في بيت ابو زيد

عند حسين اللي دخل المقلط وهو ينزل فراشه بضيق وشاف مطلق اللي ساكن لف له وهو محتار يعلمه الحين ولا يسكت ويخاف ان مطلق يسوي سالفه في ذا لليل

مطلق: وش بلاك تناظر كذا ؟! وش عندك وش مسوي!

حسين جلس قدامه: ليه من اليوم ماجيت البيت

مطلق: ابي امشي برتاح شوي تطلبوني شي !؟

حسين: علامك معصب انت بعد اسالك انا عادي

مطلق ضاق: يا حسين ما قصدي اعصب عليك بس اني ضايق شوي

حسين : كلنا ضايقين

مطلق: ليه وش فيكم

حسين تردد بس قال بقهر: محسن الله لا يوفقه

مطلق بعدم اهتمام: ماعليكم منه بجيب لكم كلكم جوالات واذا فيه خير يفتح فمه

حسين : مب سالفة الجوالات

مطلق: وش صار بعد !؟

حسين شرح كل السالفه وانهبل مطلق : الله يكسر يدينه الكلب وينه والله للعن خيره هو والسلقه اللي معه

حسين: ابوي اصلا طرده هو وياها وطلع من زمان تكفى لا تكبرها دام ابوي طرده خله يولي

مطلق: سلمى فيها شي

حسين: مدري من الصبح فالغرفه ما طلعت بس اتوقع انه موجعها

وقف مطلق وهو معصب: الله يوجعه الللله يوجعه

طلع متجهه لغرفة البنات بعد ماكان الحال هادي فالبيت دق ودخل وهو يشوفهم كلهم عند فراش سلمى اللي سحبت كمها على يدها بعد ماكانت ريوف تناظر يدها اللي معلم فيها العقال

سحب مطلق يدها بغضب: وش بلاها يدتس

سلمى اللي كان وجهها احمر اصلا: مابها شي

رفع مطلق كمها وانهبل : عساه يده الكسر انتم ورا ماعلمتوني هااااه ورا ماعلمتوني

ريوف : ابوي سوا اللي سواه خلاص

مطلق: وش اللي خلاه يسوي كذا

سلمى بكت: والله ماسويت شي حتى يوم اصايل غلطت طنشتها عشان امي كانتت خلقه معصبه

مطلق اللي عصب زياده ويوم شافها تبكي : امسحي دموعتس يخسي محسن وسلقته يبكونتس والله والله لاوريتس فيه بس انتظري لين بكره ويشوف شغله اللي مايستحي امسحي دموعتس

سلمى مسحت دموعها وهي مقهوره انها ما كفخت اصايل

جلس مطلق وهو معصب وبالقوه هدى بعد ما هدت سلمى وطلع وهو يدري لو يموت مايجيه النوم

.................••............

في الخبر

في شقة العيال كان المفروض الكل نايم بس ابد مستحيل مع بكى عزيز اللي مايدرون وش علته وصحى دحوم وبكى معه وانحاست الشقه بالبكى

هايف اخذ عزيز من متعب وهو يهزه ويقرا عليه بس ابد مافيه فايده

مشاري: نوديه المستشفى

سعود: اوديه يحوسون فيه شوي يقولون مافيه شي

متعب : اصبر طيب يمكن جوعان ولا بردان

مقبل : ماعليه حراره !

هايف : دقيقه دقيقه بتصل في امي يمكن تعرف شي

سعود : ايه تكفى

متعب : بشويش لا تروعها

هايف : طيب

دق هايف على مطلق اللي مانام اصلا : هاايف علامك وش فيك تدق ذا الحزه

هايف: مطلق اسمع مامعي وقت قوم امي وخلها تكلمني

مطلق : وشو انهبلت تبي تجلطها انت ؟! وش تبي فيها

هايف: يوه يا مطلق عزيز يصيح ماندري وش فيه وبسألها اخلص

مطلق: لو اقومها انا ابوي بيقوم بعد ويسوي سالفه

هايف: مطلق فجاءه صرت ماتفهم ارسل سلمى ولا ريوف

مطلق : طيب انتظر ... راح مطلق يصحي ريوف اللي خافت: وش فيه هايف

مطلق : مافيه شي يبي امي بشغله اخلصي

راحت تنادي امها اللي صحت مفجوعه: يمه ولدي وش فيه علامه يتصل ذا الحزه هاته هاته

هايف : امي امي حبيبتي بسم لله عليتس والله اني بخير وطيب ولا فيني شي بس بسألتس عن شغله

ام زيد: بسم للله عليك وش فيك وش تسأل عنه

هايف: سمي بالله واسمعيني وبعدين اشرح لتس السالفه الحين .. عندنا بزر صغير رضيع يبكي ماندري وش بلاه مايبي حليب ولا هو بردان وش نسوي

ام زيد: من ذا البزر

هايف: علميني الحين !

