نزل من سيارته مع ابوه اللي نزل وناظر اخوانه خلفه وما كان لابس بشت غير عقاب وهذي ماهي عادة عيال عقاب وهذا اللي كَوى صدر ثنيان منظرهم بالبياض بعد ماكانوا يمشون خلف ابوهم ببشوت

دخلوا مجلس بندر وناظر ثنيان الرجال اللي بالمجلس وتقدم مع ابوه اللي سلّم ومشى يتقدم يصافح الحاضرين من قبيلته ومن قبيلة بندر

وجلس وجلسوا حوالينه عياله وشد على سبحته ثنيان يسمع مقدمك عقاب:لنا الشرف بجيّتنا لين عندك يا أبو راشد وعسانا ما نقطع عادتنا بالجيّه بكل خير

بندر هز راسه:تقول ان اللي صار بيصلح بيني وبينك ؟

عقاب:ماني ضد الصلح بس انا جاي لرضاتك وحقك وحق شرفك واسمك

حك شاربه ثنيان يراقب الرجال ونطق أكبرهم سن بآيات ومنطوق يهدي مافي نفوسهم

عقاب هز راسه بهدوء ولف على ثنيان:ولدي ماخرج عن شوركم يا أبو راشد بيده صك زواج وصك طلاق

بندر:بتدافع عن ولدك يعني ياعقاب ؟

سكت عقاب لان بندر يناديه بإسمه حافّ ومحد تجرأ بيوم يناديه بإسمه

ورفع صوته ثنيان يتقدم بظهره بثبات:ان كان اللي صار غلط وبدون شورك وشور أبوي فأنا أطلب السموحه من أبوي بالأول ثم منك وقبيلتك واسمك ، لكن انا ما غصبت احد على شي ما يودّه ، هذا صار برضاي وبرضى بنتك وعلى ورق حلال

سكت بندر يناظر ثنيان بحده وبدل نظراته بين بندر وراشد وكمل:ويشرفني اني اعلن زواجي وطلاقي من بنتك وأعلنها قدام قبيلتي وقبيلتك وما جعلتها سرّ عشان رخصها بعيوني ، حَشى

لف عقاب يناظر ثنيان وكمل ثنيان:ماهو الا سرّ وصار عَلن الحين ، وعرفت خطاي وهذا انا عندكم استسمحكم

لف عقاب على بندر ونطقوا الحضور يتدخلون بالموضوع

وطال الموضوع طال لدرجة ان عقاب اشتد حجاجه ولا قدر يصبر على وضعه وكأنه ياخذ من بندر حق السنين الطويله وثار قديم بينهم

لين قطع الحوار عقاب يرفع صوته:طال الموضوع يابندر واخذ من وقتي واجد وصلك اعتذارك وهذا انا بعيالي خالين البشوت وقبيلتي معي ورايتي بيضاء قدام كل الحضور من شيبانكم وأبيض شواربكم لين أصغر رجّال بينكم ، واللي بينكر عطاي ووجودي الليله ماهو الا سفيل

بندر:ما اخذت رضاي للحين ياعقاب

رفع حاجبه ساري وناظروه عيال عقاب بحده كيف يقلل من شان عقاب بين الحضور

ونطق عقاب:انا ما اخذ رضا من احد يابندر انا اعطي وارقى سما وطلوعي مطلع الصقور ، وانا عقاب بن جرّاح ما اتعالى عن غلط عيالي وهذا انا عندك لكني ما أبطي وانا داني عند احد

ابتسم بندر:لكنك دنيت عندي

وقفوا عيال عقاب يقطعون الحديث وابتسم عقاب يناظر بندر:جينا بطيب الفعايل وهذا فعايلك قدام ربعك وربعي

وقف عقاب مع عياله وقاموا جماعة عقاب بيتركون المجلس ووقف بندر:دام تبي الصلح فالصلح ماهو بيني وبينك

لف ثنيان ولفوا اخوانه وعقاب ملقيه قفاه

ونطق بندر يضرب على كتف راشد:راشد يصير نسيبكم

جمد وجه ثنيان وعقد حاجبينه نهار ولف ساري على ابوه اللي التفت وناظر راشد اللي واقف بجانب ابوه

ونطق احد الحضور:عطَه يا أبو ساري عَطه ما بتعطي الا لرجّال وخل الصلح يتمّ وتصيرون أهل

مارد عقاب يناظر بندر ولف ثنيان على ابوه وهمس:لا ابوي

جاسر لف يناظر ابوه وبلل شفايفه ساري بتوتر وناظر الحضور عقاب ورجع ناظر بندر:لو تبي تدلّ مجلسي ما اعطي بنتي لأحد بغير مجلسي

لف نهار بصدمه على ابوه وخرج عقاب ومشى خلفه ثنيان:ابوي وش يعني ؟ بتعطيه أصايل اختي ؟ جيناه وانذلينا عنده خلاص يكفي

جاسر:يخسى ياخذ اختي اقسم بالله يخسى

ساري:ابوي لا تنتظر منه خير واضح نيته ومن وقت طويل ما يبي صلح معك

نهار:أصايل ما تاخذ ولده لو على جثتي

ثنيان:ابوي يبي يلوي ذراعك بأصايل اقسم بالله هذي نيته لا تعطيه حتى ان جاك لا تعطيه

لف عقاب عليهم بحده وناظره ثنيان وناظرهم عقاب كلهم وهمس:كله بسببكم وبسبب افعالكم اللي ما تفكرون فيها

ناظر ثنيان اللي اخذ نفس بضيق:لحد يعلمني وش اسوي

تركهم ومشى يركب سيارته مع السواق ولف ساري:ما عطاه ولا بيعطيه هدوها

جاسر:ابوي ما يفرط في أصايل لبندر اعرفه

نهار:يبطي اصلاً بندر وولده ولو وافق ابوي الموضوع بيوقف عندي

سكت ثنيان واخذ نفس ومشى يركب سيارته وركب كل واحد سيارته وخرجوا من مجالس بندر

'

تناظر الحضور اللي يتكلمون ويرقصون على صوت الاغاني والطرب وتناظر نوره اللي تصفق وتهلي وترحب بكل الموجودين

وملاك صوت افكارها وذكرياتها اعلى من كل شي

تناظر شادن اللي قدامها تتكلم مع اهل جنى وتضحك وياكل صدرها جمر من خذلانها بشادن ومن انتقامها لها

نزلت عيونها ملاك ثواني لفنجانها تناظره وهي هاديه وتفكر

ولفت من مسكت كفها أصايل:ارقصي معي

ملاك ابتسمت:ارقصي مع امك

أصايل:لا انا ودي معاك

ابتسمت ملاك تناظر أصايل ووقفت أصايل وحطت فنجانها ملاك ووقفت قدام أصايل ترقص بهدوء وتبتسم ابتسامه هاديه

ووقفت نوره من شافتهم يرقصون ورفعت كفوفها تصفق لهم وتعزز لهم

وابتسمت أصايل ترقص مع ملاك اللي تمشي بينهم وترقص بموج فستانها ترسم خطوط انتصارها على صفحات فضول الحضور وتجاوب بجواب واحد على جميع اسئلتهم ، انها زوجه لثنيان بن عقاب بن جرّاح

ناظرتهم شادن وتلاشت ابتسامتها ماتقدر تخفي غضبها وقهرها وغيرتها من ملاك

تشوف نظرات نوره لملاك وابتسامتها وتشوف أصايل اللي ترقص مع ملاك وكأنها وسط أهلها

كأنها ترقص مع اختها وأمها اللي واقفه تصفق لها

وهذا اللي كانت تشعر في ملاك من ابتسامة نوره وأصايل ونظراتهم لها وكأنها عاشت معهم عمرها كله ولا سكنت صدرها الغربه منهم

اخذت جوالها نوره تتباهى فيهم وتصورهم يرقصون سوا

وابتسمت ملاك تجلس وتناظر نظراتهم لها وسكوتهم واخذت نفس ترتاح وتجلس بإعتدال ظهرها ، بثقه ، بغرور

تكسر خشم شادن اللي أمامها خاسره ولا تقدر تطولها ناظرت شادن بنظرات عاديّه ولفت لجوالها اللي يدق ومن ناظرت اسمه وقفت تتركهم

وردت وهي تدخل للشاليه:وش صار ؟

ناظر الطريق ثنيان وهو ساكت بعد سؤالها ، ما يدري ليه اتصل من ضيقته عليها رغم انها سبب في ضيقته اصلاً

وقفت من سمعت هدوئه وفهمت افكاره ونطقت بهدوء:ياليتك ما دخلتي حياتي ياملاك

ابتسمت تكمل:صح ؟ تقول بداخلك هذي السبب بكل شي سئ بحياتي

مارد ثنيان وهو يسوق وفصخ شماغه يحطه بحضنه وكملت ملاك:سو اللي تبي تسويه ماعاد يفرق عندي شي ، كل شي اظنه خاب فيه ظني اصلاً

لفت ملاك تشوف شادن اللي قاعده وسطهم وعقدت حاجبينها تصد:وش صار فيك ؟ كل هذا قهر مني ؟

ثنيان نطق بهدوء:تطلعين اليخت الحين ؟

سكتت ملاك تسترجع طلبه وعقدت حاجبينها بعد ثواني:كيف يعني ؟

ثنيان اخذ نفس يشوف الشاليهات اللي على طريقه:يعني اطلعي لي انا برا

انصدمت ولفت تناظرهم وناظرت جوالها من قفل وظلت ترمش بهدوء تستوعبه ومشت تدخل الغرفه تاخذ عبايتها واغراضها وتلبس عبايتها وخرجت ولفوا عليها

وابتسمت لنوره:خالتي استسمحك ثنيان برا ينتظرني

هزت راسها نوره:مسموحه يا أمي انتي

ابتسمت ملاك بهدوء ومشت تخرج من عندهم وناظرت سيارة ثنيان اللي واقفه وضيقت عيونها تحاول تشوفه من نور السياره اللي على وجهها

وفتحت الباب تركب جنبه ولفت عليه تناظره صاد عنها يحرك ولفت للطريق:بتنتقم مني يعني وترميني بالبحر عشاني ما اعرف اسبح ؟

ثنيان نطق بهدوء وهو يسوق:ما اصدق انك ماتعرفين تسبحين انتي تعرفين لكل شي

ابتسمت بهدوء ملاك تراقب الطريق ووقف ثنيان عند الساحل وناظرت اليخوت:ما اركب يخت كانت فيه وحده غيري

ثنيان قفل سيارته:وعشاني اعرفك ماهو نفس اليخت

ناظرته ملاك ونزل من السياره ثنيان ونزلت معاه ومشت خلفه تشوفه ماسك شماغه وعقاله وماشي لليخوت ووقف عند يخت وناظرته ، ماكان نفس يخته فعلاً

لف عليها ونزلت عيونها تفصخ كعبها وتمسكه بيدها وتمد كفها من مدّ كفه وتركب اليخت وتناظر البحر وتسمع صوت موجه

دخل ثنيان داخل يشغل اليخت ودخلت خلفه ملاك تراقب هدوئه وكيف انتصف باليخت وابتعد عن الساحل

لفت لداخل اليخت تشوف داخله وجلست وهي تحط عبايتها يمينها وتراقب البحر والموج

غمضت عيونها تشم ملوحته وتسمع صوت موجه وفتحت عيونها من قفل اليخت ثنيان وترك اليخت يطفو بنفس موجه وهدأ الجوّ وابتعدوا عن أنوار الخبر وما يشوفون غير نور القمر

وخرج ثنيان وهو ماسك شماغه يدور عليها وعقد حجاجه من شافها جالسه ترتدي لونه ، لون الموج والبحر

وتقدم لها:ليه هاللون ؟

رفعت عيونها ملاك من وقف قدامها:لان هذا اللون يشبهني

سكت ثنيان يناظر جسمها وجلوسها ورجلها اللي باينه له واللون اللي يزهى عليها مع لون شعرها ، كانت آيه من الجمال وكأنها فعلاً ملاك

جلس بجانبها وصدت ملاك تناظر ظلمة الليل ونور القمر المكتمل فوق البحر وتسمع صوت موجه

وناظرها ثنيان بهدوء:خرجت من عندهم أدور لك أعذار

لفت ملاك عليه وكمل ثنيان من حط عيونه بعيونها:خرجت وكل شي يأشر عليك ويقول هذي هي ، هذي سبايب كل شي

سكتت ملاك تناظره وكمل ثنيان:حاولت أكابر وأنسى ماضي لياليك لكن جتني طيوفك وزادت الطين بَلّه

ملاك بلعت ريقها تسمع هدوء صوته وكمل ثنيان:للحين أرسم ورا غلطاتك أعذار وأقول زلّه تحسبين اني اعرف ليه اسوي كذا ؟ والله ما اعرف ليه

ملاك ناظرت عيونه اللي تتأملها وكمل ثنيان

:استبحتك عن كل غلطاتك وسامحتك عن ألف الذنب الى ياء النهايه

نزل عيونه ثنيان يناظر كفوفه:اشرحي لي وش يصير انتي

رفع عيونه من جديد:علميني من إنتي ؟ وش تبين من حياتي ؟ وليه جيتي ؟ وليه ماتروحين مني ؟

صدت ملاك للبحر بهدوء بدون رد وكمل ثنيان:نصف منك أمان واستأمنه ونصف منك خوف وأخافه ، كل شي فيك نصف وانا ما كسبت ولا نصف فيك لا أمانك ولا خوفك ، دايم حَذر منك

بللت شفايفها بهدوء ملاك تسمعه ولفت عليه تناظره:انت فهمني وش تبي بملاك ؟ علمني ليه للحين مع ملاك ؟

ثنيان مارد عليها ولفت عليه بجسمها كله تناظره:ليه تبي تشوف أحسن مافي ملاك وكل الناس تشوف اسوأني ؟

ثنيان:صرت اسئله الحين ؟

ملاك بلعت غصتها بهدوء تكمل:ليه يوم كل الناس جوّ في شمالي جيت انت يميني ؟

ثنيان:انتي دخلتي معي بحرب وتحدي

ملاك ناظرته من تجمع موج عيونها:ومن الكاسب ؟

ثنيان سكت ثواني ونطق:انا المهزوم

ملاك ناظرت عيونه وسكتت ثواني لين نطقت:كل اللي بحياتي خيبّوا ظني حتى إنت ، يوم اني ظنيت انك المحارب الاول قدامي صرت بجنبي

ثنيان:بحارب معك

ملاك:من تحارب ؟

ثنيان:ماضيك اللي سبب نيرانك

صدت ملاك تعض شفتها ما تبكي وكمل ثنيان:عمك وبنت عمك وجاسر ، وأنا والدنيا

لفت عليه وكمل ثنيان:بحارب كل شي عشان ملاك تفوز ابي ادفن هالشيطان

ملاك ناظرت عيونه ماتفهمه ولا بتفهمه وكمل ثنيان:حربي ماهي معك حربي مع نارك

نزلت دموعها بقهر لان نارها منصور ومنصور حريق ثنيان

وتقدم ثنيان واخذ نفس بتردد لكن صوت نبضه يغلبه

مسك كفها ورفع عيونه لعيونها من قريب

رجفت كفها من لمس كفه الدافي وكأن كفه ملمس حنيّه ومعطف براد وجمر دافي وموج هادي

ناظرها كيف تتأمله ، يحسد الموج اللي ضفّها لأول مره معه والهواء اللي ضمّها والحرير من ثيابها ، يحسد كل جمره تشتعل في عنقها تثور

يناظر مفرق نحرها كيف قلايد ذهبها تذوب ، تذوب من شدة نارها ولَهبها

ولكنه تعب كل مره يكتفي بالنظر يبدل نطراته بين ثغرها وعروق نحرها وكل ما بداخله يرغب

ناظرت نظرات الغرق من عيونه ماتعرفه ، ماتعرف هو وش يكون ؟ هو غريب هو حبيب ؟

هو بين البين وشي يستدعي داخلها شعور غريب شعور بدايات تسكن صدرها تجعل اصغر ما بداخلها يرقص ويغلي من نظراته ووجوده وصوته ودفى كلامه

حنيته اللي غلبت كل قسوه ذاقتها وشكّلت داخلها حطب وجمر ، حنيّة موج اللي تطفي نارها

يناظرها ما رفّ له جفن وهي تغرق مثل ما يغرق الموج في بعضه قدامها وحوالينها

رجفت كفوفها من شعورها ومن خوفها ومن انقلاب داخلها ونزلت دموعها رغماً عنها تحس داخلها حرب تقيم بين بعضها وكأن ثنيان بيزيح كل شي في قلبها ويسكنه رغماً عنها

جالسه قدامه تناظره فاتر حيلها ، مهزومه ظنونها ومخذوله من أقرب الناس لها ، ومغلوبه قسوة زمانها بحنيّة موجها اللي أمامها

ناظرها ثنيان يشوف نظراتها له ويحس بكل هالنيران اللي حوالينهم: تحت القمر وفوق البحر نجلس ومستعد أقول الخوافي كلها ، وارمي يميني وشمالي كل زلاتك بس نذوق ينبوع الهوى عذب صافي

شد على كفها يقربها منه وغمضت عيونها من اقترب منها

ثنيان همس يناظر رجفتها:مستعد والله اني مستعد

ناظر ثغرها يسري داخله جمر من نارها

يحس بحرارة جسمه تزيد من قربها ومن رغبته اللي غلبت تردده بهاللحظه

فتحت عيونها ملاك تتأمله ودها تزيح النظر عنه لكنها تشوفه أقوى من كل شي عاشته بالدنيا

يغلب قوتها ولَهبها وقسوتها وكأن له قدره كبيره لها هي فقط

يكشف ستور جروحها ويفتق خيوطها خيط خيط ، ياخذها من كل شي بلحظه وكأن كل كونها يختفي

تعيش معه عالم ما جربته وضدها ، عالم موج وبحر ودفى رغم اللهب ، وحنيّه تمسح على كل قسوه وتطفيها

ناظرت نظراته لثغرها ولعنقها ولعيونها اللي يبدلها على كل جزء منها وناظرت ثغره من اقترب منها رغبه بتقبيلها

وشدت على كفه من زاد جمرها واشتعلت اكثر بقربه ماتقدر تعطيه ولا تقدر تقدم وتغرق

ماتقدر تعكس كل طريقها اللي تمشيه لأجل شي ودها فيه مثل ماهو وده فيه

تقدم منها اكثر ياخذ نَفسها ورفع كفوفه لوجهها وبلع ريقه يسمع صوت الموج حوالينه وكل مافيه يتجه لها

رفعت كفوفها تمسك كفوفه اللي على فكّها من لمس أنفه أنفها واشتعلت نار داخلها وماقدرت غير انها تنزل راسها وتتنفس بسرعه من صدته وفتح عيونه يناظرها ونزل عيونه من بللت ثوبه دموعها وبلع ريقه وبعد كفوفه عن وجهها

وعقدت حاجبينها تغمض عيونها بقوه تبكي واخذ نفس يستجمع نفسه وفتح ياقة ثوبه ووقف يتركها

بكت من تركها وفتحت عيونها تناظر البحر ، صورة منصور قدامها وصوت ثنيان بعقلها

تحارب جهتين ضدّ بعض داخلها لوحدها ، تحارب ودّها بما ودّها

ماتبي تصدق فكرة انها عمرها ما حبت منصور وكلها تعلقات من سوء مراهقتها ، ماتبي تكتشف بعد هذا كله ان ثنيان هو الحب الحقيقي

ولكن كل خوفها الأكبر ماهو نفسها هو ثنيان فقط لأنها تعرف حجم قسوة الحقيقه لو عرفها

بكت ترفع صوتها بقهر وغضب داخلها من حياتها ومن وجود ثنيان بحياتها بوقت ما ناسب دخوله

تبكي لانها تبي وجوده لكن بوقت أفضل بحياتها

وقفت تتمسك باليخت لين وقفت عند نهايته وهي تبكي ورفعت كفوفها على صدرها تحس بالنيران تشتعل داخلها وصرخت بعلو صوتها تغمض عيونها بقوه وتصرخ ما يرجع عليها حتى صدى صوتها

كل اللي تسمعه موج هادي ودها تغسل داخلها فيه

وقف ثنيان يراقبها بنهاية اليخت تبكي وتصرخ وشد على قبضة يده بقهر وغمض عيونه يسمع صراخها

في شي أكبر يحاربها وبينه وبينها ولا يقدر يعرفه لكن اللي يعرفه ان ملاك ما صدته ملاك أجبرت تصده

وصراخها وبكاها قدام عيونه الحين دليله اللي يؤمن فيه

ظلت تتنفس بسرعه بتعب من صراخها وبكاها وجلست وهي تتنفس وتناظر البحر ، تحط قدام عيونها ثنيان ومنصور

تحط قدام عيونها حياتها اللي ماتعرف نهايتها ، تشوف منصور اللي خلف الحديد بسببها 

وتحط قدام عيونها ثنيان اللي باع حياته وسمعته وشرّها واشترى خيرها وماضيها وأجوبتها

غمضت عيونها بتعب هي واقفه بمحلها لانها تجهل وين تمشي

بين عيونها عقاب وأهله وبين عيونها هي ومنصور

وخوفها الوحيد اللي ماتبي تفكر فيه هو ثنيان اللي تشوفه الضحيه بالقصه واللي ممكن تأذيه أكثر رغم انها أذته

فتح لها بيبان الاعذار بنفسه ورسم لها خطوط خارج خطوطه وتغاضى عن زلّاتها ومسح اخطائها وحطها بين اهله يعيشها أفضل حياه تبي تعيشها

لفت بعيونها تدوره وناظرته واقف من بعيد يناظرها ورمشت بهدوء من طاحت دموعها وشدت على فستانها تشوفه يوقف قدامهم ألف حاجز ماتقدر تتخطاه

ناظر نظراتها له وهو واقف محله ينتظر منها القدوم بس لكنها ما تقدمت

ما يعرف وش اللي يوقف بينهم بهاللحظه لكنه يحلف يمين وده يمحيه ويرتاح

تناظره وكلها ملامه لانها تصدّه وتمنعه وتمنع نفسها وتعيشه حياتها اللي هي ما تحملتها ، تحلف يمين برب الموج انها ودها تركض لحضنه تبكي لكن رجولها ما تشيلها

تشوف قدامه حاجز كبير ما تقدر تكسره ماتقدر تتعداه

تركها ثنيان يدخل لليخت وغمضت عيونها بتعب من صوتها اللي راح بسبب صراخها ومن احتراق عيونها من موج دموعها

ناظرت البحر الهادي واخذت نفس طويل تغمض عيونها وشغّل اليخت ثنيان وعرفت انه صار وقت العوده

رَسى على المرسى وخرج يناظرها ماسكه كعبها وتنزل من اليخت على المرسى ومشى خلفها من مشت قبله

وقفت عند سيارته وفتحها وركبت وشغل سيارته

وهمست:بروح عند منيف

لف عليها يناظرها ثنيان ومالفت عليه ابد

وبلع ريقه يشد على الدركسون ويحرك سيارته ، مشى بهدوء يناظر الساعه قدام عيونه ٣:٠٠ ص

وقف عند البيت على أمل يتكلمون سوا وينفهم اللي ماهو مفهوم بينهم لكنها فتحت الباب تتركه

ورفع عيونه عليها يشوفها تدخل البيت ، قفلت الباب وغمضت عيونها تبكي ورمت عبايتها وكعبها واغراضها بتعب وجلست على الكنب تغطي وجهها وتبكي

مع إنه ما تكلم وما تبادلوا الاعترافات والشعور ، تتعب لانه يرجعّها لأول نقطه ولمكان تجهل تطلع منه

مكان يشبه غريق ما يعرف للسباحه يغوص بمكان ماله قاع ، يقلب توازنها وهي تخاف الاهتزاز يغيّر محطات وقوفها وطريقها كله

غيّر كل أمورها وهي تخاف التغيير ، تخاف بيوم تصحى ما تلاقي داخلها منصور ، تلاقيه

تخاف الحقيقه وتخاف قربه وتخاف من الخذلان والجحود ، تخاف تعيش شي اكبر من جريمة منصور وصوت ضميرها وجحوده لها وخذلان اهله لها

مسكت راسها وهي تبكي وتهز نفسها بخوف وهمست:لا تكفى يارب لا لا لا

قاعده تلمس داخلها شعور ماتبي تحسه ، صورة ثنيان وقربه وصوته وريحته وكلامه زالت من ذاكرتها أي احد وكأنها ماعاشت ماضي غير مع ثنيان

-

رجع دربه كله اللي مشاه مع ملاك بدونها ، البحر

لكنه وقف سيارته بدون ينزل يناظر الموج قدامه ، يهوجس وكأن الهوجاس ترك كل خلق الله الليله وسكن ثنيان

ودّه يكشف اللي داخلها يعرف من هو عندها ووش ترتجي منه ووش ودها معه ، ودّه ما تجاوب الا على سؤال واحد من بين كل الاسئله اللي غارق فيها

هي تشعر مثل ما يشعر ؟

تنعاد عليه طيوفها من أول جيّاتها له لقبل الدقايق الأخيره بينهم

كانت متمسكه بكفوفه بعد ما كانت تحط بينها وبينه مليون مسافه وحدود وخطوط حمراء

الليله لمست كفوفه ولا ابتعدت وكأنها تهدأ وهي قريبه منه لكنه سمع صوت نحيب بكاها وصدّتها اللي بدون أسباب

لكنه حاول لأجلها وبادر وكان هو السبب دايم بينهم ، كان ياطى على جمرها مع ان غيره ما قدر على نيرانها

نبش بيدينه الثنتين وسط اللهب ولا تألم لكنه بعد هذا كله حسّ انه غرق بمكان ما يشبهه ولا ينفع له

ملاك اللي كل شي حوالينها يقوله لا ، وكل شي ضد اللهب والموج

لكنه كان يؤمن انها ملاك وكل مره كانت تبكي أمامه ينتصر ، ويشعر ان هذا انتصاره الحقيقي ، شوفتها ملاك

بدون اقنعه مزيفه ومشاعر تتلبسها عكسها ، كان دائم ينظر لها بإنها خير ولها ضمير مع ان كل شي سوته عكس كل ايمانه

نزل عيونه بتعب وتساؤل ويهوجس بالبحر بدون أجوبه

'

جلست أصايل على الطاوله:وين الناس ؟

نوره:ثنيان وملاك الغايبين

عقاب:عن الجميع

عض شفته نهار:افا !

نوره ابتسمت:والله مدري وين غايبين بس الله يجعلهم سالمين

ضحكت جنى:ماقاوم اللون

سكتوا وناظرتهم جنى ولفت لساري وبلعت ريقها

لفت شادن تشوف مكان ثنيان وملاك وصدت تاكل

رفعت عيونها نوره من دخل ثنيان ومعه شماغه وناظروه ووقف عندهم:سلام

ناظر ثوبه وحالته عقاب:وش هالحال ؟

ثنيان ناظر نفسه ورفع ذراعينه:وش فيه حالي ؟

نوره:وين ملاك ؟

ناظرهم ثنيان ولف من دخلت ملاك خلفه:معاه

وقفت بجانبه وابتسمت بهدوء وناظروا كعبها اللي بيدها وسكتوا بإستغراب من حالهم

ولف ثنيان عليها ولفت عليه بهدوء:شوي واجي افطر

تركته محله ومشت للغرفه ولف عليهم يناظرهم ومشى خلف ملاك

عقدت حاجبينها نوره:وش هالحاله عليهم ؟

شادن:يمكن تهاوشوا

رفع عيونه عقاب على شادن اللي تاكل ولفت أصايل:ما اتوقع

عقاب:افطروا

،

قفل الباب ثنيان وناظرها:كيف رجعتي ؟

حطت مفتاح منيف على التسريحه وتقدم ثنيان لها

ورفعت عيونها عليه تشوف حاله نفس حال أمس ومشت تفصخ عبايتها وناظر فستانها اللي لا زالت لابسته وجلست على الكرسي تمسح بقية مكياجها

فصخ ثوبه ودخل الحمام ومسحت مكياجها ملاك واخذت لها ملابس وانتظرت خروجه من الحمام

تعداها من خرج وقفل الانوار وعقدت حاجبينها تشوفه ينسدح ولا تجرأت تسأله عن شي

دخلت الحمام واخذت شاور تحت مويه حارّه تشبه داخلها وغمضت عيونها ما يخطر في بالها غيره وقربه وكأن النهار ما كفّاه اللي اخذه الليل منها

فتحت عيونها تخرج من الشاور ولبست ملابسها تنشف شعرها وارجع من جديد تحط ميك اب وترسم على وجهها الوجه اللي تعودوه

خرجت تاخذ جوالها وتطلع لها عبايه في سكون الغرفه ونوم ثنيان

نزلت لهم وهي تناظر رسالة منيف:متى جيتي ومتى رحتي ؟

ارسلت له وهي تدخل عليهم:بنتكلم سيارتك معي

ابتسمت لهم:بالعافيه

نوره:وين ثنيان ؟

ملاك جلست وابتسمت:تعبان بينام

سكتوا يناظرونها ورفعت عيونها عليهم:سهرنا باليخت عشان كذا تعبان

ابتسمت نوره:اي يالله زين

اخذت نفس بهدوء ملاك تفطر وعيونها من شدة بكاها امس تألمها

نوره:ما علمتني عقاب وش صار معكم امس ؟

سكتوا العيال ورفع عيونه عقاب يراقب ساري وجاسر ونهار وهز راسه:ماصار شي

نوره:شلون يعني ؟ ما تصالحتوا ما قال شي ؟

عقاب رجع ظهره لورا:أصايل

لف نهار على ابوه ولفت أصايل:هلا

عقاب:من بيوديك دوامك ؟

أصايل ابتسمت:اللي يتطوع من اخواني حبايبي

جاسر هز راسه:انا فاضي

نهار:انا اوديك على طريق دوامي

ساري:اذا تبين ماتشا ؟

ضحكت أصايل:سجلي امي اللي صاير

نوره ضحكت:بيدلعونك اليوم

أصايل:بختار ابوي حبيبي يوديني

عقاب:كان ودي لكني مشغول ودربي مو على دربك

أصايل:حسافه

عقاب:روحي مع نهار

ابتسمت أصايل لنهار وهزت راسها:تشغل اغانيي اللي احبها

نهار اشر على عيونه وابتسمت أصايل

لف عقاب على ملاك اللي تاكل بهدوء وتناظر صحنها :ملاك

رفعت عيونها لعقاب وتكلم بهدوء:دام سيارتك ماهي معك انا بوديك

ملاك سكتت ثواني:كيف عرفت ان سيارتي مو موجوده ؟

عقاب ابتسم لها:اعرف كل شي ، قومي ان خلصتي

قامت تتركهم جالسين وناظرت نظرات شادن لها وصدت ملاك تتجاهلها ومشت خلف عقاب

رفع يده خلف كتوفها يمشي معها وركب مع السواق وركبت بجانبه

ابتسم ولف عليها:الشاهين المغرور ارحبي

ابتسمت واخذت نفس ولف عليها:مكتبك ؟

هزت راسها ملاك وصد عقاب للطريق:ما تكلمتي مع بنت عمك ؟

رفعت عيونها للطريق ملاك:لا

عقاب التفت عليها:لان مافي كلام بينكم والا لان الكلام ان طلع ماهو زين لك

لفت ملاك عليها:ماهو زين لها هي

عقاب:تدرين انها طلبت مقابل كل هذا الزواج فلوس ؟

سكتت ملاك بقهر تناظر الطريق وكمل عقاب:وتوقعت لاني شفت ابوها وعرفت ليه ما تبينه

ملاك ماردت عليه ولف عليها ملاك:اعرفي زين ملاك اني انا ما بسمح لحد يدخل بحياتك ويدمّر شي داخلك حتى لو كانوا أهلك

