دخل ثنيان وهو راجع من شغله عليه بدلة أرامكو السعوديه وطلع مع الدرج على صوت عقاب يناديه بحده

والتفت بإستغراب يشوفه بالصاله وتقدم يناظرهم قاعدين وعقد حاجبينه:هلا

عقاب:من قالك اني مت يوم انك تتصرف على مزاجك ؟

لف ثنيان يناظر ساري ونهار اللي قاعدين ولف لعقاب:عن وش تتكلم؟

تقدم عقاب:رايح لمحامية نهار ؟

لانت ملامحه وناظر عقاب:رايح

عقاب:وليه ؟

ثنيان اخذ نفس:لان عندي محامي افضل لنهار

عقاب:ومن انت تقرر وش الافضل ؟ انا كلمت محامي ومواعد معه تجي تكنسل كل شي ليه ؟ من عطاك الحق تتصرف بدون علمي ؟

ثنيان صد يبلل شفايفه بعصبيه ولف لعقاب اللي ينتظر منه جواب لكنه سكت

عقاب:انطق

ثنيان:لانها لازم تبتعد هالبنت

عقاب رفع حاجبه وكمل ثنيان:وانا ثنيان اخو نهار اقول ما ابيها تساعد نهار بشي

عقاب:وليه ؟ عطني اسبابك ياثنيان يا أخو نهار

ثنيان بلع ريقه ثواني وناظر ابوه:لانها تلعب لعبه انا كاشفها

عقاب:اشرح لي

ثنيان:البنت مخططه عليك وزيها زي بنات حاولوا وهذي وحده منهم ، البنت ماتبي تكسب لقمة عيش من شغلها تبي تجيب راس العميد عقاب بن جراح

لفت نوره على عقاب اللي تقدم بغضب وناظره ثنيان يكمل:ناويه تتزوجك

عقاب:وانا اصغر عيالك تصرف عني مضره ؟ ماتعرف اني عقاب ؟

ثنيان:اعرف لكني ماشفت منك ردة فعل كالعاده

لفوا على عقاب اللي سكت وكمل ثنيان:قلت اساعدك

شد على قبضة يده عقاب ووقفت نوره:صلّ على النبي

بلع ريقه ثنيان وتقدم عقاب له:تدري اني مستحي اضربك وانت هذا عمرك ؟ ، لكن عيب انك تكلمت قدامي وقدام امك واخوانك عن افكارك هذي

رفع سبابتها على جبين ثنيان:وحط ببالك لو انا بيوم قررت وقلت بخطي هالخطوه حط ببالك لا انت ولا اخوانك كلكم تقدرون توقفوني

رفع حاجبه ثنيان ولفت نوره عليه وهز راسه عقاب:بتحضر جلسة نهار عشان تشوف المحامي اللي اخترته انا ومحد يقدر يغير قرار قررته

مشى يخرج من الصاله وناظرهم ثنيان ولفت نوره:وش تقول انت ؟

ثنيان:اقول اللي شفته

نوره:وش شفت ؟ ليه تناشب مع ابوك ؟

ثنيان صد وناظره ساري:وهو صادق ابوي مالك شغل حتى لو ابوي يتسربت ويبي بنات بعمر بنته انت شعليك

لفت نوره:ساري ! كيف تتكلمون عن ابوكم كذا ؟ وش جاكم ؟

ثنيان لف عليه بحده:وش علي ؟ اقولك تلعب على ابوي وهو بهذا العمر طمعانه بمكانته وفلوسه

نهار:لا ياشيخ انا شفت البنت ماهي يمّ ابوي حتى

نوره:ابوك ما يغلط ياساري ولا يزلّ وانا اعرفه من سنين وغير هالبنت كان اشطر لكن ابوك ما يروح بهالدرب ، ابوك ياثنيان زوج نوره ولا يمكن يكون زوج وحده ثانيه

ساري ضحك:انا رجّال واعرف طريق الزلّه عند الرجال ماهي صعبه

لف ثنيان على ساري وضحك نهار:انكتم عشان لا يجيك الرجال اللي بيوريك الصعب والله

سكت ساري ومشى ثنيان يطلع لغرفته ودخل وفصخ ملابسه ورماها بالارض وجلس وهو معصب

عقد حاجبينه بغضب ولف من ناظر جواله يهز واخذه ورد:هلا

جواهر عقدت حاجبينها:وينك ثنيان دقيت عليك مرتين

ثنيان:صامت ما سمعته

جواهر:وصلت البيت ؟

ثنيان:وصلت

جواهر:بتجي اليوم ؟

ثنيان اخذ نفس:ان شاء الله بس متأخر بنام الحين مدري متى اصحى

جواهر:مو مشكله اهلي ماشين للرياض اصلاً بكون لحالي واقدر اجيك

ثنيان:غريبه خلوك

جواهر ضحكت:اقنعتهم اجلس لجالي وقلت ما بطلع مكان بس ترا راشد موجود بالبيت ما خلوني لحالي لحالي بالضبط

ثنيان:راشد ما يرمش

جواهر:ماعليك اكيد يطلع برا وما بيقول لي شي لو خرجت

ثنيان:طيب بنام الحين والله تعبان

جواهر:اوكيه ياحبيبي

قفل جواله وانسدح بتعب

-

قفلت مكتبها ومشت بتفتح سيارتها ولفت من دق بوري وناظرت سيارة عقاب وصدت ثواني ومشت لين فتح شباكه عقاب:اركبي نتكلم

رفعت ساعتها ورجعت ناظرته:خلص وقت دوامي اعذرني ياعميد

عقاب:لو ابي بوقت دوامك جيت بوقته وتعرفيني بالوقت غلّاب العقارب

ملاك:وليه اجي معك ؟

عقاب:بنتكلم

ملاك لفت لسيارتها تقفلها ومشت تركب بجانبه ورفع كفه عقاب وحرك حمدان

جلست بهدوء وبكل ثقه وهي تناظر الطريق

عقاب:جاني خبر عن اللي قاله ولدي

ملاك مارد وكمل عقاب وعينه على الطريق:ما ينلام

لفت له ملاك ورفعت حاجبها ولف عقاب يناظر حدة ملامحها ونظراتها وكمل:اقابل بنات كثير يحومون ورغبتهم يوصلون لربع ريال وربع منصب

ملاك:انا ملاك بنت مساعد ماني من هذول البنات ومستحيل اكون منهم واذا تذكر يا عميد انت طلبتني ما جيتك انا

عقاب:معي علم

ناظرته وكمل عقاب:ولاني اعرف النيّه من نظرة الآدمي عرفت ان نيتك ماهي لعب بنات

صدت ملاك وكمل عقاب:وجيت عشان اعتذر عن اللي حصل واعتبريه سوء فهم وبيتصحح

ملاك:ماهو طموحي الأعذار ياعميد انا اكبر من اني انتظر أسف

عقاب ابتسم:ويكون ، انا بعتذر لك وان شاء الله مقبول

ملاك:عشان ارجع لقضية نهار؟

عقاب هز راسه بالنفي:نهار اي احد يطلعه لكن عشان انا ما اطغى بالناس واتجاهل زلّات عيالي بكبر ، نفس ما احترمتيني وكان بيننا شغل واجب علي استسمح منك عني وعن ولدي

ملاك ماردت تصد وكمل عقاب من وقف حمدان ولفت تناظر المكان

عقاب:خذيها نزهه

ناظرت النادي اللي وقف عنده حمدان كان نادي الضباط اللي مسويه عقاب

نادي ترفيهي عسكري فيه تدريبات عسكريه للعسكر ورمايه وخيول ومسابح كبيره وأجهزه رياضيه مكان ترفيهي مذهل وشيّق وطموح اي احد يدخله من الناس اللي موجوده بالمكان من الرتب العسكريه وابناء العسكر وبناتهم ، عالم فاخر نفس ما شافته ملاك بعيونها وهي تمشي بالمكان مع عقاب

وقف على مدرج يناظر الخيول اللي تتدرب:نهار يحبها

ناظرت الخيول اللي تقفز من الحواجز وكمل عقاب:لكن بعد السالفه منعته بجي عشان ما يطيح بألسنه واسئله

سكتت ملاك تتأمل الناس بالمكان ومشى عقاب ومشت معاه تتجول ونطقت:ممنوع الدخول لأب شخص غير عسكري ؟ جنون عظمة العساكر

ضحك عقاب:ماهو جنون عظمه هذا المكان شريته من سنين وانا امارس شغلي وخليته تدريب لي ولزملاء قطاعي لين صاروا يتجمعون يتدربون ويتسلون وعشان مناصبهم منعت الدخول لأي احد يعني لحفظ الخصوصيه

هزت راسها ملاك وهي تناظر الطاولات والكراسي اللي جالسين عليها رجال وياكلون وتعرفهم تعرف الشيوخ وعيال الشيوخ من اصواتهم وريحة عطورهم وحتى مواضيعهم

لف عقاب يأشر:مكان الصقور

لفت وعقدت حاجبينها من الرمايه وكمل عقاب:ما يصيب أهدافها الا صقر

وابتسمت تناظر البنادق والفرد والرصاص بالمكان:والشاهين ماله مكان هنا ؟

لف عليها عقاب وناظر ابتسامتها وفهمها وميل راسه بذهول:تعرفين؟

ابتسمت تتقدم:يعطوني ؟

عقاب:انا معك كيف ما يعطونك

تقدمت ومشى خلفها لين وقفت بأول محل الرمايه ومد لها العامل فرد واخذته تمليه رصاص بنفسها ووقف بجانبها عقاب:من وين تعلمتي ؟

ملاك:اسألني اذا أصبت الهدف

لف يناظر الهدف ولبست السماعه على اذنها وناظرت الهدف وهدأت انفاسها تركز على هدفها وثواني جابته وابتسم عقاب بدون يبين اسنانه من شاف الهدف ولفت ملاك وابتسمت:صنفني مع الصقور

عقاب ناظر العامل:جب بندقيه

لفت له ملاك وغير الهدف عقاب وهو يتحداها واخذت البندقيه وناظرها عقاب:ثلاث طلقات جيبيها تحت بعض

ملاك ابتسمت:اشتقت للميدان ياعميد ؟

ابتسم عقاب لانه يدربها بدون ما ينتبه ورفعت البندقيه تناظر الهدف وتقدم عقاب يدق ظهرها بإصبعه واعتدلت بوقفتها لانه ينبهها وطلقت اول طلقه ورجعت تدخل الرصاصه الثانيه وتحاول تصيب تحت هدفها الاول وهذي صعوبة تدريب عقاب

اخذت وقتها لين صابت الهدف وضحك عقاب

تنهدت بربكه والتفتت:٤ طلقات ؟

عقاب تكى يناظرها:جربي

رجعت تحاول تطلق وجابت مسافه تحت الهدف بالضبط وابتسمت ورجعت تحط الرابعه وتطلق ولفت له من شاف الطلقات تحت بعض بالضبط وناظرته بتحدي وابتسم عقاب:من وين تعلمتي ؟

ملاك:دخلت العسكريه ٦ شهور

ناظرها بصدمه وكملت ملاك:بس خرجت منها والا كان انا قدامك الحين ملازم أول

عقاب:ليه خرجتي ؟

ملاك:صارت لي ظروف

مشت ومشى بجانبها عقاب وهز راسه:يعني تقولين من كل لّد و لّد اخذتي علم

ابتسمت ملاك:ربتني الدنيا ماني رباة أحد

ابتسم عقاب يناظرها وهز راسه يمشي معها ودخل الغرف الخاصه وفتح مكتبه ودخلت تناظر المكتب اللي جدار من جدرانه زجاج شفاف يطلع على اسطبل الخيول ووقفت قدام الزجاج تناظر الخيول

وجلس على الكرسي الجلدي عقاب:كملي قضية نهار ياملاك

لفت عليه وكمل عقاب:عشان تكسبينها وعشان أكسبك

سكتت تناظره وكمل عقاب:اكسبك محاميه شاطره تنفعيني

صدت تخفي ابتسامتها وكمل عقاب:وأتعابك حدديها عدد وتجيك

ملاك لفت عليه ومشت تجلس قدامه على الكرسي الاخر وبينهم طاولة شطرنج وتقدمت تناظر الطاوله:عشان ينتصر العميد من جديد والكل يقوله سمّ ؟

عقاب:انا ماني على خبر ظنك وظن الناس ، انا ما ازعل واقلب الدنيا ان ردني احد لكن ما تجرأ للحين اللي يردني

ابتسمت تناظر الشطرنج ورفعت الملك وحطته قدام عقاب وابتسم من فهمها ورجعت بظهرها لورا:سمّ ياعميد

نزل راسه عقاب يبتسم ووقفت ملاك:انا استأذن

عقاب:السواق اللي جابك بيوديك مكان ماتبين

ملاك:بدون كلافه ارجع بنفسي

عقاب:حشى

ملاك سكتت وعقاب ناظرها:تعرفين سيارتي

هزت راسها وخرجت تاركته بمكتبه وابتسمت تناظر المكان وكأنها تمشي لحلمها ورغبتها ونهاية مسعاها ، لو تجلس بهذا المكان يومين قدرت تلعب على شيوخ يسددون ديّة منصور بدون ما يدرون حتى لكن طموحها الشيخ العميد اللي واقف عند الزجاج يناظرها

رفعت عيونها لنظراته وهزت راسها له بهدوء وخرجت من النادي

فتح الباب حمدان لها وركبت وابتسمت:عرفتني حمدان ؟

حمدان عقد حاجبينه من نادته:لا

ملاك:بتعرفني قريب

حمدان:فين يروح ؟

ملاك:اطلع الخط وادلك

لفت تناظر السياره وتلمست مقاعدها بإبتسامه واخذت جوالها تصور لشادن وقفلته وابتسمت تناظر الطريق

-

ناظر الساعه وقام وهو يتثاوب وغسل وخرج وهو يطلع له ملابس ويحطها بشنطته الصغيره واخذ جواله يناظر رسالتها وابتسم من دخل وشافها مرسله صوره لها جالسه بالشاليه وتنتظره وقفل جواله ياخذ شنطته ويخرج من غرفته طلع من البيت وركب سيارته وكان بيشغلها لكنه ناظر ابوه اللي يمشي بالحوش ويكلم ، ظل يراقبه وشاف الساعه من سيارته ١٢ نص الليل وشغل سيارته ولف عقاب من سمع صوت السياره وقفل بابه ثنيان وحرك خارج من البيت

حاط ذراعه على الشباك وساهي معقوله ابوه يسويها وتقدر البنت تجيب اللي محد قدر يجيبه ، سمعته وسمعة اهله كلهم بتروح وطي لو ابوه يتزوج وحده بعمر بنته ناظر طريقه فارغ خلفه ودخل لطريق الشاليهات ووقف عند الشاليه اللي شاريه بنفسه وله ومطل على بحر الخبر بحر الشرقيه

نزل واخذ شنطته ومشى يفتح الباب ويدخل

ابتسم من وقفت له وفتح ذراعينه وضحكت تحضنه  ابتسم يشد عليها ويبوس عنقها:اشتقت لك

جواهر:وانا اكثر

ابتعدت عنه وناظر لبسها:تندميني يعني ؟

جواهر:هذا لبسي دايم وانت تعرف

تقدم يجلس وجلست جنبه جواهر لف عليها:وش قلتي لاخوك

جواهر؛قلت بنام عند وحده من صحباتي ما سأل كثير

هز راسه ثنيان وصد وناظرته جواهر:شفيك ؟

ثنيان:توني صاحي ما شبعت نوم بس صحيت عشانك ماودي تحتريني واسحب عليك

ابتسمت جواهر:الحين يزين النوم بحضني

ابتسم ثنيان وبللت شفايفها جواهر:تعرف ان السرّ معاك احلى من العلن ؟ والشوق يخليني اتلهف عليك لهفة العشاق

ثنيان:لو كنتي قريبه مني ما حبيتيني هالقد

ضحكت جواهر وابتسم ثنيان:عشرتي من قريب شينه

جواهر؛لا تقول كذا اعرفك ثنيان وبعدين كم صار لي معاك سنتين من عمري وانا اعرفك واعرفك اكثر من اهلك اللي معك

ثنيان:وتعرفين اني الحين اهوجس بسوالف اهلي ؟

جواهر؛مشاكل جديده ؟

ثنيان اخذ نفس:في وحده تحوم حوالين ابوي

جواهر:وش الجديد ؟ دايم حوالين ابوك حريم

ثنيان لف لها:كُبر أصايل اختي

ناظرته جواهر ثواني؛تعرفها ؟

ثنيان:محامية نهار

جواهر:وكيف عرفت انها تحوم على ابوك؟

ثنيان:اعرف بالنيّات انا ونيّتها ابوي هالبنت

جواهر:عادي بكره ابوك ما يعطيها وجه وتطفش

ثنيان:من قال ابوي مو عاطيها وجه ؟

رفعت حاجبينها جواهر وكمل ثنيان:انا هذا اللي مهبل بي ان ابوي ماهو كعادته هالبنت غير

جواهر:معقوله يسويها ويتزوج ؟

ثنيان لف عليها:على موتي صاحيه انتي ؟ اقسم بالله سمعتنا تصير بالتراب

جواهر:بس هو ما سوا شي غلط تزوج ترا

ثنيان:تزوج وحده كبر بنته وعياله بطوله ؟ تبين تجي وحده كبر أصايل اناديها عمتي ؟

جواهر سكتت وكمل ثنيان:لكن انا اعرف لها

جواهر:لا تدخل نفسك بسواليف ثنيان

ثنيان؛هذي السواليف اهلي

جواهر سكتت ولف ثنيان عنها

-

خرجت من البيت وقهوتها بيدها وتكلم:دعواتك

شادن:الله يقويك مع ان ماعليك خوف

شغلت سيارتها ملاك ورجعت ظهرها لورا:ماعلي خوف الحين علي خوف ان انتهت هالقضيه وش بيصير

شادن:تلاقين لك طريق ثاني

ملاك اخذت نفس بتوتر:تقدرين تجيني بعد ما يخلص دوامي ؟

شادن:ابوي لين الحين مو واثق فيني يدري اني بجيك

ملاك:متى يستوعب ابوك ان منصور ماهو بسببي بالسجن ؟

شادن:يمكن اذا طلعتي منصور

سكتت ملاك وكملت شادن:زرتيه ؟

ملاك:لا

شادن:مابتشوفينه ؟

ملاك:كل ما شفته انهديت وانا ابي لي قوه

شادن تنهدت:الله يطلعه بالسلامه لنا يارب مشتاقه له ملاك بيتنا بدونه ميت

ملاك:انا بدونه ميته ياشادن بدونه ميته

شادن:روحي لشغلك ما بخليك تتأخرين

ملاك سكتت وقفلت شادن وغمضت عيونها ملاك تستجمع نفسها وحركت

وقفت عند المحكمه وعدلت حجابها واخذت شنطتها ونزلت

مشت تاخذ نفس بثقه وخطوتها سريعه ودخلت المبنى تناظر نهايته نهار واقف وعقاب على الكرسي جالس وبجانب نهار اخوانه الاثنين

رفع راسه عقاب لها يناظرها تمشي لهم ولف نهار وابتسم من شافها جايه

لف ثنيان ينتبه لنظرات ابوه ولف لملاك اللي عينها على عقاب وتمشي له وماهي شايفه احد غيره

وقفت قدامه ووقف عقاب يناظرها وابتسمت بدون تظهر اسنانها:جيت ياعميد

عقاب هز راسه لها وهو يناظرها ولفت ملاك لنهار؛جاهز ؟

نهار عدل شماغه:بسم الله

مشت تدخل ودخلوا خلفها وجلست بجانب عقاب تلبس نظارتها الطبيه وتسمع حوارات المحكمه النصوص المصدقّه والتهمه اللي لازم يتبرأ منها نهار عشان سمعته وسمعة اهله نزلت انظارها للأوراق ولف عقاب يناظر جلوسها وظهرها المستند بإعتدال دليل ثقتها ونظراتها اللي ترمقها لكل الموجودين بإنتباه وكأنها فعلاً شاهين نفس ماسمت نفسها

رجع ظهره ثنيان يناظر ابوه اللي منشغل بشي آخر عن المحكمه وشد على قبضة يده من وقفت ملاك

رفع عيونه لها وتكلمت بصوت شبه مرتفع وواضح بدون رجفه بدون ربكه بكل ثقه تتكلم وتعطي مخارج نهار من القضيه وتعريه من الاتهامات ووسط حديثها استطردت وتكلمت عن عقاب اللي يعرفونه الموجودين :وعلى إستطرادي يقولون ما يغلط طير وراعيه قناص

ابتسم عقاب وضحك بسخريه ثنيان ولف نهار يناظر اخوانه

ابتسم القاضي يهز راسه لانه يعرف عقاب وعقاب سمعته معروفه عميد كبير واسمه لامع بشغله

كملت حوارها وسكتت تسمع راي القاضي ونزلت نظارتها من اثبت براءة نهار وشرّفه عن تهمة التحرش وبيّض صفحة كتابه

لفت لعقاب وابتسمت وهز راسه لها كشكر واخذت شنطتها توقف قدامه:اخر مصايبكم يالعميد

عقاب؛ولو أنصاب العميد الشاهين يسدّ عنه

ابتسمت من جاب طاري الشاهين يقصدها ولفت لنهار اللي تكلم :ماقصرتي ملاك

ملاك؛واجبي وشغلي المهم تعرف تحذر المره الجايه وتسلم

نهار هز راسه:والله الكلام ما يوفيك والشكر قليل بحقك

ملاك هزت راسها له لانه يولد حديث بينهم ولفت لعقاب:نتكلم بمكتبي متى ماكنت فاضي

عقاب:ما يحتاج ، نتكلم هنا عن أتعابك قبل يجفّ عرقك

لفت تناظره يرفض جيته لمكتبها ووقفت وناظرها عقاب:بعطيك شيك واكتبي عدد ويجيك

لف ثنيان من سمع ابوه يجيب طاري الفلوس ونزل راسه ينتظر صدق ظنونه وحواره اللي كان بينه وبين ابوه قبل يجون بإنها بتطمع وتطلب مبلغ اكثر من حقها

ملاك:ما يحتاج شيك المبلغ اكيد انه بجيبك ياعميد أتعابي بقضايا نفس قضية نهار عشر الاف

لف نهار على ابوه اللي سكت ورفع راسه ثنيان يناظرها بصدمه وضحك ساري:معد احد يشيل كاش ياطويلة العمر

ابتسمت ملاك لساري:شكل الفقراء بس اللي يتعاملون بالكاش

ضحك ساري وبلل شفايفه ثنيان من لف عليه عقاب يناظره:عطها حقها

ثنيان:مامعي كاش

عقاب رفع يده:حول لها الان من عندك

لف لملاك؛بتجيك بحسابك ، ماقصرتي

ملاك ماردت ومشى عقاب يخرج وخرجوا معه ورفعت انظارها ملاك لثنيان اللي تقدم لها

وفتحت شنطتها تطلع كرتها وتمده له اخذه وعينه بعيونها والتفتت تقفل شنطتها ولفت له

:بالمناسبه ماعرف اسمك

ثنيان سكت ثواني:ثنيان

هزت راسها:صعب تتذكره وسهل تنساه

ابتسمت وخرجت تاركته وخرج ثنيان وركب سيارته يحول لها فلوسها وشغل سيارته يحرك للبيت

وقف بجانب سيارات اخوانه ونزل يشوف ابوه ياخل البيت

طلع يسمع امه:حبيبي حمدلله

نهار:اي والله حمدلله

جلس وجلس عقاب يناظره وكمل نهار:الحين يمديني ارجع لحياتي القديمه ؟

عقاب:هذا اللي ميت عليه ؟ سيارتك ومشاويرك ؟

نهار:والفرس والله من زمان ما طبيت النادي

نوره:خله يروح دام انحلت المشكله واللي يتكلم بشي يحط اصبعه بعيونه الثنتين

لف عقاب لثنيان اللي جلس:عطيتها حقها؟

هز راسه ثنيان وكمل عقاب:طلعها من جيبك عشان تعرف ان ما يتصرف احد من غير شوري

مارد ثنيان ولف عقاب لنهار:روح اذا تبي تروح

نهار ابتسم وتقدم له يبوس راسه وخرج من البيت

ساري:من وين جبت البنت ذي ؟

عقاب:دلوني عليها

ساري:تاكل المحاكم أكل الذيابه

نوره:وش تطلع هي هالبنت ؟ وش ابوها وش اهلها؟

ساري:لا بنت عاديه ماهي بنت عوايل معروفه

هزت راسها نوره ونزل انظاره عقاب بهدوء يسكت

-

نهار ناظر رقمها واتصل وهو يسوق وابتسم

لفت لجوالها وضحكت ترد:تحرشت بوحده ثانيه؟

ضحك نهار:لاوالله لكن ودي

رفعت حاجبها وابتسم نهار:شكر الكلام ما يناسب نهار بغيت اشكرك بطريقه ثانيه

ملاك:انا يناسبني شكر الكلام مابي اكثر

نهار:برجع اتمرن بالنادي حق ابوي نادي الضباط اذا تعرفينه وودي تحضرين تمريني الأول ، أول تمرين بعد ما اكلوا الناس اسمي واسم ابوي واهلي ابي ارجع التمرين قدام اللي بغى طيحتي وابي تكونين موجوده

سكتت من جاب طاري التمرين وكمل نهار:ومنها تشوفين اهلي بيكونون موجودين عشان يسكتون الناس

ملاك:عشان يصدقون كلام اخوك قصدك

ابتسم نهار:ثنيان متأثر باللي حوالين ابوي كل ما شاف انثى جنب ابوي ظن انها نفس النيّه وتبيه وتطمع له

ملاك:النادي ما ينفع لغير العسكر

نهار ابتسم:الضابط نهار اكبر واسطتك تدخلين

ابتسمت ملاك:متى ؟

نهار:الاربعاء العصر

ملاك هزت راسها:اشوف شغلي واكلمك

نهار:ابد موجود بأي وقت

ملاك قفلت وابتسمت تناظر جوالها:النيّه يدق العميد ودق الضابط

ضحكت بسخريه وصدت تناظر سنابات أصايل اللي تصور جمعات وصحبات وحفلات بصخب وبدون ملل

خرجت من سناب تدخل على الصور وناظرت صورة منصور بجوالها رجعت لها أصوات ذكرياتها من جديد ودخلت بدوامة الهوجاس اللي ينتشلها لوقت طويل

تذكر منصور ولد عمها اللي ربا معها من موت اهلها لين قبل ينسجن ، تذكر انه خطبها ونوى يتزوجها لكن الظروف منعتهم وتكلبشت يدينه وانسجن بالوقت اللي كانت تختار فيه فستان زواجها

نزلت انظارها تقفل جوالها وتذكر كيف عمها طردها هي ومنيف من بعد سجن منصور على ظنه انها السبب بسجنه لانها كانت معاه

ظلت ساهيه تذكر وجودها بجانبه وبجانب شادن كيف كانت حياتها أسهل ماعاشت ولا جربت تفقد امها وابوها وحاجتها لهم الا يوم عاشت بمكان مع منيف لوحدهم

ودفن نفسه منيف بين الأجهزه والكودات والشفرات وانغمس في بحر ماله طوق نجاه وهي تلحقت بشوت الشيوخ تجمع الريال من الريال تبيع اللي تقدر تبيع وتسرق اللي تقدر تسرقه كله على أمل منصور

-

نهار:بتجون حتى امي ابيك تجين

نوره:لا تدخلني بزحمة نادي ابوك

نهار:عشان يشوفونا كاملين ما يفرقنا شي ومانطيح احنا عيال عقاب مانطيح

ساري ابتسم يكمل:والعقاب دايم مكانه بالسما

ابتسم عقاب من كلام عياله وناظره ثنيان:خرجني منها نهار

نهار؛قلت الكل واذا جات أصايل بغصبها ولو جاسر بالسعوديه جبته طرق

ساري:نجيب المدام والا مالها لزوم ؟

نوره:هي ماردت من السفر مع اهلها ؟

ساري هز راسه بالنفي ولف نهار:بتجي قبل الاربعاء جبها معك

ساري:ما سألتها

عقاب:الإهمال سكين الزواج ياساري

ناظره ساري ورفع انظاره عقاب لساري:والورد ان ماسقيته تحول شوك ، لا يعورك الشوك

سكت ساري وصد عقاب يشرب قهوته ونطق نهار:وولد بندر معي بالتمرين

لف ثنيان يناظره وهز راسه عقاب:هو يدخل باقي ؟

نهار؛ولا كأن النادي لنا

عقاب:المشكله ان اللي توسط له عزيز وغالي والا بندر ما يدوس على أرض لي

سكت ثنيان يناظرهم وكمل نهار؛واهله اكيد يجون معه

نوره؛امه بالذات ماتخليه

بلع ريقه ثنيان من طاريهم وكمل عقاب؛زين ما ناسبناهم

لفوا على ثنيان اللي صد عنهم ولفت نوره لعقاب تقطع كلامه ووقف ثنيان يخرج من عندهم

دخل غرفته واخذ جواله يناظر رسالتها:بتروح تمرين نهار ؟

اخذ نفس يهدي نفسه وارسل:بتجين مع اهلك انتي ؟

جواهر:اذا بشوفك بجي اكيد

ثنيان:ماودي ومالها لزوم

جواهر:تكفى ثنيان انا بخاطري بشوفك

ثنيان سكت يرفع انظاره عن جوالها وارسلت:نتذكر اول موقف بيننا هناك

تنهد يكتب لها:ان شاء الله

ابتسمت جواهر وقفلت جوالها

-

دخلت النادي تسمع صوت شخص بالمكرفون يعدد اسماء اصحاب الخيول وعددهم وعرفت ان التمرين بدأ وتأخرت وهذا مطلبها تتأخر وما تدخل للمكان بوسط الفوضى تدخل والكل جالس وعينه على الخيول ونيّتها تكون الفرس اللي تسرق الأنظار وأنظار عقاب بالذات

دخلت صالة الخيول وتقدمت تمشي وعينها على فرس نهار اللي جالس عليه ويتدرب قبل التمرين ووقفت عند حدّ الاسطبل وابتسمت من لمحها ونزل من الفرس ونزل الكاب اللي على راسه يتوجه لها

ناظرت الكاميرا اللي بالمكان تصور الخيول وتعرضها على شاشه كبيره يشوفها كل الحضور وصدت لنهار:نوّر المكان

ملاك:ماكنت بجي بس انت اصريت وتأخيري دليل شغلي

نهار:بتتسلين بس دعواتك يكون تمرين لصالح نهار

ملاك:مافي شك موفق

نهار رفع ذراعه:اهلي فوق هذولا هم

لفت ملاك تناظر عقاب اللي جالس وعينه عليهم وبجانبه عياله يناظرونهم وابتسمت بدون تبين اسنانها لعقاب اللي هادي يناظرهم ولفت لنهار:مابزعجهم براقبك من هنا

نهار:على راحتك

ابتسم لها ومشت تبتعد عنه وتجلس لوحدها

لفت أصايل:الكلب نهار

نوره: منهي ذي اللي واقفه معه

أصايل:محاميته قابلتها بالنادي بعد

نوره ناظرت ملاك اللي قاعده لحالها ولف ثنيان لعقاب اللي وقف

نزل من المدرج لين وصل عندها ولفت له ملاك

عقاب:سبقني نهار ؟

ملاك:سبقك ؟

عقاب:بالعزيمه

ملاك ابتسمت تلف تناظر الخيول:عجبني المكان جيتي لهنا كلها عشاني ماشبعت من المكان وزين توسط لي الضابط نهار

ضحك بهدوء عقاب:ما يبطل يتباهى برتبته مع انه ما يستحقها

ملاك:محد يكون في مكان ما يستحقه ياعميد

لف عقاب عليها وهزت راسها ملاك:فاله التوفيق

عقاب:حياك

ملاك لفت من شافته يقصد جلستهم:لا مرتاحه هنا ولاودي ازعجكم

عقاب:تعالي مامن ازعاج

وقفت تمشي معه وتقدمت لهم وناظرتها أصايل وابتسمت لها

ناظرها ثنيان تمشي مع عقاب ووقفت:مساء الخير

وقفت نوره وتقدمت ملاك تصافحها:شلونك؟

نوره:ياهلا انتي محامية نهار ؟

ابتسمت ملاك:بطلت اكون محاميته نهار بريئ ما يحتاج محامي

ابتسم عقاب من اجاباتها وابتسمت نوره:ماقصرتي

هزت راسها ملاك تناظر شكل نوره ووقفت أصايل:كويس نهار عزمك اشوفك مره ثانيه

ملاك:فرصه سعيده ماكان عندي خبر انك بنت العميد

ابتسمت أصايل:وأنا أسعد

عقاب:جنى زوجة ولدي ساري

مدت كفها جنى وهي جالسه وناظرتها ملاك وصدت لعقاب:ماودي ازعجكم بجلس بمكاني

لف ساري لكف جنى اللي رجعته بصدمه وهز راسه عقاب وهو يناظر جنى ومشت ملاك ترجع محلها

جنى:مغروره على وش؟

عقاب:ماهو غرور بس ما ترضى السلام بالجلوس

جنى:شدعوه عمي تكاسلت اقوم لها

عقاب:وهذا جوابها لكسلك

لف ثنيان يناظر عايلة بندر اللي دخلوا ورفع عيونه عقاب لبندر اللي ناظره وتوجهوا يجلسوا بعيد

لفت جواهر تناظر ثنيان وجلست جانب اهلها

رفعت راسها ملاك تناظرهم ولفت للعامل اللي واقف وهزت راسها له وتوجه لهم

ناظره بندر من تقدم بالدله يصب له قهوه:ما عدلت لنا جلسه ليه ؟

العامل:كنت مشغول مع الاخت اللي هناك

لف بندر يناظرها من بعيد صاده للخيول ولفت جواهر تناظرها ونطقت زوجة بندر:من بنته هذي ؟

العامل همس:هذي جات مع العميد عقاب لوحدهم

لف بندر عليه وكمل العامل:جولها بالمكان ودخلت مكتبه قعدت معه وقت طويل

لفت زوجة بندر ناظرته بصدمه وكمل بندر:وش تطلع؟

العامل:هي اللي دافعت عن ولده لكن شكل علاقتهم اكبرت عزمها تجي لولده الحين تشوفه

هز راسه بندر يناظر عقاب ولفت جواهر تناظرها جالسه لحالها

زوجة بندر:يعرف ينقي عقاب

مشى العامل من عندهم ولف بندر يهمس:بيزل بس بفضحه قبل يزل

زوجة بندر:لا تدخلنا معه بحروب من جديد

مارد بندر يناظر الخيول

لف ثنيان يناظرها جالسه وقام من بين اهله ينزل لها ووقفت تاخذ شنطتها وتمشي وتبتعد مشى خلفها لين شافها توقف عند عامل وتمد له فلوس ولفت من شافته واقف ومشى العامل بيروح ومسكه من ذراعه ثنيان:انتظر

ناظرته ملاك ولف لها ثنيان:ليش عطيتيه فلوس ؟

ملاك؛صدقه

ناظر الفلوس اللي مع العامل:كل هذي صدقه ؟

ملاك؛ما ابخل على ربي

لف ثنيان للعامل وناظره يحفظ وجهه ومشى العامل ولف ثنيان لملاك؛ما مليتي ؟

ملاك ابتسمت:المفروض اسألك انت والا هذا مو ملل هذا قهر عشان أتعابي من جيبك !

ثنيان؛تحسبين استخسر عشر الاف بصدقه ؟

رفعت حاجبها ملاك وابتسمت:ولا انا استسخر بصدقه

سكت لانها تقصد فلوس العامل ومشت من عنده وناظرت جواهر اللي دخلت المكان ولفت لها جواهر تناظرها وتقدمت لثنيان:وش تسوي هذي عندك؟

ثنيان لف عليها:وش تسوين انتي هنا؟ ناقصين مشاكل ارجعي

جواهر ناظرته وناظرها بحده ثنيان:ارجعي جواهر

خرج تاركها وتقدم لاهله يشوفها واقفه ووقف يناظرها

ملاك:وصلوا تبريكي لنهار وفرصه سعيده

نوره:حبيبتي احنا أسعد

أصايل:بيننا الو

ابتسمت ملاك:اكيد

وقف عقاب وناظرته ملاك وتقدم يرفع ذراعه يدلها للطريق ومشت معاه مشى من عند بندر وناظره بندر وابتسم ومشت ملاك مع عقاب لين طلعوا من النادي والتفتت عليه ووقفت

وقف عقاب قدامها:حطيت اسمك بالمكان لو ودك تجينه بأي وقت

ابتسمت ملاك:لو حصل ووقتي سمح لي

عقاب هز راسه لها:مشكوره على الجيّه

ملاك:عزيمه ولبيتها

عقاب سكت وناظرته ملاك ثواني:فمان الله

مشت تاركته واتجهت لسيارتها فتحتها وركبت وشغلتها ولفت عليه ورفع كفه لها وهزت راسها تحرك مبتعده عن النادي

رجع ودخل وناظر نهار اللي ابتسم:والله يا اني اشتقت

ساري:باين عليك من الشوق تراقصتم انتم وفرسك بالمكان ولا كأن احد موجود

ضحك نهار ولف لابوه:ملاك راحت ؟

هز راسه وجلس ولفت أصايل وضحكت:شدعوه اللهفه

نهار لف لامه:بالله كيف البنت ؟

نوره:تعرفون ذوقي بالبنات ما احب الا بنات الشيوخ يجونك ثقال بس هالبنت غير غير

أصايل:ما اعرف وش يشتغل ابوها ، ابوي تعرف ؟

عقاب؛ميتين اهلها عندها أخ واحد

ثنيان ناظر ابوه وهمست أصايل:ياحرام

نوره؛بس عليها طول تبارك الله والوقفه وقفة شموخ والله انا قلت من بنات هالمكان

نهار ابتسم من وصف امه ولفت نوره لأصايل:ازين من صديقاتك اللي تجيبونهم

أصايل:ما شفتيها بالنادي بدون حجاب وعبايه اجل

نوره لفت لعقاب:اعزمها عقاب بيتنا خل نتمقل فيها يمكن ربي يهدي بعض الناس

لف ثنيان من ناظرته امه وناظره عقاب:يبطي

ناظره ثنيان وكمل عقاب؛مابيعرف يختار

ثنيان:اعرف اختار لكن ماتناسبني ولا تناسبنا

سكت عقاب من نطق بالجمع لهم ولف ثنيان عليهم:انا راجع البيت

ساري وقف ووقفت جنى معاه:وانا معك

ثنيان مشى وخرج ولف لساري:اسبقني

مشى ساري مع جنى ودخل ثنيان وناظر العامل اللي واقف ومن شافه كان بيروح ورفع صوته ثنيان بغضب:اوقف

وقف العامل وتقدم له ثنيان:ليش عطتك فلوس ؟

العامل؛صدقه

ثنيان مسكه من بلوزته يناظره بحده:والله لتودع المكان ذا تفهم والا ما تفهم ! انطق قول

العامل بلع ريقه وتقدم له ثنيان:قول

العامل:تبيني اقول انها تجي مع طويل العمر عقاب لهنا بتكرار وتجلس معه بمكتبه

عقد حاجبينه ثنيان:تقول لمن ؟

العامل بربكه سكت ونطق ثنيان بغضب:لمن ؟

العامل:لعمي أبو راشد عمي بندر

سكت ثنيان وفلت يده والتفت بغضب من فهم انها ذيب وفتشت عن انيابها وكشفها

كان بإمكانه ياخذ العامل لعقاب لكن دام كذّبه عقاب هو بيحلها بنفسه

خرج من النادي وركب سيارته وفتح جواله يدور رقم ودق وهو يسوق ورد عليه:هلا

طلال:ارحب

ثنيان؛طلال بغيتك بخدمه واستعجل لي فيها بعطيك اسم وحده ابي تعرف لي عنها كل شي ينعرف زواج وطلاق ولعب عيال ومن هي وش تكون

طلال:مستك بشي ؟

ثنيان؛تعقب تمسني بشي بس ابي اعرفها

طلال:طيب لارحت دوامي شفت لك بس قولي من تكون

ثنيان؛اسمها ملاك بنت مساعد محاميه ومكتبها بحي الياسمين لو تدله عندي رقمها اذا ينفعك

طلال:ماعليك عندي الموضوع

ثنيان:طيب وبمرّ عليك بعد العشاء

طلال:ابشر

قفل ثنيان منه وشد على الدرسكون هو مقهور لانه الوحيد اللي لمس نيّتها ومحد صدقه

دخلت البيت ورمت عبايتها واخذت نفس تمشي وتفكر كررت خطواتها بالمكان تفكر وطلعت جوالها وهي تمشي بالصاله

شادن:حكيني عرض عليك تتزوجينه بعد روحتك؟

ملاك؛ولده عرفني

شادن عقدت حاجبينها وجلست:مافهمت

ملاك؛ولده قاعد ينبش وراي بيسد علي طريقي بيتغدا علي قبل اتعشا عليهم

شادن:قلت لك ملاك قلت لك ما بتدخلين بسهوله لو راحت عن عقاب بيجيبك غير عقاب

ملاك؛الحين لازم امسكه من اليد اللي تعوره ماراح اخليه يمسك علي ممسك

شادن:وش بتسوين طيب علميني ؟

ملاك:بنتساعد هالمره

شادن اخذت نفس:معك

قفلت ملاك وجلست وهي تهز رجلينها وجاتها رساله واخذتها وناظرت رقم نهار وعقدت حاجبينها تفتحها

نهار:فرحت انك جيتي عشاني بس كان ودي اشوفك قبل تطلعين

سكتت تناظر رسالته وابتسمت ثواني ترد عليه:جاني شغل واضطريت اطلع والا انا ما يناسبني ابارك بالكلام

ابتسم نهار من عادت جملته ورجع يكتب لها:اذا انتي ماخلصتي شغلك بمرك المكتب

ملاك:حياك

قفلت جوالها بعد رسالته واخذت نفس تجمع افكارها هي بالبيت لكنها بتطلع لمكتبها عشان تشوف نهار وتعرف اللي تقدر تعرفه هي ماتعرف حبال ثنيان لوين توصل ولأي معلومات عنها ممكن يعرفها لكنها حذره وتنام نومة الذيابه من حذرها

ركبت سيارتها تمشي لمكتبها ووقفت من شافت سيارته عند المكتب واخذت نفس تشوفه ينزل ويبتسم لها

نزلت من سيارتها وناظرها نهار:جيتي عشاني ؟

ملاك:جنون العظمه هذا بيضيعك

ضحك نهار وتقدمت تفتح مكتبها وتدخل ودخل خلفها:اجل ليش كنت برا ورجعتي للمكتب ؟

ملاك؛خرجت شريت حبر للطابعه ورجعت

رفعت الكيس بيدها وجلست وجلس نهار:كيف كان مستواي اليوم ؟

ملاك:شغوف هذا اللي شفته فيك

نهار:احب ، احب اني اعتلي فرس يفهمني وافهمه

ملاك:واضح حتى اللي ما يعرفك يشوف هالشي فيك

نهار:وانتي تعرفيني ؟

ملاك؛اعرف انك متحرش بس

ضحك نهار وكملت ملاك:انا حتى اهلك ما اعرفهم

نهار:عاد اهلي كل واحد وجوّه ، ابوي معروف وامي حياتها كلها مواجيب وحريم ومنافسه بين حريم الشيوخ وأصايل اختي من شكلها تعرفين حياتها

ابتسمت ملاك لانها شافت حياة أصايل وكمل نهار:ساري اخوي اعلامي مدري تعرفينه والا لا بس مشهور بتويتر ومتحدث اعلامي وعنده مؤتمرات مقابلات وجاسر اخوي مبتعث يدرس وان شاء الله هالسنه يرجع

هزت راسها تنتظره يكمل ونطق:ثنيان شفتيه راعي بحر عنده شاليه ويخت واغلب وقته بالبحر ما يحب اليابسه

ضحك نهار وناظرته ملاك؛وش يشتغل ؟

نهار:ثنيان مهندس بأرامكو

ملاك:ماشفت الا زوجة اخوك ساري بس

نهار:هو الوحيد اللي متزوج فينا

ملاك:ثنيان مو متزوج ؟

نهار:كان وده بس ماصار نصيب

ملاك:من كان بياخذ ؟

نهار:بنت بندر تعرفينه ؟ كان موجود اليوم وولده راشد لعب معي

سكتت ملاك تتذكر جواهر اللي صادفتها بالمكان وكانت تناظرهم وكمل نهار:بس ابوي من زمان بينه وبين بندر مشاكل كانوا يشتغلون سوا بنفس القطاع والوضع منافسه يوم خطب ثنيان بنته شاف نفسه وتأمر قام ابوي قال تبطي

ملاك هزت راسها:يفهم لو استشيره بشاليه ؟

نهار؛شاليه تشترينه ؟

ملاك:شفت واحد وعجبني بس بموقع ما اعرفه ومدري كيف شكله بالصدق ، وين شاليه اخوك؟

نهار:والله مدري ماقد رحت له

ملاك:محد يروح له؟

نهار؛ماصار فرصه بس دايم يكون موجود فيه ثنيان اذا ودك اسألك اياه

ملاك:لا لا خلاص انا اشوف بنفسي

نهار ابتسم:وعاد انا نهار

ابتسمت تصد بأنظارها:المتحرش

نهار:الضابط نهار لا تشوهين سمعتي وانتي مبرئتها

ملاك ناظرته:انا ادرى من الناس بكل شي

نهار:كاشفتني ؟ ما اكتشفتي شي ثاني ؟

سكتت ملاك تفهم تلميحاته وتعرفه وواضح عليه ونطقت:ابوك يحبك تدري ؟

ابتسم نهار:ابوي شديد وقوي محد يغلبه لكنه يحبنا وادري فيه مهما عصب ماعنده اغلى منا

هزت راسها ملاك:وامك ؟

نهار:امي الجندي المجهول ورا ابوي والود وده ابوي يدق لها تحيّه كل مادخل وخرج

ملاك سكتت وكمل نهار:والمفروض يدق لها تحيّه الشخص اللي يطلعك من عزّ مشاكلك بسهوله يستاهل يندق له تحيّه

ابتسمت لانها فهمت عليه ورفع كفه على راسه يدق تحيه وضحكت ملاك:التحيه ماتصير وانت جالس ياضابط نهار

ضحك نهار ووقف لها يضرب تحيه وابتسمت ولفت لجوالها اللي وصلته رساله واخذته تقراها

ملاك:برجع البيت

نهار هز راسه ووقفت ملاك تاخذ اغراضها وسأل نهار:بتشوفين أصايل اختي صح ؟

ملاك ابتسمت:تعلمك بكل شي ؟

نهار ضحك:انا اسألها بكل شي

ملاك:بقابلها بس مو اليوم بكره ان شاء الله

هز راسه نهار ومشت تخرج من المكتب ملاك وركبت سيارتها وركب سيارته نهار وابتسم يناظرها تحرك وحرك بعدها

-

دخل ثنيان مكتب طلال وابتسم طلال:ارحب

ابتسم ثنيان يسلم عليه وجلس وضحك طلال:بتحرق جسمك من شموس البحر

ثنيان:فيها العافيه شمس البحر بس من يفهم

طلال:المره الجايه خذني معك

ثنيان:تبشر ، وش صار معك ؟

طلال رجع ظهره لورا:مالها شي

ثنيان عقد حاجبينه:كيف مالها شي ؟

طلال:قضايا صكوك زواج ملاحظات بالدوله

ثنيان سكت وكمل طلال:بس لها سمعه بين العسكر اللي طلبته يبحث عن اسمها يعرفها

ثنيان رفع حاجبه وكمل طلال يتكلم بهدوء:قال انها بفتره كانوا مطلعين اشاعه انها بتتزوج اللواء سعد وبعدها بفتره اشاعه انها متزوجه بالسر شيخ قبيله معروف ، معروفه بالمحكمه تمسك قضايا ناس تجار شيوخ ومناصب كبيره

ثنيان هز راسه وكمل طلال:واضحه نيّتها

ثنيان:واضحه نيّتها وواضح من اللي نشر الاشاعات ولها حكمه بس غريبه بكل هذي المحاولات ماتزوجت

طلال:يمكن ماهي راعية زواج

عقد حاجبينه ثنيان:لا ياشيخ مستحيل ماهي بنت شوارع ، البنت اللي يشوفها يقول انها بنت عوايل دخلت النادي وكأنها من بنات الضباط والشيوخ محد مستنكر وجودها

طلال:من عشرتها لهم صارت تعرف حياتهم

ثنيان هز راسه وسأله طلال:دخلت على ابوك ؟

ضحك ثنيان من فطنة طلال:اي قاعده تحوم حوالينه

طلال:ما اعرف صراحه وش نيّتها دام ماتزوجت لكن ما اتوقع انها خطيره

ثنيان:ماهي خطيره ولا ينخاف منها لكن بغيت اتغدا عليها

طلال:عساك عالقوه وماهي جديده على ابوك ، ابوك دايم مزحوم

ضحك ثنيان ووقف:ماقصرت طلال

طلال:ابد نخدمك

خرج ثنيان وركب سيارته ودق وهو يسوق وابتسم:سبقتيني ؟

جواهر ابتسمت:لا باقي بالطريق جايه ، انت وصلت؟

ثنيان:لا والله ماشي الحين

جواهر:٥ دقايق واوصل لا تطول

ثنيان:جايك

قفلت منه وابتسمت من وقفت عند الشاليه ونزلت من سيارتها تقفلها وفتحت الشاليه ودخلت

رفعت جوالها شادن تصور سيارتها ودخولها للشاليه والمفتاح اللي بيدها وارسلتها لملاك وانتظرت ٤٥ دقيقه ووقفت سيارة ثنيان جنب سيارة جواهر ونزل منها يدخل الشاليه

تلثمت شادن ونزلت من سيارتها وتقدمت للشاليه جربت تحوم حوالينه لكن ستاير الشاليه مقفله دارت حوالينه ودخلت مع شاطئ البحر تناظر الشاليه

صورته وتقدمت تحاول تشوفهم لين وقفت عند الشباك وناظرتهم بالصاله عضت شفتها من شافت ثنيان منحني يبوس جواهر وجواهر جالسه على كنبته

خرجت من الشاليه وركبت السياره تحرك وهي ترسل الصور لملاك وتضحك

وقفت ملاك من شافت الصوره الاخيره وضحكت تهز راسها وترسل لشادن:اموت عليك

ضحكت شادن وحركت سيارتها راجعه

ناظرت الصوره ملاك وهي مبتسمه وهمست:ما ندري حلال والا حرام بس ان شاء الله انها ماهي حليلتك

قفلت جوالها وحطت كوبها على الطاوله ووقفت تدخل غرفتها

-

لفت وهي تعدل شعرها:ادخل

دخل راسه نهار وابتسمت أصايل:عارفه والله

نهار:بوديك انا

أصايل:تغيرت الخطه مو طالعين

نهار دخل وناظرها:ليه ؟

أصايل:بتجيني البيت هنا

ابتسم وسع مبسمه وتقدم لها:احلفي

أصايل:والله صحباتي قرروا يجوني وقلت تجيني هنا ملاك

نهار:حلو حلو اجل بقعد بالبيت

أصايل:لا ياحبيبي ماراح اشوف لك ظل ابغاهم ياخذون راحتهم

نهار:اي مو مشكله ياخذون راحتهم وانا وش بسوي

أصايل:بقعد فوق بالملحق لو سمحت نهار لا تسوي حركات

نهار:لا ابد خذوا راحتكم

خرج وتنهدت أصايل واخذت جوالها وطلعت فوق

دخلت ملاك البيت ووقفت بالمواقف تناظره لفت تشوف البيت الكبير بشبابيك طويله عريضه وبابه الكبير السيارات اللي بالمواقف اللي لو تبيعها كلها سددت ديّة منصور ، لفت تشوف النافوره بمنتصف الحوش والجلسات بالحوش ومن وسع البيت ماقدرت تشوف الا اللي على مدى بصرها ، نزلت من سيارتها وقفلتها تمشي للداخل فتحت لها الباب الخدامه ودخلت البيت

ناظرت الاستقبال من مرايات ونجف وثريا وريحة البخور بالمكان ولفت يسارها تشوف صورة عقاب بالبدله العسكريه على جدار كبير ووقفت تناظرها

تقدمت للصوره الكبيره توقف قدامها تتأملها وكأنها تشوف أملها وحلمها اللي قرب يتحقق

لفت للخدامه اللي مشت تدلها وطلعت مع الدرج تلمس الدربزان بيدينها الثنتين وتطلع لفوق تناظر الصالات والاثاث ، وبداخلها مؤمنه انها فتره وتسكن بهذا البيت وتكون صاحبة هذا البيت وكلمتها مسموعه فيه ، دخلت الملحق اللي عباره عن غرفه بالسطح كبيره وابتسمت من وقفت أصايل:اول الواصلين

ملاك ابتسمت تسلم عليها وتقدمت تناظر الملحق ولفت أصايل للخدامه تكلمها

جلست ملاك تناظر المكان ولفت أصايل:خذي راحتك محد يجي هنا

فصخت عبايتها ملاك وحجابها وحطت عبايتها على شنطتها واخذت جوالها أصايل ترد:الو

خرجت من عندها ووقفت ملاك تتقدم تناظر السطح وجمعت ذراعينها ببعضها تتكتف وسرحت وهي تفكر بالبيت هذا بأصحابه وحلمها اللي بتوصل له

ولفت من سمعت صوت وجمدت محلها من شافته

-

فتح باب الملحق بعد ماشاف أصايل تطلع وناظرها واقفه لابسه جمبسوت بارز طولها وجسمها الرياضي وشعرها اللي رافعته ولفت من سمعت صوت الباب وناظرته وابتسم ابتسامه هاديه ورفعت حاجبها من ابتسامته:على اساس باخذ راحتي بالمكان ! كيف تدخل هنا ؟

نهار:شي بخاطري وسويته

ملاك تقدمت ورفعت كفها تأشر على الباب وهز راسه نهار وهو مبتسم ورفع كفه يدق لها تحيّه وخرج

ناظرت مكانه اللي كان واقف فيه واخذت نفس بغضب وجلست ولفت من دخلت أصايل ومعاها بنتين وناظرت ملاك:نهار دخل هنا ؟

ملاك سكتت تناظر صديقاتها وضحكت رزان:اخيراً شفناه بالبيت

أصايل:شفتي الكلب قلت له لا يجي ومعطيته خبر

جلست هديل وابتسمت:الود ودنا يتكي معانا

ضحكت رزان:بنت !

