عن غصه.. وكذبات.. واعذار واهية..!

مهره بطبيعة الحال كانت حاسه.. وبأمل.. تحاول تصدق كذباته..!

لمن جاء ذاك اليوم.. وكانت بيت سعود..و طلعت لأن فارس ينتظرها عشان يمشون..بيتهم..

واسمعت نواف.. وهو يتكلم مع فارس بالكارثه.. ووضع سيف هناك..

وان سما اختفت بسيف..!

*ابتلعت غصاتي والألم.. كنت اعلم ان هناك مصيبه حلت بابني.. لكن اهونها انه اختفى مع امه.. ابليس وضع امامي انه سقط من يختهم وغرق.. او خرج من المنزل وخُطف.. او ركض في شارع.. واصيب في حادث..

طبعاً مصيبه ان تخطفه امه وتختفي..ليست سهله وكأني ابتلع كمية من الزجاج المجروش..

عدت ادراجي.. للمنزل.. وحاولت ان ابدو وكأني لم اسمع شي..!

حالي مثل المريض الذي حددو مدة عيشه.. ويضحك بأمل.. عل الله يكتب له عمر اطول..

احاول ان ابدو وكأني لم اسمع شي..

اطبطب على قلبي..

انهم سيجدونه.. وانه مع امه اللتي تعشقه.. ولن تدع مكروه يصيبه..!!

زينه طالعتها.. وهي سانده كفها على الجدار..

وتمسك بطنها اللي حست كأن شوك فيه :

مهره ابوي وش فيك رجعتي..نسيتي شي؟!

مهره تحاول ماتبكي وابتسمت بغصه:

شكلي بدخل الحمام..لااتوهق في السياره

ضحكت زينه:

الله يعينك..عاد من بعد البيت..

مهره تتوجه لدورات المياه:

تعرفين فارس يوهقني يمر كوفي ولا شي..

ودخلت وسكرت الباب وقفلت..

ومسكت المغسلة.. وهي تشهق ومب عارفه تتنفس.. وصورة سيف تداهمها.. بهمس منهار:

مشتاقه لك يمه.. حرموني منك.. حرموني..

طاحت دموعها.. وهي تنزل راسها.. وتفتح الماي..

وراحت تغسل وجهها..

والماء ينزل مختلط بالدم النازف من انفها..

ملطخ كفوفها.. والرخام..

*******

وبعد كم يوم..

سيف كان بمحله..

وعلى غير العاده.. لبسه مب مرتب.. بقميص مفتوحه ياقته..

تعبان ومرهق..

خذ ملف من آرثر بدء يوقع فيه وهو واقف..

ويناقشه.. عن بعض الامور..

كانت في زبونة اللتفتت:

مستر سيف..؟!

رفع راسه ببتسامه باهته: اهلا ًمدام سيلين.. كيف حالك..

صافحته ببشاشه:بخير..الا تساعدني في الاختيار.. فأنا أثق بذائقتك..

قرب من الطاوله بمجاملة.. يشوف القطع اللي محتاره فيهم..

حاول يركز.. مثل عادته.. واسلوبه مع الزباين.. بس ماقدر..

تنهد ودعك عيونه.. :

اعذريني مدام سيلين.. لست في مزاج جيد..

وتركها.. باعتذار وتوجه.. لارثر... وخذ منه باقي الاوراق.. وطلع..!

وصل لسيارته.. ورمى الورق فيها..

وتداهمه وعوده.. اقترانه بمهره كان عشان سيف.. تضحيتها بكل شي عشانه.. تقبلت اتهام بشرفها..عانت الأمرين.. كله لعيون سيف..!!

سيف واتصالاته ولهفته للرجعه لهم.. عيونه اللي تمتلي دموع وهو يقول (ماما وحستيني) ..!!!

أكبر خطأ ان طاوع راجح.. وحكم ضميره.. وقال سما امه ويحق لها تشوفه..!!

بس الواقع لو مقدم تقاريرها.. وحكم القانون.. ماقبلوا انها تاخذه..!

بس كانوا مايبون يدخلون القانون ولا انه ينسب لسما رسمياً.. او ان مهره تدخل باشكالات..

فكانت الأمور كلها وديه.. بدون اثباتات..

مشى بسيارته..

ضايع..

ارتفع رنين جواله ابتسم بتهكم مرير :

وش تبين اقولك يامهره..مالي وجه والله..

وفعلا ً مارد..

مهره واللي كانت في بيت سيف بلندن.. :مايرد..

فارس:والله بينصدم لاشافنا هنا..

شردت في الخارج من النافذه:

كم يوم مايبي يرد علي ولايكلمني.. ابوك هربان من انه يواجهني..

فارس واقف يشرب كوفي قدام المدخنه الكبيره:

هو من درى انك دريتي.. وهو منعفس..!!

عيونها امتلت دموع :

وين راحت بولدي.. ماخلوا مكان ولالقوها..وين..!!!!.

*******

سيف كان في الورشه..

كان واقف قدام لوحه.. ويشتغل فيها.. وينظفها.. بدقه..

يحاول يتناسى كل الاحداث..

ماينام.. ولايرتاح..

ياسمين.. وهي تلملم اشياءها.. طالعت الساعه وطالعته كيف دمر ملابسه الغاليه بالمواد:

سيف خلاص اتركها.. عدمت قميصك.. حرام..

مارد عليها.. ولااصلا ً انتبه لها..

نادته:سيف..؟!

رفع عيونه.. قالت:تأخر الوقت اترك اللوحه بكره.. راين يسويها..

سيف:ياسمين.. خلاص روحي لاتتأخرين اكثر على امك..

بحنيه:والله وجهك مرهق روح ارتاح ونام..

هز راسه:ليت اقدر انام ان كان نمت..

ياسمين:لاتسوي في نفسك كذا.. وارجع الرياض عشان مهره.. حرام في اشهرها الاخيره وتحتاجك..

يشتغل بدقه باللوحه.. :

لو اقدر احط عيني بعينها.. رجعت.. ماقدر والله..

ياسمين:وش ذنبك انت.. بس سيف لاتحمل نفسك الخطأ..

سيف مستمر في شغله.. ولارد عليها.. تنهدت.. وطلعت..!

بعد وقت.. طلع من الورشه..

وطلع جواله اللي كان صامت.. لقى مكالمات كثير من نواف....

اتصل وبقلق:وش صاير.. وش هالمكالمات يانواف..؟!

نواف بعصبيه:انت حي.. ميت..عنبوك من كم ساعه ادق عليك ماترد..

سيف:كان صامت.. وكنت مشغول بالورشه.. وش فيك.. فيكم شي..؟!!

نواف بانفعال:حضرتك محمل نفسك الذنب.. ومنطفس مبعد ولاترد وتحرق في روحك.. مرتك تتصل.. وترسل ولاترد.. سيف صاحي.. كنك مب انت والله..

زفر سيف وشغل سيجار:

اختصر نواف.. مهره ماقدر ارد عليها.. الا ومرجع سيف معي..اذا ماعندك شي ثاني تقوله.. بقفل..

نواف :الا فيه.. مهره وفارس وصلوا عندك بلندن.. وترى من وصلوا وهم يكلمونك وانت مو حولهم..

توسعت عيونه بذهول وبانفعال وغضب:

شهالجنووون..شلون خليتهم..مهره تعبانه.. وفارس مدرسه.. وش ذا الخباااال..

نواف:والله مادريت.. الا وهم في المطار.. كلم فارس وقال.. مهره كانت بتجي لحالها وماخلاها.. وهو مدرسته اهليه ودبر الوضع.. مهره ماعادت متحمله.. تبي تكون قريبه من سيف.. وبتلقاه..

سيف بغصه وتهكم:

وش تلقى يااخوك.. وش تلقى.. طوال الشوارب اعجزوا..

نواف:عاد هي عندك.. وخفف اللوم على روحك..

قفل سيف.. وتلفت بحيره.. وغبن..

وتنهد بقوه.. وركب السياره وتوجه للبيت..

******

مهره كانت فوق بعد ماتأخر الوقت وماجاء..

*تكات الساعه..تحفر عقلي كامعاول حاده.. برودة لندن تقصف عظامي.. وشعوري بالضياع والألم.. يجعل مني جثه بارده في ثلاجة موتى..اقف عند حاجز السلم.. وانظر للباب الموصد.. انتظر.. ذاك الذي لا أدري اغضب منه.. ام ابكي على صدره.. اواسيه.. او ابحث عن مواساتي لديه.. فُتح الباب اخيرا ً.. ودخل سيفي.. وسندي وذخيرتي.. وكأن المأساه حطت فوق رأسه كاغراب.. ذبوله تعبه وشحوبه.. كيف بالله يذوب قلبي وينصهر..! *

دخل سيف.. وجلس في الصاله الشبه مُظلمه..ماصعد فوق..

راقبته من عند الدرابزين كيف مرخي جبينه على كفوفه.. وسيد الموقف السكون..!

مرت الدقائق والربع ساعه والنصف..

هي مو قادره تنزل.. وهو مو قادر يصعد لها..!

جلست في الصاله الفوقية.. بشرود.. وصمت.. يشبهه..!

وقعت عينها على العود اللي كان من راجح..!

خذته.. وجلست فيه..

لتسكب ألمها في اناملها.. وتنسج على تلك الاوتار مقطوعة.. مُره..

احيان الانسان من شدة الغصه لايعبر.. لايخرج صوته..

لكن قد تتغير لغته لقصيدة او خاطره او رسوم تعبيرية عشوائية.. او دندنة وتر..!

سيف.. *كنت غارق في خذلاني..

وصلتني تقاسيم مهره على هيئة مشارط حاده..

قطعت بقايا قلبي.. وروحي..

نهضت.. اصعد السلم.. وكأن هناك خيوط وهمية خرجت من انامل مهره والعود وسحبتني الى حيث هي..!!

نظرت اليها.. تعزف.. شارده في نقطه وهمية..

ذهبت نحوها.. واطرقت..

لم ترفع عينيها لي ولم تنظر.. استمرت تجلدني بالوتر الحزين..

كانت على الكرسي..

جلست امامها على الارض على بعد متر.. هي تدندن حزنها..

وانا اسمعه..!

ضمرت اضلاعي وضاقت..!

من نحن لنسطر الحزن في عمر مهره ملحمه..؟! *

مهره..

*حانت اللتفاتي اليه.. لايرفع رأسه.. ولاينظر لعيني.. وازدادت غصتي ومراري.. *

وقفت عزف..

وتركت العود..

نزلت على الأرض عنده..

وبخفوت :ماتبي تشوفني.. ماتبي تحط عينك بعيني..