لفت عليه ملاك تناظره وكمل عقاب:أنا أبوك وأهلي أهلك وانتي عندي مثل أصايل وان كان اللي بيزعلك يوم ولدي ثنيان فمهو أغلى منك ، انا طول عمري أقدّر كل انثى تدخل بيتي بدايتها من ام ساري ونهايتها انتي

ابتسمت بهدوء ملاك من كلامه ومسك كفها عقاب وبلعت غصتها بتأثر وابتسم عقاب:آماليّي فيك كبيره يا ملاك وجمايلك واجد ووجودك مهم

عضت شفتها تكتم دموعها وناظرت عقاب اللي مبتسم يناظرها وهزت راسها:الله لا يخيب ظنونك فيني

ابتسم عقاب يطبطب على كفها ولف للطريق من وقف السواق

واخذت نفس ملاك ونزلت من السياره تدخل المكتب

ارسل لملاك وردت عليه:سيارتك بالبيت كلّم نهار وروح خذها ما امداني منيف

تنهد واخذ جواله يتصل على نهار ورد نهار وهو يوطي صوت الاغاني:ارحب الفال الطيب

منيف:البقى ، شلونك نهار ؟

نهار:انا بخير شلون ابو يامور ؟

ابتسمت أصايل وهي تناظر الطريق وضحك منيف:بخير بس متورط

نهار:ابشر بسعدك

منيف:ان لاحظت ترا سيارتي عندكم

نهار ضحك:لاحظت وبعاقبك وبخليها عندنا

منيف:بجي اخذها

نهار:اصبر بوصّل الشيخه أصايل دوامها وأمرّ عليك ناخذ سيارتك

سكت منيف ثواني وهز راسه:اذا مافيها كلافه

نهار:ابد تحت أمرك

منيف:ما تقصر

قفل نهار ولفت أصايل:عادي اذا يبغى سيارته خذه على طريقنا

نهار:وين بيته ووين طريقنا ؟

لفت أصايل للطريق:طريقي وطريقه مو واحد ؟

نهار:لا وين دربك ووين دربه ، اوصلك واشوفه

اخذت نفس بضيق ودخل المستشفى نهار ولف لها:دلوعتي لا أوصيك انتي ما تحتاجينهم هم يحتاجونك

ابتسمت أصايل وابتسم نهار:اي شخص يرفع عينه بس عليك ترا فَردي بخصري

ضحكت أصايل:لا تكفى مانبي طيش

نهار:انتبهي لنفسك

هزت راسها أصايل ونزلت من سيارته ودخلت المستشفى بتوتر وتقدمت من شافت صديقاتها:كيف الوضع ؟

ميّ:باقي ما وصل المشرف قاعدين ننتظر

ناظرت المتطوعين أصايل:كل هذولا معانا ؟

ميّ:شكلهم

سكتت أصايل تناظر المكان والناس ورفعت عيونها تصور لوحة التدريب وتنزلها بسنابها

'

جلست على مكتبها ومسكت راسها بتعب كل شي ينهمر عليها دفعه واحده كل شي فجأه صار اثقل من متونها

رجعت ظهرها لورا من دخل عليها رجّال وسلّم واخذت نفس ترد السلام:تفضل

جلس وبيده أوراقه:عندي قضيه اذا تقدرين تحلينها

هزت راسها بدون تناظره:حط اوراقك ورقمك واطلّع عليها واكلمك

حط الاوراق على طرف المكتب وخرج وفتحت لابتوبها تشغله وسحبت الاوراق تناظرها

عقدت حاجبها تشوفها فارغه وزاد استغرابها وهي تفتش بينهم وهمست:يستهبل

رفعت عيونها تدوره ورجعت تناظر الاوراق ووقفت تناظر الصوره اللي بين فراغ الاوراق وبياضها

واخذت الصوره تناظرها وجمد وجهها تشوف صورة منيف وتنفست بسرعه بخوف تفهم كل شي انه تهديد

وصرخت بخوف تخرج من مكتبها ولا لقت لها سياره ورجعت مكتبها تمسك راسها وتاخذ جوالها والصوره بيدها

مشت بخوف بالمكتب رجولها ما شالتها وجلست وهي تناظر رد منيف

غمضت عيونها بخوف وهي تتنفس وكأن من يركض خلفها:لا تكفى يارب

طلع جواله منيف وهو مع نهار يسمعه يتكلم وقفله يحطه بجيبه ولف لنهار:يعني اختلاط ؟

نهار هز راسه:اي تخصصها من قبل اختلاط اصلاً بس ماني شايل همّ ان احد يتعرض لها انا موجود واخواني وابوي موجودين

سكت منيف يناظر الطريق ودخل نهار البيت ونزل منيف وناظر جواله اللي يدق واخذه يرد:هلا ملاك

ملاك بكت بخوف:منيف

وقف محله بخوف يسمعها وعقد حاجبينها:وش فيك ؟

لف عليه نهار يناظره

وبكت ملاك برعب تتمسك بمكتبها:منيف تكفى تعال تكفى

منيف قفل الباب بخوف:وش صاير علميني طيب ؟ وينك انتي؟ من عندك ؟

ملاك بكت بخوف ترفع صوتها:محد محد بس تكفى تعال

منيف:طيب طيب بجيك اهدي

قفل وناظر نهار:جيب مفتاحي نهار من داخل

نهار:وش السالفه ؟

منيف:مدري والله ملاك دقت تبيني وتبكي ماني فاهم شي

نهار عقد حاجبينه:طيب طيب جايك

ركض نهار يدخل وطلع لفوق ودق غرفة ثنيان ودخل وفتح عيونه ثنيان بإنزعاج من فتح الأنوار

ناظر نهار اللي يدور حوالينه:وش فيك ؟

نهار:مفتاح منيف وين ؟

جلس ثنيان وهو عاقد حجاجه من نعاسه:وش صاير ؟

نهار:ياخي منيف يبي مفتاحه بيروح لملاك تبكي مدري شفيها اتصلت عليه تبيه

لانت ملامح ثنيان ووقف:تبكي ليه ؟

نهار اخذ المفتاح:مدري

ثنيان:انتظرني

نهار:اخلص

نزل نهار بسرعه ومد مفتاحه لمنيف وركب منيف يحرك يخرج من البيت وحرك بعده نهار

ونزل ثنيان مستعجل وركب سيارته وخرج بعدهم

وقف منيف عند مكتب ملاك ونزل تارك بابه مفتوح بخوف برعب من ان اللي صار مع منصور قبل يصير من جديد وكل رعبه يسكنه

دخل ورفعت عيونها ملاك اللي تبكي وبكت بإنهيار من شافته وتقدم لها يحضنها وهي جالسه وبكت تتعلق فيه

مسح عليها بخوف ونطق:وشفيك ؟ وش صار ؟

دخل نهار وناظرها بالارض تبكي ومنيف حاضنها

ودخل ثنيان وناظرها بصدمه وتقدم:ملاك !

رفعت عيونها عليه وناظرته وناظرت نهار اللي ببدلته ماسك فرده وكأنه يترقب شي

ورجعت ناظرت منيف وهدت وهي تتنفس بسرعه وجلس ثنيان يناظرها بصدمه:وشفيك علميني ؟

لفت ملاك على منيف ومدت له صورته واخذها وعقد حاجبينه ورجع ناظرها:وش فيها ؟

ملاك رجفت بخوف:جاني واحد حط اوراق على مكتبي وخرج

سكت ثنيان يسمعها وتقدم نهار يسمعها

وكملت ملاك بخوف:ولقيت الاوراق فاضيه مافيها شي ولا نقطة حبر ووسطها صورتك

بكت بخوف ورجعت ناظرت الصوره:بس صورتك

وقف ثنيان ياخذ الاوراق وتقدم نهار:وش يبي يعني ؟

منيف سكت ورفع عيونه لثنيان اللي يناظر الورق الفارغ

ملاك:يبي يخوفني هو اللي رمى سيارتي وهو اللي كسّر مكتبي وحط رصاصه على كرسي مكتبي انا ادري والله ادري في احد يلعب معي

لف ثنيان وعقد حاجبينه:متى كسّر مكتبك ؟ اي رصاصه ؟

منيف:ليه ما علمتيني ؟

صدت عنهم بتعب ومسكت راسها ولف نهار يدور بمكتبها:كان عندك كاميرا وينها ؟

عضت شفتها بقهر ملاك لانها غيرت مكتبها ولا ركبت بدالها وحده

ثنيان ناظرها بغضب:كيف يعني يجي احد يكسر مكتبك ولا تعلميني ؟ كيف يحط لك رصاصه ولا يجيني خبر ؟

منيف ناظر ملاك بهدوء:وليه انا ماعندي خبر بعد ؟

ضرب المكتب ثنيان بعصبيه:وش يعني تسكتين ؟ يجيك احد يرمي عليك نار بسيارتك ويكسّر مكتبك وباقي عايش ؟ باقي ما اخذت روحه ؟

ناظر ملاك يقرب منها بعصبيه:ليه ما تعلميني ؟

سحبه نهار يبعده:اهدأ ياخي ماهو وقته

منيف لف لملاك:اهدي ملاك هذا انا عندك ما بيصير شي

ملاك ناظرت منيف برعب:ماراح يتركني ولا يبي يقتلني يبي يخوفني بس

نهار:ما تذكرين شكله ؟ ما شفتي سيارته ؟

هزت راسها بالنفي ومسك راسه ثنيان يتنفس من غضبه

ورفع عيونه منيف على نهار اللي يراقبه ورجع ناظر ملاك وتنهد

اخذ نفس ثنيان وخرج من المكتب ونزل للشارع يناظر حوالينه ورجع دخل وناطر ملاك:ينقفل ذا المكتب

رفعت عيونها عليه ملاك واخذ شنطتها واغراضها ووقفت:هذا اللي بسويه ؟

ثنيان لف عليها بحده:اي هذا واحد ابن ست وستين كلب قاعد يلعب معك يحسب ما وراك احد ، بتقفلينه وانا بقعد هنا اشوف وش بيسوي

ملاك وقفت:بيوقف يعني وبيخاف منك ؟ هذا ما يبي احد افهم هذا يبيني انا

لف ثنيان عليها:يخسي لا تستفزيني بكلامك وتكلمي زين

وقف منيف يناظرهم وتقدمت ملاك لثنيان:هذي الحقيقه ياولد العميد هذا يبي راسي ويبي يخوفني لا انت ولا اهلك وقبيلتك كلها بتمنعونه

ثنيان تقدم لها ورفع صوته:قلت يخسي ، امنعينا

منيف:ملاك امشي البيت ونحل السالفه

ملاك لفت على منيف:ماراح اتخبى بالبيت عشان كلب يبي يخوفني

ثنيان:خوّفك لا تسوين قويه ، جيناك تبكين خايفه ياخي اعترفي قولي ابي من يساعدني

ملاك:بكيت خفت على منيف وهذا هو منيف قدام عيوني

ثنيان:وحطوا صورة ثنيان بكره بمكتبك بتبكين من جديد ؟

سكت منيف يصد ويتنفس بهدوء وناظرهم نهار من اشتدت نظراتهم

وارتبكت ملاك تناظر عيونه وعصبيته وكيف ماسك اغراضها بيده

ونزل عيونه ثنيان:امشي

هزت رجلها تكابر ولف منيف:ملاك خلاص تكفين !

نهار:انا بخوفك ولو ان المفروض ما تخافين بس لا تقعدين تنتظرين يسوي شي زياده ، خافي عشان المفروض تخافين

ناظرتهم ملاك ورفعت عيونها لثنيان ووقفت ومشت تخرج

وخرجت بتركب بسيارة منيف ولف منيف:ملاك !

لفت ملاك وهمست:ماراح اروح معاه

خرج ثنيان وعقد حاجبينه يشوفها عن سيارة منيف:تبين اغراضك ؟ بتجين معي

مشى لسيارته وهو معصب ولفت ملاك لمنيف اللي رمش بهدوء يطمنها

ومشت لسيارة ثنيان وركبت بجانبه وحرك ثنيان وهو معصب

حطت شنطتها بحضنها تراقب الطريق وبنص طريقهم هدأ السرعه ثنيان وتكلم بهدوء:ليه ما علمتيني ؟

ماردت عليه ملاك وهي تناظر الطريق ولف ثنيان:ومتى صار وانا ما حسيت ؟

همست ملاك:حسيت

عقد حاجبينه ثنيان:متى ؟

ملاك اخذت نفس ولفت عليه:اكيد ما بيأثر عليك الموضوع ليه ما علمتك

ثنيان:بيأثر ملاك بيأثر لان انا ماودي يصير شي وما تفكرين فيني اول واحد ، بيأثر لان انا ودي اصير اول رقم تتصلين عليه ماهو منيف ، بيأثر لان انا ودي اخذ حقك مره وحده بعد ما اخذتي حقك بنفسك عمرك كله

سكتت ملاك تناظره وناظرها ثنيان:ابي احس اني موجود بحياتك حتى لو انتي ما سمحتي لي

شدت على شنطتها تناظره وهز راسه بالنفي ثنيان:إصحِّك تبعديني

ملاك همست:أسلم لك وانت بعيد

لف ثنيان للطريق من جديد:مابي السلامه

سكتت ملاك تناظره يسوق ولفت للطريق

غمضت عيونها بتعب تحس بإن صدرها خالي من فجعتها وخوفها اللي سكنها ، تكذب على نفسها وإحتياجها لحضنه

ما تبي يزيد داخلها حاجه لحضنه ووجوده ابد ، حتى لو ان امنيتها الوحيده انها ليله واحده تنام بحضنه وهي كلها يقين انها بتنام أفضل وأريح نومه لها

ماتبي وودها تفتح باب السياره وتتخلص من كل هذي المشاعر

ناظرت سيارة منيف بالخلف وخلفها نهار اللي ترك دوامه عشانها ولفت لثنيان اللي ترك منامه وجاها

ولا مره طاحت بمشكله وشافت حوالينها احد وبهذي الكثره

عقاب يوصلها وثلاثه رجال يرجعونها ، لاول مره تحس ان حوالينها دروع تحميها من اي شي

دخل البيت ثنيان ووقف ونزلت ملاك ونزل منيف لها ومشى لها ورفع كفوفه على وجهها:كلمت نهار وبنحلها ماعليك لا تخافين

ملاك هزت راسها بهدوء:مو خايفه عليّ

وقف ثنيان يناظرهم وكمل منيف:ولا تخافين عليّ ماني مخليك

مسكت كفه تبعده من حست انها بتبكي من جديد وهزت راسها وناظرها منيف:بكلمك

شدت على كفه ورفع عيونه منيف لثنيان وهز راسه ثنيان:لا تقلق

هز راسه منيف ومشت ملاك مع ثنيان للداخل وتقدم نهار:كلمت دوريه بنروح نشوف كاميرات الشارع هناك والمحلات اللي جنب المكتب

منيف:تكفى نهار جب الكلب ذا

هز راسه نهار:لا تشيل همّ ملاك اختي مثل أصايل والله ما تمرّ

شد على كتف نهار ومشى لسيارته منيف وحرك خارج من البيت

'

جلست على السرير وهي هاديه ومشى ثنيان وهو يدور بالغرفه وثواني لف عليها:من بيسوي كذا ؟

ماردت عليه وهي ساكته وعقد حاجبينه ثنيان:معقوله عمك ؟

مشى بالغرفه ولف عليها:والا بنت عمك ؟

رجع يمشي بالغرفه وهو يفكر وهمس:مستحيل جاسر ماهي حركاته ، يعني ليه يرسل احد يأذيك ؟

مسك راسه يفكر والتفت عليها وتقدم لين عندها:هذي طقوسك عشان ترجعين أقوى ؟

رفعت عيونها ملاك:ليه يهمك ؟

ثنيان صد بعصبيه:إنّا لله وإنّا اليه راجعون ، ملاك انتي تستوعبين اللي صار مثلي ؟ والا تبلدتي ؟

ملاك رفعت صوتها:لا ما تبلدت بس ابي افهم ليه مهتم ؟ يهددني ويذبحني انت شعليك ؟

ثنيان:عليّ ومهتم وبتدخل ياملاك لو توقفين قدامي وتمنعيني

تقدم لها ينحني:وان لقيت الكلب هذا او لقيته بمكتبك والله لأذبحه بيديني هذي

جمد وجهها وسوّد من كلامه ويدينه اللي رفعها قدام عيونها ورمشت برعب وناظرها ثنيان وسكت من تبدل حالها

نزلت عيونها للارض وبكت بخوف وهي تتنفس وكأنها مختنقه تذكر صراخها على منصور وكيف كان يقتل شخص بمكتبها ، تذكر دخول منصور للمكتب يركض وكيف كان الضحيه ماسك ملاك ومغطي فمها يلمسها بطريقه مخيفه

من تذكرت الموقف تغير حالها قدام ثنيان اللي يناظرها وعقد حاجبينها من نزلت من على السرير تجلس على الارض وتبكي بخوف

وتقدم لها وهمس:ملاك

رفعت كفها تمسكه بخوف وصرخت ماتبي تعيد كل شي ماتبي ينعاد كل شي ، تبي تصرخ عشان ما تسمع صوت الحادثه وصراخها بإسم منصور تبي تبكي ما تبي تشوف منظر منصور من جديد

مسكها بخوف ثنيان من انهارت وهزّها:ملاك

تمسكت فيه وهي تصرخ وحضنها بصدره بخوف:سمّي بالله ملاك اذكري الله

صرخت وهي تبكي:لا تقتله تكفى

سكت يسمعها وهو مصدوم وهز راسه يهديها:طيب اهدي ماني قاتل احد بس اهدي

رجعت تتمسك فيه وجلس بإعتدال بجانبها وهو حاضنها وعقد حاجبينها يسمعها تبكي ولاهو فاهم شي

ابتعد عنها ومسك وجهها يناظرها:بتنحل لا تخافين بحلها انا وبعرف من هذا اللي يأذيك ووعد اني اتخلص منه

ناظرته وهزت راسها بتعب:تكفى لا تقتله

ثنيان:ماني قاتله ياملاك اذكري الله ، انا ماني موسخ يدي بدمّ كلب لكني بحلها وأمنع الردى عنك

ملاك ناظرت وجهه بخوف تتأمله برعب:مابي أنادي اسمك ولا تسمعني

عقد حاجبينه ثنيان بدون فهم من كلامها ورفعت راسها ملاك تتنفس وتغمض عيونها بخوف

ترجف بين كفوفه ونزل عيونه ثنيان لعنقها اللي بان له وزادت عروقها بروز من تنفسها وتوترها

ورفع عيونه ثنيان يناظرها مغمضه عيونها بخوف وتقدم لها ما يتردد ما يقدر وما يقاوم ورفع كفوفه يمسك وجهها ودفن وجهه بعنقها

وعقدت حاجبينها تنزل راسها من حست فيه يقبّل عنقها ورجفت كفوفها

وفتحت عيونها بذهول من حسّت ان كل ما بداخلها يتطاير من وجود وجه ثنيان بعنقها وملمس ثغره على عنقها ونحرها

رفعت كفها من استوعبت ومسكت شعره من الخلف بعجز انها ترده لانه يقبّل عنقها بغرق بإندفاع برغبه ورفع راسه ثنيان يناظرها من قريب وكأنه خرج من الغرق

منظره ونظراته وكيف بلل شفايفه يناظرها

بلعت ريقها بصدمه ترمش بعيونها وأهدابها المبلله تراقبه

نزل عيونه لعنقها اللي توّرم بالورد من ناحيه واحده وكأنه انتصر واخيراً على جفاف عروقها الخضراء ووردها

ورجع ناظر عيونها من جديد مصدوم من حاله قبل ما تكون هي مصدومه من حاله

وكأنه ماصار يقدر يتحكم برغباته ولا بنظراته ولا بشعوره

نزل كفوفه لكفوفها وشدّ عليها من شاف نظراتها له واخذ نفس وهمس:ماقدرت

سكتت بذهول تناظره وشال يدينه عن يدينها ووقف تاركها وبلع ريقه من رفعت عيونها له وخرج من الغرفه ظلت تناظره بصدمه وكأنها خرجت من اللي هي فيه ودخلت عالم ثاني

نزلت عيونها تلمس بطنها اللي تحس ان كل داخله يطير من شعورها وغمضت عيونها تمسك رجفتها من تذكرت شعورها وكيف لمس ثغره عنقها

فتحت عيونها تبلع ريقها ووقفت تستجمع نفسها تهدي حالها اللي تغير بعد قربه ، تحاول تمسح تعرقها اللي تحس فيه واحتراقها اللي زاد اشتعاله

لفت للمرايه ووقفت لوهله تشوف أثر ثنيان على عنقها

جلست بصدمه ولمست بأصابعها الورد اللي شكّله بين عروقها الخضرا بعنقها الشفاف

بلعت ريقها تتحسس عنقها وغطت بكفها ورده وغمضت عيونها من مشاعرها لكنها في ظلمة عيونها كانت تشوف نظراته من جديد وفتحت عيونها بتعب وهي تتنفس بسرعه

كل ماله يصير أقرب كل مالها تحس معه بإحساس غريب وماتبي تغرق ماتبي تحس بيوم انه قريب منها لدرجة ما تقدر تترك كل شي وتهرب

لكنها بلحظه معه نست الهروب وحسّت انها باقيه معه لا محاله

'

خرج من عندها يحك جبينه وناظر نهار اللي دخل:ثنيان

رفع عيونه وعقد حاجبينه من شاف نهار:وشفيك ؟

نهار:بحل موضوع الكاميرات

عقد حاجبينه ثنيان:اي كاميرات

نهار:تستهبل ثنيان؟ كاميرات المحلات اللي جنب المكتب

ثنيان سكت ثواني وضحك نهار:انت وش فيك دايخ ؟

ثنيان حك حاجبه:اي اي فهمت طيب وينها

نهار:وش اللي وينها ؟

ثنيان:الكاميرات

نهار:انت دايخ واجد لا صحصحت كلمني

مشى تاركه واخذ نفس ثنيان ومشى يدخل الصاله وناظر امه اللي تكلم

وجلس وصبّ له شاهي واخذ الفنجان يناظره وهو ساهي ، يهوجس

بلع ريقه من شعوره ومن فعله ومن نظرات ملاك له صار بخاطره يرجع من جديد يشوف ورد عروقها الشفافه ماهو مصدق اندفاعه

ابتسم بخفوت وهو يناظر الفنجان ولف من نطقت نوره:تهوجس في من ؟

اخذ نفس يبلل شفايفه:ولاشي ، ابوي ما رجع ؟

نوره:لا يقول بينتظر أصايل لين تخلص وياخذها هو

ثنيان:بلغك باللي صار مع بندر ؟

نوره:قالي ماصار شي بندر نفسه نفسه راعي المشاكل

سكت ثنيان وهز راسه:سوينا اللي علينا

نوره فتحت جوالها:صح بغيت اوريك تعال اقرب

وقف ثنيان وبيده فنجانه وجلس جنب نوره اللي شغلت له مقطع ملاك وأصايل

وابتسم بخفوت يناظرها ترقص مع أصايل بفستانها اللي اختارت لونه بنفسها وعشانه

دخل جاسر وناظرهم:وش فيكم ؟

نوره:لا تقرب قاعده اوريه احسن اختياره ترقص

رفع عيونه ثنيان وناظر جاسر ورفع حاجبينه جاسر:احسن اختيار فعلاً

ثنيان سكت وهز راسه جاسر:بغيتك

ثنيان:اخلص فنجاني واجيك

سكت جاسر يناظر ثنيان اللي يشرب من فنجانه وخرج تاركه وشرب فنجانه ثنيان ووقف يخرج مع جاسر

ناظره واقف بالحوش ويناظر السيارات ووقف جنبه ثنيان:عسى خير

لف جاسر عليه:الخير عندك

اخذ نفس ثنيان وناظره:باقي بتحوم حوالين ملاك ؟ والا شادن ترست مخك بأشياء جديده ؟

هز راسه بأسف جاسر:كنت انتظر انت اللي تحلّ الموضوع لكني ما اشوف منك شي

ثنيان:لاني ما بحله نفس ما انت بتحله ، ونسبب مشاكل ونخلي سيرتنا على لسان كل الناس غير ان وجود ملاك بيننا أمان عشان بندر وطاريه

جاسر ناظر ثنيان بحده:تضحك على من ثنيان ؟ تضحك على نفسك ؟ انت ما تدور نهايه لملاك انت للحين تطول مشوارها معك ماودك تخرجها من بيننا وتكشفها قدام ابوي وقدام امي اللي يعاملونها مثل أصايل

سكت ثنيان يناظر جاسر وشد على فكّه يسمع جاسر

جاسر:هذي شرّ وانت الحين قاعد تحارب في شي هي سببه ، لا تغرق ثنيان مثل ما تغرق بالبحر ، لاتغرق لان القاع اللي بتوصل له بينهيك

مارد ثنيان يراقب جاسر وهز راسه جاسر:ومابي أكشف اوراقها قدامك الحين لكن حقيقتها بتعورك

ثنيان:حقيقة ملاك محد يعرفها غيري

هز راسه بأسف جاسر وكمل ثنيان:خلص نفسك من شادن وتأثيرها عليك وخلني انا اسلم بمشاكلي لوحدي

جاسر:مشاكلك مستمتع فيها ياثنيان ، تكفى لا تطيح اكثر

ثنيان:ماطحت ولا بطيح انا اعرف احل اموري لوحدي ، صحصح جاسر ولحد يكذب عليك

سكت جاسر يراقب عصبية ثنيان ومشى بيدخل ثنيان ونطق جاسر:اهم شي لا تطيح قبل تشوف زنزانه

لف ثنيان وعقد حاجبينه ومشى جاسر لسيارته وظل يراقبه ثنيان لين مشى وركب سيارته ثنيان وارسل لنهار:شفت الكاميرات ؟

نهار:اي وكلمت طلال بيتصرف

ثنيان:جايك

قفل جواله وخرج من البيت

-

خرجت من الغرفه من شافت خروج ثنيان من البيت ودخلت غرفة ملاك بدون تدق بابها ولفت ملاك بإستغراب وعقدت حاجبينها من وجودها

بلعت ريقها ملاك تشد ياقة فستانها اللي لبسته وعقدت حاجبينها:صار وقت نتكلم الحين ؟

تقدمت شادن وتكتفت ووقفت قدام ملاك:صار يابنت عمي

ملاك:اي ومن وين بتبدين ؟ من زواجك والا من خيانتك والا من وين ؟

شادن:من منصور

صدت ملاك من طاريه وتقدمت شادن بحده:من عنده لانه هو بداية كل شي بداية وجودك هنا بينهم وبداية وجودي هنا معك

لفت ملاك بحده:قبل زواجي كنتي تقولين بتتزوجين وتتركين منصور يتعذب والحين اشوفك تزوجتي ، عسى منصور راضي عن زواجك ؟

شادن:ماتزوجت عشان منصور تزوجت عشان احمي نفسي من مشاكلك

عقدت حاجبينها ملاك بذهول من شادن:كل شي بتحطيني سبب فيه ؟

شادن:لانك انتي السبب فعلاً

صدت ملاك من كلام شادن بملل ومن اتهاماتها

شادن:جاسر

لفت ملاك تناظرها وكملت شادن:يعرف كل شي

سكتت ملاك ثواني وهمست:وشو كل شي ؟

شادن:منصور والديّه وسرقتك عشانه وسبب سجنه

جمد وجه ملاك وكملت شادن:وانا هنا عشان ينتقم منك ويغطي عيبه ويسدد باقي ديّة منصور

لانت ملامح ملاك بصدمه تناظر شادن بذهول ورفعت كتفها شادن:ومنصور بنفسه اذا طلع بيبلغ ثنيان بكل شي

ظلت تراقب شادن رجولها ما تشيلها ورفعت حاجبها شادن:وبيخرج منصور وبتخسرينه وبتخسرين ثنيان معه ، هذا اللي يراهن على خيرك ولا يبي يسمع حقيقتك ويشوفها

جلست ملاك وعيونها تراقب شادن بصدمه ورفعت كفوفها شادن:كلنا خسرنا بالنهايه بس خسارتك انتي اكبر

نزلت راسها ملاك تناظر الارض جامد وجهها وتقدمت شادن لها:جهزي اعذارك والا جهزي كرت مغادرتك اسهل

وقفت ملاك وناظرتها بحده:انتي علمتيه ؟ انتي اللي قلتي له عن كل شي عشان يهددني ؟ انتي من اي حثاله طلعتي لي ؟

تقدمت شادن بغضب:هو هددني بنفسه ولا قدرت اكذب اكثر

ملاك:وانا ويني ليه ما تجين عندي انا احلها نفس دايم ؟ ليه تتصرفين من راسك ياغبيه

شادن:اجيك تحلينها ؟ انتي مشغوله مع ولد البحر زوجك موج مو منتبهه لاحد

تقدمت ملاك واشتعلت غضب من شادن وهمست بوجهها:قصي يدي اذا جاسر طلع لك اخوك ياحماره

بلعت ريقها شادن تخفي ربكتها:منصور صار اخوي الحين ؟

دفعتها ملاك بقهر من تصرفاتها:ولا عمرك بتفهمين ، غبيه

شادن:تركنا لك كل الذكاء والدهاء يابنت عمي

ملاك لفت عليها:شوفي وين انا ووين انتي وتعرفين ان مافيك ذرة ذكاء ، قاعده تحاربيني وتاركه جاسر يسرح ويمرح ياغبيه

شادن:استهيني في جاسر لين تصبحين ومنصور حرّ ووقتها خل السقف يطيح فوق راسك بخساره

ملاك:تخسين انتي وجاسر تطيحوني وانا اعرف اتصرف بحياتي ولا بتحكميني بشي وتوكلي الحين اذلفي ربي عيال الثور اللي عندك

هزت راسها شادن بقهر وخرجت تاركه ملاك وجلست على السرير وتمسكت باللحاف ملاك بشده وهي تناظر الارض

داخلها يزيد بغليانه وجمرها تكاثر من حريقها ومن اسم منصور وثنيان اللي صاروا بكفتين

كل شي تشكل فوق راسها سحابه سوداء وحجبت عنها شمسها الحارقه ماعاد عندها كروت تطلعها وتدافع عن نفسها وتثبت نفسها

'

دخل عقاب عليهم يناظرهم جالسين ينتظرونه وجلس على كرسيّه بهدوء ورفع عيونه لعياله يناظرهم واحد واحد

ورفع عيونه من نزلت ملاك ولف ثنيان عليها ورفعت عيونها على ثنيان وبلعت ريقها تتقدم وتجلس بجانبه