لفت تأشر لها على ملاك وناظرتهم أصايل:ملاك محامية نهار

ابتسمت رزان:اهلين

ناظرتها هديل بشكلها وصدت ملاك عنهم لأصايل

جلست أصايل ولفت لملاك وهمست لها:قالك شي ؟

ناظرتها ملاك :دق لي تحيّه

ضحكت أصايل:مشاكس

ملاك:ومتحرش

ضحكت أصايل ولفت للخدامه اللي دخلت تضيفهم وشغلت اغاني اصايل بالمكان وصدت بملل ملاك عن البنات

ناظرت جوالها تشوف رسالة شادن:بيرجع بعد ربع ساعه بيته

قفلت جوالها تنتظر يعدي الوقت وارسلت لها شادن وصوله ولفت لأصايل:طلع لي شغل بنعيدها مره ثانيه

أصايل:حسافه

ملاك لبست عبايتها وحجابها وابتسمت:ماعليك بنشوف بعض كثير ان شاء الله

أصايل:اجي معاك والا تخافين يطلع لك نهار؟

ملاك:اخاف من اي احد الا نهار

ضحكت أصايل ومشت تخرج ملاك ومشت تنزل لتحت وتقدمت للباب تشوف الخدامه بتفتحه ووقفت من شافت عقاب يدخل ورفع عيونه لها وعقد حاجبينه

دخل خلفه ثنيان وناظرها واقفه وعقد حجاجه بإستغراب من وجودها

عقاب تقدم:بنت مساعد

تقدمت ملاك وناظرت ثنيان خلفه وهزت راسها:كنت عند أصايل

عقاب هز راسه ولارد وناظرتهم ملاك:استأذن

خرجت ولف ثنيان يناظرها ومشى خلفها وناظرها تركب سيارتها وتقدم لها:لين متى بتلعبين هاللعبه ؟

لفت عليه تقفل بابها وتفتح الشباك وتشغل السياره وابتسمت تناظره:صدقني الافضل لا تدخل باللعبه هذي

ثنيان رفع حاجبه وكملت ملاك بإبتسامه:وتعود تناديني عمتي من اليوم

سكت من ألجمته بنيّتها بكل صراحه وغادرت البيت وشد على قبضة يده بغضب هي تتحداه بكل وضوح وماتشوف شنب رجال قدامها وهز راسه يدخل البيت

طلع لفوق ونادى الخدامه:نادي أصايل من فوق

دخل غرفته ينتظرها ودقايق جاته:هلا

ثنيان:وش جابها ذي بيتنا ؟

أصايل:مين قصدك ؟

ثنيان:محامية نهار

أصايل:ليش لا ؟ ملاك عسوله وانا احب البنات الحلوات

ثنيان:هذي شيطانه ماهي ملاك معد اشوفها في بيتنا تفهمين

أصايل:ليش طيب ؟

ثنيان:لاني انا قلت وخلاص

سكتت أصايل تناظر غضبه وخرجت تاركته وهز راسه ثنيان:أنا اللي بخليك تناديني عمي ، أنا

اخذ جواله ودق على طلال:طلال بلغ اللواء سعد اني بزوره بالبيت واذا كنت فاضي ابيك تجي معي

طلال:وش عندك ؟

ثنيان:بغيته بموضوع

طلال:طيب بشوف واكلمك

ثنيان:انتظرك

قفل جواله ثنيان ودخل ياخذ شاور ويلبس ثوبه وشماغه ويحط العود خلف اذانيه ويلبس ساعته وجزمته على صوت الرساله تعطر واخذ جواله يقرأ رسالة طلال:ينتظرك

ارسل لطلال:بمر عليك

قفل جواله وخرج من البيت وركب سيارته وعدل شماغه وتوجه لطلال وركب بجانبه طلال:ماقلت لي وش عندك ؟

ثنيان:بسأله عن اللي عطيتك معلوماتها

طلال:ورايح له البيت ليه ؟ كان قلت لي انا اروح واتكلم معه والا اتصل عليه

ثنيان:لا ماعليك انا اروح احسن

وقف ثنيان عند البيت ودخل مع طلال لمجلس اللواء ووقف:ولد عقاب

ابتسم ثنيان يصافحه:مسيت بالخير

سعد:مسيت بالنور حيّ من زارنا والله ليه ابوك ماهو معك ؟

ثنيان:جيت خفيف عندي موضوع صغير ومستعجل

سعد:حيّاك

تقدم ثنيان يجلس وسط المجلس الكبير وجلس جنبه طلال وتقدم قهوجي يصب لهم قهوه واخذ فنجانه ثنيان:ما ببطي عليك بغيت اسألك عن شخص

سعد:منهو ؟

ثنيان:تعرف وحده ينقال عنها ملاك بنت مساعد

سكت سعد ثواني ورفع حاجبه ثنيان وحط فنجانه سعد:ليه ؟

ثنيان:قول عنه موضوع خاص بغيت اسألك عنها

سعد هز راسه:اعرفها بنت مساعد من ينساها ؟

ثنيان:وين عرفتها ؟ والسموحه اسألك لكني بعرف ومهتم اعرف

سعد:ساعدتني بقضيه بالمحكمه بعدها عزمتها ببيتي مع اهلي وطلعت اشاعه بعد فتره يقولون اني متزوجها بالسرّ وتخربطت امور حياتي والله ومسكينه هي مالها ذنب

ثنيان هز راسه:ما طلبتك فلوس ؟

سعد عقد حاجبينه:لا لا هي حتى القضيه ما اخذت فوق اتعابها شي

رفع عيونه سعد:لكن تبي الصدق ؟ البنت ذيبه وسط ذيابه

سكت ثنيان وكمل سعد:مسكت لكم قضية اخوك ؟ سمعت انه متحرش بوحده

ثنيان:ما يسويها ولد عقاب واخو ثنيان

ابتسم سعد:ونعم

ثنيان:ماقصرت واعذرنا استعجلناك وجيناك

وقف ثنيان ووقف معه طلال وابتسم سعد:نبي نكثر من هالجيّات ونشوف ابوك

ثنيان ابتسم:على خير ان شاء الله ، سلام عليكم

خرج مع طلال وركب سيارته ولف عليه طلال:ما استفدت شي

ثنيان حرك سيارته:الا والقى وراها بلا

طلال:شوفها قاعده تحوم ولا لقت اللي تبيه لين ملت بكره تمل ومعد تشوف لها درب

ثنيان:ملت من وش ؟ اذا اللواء سعد اللي داخل للحين يهوجس فيها وشكله كان ناوي يتزوجها ليه ما تزوجته ؟

طلال:ملت منه يمكن

ثنيان:ملت يوم مالقت اللي تبيه بس عقاب قاعد يغرق يا طلال ولأول مره بيطيح

طلال:ما يسويها

ثنيان هز راسه بهدوء وسكت خوفاً من ظنونه

طلال:بس ماهي قاعده تاخذ فلوس ليه طيب ؟

ثنيان:اكيد تهمها الفلوس اكيد نيتها الريال لكن ليه للحين محد قال انها تبي فلوس ؟

طلال:ولو تلاحظ دايرتها معروفه ، ماتحوم الا حوالين الشيوخ والعسكر

ثنيان حك شاربه:راعين فلوس وخير وعز

هز راسه طلال وصد لطريقه ثنيان يفكر

-

وقف عقاب عند القزاز الطويل يناظر أصايل اللي وصلت صديقاتها عند البوابه ورجعت ولف من سمع صوت الباب:أصايل

سمعته وطلعت وناظرته واقف وبيده كوب شاهي:عيون أصايل وقلبها

عقاب مشى وجلس على الكنبه وجلست جنبه أصايل

عقاب:ليه ناديتي ملاك ؟

أصايل:انت وثنيان بتهاوشوني يعني ؟

عقاب عقد حجاجه:قالك شي ثنيان ؟

أصايل هزت راسها:يقول لعد تدخل بيتنا

سكت عقاب يدري ان ثنيان مصرّ على نيته لها وكملت أصايل:بس البنت عسل صراحه وانا بخاطري اعرفها اكثر واروح معاها وارجع ، انا حواليني بنات كثير بس ودي بوحده رايقه ثقيله نفس جو بنات أصحابك

كان ساكت عقاب يناظر كوبه وكملت أصايل:ملاك كأنها بنت شيخ او بنت من بنات اللي يجون النادي حقك ما اعرف بس مو مصدقه انها من الطبقه المتوسطه

عقاب هز راسه وكملت أصايل:متخيل سيارتها عاديه كذا ؟ انصدمت

عقاب:ماتهمها الفلوس

أصايل؛صح ؟ عشان كذا اقولك كأنها بنت عز وتعرف النعمه

عقاب التفت لها:ناديها اذا ودك لا تسمعين لثنيان

أصايل:اذا بشوفها انا اروح لها او نتقابل بمكان برا اصلاً هنا ما اخذت راحتها احس

عقاب:ليه ؟

سكتت من تذكرت نهار ولفت عليه:بشوف نهار أنا

وقفت تخرج من الصاله ولف عقاب لجواله واخذه ووقف يمشي خارج من البيت بكوبه

نزل للحديقه ومشى وهو يدور رقمها ودق عليها

وحط الجوال على اذنه وجاته نبرة صوتها الشجي صوت على نعومته واضح وعالي وتلازمه بَحه خفيفه أنثويه

عقد حاجبينه عقاب من سمع صوتها:الو

ملاك:معاك يالعميد

ابتسم عقاب:تناديني بالعميد وكأني على رأس العمل

ملاك ابتسمت تسكت وكمل عقاب:جيتي لهنا ولا قابلتي أم ساري

ملاك:أصايل قالت برا البيت واضطريت اطلع قبل اشوفها

عقاب هز راسه:لك جيّه ثانيه ان شاء الله

ملاك:ما اعتقد اذا بشوف أصايل بنتقابل بمكان بالخارج افضل

عقاب:ما أشاورك

سكتت ملاك وكمل عقاب:لك جيّه ثانيه وبننتظرك هالمره انا وام ساري وساري وزوجته

دخل ثنيان البيت بهاللحظه وشاف ابوه واقف يكلم وتقدم له يشوفه معطيه ظهره ووقف يسمعه

ابتسمت ملاك تسكت وكمل عقاب:تعرفين وش ينرد على العميد يا بنت مساعد ؟

اتسع مبسمها تهز راسها:سَمّ

ابتسم عقاب من فطانتها وهز راسه والتفت يناظر ثنيان اللي واقف:تصبحين على خير

نزل راسه ثنيان بإبتسامه بارده وقفل جوالها عقاب وناظره:كاشخ وين كنت ؟

ثنيان ناظر ابوه ثواني ونطق:معزوم

عقاب:احد نعرفه ؟

هز راسه بالنفي وحس بغضبه وشد على قبضة يده يرجع وراه:تصبح على خير

تركه ومشى يدخل البيت ودخل غرفته جلس على سريره ومسك كفوفه يفكر ، الناس يتكلمون فيهم وهم بدون مشاكل ويتلهفون يعرفون اخبارهم وابوه معروف بكل مجلس وبكل حفل وبكل مناسبه هو معزوم وحاضر ويده كريمه واغلب ايام السنه يعزم ببيته رجال وشيوخ وكبار روس لو تزوج وهو بهذا العمر وحده كُبر عياله بيصيرون علك بحلوق الناس

مسك راسه بفشله من تخيل الموقف ولف من جاته رساله واخذها وتنهد بتعب وعقد حاجبينه يشوف رسالة طلال " عرفت كيف تلعبها ، بنفس المده اللي تدخل فيها حياة العايله يتهددون من مصادر مجهوله بصور او مقاطع ويطلب المصدر المجهول فلوس مقابل السكوت وغالباً نفس السعر مليون وميتين ألف ، ثنيان البنت هذي تدخل بنيّتين لكن اللي يعرفها يعرفها بنيّه وحده "

عقد حاجبينه يرجع يقرا الرساله ووقف يدق على طلال

ورد طلال وهو يناظر الاوراق؛اللواء سعد هذا بنفسه قدم على بلاغ تهديد لصور بنته وماقدروا يوصلون للمصدر لين اندفع للمصدر فلوس وبعدها اختفى

ثنيان:يعني هي تمسك ممسك وتاخذ فلوس بالتهديد ؟

طلال:محد يقول هذا الكلام بس انا مقتنع فيه ، دخولها لحياة اللواء سعد كان بنفس الفتره اللي تتهدد فيه بنته وبعد ما انقفلت القضيه غادرت

ثنيان ضرب الجدر من غضبه:الشيطان بإسم الملاك

طلال:قلت لك لها نيّتين نيّة ملاك ونيّة شيطان

ثنيان:وانا كشفت الشيطان قبل تلعبها

طلال ابتسم:هذا تحليلي واسلم منها ياولد عقاب

ثنيان:ولا تتجرأ تضرني او تضر اهلي

طلال:خلك فطين ما اعرف كم شخص مشت عليه لعبتها بس لا تكون من ضمن الضحايا

ثنيان هز راسه وقفل جواله

-

واقفه بسيارتها قدام السجن المركزي لها اكثر من ساعه ماقدرت تنزل بخطواتها تدخل المكان ، تاخذها ذكرياتها وتعرف تعرف انها لو نزلت وقابلته بتنهد وبتتعب وبتضعف ، لان حياتها الحاليه وانشغالها بدنيا لابسين البشوت ومعتلين النجوم ماهي الا عشان منصور وديّة منصور ، تخاطر وتدخل بين ريحة الفلوس وتعاشرهم وتطلع ابشع مافيهم وتبتزهم فيه وبعدها تسدد لمنصور الديّه

فتحت باب سيارتها ودخلت بدون تفكر أكثر حطت هويتها وطلبته بالإسم ودخلوها لغرفة الزياره وجلست وهي تنتظره

جلست على الكرسي وعينها على كفوفها تعرف لو شافها عمها أبو منصور تزوره بيهد فيها ويطردها هو حتى رفض تمسك قضية منصور لكن كل محاولات عمها فشلت في ان ملاك تبتعد وماتزوره

رفعت عيونها من انفتحت الزنزانه ودخل وهو مكلبش وطاحت عيونه بعيونها ومن زمن طويل ما احترقت محاجر عيونها بدموعها الا الان ، يوم شافته قدامها

طاحت دموعها بدون ما تتغير ملامح وجهها وهي تناظره وظل واقف يراقبها منصور يتأمل العيون اللي قضى عمره كله يحبها ، العيون اللي خلته يصبر على السجن ويعيش ، يعيش عشانها

تقدم وسحب الكرسي وجلس وحط كفوفه المكلبشه على الطاوله قدامها ورفعت اصابعها تمسح دموعها بثبات

منصور:ابطيتي علي

ملاك بلعت غصتها تكابر بضعفها:ابوك يردني

منصور سكت يناظرها ورجعت ظهرها لورا ملاك:كيف وضعك ؟

منصور رفع يدينه وناظرت الكلبشات وكمل منصور:وش بيكون ؟

ملاك:يقولك ابوك اني تركتك صح ؟ واني لهيت بدنيا غيرك ؟ صدقته ؟

منصور هز راسه بالنفي وابتسم بهدوء:وقالي ان اسمك معروف بين القضاه وتمسكين اكبر قضايا لاكبر ناس

ملاك هزت راسها وكمل منصور:انا ادرى بك

ابتسمت تصد من حست انها بتبكي ورفعت كفها تحك جبينها بتوتر ورجعت ناظرته:بتخرج من هنا

منصور اخذ نفس وسكت ونزل انظاره وكملت ملاك:حتى لو رفضوا القبيله يساعدونك بالديّه وحتى لو ابوك تكاثر يطيح عند رجلين اهل الميت ، انا ملاك

سكتت من نطقت اسمها ورجف صوتها وقربت منه لين رفع عيونه لها وناظرت عيونه بتحدي ورفعت سبابتها:ملاك اللي بتطلعك من هنا ، بحرر يدينك هذي

منصور ظل يناظرها ترجف وتخفي دموعها بعيونها وكملت ملاك:في حشره هنا يبلغ ابوك بجياتي ويمكن يوصله خبر ويجيني لكن تطمن فتره تمرّ وارجع اجيك

منصور:بيمنع اسمك من زيارتي

ملاك ابتسمت وطاحت دموعها من ابتسامتها:من يمنعني ؟

ابتسم منصور لها وعضت شفتها تناظره وهز راسه منصور تقدم بكفوفه يمسك كفوفها يناظر ابتسامتها وسط دموعها

نزلت عيونها لكفوفه وطاحت على كفوفه دموعها

منصور:إنتي أكثر حديث لهوجاسي هِنا ، تمرين الذاكره أعذب من الماء في فمّ ضامي ، وانا ضامي

رفعت عيونها له تبكي وكمل منصور:ضامي الدنيا معك ضامي البسك دبله وعيّت عليّ البسك

هزت راسها تبكي وصدت عن عيونه واخذ نفس منصور:مابي تشقين على شاني ابي تنتظريني وهذا يكفيني

ملاك لفت عليه وهي تبكي ودق الباب العسكري واخذ نفس منصور:الله يجيب الصالح

ضحكت وسط دموعها تشد على كفوفه:الله يجيب الصالح

كانت جملته المعتاده لها من زمن ماعرفته وكبرت معه بنفس البيت كان يحبها بالسرّ عن اهله عشان لا يمنعونهم عن بعض وكان يقولها أحبك بجملة الله يجيب الصالح وترد عليه وتفهمه والحين كررها لها خلاها تضحك

شال كفوفه ووقف وضحكت وهي تبكي:انتبه على نفسك

هز راسه لها ودخل وقفل الباب العسكري ونزلت راسها توقف ضحك وتبكي بعلو صوتها وحطت راسها على الطاوله تبكي لانها قاست فستان زواجهم لبسته تستعد انها تصير له وحلاله وكل شي بلحظه تغير

خرجت من المكان تجر خطواتها ومسحت دموعها تشغل سيارتها وتحرك فتحت شباكها تاخذ اطول نفس تقدر تاخذه ووقفت عند البحر ورجعت تبكي من جديد

ناظرت رسالة شادن واخذت جوالها وهي تبكي وقرتها

شادن:في احد اتصل على ابوي وقاله انك زرتي منصور

قفلت جوالها ورمته جنبها ورجعت تبكي وتناظر البحر

وقف ضجيج عقلها صوت المؤذن الله أكبر وغمضت عيونها بتعب تردد:الله أكبر

اخذت نفس تستجمع نفسها ونزلت من سيارتها ورفعت راسها للسماء تغمض عيونها وتاخذ نفس ودخلت الحمامات تتوضى وتدخل المصلى تجلس فيه ورفعت كفوفها الثنتين تجمعهم وهمست:يارب أنا عبدك ما أعرف ارسم خطاي ، ارسم لي طريقي وخلني امشي به

كبرت وصلت وخلصت من صلاة الفجر وطلعت تركب سيارتها وتحرك لمكتبها

ناظرت شكلها بالمرايه وتأففت هي ما تحب تكون بهذا الوجه التعبان المتهالك من الدموع نزلت انظارها من وقفت عند المكتب ونزلت من سيارتها تطلع مفتاح مكتبها ولفت من ناداها:بنت مساعد

لفت وعقدت حاجبينها تناظر ثنيان واقف ونطقت:مبكر !

ثنيان تقدم لها وفتحت المكتب تدخل ودخل خلفها وناظرته:جاي تقولي ما امسك قضايا زياده ؟

ابتسم ثنيان:ليه اقولك ؟

حطت شنطتها وجلست:مدري انت شايف ان الناس تمشي على كيفك

ثنيان:اجل تمشي على كيفك يوم انك تقولين لي نادني بعمتي

ضحكت ملاك ورجعت ظهرها لورا:جيتني بوقت ماهو مناسب

ثنيان تقدم بغضب:ماني جاي ادردش معك عشان يكون مناسب جاي اقولك وخري عن درب اهلي ، أصايل واخواني وابوي وامي تفهمين ؟

ماردت ملاك وكمل ثنيان:والا بكشف اوراقك

ضحكت ملاك وضرب مكتبها ثنيان:بفضحك تفهمين

وقفت وناظرته بهدوء:لا تضرب مكتبي ندري انك رجال وقوي وتقدر تكسر وتعلي حسّك

ثنيان:واقدر امد يدي ان وصلت

ابتسمت ملاك ورفعت سبابتها خلفه ولف يناظر الكاميرا اللي بمكتبها ورجع لف لها:بتخوفني هذي ؟

ملاك:لا ، انا اللي بخوفك

ثنيان:تعرفين اللواء سعد ؟

ملاك؛اعرفه

ثنيان:تعرفين من هدده واخذ منه مليون و٢٠٠ الف ؟

ابتسمت ملاك وابتسم من ابتسامتها ثنيان:تحسبين  يخفى عني شي ، يوم انهم ماعرفوك انا عرفتك انتي لك نيّتين نيّة شيطان ونيّة ملاك

ملاك ابتسمت تناظره يكشف اوراقها وفعلاً كان اول شخص يعرف لعبتها وناظرها:كم واحد لعبتي عليه نفس لعبة اللواء سعد ؟

ملاك:معك والا بدونك ؟

ثنيان تقدم لها:تخسين

ملاك ابتسمت:مشكلتك كشفت الشيطان اللي داخل ملاك وهذا يضرك ما ينفعك

ثنيان:هذا يخليني انهي لعبتك

ملاك لفت تاخذ جوالها تحت نظراته وفتحت الصوره ومدتها له قدام عيونه وجمد وجه ثنيان يناظر الصوره وعقد حاجبينه يشوف صورته مع جواهر بالشاليه حقه

هو يحلف انه يتأكد قبل يدخل الشاليه ان محد لاحقه وسنتين محد قدر يكتشف موضوعه مع جواهر بنت بندر

كيف الحين دارت فيه الدنيا بلحظه وسكت يتأمل الصوره حتى أفكاره هدت

همست ملاك:وش هالعايله ياعيال عقاب

ابتسمت تكمل:قبل تعرف اني شيطان عرفت ليش سموني ملاك ؟

لف يناظرها وابتسمت:لان مهما ظنيت ببرائتي اصدمك ، مهما حسيت انك قفلت علي باب ! افتح قدامك سبعين باب

ثنيان سكت جامد وجهه ووقفت قدامه ملاك بهدوء:ما بهددك نفس بقية العابي على قولتك لكن هذا ضمان يبعدك عن طريقي لدرب ابوك

ثنيان ناظر عيونها بحده وهو يتنفس من غضبه وهمست ملاك تناظر شرارات عيونه:تسمع بالملاك خيراً من أن تراه

ماقدر يتكلم من جنونه ومن صورة جواهر قدامه ومن صدمته ومن الشيطان اللي قدامه ولف يخرج من المكتب ورمت جوالها على المكتب ملاك وجلست واخذت نفس ترتب افكارها واخذت جوالها ترسل لشادن:كلمي جواهر

قفلت جوالها على دخول محمد وتنهدت تصد وتستغفر:ما بنخلص اليوم

محمد:انتي ما تفهمين ؟

لفت له ملاك:تكفى لا تزيدها يالله صباح خير 

محمد:ابعدي عن ولدي خليه يرتاح جبتي له المصايب دخلتيه السجن واخذتي منه مستقبله وسنينه وش تبين تاخذين اكثر

سكتت ملاك تناظره بهدوء وكمل محمد:ابوك لو كان حيّ وعرف اللي سويتيه كان تمنى انه مات ، زين ان ابوك مات ما شاف منك اللي سويتيه بولد عمك ، على الاقل ارحمي امه اللي ربتك بدال امك وشالتك من اليُتم ، ما ينفع فيك خير انتي دخلناك بيتنا وخرجتي منه ولدي مكلبش ، لا اشوفك بدربي ودرب عيالي لا شادن ولا منصور تفهمين ؟

ماردت وخرج محمد وبللت شفايفها تمنع بكيتها وصدت بالكرسي تهمس:لا تبكين

اخذت نفس طويل تهدي نفسها ولفت تناظر صورة امها وابوها على شاشة كمبيوترها وعضت شفتها بقوه ووقفت:خلاص تعبت خلاص

هفت على عيونها تهدي نفسها وتنفست بهدوء تستجمع نفسها

كان يسوق بسرعه ويتكلم بغضب:الله ياخذك الله ياخذك

ضرب يده بتكرار وهو يسوق وفتح زرار ثوبه وحط كفه على فكه يناظر الطريق

عض شفته يتذكر الصوره كيف قدرت تمسك عليه زلته وتكشف سرّ كان دافنه سنتين عن اهله وعن اهل جواهر

مستحيل تهدده مستحيل يسمح لها تغلبه بلعبتها مستحيل يتركها تدور ممسك على أصايل اخته وباقي اخوانه

لف يشوف اتصال جواهر بجواله وهز راسه:الا انتي لا يعوروني فيك ، الا انتي

-

عقاب لف لنوره:اعزمي بنت مساعد

لف نهار يترك جواله وناظرته نوره:من بنت مساعد؟

نهار:محاميتي

نوره عقدت حاجبينها:ليه ؟

عقاب:اعزميها

نهار ابتسم يراقب ابوه وهزت راسها نوره:سمّ

عقاب:وعطي خبر لزوجة ساري

نوره:ان شاء الله

ابتسم نهار يقوم من عندهم ومشى يطلع لغرفة أصايل دق الباب ودخل:بنت

لفت عليه والقطوه بحضنها وجالسه على جوالها:تجي بس للمصايب

نهار قفل الباب ومشى يجلس على السرير:لا والله هالمره سالفه حلوه

صدت لجوالها:بنت جديده اكيد

نهار:ياخي عطيني اهتمام

تنهدت وجلست والقطوه بحضنها:وش فيه نهار ؟

نهار:ابوي قال لامي قبل شوي يعزم ملاك

أصايل ناظرته بذهول:تعزمها ليش ؟

نهار:مدري شكلها جايزه له

أصايل:غريبه بمناسبة وشو يعزمها وامي بعد ؟

نهار:اسمعي افكر اقول لابوي اني ابيها

سكتت أصايل وهي تناظره وضحك نهار:لا تطالعيني كذا منجد احسها تنفع تصير زوجتي

أصايل:اي دايم تقول كذا كل ماشفت بنت حلوه

نهار:هذي بالذات مو اي بنت هذي ملاك ، كل شي فيها يجذبني شخصيتها وطولها وعيونها البنت كامله أصايل والله دخلت مزاجي وعاجبتني

أصايل:هذا بعد مادخلت عليها وانا محذرتك ؟

ضحك نهار بربكه:شفتها ، للحين صورتها براسي

أصايل:يومين وتجي بنت احلى وتنساها

نهار:أصايل والله اني صادق ابي اخطبها احسني حبيتها

أصايل:كل شي عندك بسهوله ياحلو حياتك

قامت القطوه من حضن أصايل تمشي بالسرير ولف نهار يناظر القطوه وهو ساكت وكملت أصايل

:حتى كوتي ناقدتك قامت من القعده

ضحك نهار ياخذ كوتي ويرفعها وناظر رقبتها اللي حاطه فيها سلسال غالي أصايل:انتي بنت نعمه صدق ، ملبسه قطوتك ذا السلسال بكم شاريته ؟

أصايل مسحت على راس كوتي:فداها كل حياتي عيوني هذي احبها اكثر منك

رمى عليها كوتي وصرخت أصايل:بشويش عليها اعاملها بلطف انا

نهار وقف:ما عطيتيني وجه للسالفه

أصايل:اعرفك

مشى يخرج نهار تاركها بغرفتها

-

جالسه بالصاله على جوالها وتشرب قهوتها وتسمع ابوها اللي يتابع الاخبار من جواله ولابس نظارته

ولفت من دخل راشد يسلم ورفعت راسها ام راشد:هلا امي

كشرت جواهر:روح تروش تكفى لا تجلس بعد تمرينك على الكنب

راشد:انظف منك

ام راشد:خلي الولد بحاله !

جلس راشد جنبها وصدت لجوالها وناظرت الرساله من الرقم الغريب ودخلت تناظرها كانت ايبان بنكي وعرفت انهم محتاجين كالعاده يدورون رزقهم

صدت بملل تقفل جوالها ورجعت ناظرته من جاتها رساله بعدها وتأففت ولف راشد يناظرها

فتحت الرساله وجمد وجهها تشوف الصوره تحت الايبان تغير وجهها وهي تناظر صورتها مع ثنيان ونطق راشد:وش فيه ؟

رفع راسه ابو راشد يناظرها ولفت عليها وجهها جامد:ولاشي

راشد:كيف ولاشي وجهك ازرق

بلعت ريقها تقفل جوالها وابتسمت بربكه:تذكرت ان عندي موعد ليزر وشكله فاتني

ام راشد:انتي ومواعيدك اللي ماتخلص

وقفت:بكلمهم اشوف اذا اقدر اروح لهم

دخلت غرفتها وجلست وهي تحس برجفة رجلينها ورجعت تفتح الصوره وغطت فمها بصدمه دارت فيها الدنيا وهي تتخيل ردة فعل ابوها وراشد لو عرفوا

بلعت ريقها وكفوفها ترجف وناظرت الرقم الغريب وكتبت:راح اشتكيك

وصلتها رساله بنفس الوقت:قبل ما توصل لابوك ؟

بكت بخوف ووقفت تكتب:وش تبغى ؟

انتظرت وجاتها رساله:مليون و٢٠٠ الف ريال سعودي

جمدت ملامحها ومسكت قلبها من المصيبه اللي طاحت عليه وغطت فمها تمنع شهقاتها وتبكي

اول ماخطر ببالها ثنيان ولو عرف ممكن تخسره ممكن علاقتهم تنتهي ممكن يتركها

جلست بالارض تبكي وقفلت جوالها وهي مغطيه فمها

غطت وجهها بيدينها ولفت من سمعت جوالها يدق وبكت بخوف وناظرت اسم ثنيان وزاد بكاها

جلست بعد وقت وهي تهدي نفسها وهمست:بتمر بتمر

اخذت جوالها ودقت على ثنيان واخذ جواله ورد وهو عاقد حاجبينه:جواهر ؟ ليه مارديتي علي ؟

جواهر:كنت اخذ شاور

سكت ثواني يسمع صوتها ونطق:فيك شي؟

جواهر:اخذت برد نسيت المكيف بالغرفه مفتوح

ثنيان:متأكده مافيك شي ؟ مابخاطرك شي ؟ قولي لي جواهر

جواهر نزلت دموعها ومسحتها:أحبك

ثنيان تنهد بتعب:وانا أحبك وانتي تدرين بس ان كان بخاطرك شي وما تعلميني بزعل منك

جواهر:لا

ثنيان هز راسه:بتجيني اليوم ؟

جواهر:لا لا ما اتوقع اهلي بالبيت اليوم كله

ثنيان:زين ولو بغيتي تشوفيني قولي لي لا تروحين الشاليه

جواهر:اوكيه

ثنيان:انتبهي لنفسك

جواهر:وانت كمان

قفلت منه وفتحت الصوره تناظرها وبكت بخوف ورفعت عيونها تفكر بضيقه كيف تحلها

-

دخلت البيت ملاك وناظرت رسالة شادن اللي كاتبه:ماردت

اخذت نفس وجلست وهي تفكر لو قالت له او ما قالت هي متأكده ان جواهر بتخاف من التهديد

رجعت راسها لورا بتعب ولفت لجوالها اللي يدق وعقدت حاجبينها من الرقم الغريب وردت:هلا

نوره:ملاك؟

ملاك:وصلتي

نوره:انا أم ساري زوجة عقاب

سكتت ملاك ثواني:ياهلا

نوره:كيفك وكيف اخوك؟

ملاك:حمدلله كلنا بخير

نوره:اذا سمح وقتك ووقت اخوك تنورونا ببيتنا

عقدت حاجبينها ملاك:مافهمت

نوره:نسولف ونتعرف عليكم وعقاب طالب مني اعزمك واعزم اخوك

هزت راسها ملاك بهدوء:ان شاء الله على خير اشوف وقتي وابلغك

نوره:بإنتظارك

قفلت ملاك ورفعت حاجبها بصدمه وابتسمت هي جربت كثير تدخل بعوايل ويرتاحون لها وفعلاً يعزمونها فضولاً لحياتها لكن ماتوقعت ان عقاب يكون سهل كذا

وقفت ومشت لغرفة منيف تشوفه قاعد بالظلام على جهازه ولابس سماعات وواضح يسمع اغاني لانه بهز راسه بطرب ودقت كتفه وفز ينزل السماعه:بسم الله

ملاك:طربان

ابتسم:اي قاعد اطير موقع واحد ابن كلب نصاب

ملاك:عساك عالقوه ، معزومين

منيف عقد حاجبه:على وين ؟

ملاك:ببيت العميد عقاب بن جراح

منيف رفع حاجبه:عايله جديده 

ملاك:اي وبعطيك شغل تسويه

منيف:تدخليني بسوالف انا ماودي فيها

ملاك:جيب لي فيديو حلو يستاهل يندفع عليه مليون وتبشر بالخير

تنهد منيف ولف لها:من البنت ؟

ملاك:أصايل عقاب بنت العميد

تأفف منيف وهزت كتوفه ملاك:قدها

منيف:طيب متى ؟

ملاك:حدد وقت انت وبلغني

خرجت تاركته ولف يرجع يلبس سماعته على اذنه

-

وقفت ملاك تناظر دوام ساري ولفت تشرب قهوتها وهي بسيارتها وناظرت الوقت اللي مشى وانتهى وقت الدوام وبدأ الموظفين بالخروج ناظرت سيارة ساري اللي لا زالت بالمواقف ولبست نظارتها من خرج ومشى لسيارته وخرجت بعده بنت من جنسيه عربيه وابتسمت ترفع كفها له وتركب مع سياره وابتسم يشغل سيارته وحركها ومشت خلفه ملاك وضحكت:عيال العميد وعيال العميد بالنهايه كل واحد يلعب بذيله

شافته رايح لطريق بيته ولفت ترجع لبيتها هي من فتره تراقبه وتعرف انه يتأخر نص ساعه بعد انتهاء العمل واليوم لمحت سبب التأخير

ونزلت جوالها تدق على شادن وهي تسوق وردت شادن:شصار معك؟

ملاك:مضبط وحده عربيه ماعرفت شتطلع بس ماهي سعوديه

شادن:طيب ؟

ملاك:شعرها طويل اشقر غالباً بتعرفينها ما تلبس عبي وباقي الموظفين سعوديين

شادن:طيب بكره اروح واشوف عن قرب

ملاك:تمام كلميني بكره

شادن:شصار على موضوع أصايل ؟

ملاك:مسألة وقت ، جواهر ما وصل تحويلها ؟

شادن:لا للحين

ملاك:خليها تستخير وش تبيع من اللي عندها

شادن:تبيع ساعه من ساعاتها تجيب مليون وزود

ابتسمت ملاك:وصلت البيت نتكلم بكره

شادن:شفتي ابوي ؟

ملاك تنهدت توقف السياره:شفته

شادن:تهاوشتوا ؟

ملاك:لا قهويته وقلطته بمكتبي

تنهدت شادن وضحكت ملاك:ماصار شي بس لا يدري اني اكلمك

شادن:ان شاء الله، علميني وش يصير معك بزوارة بيت العميد

ملاك:اكيد

قفلت منها وفتحت باب سيارتها وناظرت السياره اللي واقفه بنهاية الشارع وحركت وشدت على اسنانها:ما بتفكني انت !

مشت تدخل البيت وتأففت تفكر هو راقبها صاحب السياره وهي تراقب ساري ؟ والا كان يراقب البيت فقط ؟ متأكده ان ثنيان وان اللي بالسياره شخص من ثنيان ومسكت راسها لانه مصرّ ما ينهزم مصرّ يكمل حربه معها

-

خرج ثنيان من غرفته بعد مكالمة طلال وتقدم يدق باب جناح ساري وانتظر وخرج ساري وعقد حاجبينه:شصاير ؟

ثنيان:تعال بتكلم معك

ساري:الحين؟

ثنيان:قفل بابك وامش ياساري

قفل الباب ومشى مع ثنيان وابتعدوا وجلس ثنيان وجلس قدامه ساري:مسوي مصيبه ؟

ثنيان:لا بس بغيت اقولك انت لو مسوي مصيبه احذر

ساري:احذر من وش ؟

ثنيان:في احد يراقبك ويبي طيحتك انتبه ساري تكفى

عقد حاجبينه ساري:من اللي يلاحقني ؟

ثنيان:اعداء لنا ، انتبه احد ياخذ زلّتك ساري تكفى

ساري:ياخي مطلعني من غرفتي الحين وتقولي احد يراقبني وانتبه وش العلم ثنيان ؟

ثنيان:انا نفسك ما ادري لكن في احد يترصدنا ويبي طيحتنا انتبه تزلّ

سكت ساري وهمس ثنيان:سمعت ؟

هز راسه ساري ووقف ثنيان يتركه وسكت ساري واخذ جواله بتوتر يحك جبينه ورجع غرفته دخل وناظرها تحط كريم:مين اللي دق ؟

ساري:ثنيان

جنى:وش عنده الحين؟

ساري:بغاني اسوي له شغله

سكتت جنى وهي تمسح يدينها ومشى ساري يحط جواله بالشاحن وينسدح وتقدمت له جنى:ساري لا تنسى موعدنا بكره تكفى

ساري:اي موعد ؟

جنى:من الحين نسيت ؟ موعد الدكتوره اللي بتشوف موضوع الحمل

ساري اخذ نفس:طيب

جنى:وجوالك لا تقفله بشغلك عشان ادق عليك

ساري:انا اقفله عشان ماتدقين علي

جنى:ساري !

ساري صد ينسدح بدون رد وناظرته جنى وتأففت تطفي اللمبه وتنسدح جنبه

-

تمشي وهي لابسه روبها ومسويه شعرها مَكر وبيدها كوبها وتسوي اكلها ومشغول بالها تفكر في العزيمه اليوم ووش بيصير فيها اكلت قطعة التوست

دخل منيف وناظرها:غتره والا شماغ ؟

ردت وعينها على البيض اللي بالصاج:شماغ

منيف:الشوز شرقي والا عملي ؟

لفت عليه:شرقي

منيف:ما بتجهزين ؟

هزت راسها وتقدم منيف:انتي تدخليني بسواليف رجال وانا مـ

كملت عنه:وانت رجال نفسهم

تنهد منيف:اي بس ماني متعود ، وشيوخ وعيال عز ياخي ليه تدخليني معك ؟

ملاك:صعبتها وهي سهله ، من قالك تصنع شي ؟ خلك على طبيعتك

منيف تنهد وجلست وهي تاكل وتشرب قهوتها وجلس قدامها:سويت الرابط ترا

رفعت راسها له:ذيب ما اخذت وقت

ابتسم منيف:أخو ملاك

ابتسمت له وشربت من قهوتها:ارسل الرابط لي وانا اذا اخذت الرقم الجديد ارسلته لها

منيف:طيب

وقف يخرج من عندها ووقفت ملاك تدخل غرفتها قفلت بابها برجلها وتقدمت تجلس

شغلت اغنيه بجوالها وبدت تحط مكياج وهي رايقه ابتسمت تفك شعرها وتبخره ودق الباب منيف ووقفت تلبس عبايتها:تعال

منيف:هيا جهزت

لبست عبايتها وعدلت حجابها واخذت شنطتها وخرجت معاه:بسياره وحده

منيف؛سيارتك ؟

ملاك:سيارتك ، جديده بدون فايده

ابتسم منيف وركب وركبت جنبه ملاك وهي تفتح شريحتها وتبدلها بشريحه جديده وترسل الرابط لأصايل وكتبت تحت الرابط:سنابي الجديد

قفلت الشريحه المجهوله ورجعت شريحتها وفتحت الشباك ترميها وقفلت الشباك ولفت للطريق

-

نزل ثنيان وهو يشم ريحة البيت عود وبخور وكالعاده ما استغرب ولف لامه اللي واقفه مع الخدامه:ابوي بيجيه احد ؟

نوره:ابوك وانا

ثنيان تقدم لها:من ؟

نوره:عيال مساعد

عقد حاجبه ثنيان وكملت نوره:محامية نهار

جمد وجهه من غضبه وصدمته:وش يبي يعزمهم ؟

لف من سمع ابوه خلفه:وش عليك؟

ثنيان ناظره:وش مناسبة العزيمه ؟

عقاب:ابي اتعرف عليهم

ثنيان سكت يناظر ابوه ولف ابوه عنه لنوره:وصلوا استقبليها

مشى عقاب يخرج ولف ثنيان من نزل ساري لابس شماغه وثوبه ووراه نهار وعقد حاجبينه:عندكم علم وما تعلموني ؟

ساري:توقعت عندك خبر

ثنيان هز راسه بالنفي ومشوا يخرجون ومشى يوقف معهم وابتسم نهار يشوفها تنزل من سيارة اخوها

نزلت وناظرتهم يستقبلونهم وعدل شماغه منيف بتوتر وتقدمت تمشي بكعبها وصدى صوته على بلاط ممر البيت تتردد بأذانيهم من مشيتها وطولها

واخذ نفس نهار يناظرها كانت تمشي بشويش وبخطوات كلها ثقه وغرور وكأنها تمشي على ضلوع قلب نهار من اعجابه بها

تقدمت وعينها على عقاب ووقفت قدامه:العميد ؟

هز راسه عقاب:حياكم الله

ابتعد عنها ورفعت عيونها لثنيان اللي واقف وابتسم نهار:حياك الله

ابتسمت بهدوء وهمست:المتحرش

رفع كفه على راسه يدق تحيه وابتسمت تدخل البيت ولف عقاب لمنيف:ارحب

منيف:البقى كيف الحال ؟

عقاب:نحمد الله ، حياك

مشوا للمجلس ودخل منيف وناظر المجلس الكبير بكنب فخم وطاولات وثريا كبيره وسطه وجدار كتمل طويل قزاز يكشف عن حديقتهم ومواقف سياراتهم وهمس:ماشاء الله

جلس وجلس عقاب وناظرهم ثنيان واخذ نفس يهدي نفسه وجلس مع اخوانه

حك شاربه منيف يناظرهم قدامه ولف لعقاب اللي نطق:وش تشتغل يامنيف ؟

منيف اعتدل بجلسته:والله ياطويل العمر مالي وظيفه لكن مقضي اموري حمدلله

عقاب:مادرست ؟

منيف:دارس علوم حاسب واشتغل شغل خاص اسوي مواقع واعدل امور وحسابات

عقاب:اي زين الله يوفقك

منيف هز راسه وناظر نهار:حمدلله على السلامه انت اللي ملاك اختي مسكت قضيتك ؟

نهار ابتسم:اي والله ماقصرت

منيف:اخر الطيحات ان شاء الله

عقاب:نهار ما طاح وعيالي كلهم لا يمكن يطيحون

لف منيف عليه وابتسم عقاب:عيال العميد

سكت ثواني منيف يناظر عقاب وهز راسه:ونعم

-

ملاك ناظرت جنى اللي تقدمت تدخل بتسلم وظلت جالسه ملاك ووقفت قدامها جنى تنتظر وقوفها

ناظرتها ملاك تذكرها بحركتها ورفعت حاجبها جنى ووقفت ملاك ومدت كفها وصافحتها جنى وجلست وجلست ملاك ولفت لأصايل اللي جنبها:مجربه كعوبهم من قبل بس ما كانت مريحه صراحه بس خيال كعبك

ملاك ابتسمت:ينفع بزواره خفيفه

أصايل:اي

ناظرتها نوره اللي تشرب شاهي:كيف الشغل معك ؟

ملاك لفت لها:حمدلله ماشي

نوره:قبل يومين جلست مع ام عبدالرحمن زوجة اللواء سعد وقلت لها انك كنتي محامية نهار

صدت ملاك من طاريهم وكملت نوره:وقالت انها تعرفك وحصل دخلتي بيتهم وعزموك نفس عزيمتنا

هزت راسها ملاك:كان عندهم قضيه وخرجتهم منها

نوره:تدخلين بيوت كثيره

ملاك سكتت تناظر نوره وابتسمت نوره:واضح أطباعك اخذتيها من دخلة هالبيوت

لفت أصايل لامها بذهول وابتسمت جنى وناظرت ملاك نوره وابتسمت بدون ترد ، هي تقدر ترد وتلجم نوره بالرد لكنها تحب رد الافعال ومتأكده انها فتره قصيره وبتكون زوجة عقاب وتاخذ اللي تبيه

شربت من فنجانها بدون ماترد وصدت بنظراتها

ولفت من سمعت صوت عقاب:أصايل

ابتسمت ووقفت أصايل تخرج وناظرته

اشر عقاب:بدخل

أصايل:اوكيه دقايق

دخلت تناظر ملاك اللي تلبس:ابوي بيدخل

تقدم عقاب يسمعها تقول:البيت بيت العميد

رفعت راسها من دخل وناظرها عقاب:الشاهين

ابتسمت ملاك وتقدم عقاب يجلس بجانب نوره ولفت ملاك من دخل ثنيان ووقف يناظرهم

ناظرها ثنيان وظلت تناظره ملاك لثواني وصدت عنه لعقاب

عقاب:اخوك ليه ما توظف؟

ملاك:لقي وظايف كثيره بس يحب يسوي شغله بنفسه

عقاب:اذا احتاج وظيفه علميني يلقاها جاهزه

رفع حاجبه ثنيان يناظر عقاب وابتسمت ملاك:ماتقصر

-

نهار رفع نظره لمنيف:حياك نتمشى برا

وقف منيف وناظرهم ساري اللي طلع جواله وخرج نهار ومشى معه منيف

ابتسم نهار:انا الوحيد اللي معك بالعمر

ضحك منيف وناظره:ماشاء الله اخوانك كبار

نهار:تعال استفيد منهم بشي ؟ ولاشي

ابتسم منيف يمشي مع نهار:يكفي عزوه

هز راسه نهار وكمل منيف:يعني انا تمنيت يكون عندي اخوان اكثر

نهار:الحين تتزوج اختك وتصير انت ونسيبك اخوان

ضحك منيف:هذا اذا تزوجت ملاك

ابتسم نهار يحك جبينه:ماتدري وين نصيبها

هز راسه منيف:الله يرزقها

نهار:لافضيت وكنت فاضي كلمني اعزمك بالنادي عندنا تنبسط صدقني

منيف:ماني مع الناس واجد

ضحك نهار:تغير جو

منيف هز راسه وطلع جواله نهار:بنشب لك لا تحاول تصرفني

ضحك منيف ونطق نهار:عطني رقم جوالك

املاه منيف ودق نهار عليه وضحك منيف يطلع جواله:مافي ثقه ؟

نهار ابتسم:هذا اول اختبار ثقه بيننا وطلعت قدها

منيف ابتسم:قدها ان شاء الله

-

وقفت ملاك ووقف عقاب معها:نشوفكم مره ثانيه

ملاك:على خير ان شاء الله

عقاب تقدم قبلها ومشت ملاك خلفه ناظرت ثنيان اللي واقف وابتسمت له وخرجت مع عقاب

لف لها عقاب من خرجوا وناظرها:عندي محل تجاري بشارع عام ماطلع له صك وبيعطلني ، تحلينها ؟