بخفوت مجروح:

خذلتك يامهره.. خذلتك.. كل وعودي.. تحرقني.. ماوفيت فيها..

مسكت كفوفه.. وبخفوت باكي:

بتوفي ياسيف.. وبتجيبه.. لاتيأس كذا وتكسر مجدافي..

سيف بشرود:عجزت يامهره.. ابشرك عجزت.. مابقى شي بيدي ماسويته..

طاحت دموعها على كفوفه.. وانهارت بكاء صامت وهي تقول:

باقي.. بتلقاه.. مو انت اللي لاقمت تقوم قومة جمل..

كمل بتهكم مر:وانا نفسه اللي لاطاح طيحته.. طيحت حصان..

اخفت وجهها بكفوفه في حضنه.. وبكت بانهيار.. وهي تردد:

ابي ولدي ياسيف.. ابيه.. والله ان قلبي على فرقاه ذايب.. ابي سيف.. جب لي سيف.. تكفى..!!. ابي اضمه.. ابي اشمه.. خلوني اشوفه عروق قلبي جفت بدونه..

فارس اللي كان صاحي سمع العزف وطلع..

كان واقف ويشوف الموقف.. المخضب بالدموع..

وابوه اللحين يمسح على راس مهره..

اللي من صارت السالفه.. الاخيره.. توها تبكي بهالشكل وتنتحب..!!

******

بعد يومين تقريباً..

وفي صباح لندني.. هادئ.. سيف ومهره وفارس يفطرون بهدوء وصمت..

حط كفه على خدها البارد الشاحب:

اليوم نبي نروح المستشفى.. وتشوفك دكتوره... ونضبط لك مواعيدك هنا ..

باختصار:ماله داعي.. اموري طيبه..

سيف يحاول يسيطر على انفعاله:مهره.. خافي على البيبي اشوي.. يعني باسلوبك ذا بيموت وتموتين.. قبل حتى نلقى سيف..

مهره بعصبيه:

ماناقصني الا هالفال سيف.. اففف.. اففف..

وقامت..راحت عنهم..

صفق الكاس اللي جنبه وطاح على الارض وانكسر..

فارس:يبه روق.. ماهو كذا..

سيف بانفعال:

اذا استمرت كذا بتموت.. بتموت وتلحق امك ولاتقول ماقلت..

فارس زفر بوجع:

لاتقول هالكلام.. والله ترى الحكي يوجع..

ارتفع رنين جوال سيف..

وخذه ورد..

وكان يستمع للطرف الثاني و واضح انه مشاري..

وكان الانفعال والغضب اللي يرد فيه يدل على ان حلت كارثه..

مهره..

جات على صوته وكلامه.. عيونها طارت.. وهي تستشف اللي حصل..بس ماقدرت ترتب كل الامور..

قفل..

مهره برعب:كيف.. مافهمت.. شلون يعني ارجعت بدون ولدي..

سيف بغضب:الله يلعنهاااااا..

مهره بانهيار صرخت :شصاااار..!!!

******

بعد اشوي في بيت راجح..

كانوا متواجدين عايلة راجح.. وطلال وفواز.. عشان يحققون مع سما والجميع.. في الموضوع اللي حصل..

طلال طالع ساعته:سيف ماجا..؟!

مشاري :جاي في الطريق..

اللتفت على سما اللي ترجف.. وشارده.. ووجهها ماله لون..

نادها:سما..!!.

ولاردت..

نادا بصوت اقوى:يا أخت سما..

ارفعت راسها بارتياع..

طلال وعاقد حواجبه:ممكن اللحين تتكلمين.. وتقولين لي اللي حصل من الاول..

حطت كفوفها براسها وانهارت بكي وبكلام ملخبط بين العربي والانجلش:

ضيعت ولدي.. ضيعته..انا وضيعه.. انا مختله.. عساف كان محق.. اضعته..

مشاري جلس قدامها: اشششش سما.. اهدي.. عشان نقدر نوصل لسيف.. لازم تتذكرين كل تفصيل وحدث..

فواز بعصبية:يابنت الناس اهدي.. ترى الوقت ان طال ماهو من صالحنا..واذا انتي عارفه نفسك.. ليه بالله من البداية تهربين فيه..

انهارت اكثر..

مشاري:تكفى اشوي شوي.. ماراح ينفع كذا..

راجح اللي كان ساكت.. بملامح جامده تخفي الكثير.. يحرق سيجار ورى سيجار..

لمن دخل سيف ومهره وفارس..

مهره تقدمت ووقفت وطالعت سما وبصوت عالي متهكم:

انبسطتي هالحين.. انتصرتي..كسرتي خشمي.. وصار ولدك الحالك..بشري.. تعلقك..؟! نساني..؟! الله لايحلك انتي وعساف.. كانكم حلفتوا علي الوجيعه..

مسكها سيف :مهره ماهو وقته..

سحبت ذراعها وبصياح:

ليش هو بقى فيها وقت.. ولدي ضاااع.. ولدي بحححح..

انهارت بكى وبصياح وهي واقفه قدام راجح :

هااا ياعم راجح.. عساك بس وفيت حقوق غازي.. عساك بيضتها.. بنذرك.. ليتك مادورتني ولالقيتني.. ليتك ماحطيت عساف بوجهي..

غمض عيونه بقوه.. وغصه..

وكل شي نواه خير بغازي.. رجع بالمقلوب..

انتحبت سما وهي توقف وتتوجه لمهره:

آسفه مهره.. آسفه..

وبشكل غير متوقع.. عاجلتها مهره بكف.. وصاحت بوجهها:

كيف هااان عليك.. كيف ضيعتيه من يدك..ليش ماتمسكتي فيه..

سما تبكي بنحيب:

كانوا مسلحين..هددوني..قالوا له بنوديك لمهره.. وترك يدي وتعلقهم ماخاف.. تركني وراح..سمع اسمك وراح..!!

مهره بنحيب:آااااه ياسيف كانك جرح بقلبي مايطيب..كيف ماتمسكتي فيه بظافرك واسنونك...

سما وشردت..

في لحظة الرجال يمسك يد سيف ويقول بيوديه لمهره.. وكيف سيف ترك يدها.. وتركته.. وانسل من كفها بخفة.. ماقبضت على يده.. لانها كانت مذهوله كيف تركها بس سمع اسم مهره.. كيف راح مع رجال غريبين في سبيل انه يشوفها..

تمتمت بشرود مرعوب:

آسفه مهره..والله آسفه..

مهره بألم وصياح:على ويش.. على جوفي المحروق.. ولا قلبي المقطوع... مابي من احد أسف..

مدت كفوفها بانهيار:

ابي سيف باحضني.. جيبوه واخذوا عمري..

سيف ضمها وانهارت.. :

شلون القاه.. ولدي خطفوه.. !!..ضايع ببلاد هالاجانب.. كانت هينه وامه معه.. كانت هينه ياسيف.. احس روحي بتطلع..

ضمها اكثر.. وجلس معها.. :

اهدي ابوي..بنلقاه.. الحين ناخذ معلومات من سما.. ونتابع كاميرات الشوارع وكل شي.. الامن البريطاني والسعودي كلهم معنا..

خذ كاس ماي من ليان.. حاول يشربها وارفضت..

فواز..

*اقشعر جلدي لانهيار تلك المجروحه.. اكثر انسان ممكن ان يشعر بالضياع والفقد. والايدي المربوطه انا.. ذكرتني بنفسي.. وانا ابحث عن حنين.. وكل ماوجدت طرف خيط اضعته.. اصعب الامور ان يضيع لك قلبا ً.. لاتعرف حجم الخطر حوله.. ولا بصيص أمل لايجاده*..

طلال:والحين ممكن نهدا كلنا.. عشان نقدر نوصل لشي..

جلست سما.. وهي تمسك بيديها وتحاول توقف رجفتها..

واللتفت على مهره.. :ام سيف.. زينه انتي هالحين..؟!

فواز طالع جهتها.. ويجي له شي يقوم ويذبح سما.. على اللي سوته..

امسحت وجهها واستعدلت وهي تبعد عن صدر سيف وبضياع:

زينه.. اصلا ً..وش يفيد الصياح والعظم مكسور..

طلال:

لك وعد.. ان المسئلة ماطول.. وسيف بنجيبه بحضنك.. ولايطلع منه.. الا رجال.. واذا هو يبي.. وبإرادته..

عقدت حواجبها بتسائل..

طلال ماجاوب بتفاصيل..

اللتفت لسما وبجديه:وهالحين.. ابي كل تفصيل صار ياسما.. وبالبدايه وين بالضبط صارت السالفه..

سما برجفه قامت تتكلم..

النتيجه..

ان من كم يوم جاها واحد وعرض عليها..يضبط لها ورق وجوزات.. لها ولسيف.. وبسريه تامه.. وبيساعدها على السفر..

مارتاحت وارفضت.. وغيرت مكان السكن اللي هي فيه.. خاصه انها ماعرفت المقابل.. وش يبي..

ومن يومين.. اختطفوها هي وسيف..

وحطوهم بيخت فخم.. مليان رجال مسلحين.. بس عاملوهم بشكل كويس...

وكانوا معبين المقصوره العاب لسيف..

امس دخل واحد.. وكان مسلح.. وقال لها انه بياخذ سيف.. وهي ترجع لابوها.. وتقوله.. يبون مبلغ ٤٩ مليون ريال..وخل عم حفيدك يساعدك..

سيف ترك يدها بسهوله وتعلق بالرجال.. لما وعده انه بياخذه لمهره..

عقد سيف حواجبه:٤٩ مليون...؟!

واللتفت بحده لطلال وفواز:والله ووضحت وبانت.. ماغيره منصور ولد الحرام..

فواز:والله اني قايل.. انه بيرجع فلوسه بسواد وجه.. بس عاد يخطف ورع..

طلال بهدوء لراجح:

ها يابو مشاري وش رايك بهالحكي..؟!

زفر راجح.. :

غزر هالبحر غزر.. وانا والله مافيني حيل على الغوص.. بس المبلغ ابد مني.. ومايظل سيف عندهم يوم..

طلال:

منصور يبي يسترد فلوسه اللي تصادرت.. وعن طريق لوي ذراعك..و واضح انه توصل لسيف.. من ذكره لعم حفيدك.. يعني ان طلعنا سيف اللحين من عنده بترجيع فلوسه.. انت وسيف ماراح تسلمون من شره..ومثل ما انهى غيركم..يقدر يسويها فيكم..!!

مهره باستغراب.. وبتسائل:

مين ذا.. وليش ياخذ سيف.. مين منصور..

طلال :ماتدرين من منصور اللي نتكلم عنه.. منصـ..