ام زيد: يمكن فيه مغص يا امي

هايف: كيف اعرف

ام زيد: اسمع نوم الولد على بطنه على رجلك بس انتبه لا تكتمه ولا توجعه بشويش

هايف : دقيقه

عطى متعب الجوال : افتح بيسكر

وجلس هايف وهو ينوم عزيز على رجله : طيب يمه خلاص

ام زيد: امسح على ظهره بشويش وانت تخبط بشويش لا توجعه اعرفك دفش ولحفه زين

هايف: الله يسامحتس بس ابشري

ام زيد: عندكم بابونج

هايف : مدري وللله

سعود ركض لمقبل اللي نام على كنبه : مقبل عندنا بابونج

مقبل : وشو ذا معرفه

سعود : يوووه ، خلاص بنشتريه

هايف: امي وش نزين به طيب

ام زيد: حط منه شوي في الرضعه ومويه حاره وخله لين يصيرر دافي وعطوه

هايف: خلاص ابشري يلا مع السلامه

ام زيد: دق علي اذا ما سكت

هايف: ابشري خلاص انتي نامي نامي

ام زيد :اقراء عليه كود انكم مروعينه

هايف: يمه احد مسلطتس علينا

ضحكت ام زيد: يلا يلا

سعود : انا بروح بروح ادور بابونج

متعب : اجلس انت انا بروح لسوبر اللي هنا فيه عطار بشوف

راح متعب وبدا عزيز يهدي من البكى وهايف مستمر يهزه بشويش ويقرا عليه

وليد : انا باخذ دحوم جوا ينام

سعود : ايه تكفى

بعد شوي رجع متعب وراح يسوي اللي قالته ام زيد

ورجع جلس وشوي عزيز نام

سعود : وش نسوي اخاف نحركه ويصحى

مشاري: لا تكفون لاتحركونه

هايف: اخاف اغفى ويطيح

مقبل: وش نزين طيب نحط تحتكم مخده

وليد: ليتك ساكت

مقبل : اسكت انت

مشاري: اسكت انت وياااه ازعجتونا مب وقتكم

هايف: اصصص واسمعوا شيلوني انا وياه ونزلوني

الكل: هاااااه

مشاري : حسيبك الله نشيلك كيف بالله ومع بزر ؟انت يبي لك شيول تشيلك

هايف: اذا قمت وحطيت البزر وجيتك اعلمك كيف اصير شيول

سعود: يا عيال خلاص نشيله وش نسوي

هايف: يلا يلا ربع تعاونو ما ذلو

وليد: تعانوا على البر والتقوى ولا تعاونوا على الاثم والعدوان

مقبل: وش دخل ياخي !؟ ولا ودك تشارك بس

مشاري : اكبر اثم نشيلك

نزلوا بشويش لكن رجع يصيح عزيز ومن هنا ومن هنا لين رجع يسكت وهايف يهزه وسعود يسمي عليه

اما العيال كانت مشاركتهم وجدانيه ومقبل اللي منسدح ومتعب نايم على بطنه ومشاري على رجول متعب ومن بعده وليد

اما هايف اللي مال على كنبه ونام بعد وسعود منسدح على رجل هايف الثانيه وماصدقوا عزيز يهجد وناموا بتعب

................••............

في بيت ابو نجد

الصبح في غرفه تسللت لها اشعه الشمس اللي اشرقت على وجه نجد اللي ما عرفت تنام ابد وهي تناظر ورقة هايف اللي تأسرها معاني كلماته حروفه وخطه اللي دقيق في كل شي وحنون حتى على حروفه ابتسمت وهي تذكر مواقف هايف اللي نستها اياها الايام

ضحكت بدمعه فجاءتها وهي تذكر هايف اللي دايما يجون عندهم معقوله انه يحبها من هذاك الوقت

وقفت وهي تتجهه لصاله انسدحت ودها لو يتصل وترد وتأكد كل المشاعر

.................••............