لف عليها ثنيان يحسّ بإحتراقها وخمن انه السبب ولف للأكل بهدوء ياكل

ورفعت عيونها شادن على ملاك ولف جاسر عليهم يناظرهم ورجع ناظر شادن

نوره ناظرت عقاب:عقاب وشفيك اليوم خامل ؟

عقاب:من الصبح اشتغل تعبت شوي

أصايل:وانا تعبت بدوامي كان مرهق مرهق

ساري:وش بتسوين بتكملين ؟

أصايل لفت وهي تاكل:اكيد مره مهم التطوع وبينفعني

جنى:حياتي الله يوفقك

ابتسمت أصايل ولفت نوره:عقاب شرايك نشرب شاهي وناكل كيك ومكسرات بالحوش كلنا ؟

عقاب رجع ظهره لورا:تجمعوا اللي ودكم

نوره وقفت:بقولهم يجهزون القعده

تركتهم ونزلت كفوفها ملاك بتعب تناظر الأكل واخذت نفس ولف عليها ثنيان وهمس:كنتي تبكين ؟

هزت راسها بالنفي بدون تناظره وسكت ثنيان يناظرها ولف من وقف عقاب:اطلعوا لا تبطون عن امكم

وقف نهار:جاي انا

وقفت ملاك وناظرت جاسر وشادن اللي وقفوا معها وظلت واقفه تناظرهم

ولف ثنيان يوقف وناظرهم لين خرجوا ومسك ذراع ملاك وتقدم يهمس:تكلم معك؟

انضغطت ولفت تناظر ساري وجنى اللي وقفوا

ورفعت عيونها ملاك على ثنيان لين خرجوا ونطق ثنيان:تكلم معك جاسر ؟

هزت راسها بالنفي ملاك وبعدت ذراعها عنه وتقدم ثنيان:اجل وشفيك ؟

رفعت عيونها ملاك تناظر ثنيان ثواني ولاردت ومشت تتركه

اخذ نفس ثنيان بتعب وخرج خلفها

جلست ملاك وحطت ذراعها على الكنب تتكي وتناظرهم كان ودها تختفي من بينهم للابد وتترك كل شي بلحظه وحده

لكنها تناظر عقاب ونوره ونهار وأصايل وثنيان اللي بجانبها

يعورها ثنيان من مكان ما كانت تتوقع انها بتتعور فيه ابد وتشوف اسئلته بعيونه ومخاوفه وقلقه من اخر موقف بينهم ، ماودها يشوف نار داخلها مو سببها

ماودها تشوف فيه نظرات لوم وتردد واسئله

لانه يحاولها وهي مالقت شخص يحاولها قد ثنيان للحين ، هو يرغب في قربها ووصلها مع ان غيره يتمنى خلاص ملاك

رغم انها نار ولهب وتحرق اي شي تلمسه هو الوحيد اللي لمسته وما احترق للحين دافي موجه وبَحره

تخاف انها تخذله او يلاقي اجوبه من غيرها ماتبي تجاوبها هي

لف ثنيان من انتبه لها انها متكيه بيدها وتناظره ، نظرات من عيون تلمع ، عيون تعود يشوفها تحترق وتشتعل لكن كانت تلمع الحين

ما يدري هي توادع والا تقاوم والا تكابر بنظراتها لكنه ظل يراقبها ويجهل صوت افكارها

ورغم سوالف الموجودين بالمكان هي ما كانت تسمع ولا تشوف غيره ، بكل اصراره وكلامه واسئلته وقربه وحضنه ودفاه ، كل التفاصيل اللي غفلت عنها بلحظتها الحين رجعت تشوفها وتسمعها من جديد وتراكمت عليها مره وحده تفوقها انها تعشقه

تحبه ، عطاها شي اكبر من اللي تنتظره وتستناه ، عطاها عائله وتقدير عطاها مساحه وأعذار

طالت بنظراتها واخذ نفس بتوتر من وضعها وبدل نظراته عنها لاهله

وكأنه قطع حبل افكارها من التفت وعقدت حاجبينها بإنزعاج من التفت عنها

واعتدلت تمد كفها لكفه ولف عليها بصدمه يناظرها وعقد حاجبينه

مسكت كفه بقوه وحطته بحضنها ولفت تناظرهم وتبلع ريقها

ناظرها ثنيان ونزل عيونه لكفوفها اللي تحضن كفه وشد عليها وهو يجهل سببها

بللت شفايفها ملاك تحس بنظرات شادن لها لكنها مالفت عليها ابد

جاته رساله بجواله واخذه بكفه الثانيه يقرا رسالة طلال:مسكته بيحطونه يستجوبونه

قفل جواله ثنيان وابتسم يحس بكفوفها بكفه وسند ظهره للخلف وهمس:صرتي موج ؟

اخذت نفس ملاك ولفت عليه وهزت راسها بالنفي

ناظر كفوفهم ورجع ناظرها:ما احس بنار

ملاك بلعت ريقها تناظره:لو

سكت ثنيان ونزلت عيونها لكفوفهم ورجعت ناظرته:اطلب اني اخرج من المرسى للموج ، توديني ؟

عقد حاجبينه وتقدم لها:انتي تخافين الموج

رفعت راسها تنفي كلامه:ماعاد يخوفني الموج صرت استأمنه

سكت ثنيان يناظرها ورفعت عيونها لعيونه ملاك:ضجيج عقلي اعلى من اصواتهم

شد على كفوفها ثنيان وهز راسه ، نزلت عيونها لكفه الكف اللي تشعر ان داخله سعة العالمين رغم ضيق الكون عليها ، شعور الاطمئنان غريب بكفه

لف ثنيان وابتسم:سهرتكم رايقه بس الموج ينادي

ضحكت نوره ولفت ملاك عليهم وابتسمت بخفوت

أصايل:زمان كان ثنيان يهرب للبحر الحين الاثنين يهربون

ثنيان لف لملاك:ملاك طلبت

لفت ملاك عليه وابتسم ثنيان:وما بردها

عقاب:الله يسهل عليكم

وقفت ملاك وفلتت يدها بصعوبه من يد ثنيان وكأنها تخاف تتركها للأبد ويختفي عنها

لف عليها من لاحظ انها تتمسك بكفه لين اخر خطواتها وتدخل البيت

لف ثنيان على جاسر وشادن اللي جالسين ومشى خلف ملاك

دخلت الغرفه وهي تطلع لها ملابس ودخل ثنيان وناظرها:تبين نطول ؟

لفت عليه تشوف نيته من سؤاله وبلعت ريقها ثواني:انا بروح لاني متضايقه وسـ

سكتت بربكه وهز راسه ثنيان:ماني ضاغط عليك

كان قدّ كلامه فعلاً ما يبي يضغط عليها بقربه لانها اليوم مسكت كفه وباقي مشواره معها قصير

هزت راسها براحه ومشت للحمام واخذ شنطته ثنيان وابتسم يحط فيها شورتاته ومنشفته واخذ مفتاحه ومشى للحمام ودق الباب

ولفت على الباب لين نطق:بنتظرك بالسياره

هزت راسها:طيب

مشى يخرج من عندها ولفت للمرايه وناظرت الفستان التفاحي اللي لبسته وبيّن عنقها كامل وبان ورد ثنيان اللي زرعه على عروقها الخضراء

وزرع داخلها ورد بين لهب وجمر وكأنه فعل معجزه وسط اللهب وزرع ورده

رجعت تناظر وجهها وتتذكر كلام شادن وحطت ميك اب بوجهها ببرود وجمود

حتى لو كانت نهايتها على يد شادن وضميرها اللي ياكلها بسبب منصور لا زال ، هي تعيش شي اكبر من كل هذا تعيش موج يطفي لهبها وماتبي تختفي عنه وتحتاجه بهاللحظه بالذات

خرجت من الحمام ولبست عبايتها تاخذ بقية اغراضها بشنطه صغيره وخرجت

ناظرتهم جالسين وابتسمت لهم:تصبحون على خير

نوره:وانتوا من اهله استودعناكم الله

مشت ملاك بعد ما ناظرت شادن وركبت السياره بجانب ثنيان اللي حرك خارج من البيت

نزلت عيونها لدبلتها تناظرها ولفت لثنيان اللي ماكان قادر يخفي ابتسامته من ردة فعلها

لفت للطريق تشوف البحر واقترب من المرسى ووقف ولف عليها وناظرته وفتحت الباب تنزل

غمضت عيونها من شمت ريحة ملوحة البحر واخذت اطول نفس ولفت من نزل ثنيان وشنطته بيده ومشت معاه

طلع اليخت ومد كفه لها ومسكته بقوه تطلع اليخت وحط اغراضهم ومشى يدخل

جلست بهدوء من شغل اليخت وخرج عن المرسى يبتعد بالبحر وغمضت عيونها من سرعته وهواء الموج اللي تحس فيه يملي رئتها وفصخت حجابها وعبايتها واستندت على حافة اليخت ترجع راسها للخلف وترفع يدينها وابتسمت بهدوء من مشاعرها وحياتها اللي تركتها على المرسى تحترق وضحكت بعلو صوتها

تمد كفوفها للموج وتلمسه وتكت براسها تناظر الموج ورَسى ثنيان وسط البحر يترك اليخت يبحر براحة الريح وخرج لها

وتقدم لها:اسبحي اذا ودك

هزت راسها بالنفي وجلس بجانبها:اي وما بتعلميني وش الغريب اللي صار لك الليله ؟

ملاك لفت للبحر تتكي براسها وتناظره:الجمر هادي

ابتسم ونزل عيونه لعنقها ينتبه لورده اللي زرعه بين عروقها وصد بهدوء:ماهو فارق عندك اللي هددك ؟

ملاك ناظرته:اي واحد ؟

لف عليها وكملت ملاك:يهددوني كثير

ثنيان:متى صار موضوع الرصاصه ؟

ملاك:وانت بين الموج يازوجي موج

سكت يتذكر مكالمتها وعض شفته وصد

هز راسه بعد ثواني ثنيان:دريت جاك شي من جاسر لانه كلمني

ملاك هزت راسها بالنفي تصد للبحر:شادن كلمتني

ثنيان لف عليها:تحاربك ؟

ملاك سكتت ثواني:وانا مامعي ذخيره

ثنيان ناظرها تتأمل الموج وهاديه:وانا ؟

ملاك لفت عليه وهزت راسها:انت ذخيرتها هي مو ذخيرتي

ثنيان اخذ نفس:انضغطتي واجد

ملاك ماردت عليه تناظر البحر عقلها متوقف عن التفكير وكأنها بعد ماكانت تسعى طول عمرها توقفت فجأه

وسكت ثنيان من شافها ساكنه مميله راسها تناظر الموج ورجع ظهره للخلف يصد للبحر ويهدأ

رفعت عيونها لثنيان اللي صاد للبحر وساكت وجالس جنبها

كان موجود بكل وقت انهياراتها كان ما يقول لا حتى لو ماهو فاهم وجاهل ، ياكم تتمنى تستند على كتفه اللحظه هذي ويوقف عندها كل شي لكنها ماتقدر

ما تتخيل حجم الألم اللي بتعيشه بعد ما ينكشف كل شي وتنفتح ستاير خبتها عن الحقيقه

ماتبي تفقده او تفقد عائلته او تفقد اللي يعطيه اياها بدون مقابل بدون ملل بدون احساس

نزلت دموعها بدون شعور منها تذكر منصور اللي ينتظر حريّته اللي شرت الشرّ عشان تخرجه بنفسها ، وتذكر ضميرها اللي كان طول عمرها معيشها على انه حب لمنصور لان اللي عاشته مع الموج اللي امامها هو الحب الحقيقي وكل شي عاشته مع منصور هو حاجه للسند بعد فقدانه وضمير يأنبها لانها سبب سجنه

لكن الحب الحقيقي هو اللي يستند على اليخت ويتأمل الموج اللي يشابهه

همست وهي تتأمله:الموج قادر

لف عليها وناظر دموعها ولمعة عيونها وبلل أهدابها ولا ظن انها تبكي يمينه

وهزت راسها بهدوء وهي تتأمله:انا عشت ما احتجت ، لكني من بعدك احتاج لك حاجة اللهب لآخر نقطه من الموج ، احتاجك حاجتي للصيف بعز الشتاء ، انت كل حاجاتي

سكت ثنيان يناظرها وكملت ملاك:كنت تجهل كم مره حطيت قلبي المشتعل وسط موجك وطفيته ، ماكنت اقدر اقولك ولا مره اني اغرق معك وانا على اليابسه على المرسى

كانت مميله راسها على ذراعينها وتتأمله:لولا حنانك كان كل هالعمر دمعات مسكوبه ، اشوفك أقرب غريب وأبعد مستحيل واحس اني بين الكل مغتربه لكني معك بوطني ، عمري ما حسيت بالدفى بعد سنين طويله الا معاك وجنبك ، انت المكان الدافي وانا بدونك احترق

عقد حاجبينه من كلامها واعترافها ودموعها اللي تنساب بهدوء

رمشت بهدوء ملاك:ماكان ببالي بيوم اقول هذا الكلام لكني ما صرت اعرف الجاي ، دايم كانت تسيّرني القسوه لكن ماكنت اقسى الا على نفسي

رفعت اصابعها على ذراعه تلمسه بأطراف اصابعها وهمست:كل شي لمسته إحترق مابي أحرقك

ثنيان:إحترقت

رفعت عيونها على ثنيان وتكلم بهدوء ثنيان:إحترقت يوم وقفت عند أجوبتك وقلت مابي اسمعها

سكتت تناظر عيونه وكمل ثنيان:إحترقت يوم عرفت اني ابي الغرق بين الاسئله بس مابي نجاة الأجوبه

رفع حاجبه ثواني بشعور يسكنه:لان ماورا الأجوبه الا نهاية طريقك

ساحت دموعها على ذراعها تتأمله وكمل ثنيان يهز راسه:أنا موج وقلبي على الماء وقلب الماء على شطك

غمضت عيونها تفهم جملته بمفهوم من أربع حروف

' أحبك '

ناظر عيونها اللي غمضتها وعرف انها تفهم تعبيره وفتحت عيونها عليه ماتبي تخذله ماتبي تعوره ماتبي تتركه لكنها تغرق بجانبه وتبي الغرق ماودها بالنجاه

اخذ نفس براحه من نطق جملته وحسّ انها استوعبت مشاعره ولف للنور اللي بدأ يشق الظلام دليل طلوع الفجر وشروق الشمس

ووقف يدخل لداخل وغمضت عيونها ملاك بهدوء

خرج وبيده منشفته ولفت له تشوفه بوضوح من شروق الشمس وفصخ تيشيرته وجلست بإعتدال وناظرها:لو غرقت لا تنقذيني

ابتسمت ثواني لانها ماتعرف تسبح:ما بنقذك إسبح على مسؤوليتك

ابتسم بخفوت وحط منشفته وقفز من اليخت للبحر وتناثر الموج على فستانها واخذت نفس

تلفتت حوالينها بخوف من صارت لوحدها وتسمع هدوء الموج ووقفت تشوف مكان ثنيان لكن ما لقته

بلعت ريقها تنتظره وتمسكت بمنشفته وهي تناظر البحر حوالينها من كل الاتجاهات

كتمت خوفها وهي تدوره بعيونها ومن طوّل ما شافت له مكان ، كانت متأكده انه يعرف ينجو ويسبح بتمرس لكنها تخاف وسكنها الرعب من طوّل

وهمست بإسمه لأول مره على لسانها:ثنيان

ماجاها صوت وتلفتت ترفع صوتها:ثنيان

تقدمت لطرف اليخت بخوف وصرخت تناديه:ثنيان

بكت بتعب من ضغطها وخوفها ولمست طرف الموج تصرخ بإسمه:ثنيان

فلتت منشفته ترمي نفسها بالبحر تجهل النجاه لكنها بتلحقه وغطست

وفتح عيونه ثنيان من شافها تغطس وابتسم لانه سمعها سمعها تناديه ولف يشوفها تتشبث بسطح البحر وجمد وجهه يستوعب انها فعلاً ما تعرف تسبح

غطس يدخل ومدّ ذراعينه لها بجوف البحر ومسك كفوفها بقوه وحاوطها يحضنها وطَفى يتنفس وناظرها تتنفس وهي متمسكه فيه

ناظرها بصدمه ثنيان تكح وتتنفس وتشهق:منجدك ؟

رجف فكّها من برودة المويه وشعورها وراحتها بعد ما عاشت النجاه مع ثنيان

ناظرها بصدمه يشوفها تننفس بسرعه:ما تعرفين تسبحين ؟

عقد حاجبينه ثنيان:لو انا غرقت بتغرقين وراي ؟

ماردت عليه وهي ترجف وتحرك رجلينها بجهل بالبحر ومتمسكه بكتوفه العاريّه

ناظرها بذهول يستوعب انها رمت نفسها خلفه وهي تجهل النجاه

هز راسه بعدم تصديق يناظرها

ورفعت كفها تحاول تمسك اليخت وبعّدها ثنيان ولفت عليه:طلعني

هز راسه بالنفي:ناديتي اسمي سمعتك

ماردت عليه وهي ترجف من برودة الموج وخوفها من الموج والغرق اللي عاشته ثواني

وناظر أهداب عيونها المبلله ثنيان:ماعاد اسمي صعب تذكرينه وسهل تنسينه

كان بيفلت يدينها وتمسكت فيه برعب:لا تتركني

ابتسم لها وهز راسه:لا ، قولي لا تتركني ثنيان

استفزها بإبتسامته وكأنه يتحداها وسط الموج ودفعته عنها تحاول تتمسك باليخت وغطست وضحك يرفعها وشهقت تتمسك فيه من جديد

ضحك يشوف شعرها اللي على وجهها:ماهي صعبه قلتيها ثلاث مرات

ملاك فتحت عيونها بتعب:طلعني

هز راسه بالنفي ورفعت شعرها عن وجهها وناظرته بتعب يصعب عليها تقول اسمه من جديد لانها تثاقلت حروف اسمه من مشاعرها وهي تناديه لكنها تبي تحب اسمه وتبي تكرره وتتعمد يلتفت عشان تناديه وتنده له ، ماعاد صارت تقدر تقاوم كل شي يخصه كل شي فيه يجذبها تحبه وتبيه ، ماصار سهل تنساه وصعب تذكره صار داخل جوفها ما يفارقها بكل وقتها

همست وهي تناظر عيونه وإنتظاره لإسمه منها:ثنيان

لانت ملامحه ما توقع بيكون اسمه منها حلو ومختلف وكأنه لأول مره يعرف ان بداية اسمه ثاء ونهايته نون رقيق

كان منظر دهشته أمامها مدهش ، كانت تشوف وجهه من قريب ومنظر شعره المبلول ، رموش هدب عينه المبلول ، بؤبؤ بصَره اللي يلمع

كتوفه العريضه اللي متمسكه عليها بقوه ، كان ماسكها من خصرها لنفسه لجسمه وماسكته لانه النجاه لها من الغرق لكنها تغرق فيه هو وما منه نجاه ابد

بلعت ريقها تشوف نظراته لها وتحس بالتوتر لانها وسط موجه ما تلاقي لكبريائها طريق وكل ما بداخلها من لَهب مطفي ، وكأن الموج قادر وصار الموج يطفي اللهب

ناظرها متمسكه فيه وكأنها مو لاقيه نجاه وسط الموج الا فيه ولأول مره يشوف ملاك متمسكه فيه وكان منظرها وسط حضنه ، قريبه منه ، بين عالمه ، بحره وموجه وتلجأ له ! ' مُشهي لتقبيلها '

ابتسم ابتسامه خفيّه لانها مستحيل تبتعد مستحيل تصدّه مستحيل يتردد ولا يستغل اللحظه

لان تردده طال وصدودها كثر والفرصه الوحيده الان

ناظر ثغرها اللي يرجف واقترب منها يحس بذراعينها اللي تحتضنه وقبّلها

عقدت حاجبينها وغمضت عيونه بقوه من حست بثغره يلمس ثغرها واشتدت بروده فوق برودة الموج تحسه يقبلها ويشدّها اكثر له

كانت تغرق وسط الموجين وهي ما بيدها طوق نجاه من كلاهم

كان تقبيلها بمثابة المنفَى البعيد عن الكون وضجته ، ما يوجد شي أشهى مذاق من ثغرها وكأنها بدلّت الكون من ظلام لصباح ومن موج لغيم تحملهم الرياح

تحس انها تسبح داخله ماهو داخل الموج اللي تجهل قاعه ، ترتوي من الربيع الباسم اللي يقطع جفافها ، جَرى داخلها موج وكأنه سقاها من موجه وجرى نهر الهوى داخلها جريّة السيل وهي تحاول تنتقل من غَبّته لين ضفافه ، تجهل جميع اتجاهاتها وما تشوف الا هو شمالها وجنوبها وشرقها وغربها وكأنه تحكم ببوصلتها

كان دايم يظن ان البحر أعذب لين ماجرب يقبّل ثغرها على شروق الشمس وزُرقة السماء مع إحمرار شمسها وكأن اللهب التقى مع الموج جوّ وبحر

كان يرجع يخيّط تهشّم خفوقها وكانت تعلّمه الغرق الحقيقي

وسط الموج المالح كانت الأعذب لروحه ولثغره ولجوفه ، جرب يغرق في بحور بلا مواني ساعات لكن كانت الدقايق اللي قضاها يقبّلها أشدّ غرق عليه

كانت فَن غير إنها لَهب ودائماً يشوفها فَن بكل حالاتها وطريقة تشكلها قدامه بكذا حال حتى بملمس ثغرها بين ثغره ورجفتها يشوفه فَن

لأول مره تشع من داخلها لكن ما تشع لَهب تشع غرام ، لأول مره كل ما بداخلها يوافق ولا شي يردّها عنه حتى عقلها وقلبها يبيه

تتكاثر داخل معدتها جذوع الورد وتحس ان داخلها بستان من مشاعرها

رفعت كفها تلمس رقبته وشعره من الخلف وكأنه جاها معطف في عز الشتاء وكأنه جاها ورد في موسم حصاد ، وكأنه جاها صيف تحبه

يوم اقتربت منه كل هذا القرب وذاق رحيق ثغرها شمّ فيها أنعم الروائح ، كان جسمها ينبض بريحة الخزامى وزهر البرتقال ، رائحه عَذبه وكأن الزهر تناثر حوالينه ، ما يعرف هل هذا شعور او ان جسمها معطّر فطره

كانت الشمس تلمس اجسادهم اللامعه من الموج انعكست على جلودهم شمس وموج ، صبح وبحر ، صيف وغرام ، موج ولَهب

ابتعدت عنه تاخذ انفاسها من الغرق فيه وفتح عيونه من الحلم اللي كان مدفون فيه

ناظرها مغمضه عيونها ورمشها مبلول وفتحت عيونها بعد ثواني تحاول تستوعب كل اللي حصل كل اللي جَرى

بلعت ريقها ومدت ذراعها تتمسك بسلّم اليخت وتغادر حضنه وتطلع لليخت

وقفت على اليخت ترجف واخذت منشفته تغطي نفسها وطلع لها ومسك ذراعها يلفها له ومسك وجهها بيعيد الكرّه لكنها من ربكتها وخوفها وصوت نبضها العالي صفقته كف بيد راجفه وناظرها بصدمه وكأنه استفاق

ملاك بلعت ريقها بخوف وناظرته بحده وهي ترجف من البرد والموج اللي يغطي جسمها:بعّد

ابتسم من مشت تدخل وتقدم لها:رجعت لَهب يعني ؟

جلست وهي ترجف وضحك ثنيان:ما أرتويت

رفعت عيونها ملاك بربكه:خلاص

بلل شفايفه يرفع شعره عن جبينه ويهز راسه:بس اذا ودك تاخذين لون تان هذا وقت الشمس

ماردت عليه تصد وتقدم يناظر قستانها التفاحي المبلول:انزعيه تبللين المكان فيه

رفع عيونها للابتسامته:وتنتظرني انزعه قدام عيونك ؟

ثنيان ابتسم ورفع حاجبه:وش يمنع ؟

بلعت ريقها من نظراتها ووقفت:اطلع خلني ابدل

تقدم لها ثنيان ومسك شعرها المبلول:شكلك حلو بين الموج

رفعت كفها ومسكه بقوه وضحك:أعصابك !

ملاك ناظرته وهي تتنفس:اخرج

ابتسم يناظرها ونزل عيونه لعنقها اللي يزينه ورده ورجع يناظر ثغرها وابتسم بوسع مبسمه وهز راسه

وخرج يتركها وضحك يعض شفته وغمضت عيونها وهي ترجف من برودة الموج اللي غرقت فيه وتتذكر مشاعرها وقتها وملمس ثغره عليها ، هي ماكانت تعرف للاستسلام باب لكنه فتح اوسع ابوابه ثنيان واستسلمت

شدت على كفوفها بقوه ورفعت كفها على صدرها وغمضت عيونها

وقف جاسر السياره ولف لشادن اللي ناظرته:لا تضايقه

مارد عليها جاسر ونزل من السياره ونزلت معه شادن وتقدم يدخل السجن المركزي ويطلع هويته للعسكري:بشوف منصور بن محمد أخ زوجتي

هز راسه العسكري:استريح

جلس جاسر وظلت واقفه شادن بتوتر تناظر السجن

وتقدم العسكري وبيده الهويه:تفضلوا

وقف جاسر يدخل داخل غرف الزياره وجلس على الكرسي وهو ينتظر منصور

تكتفت شادن بتوتر تنتظر منصور وفتحوا باب السجن الحديدي وخرج منصور مكلبش وناظر جاسر اللي جالس وتقدم لهم

رفع عيونه جاسر لمنصور من اقترب ووقف منصور عنده يناظره ونطق جاسر بهدوء:سبب كل شي

لفت شادن على جاسر وسحب الكرسي منصور وجلس:ليه جيت ؟

جاسر:شادن كلمتني انك ماتبي تشوفها عشان تزوجتني وطلبتني اسدد باقي ديّتك ولا جاز لك الموضوع جيت اسمعه منك

هز راسه منصور:اي قلت ولا برجع بكلامي ، لا ملاك ولا شادن ابي منهم شي بعد اختيارهم ولا ابي احد يذلني بمنصبه وفلوسه عشان اطلع لحريتي

جاسر:يعني تدري بملاك ؟

سكت منصور يناظر جاسر وتقدم جاسر بهدوء:وتدري اني بركض وراها وبدخلّها مكان ما انت قاعد الحين ؟

منصور:ما يهمني

رفع حاجبه جاسر:ما يهمك ؟

منصور هز راسه:ما تعني لي ملاك ولا اي شي يخصها ولا ارتجي منها شي ، ارخصت نفسها وتلوثت وانا مابي حياتي زود تلوّث

جاسر:انت تلوّثت على قولتك بسببها وقتلت واحد مع ان القتل ماله أعذار يعني مجرم ، وهي سرقت ناس ونصبت عليهم عشان تطلعك يعني مجرمه ، مافي فرق بينكم

منصور:انا دافعت عنها ولو تشوفونه غلط انا ماني ندمان عليه لانه من رجولتي

جاسر:القتل ماهو رجوله لا تغيّر مصطلحات كبيره وتلمعّها

منصور مارد يناظر جاسر واخذ نفس ثواني جاسر:انا بسدد باقي الديّه مو عشانك ولا عشان اختك عشان ينحرق قلب ملاك بس

منصور:لا تدفع شي اللي بيدفع لي باقي أموري موجود

عقدت حاجبينها شادن ونطق جاسر:منهو ؟

منصور رجع ظهره لورا:ما يهمك ، اخر كلامي ملاك احترقت صفحتها بكتابي ولا ابي وحده رخيصه مثلها بحياتي ومثل ما باعتني وانا مسجون عشانها ببيعها وانا حرّ ، غير انها من قبل ماكانت تعجبك وعليها حركات

سكتت شادن وعقدت حاجبينها ورفع حاجبه جاسر:وشو الحركات ؟

منصور تقدم لجاسر وهمس:مستعمله

جمد وجه جاسر من كلام منصور واتهامه وطعنه بشرف ملاك

جاسر:يعني الحرب بتصير بينكم ؟

منصور رفع حاجبينه وهز راسه جاسر:لا تنسى اني جيتك وانت رديتني

منصور:يكفي تترك انتقامك على جنب وتطلق اختي

وقف جاسر وابتسم:حربك مع ملاك وحربي مع اختك

لف منصور يناظر شادن بحده اللي توترت ولف جاسر على شادن:اذا تبين تقعدين مع اخوك

منصور:مابي احد يقعد معي

شادن:منصور !

رفع عيونه منصور بحده ووقف يتركهم ولف جاسر على شادن:اخوك عليه تناقضات عجيبه يحارب اللي منه وفيه

شادن:قلت لك لا تروح له ليش تجي ؟

جاسر:من انتي تحكميني ؟

شادن:دام ما يبي منك شي منصور طلقني واتركني بحالي

ضحك جاسر:اسمع بالله تحسب اللي بيني وبينها منصور وبس ، نسيتي عهدنا ؟

تأففت شادن بتعب وناظرها جاسر:باقي اللي بيني وبينك ما انتهى

رفعت عيونها شادن وخرج جاسر ومشت خلفه

'

فتح جواله يشوف الساعه ولف ليامور:الفزعه ياذيبان

جلس منيف وناظره يامور وابتسم منيف:الحين اسمح لك تتسلط عليّ

فتح كفوفه:اقرب حلل فلوسي عليك

ابتعد يامور وعقد حاجبينه منيف:الحين صرت تخاف مني ؟ اقولك الفزعه امش

وقف منيف ليامور وهوّش له يامور وضحك منيف:اي اي ابيها هذي

فزّ منيف ليامور وهجم عليه يامور وغمض عيونه بألم منيف من خَمشه بخده كامل ومسك خده منيف وابتعد ولف للمرايه وجمد وجهه من شاف الدم من خده وابتسم:يسلم راسك يامور ابشر بأحلى تونه عشاء اليوم تستاهل

اخذ مناديل يمسح خده بألم واخذ جواله وخرج من البيت

ركب سيارته وشغل موقع المستشفى بجواله يمشي على الموقع لين وصل ووقف سيارته

وناظر خده بالمرايه اللي ينزف ورجع يحط مناديل ونزل

دخل وتقدم للطوارئ وهو يناظر المتدربين الموجودين

تقدم بيدخل وخرجت متدربه:ثواني لو سمحت

هز راسه وقف وهو يمسح خده بالمناديل ويناظر حوالينه ، لف يشوف العيال المتدربين اللي يتقهوون وواقفين وعقد حاجبينه بحده من سوالفهم مع المتدربات وصد من اشرت له وحده يدخل الغرفه

وجلس على السرير وتقدمت له:اشوف جرحك

منيف:وش تشوفينه ؟

المتدربه:انا متدربه بس لو جرحك يحتاج يشوفه دكتور اكيد بنادي دكتور يشوفه

منيف:لا ياخي مو انتي

المتدربه:نعم !