ابتسمت له:انا الشاهين

ابتسم عقاب يهز راسه لها:تعرفين الفرق بين العقاب والشاهين ؟

ملاك:اعرف ان العقاب يحلّق اعلى وفريسته اكبر واقوى من الشاهين

سكت عقاب وابتسمت ملاك:بس الشاهين يظل شاهين يالعميد

ضحك عقاب وهز راسه:مريني يالشاهين النادي ان قدرتي عندي شغل فيه ونتكلم بعدها

هزت راسها ورفعت راسها لثنيان اللي واقف خلف الزجاج يناظرهم ولفت لعقاب:شكراً على العزيمه

هز راسه عقاب ومشت ملاك ولفت تناظر نهار ومنيف من بعيد ولف منيف لنهار يصافحه:ان شاء الله على خير

نهار:فمان الله

مشى منيف يطلع مفتاحه ويفتح سيارته ورفع كفه يسلم على عقاب وابتسم له عقاب وركب منيف وركبت جنبه ملاك وناظرت عقاب اللي واقف وخرج منيف من بيتهم وابتسمت ملاك

لف منيف عليها:اقسم بالله متلهف لغرفتي كأني تارك زوجتي

لفت عليه ملاك وضحكت:يبي لي دايم اطلعك غصب لين تتعود

منيف فصخ شماغه عن راسه وحطه بحضنه:رسميات ورجال والله مالي بها

ملاك:ما قال لك شي عقاب ؟

منيف:شغل وما شغل وش سواليف الاغنياء يعني ؟

ملاك:قالي اذا تبي وظيفه فهي عنده

منيف هز راسه:قالي وش يشغلني عنده يرحم لي والديك خليني بغرفتي استر لي

ملاك صدت عنه وناظرت جواله ترسل لشادن:وش صار على جواهر ؟

ردت شادن بعد ثواني:ما وصلني شي للحين

اخذت نفس ملاك وقفلت جواله وهي تفكر

-

ناظرت الشقه ولفت له:بيع

رفع حاجبه:خساره اخت جواهر بتخسرين نص قيمة شرائك لها

جواهر:بيع قلت

سكت وهز راسه واخذت نفس جواهر ومد لها الاوراق ووقعت على البيع وناظرها:ايداع المبلغ خلال ٢٤ ساعه بحسابك

جواهر:ما ابي تأخير

هز راسه وخرجت جواهر وركبت السياره وفتحت على صورتها مع ثنيان تناظرها وكتبت لصاحب الرقم

:٢٤ ساعه ويوصلك المبلغ اذا لقيت تهديد من جديد صدقني بلقاك وبموتك بيديني

لفت شادن من وصلتها رساله وابتسمت:على أمرك

لفت لجوالها ترسل لملاك:٢٤ ساعه وبتحول

ابتسمت ملاك ورجعت راسها لورا تناظر السقف مو اول مره تخطط لمليون ويجيها ومو اول مره تسدد لمنصور من ملايين ناس ما تفرق عندهم المليون من اول مادخل منصور خلت كل تركيزها على بنات وعيال الشيوخ اللي يصرفون المليون بدون حسره وحطت المليون فوق المليون وسددت نص ديّة منصور وما زالت في مطلب انها تسدد النص بسهوله اذا تزوجت عقاب بتقدر تجيب نص الديّه بشهر

اخذت نفس ولفت من خرج منيف:فتحت سنابها

هزت راسها:جايتك

دخل منيف يناظر سناب أصايل اللي دخل لها ودخلت ملاك:هي غبيه والا انت ذكي ؟

ابتسم منيف:انا ذكي الرابط اللي ارسلته لك رابط يشبه سناب وخليتها تضطر تدخل يوزرها وباسووردها ودخل لي على طول سنابها

هزت راسها تناظر صورها:دور اللي يقدر يكون ضدها

منيف:لا تدخليني بالمواضيع ذي

ملاك:لا ادخلك ؟ انت اللي بتهدد وبتستلم المبلغ وكل شي انا مشغوله مع الراس الكبير

منيف:اي خلي شادن تدبرنا

ملاك:شادن عندها اللي يشغلها

منيف تأفف وشدت على كتوفه ملاك:لا تضعف عند صورها اهم شي ياكوتش

مارد منيف وضحكت ملاك تخرج ودخلت غرفتها تجلس وتحط ميك اب وتلبس عبايتها وحجابها وتاخذ شنطتها وجوالها وتخرج من البيت

لبست نظارتها وهي تراقب المرايه والسياره اللي خلفها وضحكت:يالله لقيت اللي تدور عليه

حركت وحركت خلفها السياره وابتسمت ملاك

-

ناظر الصور منيف كانت صور عاديه صورها بفساتين وتنانير قصيره وبناطيل وشورتات وكل اشكال الملابس وكأنها عايشه في بيت مصمم ازياء ، السفرات والطلعات واعياد الميلاد حياه اقل ما يقال عنها بذخ

رفع حاجبينه يتأمل سفراتها لين وصل لسفرة الصيف وعض شفته من طلعت له صورها على البحر وتأفف يصد:اشغلتيني يا ملاك اقسم بالله

لف يحفظ الصور ويحاول ما يتأمل شي وارسلها على جواله الثاني وركب شريحه جديده وبلع ريقه بتردد وقفل الجوال بدون يرسل شي

لف يناظر بقية صورها مع اهلها وابوها ، راكبه فرس وتلعب تنس ، تسوق سياره وراكبه طياره

كانت مدللـه والدلال واضح عليها شغل مقاطعها يشوفها تغني بحفلات وترقص مع صحباتها ، وقف على فيديو يشوفها تحط ميك اب بغرفتها على صوت اغاني وغرفتها خلفها مليانه شنط وشوزات وملابس وعطور

كمل يتأمل بقية صورها مع قطوه صغيره ملبستها عقد مميز أخضر وواضح سعره من شكله وناظرها كيف متصوره مع القطوه وحاضنتها وتبوسها وابتسم يهمس:وش سوت القطوه عشان يحطها ربي عندك ؟

كان يقصد ان القطوه تعيش حياه هنيّه مُترفه وضحك واخذ نفس ياخذ الجوال ويرسل صورتها بدون كلام

وتنهد يناظر صورها بشاشة كمبيوتره وهز جسمه بالكرسي يتأملها لف لجواله الاساسي من جاته رساله واخذه يناظر رقم نهار:الهكر منيف ؟

بلع ريقه ورفع عيونه على صور أصايل ورجع يناظر رسالة نهار اللي ارسل:اذا فاضي بمرك نمشي للنادي

توتر ووقف يكتب له:مشغول والله

نهار:اعرف شغلك انا

بلع ريقه منيف وكمل نهار يرسل:بمرك ولا يكثر مشوار صغير

منيف قفل كمبيوتره من شاشته وهمس:ياخي مو وقتك

ارسل لنهار:طيب استناك

اخذ نفسه ومشى يغير ملابسه واخذ جوالاته وخرج من دق نهار وناظر سيارته وابتسم نهار يفتح شباكه:حيّ الهكر

ابتسم منيف بهدوء وركب بجانبه ولف لنهار:ماشاء الله على البركه السياره اصدار جديد امداك ؟

ضحك نهار:حجز ياطويل العمر من وهي تتصنع خاطري فيها

منيف رفع حاجبينه وكمل نهار:احاول اطلع جنوني قبل ارجع لشغلي

منيف ناظره:عسكري ؟

نهار هز راسه:بالقوات المسلحه

منيف:الله يوفقك

نهار:اللهم امين

-

دخلت ملاك النادي وناظرت الناس اللي بالمكان وتقدمت تدخل مكتب عقاب ورفع راسه عقاب :ياهلا

دخلت وقفلت الباب وتقدمت تجلس امامه وهو بيده اوراق:وش تشربين ؟

ملاك:قهوه

عقاب رفع تلفونه ولفت ملاك تناظر النادي مع زجاج مكتب عقاب ودخل العامل بالقهوه واخذتها ملاك وتقدم عقاب:اي يالشاهين

مد لها الورقه واخذتها تناظرها وكمل عقاب:راجع لي محامي بالصك بس ما طلع ومتعسر

ملاك شربت من قهوتها وعينها على الورقه:ماراجع لو راجع كان طلع

عقاب:حليها

ملاك هزت راسها:ان شاء الله

عقاب:تبين تمشين بالنادي ؟

ابتسمت ملاك:اكيد

حطت الورقه بشنطتها وخرجت معاه ونزلوا للنادي يمشون وناظرت الخيول والشباب والبنات اللي يتدربون

ولف عقاب عليها:تمنيت خلفتي بنات

لفت عليه ملاك وعقدت حاجبينها:ليه ؟

عقاب:يعني لو إن عيالي كلهم مثل أصايل كان حياتي أحسن

ملاك ابتسمت:أصايل تقولك أحبك لكن العيال يفعلونها لك

عقاب:بس يتعبوني ، يتعبوني واجد

ملاك:رجال ، ما يحبون ينحطون تحت حدود

عقاب هز راسه بهدوء ولف يناظرها وابتسمت بهدوء ملاك تناظر المكان وعقدت حاجبينها من شافت منيف

ولف عقاب على مكان نظرها وناظر نهار ومنيف داخلين الاسطبل ولف نهار من شافها واقفه مع عقاب وعقد حاجبينه

تقدم عقاب ومشت معاه ملاك وناظرت منيف

نهار:ابوي !

عقاب هز راسه وناظر منيف:عزمك نهار ؟

ابتسم منيف:غصبني قصدك

ضحك نهار:ماكان وده جبته غصب

ناظرته ملاك وسكت منيف يصد بتوتر وناظر ملاك نهار:عندكم شغل ؟

هز راسه عقاب ولف من ناداه من خلفه شخص:ابو ساري

ابتسم عقاب يصافحه ولفت ملاك لمنيف وهمست:وش صار معاك ؟

سكت منيف ولارد عليها وهو يناظر عقاب

ابو نواف ابتسم يناظر منيف وملاك:هذولا الاهل الجدد ؟

عقد حاجبينه عقاب ولف نهار يناظر منيف وملاك وكمل يضحك ابو نواف:صرنا نسمع من الموجودين هنا يا ابو ساري ؟ افا

عقاب:وش تسمع ؟

ابو نواف اشر على ملاك:ماهي زوجتك ؟

جمد وجه عقاب وعقد حاجبينه نهار وتقدم:وش تخربط ؟

لف منيف لملاك اللي واقفه وشد على قبضة يده من توتره

ابو نواف:والله ماجبت شي من عندي وظنيت ان كلامهم صحيح لاني شفتكم سوا من جديد

عقاب:من قالك هذا الكلام؟

ابو نواف:كل اللي بالمكان يعرفون يا ابو ساري بس استغربت انك ما اعلنت للحين

نهار:يعلن وش يعلن وش ؟

عقاب لف لنهار:نهار !

ناظره بحده وسكت بغضب نهار ولفت ملاك تخرج من المكان ومشى نهار خلفها يناديها

لف عقاب لمنيف:هذا اخو ملاك محامية نهار عندك ، اسأله من اكون

اخذ نفس منيف يناظر عقاب اللي يناظره وتوتر يناظر ابو نواف:اختي تشتغل مع العميد مابينهم الا شغل

ابو نواف عض شفته:من نشر هالكلام ؟

عقاب:من ما يكون الكلام غلط ولا اسمح انه ينقال

-

خرجت من شنطتها مفتاحها ولفت لنهار اللي يركض خلفها ولفت له:نعم نهار نعم ؟

وقف نهار قدامها:ليش تطلعين من المكان ؟

ملاك:يعني ماسمعت اللي يقوله ؟ وش يقعدني ؟

نهار:اي تقعدين لانهم هم المفروض اللي يطلعون ويستحون من انفسهم وهذا اللي وقف قدام ابوي البجيح بكسر خشمه

ملاك:لا تكسر شي خلني اروح

فتحت بابها وقفله نهار واخذت نفس ملاك وناظرت نهار:نهار !

نهار:ياخي افهميني ماودي تروحين

ملاك ناظرته وكمل نهار:ادخلي واكسري خشومهم

ملاك:لو بروح بروح عشان ما احط عيني بعين ابوك بس

نهار:ابوي اكبر من انه يتأثر بإشاعات كلب اللي طلعها

ملاك صدت عنه ورجع ناظرها نهار:تكفين ادخلي ، ادخلي لا تحرجيني مع اخوك

ملاك اخذت نفس ورجعت تمشي معه وابتسم نهار لين دخلوا وناظرها عقاب وصدت عنه

لف منيف عليها:ليه تطلعين ؟

ملاك:خلاص منيف

تركته ومشت تجلس ولف منيف لنهار اللي دق كتفه وناظره واشر له نهار يدخلون الاسطبل

تقدم عقاب وجلس جنب ملاك اللي صاده تناظر نهار يعلم منيف على الخيل

عقاب:السموحه لو ضايقك الموضوع

لفت عليه ملاك:ماضايقك ؟

هز راسه بالنفي عقاب وسكتت ملاك تناظره وكمل عقاب:متعود على اشاعات تطلع علي دايم

ملاك سكتت وصدت عنه وكمل عقاب:اشاعات فتره وتختفي

ملاك:وانا ما عشت اشاعات من قبل وماودي اعيش ، سمعتي وسمعة شغلي تهمني

عقاب هز راسه:نسكّتهم اجل نسكّتهم

لفت تناظره ملاك ولارد عقاب يصد عنها ولفت تناظر منيف ونهار مافهمت مقصده الا بمقصد واحد ان الاشاعه تصير وهالشي زرع داخلها انتصار ورا كل طموحها ومحاولاتها هي كل مالها تقترب شوي شوي من رغبتها

-

يكلم ويناظر جواهر اللي تسوق وهو خلفها:وينهم الحين ؟

طلال:اخر شي قالي انهم بالنادي كلهم بعد ماخرجت ملاك لحقها نهار يكلمها ودخلت معه

هز راسه ثنيان من وقفت بالاشاره جواهر وهو خلفها:خله يعرف وش صار داخل بينهم وعلمني

طلال:ابشر

قفل ونزل من سيارته بالاشاره ودق على شباك جواهر ولفت بصدمه تناظره واشر لها انه خلفها وظلت تناظره بصدمه ورجع يركب سيارته وبلعت ريقها تشوف سيارته خلفها ومشت من انفتحت الاشاره وسبقها ثنيان بسيارته ولحقته لين وقفوا عند البحر ونزل ونزلت جواهر وقفل بابه ثنيان:وش تسوين بالشقه حقتك ؟

جواهر:بأجرها

هز راسه ثنيان يناظرها:توقعين صك بيع ؟

اخذت نفس جواهر تغمض عيونها وتقدم ثنيان:ليه تبيعين شقتك ؟

جواهر:احتجت فلوس بس

ثنيان:احتجتي فلوس ؟ صاحيه انتي ؟

جواهر صدت عنه ومسك ذراعها ثنيان:علميني وش اللي صاير

جواهر ناظرته بخوف وهزها ثنيان:انطقي

جواهر:في احد يهددني

هز راسه ثنيان وضرب كبوت سيارتها بقوه بغضب وصدت جواهر بخوف تبكي واخذ نفس بغضب ثنيان:انا قلت قلت والله ما تخليني

لف لجواهر:ليه ما علمتيني ؟

جواهر:خفت خفت ثنيان ماكان عندي وقت

ثنيان:وش قايل لك من قبل انا ؟ هاه ؟ وش قلت ؟ قلت اي مصيبه تطيحين فيها تعالي قولي لي انا اطلعك منها

جواهر صدت تمسح دموعها وتقدم ثنيان:قولي ما حولتي

جواهر ناظرته وسكتت وهمس ثنيان:حولتي ؟

هزت راسها وصرخ ثنيان يصد عنها ورجفت بخوف جواهر:ثنيان !

ثنيان ناظر البحر بغضب ولف لجواهر:عطيني الايصال

جواهر:ثنيان لا يرسلون شي لابوي تكفى خلاص قالوا بيتركوني بحالي

ثنيان رفع عيونه بحده:هاتي الايصال قلت

مشت لسيارتها واخذت جوالها وورته الايصال وقرأ البنك والإسم ومد جوالها:ارسليه لي الحين

مشى بيركب ونادته جواهر وهي تبكي:ثنيان !

تنهد من سمع صوتها ولف لها يناظرها تبكي وتقدم لها يحضنها وبكت وهي بحضنه واخذ نفس:ما بيصير شي لا تخافين

جواهر:خايفه ثنيان

ثنيان:بحلها

ابتعد عنها يناظرها وهزت راسها جواهر ومشى ثنيان يركب سيارته وحرك وناظر جواله اللي يدق ورد

طلال:خرجت لوحدها والباقين داخل

هز راسه ثنيان وقفل جواله ومشى بسرعه لطريق النادي وناظر سيارتها ومشى خلفها بسرعه وحدّها ولفت ملاك بصدمه تناظره يحدّها وهمست:مريض ذا ؟

ابتعدت عنه تسرع وتتخطاه وتدخل بين السيارات ودقها من الخلف وانصدمت تناظره بالمرايه ناوي يسبب لها حادث ولف بسرعه يحدّها ويكسر مرايتها ويوقف قدام طريقها وضغطت بريك تناظره قدامها ونزل من سيارته ومشى لها يفتح بابها

هزت راسها:عندي داش كام

شتمها وسحبها من ذراعها ينزلها ودفعت ذراعه:انت صاحي ؟ وش تسمي ذا اللي تسويه ؟

ثنيان:اخذتي اللي تبينه من جواهر صح ؟

ملاك:ما اخذت شي

ثنيان:انكري لكن والله لاطلعك من تحت الارض تفهمين ؟

ملاك:لا تلعب معي قلت لك ، وسيارتي بتصلحها تفهم ؟

ثنيان:ادعسي فوق راسي واصلحها

ملاك ناظرته بيمشي:أمّن على اخوك ساري بس

لف لها وابتسمت ملاك تغيضه وتقدم لها بغضب:تلعبين معي ؟

ملاك:مهما حاولت ياولد العميد انا اقوى منك لذلك وخر عن طريقي

ثنيان رفع كفه يمسك فكها يردها على سيارتها وغمضت عيونها بألم وناظرته يناظرها من قريب:والله لأصير كابوسك والله

بعدت كفه عن فكها بقوه وناظرها ثنيان وهز راسه وركبت ملاك واخذت نفس بغضب تشوفه يحرك وناظرت مرايتها واخذت جوالها تشوف رسالة شادن:ارسلت لي سكرتيرة ساري عندي صور

ضحكت ملاك تحرك سيارتها ودقت على شادن وردت شادن:قبل شوي طلعت من عندها

ملاك:وش صار معك؟

شادن:عشانها مقيمه هنا ميته على ريحة الريال ، وطلع فعلاً ساري ماخذها مسيار عطتني جهازها وشفت الصور

ضحكت ملاك:حماره

شادن:اول ما اخذت الصور قلت لها بلطي البحر

ملاك:دام وجهها مكشوف هدديها اجل نخرج منها كم ريال

شادن:طيب

قفلت ملاك وابتسمت تسوق سيارتها بدت تطيحهم واحد واحد مسكت فكها بقوه من الألم وتأففت من طاري ثنيان

رجع ظهره لورا من ارسلت علامة استفهام واخذ نفس يرسل:حولي لي فلوس والا نشرت الصوره

رفعت حاجبها أصايل:غبيه انتي تسوقينها علي ؟

سكت منيف وبعدها ارسل رقم الحساب وناظرته أصايل وكتبت:انتي وحده من البنات صح ؟

اخذ نفس منيف وفتح الكاميرا يصور سنابها من الكامبيوتر وعقدت حاجبينها تعدل جلستها بتوتر وكتبت:بلا استهبال منال اعرف حركاتك

منيف:٣ أيام يمديك تدبرين المبلغ

أصايل رجعت تناظر الصوره وبلعت ريقها:من وين اخذت سنابي ؟ كيف قدرت تفتحه ؟

منيف مارد وقفل الجوال ووقفت أصايل بخوف تدور بالغرفه وناظرت صورتها ورجعت تجلس بربكه

تقول لاحد من اهلها والا بتصير كارثه تحلها هي لحالها وخلاص والا وش بتسوي

الموضوع جدي مو استهبال بكت بخوف تناظر صورتها وهزت رجلينها بتوتر تفكر

بكت من خطر ببالها ابوها ورجفت بربكه تفتح الفويس:تكفين منال اذا تستهبلين تراني قاعده ابكي لا تختبرين صبري بسوالفك الخايسه

ارسلت الفويس ولف ياخذ الجوال ويسمع صوتها وهي تبكي وبلع ريقه مايرد عليها

وصرخت تبكي أصايل من سمعها ولارد وجلست وهي تبكي:اوف اوف

مشت بالغرفه وهي تفكر تقول لنهار او لثنيان اخذت نفس تهدي نفسها ورجعت تناظر الرقم تحاول تطلع له اسم بس ما كان يطلع له اسم

-

ثنيان دخل البيت معصب وناظر نهار اللي خارج:وين ابوي ؟

نهار:وش فيك ؟

ثنيان:اخلص وين ابوي ؟

نهار:بمكتبه

ثنيان:لعد اشوفك تحوم حوالين المحاميه ذي ، تفهم ؟

نهار:ليه وش صاير ؟

ثنيان:اسمع مني ولا تسأل

تركه ومشى ثنيان يدخل لعقاب ورفع راسه عقاب من دخل ثنيان:شعندك ؟

ثنيان تقدم له:بتكلم معك بموضوع

عقاب ناظره وجلس ثنيان:البنت اللي تحوم حوالينك

عقاب:انت مازلت في نفس الموضوع ؟

ثنيان:ابوي افهمني تكفى ما اجيب شي من راسي ، البنت نشرت اشاعه بالنادي عند بزارين الضباط انك متزوجها عشان تنتشر الاشاعه وتضطر تسكتهم او حتى تدخل الفكره براسك

هز راسه عقاب؛وبعد ؟

تنهد ثنيان:ابوي البنت ماهي زينه تكفى افهمني ، انت اسأل عنها وتعرف

عقاب:سائل عنها واعرف عنها كل شي

ثنيان:تدري انها ما تاخذ الا قضايا تخص الشيوخ وتدخل بينهم وش رغبتها يعني ؟

عقاب:تمشي شغلها

ثنيان:ابوي يرحم لي والديك صدقني البنت نيتها واضحه تبيك

عقاب:عطني دليل

ثنيان سكت ثواني:ناشره اشاعه بالنادي انها متزوجتك

عقاب:ماهي هي سألت وعرفت ان بندر اللي ناشرها

ثنيان:طيب صدقني انا مستعد اجيب لك عامل رشته هي عشان يبلغ بندر

عقاب:ثنيان انا مدري وش جاك وخلاك تنشب بذا الموضوع بس البنت ماهي راعية هالسوالف وانا ادرى وان طلعت فعلاً لها نيّه شينه لو شوي علينا كان عرفت

ثنيان صد ومسك راسه وناظره عقاب:لكن تبي اخذ بكلامك واسمع منك بختبرها

لف ثنيان عليه وهز راسه عقاب:اذا نيتها تبيني فعلاً ما بتوافق على ذا الطلب

ثنيان:وش الطلب ؟

عقاب:اخطبها لك

سكت ثنيان بصدمه وجمد وجهه ودخلت الخدامه بشاهي عقاب وحطته على المكتب

كمل عقاب:واذا وافقت عليك فهي لك مابها رجوع ولا تقول لا بعد ما اخطبها

ثنيان:مستحيل توافق علي مستحيل البنت ماتبي الا انت

عقاب:طيب نخطبها ونشوف

ثنيان هز راسه:بس صدقني كلامي كله صح

وقف ثنيان وخرج من عند عقاب واخذ نفس عقاب يراقب محل ثنيان

-

نهار ناظر امه اللي ركبت معه:حيّ الشيخه ام نهار ، كيف الجَمعه ؟

نوره:ماعندهم من جديد كل سوالفهم نفس بعض

نهار ابتسم يسوق وناظرته نوره:وش جابك انت غريبه ؟ يوم قال حمدان نهار بيجيك ماصدقت

نهار ضحك:شدعوه يالغاليه بغيت اسولف معاك شوي

نوره:اي باين تبي سوالف وش نيتك هالمره ؟

نهار:نيتي ودك بها من زمان

ناظرته نوره وابتسم نهار:تخطبين لي

نوره ضحكت:ما اصدق لا تمزح معي

نهار ضحك:والله صادق ابيك تخطبين لي

نوره ناظرته بذهول:ابوك جبرك ؟

نهار:ليه مو مصدقه ان انا ودي ؟

نوره:ابرك الساعات امي انت بس مصدومه

نهار:حتى انا مصدوم بس ابي البنت قبل تطير مني

نوره ابتسمت:يالمشاكس اثاري فيها بنت

نهار ابتسم:ومو اي بنت

نوره:من بنته ؟ نعرفهم ؟

نهار:اي تعرفينها

نوره:ومن تكون ؟

نهار ابتسم:ملاك

نوره رفعت حاجبينها:اي ملاك؟

نهار:محاميتي

نوره:اووه بنت مساعد

نهار هز راسه واخذت نفس نوره:مو بطاله البنت زينه وثقيله وراعية خير ماهي مشفوحه لكن في احلى خل اختار لك على ذوقي

نهار:اذا على ذوقك ماني متزوج

نوره:شدعوه امي ؟ والله زين ذوقي

نهار:ابي ملاك

نوره:الله أكبر يالصمله

ابتسم نهار:تكلمين ابوي ؟ والا تقيسين نبضها ؟

نوره:لا اصبر اتكلم مع ابوك بالاول

نهار هز راسه:بس لا تبطين تكفين امي

نوره:الصبر زين الصبر زين

نهار ضحك ولف لطريقه يسوق لين وصلوا للبيت ونزلت نوره تدخل البيت

تقدمت الخدامه تاخذ شنطتها:بابا عقاب يبغاك في مكتب

نوره هزت راسها ومشت لين المكتب ودخلت

رفع راسه:خلصتي عزايمك؟

تقدمت وجلست:الله والعزيمه لو مو رايحه احسن

عقاب:ليه

نوره:سوالف حريم ، المهم انت وش بغيت ؟

عقاب اخذ نفس:بخطب لثنيان

نوره:شاورته ؟

عقاب هز راسه ورفعت حاجبينها بصدمه:صادق؟

عقاب:صادق

نوره:غريبه وافق ، ماكان يبي

عقاب:اقنعته

نوره:من بتخطب له ؟

عقاب رجع ظهره لورا:ملاك بنت مساعد

تغير وجه نوره وسكتت وناظرها عقاب:ليه سكتي ؟

نوره:نهار يبيها

عقد حاجبينه عقاب:يبي من؟

نوره:ملاك

عقاب سكت وكملت نوره:قبل شوي كلمني وقالي كلمي ابوي

عقاب هز راسه بالنفي:ما تنفع له

نوره:وليه ؟ دام نهار بخاطره ملاك وثنيان ماتفرق معه

عقاب:لان نهار بزر مستحيل يكبر ويعرف وش يعني زواج وزوجه والبنت اعقل من شخصية نهار ليه نظلمها ؟

نوره:بس وده بها

عقاب:حتى ثنيان وده بها وبتناسب ثنيان هو عاقل وهي عاقله

نوره:وش اقول لنهار ؟

عقاب:انا اتكلم معه وانا بتكلم مع ملاك

نوره سكتت وهز راسه عقاب:بحلها

تنهدت نوره ووقفت تخرج من المكتب تاركه عقاب

-

دارت بالغرفه وهي تفكر وجلست وفتحت جوالها تحاول تدق على الرقم بس محد يرد عليها

فتحت محادثة الواتس اب تكتب:مين انت ؟

لف منيف يقرأ رسالتها وكتب:حولي الفلوس مو لازم تعرفين

أصايل:تستهبل ؟ تعرف انا بنت مين ؟

منيف:العميد عقاب واخوك ضابط بالقوات المسلحه

سكتت أصايل بخوف وكتبت:انت من اعداء ابوي ؟

ضحك منيف من اسلوبها وفتح الكمبيوتر ولارد عليها

ناظر صورها الباقيه واخذ الجوال يصور لها من الكمبيوتر صوره لها وهي تشرب ماتشا وارسلها

وناظرت الصوره بربكه وتوتر وارسل بعدها:تشربينها بكل صورك وش هي ؟ طعمها حلو ؟

لاحظت انه يستفزها وهزت راسها:بخلي الشرطه تطلع محلك ويشربونك اياها بالسجن ياكلب

ابتسم منيف ولارد ووقفت أصايل تخرج من الغرفه وبلعت ريقها من شافت عقاب طالع وجمدت محلها

ناظرها عقاب ونطق:فيك شي ؟

أصايل هزت راسها بالنفي وتقدم لها يناظر وجهها:وش فيك ؟

أصايل ابتسمت تحك جبينها:دوبي صاحيه بس

عقاب ناظرها وهمس:تعرفين اني اعرف الكذاب من الصادق ؟

بلعت ريقها أصايل:متضايقه شوي مو شي مهم لا تشغل بالك

عقاب سكت ثواني:اكيد ؟

هزت راسها وتقدم يبوس جبينها وابتعد:ان بغيتي شي ابوك موجود

أصايل اعتلت غصتها بحلقها وابتسمت بدون ترد وتقدم يتركها وغمضت عيونها بخوف تمنع دموعها ومشت بسرعه لغرفة نهار ودقت الباب ودخلت

ناظرها:وش عندك؟

ناظرته يتعطر:خارج ؟

نهار:اي مع اخو زوجتي

ضحك وغمز لها وعقدت حاجبينها:مين ؟

نهار:اخو ملاك ، منيف

سكتت تناظره وتقدم:شبغيتي انتي ؟

أصايل:خلاص ولاشي روح

نهار:والله ما تطلعين ، تعالي قولي لي وش بغيتي

أصايل ناظرته واخذ كفها نهار وجلس وجلست جنبه بتوتر

نهار:فيك شي ؟

أصايل:وحده من صحباتي قالت لي سالفه وشلت همها جيت اسألك

نهار:وش فيها ؟

أصايل بلعت ريقها:في واحد ما اعرف كيف جاب سنابها ودخل عليه وهددها بصوره لها

نهار:ابن كلب

أصايل:وابوها معروف يعني وماتقدر تشتكي لان بيوصل لابوها خبر اكيد

نهار:ماعندها اخوان يساعدونها ؟

أصايل ناظرته وسكتت وناظرها نهار:حتى الاخوان بلشه يمكن مو متفهمين

هز راسه:عطيها رقمي تكلمني

أصايل:وش رقمك ومارقمك لا طبعاً ماتدري اني كلمتك

نهار:ماني مسوي شي بحلها انا اعرف بقطاع الجرايم اصحاب هناك بيخلصون الموضوع ويجيبونه

أصايل:لا نهار ما اقدر اعطيك رقمها يعني قولي كيف تروح ولمين

نهار:خليها ترسل لي الرقم اللي كلمها واشوف

أصايل بربكه:نهار !

نهار:عندي ياخي بسيطه

أصايل:اخاف يرسل الصوره لاحد

نهار:لا ما يقدر يرسل شي

أصايل:طلب فلوس منها

نهار:ارسل لها حساب ؟

أصايل هزت راسها ونطق نهار:حلو اجل سهالات ارسلي لي وانا احلها ماعليك

هزت راسها أصايل وابتسم نهار:ادعي لي عندي تمرين

ابتسمت له وخرج نهار يركب سيارته وحرك لين وصل بيت ملاك

وابتسم من شافها تطلع من البيت بتركب سيارتها ولمحته ، فتح بابه ونزل:محاميتي

ناظرته ونزلت نظارتها:عسى ماشر ؟

نهار:جاي اخذ منيف

ملاك رفعت حاجبينها:صرتم اصحاب ؟

نهار ابتسم:اسهل شخص يكون علاقات انا

ملاك هزت راسها:علاقاتك ركيكه على كذا

نهار:لا اعرف انقي علاقاتي زين وقد الثقه يكونون

ملاك سكتت تناظره وخرج منيف وناظرهم وتقدم

ناظر ملاك منيف:تبين شي ؟

هزت راسها بالنفي ومشى نهار يركب وركب جنبه منيف

منيف ربط حزامه:ياخي والله ما افهم بالخيول

نهار:احسن لك من قعدة البيت

منيف لف للطريق وطلع جواله نهار ولف منيف:لا تمسك جوالك وانت تسوق

نهار ابتسم:خايف علي والا عليك ؟

منيف ابتسم وناظره:علي انت ما اعرفك الا يومين

نهار ضحك:صحبه ماعليها حسوفه لو انتهت

ضحك منيف:بس ترا انا ماعندي اصحاب مقضيها وحداني

نهار ناظره:ليه بالله ؟

منيف رفع كتفه يناظر الطريق وضرب كتفه نهار:انا جيت اسد مكانهم ولا يهمك

منيف:ياخي شكراً لي سنين واقف انتظرك

ضحك نهار من طنازته ولف لجواله يدق وحطه سبيكر وسكت منيف يناظر اسم صاحب المكالمه على شاشة التلفزيون:وكيل رقيب حمد

صد للشباك ونطق نهار:حيّ حمد

حمد:ياهلا وين الناس ؟

ابتسم نهار:على الفرس وينك انت ؟

حمد ضحك:والله مبطي ماجيت النادي باقي فيه انت؟

نهار:نادي ابوي وش تتوقع ؟

حمد:يبي لي زياره

نهار:بس قبلها ابي منك خدمه حمد ماعليك امر

حمد:تبشر

نهار:ماتقصر ، في وحده منا وفينا صارت لها مشكله وبغينا نحلها بدون حسّ تقدر ؟

حمد:وش المشكله؟

نهار:في ابن كلب يبتزها بصوره

جمد وجه منيف اللي يناظر الشارع وكمل نهار:فتح سنابها واخذ لها صوره وطلب فلوس

حمد:ارسلي لي واشوف

نهار:بس اسمع الموضوع مكتم عليه البنت ابوها معروف

حمد:نجيبه نجيبه لا تقلق

نهار:ماتقصر

نزل انظاره لكفوفه وهو يسمع نهار يكمل المكالمه ويضحك ولف للشباك يناظر الطريق لين قفل نهار ولف عليه:مين اللي يهددها واحد ؟

نهار:صديقة أصايل اختي

سكت منيف وكمل نهار:بس ياخي ذي القصص تصير كثير البنات معد ينتبهون وعيال الحرام واجد

لف منيف للطريق وكمل نهار:لكن والله لو انها أصايل اختي لأطلعه من تحت التراب وادعس على رقبته

مارد منيف وطلع جواله الثاني يفتحه ويناظر محادثة أصايل بجواله وظل يناظر صورتها ويسمع الاغاني اللي يختارها نهار وقفل جواله يحطه بجيبه

-

تسوق وهي تكلم:سددتها الصباح اليوم مليون جواهر

ضحكت شادن:عساها تكفر عن ذنوبها

ابتسمت ملاك وهي تشوف سيارة عقاب عند المكتب:تخيلي من عند مكتبي

شادن:العميد

ضحكت ملاك توقف سيارتها وتناظره واقف:بشحمه ولحمه

شادن:مو صاحيه

ملاك ناظرته وهي تكلم:ماقال بيمر ولا عندي خبر مدري وش عنده

شادن:الله يستر

ملاك:محلوله ماعليك بقفل انا

شادن:طيب

قفلت جوالها ونزلت وناظرته واقفه ومشت له:العميد !

عقاب:قلت شكل ما بتمرين مكتبك وبوقف كثير بس ماشاء الله جيتي

ملاك طلعت مفتاحها:عندي شغل كيف اخلي مكتبي

دخلت ودخل خلفها وتقدمت لمكتبها:حياك الله

جلس عقاب وجلست ملاك:صك جديد ؟

ابتسم:لا

ابتسمت ملاك وناظرته:اجل وش سبب الزياره ؟

عقاب اخذ نفس وناظرها:تذكرين اللي حصل بالنادي وضايقك وضايق اخوك

سكتت ملاك تناظره وكمل عقاب:وقلت لك بنسكتهم دام ماترضينها عليك

ماردت ملاك وسألها عقاب:صح والا مو صح؟

هزت راسها ملاك وتقدم بهدوء عقاب:وجيت عشان نسكتهم سوا

حست بالفرحه داخلها وهي تراقبه يتكلم وتنتظر ينطق بالجمله اللي تبي تسمعها

عقاب:ملاك انا ودي اخطبك

تماسكت عشان لا تبتسم قدامه ولكن جسمها اقشعر من جملته تناظر نظراته لها وكمل عقاب بعد هدوء:اخطبك لولدي ثنيان

جمد وجهها واستنكرت كلامه وهمست:مافهمت

عقاب:انا من يوم شفتك وقلت انك تشبهيني وابيك في بيتي مع عيالي ، ومالقيت احسن منك لثنيان ولدي

بلعت ريقها ملاك تتنفس بتوتر:ثنيان ؟

عقاب:ادري الموضوع صادم بالنسبه لك وبغيتك تسمعينه مني قبل اخطبك رسمي من منيف اخوك ، لكن ودي اعرف اجابتك قبلها

ظلت تناظره بصدمه هي ماكان عندها اجابه لانها ماخططت لخطه غير خطتها ماكان من ضمن خطتها هالحوسه ، ليه يخطبها لولده دامها عاجبته ؟ ليه ثنيان بالذات ؟

عقاب ظل يناظرها ساكته واخذ نفس:ماودي اضغط عليك فكري وردي لي

وقف وناظرته وخرج عقاب تاركها وضربت مكتبها بصدمه ووقفت تمسك راسها

هذي خطة ثنيان اكيد ، هو رسمها يبغى يهزمها لكن مستحيل يصير اللي يبيه ثنيان مستحيل توافق يحكمها غصباً عليه

-

لف لطلال يناظره بحده:كيف ما يطلع ؟

طلال:طالع قدامك ولاشي يدل على شخص الارقام مزيفه وحتى ايبان التحويل دولي وصاحبها ماهو سعودي

ثنيان:اقولك محوله لها انا متأكد

طلال:وانا متأكد ثنيان بس شوف قدام عينك بحثنا مايدلنا على شخص سعودي

ثنيان خبط المكتب:لعنه

طلال:البنت تعرف تخارج نفسها ، محاميه تعرف وين الثغرات وسدتها

ثنيان مسك راسه وهز راسه بتكرار ولف لطلال:بتطيح بتطيح وطيحتها على يدي بس اهم شي اهلي يبتعدون عنها

طلال:قلت لابوك ؟

ثنيان:ماقلت له كل شي بس حذرته وماهو مصدقني

طلال:تبيني اكلمه انا ؟

ثنيان:صاحي ؟ بثواني تفضحني الشيطان

طلال سكت وناظره ثنيان:بس قالي بيخطبها لي واذا رفضت بيعرف نيتها

ضحك طلال:تخيل توافق عليك

ثنيان:مستحيل هذي تبي الفكه مني وش يطيحها عندي

طلال:حذر ساري اخوك تراه ما يحاسب زين

هز راسه ثنيان:اكيد ، بشوفه انا الحين

طلال:فمان الله

خرج من عند طلال وركب سيارته وحرك رايح لدوام ساري وقف ونزل يدخل المبنى وتقدم يناظر المكاتب ودق مكتب ساري ودخل وناظر ساري اللي واقف ومعصب وجالسه بنت على الكرسي تبكي

عقد حاجبينه ثنيان وهمس:وش صاير ؟

بلل شفايفه ساري:ولاشي

ثنيان دخل وقفل الباب:كيف ولاشي

ساري:خلاص روحي

وقفت بتروح ورفع كفه ثنيان:اجلسي اجلسي

لف لساري:اخلص وش صاير

اخذ نفس ساري وسكت ولف ثنيان للبنت:ليش تبكين؟

لفت تناظر ساري اللي يناظرها وسكتت

ثنيان:احد ينطق

ساري:في واحد يهددني

غمض عيونه ثنيان وصد وهمس:الله ياخذك

ساري اخذ نفس وتقدم ثنيان:ماقلت لك انتبه ؟ ماقلت لك حاسب في احد يدور زلتك ؟ ماتفهم انت ماتفهم ؟

ساري لف بعصبيه:انا منتبه بس الحماره ذي باعتني

لف ثنيان لها وبكت:والله مش انا ، ضغطوا علي واضطريت قول الحقيقه

ساري:الحقيقه صورنا ؟ جاوبي صورنا ؟ تبين تخربين بيتي انتي من قبل وحذرتك الا زوجتي

هزت راسها بالنفي:والله مو قصدي خرب بيتك بس حتى انا بيطلبوا مني مصاري

ثنيان:وش مهبب ؟

لف ساري يناظر ثنيان وبلع ريقه ساري يصد وغمض عيونه ثنيان وهمس ساري:يتبرأ مني ابوي لو يدري

ثنيان لف للبنت:مين هددك ؟

رفعت كتوفها:في وحده اجتني وطلبت كمبيوتري وماكنت بعرف انها بدها صور

ثنيان عقد حاجبينه:مين الوحده ؟

مسكت راسها:مابعرف منقبه قالت انها تشتغل بالصيانه

ساري لف لها:تضحكين علي ؟ صورنا وش وداها كمبيوتر دوامك ؟ والله نويتي تبيعيني لكنك غبيه

بكت بخوف:والله لا والله لا

ثنيان:كم طلبت منك ؟

بلعت ريقها:مليون و٢٠٠ الف

ضحك ثنيان بغضب وصد عنهم يشد على فكه ولف ساري:وانا مهدديني بنفس السعر

ثنيان:لا تحول شي تفهم ؟

ساري:معطيني مهله ثنيان تستهبل ؟ شغلي وزواجي وابوي كل شي بينتهي لو تنتشر صوره

ثنيان:هذي ضريبة اللي يخون زوجته

لف ساري للبنت اللي جالسه وصد بتوتر ولف ثنيان يخرج من المكتب ولف ساري للبنت:بحول الفلوس

ناظرته:وانا ؟ من فين لي مصاري ؟

رفع حاجبينه ساري:كان فكرتي قبل تبيعيني

وقفت تناظره بصدمه:اذا وصلت لاهلي يقتلوني

ساري هز راسه وجلس على المكتب:لكل فعل ردة فعل

سكتت تناظره بصدمه ورفع عيونه ساري:اذلفي

هزت راسها:بتضطر تسكتني انا كمان

ابتسم ساري:جربي وتعرفيني وش ممكن اسوي

ناظرته بحده وخرجت تاركته ولف على كاميرات المراقبه يناظر المنقبه اللي دخلت المكتب تتكلم مع البنت وتتصفح اللابتوب

-

هزت راسها وهي تكلم:مستحيل طلبني من ابوه مستحيل

شادن:يمكن ما يدري وابوه خطب بدون علمه

ملاك:مستحيل

شادن:يبي يلعب ؟

ملاك سكتت تفكر وكملت شادن:قال دامها ماسكتني من اليد اللي تعورني انا اعورها

ملاك:وتوقع اني بوافق عليه !

شادن:ما بتوافقين ؟

ملاك:حلم

شادن اخذت نفس:ما اعرف انا زيك مو فاهمه شي

ملاك:كلمي ام زكي خدامتهم يمكن سمعت شي يفيدنا

شادن:طيب

ملاك:اسأليها لو الخطبه صارت بينهم او ما سمعت شي بلغيني شادن ضروري

شادن:طيب اكلمها وارد عليك

قفلت ملاك ومسكت جوالها تناظره ولفت من دخل منيف وناظرته:من وين جاي ؟ توقعتك بغرفتك

منيف دخل وجلس:مع نهار

رفعت حاجبها:وش السالفه ؟

منيف:مدري عنه بس فكيني منه تكفين

ملاك ناظرته وسكتت وكمل منيف:ماني مرتاح كل يوم وهو عند البيت يبيني اطلع معه

ملاك:وليه كل هالضيقه ؟ نهار نفس عمرك

منيف:بس ماهو نفسي

ملاك ناظرته بهدوء:عشاننا نلعب عليهم؟

اخد نفس بضيق منيف يصد عنها وابتسمت ملاك:تعود ، تعود تبتسم ولا كأن داخلك شر وظلمه

منيف لف عليها:قاعد اهدد اخته

ملاك سكتت وكمل منيف:عن اي شر تتكلمين ؟

ملاك:وطول موضوع اخته اصلاً ، ليه ؟

منيف رفع كتفه وكملت ملاك:ارجع اضغط عليها لا يطول الموضوع والرقم لازم ينقفل بدري تفهم ؟

منيف ناظرها وتقدمت ملاك:تفهم ؟

هز راسه ووقف تاركها ودخل الغرفه وهمس:الله ياخذها حاله

جلس على الكمبيوتر حقه وشغلع وفتح جواله ياخذ نفس ويرسل لها

:الموضوع طلع من بيني وبينك صح ؟

رجع ظهره لورا من شافها اون لاين وبلعت ريقها أصايل تقوم من جنب امها وتدخل الغرفه وترد عليه:ما تقدر تنشر شي لي والواضح تعرف مين ابوي والا ما استهدفتني

منيف:اعرفك واعرف اهلك واعرف ان نهار اخوك عنده علم بس العلم انها صديقتك ماهو انتي

غطت فمها بخوف وجلست من حست انها ترجف هو فعلاً يعرفها ومستهدفها وأذكى مما تتوقع

منيف:اطول شنب بالخبر ما يقدر يجيبني واللي ابيه بيجيني يا أخت النهار ، مليون وميتين الف واختفي مثل غروب الشمس

سكتت تناظر الرساله أصايل وكمل منيف:٢٤ ساعه انتظر فيها المبلغ

خرج من المحادثه وقفل جواله ولف للكمبيوتر اللي اشتغل على سنابها ورجع ظهره يناظر الصور قدامه

'

وقف ثنيان بالمواقف ونزل راسه لطلال اللي كتب له:قارنت بين الايبان بقضية اللواء سعد والايبان اللي عند ساري ، مختلفه وكلها دوليه ، ثنيان مالها أي منفذ كل شي متقن

تنهد ثنيان ورجع ظهره لورا وناظر سيارة جواهر توقف خلفه وتنزل من سيارتها وتمشي تركب جنبه

رجع راسه لورا من ركبت ولفت له تناظره بهدوء وظل يرمش بدون ما يتكلم وهو يناظرها وعضت شفتها وهمست:لا تخوفني

اخذ نفس يغمض عيونه وتقدم لها يحضنها ونزلت دموعها بخوف من حضنه وشدت عليه وتنهد ثنيان وهو بحضنها

جواهر:ما بيصير شي يبعدني عنك صح ؟

ثنيان مارد وبعدت عنه جواهر تناظره وعقد حاجبينه من شاف دموعها:ليه تبكين ؟

جواهر هزت راسها تمسح دموعها:انا من يوم وصلتني صورتنا مانمت ثنيان ، انا كل ما سمعت صوت اهلي خفت وفزيت ، خايفه ثنيان خايفه

ثنيان سكت يناظرها وكملت تتمسك بكفوفه:لا تخليني تكفى

ثنيان اخذ نفس يهدي نفسه وشد على كفها:ما بيصير شي ، تكلمين امك تغيبين ليله ؟

مسحت دموعها تناظره:فين بنروح ؟

ثنيان:البحر

سكتت وكمل ثنيان:نبحر انا وياك

ابتسمت وابتسم ثنيان يطمنها وهزت راسها تفتح جوالها وحرك ثنيان سيارته

'

جلست ملاك وقرت رسالة شادن:سمعت جمله وحده عقاب يقول لثنيان اخطبها لك وثنيان قال مستحيل توافق

سكتت تناظر الرساله ملاك بتفكير وكتبت شادن:يختبرونك ؟

ملاك:مدري

شادن:بتنسحبين كالعاده ؟

ماردت ملاك تفكر وقفلت جوالها وحطت راسها تحت يدها تستند وتناظر الشارع مع الشباك

هي دايماً اذا حست ان الامور بتتلخبط وتمشي عكس التيار تنسحب وتترك كل شي وتختفي تماماً من حياة العايله اللي تكون هدفها ، بس هالمره ما وصلت لشي ماتعرف هي وين والتيار لوين بيوديها

غمضت عيونها تشوف نظرات منصور من جديد ولفت لرسالة شادن وفتحتها تشوف ايداع مبلغ مليون وميتين الف من ساري

قفلت جوالها ترجع تلف تناظر الشارع ، هي حتى لو كملت معهم وجربت توافق على ثنيان وش بيصير بعدها ؟ بيقول لا ، او عقاب بيعرف نيتها الحقيقيه ، هي ليش تشوف من عقاب نظرات تفسرها على اساس انها فعلاً بباله وبتفكيره ليه خطبها لثنيان رغم ان كل شي عاشته معاه كان حقيقي

نزلت نظرها لجوالها وفتحت الصور تشوف صورة ثنيان مع جواهر ، الصوره اللي لو تنباع انشرت بملايين لان ثنيان ولد العميد عقاب وجواهر بنت العميد بندر وعقاب وبندر من أثقل البشوت اللي تنلبس بالأماكن

نزلت راسها لشادن من خطرت ببالها فكره جديده

وكتبت:دوري أم جواهر ووصلي لها الصوره بأي طريقه واطلبي المبلغ

عقدت حاجبينها شادن:تصرف مو محسوب !