في بيت ابو زيد

الصبح طلع على مطلق اللي كان من بعد الثلث الاخير من الليل وهو ما طوى سجادته كان جالس وهو بين استخاره ودعاء الين ما اتسعت الدنيا بنور الشمس واتسع معاها صدر مطلق اللي كأنه انمسح على قلبه ووقف وهو يجمع سجادته بعد ما اخذ قراره واتجهه للبيت واول ما فاحت ريحة الفطور

دخل وهو يشوف ابوه كالعاده ببيت الشعر اللي مبني بطرف الحوش وريحة النار في كل المكان وحسين جالس على طرف النار وهو يسوي القهوه لابوه

مطلق : سلام عليكم

الكل : وعليكم السلام

جات ام زيد معاها خبز المله: هلا امي جيت بوقتك

مطلق: تسلم يدتس يالغاليه

ام زيد: الله يسلمك

جات ريوف وجات سلمى وعطاها ابو زيد نظره

لكن تدخل مطلق : يبه سلمى ترا مالها دخل ومحسن ذا اذا ماحشم نفسه قسم بالله لا ادفنه حي

ابو زيد: اشوف كنه ما عاد لي حشمه كل واحد بيدفن الثاني

مطلق: انت تشوف محسن وتصرفاته

ابو زيد: خلصنا محسن وتصرفنا معه وانت خلك بنفسك وانتي امشي انثبري ان شاء الله اسمع انتس مسويتن شي

سلمى: ابشر

جلسوا بصمت وبعد الفطور افترقوا لاشغالهم ومطلق اللي يمشي مع ابوه للمحل لف وقال: يبه

ابو زيد: هاه

مطلق : انا البارح استخرت وفكرت وقررت

ابو زيد: قل وش عندك

مطلق: انا موافق على بنت عمي

ابو زيد لف ببتسامه: بارك الله فيك وانا ابوك هذا الكلام العدل والرجال مايخلي قلبه يمشيه ولا ترا تاليتك مثل محسن

مطلق : الله يكتب اللي فيه الخير

ابو زيد: اذا جاء عمك بنخطب منه

مطلق: زين

.................••............

في الخبر

عند الشباب اللي كانوا مرميين بتعب بعد ليله مرهقه فزوا على صوت جوال هايف وركض مشاري يسكر اذان عزيز عشان ما يصحى وسعود حط يده على عزيز ومتعب ومقبل صحوا وهم مفتحين عيونهم بقوه وهي حمرا خوفاً من ان عزيز يصحى ويبكي وهايف اخذ الجوال بسرعه: الو

ام زيد: سلام امي

هايف: هلابتس يمه

ام زيد: نايم

هايف: اي والله تعبانين من عقب امس ونايمين

ام زيد:وش سوى الولد

هايف: لا يمه ارتاح ونام اشوى

ام زيد: اجل زين ناموا واذا صحيت علمني

هايف: ابشري

سكرت وقال مقبل: يرحم امكم صمتوا الجوالات لا يصحى

هايف: مشاري وش بلاك مسكر اذانه

مشاري :عروق مخي اللتهبت من الصياح مابيه يصحى ويصيح

سعود : انتم بتصحونه بأصواتكم خلاص ناموا

متعب اللي اصلا نام من زمان والباقين رجعوا ينامون بعد

ولكن ما طولت نومتهم وصحى متعب بإنزعاج على صوت الباب وهو يركض يفتحه قبل يصحى عزيز فتحه وهو عين مفتوحه وعين مسكره: عمي ابو فرج

ابو فرج: سلام عليكم نايييميين عسى ما ازعجتكم

متعب وهو يسلم عليه: لا ابد خذ راحتك متى وصلتوا

ابو فرج: وصلنا امس باليل وارتحنا واليوم خالتك ام فرج قررت تطبخ الغداء وتعزمكم عليه ولا تعييون بتحضرون ان شاء الله

متعب : ابشر وكيفها خالتي ام فرج

ابو فرج: بخير حمدلله رجعنا من الديره وغيرت جو ومبسوطه

متعب:الله يديمها

ابو فرج: امين ، يلا ننتظركم على الغداء وناخذ اخباركم هناك

متعب: ابشر

راح ابو فرج ومتعب من التعب وده يبكي ناظر ساعته وكان باقي على صلاة الظهر نص ساعه راح لصاله وهو يسحب فالعيال ويصحي فيهم وبالقوه صحوا

وليد: ياخي شفيك انت مصحينا وش تبي باقي ما اذن

متعب: ابو فرج رجع ومسوي غدا ويعزم ويقول الكل يجي بدون حرف واحد

مشاري : متى جو ما شفناهم

متعب: امس بالليل

مقبل: الله يعني بنحصل اكل رهييب وبتطبخ ام فرج

وليد: انت بس همك بطنك ياخي خفف شوي

مقبل: مب شغلك

سعود: والله بتنقذني انا ام فرج ضعت يوم راحت لديرتهم

متعب: صدقت اي الله

قاموا يلبسون ويستعدون وهايف يادوب يستوعب وجاء وهو ثوبه في يده : تعالوا صدق: من ذا ابو فرج!؟

سعود: هذا طال عمرك صاحب ذا الدور اللي حنا مستاجرينه وهو ساكن هنا فالفله اللي قبالنا