منيف اخذ نفس:في متدربه معكم ناديها هي تشوف جرحي

المتدربه:الكل مشغول خلني اشوف جرحك لو سمحت لا تعطل غيرك

منيف:لو سمحتي انتي اتركيني محد بيشوف جرحي

دخلت ميّ للمريض اللي بالغرفه ولفت من شافت منيف وانصدمت:انت أخو ملاك ؟

لف منيف وماعرفها:اي

ميّ:خلاص نسرين انا اشوفه

منيف:وانتي مين ؟

ميّ:انا صديقة أصايل اللي صكيت على سيارتك هذاك اليوم بحوش بيت أصايل

منيف:وأصايل وين ؟

ميّ:كانت بالبيت

منيف:الحين الحين وين أصايل ؟

ميّ:ماسكه قسم ثاني

منيف:قسم ايش ؟

ميّ:حروق

منيف:ابلش وش يحرقني الحين

ميّ لفت عليه:ما اسمع

منيف:ناديها بالله هي تعرف لي

ميّ:كيف تعرف لك ؟ انا بشوف جرحك واطهره لك

منيف:ياخي ليه محد فاهمني ما ابي

ميّ عقدت حاجبينها واخذ نفس منيف:اسمعي كلمي أصايل تجي تشوفني هي وهي تطهر جرحي

رفعت كتفها ميّ:بشوفها

خرجت ميّ من عنده ومشت للقسم الثاني ونادت أصايل:أصايل

لفت أصايل اللي ماسكه ذراع طفل وتقدمت ميّ:ابغاك تجين معي قسمي شوي

أصايل:مو فاضيه ميّ اذا عندك سؤال اسألي المشرف

ميّ:حياتي مابي تساعديني ابيك تشوفين اخو ملاك هو عندنا بالقسم

لفت بصدمه أصايل:منيف ؟

هزت راسها ميّ:خده مجروح ورفض احد يشوفه يقول أصايل تعرف لي

سكتت بصدمه أصايل وابتسمت ميّ:هذي بدايات المحبه والا في شي ما اعرفه ؟

أصايل بلعت ريقها:امسكي مكاني

تركت ميّ ومشت بتوتر لين دخلت القسم ووقفت تشوفه يناظر بالدم اللي بالمناديل وعاقد حاجبينه ورجع يحط المناديل على خده ورفع عيونه ولانت ملامحه من شافها

ارتبكت وتقدمت له وناظرها منيف تتقدم له وتخدر ولا كأن خَده مجروح ورمشت بتوتر وهمست:من ايش ؟

منيف ناظر ربكتها وحيَاها ونطق بهدوء:يامور

ناظرت عيونه ثواني أصايل:ما يحبك

منيف:ماهو طموحي ان يامور يحبني

بلعت ريقها ثواني تصد:طيب كان خليت ميّ تساعدك

منيف:ما رديتها بس هي قالت بنادي لك أصايل

ناظرته أصايل يكذب وبللت شفايفها بهدوء وسحبت من جانبها المطهر وتقدمت له:شيل المناديل

شال المناديل وعقدت حاجبينها تشوف جرحه ونزلت عيونها تمسح الجرح بشاش بالمطهر

ورفع عيونه منيف يناظرها من قريب ما يحس بشي غير بالغرام اللي يلمس صدره لها ومن إخت النهار الرقيقه العَذبه اللي أمامه تمسح جرحه ولا تدري انها دواه من كل شي داخله

رفعت اصابعها تمسك جبينه وتناظر جرحه بدقه وهمست:يمكن تحتاج خياطه

نزلت عيونها له وارتبكت من شافته يناظرها ونظراته اللي لطالما وترتها ولا تفهمها

رجعت لورا تبعد اصابعها عنه:بكلم الدكتور يشوفها

هز راسه بالنفي:طابت

سكتت وبلع ريقه منيف:اقصد ما يحتاج يعني بتطيب جرح سطحي

أصايل:لا لا مو سطحي بخلي الدكتور يشوفك

منيف لمس جرحه يتحسسه وتقدمت تبعد اصابعه:لا تلمسه

رفع عيونه عليها ونزلت اصابعها عن اصابعه:لا تعاند جرحك يحتاج خياطه

منيف:خياطه يعني أثر دايم وانا ما احب يبقى عليّ أثر

أصايل:مو مشكله يبقى أثر ، أثر يعني انت قوي

رفع عيونه عليها منيف:تهقين ؟

بلعت ريقها أصايل من طال كلامهم مع بعض لأول مره  ومن نظراته لها ومن جيّته اللي تدري انها لأجلها وعشانها لكن تجهل كل مشاعره وش سببها ؟

مشت تتركه واخذ نفس منيف يغمض عيونه ثواني

كان وده الحديث يطول بينهم وتسولف معه عن كل شي وتناديه وده تناديه وتطلبه وتآمر وتنهي عليه ، وده بكل مافيها ، وترجع تلمسه وتستحي منه وترتبك

تنهد بتعب ورفع عيونه:اهخ

دخل دكتور وخلفه أصايل وتقدم الدكتور:ارفع راسك اشوف

رفع راسه منيف وناظرته أصايل ثواني وهز راسه الدكتور:مش موضوع كبير بس هنخيطه

منيف:شدعوه !

ابتسمت ثواني من كشر واختلفت ملامحه مع الدكتور وعقد حاجبينه لان الدكتور يعوره

وخيطوه غرزتين بخده وبقى أثر الجرح على خده ولف الدكتور:بس طهريه وغطيه

هزت راسها أصايل وخرج الدكتوره وتقدمت أصايل تاخذ الشاش والتيب ورفعت راسه بأصابعها وهمست:يحتاج تغير جرحك كل يوم

نطق منيف وهو يناظرها:عندك ؟

ناظرت عيونه وهزت راسها بالنفي وهز راسه منيف همس:اجل ما يحتاج

ارتبكت اكثر ترمش وتصد بعيونها وتغطي جرحه وبلعت ريقها تبتعد عنه:ما تشوف شر

مشت بتروح ووقف:أخت النهار

لفت عليه وناظرها:والا ماتحبين احد يناديك كذا ؟

هزت راسها بالنفي وتقدم منيف:بغيت اقولك اخر شي

توترت من مقدمته وخافت من اللي خطر ببالها وناظر رجفتها منيف وعقد حاجبينه:شفيك ؟

أصايل:وش الموضوع ؟

لف منيف يناظر المتدربين:اذا احد ضايقك منهم

عقدت حاجبينها ولف منيف عليها:يعني احد رمى كلمه عليك

سكتت تنتظره يقولها علميني وعطيني علم لكنه فعلاً ماله حق يطلبها تعلمه وتنهد يغيّر نيّته:علمي اخوانك

هزت راسها له ولف منيف يناظر المتدربين ولف عليها يناظرها:ولو اني ما اخاف على كوتي جبتها عندي لكن يامور ما يحبها

أصايل رفعت كتفها:يمكن هي تحبه

سكت منيف يناظرها وبللت شفايفها أصايل تصد بنظراتها وهز راسه بدون يرد وخرج من عندها وابتسم

ابتسمت أصايل تمسك قلبها وتعض شفتها

غمضت عيونها تتذكره ولفت تشوفه يخرج ويختفي عن انظارها واتسع مبسمها

'

طلع من دوامه نهار وهو يكلم وركب سيارته:انا بكلم ثنيان اول ما يطلع من البحر واخليه يشوفه

شغل سيارته وهز راسه:والله ياطلال ماودي اجيك واتصرف ولا ادري ثنيان وملاك وش بيسوون

ضحك نهار:ننتظر الغريق عاد شنسوي ، ماقصرت ياحبيبي

قفل جواله وحرك سيارتع يشغل اغاني ولابس نظارته الشمسيه واخذ جواله اللي دق ورد وابتسم:ارحبي ام النهار وست النساء كلهم

ابتسمت نوره:عيّار

نهار رفع كفه يغني:كانوا يسموني

نوره:اسمع اسمع ابيك تمرّ لي مشوار مافضيت اشوفه

نهار:من عيوني كم عندنا ام النهار ؟

نوره:وحده وماتبي تنحرم من هالحسّ

نهار:عادي امي اعترفي اني افضل عيالك واحسن واحد عندك ترا ما بيزعلون اخواني

نوره ضحكت:يالله يالله بس شفت نفسك

نهار:آمريني

نوره:لي فستان بدار مصممه واستلامه اليوم لكني مافضيت ابيك تجيبه لي

نهار:طيب روحي بكره وشوفيه عندهم

نوره:بتسافر المصممه تقول ما بلاقيها

نهار اخذ نفس:اي اروح وينه ؟

نوره:برسل لك الحين الموقع اصبر

نهار قفل من امه ورفع الصوت يغني وشغل الموقع يمشي له ووقف عند الموقع ونزل نظارته يقرأ اللوحه

' دار أزياء غلا فهد ' ولوقو المحل ' فَهد '

ابتسم بإعجاب يناظر المكان ولبس نظارته ونزل من السياره بدلته عليه ونجمته فوق كتفه وفَرده بخصره

ودخل المكان وناظر البنات اللي بالمكان وابتسم ونزل نظارته وعقدت حاجبينها من وجوده ونطقت:تفضل اخوي ؟

عض شفته نهار:اخوك ؟ افا

تقدمت وناظرته:خير اقدر اخدمك بشي ؟

نهار ناظرها وابتسم كانت لابسه عبايه بيضاء وحجاب وبيدها متر وايباد:صاحبة المكان ؟

هزت راسها:تفضل

نهار:ابيك

رفعت حاجبها:نعم ؟

نهار:ابيك بخدمه

هزت راسها:تفضل

نهار ابتسم وحك جبينه:الوالده ام نهار لها غرض عندك وتبيه

عقدت حاجبينها:ام نهار مين ؟ ما اعرفها

نهار:ام ساري

هزت راسها:اها اي طيب ثواني

لفت للعامله:جيبي فستان مدام نوره

لفت عليه:يجيبونه لك السياره تقدر تتفضل

نهار:لا عاجبني المكان

سكتت تناظره وتجوّل بين الفساتين وناظرته ورفعت حاجبها:بس ما اتوقع تلاقي مقاسك هنا

ابتسم نهار ولف عليها:تهكم ! مقبوله منك

اخذت نفس تصبّر نفسها:عندي زباين هنا ويقيسون ملابسهم عندي فإذا سمحت لا تتجول بالمكان وتضايق زبايني

نهار:وانا زبون بعد

سكتت تناظره ولف عليها:دار غلا فهد ؟ انتي غلا ؟

ناظرت حركاته وغروره:لا فهد

ضحك نهار:تعضين ؟

مدت العامله الفستان وتقدمت غلا:تفضل لو سمحت

نهار اخذ الفستان وابتسم:اتفضل

مشى بيخرج ولف على غلا:بس حلو اللوقو

ماردت غلا وخرج نهار وصدت تتأفف:استغفر الله بس

ركب السياره يحط الفستان بالخلف ويحرك للبيت

دخل البيت وقفل الاغاني ونزل ومعه الفستان يناظر اسمها على قطعة القماش اللي تغطي الفستان وابتسم يدخل البيت

وناظر نوره اللي استقبلته:امي يا أغلى الحبايب

نوره اخذت الفستان:اي ما قصرت

لفت تنادي العامله وابتسم نهار:امي ابيها

تنهدت نوره بملل وناظرته:مو فاضيه نهار لسوالفك

نهار:افا ! والله موضوع مهم ابيك تخطبين لي

نوره:المره الثلاثين ؟

نهار ضحك ومشى خلف نوره اللي تجاهلته:طيب ما سألتيني عن ذوقي يمكن يعجبك

نوره:ما يعجبك الا الغالي اعرفك لكنك ما تعرف تقدّره

نهار:غلا فهد

لفت عليه وعقدت حاجبينها نوره وابتسم نهار:حلو الاسم صح ؟

نوره:وغلا من بعد ؟

نهار:افا ؟ بنت الفهد التايقر اللي على فستانك قبل شوي

نوره ناظرته بصدمه:المصممه ؟

نهار:بذاتها

نوره:انت ما توفر نهار ؟ ارسلك تجيب فستان تجيب لي عروس ؟

ضحك نهار:بس تناسبني احب اللي كذا احب اللي تكسر راسي وما تعطيني وجه

نوره:اي اتمنى انها كسرت راسك بس

نهار:هيّا امي اخطبيها متى نحدد ؟

نوره:انت مهبول نهار فيك شي ؟ اعرفها انا اعرف اهلها اعرف انها متزوجه والا لا ؟

نهار:ماعليك اجيب علومها انا

نوره:اقول نهار لا تضايق البنت وتحرجني معها اول مره اتعامل معها ولا شفتها للحين اصلاً تعاملت معهم بجوالي ، مابي اخسر المصممات بسبب طيشك

نهار:بالله ما شفتيها ؟

مسك قلبه:اهخ يا امي تعالي اوديك لها شوفيها

نوره:نهار اعقل !

نهار:طيب قلبيها براسك يمكن تجوز لك الفكره

نوره:قلب انت براسك لان لو خطبت ماراح تلاقي غيرها وتقول ابي بعد،  ماهو منيو

ضحك نهار من ذبتها وباس راسها:خفيفة دم ام نهار

نوره:وخر بس

مشت تاركته ومشى نهار لغرفته وابتسم يطلع من جيبه كرت سحبه غفله من دون ما تنتبه غلا ، كان كرت اسم الدار واللوقو والتواصل الاجتماعي لدارها

فتح جواله يحط حساباتها بجواله ويناظر الفساتين والعبايات اللي تصممها

'

صحت وعقدت حاجبينها تسمع صوت الموج وفتحت عيونها تشوف مكانها وجلست تتلفت حوالينها كان الموج الأزرق حوالينها وهي باليخت

عقدت حاجبينها تناظر فستانها الاصفر وتذكرت انها غيرت ملابسها وغفت بدون تحس

لفت على اليخت ووقفت تمشي ودخلت عليه وناظرها وابتسم:ألوان الصيف هذي احبها

ملاك:ليش جالس هنا ؟

ثنيان :تخبيت عشان تناديني

رمشت بإستيعاب:نايمه من الليل ؟

ضحك ثنيان لانها ترفض تصدق ووقف:لا نايمه من الصبح ، الليل ما نمناه

صدت عنه من ضحكته وخرجت وخرج خلفها

لفت بتوتر:طيب بنرجع

ثنيان:بغيتك تشوفين البحر بالشمس يمكن تحبينه

وقف جنبها وناظرت البحر ولفت عليه:اي حلو

ثنيان ناظرها تتجاهله وابتسم:ليه تكابرين غصب ؟

اخذت نفس:ممكن نرجع ؟

ثنيان هز راسه ولف للبحر:الراس يابس

مشى يتركها وناظرته وجلست وهي تناظر البحر وزُرقته وجماله بالشمس وانعكاس الشمس عليه وصفاء السماء وريحة البحر ، منظر يخليها تاخذ نفس طويل براحه

شغل اليخت ثنيان يرجع للمرسَى ودخلت ملاك تاخذ فستانها المبلول بيدها وتلبس عبايتها ووقف ثنيان بالمَرسى ودخل ياخذ شنطته ويخرج معها

مشت للسياره وهي ماسكه فستانها وابتسم ثنيان يمشي خلفها:كان طولنا

تجاهلته تركب وضحك ثنيان يهز راسه بتعب منها وركب جنبها وصدت تناظر الطريق وشغل سيارته يكتم ضحكته منها وحرك سيارته

وهو حاط يده على الشباك ولف يناظرها صاده ومتكتفه ودخل البيت ووقف

ونزل ملاك ونزل معها ودخلوا ومالقت احد بالصاله ولفت عليه:محد موجود

مشت للغرفه ودخل معها وحطت فستانها بالارض وابتسم ثنيان يحط شنطته:هذا الفستان ابيه لا تحذفينه

ملاك:بتلبسه ؟ حلالك

ضحك ثنيان لانها صاده عنه ومشى لها:ملاك

بلعت ريقها من نبرة صوته وتمسكت بباب الدولاب تناظر ملابسها ووقف خلفها ثنيان

وناظر شعرها ومد كفينه يجمعه من عنقها لظهرها وغمضت عيونها ملاك بربكه وتقدم ثنيان اكثر لها وناظر عنقها:خضار عروقك الشفافه تبي من يسقيها عطر وتنبت ورد

لفت عليه وناظرت عيونه:لا

ابتسم بدون يبين اسنانه وناظر عيونها:حافظك حفظي لعيني ، اعرفك تبين وتردين بلا ، تشحين بالماء وقلت لك انا قلبي على الماء وقلب الماء على شطك

نزلت عيونها تتنفس بسرعه من مشاعرها تجاهه والحواجز اللي بينهم ورفعت عيونها له:بيني وبينك حاجز

سكت ثنيان يناظرها وبللت شفايفها تغمض عيونها ثواني ورجعت ناظرت عيونه:ماقدرت امنعه

ناظر عيونها وموج عينها وبلعت ريقها:وما اقدر ، حتى لو تشوف كل شي فيني يبيك ، ما اقدر

لانت ملامح ثنيان وناظرته ملاك ومشت من جانبه واخذ نفس ثنيان يغمض عيونه ثواني ولف قبل تدخل الحمام:وانا ما اقدر

لفت عليه ملاك ورفع كتوفه ثنيان يناظرها:ما اقدر ابادر زود واحاولك اكثر ، ان كان بيصير بيني وبينك شي فبيصير اذا انتي بادرتي

هز راسه بالنفي ثنيان:انا اكتفيت

مشى يتركها ويخرج من الغرفه وتنهدت بتعب وجلست على السرير وضمت كفوفها ببعض بحيره وتعب من حالهم وحالها

زاد في داخلها ثنيان واندثر وتكاثر وبان على كل روحها وكأنه يسري بين عروقها الشفافه على قوله

عطاها عطاها وما اخذ منها شي غير الصدّ وبس ، لكنها ماتقدر تبادر بشي ممكن ينهار بلحظه ويختفي كل الحنان والودّ وتنطرد من كل حياته وحياة اهله

لفت تناظر مفتاح سيارتها ثواني ووقفت ولبست عبايتها وتحجبت واخذت مفتاحها وشنطتها وخرجت من البيت

مشت من الصاله تشوفه جالس مع نهار ورفع عيونه يناظرها تتخطاهم وتخرج

ولف يشوفها مع زجاج الصاله تشغل سيارتها وتخرج

ناظرت طريقها وهي ساهيه وعقدت حاجبينها من دخلت بزحمه وتأففت من اصوات الزحمه ولفت تناظر السوق اللي جنبها وفهمت سبب الزحمه

وقفت واخذت نفس ولفت تناظر السوق ونزلت ، تمشت فيه تناظر المحلات وتقدمت لمحل ودخلته تناظر حوالينها ، لمست العطور تشمها بهدوء وغمضت عيونها من جمال ريحة العطر

ولفت للي واقف عندها:لو سمحت مكونات العطر ؟

تقدم يشوف العطر:زهرة السوسن خشب الصندل باتشولي عنبر كشمير وبرتقال وعسل

ابتسمت من المكونات الكثيره وهزت راسها:مناسب

اخذ تست تجربه وشمته ونطق:العطر كان مقطوع وتوفر الان بكميات قليله بعضها بطلب مسبق وبيرجع ينقطع للأبد ، صعب تلقينه بعدين ، محظوظه لحقتي آخر عبوه منه

ملاك:محظوظه محظوظه ، صعب تلقاه بعدين

ابتسمت من مفهومها اللي تشكل بعقلها عن العطر وعن ثنيان اللي كثير عندها بكثرة مكونات العطر وصعب تلقاه بعدين ، صعب ومحظوظه فيه

لفت عليه:ابغاه

ابتسم:اختيار مميز العطر ينفع شتاء وصيف وما ينمل من ريحته ابداً

هزت راسها ومشت معاه وناظرت العطر وسعره الكبير مقارنة بحجمه وطلعت بطاقتها تحاسب

ونطق:حابه نغلفه هديه ؟

سكتت تفكر ثواني وهزت راسها

وحطه بالكيس ومدّه لها واخذته تخرج من السوق

ركبت السياره وناظرت العطر جنبها هي لأول مره تشتري هديه لشخص من زمن طويل ومن آخر مره أهدا عمها هديه وخذلها

حركت سيارتها ترجع للبيت ونزلت من السياره وناظرت أصايل اللي داخله البيت وابتسمت:خلصتي دوامك ؟

أصايل ابتسمت لها:حمدلله

ناظرت الكيس ورفعت عيونها:تتسوقين بدون ما تعلميني ؟

ملاك ابتسمت:مو لي

رفعت حاجبها أصايل وضحكت ودخلوا سوا ودخلت أصايل الصاله وطلعت فوق ملاك

رفع عيونه نهار:دلوعتي اشتقت لك والله القعده مع ثنيان تسدّ النفس

لف عليه ثنيان:خل أصايل اجل تنفعك

نهار ضحك وجلست أصايل:وين الناس ؟

نهار:امي معزومه وجاسر وشادن ماهم بالبيت وساري بدوامه وجنى عند اهلها وابوي مشغول ، بقي احد ؟

أصايل:اوف شكل الوضع اليوم غداء لوحدنا

نهار لف لثنيان:وش الوضع ؟

ثنيان:معكم تبون من برا ؟

أصايل بققت عيونها بحماس:تكفون

نهار:تم من يطلب ؟

أصايل:انا وبحسب حساب ملاك معانا

لف ثنيان عليها:جات ؟

أصايل:اي ماشفتنا ؟

لف يناظر الحوش وشاف سيارتها ورجع ناظر أصايل ووقف

نهار:كلم ملاك بالموضوع

هز راسه ثنيان ومشى للغرفه ودخل الغرفه وناظرها واقفه عند المرايه لابسه فستان ضيق على جسدها

وانقطع نفسه من جمالها بكل مره يروح ويرجع لها وكأنه ينبهر من جديد

لفت عليه ملاك ونطقت بهدوء:كنت بجي اناديك

ثنيان سكت ثواني وتقدم:ليه ؟

ملاك تقدمت له ورفعت عيونها له:شي لازم يصير

سكت ثنيان يناظرها ولفت ملاك واخذت الكيس من الارض ومدته له وناظره ورجع ناظرها ينتظر منها اجابه

ملاك:ماني شخص جحود وماني شخص متطلب وأقدّر اللي تعطيني وتحاوله لأجلي وكبير بعيني

ناظر عيونها ورمشت بهدوء ملاك تناظره:وان شاء الله تفهمني زي ما تفهمني دايم

نزل عيونه للكيس ورجع ناظرها:بس مو هذا اللي ابيه

ملاك:أدري بس اقبلها مني

اخذ نفس واخذه من يدها ومشى للسرير وجلس ومشت تاخذ عبايتها:بروح لمنيف

رفع عيونه عليها ومشت تتركه بالغرفه ولف يناظرها تخرج والتفت للكيس

طلع البوكس يفتحه وناظر الكرت يقراه:أبي ابقى الحبيب اللي تخبره صادق وما زال واخاف تجرحك بعض الحقايق لو أبينها ، ثقيل الحلم وأحلامي بعيده والدروب طوال وأنا ما ودي أحكي لك الين أحلامي أضمنها ، إذا بنحكي عن الواقع كثير أشياء ما تنقال وإذا بنسكت كثير أشياء صعبه ينحكي عنها

غمض عيونه بتعب وتنهد ياخذ العطر بحضنه وغمض عيونه بوجع:اهخ ملاك

فتحه يشمه ويتعطر منه وناظره ثواني ، جاهدها وحاولها وللحين تقول له ان بينهم حاجز يجهله

فتح عيونه يمسك صدره بوجع بقهر من الطريق اللي يمشونه سوا بلا وجهه

وخرج من الغرفه ومشى للصاله

أصايل:شوي ويوصل الاكل تعال

مارد عليها ورجع للغرفه وقفل الباب خلفه ومشى لأدراجه ودور بين أوراقه لين لقاها ، الصوره

رفع الصوره يناظر وجه اللي قدامه واخذها بجيبه وخرج من البيت

'

المغرب - ٧:٠٠ م

حاضنه كوبها وتناظر القطو بحضن منيف:وليش جبت قطو ؟

منيف:بدون سبب

ملاك ناظرته صاد:عشان أصايل

رفع عيونه منيف لملاك وناظرت جرحه ملاك:وجرحك منه ؟

هز راسه منيف وجات بتسأله دق جوالها اخذته تشوف اسم عقاب وعقدت حاجبينها تناظر اسمه ثواني

تخاف ، تخاف ان كل شي وصل لعقاب او ان اللي خلف الحديد خرج معه الحقيقه

بلعت ريقها ترد بهدوء:هلا

عقاب:بنتي ملاك

غمضت عيونها من سمعت صوته وابتسم عقاب:رجعت البيت مالقيتك بغيتك بخدمه

ملاك:سمّ

عقاب:والله قبل شوي دخلت البيت ياملاك لكن مالي راحه بالدنيا ، في عامل على كفالتي صارت له مشكله تهريب وما تهريب وبروح اشوف الامور بالشرطه

جلست بإعتدال ملاك:اوكيه بجيك انا

عقاب:طيب بغيت اخذ نهار لكني لقيته نايم

ملاك:ما يحتاج خلاص انا بجيك هناك على طول

عقاب:ماتقصرين

قفلت منه وناظرها منيف:وش صاير ؟

ملاك:مشكله بحلها وارجع

وقف منيف:ترجعين هنا ؟

لفت عليه ملاك وهزت راسها ثواني ومشت لغرفتها

لبست عبايتها واخذت شنطتها وجوالها وخرجت

ركبت سيارتها تحرك ووقفت عند مركز الشرطه تشوف سيارة عقاب ونزلت ومشت من نزل من السياره

تقدمت له:ندخل ؟

عقاب هز راسه بتعب وناظرته ملاك:اذا تعبان انا اشوف الامور واجيك هنا

عقاب شد على كتفها:لا لا تعالي

مشى معها ودخلت ملاك معه وتقدمت تتكلم مع العسكري ووقف عقاب ثواني

ملاك:معاي اقامته وكفيله بس احتاج اشوف الضابط

العسكري:انتظروا هنا

هزت راسها ملاك ولفت تناظر مكان عقاب وجمد وجهها تشوفه بيطيح وركضت له بخوف من شافته طاح بالأرض وركض العسكري لعقاب

طاح شماغه وعقاله جنبه مايتحرك منه شي

جلست عنده ورجفت وتقدمت له ولف العسكري:اطلب لنا سيارة اسعاف

مسكت كفه ملاك برعب ورجفت بخوف انه ينعاد لها نفس اللي عاشته ، الفقد

تذكر كلامه قبل دقايق معها:مالي راحه بالدنيا

بكت بخوف تشده وتهزه:تكفى لا تروح تكفى

زاد بكاها بخوف تحركه بقوه:تكفى

صرخت تحاول فيه يقوم وتجمعوا العسكر يناظرونهم وبكت تصرخ بخوف تتمسك بثوبه وترجو كل الرجوى انه ما يخرج من حياتها ميّت ، تفقده وتعيش فقده

تذكرت كل حنانه معها كل كلامه عنها وكل اهتمامه واحتوائه لها

تشوف نور الاسعاف اللي يعكس عليه والمسعفين اللي يشيلونه وتمسكت بشماغه وعقاله وهي تبكي وركبت سيارتها وشماغه بحضنها وحركت سيارتها خلفه وهي تمسح دموعها بعشوائه وتهمس بخوف:تكفى لا تخليني تكفى لا تروح ، تكفى

نزلت اول ما وصلوا للمستشفى وشدت على عقاله وشماغه بيدها وركضت معهم لداخل وهي تبكي ومسكت كفه بقوه بخوف وكأنها تتمسك بآخر آمانها

فلتوا يدها يدخلونه ووقفت محلها وطاحت على الارض تبكي وهي تشد على عقاله

ووقفت تمسك جبينها وتحاول تهدأ وتهدأ رجفتها واخذت جوالها وهي تناظر المستشفى

-

ثنيان ناظر طلال اللي واقف قدامه:ومارضي يعترف يقول انه يشتغل عند واحد وهو قاله يسوي كذا مع ملاك وهو ما يعرف شي اكثر

ثنيان عقد حاجبينه:وشو بتوقف القصه لهنا ؟

طلال:لا اكيد بنضغط عليه لين يتكلم وبنشوف جواله واتصالاته وحساباته بالبنك

ثنيان هز راسه:طيب بغيت اعطيك صوره ابي اعرف صاحبها

دخل يده بجيبه ثنيان يطلع الصوره وعض شفته من دق جواله:دقايق طلال

اخذ جواله وابتعد من قرأ اسمها وعقد حاجبينه يرد:ملاك

بكت وهي تتنفس بسرعه:ثنيان أبوك

جمد وجهه بصدمه:وشفيه ؟

ملاك لفت تأشر وهي ترجف وتبكي:أبوك طاح أبوك قدام عيوني طاح

ثنيان نشف الدم بعروقه وركض لسيارته:وينك ؟ وينه وينكم ؟

ملاك:بالمستشفى ، تكفى ثنيان

ثنيان:طيب جاي جاي

قفل منها وجلست بالارض تبكي متمسكه بعقاله وشماغه

وناظر طريقه ثنيان وهو مسرع واخذ جواله ودق وصرخ:رد يانهار رد

مارد عليه ودور رقم جاسر واتصل ورد جاسر:هلا

ثنيان:وينك ؟

جاسر عقد حاجبينه وناظر اهله اللي يتعشون:بالبيت ، شفيك ؟

ثنيان:ابوي طاح وملاك تقول انه بالمستشفى

جمد وجه جاسر:ايش ؟

لفوا عليه ونطقت نوره:وشفيك ؟

جاسر:اي مستشفى طيب ؟ بجيك

لف ساري بخوف ونطق:وش السالفه ؟

وقف جاسر برعب:ابوي بالمستشفى

جمد وجه أصايل بخوف وشهقت جنى ووقفت نوره:وشفيه ؟

جاسر:مدري مدري مدري

ركض يخرج وناظرتهم شادن بصدمه ولفت نوره:انتظر انتظر بجي معكم

'

دخل المستشفى ما يدري كيف عدّا الطريق كله وما يدري كيف للحين واقف على رجلينه من خوفه ودخل يركض يدور عليها بعيونه

ومشى لين شافها بالارض تبكي وعقال ابوه وشماغه بيدها وجمد محله بصدمه وخوف

ورفع عيونه يقرأ لوحة الطوارئ وتقدم لها وهمس:ملاك

رفعت عيونها وبكت بخوف ووقفت على رجلينها وحضنته وهي ترجف ورفعت صوتها تبكي

وزاد رعبه من بكاها وحضنها:تكفين قولي مافيه شي

ملاك بكت وهي بحضنه:ما ادري ما ادري ثنيان طاح ، طاح قدام عيوني ماقدرت اسوي شي ماقدرت اسوي شي

ابتعدت عنه وهي تجهش واشرت على مكانه:طاح مافيه شي

مسك كفوفها وهز راسه:اهدي طيب ابي اسمعك علميني وين كنتوا وش صار ؟

ملاك اخذت نفس وناظرته:كنت معاه بالشرطه كنا بنسوي اجراء وكان تعبان باين عليه

رجعت تبكي بخوف تشد على كفه:بعدها طاح بالارض

لف ثنيان وعقد حاجبينه بخوف وناظرته ملاك:ماراح يصير له شي ماراح يروح مكان

لف ثنيان عليها وهز راسه:ان شاء الله ان شاء الله

تقدم يدور احد يكلمه وحاول يدخل وخرجت الممرضه:ممنوع لو سمحت انتظر برا

ثنيان:ابي اتكلم مع الدكتور اي احد ، ابوي داخل ابي اعرف وش فيه

الممرضه:ممنوع تدخل انتظر لين يطلع لك الدكتور

ضرب الباب ثنيان بغضب:اقولك ابوي داخل ما تفهمين ؟ الحين تعلموني وشفيه ابوي الحين

الممرضه:لو سمحت خفض صوتك واستريح لا تسبب مشاكل

لف ثنيان من نادته نوره وناظرهم جايين كلهم

ولفت ملاك تشوفه ونزلت عيونها لشماغ عقاب تبكي بخوف ، خوف انها تعيش شي معهم يخافونه كلهم