سيف قاطعه وهو يتنحنح:

منصور.. خوي بو مشاري..كان مخدوع فيه.. ومثل ماانتي شايفه.. طلع ماهو مثل مايظن..

راجح بتأييد لسيف.. لأن مهره وشكلها التعبان.. مافيها لزيادة صدمات:

اي والله انه طلع ولد حرام.. عساني انفض يدي عن ترابه..

طلال رفع حاجب وماعجبه.. التغطيه الحالية.. لأن ممكن لو درت مهره.. عن منصور.. تلقى خيوط تساعدهم.. على العثور على سيف..

مهره مارتاحت وحست بريبه.. بس اسكتت.. واسم منصور يتردد في مخها..

وطبعا ً منصور اللي تعرفه زوج امها.. بس شدخله بهالقضايا.. هو تاجر معروف وله اسمه بالسوق..

لا مو هو المقصود..

طيب ليش لا.. راجح.. طلع خوي ابوي.. ومنصور كان خوي ابوي.. معقوووول..!!!!!!!!!

فجأه مهره.. وبإلهام غريب.. وكأنها منومه مغناطيسياً..

افتحت جوالها وشغلت برنامج.. وبفهاوة:

انا معي برنامج.. مقترن بايباد سيف.. يحدد مكان الجهاز..كنت مركبته لان كل يضيعه..دوم واشغله والقاه..

توسعت عيونهم بصدمه.. وهم يلتفتون عليها..

وسيف اللي جنبها.. بذهول وانفعال:

من جدك..

مهره وهي تشتغل في الجهاز.. :

ايه.. ودام جهازه معه..ممكن يضبط..

وفعلا ً بين على الخريطة.. موقعه..

وقف فواز.. وهو يسحب الجهاز من يدها :

انا اشهد انك ذيبه..

وراح لطلال..وراه: كلم آدم .. وخذ اذن عشان.. نتحرك..

مهره بانفعال:

يعني لقينا سيف..

رجع جوالها :قولي ان شاء الله.. ممكن يكون اخر نقطه اشتغل فيها الجهاز.. احنا نداهم ونشوف..

مهره برعب :

وش تداهمون.. لايصير في ولدي شي...

سيف:اذا هناك مايجيه شي..

مهره بصياح:

لاداهمون ولاشي... عطوه فلوسه واخذوا سيف..

طلال وهو يقوم:

ماينفع.. واصلا ً هم ماحددوا لوسيلة اتصال ولانقطه حق نتواصل معهم.. يعني واضح مطولين ويبونكم تستون على نار هاديه..

مهره بانفعال:

طيب حددنا مكانه.. نروح ومعنا الفلوس.. وناخذ سيف..

طلال:تحديدنا للموقع.. وصولنا يدل على شيين.. يا ان سيف هناك..ولا.. احد متوقع نوصل.. او ان معهم علم ببرنامج سيف.. وينتظرون نلقى المكان.. ممكن يكون فخ..

مهره قامت وبحزم :انا بروح معكم..

سيف مسك كتوفها:

يابنت جنيتي.. والله ماتروحين مكان..

مهره بجنون:

لا والله بروح.. لو بظل امووت تعرف شلون اموت.. اعصابي تآكلت.. ..

فارس واقف بوجهها:

مهره.. انتي شايفه حالك.. وش بتسوين.. خلاص الامن.. يجيبونه وش يوديك..

مهره بتهكم وعصبية:

الأمن بس..؟!.. ابوك بيروح.. وانا بركب قبله بالسياره..

فارس بانفعال:وابوي وش يوديه.. مكان مجرمين..

اللتفت لابوه بدهشه..

سيف لبس الجاكت.. واستعد يطلع مع طلال وفواز.. :

وليد بيخلص شغلة بلاغات في الامن تخص سيف وبيجي.. وياخذكم.. خلكم معه بالبيت لمن اجيكم..

مهره اندفعت له وبتحدي :

والله ماتعدي الا وانا معك.. وماكون بنت رجال اذا طلعتوا بدوني..

صاح فيها:انهبلتي.. احنا بنروح وماندري وش يصير.. انتي حالفه تموتين قبل تولدين..

مهره وعيونها بعيونه :ماحدن يموت الا بيومه..

طلال بهدوء:سيف خلها تجي..

سيف بعصبية :واذا...

قاطعه طلال:تحت حمايتي..

سيف بقلق:مهره اقعدي مكانك لاتدوشيني..

شالت شنطتها وجوالها..

وراحت طلعت قبلهم..

فواز وهو يمشي جنب سيف:

والله كنت اضن اللي عندي راسها يابس.. طلعت اللي عندك راسها جدار..

سيف بخفوت:ومير طلال.. بدل مايقول كلمة العود.. ويمنع.. وراه عطاه على جوها..

فواز :ماهو لله.. بتفيدنا..

فارس طلع بقلق.. للحديقه..

ليان وهي تطالع مكان اختفوا :

بالله سما.. تقدرين ترمين نفسك بخطر عشان سيف مثلها.. ليش ماقلتي انك بتروحين معهم.. كيف تبين سيف لك الحالك.. ومنافستك هالأم اللي بايعه روحها عشانه..

سما بشرود.. وقلبها يقرع كالطبول..

سيف انسل من يدها.. كاخيط الحرير..

ومهره تهاجم وتناظل وتوقف قدام المدفع عشان ترجعه..

وهي ابدا ً ومستحيل.. تدخل في مداهمه.. عشان تستعيده..

تهاب الموقف والحدث..!!.

تخيلت كيف شكل مهره.. وكيف تغيرت عن آخر مره شافتها فيها..

مهره لونها.. اصبح ابيض كالموتى.. لفقده..

كيف انافس مهره.. في حب سيف..

كيف تشتري سيف بروحها..

وانا بعته.. وهو كان بين يدي..!!..

بعد اشوي..

وصلوا عند بيت بره المدينه.. في مكان ريفي..

بس كان مظلم..

وواضح مافيه احد..

مهره تطالع من النافذه.. وهي ترتجف..

وتشوف سيف يمشي معهم للبوابه..

طلال وهو يتقدمهم ومعه مسدس:واضح البيت فاضي..

سيف :بس ماهو مهجور..

واشر على زباله.. واضح انها توها من بقايا وجبات الاكل اللي ماتغيرت..

فواز وهو يتحرك بحذر ويطل من النوافذ.. :خلكم منتبهين..

مهره فتحت الباب ونزلت.. وواحد من الامن واقف :

اختي ارجعي السياره..

مهره:مافي احد.. واضح البيت فاضي..

وراحت بتدخل..

حط ذراعه قدامها:اختي ارجعي.. لايعصب بوعقاب..

مهره ولا عليها منه.. راحت دخلت الحديقه.. وبس لمحها سيف بعصبية:

وش تبين.. ارجعي السياره..

بعناد:وانا جايه عشان اقعد بالسياره.. البيت واضح فاضي..

فواز يفتح الباب بأداة عنده.. ويقول :

البيت مافيه احد.. مقفول من بره.. ادخلو بس بحذر..

شوي وكانوا داخل وشغلوا النور..

البيت صغير.. بس نظيف واثاثه.. سليم.. ومرتب.. الا من بقايا.. اعقاب السجاير.. وزجاجات البيره..

افتحو الابواب.. عشان يتأكدون ان مافي احد..

واخذوا يشيكون على كل شي..

وينبشون في الاوراق اللي على المكتب والكتب الموجوده..

مهره.. تمشي بحذر..

وتوجهت لاحد الغرف.. وحست انها تسمع صوت سيف.. وهو يلعب بسياره.. :

نااااان.. نااااان.. لمبرديني حقتي قووويه..

عضت شفتها.. وهي تدخل الغرفه الخاليه وخطت داخلها..

وطاحت عيونها على مجموعة سيارات.. صغيره.. مبعثره في الأرض..

تشوشت عندها الرؤية..

وهي تشووف قصص مصوره.. على السرير..

رفعتها برجفه.. وشافت..

الخربشات الطفوليه اللي ماليه الكتاب.. كانت كلها حرف الـm.. بتعرجاته الكثيره..

طريقة سيف في كتابة حرفها..

طاحت دموعها بغزاره...

وهي ترفع عيونها للجدران.. كاتب حرفها بكل مكان...!!!!

طلعت من الغرفه وراحت لسيف.. ومدتهم له وبصوت يقطع القلب:

كان هنا....!!.. هو يكتب حرفي كذا.. سيف كاتب حرفي بكل مكان حتى بالجدران..

خذ الكتاب.. وبزفره مخنوقه.. ماقدر يعلق..

تهالكت مهره على الارض:

ياربي رحمتك.. كيف وضعه اللحين.. خايف.. يبكي.. وليه مايتصلون.. اذا يبون فلوس نعطيهم.. بس يجيبونه..

حست قلبها بينفجر مسكت ضلوعها..

طلال جلس على كنب قريب..

وبالهجه حازمه قال:

ام سيف ركزي في اللي بقوله واللي ابيك تسوينه.. اذا تبين نوصل لسيف..

طالعته بعيون مجمره.. وقصدها (قل)....!

سيف ماعلق..بس ممكن يكون الحل الأخير..

وطلال قال:

اللي خاطفين سيف.. جماعة منصور زوج امك..

شهقت بذهول.. وصدمه:

منصووووور..!!!!!!.. ليه وش يبي..

طلال تكلم بشفافيه عن كل شي.. وحتى عن اصرار سيف للوصول له عشان ثار ابوها..

ومهره كانت في حالة صدمه وشلل في الاستيعاب.. ووجع وقهر.. من امها.. من امها.. كل شي صار شين لهم منها... !!

تركت المكان بسرعه لدورة المياه وهي تمسك معدتها..

واستفرغت..

حتى حست ان معدتها بتخرج من حلقها..!!!

سيف لحقها..

فواز :

ياشين العله لاجات من اقرب الناس لك..

طلال شارد وساكت.. بس من داخل يغلي..

بعد اشوي.. طلعت مهره وماسكها سيف.. وهي ماسكه انفها بمنديل.. ويقول:

خلونا نأجل كل شي لبكره.. لازم اوديك لدكتور..

مهره بعناد.. رغم التعب:

الحين بوعقاب.. قالي عن سواد وجه منصور.. باقي اعرف وش ممكن اسوي عشان اوصل لولدي..

فواز بقلق:وش هالدم.. انا مع سيف نأجل كل شي بعدين..

مهره باصرار تجلس :رعاف عادي.. يجيني.. مافي شي خطير.. تكلم يابوعقاب.. وش الخطوه الثانيه..

سيف بانفعال:

تعاندين..!!!