مقبل : تقدر تقول ابونا وام فرج امنا

متعب: ابو فرج ماعنده عيال متزوج هو وام فرج من سنين لكن ماعطاهم الله عيال

هايف: وفرج منهو!؟

مشاري وهو يشخص : فرج قصته قصه ،هو اصلا ما عنده فرج بس الناس مسمينه ابو فرج الله يسعده معروف بأنه مايجيه احد ضايق الا ويساعده ويفرج عنه ولا يجيه مديون الا يسدد عنه والمحتاج يقضي حاجته والحاره هنا كللللللها ما تعرف احد كريم كثره ودايماً بيته مفتوح للكبير ولصغير وسموه ابو فرج لانه يفرج بأذن الله مشاكل ناس واجد

وليد: واذا تسأل عن ام فرج هي بعد ما تقصر مثله اللي بيدها مب لها تعطي ذا وتعطي ذا وتطبخ وترسل على الناس يعني اذا راحوا لديرتهم الحاره كلها تكتئب

متعب : وعاد علاقتنا حنا فيهم غييير ،من اليوم اللي استاجرت فيه ذا الدور وهم ماتركوني ابد من يوم انا بلحالي غدا ولا عشاء ولا فطور ينادوني عليه ويوم جاء مقبل نفس الكلام ووليد ومشاري وسعود كلنا والحين انت معنا ويعدونا عيالهم وام فرج تعتبر نفسها امنا تجي وتجلس معنا وتسولف وابد بتحبها حتى انت

سعود : الا بتحبها اكيد وتستانس معها خصوصا انها من القديمين اللي سوالفهم مثل سوالفكم ولهجتهم بعد

هايف: اوووه قولو لي كذا وانا استانس

مشاري ببتسامه لهايف: لا اصبر باقي شي بيعجبك

هايف : وشو !؟

مشاري : لو تعرف قصتهم بس يوجعك قلبك بس اصبر هو يقولها لك بنفسك هو يحب يقولها لناس

هايف: اوه شوقتني يا شيخ

متعب:يلا يلا بنصلي فالمسجد ونروح

سعود : يلا وانا بصلي وبطلع قبلكم

طلعوا كلهم للمسجد ماعدا سعود اللي مايقدر عشان عياله ................••............

في الديره

عند محسن اللي كان مستاجر غرفه وجالس بضيق وخصوصا انه يدري ان ماعنده شي يصرف منه واللي بجيبه قليل وابوه زعلان واصايل متذمره

اصايل: يووووه لين متى وحنا كذا ليين متى طلعني من هالزريبه ودور لنا بيت زي الناس

محسن: يا اصايل انا من وين لي

اصايل: يا سلام ابوك اكبر تجار الديره في البشوت والسيوف وانت ماعندك اجل من عنده ولا اخذها حبيب قلبه مطلق ووهايف اللي يسعسع في الدمام ولا زيد اللي متحضن الفلوس على قلبه

محسن: وش اسوي انا هاه وش اسوي

اصايل : رووح له قله ابي حقي يصرف عليك مثلك مثل اخوانك

محسن: الله يهديتس بس وش حقي كله حلال ابوي

اصايل: انت بتذبحني اقولك ابوك اشترى سياره لهايف ومطلق كل شي في يده يبيع ويشتري بكيفه وحسينوه ابد اللي يبي ما عليه الا يمد يده وكل شي تم هذا غير خواتك اللي يسحبون وهدايا تركي رجل شريفه حتى زيد اللي متوظف كل اسبوع يعطيه وانت ابد خلك اخرهم وش تفرق عنهم هاه وش تفرق الا كلهم يكرهونك ولا يبونك وبكره لو يموت ابوك كل شي بيكوشون عليه ويطردونك

محسن: يووووه استغفري ربتس يا اصايل تبيني اطالب ابوي واورثه وهو حي

اصايل: يا محسن خلك ذيب وان لم تكن ذيب بتاكلك الذيابه

محسن سكت وهو بدا يدخل في صدره شك في اخوانه وابوه

.................••............

في السوق

عند مطلق اللي كان جالس في المحل وهو كعادته يقلب في مسبحته وساج فلاح دخل : سلام مطلق

مطلق : هلا هلا فلاح

وقف يسلم عليه : وين ايامكم ياخي ولا يوم راح هايف معاد تجون لسمره !

مطلق: والله يا فلاح اشغال ذا الايام وامورنا متلخبطه لكن بنجيك قريب

فلاح : الله يحيكم ويستر على هايف اشهد بالله اشتقنا له

مطلق: والله انه هو بعد اشتاق لكم وبيجي وبنسمر ونستانس

فلاح: الله يوفقه هو بس مبسوط هذا هو المهم

قطع عليهم ابو صيته اللي يعرج: سلاام يا ولد

مطلق لف يناظره: هلا ابو صيته

ابو صيته: وينه ابوك !