لف ثنيان وناظر نهار:تصرف هدّ المكان عليهم خلهم يعلمونا وشفيه ابوي ؟

نهار ناظره بخوف:وينه ؟

ثنيان:داخل

نوره مسكته:قولي وشفيه ابوك وش صار له ؟

ثنيان هز راسه بضياع وبكت أصايل تتمسك بذراع جاسر اللي واقف معهم

ساري:بيقوم بيقوم يمكن تعب بسيط ان شاء الله خير

جاسر:احد يشوف لنا دكتور والا اي زفت يعلمنا عن حالة ابوي

نهار:بشوف الوضع انا واجي

مشى مبتعد عنهم ومسك جبينه ثنيان وغمض عيونه بخوف

'

دخل منيف بصدمه من عرف بالخبر ومشى يناطرهم جالسين وتقدم لهم:وش صار ؟

ناظرته ملاك وبكت ولف عليها من سمع صوت بكاها وتقدم لها وحضنته ملاك بخوف

كان يدري انها ترعبها المستشفيات ولحظات الفقدان الاخيره ، لانه كان واقف بنفس المكان معها قبل سنين ينتظرون ذرة أمل بإن امه وابوه سلموا من الحادث لكنهم خرجوا بالخيبه

بكت ملاك وهي ماسكه عقاله وشماغه ومتعلقه بمنيف

وتنهد منيف ولف لنهار:وش صار ؟

نهار تكلم بضيق:للحين ماخرجوه من الطوارئ

عقد حاجبينه منيف بخوف ولف يناظرهم كلاً بحاله وخوفه وابتعد عن ملاك:ما بيصير شي ان شاء الله بيقوم بالسلامه اهدي ملاك تكفين

ملاك هزت راسها بالنفي:ما اقدر وانت تعرف

سكت منيف ولف عليهم وبلع ريقه يناظر أصايل اللي ماسكه ذراع جاسر وجالسه جنبه وباين عليها تبكي لكن بهدوء وخوف

صد وجلس وجلست جنبه ملاك ترجف يدينها تناظر عقال وشماغ عقاب

انهد حيلهم من الانتظار وأصبح الصبح وهم بنفس مكانهم ما يعرفون شي عن وضعه وحاله

ولفت ملاك من سمعت صوت اللي جاي من بعيد:بالسلامه ان شاء الله بالسلامه

لفوا عليه يشوفونه محمد جاي ومعه شادن وتنهد ثنيان يصد

ووقفت شادن وناظرتهم:وش صار ؟

محد رد عليها وناظرهم محمد:بيقوم بيقوم هذا العميد عقاب

جاسر ناظره:تكفى ريحنا محد ناقص يسمع شي

هز راسه محمد ووقف معهم ورفعت عيونها شادن على ملاك اللي منهاره محلها تراقبها

صدت ملاك للطوارئ وناظرت منيف اللي تقدم ومعه مويه وجلس بجانب ملاك:اشربي

ملاك:مو قادره

تنهد منيف ولف يناظر أصايل وصد ما يقدر يسوي شي أكثر من جلوسه وسطهم

انفتح الباب وفزّوا وخرج دكتور وماقدرت توقف على حيلها ملاك تناظره بترقب

نشف دمها وجمدت رجلينها تناظره وتترقبه

الدكتور:والدكم الحمدلله بخير لكن احتجنا نسوي فحوصات على قلبه وجميع وضعه واكتشفنا انه عنده اشتباه ورم على كليته اليسار ممكن تكون أثرت على صحته

ضربت صدرها نوره بخوف وجمد وجه ثنيان يهمس:كيف يعني ؟

بكت أصايل:أبوي

لف نهار لها وحضنها وناظره جاسر:وش يعني طيب ؟

الدكتور:احتاج اتكلم مع الكبير واشرح له

ساري:طيب انا اجي معك

مسكه ثنيان:انتظر اشرح لنا كلنا ابوي وشفيه ؟

الدكتور اخذ نفس:ابوكم بخير ان شاء الله بس كليته متأثره بورم كبير ونحتاج نستشير استشاري أورام وهو يتكلم معكم بس أبوكم بخير حالياً وتحت الملاحظه الى ان يستعيد وعيه

مسك راسه جاسر وصد عنهم ومشى الدكتور ومشى معه ساري يتكلم معه

ناظر الطوارئ ثنيان بصدمه وتقدم يحط جبينه على الباب

ولف منيف لملاك اللي تناظره ومسكت راسها تغمض عيونها بتعب

ناظرهم محمد ولف لشادن اللي واقف واشر لها وهزت راسها بالنفي

بلعت ريقها ملاك ورفعت عيونها تشوف ثنيان حاط راسه على الباب ومغمض عيونه وتسمع بكاء نوره اللي حاضنها جاسر

وقفت تمشي وعقال عقاب بيدها لين وصلت لثنيان وبكت بدون صوت تمسك ذراعه

ولف عليها ثنيان وتنهد بتعب ورفعت ذراعينها تحضنه وحضنها يعقد حاجبينه بتعب

رجفت وهي تطمنه وهمست:بيقوم بالسلامه اعرفه

مارد عليها ثنيان وهو حاضنها ورفعت عيونها شادن تناظرهم وصدت لابوها اللي يناظرهم

شد نهار على كفوف أصايل:ما بيصير شي بيقوم بالسلامه ان شاء الله

أصايل هزت راسها بالنفي:بشوفه تكفى نهار بشوفه

نهار هز راسه:بنشوفه كلنا بس اهدي انتي

رفعت عيونها ملاك تبتعد عن ثنيان من مشى ساري لهم ولف ثنيان عليه:وش قال ؟

ساري:كلمت الاستشاري وقال بيجي يشوف وضعه وبيسوي له اشعه وتحاليل بعدها يقولنا

جاسر وقف بعصبيه:احنا بننتظرهم يعني ؟

ساري:جاسر ترا لازم ننتظر اصبر يا اخي خلنا نطمن عليه

نوره:كلموه طيب خل يجي يشوف عقاب ويطمنا خلاص ما بقدر اوقف على رجليني زود

مشى ساري يمسك كفوف امه ويهديها وصد ثنيان عنهم ينتظر

وناظرت حالهم ملاك وتنفست بصعوبه وهي ترجف وصدت عنهم تمشي وبيدها شماغه وعقاله وناظرها منيف ومشى خلفها

مشت ماتدري لوين تبي تبتعد عنهم وبس ولحقها منيف يركض:ملاك

وقفت تحط ظهرها على الجدار ووقف قدامها منيف وناظرته ملاك ترمش بثقل وهي تناظره:بيموت وانا ما اعطيته حقه مني

سكت منيف ونزلت دموع ملاك بجمود وهمست:بيموت وهو اخر شي ناداني بنتي

تنهد منيف ومسك كتوفها وبكت ملاك ومسكت رقبتها بإختناق:بيموت بيموت

منيف:اهدي ملاك ما بيصير له شي الحين يطلعونه ونشوفه ونشوف وضعه

ملاك لفت عليه ورفعت صوتها وهي تبكي:ماكله الورم ماكل جسمه

منيف:اذكري الله ملاك وش هالكلام ؟ بيبدون معه علاج وان شاء الله يتخلصون منه

ملاك مسكت راسه بتعب وشدّ على كتوفها منيف بقوه:مابيصير له شي بس اهدي انتي لا يشوفونك كذا

ملاك ناظرته وهي تبكي وهزت راسها بالنفي:كيف قدرت اسوي فيهم كذا ؟ كيف قدرت منيف ، هذولا أهلي أهلي

سكت منيف وبكت بتعب ملاك وحضنها منيف وشدت عليه وهي تبكي

دخلوا الغرفه وبكت أصايل من شافتهم:أبوي

مسكت كفه تناظره نايم وتقدمت نوره وهي تبكي بدون صوت وجلست عنده

وتنهد ساري يناظره وبلل شفايفه ثنيان يحاول يتماسك وهو يناظر ابوه

لف نهار وحط راسه على الجدار بتعب وشد على كتوفه جاسر بقوه يقويه

وناظرهم ساري:بيشوفه الاستشاري وتحاليله واشعته ويكلمنا بس لا تضغطون على ابوي لو قام

أصايل بكت بدون ترد عليهم ونطق جاسر:أصايل !

أصايل ناظرتهم:ما اقدر

جلس ثنيان وهز رجله بتوتر وهمس:وش بيصير يعني ؟ يظل طايح بالسرير ابوي ؟

ساري:لا لا ان شاء الله بنشوف وضعه لا تيأس

ثنيان رفع عيونه:يأس ؟

اشر على ابوه بالسرير وهو يناظر ساري وتأفف ساري من الضغط

وصد جاسر يتكي على الجدار ويناظر ابوه

دخلت ملاك مع منيف وناظرت عقاب على السرير ورمشت بهدوء تناظره نايم

منيف ناظر نهار اللي متكي على الجدار مغمض عيونه ومسك ذراعه يشدّ عليه

ولف نهار عليه وحضن منيف وتنهد منيف يحضنه:أجر وعافيه ان شاء الله بيقوم بالسلامه

بلعت ريقها ملاك تسمع بكاء أصايل وناظرت الشماغ والعقال بيدها

تضايق من وضعهم ووضع ابوه ووقف يخرج من عندهم ولفت ملاك تناظره ومشت خلفه

جلس على الكراسي ومسك راسه ينزله بين كفوفه وتقدمت له ملاك وجلست جنبه

وغمض عيونه ثنيان واخذ نفس ولف عليها:مابي يصير له شي

ماردت وهي تناظره ورجع ظهره بضيق ثنيان:ماعيّشته للحين الأيام اللي يبيها مني

عض شفته من تذكر علاقته مع أبوه ولف لملاك:مابيه يروح ملاك

مدت ذراعها تحاوطه ذراعه وتقرب منه وحطت راسها على كتفه تحضن ذراعه وتنهد ثنيان يحط راسه على راسها

ونطقت ملاك:بيقوم بالسلامه ان شاء الله وبيعيش ويشوف الايام اللي تبيه يشوفها

غمض عيونه ثنيان ومسكت كفه ملاك بقوه تشد عليها

ورفعت راسها من نطق محمد:الله الله

لف ثنيان على محمد اللي مبتسم يناظرهم وناظرته ملاك

محمد:الله يخليكم لبعض ونعم الزوجه هاه ياملاك

نطقت ملاك بتعب:مو ناقصتك

محمد:لا العفو منك مانبي نقطع عليك لحظاتك مع عائلتك وزوجك وخوفك على أبو زوجك

ناظرهم ثنيان ورفعت عيونها ملاك بغضب ونطق محمد:هذا وفائك اللي تتكلمين عنه يابنت اخوي ؟

وقفت ملاك بعصبيه ورفعت صوتها:انت ما بتتركني بحالي ؟ انت ماتبي تفكني من شرك ؟ مصرّ أكرهك واحاربك ؟

محمد ناظرها بحده:انا احاربك انا ؟ انتي اللي تبين تحاربيني وتحاربين الرجال اللي قسم لقمته معك

سكتت من فهمت انه يقصد منصور وهز راسه محمد ورفع حاجبينه:والا المستور للحين مستور ؟

تقدمت ملاك له:الحين تذلف الحين من قدام عيوني تذلف والا والله لأنسى ان فيها عمّ

ناظرته بذهول:انت تشوف الوضع ؟ انت تحسّ ؟ جاي تبي تحاسبني بوضع كذا ؟

لف محمد لثنيان اللي يناظرهم وهو جالس ورجع ناظر ملاك:والله العتب ماهو عليك العتب عليهم اللي للحين حاطين لك وجود بينهم

ماردت ملاك وهي تناظره ولف محمد لثنيان:اذا ودك تعرفها فجوابها عندي

ملاك ناظرته بحده ومشى محمد تاركهم وتنهد ثنيان يرجع يمسك راسه بتعب

ولفت ملاك من تقدم ساري ومعه الاستشاري وهمست:ثنيان

رفع عيونه عليها ولف من شاف ساري ووقف وناظرهم

الاستشاري:شفت وضع الوالد وتكلمت مع اخوك وجيت عشان ابلغكم

ثنيان:وش وضعه ؟

الاستشاري:وضعه الحين مستقر لكن في ورم حجمه متوسط في كليته اليسار

غمض عيونه ثنيان بتعب وكمل الاستشاري:ومضطرين اننا نبلغ الوالد عشان هو يختار الأنسب له ، إما انه يبدأ علاج كيماوي او اننا نستأصل كليته لان صعب نستأصل الورم بدون ضرر للكليه

ثنيان:لازم يعرف ابوي ؟

الاستشاري:لازم وضروري يعرف وهو يقرر بنفسه

ثنيان ناظر ساري وتنهد ساري

ناظرتهم ملاك ولف الاستشاري عليهم:انا بمرّ عليه بعد الافاقه بإذن الله

مشى تاركهم ودخلت ملاك تناظر عقاب اللي نايم وأصايل ماسكه يده وتبكي

ودخلوا ثنيان وساري ولفت نوره:وش قالوا لكم ؟

ساري تنهد:يقولون ان ابوي متضرره كليته اليسار ويحتاج انه يختار إما يبدأ علاج كيـ ..

سكت بصعوبه يكمل وغمض عيونه ثنيان وناظره نهار:لا تقول

ساري:او انهم يستأصلون كليته كامله

مسكت راسها نوره وبكت أصايل:لا يصير بأبوي كذا تكفون ، تكفى ساري

تنهد ساري يسكت وتقدمت ملاك لأصايل وبكت أصايل:تكفين ملاك لا يصير فيه شي تكفين

ملاك:مابيصير شي ان شاء الله

أصايل بكت تتمسك بملاك:لا لا ماتعرفين وش ممكن يصير لي ماتعرفين وش يعني افقد ابوي ؟

سكتت ملاك ثواني وهمست:انا اللي اعرف

رفعت عيونها نوره وناظرها ثنيان وبلعت ريقها ملاك:والله لا يذوقك اللي اعرفه

حضنتها أصايل تبكي وتنهدت ملاك بتعب وناظرت عقاب

جاسر:لا تقعدون تبكون كذا ويصحى ابوي على هالمنظر

نهار لف لجاسر:والوضع يحتاج اننا نمثل ؟

جاسر:لا تمثل بس لا تكبّر الموضوع ابوي طيب وبخير وحتى لو ان داخله شرّ بنطلعه وبيقوم بالسلامه

نوره مسكت كف عقاب:يارب يارب

'

دخل منيف ودق الباب وناظروه

كانوا جالسين بصاله صغيره قبل غرفة عقاب اللي نقلوه عليها بجناح أوسع وأفضل

وتقدم وبيده أكواب وهمس:سلام عليكم

نهار:تعال منيف

حط الأكواب وحك جبينه:قهوه

هز راسه ثنيان له واخذ الأكواب يوزعها عليهم واخذ الكوب اللي حاطه لوحده ومدّه لأصايل ولا انتبهت له

ونطق نهار:أصايل

رفعت عيونها وناظرت منيف اللي ماد لها الكوب واخذته من يده ومشى منيف وجلس جنب ملاك

نوره:بدخل اشوف ابوكم

ساري:امي قالوا بيعلمونا اذا تطمنوا عليه وبندخل له

نوره:ما اقدر ما اقدر

تقدمت تدخل غرفة عقاب واخذت نفس أصايل تهدي نفسها وشربت من القهوه اللي مقفله بكوب اسود وعقدت حاجبينها من ذاقتها شي غير القهوه

ونزلتها تفتح غطاها وشافتها ماتشا ورفعت عيونها لمنيف اللي يناظرها وبلعت ريقها ترجع تناظر الماتشا

تقدم نهار يطلّ وناظر امه عند عقاب تتكلم معه وهمس:ابوي قام

فزّوا يدخلون عنده وفتح عيونه عقاب وناظرهم حوالينه ونطقت نوره:حمدلله على السلامه عقاب شلونك وش تحس فيه ؟

مارد عليها بتعب وتقدم جاسر:ابوي كيف صرت الحين ؟ في شي يعورك ؟

عقاب:لا لا

تقدمت أصايل تحضن كفه وتبكي بدون صوت

ساري:ابوي

عقاب:مافيني شي قلت

نوره هزت راسها:ان شاء الله

رجع يغمض عيونه من جديد وتنهدت ملاك تجلس بتعب

ولف ساري لثنيان:بنادي الدكتور

هز راسه ثنيان وخرج ساري ولف عقاب لأصايل:ابوك مافيه شي ليه تبكين ؟

ماردت عليه وهي تبكي وغمض عيونه بتعب عقاب

ودخل الدكتور:سلام عليكم أجر وعافيه

فتح عيونه عقاب وهز راسه بهدوء وابتسم الدكتور:كيف صرت ؟ ان شاء الله احسن ؟

عقاب:طيّب انا

الدكتور:بإذن الله سوينا لك فحوصات ياعمي والفحوصات طلعت لنا اللي تعبك

سكت عقاب وعضت شفتها نوره تناظره

وكمل الدكتور:في ورم على كليتك اليسار هو اللي تعبك هالفتره ولكنه ببداية نموّه حمدلله

بكت أصايل وتقدم نهار لها وغطت وجهها تحضنه وعقد حاجبينه عقاب يسمعه

الدكتور:الموضوع بسيط ان شاء الله لا تشيل همّ لكن احنا ممكن نحلّه بحالتين ، إما نبدأ علاج كيماوي يستمر فتره وأضمن لك فائدته أو اننا نستأصل كليتك كامله وهذا أسرع

سكت عقاب يناظره وتنهد ثنيان يناظر ابوه ونطق جاسر:ابوي الموضوع بسيط وان شاء الله بتقوم بالسلامه بالحالتين

عقاب ناظرهم واقفين حوالينه ولف للدكتور:أنا بخير وما يلمسني شرّ وان كان تمكن مني فشيلوه

ساري:ابوي انت فكر شوي وقرر اللي يريحك

الدكتور:اذا ودك نستأصل الكليه بنسوي تحاليل جديده ياعمي

هز راسه عقاب:شيلوه شيلوا اللي يعورني

الدكتور:براحتك نبغاك ترتاح الحين وناخذ التحاليل اللازمه ونشوف

لف عليهم:وجودكم كبير لأبوكم بس صدقوني ابوكم بخير عندنا تقدرون ترتاحون ببيتكم

نوره:بنقعد عنده ما بنروح محل

جاسر:امي والله ان ابوي بخير وانا ادري روحي ارتاحي من امس ماغفت عينك

نوره:ولا أخليه

عقاب:روحوا كلكم مافيني شي

نوره:لا تكابر عقاب وش لك بالمكابره خلنا حوالينك

عقاب:لا انا مابي توقفون فوق راسي كأني جنازه توكلوا بيتكم

ساري:بعد عمر طويل يا ابوي الله يمدك بالعافيه

عقاب هز راسه:خذ اهلك

ثنيان:انا اقعد مع ابوي

عقاب:لحد يقعد عندي المستشفى كله عندي روحوا انتم

أصايل:ما اخليك

عقاب:بتروحين بتروحين

ناظر نهار عقاب وهز راسه نهار ومسك أصايل:مشينا

أصايل بكت ومسكت كف عقاب:بترجع البيت ماراح تطول علينا

عقاب هز راسه:برجع ان شاء الله

مسحت دموعها أصايل ومشت مع نهار وخرجوا ورفعت عيونها ملاك من ناظرها عقاب ورمشت بهدوء تناظره ووقفت تخرج

اشر لها منيف وخرج قبلهم يطلع من المستشفى

وخرجوا من عنده واخذت شماغه وعقاله بيدها ومشت لثنيان اللي خرج ومسكت ذراعه تخرج معاه

تنهد ثنيان وركب سيارته وركبت جنبه ملاك ولفت عليه تشوف تعبه وهوجاسه وتنهد وقفل الباب يحرك

دخلوا البيت وكلاً نزل من سيارته

طلع ثنيان وحطت شماغه وعقاله ملاك على الاستقبال عند صورته ورفعت عيونها لصورته

ابتعدت تناظره ثواني ومشت تطلع ودخلت الغرفه

وناظرت ثنيان اللي جالس على السرير وهادي

وفصخت عبايتها وحجابها تعلقها ومشت له وجلست جنبه

غمض عيونه بتعب ثنيان ومال عليها وفتحت ذراعينها تحضنه وحط راسه على صدرها وتنهدت تمسح على راسه اللي على صدرها

حاوط بذراعينه خصرها وهمس:خليك جنبي

غمضت عيونها من صوته:أنا جنبك وأنا عونك وكتفك ومركاك

مسحت على شعره وهي حاضنته ورجعت للخلف تستند على السرير واعتدل ثنيان ينسدح وحط راسه من جديد على صدرها وغمض عيونه

مسحت على شعره ملاك وهي تسترجع كل تعبها وأول نومه نامتها بعد فقدها لأمها وأبوها والشعور اللي سكنها في نومتها

ما تتمنى اي احد يرجع يعيش نفس شعورها ويفقد احد من اهله كيف لو كان عقاب ، وهي تعرف وش يعني عقاب وكيف عياله وعائلته مترابطه ببعضها وكيف عقاب يلاحظ الجميع ولا يغفل عن عينه أحد

نزلت عيونها تشوف ثنيان اللي بحضنها وشدت عليه ودها تحبسه داخلها ولا يمسّه شرّ او وجع

ولا يهون عندها ولاهو قليل ولا ترضى تشوفه بأسوأ حال ، هي تبي تشوفه بأحلى مشاهد بصرها ، سعيد

تنهدت تمسح على شعره وتشوفه غافي على صدرها

'

فزّ وفتح عيونه ورفع راسه يشوفها تناظره وناظرها ثواني وهمست ملاك:ما نمت كفايتك

لف واخذ جواله وناظر الساعه ورجع ناظرها:محد اتصل عليّ ؟

هزت راسها بالنفي وعقد حاجبينه ثنيان:مانمتي ؟

هزت راسها بالنفي وجلس بإعتدال ثنيان:ليه ؟

ناظرته ملاك بهدوء تشوف حاله وشعره المبعثر وعلامات التعب على وجهه وهمست:ماجاني نوم

ثنيان وقف:بروح لأبوي

جلست واخذت نفس:ما امداك ثنيان

لف ثنيان عليها من نطقت اسمه وكان وده يوقف عند هاللحظه لكن كل الظروف مانعته

هز راسه بالنفي يصد عنها:لا

وقفت:انتظرني

ثنيان:لا لا انتي نامي انا اجيك الصبح اخذك

مشت تاخذ عبايتها:ماراح اخليك

لف ثنيان يناظرها وناظرته ملاك وهي تتحجب ولف ثنيان للدولاب ياخذ ملابسه ودخل الحمام وجلست ملاك تنتظره

خرج بعد دقايق واخذ مفتاحه ومشت تطلع معه ، ما سمعت حسّ بالبيت والكل نايم وخرجوا وركبت يمينه وحرك للمستشفى

وقف اول وصولهم ونزلت معاه ملاك وتقدم ثنيان لغرفة ابوه وهمست:يمكن نايم

فتح الباب بهدوء ثنيان ودخل الصاله الصغيره وتقدم يشوف ابوه نايم وهز راسه لملاك اللي برا وخرج لها:بشوف الدكتور واجيك خليك عنده

ملاك:بشوف الدكتور انا بعد

ثنيان ناظرها ثواني ومشى يتقدم قبلها ومشت خلفه

وقف ثنيان يسأل عن الدكتور وقالوا انه موجود

دق الباب ثنيان ودخل ورفع عيونه الدكتور:اهلاً وسهلاً

ثنيان دخل ودخلت معاه ملاك وجلس ثنيان:بغيت اسألك دكتور عن ابوي وحالته ما أستجد معاك شي جديد ؟

الدكتور:لا والله انا انتظر التحاليل معكم وان شاء الله الصبح يمكن تكون جاهزه اطلّع عليها وابلغكم بكل خير

ثنيان:طيب وابوي يحتاج يجلس هنا بالمستشفى هذي الفتره ؟ لاني اعرفه ما يرتاح بعيد عن البيت

الدكتور:اكيد لازم ولا يمكن يخرج لين نخلص من كل التحاليل ونقرر العمليه

سكت ثنيان ورفع عيونه لملاك اللي واقفه ووقف:طيب يعطيك العافيه

الدكتور:الله يعافيك ماتشوفون شرّ

خرج ثنيان ولفت عليه ملاك:اسبقني عنده بمرّ اجيب لك قهوه واجيك

هز راسه وهو يفكر ومشى يتعداها ويرجع ولفت ملاك ودقت باب المكتب من جديد ودخلت

رفع عيونه الدكتور واخذت نفس ملاك:دكتور

قفلت الباب ووقفت وبلعت ريقها ثواني:انا فكرت كثير وقلت اسألك يمكن يكون في احتمال اني أتبرع له بكليه

ابتسم الدكتور ثواني:بدري على هذي الأمور كان موجود الاحتمال لان كليته اليمين ماهي بصحه جيّده برضو لكن انا قلت بشوف التحاليل وبعدها اشاوركم واشاوره

ملاك جلست وناظرته:طيب يصير اطلب منك انه لو في مجال للتبرع ماتبلغ الا انا

الدكتور:ما ينفع احنا لازم نبلغه هو ونبلغ باقي أولاده

ملاك هزت راسها بالنفي:ماراح يقبل ولا يقبلون أولاده ، بلغني انا انا جاهزه واقدر اتبرع وصحتي جيّده

الدكتور:بشوف التحاليل الصبح وابلغكم ان شاء الله

اخذت نفس ملاك وهزت راسها ووقفت تخرج من عنده

مشت تطلب قهوتين وعضت شفتها وهي تفكر ولفت من مدّ لها القهوتين واخذتهم

رجعت لثنيان ودخلت الغرفه وناظرته جالس عند ابوه يناظره وساهي وميّلت راسها تتأمل جلوسه وضعفه وخوفه وهواجيسه اللي تدور براسه

وهمست:ثنيان

رفع عيونه لها وناظرها واقفه وبيدها قهوتين ولف لأبوه يناظره وقام يوقف ومشى لها

جلست معه بالصاله الصغيره وجلس ثنيان واخذ قهوته

نزل عيونه لقهوته وتكلم بهدوء:ابوي ما يحب يكون ضعيف ابد

رفعت عيونها ملاك عليه وكمل ثنيان:وادري ما عجبه وضعنا يوم قام وشافنا حوالينه ، لانه ما يحب يطيح

لفت ملاك تشوف عقاب وكمل ثنيان:ورغم انه تعبان صحى وقال مابيكم موجودين ، مايبي احد يشوفه وهو ضعيف

ملاك هزت راسها وهي تشوف عقاب:العميد عقاب

رفع عيونه ثنيان لها واخذت نفس ملاك ولفت لثنيان:بس بيقوم لان القوي ما يطيح

هز راسه ثنيان:ان شاء الله

لفوا من انفتح الباب بهدوء ودخل نهار وخلفه أصايل وعقد حاجبينه ثنيان:وش جابكم ؟

نهار:انتم هنا ؟

ملاك ناظرت أصايل:نايم

أصايل لفت عليهم:ماجاني النوم ماقدرت انام

نهار:ولا انا

ثنيان:تعالوا

مشت أصايل وجلست وناظرت عقاب من بعيد وعضت شفتها تراقبه

ولف نهار:ما كلمت الدكتور ؟

ثنيان:لا يقول الصبح بيمرّ علينا

نهار رجع ظهره لورا وسكت يناظر ابوه على السرير

وقف ثنيان ومعه قهوته ومشى لشباك المستشفى يوقف

ناظرته ملاك يشرب من قهوته وهادي ووقفت تمشي له ، وقفت جنبه ولف عليها ثنيان وهمس:ما غفيتي من أمس

شربت من قهوتها ملاك وهي تناظره:ما أنام

ثنيان:عشاني نمت على صدرك ماقدرتي تنامين اعرف

ملاك:فداك

سكت ثنيان من جوابها وهزت راسها ملاك ثواني ، ما كان يدري وين هم وكيف علاقتهم ووضعهم ، مرّه أقرب من شريان قلوبهم ومرّه أبعد من سحاب السماء عن أرضهم

لكن يتأكد دايم ان ملاك تحتاجه وتبيه لكن يمنعها الكثير ويغيّرها خوفها وعدم ثقتها

ناظرته ساهي يناظرها وعرفت انه يبي يعرف ليه دايم ضدّ وضدّ وصدت لانها هي بالذات ماتعرف ليش تكون ضدّ وضدّ ، كل شي داخلها يجري له ويموت عليه لكنها ماهي له وماهو لها ويوقف قدامها مليون حاجز

تنهدت بتعب وحسّ فيها ثنيان ورفع ذراعه يحاوط كتوفها وبيده الثانيه قهوته

حطت راسها على ذراعه من حضن كتوفها وسكتت بهدوء وغمضت عيونها براحه ، راحه مع إنها تستند على ذراع تشعر إن هاللحظه الأمان الحقيقي لمفهوم الأمان

والوّد داخلها انها تعيش عمرها كله على هذا الذراع ولا ينزاح عنها ابد

وهمست ملاك:لو تطلب أكون على هذا الذراع حياتي اللي باقي لي فيها ! ما بردّك

سكت ثنيان يسمع كلامها وكملت:ما أشوف الا إنت حولي

غمضت عيونها خوف انها تفقده وبعدت راسها تناظره وهز راسه ثنيان يكمل عنها:وخايفه معد تشوفيني حولك

سكتت تناظره وهمس ثنيان:تفهمين اللي ابي اقوله بدون اقوله وتعرفين ان كل حبال الوصل وكل أجوبة الاسئله وكل حلولنا ! ، بيدك انتي

ملاك هزت راسها:ياليتها بيدي كان ما بخلت وأتسع لك كَفي وذراعي وصدري وقلبي

ثنيان ناظر موج عيونها من تجمع بمدامعها وشدت على ذراعه ورجعت تحط راسها على ذراعه بدون تكمل شي

'

دخل جاسر ومعه شادن ونوره وناظرتهم نوره:ماصحى ابوكم ؟

هز راسه نهار:لا قاعدين ننتظر الدكتور

نوره مشت تدخل الغرفه وناظرهم جاسر بإستغراب:مارجعتم انتم ؟

ثنيان:الا بس جينا نص الليل

جاسر:فطرتم ؟

نهار:من له نفس ؟

جاسر:الا لنا نفس لا تقعد لي ذي القعده كأن ابوي بيموت

أصايل:اوف خلاص لا تجيبون ذا الطاري

لف جاسر من قام عقاب وتقدم له وقاموا له كلهم يدخلون

ثنيان:ابوي ؟

ناظرهم عقاب بتعب ومسكت ذراعه نوره:كيفك اليوم ؟

هز راسه بدون يرد وعضت شفتها أصايل تناظره

دخل ساري ومعه الدكتور ولفوا عليه

تكتفت ملاك تناظر الدكتور بترقب

الدكتور:أجر وعافيه ياعمي كيف صحتك اليوم ؟

هز راسه بدون رد عقاب ولف جاسر:وش الوضع يادكتور ؟

الدكتور ناظر الأوراق بيده:إحنا قلنا نسوي عمليه إزالة الورم بالكليه كامله ولكن كليته الثانيه بتتعب ويحتاج الكليتين

سكت عقاب يناظره وعقد حاجبه ثنيان:شلون يعني ؟

الدكتور ناظر ملاك ورجع ناظرهم:يعني ممكن ياخذ كيماوي او احد يتبرع له بكلـ

قاطعهم عقاب:لا

ساري:ابوي تكفى لا تعقد الموضوع

وقف جاسر:انا موجود

نهار:وانـ

قاطعهم عقاب:قلت لا

ثنيان لف عليه:ابوي نفديك كلنا بعمرنا لا تردنا المهم تقوم بالسلامه

نوره:عقاب !