ملاك:دوري لها ما بتنخلط الامور

شادن:باقي بتحاولين بالعايله ؟

ملاك:ما انتهينا منهم

شادن:اكيد ما بتوافقين ملاك

ملاك ماردت وقفلت جوالها ومسكت راسها تضغط عليه بقوه بتفكير

وقفت تدور بالغرفه ووقفت قدام المرايه تناظر شكلها ولفت تاخذ جوالها وتدور رقم عقاب وفتحت المحادثه واخذت نفس تكتب ورجعت تمسح وجلست ورجعت تكتب من جديد وارسلتها وقفلت جوالها على طول

'

حاط ذراعه فوق كتوفها ومبتسم يسمع سالفتها ورفعت راسها له تناظره:وشريتها تخيل ! حاولت اتجاهل شكل الشنطه بس رجعت وانا احلم فيها ابغاها وماقدرت شريتها لنفسي

ابتسم ثنيان ورفع اصابعه يبعد شعرها وابتسمت جواهر:واستحيت اطلبها منك هديه قلت بصير مرأه مستقله واشتريها لنفسي

ثنيان اتسع مبسمه:طيب أحبك

رفعت نظرها له وضحكت وانحنى ثنيان يبوس خدها واخذت نفس جواهر وهي تسمع دقات قلبها مع صوت الموج اللي حوالينهم من كل الجهات

ورفع عيونه ثنيان يناظر عيونها:انتي بحر وانا ماعندي طوق نجاه منك ، كل ما حاولت اغرق فيك اكثر

جواهر مسكت كفه:وانا ما ابغى تلاقي طوق نجاه مني ابد

ابتسم بهدوء ثنيان وكملت جواهر:خلك غارق فيني ، للأبد

سمع صوت جواله يدق واخذ نفس يقوم من جنبها ونطقت جواهر:ثنيان جيب معاك مويه او عصير نشربه

هز راسه ودخل اليخت واخذ جوالها وناظر رقم ابوه وعقد حاجبينه ورد:هلا

عقاب:ليه جوالك مقفل ؟

ثنيان:مو مقفل بس بالبحر انا مافي شبكه زينه ، بغيت شي ؟

عقاب:بغيتك

ثنيان:صاير شي ؟

عقاب:بنتكلم بخطبتك

سكت ثنيان وعقد حاجبينه وكمل عقاب:بنت مساعد وافقت

جمد وجه ثنيان وسكت بصدمه وكمل عقاب:وانا قلت انها بتوافق لأني أدرى بالنوايا يا ولد العميد

ثنيان مارد وكمل عقاب وهو يسمع سكوته:اطلع على ساحل بحرك وتعال لي

قفل جواله ثنيان وظل يناظره بصدمه وعقد حاجبينه يفكر كيف وافقت وليه وافقت ، معقوله ابوه يكون يكذب او وش النيه بالموضوع

دخلت جواهر وناظرته وهمست:صار شي ؟

ثنيان هز راسه ووقف:ابوي يبيني برجع له

جواهر ناظرته يشغل اليخت:الحين ؟

هز راسه ثنيان وجلست جواهر:ما قالك وش صاير ؟

ثنيان:الا موضوع صكوك واراضي يبيني اشوفها معه

جواهر:والحين لازم ؟

ثنيان:طلبني العميد اقدر اقول لا ؟

سكتت جواهر ولف ثنيان يناظر البحر وهو راجع لمرساه وعاقد حاجبينه يفكر

'

عقاب دخل وناظرهم جالسين ورفعت راسها نوره:وين رحت ؟

عقاب:دقيت على ثنيان يجي

نوره:ليه ؟

عقاب ناظرها ثواني ولف لنهار وأصايل وساري وجنى اللي جالسين:تجهزوا بنخطب لثنيان قريب

لفت بصدمه أصايل:نخطب لمين ؟

نهار:بنت بندر ؟

عقاب:يعقب

نهار:اجل من ؟ هو قال ما يبي الا هي

عقاب:غير رايه

أصايل:هو طلب ؟

عقاب:ليه كل هالاسئله ؟ خطبنا له وخلاص

ساري لف له:من طيب ؟

عقاب لف لنهار:بنت مساعد

سكت نهار ثواني وعقد حاجبينه:من بنت مساعد ؟

عقاب:ملاك

جمد وجه نهار ولفت أصايل على نهار تناظر وجهه وبلعت ريقها ولف نهار لامه اللي تناظره بضيق وهمس:طلبتها انا

عقاب:ادري

لف نهار لابوه وكمل عقاب:لكن ثنيان يبيها واخوك الكبير وانت لاحق على عمرك ندور لك وحده تناسبك

هز راسه نهار:تناسبني ؟

عقاب ناظره:ملاك ما تناسبك

سكت نهار ولف على امه اللي ساكته ووقف وخرج واخذت نفس أصايل تلحقه وشافته طالع من البيت

تنهدت:نهار !

فتح سيارته وتقدمت له:وشفيك زعلت ؟

نهار لف عليها:محد ملاحظ اللي صاير يعني ؟ قايل لك وقايل لامي ابي هالبنت ليه مو ماخذين كلامي بعين الإعتبار ؟

أصايل:توقعتك تمزح نهار وبعدين انصدمت زيك ان ثنيان يبيها

نهار:قلت ابي ويجي ثنيان ياخذها ؟

أصايل:يمكن ثنيان ما خطب يمكن بس ابوي يتكلم ، ثنيان مستحيل يرضى بوحده غير جواهر وكلنا ندري

نهار لف لقدام وسكت وتقدمت أصايل:تكفى نهار لا تروح وتخليني قلقانه عليك

نهار:بروح للخيل

سكتت تناظره وتقدمت تحضنه وتنهد نهار وابتعدت أصايل عنه وقفل بابه وحرك سيارته رايح

خرج من البيت وعقد حاجبينه من شاف سيارة ثنيان داخله وناظر ثنيان اللي ناظره ودخل وخرج من البيت نهار بإنزعاج

وقف ثنيان ونزل ودخل البيت وتقدم يدخل وناظرهم جالسين كلهم وهمس:سلام

لفت أصايل تناظره وتقدم يجلس وناظره عقاب:متى يناسبك نروح نخطبها ؟

ثنيان:نخطبها ليه ؟

عقاب:لان بيننا كلام ياولد العميد

ثنيان بلع ريقه واعتدل:ابوي انا قلت نيتها اللي واضحه لي وللحين عند كلامي

لف عقاب يناظر جنى ووقف:امش نتكلم لوحدنا

أصايل ناظرتهم:عادي اجي ؟

هز راسه عقاب يمشي ومشت أصايل معاهم ووقفت نوره تطلع معهم

ولفت جنى لساري:شدعوه لو صرفوني اسهل

'

دخل ثنيان المكتب وجلست أصايل تناظره واقف ودخلت نوره:عقاب

عقاب:لا تخلطين المواضيع احنا في ثنيان الحين

سكتت نوره ونطق عقاب:قلت لي ابوي هي تبيك هالبنت وحاطتك هدفها ولو تقدمت لها انا مستحيل توافق علي وش رديت عليك ؟

سكت ثنيان يناظره وكمل عقاب:وش رديت ؟

اخذ نفس ثنيان:قلت بتصير لك ومالها رجعه

عقاب هز راسه:وهذي هي وافقت عليك

ثنيان:بس انا ما ابيها

عقاب جلس:تتكلم عن البنت بالشينه وهي طلعت اخوك من سالفه تخص سمعتنا كلنا وتحذرني منها وهي نيتها شغلها والحين تقول ما ابيها ؟

ثنيان:ما ابيها ولا ابي غيرها انت تعرف من اللي ابـ

خبط مكتبه:تنكتم ، تنكتم وما تجيب طاريه وطاري بنته ، هذاك باب قفلناه تتزوج بنت بندر بحلمك بس يا ثنيان تفهم !

صدت نوره بضيق وظل ثنيان يناظر عيون ابوه اللي جالس قدامه وسكت

عقاب:تموت ما تزوجتها ياثنيان طلاق بأمك اللي جنبك انك ما تتزوج بنت بندر

شد على فكه وهو يسمع ابوه ولفت نوره وهي تغطي فمها وتراقبهم ولفت أصايل لثنيان اللي ينحرق أمامهم

عقاب:خطبت البنت وقالت موافقه ومالنا رجعه تصير لك بنت مساعد لانها تناسبك وانا أدرى

ثنيان ظل يناظر ابوه وهو ساكت وهز راسه عقاب:لا ترتبط الجمعه بنروح لهم نخطب

انسحب من عندهم وخرج من المكتب وطلع لغرفته وفتح الباب ورفع كفه على صدره يحس بوجع قلبه ، حرمه من أغلى أمنياته وأول حب حياته ، حرمه من سعادته

ناظر جواله يقرأ رسالتها:وصلت ؟

مارد عليها وجلس على السرير ومسك راسه يغمض عيونه

فتحت ستارتها تشوف سيارة نهار وعقدت حاجبينها وانتظرته يروح لكنه كان واقف مشت لغرفة منيف ولف عليها من دخلت

ملاك:نهار كلمك ؟

مسك جواله وعقد حاجبينه:لا

ملاك:واقف عند البيت

وقف منيف:شعنده ؟

رفعت كتفها ومشى منيف وخرج من البيت ووقفت بالشباك تناظرهم

لف نهار من خرج منيف وتقدم منيف وفتح الباب وركب:وش جابك ؟

نهار:ولاشي سيّرت قلت بكلمك بس قلت اكيد نايم

منيف ناظره وهمس:فيك شي ؟

اخذ نفس نهار:متضايق بس ، بروح النادي اطلع حرتي على الفرس ماعليك

منيف:صاير معك شي؟

نهار:لا لا ادخل نام انت ماعليك مني ، شدراك اني هنا ؟

منيف:ملاك شافتك وقالت لي

سكت نهار واعتدل منيف:سوق سوق

نهار:لا والله منيف ماعليك ادبر عمري

منيف:اقول حرك

سكت نهار ولف منيف يناظر الطريق وحرك نهار وهو ساكت

وقف عند النادي ونزلوا سوا ودخل يناظره فارغ وتقدم يوقف عند الاسطبل ويتكي وهو يناظر المكان

وقف جنبه منيف:اي وش عندك ؟

اخذ نفس نهار ولف عليه منيف يناظره:وش العلم ؟

نهار:والله مدري كيف اتكلم بس اني مصدوم

منيف:ليه ؟

نهار:كنت حاط عيني على وحده وابي اخطبها

سكت منيف يناظره وصد نهار وابتسم بهدوء:واليوم انخطبت

منيف صد وابتسم بدون يبين اسنانه:همومك هيّنه يا نهار

نهار:لا تستهين بالقلب ، تراه ياخذك لسابع سماء ويرميك لجوف الارض

منيف:اي لكن بتنساها

نهار:بشوفها اكثر من اهلي كيف بنساها

عقد حاجبينه منيف:تقرب لكم ؟

هز راسه نهار وصد ونطق منيف:ماعليك مشاعر قلبك ماعليها شهود ، اقتلها

لف نهار عليه وكمل منيف:دامها راحت لغيرك يعني مابها خير لك وبتفهم حتى لو متأخر

سكت نهار يصد عنه ولف منيف يناظر المكان

لف نهار يناظره:وانت اخبار قلبك ؟

ابتسم منيف ولف لنهار:مصكوك

نهار ابتسم:انتبه يصير الصك عند وحده لَعوب بس

ضحك منيف:ما اروح بالعجه ماعليك

نهار ضحك ولف من سمع اللي تناديه خلفه ولف منيف ولانت ملامحه من تقدمت لهم ونطق نهار:أصايل

وقف بإعتدال منيف يناظرها ، هي اللي بشاشة كمبيوتره هي اللي صورها محفوظه بشاشته وبعقله ، هي اللي مستحيل ينسى كل صورها وضحكاتها وسفراتها لبسها واحلى اوقاتها وقطوتها اللي تشاركها التصوير دايم ، هي أمامه الحين

جمد وجهه وصد عنهم يبتعد بسرعه وتقدمت أصايل:جيت اطمن عليك كويس لقيتك هنا

نهار:قلت لك مافيني شي ، ليه تجين ؟

أصايل رفعت كفها لذراعه تشد عليه:قلقت عليك

نهار:مو لحالي ماعليك

لفت أصايل لمنيف اللي مبتعد ومعطيهم ظهره ورجعت ناظرت نهار:ارجع يعني ؟

نهار:اعقب ماني مرجعك لوحدك وانتي جايتني ، باخذك نرجع سوا واشربك احلى ماتشا فيك يالخبر

ضحكت أصايل ولف نهار :منيف

لف منيف يناظرهم ومسكت ذراع نهار أصايل تناظرع

نهار:مشينا

منيف:ارجع لوحدك ماعليك ادبر نفسي

نهار:امش بس

منيف:ارجع نهار

نهار:استناك ، الحقني

رفع ذراعه نهار حوالين أصايل ومشى معها ومشى منيف خلفهم وركبت بالخلف أصايل وركب منيف ومسك ياقته يحركها من ضيقته وركب نهار:غريبه حمدان صاحي يوصلك !

أصايل:صحيته كان نايم

ضحك نهار:بيطلعها من عيونك

ابتسمت أصايل ونزلت راسها لجوالها تناظره بتوتر ولفت تناظر الطريق

لف منيف يناظر الطريق وشاد على قبضة يده ويحرك اسنانه من قوة ضغطه على فكه

ووقف نهار بدرايف ثرو ولف لنهار:وش تشرب ؟

منيف غمض عيونه ياخذ نفس:ودني البيت نهار يرحم اهلك

ابتسم نهار:طيب ابشر بس ناخذ لأصوله ماتشا

عقد حاجبينه منيف ولف نهار يطلب لها ونزل انظاره منيف يتذكر مشروبها اللي دايم تصوره بصورها ورفع راسه يلف عليها

رفعت عيونها تناظره من لف وارتبكت من نظراته اللي كانت تستغرق ٥ ثواني بعدها صد لقدام

عقدت حاجبينها بربكه ولف نهار يمد لها الماتشا واخذتها وحرك نهار ووقف عند بيت منيف ونزل منيف بدون يتكلم

ونزلت أصايل تركب مكان نهار ولفت عليه:أخو ملاك؟

هز راسه نهار ولف للطريق ولفت تناظر بيتهم لبن غاب عن عينها ولفت لنهار:من متى تعرفه وتطلع معاه ؟

نهار:من اول

أصايل:عشان ملاك ؟

نهار:لا تسولفين عنها أصايل

أصايل:مستحيل ثنيان يوافق صدقني نهار

نهار:حتى لو ما وافق ثنيان ، هي وافقت عليه

تنهدت أصايل ولف نهار للطريق ورجعت راسها للخلف أصايل وغمضت عيونها تشد على جوالها ونزلت راسها من وصلتها رساله من نفس الرقم: لو جرحتك والله إن نفسي دنيّه

عقدت حاجبينها وارسل بعدها:الله يستر عليك

بلعت ريقها بخوف من خرج من المحادثه وظلت تناظر الرقم ورسالته بخوف وبرعب ما تحس بالأمان وما تفهم اللي حصل لكنها تخاف ، تخاف من كل شي يقوله ويكتبه

لفت تناظر نهار اللي يسوق وساهي وبلعت ريقها تحبس دموعها وتسكّت غصتها وشدت على جوالها تلف للطريق

'

تمشي بالشارع وعاقده حجاجها تفكر لين شافت خلفها سياره تعرفها واخذت نفس من حدها من يسارها وناظرته يحدها لين دخلت بمواقف ونزلت بسيارتها تدخل المواقف الفارغه ووقف سيارته قدامها وفتحت الباب ونزلت:دايم بتحدني بالشارع كذا ؟

تقدم ثنيان لها ونزلت انظارها من شافت بكفه مسدس ورفعت نظرها بسرعه له من وقف قدامها ورفع المسدس على جبينها وغمضت عيونها برعب

ناظرها بغضب:انهي حياتك هنا ومحد يدري

ماردت وهي مغضمه عيونها والمسدس على جبينها وكمل ثنيان:انا محد يلعب بحياتي لعب الورق ، أنا أطويك طيّ رجليني على الأرض وأنهيك تفهمين ؟

فتحت عيونها تناظره قدامها وناظرت عيونه اللي تشتعل بالنيران كانت تشوف موتها لحظي وشريط حياتها اشتغل بذاكرتها

ثنيان:كل شي تحاولين ترسمينه بإحتراف بأنهيه الحين كل ألعابك مع اهلي واخواني بنهيها الحين ، كل شي سويتيه لي ورسمتي مضرتي بيدينك هذي بنهيها ، بنهي كل شي يالشيطان الرجيم

ملاك ناظرت عيونه وتقدم ثنيان يناظر عيونها اللي تتأمله بدون ما يفهم منها لا خوف ولا ثقه ما يشوف فيها لا رعب ولا أمان ، نظرات ما يفهمها ولا يعرف وش وراها

ملاك همست:أدور الموت لو تدري

سكت ثنيان يناظرها وكملت ملاك:بس مالقيت اللي يتجرأ يضغط زناد بجبيني ، سوها يابطل سوها ياولد العميد

ثنيان تنفس بغضب يسمع هدوئها ورفعت كفها على كفه تناظره وغرقت عيونها ببحر ماهو بدموع بموج ماهو بدمع

وشدت على كفه وهمست:سوها

كانت تسمع صوت نفس غضبه وتشوف نظرات اللهيب من عيونه لكنه بعد دقايق طويله صرخ يرمي المسدس من ذراعه لأبعد مكان ويبتعد عنها

نزلت راسها تناظر الارض من طاحت دموعها ومسحتها ووقفت بإعتدال وتقدمت له:ليه خطبتني ؟ من اللي يلعب ؟

ثنيان التفت لها:كنتي تبين تثبتين لابوي ان كلامي غلط ؟

ملاك:كنت بعرف وش بتوصل له ، تحط مسدس فوق جبيني وتخطبني بنفس الوقت وش نيتك ؟

ثنيان تقدم لها:نيتي اطيحك يالشيطان

ملاك:اذا بطيح بيوم ، بطيح جثه بس انا ما اطيح حيّه

ثنيان سكت يناظرها وكملت ملاك:تبي تتخلص مني اقتلني غيرها انا شيطانك ياولد العميد

ثنيان ناظرها بتركب سيارتها وتقدم يقفل بابها بقوه ولفت تناظره ونطق ثنيان:انتي عدوتي يابنت مساعد وانا عدوي خسران

ملاك هزت راسها:نثرت الجمر بطريقك

ثنيان:امشيه وانا بردان

ملاك ماردت وكمل ثنيان:خلك عند كلمتك

ابتعد عنها وناظرته ياخذ المسدس من الارض ويركب سيارته ويحرك خارج من المواقف

ركبت سيارته وقفلت الباب ونزلت نظرها لكفوفها اللي ترجف وغمضت عيونها تاخذ نفس طويل وتقوي نفسها تقوي حيلها وجهدها

ماراح يرعبها شنب ذكر وماراح يوقفها تهديد وسلاح هي لها نيّه ونيّتها نصر منصور ورجعته لدنيا تعيش فيها معه ومالها نيّه تستسلم ابد

شغلت سيارتها بيدينها اللي ترجف وناظرت اسم عقاب بجوالها واخذته ترد وهي تخرج من المواقف:هلا

عقاب:ملاك !

ملاك:الشاهين

عقاب ابتسم بهدوء:انا عند مكتبك وما سيّرتي عليه

ملاك:جايتك مو بعيده

عقاب:لا تستعجلين

ملاك هزت راسها وقفلت جوالها وهي تناظر طريقها

'

دق الباب نهار ودخل ولفت له:تعال نهار

تقدم لها واخذ نفس:وش صار على صديقتك اللي يهددها واحد ؟

لفت بسرعه وبخوف:ليش ؟ لقيتوه ؟

نهار:غريب ياخي كل شي مزيّف من الرقم للايبان ما وصلوا لشي تقولين انه مو حقيقي !

سكتت أصايل بخوف ونطق نهار:هو باقي يهددها ؟

رفعت كتفها أصايل وهي تشد على يدينها بربكه

نهار:خليها تبلكه لا تخاف منه ما ظنتي بيسوي شي

أصايل:وصورها ؟

نهار تنهد:والله مو هيّن الموضوع بس خليها تغير سنابها ومعلوماتها وخلاص لا عاد ترد عليه

أصايل سكتت ولف نهار:وين ثنيان ؟

أصايل:ماشفته له يومين ما ينشاف

نهار:ابوي جاب طاري خطبته ؟

أصايل:يقول الجمعه

سكت نهار وصد عنها ولفت أصايل تاخذ قطوتها من الارض ولف نهار:خارج انا

هزت راسها ومشى يخرج من غرفتها ولفت وهي تمسح على كوتي واخذت جوالها تناظر الرقم ارسلت علامة تعجب وجاها صح واحد فقط

عقدت حاجبينها تعيد اخر جمله كتبها: لو جرحتك والله إن نفسي دنيّه

رجف قلبها من شدة خوفها ورعبها من الشخص المجهول وفتحت سنابها تناظره فارغ حذفت كل اللي فيه لان ماودها احد يتهدد معها

قفلت جوالها وغمضت عيونها تهمس:يارب تطمن روعتي يارب

'

دخلت المكتب ودخل خلفها عقاب وجلست على المكتب ورفعت عيونها له من نطق:تدرين اني توقعت الرفض منك ؟

رجعت ظهرها لورا وجلس عقاب والتفت لها ورفعت حاجبنيها:ليه ؟

عقاب سكت ثواني:ما كانت امورك طيبه مع ثنيان من البدايه

ملاك سكتت وكمل عقاب:ليه وافقتي عليه ؟

ملاك ناظرته:المفروض ما اوافق !

عقاب:أفضل خياراته انتي ، وأنسب قراراته إنتي

ملاك سكتت وكمل عقاب:ومن يوم شفتك يابنت مساعد عرفت انك بتدخلين بيتي وعائلتي لا تسأليني ليه

ملاك:ودي اقولك اني ما وافقت الا على الجيّه ورديت عليك بوضوح حيّاك الله وعائلتك ببيتنا ماجبت طاري خطبه

عقاب هز راسه:وبنجي الجمعه ان شاء الله ان كان يناسبك ويناسب اخوك

ملاك:الله يحييكم

سكت عقاب يناظرها ووقف واخذ نفس:نشوفكم على خير

التفت بيخرج على دخول نهار ووقف نهار يناظر ابوه وناظر ملاك اللي تناظره

عقاب تقدم له بهدوء:وش جابك ؟

نهار بلع ريقه يناظر ابوه بدون رد ونطقت ملاك:انا ناديته بيننا شغل

لف عقاب لملاك اللي تناظر أوراق بيدها:وش شغله ؟

ملاك رفعت عيونها لنهار:عندك كوفي بتفتحه وتبي سجل تجاري والا ؟

هز راسه نهار ولف عقاب لنهار:خير ان شاء الله

خرج تاركهم ولف نهار يناظره لين طلع ولف لملاك:ليه تكذبين ؟

ملاك:ودي تفتح كوفي تتسلى فيه والا شرايك ؟

جلس نهار وناظرته ملاك من شافت نظراته:لا تشابك الأمور

نهار:وافقتي على ثنيان

ملاك:ما خطبني ثنيان

نهار ضحك بسخريه:اجل جايين الجمعه يتقهوون ببيتكم؟

ملاك:اي

نهار سكت ثواني يناظرها وكملت ملاك:لا يهمك الموضوع يا نهار خطبه او مو خطبه ولا ودي افهم اللي تبي تلمح له لان الود بيني وبينك بينتهي بالوضوح

نهار مارد عليها وكملت ملاك وهي تناظره:وباقي ودي تدق لي تحيّه نفس كل مره

نهار:كلمت امي تخطبك لي

سكتت ملاك ولانت ملامحها وكمل نهار:بس سبقني ثنيان لك

ماردت عليه واخذ نفس نهار:كنت ناوي أتقدم لك ، انا واضح ولا يمكن أخبي شعوري

صدت بعيونها وتقدم نهار:واذا فعلاً ما وافقتي على ثنيان وللحين الموضوع كلام وبس ! ، فكري فيني

غمضت عيونها تتنهد بتعب ووقف نهار يخرج من مكتبها

رجعت ظهرها لورا وهمست:ليش تتلخبط الامور ياربي ليش

-

دخلت جواهر غرفتها ولفت من انفتح الباب وناظرت امها معصبه وعقدت حاجبينها:شفيك ؟

تقدمت ام راشد ومسكتها بقوه من ذراعها:وش مهببه ؟ وش مسويه ؟ الله ياخذك وش مسويه ؟

جواهر ناظرتها بخوف:شصاير ؟

ام راشد ابتعدت عنها وهي تضرب خدينها بخوف وناظرتها جواهر برعب ولفت ام راشد:وش مسويه مع ولد عقاب ؟

بلعت ريقها جواهر بصدمه وجمد وجهها

وتقدمت ام راشد تهمس:وش مسويه الله ياخذك ؟ لو يدري ابوك ذبحك وذبحني معك لو يدري احد انفضحنا انفضحنا

نزلت دموع جواهر بخوف وجلست وتقدمت ام راشد تسحبها من يدها:ليه ليه ؟ رديناه وقلنا ماهو نصيبك وش مسويه معه ؟ وش مسويه ؟ فضحتينا فضحتينا

جواهر بكت بخوف واخذت نفس تهدي نفسها:يهددني احد بصورتك بصورتك معه ، شفتيها ؟ شفتي سواد وجهي ووجهك

مسكت راسها تبكي جواهر وفتحت جوالها ام راشد:يبون فلوس عشان ما يفضحونك

جواهر رفعت راسها وناظرتها ام راشد بحده وتقدمت تصفعها كف وبكت بعلو صوتها جواهر وتقدمت ام راشد:ولا تخرجين من غرفتك ولا تشوفك عيني يا جواهر تفهمين ! خليني استر على ذا الفضيحه الله يستر علينا

جواهر لفت وهي تبكي:متزوجني

ناظرتها ام راشد بصدمه وبكت جواهر وهي تناظر امها

رفعت يدينها على راسها ام راشد

مصيبه ولو يدري عنها احد صاروا فضيحه ماتدري كيف بتحلها وماتعرف كيف بتكتم على الموضوع

تخاف تروح لثنيان وتهد فيه وفي اهله وتنفضح بنتها وتخاف تسكت وتكتم وتستمر جواهر مع ثنيان

ام راشد:انثبري لين احلها

ولفت تخرج امها  تاركتها وفتحت جوالها ام راشد ودقت وهي تنتظر الرد وجلست وهي تمسح على ركبها من صدمتها وخوفها:الو ، اسمع ابي تبيع الأرض اللي بشارع الملك فهد دور لي اي مشتري وبيعها اليوم اليوم ابي الفلوس ولا يجي خبر لأبو راشد ابد

قفلت جوالها وناظرت صورة جواهر مع ثنيان وخبطت خدينها وهي ترجف من خوفها

'

فتح المقطع يشوفها تلعب ولابسه تنوره قصيره وكاب على شعرها وتضحك:بنت العميد دايم رقم واحد

ضحكت تقرب من الكاميرا اللي تصورها

غير الفيديو يناظر صورها بالسفر مره وسط الثلوج ومره على البحر ومره بالطياره ومره بالسياره ، تجوّل بصورها يشوف كل حياتها كل تفاصيل ذكرياتها

شال السماعات من اذنه من دخلت ملاك وبلع ريقه يغير الشاشه ويلف لها:شفيك ؟

ملاك ناظرته:بغيت اسألك عن موضوع أصايل

بلع ريقه منيف وتقدمت ملاك له

اخذ نفس يصد بربكه:ماعطت الموضوع أهميه

رفعت حاجبها ملاك:ليه وش الصوره اللي هددتها فيه؟ ما تسوى ؟

منيف ناظرها:لا مالها زلّه وما حسيت انها خافت تركت الموضوع بدون رد

ملاك:غريب ! ما يهمها صورها ؟

منيف سكت وناظرته ملاك:طيب تخلص من رقمك خلاص وقفل على موضوعها

هز راسه ولفت ملاك:بيجون بكره

منيف:عندي خبر

ملاك:وتعرف وش بتقول لهم ؟

منيف هز راسه واخذت نفس ملاك:الله ييسرها

منيف:بتنحل

هزت راسها له وخرجت تاركته ولف نهار يفتح شاشته وفتح جواله وهو يقرأ اسم المحل اللي بالصوره ويبحث عنه المحل اللي تاخذ منه ماتشا دايم

'

خرجت تشوف ساري وجنى برا جالسين قدام المسبح وابتسمت:جالسين ما تعزموني ؟

جنى ناظرتها:تعالي سليني ساري اصلاً على جواله مو معاي

ناظرته أصايل على جواله:افا كيف تخلي زوجتك ؟

ساري قفل جواله وناظر أصايل:ثنيان ما رجع ؟

أصايل عقدت حاجبينها:الكل يدور ثنيان !

ساري:ما شفته وابيه

أصايل:ما اتوقع بالبيت ما شفته

ساري هز راسه يصد ولفت جنى:اوف وش هذا ؟

لفت أصايل تناظر الخدامه جايه ومعها ورد وماتشا بيدها وعقدت حاجبينها أصايل من تقدمت الخدامه:فور يو

اخذتها أصايل وابتسمت جنى:من مين ؟ معجب ؟

ساري:وش ذا الكلام ؟

جنى:امزح معاها اكيد من وحده من صحباتها

اخذت الكرت أصايل تقراه وعقدت حاجبينها

: أنا حفظت كل شي يخصك يا أخت النهار

زاد استغرابها ولفت من سؤال جنى:مين ؟

بلعت ريقها أصايل:وحده من صديقاتي زعلتني وبتراضيني

ابتسمت لهم تبتعد بالورد والماتشا وتلاشت ابتسامتها بخوف ومشت تدخل غرفتها واخذت جوالها تفتحع لكن مالقت رسايل ولفت تناظر الورد والماتشا

اخذت الورد تفكه وتقطعه:اكيد يراقبني اكيد حاط عندي تجسس

رمت الورد ونثرته بالغرفه وفتحت الماتشا تكبها بالزباله بخوف

'

يوم الجمعه - بعد صلاة الجمعه

خرج من المسجد مع أبوه وأخوانه وطلع جواله يدور رساله من جواهر لكنه مالقي

بلع ريقه من لف عليه عقاب:لا تختفي العصر نمشي

سكت ثنيان ولف نهار عليه يناظره وصد عنهم

ركب سيارته ثنيان ودق على جواهر لكنها ماردت تنهد ولحق سيارات أخوانه للبيت ووقف داخل البيت ينزل وتقدم له ساري:وين كنت مختفي؟

ثنيان:ليه صار شي ؟

ساري:دفعت المبلغ

تنهد ثنيان بتعب وتقدم ساري:لكن نشبت باللي بالدوام ياثنيان دبرني

ثنيان لف له بحده:انت تغلط وانا اسد عنك اغلاطك ؟

ساري:ابوي يتبرأ مني ان وصله خبر تكفى ثنيان

ثنيان:سكتها بفلوس

ساري:ما يرضيها جربت من قبل

ثنيان تنهد:خل نشوف موضوعي الحين وبعدين نتكلم

ساري سكت وتقدم ثنيان يدخل البيت وناظر نوره اللي تقدمت تغطرف:اقسم بالله مو شايلتني الفرحه ، اخيراً !

مارد ثنيان ولف عقاب يناظره وصد عنهم نهار بهدوء

لفت أصايل تناظرهم كان نهار بعالم وثنيان بعالم وابوها بعالم اخر كل اللي تشوفه هو ان هذي الخطبه كل شخص ينظر لها بمنظور اخر غير عن الثاني

عقاب همس:نصلي العصر ونمشي لهم

مارد ثنيان وتركهم ومشى يدخل غرفته فتح ازارير ثوبه وقفل الباب وعقد حجاجه بغضب بقهر ببغض

يحمل داخل صدره أكوام من الصراخ ومن النيران ومن اللهب

ضرب بيده السرير ورمى مخداته بالارض وجلس وهو يتنفس

هو ما طلب شي كبير ، هو طلب حب حياته بس ، طلب يعيش مع بنت اختارها وراضي فيها وعاجبته

ليه تنعكس الامور وتخرب ليه يضطر يعيش معها سرّ وهو يبيها علن ؟ ليه قدرت ملاك تلوي ذراعه بجواهر وبسهوله وهو الان ينحني لها بكل سهوله

هز راسه وهمس:يمين بالله يا بنت مساعد اني لاخذ حقي منك ، تبينها حرب انا جاهز

شد على فكه ولف لطلال اللي ارسل له:باقي الحراسه وراها وبنراقبها

مارد عليه ودور رقم جواهر وحاول يتصل عليها لكن ماردت ، تنهد يمسك راسه بقوه بألم من افكاره اللي اخذت منه حقه من النوم وأسهرته

'

جلست قدام المرايه تلبس خواتمها بأصابعها وتناظر شكلها بالمرايه ، رجفت من تكررت عليها ذكريات ماتبي تذكرها او تطريها لأنها تضعفها لكنها ماقدرت

ماقدرت ما تعيد نفس الليله اللي خطبها فيها منصور وكانت تجهز لكتب كتابهم سوا ونقت الفستان اللي بيكون فستان انتصارها بحب منصور وزواجهم بالعلن ، منصور ولد عمها اللي عاشت معه كل مراهقتها وشبابها وصار قريب لها ولمنيف ولا ذوقها يوم اليتم من بعد امها وابوها ، من يوم دخلت بيت عمها منصور كان درع عن كل حزن وسند عن كل ضيق شالها وشاله منيف اكثر من وجود امه وابوه

لفت من دق الباب ودخل منيف وناظرها:جهزتي ؟

هزت راسها وصدت عنه تنزل عيونها ليدينها وتقدم منيف يناظرها:انا معك

ابتسمت وكأن منيف كان ينقصها عشان تبكي ورفعت راسها تناظره من امتلت دموع عيونها وهمس منيف:حتى لو بتوديني انا وياك لطريق مو لنا ولطريق وسخ يوسخنا ، انا معك

ملاك:عشان منصور

منيف:مو هو اللي علمني اكون معك اصلاً ، منصور اللي خلاني اكون معك

ملاك صدت عنه وهمس منيف:لكن الطريق يعور يا ملاك وانا واياك بندخل بمكان ما نقدر ننام فيه بأمان

ملاك لفت عليه:بندخل هذي العايله عشان نطلع منصور وياخذ حقه بالدنيا

منيف:وش ذنبهم ؟ ما يعرفون منصور ولاهم مجبورين يسددون ديته !

ملاك:مو مجبورين ولا يعرفونه لكن وقف عمي قدام شيوخ يطلبهم يساعدونه لو بالقليل ورفضوا وترفعوا ، من اللي بيساعد منصور لو طلبناهم وانذلينا لهم ؟

منيف:ونقوم نسرقهم !

ملاك هزت راسها:مليون من كل مليونير بتضره ؟

منيف سكت يناظر ملاك وكملت ملاك:ادري من اول واعرف نظراتك هذي ومو راضي على اللي اسويه بس منصور ماراح يموت وهو بعيد عني

صد من نزلت دموع ملاك وعض شفته ولفت ملاك ترفع راسها وتهف على عيونها بيدين راجفه

واخذ نفس منيف ولف لملاك ومسك كتوفها يلفها ولفت تناظره وهز راسه منيف:بنطلعه

ماردت ملاك وهي تناظره وكمل منيف وهو ياخذ نفس يقوي نفسه:وانا معك

ملاك رفعت يدينها ليدينه تشدهم وهمس منيف:ذيابه وما نهاب بشوتهم وفلوسهم

ملاك ابتسمت وابتسم منيف:جاهزه تصيرين من عائلة عقاب ؟

هزت راسها ملاك وشد على كفوفها منيف وهمس:الله معانا

مشى وخرج من الغرفه وخرجت ملاك ووقفت وهي تسمع منيف يفتح الباب ويرفع صوته:حيّ الله من جانا

تقدمت للشباك تناظر سياراتهم واشكالهم يدخلون للبيت وابتسمت

لانها جابتهم ، جابتهم يخطبونها نفس ما خططت ولو ان عينها كانت على العميد الا انها قد ولد العميد

لفت لجوالها من دق واخذته تقفله وناظرت رسالة شادن اللي تحاول تتصل عليها:ملاك لا تسوينها ؟ منصور يموت لو يجيه خبر

ماردت عليها ولفت من دخلت نوره وأصايل خلفها وجنى وابتسمت:أهلاً وسهلاً

'

جلس منيف وناظرهم يتقهوون وناظر عقاب اللي عينه عليه ولف لنهار وابتسم:العاده ما تدخل البيت

نهار ابتسم:بتكثر الجيّات للبيت عندك الحين

همس عقاب:على خير

لف منيف عليه واخذ نفس ثنيان يعدل جلسته ونطق عقاب:إحنا جايين نخطب اختك لثنيان ولدي ، وانا كلمت ملاك قبلها ولا عطتني جواب

منيف هز راسه وناظر ثنيان ورجع ناظر عقاب:عندها طلباتها

صد ثنيان يخفي ضحكة السخريه اللي تشكلت على ثغره

وهز راسه عقاب:حاضرين من مهر وزواج وشبكه والرقم اللي تطلبه بيجيها

منيف:المهر والشبكه والزواج هينين

لف ثنيان من نطق منيف برقم للمهر وكان منخفض مقارنةً بتوقعهم ولف عقاب يناظر ثنيان المصدوم ولف عقاب:بس ؟

منيف ضحك:المفروض اكثر ؟

لف ساري على ابوه ورفع حاجبينه عقاب بذهول هو قبل يجي كان يتناقش مع عياله برقم المهر اللي بتطمع فيه ويكون مبالغ فيه لكنها طلبت اقل من التوقع واحتمالاتهم

عقاب:واحنا حاضرين

منيف:عطونا وقتنا ونرد عليكم ان شاء الله

عقاب:خذوا راحتكم

لف ثنيان على ابوه اللي التفت وناظرهم نهار وفهم نظراتهم وتوتر يهز رجلينه ووقف منيف يخرج من المجلس ونطق ثنيان:تلعب علينا ؟

عقاب:هذا رهانك ؟ تطلب مهر مليون ؟ شوف كم طلبت البنت الحين

ساري:غريبه !

عقاب:ليه غريبه ؟ بنت ناس وشايفه خير ولا هي طمعانه بحلال غيرها

نهار ناظرهم:يعني تبونها ؟

رجع ظهره لورا ثنيان:لا

عقاب:ماهو على كيفك ! عطينا كلمه ولا بنرجع عنها

ثنيان ناظره وهز راسه بالنفي وتقدم عقاب بغضب:تخسى يا ثنيان تطيح كلمتي بالارض وانا معطيها لرجال ، تخسى قلت تاخذها ان طلعت نيتها زينه وهذي هي بنت ناس لا ترجع بكلمتك لانك ظلمتها

سكت ثنيان يناظر ابوه وصد عقاب ورمش بهدوء ثنيان ورفع كفه على صدره يتحسس حريق صدره وناظرهم نهار وشد على فكه يصد عنهم

'

ناظرت فنجانها وتسمع هدوئهم وتنحنت أصايل:باقي تروحين النادي ؟

ناظرتها ملاك وهزت راسها:اكيد

جنى:جسمك نادي ؟ توقعته اجراء طبي

ضحكت جنى وابتسمت بهدوء ملاك:تعودت عيونك على الـ ( فيك )

ضحكت أصايل وابتسمت جنى:صراحه لا ماتعودت عيوني بس ما ادري مو مقتنعه ان الرياضه تخلي الجسم كذا

نوره:لا ! في بنات كثير اجسامهم حلوه حتى بدون رياضه

سكتت ملاك من بدوا حوار وهي بالها بالمجلس عند عقاب وعياله ومنيف

حكت جبينها بهدوء وناظرتها نوره وابتسمت:كنا بنطلب شوفه شرعيه اليوم بس عقاب قال لا نستعجل

ماردت ملاك وضحكت أصايل:كويس لاني احس ثنيان بيتوتر فوق توتره لو شافها اليوم

جنى:شدعوه ! ترا عيون ثنيان شابعه بنات

لفت نوره تناظر جنى بحده ورفعت عيونها ملاك عليهم من توتر الجو وابتسمت بهدوء:بس انا ما تشبع عيون احد مني

لفت جنى تناظر ابتسامتها ونظرات عيونها وسكتت

وابتسمت أصايل تلف لملاك:لا تطولين بالرد ملاك ، انا اكثر وحده ابي تكونين منا وفينا

ناظرتها ملاك وابتسمت بهدوء ولفت نوره من دق جوالها وردت:طالعين

لفت لهم:مشينا

وقفت ملاك من وقفوا ومشت معاهم لين لبسوا عباياتهم وخرجوا وقفلت الباب ولفت تمشي لمنيف بالمجلس

وقفت عند عتبة الباب من سمعته يتكلم وعقدت حاجبينها ترجع بخطواتها لين سمعت نهار ينطق:بتوافق اختك ؟

ضحك منيف يناظره لوحده بالمجلس:وش بترشيني الحين عشان اعلمك وتعلم اهلك ؟

ابتسم نهار:لا ولو عرفت ماني قايل شي لاهلي

منيف:ماهو سرّ نخبيه لكن يبي لملاك وقت تفكر

نهار ناظره وكمل منيف:هي فعلاً ماقررت

هز راسه نهار وتكى منيف بيده:بس اخوك ما قال شي ليه ؟

نهار ابتسم ورفع نظره لمنيف اللي ضحك:لا يكون مجبور !

نهار هز راسه بالنفي:بس ثنيان ما يتكلم بعد كلام العميد

سكت منيف يناظر نهار وحاله اللي تغير ونطق:اذا بتروح للنادي سيّر علي اروح معك

نهار:نعطيك فرس خلاص ؟

ضحك منيف:لا مالي بالفرسان بس ابي اتفرج بالمكان

نهار:ابشر

وقف نهار ووقف منيف:بيننا تواصل

نهار:اكيد

مشى يخرج من المجلس ولف منيف من دخلت ملاك:وش صار ؟

منيف:نفس ماصار ما طولوا بالكلام

ملاك:كيف ردة فعلهم على المهر ؟

ضحك منيف يشرب قهوته:كانوا يتوقعون تاخذين حلالهم كله مهر

ابتسمت ملاك بهدوء وكمل منيف:بس ثنيان ما يبي

ملاك:ادري ولا انا ابي بس هو له غايه وانا لي غايه

منيف:بيأذيك ملاك

ملاك:ماراح يقدر ابوه بوجهه

منيف:بس بوجهه غضب ورفض مستحيل احد ينكره

ملاك سكتت ونزل عيونه منيف ثواني لين نطقت ملاك:اتمنى ما وصل خبر لعمك

منيف:لو عرف بيغث منصور على طول

ملاك:اعرف وهذا اللي يخوفني

تنهدت ووقف منيف يصب له قهوه ومشى يدخل غرفته وفصخ غترته وتقدم يفتح الكمبيوتر وبيده فنجانه وشرب منه وهو يناظر سنابها الجديد اللي سوته وقدر يدخل عليه بكل سهوله وابتسم من شافها صورت فيه صور جديده

ودخل يناظر صورتها بغرفتها قبل وقت زيارتهم بدقايق بفستانها الوردي وظل يناظرها وهو يشرب من فنجانه

وابتسم يفتح درجه يفتش بين اغراضه اسلاكه واجهزته القديمه واخذ شريحه قديمه وحطها بجواله الثاني ولف ينقل رقم أصايل وفتح محادثتها وابتسم يرجع ظهره لورا:انتي لو كنتي الليله بين ورد ما فرقوا بينكم يا أخت النهار

'

جلس عقاب يسمع كلام نوره:البنت حلوه وعاجبتني وفيها من شخصيات البنات اللي احبهم ، يعني لو صارت كنتي بتفاخر فيها بمجالس الحريم

هز راسه عقاب وهو يناظر ثنيان اللي جالس بدون رد

جنى:بس مغروره وما اعرف من وين جاها هذا الغرور اهلها مو تجار ولا ناس معروفين

عقاب:هي معروفه بنفسها والشخص ان صار معروف بنفسه ماهو بعائله يصير غروره ماله حد

أصايل:انا كمان عاجبتني واشوفها تناسب ثنيان

ساري ميل شفايفه بإستغراب:بس ليه تقلل نفسها بمهرها ؟

عقاب:هذا دليل انها ما تنشرى بفلوس ، غاليه بنفسها

ضحك بهدوء ثنيان:ساقتها عليكم وبس

رفع عيونه بحده عقاب ووقف ثنيان وناظر ابوه لثواني وخرج من عندهم

تنهدت نوره:ليته يلين معاها ويكمل حياته وارتاح من همه ، ليته يطلع من راسه اللي ساكنه راسه

عقاب:مو ساكن راسه الا العناد

نوره:وين نهار طيب ؟

ساري:ما لحقنا خرجنا وهو جالس

نزلت راسها أصايل تناظر الرساله من رقم غريب وعقدت حاجبينها تفتحها وقرت الرساله وتغيرت ملامحها بخوف

لفت تناظر اهلها وشدت على جوالها تخفي رجفتها وبلعت ريقها تاخذ شنطتها وتطلع من عندهم

دخلت الغرفه وقفلت الباب وجلست تناظر الرقم الجديد وعرفته هو نفس الشخص اللي كان يهددها لانه يناديها بأخت النهار

غمضت عيونها بتعب وارسلت بيدين راجفه:انت قلت بتتركني بحالي

اخذ الجوال منيف يقرأ رسالتها وكتب بهدوء:النيه أنهبك والحاصل نهبتيني وأنا فاطنٍ لك

ارتبكت بخوف وكتبت:انت كيف تعرف كل شي بحياتي ؟

منيف:محد يقدر يشوفك وينساك ، إنتي أكبر بلوه تدخل بحياة إنسان إنتي ورطه عاطفيه

سكتت تناظر كلامه بخوف وبلعت ريقها تعيد كلامه وكتب منيف:ما بضرك

اخذ نفس وقفل جواله يحط اصابعه على شاربه ويناظر صورتها

'

ملاك وقفت بشباكها تشرب قهوتها وتقرأ رسالة ام سعيد اللي مسميتها أم زكي بجوالها:كيف اتأكد من الخبر ؟

كتبت لها ملاك ترد:ما يحتاج تأكيد ما بينكرون الخطبه

أم سعيد:بدق واشوف العلم

ابتسمت ملاك وقفلت جوالها تناظر الخطبه ينتشر صيتها بين الناس وهذا اللي تبيه تبي يدخل التوتر بين العائله وتصير ملاك معروفه عند الجميع وتتشابك وتتخالط أمور ببعضها وأول شي طلعته إشاعه

ان عقاب خطب ملاك بنت مساعد وهي تكون محامية ولده نهار

وابتسمت تضحك لان تعرف اذا طلعت الاشاعه بينكرونها وبيقولون ان الخطبه لثنيان وبيوصل الخبر لجواهر واهلها وبتحرق قلب ثنيان وتلعب بأعصابه

قرت رسالة شادن اللي مضمونها:وصلني تحويل أم جواهر حولت مليون وميتين ألف

تنهدت لان واضح شادن زعلانه ولا تبي تكلمها وتسألها عن الخطبه وحطت كوبها ومشت تدخل غرفتها

'

خرجت نوره وهي تكلم وناظرت عقاب بالصاله:وش هذا الكلام ؟ من ناشر الاشاعه ؟

رفع راسه عقاب يناظرها وجلست نوره:هو صحيح رحنا نخطب بس كنا نبيها لثنيان وللحين إحنا بالبرّ ما صار الا كلام وما بغينا ينتشر

عقد حاجبينه عقاب وكملت نوره:الله يكتب اللي فيه الخير

قفلت ولفت لعقاب:من وين الناس تجيبهم اخبارنا ؟ امس خاطبين لثنيان

عقاب:من اللي كلمك ؟

نوره:زوجة عدنان تقول الحريم يقولون امس عقاب راح يخطب بنت مساعد ، حتى الاشاعه مطلعينها عليك !