مطلق: عند ابو تركي

ابو صيته : اييه ! اقول يازين محلكم يوم راح اخوك البغيض

ابو صيته مايداني هايف وهايف ما يدانيه

مطلق: للله يستر عليه ودامك ماتحبه احشم اللي يحبونه والله يستر عليك

ابو صيته: وانت بعد مخنز مثله

مطلق : الله يستر عليك

راح ابو صيته ولف فلاح يضحك: كل ما اشوف ابو صيته وعرجته اتذكر هايف الخبل

مطلق ضحك: الله يسامح هايف من ذنبه بس

فلاح: تراه ما قصد انه يكسرها كسر قوي بغاها فك بس حظ الشايب

مطلق اللي ضحك وهو يتذكر الموقف اللي ماينسى

(وقبل سنين وهايف اللي متعقد من ابو صيته الا مايسوي شي هايف الا يعلم ابوه ويزود عليه وينطق هايف كل يوم بسبته

وفي يوم من الايام شاف ابو صيته هايف وهو يهج من المدرسه بعد ما طلع من هوشه مدميه وجلس يهدده الا يعلم ابوه وطبعا لازم بهارات ابو صيته اللي تكبر الموضوع فوق ماهو كبير

وجلس يفكر وش يسوي به وش يسوي عشان ينسى ابو صيته وشافه جاي لبيتهم بغضب وركض هايف وهو يكب الزيت على باب المجلس ومسحه بشويش بحيث انه ما ينتبه له وبعده بمسافه حط مويه وصابون وخففه عشان مايشوفه وتخبى ومن حظ ابو صيته اللي جاي بشره ويزحللق ويطيح وويجي بيقوم ويطيح للمره الثانيه من الصابون وهو خلقه رجوله ضعيفه ومريض

ويجلس يصيح بالمجلس وطلع مطلق يركض على الصوت وهايف طلع بس زحلق وطاح بعد على رجل ابو صيته واتم الكسر ويسحبه مطلق ويطلعه ويركض ياخذ السياره وزيد طلع ومحسن اما هايف بعد ما راحوا ركض وهو ينظف المكان عشان محد يلقى الجريمه والدنيا تجمعت على صراخ ابو صيته )

والحاصل ان ابو صيته انكسرت رجله كسر مضاعف ومن بعدها يالله تجبرت بس ماعاد يمشي عليها زين صار يعرج

................••............

في الخبر

عند هايف اللي كان واقف مع العيال عند باب ابو فرج ويتنظرونه يفتح وهم يسمعون الترحيب الحار من ورا الباب وفتح ابو فرج وهو يسلم عليهم ولكن اتسعت عيون هايف بضحك: عمي نااصر

ابو فرج : ا ا هااايف يالله انك تحيي الغالي ولد الغالي

الكل استغربوا يناظرون ابو فرج اللي حضن هايف بحب

هايف : ويين ايامك يا عمي لا عاد تجي ولا عاد نشوفك

ابو فرج: والله انكم على البال لكن ضاع مني رقم ابوك ولاعاد قدرت انزل لديرتكم بلحالي وانا ناسي الطريق بعد ما عدلته الحكومه

متعب: تعرفون بعض

هايف: كيف ما اعرف يمين الخير

ابو فرج: الله انه يسعدك ويحيك ادخل ادخل

سعود: اووه الحين بيروح الدلع منا

ضحك ابو فرج: ادخلوا ادخلوا

دخلوا وهم يضحكون

مشاري: وشلون تعرفون بعض يا عمي

ابو فرج: انا اعرف ابو هايف رجال كفو كان رفيق لي ايام زمان وتقطعت بنا الطرق زمان ولا عاد مريت ولا عاد شفته

هايف: الله يعلم ان ابوي دايم يذكرك بالخير ويدورك

ابو فرج: والله اني مثله وكل ما رحت لاحد يعرف ديرتكم سألته بس محد يدلني

هايف: اجل وصصلت عند اقرب دليل

ابو فرج: عز الله عز الله، طمني انت كيف ابوك وكيف اخوانك الديره كلها كيفها

هايف: حمدلله على ما تحب وكل شي يسرك

ابو فرج بضيق: علمني عن ابو نجد للحين متهاوش مع ابوك للحين ما تصافوا

العيال كلهم استغربوا وناظروا هايف اللي بان ضيقه على وجهه : لا والله الا زادت الطين بله