مهره بخفوت وتوسل:اذا في شي ممكن نسويه لانأجله.. سيف ماعاند.. والله ماهو عناد.. قد ماانا محروقه عليه.. الدكتور ماراح يسوي لي شي.. انا علاجي ولدي..

جا لها وبعد المناديل عن انفها:

خشمك ينزف.. بلا جنون.. سيف ماحد مأذيه.. ماهو في صالحهم.. ومثل ما انتي شايفه.. واضح ان منصور موفر كل شي عشان مايبكي.. ولايخاف..

مهره بتوسل:عشان خاطري سيف.. عطني وجه اليوم.. وخذني على قد عقلي.. وتالي مابي شي..

جا فواز من المطبخ.. معاه كيس ثلج.. عطاه سيف.. :

كمد راسها شوي.. الواضح ان ضغطك يلعب يا ام سيف.. هدي.. والامور طيبه..

مهره :يعطيك العافيه..

وبأمل :يعني بنكمل اليوم..؟!

ابتسم فواز:وقفي رعافك.. وابشري..

طلال:اهدي يا اخوك.. لأن كذا ماراح نقدر نسوي شي.. حطي في بالك ان سيف بخير.. وبنلقاه..

هزت راسها ايجاب.. وهي تتمسك بيد سيف :

انا واثقه فيكم.. ومتأمله خير..

سيف يحرك الثلج اللي براسها.. :

والله لاطلع تكسرك لكلامي من عينك..

مهره ابتسمت.. وشكلها يكسر الخاطر:

اضم سيف لقلبي.. وبعدها سوو اللي تبي..

بعد اشوي كان طلال يتكلم:

امك مالها دخل بأي اعمال منصور.. تشتغل صدق.. بس باعمال مشروعه ومباحه.. وعندها الاعمال الخاصه فيها وتحققنا من كل شي.. و واضح ان حتى اخوانك مالهم في شغل ابوهم.. لان اسامه بالجامعه.. وباسل بثانوي.. ووضعهم ماعليه غبار..

مهره بتسائل مرتجف:

اكيد ماما ماتدري.. ان منصور قتل ابوي...

طلال:ماتوقع.. لان قتله لابوك كان ضمن اعماله في المجال اللي ماتعرفه امك.. وماهو في صالحه تدري.. لان ردة فعلها.. بتكون سيئه قدام قتله لابو بناتها..

مهره بوجع:ليتها ماتدري.. يارب.. ماتدري..

سيف مسك كفها بقوه:

مستحيل يكون عندها علم.. ذا شي ماطلعه منصور لاحد.. ملف ومتسكر.. ويكون بعلمك اصابع الاتهام 90٪على منصور.. بس فيه 10٪ممكن يكون مو هو..

مهره بأمل مقتول همست:يمكن بعد.. نكون ظلمناه وماقتله..

طلال بحزم:بس احنا ماظلمناه.. في خطف سيف..

مهره اللتفتت.. لطلال اللي كمل :بالنسبه لبيت منصور في فيلا كبيره هنا هي اللي معروفه له نفسها اللي يعرفها راجح وهذي مراقبينها من مده.. ومافي اي شي يقول ان سيف فيها.. وخاصه ان منصور حريص ويدري انه تحت المجهر .. لازم عنده ممتلك خاص فيه ثاني هنا.. ابيك تتصلين على امك.. بحجة......

وراح يكمل لها.. الخطه بالضبط....

اللي استوعبتها مهره..

وبعد اشوي كانت تنفذ..

وكانت تتصل على امها.. والجوال سبيكر.. وثلاثتهم يسمعون..

ردت..

امها بلهفه:مهره ماما..؟!. شكلي احلم..

مهره:الله لذي الدرجه انا عاقه..

امها :يلا حسبي.. متى اخر مره كلمتيني..

مهره: عيد رمضان يمكن..

نوير:ذيك زوين تكلمني وتوصل.. ولا انتي وسندس.. قاسين.. الله يسامح صبحا.. ماليه خاطركم علي..

مهره امتلت عيونها دموع وعضت شفتها:

ماما والله احبك..

سيف حس بغصه.. ويدري ان مهره مهما كابرت تموت في امها.. بس خاطرها دوم زعلان من بعدها عنهم..

نوير بحنية وحب :يابعد روح مامتك.. وانا احبك يابعد الدنيا.. قولي لي.. قربت ولادتك..

مهره:ايه.. انا بالثامن.. بس شكلي بولد اليوم..

امها:بسم الله عليك.. تولدين ان شاء الله بوقتك.. شهالفال..

ضحكت مهره والدمع يختنق بعينها:مجرد شعور..

نوير:ايش رايك.. تكسرين الحاجز.. واسوي استقبالك عندي..

مهره :ليت ماما بس ماتضبط.. انا بلندن..

نوير :وش مطيرك.. هناك.. يابنت اقضبي ارضتس.. لمن تولدين تالي روحي اللي تبين..

مهره بتردد وهي ترفع عيونها لهم:

عاد جات كذا.. ماما انا بلندن وصايره لي سالفه.. وماجا في بالي الا انتي..

نوير:آمريني فديتك.. لو تبين اجيك جيتك..

مهره:حبيبتي انتي..!!

نوير وقلبها يتقطع ماتدري ليش.. باحساس ام :

مهره تكلمي.. كلني قلبي عليك صاير لك شي.. وش فيك ياعينها..

مهره انهارت بكي.. خافوا.. تجيب العيد.. بس تكلمت :ماما زعلت من سيف وقدني هايمه بالكفيات والشوارع بلندن.. ماعرف وين اروح.. ولا ابي ارجع بيته...

امها بقلق :ليه وش صاير يخليك تطلعين.. يابنتي اعقلي وارجعي لبيت رجلك.. ماعدتي بزر.. وتراك بغربه.. لاتخوفيني عليك..

مهره بانفعال ونحيب.. :

مابي ارجع.. ماما.. زعلانه منه زعل كايد.. لو برجع مالي كرامه..

امها وتبي تحل المشكله:وش مسوي.. لاتقولين شارب وبتسوين سالفه.. اكثرهم يشربون بره..

مهره:

لا يمه مو شرب.. والله لو يشرب كان اصبه بغاز واحرقه..

انصدموا الشباب من مهره..

والمصداقية..

هي بكت وانتحبت عشان الوضع اللي هي فيه..

بس صار الوضع جداً.. عجيب مع السالفه اللي حبكوها..

امها:لاتقولين اجل غيرانه.. ومطالع هنا ولاهنا.. عاد قدك عارفه نفسك وزينك ياروح امك.. مايلقى مثلك..

مهره:خلاص ماما.. مابي اتكلم في الاسباب.. بتساعديني ولا..

امها :وانا عارفه اساعدك وقلت لا.. انا احاول اعرف مشكلتك وانصحك ترجعين..

مهره :ماما.. ابي مكان ابات فيه الليله.. انتي مره قلتي عندكم بيت تجونه بالصيف هنا.. واذا رجلك فيه مابي اروح..

امها بسرعه:اصبري وش فيك عجله.. منصور حتى لو جا لندن عنده مكان يقعد فيه.. فيه بيت ثاني.. تبين تروحين بعطيك العنوان..

مهره:قبل تعطيني العنوان.. توعديني وعد ماتقولين لرجلك شي.. بكره يذلني.. اني مادقيت الا للحاجه..

نوير :ياربي مادري ليش ماتواطنين منصور..

مهره:بتوعديني وتحلفين ولا والله انام في الشارع ولا اطب بيتكم...

نوير:خلاص لك اللي تبين.. واللي خلق عيونك الحلوات ماقوله.. وش تبين بعد..

مهره:بعد عمري والله..

نوير:برسلك موقعه بالواتس.. بس ترى فاضي.. العاملات.. مايجون الا لاجينا فيه.. ماتخافين..؟!

مهره:لا ماخاف.. خبرك.. فلاحين وراعين مزارع..

نوير وافهمت قصدها :ترى انا ماقلت.. انتي اللي قلتي..!!

ضحكت مهره:طيب مو قصدي شي.. بس كيف ادخل بيتكم..

نوير:اول ماتوصلين عند الباب الداخلي.. فيه يسارك تمثال كبير.. ابد بتلقين المفتاح بالسله اللي شايلها التمثال فوق راسه..

مهره:تمام.. انتظر الموقع..

نوير :طمنيني عليك ماما تمام..؟!

مهره:اوك..

وقبل ماتسكر.. همست بتردد :

ماما....؟!

امها:عيوني..

قامت مهره وصدت عنهم.. وببكي مكبوت:

قولي لي.. من حبيتي اكثر.. غازي ولا منصور..

سيف انعصر قلبه عليها..

ونوير سكتت.. بعدها:وش هالسؤال..

مهره ودموعها تسيل :

يمكن لان انا عندي سيف وقبله كان عساف.. وحبيت سيف اكثر.. انتي مثلي صح..؟!

سكتت نوير مده بعدها قالت:

انا ماحبيت في عمري قد ابوك.. ولاتسئليني عن اي تفاصيل.. مع السلامه امي..

وقفلت..

لتنهار مهره.. بكى.. يقطع القلب..!!!

وسيف ضمها من ظهرها.. يحاول يلملم.. خاطرها المكسور....

(‏عزاه ياصدرٍ ذاق من لوُعات الأيام م يكفيه.)

*******

وصلنا البيت المقصود..

واللي أكد لنا ان هو نفسه.. وجود رجال فيه.. والانوار مشغله..!!

وقفت السيارت على بعد..

سيف وقف عند بابها وهو مفتوح وانحنى لها:

لو يصير شيصير لاتنزلين.. ذا البيت مو فاضي..

مهره بعيون زايغه :

سيف انتبه.. تكفى..

باس جبينها :

قلت لك لو يصير شيصير.. لاتعدين السياره.. الرجال حولك.. ولو تلقيفتي ونزلتي بيمنعونك حتى لو بالقوه..

تمسكت في كفوفه:

ماراح اجي.. بس تجي سالم انت وسيف.. والله لو يصير فيكم شي..اموت..

ابتسم يطمنها:

ماهنا الا الخير.. معي ذيابه.. انتبهي لحالك.. وقفلي السياره..

هزت راسها ايجاب..

وقبل يسكر السياره.. سحبت يده واسحبته اكثر نزل راسه لها وضمته.. وهمست في اذنه تستودعه..

حس بوخزه بقلبه.. ورهبه..

وهو يبعد عنها.. ويسكر الباب..

وياخذ سلاح مده له فواز واخفاه عند خصره..

ومهره ترجف برعب وترقب..

بعد ٢٠ دقيقه..

وبعد اقتحام سلس وتعارك بالايدي..

كان الامن.. توسط البيت.. ويطالبون من الرجال المتخبين فوق وبالغرف.. يسلمون نفسهم..