عقاب عقد حاجبينه:من قايل لهم اني خطبت ؟

نوره:الناس ودهم بالمشاكل وبس

عقاب:والحين قلتي لهم ان الخطبه لثنيان وبينتشر الخبر قبل نتمم وانا ما احب الشوشره

نوره:شسوي ! ما اقدر انكر وبكرة النهار يملك ثنيان ويقولون نوره تكذب

عقاب تنهد:ليت الامور تتم بسرعه ، ثنيان بيرفض لو طول ادري

نوره:لا ياشيخ ان شاء الله ما يرفض وبيطخ صدقني ان شافها وجلس معها بتعجبه

عقاب:هي عجبت اخوه اكثر منه

نوره:ماشفت نهار من امس

عقاب:ولا أنا ، خليه طيش وبينسى

نوره:ياليت ياعقاب ولا تختلط الامور وتصير زوجة اخوه وينحرق ولدي قدام عيني

عقاب:ان قالت تم لثنيان لا ينطق نهار بحرف بتصير زوجة اخوه وبينزل عينه بالارض

تنهدت نوره وسكتت

'

وقف يمين طريقه من شاف اسمها على شاشة جواله واخذه يرد:وينك انتي ؟ ليه تخوفيني عليك ؟

جواهر هزت راسها:بالله ؟ خفت مره لدرجة تروح تخطب ؟

سكت ثنيان وكملت جواهر:ليش سكت ؟ صدق خطبت ؟ مو اشاعه ؟

ثنيان بلل شفايفه وهمس:جواهر ماهو نفس ما تفكرين

جواهر غطت فمها وجلست:خطبت ؟

ثنيان:بيني وبينها مصلحه ولاهو زواج ولا بيكون زواج ، مصلحه اقسم بالله مصلحه ولصالحي

جواهر عقدت حاجبينها بذهول:انا جالسه هنا احارب لوحدي عشان علاقتنا وانت بتتزوج ؟

ثنيان:في ايش تحاربين ؟

جواهر:الصوره وصلت لامي ثنيان وطلبوها نفس ما طلبوني فلوس وبتوصل لابوي وينتهي عمري ان عرف ، بس انت عندك مصالح اهم

عقد حاجبينه ثنيان:كيف وصلت لامك الصوره ؟

جواهر رفعت صوتها بغضب:وصلت وصار وعطتهم فلوس نفس ما انا عطيتهم

غمض عيونه بغضب ثنيان وكملت جواهر:والله ياثنيان لو اعرف انك تزوجت بتشوفني كابوس بحياتك والله

ثنيان تنهد بتعب:جواهر تكفين اسمعي مني

جواهر:مصالح ! مصالح لمين لابوك ؟ بيقدم على وزاره وبتاخذ بنت وزير ؟ والا مصلحه عشان ابوك يعرف لواء ينفعه وعنده بنت حليوه ! اي مصلحه ياثنيان اي مصلحه انا ضيعت حياتي الجايه كلها يوم مشيت وراك وخليت اهلي ورا ظهري

ثنيان:ما اخترتيني غلط ولا بتندمين ولا احد بيقدر يأذيك تفهمين ؟

جواهر:أذيتني انت

سكت ثنيان وهزت راسها جواهر:انت الأذيه

قفلت جوالها وبكت ترمي جوالها وانحنت على نفسها وهي تبكي ، هي عاشت الخوف والرعب لوحدها عشان علاقتها بثنيان واليوم يجيها خبر انه خطب والواضح بيكمل حياته وبتكون هي نزوه وسرّ بحياته

شغل سيارته ثنيان وهز راسه:والله لأعيشك جحيم الدنيا يا الشيطان والله لأعيشك أسوا أيامك

حرك سيارته ومشى لين مكتبها وناظره مقفل وهز راسه يكمل مشواره لين بيتها ووقف عنده وناظره ونزل تارك بابه مفتوح وتقدم يدق الباب بقوه

عقدت حاجبينها وهي بغرفتها وخرجت وناظرت غرفة منيف مقفله ومشت للباب وهي تسمعه يدق بقوه:طيب طيب

وقفت عنده ونطقت:مين ؟

ثنيان:كابوسك

سكتت تسمع صوته وابتسمت من عرفته وفتحت الباب بدون ما تطلع له وتكلمت من خلف الباب:مستعجل تعرف جوابي والا ماقدرت تنام متلهف تلبسني دبله ؟

دفع الباب برجله بقوه وتألمت ترجع لورانا ودخل ثنيان وناظرها بحده ولفت له تناظره يدخل البيت ونطقت:منيف داخل

ثنيان:ابن ابوه احد يجي يردني

سكتت ملاك تناظر غضبه وتقدم ثنيان:انا مستعجل البسك كفن أبيض وأنهي حياتك بيديني

ملاك:تهددت كثير ياولد العميد بدري عليك تخوفني بكلمتين

ثنيان تقدم لها يوقف قدامها:دخلت صالة بيتك واتحدى سواها احد قبلي

سكتت ملاك تناظره ونطق ثنيان:تحاولين تعوريني بجواهر ؟

ابتسمت ملاك تستفزه:والله تحبها مره ياولد العميد ، صدمتني

ثنيان:واحب طعم الدم

ضحكت ملاك تتكتف:وانا احب ريحة الفلوس

ثنيان:بطلعها من ظهرك ريال ريال

ابتسمت ملاك:تتحداني ؟

ثنيان:والله يابنت مساعد لأخذها من ظهرك ريال ريال

ملاك ناظرت عيونه اللي يطاير منها لهب ونطقت:روح بشر امك اني موافقه على الزواج ياولد العميد

سكت ثنيان يناظرها تتحداه بكل ثقه واقفه قدامه بدون عبايه وبدون خوف وبدون ما تبتعد خطوه عنه وهز راسه ثنيان وهمس:ان وقعتي تحت اسمي بتوقعين على موتك

ملاك مسكت الباب وناظرته بدون ماترد ولف يناظرها واقفه عند الباب وخرج من البيت وابتسمت ملاك تقفل الباب خلفه

واختفت ابتسامتها توقف على الباب وعرفت انها دخلت من الان حرب يا تخرج منها بسلامة منصور يا تلحق منصور

دخل النادي وهو عاقد حجاجه وتقدم للاسطبل يدخل ولف من شاف البنات اللي جالسين وعيونهم عليه وصد يمشي لداخل الاسطبل يطلع فرسه ولف من سمع صوت خلفه

:اخو منيف

ابتسم من لف وناظر منيف وتقدم منيف:بتدخل الميدان وانا ماني من الجمهور ؟

ابتسم نهار:شدراك اني هنا ؟

منيف:جيت من نص ساعه ولا لقيتك وكنت بطلع لكن بلغني واحد انك جاي وقلت لهم يجهزون فرسك

نهار هز راسه وتقدم منيف:وين اختفيت هالايام ؟ من خطبة اخوك ما شفتك

نهار:ولا اهلي شافوني ابشرك اسبوع

منيف:وليه ؟

نهار اخذ نفس ولف وابتسم:وافقت اختك

ابتسم منيف:بنصير أقارب

ضحك نهار بهدوء وطلع على فرسه وابتعد منيف عنه وخرج نهار للميدان واختفت ابتسامته وطلع منيف يوقف على أسوار الإسطبل ودخل على جواله يناظر رقمها ولف يناظر المكان ، وده يشوفها وده تجيه ويرجع يشوفها من جديد لكنه طلع جواله الثاني من جيبه من دق ورد:هلا ملاك

ملاك:وينك ؟

منيف:مع نهار

ملاك:ما كلمك عقاب ؟

منيف:قالي بيحدد موعد الملكه بس ما ارسل لي شي من جديد

ملاك:معناته بيتهم حرب حرايب

منيف:الظاهر لان اخوه ماش

ملاك:نهار ؟

منيف:اي ماهو بخير بين

ملاك جلست:اذا استجد شي بلغني

منيف:اكيد

قفلت منه ورفعت عيونها للفساتين اللي تعرضها لها مصممه:تعرفين مين بتزوج ؟

ابتسمت المصممه:لا والله

ملاك:ولد العميد عقاب بن جرّاح تسمعين فيه ؟

المصممه:أبو ساري صح ؟

هزت راسها ملاك وابتسمت المصممه:الف مبروك تستاهلين كل خير ، ام ساري زوجة العميد كانت تزورني بالأعياء افصل لها فساتين ، زبونتي هي وبنتها

ملاك:ابي شي البسه يكون لزوجة ولد العميد

المصممه:على كذا لازم نصمم لك قطعه مميزه

ملاك:وانا جايه عشان كذا

المصممه:تمام بنتكفل بطلتك وان شاء الله تعجبك

ملاك وقفت واخذت شنطتها:بس لا تطولين

المصممه:ان شاء الله

ملاك ابتسمت وخرجت من عند المصممه وهي تدري انها بتتكلم وبتجيب طاري زواجها وهي تبي كذا ، تبي شوشرة الناس وخربطة امور ثنيان واهله

ركبت سيارتها واخذت جوالها تحاول تدق على شادن لكن ماردت عليها وتنهدت تحرك سيارتها

'

أصايل لفت لامها:امي ليش نتكلف وشغله ؟ احس بنلاقي هنا شي حلو ومناسب

نوره:تستهبلين ؟ من متى ما شافونا الناس ؟ اخر مره زواج ساري ، لا بكلم ابوك بنحجز للكويت ناخذ فساتين من هناك

أصايل:طيب روحي انتي انا بلاقي شي هنا اكيد

نوره:بتجين معاي وانتي ما تشوفين تفهمين ؟

تنهدت أصايل:اوكيه ومتى نرجع ؟ واذا مالقينا ؟

نوره:بنلاقي ياحلو مصممات الكويت على ذوقي وذوقك

أصايل فتحت الايباد تناظر الفساتين وهمست:ما اعرف وش سوت العروس

نوره:تصدقين وانا افكر اقول ادق عليها اشوف لو تبي مساعده ابيها تلبس شي دهره

ضحكت أصايل:ما اتوقع بتقصر

نوره:برضو بكلمها واشوف من وين بتاخذ لها فستان وطقم

أصايل:ليش طقم الشبكه موجوده

نوره:على طاري الشبكه كلمت ثنيان يجي معاي ننقي سوا بس مالقيته مدري وين طس

أصايل:البحر اكيد

نوره:ما يوصله الخط

أصايل:اذا طلع للبحر ما يوصله خط وانتي تعرفين

نوره كشرت:وليه البحر وهو عريس ؟ كل هذا هواجيس بجواهر ؟ عاد من زينها هي وامها

أصايل:يحبها زينه والا مو زينه

نوره:لا ما يحبها اسكتي

أصايل لفت للايباد تناظره واخذت جوالها نوره:أبوك بالمكتب جايب خياط يبي يفصل بشت له ولثنيان ولاخوانك لكن وين ثنيان الله يصلحه

أصايل:نهار معاه تحت ؟

نوره:اي ونهار موجود ناداه ابوك

أصايل:اكيد ابوي ماراح يخلي احد ما بيعزمه

نوره:وانا ما بقصر

ضحكت أصايل وفتحت جوالها نوره ولفت أصايل للايباد ورفعت راسها من دخل نهار وناظرته نوره:نهار ! دوبنا نشوفك ؟

نهار تقدم يبوس راسها وجلس:كنت مشغول بالدوام

نوره:ابوك يقول ما خلصت اجازتك اي دوام ؟

نهار تنهد:اهوجس يريحك كذا ؟

نوره:لا تهوجس عندنا كتب كتاب اخوك وبنجهز له

نهار:والعريس وينه عاد ؟

أصايل:يهوجس نفسك

ابتسم نهار ولف لأصايل ووقفت نوره:بشوف ابوك دام راح الخياط من عنده

خرجت تاركتهم ولفت أصايل لنهار:اخبارك ؟

نهار ابتسم:سرعة التخطي عندي عاليه لا تخافين

ابتسمت أصايل:تعلمني فيك ؟

نهار:وش الوضع ؟ تحددت ملكته ؟

أصايل:لا ابوي ينتظره يجي لكنه مختفي

نهار:ابوي شبك الامور على هواه لا ثنيان مبسوط ولا انا مبسوط

أصايل:ثنيان بينبسط لكن صعب عليه يتخطى ، علمه شوي

ضحك نهار ورجع يدينه لورا وناظرته أصايل:تجي معانا ؟

نهار:وين ؟

أصايل:الكويت

نهار:وش يوديني ؟ ويبي لي اجازه خارجيه وشغله

أصايل:ننبسط سوا انا وانت وامي

نهار هز راسه بالنفي وتقدمت أصايل:بليز نهار والله مشتاقه للسفر معاك

نهار:انتي وامي بتروحون تدورون فساتين انا اروح ليش

أصايل:انا معاك ما عليك

نهار تنهد:نروح سياره اجل

أصايل:مستحيل امي توافق

نهار:انا وانتي بس

ابتسمت أصايل وغمز لها نهار وهزت راسها له وضحك نهار:تم يا أخت النهار من يردك انتي ؟

تلاشت ابتسامتها من ناداها كذا وصدت بربكه للايباد

نهار:جيت عشان افصل بشت مع ابوي وبرجع اطلع منيف ينتظرني تحت

هزت راسها أصايل ومشى بيخرج ومشت عند رجله كوتي وضحك نهار يشيل القطوه:تبغين تتمشين ؟

أصايل:لا نهار اخاف عليها

نهار:بوريها منيف واجيبها

خرج ومشت أصايل تشوف منيف واقف عند سيارة نهار وقاعد على جواله ينتظره

خرج نهار ورفع عيونه منيف من شاف القطوه بحضنه

نهار:لا تقول تخاف من القطوه

ابتسم منيف:لا ياشيخ

نهار مد القطوه واخذها منيف يناظر عقدها وابتسم:حتى الحيوانات تعيشونها عيشة عز ؟

نهار:هذي قطوة أصايل ثاني اكثر شي تحبه بعد ابوي

سكت منيف يناظر القطوه وسلسالها برقبتها ورفع عيونه لنهار وابتسم:رجعها لا يصير لها شي عندي

ضحك نهار ونزل كوتي بالارض وركضت لداخل البيت

نهار:مشينا

ركب منيف السياره وركب نهار وحركوا خارجين من البيت

'

عقاب ابتسم:من زمان عنك وكتب كتاب ثنيان جانا بوقته تنورونا انت ومن يعز عليك بمنتصف هالشهر بإذن الله

هز راسه عقاب وهو على مكتبه :لا والله انها اشاعات يا ابو محمد انا وش يزوجني بهالعمر ؟

لف من انفتح الباب ودخل ساري وكمل عقاب يكلم:لا والله ابو البنت ماهو معروف ومرحوم الله يغفر له لكن البنت بنت ناس وطيبه والله يوفق ما بينهم

جلس ساري وهو يسمعه وكمل عقاب:بإذن الله على خير والله يبارك فيك

قفل منه ورفع عيونه:رد عليك ؟

ساري:لا

عقاب:روح له

ساري:ابوي وين اروح اكيد انه بنص البحر وين القاه

عقاب:بالبر بالبحر بالجو دور اخوك وخله يجيني

ساري تنهد وهز راسه:طيب ان شاء الله

وقف ساري يخرج واخذ جواله عقاب واتصل وهو ينتظر الرد

ونزل عيونه منيف وهو بالسياره ولف لنهار:ابوك

نهار ابتسم:حدد كتب الكتاب

منيف رد:هلا ابو ساري

عقاب:كيف الحال منيف ؟

منيف:نحمد الله انت كيف حالك وكيف صحتك ؟

عقاب:بخير الحمدلله ، حددت موعد يناسبنا جميع وان شاء الله يناسبكم

منيف:متى ؟

عقاب:بمنتصف هالشهر ١٥ يوافق ليلة خميس

منيف هز راسه:ان شاء الله بإذن الله

عقاب:بلغ اختك بالموعد

منيف:اكيد

عقاب:الله يوفقهم وعقبالك

ابتسم بهدوء منيف:بوجودك

قفل الجوال ولف نهار:متى ؟

منيف:١٥ من هالشهر

نهار رفع حاجبينه يناظر الطريق ولف منيف:تشوف اخوك انت ؟

نهار:ثنيان ؟

هز راسه منيف وهز راسه بالنفي نهار:لا ما شفته

منيف صد للطريق بهدوء ووقف نهار عند سيارة منيف ولف له منيف:لا عاد تختفي

نهار ابتسم:ابشر طال عمرك

ضحك منيف ونزل من السياره ومشى لسيارته فتحها وركب وحرك نهار ورفع عيونه منيف يشوفه يبتعد ونزل انظاره لجواله الثاني يناظر رسايل أصايل لوحده من صديقاتها تبلغها بسفرتهم للكويت وعقد حاجبينه وقفل جواله يحرك سيارته ومشى وهو يناظر الطريق لين وقف عند كوفي ولف للجوال يفتحه ويقرأ رسايلها ووقف سيارته ونزل

دخل الكوفي وناظر الموجودين بالمكان ورفع عيونه من شافها جالسه مع بنتين وبلل شفايفه يناظرها

والتفت يطلب له قهوه ولف يناظرها من بعيد تسولف بإندماج

لفت أصايل:انا كان ودي من هنا نلاقي فستان بس أمي أصرت

روان:بتلاقون بالكويت الحين موسم

أصايل:اتمنى ما نطول

روان ابتسمت:نهار معاكم ؟

ضحكت أصايل:ما يخليني نهار

تنهدت روان ولفت على ميّ:نبي نروح طيب

ميّ ضحكت:نهار بيلتفت لك يعني ؟

أصايل ابتسمت:نهار حبيبي ذوقه صعب وما يعجبه أي احد

ميّ لفت وهمست:شفيه هذا يخزنا كذا ؟

لفت أصايل تناظر مكان نظرها وعقدت حاجبينها من صد وسكتت تتذكره وعرفته وهمست:أخو ملاك

لفت عليها روان:أخو خطيبة اخوك ؟

هزت راسها أصايل ولفت عليهم:لا تطالعون خلاص

ميّ ابتسمت:اذا هذا الأخ كيف البنت ؟ تحسمت اشوف عروسة ثنيان خلاص

روان لفت لأصايل:يعرفك ؟

رفعت كتفها بدون ما تناظرهم ونطقت روان:شكله يعرفك لانه يطالع فينا

أصايل:خلاص بنات لا تحرجوني معاه لا تطالعون باين نحش فيه

خرج من الكوفي ولبس نظارته الشمسيه وركب سيارته ابتسم يشغل سيارته ويعض شفته ويحرك

'

ملاك ناظرت جوالها ودقت وهي تناظر البيت وماردت عليها ونزلت من السياره وتقدمت للبيت تدق الباب

نزلت انظارها تخفي توترها من البيت اللي عاشت فيه عمرها وكبرت فيه وكل ذكرياتها فيه

رفعت عيونها من فتحت الباب شادن وانصدمت شادن تناظرها بذهول وتقدمت تهمس:ابوي داخل وش جابك ؟

ملاك:ادري داخل جيت لانك ماتردين علي

شادن:طيب روحي وبرد بس روحي

ملاك:لا البسي عبايتك وتعالي معاي

شادن:ملاك ابوي لو يشوفك بيذبحني مجنونه انتي ؟

ملاك:اطلعي شادن استناك بسيارتي

مشت تاركتها وركبت السياره وانتظرت دقايق الا شادن تخرج لها ومشت شادن تركب:حركي بسرعه

حركت سيارتها ملاك واخذت نفس شادن تناظر الطريق:ليش جيتي ؟

ملاك:ليش ماتردين علي ؟

شادن لفت عليها:بتتزوجين

ماردت ملاك وهي تسوق وكملت شادن:ما وصلت للزواج مع انك سويتي هاللعبه مع كذا عائله شمعنى الحين تتزوجين ؟

ملاك:لان قربت اروح لنفس مكان منصور

لفت ملاك تناظر شادن من وقفت السياره وكملت:انا قاعده اسرق الناس وربي يستر علي بس مو كل مره تسلم الجرّه

شادن:وتقومين تتزوجين ولد عقاب !

ملاك:لان ولد عقاب اللي بيخلص دية منصور مره وحده

شادن ضحكت بسخريه وصدت عنها

ملاك:وبتكون اخر عائله ادخل فيها واسرقها

شادن:تعرفين لو منصور عـ

قاطعتها ملاك:محد بيعلمه

شادن ناظرتها:وابوي ؟ ما بيوصله خبر ؟ بيركض ركض عشان يقول لمنصور

ملاك صدت عنها وغمضت عيونها بتعب

شادن:حتى لو قلتي لمنصور سبب زواجك مستحيل يرضى ملاك

ملاك:ادري

شادن:ليش تسوين فيه كذا طيب ؟ تتوقعين يبي حريته بهالشكل ؟ تتزوجين غيره ؟

ملاك:مستحيل احد يجي مكان منصور وبشتري حريته حتى لو بدون رضاه

شادن ناظرتها وهزت راسها ملاك:وبيخرج ويلاقيني استناه

شادن:ما ادري وش قاعده تسوين بس انتي بمكان صعب ملاك

ملاك:وانا قده

شادن ناظرتها ونطقت بهدوء ملاك:بس لا تخليني لوحدي

شادن تنهدت ومدت كفها ملاك تمسك كف شادن ولفت شادن عليها هي ما اقتنعت ابد لكنها هزت راسها شادن:الله يستر عليك

ملاك:برجعك الحين ووراي شغل ضروري الحق عليه

شادن:طيب

ملاك حركت ووقفت عند البيت ونزلت شادن وحركت وهي تناظر جوالها وشغلت الموقع اللي طالع لها بالرساله وابتعدت بسيارتها لين بان لها شاطي البحر واليخوت والسفن ووقفت سيارتها ونزلت ومشت تدور بعيونها بالمكان وتقدمت من شافت عامل بالمكان:تعرف يخت ولد العميد ؟

هز راسه:ثنيان ؟

ملاك:انت أخبر

لف العامل يأشر:باقي مارجع بس راجع بعد شوي

هزت راسها ملاك:عندي خبر

وقفت تنتظر بالمكان وتناظر البحر واليخوت وهي لابسه نظارتها الشمسيه

تكت بظهرها على السياره تناظر اليخت اللي جاي من بعيد واعتدلت بوقفتها لين عقدت حاجبينها تنزل نظارتها تناظره يهدي اليخت ويدخل بين اليخوت لكنه مو لحاله باليخت

رمى حبل اليخت ومسكه العامل يثبته ونزلت وهي تغطي شعرها بطرحتها وتنتظر ثنيان ينزل

وظلت تناظر جواهر اللي شايله شنطتها وتيشيرت ثنيان بيدها ونزل ثنيان من اليخت وهو حاط منشفه على عنقه ولابس شورت وسحب التيشيرت من جواهر يلبسه

جواهر رفعت يدها تمسك شعره المبلول وهمست له:بتمرض ثنيان

ثنيان هز راسه بالنفي:لا ماعليك

مشت جواهر معاه ومسك كفها ثنيان يشيل شنطته الصغيره بيده ويتقدم ووقف محله من شاف السياره اللي واقفه وقدامها ملاك

وقفت جواهر ورفعت عيونها لملاك وابتسمت ملاك تناظرهم

عقدت حاجبينها جواهر بصدمه من وجود ملاك بالمكان وتقدمت ملاك بهدوء تناظر ثنيان اللي يناظرها ووقفت قدامهم وناظرت ثنيان ورفعت عيونها لشعرها:لا تمرض ورانا كتب كتاب

ثنيان همس:كيف عرفتي مكاني ؟

ملاك:انا شيطان زي ما تناديني

بلعت ريقها جواهر تناظرهم وناظر نظراتها ثنيان وابتسمت ملاك:كل ما تحس انك بأمان تذكر ان صار الحين بحياتك شيطان

ثنيان:معد يهمني وجودك

ملاك ابتسمت:والله ؟ هذا وانا بصير زوجتك

صدت جواهر عنهم تكتم غيضها ونطق ثنيان:لا تزيدين حربنا

ملاك:حربنا مالها مقياس نزيد ونهدي فيها يا ولد العميد ، اللي يلقى زلّه على الثاني يطلعها

ثنيان:وانتي ستيره ؟

لفت ملاك تناظر البحر والموج ولفت عليه وابتسمت:فتش وراي أنقى من بياض النور

ثنيان شد على كف جواهر وهو يناظر ملاك ولفت ملاك لجواهر وابتسمت:تنورينا يوم ١٥ بكتب كتابنا اكيد عطاك خبر ولد العميد

ناظرت ابتسامتها جواهر وشدت على كف ثنيان

وبعدت ملاك عنهم ترجع لسيارتها وركبت وهي تناظرهم وابتسمت تحرك سيارتها تخرج من المكان

ولفت جواهر:كيف عرفت المكان ثنيان ؟

ثنيان مارد وهو يناظر سيارتها من بعيد

واخذت نفس جواهر:باين ما بتوقف لعب ثنيان ، زواجك منها ما بيسكتها عنا !

ثنيان ناظرها:انا اعرف وش اسوي بس انتي بعدي من هنا ما نعرف وش مسويه

جواهر تنهدت:تمام

ثنيان ناظرها تبتعد:وعلميني وش بتقول امك على غيابك

جواهر:الله يستر

مشت تركب سيارتها واخذ نفس بغضب ثنيان ومشى لسيارته وركب واخذ جواله يفتحه ، هو ماعنده خبر عن التاريخ وان كتب الكتاب تحدد غاب بالبحر مع جواهر واختلا فيها بعيد عن اي احد عشان يفهمها كل شي ولا يخسرها

حط جواله على اذنه:هلا ساري

ساري:وينك انت ؟ دورت لك بكل مكان محد يعرف لك درب ، ابوي ذبحني عشان الاقيك

ثنيان:كنت بالبحر

ساري:ومطنش كل شي ؟ تعال ابوي يدورك

ثنيان:بجي

ساري:حدد تاريخ لكتب كتابك

ثنيان:عندي خبر

ساري:تعال لا تبطي

ثنيان قفل جواله وناظر المكان وعقد حاجبينه بتساؤل كيف عرفت محله وكيف جاته وعرفت برجوعه

شغل سيارته وحرك حط يده على الشباك وهو يفكر وناظر الطريق خلفه ماكان في احد لاحقه كيف تعرف خطاويه كيف تجيبه وتجيه ؟

وقف عند البيت من وصل ونزل ودخل البيت واخذ نفس من سمع صوت ابوه ودخل الصاله يناظره مع ساري لوحدهم ونطق:سلام عليكم

رفع راسه عقاب يناظره وهز راسه:بالبحر

جلس ثنيان ورفع خصلات شعره المبلله عن جبينه ولف لابوه:اي

عقاب:وليه واحنا ورانا كتب كتاب ؟

ثنيان ناظر ابوه:وش المفروض اسوي بقعدتي هنا ؟

عقاب:لا روح للبحر ولا نشوفك غير بليلة كتب كتابك ليه تتعب نفسك طال عمرك وتشرفنا

صد ثنيان يناظر ساري ونطق عقاب:بتقعد ياثنيان قدام عيني لين كتب كتابك وان غبت قلبت الدنيا عليك لو كنت بالجو ماهو بالبحر

ثنيان لف عليه: انت جابرني على شي ما ابيه وبتجبرني اقعد بالبيت زياده ؟

عقاب:لا اسمعك تقول مجبور تفهم ؟ انت اخترت بنفسك وبتتزوج

ثنيان صد عنه وكمل عقاب:جهز عمرك عندك وقت لين ١٥ من هالشهر

ثنيان مارد ووقف عقاب يطلع من عنده ورفع عيونه ثنيان لساري:امي وين ؟

ساري:بالكويت

ثنيان عقد حاجبينه وكمل ساري:يجهزون هي وأصايل ومعهم نهار

هز راسه بهدوء وتقدم ساري له:لا تخلي ابوي ينفس عليك اكثر صدقني بتندم ثنيان

ثنيان:المفروض اسكت لإختياره نفس ما انت سكت لإختياره ؟ والنتيجه وش ؟ قاعد تخون زوجتك اللي بإختيار ابوك

ساري:انكتم ثنيان

ثنيان رجع ظهره لورا:هذا الصدق

ساري:والصدق ان لو ابوي درى عني بيتبرأ مني بدون تفكير ولو انت أذيت زوجتك ابوي بيعاقب بدون تفكير

ثنيان:من ولده انا والا هي ؟

ساري:تعرف مبادئ ابوي انت

ثنيان صد عنه ونطق ساري:وسالفتي حليتها لعد تجيب طاريها

ثنيان:وش سويت ؟

ساري:دفعت لهم عني وعن البنت

ثنيان ضحك:حلو دفعت مليونين

ساري:وهدت الامور

ثنيان:واذا شهر ورجعوا هددوك ؟

ساري:مستحيل

ثنيان ضحك:ماتعرفهم انت

ساري:وقتها اعرف احلها

ثنيان:الله يستر على نهار وأصايل بس

ساري:جاسر بيجي ؟

ثنيان:تسألني انا ؟ اسأل العميد عنده خبر عن كل شي

وقف ثنيان تارك ساري ودخل غرفته بتعب وانسدح على سريره

-

يمشي معها وحاط ذراعه فوق كتوفها وياكل معها بالنودلز اللي بيدينها:نهار لا تخلصها علي

نهار:عجبتني ماتوقعت حلوه

أصايل:كان اخذت تعبت اقنعك

نهار ناظر الناس وهو يمشي ولفت أصايل عليه:خل نجلس تعبت

جلست وجلس جنبها ورفع ذراعينه ورا راسه وتربعت أصايل تناظره وهي تاكل:بسألك نهار بصراحه وجاوب علي

نهار:لا

ضحكت:نهار ! لا تصير مليق

نهار ابتسم:قولي

أصايل:الحين يعني لو اجيب لك وحده على ذوقي بتعجبك ؟

نهار:اخذ على ذوق امي ولا ذوقك انتي

ضحكت أصايل:خير ذوقي حلو بالبنات كل صحباتي حلوين وحتى ملاك كانت من ضمن إختياري

سكت نهار يصد عنها وسكتت أصايل تناظره وبلعت لقمتها:هذا وانت تقول تخطيت

نهار:تخطيت

أصايل:عاد الصدق ماكانت لايقه عليك قد ماهي لايقه على ثنيان ، انت يبي لك وحده خفيفة دم وحلوه ونفس فايبز نهار بن عقاب

ابتسم نهار:وفايبز نهار بن عقاب تتوقعين في احد يعرف له ؟

أصايل:سهله تركب خيل وبتصير فايبز نهار بن عقاب

نهار اخذ نفس:عز الله اشتقت للفرس

أصايل:وامي طولت صراحه ، خليت كوتي بالبيت عند الخدم ما اعرف ينتبهون لها والا لا

نهار:كان خليتيها عند وحده من صديقاتك

أصايل:صديقاتي ما يجلسون البيوت

نهار:اوديها عند منيف ؟ تراه فاضي ماعنده شي

أصايل:لا نهار فشله نشغله بكوتي

نهار طلع جواله:بسأله واشوف

ارسل له وحط جواله بجيبه:اذا رد بشوف وش يقول

أصايل:حياتي كوتي استودعتها الله

تقدم يمسك خدودها:انتي كوتي واحلى كوتي بعدته:نهار لا تصير ثقيل دم حاطه ميك اب

نهار بعد عنها وابتسمت أصايل:صورنا

نهار اخذ جوالها ونطقت:لا عندك مو بجوالي

نهار:وليه ؟ عندك عشان صديقاتك يشوفوني

سكتت تشوفه يفتح سنابها وارتعبت من رفع الكاميرا يتصور معاها وابتسمت معه ونزل الجوال نهار ينزلها بستوري أصايل واخذت الجوال أصايل بربكه

'

ناظر الخدامه تعلق بشته قدام عيونه وهو يكلم وخرجت الخدامه على سؤال جواهر:ماراح تحبها ثنيان؟

عقد حاجبينه:وش هالسؤال ؟

جواهر رفعت كتفها:ما اعرف فكرت ممكن تصير بتعيش معاك اكثر ما بتعيش معي ، وحلوه يعني الصراحه

ثنيان:اللي يسمعك يقول ماخذها ومقتنع فيها ، هذي أذتني وأذتك جواهر دمرت حياتي وحياتك أي حب ؟ انا بطلع اللي اخذته طرق واكشف اوراقها وهذي مصلحتي من ذا الزواج

جواهر سكتت واخذ نفس ثنيان:لا تغارين تدرين ما أداني سوالف الغيره

جواهر:مو بيدي

ثنيان تنهد وكملت جواهر:ثنيان بتتزوجها الناس كلهم بيشوفونك سوا بتعيش معاها الشي اللي ابي اعيشه معاك ، تلبسها دبله المفروض بإصبعي انا مو بإصبعها

ثنيان:ما يكفي اللي سويته وطرق عن ابوي وابوك ؟ يوم ردوني عنك تركتك ؟ شوفيني متكي اسولف معك وبشتي قدام عيني

جواهر:بشت ؟

غمض عيونه ثنيان بتعب ونطقت جواهر:بقفل سمعت حس امي

ثنيان:طيب

قفل منها ووقف يمشي لبشته وناظر ياقة البشت اللي مكتوب عليها اسم ابوه واخذ نفس ياخذ البشت

وقف قدام المرايه ولبس بشته وهو يناظر شكله ولف من انفتح الباب وناظر امه اللي تغيرت ملامحها ولانت:امي انت

تنهد يفصخ بشته وتقدمت نوره:حبيبي يا امي الله يوفقك

ثنيان تقدم لها وباس راسها وحضنته نوره:عساها تكون لك عوض ربي وتكون بحر وموج نفس ما تحب نفس ماتبي

ثنيان ناظر امه اللي تحاوط وجهه بكفوفها وهمس:تدرين انها ماهي هي اللي ابيها

نوره:ادري ان ربي اختار لك اللي أحلى واللي أجمل ويوم عطاك عطاك ملاك ماهي بشر

مارد ثنيان وهو يناظرها وابتسمت نوره:بتكون لك فجر بعد ليل تسهره وبتكون لك شمس تدفيك بعد براد يتعبك بتكون ستيرة جروحك وبتحمي لهيب قوايل حياتك ، ملاك اللي بتخلي حياتك جنّه وأنا أدري

ثنيان بعد كفوفها:تبالغين

ابتعد عنها وناظرته نوره:ما أبالغ اقتنع وخل أمورك تمشي مابقي شي على كتب الكتاب والخبر انتشر والكل بيحضر ، خل يشوفون انها اختيارك من عيونك وابتسامتك

ثنيان لف لها:ماهي اختياري

نوره:إختيارك وأنسب إختيار

صد عنها ثنيان يعلق بشته وابتسمت نوره:ماصدقت يوم جيت من المطار وقال ابوك انك بالبيت ، بنخلص باقي الامور سوا انا واياك ونشتري شبكة ملاك سوا

ثنيان:طلعينا من هذي المواضيع

نوره:بكره نروح بعد صلاة العشاء ان شاء الله الحين ريّح انت

ناظرها ثنيان وابتسمت نوره وخرجت تاركته بغرفته

'

ارسل له نهار:بيمرّ السواق ياخذ القطوه ماقصرت منيف تعبناك

مارد منيف ولف لكوتي ياخذها بحضنه:بترجعين بحضنها ؟

ناظر سلسالها يلمسه بيده وتحركت كوتي وانقطع السلسال بيده

جمد وجهه وهمس:تكفين لا

مشت كوتي بالغرفه ومسك راسه منيف بورطه يناظر سلسال كوتي بين اصابعه مقطوع

طلعت كوتي بحضنه وانسدحت ومسح عليها:تهقين وش بيصير ؟ ظنك يعني ممكن تلتفت علي ؟ تشوفني وتلمحني بنت العميد ؟ واصير محظوظ نفسك ؟

انسدح وكوتي بحضنه ولمس وجهها بأصابعه:حليني بعيونها

ضحك لان كوتي تلحس اصابعه ومبسوطه عليه ولف من دق جواله ورد:ارحب اخو منيف

نهار ابتسم:أصايل تقول السواق برا

منيف ناظر السلسال:طيب الحين اطلعها

نهار:عسى استانست عليها بس ؟

ابتسم منيف:افكر اجيب لي ياشيخ

ضحك نهار:تبتلش بقطوه بذا العمر ؟

ضحك منيف:بطلعها الحين

قفل جواله وخرج وكوتي معه والسلسال بيده وتقدم من شاف سيارة حمدان وتقدم له بيفتح الباب لكن انفتح الشباك من الخلف ونطقت:كوتي !

لف يناظرها وجمد وجهه ومدت كفوفها تبي تاخذ كوتي وتقدم منيف لشباكها وبلعت ريقها من حست بأطراف كفوفه تلمس كفوفها وشالت كوتي بحضنها بسرعه

ولفت عليه:شكراً تعبتك

منيف مارد ورفع السلسال وناظرته ولفت لكوتي :قطعتيه ؟

منيف:انقطع علي بالغلط

أصايل ناظرته:مو مشكله ، شكراً مره ثانيه

ابتعد من قفلت الشباك وحرك حمدان ونزل عيونه منيف للسلسال اللي بيده وشد عليه بأصابعه ودخل البيت

تقدم وشاف ملاك بالصاله جالسه وحط السلسال بجيبه وجلس ولف عليها يشوفها تشرب قهوه وساهيه تناظر التلفزيون

منيف:ندمتي ؟

لفت عليه واخذت نفس:مابديت بشي عشان اندم

منيف:ليش تهوجسين ؟

ملاك حطت الكوب وناظرته:بيوصل خبر لمنصور تنصحني اسبقهم واقوله ؟

منيف:تتوقعين بتكون أشوى لو جات منك ؟

ملاك رفعت كتفها:بس مابي يشوهوني بعيونه ويزيفون مشاعري ويقولون ملاك نستك واختارت حياتها

منيف:بيقولون خصوصاً عمي ما بيقصر وبيبهر ببهار

ملاك:بيصدقهم ؟

منيف ناظرها:انتي ادرى بمنصور

ملاك سكتت وغمضت عيونها بتعب

منيف:سألني عقاب عن عمي وقال بيحضر ؟

ملاك عقدت حاجبينها:وش رديت عليه ؟

منيف:قلت له اكيد وش اقول ؟ ويوم كتب الكتاب نقول انشغل

ملاك سكتت وكمل منيف:شايل هم الحضور اقسم بالله ماهو بمستواي ولا اعرفهم وكلهم شيوخ وتجار وكبار وانا لحالي

ناظرته ملاك وتقدمت تمسك كفه ولف عليها منيف

ملاك:وانا لحالي بينهم

منيف:بس انتي قويه

ابتسمت ملاك له وكمل منيف:وماني خايف عليك

ملاك:خلك جنبي دايم وانا بكون قويه لا يعوروني فيك

منيف:بتخليني لوحدي بالبيت ؟

ملاك ناظرته:لا تبكيني الحين

ضحك منيف وتقدم يحضنها وحضنته ملاك وتنهدت تغمض عيونها وتشد عليه:إنت أحن وجهه بحياتي مسح على ظهرها منيف:بجيك ما بخلي ثنيان يستفرد فيك

ملاك:ما بيقدر يسوي لي شي

منيف ابتسم وابتعد عنها:ماعليك خوف

'

١٥ من الشهر - ليلة خميس

كتب كتاب ثنيان بن عقاب على ملاك بنت مساعد

ليله حكوا فيها كل الناس وامتلى المجلس برجال كبار يعزّون عقاب ويعرفونه ، بشوت وشيوخ ، تجار وضباط ، ريحة العود والبخور والبُن والهيل والإستقبال المشرّف والنجف العالي والبخور اللي يملي المكان والتراحيب بالمجلس الكبير وسلام عقاب وابتسامته وترحيبه

عدل بشته ثنيان يسلم على الموجودين ويمينه بقية أخوانه ببشوتهم

لف ثنيان على ساري:من صلاة العصر وانا ماقعدت ابوك من بقى بالسعوديه ؟

ساري دق ذراعه والتفت ثنيان يصافح اللي تقدم له وابتسم يرحب به

لف عقاب لثنيان:الشيخ وصل اقعد

لف ثنيان لمنيف اللي يسار عقاب وجلس وجلس عقاب وتوسطهم الشيخ

ورفع عيونه منيف للمصورين بالمكان والحضور والموجودين ونزل نظره من بدأ الشيخ بدعاء واستفتح كتب الكتاب بعظه وعبره

وحرك ياقته ثنيان بضيق وإختناق ولف عقاب عليه يناظره والتفت ثنيان على الشيخ:ردد معي

ثنيان رفع عيونه لأبوه اللي شاد أعصابه وردد خلف الشيخ

والتفت الشيخ لمنيف:عندها شروط ؟

منيف رفع عيونه لثنيان:عندها شرط وحيد

لف عقاب بذهول وعقد حاجبينه ثنيان وتقدم ساري يناظر منيف بإستغراب

بلع ريقه ثنيان من الحضور ولف الشيخ:وش شرطها ؟

منيف:مؤخر

نزل راسه ثنيان وابتسم يعض شفته كيف راحت عليه حركه ممكن تسويها ، كيف نسى انها شيطان وما يغلبها شي

عقد حاجبينه عقاب وكمل منيف:٥ مليون

تلفتوا الحضور على بعضهم وبلع ريقه عقاب والتفت لثنيان اللي يناظره ووجهه غضبان وعرف عقاب ان الخط ماله رجعه والتفت للشيخ:سجل ياشيخ سجل خل نمشي الأمور

منيف ناظرهم وسجل بالعقد الشيخ والتفت الشيخ على عقاب:الف مبروك ياعميد وعقبال باقي أخوانه

ابتسم عقاب ووقف يسلم على الشيخ ووقفوا الحضور يتقدمون يباركون وشد على بشته ثنيان وهو يسلم

والتفت لمنيف اللي تقدم له:مبروك

هز راسه ثنيان يسلم عليه ولف عقاب على منيف يصافحه وهمس:ماعندنا علم ليه يامنيف ؟

منيف:هذا هو صار عندكم علم

سكت عقاب ووقف محله منيف يصد عنهم ولف ثنيان على ساري اللي يناظره وشد عقاب على ذراع ثنيان:اهجد صارت حليلتك

ثنيان لف لأبوه:ماقلت لك نيتها ؟

عقاب مارد عليه وصد للحضور والتفت لمنيف:بغينا نبارك لملاك

منيف طلع جواله:بشوفها

خرج من عندهم يدق عليها ولفت ملاك تاخذ جوالها:هلا منيف

منيف:اناديك زوجة ثنيان الحين ؟

ابتسمت بهدوء ملاك وهي تناظر شكلها بالمرايه:وافقوا على المؤخر يعني

منيف:وافقوا إجباري قدام الحضور لكن عقاب ما عجبه اللي صار

ملاك:ما يهم

منيف:يبي يشوفك يقول بيبارك لك

ملاك:مو الحين

منيف:طيب كلميني لا سمح لك وقتك

ملاك:طيب

قفلت من منيف وناظرت شكلها بالمرايه فستانها الطويل زهري فاتح اللون ويزينه كرستالات وشعرها خلف ظهرها منسدل ومثبته مقدمة شعرها بهيدبيس

لفت لأصايل اللي دخلت وابتسمت أصايل:بتطلعين الحين؟ لان ابوي يسأل

ملاك:عطيني ٥ دقايق

أصايل:بسبقك اجل ونزف ثنيان وابوي على بال تجهزين

هزت راسها ملاك وخرجت أصايل ولفت ملاك لجوالها تناظر رسالة شادن:وصل الخبر لابوي ملاك

رفعت عيونها تهدي نفسها وقفلت جوالها ووقفت بربكه تستجمع نفسها وطاقتها وهمست:كله عشان منصور

غمضت عيونها وشدت على مسكتها وتقدمت تخرج من غرفتها ، لوحدها تزف نفسها بنفسها تجمع من داخل قلبها قوه وثقه وتستعد للدخول بحياة ناس كبار تستعد يصير اسمها جنب اسم شخص ما يحبها ولا تحبه ولا يبيها ولا تبيه والأدهى يحاربها وتحاربه

وقفت قدام الباب تسمع الزفه تشتغل بالقصر هم تكلفوا بكتب كتاب وعزموا الإنس والجن وما بقوا شخص كيف بيكون زواجهم ؟ وكيف بيكون شعورها وقتها

واقف على الكوشه وبجانبه عقاب ومنيف وعينهم على الباب المقفول

نزل راسه ثنيان يناظر الارض هو يعيش لحظه تمناها لكن مو مع هالانسانه ولا بهالشعور ، هو ما يتزوج الحين هو يدخل بحرب ووده الفوز والنصر ، يرجع حلاله وحلال اخوه ساري وحق جواهر من اللي سببت لها الرعب

عرفت تلعبها واختارت مؤخر اكبر من مهرها بأضعاف مضعفه لانها تدري انه بيذلها بالطلاق ، لوت ذراعه قبل يمدها وتغدت عليه قبل يتعشى هو عليها

عرف بهاللحظه ووقوفه قدام الحضور ان اللي بتنزف له الحين ماهي ملاك ، هي شيطان وجاثوم بيخنقه بحياته وبيسبب له متاعب وبيكون بتحدي دايم معها

رفع عيونه من سمع غطاريف الحضور وانفتح الباب اللي تطلع منه عروسته الغير مرغوب بها ، ملاك

تقدمت بأول خطوه تناظر ثنيان وعقاب والحضور وابتسمت بهدوء تبشر نفسها بإنها قالت وطالت واقتربت لهدفها واقترب الفرج لمنصور

ابتسم لها منيف يناظر طلتها وثقتها وابتسامتها واتسع مبسمها من انتبهت لمنيف اخوها

تقدمت تنزف وعينها على عقاب وثنيان اللي بإستقبالها وتناظر نظرات ثنيان لها وتفهمه ، تفهم نظرات التحدي والحقد والبغض اللي بعيونه وتعرف انه ما ينوي خير وسلام ابد

طلعت برجلها للكوشه والتفت عقاب لثنيان اللي تقدم لها ومد كفه لها ورفعت عيونها ملاك تناظره واقف قدامها وناظرت كفه ومدت كفها ومسك كفها بقوه وحسّ انه يلمس جمره بكفه من نيران ملاك ، وتقدمت له وغمضت عيونها من اشتعل جبينها من قبلته نتيجة اللهب اللي يسكن صدره وابتعد عنها يناظر عيونها وابتسمت له تشد على كفه بقوه

وصدت تمشي ومشى معها وتقدم عقاب لملاك وابتسم بهدوء:الف مبروك

تقدمت تسلم عليه ملاك وبداخلها تقوله انت كنت بتكون محل ثنيان ونيتي من قبل اشوفك انت لكن شائت الأقدار وصرت أب لزوجي ماهو زوجي

تقدم منيف وفلتت كفها ترفع ذراعينها وتحضن منيف وابتسم منيف:انتي ملاك

ابتسمت له وابتعدت عنه:انت الوحيد اللي تشوفني ملاك

منيف باس جبينها وشدت على كفه توقف بينه وبين ثنيان والتفت عقاب لمنيف:خلنا نستأذن

لفت تشوف عقاب يلتفت لها وهمس:بيننا كلام يابنت مساعد

ملاك:بيننا عيش وملح من الحين ورايح

سكت عقاب يناظرها وابتسم لها ومشى مع منيف ولفت ملاك على الحضور تشوف عددهم وعيونهم اللي متسلطه عليها وعلى ثنيان

ولف ثنيان عليها:مؤخر !

ابتسمت تلف عليه وتناظر عيونه:خلك فطين يا ولد العميد

ثنيان:تنوين الطلاق ؟ تحلمين به

ابتسمت له تصد عنه وتمثل الحياء وصد ثنيان لأمه اللي تقدمت تصفق وتسلم عليه

وطلعت أصايل تسلم على ملاك وابتسمت ملاك تسلم عليها

وجلسوا والتفت ثنيان من تقدمت بالشبكه نوره تناول ثنيان ولف ثنيان يناظر ملاك ولبسها العقد

وقربت منه ملاك عشان يلبسها عقدها ونطق ثنيان:بزرع بكل خطوه تمشينها ألغام يابنت مساعد

ابتسمت ملاك تبتعد عنه:بخليك تغرق وانت بالبرّ ياولد العميد

ثنيان التفت ياخذ الدبله من أمه ويسمع صخب الأغاني وكاميرات التصوير اللي تصورهم ومدت كفها ملاك واخذ كفها بيده ورفع عيونه لها يناظرها ودخل بخنصر كفها دبله تلمع ونطق:هذا الشي الوحيد اللي بتاخذينه مني

ملاك ضحكت:و ٥ ملايين

ناظرها ثنيان ومدت كفها تمسك كفه وتلبسه دبلته والتفتت لأصايل اللي تقدمت:بصوركم

ثنيان:يكفي الكاميرات اللي موجوده

أصايل:هذي حصريه للي ماحضر

ملاك ابتسمت ورفعت جوالها أصايل وتقدمت نوره:مدوا كفوفكم خل يشوفون الدبل

ابتسمت ملاك ومدت كفها على كف ثنيان وناظر دبلته ثنيان ولف على ملاك اللي مبتسمه للكاميرا

يناظر شموخها وثقتها وابتسامتها كيف يقدر إنسان يعيش داخله سواد وما يظهر الا النور ؟ كيف قادره تكون مرّه شيطان ومرّه ملاك !

أصايل:عيونك هنا ياعريس يافاهي

لفت ملاك تناظره يناظرها وابتسمت له تصد لأصايل ولف ثنيان لأمه:اخرج ؟

نوره:اخرجوا سوا بس اصبر يا أمي

مشت تاركتهم سوا على الكوشه قدام الحضور واخذت نفس ملاك ترسم إبتسامه لنظرات الجميع

وقفت معاه تخرج من المكان وتتوجه لغرفتها مع ثنيان ودخلت ناظرت نوره وعقاب يتكلمون وسكتوا من شافوهم

ووقف عقاب:روحوا تعشوا واسهروا

ثنيان:ما يحتاج

عقاب ناظره بهدوء ولفت نوره تبتسم:ابوك حجز لكم مطعم تتعشون فيه وتروقون وتسولفون

ثنيان ناظرها وشدت على ذراعه نوره والتفت يناظر ابوه ولف لملاك:البسي

ملاك:بغير ملابسي

تقدمت تبتعد عنهم ولف عقاب عليه:شفيك ؟

ثنيان:تسألني بعد اللي سووه قدام الناس ؟

عقاب:حقها ليه تزعل دام نيتك زواج ؟

ثنيان رفع حاجبه:ابوي !

عقاب:انت مانت مطلق ليه تتكاثر من طلبها ؟

ثنيان هز راسه:صح لان الحين صارت ملاك بنتك وترضى علي اللي ما ترضى عليها ، نفس ساري وجنى

نوره:هدها يا إمي وروق وخذ زوجتك واسهروا وخذوا علوم بعض

ثنيان صد عنها ولفت نوره لعقاب وسكت عقاب يصد عنهم

'

خرجت وناظرت منيف اللي واقف عند باب غرفتها:اغراضي داخل منيف خذها للبيت

منيف:طيب وان احتجتي شي كلميني

هزت راسها ومشت لسيارة ثنيان اللي راكب فيها وفتحت الباب تركب معاه وقفلت الباب تكتم انفاسها من توترها ولفت تناظر منيف اللي واقف وعينه عليهم

وحرك السياره ثنيان بدون ما يلتفت عليها وباله مشغول وهو يسوق وماهو معها

همست وهي تفرك يدينها:طف التكييف

مارد عليها ولفت عليه تناظره صاد ومدت يدها تقفل التكييف والتفت عليها وشغله

وناظرته وهمست:كذا بتاخذ حقك يعني ؟

مارد عليها وضحكت وفتحت الشباك تكسر برودة السياره وقفل الشباك ولفت له:تستهبل ؟

لف عليها ثنيان:لا يكون زعلتي ؟ اطلبي الطلاق عشان تجيك ٥ مليون الحين

ناظرته وصدت تستغفر واخذ نفس ثنيان وهو يسوق ووقف عند البحر ولفت له تناظره يطفي السياره وينزل لوحده

عقدت حاجبينها ونزلت وتقدمت له:بتعشيني سمك طازج ؟

مارد عليها يناظر البحر وحط يدينه بجيوبه واخذت نفس تصد للبحر ملاك

غمضت عيونها تسمع صوت الموج ونطق ثنيان وعينه على البحر:وش حدك تسرقين ؟

فتحت عيونها ملاك ولاردت وهي تراقب الموج ولف ثنيان عليها وهز راسه بالنفي:عندك كل شي ما انحديتي للفقر عشان تسرقين ، ليه ؟

لفت عليه ملاك تناظر نظراته لها:ما أسرق

ضحك بسخريه وصد عنها ورجع يلف عليها:اخذتي من جواهر مليون وامها مليون وساري واللي تشتغل معه مليونين ، ٤ ملايين وين راحت ؟ غير اللي من قبل اهلي

ملاك ابتسمت:اهلك ؟ عاد جواهر من اهلك ؟

ثنيان:جواهر الأوله بكل شي

صدت ملاك وهي مبتسمه وكمل ثنيان:واللي خلاني ارتبط بوحده بوجه ملاك وروح شيطان ! جواهر ، لان اللي يمسها بضر يمسني انا

ملاك لفت عليه:انتبه من الغدر بس ياولد العميد

ثنيان:لو بتضرني كان ضرتني من سنتين

رفعت حاجبينها بإعجاب ملاك:سنتين ومحد كشفكم الا انا ؟ كل يوم يزيد غروري بملاك

ثنيان:انتبهي ، لا تكشفين الجرح وانتي ستيره

ملاك لفت عليه تناظره وكمل ثنيان:اول ما اكشف ورقه من اوراقك المستوره ما برحمك يابنت مساعد

ملاك:تبي اطمنك ؟ لو كشفت ورقه من اوراقي بس ما بتلاقي وراي ولا ريال

عقد حاجبينه وابتسمت ملاك:بتتعب على الفاضي ياولد العميد

ثنيان:اي شي يرجع حق جواهر وحق اخوي منك مافيه تعب

ملاك لفت عليه وابتسمت:جواهر حليلتك والا انا الاولى بكرت عايلتك ؟

مارد ثنيان عليها وصد وضحكت ملاك:انتبه من غيرة جواهر بس يمكن من حريق غيرتها تعورك ويمكن تكتشف بوقت متأخر انها غلطه وضيعت منك كل شي وتسرعت فيها

ثنيان مارد وهو يناظر البحر ولفت ملاك للبحر:خلنا يوم نروح باليخت حقك بخاطري اجرب اشوف وش عطاك البحر عشان تحبه هالقد ؟

ثنيان:تحلمين

ابتسمت ملاك ولفت عليه:عاد جد كيف تأمن للموج وما تأمن علي ؟ ترا انا والموج نتشابه اذا ما تأمن علي لا تأمن على الموج ، هو ما ينعرف داخله وانا تجهل داخلي ، هو من بعيد حلو لكن من داخله ظلام ورعب ، نفس ملاك زوجتك

لف يناظرها ثنيان وابتسمت ملاك:بس انتبه ! تحبني مع الموج لاني نار ولهب

ثنيان:ما يطفي النيران واللهب الا الموج يابنت مساعد

لفت ملاك تناظره وكمل ثنيان وعينه بعيونها:وانا موج وانتي لهب

ابتسمت ملاك:يعني نبطل زواج خلاص ؟ طلق اجل

ثنيان:تاخذين موضوع زواجنا بإستهبال وما كأني معك في حرب

ملاك:لا تسميها حرب ، قول تحدي انت تبي مني اربع ملايين وانا ابي منك خمس والفايز اللي ياخذها طرق

ثنيان:ما بتشمين اكثر من اربع ملايين اخذتيها

ضحكت ملاك ترفع سبابتها:كشفت طموحي ، طموحي ما اخذ خمس ملايين واكتفي اطمح للزياده

ثنيان:تكشفين اوراقك قدامي !