ابو فرج: لا حووول الله لايسامح اللي كان السبب

هايف: الله لا يسامحه

ابو فرج: وش اللي زاد المشاكل اراضي بعد

هايف ضحك وهو يأشر على كتفه: ابد صابني ابو نجد في كتفي وقبت الدنيا

ابو فرج: لا لا تقول متى هالكلام

هايف بحزن: هذا اللي صار قبل اسبوعين ولا ثلاث

سعود: في ذمتك جيتنا متصاوب

هايف ابتسم: اييه

وليد: وش ذا الاكشن ولا درينا عنك

ابو فرج: هذا ان دل دل انكم مهبل ما ينترك عندكم شي

مقبل : اييييه بدييينا بالسحبات والهواش

ابو فرج : هههههههههههههههههههههههه وانا صادق جايكم وجرحه طري ولا دريتوا به

متعب: والله مادرينا

هايف: الحق علي انا ماعلمت بس حمدلله تشافى جرحي وطيب

ابو فرج: وابو نجد وراه يصوبك لايكون للحين تكتب على الجدران

هايف ضحك باحراج وهو متفشل لان ابو فرج قد شافه يكتب على الجدار لنجد : لا صابني في عرس بالغلط

متعب : وش سالفة الجدران شكلك ماضيك مولع

هايف: خلنا مني الحين الايام كثيره وبحكي

وبعد اسئله وسوالف كثيره بين هايف وابو فرج قال مشاري: ابو فرج انا طالبك تعلم هايف قصتك مع ام فرج اذا مايعرفها

هايف: لا والله معرفها

سعود: انت مانكم من ديره وحده!

ابو فرج: لا انا ديرتي بعيد شوي بس المعرفه والشغل قربتنا

هايف: اجل علمني !

ابو فرج ضحك: بعلمك والظاهر ان القدر متشابهه وعشان تعرف ليش اذا شفتك عند بيت ابو نجد ماهاوشك ولا اعلم عليك

وليد: لاا ابو نجد ذا شكل سالفته سالفه

مشاري ابتسم وهو يشوف هايف اللي انحرج : عاد قصة ابو فرج وحبه عظيمه ما ينمل منها

هايف : اسلم يا عمي

ابو فرج: هذا الله يسلمك قبل زمان ايام ماكنا بدو رحاله كل شوي لنا ديرتن غير عن الاولى في ذاك السنه شدينا رحالنا ونزلنا لديرتن جنبنا ويرسلني ابوي لبيت مبني جنبنا ادور عندهم ماء والله واروح وانادي وماطلع لي رجال بس طلعت لي وحدة شلعت قلبي الماء ثلاث حروف عجزت انطقها وتسإلني وش ابي واضيع وانسى ويجي ابوها وانا مانيب في عقلي ويسالني وانسى ويطردني يحسبني اللعب

وارجع لابوي ويسالني واضيع والله و يهاوشني ويرجعني عليهم ويالله طلعت الكلمه وتعطيني الماء وارجع وكل ما قالوا خلص نقزت قلت اجيبه واروح وكل شوي مرتز عند بيتهم ابي ماء وتعطيني واخر شي علموني وين المورد الماء ولا عاد رحت لهم واجلس اراقبها ومن بعيد وقلبي منشلع واذا جاء احد عندها مت من الغيره ما ودي احدن يكلمها وهي قشرا ما تخليني احكي معها واصحى هذاك اليوم واناظر جهتهم الا بيتهم مب فيه وانا افز واروح لابوي وقالي شدو رحالهم وراحوا مايدري وين بيروحون وانا انهبل وانا اطيح وحالتي حاله ويكووني ويعالجوني وابد ماعاد انا على الدنيا ويالله صحيت وادور واسال قالوا ماندري عنهم ابد ويعيي ابوي إنا نغير الديره واعجبته وبيجلس وانا مابي اجلس ابد ابي اطلع وابوي معيي ونجلس سنين وكل ما مرنا احد اسال ولا احد يدري والله و ارفض الزواج واجلس انتظرهم يجوون ولا حنا نشد ندورهم ولكن مات ابوي وبعد كم شهر اخذت امي واخواني وشديت وانا امشي وادور بين الناس وبعد سنين لقيتهم ويوم لقيتهم بغيت اموت واروح اخطبها من ابوها ويعيي وكل شوي اروح ويرفض وانا بس اشوفها من بعيد والله يجي يوم وانا احصلها لحالها واعلمها قلت يا بنت الحلال تراني احبتس وابيتس وابي اتزوجتس بس ابوتس رافض

وتعطيني كلمتها اللي صح مشهوره بس وقعت بقلبي ( اللي نبي عيا البخت لا يجيبه ، لي سنين انتظرك ويوم جيت عيا البخت )

وهي قالته وانا انهبل قلت ابد دامها بعد تبيني ولا ماتروح لغيري

وجلست معهم اذا ششدو شديت واذا نزلوا نزلت وواخطبها من ابوها 20 مره

هايف: 20 مره ياعم ما مليت

ابو فرج: اجل انت مليت يا هايف !