طلال بحده.. :

سلموا الطفل اللي معكم..

واحد صاح من فوق :

مافيه اطفال.. الفيلا ممتلك خاص.. وراح تحاسبون على هالتصرف..

طلال وهو يتسلل للدرج :

خلك رجال وتعال وقف قدامي وحاجج..

اطلق رائد من فوق رصاصه عشوائية :

لا تصعد.. لاني برمي عشوائي..

تراجع طلال..

سيف وفواز كانوا محتمين بعمود كبير..

سيف بهمس :يمكن سيف مو هنا..

اشر فواز بعينه على كرسي قريب :الا هناا..

اللتفت حيث اشار.. لقى جاكت صغير على الكرسي..

وفجأه اعتلى صوت سيف المكان.. يبكي..

توسعت عيون سيف وهو يتلفت بجنون.. ولايدري من وين يجي الصوت..

قام ينادي بقوه:سيف يبه.. سيف..

وسيف اللي سكت مع صوته.. بعدين صاح يناديه :

اووبا.. اوبا.. ابي ماما.. اوبا ابيك..

جن جنونه وهو يتحرك.. فواز مسك ذراعه.. بخفوت:

لاتتهور.. اصبر اشوي..

بعصبيه.. وخفوت.. :ماقدر يافواز..

فواز:انت عارف مكانه ذا الحين..

صوت سيف اختفى واكيد اللي معه مانعينه يصرخ..

سيف وعيونه تلاقط.. :

الصوت مو فوق.. الصوت جاء من شمال..

صاح سيف من جديد بانهيار باكي.. :

اوووبا اتروح.. عني.. اوووبا شلني..

سحب ذراعه بقوه.. من فواز.. وتركه متوجه للصوت..

رائد من فوق:

وقفوا تحركاتكم بالمكان.. ولا والله بتروح ارواح..

طلال اشر بعينه لسيف.. يوقف..

وخاصه سيف بين يديهم..!

واشر لفواز بحركه.. فهمها على طول..

وهو تكلم: انتوا تبون فدية.. ليش نسيل الدم الحين.. خلينا نشوف الورع ونطمن على وضعه..

بره مهره.. ومن اسمعت صوت رصاص..

وقد انفتحت لديها بوابات الجحيم.. من ألم مُريع.. يقصف ظهرها وبطنها..

وابنتها اللتي عنفتها بنفسيتها طوال الحمل..

بدت معلنه القدوم..!!

بجو مرعب ومخيف.. ورصاص مزري لاندري من سيسقط فيه..

امسكت بطنها بصرخه مكتومه..

وبدت في حالة احتضار..

والموت يحلق بها من كل جانب..!!!

في الداخل..

طلع واحد من بوابة القبو.. يغرس فوهة مسدسه البارده داخل رأس سيف وشعره الغزير وهو يبكي..

الا انه اتوسعت عينه.. لمن شاف سيف وشهق.. :

اوباااااا

وحاول يركض بس امسكه اللي وراه..

وسيف يطمنه بحنيه وهو يشير له بكفوفه:

انا هنا ابوي.. لاتخاف الحين نمشي.. مهره بره تنتظرك..

تناسى الخوف وهو يصيح بفرح من بين دموعه:

ماما هنا.. والله اوبا.. جات..؟!

سيف:جات وتنتظرنا..

طلال باسفل السلم.. يحاور رائد فوق..

وكان كله لاشغالهم..

عشان فواز.. اللي دخل من القبو من الباب الخارجي.. وباغت اللي ماسك سيف وهو يضرب المسدس من يده.. وقبل مايستعدل يعاجله بشوته على راسه.. سقط بعدها..

وسيف انطلق كالرصاصه...

لتتلقفه ذرعان سيف ويضمه بقوه.. وهو يرفعه ويخفي وجهه برقبته.. ويصيح بآااااه..

وهو يشمه بقوه..

ومو مصدق انه اخيراً امسكه..

طلال:اطلع حالا ً سيف..

تو سيف بيطلع..

فجأه وبدون ينتبهون..طلعوا اثنين من احد الغرف قريبه من فتحة الباب.. واحد ضرب سيف على راسه.. باداة..

فتح جرح كبير براسه..

والثاني غرس سكين صغيره بذراعه.. في محاوله منهم لاستعادة الصغير...

حس بعضلاته تمزقت وتقطعت..

حتى كادت يدينه تفك سيف..

لكنه تمسك فيه.. بذراع .. واللتفت وهو يشهر المسدس بوجههم..

والصغير تعلق فيه.. واخفى وجهه برقبته ببكى يقطع القلب..

وقبل مايضغط الزناد..

فواز اطلق على الاثنين.. واحد في فخذه.. والثاني بالساق..

واللتفت لطلال.. بحده.. خلينا نصعد لولد الكلاب دام خذنا الورع...

******

طلعت مهره من السياره..

الألم الرهيب.. اللذي داهمها.. استكان امام صوت الرصاصات.. وسكون الموتى اللذي خلفه..

لم يخرج.. لاسيف ولاسيف..

وجعي.. يتباهى وينتصر..

اردت ان اقع على الأرض.. حيث سأعود اليها اليوم..

الم طلق.. والم فقد..

اللهم هون علي سكرات الموت وغصاته..!!

جلست عند جذع شجره قريبه..

وماتبي تقول للرجل الامن اللي قريب منها.. عن الالم اللي فيها..

تبي تركيزهم بس في دعم الناس اللي داخل..

*امسكت العشب بقوه..

وروحي ستخرج..

لكن خدراً يشلني..

لست في ولادة..

بل احتضار..

ابنتي لن تخرج روحي ستخرج..!!!

عيني على الطريق المُظلم حيث المنزل..

سيف يمشي نحوي..

والدم ينزل من رأسه.. ملوث قميصه.. ووجهه..

وعلى كتفه..

قلبي وروحي صغيري.. رفيق وحدتي ومراري..

لكنه يستكن على كتفه دون حراك..

هل وجوده ميت.. هل الدم من سيف..

لاقوة لي على النهوض.. او حتى النداء..

صوتي لايخرج ابداً..

انا منهاره تماماً..

توجه سيف لها وهي مستنده على الجذع.. وعقد حواجبه.. وحجابها نازل.. ورجولها ممده على الأرض..

ناداها :مهره.. !

رفع سيف راسه عن كتفه باللهفه بس سمع اسمها.. وصاح:نزلني اوووبا..

نزله .. واندفع لها.. !!

مهره ببتسامه منهكه.. ترفع ذراعها بصعوبه..

ليعود لروحها واضلاعها..

ضمته بقوووه متراخيه.. وهي تهمس بنحيب:

ياحلوو ريحتك يمه.. اشتقت لك ياروحي.. ياعمري..

سيف انهار بكي.. وهو يبوس وجهها وعيونها.. :

ماما ماتخليني اروح لسما.. ماتخليني اروح عنك.. ماماااا ابي بس مهره.. بس مهره..

سيف وجعه قلبه.. كيف سيف يحاول يدخل في صدر مهره.. كيف يحاول يتخبى في جسدها وضلوعها...

ابتسمت بوجع.. وهي تحط خدها على خده:

ولدي والله مايخذك من حضني الا الموت.. انتهى ياابوي انتهى.. لاتبكي ياسيفي اوجعته قلبي...

قالتها وارخت راسها وذرعانها..

سيف شاله عن حضنها وبارتياع :

مهره.. مهره.. .. بسم الله عليك.. كلميني.. مهره الوووووو...

سيف يطالعها بهلع:

ماما ماتت.. ماتت..؟!!!

سيف يضرب خدها ويتحسس النبض.. :

لاتقول كذا يابابا..

وصاح في احد الرجال:عزام.. ساعدني نبي اقرب مستشفى..!

********

نوير كانت بتنام.. وتتقلب.. وصوت مهره:

والله احبك ياماما.. والله احبك ياماما..

توترت اعصابها وحست بشعور غريب..

وهي تدق عليها وماترد..

طلعت من الغرفه.. وراحت جلست في الصاله الشبه مظلمه..

وطفولة مهره تداهمها..

وقت افتحت عينها اول ماولدتها.. وانبهارها:

يمممه يمممه على العسل.. غازي هالفص خذت عيونك.. عشان تاخذ قلبي مره وحده..

غازي :وش رايك نسمي هالشقرا مهره..

تطالعها بشفاقه وحنيه:

والله اسم على مسمى.. ❤️

تنهدت.. وقلبها مثقل..

صعد اسامه.. وشافها.. باستغراب:

يمه.. صاحيه من النوم والا مانمتي..

نوير :

ماعرفت انام.. مادري وش فيني..

جا حب راسها :

مشتاقه لمنصور..؟!

ابتسمت وهي حاطه كفها على رقبتها:

ابوك عودني على غيابه.. ماهو جديد..

اسامه:اجل وراه..

همست:اختك مهره مكلمتني..

عقد حواجبه:ايه وش فيها..؟!

بقلق:مادري.. اول مره تعبر وتقولي احبك.. واصلا اول مره تطلب مني شي..

ابتسم :يمكن مأثر فيها الحمل وصايره حساسه.. يازينها.. والله صاير لي فوق السنه ماشفتها..

نوير:وصلوا خواتكم يااسامه.. لاتقطعونهم مثلي.. انا مافيني خير.. لاتصيرون مثلي..

اسامه :انا اتواصل معهم.. بس تعرفين على اللقا.. ياله تضبط.. جدتهم قفل.. وغير مرحب فينا..

نوير :ماعليه امي.. كلهم تزوجوا.. مهره وزينه بالرياض الحين.. وسندس بحايل وتراها اختكم الكبيره ولها الحق تروحون لاعندها هناك..

اسامه:ابشري.. والله وبدون توصين.. عارفه غلاتهم عندي.. والحين قومي نامي.. الساعه سبع ونص..

نوير:بنتظر اشوي يمكن ترد مهره اطمن..!

اسامه:وش يقعدها لسبع اكيد نامت..

نوير:هي بلندن.. عندها اربع ونص اللحين..

اسامها:ايه نايمه.. قومي وصلي على النبي.. ومافيها الا الخير.. يعني لاقلت لك احبك .. بموت بيصير لي شي..

نوير :فال الله ولافالك.. عساني ماذوق حرتكم لاانتوا ولاخواتكم..

********

في صباح لندن..

وفي ممر بارد في المستشفى..

اعلن الطبيب.. ان مهره ولدت.. وانجبت بنت..

لكن حصلت مضاعفات لمهره..

وهبوط حاد في علاماتها الحيويه..

وكله من تأثير الاحداث اللي مرت فيها..

وباقيه تحت الاكسجين والاجهزه وغايبه عن الوعي..