ملاك:لان اوراقك مكشوفه لي

ثنيان سكت يناظرها وابتسمت ملاك ترفع دبلتها قدام عيونه:لو بيوم اختفيت من حياتك بخلي دبلتي لك هذا الشي الوحيد اللي بخليه لك

ثنيان:اذا قدرتي تهربين لمكان وخليتك

ابتسمت ملاك تصد للبحر ودخل يدينه بجيوبه ثنيان ما يقدر يتخلص منها لين ياخذ حقوقهم وهي ما بتخليه وبتاخذ مطلبها ولا يدري لمتى بيستمر هالتحدي بينهم

لف يتوجه لسيارته واخذت نفس تركب يمينه ملاك نزلت راسها لجوالها تدور رساله من شادن بس ما ارسلت شي

رفعت راسها تناظر الطريق وحرك سيارته ثنيان واخذ جواله يناظره فارغ وحطه بحضنه وكمل يسوق بهدوء

'

التفت منيف من حرك ثنيان يغيب عن انظاره ولف للغرفه ودخل يناظر شنطة ملاك بالارض وانحنى يقفلها ولف من سمع خطوات كعب متجهه للغرفه وصد بظهره يتنحنح وتقدمت توقف عند الباب:نهار !

لف عليها من سمع صوتها وناظرها واقفه بكامل زينتها قدام عيونه

وقفت برعب وتغيرت ملامحها وانصدمت من وجوده بالغرفه هي كان على ظنها انه نهار لانه نفس طول نهار ومقفّاه لكن من لف انصدمت وجمد وجهها

بلع ريقها يناظرها وشد على الشنطه وهمس:السموحه

نزل راسه وخرج من الغرفه تاركها وعقدت حاجبينها تناظر محله وبلعت ريقها بربكه ونزلت انظارها لفستانها وزينتها وغمضت عيونها وهمست:ليش ياربي اوف

خرج من عندها وحط شنطة ملاك بالخلف وقفل الباب واخذ نفس وبلل شفايفه من شاف نهار جاي من بعيد:هاه وين رايح ؟

منيف مسك باب سيارته بربكه:للبيت خلاص

نهار:اقعد نفرفر شوي سوا

منيف:تعبان والله برجع أريّح

نهار:على راحتك

فتح بابه وركب منيف وفك ياقة ثوبه يناظر نهار يدخل الغرفه وتنفس منيف يهدي نفسه ، هو شافها بالصور وحفظ كل تفاصيل حياتها وعرف كل اهتماماتها وماضيها كله لكن من شافها قدامه الحين ابرقت وارعدت داخل صدره غيمه عصفت فيه ، حرك سيارته ومسح جبينه يبلل شفايفه وفصخ شماغه يحطه بحضنه ولف لجواله الثاني ياخذه ويفتحه وناظر سنابها اللي مفتوح عنده ومصوره فيه ثنيان وملاك بس وصورتها الاخيره مع نهار بالكويت ، قفل جواله ووقف عند البيت ونزل

اخذ شنطة ملاك من الخلف ودخل البيت لوحده ، رمى شماغه ومفتاحه وجلس على الكنبه ورفع انظاره للسقف من تشكلت صورتها بمخيلته وذاكرته من جديد واخذ جواله يكتب لها:مبروك يا أخت النهار تزهاك الأفراح والمسرات

ماردت عليه وقفل جواله ولف من سمع الباب وناظر ملاك تدخل وناظرته ملاك:قول ماتعشيت

منيف جلس بإعتدال:ما عشاك ولد العميد ؟

جلست ملاك بتعب:اطلب لنا

منيف:وش قال لك ؟

ملاك:خرابيط، اطلب باخذ شاور واجيك

وقفت وفصخت عبايتها وهي تمشي ورمت عبايتها وجلست قدام المرايه واخذت المناديل تمسح مكياجها وهي تناظر شكلها بالمرايه وبلعت ريقها تشوف حزنها وضعفها وضيقتها بإنعكاس مرايتها

نزلت نظراتها للمكياج بمناديلها ورفعت عيونها تبكي بدون صوت تمسح روجها وهمست:يارب الهمني القوه وارزق قلبي السلوان

بكت وهي تمسح وجهها ووقفت تاخذ روبها وتدخل الحمام فتحت المويه ووقفت تحتها وهي تبكي

هي تمثل القوه وتحاول تتلبسها لكنها تنهار كل ما خلت بنفسها قدام مرايه ، لانها تشوف ضعفها وخوفها وحزنها

'

وقف عند بيتهم يناظره وهو بسيارته واخذ جواله يرسل لها:والله لو وحاولوا يرسمون درب غير دربك اني مستحيل امشي فيه

ارسلها وقرتها جواهر ولف يناظر البيت ورجع يرسل لها:انا عند بابك

عقدت حاجبينها جواهر ووقفت تمشي لشباكها لكن ماقدرت تشوفه من حوش بيتهم الكبير وارسلت له:كيف قدرت تحط بإصبعها دبلتي ؟

ثنيان دق عليها وناظر البيت وردت جواهر بدون صوت واخذ نفس ثنيان:محد ياخذ محلك وكله عشانك

جواهر:ماقدرت اوقف على رجولي احس الدنيا تحتي جمر كيف بتصير لك وزوجتك ؟ كيف بتنام جنبك ثنيان ؟

ثنيان:بخليها تنام يميني ؟ انا لك جواهر ومستحيل اكون لغيرك وبزواجي او بغيره انا لك وما ببتعد عنك وبتنفرج وبتصيرين علن بحياتي

جواهر ماردت وهي تهز رجلها ونطق ثنيان:ليت اقدر اجيك ليت ما يوقفني باب وحارس

جواهر:يوقفك الف شي مو بس باب وحارس ، مو قادره امثل ان كل شي عادي وارجع اطالع في عيونك

كانت تحس بالغلّ والحقد والغيره والخوف وكأن بساط الأمان انزاح من تحتها ، هي من قبل وهي تحس بالرعب من مستقبلها مع ثنيان كيف والحين صار لوحده غيرها

ثنيان تنهد وشغل سيارته ونطقت جواهر:تصبح على خير

قفلت منه وناظر جواله وحرك سيارته ومشى لين البيت ودخل ووقف سيارته ونزل يدخل بيته

طلع للغرفه ولف من سمع صوت خلفه:ياعريس

لف وناظر نهار جالس وتقدم له:وش مسهرك ؟

نهار ابتسم:كل ذا عشاء مع العروس ؟

جلس ثنيان ومارد عليه وتقدم له نهار:وش شعورك بالله ؟

لف عليه ثنيان:تستهبل نهار ؟ وكأني انا خاطب برغبتي ؟

نهار:دامك ماتبيها ليه ما خليتها لغيرك ؟

صد ثنيان عليه بدون رد وكمل نهار:دام ابوي جبرك المفروض تحمد ربك عليها

ثنيان هز راسه:صح الكل يثني عليها ويقول ونعم الإختيار

نهار:هذا الصدق البنت ذي ما بتصير لك سند لوحدك بتشيل اسم عايلتنا

لف ثنيان يناظر نهار اللي ما يفهم شي ويجهل كل شي ونطق:روح نام

نهار:بسهر جايز لي الوقت

هز راسه ثنيان ووقف:اجل تصبح على خير

مشى تاركه ودخل غرفته وغمض عيونه بتعب ينسدح بثوبه

فتح جواله يناظر سنابات أصايل اللي مصورتهم سوا وناظر ملاك اللي سانده ظهرها بثقه ويكسيها غرور يحرق اللي يقرب منه ، تبتسم وكأنها تلمّع صورتها قدام الكل بإبتسامه

ناظر شكله ونظراته لها وعرف انه بتحدي ومطلبه يغلبها وبس

'

قرت الرساله وحكت جبينها تفكر وشربت من كوبها ترد عليه:بإنتظارك

جلست ودقايق دق الباب ووقفت ومشت تفتحه وابتسمت:جاي تبارك لي ياعميد ؟

عقاب تقدم يناظرها بدون عبايه:باركت لك أمس

فتحت يدينها تأشر له بالدخول ودخل عقاب البيت ومشت تجلس ملاك وناظرتها يجلس قدامها

عقاب ناظرها لثواني ونطق:٥ ملايين ليه ؟

ابتسمت ملاك:أرعبك العدد مع انك تسمعه كثير

عقاب:ما ترعبني أرقام ، أنا استغربت

ملاك شربت من كوبها وناظرته:ليش تستغرب ؟

عقاب:اللي طلب مهر قليل هالقد ليه يطلب مؤخر كبير هالقد ؟

ملاك:أول شي ياعميد مافي شي أكبر منك غير ربك انت ما يعلو فوقك ارقام وملايين ، ثاني شي نيتنا أنا وولدك زواج وإستقرار وود ولين ليه متخوف من المؤخر ! عسى ما تكون نيّة ولدك شي ثاني ؟

عقاب:حشى

ملاك ناظرته وكمل عقاب:وثنيان مطلبه زواج وإستقرار وأفضل ما أختار وان شاء الله ما يجي بينكم درب للطلاق ابد ، بس ليه تحطين مؤخر ؟ خايفه ؟

ملاك:انا ما اخاف ، انت تعرف شغلي وانا اواجه مصايب العالم كلها وتعرف اني دخلت بيوت ناس كبار وشيوخ واعرف مشاكلهم وما سويت الا ضمان لحقي ووجودي ببيتك

عقاب:انتي من يوم صرتي زوجة ثنيان ولدي المفروض تضمنين حقك لان عقاب موجود وما بسمح لأحد ياخذ حقك ولو انه ولدي

ملاك:فيك الخير ياعميد ، وان شاء الله ما ازعجك الموضوع هو ضمان عشان اكون مرتاحه واعيش واعطي ولدك اللي يسعده ويعطيني اللي يسعدني

عقاب:بسألك وجاوبيني بصراحه وانا تراودني شكوك لانك ما طلبتي المؤخر الا متأخر

سكتت ملاك تسمعه ورفع عيونه عقاب عليها:وصلك كلام عن خطبة ثنيان الاولى ؟

ابتسمت بهدوء ملاك بدون رد وداخلها انتصرت وكأنها تنتظر يفتح الموضوع عقاب ويقوله

هز راسه عقاب:كنت شاك ، على العموم خطبة ثنيان الاولى كانت من سنتين وقفلنا بابها وثنيان تخطى ولا له رجعه ، ثنيان مستحيل ياخذ بنت بندر لا قبلك ولا بعدك

بللت شفايفها ملاك وهي تبتسم وناظرته وكأنها تقول انت غارق في أوهام ياعميد والمويه تجري من تحتك بدون تحس

عقاب كمل:ولو وصلك كلام من مصدر مجهول او احد ضايقك برسايل عطيني ارقامهم واطلعهم لك

ملاك هزت راسها بالنفي:ما يحتاج ياعميد ، وتطمن انا أكبر من إني اتأثر بتلاطيش كلام ، لكن ابي احس بالثقه بولدك

عقاب:زين اذا على كذا احنا بدرب أمان

ملاك ابتسمت وكمل عقاب:وموعد زواجكم عليك انتي وثنيان لهنا وما بتدخل بشي بينكم

ملاك ماردت ووقف عقاب:اخوك ماهو موجود ؟

ملاك وقفت:نايم

عقاب هز راسه:استأذن انا

مشى ومشت خلفه ملاك وخرج وقفلت الباب بعده ومشت للشباك تفتحه وناظرته يركب السياره ويبتعد عن البيت

ولفت تلبس عبايتها بغرفتها وتناظر شكلها بالمرايه وهمست:نشوف أم ساري وش يطلع من وراها

عدلت حجابها واخذت شنطتها وخرجت من البيت ركبت ورفعت عيونها للسياره اللي تترقبها بالخلف وابتسمت تحرك سيارتها

مشت ووقفت عند المول ونزلت ومشت دخلت المول تمشي فيه ودخلت المحل الأول ولفت تناظر اللي دخل خلفها لابس نظاره شمسيه ويتصدد عنها وخرجت تدخل محل ثاني ولفت لقته بالمحل

مشت تخرج ومشت بخطوات هاديه ولفت تناظره خلفها وتقدمت له وارتبك يرجع خلفه ونطقت:وقف

وقف وتقدمت له تناظره:سلم على ولد العميد وقوله يهدي غيرته علي وخوفه انا ذيبه ما بيصير لي شي

جاء بيبرر ونطقت ملاك:اذا شفت سيارتك وراي من جديد ببلغ عليك تفهم ؟

تركته تخرج من المول وتركب سيارتها وناظرته يخرج ويمشي بإتجاه غير طريقها واخذت نفس تناظر طريقها

وقفت عند البيت وانتظرت دقايق وهي تراقب خلفها ورفعت عيونها من خرجت سيارة السواق حمدان من البيت وشغلت خلفه تمشي وهي متأكده انه بياخذ نوره لانها تواصلت مع الخدامه وبلغتها

شغلت اغاني بسيارتها وهي تهز راسها بهدوء وتمشي خلف حمدان لين وقف عند بيت وعقدت حاجبينها تناظر البيت ونزلت نوره للبيت وحرك حمدان

ونطقت ملاك:وهذا بيت من بعد ؟

ناظرت البيت وجات بتحرك بس دق جوالها ولفت لجوالها وردت وهي تناظر البيت:هلا شادن

شادن:الخدامه تقول وصلها لبيت ام ماجد صديقتها

هزت راسها ملاك:اي انا وراها وشفـ

سكتت من وقفت سياره عند البيت وعقدت حاجبينها تهمس:اصبري شادن

شادن:وش صار ؟

ناظرت البيت ملاك وخرجت نوره وركبت بالسياره وابتسمت ملاك:والله قلت يخرج منها شي ، هذي عائلة عقاب كلها مصايب ، شادن اكلمك بعدين

شادن:اوكيه

حركت خلف السياره وابتسمت تمشي خلفهم لين وقفت السياره عند فندق وعقدت حجاجها ملاك تشوف نوره تنزل وتحرك السياره وتقدمت ملاك توقف بجانب السياره وتدق بوري

فتح قزازته وناظرته ملاك:انت توصل ؟

نطق:أوبر اختي انا

هزت راسها ملاك:موفق

قفلت شباكها ووقفت بالمواقف ولبست كمامتها ونظارتها الشمسيه ونزلت للفندق

مشت وهي تشوف نوره واقفه عند كاونتر الإستقبال تنتظر دورها ووقفت خلفها ملاك

وتقدمت نوره من وصل دورها وتقدمت ملاك تسمعها

نوره:بغيت غرفة جاسر عقاب عندكم نزيل هنا

لفت بسرعه ملاك تبتعد عنها وعقدت حاجبينها ولفت من سمعت صوت يخرج من المصعد ينادي:أمي

لفت نوره وابتسمت من شافته:أمي إنت

لفت تناظر جاسر اللي تقدم ماسك بيدينه طفلين وابتسم يحضن نوره وعقدت حاجبينها تراقب الأطفال الشقر اللي بجانب جاسر

وابتعدت من حست ان وجودها ملحوظ وخرجت من الفندق وركبت سيارتها ونزلت كمامتها واخذت جوالها تتصل على شادن

ردت شادن:وش صار معاك ؟

ملاك:جاسر ولدهم بالسعوديه بس شكله جاب شي اكبر من الشهاده

شادن:امه راحت تستقبله بالمطار ؟

ملاك:لا بفندق ، اسمعي شادن بعطيك اسم الفندق وانتي كملي اللي عليك ، ابيك تعرفين اذا جاسر جايب معاه مرَه والا لا ، شفت معاه عيال اثنين بنت وولد شقر ما يشبهونه اعرفي لي عياله والا لا

شادن:اوف تتوقعين تزوج هناك ؟

ابتسمت ملاك:والله ما استغرب كل عيال عقاب وراهم مصايب ، ما ادري شادن مافهمت شي بس تعرفين لو صدنا عليه هالصيده وش يصير ؟ نوره بتدفع مليون وجاسر مليون ويا حلاوه

شادن اعتدلت بجلستها:طيب بشوف الموضوع انا

ملاك:تمام

قفلت ملاك تصور لها الفندق وحركت سيارتها مبتعده وضربت الدركسون بحماس:عائله ملغمه مصايب مصاايب

ابتسمت تحك جبينها وهي تسوق وعضت شفتها بتفكير وناظرت طريقها الفارغ وعرفت ان اللي خلفها ابتعد وهالشي ريحها

'

جلس جاسر مع امه وناظرته بضيق:جيت الليله ؟

جاسر:امس

نوره مسحت على كتفه:انا بكلم ابوك

جاسر:لا تكفين امي يرحم اهلك والله ما يدخلني البيت لو اموت

نوره:اجل لين متى بتسكت ؟ بيلين لو شاف عيالك بيلين

جاسر ناظر عياله ولف لأمه:امي جايب اثنين معي مو واحد وش يلين

نوره:عادي يا أمي لقيت حياتك هناك وتزوجت بالحلال وهذا أهم شي

جاسر:وين زوجتي ؟ والله انحاشت لانها بدون دين

نوره تنهدت:ماعليك فيها الكافره ذي المهم عيالك معاك

لفت لهم وابتسمت:أمي انتم تعالوا سلموا على جده

جاسر ناظر عياله اللي مو فاهمين شي وكلمهم بالانقليزي وتقدموا لنوره اللي تبوسهم

نوره ابتسمت ونطقت بالانقليزي تسألهم عن أعمارهم

رفعت البنت اصابعها بأربعه والولد ثلاثه ولفت تناظر جاسر اللي عاقد حجاجه بهمّ وضيق

نوره:ماعليه يا أمي اصبر وبلاقي حل

جاسر:بصبر مستحيل اروح لأبوي كذا مستحيل

نوره:انت شهادتك معاك جاسر يا أمي اللي رحت له جبته ليه يعصب ؟ عشان جبت ولدين معك ، هذولا أحباب الله ورزق من عنده

جاسر ناظر امه:ليت ابوي مثلك

نوره:بيلين ماعليك امك وادرى فيه

جاسر تنهد ولفت نوره تلعب مع الصغار

-

وقفت عند المكتب ملاك ونزلت من سيارتها وفتحت المكتب تدخل وجلست على المكتب وفتحت ملفاتها تنشغل فيها ولبست نظارتها الطبيه ورفعت عيونها من دخلت عليها وحده تعرفها وابتسمت بذهول ملاك تناظرها ورجعت ظهرها لورا:اوووه الآنسه جواهر ؟ لا يكون عندك قضيه نخدمك فيها

تقدمت جواهر وجلست وناظرتها ملاك وابتسمت:لا تبدين سناريو حريم بالله

جواهر:كيف وصلتي لشاليه ثنيان وصورتينا ؟

ملاك رفعت يدينها:انا؟

جواهر:وكيف عرفتي مكان يخت ثنيان ووصلتي لنا ؟

ملاك:انتي جايه تسأليني عن خطواتي ؟ والا اكلك الفضول ؟ والا خايفه من خطواتي الجايه ؟

جواهر:اخاف منك ؟ مستحيل انتي حشره بحياتي وحياة ثنيان وبندعس عليك قريب ، انا مستحيل اخاف منك

ابتسمت ملاك:ما تخافين اكيد لو تخافين ما ارسلتي مليون وميتين عشان صوره

سكتت جواهر وضحكت ملاك:لا تعيقين خطواتي ياجواهر وانا ماعندي مصلحه معك فأبتعدي افضل لك

جواهر:خطواتك اللي تتكلمين عنها هي ثنيان ، وانا مستحيل اخليك تربحين ثنيان ، ثنيان مستحيل يطالع في وجهك يعشقني وبجنون وحط رأي اهله عني بعرض الحايط

ملاك ابتسمت ورفعت اصبعها:( تو ليت ) ياجواهر ، متأخره وجداً

جواهر شدت على فكها من شافت دبلة ملاك بإصبعها وتقدمت ملاك على المكتب وجمعت يدينها ببعضها ورفعت عيونها لجواهر:لا تخلين عيوني تشوفك وما بلاحقك تطمني

جواهر:تحلمين ابعد عن طريقك انا بطيحك وبرجع اللي اخذتيه مني ومن امي

ملاك هزت راسها لها:انتي بديتيها

جواهر:ويمكن مره وحده  ادخلك مستشفى للامراض العقليه لانك ..

رفعت كفها تأشر على عقلها بإنها مجنونه وضحكت ملاك وثواني اعتدل وجهها بالجديّه وناظرت جواهر بحده:طيب اسمعي الكلمتين هذي عشان لا اطلع عليك ..

اشرت على عقلها بالجنون وكملت:اذا للحين ما انكشف موضوعك وجات على مليون ! لمي نفسك ، وخافي لان لو ابوك وصله خبر انك تنامين بأحضان ولد العميد عقاب عدوه الوحيد ! بنترحم عليك ، وخافي على ابوك الشيخ الكبير عشان لا تصير سمعته بتراب الارض ويخرج من الدنيا بفضحيه شكبرها عشان بنته خرجت من شوره ولها سنتين متهنيه بحضن ولد العميد الله أعلم بالحلال والا بالحرام ، ولو مو خايفه من هذا كله خافي مني لانك قبل شوي تقولين اني ..

اشرت على عقلها بالجنون وناظرت جمود وجه جواهر وابتسمت ترجع ظهرها لورا:تشربين شي ؟

ماردت جواهر تناظر ملاك بصدمه وذهول من كلامها وتهديدها واخذت شنطتها وخرجت وابتسمت ملاك وهمست:شربتها المرّ وش باقي بتشرب مني ؟

اخذت نفس ولفت لأوراقها تنشغل فيها من جديد

'

دخلت الفندق وهي لابسه نقابها ومشت للكاونتر وابتسمت:مرحبا في نزيل عندكم بإسم جاسر بن عقاب

هز راسه:صحيح

شادن:اذا موجود بالغرفه بطلع له اذا سمحت

:مع الاسف اختي هو بالمطعم تحت ممكن تنزلين له

شادن سكتت ثواني وهزت راسها:يعطيك العافيه

مشت وضغطت المصعد وركبت ونزلت للمطعم ومشت تدخل المكان

تلفتت بالمكان تدور بعيونها على شخص ماتعرفه ولا تعرف كيف بتعرفه لكنها تدور بعيونها بين الموجودين

وقفت بالمكان تدور وتناظر اللي ياكلون ولفت من خبط برجلها طفل وبيده ايسكريم ولفت بصدمه وعقدت حاجبينها تشوفه يطيح ويبكي ورفعت راسها من تقدم:جون

رفعت عيونها له من تقدم يشيله من الأرض وجمد وجهها من عرفته ولف عليها يناظر عيونها:معليش عدمنا عبايتك كان مستعجل يركض ما انتبه

ماردت عليه وهي تناظره وتناظر جون بحضنه وبلعت ريقها:لا مو مشكله الحين امسحها اهم شي هو ماتعور

لف جاسر على جون اللي يبكي وناظرته شادن:ولدك ؟

لف عليها وهز راسه وتقدمت بنت ومسك راسها وناظرتها شادن وابتسمت:الله يخليهم لك

هز راسه جاسر وتخطاها يمشي لطاولتهم وجلس وجون على الطاوله وجلست البنت قدامه تكمل اكلها

بللت شفايفها وجلست على طاوله لوحدها وهي تناظرهم كان يأكل جون ويسكته لانه لا زال يبكي وتسمع كلامه ما كان يتكلم معهم بالعربي ابد

نزلت عيونها من التفت عليها وناظرت المنيو واخذت جوالها ترسل لملاك:عياله

ملاك:صوريه

بللت شفايفها شادن ولفت تناظر جاسر وعياله ورفعت جوالها تمثل انها تكلم والتقطت صور لهم ونزلت جوالها وناظرت الصور

قفلت جوالها ولفت من تقدمت البنت وناظرتها بصدمه شادن

نطقت البنت بالانقليزي:اسمي سارا ووالدي يقول حساب طعامك مدفوع مقدماً

رفعت عيونها شادن لجاسر اللي ميل شفايفه بأسف ولفت للبنت:ماله داعي شكراً

سارا ابتسمت ورفعت كتفها:عيونك تبدو جميله

شادن ابتسمت:شكراً وانتي جميله جداً

سارا:لا أشبه والدي أشبه والدتي

رفعت شادن اصابعها على شعر سارا وابتسمت:أين والدتك ؟

سارا رفعت كتفها وماردت ورفعت عيونها شادن لجاسر ولفت لسارا:فرصه سعيده سارا

سارا ابتسمت ووقفت شادن واخذت شنطتها وطلعت من المطعم ولف جاسر من تقدمت سارا:لا تريد

لف جاسر يناظرها تركب المصعد ولف لجون اللي يأكله وتنهد بتعب

'

نهار ابتسم وخرج من النادي شايل شنطته ولابس كابه وتيشيرت وشورت وبيده قهوته وركب سيارته وحرك وهو يدور رقم منيف وكلم وهو يسوق

على رد منيف:ارحب

نهار ابتسم:دوبك صحيت ؟

منيف فرك عينه:والله انت اللي صحيتني

نهار:زين لان قبلها دقيت اربع مرات

منيف تثاوب:ما حسيت والله

نهار:فاضي ؟

منيف:الحين اي

نهار:لا مو الحين بعد يومين

منيف:ليه ؟

نهار:عندي تمرين بس ماهو بالخبر وابيك تجي معي

منيف:وين ؟

نهار:بالعُلا

منيف رفع حاجبينه:اوله

نهار:بالله تعال وتذكرتك علي بس تعال ونقعد كم يوم

منيف:والله مدري نهار ما عمري رحت وابطيت برا البيت واختي لوحدها

نهار ضحك:اختك زوجة ثنيان ترا ، وبتجي معه

سكت منيف ثواني:اهلك بيروحون ؟

نهار:ماقلت لهم لين الحين انت اول من كلمته بس ادري فيهم بيجون يجون

منيف:مدري والله ما اوعدك

نهار:حجزت وخلصت

منيف:يا نهار !

نهار:طيب ان وافقت اختك بتجي ؟

منيف:اي

نهار ابتسم:اجل استعد

منيف سكت وقفل نهار ووقف بالمواقف ونزل ودخل وهو يدندن ودخل الصاله ولقي نوره:ام النهار

نوره رفعت راسها وابتسمت من طاقته وروحه:أمي

تقدم وباس راسها وجلس:ودك تتمشين ؟

نوره:ياماشاء الله على طاقتك يانهار رحت مشوارين ورجعت مافيني احرك رجليني

نهار:لا مو الحين بعد يومين

نوره ناظرته:وش عندك بعد يومين ؟

نهار:تمرين

نوره:اجي معك أمي انت وين تروح اجي معك وأدعمك

ابتسم نهار واخذ كفها يبوسه:أعشقك أم نهار

ابتسمت نوره:وين ؟

نهار:بالعُلا

عقدت حاجبينها نوره:بالسعوديه ؟

نهار هز راسه:اي بتكون مستوى سعودي شريف ضامن فوزي بإذن الله

نوره:اي طيب اجي معك

نهار:كلنا كلنا بكلم ساري ينسق جدوله وبحجز لكم هناك فيلا ونقعد كم يوم تنبسطون

نوره ابتسمت:اسم الله على روحك

نهار:أصايل بالبيت ؟

نوره:لا سِتّنا الهانم برا

نهار:طيب انا اكلمها بس كلمي ابوي انتي

نوره:اكلمه ماعليك

لف نهار:صح نبي ثنيان يجي

نوره:كلمه شوفه وش يقول ماظنتي بيرجع لدوامه بعد اجازته

نهار:بكلمه بس اعزمي ملاك

نوره:هاو فشله نهار بقول لثنيان يعزمها

نهار:ما يناديها اعرفه كلميها انتي

نوره:بشوف بالاول ابوك وش يقول

نهار:حلو اجل بدخل اخذ شاور انا

وقف وخرج من الصاله ودخل غرفته

دخلت تناظر ديّة منصور اللي معروضه والمتبقي منها ١١ مليون

ابتسمت براحه لأنها لوحدها سددت دية منصور ٣٠ مليون اخذتها بحيله من تجار كبار دخلت بينهم وكأنها ملاك فعلاً طلعتهم من قضايا بمرتب قليل وبنفس اللحظه طلعت اسوأ مافيهم ونقاط ضعفهم وهددتهم بدون ما يعرفونها والحين جاي الدور على نوره وجاسر والجاي أفضل قدامها وهي متأكده مؤخر ٥ مليون بيسد اخر ديّة منصور وبيخرج منصور بمده قصيره

لفت تناظر رسالة شادن:ارسلتها لامه

رجعت ظهرها تناظر صورة جاسر وعياله ودق جوالها ورفعت عيونها بإستغراب وردت:هلا

ابتسمت نوره:ملاك !

ملاك هزت راسها:وصلتي

نوره:كيف حالك ؟

ملاك:الحمدلله بخير انتي كيف صحتك ؟

نوره:بأحسن حال ، قاعده مع عقاب نسولف ، نهار عنده تدريب بالعُلا بعد يومين ووده نروح جميع معاه وانا قلت خل ننادي ملاك تجين معنا ونتسلى سوا

سكتت ملاك بهدوء ولفت نوره على عقاب اللي يناظرها:وثنيان وده اكيد لكنه مشغول قلت اتصل انا ادري ما بترديني

ملاك:والله ما اعرف وش اقولك بس وقتي ضيق ومنشغله بقضيه ماخذه وقتي

نوره:بزعل منك ! هذا اول طلب تطلبه خالتك وما بتروحين مع احد غريب حمولتك وأهلك

سكتت ملاك بهدوء تفكر ونطقت نوره:بس نهار وده يحجز طيران لنا سوا ويبي بياناتك

ملاك:على خير

نوره ابتسمت:نتقابل ان شاء الله

ملاك:ان شاء الله

قفلت نوره ولفت لعقاب:بتجي

عقاب:وثنيان وينه ؟

نوره رفعت كتفها:ما ادري والله

عقاب:كان عزمها هو بنقعد نضبط حياته من وراه ؟

نوره:بداية زواجهم وما يفهمون بعض بعدها بتلقاهم يتفاهمون نفس ساري وجنى

عقاب:ساري للحين ما يفهم جنى

تنهدت نوره:الله يصلح الحال

وقف عقاب واخذت جوالها نوره تناظر الرساله ولف عقاب من تذكر:صح ما قالك نهار كيف بينقل فرسه معه ؟

ماردت نوره وهي تناظر الصوره بصدمه ونطق عقاب:نوره

رفعت راسها بجمود وهمست:هلا

عقاب:وش فيك ؟

نوره هزت راسها بالنفي:ولاشي وش بغيت ؟

عقاب:خلاص انا اتكلم مع نهار

مشى تاركها ولفت نوره تناظر الصوره بخوف وقرت الرساله اللي تحتها:لو جات الصوره مِنا بيزعل العميد واذا تبين الموضوع يخرج منك مطلبنا مليون وميتين الف ريال سعودي على هذا الحساب

قفلت جوالها ومسكت راسها بصدمه وهمست:يارب سترك

'

دخل غرفته ولف على جون:وقت النوم

لف بإنزعاج يفتح السرير عشان ينامون عياله وانسدحوا وباسهم وغطاهم واخذ نفس بتعب وقفل الانوار وخرج مع بلكونة الفندق معه جواله وناظر الرساله اللي جاته وجمد وجهه من شاف صورته مع عياله

ظل يناظرها ويقرأ الكلام اللي تحت الصوره:جبت شي أغلى من الشهاده ياجاسر بن عقاب ، عقاب بيكون فخور فيك

نزل عيونه من انرسل ايبان حساب بنكي وتحته مكتوب مليون وميتين الف

ورجع يفتح الصوره وعقد حاجبينه يتذكر اللي كانت بالمكان ومنقبه والصوره من الطاوله اللي جلست فيها وهمس:بنت الكلب ماكانت صدفه

هز راسه بتعب ومسك راسه وجلس واخذ نفس ولف من اتصلت نوره ورد:هلا أمي

نوره لفت تناظر حوالينها:جاسر في احد صورك بالفندق وارسل علي صورتك

جاسر:وصلتني

سكتت نوره بصدمه:هددوك ؟

جاسر:امي لو ابوي وصله خبر الحين قتلني اقسم بالله تبرأ مني

نوره:اسكت اسكت بحلها أنا كمل طلبوا منك ؟

جاسر:اكيد ما بتعطينهم فلوس ويرجعون يبتزونا من جديد

نوره:نسكتهم لين اقدر اتكلم مع ابوك وافتح الموضوع معه

جاسر:امي تكفين حليها مو قادر اعيش لوحدي مع العيال مخنوق يمين بالله

نوره:هانت يا إمي بفاتحه اذا رحنا للعُلا مع اخوك نهار

جاسر عقد حجاجه:شعنده نهار ؟

نوره:تمرين

جاسر تنهد:حليها امي تكفين برجع لبيتنا ولاخواني

نوره:بإذن الله تطمن يا أمي انت

قفلت منه ولفت تناظر البيت خلفها ومشت بحوش البيت ووقفت عند المسبح وهي تتصل

:استاذه نجلاء ، يسعد مسائك معليش اتصلت بوقت متأخر بس بغيت أمر بكره عليك البنك عندي حواله بنكيه كبيره

ابتسمت نوره:ماقصرتي الصبح انا عندك ان شاء الله

قفلت جوالها ولفت تناظر البيت ومشت تدخل

'

قفلت شنطتها ولفت لمنيف اللي ينتظرها وهمست:مشينا

ابتسم منيف وحط ذراعه خلف ملاك وفتح سيارته وحط الشنط وركبت ملاك

فتحت مرايتها تناظر شكلها ولفت من ركب منيف وابتسم:سفره مكفولين مشمولين فيها ! وش احلى ؟

ابتسمت ملاك:هذا وما صرت ببيتهم

منيف ابتسم:والله نهار ابن حلال

ملاك:كل اهله يقولون هذا الطايش الضايع والحقيقه انهم كلهم ضايعين وهو اعقلهم

منيف ناظر المطار اللي توقفوا عنده ونزلوا ومشت ملاك ومنيف بجانبها والعامل خلفهم بالشنط ودخلوا لمنطقة رجال الأعمال وابتسمت ملاك تشوفهم جالسين بإنتظارهم

اخذ فنجان القهوه وشرب منه ورفع عيونه من شافها جايه ولانت ملامحه من نطق عقاب:عيال مساعد يالله حيّهم

حط فنجانه ثنيان ولف لأمه اللي شدت على ذراعه وهمست:انا عزمتها

رفع عيونه ثنيان لملاك اللي مبتسمه وناظرتهم:كيف الحال جميعاً ؟

نهار ابتسم وتقدم يسلم على منيف:الفال الطيب

منيف ابتسم:لو خسرت معد بتعزمني

نهار:فايز بإذن الله انا بهذا التمرين واثق أتم الثقه بنفسي

ابتسمت ملاك تناظر نهار اللي رافع ذراعه خلف كتوف منيف

ابتسم عقاب:ان شاء الله بإذن الله منصور ، منصور

جمد وجه ملاك ولفت تشوف ملامح عقاب وناظرته مبتسم يسولف وتغيرت كل ملامحها من إسم منصور وبدت تعلا صوت افكارها

وش كان قصده ؟ ليه قال منصور ؟ ليه ما قال فايز ؟ معقوله عرف طرف خيط ؟ يعني عقاب يعرفها ؟ عقاب كاشفها ؟ هي زلّت هي غلطت ؟ انكشف موضوعها ؟

لفت من مسك ذراعها منيف وهمس:ماهو مقصود

ناظرته ملاك وبلعت ريقها وناظرها منيف والتفت لأصايل اللي جالسه بجانب جنى وصد عنهم

ساري:اذا ما رجعتنا بكأس الفوز بخليك تداوم عني شهر يانهار

ضحك نهار:المكسب الأول بيكون جمعتنا اللي من حُر مالي

ابتسم عقاب:والله ما توقعت تتكفل بكل شي قلت بيجي يطلب

نهار:افا ! وانا ولد عقاب

ابتسم عقاب ولف ثنيان يناظر ملاك اللي واقفه وعينها على عقاب وظل يراقب نظراتها لأبوه ولف لعقاب اللي مبتسم يمزح مع نهار ونزل راسه لفنجانه وهز راسه بأسف على الوضع اللي أنحط فيه ، كيف قدر يرتبط بوحده حاطه عينها على أبوه

ناظرت عقاب ملاك بنظرات شك وخوف ورعب هي تخاف لو ينكشف أمرها بدون علمها ، تخاف يبان موضوع منصور لان لو بان لهم منصور بانت كل الأوراق المستوره وعرفوا مصدر الفلوس اللي تنأخذ منهم إجبار

لفت نوره تناظرهم واخذت نفس تناظر جوالها هي من بعد ما حولت المبلغ ما عاد تواصلوا معها وهذا اللي مطمنها

رفعت راسها أصايل تراقب منيف اللي جالس على جواله وبجانبه نهار ولفت لجنى وهمست:كيف بناخذ راحتنا طيب ؟ كنت مجهزه اوتفت خيال

جنى ابتسمت:خليك نفسي من يوم تزوجت ساري صرت البس ملابسي بغرفتي اخوانك مرابطين بالصاله

تنهدت أصايل ولفت لجوالها تاخذه وجمد وجهها تقرأ الرساله : يا هَني من يسافر معك

عقدت حاجبينها ورفعت عيونها بالمكان تناظر حوالينها بخوف ، هي تحس انها مراقبه من وقت طويل

بلعت ريقها تلف تناظر اهلها وارتبكت تقفل جوالها

ولف منيف يناظرها تتلفت بالمكان ولف على ملاك

وقفوا يتجهون للطياره وتقدمت أصايل:ابوي

لف عقاب وتقدمت له وابتسمت تمسك ذراعه:خذني معاك

ابتسم عقاب يمشي معها ووقفت ملاك من تقدم لها ثنيان:ما ناديتك

ضحكت ملاك بهدوء وهزت راسها وهي تمشي معه:خالتي أم زوجي طلبتني قلت مابردها

ثنيان ناظرها تبتسم له ولفت تمشي خلفهم وركبوا الطياره وجلست بمقعدها ورفع عيونه عقاب يناظر ثنيان ويترقب لمقعده ولف ثنيان من انتبه ان ابوه واقف ينتظره ومشى يجلس بجانب ملاك ومشى عقاب يجلس بمقعده

لفت ملاك تناظر المطار من الشباك وبلل شفايفه ثنيان يصد عنها

أقلعت الطياره ولف ثنيان ياخذ التمر اللي تقدم له والقهوه الشقراء السعوديه ولفت ملاك على المضيفه:ممكن سموذي التمر ؟

لف ثنيان يناظرها هي طلبت الطلب اللي يتقدم دائماً لدرجة رجال الأعمال وهمس:ركبتيها ؟

ابتسمت ملاك:لا كنت انتظر أعرفك ياولد العميد وتركبني

لف عليها واخذت فنجان القهوه من يد المضيفه وشربت منها ولفت للغيوم اللي ضمت طايرتهم بالجو

اخذت نفس ملاك ورجعت ظهرها:كم من ١٠ ودك اللي جنبك جواهر ماهي ملاك ؟

لف عليها يناظر ابتسامتها لانها تبي تستفزه وصد عنها وهز راسه بأسف ونطقت ملاك:والا مجربين من قبل ؟

لف ثنيان وهمست ملاك:جو وبحر

ثنيان:خلي الجو يسلم

ضحكت منه وناظر نظراتها وصد عنها

عضت شفتها بإبتسامه ملاك ولفت عنه تناظر الشباك

'

العُلا

الساعه ٢:٠٠ مساءاً - الظهر - إسطبل الخيول

دخلت وهي لابسه نظارتها الشمسيه وتناظر بالمكان ولف عقاب:طلع بارد الجو

كشر ثنيان وهو يمشي خلفهم وجلسوا بالمقاعد ولف ساري:ليت الفرس ما تخونه

عقاب:ما تخونه تعب وهو يتدرب

نوره:حبيبي الله لا يخيب ظنه

أصايل رفعت جوالها تصور نهار اللي مشى بالإسطبل وجنبه منيف وتوجهوا لداخل

ولفت ملاك تناظر المكان وتقدمت لهم عصيرات على طاولتهم ولفت تناظر ثنيان اللي لابس كاب ونظاره شمسيه ، بلوفر وشورت وصدت تفرك يدينها وتراقب الإسطبل

طلعوا اسماء اللاعبين وصورهم وصفقوا من طلع نهار ورفع صوته عقاب:ولد عقاب

ابتسمت أصايل تصور ولفت ملاك تناظر صورة نهار بالشاشه ونزلت أنظارها من دخل يمشي ببدلته وخوذته فوق راسه ومنيف واقف على سور المضمار

لف نهار يإشر لأهله من بعيد وابتسم ولف لمنيف:دعواتك يالفال الطيب

منيف:ملعبك

ابتسم نهار وضرب كفه ووقف منيف وهو يراقبه وتوجه نهار يركب فرسه وياخذ نفس يشوف الحواجز بالإسطبل

بدوا المنافسين القفز على الحواجز ونهار ينتظر دوره

ضرب ظهر الفرس:قدّها خلينا نفوز

لفوا يراقبون الخيول اللي تقفز بالميدان لين دخل نهار الإسطبل ووقف عقاب يراقبه بحماس ولفت ملاك تراقبهم يشجعون نهار

وقف ساري يهتف:العب نهار

ابتسم ثنيان وعض شفته يراقب نهار بالميدان ولفت ملاك تراقب نهار اللي أنهى جولته

لفوا يناظرون الوقت والنقاط ودخل الساحه نهار وكملوا باقي المنافسين

نطقت أصايل:هو أسرع واحد للان ؟

نوره مسكت كفوفها:الله يوفقه يارب

ابتسم ثنيان:بيجيبها بيجيبها والله

ناظروا المنافسين اللي بالميدان واخذت جوالها ملاك تناظر مكالمة شادن ووقفت تبتعد عنهم وردت وهي تراقب الخيول:هلا

شادن:وصلت الحواله

ابتسمت ملاك ولفت على تصفيق عقاب وعياله واسم نهار اللي تصدر المركز الأول بالشاشه

شادن:وينك انتي ؟ وش هالازعاج ؟

ملاك:مع الحموله

ناظرت نهار اللي نزل من فرسه وركض لمنيف اللي نزل راسه ودخل الإسطبل وحضنه يرفعه وابتسم نهار يرفع يدينه لأهله

شادن:بديتي تدخلين معهم بالجو ؟

ملاك:مضطره أقفل مابي أطول اذا استجد شي بلغيني

شادن:اوكيه

قفلت ملاك ولفت ترجع لهم ولفت تناظر ثنيان اللي يناظرها وحطت جوالها على نطق أصايل:فاز نهار شفتي ملاك ؟

ملاك ابتسمت:اي ماشاء الله عليه

لفت تشوف نهار اللي توّج بكأس ونزل عقاب يدخل الميدان وتقدم نهار له وحضنه نهار وابتسم:بطل

ابتسم نهار وباس راسه والكأس بيده:ولد عقاب

ضرب كتفه عقاب ولف يمشي معه راجع لأهله والتفت منيف يمشي خلفهم ويناظر عقاب اللي حاضن نهار ويمشي معه ورفع عيونه لأهل نهار اللي واقفين يصفقون له

ووقف محله لثواني يراقب المشهد من صعد نهار لهم وحضن أمه وحضن أخوانه والفرحه تغمرهم كلهم وعقد حجاجه بهدوء وغرابه من المشهد اللي قدامه ما توقع انه حقيقي وممكن يصير

دعم ، وحب ، وتشجيع ، احتواء ، سند ، عائله

شي ما قد شافه او سمع فيه ولا توقع وجوده بالحياه لكنه وقف يناظرهم بغرابه وكأنه يشوف مشهد من فيلم

لفت ملاك تناظر منيف اللي واقف يناظرهم وعرفت مضمون أفكاره لانها تناظر فرحتهم بغرابه نفس ما يشعر منيف

لفت تشوف نهار يبوس خد أصايل ويحضنها ويسلم على باقي أخوانه وتشجيعهم له وحبهم واضح بدون زيف وتمثيل واصطناع ، بدون مصالح ، عائله ،

نزلت راسها تخفي ربكتها وحساسيتها ووقفت تبتسم لنهار:مبروك يابطل

رفع كفه يدق لها تحيه والتفت ثنيان عليها من ابتسمت تهنيه وابتسم نهار يجلس بتعب:حمدلله

تقدم منيف وجلس بجانب ملاك واخذ المويه اللي قدامه وصب له وشرب وهو صاد عنهم

عقاب:هذا كان شوط خفيف ، نبي التمرين الثقيل متى التمرين خارج السعوديه ؟

نهار:للحين ما اعرف ولا ادري وين بيكون بس بتجهز له اكيد

عقاب:وإحنا معك بلغني ان صار شي

نهار:ابشر

مسك ياقة تيشيرته منيف من اختناقه ولف عقاب على ملاك اللي ماسكه كفوفها ببعض:ملاك ! بردانه ؟

رفعت عيونها لعقاب ولف منيف على ملاك:ماتحب البرد

لف ثنيان عليها وابتسمت نوره:ياسبحان الله ، ثنيان ما يحب الشتاء والشخص الوحيد اللي كان يحب الصيف بعيالي هو ثنيان 

أصايل:الحين ماصار وحيد ، افضل تناغم اصلاً ثنيان وملاك

لفت ملاك تناظر ثنيان اللي صد ووقف عقاب:طيب نرجع عشان الدفى وعشان نتغدا

وقفت ملاك ورفع ذراعه منيف على كتوفها ومشت معاه قبلهم

وناظرهم عقاب يمشون لوحدهم قبلهم اثنين بدون احد ولف يناظر عياله خلفه يتكلمون مع بعض ورجع يناظر ملاك ومنيف

'

جلست بالكرفان وهي ساكته ولف منيف:هذولا ناس حقيقيه ؟

ماردت عليه ملاك وكمل منيف:ماشفت هالمشهد وهالناس طول عمري حتى يوم سكنا مع عمي محمد كان عبالي هذا مفهوم العائله ، بس طلعت غلطان

رفع اصبعه على الخارج:هذولا عائله

لفت ملاك:لا يغرك ، كل واحد فيهم شايل اغلاط اثقل من اساميهم

منيف:بس لو طاح واحد منهم وش بيصير ؟

ناظرته ملاك وسكتت وكمل منيف:وقفوا مع ولدهم وخرجوه من تهمة تحرش وجابوه يلعب هنا بكل شموخ بكل ثقه ، حتى الغلطان بينهم اسم عائلته تشرفه من اغلاطه

ملاك اخذت نفس تصد وناظرها منيف:لو عرفوا نيتنا واللي اخذناه منهم وش بيصير ؟

وقفت ملاك:خلاص منيف خلاص ، ما سمعونا واحنا نسرق بيسمعونا واحنا نتقاسم

منيف سكت وصد وهمس:ليش جيت انا

ملاك:انا مخنوقه اكثر منك بس خلاص

منيف لف عليه وفتحت باب الكرفان ملاك وخرجت لهم تشوفهم جالسين بجلسه وقدامهم جبل الفيل الجبل المشهور بالعُلا واضاءة النيران من حوالينهم والجو شاعري واصواتهم عاليه

ابتسمت ومشت تجلس ولفت أصايل:بسوي لكم فعاليه هنا

عقاب ناظرها وابتسم ولفت أصايل لنهار:بشرط انا معاك

نهار:وشو ؟

أصايل:هيلوكوبتر بس كل اثنين مره نتجول بالعُلا

نوره:بتدوخينا أصايل

خرج منيف ولفت ملاك تشوفه يمشي لهم وتقدم يجلس ولف نهار:انا بركب مرتين مره مع منيف مره معك

لف منيف يناظر أصايل اللي ناظرته وناظر نهار:وشو

نهار:هيلوكوبتر بالجو

منيف:لا ياشيخ روحوا انتم

نهار:والله لتجي

أصايل ناظرت عقاب:احجز ؟

هز راسه لها وابتسمت أصايل ووقفت ومشى خلفها نهار ولفت ملاك تناظر المكان وغمضت عيونها تاخذ نفس طويل

لف ثنيان من تقدمت تمد له تذاكر ورقيه:انت وملاك ، وجنى وساري وابوي وامي وانا ونهار مره بعدين نهار مع ..