هايف: لا والله

ابو فرح ابتسم: وانا ما مليت 20 مره وانا احبها وتحبني وابوها معيي وعطيته اللي عندي كله وعيا ورفض ويوم مات طلبتها من عمها وزوجني بس يوم تزوجنا وانا عمري 42 وهي عمرها38

هايف: وانت تحبها من عمر كم

ابو فرج ضحك وهو يشوف ام فرج جايه: 22 عام وانا احبها قبل لا تزوجها والحين انا عمري الحين 68

مشاري ضحك وهو يصفق لام فرج اللي جايه: شرفت ملكة الحب اللي دام 48 سنه

ام فرج ضحكت : يالله يسامحك يا ناصر

هايف وقف بخجل وقال ابو فرج: تعالي بعرفتس على واحد هنا

ام فرج اللي كانت لابسه شيلتها ومتغطيه غطى العجايز: من ذا !

ابو فرج: تذكرين ابو زيد علمتس عنه

ام فرج: اييه

ابو فرج: هذا ولده وطلع بالصدفه ساكن مع الشباب

ام فرج: الله يحيه اللله يحيه وشلونك يا ولدي

هايف: بخير انتي وشلونتس

ام فرج: يا حليلك انت بعد لهجتك مثلنا

هايف ابتسم: ايه

متعب: مب عشانكم تعرفونه ومثل لهجتكم ماعاد تعطينا وجهه

ام فرج ضحكت : لا معليك ما نسيتكم ابد طابختن لكل واحد الاكله اللي يحبها

مشاري: طمنيني تكفين وقولي مسويه مندي لحم

ام فرج: ابشرك

متعب: والجريش

ام فرج: الجريش لمتعب جهز والايدام لسعود وعياله جهز المندي لمشاري جهز ووليد جهزت له الملوخيه

مقبل : وولد البطه السوداء وش جهز له

وليد: ولد البطه السودا ياكل الخضر واليابس

ام فرج: اذكر الله عليه عاد انت يا مقبل بسم لله عليك ما فيه شي ما تحبه

ابو فرج: ماشاء الله ماشاء الله ، وهايف وش يحب ويتسوى له الحين

مشاري : هذا بعد صفه مع مقبل ياكل كل شي

هايف: حسبي لله عليك

ام فرج : اجل بخليكم شوي وانا عندي حريم وعطني يا سعود عيالك عندي

عطاها سعود اللي اذا جت ام فرج يسنى عياله

مقبل: يا ابو فرج ابشرك ان هايف شاعر بعد يعني بننطرب

ابو فرج: لا لا اجل اليوم نبي نروق معك

هايف: والله انهم يبالغون ولا مانيب شاعر بالحيل

ابو فرج ابتسم وهو يناظر عيوون هايف: ولا انت شاعر نجد بس!

ضحك هايف : تقدر تقول

ابو فرج: اجل بلعب معك لعبه

هايف: ابشر

ابو فرج : بعطيك كلمه وعطني وش تعني لك

مشاري : اللله على الحبيبه اجتمعوا

سعود : نغمه حزينه يا عيال

متعب: يلا يلا اللعبوا

ابو فرج: مستعد

هايف: مستعد

ابو فرج: الليــل!؟

هايف : باب لكل باب

‏ابو فرج : العطر؟!

هايف : مفتاح الحنين !

‏ابو فرج :الجرح ؟!

هايف: ثغره للغياب

ابو فرج :السهر!

هايف: صورة غايبين !‏'

‏ابو فرج :الشعر

هايف : دنيا في دفاتر نجد

‏ابو فرج ضحك : الحــب ؟!

هايف مد يده وهو يشد يد ابو فرج : حب الطيبين اشباهك

ابتسم ابو فرج وهو يشد على يد هايف : ونجد

هايف ابتسم: وطن هايف

كان حريص هايف ان سواء نجد حبيبته او ديرته يبيها كلها تعطي نفس المعنى

ابو فرج ضحك: والله انك دوبلماسي ! بس قلي والغناء وش يعني !