سيف كان شارد..

وليد :سيف.. ادخل خل يشوفون جروحك.. شفيك انت ماتحس..

دعك جبينه وعيونه:

شلون الحين.. شبيصير عليها.. (وليد..شبيصير عليهاااا..!!!!! )

قالها بصرخه حاده ملت الممر..

فارس اللي كان جالس وسيف في حضنه.. اللتفتوا..

سيف بتهضم:افيها ماما.. فالس ابيها.. ودني لها...

ضمه فارس.. :

تعبانه اشوي.. لمن تصحى نايمه..

سيف بانهيار.. ضرب الجدار كم مره:

انا تسببت فيها... كانت جثه تمشي.. لاعاشت فترة حمل زي الناس.. ولا حتى تابعت مثل الحريم.. لاترقد ولاتاكل.. وفي الاخير خطف وضيعه.. وتوتر ورصاص.. ياوليد.. انا اللي مب رجال سمحت بكل ذا يصير فيها..

وليد مسك كتوفه:

سيف.. فوووق.. لاتسوي في نفسك كذا.. العن الشيطان.. وذا مقدر ومكتوب..

سيف ولأول مره.. فارس يشوفه منهار ويبكي :

طيب وان ماتت مثل نجود.. كنت صغير وتوني بعد سنين سليت عنها.. هالحين اللي دخلت في هالقلب والراس خالطه شيب.. شلون...

وليد قاطعه بحده:

ماحد بيموت.. لاتنهار كذا.. قدام عيالك..سيف ماهو كذا.. اصحى..

فارس ضم سيف وحاول يخفي دموعه على كتفه..

لو بيصير لمهره شي..!

كلهم بينهارون مو بس ابوه..

وليد اقنع سيف.. وخذه عشان يضمدون جروحه..

جا راجح ومشاري.. وسما..

اللي قربت من سيف.. وتوها تشوفه بعد ماخذوه ونادته:سيف ماما..

اللتفت طالعها وهو عاقد حواجبه..

مسكت كفه :تعال ماما.. خليني ابوسك..

سحب يده بجفا:مابي..

سما:الله سيف بس شوي..

راح ضم رقبة فارس بقوه:

ماابي.. ابي فالس.. فالس مابيها.. وديني حرامي..

بكت سما وهي تعض شفتها.. :

لاتقول كذا ماما والله ماكنت اقصد..

فارس قام وهو شايل سيف.. وبجفا:

خلي نفسيته تهدا.. ممكن سما.. الورع تعبان وطالع من حادثه..

وراح بعد ابه وترك المكان لهم..

سما انهارت على الارض وتبكي :

شلون يعني.. خلاص ماعاد يبيني..

راجح جلس على احد المقاعد:

خلي امه تقوم بالسلامه.. واللي تقوله هي يصير..

بعد خمس ايام..

تم القبض على منصور..

مهره ظلت في المستشفى ووضعها مافيه اي تطور..

موضي ونواف وزينه.. جاوا عندهم..

سيف مايفارق المستشفى..

وحالته النفسيه تدهورت..!!

موضي وزينه..

كانوا واقفين عند الحضانه.. وفارس شارد.. في اخته الصغيره..

شي صغير يشبه السكر..

كل يوم يجي يوقف عندها.. ويحصي تحركاتها.. لأن ابوه مو حولها..

ويدعي لمهره داخله.. انها تقوم وتحضن بنتها..

يدعي لنتفه هذي انها ماتاخذ حضه.. وتعيش من غير أم..

امس دخلته الممرضه.. وخلته يلامس اصابعها وكفها الصغير..

وكانت اللحظه كفيله.. بانهيار دمعي.. حار من فارس..

الى الآن ما اطلقوا عليها اسم..

لا ابوه قال شي..

ولامهره قامت وسمت..

موضي قفلت المصحف بيدها.. :

فارس ابيك تروح البيت.. تشوف شنطه او شي.. مجهزتها مهره.. عشان ولادتها..

فارس:ماهقيتها جابت معها شي.. للبيبي..

زينه:هي كانت مجهزه.. اغراض لولادتها.. اكيد جابتهم.. انت روح وشوف..

موضي:ايه امي.. اليوم بيعطونا البنت.. عشان نبدل لها.. واذا مافيه.. تطلع زينه وعمك.. ويشترون..

فارس:تمام.. انا اروح واشوف..

ترك المكان..

وراح ناحية الغرفه الخاصه اللي حجزها سيف لمهره..

فتح الباب بخفوت.. الغرفه شبه ظلمه.. وصوت الاجهزه اللي تحصو النبض.. والمؤشرات.. متتابع في وتيره وحده..

ومهره نائمه.. مستسلمة.. بعد حرب طاحنه.. طالت مذ زواجها بعساف حتى اليوم..

رفعت راية الانهزام وسقطت..

ولم ترقص على انتصارها.. سيف لها.. تم تبرءتها.. بشهادة الدكتوره اللي حضرت عملت عساف فيها..

سيف في حضانتها..

بحكم وفاة ابوه وعدم كفاءة سما النفسيه في الاحتفاظ فيه.. وبتنازل من سما..

وبدعم للقرار من راجح..

سيف راح يوصلهم.. بس مالهم حق بحضانته.. الا اذا كبر واختار هالشي..

انتصارك الثاني ثار ابوك.. والقبض على الفاعل..

امك اللي انهارت.. وماكانت تدري عن شي..

امك على الأقل بريئه من دم ابوك..

قومي..

افلحي من هالمكان البارد..

قومي وشقي الكفن..

ماهو لايق لروحك الحلوه.. الموت..!!

حاول يتنحنح.. يجلي حشرجته وهمس:

يبه..

سيف جالس على الكرسي جنب مهره.. بشاش ملفوف على راسه.. رفع راسه له:يبه..؟!

حب فارس راسه.. :

انا بروح اجيب شغلات من البيت.. تجي معي ترتاح اشوي..

سيف:لا ياعينه..

فارس :طيب تبيني اجيب لك شي من هناك..

سيف:لا ياابوي

وطلع من محفظته بطاقة ومفتاح السياره.. قال:

اسحب لي فلوس معك..

فارس خذهم:ماشي.. كم..؟!

سيف ويطالع مهره:مثل كل يوم..

اللتفت فارس يطالع فيها..

ابوه يدافع بالصدقه البلاء..

ويكافح وقوع الأسوء..

وكل يوم يخرج لمتسولين.. الميادين الشهيره في لندن.. ويوزع.. بنية الشفاء..!

قرب منها وحط يده على جبينها وابتسم :

وجهها اليوم احسن..

سيف بشرود:انا حسيت كذا.. نقول ان شاء الله..

باس فارس جبينها وطلع..

تكتف سيف ويتأملها..

ليه لما اللي نحبه يموت او يكون قريب من الموت.. نتذكر اخس مواقف معه.. واقسى كلمات قلناها له.. ليش نتذكر زعلاته ودمعاته.. وقهره..

ليه مو رايح عن بالي وانا اتهمها بشرفها.. وهي تبرر واسكتها.. واصيح بوجهها..

ليش اتذكر اختناقها ونومها وسكوتها بباريس..

ليه مو رايح عن بالي وصيتها اللي اكتبتها بالجوال.. واللي قريتها بالطياره..

ليه اتذكر كل حرف وكل وصيه..

ليه يدي ترجف وانا اتخيل الكف اللي نزل على وجهها مني.. واللي كلته بدال فارس..!

صمتها مزعج.. ونومها اكثر ازعاج..!!

******

فارس دخل غرفة ابوه ومهره..

ويدور في الشغلات اللي جابتها معها..

لقى وسط شنطة السفر.. شنطه صغيره.. فتحها ولقى فيها ملابس لها وللبيبي..وشغلات من الصيدلية..

شيك على الجيب الأمامي..

لقى علبه مخمل فتحها.. فيها قلادة ذهب آية الكرسي.. وسلسال.. وورقه..

تردد انه يفتحها.. بس قال يمكن شغلات تبي نشتريها..

فتحها.. وقراها... رعشة اصابته.. ابتدت من يده لكامل جسمه..

بعد البسملة والسلام.. وبناء على الاحداث الأخيره وما أحسه يعتمل بداخلي..وجب علي ان اكتب ماسأكتب..

اعتدت متى ماشعرت بالموت اوصي.. واحتذي برسولنا الكريم عليه الصلاة والسلام..

حين قال:

(مَا حَقُّ امْرِئٍ مُسْلِمٍ لَهُ شَيْءٌ يُوصِي فِيهِ يَبِيتُ لَيْلَتَيْنِ إِلَّا وَوَصِيَّتُهُ مَكْتُوبَةٌ عِنْدَهُ))..

اوصت بالجميع خيراً والدعاء لها وبرها بالصدقه.. وتذكرها بالترحم..

ثم..

لاأدري هل سألد او لا.. او تولد ابنتي واموت انا.. وان عشنا سوياً لن تروا ماكتبت..

سيف.. اسم بنتي على فارس.. مره سئلته وقال سدن.. بس كذاب كان بيقول نجود وخاف يزعلني لان اسم زوجتك..

تشوشت عنده الرؤية لمن وصل لهنا..

كيف مهره تحس فيني وش ابي.. وش ودي.. وش الشي اللي تلعثمت فيه قبل اقوله..

رجع يقرى كاتبه..

لا سيف مايزعلني ابد.. نجود ام فارس.. وحبك الصادق اللي الله مامد له في العمر..

انا ابي يحيا اسم نجود في البيت من جديد..

شفت عيون فارس..

كيف ملهوفه لما شاف ولد جمان يشبه نجود..

ومن يومها قررت ماسمي بنتي الا نجود..

سيف.. فارس وسيفي ونجود اللي ماشفتها.. امانتي عندك..

كمل ختام المكتوب..

وطوى الورقه بآااه ودموع ومرار...

......

باليوم الثاني.. وفي بيت سيف.. كانت عندهم البنوته الصغيره..

و ظل فارس محتفظ بالورقه وماعلم فيها احد..

بس كان.. يهمس لها باسم نجود.. وهي عنده وبدون ماحد يسمع..

نواف وهو يطالع البنت بحضنه:

سبحان الله.. شقد نتفه..

زينه :المفروض مهره تدخل التاسع من يومين..

موضي :تكبر.. وتربرب.. انت يانواف.. ولدتك مع اخوك بالسابع..

ضحك:زين اجل في امل..

سيف الصغير.. يلمس وجهها بصبعه:

حلووه نوونووو.. اسمها..؟

زينه بخفوت:لمن تطلع ماما من المشفى وتسميها..

سيف:متى ماما تجي..

زينه تحاول تخفي حزنها ببتسامه:يمكن بكره..