عقاب:ولا واحد من عيالي ينقصه شي

جاسر:ابوي ما بينقصنا شي نص الاوادم عايشين بكليه وامورهم تمام وش المشكله ان تبرع واحد منا لك ؟

عقاب:حرام بالله محد من عيالي يعطيني شي

تأفف ثنيان يصد عنهم ولف ساري للدكتور:اقنعه يادكتور تكفى

الدكتور:العمليه بسيطه ولا عليها خوف ومخاطر

عقاب:لا وان دريت ان واحد منكم تبرع لي باخذ روحي انا

أصايل مسكت ذراعه:اسم الله عليك

جاسر:ابوي تكفى لا تعاند ماهو وقت عناد احنا نبيك بصحتك وعافيتك لا تصعبها

مشت ملاك من بينهم تخرج ولفت شادن عليها ولحقتها

وقفت على الجدار ملاك بضيق من الوضع ووقفت شادن بجانبها وهمست:بكيتي عليه قد ما بكيتي على ابوك

ماردت ملاك عليها وناظرتها شادن:وصرتي تسندين راسك على كتف ولدهم

لفت عليها ملاك تناظرها:بتوقفين قدامي مثل ماوقف ابوك وتقولين اني انانيه وجحوده صح ؟

شادن:مو هذا الصدق ؟ دفع عمره الباقي كله منصور عشانك وبالنهايه انتي وينك ؟ هنا بينهم وكأنك بنتهم

ملاك غمضت عيونها بتعب وكملت شادن:كنتي تبين منصور ملاك ، تلبستي ثوب الشرّ عشانه وسرقتي عشانه الحين وش تغير ؟ علميني ليه ؟

ملاك لفت عليها بتعب:لاني المفروض اترك كل شي كل الدنيا بناسها واهلها واختفي ، تعبت تعبت من كلامكم وصوت عقلي وصوت قلبي تعبت ، ارحميني شادن

شادن:ولا يمكن ارحمك ، ماشفتي منصور من مده ولو شفتيه بتبكين عليه نفس ما انا واهلي نبكي عليه ، مستحيل انسى انه الحين بالسجن بسببك

ملاك صدت بتعب وكملت شادن:مستحيل افضحك عندهم او عند حبيب قلبك الجديد ثنيان ، لكن صدقيني مرد الحقيقه بتنكشف وش شعوره ثنيان اذا عرف انك سرقتيه وسرقتي اهله عشان واحد

لفت عليها ملاك وهزت راسها بصدمه من شادن وكملت شادن:أحقد عليك

ماردت ملاك تناظر شادن وناظرتها شادن بحده ومشت تاركتها  

خرج الدكتور وساري معه يتكلم وناظرتهم ملاك

الدكتور:جربوا اقنعوه يمكن يقتنع

ساري:مو لازم يدري يادكتور

الدكتور:رضا ابوك أهم والله ولو ماهو راضي نلاقي له متبرع ان شاء الله

ساري تنهد وهز راسه ورجع يدخل ومشت ملاك خلف الدكتور وبلعت ريقها:دكتور

لف الدكتور بتعب:قلت اللي عندي لاخوانك ابوكم ماهو موافق

ملاك:انا مو بنته انا زوجة ولده ، وابي اتبرع بدون علم اي احد

الدكتور:ما اقدر اعذريني

مشى بيتركها ومشت خلفه ملاك:هو مايبي عياله يتبرعون له بس انا ماراح يدري واذا عرف مابيزعل

الدكتور:انتم خايفين عليه وانا عارف بس نلاقي له متبرع ونرفع اسمه بالمستشفى

ملاك:انت مو فاهمني دكتور انا على رقبتي دين وابي اسدده ولازم اسدده ، وانا اصلاً بختفي من حياتهم وانفصل وماراح احد يعرف شي

الدكتور:انا ما افهم بمشاكلكم العائليه ولا اقدر اساعدك اكثر

مشت ملاك بتعب جنبه:طيب انا اتحمل المسؤوليه صدقني ووقعني على اي ورقه مستعده ، بس تكفى ابي اتبرع انا

الدكتور ناظرها ووقف وناظرته ملاك بترجي:تكفى

الدكتور:نشوف التحاليل ونقرر

تنهدت وابتسمت بهدوء وهزت راسها:بس ماودي احد يعرف بليز دكتور

هز راسه الدكتور ومشى ومشت ملاك ترجع لهم

دخلت وناظرت عقاب اللي جالس وعاقد حاجبينه بعصبيه

نوره:ليه تبي تضرّ نفسك ؟

عقاب:خلاص عاد ، خلاص ولا واحد راضي يقفل الموضوع ؟

جاسر:انت اهدأ ولا تعصب

عقاب:قفلوا الموضوع ماني ناقص زود

سكتوا واخذت نفس ملاك واخذت شنطتها وناظرتهم:استأذن انا

لف ثنيان عليها وهزت راسها نوره:روحي يا أمي روحي

مشت بتخرج ومشى ثنيان خلفها وناظرتهم شادن

وقفت من ناداها ثنيان:ملاك

لفت عليه وناظرها:وين رايحه؟

ملاك:ابوك تعبان وباين عليه وماودي اقعد واضغط عليه وانتم بعد لا تضغطون عليه

ثنيان:ماهو راضي يقتنع مدري وش الحل

ملاك:ساري تكلم مع الدكتور والدكتور قال بيرفع اسمه وبيجيكم متبرع ليش تصعب الموضوع ؟

ثنيان:واذا طوّل الموضوع ؟

ملاك:ماراح يطول

ثنيان:كيف عرفتي ؟ اقولك ابوي مريض وباين عليه اقسم بالله يكلمنا وهو يتألم احس فيه

ملاك تنهدت:ان شاء الله بينحل الموضوع قريب

ثنيان سكت وناظرته ملاك:منيف بيمرّ عليّ

هز راسه ثنيان وخرجت ملاك من المستشفى ووقفت من شافت منيف بسيارته ومشت له

ركبت وناظرها منيف:كيف الوضع ؟

ملاك:لا تسأل

منيف:كنت بنزل بس استحيت

ملاك هزت راسها بالنفي:لا لا ما يحتاج

منيف حرك ولفت لمنيف:بسافر

لف عليها بصدمه منيف وناظرته ملاك:طلبوني شركة محاماه اقدم ندوه بالقاهره وبروح

منيف:تستهبلين ملاك ؟ بذا الوضع ؟

ملاك:ماقدرت ارفض

منيف؛ملاك الرجال يمكن يموت من تعبه وانتي بتروحين القاهره ؟

ملاك:وش اسوي يعني ؟ اعالجه منيف ؟ واقف العلاج عندي وانا قلت لا ؟

منيف سكت بصدمه وهز راسه

ولفت للطريق ملاك:بروح يومين اشتغل وارجع واموره طيبه مافيه شي

منيف:بس اللي يشوفك امس تبكين عليه ما يعرفك الحين

ملاك:تطمنت عليه مافيه شي

منيف سكت ولف للطريق بصدمه واخذت نفس بتعب ملاك ووقف عند البيت منيف ولفت عليه منيف:مرّ عليّ الصبح بكره عشان توديني المطار

منيف:ملاك !

ملاك لفت عليه تصرخ؛نعم نعم ؟ وشفيها ملاك ؟ تجننت ؟

منيف ناظر انفعالها واخذت نفس ملاك ونزلت وتركته

دخلت البيت واخذت نفس بتعب ولفت تناظر صورة عقاب وهمست:بسدد ديني ياعقاب

تأملت صورته بثبات وإصرار على عطائها الكبير بدون تردد ومشت تدخل الغرفه

اخذت شنطة السفر وحطت فيها ملابسها وطلعت جوازها تحطه على الشنطه

'

دخلوا البيت سوا وتنهدت نوره:الدكتور قال احتمال كبير يكون في متبرع قريب

ساري:ان شاء الله وانا متطمن

ثنيان تنهد ودخل وجلس بالصاله وجلسوا بتعب وناظرتهم أصايل:طيب مو لازم يعرف واحد يتبرع ولا نعلمه

جاسر؛خلاص أصايل كم مره عدنا الموضوع ابوي رافض ولا يبي

جلست شادن وهي تناظرهم وتنهد نهار:لو طوّل الموضوع بروح اتبرع انا ومحد بيوقفني

ثنيان رفع عيونه لنهار ولف من دخلت ملاك:سلام

نوره تنهدت:وعليكم السلام

جلست ملاك وناظرتهم:صار شي جديد ؟

ثنيان هز راسه:يقول الدكتور يمكن يومين بالكثير ويلاقون متبرع لأبوي

هزت راسها ملاك ووقف ثنيان يخرج من عندهم واخذت نفس تستند ملاك وهي تناظر حالهم

لفت من سمعت نوره تبكي وتنهدت أصايل:امي ؟

ساري:امي ليه تبكين الحين ؟

نوره غطت عيونها:فاقدته بالبيت فاقدته

جاسر:بيرجع ان شاء الله قوّي نفسك امي ابوي ما يبينا نكون كذا

تقدم نهار لنوره وجلس جنبها وحضنها ورفعت عيونها  ملاك من دخل ثنيان وبيده جواز ملاك وعقد حاجبينه:وش هذا ؟

ملاك:جوازي

سكتوا وهز راسه ثنيان وهو عاقد حاجبينه:اي ادري انه جوازك ليه محطوط فوق شنطة سفر ؟

ملاك:لاني مسافره الصبح

لفت نوره بصدمه على ملاك ورفعت حاجبها شادن

وتقدم ثنيان:كيف مسافره ؟

ملاك بلعت ريقها من نظراتهم:جاني تكليف شغل بالقاهره بكره وماقدرت ارفض بروح يومين وان شاء الله ارجع

أصايل:بهالوضع ؟

ملاك ناظرتها:مافي وضع ، ابوك طيب وبيقوم بالسلامه ان شاء الله

جاسر:لا ونعم ونعم هذي اللي كان يناديها ابوي بنتي

سكت ثنيان يناظرها بصدمه ووقفت ملاك:انا ماني علاج لابوكم وشارده عن صحته ، ابوكم بالمستشفى وقايمين فوق راسه طاقم وش كبره وانا موجوده معه يومين والحين جاني شغل وش المانع اروح وارجع ؟

ثنيان:المانع انا

لفت عليه ملاك:بتمنعني ؟

نوره:ملاك منجدك بتسافرين وتخلينا بهالوضع ؟

اخذت نفس بتعب ملاك وصدت عنهم ورجعت ناظرتهم:لا تطالعوني كذا وكأني أنا اللي طيحت ابوكم ، قلت لكم شغل وارجع

نهار:ملاك !

مشت تاركتهم من حست بالضغط ودخلت الغرفه ونطقت شادن:هذي ملاك

لف عليها ثنيان وناظرتهم شادن:هذي هي اللي بيضتّوا صورتها

ناظرتها نوره بصدمه ومشى ثنيان يخرج ودخل الغرفه وفتح الباب بقوه

وتقدم:وش يعني اللي بتسوينه الحين ؟

اخذت نفس ملاك ونزلت شنطتها على الارض ولاردت

ومسك ذراعها بقوه ثنيان ولفّها ورفع صوته:جاوبيني

ملاك ناظرته:وش بسوي ؟ بسافر

ثنيان عقد حاجبينه:انتي نفسها اللي يومين معي ؟

ملاك ماردت وناظرها ثنيان بذهول:انتي اللي يوم كامل ما نزل عقال ابوي من يدك ؟

صدت ملاك بعيونها وهزّها ثنيان:بكيتي عليه كأنه أبوك قدام عيوني بكيتي ، سندتي راسك على ذراعي وما خليتيني والحين بتسافرين ؟

لفت ملاك عليه:ظروف وشغل يناديني

ثنيان فلت ذراعها يناظرها بصدمه:اي شغل ؟ اي شغل الله يلعن ابو الشغل اللي بيشغلنا عن ابوي

ملاك ماردت وتقدم بغضب ثنيان:فضّي شنطتك دام للحين الامور طيبه

ملاك هزت راسها بالنفي وناظرها ثنيان:بتتركيني ؟

ملاك بعدت عنه ورفعت صوتها من الضغط اللي تحسه:ماقلت بخليك ولا قلت بهاجر انا قلت يومين ياجماعه احد يفهمني

صرخ بوجهها ثنيان:ويومين عادي ؟

سكتت من صرخ بوجهها ورمشت بخوف وبلعت ريقها

ناظرها ثنيان وهز راسه:انا الغلطان

سكتت تناطره وكمل ثنيان:انا الغلطان اني عليت آمالي فيك

شدت على قبضة يدها ملاك وهز راسه ثنيان:كلهم وقفوا بوجهي وقالوا انانيه وجحوده وما تفكر في احد غير نفسها وغرورها وماصدقت

سكتت تناظره وتقدم ثنيان يناظرها:غلطان يوم كذبت عمك اقسم بالله غلطان ، وقفت معك بكل وقت طحتي فيه وقفت ولا عمري تعبت وبديتني عنك والحين يوم احتجتك قطعتيني بسيف البعد

عقدت حاجبينه ملاك وكمل ثنيان:كل شي قالوه عندك صح هذا انتي جحدتي ابوي وجحدتيني ورميتي كل شي بعرض الحايط ورايحه عشان نفسك وشغلك

تقدم بغضب وضرب صدرها بسبابته:مافي أنجس من هذا القلب ولا عمره يتعدل

رجعت للخلف وهي تناظره ورفع عيونه ثنيان عليها:كل شي عطيتيني اياه كذب واستغليتيني ويوم عطيتك انا كل شي وبغيتك تعطيني شي واحد بس ؟

اشر على شنطتها وجوازها ورمشت بهدوء ملاك تناظره ولف ثنيان ووقف عند الباب وحس انه يشتعل داخله وضرب الباب بقوه وصرخ بغضب وفتح الباب وخرج

خرج من البيت تاركهم ولفت نوره تشوف سيارته وعقد حاجبه نهار:منجدها ملاك ؟

جاسر:وش تتوقع يعني

لفت أصايل بصدمه تناظر اهلها ولفت نوره لشادن اللي تناظرها

'

جلست على السرير ملاك وغمضت عيونها بتعب ورفعت كفها لصدرها بقوه بألم

تذكر كلامه لها وكيف صدّق عمها ورمى عليها أبشع الاتهامات

ورمشت بهدوء وهزت راسها:هو ما يدري ما ينلام

مشت وجلست عند المرايه تناظر دموعها وبكت بتعب لأنها تعيش شي اقوى منها لأول مره

تمسكت بالتسريحه وهي تبكي ورفعت راسها من جديد تكتم دموعها وتمسحها ويجمد وجهها

اخذت نفس تستند بظهرها وتناظر شكلها ، بتسويها وحتى لو عاشت شي اقوى منها ماراح تترك دين عقاب ، بتعطيه كليه وحياه وعمر وصحه دامها تقدر

بتعطيهم أبوهم اللي هي فقدت وجوده ، بتعطيهم الحياه اللي تمنتها وتبي تعيشها

نزلت عيونها تذكر عمها وكلامه وشادن وثنيان ومنيف والكل وغمضت عيونها تشد على نفسها وبلعت ريقها تقوّي نفسها

وناظرت شكلها بالمرايه بجمود وهزت راسها

كانت دايم اكثر من يعطي واقل من ياخذ ، فنت حياتها كلها في تضحيه وعطاء ومالقت مقابله شي

اخذت عبايتها تلبسها بهدوء واخذت شنطتها وجوازها وخرجت من الغرفه

مرت من عندهم وناظروها ووقفت ثواني تناظرهم وخرجت

حطت شنطتها بالخلف وركبت وحركت سيارتها خارجه من البيت

ناظرت البيت من المرايه هي حاطه احتمال انها ماراح ترجع وممكن تخسر حياتها بالعمليه اللي بتسويها وابتسمت بهدوء لانها تتمنى

بعد كل هذا التعب اللي عدّت فيها تحس انها المفروض تستريح خلاص وتنتقل للبرزخ

فتحت شباك سيارتها وغمضت عيونها بهدوء تستنشق ريحة الدنيا وفتحت عيونها تسوق ونزلت دموعها وهي تضحك من وضعها وحالها

ووقفت عند بيت منيف وناظرت شكلها بالمرايه تعدله

نزلت من السياره ومشت للبيت ودقت الباب تناظر ساعة يدها ٣ بعد منتصف الليل

اخذت وقت طويل بسيارتها تتجوّل وقطعت نص الوقت لين وصلت لمنيف

فتح الباب منيف وناظرته ملاك بهدوء:وصلني للمطار

سكت منيف يناظرها ومشت تخرج واخذ نفس منيف واخذ مفتاحه وشغل سيارته ولف عليها من ركبت

وصدت ونزل يحط شنطتها بسيارته ويرجع يركب وحرك للمطار

وقف عند المطار وفكت حزامها ملاك ولفت عليه وابتسمت بهدوء:انت أفضل شي بحياتي

سكت منيف يناظرها وتنهد:ماكان له داعي هالشغل ملاك انا لأول مره ضدك

هزت راسها ملاك بالنفي:مو أول مره دايم أنت ضدي وضد كل اللي اسويه

منيف مسك كفها:تكفين ملاك لا تتركينهم هم اعتبروك بنتهم وجاتك فرصه تعدلين اللي سويتيه لهم ليه ترفضينه ؟

ملاك ناظرته وابتسمت:أحبك منيف

سكت يناظرها وتقدمت تحضنه ورمشت من طاحت دموعها على كتفه بتعب وتنهد منيف يشد عليها

ميلت راسها على كتفه تغمض عيونها وهمست:لا تزعل مني وتنساني

عقد حاجبه منيف:وش هالكلام ؟

بعدت عنه وناظرته بتأمل وكأنها بتفقده:إنت حنون ويارب ما تذوق عكس حنيّتك ابد

منيف هز راسه:ماعجبني كلامك لا تتكلمين كذا

مسكت كفه بقوه ملاك وابتسمت:أحبك مره

ناظرها منيف ونزلت ملاك ومسحت وجهها تناظر المطار وفتحت شنطة السياره واخذت شنطتها ولفت لمنيف اللي نزل

ووقف يناظرها وابتسمت له ورفعت كفها تأشر له وحط كفوفه بجيوبه يناظرها وصدت تدخل المطار

مشت وهي تجرّ شنطتها لين دخلت جلست بكوفي وحطت جوازها قدامها واخذت نفس وطلبت قهوه

وبدت تشرب منها وهي تهوجس ونزلت عيونها لساعتها لين انقضى وقتها وأصبح الصبح

وحطت كوب القهوه على الطاوله واخذت شنطتها وهمست:سويها ملاك

سحبت شنطتها تخرج من المطار ووقفت تاكسي وانحنت:مستشفى الملك فهد

هز راسه وفتحت الباب تركب وحرك للمستشفى ونزلت تدخل

تقدمت للرسبشن وحطت الورقه اللي بيدها ودخلوها لغرفة التنويم

جلست وهي تناظر الغرفه البيضاء الفارغه ودخل الدكتور بعد مده من الزمن:ناخذ فحوصات بالأول

ملاك:ما ابغى يخرج شي من هذي الغرفه واحد يعرف

الدكتور هز راسه:ان شاء الله ، استريحي

انسدحت على السرير ومدت ذراعها وتقدمت الممرضه تشبك لها الإبره وتاخذ من دمها وناظرت السقف ملاك

وقف ساري من دخل الدكتور:في متبرع قال بيتبرع

عقد حاجبه عقاب وناظرته نوره:والله ؟

الدكتور:بس للحين تحت الفحوصات بنخليه ليله بالتنويم لين نتأكد من كل الأمور بعدها نحدد موعد للعمليه

جاسر:من المتبرع ؟

الدكتور ابتسم:ماوده تنكشف هويّته وده تكون لله

عقاب:لا ابد ، تعلمني

الدكتور:السموحه والله هذي رغبته

ثنيان:ما ناخذ من احد مانعرفه

ساري:ياجماعه ؟ يوم انحلّ الموضوع بتعقدونه ؟

نهار:وهو صادق ساري خلاص دام ما يبي نعرفه لا نعرفه

عقاب:يقعد دين عليّ ؟

الدكتور:ماهو دين ياعمي هو عمل خيري وجزاه الله خير وان كان بتردها له تدعون له بالخفاء

نوره:الله يجزاه خير يارب

لفت أصايل وتمسكت بكف عقاب:حمدلله

جلس ثنيان وهز راسه ساري:ياربي لك الحمد

عقاب ناظر شادن اللي جالسه وناظر ساري:وين زوجتك ؟

ساري:ببيت اهلها مابغيتها تجي وتعرف بتقول كل شي لاهلها ولا ودي

ولف لثنيان اللي رفع عيونه له وسكتوا يناظرون ثنيان

ونزل عيونه ثنيان بدون رد ونطقت شادن:ملاك سافرت

لفوا عليها واخذت نفس شادن:والله انا بعد انصدمت كيف تتركنا بوضع كذا ، بس تقول شغل وماتبي تقطع برزقها عشان احد

صدت أصايل بإنزعاج من كلام شادن ولفت نوره لعقاب:مانبي نتكلم فيها اللي ما يوقف معنا بشدتنا مانبيه بالرخاء

عقاب:الغايب عذره معه

ثنيان:مالها اعذار

لف عقاب وناظره ثنيان وهز راسه بالنفي:مالها عندي اعذار

سكتوا وصد ثنيان عنهم ورفعت عيونها أصايل لامها ورجعت صدت بضيق

شادن ابتسمت:اهم شي انت تقوم بالسلامه ياعمي

جاسر لف لشادن:وانتي ارجعي مع حمدان لا تخلين الصغار لوحدهم

ناظرته شادن وصد جاسر عنها واخذت نفس شادن وخرجت من المستشفى

نوره:ما ظنيت ولا مره وحده ان ملاك ممكن تتركنا بوضعنا هذا

عقاب:نوره ! خلاص قلت

ناظرهم ثنيان ووقف يتركهم ، وقف بالصاله الصغيره والتفت يناظر الشباك اللي وقفوا عنده

مستحيل يصدق انها نفس الشخص ونفس النظرات ، مستحيل يصدق انه غَفى على صدرها ليله كله ولا غفت لها عين عشان لا تضايق نومته ، مستحيل يصدق انها اللي ركضت له تبكي وبيدها شماغ ابوه وعقاله والحين هي مسافره تاركتهم بهذا الوضع

شد على يده بقهر وهو يتنفس بسرعه انخذل منها بشكل كبير ولا توقعه ، مستحيل يسامحها على كل مره بادر فيها لها وهي ما بادرت بخطوه وحده

كانت دايم تشحّ عليه بكل شي مدّتها قصيره له ، ماكان يشوف منها غير نظرات فقط ولا مره جربت تعطيه شي اكثر من زجاجة عطر

'

غمضت عيونها تشوف الساعه اللي معلقه بالجدار وصوت قطرات المغذي اعلى من صوت الهدوء اللي بالغرفه

ترمش بهدوء وهي ساهيه بعقارب الساعه ، ومن بعد مده طويله اول مره تشعر بالوحده من جديد بعد ما ودعتها

تفكر في القسم الآخر من نفس المستشفى وكلامهم عنها بهذا الوقت وانتصار شادن

غمضت عيونها بهدوء تبي تغفى تبي تنام هاجرها النوم من قبل يطيح عقاب قدام عيونها

لكنها ما تحس بتعب او نعاس وكأنها تخدرت تماماً ولا تشعر بشي

تبي الصبح يجي تبي يمرّ الوقت ويضطرون يبنجونها عشان تقدر تنام وترحم صوت الهواجيس اللي داخلها ، أزعجتها افكارها وأصوات تسمعها بتكرار ونظرات ترجع تشوفها وضحكات لها صدى بدماغها

من لحظة زواجها ومشهد ثنيان ببشته أمامها لآخر صرخه صرخها بوجهها كل شي استعادته

غمضت عيونها تذكر طعم الموج اللي ذاقته بعد ما لحقته للبحر واستقبلها بحضنه وشالها من جهلها بالسباحه لحضنه

جربت مره تترك كل الحواجز وتقدر تقبّله ولا نست ، ما نست كيف كانت مشاعرها وهي تحس بثغره وقبلاته لها

فتحت عيونها تصد وتحاول تخرج من ذاكرتها لكنها ماقدرت ، انقضى وقت طويل وصارت تهوجس ولاهي بوضع صحي جيّد

تبي اي شي يسكّت دماغها وتهدأ اي شي يشبه حضن ثنيان ودفاه وعمقه ووسعه

دخلت الممرضه عليها وناظرتها ملاك:متى بيجي الدكتور ؟

الممرضه:اول شي بيجي استشاري التخدير يشوف وضعك وبعدها ننقلك لغرفة العمليات

هزت راسها ملاك وجلست بإعتدال ورفعت شعرها بتعب وهمست:قدّها ملاك قدّها

فصلت الممرضه المغذي وتركت الابره بوريدها ودخل الدكتور وصارت الغرفه ممتلئه بالممرضين

بلعت ريقها بربكه ونزلت من سريرها ووقفت الممرضه قدامها تلبسها لبس العمليات ، وانسدحت على السرير المتحرك تناظر اضاءة السقف ومشوا فيها لغرفة العمليات

تسمع صوت خطواتهم وتحس ببرودة المستشفى تسري بعروقها ، امتلى جسدها بمغذي بارد

شدت بيدها على الغطاء اللي عليها ، لأول مره تحس ان كفها يتوق لكفه ، تنسى كل شي بهاللحظه ولا تنسى كفوفه

دخلت الغرفه وغمضت عيونها بإنزعاج من الاضاءه ولفت للدكتور اللي يتكلم معها ودخلت بدوامه وصدى وكأنها تغرق وغمضت عيونها تدخل بمفعول البنج

'

واقفين عند غرفة العمليات من بعد دخول ابوهم

ولف ثنيان على أمل جيّتها ولآخر مره يستأمل فيها ، لكنها ماجات

نزل راسه بتعب وخذلان يناظر الارض ورفع عيونه يشوف اهله جالسين

وجنى واهلها موجودين وشادن واهلها موجودين ، ورفع عيونه لمنيف اللي واقف مبتعد عنهم مسافه وينتظر معهم

اخذ جواله منيف يفتحه ما يلاقي فيه رساله او اتصال من ملاك

هزّ رجله وتنهد بتعب على ملاك وكيف شغلت باله من يوم تركها لانها ما كانت بخير

ماهو مرتاح ويحس انه مخنوق وابتعد عنهم وفتح الواتس اب يسجل لها صوته:ملاك من يوم وصلتك للمطار ما كلمتيني طمنيني وصلتي ؟

ارسل الرساله ورجع يسجل لها:ما بتسألين وش الوضع عندنا ؟ ترا عقاب لقي متبرع ودخل العمليات اليوم

ناظر الرساله صح واحد ورجع يرسل:لك يومين مختفيه ملاك علميني وطمنيني

ارسلها واخذ نفس وقفل جواله ولف عليهم يناظرهم

لف من نطق محمد:بنت اخوي يقولون مسافره

رفع عيونه ثنيان عليه وتنهد محمد:امسحوها بوجهي تعبت امسح بوجهي سواد وجهها ، لكن وش اسوي ناكرة المعروف

ناظرهم منيف بضيق ولف محمد على منيف وقام منيف يبتعد عنهم

وناظره ثنيان من خرج من عندهم دلالة انزعاجه ورجع صدّ

'

كان الشعور وعي ولا وعي ، تشوفه لكنها ماتقدر تلمسه

شي يشبه غرقها بالبحر لكن مالقت ذراعين ثنيان تخرجها من الغرق

تشوف كل شي مثل الحلم ، صورته وقربه صراخه وحضنه تحس ان داخلها يتورد من اللاوعي اللي تعيشه

الجو بارد ، بارد جداً وهي ماهي دافيه

تشوف حوالينها بحر وشجر وتسمع اصوات ضحك واسمها

تلف تشوف حوالينها عقاب ونوره ، أصايل ونهار ومنيف وأمها وأبوها موجودين

أول مره تشوف كل اللي تحبهم موجودين بدون نقص وبدون زياده لشخص ما توّده ولا يوّدها

تمنت ما تفوق تمنت تعيش بهذا اللاوعي للأبد ، حتى لو انها ماتقدر توصل لهم وتلمسهم كان منظرهم جميل

تمنت ان بعد ما تعطي حياتها لحياة عقاب تفقدها هي ، وتترك كل هذي الدنيا لأحيائها

تنضم مع أمها وأبوها وترتاح من جبال ساريّات واقفه على صدرها ومن أصوات ضمير وخطوط حمراء تشوفها وتسمعها

ورغم كل هذا الزحام شافت نور يشعّ مثل النجوم بعتمة السماء ما جذبها بين الجميع غير هذا النور

ابتسم لها وابتسمت له تتناثر منه حنيّه توصل لين عندها وتغمرها كانت تحس ان أحشائها تتحرك من مشاعره اللي يبثها لها وهمست تنطق بإسمه:ثنيان

تلفتت تشوف منصور لوحده بعيد عنها وعنهم واستغربت وجوده وبُعده عنها وحاولت تقرب منه ، نادته ونادت اسمه ورفعت صوتها عشان يسمعها لكنه واقف بعيد عنها

قربت منه لين عنده تناديه ورفعت ذراعه تبي تلمسه ومسك ذراعها بقوه وحسّت بالألم يعصر داخلها وفزّت تحاول تتنفس

وناظرت الغرفه البيضاء الخاليه وتمسكت بالسرير تحاول تلقط نفسها وحطوا عليها الاكسجين وغمضت عيونها بتعب تحس بألمها

وعرفت انها فاقت بعد العمليه وكل اللي كانت فيه لاوعي

رمشت بتعب ترجع تغمض عيونها وتتنفس بسرعه وتتألم

مسكوا ذراعها يشبكون لها مغذي ومخدر واستراحت على فراشها لوحدها

'

دخل الغرفه وناظر نوره اللي توزع الورد ولفت نوره وابتسمت:في احد بيزور ابوك؟

نهار:الكل بيزور ابوي الحين بس المهم ابوي يصحى ويصير فيه حيل يستقبل الناس

هز راسه ساري:اكيد وانا كلمتهم يمنعون اي شخص بيدخل

أصايل:الورد والكروت والجوكلت ماتوقعت ان بيصير الوضع كذا

ابتسمت نوره:ابوك العميد عقاب من ما يعرفه ؟

ابتسمت أصايل:حمدلله على سلامته خلاص ودي اشوفه بالبيت من جديد واسمع حسّه وارتاح

هز راسه ثنيان وهمس:حمدلله

نوره:أمي ثنيان خذ اخوانك وروحوا البيت ناموا وغيروا والبسوا ثيابكم وتعالوا

جاسر:وبشوتنا

هزت راسها نوره:روحوا واستريحوا محد نام من مده

أصايل:انا كمان بخاطري ارجع تعبانه مره

نهار:امي بتقعدين ؟

نوره:اي اي روحوا انتم ارسلت السواق يجيب لي عامله ومعها أغراضي وأغراض ابوكم

ساري:اذا بغيتي شي كلميني اجيك

هزت راسها وخرجوا واخذ نفس ثنيان بتعب ومشى يخرج ويركب سيارته

ويستند بظهره يناظر الشارع ثواني ، نزل عيونه لجواله الفارغ وتكاثر بقلبه الزعل والضيق والعتب والخذلان