هايف ضحك : يانجد ودي اغني بك على هوني ‏حورية الارض فوق الارض نجدية

ضحكوا كلهم وصفق مشاري : اخيرا اعترفت حيرتنا ووشوقتنا

ابو فرج ضحك : طلعت عيني لين نطقت

متعب : من يوم شفتك عرفت انك هواوي بس ساكت

سعود : للحين مافهمت نجد وش هي ديرتك ولا وشو

هايف هنا انحرج وضغطوا عليه

ابو فرج: نجد قصتها قصه

متعب: عاد يا هايف علمنا القصه !؟

هايف تنحنح وبالقوه شرح القصه وهو كان وده انه يحب نجد بالخفيه بس واضح انه مكشوف من عيونه

مقبل اللي كان متكي جنب ابو فرج: يا ليتني نجد

ضحكوا كلهم وضربه وليد: حسافه ان انت تكون نجد

متعب: اييه قلبي عورني والله

سعود : الله يكون بعونك يا هايف

ابو فرج: ماعليييك كل شي بيتصلح كل شي بيزين

هايف : ان شاء الله

ابو فرج: قم يا مشاري شغل لنا شي نستانس عليه

مشاري ضحك: طبعا اللي ما تعرفه ياهايف ان ابو فرج محب قوي لسامري وخبيتي دامك عنده لاااازم انك تعلم سامري وترقص بعد مب بس تناظر

هايف: عاد انا ما اعرف

سعود: يعلمك كلنا كنا مانعرف وتعلمنا

ابو فرج : اعلمك اعلمك قم يلا صفوا يلا

مشاري اللي كان لعبته الاغاني وقال: تعاطفاً مع احوال الهواويه اهديكم هالاغنيه

(ياللي ترد الخبر .. طوّل غيابك على عين ٍ جفاها المنام

طاغٍ علي السهر .. بين الجفن والجفن ما مر يومٍ سلام)

هايف كان مستانس مع ابو فرج اللي يعلمه وهو يردد مع الاغنيه ويضحك

سعود :دقيقه فيه وحده تصلح على هايف دقيقه

ابو فرج: يلا اليوم برعاية هايف

هايف: لا تضغطوني عاد

سعود رفع الصوت وهو يغني وغنوا معه كلهم بضحك

(ياهل الشرق مروا بي على القيصريّه=عضدوا لى و تلقون الاجر والثوابي.

انحروا بي دكتور العشاق يكشف عليّه=كود يمسح على جرحي ويبري صوابي..) انتشر الضحك والرقص وسعة الصدر في بيت ابو فرج.

................••............

الحال في بيت ابو زيد

اللي كانوا على الغداء دخل محسن بغضب: وين ابوي

مطلق وقف وهو خلاص يبي اي احد يفرغ فيه ضيقه : انت خير وراك تصارخ

محسن : يبه .. ابي بيت وابي سياره ..انا ماني اقل من الباقين

ابو زيد اللي جالس وهو يناظر فيه: هذا شكل تدخل فيه على ابوك

محسن: وش فيني فرق عن باقي عيالك انا ابي حقي من كل شي ابي نصيبي من كل شي لي فيه حق عليك

مطلق هنا انهبل: تبي تورث ابوك حي يا قليل الخاتمه

محسن: انت اقطع صوتك

مطلق لا شعوريا هفه كفين بردت قلب كل الحاضرين فيه

مطلق : من انت جاي وتطالب بحق من انت ؟!

ابو زيد: مطلق خللله وانت قم انقلع من بيتي وعيني لا تشوفك ووالله ليدفنوني ماشفت مني ريال انقلع انقلع

محسن: انا ولدك ولدك وانت مجبور تصرف علي

مطلق سحبه وهو يدفه برا : انقلع لا والله لذبحك انقلع

ام زيد: تكفون لا لا هذا مب كلامه مب كلامه محسن يمه اسمع والله ماتنفعك اصايل هذا ابوك كيف تقول كذا كييف

محسن: وخروا عني والله لا اخذ حقي والله

طلع وهو يحلف وابو زيد قام بغضب وهو يرمي الفنجال من قدامه وراح وهو يردد بغضب : حسبي الله ونعم الوكيل حسبي الله ونعم الوكيل

ام زيد اللي جلست تبكي: ليه يا مطلق هذا اخوك

مطلق : يخسي اخوي ما يطمع بورث ابوي وهو حي

طلع مطلق بغضب وحسين واقف بصدمه: انهبل ولدتس يمه انهبل

ريوف: حسبي لله عليتس يا اصايل الزفت حسبي لله عليتس

سلمى: بتذبح ابوي وتذبحنا الله ياخذها

ام زيد: وش اسوي وش اسوي كيف اخذ ولدي منها

سلمى: ولدتس راااح يمه انهبل وقعد انهبل

ريوف جات وهي ترفع امها : خليه يمه بيعرف ذنبه يمه

ام زيد: حشى والله ما اخليه يضيع معها اكثر، حسيين حسييين

حسين: يمه علامتس

ام زيد: امش بنروح لاخوك امش

حسين: يمه وش تبين به يا يمه

ام زيد: هذا ولدي

حسين: معرف بيته يمه معرف وخليه وبكره اذا خلصت فلوسه بتتركه ذا الحيه ويجي

ام زيد قامت ببكى ودخلت غرفتها وافترقوا كلهم بزعل وضيق