موضي القت نظره على فارس اللي مايتكلم وشارد:

فروس ابوي.. وراه.. هونها وتهون امي..

تنهد.. واستعدل في جلسته:

مافيني شي يمه..

موضي بحنيه:ياولدي عين خير.. ومهره اليوم وضعها احسن من امس.. الدكتور قاله ماهو انا..

فارس :

بس ماتبي تصحى يمه.. وابوي وضعه دمار.. يمه حتى ماشال اختي ولايدري عنها..

زينه بحنيه:

فارس لاتشيل الهم.. بعدك صغير.. وصدقني ازمه.. وبتعدي.. والحمدلله اليوم توازن الاكسجين عند مهره والضغط.. وبتشوف بتقوم.. وتصحى.. وكل ذي بتبقى ذكرى..

فارس رجع راسه على ورى:

ان شاء الله.. الله يسمع منك..

سيف:ديون.. شتقولين..؟!

شالته.. وضمته.. :اقول ان مهره تحب سيف مرررررره.. وتسوي كل شي عشانه..

لحظة صمت مرت..

انفتح الباب ودخل سيف.. اللتفتوا ناحيته.. ذبوله.. وشحوبه.. وجفونه الداكنه.. الشاش الابيض يغطي راسه..

الغريب.. انه جاي ابكر.. بالعاده يجي قريب الفجر.. يتروش ويبدل.. ويصلي ويرجع لها..

كان بيتوجه للدرج..

لما سمع صوت بكي الصغيره..

وكأنه ناسيها تماماً..

وقف.. بدون يلتفت..

والبنت تبكي..

قطعة مني ومنها.. كيف سليت عن كنزي الثمين..

تلك الروح..

نبتت من عشقي المجنون بها..

متى طلعوها..؟!!!

اللتفت..

وكأن احبالها الصوتيه تشكلت خيوط وهمية.. تجره بلطف لها..

وقف ويناظرها بحضن نواف..

موضي:تعال امي.. اليوم سابع لاسميتها ولاحبيتها.. تعال ابوي سم وصل على النبي وقر عينك بشوفها..

قرب.. وبحذر شديد.. خذها من حضن نواف..

رفعها لوجهه وشم صدرها..

لتثير قنواته الدمعية..

تبكي ولا اتبين ملامحها.. لكن بها رائحة تلك النائمه.. باستكنان يثير جنوني..

هدهدها وهو واقف فيها.. ويبتعد عنهم اشوي.. وهو يكلمها بخفوت..

لمن اسكتت.. وجلس في الجلسات الثانيه بالصاله.. حط كفوفه تحتها ورفعها.. يتأمل ملامحها الملائكية..!

اعظم طبطبه من ربي.. انها تشبه مهره..

ياربي تلك الشقراء..

المتمرده.. المقاتلة..

حققت امنيتي.. في طفله تشبهها..

عينها عسلية.. رمشاها طويله.. انفها شفتاها..

مهرتي.. بشكل طفله..!

ابتسم وهو يتخيلها.. تقول بشقاوة(ولا لايكون ماتبيها تشبهني..)..

رفعها وباس وجنتها..

مرر انفه على ملامحها الصغيره..

والطفله مستكنه عنده..

شالها.. وتوجه للدرج..

موضي:وين بتوديها..جبها..

سيف :بخليها عندي اشوي.. ابي اتعرف على بنتي.. ماشفتها..

موضي بتقوم تاخذها.. مسكها نواف.. وهمس:

اتركيه.. معها اشوي.. ماراح يصير فيها شي..

سيف دخل غرفته.. وحطها على السرير.. كيف صغيره كذا.. لايكون ماكتملت..

الا قال الدكتور امورها تمام..

ابتسم.. وهو يفك لفتها.. :تدرين امك فتحت عيونها من اشوي.. بس اللي ماتستحي.. ارجعت نامت من جديد.. عاد من يحب النوم كثرها..لاتصيرين مثلها في هالشي.. حد يحزن ويرقد.. يتوجع ويرقد.. يبي يولد ويرقد..

لااا تمادت امك..!!!

مسك كفها الصغيره.. :

زعلانه ان ماعندك اسم.. بتسميك امك.. بس خليها تتكرم علينا..وتقوم..

كان يلمسها لمسات حانيه..

وخدرت ونامت..

بعد شوي.. كان منسدح جنبها.. وبرضو نام..

تحت..

موضي تحاتي..:هالحين يدخل يسبح.. ويخليها تفحط لحالها.. ولايرقد.. ويفغصها.. اصلاً سيف مفهي ولاهو شلي.. بقوم اجيبها..

فارس قام :

خلاص يمه.. انا اشوفها..

وصعد..

موضي:كلم خالك.. هالحين قايل بيجي يتعشى مع ماريا.. ورى ماجاء..

نواف :عادي.. هي ماريا شفتيها تلوب.. تبي تروح تشتري هدايا للبنوته..

موضي :ليتها.. تجتهد وتجيب له ضنا.. بدال ماهم يناظرون بعض كل هالسنين ياحظي..

زينه كتمت ضحكتها:

خليهم.. مبسوطين.. جايز لهم المطالع مايبون احد ينكد عليهم..

موضي:الخلا بس.. افكار هالاجانب ماتجوز لي.. ووليد معطي هالعصله وجه.. اذا مب جايبه له ذكرى.. اعرسه اللي تجيب له درزن..

زينه:يووه يمه.. شعليك منهم.. يمكن يتبنون زي انجلينا جولي..

موضي :ما عاد باقي الا هي.. ياتجيبه من ظهره.. ولايطالعون احسن لهم..

نواف :والله اللي اشوفه ظهر خالي وليد.. يابس ومافيه عيال..

موضي:بسم الله على اخوي.. مافيه الا العافيه.. بس مطاوع هالانجليزيه.. الله يخلف عليه..

فوق..

دخل فارس الغرفه.. وشاف ابوه نايم وجنبه نجود.. كما يسميها بينه وبين نفسه.. قرب جهتها وجلس جنبها وابتسم وقت شافها فاتحه عيونها..

وكيف طالعه كيوت ولفتها مفتوحه.. لملم المفرش عليها.. وهو يشيلها.. :

زينك..كنك بتنشبين لي في حب بوفارس..

بدت تبكي وهدهدها وهو يهمس باسمها:

جودي.. ابوي.. جودي.. زينك ياعين اخوك..

سيف فتح عيونه..

وفارس على السرير.. شايل اخته ويلاعبها..

وانتبه للاسم اللي يناديها فيه..

قال:سميتها..؟!

فارس :ماهو انا سميتها.. مهره سمتها..

استعدل :وش.. عساس كانت تقول انت تبي سدن..

طلع فارس ورقه من جيبه مدها لابوه:

لقيتها بالاغراض اللي مجهزتها.. لولادتها..

قراها .. وبخفوت:

ياكثر.. ماتكتب وصايا..وش فيها مستعجله على الموت..

شق الورقه..

وقال:وانت تبي تسميها نجود صدق..؟!

فارس ابتسم.. :اي والله ودي.. شلون افهمتني مهره مادري..

قام سيف وسحب فوطته:

اجل نجود.. ودامك سميتها.. جب لاختك سماوه عدله.. عنك وعن امك..

فارس بفرح:يعني اقول لامي موضي ولهم الأسم..

سيف:ايه يبه.. وياطيب من سميت عليه..

شالها فارس.. وقبل يطلع.. :

قل لجدتك تبدل لاختك وتشبعها وتدفيها.. نبي نروح لمهره.. وناخذها لها..

فارس:ليه صحت.. كلمتك..؟!.

سيف :فتحت اشوي.. بس ماحاكتني..خلينا نودي لها جودي.. يمكن تعطيها وجه..

فارس: تمام..

******

وكأني على ظهري في مزرعتنا.. اسمع صوت حوافر حصان تضرب الأرض..

لأن هناك ابي كان يمارس هوايته في ركوب الخيل..

سمعت صوت امي وكان صوتها غريب في المزرعه..

وكانت تقول بصوت أثير:

‏من دون خلّي يمر الوقت مالي به

‏وش لي بـ ليلٍ طويل وسَيده غايب.

وسمعت ابوي بوضوح رد لها بصوت رخيم :

‏عليگ السّلام ولا بقى بالخواطر شي

تعدتگ شرهات الخواطر بما فيـــــها.

لايسعني الا ان اسمع.. لااستطيع النهوض.. من ذاك التراب..

حاولت ان اناديهم لأفهم..

لكن صوتي لايخرج..

رأيتنا الثلاثه صغار.. باطواق ورد.. نركض جميعا ً ونضحك..

اغمضت عيني بقوه..

حين ركضنا ثلاثتنا نحو جسدي.. المرمي على الأرض..

لكنهم توقفوا قبل دهسي.. سندس وزينه..

يطبطبون على بطني الكبير..

بشكل مضاعف اخافني..

سندس:شكلك يامهره حملتي بفيل..

زينه تلمس بطنها :بطنك يخوف.. كنك بالعه وحش..

ناظرتني واقفه بهيئة الطفله.. حزينه لوضعي.. وسخرية الاثنتين..

وكأن فمي تقوس واقول:

ولدوني.. والله بطني ثقيل.. ماعرف امشي.. والله ماعرف اتنفس..

سندس وزينه يسحبون يديني.. :

قومي وقفي.. قومي.. يالبطه..

عوروني من سحبهم وابي اصرخ اتركوني ماقدر اقوم..

بس انا وانا طفله.. ضربت بطني بقوه :

قومي لاتخليني بروحي... قومي...

تمزقت.. ولا استطيع النهوض..

جاني صوت ابوي :

ابعدوا عنها..

اتركوا يديني.. وابتسم ابوي.. وبصوته الحاني.. :

انتي مهره..؟!.

وكرر: انتي مهره..؟!

حاولت ارد.. ماقدرت..

قال لي :المهره الاصيله.. ماتخلي السبق بوسط المضمار.. قومي يبه.. وراك مشوار طويل..

حاولت النهوض واللحاق به وهو يستدير ويتركني..

لكن بطني الهائله منعتني..

فجأه وجدت جدتي.. تمسح على بطني.. وتقرى وتنفث وتدعي.. بكفها زيت مقري.. وتعيذني.. وانا ابكي..

وهي تقول.. :شدي يمه.. بتولدين كل شي.. كل شي بتولدينه..

شعرت بطلق هائل.. واني في حالة ولادة..

رفعت كفوفي لامسك بشي..

وكانت ذرعان سيف.. وراسي على حجره..

وهو يقول.. هانت ياروحه.. هانت..

وكنت ألد.. وألد.. وألد..