لفت لمنيف وبللت شفايفها:معاك

نهار ابتسم:اول شي العميد

عقاب هز راسه بأسف ووقف ولف لنوره:تعالي

نوره:بتدوخني ياعقاب

عقاب مسك كفها:تعالي انا معك تعالي

ناظرتهم ملاك ولف ثنيان يناظر نظراتها لأمه وأبوه ولفت من داهمهم هواء وضيقت عيونها تشوف الهيلوكوبتر ورفعت عيونها من طارت وابتعدت بالجو ولفت أصايل لنهار:بتصورني اوكيه ؟

هز راسه نهار يراقب الهليكوبتر ولفت ملاك لثنيان:خذ أصايل

لف لها وناظرها وعقد حجاجه:ليه تعكر مزاجك ؟ شفتي شي ماعجبك ؟

ماردت عليه وصدت ومد التذكره لها ثنيان وصد وناظرتها ملاك وتنهدت

ركبت أصايل وهي تحط السماعات على راسها ونهار جنبها ابتسمت تصور العُلا على لحظة الغروب والمكان الفسيح الوسيع اللي تحت أنظارهم

وابتسم نهار لها من صورته وهبطوا بعد مده وتقدم نهار يرفع صوته لساري:موفق ياكابتن

ابتسم ساري وجلس وجنى يمينه وتقدم نهار لابوه:كيف التجربه ؟

عقاب:وش هالمكان ياولد ؟ سبحان الله

نوره:اي والله سبحان الله شي خيالي

ابتسمت أصايل تجلس يمين ملاك:اشبك اليوم مو بالمود

ابتسمت ملاك:ما احب البرد يعكر مزاجي

أصايل:توقعت ثنيان يبالغ يوم يقول كذا بس طلع حقيقي في احد يتعكر مزاجه من البرد

لف ثنيان على أصايل والتفت من هبطت الهيلكوبتر ووقف:يالله

ناظرته ملاك واقف ووقفت ومشت معاه تناظر ساري وجنى اللي تقدموا له وابتسم ثنيان لساري يصافحه كف بكف وركبت وحطت السماعه على اذنها ولفت من سمعت أصايل تصرخ تناديهم

لف ثنيان يناظر جوالها وابتسم وابتسمت ملاك وصورتهم والتفت ثنيان يربط حزامه واقلعت وناظرت العُلا ملاك والجبال الشاهقه والتراب الناعم الأشقر

وبعزّ سرحانها بالمكان تسائلت سؤال ، هي ليش تعيش اشياء كثيره المفروض تعيشها بروح غير روح الشيطان داخلها ؟

لفت تناظر ثنيان اللي يناظر العُلا وعقدت حاجبينها بإستنكار من وجوده بجانبها ونزلت نظراتها لدبلتها وكأنها عاشت بحظة إدراك للي تسويه وغرقت فيه

والتفت ثنيان لها يناظرها تناظر دبلتها ورفع صوته:اللي غير مزاجك ابوي

رفعت راسها وعقدت حجاجها تسمعه يتكلم بصوت عالي وهز راسه ثنيان:قلتي كيف ما ضبطت معي واخذت عقاب بدال ولد عقاب ، للحين تفكرين فيه حتى بعد ما غلبتك ؟

ماردت ملاك وهي تناظره وكمل ثنيان وابتسم:ابوي وامي الشي الوحيد اللي مستحيل وتحلمين تضرينه

ناظرته كيف يلوّنها بأفكار ما سكنت بالها ، كيف تقوله انها تناظر عقاب ونوره بمنظر الأم والأب الصحيين اللي استغربت حياتهم وانذهلت من عائله كبروها سوا

ابتسم ثنيان يناظر نظراتها له:البرد يعكر مزاجك ؟ انتي قوايل حارقه ، ما يعكر مزاجك الا الشيطان اللي داخلك

ماردت ملاك وهي تناظره وكمل ثنيان:طول ما أنتي جنبي ماشعرت ببرد لانك تفوحين نيران ، إنتي لَهب

هبطت فيهم وناظرها ثنيان وفك حزامه ونزل السماعه ونزل وظلت تراقبه ملاك ونزلت راسها تفك حزامها ومشت خلف ثنيان ورفعت صوتها تشوفه رايح لهم:ولد العميد

لف لها ثنيان يضيق محاجر عيونه من الهبوب وتقدمت له ملاك وناظرته وسط الهبوب اللي تحرك حجابها وعبايتها وناظرته:انا مابي اكون الصح ولا ابي اعلمك الصح عن ظنوني وأفكاري ، ولا بعدل شي تظنه فيني ، لكن داخلي نيران ويشوفها ويحسّها كل من جلس جنبي بس رغم هذا أنا بردانه

سكت ثنيان يناظرها توصف شعورها لأول مره بدون ابتسامات مستفزه وضحكه مزيفه

وصفت داخلها بإنه بارد يلفحه هواء رغم احتراقها بأفعال غلط تسويها

ناظرته ملاك لأول مره تضايقها فكره تنقال عنها لأول مره يأثر فيها كلام إنقال عنها

يمكن لانه مسّها من شي تفقده تشوفه ومستحيل تلمسه ، شي ماعاشته وما شافته الا فيهم

عائله ..

مشت تاركته تناظرهم جالسين وعينهم عليها وتقدمت لهم وابتسمت:شكراً أصايل انبسطت بس تعبت من البرد بدخل أريح

ناظرها عقاب ومشت تدخل الكرفان ولف منيف على نهار اللي يناديه ومشى معه للهيلكوبتر

تقدم لهم ثنيان وجلس يتجاهل نظرات ابوه له

'

دخلت الكرفان ومسحت أنفها من البرد وجلست وهي تناظر جلستهم قدامها من الشباك المظلل

وعقدت حاجبينها وهي تشوف عقاب يوقف متجه للكرفان رفعت عيونها من فتح الباب وناظرها:اقدر ادخل ؟

هزت راسها له ودخل عقاب تارك الباب مفتوح وتقدم يجلس جنبها

مسحت أنفها بالمنديل وهي صاده عنه وناظرها عقاب:تدرين اول ما شفتك وش قلت عنك ؟

ابتسمت بدون تناظره:شاهين

عقاب:بنتي

لفت عليه تناظره وكمل عقاب:تمنيت انك تكونين بين عيالي وتدخلين بيتي بأي طريقه ، ويوم ثنيان قال ابيها فرحت لان وجودك مكسب واعرف ان داخلك شي كبير بتعطينه لي ولعايلتي

ناظرته ملاك وكمل عقاب:ويمكن ماقد حاورتك بهالاسلوب ودايم اوقف قدامك عميد عقاب وانتي بنت مساعد المحاميه لكن اليوم ودي اوقف معك بحسبة ابوك وانتي اخت لأصايل

سكتت تتأمل عقاب وكمل عقاب:انا من اليوم مطمن على سمعتي وسمعة اهلي وادري اي طيحه لي او لعيالي بلقاك موجوده وبتسدين كل شي

ميلت شفايفها تناظره وكمل عقاب:لا تحسين انك غريبه بيننا ، انتي وحده منهم

ابتسمت ملاك تناظره وتجمعت بمحاجر عيونها دموعها وابتسم عقاب من شاف تأثرها عليها ورفع كفه يشد على كتفها ولفت من دخل ثنيان يناظرهم

ولف عقاب يناظره:تعال اقعد مع زوجتك

وقف عقاب وصدت ملاك تمسح عبرتها وخرج عقاب وناظرها ثنيان ولفت عليه تناظره

التفت يشوف ابوه اللي راح يجلس بعيد عنهم وقفل باب الكرفان وتقدم يجلس قدامها

ناظرته ملاك:انتبه لا تاكلك نيراني

مارد عليها من سخريتها وصدت ملاك تفصخ حجابها بإختناق وصدت عنه

ثنيان:وش يقولك ابوي ؟

تكلمت بهدوء وهي صاده عنه:شاف اللي انت ماشفته

ابتسم ثنيان:ابوي طيب ومسكين والله

لفت تناظره ملاك وكمل ثنيان:لانه مو مصدق نيتك الحقيقيه وما يدري انك سرّاقه

هزت راسها ملاك:صح سرّاقه ومليانه شرّ وداخلي نيران تحرقني وتحرق اللي حواليني

وقفت تناظره ورفعت صوتها:صح انا عكس اسمي وانا شيطان وانا ضحكت عليكم كلكم ونيتي تراب ونجسه واحب الظلام والشرّ ، اي انا كذا انا كذا ياولد العميد

تقدمت له وهو جالس وهمس:مو عاجبك طلق

ناظرها بحده ومسك عنقها بقوه يرجعها خلفها ويثبتها خلفها وتعورت تمسك يده وناظرته

ناظرها ثنيان بغضب:بتتمنين تموتين قبل اطلق ، والله لأطلع نيتك قدام ابوي وابين معدنك الوصخ

ناظرته بنظرات مليانه تحدي مليانه وجع مليانه شموخ مليانه ضعف مليانه قوه ، شي مستحيل يفهمه من نظراتها غير انها من كل شي ضد وضد

وشدت على كفه تحاول تفك عنقها من يده لكنه مابعد يده وفلتت يدها تضربه كف

فلتها وشد على فكّه بقوه بغضب والتفت عليها وناظرته ملاك وهمست:اكسرها لك

ماخلت له مجال يتكلم وفتحت الباب وهي تلبس حجابها وخرجت لهم وابتسمت وهي تتنفس من غضبها وتقدمت لهم تجلس

خرج من الكرفان وعينه على ابتسامتها اللي توزعها عليهم ولا كأنها اللي داخل قبل شوي ، وكأن الشيطان مات وهذي هي ملاك بينهم

ناظر نوره اللي تأشر له:تعال ثنيان

تقدم لهم يجلس ولفت ملاك عليه وهي تشرب من قهوتها:خدك أحمر قرصك شي ؟

لف عليها ثنيان يناظرها ولفوا يناظرون خده ورفعت كفها تمسح على خده:يمكن قرصك ناموس ؟

نوره:اي والله كثير هنا بيأذينا

ناظرها بحده ثنيان وابتسمت تبلل شفايفها وتشيل كفها عن خده

دق جواله وصد بنظراته وهو غضبان وناظر الإسم وبلل شفايفه يقوم من عندهم

ولفت تناظره ملاك وهي تشرب من قهوتها وصدت تاخذ نفس تستجمع نفسها

وقف بعيد ثنيان:هاه طلال

طلال:عمها حيّ وعنده ولد وبنت وموجود بالشرقيه

عقد حجاجه ثنيان:ليه ماحضر كتب كتابها ؟

طلال:علمي علمك بس كانوا ساكنين معه فتره طويله

لف ثنيان على منيف اللي يسولف مع نهار وناظر ملاك ورجع صد:طيب تعرف له عنوان ؟

طلال:اكيد طالع لي عنوانه

ثنيان:لا رجعت للشرقيه اخذته منك

طلال:ابشر

قفل ثنيان وحط جواله بجيبه ورجع يجلس بينهم

عقاب لف لأصايل:والله تعبان يا أصايل

أصايل همست:بليز ابوي

نوره:شتبي ؟

عقاب:ارقص معها بالظل

ناظرته أصايل بذهول ورفع صوته قدامهم

نوره:ماتكبر

عقاب:بعيوني ما تكبر هذي أغلى شي بحياتي وان كان بيتي قايم لليوم فهو قايم عشان أصايل فيه

ابتسمت أصايل من كلامه وضحكت جنى:العيال يعوضكم الله

نهار:لا تعودنا خلاص

عقاب:أصايل اللي بياخذها ما بيكون شخص عادي ولا بسمح انها تاخذ شخص عادي

رفع عيونه منيف يناظر عقاب ورجع صد عنهم

عقاب:وين نروح ؟

أصايل:شوف هناك كيف الاضاءه على كل الجبل والاغاني حلوه

عقاب تنهد ووقف وناظرته نوره:منجدك عقاب ؟

عقاب:دلوعتي

ابتسمت أصايل ومشت معه لبعيد وناظرتهم ملاك لين اختفوا عن انظارها وصدت بهدوء

لفت جنى:شوفوهم

رفعوا عيونهم للظل اللي تشكل على الجبل وعقاب ماسك يدين أصايل يرقص معها

وناظرتهم ملاك وصوت الاغاني الفرنسيه اللي بالمكان وظلمة المغرب اللي حلّت عليهم

وناظر ظلها منيف مع عقاب وكيف انها تتمسك بكفوف عقاب وترقص معه بخفه ولف يناظر نهار اللي يصور ظلهم على الجبل

غمضت عيونها ملاك بتعب من مشاعرها وبللت شفايفها تصد عنهم ورجعت تشرب من قهوتها

ودقايق رجعوا وتسمع ضحك أصايل وجلس عقاب وهو مبتسم

أصايل:وعدتني ترقص معاي بكتب كتاب ثنيان بس ماعطيتني وجه

عقاب ابتسم وناظر ثنيان اللي على جواله وملاك اللي تناظر فنجانها:بزواجهم ان شاء الله

رفعت عيونها ملاك لهم وناظر ابوه ثنيان

جنى ناظرتهم:حددتوه؟

ماردوا وناظرتهم نوره:متى ودكم ؟ عشان نشوف حجوزاتنا من بدري

لف ثنيان يناظر ملاك اللي ناظرته وابتسم لها:ليه نتأخر ؟

ملاك ماردت وهي تناظره وكمل ثنيان:يمديك تجهزين بشهر صح ؟

شهقت أصايل وناظرته نوره:ثنيان !

منيف ناظر ملاك اللي هاديه وتناظر ثنيان وارتبك

سكت عقاب يناظرهم ونطق ساري:ليه تستعجل ؟

ثنيان رفع كفه على خده اللي ضربته ملاك قبل شوي عليه ويحس بنيران صفعتها للحين وابتسم:ليه نتأخر ؟

عرفت انه بيرد الكف لها بإستعجاله وابتسمت تصد بهدوء بدون رد ولف ثنيان لهم:الشهر الجاي يمديكم من اليوم تجهزون

اخذت نفس ملاك وهي تناظر قهوتها وناظرته أصايل وابتسمت:توقعت بيطول موضوع زواجك بس انصدمت

عقاب هز راسه:زين دام تحدد

رجع ظهره لورا ثنيان ولفت ملاك على منيف اللي يناظرها وصدت عنهم

طلع جواله عقاب يناظره وسط سوالفهم وعقد حجاجه ولف لنوره:امس كنتي بالبنك ؟

سكتوا ورفعت عيونها ملاك على نوره اللي ارتبكت وهزت راسها

عقاب:ليه ؟

نوره:ولاشي بغيت اسوي تحويل وبس يعني ماهو شي مهم

عقاب:ماعطيتيني خبر

ناظرهم ثنيان ولفت نوره بربكه تضحك:شدعوه عقاب ماهو موضوع مهم

عقاب:مليونين نوره !

لف ثنيان على ملاك وجمد وجهه يناظرها وناظرته ملاك ببرود وهي تشرب من قهوتها من جديد

رفع عيونه منيف على نوره اللي سكتت ونطق عقاب:لمن حولتيها ؟

نوره:وحده اعرفها تبيها سلف وماقصرت معها وادري يعني بترجعها وماكانت تبي احد يدري

عقاب:منهي ؟

نوره:ما اقدر اقولك عقاب ماتبي اعلم بإسمها

نهار ناظر امه:سلف مليونين ؟ زرفتك هذي

نوره:لا تبيها تكمل مشروعها وبترجعها قريب

سكت عقاب يناظر نوره ولف من وقف ثنيان ماسك ذراع ملاك معه ووقفت ملاك معه وتنهدت بتعب تمشي معه

بعد عنهم وهو ماسكها من ذراعها بقوه وابتعدوا ونطقت:يدي بتنخلع

لفها بقوه وعقدت حواجبها بألم وناظرته

تقدم بغضب ثنيان:قولي ان المليونين اللي من عند امي ماهي من وراك

ملاك:ماهي من وراي

ابتسمت تكمل:بس كذا ؟ عسى اقتنعت

ثنيان تقدم لها يرفع صوته:لا تختبرين صبري انطقي لا تخليني ادفنك هنا الحين

ملاك صدت عنه من تطاير عليه لعاب غضبه وصراخه وتنفست بهدوء بدون رد

ضربها من كتفها ترجع وراها وتقدم:تدرين لو عرفت انك هددتي امي بشي وش بسوي فيك ؟

ملاك لفت عليه تناظره بهدوء ونطق ثنيان:تتمنين وقتها انك مت ولا عرفتيني

ملاك:لا هذي شي قديم من يوم شفتك ندمت اني عرفتك

ثنيان:يمين بالله يابنت مساعد لأبكيك

رفع راسه يكتم غضبه:اقسم بالله اقسم باللي خلق هالجبال كلها اني لأبكيك تسمعين ؟

ناظرته ملاك بدون رد ولف ثنيان وهو يتنفس بغضبه ولفت ملاك تتنهد بهدوء ومسكت ذراعها بألم

وبعد ثواني ابتسمت تبين أنياب أسنانها وضحكت بهدوء تناظر المكان وتتذكر تحدي ثنيان وجنونه وكيف وصلت للي تبيه بدون محد يردعها

تلّونت بالشرّ للحظات وتغيرت ملامح الملاك للشيطان ورجعت لهم ما تلقاه لكنها جلست بينهم ولفت لمنيف اللي يناظرها وابتسمت له وصدت عنهم

دخل ثنيان الكرفان وقفل الباب بقوه ولفوا عليه وابتسمت ملاك ترجع لهم تجلس بهدوء

لفت جنى تناظر ساري وهمست:شكلهم تهاوشوا

ساري:اوشش

نهار:هاه أصايل تجربين ؟

أصايل:عادي نهار بس الحين مبتلشه بعبايتي

نهار وقف:انا معاك تعالي

أصايل وقفت معه وجنى ناظرتهم:بتركبون خيول ؟

نهار:اي

جنى:ساري خل نروح معهم خيال المكان هناك

ساري:روحي معهم انتي

جنى كشرت وجلست ولف نهار لملاك ومنيف:تعالوا

ملاك لفت لمنيف اللي نطق:لا ماودي

نهار:من يوم وصلنا وانت رافض كل شي تعالي منيف اخلص

ملاك وقفت:انا جايه براقبكم ما بركب فرس

ابتسمت أصايل ومشوا يبتعدون ووقفت ملاك تناظر الخيول بالمكان ودخل نهار مع أصايل وساعدها تركب الفرس وابتسمت من اعتلت الفرس وناظرها نهار:أطلق خيّاله

ضحكت أصايل ولفت تناظر منيف اللي ركب فرس ونهار خلفها ومشوا بالمكان بهدوء

اخذت جوالها تصور ولف منيف يراقبها تصور ومبتسمه كان يحس بذبذبات حبها بصدره ويغرق بكل تفاصيلها ولا هو قادر على النجاه ، تسرقه وتنهبه وتفتنه وهو مو قادر على الصدّه

ضرب نهار الفرس ينطلق بسرعه قبلهم ورفعت عيونها أصايل تصوره من ابتعد عنهم ولف منيف يمشي على الفرس بهدوء بين الرمال الشقراء والهبوب البارده وأنوار نيران الحطب بالمكان

مسكت اللجام أصايل من تحرك الفرس بإنزعاج وصهل بالمكان

التفت منيف عليها يشوفها متوهقه:لا تشدين عليه

أصايل:خايفه يطيحني

تقدم منيف لها بالفرس ومد كفه ولفت عليه تناظره ورفع عيونها لها:عطيني

كان يقصد اللجام وهي ما سمعت منه غير عطيني كفك

ارتبكت ولاحظها ونطق وهو يناظرها:لجامك

بلعت ريقها ومدت كفها وسحبه معه ونزل من على فرسه ورفع عيونه عليها:بتنزلين من عليه ؟

أصايل:بنتظر نهار

توتر الخيل وهو يتحرك وتوترت أصايل اكثر ونطق منيف:انزلي ما يمديك لين يجي نهار

صهلت الخيول ولف يشوف فرسه اللي وقف قدام فرس أصايل يصهل أمامه ورفعت عيونها بخوف أصايل ومد ذراعه منيف على خصرها وسحبها بقوه تنزل من الفرس

وتشابكت الخيول ببعضها وابتعد معها للخلف

بلعت ريقها تغمض عيونها وتمسكت بتيشيرته تصد عنهم ولف منيف عليها وأحتّر داخله منها من قربها من كفوفها اللي تلمسه وتتمسك فيه وتستنجد وتحتمي فيه

ودّه يقول:احتمي فيني افقديني واسألي عني وحبيني وغاري عليّ ودوريني في ليالي العُلا وإزعاج الخبر بس لا تتركيني

رفعت عيونها أصايل تناظره كيف يناظرها وتوترت تفك كفوفها من عليه بخوف

لمس كفوفه ببعضها وصدّ عنها ونزل عيونه لكفوفه اللي لمستها وكأنه يشوف على باطنها آثار جمالها الباقي عليها

كيف يتوارى عن شوفها وهو ميت وملتاع هدب عينه لها

لف عليها يناظرها ولا لقيها وكأنها سراب الصحاري ، يتوه فيها ولا يلقاها تشبه المستحيل والمحال ، تلاعبت بصدره لعب الرياح لصغار الرمال

تقدم نهار له:وين أصايل ؟

منيف:الخيول لعبت فينا لعب مدري ظنتي رجعت لأهلك

نهار نزل من الفرس ومشى يبتعد واخذ نفس منيف وصد يمشي خلف نهار

متكيه تناظر المكان وغمضت عيونها بهدوء لين حست باللي يوقف جنبها فتحت عيونها من نطق:كان ركبتي معهم

ابتسمت من عرفت انه عقاب:ماودي

عقاب وقف جنبها يناظر المكان:تهاوشتوا ؟

ملاك لفت تناظر عقاب:انا وولدك بمرحلة تعارف بتصير هذي الاشياء

ضحك عقاب وهز راسه:زين ما اخترت لثنيان تصبرين على مزاجه وتقلباته

ملاك ماردت وصدت عنه ونطق عقاب:ثنيان ماهو أصعب عيالي ولا أسهلهم لكنه ما ينفهم من بعيد ان بغيتي تعرفينه ادخلي داخله

اشر على صدره:هنا ، بتعرفين انه نفس البحر وموجه

ابتسمت ملاك:ما سمى نفسه موج عبث

عقاب:يقول انه موج ؟

هزت راسها ملاك:وانا لَهب

لف من تقدمت أصايل تشد على ذراعها وساهيه:أصايل

رفعت عيونها بخوف وعقد حاجبينه عقاب:وشفيك؟

أصايل:الخيول بس مسـ

لفت بتأشر وشافت نهار ومنيف جايين وتوترت تلف لعقاب:فهمتني؟

هز راسه عقاب وناظرتهم ملاك ووقف نهار:خوافه ، الخيل يوم شاف الفرس جنّ جنونه وخافت أصوله الدلوعه

مشت أصايل تبتعد عنهم وناظرها منيف ولف لنهار:ترا كانت بتتعور

نهار:وهي خوافه زود الحين ادور لها ماتشا اراضيها

مشى خلف أصايل ووقف منيف جنب ملاك وناظرهم عقاب بتمعن لين حسّ منيف بنظراته وبلع ريقه بربكه ولف لملاك:تدخلين شكلك بردتي ؟

ملاك هزت راسها:عن اذنك ياعميد

هز راسه وابتسم ومشت ملاك مع منيف ولف منيف يراقب عقاب ولف لها:ما يطمني هذا الرجال اخاف منه

ملاك:ليه ؟

منيف:مدري ماهو مريح ونظراته غريبه

ملاك:ترا طيب وعلى نياته ولا يدري عن شي

منيف:والله مدري عنه بس انه يوترني

فتحت الكرفان وناظرت ثنيان اللي جالس وناظرهم منيف وخرج يتركهم

جات بتدخل وتقدم ثنيان:امشي معي

تنهدت ملاك بتعب من مسك ذراعها ونزل من الكرفان ومشى يبتعد نطقت بتعب من عواصفها اللي عاشتها بيوم واحد ولا لها طاقه اكثر:خلاص

ناظرت المكان ملاك من ابتعدوا:بتقتلني هنا ؟

لف ثنيان ووقفت ملاك وناظرها ثنيان:امي حولت لك

ملاك ماردت وهز راسه ثنيان:سألت وطلع لك وادري وواثق انه لك ، بوشو هددتي امي

ملاك:ماهددت احد

ثنيان تقدم لها بغضب:انا كاشف اوراقك تلعبين على من ؟ على من ؟ طالعي فيني انا الوحيد اللي كاشفك هنا واعرف نيتك

ملاك ناظرته بحده:طيب وكشفتني وتعرف نيتي وتعرف اني داخله العب في اهلك ليه مستمر ؟ طلق يا آدمي طلقني وفك عمرك وفكني من اللي انا عايشته هنا

ثنيان:تموتين وما اخليك تتهنين باللي اخذتيه ومن اليوم ياملاك والله لالاحقك واطلع انجس اوراقك واكشفها

هزت راسها ملاك:كان غيرك اشطر

ثنيان:عزاي لأبوك اللي شوهتي اسمه وحطيتي اسمه تحت التراب مثله

ملاك سكتت من جاب طاري ابوها وكمل ثنيان:اقسم بالله ما اخاف منك قد ما اشفق عليك ، تلعبين بالدنيا عبالك الحياه دايم بتوقف معك

ملاك هزت راسها:بتوقف معي الدنيا وبوقف على حيلي دايم ياولد العميد ومحد بيقدر يمنعني لا انت ولا عشره مثلك

رفع عيونه ثنيان خلفها من تقدم عقاب ونوره معه وناظرهم من بعيد يلمحهم يمشون لهم ورفعت سبابتها ملاك بتهدده ومسك كفها وتقدم لها يشد كفوفها ويحطها خلف ظهره ويحضنها

عقدت حاجبينها من حست انها توسطت صدره وكفوفها خلف ظهره وهمس بإذنها:اهلي وراك

كان يدري ان لو شافهم ابوه يتهاوشون لعن خيّره لانه يقدّس علاقة الزواج ويبني حياته على احترام الزوجات ويعرف انه يهاوش ساري دايم ويعاقبه ولا وده يتعاقب وتنتصر ملاك بشي

وكان الحضن هو وسيلة الصمت بينهم مع انه يحس بنارها وريحة رمادها من كفوفها اللي على ظهره لحضنها ، تشتعل لدرجة يحس بالدفى من حضنها

جامد وجهها وهاديه وهي بحضنه تسري النيران بدمها من شعورها ومن تشكل قدامها شكل منصور

رجفت بخوف وبربكه وهي تراقب خيال منصور ونطراته لها

عقد حاجبينه من الهدوء اللي سكنها من حضنه ورفع كفوفه على ظهرها بهدوء ، وكأن الموج يحيط اللهب ويهدي شراره وجمره

ورفع عيونه ثنيان من اختفوا اهله وابتعد عنها وعقد حاجبينه يشوفها ترجف ووجهها جامد وهمس:وشفيك؟

ماردت ملاك وفلتت يدها من يدينه وهي ترجف بشكل واضح وعقد حاجبينه يراقب اختلافها:كل هذا من قربي ؟

ماردت عليه نزلت عيونها لصدرها من حسّت انها تنزف وان الجروح داخلها تقشّرت وتلونت بالدمّ المحترق

رفعت عيونها وظل جامد محله ثنيان يناظر حالها وتغيرها ولاهو فاهمه ، يشوف محاجر عيونها محترقه من دموعها ووجهها يحترق من احمراره وكأن كل شي فيها يحترق ويشتعل

هي بس من تشكل قدامها خياله تدمرت ، هي بس عاشت يوم مع العائله اللي ركضت عشان تسرقهم وتدخل فيهم ! تدمرت

أنهدّ حيلها وأنهدّت قدامه تتنفس بتعب وتنزل دموعها بدون صوت ، توّن بهمس وكأنها أنصابت إصابه بجوفها

كان قريب منها يستكشف حالها ويستفهم عن وضعها اللي تغير من حضنه ، بس من حضنه

رفع ذراعه من كانت تترنح ورفعت كفها تتمسك بذراعينه وتتهاوى على الارض

جلس معها يناظرها مذهول ، مرعوب ، مستغرب

ونزلت راسها بتعب هي ليه تعيش كل شي مره وحده ؟ ليه يوم لمست الحنيّه بملمس صغير انهارت وطاحت ؟ ليه تبي كل شي تعيشه قاسي عشان تستقوى وما تطيح ؟ ليه يوم جربت حضن بعد سنين عجاف انهارت ؟

وناظرها ثنيان وهي جالسه ومتمسكه فيه وهمس:تعبتي تتصنعين القوه ؟

كانت تتحاشى الذكريات وتتوارى عن الحقيقه اللي تكبل معصمها وهي انها شرّ عشان تطلّع الخير اللي سكن داخلها

رفعت عيونها تحترق من مشاعرها وهي متمسكه فيه وهمست:لا تقرب مني مره ثانيه

ثنيان عقد حاجبينه وكملت وهي تهمس:أسند كفي على ظلالي ولا أسنده عليك

ثنيان:ليه ؟ ليه تقولين كذا وانتي متسنده عليّ ؟ ليه تغصبين نفسك تكونين شخص ماهو انتي ؟ ليه تتلونين بشرّ غصب عن الضمير اللي داخلك ؟

ماردت ملاك وهي تتنفس مابحيلها قوه عشان تغادر المكان

كمل ثنيان:تعيشين بربع ملاك وثلاث ارباع شيطان ، انتي ما انتي كذا ولا في احد يولد بشرّ نفس الشرّ اللي يسكنك ، ليه ؟

بكت بتعب لانها تسمع كلام ماتبي تسمعه وشد على كتوفها ثنيان يهزّها:فكّي أزرار الدموع ، بيتعبك وهو متستّر

رفعت عيونها من بكت ورفعت صوتها:ما يخصك لا بشرّي ولا بخيري ، وانت ماتعرف شي ماتعرف ولاشي ، اتركني اتركني يابني آدم انا ناار

صرخت تكرر اخر جملتها:انا نار

ناظرها تبكي ومتمسكه فيه وتطلبه يروح وعرف انها توقف على البيبان وتبي البيبان ما تفتح وتمثل شي ماتبيه وتعيش شي ما اختارته ، وتحترق تحترق مثل اللهب

فلت كفوفها ووقف وناظرها جالسه على الارض ومشى يتركها وبكت من راح وظلت لوحدها ، بكت بتعب تستجمع نفسها وتلملم جروحها وتمسك كتوفها بيدينها

تذكرت الحضن الاخير اللي عاشته بحياتها وكان حضن أبوها وماحضنت بعده ذكر بحياتها حتى منصور اللي شقت عشان تجرب حضنه ما عاشته

تذكر كلام عقاب لها وتذكر اهتمام أصايل لها والودّ اللي يكنه نهار تذكر نوره اللي اعتبرتها جزء من العائله ، تذكر انها م عاشت حنيّه من بعد منصور ويوم جاها حضن وكلام وتلميح واهتمام انهارت وطاحت

رفعت راسها تحرق غصتها احبالها الصوتيه ونطقت:اهخ

تألمت من كل شي وطاحت قدام عدوها ، طاحت لانها ماقدرت تروح بالوقت اللي كان لازم تروح

'

نزلت من الطياره تمشي مع منيف ولف منيف لنهار:مشكور على الرحله

ايتسم نهار:نعيدها ولا يهمك اختار انت وازهلني

ابتسم منيف يرفع عيونه لأصايل اللي ماسكه ذراع نهار وتمشي معه وعيونها عليه وصد للأمام يمشي مع ملاك

طلعت مع منيف وركبت سيارته وفتحت جوالها تناظره

لفت تناظر ثنيان اللي خرج من المطار ومعه شنطته يسحبها معه ولابس كابه فوق راسه ومتوجه لسيارته

صدت لقدام تتجاهل اللي عاشته وترميه ورا ظهرها

ركب منيف واخذ نفس وحرك ونطقت ملاك:امش ورا ولد العميد خل نشوف وين بيروح

منيف لف يناظرها:من ؟ ثنيان ؟

هزت راسها وناظر سيارة ثنيان اللي بالخط ومسكت كفه ملاك:لا تبيّن

هدأ من سرعته ورفعت عيونها وهي تراقب سيارته ولفت يمينها تشوف البحر وابتسمت تهز راسها من عرفت وجهته

وقف منيف من شافه يدخل لشاليهات ولف لها يناظرها:بتنزلين له ؟

هزت راسها بالنفي:ماهو لوحده

منيف:وتدرين انها داخل معه وبتقعدين ؟

لفت ملاك على منيف:اذا صرت اغار عليه وقتها بدخل عليهم بس بغيت اعرف اذا جواهر باقي تتنفس والا خنقتها لكنها ما زالت تلعب

منيف مارد وهو يناظر الشاليهات ولفت ملاك:خل نرجع

حرك منيف متوجه للبيت ونزلت اول وصولهم ونزل منيف ينزل الشنط

دخلت البيت ووقفت من شافت شادن جالسه بالصاله وعقدت حاجبينها:شادن !

ناظرتها شادن ورفعت حاجبينها ومشت ملاك تحط شنطتها على الكنب وتقدمت لشادن اللي وقفت وحضنتها ملاك

غمضت عيونها بهدوء:قولي ماصار شي يخوف

شادن:وين منيف ؟

ملاك ابتعدت تناظرها بخوف:وراي

شادن ناظرت منيف اللي دخل وتغيرت ملامحه من شافها ونطق:صاير شي ؟

شادن ناظرتهم:ابوي بلغ منصور انك تزوجتي

جمد وجه ملاك وعض شفته منيف يصد

وناظرت ملاك تكمل:منصور مستحيل يسامحك

ملاك ماردت عليها وجلست شادن:قلت لك ملاك بس بتحرقينه وهو محروق ، قلت لك بيعرف ابوي ماراح يسكت بيسوي اي شي عشان منصور يكرهك ، هو ظنه انك السبب بطيحة منصور هذي ، لانه قتل شخص تحرش فيك بمكتبك ، لانك كنتي مع منصور ولا منعتيه من الغلط خليتيه يقتل شخص وانتي معه والحين منصور بيقتل نفسه لو عرف انك تزوجتي غيره ملاك ، بيموت بيموت لوحده بزنزانه ، كنتي انتي الشي اللي بيخليه يطلع من السجن ويبي حياة الحريّه عشانه ، عشانك انتي بس اسـ

رفعت يدينها ملاك توقفها عن الكلام:لا تكملين

تقدم منيف يناظرهم ونطقت ملاك:ظنك بيقتنع منصور ؟ انتي تعرفين وش منصور وملاك ؟ تعرفين كيف يفهمني منصور بدون ما اتكلم ؟ تعرفين كيف افهمه ؟ تعرفين وش يعني انا ومنصور ؟

رفعت ذراعها ملاك وهي تتكلم بحرقه:تدرين قبل اعرف بحبه كيف نطق لي أحبك ؟ تعرفين ؟

ناظرتها شادن وعضت شفتها ملاك تمنع دموعها وكملت بهدوء:قالي الله يجيب الصالح

صدت شادن عنها وهزت راسها ملاك:وقتها عرفت انه يقولي أحبك لاني اعرف منصور اكثر منك ومن ابوه وامه اللي الحين يحسبون انهم يحترقون عليه اكثر مني انا ، ظنك بيكرهني ؟ بيصدق كلام ابوه عني ؟

منيف:زوريه

لفت على منيف تناظره ونطقت ملاك:ما يحتاج ازوره منصور يعرفني

شادن:مابتقدر تروح له ، وش بتقولين بتقولين صح والله تزوجت بس ترا تزوجت عشان اسدد النص الثاني من الديّه واكمل اسرق الناس عشان اطلعك

ملاك عقدت حاجبينها تناظر شادن:انتي معي بكل خطوه وقلتي كل ذا عشان منصور والحين انا اللي صرت اسرق الناس ؟ انا ؟ لوحدي ؟

ابتسمت ملاك تناظر شادن بصدمه:بنت أبوك

شادن وقفت وناظرتها:هذا الصدق ، وش تسمين انك حاطه دبله بيدك الحين ؟ مستانسه فيها ؟ والله اغلى من اللي كان بيجيبها لك منصور

ملاك:اطلعي برا

شادن:انتي قاعده تعيشين حياتك ملاك ، متزوجه ولد العميد عقاب ولد الشيخ عقاب المهندس الكبير ثنيان ، وتعالي قولي عشان اطلع منصور ، سددتي نص كامل من الديّه بدون ما تتزوجين ذكر واحد ليش الحين تزوجتي ؟

ملاك:اطلعي برا شادن مابي اكرهك اطلعي

شادن هزت راسها بالنفي:معد أصدقك

تقدم منيف وسحب شادن من ذراعها ومشت شادن معه وخرج وخرجت معه شادن ولف منيف عليها:تستهبلين ؟

شادن:لا تدافع عن اختك انت بعد قاعد تسرح وتمرح مع اخو زوجها وسفر وتماشي وانت اصلاً كنت رجل كهف قدام شاشاتك ما تقدر تطلع وتواجه العالم

منيف:اي انا رجل كهف ورجل يوقف قدامك وقدام اي احد بيأذي اختي ، ولو اني ما أعز منصور واعرف انه ما يشبهك ولا يشبه اهلك كان قلت باللعنه ولا نجمع له ريال لكنه منصور

شادن:مانبي منكم شي

منيف:اطلعي

شادن ناظرته ورفع اصبعه منيف وخرجت شادن ودخل منيف يناظر ملاك اللي جالسه وتهز رجلها بتوتر وتقدم لها:ابوها عبى راسها

ملاك رفعت عيونها:علي ؟

منيف سكت وكملت ملاك:انا ؟ شوف وين مكاني منيف وشوف وش قاعده اسوي وهم وش قاعدين يسوون لي

وقفت تناظر منيف ورفعت اصبعها:شوف ليش لبست دبله من شخص ما اواطنه ولا يواطني وشوف وش يقولون عني

هزت راسها ملاك:شوف من سدد لمنصور نص ديّته وشوف وش يقولون عني

منيف:لو انه غير منصور ما كان خليتك تسوينها

ملاك ناظرت منيف:ولو غير منصور ما كان كملت

مشت تاركه منيف ودخلت الغرفه تنفض غضبها من فوق صدرها واخذت نفس ولفت من دق جوالها واخذته تناظر رقم أصايل

تجاهلته ولاردت وجلست على سريرها وهي تفكر

'

ثنيان جلس على الكنبه على سؤالها:انبسطت معاها؟

لف يناظرها ولفت عليه تناظر حدة نظرته:ازعجتك بسؤالي ؟

ثنيان:لا تستفزيني جواهر تعرفيني ما احب غيرتك ذي وجاي من المطار تعبان عشانك

جواهر تقدمت له:ماقالت لك شي عني

ثنيان:ماتهمينها ليش تسأل عنك ؟

سكتت جواهر تخفي موضوع روحتها لملاك ونطقت بعد ثواني:يمكن تغار مني

ضحك بسخريه ثنيان:ملاك ماتشبه حركاتك ولا حركات باقي البنات

رفعت حاجبها جواهر وكمل ثنيان:هي منشغله بأشياء اكبر ماهي فاضيه تغار من بنات

جواهر:صح ملاك بكفه والبنات الباقين بكفه ثانيه

ثنيان رفع عيونه:هذا اللي فهمتيه الحين؟

جواهر:هذا كلامك

ثنيان تنهد يرجع ظهره لورا وهمس:صبرك يارب

جواهر:مو طايق تسمع مني شي ثنيان ما تلاحظ ! من يوم جيت وانت تتأفف وتستغفر !

ثنيان ناظرها بحده:اسمعي وش تقولين بالاول من دخلتي عليك وانتي ماعلى لسانك غير ملاك وطاريها ، ماكله قلبك اكل وهي ولا تلتفت لغيرتك ذي ولاهي ملتفته لي اصلاً ، اقولك نيتها ابوي حتى بعد زواجنا وسرقت امي ما ادري بوشو هددتها وانتي جايتني تغارين منها !

جواهر سكتت من وقف ثنيان ياخذ ملابسه اللي على الكنبه ويحطها بالشنطه:لا عقلتي وفكيتيني من غيرتك ذي كلميني

اخذ شنطته وخرج من عندها وطلع من الشاليه وركب سيارته وحط شنطته بالخلف ولف يشغل سيارته

مشى دربه يسترجع بكاها وطيحتها وضعفها من سبب مجهول يخمن انه من حضنه ، كيف قادره تخبي كل هذا الحزن والخوف والضعف ورا ابتسامات وقوه وكبرياء وغرور

مالقي نفسه الا عند بيت ملاك ووقف يناظر سيارتها موقفه وراقب البيت دقايق ورفع ظهره من خرجت تشغل سيارتها وتركب

ركبت وهي معصبه وتاكل نفسها من الغضب ساقت بسرعه ومشى خلفها ثنيان يشوف دربها

ولأول مره ما كانت تطالع خلفها كانت تناظر قدامها وكل اللي قدامها منصور ، لو كان فعلاً صدّق ابوه وأقوال ابوه عنها لو فكر انها اختارت غيره وتزوجت وتخلت عنه وهذا اللي ياكلها حالياً

وقفت عند السجن المركزي العام وعقد حاجبينه ثنيان يوقف ويناظرها تنزل من سيارتها وظل بسيارته يناظر المكان

دخلت ملاك ونزلت نظارتها وناظرت العسكري:بشوف منصور بن محمد

العسكري:هويتك لو سمحتي

مدت هويتها واخذت نفس تهدي أعصابها ولفت من نطق:اسمك ممنوع من الزياره

عقدت حاجبينها تناظره وهمست:كيف يعني ؟

العسكري:اسمك ممنوع من زيارة منصور بن محمد هذا اللي طالع لي

بلعت ريقها ملاك وتقدمت:انا محاميته

العسكري:اعذريني ما اقدر ادخلك

سكتت تناظر العسكري بصدمه ولفت تناظر باب السجن بحرقه

وقفوا قدامها عشان ما تزور منصور وحرموها تشوفه رغم انها تسعى بالظلام والشرّ عشان تطلعه

بلعت غصتها وحرقتها وغضبها وهي تناظر باب الزنزانه اللي يدخل للسجن واخذت هويتها وخرجت

عيونها تحترق من دموعها المحبوسه وتمشي بسرعه تبي تحرق نفسها من غضبها

عضت شفتها تشد على هويتها بقوه وتناظر الارض بحرقه ورفعت راسها ورفعت عيونها تناظر ثنيان أمامها

عقد حاجبينه يناظر عيونها الحمراء اللي تشتعل من دموعها وهمس:وش عندك ؟

صدت بتعب وهمست:اتركني بحالي

مشت لسيارتها وفتحت الباب وركبت وجات بتقفله وتقدم لها يوقف

غمضت عيونها تهدي نفسها:اتركني قلت

ثنيان:وش جابك للسجن ؟

رفعت عيونها عليه ملاك تحرقه بنظراتها ونطق ثنيان:لمن جايه ؟

ملاك:ما يخصك

ثنيان:اذا شلتي الدبله من اصبعك يصير ما يخصني

ملاك تنفست تشد على الدرسكون ورفعت عيونها للسجن:عندي قضيه وجيت اشوف الجاني

ثنيان:وبكّاك الجاني ؟

ملاك لفت عليه:مابكيت

ثنيان:طالعي عيونك تشتعل نيران

لفت ملاك عنه ونطق ثنيان:حتى دموعك رغم انها ماء  تخرج منك جمر ونار

ماردت عليه وتقدم ولفت عليه بإستغراب ونطق:روحي يمين

ملاك:وش تبي بسوق اتركني

مسك الدركسون بيركب وناظرته بصدمه:تستهبل ؟

ثنيان ناظرها بحده:روحي يمين قلت

تأففت وانحنت تغير مقعدها لليمين وركب مكانها ثنيان وقفل الباب وحرك

ساق مبتعد عن المكان ولفت عليه:انت وش جابك ؟ مو كنت بالشاليه ؟

ثنيان:تراقبيني يعني ؟

ملاك:نفس حركاتك

لف عليها وكملت ملاك:لاحقني لهنا

ثنيان مارد يناظر الطريق وسكتت ملاك تراقب الطريق بهدوء

وسأل ثنيان وهو يسوق:ليه ماحضر عمك محمد كتب كتابك ؟

سكتت لثواني تستوعب سؤاله ولفت عليه تناظره

لف ثنيان يناظرها:مو هو اللي رباك انتي واخوك بعد اهلك ؟ غريبه ماحضر !

ماردت عليه تصد وكمل ثنيان:يوم رباك انتي واخوك كم كانت اعماركم ؟

ملاك:لاحقني عشان تسألني هالسؤال ؟

ثنيان:اعرف أحوال زوجتي وأقاربها ومن يعاديها ومن يودّها

ملاك:محد معاديني

ثنيان:وليه ماحضر ؟

ملاك:ماكان بالسعوديه

ثنيان سكت يناظرها صاده ولف للطريق:وش هددتي امي فيه ؟

ملاك لفت عليه بغضب:وبعدين معاك انت ؟ ما يكفي لاحقني وحاشرني وتسوق عني وتستجوبني ؟ شتبي مني ؟ خلاص تعبت منك ومن الضغط اللي تعيشني فيه

ثنيان ناظر عصبيتها ورفع صوته:اذا عرفت ليش اخذتي من امي مليونين بالاول يابنت مساعد واذا عرفت وش وراك يابنت مساعد واذا ثدرت اطفي عالنيران اللي احرقتك واحرقت اللي حوالينك

ملاك صرخت تلف عليه:روح اسألها هي لا تنتظر مني اجابات انا ملاك ماني اجابات لاسئلة احد ، انا ملاك ماني ملك لأي أحد ، انا لحد ينتظر مني خير ولحد ينتظر مني شي انا ولاشي ، ولاشي ، وخل نيراني تحرقني

لف يناظر عصبيتها وهمست وهي تتنفس:وقف السياره

ثنيان التفت للطريق:ماني موقف

ملاك ضربت الكبوت:قلت وقف السياره وانزل منها

ثنيان لف وصرخ بوجهها:تحلمين اوقف نفس ما تحلمين اطلق

ملاك حست بالإختناق وانعمت عيونها من غضبها من قهرها من النار اللي تحرق داخلها ومن صراخ ثنيان عليها وعصبيته من نظراته لها ومن تسلطه ومن منصور اللي ينتظر جيّتها ومن ابواب زنزانته اللي تقفلت بوجهها ومن اتهامات باطله تجيهها ومن الشرّ اللي اخذ من عمرها ولوّن صفحة كتابها بالسواد

فتحت الباب ترتخي على طرفه ولف ثنيان بصدمه يلف الدركسون ويمسك ذراعها بقوه

جمد وجهه يشوفها مغمضه عيونها راسها لأسفل الباب على حد الزفلت وماسك ذراعها بقوه ويسمع صوت حريق الكفر من فرامله الشديده

غمضت عيونها ترفع يدينها تشمّ ريحة الفرامل وماتحس الا بالهواء اللي يلفح وجهها والكف اللي ماسك ذراعها بقوه

توقفت السياره وناظرها ثنيان وهو يتنفس بصدمه وخوف ورعب وشدها من ذراعها بقوه يدخلها ويقربها له مرعبو مذهول مصدوم ، كيف تثير استغرابه وتشغله باسئله هي من تكون ؟

رفعت راسها من شدها لها وناظرته من قريب وسحب طرحتها اللي طاحت على وجهها وتناثر شعرها على وجهها الأحمر المشتعل من نيران داخلها

ناظر عيونها ثنيان وعقد حجاجه منها ، كل مالها تصدمه أكثر من تصرفاتها وكل يوم يحسها أغرب من قبل تتلون بالغموض وترعبه ويخافها

همس وهو شادها من ذراعها:انتي صاحيه ؟

ناظرته لين لانت ملامحها تحس بالغصه تقطع حبالها الصوتيه من شدتها وجلست على مقعدها بأعتدال تناظر الطريق قدامها

وناظرها ثنيان بخوف من سكوتها وفتحت بابها تنزل ومشت لين بابه وناظرها واقفه تنتظر نزوله وشعرها على ظهرها ووجهها ونزل من سيارتها

ركبت وقفلت بابها بقوه وشغلت سيارتها وحركت تاركته بالشارع لوحده

ساقت لين وصلت لبيت عمها ونزلت من السياره تجرّ نفسها جرّ ووقفت تدق الباب بأقوى ماعندها

رفعت عيونها من انفتح الباب وناظرت شادن ودفعتها تدخل ولفت شادن بصدمه وهمست:ملاك !