شغل سيارته بقهر ياكل صدره ولحق اخوانه لبيتهم

وقف عند البيت ولف يشوف اخوانه يتكلمون ويدخلون البيت ، ومشى ينزل ويدخل معهم

ناظر جنى وشادن اللي استقبلوهم بالسؤال وظل يناظرهم ثواني ومشى يطلع غرفته

فتح الغرفه وغمض عيونه يبي يلاقيها يبي يشوفها موجوده ومعها كل أعذارها

لكن مالقي في الغرفه احد ناظر السرير وجدار الغرفه وقفل الباب بتعب وتكى عليه بظهره يشوف أماكنها بغرفتهم

كل شبر بالغرفه مشت فيه يذكرها وكأن ما غفى من أيام ونسى ، تقدم يناظر اغراضها على التسريحه

أرواجها وعطورها ومجوهراتها ورفع عيونه للمرايه يشوف انعكاسه وتعبه بوجهه

وكأن اللي غاب ماغاب طاريه حتى لو انه بالبعد سوّى سواياه ، وكنّ الطيوف تلاحقه تكويه

جرب النار وجمر النار ولهب النار ، جرب وش تسوي اللهب بحياة اللي تلمسه

جرّب انها تحرق وتصلى نار ، يحس جوفه يتآكل من نيران جوفه رغم انه موج والموج قادر

لكن لأول مره يقدر اللهب ، جلس على الارض يستند على السرير وفتح الدرج يطلّع من داخله الصوره

ناظر الصوره ثنيان يحفظ ملامح الشخص اللي بالصوره يتسائل من ولّد كل هالنيران بصدرها وصدره

حط الصوره بالدرج ولف للسرير وانسدح على بطنه بتعب وغمض عيونه

'

رفعت كفها تلمس جرحها وألمه والنار اللي تحرقها واخذت نفس بصعوبه

لفت من دخلت الممرضه وحطت عندها الفطور وابتسمت وخرجت

عقدت حاجبينها بتعب ملاك ماكانت تقدر تقوم عشان تاكل او تقوم عشان تاخذ الاكل

نزلت دموعها من حسّت بالوحده والحاجه لشخص يسندها على كتفه وتقوم على حيلها

دخلت الدكتوره وناظرت ملاك:كيف حالك ملاك ؟

ماردت ملاك وهي تناظرها وتقدمت الدكتوره:افطري عشان تقومين تمشين ضروري عشان ما يجيك تجلّط بالدم لا سمح الله وعشان تستصحين اسرع

صدت ملاك وناظرتها الدكتوره:في أحد بيرافق معاك؟

هزت راسها بالنفي ملاك وهي تتألم وناظرت الاكل وخرجت الدكتوره

بكت بدون صوت بتعب وثقل ونار تحرقها ويدها اللي حتى ما تقدر ترفعها للاكل وصرخت ترفع كفها ترمي الاكل

وبكت وهي تتمسك بالسرير بألم وصرخت:أهخ

اخذت نفس سريع تتنفسه ولفت من دخلت الممرضه وناظرتها ملاك وهي تبكي:تحطين الاكل بعيد ليه ؟ تشوفيني اقدر اخذه ؟ تشوفيني اقدر ؟

ناظرتها الممرضه بخوف وصرخت ملاك وهي تتوجع:تشوفيني اقدر ؟

هزت راسها ملاك:ما اقدر والله ما اقدر

تقدمت الممرضه لها وبكت ملاك تتمسك بذراعينها وهمست:احضنيني

ناظرتها الممرضه بصدمه وتقدمت لملاك وجلست ومدت ذراعينها الممرضه تحضن ملاك وغمضت عيونها ملاك:اهخ

الممرضه:تحسين بألم بالجرح ؟

ملاك:اي جرح ؟

الممرضه:اساعدك تاكلين ؟

بعدت ملاك عنها وهزت راسها بالنفي:بمشي

الممرضه:ارتاحي نمشي بس ارتاحي

هزت راسها بتكرار ومدت رجلينها ملاك وغمضت عيونها بألم

مسكت بيد الممرضه بقوه تحاول تقوم

وطلت تتنفس بسرعه بتعب وتحاول تقوّي نفسها وتقوم على حيلها ولا تحتاج احد

وحطت رجلينها الحافيه على الارض البارده ورجف كل ما بداخلها وتقشعر

غمضت عيونها بقوه من الألم ورفعت راسها للسقف بتعب:يارب

ناظرت السقف وبكت بتعب وشدت عليها الممرضه:اساعدك انا

اخذت نفس بقوه ملاك وشدت على يدها ووقفت وتمسكت بالستاره بقوه:اهخ يارب

مسكت جرحها واستجمعت نفسها تحاول تخطي خطوات قصيره

لكنها تصارع ألم كبير ونار تكويها تمسكت بالسرير تمشي بهدوء والممرضه معها

لكنها ماقدرت توقف اكثر كانت الدنيا كلها تدور فيها من الوجع وغمضت عيونها تهمس:يارب

الممرضه:تبغين ترتاحين ؟

لفت ملاك تشوف الخطوات اللي مشتها وبكت بتعب ماقدرت تبعد عن السرير حتى

جلست ملاك على طرف السرير ورفعت عيونها للممرضه:ماعمري استندت على احد

سكتت الممرضه تناظرها ومسكت السرير بتعب ملاك:ولا عمري

الممرضه:ارجعي ارتاحي وبحط لك الفطور قريب وافطري عشان تتقوين

رجعت تنسدح بتعب ملاك ولفت عليها:ابغى الدكتور

الممرضه:بيجيك

ناظرت الاكل اللي تفتحه لها الممرضه واخذت نفس بتعب وشالت الملعقه الممرضه وحطتها بين اصابع ملاك وجلست على الكرسي تنتظر ملاك تاكل

ناظرتها ملاك بهدوء ولفت للاكل تاكل بدون شهيه فقط عشان تعيش

'

ابتسم يصافحه:الله يحييك ويطول بعمرك

لف نهار يعدل غترته ويكلم:والله الحين ابوي بالمستشفى ان طلع بالبيت ببلغك طال عمرك ، اللهم امين ماقصرت

قفل ولف لساري اللي يتكلم مع الرجال بالمدخل وناظر ثنيان:جاسر راح للدكتور مارجع ؟

ثنيان ابتسم للي جاي:اصبر

تقدم وسلم عليه:ارحب ابو رامي كيف الحال ؟ الله يسلمك

ابتسم يصافحه:ارحب حيَاك

كانت غرفة عقاب تعجّ بالرجال والورد والمباركات وريحة القهوه والبخور وكأنه ببيته

هز راسه عقاب:ياربي لك الحمد العقاب ما يطيح

ابتسم له:صادق صادق الله يطول بعمرك ويخليك ذخر لعيالك ولنا زياره من جديد ان طلعت بالسلامه بيتك

هز راسه عقاب بتعب ودخل ثنيان يناظر ابوه ويطمن عليه ورجع وقف مع اخوانه

تقدم جاسر لهم يرفع شماغه:كلمته قال بيجي يشوف ابوي ويسأله اذا يبي يقعد مدد له بس يقول يرتاح ببيته احسن

ساري هز راسه:لا ما بيمدد ابوي خلاص يبي البيت

لف ثنيان من تقدم منيف لهم وناظره منيف ولف نهار:ارحب الفال الطيب

ابتسم منيف وسلم عليه نهار وناظره منيف:كيف الحال ؟ حمدلله على سلامة الوالد

نهار:الله يسلمك

منيف ناظر ثنيان ورجع ناظر نهار:والله بغيت اجي بعد عمليته بس قلت ياخذ يومين ويرتاح واجي اشوفه

نهار:حيّاك تعال ما انت غريب

لف منيف على ثنيان وصافحه:أجر وسلامه والله يطول بعمره

هز راسه ثنيان بدون رد ودخل منيف وناظره عقاب:تعال منيف تعال

ناظر الرجال الموجودين منيف بربكه وتقدم:شلون صحتك عمي ؟ حمدلله على سلامتك

ابتسم له عقاب ومسك كفه منيف وابتسم:الله يطول بعمرك

عقاب:وعمرك ويرحم من رباك

هز راسه منيف يناظر عقاب ومسح على كف منيف بيده الثانيه عقاب وابتسم منيف له بإمتنان

جلس منيف عند عقاب يناظر الرجال وصبّوا له قهوه واخذها وهو يسمع سوالفهم

'

بيت العميد عقاب بن جرّاح

في أحد مجالسه مستند على سرير ابيض كبير بمنتصف المجلس وحوالينه الورد وفازات الورد والرجال متوزعين على الكراسي يتحمدون له بالسلامه

وعياله واقفين ببشوتهم يستقبلون الضيوف ويرحبون فيهم

المجلس تفوح فيه رائحة البخور والعود والعنبر والبُن والهيل والزعفران ، ريحه توصف عتاقة المجلس واهميّة الزياره

لف ساري على اخوانه:بستريح انا تعبت واقف

نهار:ما اظن احد بيجي زود

جاسر:بنحط العشاء اصلاً على وصول فيه

ثنيان هز راسه وخرج جاسر للمجلس الثاني مع العمّال يوزعون سُفر الطعام ويوزعون الفواكه

دخل يده بجيبه ثنيان يناظر جواله وعقد حاجبينه يشوف التاريخ

٧ أيام ماهي يومين مثل ما قالت ، ٧ أيام عاشها مع زحمة الضيوف والرجال هواجيس

كان يقعد مع أربعين رجّال وتبرد قهوته بين أصابعه وهو ماهو حاس من هواجيسه

لف يناظر منيف جالس وكان وده يسأله ، وده يتكلم لكن كل العتب والخذلان بصدره ما سمح له

خرج من سمع صوت البوابه وتقدم يشوف السياره اللي تدخل وعقد حاجبينه بإستغراب

تقدمت تعطي السواق فلوس:بس ماعليك أمر شنطتي بالخلف

هز راسه ينزل واخذت نفس تفتح الباب وتنزل بهدوء وحذر من عمليتها

ورفعت راسها وجمدت محلها من شافته واقف من بعيد عند مجلس الرجال لابس غترته وثوبه وبشته

وعقد حاجبينه من شافها وشنطتها بجانبها

بلعت ريقها ولفت تاخذ الشنطه:شكراً

لفت عليه تناظره من بعيد وسحبت شنطتها تمشي للبيت بكعبها وعبايتها وحجابها

وناظرها بصدمه لين دخلت البيت ولف على الرجال اللي بدوا يدخلون للعشاء ودخل معهم

وتقدم منيف مع نهار بيدخلون ومسك ذراعه ثنيان ولف عليه منيف ونطق ثنيان:اختك جات

عقد حاجبينه منيف بذهول:وينها ؟

ثنيان اشر بعيونه على البيت ومشى من جنبه منيف يخرج للبيت ولف ثنيان يناظره من بعيد

'

دخلت البيت وتقدمت بتعب تسمع اصوات النساء بالبيت ولفت للعامله تمد لها شنطتها واخذتها العامله

وتقدمت ملاك تمشي بثقه وصوت كعبها يصدّى بالبيت

لفت نوره وهي مبتسمه ولانت ملامحها من دخلت ملاك وابتسمت:السلام عليكم

ناظرتها أصايل ولفت شادن عليها ولفت ملاك تشوف نظراتهم لها واخذت نفس وفصخت عبايتها وحجابها ومدتها للعامله وتقدمت تسلم

وقفت عند نوره اللي تخطتها:القهوه

وخرجت تاركتها ووقفت أصايل تتفادى الموقف وسلمت على ملاك

ووقفت جنى تسلم عليها وتقدمت ملاك تناظر شادن اللي وقفت لها وتخطتها قدام الجميع وكأنها ما تفرق عندها وش يقولون وكيف بيستغربون

وجلست على الكنبه وبلعت ريقها شادن تناظر الموجودين وجلست

دخلت نوره وابتسمت:العشاء الله يحييكم

وقفوا يغادرون الصاله وابتسمت نوره تهلي وترحب فيهم ولفت لجنى وأصايل:قوموا معهم

قاموا يخرجون ووقفت شادن:اساعدهم بشي ياخاله؟

ابتسمت نوره:لا ياحبيبتي كل شي جاهز روحي تعشي معهم

سكتت ملاك تناظرهم بذهول وخرجت شادن ووقفت ملاك وناظرت نوره بهدوء

ولفت نوره تناظر ملاك بحده:وش جابك ؟

ملاك:انا هذا مكان عودتي دايم

نوره:يوم انك تركتينا هالاسبوع كله مافرقت معنا رجعتك الحين ، مابي عيني تشوفك بينهم لاني مابي اسمعك كلمه قدام الكل وتخسرين كل الغرور اللي يكسيك

سكتت ملاك تناظر نوره وناظرتها نوره بحده وخرجت تاركتها

نزلت عيونها ثواني ملاك بهدوء ورفعت راسها من جديد تاخذ نفس ولفت للعامله:منيف برا

مشت ملاك بكعبها وتأففت بألم تجاهلته كثير وخرجت تشوف منيف واقف ينتظرها

وتنهدت:منيف

لف عليها منيف بصدمه ورفعت ذراعينها تحضنه وعقدت حاجبينها:اهخ

حضنها منيف ونطق:وينك ؟ ليه تسوين كذا ؟ فهميني

ماردت عليه وهي تتنفس بألم وبعدت عنه وناظرته:وحشتني

منيف:وين كنتي ؟ وليه ما كلمتيني ؟ وش قاعده تسوين ملاك يرحم والدينا علميني

ملاك:ولاشي انشغلت

منيف عقد حاجبينه:انشغلتي ؟ انشغلتي ما تطمنيني وتكلميني ؟

ملاك رفعت كتفها:لَهيت منيف والله ماقدرت

منيف سكت يناظر ملاك وميلت راسها من نظراته:تكفى منيف

منيف هز راسه بالنفي:كل مره تخليني برا الصوره ولا تهتمين لسؤالي وخوفي

عضت شفتها ملاك من تجمعت الدموع بعيونها

وكمل منيف:ولا مره اهتميتي للي ينتظر منك خبر

ملاك:والله ماهو كذا

منيف شال كفه من جات بتمسكه ورجع خطوه لورا:حمدلله على السلامه

مشى يتركها وناظرته بتعب ملاك:منيف

مارد عليها وخرج برا البيت ونزلت دموع ملاك ورفعت راسها تتنفس ونزلت كعبها من تعبت من الوقفه عليه

وشالته بيدها ومشت حافيه لين طلعت لغرفتها

مسحت دموعها وقفلت الباب خلفها

رمت كعبها ومسكت عمليتها تجلس على السرير وبلعت ريقها تحاول تنحني وتفتح شنطتها ولا قدرت

رجفت يدينها بألم وجلست بتعب وفتحتها تطلع اكياس ادويتها واخذت الدواء وبلعته بدون مويه حتى

لفت للمرايه تشوف منظرها المزيّف اللي تشكلت فيه ، فستان وشعر وميك اب وكعب وشموخ ثابت ما يهزّه شي

غمضت عيونها تحاول تستريح وتمسكت بالسرير تتنفس

وقفت تمشي بالغرفه اللي اشتاقت لها ولقتها على حالها بالضبط ، مشت للشباك وفتحته تناظر السيارات بالبيت والرجال اللي يخرجون رويداً رويداً

ورفعت شعرها تفكه على ظهرها وتتركه على راحته ولفت من انفتح الباب

ناظرها عند الشباك بأول دخوله وقفل الباب وعينه عليها وبلعت ريقها من شافته يدخل

فصخ بشته ورماه على السرير وصد عنها يفصخ غترته ويفك ازاريره الاولى وينزل ساعته

وترددت تتكلم او تقول شي وكيف تبدأ وكيف تنتهي وبلعت ريقها تتقدم له بهدوء:حمدلله على سلامته

لف عليها ثنيان وعقد حاجبينه بذهول منها وناظرت عيونه ملاك ، مليانه ملَام مليانه عَتب

وشدت على ذراعها تمسكه وتناظره ونزلت عيونها:ادري اسـ

سكتت من مشى يتركها ويفتح الدولاب وتعبت ، تعبت من كل هذا الصدود والحاجه اللي عاشتها والشوق اللي جربته بين جدران بيضاء بعيده عنه بعيده عن حضنه عن كفوفه

وجلست على السرير:ما خليتك والله

سكت ثنيان من سمعها تتكلم وناظر ملابسه يتجاهلها

وهزت راسها بتعب ملاك:ولا يوم خليتك

هز راسه ثنيان:بتفتحين موضوع الشوق والأشواق وسوالف الاطلال ونظرات الطيوف

ولف يناظرها:والموضوع اكبر من هالخرابيط

سكتت تناظره وتكلم بهدوء ثنيان:ولا اعرف اصلاً كيف رجعتي ودخلتي هالبيت وهالغرفه بكل بجاحه

شدت على اللحاف بيدها وناظرها بحده ثنيان:وكأن وجهك مغسول بتراب ماهو بمرق

سكتت من حجم كلامه ونظراته لها ماقدرت تنطق شي ولف ثنيان يلف وقفل الدولاب ويدخل الحمام

وغمضت عيونها ملاك ورفعت شعرها تستجمع نفسها من جديد واخذت عبايتها تلبسها وتتحجب وخرجت من الغرفه

نزلت تسمعهم بالصاله جالسين

نوره:حمدلله خلصنا منهم بنقعد كل يوم على هالحال ؟

عقاب:واجب وبيسوونه نتحملهم

أصايل:ابوي مرتاح بالكرسي هذا والا ينزلك نهار على الكنب ؟

عقاب:لا لا خليني شوي واروح غرفتي ارتاح

دخلت عليهم ورفعوا عيونهم عليها وناظرت عقاب وتجمعت الغصه بحلقها ماتدري تفرح بشوفته من جديد والا تبكي لانها تشوف منهم نفس النظرات

وابتسمت بين موج عيونها تناظر عقاب وهزت راسها:حمدلله على سلامتك

صدت نوره عنها وبلعت ريقها ملاك وتقدمت له

ولفت نوره:لا تسلمين عليه للحين جرحه ماطاب والعطور تزيده

لفت ملاك تناظر نوره اللي متجاهلتها وهز راسه عقاب لها:الحمدلله على سلامتك انتي

ابتسمت بهدوء ملاك وجلست:المهم سلامتك انت والعوض براس هالناس كلها

لفت تشوفهم جالسين يناظرونها وشادن تجلس جنب أصايل ونزلت عيونها تمنع دموعها من كل هالغربه اللي تحسها بينهم ورفعت عيونها من وقف نهار:ابوي تعبان وبيرتاح

ملاك ابتسمت لنهار تهز راسها وتجاهلها نهار يسحب الكرسي ويدفّ ابوه للخارج

ولفت ملاك وناظرت أصايل اللي تناظرها:شلونك أصايل ؟

أصايل سكتت ثواني ولفت لنوره:تبين شي امي بدخل انام انا بعد

لفت ملاك على جنى اللي تناظرها ووقفت نوره:لا امي روحي نامي وانا بعد بروح مالنا لزوم نقعد

خرجوا تاركينها ولفت جنى على ملاك وهمست:كل شي تزرعه تحصده

سكتت ملاك وخرجت جنى ووقف ساري يخرج معها ورفعت عيونها ملاك على شادن وجاسر اللي جالسين وهزت راسها:لفقتي زود ؟

شادن:مالفقت انتي ماقصرتي

جاسر:جحدتي ابوي وبكل وقاحه راجعه بيتنا ؟ زود على انه سارقتنا ما يثمر فيك شي

سكتت ملاك تناظره ووقف يخرج جاسر وخرجت شادن معه وبقت لوحدها ملاك بالصاله

اخذت نفس ووقفت ترجع الغرفه وفتحتها تشوف الظلام وتنهدت تدخل وتفتح فلاش جوالها تشوفه نايمه بالعرض بالسرير وكأنه يمنعها تنام قريب منه

فصخت عبايتها وجلست على التسريحه وقفلت الفلاش وبكت من شافت الظلام واخذت ملابسها ودخلت الحمام

مسكت عمليتها بتعب ونزعت فستانها تشوف اثار العمليه

-

فتح عيونه من سمع صوت المويه وجلس واخذ نفس بتعب وغضب يشوي داخله

ناظر شنطتها اللي بالارض وتذكر اللي عاشه لوحده وخلته لوحده ولا سألت او اتصلت او دقت عليه حتى

هو اللي عطاها ولا بخل هي ردت عليه بالشحّ

ماقدر ينام ورجع ينسدح بالظلام وسمعها تخرج من الحمام ومشت بالظلام لين وصلت للكنبه وانسدحت عليها وهي تضم نفسها

لمست عمليتها بيدها وغمضت عيونها وهي ترجف

تحضن نفسها بنفسها وهي تتمني تنفتح لها كل الأحضان بهذي اللحظه

لكن منيف صدّها والكل صدّها برجوعها من الموت

غفت بدون تحس من تعبها وألم عمليتها وصحت على النور من اشتغل وناظرته وعقدت حاجبينها

تجوّل بالغرفه بعد ما صحي ولبس لبس دوامه

جلست بتعب وضمت الروب عليها ولفت تناظره ياخذ ساعته يلبسها وناظرت العطر اللي جابته له جديد متجاهل منه ومن باقي العطور بمفرده

وقفت بهدوء وفتحت شنطتها تسحب منها دواها وتخبيه بجيب الروب وتتقدم للحمام

خرج تاركها ونزل لاهله تحت:سلام

نوره ناظرته:معك الاخت ؟

هز راسه بالنفي وجلس:شلونك ابوي ؟

عقاب:حمدلله احسن

ساري:يالله شوي شوي ويرجع يمشي من جديد اليوم امي اخذته برا ومشى شوي

ثنيان ابتسم:حمدلله

شادن:عمي قوي وبيرجع يمشي من جديد ان شاء الله

ابتسمت نوره:ان شاء الله عدينا الكثير ياربي لك الحمد

لفوا من دخلت ملاك وهمست:سلام عليكم

مارد عليها احد ومشت تسحب كرسيها

نوره:صار كرسي سارا بنت جاسر

ناظرتها ملاك وكملت نوره:تبي قريب من جدها

هزت راسها ملاك تمشي لكرسي سارا ونطقت نوره:مكسوره رجله هالكرسي محد يقعد عليه

رفعت عيونها ملاك وابتسمت شادن وهي تاكل لان انعاد اللي صار لها مع ملاك الآن وهمشوها من الطاوله

ناظرت أصايل والبقيه ياكلون بهدوء ولحد التفت عليها  وهزت راسها ملاك وناظرت عقاب اللي يناظرها

ومشت مبتعده عنهم وناظرت حمد اللي جالس فوق البلياردو ويلعب بالكور وابتسمت بهدوء

وناداها حمد ووقف يبغاها تشيله وهزت راسها بالنفي:ما اقدر اشيلك

لفت شادن:لا تطيح حمد

مسكته ملاك بحذر ولفت لسارا اللي وقفت جنبها تكلمها ونط عليها حمد وصرخت بألم تفلته وطاح بالارض وجلست بوجع وغمضت عيونها بقوه تتمسك بالبلياردو

وركضوا من بكى حمد بقوه وشاله جاسر بسرعه يناظره

رجفت من الألم وتلوّن وجهها باللهب من شدة الوجع وهي جالسه بالارض وتقدم ثنيان يوقف بخوف يناظرها

ماقدرت تتحرك من ألمها وعضت شفتها وهي مغمضه عيونها بقوه

وتقدمت أصايل بإستغراب:فيك شي ؟

نوره:شوفي حمد صار له شي تعور ؟

رفعت يدها ملاك تمسك جرحها وفتحت عيونها تتماسك وناظرها ثنيان ثواني وشدت على البلياردو بقوه توقف على حيلها

تعرقت من حجم كتمانها للألم ومن شدة المها كانت تشعر انها بتطيح ويغمى عليها بينهم

ناظرتهم ما تسمع لهم صوت ومشت تخرج بهدوء ولف يناظرها ثنيان ولف لامه اللي نطقت:فلتت الولد كان بينكسر راسه

جاسر ناظر حمد اللي يبكي وتنهدت شادن:خلاص حبيبي خلاص

لف ثنيان يناظر ابوه اللي جالس ورجع ناظر مكان ملاك وتقدم ياخذ جواله ويخرج من البيت

ركب سيارته وهمس:مستحيل

قفل باب سيارته وحرك السياره واخذ جواله وهو يسوق:هلا طلال شلونك ؟

طلال:بخير انت شلونك ؟ كيف صار الوالد ؟

ثنيان:حمدلله ، طلال اذا فاضي قبل تروح دوامك بغيتك تجي معي المستشفى

عقد حاجبينه طلال:ليه عسى ماشر؟

ثنيان:لا بس بغيتك بخدمه اللي تبرع لابوي ما انكشفت هويته لاحد لانه رافض والدكتور رافض بغيتك تجي وتدخل انت شغلك بالموضوع ببدلتك وبطاقتك

طلال حك جبينه ثواني:طيب اقابلك هناك

هز راسه ثنيان وقفل جواله وساق لين المستشفى

كله أمل انه مخاوفه وتساؤله واستغرابه يطلع غلط ، لانه مايبي ينصدم اكثر

'

شربت المويه وحطت دواها بآخر درج وغمضت عيونها تتذكر نظرات ثنيان لها ، شكواه وعتابه لها

تعترف انه ما ينلام ولأول مره توقف ضدها معاه

تبتعد عنه وتكابر لكن تتمسك في رضاه ، ماتقدر بدونه وتفقده وهو معاها ، وكل اللي عاشته بدونه نار ولَهب ماذاقت دفى من آخر شعور معاه

اخذت جوالها تجرب تتصل على منيف لكن مارد عليها

غمضت عيونها بتعب وقامت تخرج من الغرفه

دخلت الصاله ووقفت شادن وهي شايله حمد:عنده موعد تطعيم بنروح الحين

نوره:اي يالله استودعناكم الله

لفت شادن وناظرت ملاك:تبين شي خالتي ؟

نوره ناظرت ملاك وصدت:لا سلامتك

خرجت شادن ومرت من جنب ملاك وناظرتها ملاك وخرجت تاركتهم

ناظرت الصاله اللي يجلس فيها نهار وأصايل ونوره وتقدمت تجلس بهدوء وسطهم

وناظرت كل شخص جالس على جواله:عادي تسمعوني لو تكلمت ؟

رفعت عيونها نوره:مانبي نسمع شي زياده ، مرينا بأيام سوداء ماتدرين عنها انتي مو ناقصنا شي زود

ملاك اخذت نفس:صح وانا اسفه على تقصيري والمفروض اتصل

لفت أصايل وعقدت حاجبينها:تتصلين ؟ منجدك ملاك ؟ انتي باقي تشوفين روحتك لشغلك بهذا الوضع عادي ؟

نهار:انا ظنيتها من اي احد الا انتي

ناظرتهم ملاك ولفت نوره:لو سمحتي مانبي نسمع زود

سكتت ملاك ورجعت ظهرها لورا تناظرهم يصدون عنها وبلعت ريقها بهدوء

'

دخل ثنيان وتقدم من شاف طلال واقف ببدلته العسكريه وابتسم:ارحب

سلم عليه طلال:كيف الحال ؟

ثنيان:حمدلله ، مشينا نشوف الدكتور ؟

هز راسه طلال ومشى ثنيان لين مكتب الدكتور ودق الباب ودخل

ورفع عيونه الدكتور وهو يكلم وهز راسه له ودخل ثنيان ودخل خلفه طلال وعقد حاجبينه الدكتور وقفل التلفون:اهلاً

ثنيان لف لطلال وناظره طلال:انا جاي بخصوص موضوع مهم واحتاج اطلّع على ملف

الدكتور:في مشكله ؟

طلال:لا ابداً بس الموضوع سرّي ونحتاج نمشيه سرّي

الدكتور:مافهمت ، في ضرر على عملي ؟

طلال:لا ابداً شي يخص المريض

الدكتور ناظر ثنيان وناظر طلال وجلس طلال:ملف المتبرع لعقاب بن جرّاح اذا تذكره

سكت الدكتور يناظر طلال وهز راسه طلال له:صدقني ما يجيك ضرر

اخذ نفس ثنيان وجلس قدام طلال وناظرهم الدكتور:اعطيكم هويته يعني ؟

طلال:لا اطبع لنا بياناته كامله

لف لجهازه الدكتور ولف طلال لثنيان اللي ينتظر وطبع الورقه ومدّها لطلال واخذها ثنيان بسرعه

نزل عيونه على الإسم بالانقليزي :ملاك مساعد

وجمد وجهه بصدمه يناظر البيانات ونطق الدكتور:تعرفونها اصلاً

لف ثنيان للدكتور بذهول ووقف والورقه بيده وخرج

مشى خارج من المستشفى وركب سيارته وناظر الورقه من جديد

يقرأ اسمها يتذكر رجعتها وروحتها اللي كانت بنفس الفتره ، كيف ما فكر وخمن ليه ما سأل وتحرّى ؟ ليه ماكان معها ؟ ليه خلاها تسوي كذا لوحدها ؟

رفع راسه بقهر:اهخ ملاك اهخ

اخذ نفس طويل ورجع يقرأ الورقه وهز راسه بعدم تصديق ، كيف قدرت تسكت وتعيش اتهاماته وكلامه معها ؟ كيف تجاوزت الغربه اللي ذاقتها من اهله ؟

شغل سيارته وحرك والورقه بيده ومشى دربه كله لين البيت ووقف ونزل وقفل سيارته وهو جامد مصدوم ومستغرب ومقهور

دخل البيت ومشى للصاله ودخل وناظر نوره ونهار وأصايل وناظرها جالسه ولفت له تناظره وتقدم:هذا وشو ؟

رفعوا عيونهم لثنيان اللي رفع الورقه وعقدت حاجبينها ملاك بخوف وتقدم ثنيان لها وحط الورقه قدامها ورفع صوته:هذا وشو ؟

ناظرت اسم المستشفى واسمها ورفعت عيونها بذهول عليه

وناظرتهم نوره:وش السالفه ثنيان ؟

ناظر عيونها ثنيان وهز راسه بصدمه يناظرها ورجفت توقف:امش ندخل

مدت يدها بتاخذ الورقه وابتعد ثنيان:ماراح نطلع من هنا

ملاك رفعت صوتها:ماراح اتكلم هنا ، وماراح تتكلم هنا

ثنيان:لا انا ابيهم يعرفون ويسمعون هذولا اللي اوجعك اختلافهم وزعلك تغيرهم عليك

نهار:شسالفه ثنيان ؟

ثنيان ناظر ملاك وغمضت عيونها من مشى وحط الورقه بقوه على الطاوله بالنص:هي اللي تبرعت لأبوك

جمد وجه أصايل ولفت نوره بصدمه على ملاك

بلعت ريقها ملاك وهي صاده عنهم وتقشعر جسمها من الشعور اللي داهمها ونظراتهم لها اللي تحس فيها

ورجع يضرب الطاوله ثنيان بقوه بتكرار بقهر ووقف وهو يتنفس من غضبه وناظر ملاك اللي صاده:هي