وجدتي تردد: ولدتي الضيم والظلايم.. ولدتي الخوف والفقده..صبرتي ونلتي يمه.. قومي وشوفي هالورد اللي جبتيه..

اختفى بطني.. وانا اتنفس واتنفس وصدري يعلو ويهبط وسيف يبتسم.. ويمسح جبيني :

مبروك ماجاك.. مهره.. مبروك..

همست بتعب وصوتي الضئيل:وينه.. وش جبت..

كأن جدتي رمت على صدري.. مجموعه هايله من الورد الطايفي..

ورمت على رجولي مثله.. : عساه مبارك.. عساه مبارك..

وانقطع الحلم وصوت جدتي تصلي على النبي وتبارك.. ورائحة الورد تخترق انفي.. وشيء بوزن الورد يلامس صدري..

وشيء اخر يقبل اقدامي..

لكن هذا واقع..!!!

فتحت مهره بصعوبه وخفوت.. لتجد رأسا ً صغيره..

شيء صغير جداً بأعلى صدرها..

استوعبت.. واستوعبت.. وهي تحاول ترفع كفها..

كانت ماتسمع.. اذانها مترقمه..

لما بدت اصوات محببه لقلبها تداعب طبلتها..

فارس بفرح عارم:

بنتك مهره.. فتحي عدل وشوفيها.. جبتي لنا مهره صغيرونه..

حركت عيونها لسيف.. اللي واقف وماسك نجود.. ومخليها فوق صدرها.. همس بحنية:

قومي يا ام النوم.. وشوفي هالزينه اللي جبتيها..

ابتسمت بجانب فمها..

ورفعت كفها بصعوبه وحطتها فوق ظهر البنت..

وحست بقبله على قدمها:

انا ببوس رجولها لمن تصحى.. قومي ماما قومي..

امتلت عيونها دموع.. وهي تهمس:

سيف ابي اجلس..

شال نجود وعطاها فارس.. ورفع السرير.. لها..

وسيف الصغير يضم كفوفه وهو جالس عند رجولها.. وبفرح كبير متأثر يوم شافها مفتحه:

والله ياماما اشتقت لعنونك..

وقام.. وارتمى بحضنها.. وهي تضمه.. :وانا اشتقت لعيونك يمه.. وانا اشتقت..

******

بعد ساعه.. كانت تحسنت مهره.. وسولفوا معها..

نجود عندها وهي تناظرها بوله وحنيه:

شفتها بالحلم زي الورد الطايفي..

وشمتها:يازين الورد.. ياحلو ريحتك امي..

سيف:الحمدلله على سلامتك.. والله ارعبتينا ياشيخه.. قلنا لا نفست تنام بس عاد ماهو كذا..

مهره ضحكت:

النوم طوله وقصره حسب هول المصيبه..

فارس كان ساكت.. وجالس..

اللتفتت مهره عليه وتداعبه:

في واحد صاير كلامه قليل.. وش فيهم..؟!

فارس ببتسامه باهته:

اسمع لك..

توسعت عيونها :فارس.. شفيك..؟!..الا ضيقك يابعدهم..

ومدت يدها له.. ومسكها.. وبخفوت:

انتي من جدك تكتبين وصيه.. وماطيح الا بيدي.. لا وفيها انك عارفه وش ابي وتبين تنفذين رغبتي..

ضحكت :ياكثر ماكتب وصايا.. عادي لا تكبرها.. هذا انا حيه ارزق..

سيف يمسح على راسها:جعل عمرك طويل ياعينه.. ماتصلح الدنيا بدونك والله..!!

******

مرت السنه واكثر..

مرت بابطالنا بسلام.. بعد الحروب الطاحنه.. اللتي مرت وحلت..

استطاعوا ترميم.. الانقاض.. وتضميد الجروح..

وخلالها..

مرت عليهم الاعياد مجتمعين.. بعد ان تفرقوا بما قبلها..

في عيد رمضان..

سندس وزينه ومهره..

راحوا يعايدون امهم.. اللي عادت لهم عودة حميده.. بجرحها الكبير اللذي لايندمل.. بطعنة منصور لها..

اكثر من انهار بحقيقة قتلة لغازي.. وخطفه ولد مهره..!!

راحوا يعايدونها بعيالهم..

راحو.. مع مكابرة صبحا وصدها للفكرة..

بس الكل كبر.. والكل عرف الصح والخطأ..

اسامه وباسل.. فرحانين فيهم..

اسامه:عاد سندس بكبرها.. داخله بيتنا.. لابيموت جني..

سندس بنص عيون:تراه بيت امي ياحيوان.. يومه بيت ابوك مادخله.. بسمك ذا امي ولا اطلع..

ضحكت نوير:

بيتي.. حلال.. زلال.. ياجعلكم دوم تجتمعون فيه ولايفرقكم شي..

مهره تتأمل ملامح امها.. وعينها الحزينه:

ماما.. عاد فرحي.. واللي فات مات.. احنا عيال اليوم..

ابتسمت بحزن:

والله فرحانه فيكم.. بس في جروح يايمه غايره.. ومايوصلها الطبيب..

زينه :يوصلها ان شاء الله.. هذا احنا حولك.. خمسه.. مانكفي.. وفوقنا هالاحفاد مايشفعون..

نوير بحنية:يشفعون وزياده ياقليبي...

اسامه يلعب نجود وتضحك له.. :

تنوووكل.. مهير.. عادي اعض..

مهره:عضها.. اذا مافترستك..

باسل:عوذه.. ماتمزح.. وين سيف ماجبتيه؟!

مهره :يبي فارس.. يقول بيقعد مع الرجاجيل..

اسامه:كفوو.. ماعرفنا له..

زينه تقهويهم.. وتصب لامها:

يمه.. ببشرك..

نوير :بشري امي..

ابتسمت:الله عطاني..

نوير بفرحه.. خذتها وضمتها.. وباركت لها:

الله يبارك لك ويتمم لك ياعين امك..

****

مشاري.. يلبس ياسمين الدبله ويبوس اناملها:

متأكد..

ياسمين تضحك:

ماتجي تقول استعجلنا..

مشاري :يابنتي اكثر من هالتأني.. احبك.. والله احبك..

****

شاهين حاط قبعة الطيار.. على فهد..

وجمان تضحك.. وتصوره..:صاير يخرفن..

شاهين شايله:

الايطالي.. اللي انفجعنا فيه..

جمان :وانت ماتنسى..

شاهين :ولاراح انسى..

وانطلقت ضحكه صافيه منها..!

وشاهين يطالعها بنص عين..!

****

سما دخلت مجال الصحافه.. حتى الادمان... غرقت في العمل..

تتواصل مع سيف بالسناب..

واذا كانوا بلندن.. بالاجازات تلتقي فيه...

حست بكتفاء وقناعه..

سيف عند مهره.. افضل وصحته ونفسيته اجمل..!

تركته عشانه..!

*****

اصبح عمر نجود سنتان..

الآن الاجازة.. الفاصله.. لدخول فارس الجامعه..

ودخول سيف الابتدائي بعد ماخلص الروضه..!

وانا وعائلتي.. الجميله.. جينا لسياحة في فرنسا..

قبل ان نستقر باقي الاجازه.. في لندن بحكم عمل سيف.. لنعود بداية الفصل الدراسي للرياض..

في مدينة آنسي الساحره..

وعند نهر لو تيو..جالسين للغداء..

اراقب فارس ونجود النتفه.. حايسته.. وغيرانه..

ليش يشتري لسيف آيسكريم..

طبعاً الشبر هذي..

تبي تستولي على فارس الحالها.. وتغار عليه حتى مني..

يعني صدق.. احذروا من كل ماقترب من الأرض..

سيف ياكل الايسكريم وماعليه منها :

عندك واحد شتبين يالساحره..

ضحك فارس واللتفت على مهره وابوه:

ماكنه سرق لقب نوف..

ضحك سيف ويجنن مهره:

لاتشلع قلبي على الطاري..

مهره اللي كانت تتصفح بروشور سياحي.. بنص عيون:

ودك فيها.. توه القطار مابعد فات.. اترك ثلاثتي لي..وروح..

ضحك وحوطها بذراعه:

انتي قبل ثلاثك..ارفس النعمه.. اطيح في النار..

تهامسوا بغزل..

ومهره خرفنها على طول..

فارس يلتقط لهم صور..

شال نجود وحطها على الحاجز جنب اصايص الورد..

وهي تاكل الايسكريم..

سرق من عيونها بوسات..

نجود..

العصفوره الصغيره.. اللتي تكبر في قلبي.. اختي.. بعد ان كان ذاك مستحيل..

نجود :فالس.. بيبي..

ابتسم:حبيبي..؟!

بدلع:ابي كليم.. شوكلت..

فارس :ماترضى ماما.. توسخين فستانك.. كلتي ابيض خلاص..

بامتعاض :سيف عنده شوكلت..

ضحك:سيف كبير مايوسخ نفسه..

ونزلها على الارض..

وسيف منسجم ياكل الايسكريم :سيف ابي..

مدا لها.. :اخذيه يادلوعة..

خذته..

فارس :ابشركم سيف.. آثر جودي على نفسه..

مهره:والله من زينه ايثار.. بتخبص فستانها حرام فاتح..

سيف:خليها.. نرجع الفندق نبدل ونطلع..

ببتسامه حلوه ناداها:عين ابوها..!؟!!!.

نجود ارفعت راسها:عووونك.. (ياعونك)..

سيف:تعالي.. ابي حنان..

رجعت الايسكريم لسيف..

وراحت تركض.. له..

سيف :وقفي وقفي..

ومسح فمها وخشمها وشالها.. وضمها بحنان الكون..

وهمس لها :احبك يـ(الثنتين) ..

وكان كل يقولها..

جودي الصغيره نسخه مصغره من مهره.. باسم حبه الاولي نجود..

اصطفت الاطباق.. ومهره نادت فارس وسيف.. :

يلا ابوي.. تعالو تغدوا.. قدكم ميتين جوع..

جاء فارس.. وعطى القرسون الجوال.. وطلب منه يصورهم صوره عائلية.. على الطاوله..

والتقطت الصوره..

لم يتفقوا على الابتسام.. لكن جميعهم.. ابتسموا..

هناك ايام صعبه.. ومره..

لكن النضال والكفاح فيها يعني أمل..

للحياة عثرات.. والنهوض.. لايأتي الا من سقوط..!!

على نهر لوتيو.. ضمها بذراعه.. وقربها اكثر..

وتأملوا المياه الصافيه..اللتي لاتعكر..

ربي حياه صافيه لايشوبها شائبة..

بغيتك نصفي آلثآني

ولقيتك كلي آلبآقي

...

تمت بحمدالله