دخلت ورفع عيونه محمد بصدمه وذهول ولفت عليها وفاء وعقدت حاجبينها

ناظرتهم ملاك والقهوه اللي بمنتصف قعدتهم وضحكت تهز راسها

محمد:وش جابك ؟

ملاك:مانعني اشوف منصور

محمد:اي

ملاك هزت راسها:وجالس تشرب قهوه هنا وانا اجرّ نفسي بألغام عشان اطلّع منصور صح ؟

محمد وقف:مانبي منك شي ولا منصور يبي منك شي ، تزوجتي غيره وجايه وش تبين ؟ رحتي اخذتي ولد شيخ من الشيوخ اللي تاخذين قضايا منهم عشان تتزوجين واحد منهم وش تبين بمنصور

سكتت ملاك تناظره وكمل محمد:ولدي بالسجن ضايع مستقبله وانتي تتنعمين بفلوس ولد العميد

ملاك تقدمت بغضب:وانت هنا قاعد تنوح وتوّن ؟ قاعد تتقهوى يا ابو منصور ، قاعد تاكل زقوم وولدك محروق قلبه من افكار انت اخترعتها

محمد:انا ابكي كل ليله على ولدي ماتدرين عني

هزت راسها ملاك:صح انت تبكي وتحرق ملاك وتحرق منصور معك صح ياعمي صح ياللي ربيت عندك صح ياللي عديتك ابوي صح

صرخت بوجهه بغضب:احرقني واحرق منصور ياعمي احرقنا سوا

ضربت صدرها بقوه:زيدني نيران فوق نيراني احرقني

ناظرتها شادن وعضت شفتها برعب من صراخ ملاك

وتقدمت ملاك تدفع صدره بقوه:زيدني نيران ، احرق

ناظرها محمد ولارد ووقفت ملاك تناظره كيف العائله اللي عاشت معاهم سنين طويله رموا كل العشره بعرض الحائط وحاربوها الحين كيف انها شرت ببكاها ضحكتهم واحرقوا دم قلبها في شرايينها

ملاك:غلطة منصور اللي الحين هو بسببها بالسجن ماهو انا سببها ، غلطته انه رجال ودافع عن خطيبته وحافظ على شرفها وسمعتها ، انا ماني غلطة منصور

محمد:انتي السبب من يوم اختارك وحياته انقلبت فوق تحت انتي الشؤم والتشاؤم لمنصور ، من يوم اخذتكم وكبرتكم ببيتي واعتنيت فيكم ما جبتوا لي الا المصايب والمشاكل

ملاك:اي عنايه ؟ اي عنايه اللي تتكلم فيها ؟ انا كنت اسمعك تخبي لمنصور وشادن اكل وتقول لا تعطونهم ما بيكفيكم ، كنت اشوفك تهتم بعيالك ومستثقلنا اي عنايه ؟ انت اخترت لعيالك مدارس خاصه واحنا كنا حكومي ، اي عنايه وانت فرقت بين عيالك وبيننا ؟  منصور اللي تقاسم معنا اللقمه واعتنى فينا ماشفت منك ولا من زوجتك شي

محمد اشر على ملاك ولف على وفاء:تشوفينها ؟ جحدتني بعد ما اخذت ولد العميد

ملاك هزت راسها بأسف:بحياتك كلها لا تفكر تجي تعتذر لي ولا تشوفك عيوني

محمد:الله لا يحوجني لك

هزت راسها ملاك ولفت تناظر وفاء اللي واقفه وشادن خلفها وطاحت دموعها غصباً عنها تناظر البيت اللي عاشت فيه وكبرت فيه

ومشت تترك البيت وهي تبكي فتحت باب سيارتها وركبت ترفع صوتها بالبكاء صرخت من وجع صدرها ومن شتاتها ومن وحدتها ، من الوحل اللي اكل منها اكل عشان منصور ، من الشرّ اللي ينهش داخلها ويشوّه السام اللي اختاروه اهلا بعنايه عشان تكونه ، تكون ملاك

-

دخل ثنيان البيت ومشى لين غرفة امه ودق الباب ودخل ناظرها واقفه مع خدامه تطلع لها ملابس من الدولاب:هذا لا ما ينفع ، طلعي الاسود اشوف

تقدم ثنيان وانتبهت عليه نوره:هلا أمي

ثنيان لف عليها:بتكلم معك

نوره:يمه لا تقول أجلت زواجك ؟

ثنيان عز راسه بالنفي ولفت نوره:خلاص روحي مريم

مشت تخرج تاركتهم ومشى ثنيان يجلس وجلست نوره:وش صاير ؟

ثنيان:لمن حولتي مليونين ؟

نوره سكتت ثواني بإستغراب:قلت لكم لوحده اعـ

ثنيان قاطعها:امي

سكتت نوره وكمل ثنيان:بوشو هددوك ؟

تغيرت ملامح نوره برعب وتقدم ثنيان لها:ادري في احد هددك بس بوشو هددوك

نوره:من قالك ؟ جاسر كلمك ؟

عقد حاجبينه ثنيان:شدخل جاسر ؟

تنهدت نوره تصد ونطق ثنيان:فهميني امي

لفت عليه نوره:لا يجي خبر لابوك تفهم ماقلت له للحين

هز راسه ثنيان واخذت نفس نوره:جاسر اخوك بالسعوديه هنا بالخبر

عقد حاجبنيه ثنيان:وش يسوي ؟

نوره:رجع من أمريكا ومعه ولد وبنت

جمد وجه ثنيان وتقدمت نوره برعب:لا يوصل خبر لابوك تسمع ؟ كنت بقوله وافتح الموضوع معه بس ماعرفت كيف اقوله

ثنيان:ولد وبنت من من ؟

نوره:تزوج وحده امريكيه هناك بس قبل يتخرج هجّت تاركه له ولد وبنت

مسك راسه ثنيان بصدمه وتنهدت نوره:بس زين انه تزوج بالحلال يعرف ربه وجايب شهادته معه ماكان يلعب

ثنيان التفت عليها:امي انتي تسمعين وش تقولين ؟ اقسم بالله فضيحتنا تصير على لسان اي واحد

نوره:خل الناس تقول اللي تقول ولدي أنظف من ألسنتهم ولاغلط واهم شي ابوك يوصله العلم مني انا

ثنيان:وجاسر وينه الحين ؟

نوره:بفندق ، تروح له ؟

ثنيان:اكيد بشوفه لازم

نوره:طيب بروح معك انا بعد

ثنيان ناظرها:واللي هددوك كيف عرفوا ؟

نوره:مصورين جاسر بالفندق مع عياله ما ادري كيف عرفوا والله لكن معد هددونا بشي

تنهد ثنيان يصد بغضب من ملاك وفراسة ملاك

وشدت على كتفه ثنيان:بنحلها قبل زواجك ان شاء الله وبيحضر زواجك وبيكون معك

ثنيان لف عليها:نروح له الحين ؟

نوره:طيب خلني البس

هز راسه ثنيان وخرج من عندها وشد قبضة يده يدخل غرفته وجلس وهو يمسك راسه مشت على اهله بالدور واحد واحد طيحتهم ، خايف على نهار وأصايل ويدري انهم الصغار واكثر اثنين طايشين ليه ما طيحتهم قبل اهله كلهم ؟

'

فتح الباب جاسر ومن ناظر ثنيان مع امه همس:ثنيان

تقدم ثنيان يحضنه وابتسم جاسر يشد عليه ودخلت نوره تناظر الصغار:وين الحلوين عيالي؟

ابتعد ثنيان وناظر جاسر:شلونك ؟

رفع حاجبينه جاسر بدون رد وتنهد يدخل ثنيان وقفل الباب جاسر

ودخل يناظر الولد والبنت اللي عند نوره وظل يناظرهم ساهي ، هو من فتره عرف ان ساري اخوه مخربها مع وحده غير زوجته والحين جاسر جايب ولد وبنت معه من السفر ، ومانسي نفسه هو اللي مرتبط بجواهر ، هذولا عيال عقاب الحين ؟

ولف لجاسر وهمس:ابوي بينجلط منا

نوره:اعوذ بالله وش هالكلام ، ما سوى شي جاسر غلط تزوج بحلال ربي ، المصيبه لو ماكان حلال اي معك حق

تنهد ثنيان يجلس:يعني بتفرق عند ابوي حلال وحرام ؟

نوره ناظرته بصدمه ونطق جاسر:تفرق ثنيان شلون ماتفرق

سكت ثنيان وناظرهم جاسر:ماكلمتوه ؟

نوره:ماقدرت البنك كلموه عشان القبوس وماقدرت افتح الموضوع

ثنيان:لا تجيبون طاري التهديد حتى لو عرف بالسالفه

جاسر:خوفك يسبقنا احد ويعلم ابوي قبل يفهم من امي

ثنيان هز راسه بالنفي:لا ما يسوونها

جاسر:وش ضمنك ؟

ثنيان:اعرف

ناظره جاسر بإستغراب ولف ثنيان يناظر عياله وابتسم لهم

ونطق جاسر يناديهم يسلمون على ثنيان

وابتسم ثنيان من تقدموا وسلم عليهم وابتسمت نوره:ياحلوهم ياحلوهم الله يحفظهم يا أمي انت

ثنيان رفع راسه وجون بحضنه وناظر جاسر:لا تبطي قول لابوي ، ابيك تحضر زواجي ومعي

جاسر رفع حاجبينه وابتسم:اخيراً قررت تتزوج غير جواهر وش صار بالدنيا

نوره عضت شفتها من ورا ثنيان وناظرها جاسر وسكت

ونزل عيونه ثنيان بدون رد وتنحنت نوره:وشو جواهر عند ملاك ، تعطيها عشره صفر ماعمري شفت وحده تلوق على ثنيان كثر ملاك اسم الله عليها هالبنت فطانه وذكاء وثقل وابوك يبيها من زمان لثنيان

جاسر:الله يوفقكم

ثنيان مارد ووقفت نوره:اليوم اشوف ابوك ومزاجه وافتح معه الموضوع لا تشيل هم

ثنيان ناظر جاسر:وانا بتدخل ماعليك ان شاء الله خير

جاسر مسح شاربه بتوتر ووقف ثنيان وباس جون ولمس شعر سارا وخرج من عند جاسر

مشت نوره معه وطلع مفتاحه ثنيان وركب سيارته وركبت جنبه نوره:ياحبيبي هو الله يلين قلب ابوك

ثنيان لف لامه بهدوء:ليه نخاف من ابوي ؟

نوره ناظرته:من هيبته من حدوده ومن اسمه ، لان اي غلطه صغيره يا ثنيان بيضيع اسم ابوك وكل اللي تعب عشان يوصل له

ناظرها ثنيان وكملت نوره:كل واحد يتزوج ويعيش بهدوء بدون ما يخلي الناس تتكلم علينا

صد ثنيان يحرك سيارته وهو ساكت ونطقت نوره:تكلم ملاك انت ؟

هز راسه بالنفي وناظرته نوره بهدوء:امي ثنيان ما يصير كذا هذي حليلتك وزوجتك وبتكون ام عيالك ان شاء الله عطها اهتمام ، خذها مطعم يوم ويوم خذ لها هذيك الهديه الغاليه اللي تسرق قلبها قولها كلمتين حلوه ، البرود ما يحبونه البنات خذها مني ما يحبون الا الدلال والاهتمام

ثنيان:مو لازم اسوي اللي تحبه

نوره:أمي ثنيان ادري ماهي اختيارك وابوك وده بها لك لكنها خلاص صارت حلالك تعوّد وتعايش ، وبعدين ملاك الف واحد يتمناها اكثر من ان نهار اخوك كان وده بـ

سكتت من لف ثنيان وعقد حاجبينه:وشفيه نهار ؟

نوره بلعت ريقها:يالله انا وش فيني

ثنيان:وش قال نهار ؟

نوره:اوف ثنيان كانت عاجبته ماتعرف نهار يعني اي بنت يشوفها تعجبه بس الحين نيته تغيرت ويشوفها زوجة اخوه وبس

سكت ثنيان ولف للطريق وتنهدت نوره بإنزعاج من زلّة لسانها ودخل البيت وعقد حاجبينه من شاف سيارة ملاك بالمواقف

نوره:هذي مو سيارة ملاك ؟

ثنيان استغرب ووقف سيارته وطفاها ونزل

مشوا يدخلون البيت وتقدم ثنيان للصاله وناظرهم جالسين يشربون قهوه ولفت ملاك براسها تناظره يدخل

ناظرها بإستغراب ترسم ابتسامه ويتلوّن وجهها بالنور ولا كأنها اللي كانت معه ، كانت بتنتحر وصرخت بوجهه ووجها غضبان يشتعل من نيران جوفها والحين تجلس تشرب قهوتها حاطه رجل على رجل

ابتسمت نوره وتقدمت:وش هالنور اللي عندنا ؟ ملاك موجوده ؟

ابتسمت ملاك ووقفت وبان طولها وكعبها وخلخالها اللي يزيّن كعب رجلها وفستانها الميدي الملّون بالأزرق والبنفسجي وكأنها تلبس ريش الطاووس وتتلوّن فيه

ابتسم عقاب من سلمت على نوره

نوره:حيّ الله من جانا

أصايل ناظرت ثنيان اللي ما زال وقف وابتسمت:طيب بلّ ريقك يا ثنيان

لف ثنيان على أصايل وتقدم يجلس ويناظر ملاك اللي نثرت شعرها خلفها وجلست

ثنيان:وش سبب الزياره ؟

ابتسمت ملاك:والله أصايل كلمتها كلمه ما نقدر كلنا نثنيها كلمتني تبيني اكلم العميد واتوسط عشان يوافق لها

ثنيان لف لأصايل:عشان وش؟

عقاب:ماتعرف وش تبي أصايل من فتره ؟ ولا تتوب ، جابت ملاك عشان تتوسط عندي واوافق

أصايل:ابوي انت مصعب الموضوع ، يوم مفتوح للبنات بالنادي وش المشكله ؟

عقاب:النادي ماهو للبنات وللقعدات يا أصايل ، النادي مسويه للعسكر اللي يبون يتمرنون بأوقات فراغهم

نوره:شدعوه عقاب والله كل اللي يجون يجون يتقهوون وبس محد يجي يتمرن غير نهار ياحبيبي هو وهالفرس

ملاك:وانا والله من رايي اقول ما بيضر النادي لو يوم ياخذونه بنات ينبسطون ويتجمعون

نوره:شدعوه عقاب والله كل اللي يجون يجون يتقهوون وبس محد يجي يتمرن غير نهار ياحبيبي هو وهالفرس

ملاك:وانا والله من رايي اقول ما بيضر النادي لو يوم ياخذونه بنات ينبسطون ويتجمعون

عقاب:المكان فيه اسلحه ياملاك وش ينبسطون

ملاك:ما بيجي ضرر ان شاء الله ، قفله العصر وافتحه العشاء يكفيكم صح ؟

هزت راسها أصايل وابتسمت ولفت ملاك تكمل:وعادي انا اكون موجوده اذا ودك تطمن

ثنيان ناظرها:واذا انتي موجوده عادي ؟

ملاك ناظرته وابتسمت:اعرف للاسلحه

عقد حجاجه وناظره عقاب:دخلت ملاك العسكريه كم شهر

لفت نوره بصدمه:منجدك ؟

أصايل:يمه ليش ماعندنا خبر ؟

ابتسمت ملاك:ما كملت ولاهي فتره طويله اصلاً

ثنيان سكت يناظرها ولف لعقاب:لكنك تعرفين وتعرفين تقنصين الهدف مثل الشاهين

ابتسمت له ملاك واخذ نفس عقاب:طيب موافق بس من العصر للعشاء وبعدها بفتح عليكم البوابات

أصايل ضحكت وتقدمت له تبوس خده وحضنته وابتسم عقاب يحضنها وناظرتهم ملاك وابتسمت

أصايل لفت لملاك:ثانكيو ملاك بستغلك دايم عند ابوي

عقاب:لا هالمره بس عشان اول طلب لملاك

ملاك ابتسمت من تكلمت أصايل:نروح سوا اجل بكره

ملاك:ان شاء الله

لفت لنوره:استأذن انا

نوره:وين ؟ اقعدي تعشي معانا ونسولف انا وانتي بالزواج

ملاك:مره ثانيه ان شاء الله مشغوله والله اليوم

وقفت واخذت شنطتها ووقفت نوره:على راحتك ومتى ما بغيتي تجين تعالي لا تقولين فشله وحمولتي ، حتى لو ثنيان مو موجود نبي نشوفك

ملاك ابتسمت ولفت تاخذ عبايتها من الخدامه:اكيد

لبست عبايتها ووقف عقاب وناظرته:لا تتعبون نفسكم انا ادل

عقاب:بجي معك

تحجبت ووقف ثنيان من مشت وعقاب معها ومشى خلفهم يسمع صوت كعبها من خطواتها ونزل عيونه لكعبها ورجع يناظرها ويمشي خلفها

حط عقاب ذراعه على ظهر ملاك يمشي معها:ان احتجتي اي شي كلميني لا تستحين

لفت عليه ملاك ووقفت عند الباب:من بعد كتب الكتاب ياعميد نسيت من اكون شكلك

عقاب ضحك:اعرفك وما تستحين من شي بخاطرك فيه لكن قلت عشان اذكرك

وقف ثنيان بينهم يناظرهم وهزت راسها ملاك:ماتقصر ياعميد

عقاب:بحفظ الله

مشت ملاك ولف عقاب على ثنيان وهمس:استرجل وقل انا بوديك انا باخذك تعالي معي

هز راسه بأسف ودخل ومشى ثنيان خلف ملاك ولفت ملاك تناظره وفتحت باب سيارتها تركب

فتحت شباكها وناظرها ثنيان:كيف عرفتي عن جاسر ؟

ابتسمت ولفت عليه:ماخبت عليك امك غريبه

ثنيان:انتي من وين تعرفين كل شي ؟

ملاك:بعلمك بخطواتي ؟

ثنيان ناظرها بإستغراب ولفت ملاك:الحين غضبك اشتد من بعد المليونين

ثنيان:ولا عمره غضبي قل من يوم عرفتك كل يوم احس اني بتحدي معك

ملاك هزت راسها:خلك عند جواهر ولا يكثر بس

ضحكت تحرك سيارتها وناظرها ثنيان بحده لين خرجت من البيت ومشت متوجهه لمكتبها وصلت ونزلت تدخل وفتحته وثواني دخل عليها رجالل ومعه ملف قضيته وجلس معها يتكلمون بالقضيه وبعزّ انشغالها

رفعت راسها تشوف جواهر تدخل وصدت عنها تكمل مع الرجال حوارها

جواهر:بتكلم معاك

ملاك:انتظري دورك

رفعت حاجبها جواهر واخذت الاوراق ملاك:تمام بدخل على النظام الحين ارفع الاوراق وارسل لك رقم ملف القضيه

هز راسه:الله يعافيك ماقصرتي

ملاك:ياهلا وسهلا

وقف يخرج ومشت جواهر تجلس ولفت ملاك لجهازها تكتب وناظرتها جواهر:بتكلم معاك

ملاك:جايه بدون موعد زين دخلتك ، انتظري جواهر هانم مو دايم مرحب فيك

اخذت شنطتها جواهر وطلعت من داخلها ورقه صغيره وحطتها على مكتب ملاك:اعرف اخذ اهتمامك

لفت ملاك من عرفت انه شيك ورفعت عيونها على جواهر

ابتسمت جواهر:مبلغ يعيشك ملكه بدال السرقه اللي عايشه فيها

رجعت ظهرها لورا ملاك ونزلت نظارتها الطبيه تناظر جواهر

جواهر:وانتي تعرفين مقابل ايش

رفعت اصابعها ملاك:مقابل اعطيك دبلتي

جواهر:ابي ثنيان

ابتسمت ملاك:تحبينه ؟

جواهر:لا تسألين اسئله معروفه اجاباتها

ملاك:الحين الفلوس ما طلعت منك شخصيه زينه ! ، تحبين واحد ماخذك بالدسّ عن اهله واهلك ومو معترف فيك ولا معطيك الحياه اللي المفروض تعيشينها وفوق هذا تزوج غيرك وجايه تساومين عليه بملايين ؟

عقدت حاجبينها ملاك تكمل:وش هالرخص ؟

جواهر:احترمي نفسك وتكلمي زين معي ولا تتدخلين بعلاقتي مع ثنيان

ابتسمت ملاك وتقدمت لها وغمزت:بالله بالحلال ؟

جواهر:اذا ما قبلتي الشيك بيرجع بشنطتي

ملاك اخذت الشيك وفتحته ورفعت حاجبينها تضحك من العدد ولفت لجواهر:والله سخيّه وبنفس الوقت غبيه

جواهر:اطلعي من حياتنا

ملاك ابتسمت ولاردت وكملت جواهر:وعيشي بعيد عني وعن ثنيان

ملاك هزت راسها:على أمرك يالشيخه جواهر

ناظرتها جواهر بحده ووقفت تخرج من مكتب ملاك وضحكت ملاك تاخذ جوالها:سَبك

دورت رقم ثنيان ودقت عليه وهي تناظر الشيك

'

كان يسوق ومشغول بأفكاره اللي صوتها اعلى من صوت الاغاني بسيارته ولف من دق جواله وعقد حاجبينه من شافه رقم ملاك

جنّب على اليمين ولا مره اتصلت عليه من يوم عرفها ومن كتب كتابهم ولليوم هذا هي اول مره تتصل عليه وينوّر جواله برقمها

رد:هلا

ملاك:ولد العميد

ثنيان:وش سويتي من مصيبه جديده خلتك تتصلين علي

ملاك ضحكت:لا هالمره مو انا هالمره جوجو

عقد حاجبينه ثنيان:من ؟

ملاك:جواهر ياحبيب جواهر

ثنيان نطق بإستغراب:وش صاير ؟

ملاك:مرّني مكتبي ودي ينور بوجودك زوجي العزيز

ثنيان:انتي ماتتعبين ؟ ما تنهدين ؟ وش قاعده تسوين يرحم لي ابوك وامك خلاص يكفي طغيان وش صاير بينم وبين جواهر ؟

ملاك ضحكت بصدمه:أعصابك !

ثنيان تأفف بتعب وشغل سيارته:جايك

ملاك:بإنتظارك

قفلت منه وضحكت من عصبيته وناظرت الشيك وإسم جواهر ولفت لطابعتها

نسخت من الشيك نسخه وطبعتها وحطت الورقه بمكتبها على دخول ثنيان ولفت بذهول:جاي طاير ؟

ثنيان:وش عندك؟

ملاك:كل ذي لهفه يا ولد العميد

ثنيان تقدم:انطقي اخلصي

ملاك ابتسمت ومدت له الشيك واخذه وجمد وجهه من قرأ اسم جواهر والرقم اللي حاطته ولف لملاك اللي مرجعه ظهرها لورا ومبتسمه

رفع الشيك:هذا وش ؟

ملاك:شدعوه ماعمرك شفت شيكات ؟

ثنيان:جواهر ليه معطيتك اياه ؟ والا مزورته ؟

ملاك:شوف انا شيطان وياكلني الشرّ بس مو لدرجة أزوّر شيكات هذي يبي لها احترافيه

ثنيان ضرب مكتبها:انطقي قلت

ملاك:ثاني مره اقولك لا تضرب مكتبي نعرف انك قوي

ثنيان صد ياخذ نفس طويل وهمس:صبرك يارب

ملاك:استريح نتكلم مثل الناس العاقله

ثنيان لف لها:خليتي فيها عقل انتي خليتي فيها عقل !

ضحكت ملاك تأشر له يجلس وجلس ثنيان

وابتسمت ملاك:نضيفك شي زوجي العزيز ؟

ثنيان:ملاك ! لا تختبرين صبري

ابتسمت بوسع مبسمها من نطق اسمها ولأول مره تسمع اسمها منه:بطلت اكون بنت مساعد ؟

ثنيان:جواهر ليه اعطتك الشيك ؟

ملاك:زارتني مرتين هذي المره الثانيه واتوقع ان ماعندك خبر بس جواهر طفشتني وانا ما احب اللي يشغلني عن شغلي بأسباب تافهه ابعده عن طريقي وخلاص

ثنيان:ليه جاتك؟

ملاك:تساوم عليك تحسب كل شي ينشرى بفلوس حتى انت

ناظرها ثنيان بحده وابتسمت ملاك:اخذت لك وحده برخص التراب بيتها شاليه وشهر العسل يخت

عقدت حاجبينها بضحكه:ماخذها من الشارع ؟

ثنيان:تكلمي زين عشان لا يوحشك فكك

ملاك ضحكت:لا والله بتوحشك جواهر

ثنيان:هالشيك ماراح تصرفينه ولا تاخذين ريال من جواهر تفهمين ؟

ملاك اخذت الشيك من يده وناظرت الشيك:ليش ؟ احلى من المؤخر اللي تعبت عشان يجيني

ثنيان:كلمه وقلتها ولا تجربين عواقبها ، الشيك لا تصرفينه

لفت ملاك عليه تناظر جنونه وشقت الشيك وناظرها ثنيان بذهول ما يعرف كيف يفسر تصرفاتها

وابتسمت تجمع يدينها ببعض:ابي الخمس ملايين منك ، احلى

ثنيان:الحرب بيني وبينك لا تدخلين بيننا احد من اهلي

ملاك:اي زين يعني جواهر مسموح ادعس عليها لان طوّلتها

ثنيان:قلت اهلي

ملاك:وجواهر من اهلك ؟ عجيب !

ثنيان وقف وناظرته ملاك لين مشى لها وابتسمت من انحنى لها على كرسيها وناظرها بحده:مالقيت زلّه عليك للحين بس والله ان لقيت ما أرحمك

ملاك رفعت يدينها على كتوفه تعدل تيشيرته وابتسمت:بعد الزواج والا قبله ؟

ثنيان ناظر ابتسامتها ونزل عيونه لثغرها يشوف أنيابها ورجع ناظر عيونها:انتي اسوأ شي عرفته بحياتي كلها

ملاك:ليش عشاني أسرق ؟

ثنيان:لانك شرّ يمشي بهالدنيا

ملاك:لا تلّمع نفسك ياولد العميد مافي أوسخ من عائلتك واخوانك

اشتدت ملامحه بالغضب ومسك فكّها بقوه ورجع بالكرسي للخلف وغمضت عيونها ملاك بألم

ثنيان:اهلي انظف من نيّتك تفهمين

ناظرته ملاك وهمست:تبي تجرب كفّ يدي من جديد

دفعها بقوه وابتعد وناظرته ملاك تمسك فكّها:لا تعيدها ياولد العميد عشان لا اعلقها فوق رقبتك

ثنيان:ان قدرتي

ناظرته يمشي يخرج من المكتب وشدت على اسنانها من ألم فكّها وقوة ذراعه واخذت جوالها وهي تتنفس بغضب

دورت رقم عقاب واتصلت وابتسمت اول ماسمعت صوته:العميد عقاب

ابتسم عقاب:الشاهين

ملاك:اذا فاضي بغيت اشوفك

عقاب ناظر النادي اللي هو فيه وخرج لسيارته:فضيت الحين ليه وش صاير

ملاك:ابد جالسه مع ثنيان بالشاليه حقه وانشغل عني شوي قلت بكلمك تجي واتكلم معك بموضوع

عقاب هز راسه:طيب اجيك

ابتسمت ملاك:ارسل لك الموقع والا تعرفه ؟

عقاب:لا والله ما اعرف درب لشاليه ثنيان ابد

رفعت حاجبينها ملاك بتوقع:الحين ارسله

قفلت وهمست:ونعم ، لو تعرف تركض ورا عيالك كان ما دشروا

ارسلت له وابتسمت تخرج من مكتبها وتركب سيارتها

-

ثنيان تقدم لها بعصبيه:انتي ليه تتصرفين من راسك ؟ وش انا عندك ؟ وش انا ؟

جواهر:ناديتني الشاليه عشان تهاوشني ليش اروح لملاك ؟

ثنيان ضرب الطاوله:جبتك عشان افهم انا وش انا عندك ؟ جدار ؟ طاوله ؟ تهمشيني وتسوين اللي براسك ولا كأن اللي طايح بالمصيبه انا وانتي ؟

جواهر:لاني ما اشوفك سويت شي مازالت تلعب فينا لعب الشطرنج ، ماتخاف لا مني ولا منك ما خافت من احد للحين ، قبل فتره راحت معك للعلا مع اهلك وانت للحين ما سويت شي ثنيان ولا شي سويته وزواجك قرب وانا ما اعرف وش وضعي

ثنيان:قومي روحي اصرفي لها شيك ، حماره انتي ؟ ماخذه منك مليونين انتي وامك وتزيدينها ؟

جواهر سكتت بتوتر وكمل ثنيان بعصبيه يأشر على عقله:انا بفهم ليه تتصرفين بدون ما تسأليني تشاوريني تقولين بعلم ثنيان وهو يحلّها ماني رجال ؟

جواهر:كل يوم اتفزز من صوت اهلي اي تصرف اللي تتكلم عنه ؟ انا مرعوبه مو قادره انام بسبب طيش وتصرف عاطفي مافكرت في هاللحظه من قبل

ثنيان عقد حاجبينه :طيش ؟ الحين سنتين مع بعض واليوم عرفتي انه طيش ؟

جواهر:علمني وش اقول لاهلي لو وصلهم خبر

ثنيان:مدري تذكري من قبل وش كنتي تقولين لي وتعرفين ، ثنيان انت مو غلطه ولا بندم اني وافقت وتزوجت بالسرّ وخبيت على اهلي ولو صار ماصار بوقف بوجههم

ناظرها بحده:اذكرك جواهر ؟

جواهر مسكت راسها بتعب:ثنيان اقسم بالله احسني خسرت كل شي

تقدمت تجلس على الكنب وناظرها ثنيان:انتي بديتي تغلطين وغلطك ذا بيحرقك وملاك ما بترحمك من الحين اقولك

جواهر لفت عليه:بتخليني لوحدي بالمصيبه يعني ؟

ثنيان:انتي خليتيني قبل شوي وطلعتيني وتصرفتي لوحدك

جواهر وقفت تناظره بحده:انا ما وقـ

سكتت من أشر لها تسكت والتفت بصدمه يسمع الأصوات اللي برا وتقدم يفتح شوي من الستاره وجمد وجهه

لف لجواهر يأشر لها ونشف دمها تمشي وتدخل الغرفه وتقفل عليها وعض شفته ثنيان

وفتح الباب يناظر ملاك اللي تمشي مع عقاب بطرف البحر ولف عقاب عليه من شافه:وينك انت ؟

ابتسمت ملاك من شافت سواد وجهه وجمود ملامحه ولفت لعقاب:مصدوم انك موجود

مشى عقاب لين عنده وملاك جنبه وناظرهم ثنيان:وش جابـ

قاطعته ملاك تدخل:خلصت شغلك ؟

دخل عقاب خلفها ونشف الدم بعروق ثنيان يقفل الباب خلفهم ويناظرهم يجلسون

جلست ملاك ورفعت شعرها عن عنقها تربطه

عقاب:حلو الشاليه والله ومرتب

ملاك:ادخل تجوّل بالغرف بيعجبك اكثر من داخل

ثنيان وقف:ارتاح ابوي تبي تشرب شي ؟

عقاب:لا لا اقعد بس

لفت ملاك عليه تناظر توتره وحك جبينه:جاي الحين بدخل الحمام وانت بكرامه

مشى يدخل ولفت ملاك من سألها عقاب:من متى وانتي هنا ؟

ملاك:من ٩ الصباح مرّني ثنيان واخذني اشوف الشاليه

عقاب ابتسم بهدوء وابتسمت ملاك تناظر لبسها اللي قدرت بسرعه تلبسه ، فستانها الابيض الواسع وسلبرها الفوشي اللي برجلها

'

دخل على جواهر اللي وجهها أسود ومغطيه فمها بخوف وهمس:انحرقنا انحرقنا

جواهر همست بخوف:وين اروح ؟

ثنيان:اطلعي مع الباب الثاني بطلعهم برا

جواهر:ليش جات ملاك ؟ كيف تعرف الشاليه ؟

ثنيان:وقته وقته ؟ اطلعي جواهر لا تحرقيني

قفل عليها ومشى برا:خلونا نطلع برا الجو حلو

عقاب:وش جوّه الحلو ياثنيان انت تمون على الشمس والشمس تمون عليك بس انا ما احب الشموس

ملاك ابتسمت:نتمشى شوي نسايم البحر حلوه

عقاب اخذ نفس ووقف ووقفت ملاك تمشي وتخرج وخرج ثنيان يقفل الباب خلفه ومشوا لين شط البحر وغمضت عيونها تاخذ نفس طويل ملاك وتسمع صوت الموج والبحر على يمينها

ومشى عقاب يناظر المكان:ما يزعجك احد ؟

ثنيان بلل شفايفه وهو يمشي معه:من حواليني يعني ؟ لا

عقاب:زين وخاص وكبير

ملاك هزت راسها:يبي لنا نتجمع هنا يوم كلنا ونسهر

ابتسم عقاب ولف ثنيان يناظر ملاك بحده

ونزلت سلبرها ملاك:بخلي المويه تلمس رجلي

مشت عنهم للبحر ترفع فستانها وتمشي على طرف الموج ولف عقاب على ثنيان:زين انك اخذتها وطلعتها معك هذي زوجتك ولك حق عليها

سكت ثنيان يناظر ملاك اللي تمشي وكمل عقاب:ملاك كنز والله كنز ياثنيان ومن يوم شفتها قلت ابيها لواحد من عيالي ابيها تدخل بيتي

ثنيان لف يناظر ابوه اللي ما يدري عن شي وكمل عقاب:ورغم ان وصلها خبر عن بنت بندر قبل كتب الكتاب وتنكدت وادري ان حزّ بخاطرها بس رغم هذا شوفها تمشي معك على البحر هِنا

ثنيان لف لها يناظرها تمشي وكمل عقاب:تكبر عقلها وتوزن كلمتها وتعرف حدودها وتفهم كل شي

ثنيان دخل يدينه بجيوبه ولف عن ابوه يناظر ملاك

وابتسم عقاب يرفع ذراعه على كتوف ثنيان:وزواجك قرّب وان شاء الله من تدخل بيتنا ملاك بتزين أمورك ، بتعدل إعوجاجك وبتكون أوفى من مسك قلبك وتبرد على نيرانك هذي اللي داخلك

تنهد ثنيان بدون رد ومشى عقاب يبتعد عنه لملاك ولف ثنيان يراقب الشاليه

عقاب:لا تشيلين هم انا اشوف وش تقول نوره وابلغك يمكن يروحون معك سوا وتشترون من هناك اللي ودكم

ملاك:لا تضغط عليهم اقدر اروح وحدي دبي ليلتين اخلص اموري وارجع

عقاب هز راسه:انا برجع ينتظروني على الغدا

لف لثنيان يأشر له ومشى عقاب عنهم ولفت ملاك لثنيان اللي يناظرها وابتسمت تنزل عيونها لرجلينها ولخلخالها وللموج اللي يسري من تحتها

تقدم ثنيان لها ووقف قدامها:وش تسوين ؟

ملاك ابتسمت:أخوفها

ثنيان عقد حاجبينها ورفعت راسها ملاك:عشان تعرف من اللي تشتريها بفلوس

ثنيان:لو ابوي وصله خبر ما بيصير لك طيب

ملاك:وش بتسوي بتطلقني ؟

ولفت للشاليه تبتسم:قدرت تنحاش والا بلقاها داخل ؟

مشت من جنبه ومسك ذراعها ولفت له وهي تضحك:بالله وش هالذوق عليك ؟

ثنيان:ارجعي من مكان ما جيتي

ملاك:برجع بس ترا مكانك صار معروف انتبه تتقابلون من جديد هنا

تقدمت تهمس لثنيان:كل مكان بكشفه

ثنيان مارد عليها وكملت:باقي اليخت لازم توديني له والا بجيك انا

ضحكت من تغير وجه ثنيان للغضب وابتسمت:أعصابك

لفت للبحر تنحني لموجه وتلم بين كفوفها ماء البحر وتغسل فيه وجهها

ناظرها ثنيان تغمض عيونها وتستريح بالمويه بفستانها وكأنها تبرّد نيران داخلها وتطفي لهبها

كان مشهد جلوسها وسط الموج لوحه رسمها من قبل ثنيان ووصفها يوم قال انها لَهب والموج يطفي اللهب

وهذي هي تلمس بكفوفها الثنتين الموج ويتسرب من بين فراغات اصابعها ، يغرّق فستانها ويروي ضَمى ملامح وجهها ومع ذلك هي لا زالت لَهب ما خفّ توهج نيرانها وجمرها

فتحت عيونها ملاك تناظر البحر ورفعت عيونها لثنيان:ما ألومك تحبه

وقفت تلم فستانها بيدها من البلل ورفعت عيونها عليه:ماتحب جواهر كثر ما تحب البحر

ثنيان:تدرين كثر ما تصدميني وتدخلين لي من بيبان ما اتوقعها اقعد اهوجس كيف انك خربتي حياتك لسنين لا تعد والسبب اجهله

ظلت تناظر عيونه ملاك وموية البحر على ملامح وجهها ورموشها ونطق وهو يناطر عيونها:من اللي اشعل النيران يا لهب ؟

ابتسمت من تساؤله بدون تبان اسنانها:تدري ياولد العميد ! انت الوحيد اللي نظراته لي اسئله

سكت ثنيان وهو يناظرها وكملت ملاك بهدوء:وكل مره تسألني وتدري اني ما اعطيك جواب ما تملّ

ثنيان:أنا مبلي ياملاك ، مبلي فيك لحد الشرايين وباللي جمع فيك من كل شي ضد وضد اني ماتوقعت بلاقي انسان يشبه البحر مثل ما تشبهينه انتي

هز راسه يراقب عيونها:تمليني بالاسئله ، بكل مره توقفين قدامي تتصنعين الصلابه يجي شي يهدّك ويسقي نيرانك حطب ، من يزيد نارك ياملاك ؟

لانت ملامح ملاك تناظره يحللها ويسألها يوصفها ويشرح غموضها

ثنيان:انتي تقوّمين العالمين على رجل وحده وانتي تبتسمين وهاديه بحيث انه محد من هالعالمين يشمّ ريحة رمادك ، بكل هالبرود الخارجي

رفع سبابته على صدرها:انتي تحترقين هنا

كان حاط اصبعه على اجابات اسئلته ، قلبها

لكنه يجهل الاجابه رغم انه يكشف ستر غموضها رويداً رويداً

ملاك هزت راسها:استغرق مني هذا اللهب عشان ينبت داخل صدري طفولتي ومراهقتي وشبابي وما بيكفيه ، بياخذ شيخوختي وكبر سني وعجزي وضعفي ووهني

سكتت ثواني تكمل:تتوقع بيقدر موج يطفيها ؟ يطفي نتيجة سنين وعُمر ؟ انت تركض بالدرب الغلط ياولد العميد لا تحاولني وتفهمني ، انا كذا لين ياكل من لحمي الدود

ثنيان هز راسه بالنفي:انتي مستحيل كنتي لَهب بحضن امك ولا كنتي لَهب بحضن ابوك

بلعت ريقها من طاري اهلها وكمل ثنيان:هذا من صنع الدنيا عليك ما يولد بني آدم من طين يشتعل لَهب ياملاك نولد من طين وتعرفين ان الطين معجون بماء

رفعت يدها تأشر على البحر ملاك وهي تناظره:لو اسبح درب البحر كله واغوص فيه ما طفى لَهب خاطري

ثنيان تقدم لها:انا الموج اللي يقدر يطفي لهيبك ياملاك ، انا وبوسط حضني شفت رجفة صقيع بردك ، ماقدرتي ورغم احتراقك تخفين رجفة زمهرير البرد

ملاك صدت من عاد الطاري:لا تجيني من هذا الطريق

ثنيان:انتي تتصنعين كل هاللهب ، لان لو انتي فعلاً لهب ما كانت اللي شالتك ببطنها وجابتك بالدنيا سمتك ملاك

لفت عليه تناظره وكمل ثنيان:كانت تدري انك تستحقين الاسم وياليتك استحقيتيه

اخذت نفس ملاك وتقدمت له ونطق ثنيان:بتدركين بوقت متأخر من حياتك ان معظم المعارك اللي خضتيها ماهي الا هوامش اشغلتك عن حقيقة حياتك

ارتبكت لانه يزيد عليها الضغط النفسي بكلامه وابتسمت:تقدر تصير دكتور نفسي ياولد العميد

سكت يناظرها تهرب من الكلام واخذت نفس تلف للبحر:ألاحظ محاولاتك ياولد العميد لكن لا تتوقع مني الأجوبه انت بس بتغرق فيني بدون فايده

ثنيان:غرقت بالبحر عاري بدون طوق نجاه تتوقعين بخاف اغرق داخلك ؟

سكتت تناظره وهز راسه ثنيان:لكن لكل شي جواب ياملاك

ماردت عليه تناظره عيونه وصدت تترك المكان وتغادر

'

لبست أصايل واخذت عبايتها واغراضها وطلعت من البيت ركبت مع السواق واخذت جوالها تكتب لملاك:قربت

ناظرت الطريق ووقف السواق عند البيت وفتحت جوالها جربت تتصل على ملاك وماردت

تأففت وناظرت حمدان:دقيقه حمدان

فتحت الباب ونزلت ومشت للبيت ودقت الباب وهي تنتظر واخذت نفس تنتظر ملاك

فتح الباب ووقف من شافها لفت عليه

ناظرته أصايل وارتبكت ترجع خطوه لورا:ملاك !

منيف سكت ثواني يناظرها وكمل:داخل

أصايل:طيب انتظرها برا انا

منيف فتح الباب:حيّاك

أصايل:لا مو مشكله بنتظرها بالسياره عادي

منيف:حيّاك

ناظرته مصرّ يكرر كلمته ويناظرها وبللت شفايفها تدخل البيت ومشت بهدوء وتقدم يدلها للصاله ولف يرفع صوته:ملاك

مشى تاركها وفتح الغرفه ولفت ملاك:وصلت ؟

هز راسه منيف واخذت عبايتها ملاك تناظر شكلها وتستجمع طاقتها:طيب طالعه

خرج منيف ومسح يدينه ببعض يناظرها جالسه على كنبهم:السموحه مافي ماتشا نضيفك فيها

ناظرته بصدمه:هاه !

سكت منيف من طلعت ملاك وناظرت أصايل:كنت بالحمام ماسمعت جوالي ، نطلع

وقفت أصايل وناظرت منيف اللي واقف ومشوا يخرجون

ابتسم منيف يناظر دهشتها ومشت من جنبه تخرج وقفل الباب بعدهم وفتح شباك الصاله يناظرهم يركبون سوا بالسياره

لفت أصايل على ملاك اللي تكلمت:عازمه كثير ؟

أصايل:لا شدعوه بس بنتين

ماردت ملاك ودخلوا للنادي وتقفلت بعدهم بوابة النادي ونزلت أصايل ومعها ملاك ودخلوا

ناظرت البنات اللي بالنادي ولفت لأصايل:بنتين ؟

ضحكت أصايل تفصخ عبايتها ولبست كابها ودخلت مع ملاك اللي تناظر البنات

وأصايل تمشي وتسلم وملاك متورطه بكمية البنات اللي بالمكان

أصايل:زوجة ثنيان

ابتسمت لهم من رحبوا فيها ولفت تمشي مع أصايل دخلوا الإسطبل وتقدمت ملاك للخيل:ماقصرتي أصايل

ضحكت أصايل تطلع فرس نهار:فرس حبيبي

اعتلت الفرس ملاك تشدّه ومشت مع أصايل بالإسطبل

أصايل:ملاك شوفيني

لفت ملاك وشافتها تصورها وابتسمت ملاك وهي على الفرس

شافت أصايل اللي انطلقت بالميدان وابتسمت ولفت تناظر البنات الموجودين والمتوزعين بالنادي وصوت الاغاني بالمكان

مرت أصايل من عند ملاك ولفت ملاك بالفرس:انزلي لي بادل

ضحكت أصايل:لا تحاولين لعبتي واسألي عني ثنيان

ملاك:اسبقيني اجل

ركضت أصايل بالفرس وملاك وراها لين وصلوا للاسطبل نزلت تحط الخيول وخرجت تدخل البادل مع البنات ولفت أصايل:ملاك انا تيم وانتي تيم

ملاك هزت راسها واخذت المضرب واخذت مركزها مع البنات وبدوا يلعبون

ضحكت أصايل تضرب بالمضرب وتسمع تشجيع البنات

فازت أصايل والتيم وصرخوا يضحكون وابتسمت ملاك وتقدمت أصايل تحضن ملاك وهي تضحك

ناظرتها ملاك وابتسمت وعضت شفتها وهي تشوف أصايل وكيف تعرف كل البنات وتضحك معهم وتلاشت ابتسامتها من تذكرت انها بيوم كانت بتطيح أصايل بأيام سوداء وتهديد وتقلب حياتها لجحيم

كيف كانت بتقدر تفرط بكل هذي الروح الحلوه والنظيفه

ابتسمت من لفت عليها أصايل تمشي معها بالنادي

أصايل ناظرتها:ابوي قال بتروحين دبي عشان فستان زواجك

هزت راسها ملاك:ان شاء الله بس ما بطول

أصايل:بجي معاك مع ان بدلتي خلصتها مع امي بالكويت

ملاك ابتسمت:مختاره ومخلصه

أصايل:امانه !

ناظرتها أصايل بحنيّه:احس مو مصدقه بتتزوجون

ابتسمت ملاك تصد وكملت أصايل:بس برضو ما تمانعين اجي معاك صح ؟

ملاك:تعالي ما اقول لا

ابتسمت أصايل لها:وريني مهارات الشاهين اللي يتكلم عنها ابوي دايم

تقدمت ملاك للاسلحه ولفوا يناظرونها البنات اللي بالمكان ويترقبون لملاك

رفعت السلاح ملاك ورفعت جوالها تصورها أصايل ضربت الهدف ملاك وابتسمت تلف لأصايل اللي صورتها فيديو:شوف يامحظوظ شوف الشاهين المغرور وياويلك تزلّ

ضحكت ملاك من فهمت انها تصور لثنيان وحطت السلاح ملاك ولفت عليها وحده:متى زواجك ؟

أصايل:قريب ان شاء الله وكلكم بتجيكم كروت دعوه لا تخافون

لفت لملاك:ماخذين بعض عن حب ؟

لفت أصايل لملاك اللي ابتسمت بدون رد ولفت عليهم:ومو أي حب طيّحت ثنيان على وجهه

تقدمت ملاك تدقها:بنت !

ضحكت أصايل ولفت ملاك تناظر البنات الموجودين

'

قام من نومه واخذ جواله وهو عاقد حجاجه يناظر رسايله وفتح على سنابة أصايل وناظر ملاك اللي على الفرس ومتصوره مع أصايل وفتح الفيديو اللي بعده وملاك تضرب بالمسدس وتناديها بالشاهين المغرور وتأمل ابتسامة ملاك وأنيابها وكيف ان ابتسامتها قادره تسرق قلبك وتطمنك بحسن نيّتها بينما هي قدرت تكشف أسرار أبطت ما انكشفت

قفل جواله وناظر الساعه وتنهد بتعب ووقف يغسل وجهه وغير ملابسه ونزل تحت

تنحنح يدخل من سمع اصوات ونادته نوره:تعال يامخرب نومك

دخل ولفت ملاك تبتسم تناظر ذهوله وتذكر انه شافها الصبح قدام البحر والحين هي بوسط بيته

زاد اتساع مبسمها ونطقت:صباح الخير

ناظرها بصدمه هي تطلع له بكل مكان وبكل وقت وكأنها حالفه تكون شيطانه ، ناظر لبسها والفنجان اللي بيدها وابتسامتها

نوره:قولي مساء الخير شوفي الساعه كم

ثنيان ناظر جنى اللي جالسه جنب أصايل ونادته نوره يجلس جنبها وتقدم يجلس جنبها ومسحت على ظهره:امي تبي اكلمهم يجيبون لك فطور ؟

هز راسه بالنفي وهو ياخذ تمره من قدامه وناظر ملاك وأصايل:خلصتوا ؟

أصايل:انبسطت صراحه الفايبز مع البنات خيال

نوره ضحكت:تحبين سُلطة البنات انتي

أصايل:اكيد حياه ورديه والكل حلو وكاشخ وانا احب دهرة البنات احب اكحل عيوني

ابتسمت ملاك وهي تشرب قهوه وناظرتها جنى:كان ودي اجي بس انشغلت

ملاك ناظرتها من عرفت انها تكلمها:نعيدها ان شاء الله

نوره:ما بيوافق عقاب غصب اقتنع

ابتسمت ملاك:انا اقنعه

أصايل:شوفي ملاك الصوره هذي

مدت جوالها ووقفت ملاك وبان جسمها من لبسها الضيق وانرسمت ملامح جسمها وارتبك ثنيان يرفع كفه على جبينه يحكه وينزل عيونه من انتبه لنظرات جنى اللي ضحكت

اخذت الجوال ملاك وهزت راسها وجلست تناظر الصور:حلوين بس الاضاءه مو مبينه

سكتت من جات رساله لأصايل محتواها:يا أخت النهار

ناظرت الرقم اللي مو مسجل ومدت الجوال من تقدمت أصايل واخذته وارتبكت من انتبهت للرساله وصدت ملاك بهدوء عنها

لف ثنيان من سمع صوت مفاتيح والتفت لملاك واشر لها ورفعت صوتها نوره:عندنا ضيوف ياللي جاي

نهار وقف وهو يحرك مفتاحه:مالمحت شي استريحوا

وقف ثنيان ورمى عبايتها على رجولها ورفعت عيونها تناظره يخرج ولفت نوره عليها وضحكت:تاكله النيران ثنيان من غيرته

لبست عبايتها ملاك بدون رد وكملت جنى:على هالجسم انا بعد بغار على ملاك

تقدم نهار وناظر ثنيان :اها الاهل ؟

ثنيان مارد ودخل نهار وابتسم من شاف ملاك:ادق تحيه ؟ وببدلتي بعد

أصايل ناظرت بدلته:كل ما لبستها بقولك مو لايق مو لايق وبس

ثنيان:ما يستحقها

نوره:اسم الله على ولدي احلى ضابط

أصايل:اي ضابط بس شغلته يقولك سويتي اتمنى تتخطى السجن

ضربها نهار وضحكت أصايل ولفت ملاك:طولت انا برجع عندي شغل بدري

نوره:امي ثنيان وصل زوجتك ماجات بسيارتها

ثنيان ناظرها ووقفت ملاك تاخذ شنطتها:تصبحون على خير

دق تحيه نهار وضحكت ملاك تخرج ولف ثنيان يناظر نهار وصد عنهم يمشي خلفها

ركبت سيارة ثنيان وركب جنبها يشغلها وهمس:لا تتقربين من أصايل واجد

ملاك ابتسمت:مستحيل أضرّ أصايل ونهار بالذات

لف عليها:وليه نهار ؟

ملاك لفت عليه:نظاف مهما حسسوك انهم طايشين انظف منك ومن باقي اخوانك

ثنيان حرك سيارته:جاسر متزوج بالحلال تراه

ملاك:عندي خبر وساري مخبص وانت مخبص واهووه

لفت عليه تضحك:تسبح بالعسل

ثنيان مارد عليها ولفت ملاك للطريق ولف ثنيان:بتستعدين للزواج ؟ توقعتك بتطلبين الطلاق قبله

ملاك:لا ، ودي اخذ اتنشن من حضور زواجنا عشان استفيد بعد طلاقك

لف ثنيان وهمس:شيطان

ملاك ناظرته:بس عطني مده قصيره معك وما تلاقي الا دبلتي على سريرك

ثنيان:انتي من يوم تدخلين بيتنا بيتغير كل شي ياملاك

ملاك ابتسمت:طيب يعجبني كيف صرت تناديني ملاك تحسسني اني ملاك فعلاً

ثنيان:وانتي ولا مره ناديتيني الا بولد العميد ولا كأن عندي اسم

ملاك:كيف اصارحك اني انساه ؟

لف ثنيان يضحك بسخريه وناظرته بجديّه:سهل تنساه وصعب تتذكره

ثنيان:ثنيان ، وش الصعب ؟

ملاك:اسمع وتعرف

مارد ثنيان يلف للطريق ومن تذكر لف يقفل ازارير سيارته وضحكت من انقفل بابها ولفت له:تخاف افتح الباب ؟

ثنيان:ما اعرف خطواتك الجايه

ملاك:لا هذيك المره كنت تعبانه بس الحين ذيبه ما ادور الموت اذا ما دورني

ثنيان لف عليها:وليه كنتي تعبانه ؟

ملاك:لا تفتش كثير ما بتفهم شي اصلاً

مارد ثنيان وصد للطريق ووقف عند بيتها وفكت حزامها ولفت له وابتسمت:شكراً زوجي العزيز اتوقع بنتقابل المره الجايه انت ببشت وانا بفستان ابيض نفس بياض قلبي وأجنحتي

ثنيان:اختاريه أسود دام فيها قلبك وأجنحتك

ضحكت ملاك واخذت شنطتها ونزلت من السياره وناظرها ثنيان لين دخلت وحرك سيارته

دخلت البيت ورمت شنطتها تنزع عن وجهها قناعها المزيّف وابتسامتها وضحكها وقوتها وغرورها وخلتها عند باب غرفتها

فتحت باب غرفتها ودخلت وجلست على السرير تفصخ شوزها وتشيل مجوهراتها وحطت كفوفها بحضنها وهي تناظر الفراغ واخذها الماضي تتذكره