لفت عليهم تناظرهم ولفت لثنيان اللي واقف يناظرها مشتعل من ناره أمامها

واخذت نفس وتقدمت لهم:زي ما دخل الموضوع بينكم ماراح يطلع من بينكم

نوره:انتي منجدك ؟

ملاك لفت عليها وناظرتها بصدمه نوره:انتي اللي تبرعتي ؟

ملاك:ولا ابي اشوف هالنظرات وكأني سويت إنجاز

صد بتعب ثنيان من كلامها وهو مصدوم

وناظرتها أصايل:ليش ما علمتينا ؟ ليش ملاك ليش ؟

ملاك:لان مابي احد يدري ما ابي احد يدري بهالدنيا

ناظرتهم بحده كلهم وتوترت تاخذ الورقه من على الطاوله وشققتها ورمتها:ماراح ينفتح الموضوع

ناظروها بصدمه ولف ثنيان عليها وهزت راسها تحذرهم:محد بيدري

لفت نوره بصدمه على نهار اللي واقف يناظرها

ومشت ملاك تخرج من عندهم ودخلت الغرفه تتنفس بصعوبه وتوتر

ومسكت جبينها تمشي بالغرفه ولفت من دخل ثنيان وقفل الباب بقوه وتقدم لها:الحين تشرحين ليش ؟

ملاك ناظرت عروق جبينه من عصبيته وعيونه المشتعله وهزت راسها بالنفي:لانه هذا اللي كان لازم يصير

رفع ذراعه بعصبيه يرفع صوته:ليش تطلعيني من عندك ؟ ليش ما تعلميني ؟ ليش تصديني ؟

ملاك تقدمت تصرخ بوجهه:مابي تناظرني بإمتنان طول الوقت ما ابي ، ولا ابي هالشي يأثر على موج ولهب

رفعت سبابتها على صدره:عشان هذا ان مال يميل عشاني لهب مو عشاني تبرعت لابوك

ناظرها ثنيان بجنون وناظر عيونها اللي امتلت بموج عيونها وكملت ملاك:عشان عقاب اللي دخلني هنا وخلاني اعرفك واكون وحده من عايلته يستاهل روحي واعطيه

هز راسه ثنيان بعدم تصديق ونزلت دموع ملاك بثبات وهمست:عشان اسدد ديني

ثنيان:اي دين ملاك اي دين ؟ انتي عطيتيه جزء من جسدك عن اي دين ؟

ملاك:وهو عطاني ثنيان وعطاني ملاك وعطاني افضل حياه

اخذت نفس ترجف وتمنع غصتها وعقد حاجبينه ثنيان يناظرها بذهول وبكت تهز راسها بالنفي:أبيع كل عمري وأشتري ضحكة هالعائله بروحي

سكت وبلعت ريقها ملاك تكمل:حتى لو إني بيوم بكون برا برواز صورتهم ، انا بكون سبب على الأقل انهم مبسوطين

ثنيان هز راسه بنفي بتكرار:تضحين ؟

ملاك:أضحّي حتى لو اني ضحيت وأنخذلت حتى لو اني اكثر شخص عطيت وما اخذت ، عند أبوك التضحيه واجب ، ما خسرت الا ربحت بوحدتي قلب شجاع

ورفعت حاجبها ملاك تناظره امامها مصدوم:وعشان لو كلهم كذبوا خيري وصدقوا شرّي ، اكون وحدي راضيه

سكت ثنيان وهمست ملاك:وعشان اتعلم ما اقول اوجاعي للموج عشان الموج قادر

اشتعل صدره قهر من نظراتها وبللت شفايفها تمنع دموعها وناظرت عيونه:وعشان ابي أصدق انك انسان وتقسى عليّ مثلهم وتطعني بخنجرك مثل باقي الشامتين

صدت تتماسك وترفع صوتها:وعشان أنا أتعود اوقف لوحدي ولا أتعود عليك ، عشان أنا أبقى طول عمري ملاك بنت مساعد ماني لَهب موج ، وعشان اتعلم من طيحتي وارجع اوقف قدامكم كلكم من جديد

تقدمت له تناظر عيونه:عشان ما يبقى لي دين عند احد ، وعشان اسكّت الشامتين

رجفت تحاول ما تبكي وصدت تدور بالغرفه وهي ترجف:وعشان ملاك اللي ركضت طول دربها لوحدها تموت لوحدها

اخذت نفس متقطع من صوت غصتها ولفت عليه وبكت ماقدرت

وميّل راسه ثنيان يناظرها بتعب من شكلها وعضت شفتها ملاك تبكي وهزت راسها بالنفي:ما خليتك

نفث زفيره من صدره بقهر:ملاك

وتقدم لها يحضنها وبكت ترفع يدينها على كتوفه من انحنى لها

غمضت عيونها تبكي وشد عليها ثنيان يعقد حجاحه بتعب يلمس خصرها وجرحها

بلعت ريقها تتماسك ورفعت كفوفها لكتوفه تبعده ولا ابتعد ، تألمت وغمضت عيونها بتعب:اتركني

ثنيان:وأنا جثه

نزلت يدها ليدينه اللي على خصرها وظهره وابتعدت عنه ورفع راسه وهو متمسك بخصرها وناظرها من قريب

آثار دموعها وصوت انفاسها من بكاها ونظرات عيونها له

هز راسه يناظرها وهمس:بموت ندمان على اللي صار

ماردت عليه ملاك تناظره ونطق ثنيان:ممتلي فيك كل ما قلت ابعد ثنيان رجعت ابتديك من جديد ، ذقت الغرق مرّه وأنا بعمر صغير وذقت الغرق الحين وأنا بعمر كبير

سكتت ملاك تناظره وهي ماسكه كفوفه اللي على ظهرها وكمل ثنيان:تعلمين وتدرين ويدرون العالم كله بإني أحبك

غمضت عيونها بقوه من سمعتها وفلتت كفوفها من على كفوفه من تأثير اعترافه لها وفتحت عيونها تناظر عيونه

ثنيان:من أعلى خصل شعرك لأدنى دنَاك ، وعليّ العتب ليه من أول مره شفتك ماقلت أحبك كان المفروض من أول مره عرفتك أناديك بأحبك ، حُب مرهون للأبد موجود بالدّم على مسامات جلدي ومتوسط نخاعي ، أحب شرّك قبل خيرك أحب نارك قبل دفاك ، واللي يشوف الجمر عكس اللي وطاه

رفع راسه بتعب يتنهد ورجع ناظرها من قريب:اقسم بالله ضامي الماء وقلبي على الماء وقلب الماء على شطك ، تناثرتي فيني نثر السمّ بمجرى الوريد ، اشعلتي كل شي كان ساكن داخلي

نزلت دموعها تناظر عيونه ونظراته لها وكمل ثنيان يناظر عيونها:مادريت ان الموج دايم قادر لكن اللهب قادر بعد ، لمستيني واحترقت وإلمسيني احترق دامك ضمادي ، عشقت انا الآلام منك ومن عشقي أنا حتى الدواء أردّه ، تفيضين من عيوني

نزل عيونه لثغرها وعنقها ورجع يناظر عيونها:كنت بإنتظار دايم معك ، بإنتظار المية قُبله وإنكسار كبريائك ورضا الكون عنا ، انتي عمرك ماكنتي شرّ انتي بس طالعتي بالمرايه الغلط طالعيني أنا عمري ما بخليك شرّ

هز راسه يناظرها:أحبك في كل الخصام وفي كل وقت عصيب وفي كل وقت حسيتي اني ما اهتم بك ، أحبك ياجنون العاقل

سكت ثواني وكمل:أصيح بإسمك وأنا راضي ، احكميني واطلبيني وافقديني واسألي عني ودوريني وموتي فيني

هز راسه:بس موتي فيني مثل ما أنا أموت فيك ، راضي والله راضي سلميني للظلام ان لوّحت يمنى نهاري  وعاتبيني لين احس اني من الأعذار عاري واتركيني للسهر معاك بس معاك

ناظرها ساكته تبكي بدون صوت وتناظر عيونه فالته نفسها بين يدينه ونطق:تكلمي قولي أحبك قولي عشقتك قولي حرام أجفاك ، وأمانه فكيني من كل عذر وقولك ظروفي ، مابيني وبينك بعد ظروف بيني وبينك أقوى منها ، إنتي أدفى ماورا صدري وإنتي آخر عهد بحياتي ، مستعد أبيع دنياي القديمه باللي فيها ، إنتي دنيا ثانيه ما إنتي اضافه

بلع ريقه من نظراتها وقربها له وكمل:روحي علمي الصبح او الليل كان الليل ما يدري علميه ان انتي اللي طولتي نعاسي ، وأنا صبور والله صبور ولكني وصلت لآخر صبري على وصالك

شدها أكثر له وناظر ثغرها وهمس:حيّ العطش لو تمدين الوصل في كاسك

رفع نظره لعيونها:جيت لك لا ترديني

غمضت عيونها من انتهى من كل كلامه ومشاعره اللي نثرها ملح على جروحها على مخاوفها خذلانها وأقفال أبوابها

فتحت عيونها له ماتقدر ترد بحرف واحد بعد كل هذا الكلام والشعور ورفعت كفوفها على صدره وهمست:عطني وقت

رفعت عيونها عليه وهزت راسها بتعب:بس وقت

ناظر عيونها وهز راسه وفلت يدينه عنها ورجع بخطواته لورا وناظرته ملاك يمشي لوراه ويناظرها وخرج يتركها

جلست وبكت بتعب تبي توقف هنا ، هنا عند اعترافه وكلامه ومشاعره وما تكمل شي اكثر

تبي تموت بعد كل هذا الكلام وتستريح لانها ما تتخيل النهايه بينهم او الجاي

فتحت الدرج وسحبت منه ورقه وقلم بيد راجفه وكتبت اللي ماقدرت تقوله له ونزلت دموعها على الورقه وهي تكتب

خرج نهار من البيت وهو ماسك جبينه ومتكي يناظر الطريق بصدمه وذهول من ملاك

لف من دق جواله واخذه يرد:هلا

منيف:وينك ؟

نهار اخذ نفس:أتجوّل

منيف:تمرني والا أجيك؟

نهار:انا قريب انا بجيك

قفل منيف واخذ نفس بضيق وقام يغير ملابسه واخذ جواله من دق ورد:طالع

خرج ومشى لسيارة نهار وركب جنبه وقفل الباب ولف نهار:ليه ما علمتني ؟

عقد حاجبينه منيف:عن ايش ؟

نهار:عن ملاك

جمد وجه منيف يناظر نهار وبلع ريقه:وشفيها؟

نهار عقد حاجبينه:ماتدري؟

منيف:عن وشو ؟ تكلم

نهار تنهد وحرك سيارته:ياخي احسبك تدري اقسم بالله

منيف:وش صاير ؟

نهار بلل شفايفه بهدوء:ملاك تبرعت لأبوي بكليتها

جمد وجه منيف بصدمه وميَل راسه:وشو ؟

نهار:اي والله ولا كانت مسافره كانت بالمستشفى نفسه

منيف رجع ظهره للخلف ومسك راسه بصدمه وناظر طريقه نهار:وماتبي احد يدري بس ثنيان اكتشف الموضوع

رفع راسه منيف يناطر الطريق بصدمه وحك جبينه نهار ولف من دق جواله وعقد حاجبينه من الرقم الغريب:هلا

:عفواً اخت نهار ؟

عقد حاجبينه:اخت نهار ؟

:ايوا عندنا فستان بإسم نهار عقاب والا غلطانه بالرقم ؟

غمض عيونه بقوه يتذكر انه قبل تعب ابوه دخل على بوتيكها وطلب فستان بإسمه وهز راسه:اي اي صح

:طيب وقت التسليم من العصر لبعد العشاء

هز راسه نهار:طيب شكراً

قفل جواله ولف منيف اللي يحاول يتصل على ملاك:اذا تبي نروح للبيت احسن تشوفها

منيف:اي اي بالله نهار

هز راسه نهار يمشي لبيتهم ودخل وتأفف من شاف سيارة بندر وهمس:وقته ذا

عقد جاجبينه منيف:من ذا ؟

وقف نهار بالمواقف:هذا اللي بيلوي ذراع ابوي بأصايل

لف منيف بإستغراب:وش دخل أصايل ؟

نهار لف لمنيف:يبي ينتقم من اللي سواه ثنيان بجواهر بإنه يخطب أصايل لولده قدام الناس

جمد وجه منيف وهمس:وش هالليل عندي ياربي ؟

نزل نهار وفتح بابه منيف ولف يشوف بندر اللي لابس بشته وخلفه راشد ولده وظل يناظر راشد وكأن في احد سبقه لحلمه وبيتلاشى حلمه قدام عيونه بلحظه

تقدم نهار:حياكم الله

مشى بندر:عسى ابوك مو تعبان نقدر نشوفه

نهار:حياك حياك

فتح المجلس لهم ودخلوا يجلسون ودخل منيف وناظرهم وجلس نهار وهو يتصل:ساري بلغ ابوي انه عنده ضيوف

قفل جواله نهار وناظر راشد وبندر اللي جالسين قدامه

دخل عقاب بعد مدّه على عكازه وابتسم بندر يوقف له:افا عكاز يسند العقاب

هز راسه عقاب وساعده ساري يجلس:الله يسلمك

بندر:حمدلله على سلامتك

رفع عيونه ساري وجلس يمين ابوه ودخل ثنيان وعقد حاجبينه يناظرهم:سلام عليكم

رفع عيونه راشد بحده على ثنيان وجلس ثنيان يسار عقاب وناظر بندر

عقاب:جاي لوحدك يابندر غريبه

بندر:اي والله جيت أكمل ماوقفنا عنده ما عطيتنا كلمه

لف منيف بخوف يناظر عقاب وبلع ريقه ولف عقاب يناظر منيف ثواني ولف لبندر:اي موضوع ؟

لف ثنيان على ابوه وضحك بندر:قالوا تعبت كليتك ماهي ذاكرتك

ساري:انا اقول ثمّن كلامك قبل تقوله افضل

بندر:لحد يتدخل بيني وبين عقاب

عقاب مسك كف ساري وهز راسه لبندر:عطنا علمك

بندر:وقفنا عند رضاي ياعقاب وقلت راشد لبنتك نسدّ اللي حصل

نزل عيونه منيف يحترق ويسمعهم ومسك الفنجان اللي مدّه له العامل وبلع ريقه يشد على الفنجان

وهز راسه عقاب:لو ما عطيت رجّال كلمه وقلت له تم ماكان رديتك ياراعي الأنساب

عقد حاجبه نهار ولفوا العيال على عقاب بإستغراب

ولف منيف يفهم من وجيههم ان ماعندهم خبر

وعقد حاجبه بندر:وش يعني ؟

عقاب:يعني سبقك لها رجّال وهذا هو قاعد قبالك

جمد وجه منيف ولفوا عليه جميع بصدمه وناظرهم منيف

بندر ناظر منيف ولف لعقاب:تحسب هذا خلاصك يعني ؟ تقول للناس بغيت اعطي بندر لكن سبقه واحد ؟

عقاب:هذا الصدق ولكن تعبي عثر طريقهم والا كتب كتابهم قريب ويالله دام انت اول من عرف الله يحييك

بندر وقف وهز راسه بالنفي:لا والله ماتمشي عليّ ياعقاب واعلن لناسك وجماعتك ان بندر ما اخذ حقه للحين

سكت عقاب يناظره وخرج بندر ووقف راشد وناظر منيف بحده ووقف يخرج مع ابوه

ولف نهار على ابوه:وش صار الحين ؟

عقاب ناظر منيف اللي يناظرهم مرتبك ومصدوم:اعذرنا رمينا عليك علومنا اعتبره ماصار

ثنيان ناظر منيف اللي بلع ريقه:وش اللي ماصار ؟

سكت عقاب وبلل شفايفه منيف بخوف ، خوف سكنه واستوعب انها ممكن تروح عنه ونطق:انا ابيه يصير

لف نهار بصدمه على منيف ونطق ثنيان:وش تقول انت ؟

عقاب:وش اللي تبيه يصير ؟

منيف ارتبك من نظراتهم له:يعني هذا اللي صار الحين ، ان بنتك الله يطول بعمرك تصير من نصيبي

نهار:منيف وش تخربط انت ؟

منيف ناظر عقاب اللي نطق:كذا تخطب بنتي ؟

منيف جمد وجهه يعدل جلسته:لا والله ادري اني المفروض اكلمك بوقت أنسب لكني الحين عطيتك كلمه ولا رديتك حتى لو انها ماهي مقصوده وبجيك وأخطبها منك بالشكل اللي يرضيك

ثنيان لف لعقاب بصدمه وناظرهم ساري:وش هالفوضى ؟

عقاب:اي لا عرفت كيف تخطب تعال اخطب

سكت منيف واستند بقوه عدى عكازه عقاب يوقف ومسك ذراعه ساري يساعده وخرجوا

ولف نهار:تستهبل منيف ليه ماعندي علم ؟

منيف:صار عاد

رفع عيونه منيف لثنيان اللي يناظره ووقف ثنيان وخرج من عندهم

اخذ نفس منيف بوهقه وشد على ياقته بإختناق

'

دخل ثنيان خلف ابوه وتقدم عقاب يدخل للصاله ورفعت عيونها نوره لثنيان وصدت لعقاب:كان ارتحت بالغرفه لين العشاء يجهز

عقاب:لا تعبت هناك مامن تعب هنا ، حوالينك

ابتسمت بهدوء نوره ورفعت عيونها لثنيان ورجعت تناظر عقاب:وش تبي اجيب لك ؟

رفع عيونه عقاب عليهم:شاهي واقعدوا جميع كل واحد وزوجته

ابتسم ساري:ابشر ابوي اهم شي انت استريح

نوره:اجل بنادي أصايل انا

وقفت ومسكت ذراع ثنيان وخرجت معه وابتعدت وناظرته:وش قالت لك ملاك؟

ثنيان رفع كتوفه:ولاشي

نوره:ثنيان ماني مصدقه للحين ليه خليناها لوحدها ؟ من كان معها طيب ؟

ثنيان:محد

نوره غطت فمها بقهر واخذت نفس:وانا زعلتها زعلتها كثير ، يبي لي اشتري لها هديه واراضيها

ثنيان:مازعلت منك

نوره:كيف مازعلت ، والله ذوقتها السمّ مني

ثنيان:اهم شي ابوي لا يدري ويتعب الحين

نوره:لا لا ما بقول وحرّصت على نهار وأصايل ما يعلمونه ، لكني أخجل منها والله

ثنيان سكت وصد واخذت نفس نوره وطلعت فوق

دقت باب غرفة ملاك ولفت ملاك ودخلت ، اخذت نفس ملاك من شافت نوره وصدت

تقدمت نوره وبلعت ريقها:ملاك

رفعت عيونها ملاك:لا تكفين مابي اشوفك تعتذرين لي وتدورين كلام ، كنتي معذوره وقتها وتعبانه وادري

جلست نوره وناظرت ملاك وهمست:ليش ما علمتيني ملاك ؟ ليش يا أمي ليش ؟ عقاب بعد عمليته ماقدر يسوي شي كيف قدرتي لوحدك ؟

ابتسمت ملاك بهدوء:ما عرفتيني للحين ؟

ناظرتها نوره بذهول:انتي اقوى بنت شفتها بحياتي واللي خلفك خلّف خير هالدنيا كله

تلاشت ابتسامة ملاك تناظر نوره وشدت على كفوفها نوره:بستامحيني صح ؟

عقدت حاجبينها ملاك بضيق ولفت لنوره:مازعلت عليك بيوم انتي عطيتيني شي محد عطاه من قبل ، بس تكفين تكفين دايم اسمعي مني

نوره شدت على كفوف ملاك:انتي بنتي وانا اعدل اغلاط عيالي بيدي ، خطاك بعيوني صواب كنت ابيك جنبي بوقت طيحة عقاب ما ظنيت انك جنبنا كلنا بهذاك الوقت

اخذت نفس ملاك:مابي احد يدري

هزت راسها نوره وابتسمت:قومي انزلي معي

وقفت ملاك تنزل معها

'

دخل ثنيان وجلس مع عقاب ودخل جاسر وعياله وشادن وابتسم عقاب من تقدم جاسر:سلموا سلموا

تقدموا يسلمون وباسهم عقاب وجلسوا جنبه

ورفعت عيونها شادن لثنيان اللي صاد عنها يناظر ابوه

ودخلت أصايل وابتسمت:ابوي

رفع عيونه عقاب:فرحتي

تقدمت له وباست راسه:شلونك اليوم ؟

عقاب:احسن احسن اقعدوا حواليني

لفت أصايل وناظرت ثنيان وجلست قدامه ودخل ساري وخلفه جنى وابتسمت:اخيراً بنتجمع زي قبل

شادن ابتسمت:اي حمدلله كذا اكتملنا ناقصنا خالتي بس

عقاب:وملاك

رفع عيونه ثنيان من لف عليه عقاب ونطقت أصايل:امي بتناديها

سكتت شادن ودخلت نوره ودخلت خلفها ملاك ورفع عيونه ثنيان وناظرته ملاك بهدوء

رجف قلبها وهي تناظر نظراته لها ولفت على نوره اللي ابتسمت لها:تعالي ملاك

تقدمت ملاك لين جلست جنبه واخذت نفس من حست بقربه من جديد وبلعت ريقها

ولف عقاب:شلونك ملاك ؟

رفعت عيونها وابتسمت:حمدلله المهم انت

لفت أصايل تناظر ثنيان وهز راسه عقاب:الحمدلله ، نهار بالمجلس مع منيف اخوك

لفت أصايل على طاريه وهزت راسها ملاك:شوي واقوم اشوفه

رجعت ظهرها لورا وحضنت كفوفها ببعضها بتوتر

بدوا يسولفون مع بعضهم وهي ساكته وساهيه وتقدم ثنيان بهدوء:ابوي بغيت اقاطعكم ماعليك أمر

سكت عقاب ورفعت عيونها ملاك عليه ونطق بهدوء ثنيان:وقدامكم كلكم ابي اعتذر لزوجتي ملاك

لانت ملامحها وابتسمت نوره وكمل ثنيان:يمكن ضغطت عليها من الوضع اللي كنا فيه وهي معها حق بشغلها وإنشغالها وادري انها حتى بغيابها موجوده بيننا وأبي زوجتي ملاك تكون مقدّره من الكل

لف يناظر شادن وجاسر ورجع لف لابوه من جديد:ومابيها تحسّ بالغريبه وهي بيننا

رمشت بهدوء تناظره يتكلم بهدوء ولف عليها ثنيان يناظرها ولف لابوه اللي نطق:بنتي ملاك ولحد يقدر يقلل من تقديرها وهي ببيتي

لف ثنيان على ملاك ورفعت راسها ملاك لعقاب وابتسمت بهدوء تخفي دموعها

وهزت راسها نوره:وان شاء الله ان ملاك ما تزعل مني انا بعد

هزت راسها بالنفي ملاك بربكه:معذوره دايم انتي

ابتسمت بإمتنان نوره لملاك وبللت شفايفها ملاك بهدوء ولفت لثنيان اللي يناظرها ومسكت كفه تشد عليه بقوه وهزت راسها:شكراً

كانت الكلمه الوحيده اللي قالتها بعد كل كلامه معها وما يعرف ليش سمعها أحبك يمكن من فايض شعوره ؟

سكت يناظرها وشدت على كفه ولفت عليهم وتقدمت العامله تصب لهم شاهي وناولتهم فناجينهم

ومدت الفنجان لملاك ولا هان تفلت كفها من كفه ومدت كفها اليسار تاخذه ولا تفلت كفه ابد

لف عليها ثنيان يحس بكفها اللي شاده عليه بقوه واخذ فنجانه باليمين ورجع ظهره لورا

ناظرتهم شادن وكيف تبدل حالهم مع ملاك وعقدت حاجبينها بإنزعاج ولفت على جاسر اللي يتكلم مع عياله

أصايل:اوكيه دام الكل موجود الا نهار شرايكم نروح نسهر يوم سهره حلوه

عقاب:انا معك وين ما تبين

ابتسمت أصايل:بس تقوم على حيلك بالأول

عقاب عض شفته ورمى عكازه:أنا طيب وين تبين ؟

ضحكت أصايل:نحضر حفله زي زمان

ساري:ياليل ابو جوك أصايل نشغل اغاني بالبيت اسهل

عقاب:نروح نروح

أصايل:بس ممنوع احد يعتذر

جاسر:أصايل تكفين

أصايل:ابوي !

عقاب:ممنوع

ابتسمت أصايل ولف عقاب عليهم كلهم:الكل

ابتسم ثنيان يهز راسه ولف عقاب:من الفنان ؟

أصايل:تامر حسني

عقاب:الكل يعتذر

ضحكوا وضحكت ملاك ولفت على ثنيان تشوف ضحكته وتحس بدفى كفه ، كان أفضل مشهد تتابعه ، سعادته

ودها تشتري باقي عمرها وتخلي هذي الضحكه عليه دائماً

مظهره أفضل مظهر شافته فيه ، وأفضل ضحكه سمعتها بحياتها

ابتسمت بهدوء تناظره ولفت من نطق عقاب:محمد عبده وش قصرّ ؟

نوره:يووه عقاب البنت تبي الدلع والاغاني وش لها بمحمد عبده

عقاب:ما نبي اجل

تأففت أصايل ولفت نوره:روحي مع زوجك ان شاء الله

أصايل:اذا جاء بروح معاه وبشوف بعدين دموعكم وراي تقولون ياليت رحنا معاها

سكت عقاب ثواني ولف لساري وثنيان اللي ناظروه

وهزت راسها أصايل:اوكيه الاقي لكم حفله لمحمد عبده مو مشكله

ابتسمت أصايل ولفت ملاك تناظر عقاب وكيف تشافى بوجوده بينهم وعرفت ان دواء الشخص وضماده ،

- عائلته -

شرب من الشاهي عقاب:وبنطلبه يغني لنا سرّ حبي فيك غامض

ولف لنوره يغني لها وهو مبتسم:سرّ حبي ما انكشف

جاسر:سلمك الله ابو ساري هذا مو محمد عبده هذا ابو بكر سالم

ضحكوا ولف عقاب:الفن واحد مابينهم فرق

نوره:تذكرها ؟

لفت عليهم:اول اغنيه اهداني اياها بعد الزواج

ابتسمت أصايل:رومانسي العميد عقاب

ضحك عقاب:ايش خلاني اعشق فيك والعشقه تلف

ابتسمت ملاك لانه يدندن ويغني

كان الجو دافي حتى فنجان الشاهي بيدها مابرد من دفى القعده بينهم ، من دفى كف ثنيان بيدها وابتسامته وراحتها بينهم

ولف عقاب يغني ويناظر ثنيان:فوق شاطي البحر حيث اللول يوجد والصدف واللقاء قد كان صدفه ؟

ابتسم ثنيان وكمل:لا جزى الله الصدف

ضحك عقاب وابتسمت ملاك تناظرهم واخذت نفس عميق وتنهدت ولف عليها من حسَ بتنهيدتها وناظرته ملاك وهي مبتسمه وابتسم بوسع ثغره

كانت أفضل هديه هداها لملاك ، عائله

لف عقاب لنوره يغني لها:إنت تحفة صاغها الرحمن من احلى التحف ،إنت في الدنيا قضيه ما تحملها ملف ،وانت احلى اسم في قلبي رباعي الحروف

ابتسمت له نوره وهي ماسكه فنجان شاهيّها

-

لف منيف على نهار:نهار يرحم ابوك لا تقعد تطالع فيني كذا

نهار:مصدوم

منيف:وشو مصدوم ؟ ترا خطبتها وش الصدمه ؟

نهار:اي خطبتها يعني تبيها يعني تتزوجها وتصير زوج أصايل

منيف:وانت ماودك؟

نهار ابتسم بصدمه وضحك منيف:على اساس الحين ابوك وده اصلاً ؟

نهار:الحين اذا طلعت مع أصايل تطلع معنا بعد ؟ ابوك يالبلشه

منيف ابتسم من نهار وكمل نهار:لا انا ماني موافق

منيف:ادري لكن مدري ليه تكلمت وفتحت حلقي

نهار:ياخي ابوي بيوافق وأصايل توافق بس انا لا

منيف:دام أختك وابوك موافقين شعلي فيك ؟

ضحك نهار:افا افا يامنيف

رفع عيونه منيف من دخلت ملاك ووقف:ملاك

ابتسمت ملاك له ووقف نهار:والله مابغيت اقوله

عقدت حاجبينها ملاك ولفت لنهار بصدمه

منيف:ليه ما علمتيني ؟

ملاك:كفو نهار كفو هذا وانا قايله لحد يدري

نهار:قسم بالله احسبه يدري

تنهدت ملاك ولف منيف لها وتقدم:قعدتي لوحدك ؟

هزت راسها ملاك:لا وخلاص منيف لا تفتح الطاري

منيف ناظرها ومشى نهار يخرج من عندهم ولفت ملاك من نطق منيف:تعرفين وش سويتي ؟

ملاك بلعت ريقها وهزت راسها:اعرف ومو ندمانه

منيف:ليه دايم تضحين بإسراف ؟ كل حياتك تضحيه لغيرك ، متى تضحين لنفسك ؟

ملاك سكتت وتقدم منيف وهمس:ضحيتي عشان منصور والحين ضحيتي عشان ثنيان واهله

ملاك:وما خسرت بالثنتين

منيف هز راسه بالنفي:ليه تبين تتعبيني معك ؟ وتخوفيني عليك ؟

ملاك تقدمت ومسكت كفوفه:لاني ما ابيك تخاف اكثر انا اعرف وش اسوي ولا ابي احد يعلمني ويحذرني

منيف:عشانك ملاك عشانك

ملاك ابتسمت:صدقني مو ندمانه ولا يخطر ببالي هالموضوع ابد

منيف:جرحك بيبقى على خصرك لين الممات

ملاك:شارة ضميري

سكت منيف وشدت على كفوفه ملاك:وحشتني اصلاً

ابتسم لها منيف وبلع ريقه من تذكر اللي صار وسكت ما يقدر يفاتحها بالموضوع ابد

'

خرج نهار يناظر ساعته ومشى لين مكانها وابتسم يشوفه مفتوح ووقف سيارته ونزل

دخل ولفت عليه وابتسم من لقاها وترسم مع زبونه ومن شافته سكتت

لف للي واقفه عند الكاشير:طلبية نهار عقاب

هزت راسها ومشت تدخل المستودع ورفعت عيونها غلا تناظره ونزلت عيونها تنشغل عنه وابتسم يشوفها مشغوله تتجاهله

وخرجت العامله:استاذه غلا مالقيت فستان نهار عقاب

رفعت عيونها غلا على نهار ومشت للكاشير تفتح الفواتير وابتسم نهار:نهار عقاب

غلا:سمعت

لفت للعامله:شوفيه في المستودع

مشت العامله ولفت غلا:هالمره اختك زبونتنا ؟

نهار ابتسم:لا والله نهار بكبره

سكتت غلا ثواني وعض شفته نهار:ضريبة ان اسمك ما يحدد جنسه

صدت غلا من جابت العامله الفستان واخذه نهار:نفس المواصفات ؟

غلا:وش مواصفاتك استاذ نهار ؟

نهار:أندر قطعه وأحلاها وأغلاها ، بس عجبني تناديني استاذ

رفعت حاجبها غلا:تستاهل راعيتها

ابتسم نهار:بخطب قريب وبشاور على خطيبتي تلبسه

غلا:بتقول قصة حياتك يعني ؟

نهار:اذا مهتمه تسمعينها

غلا:لا

ابتسم نهار وناظر الفستان المغطى ولف لها:الحساب

نزلت عيونها للكمبيوتر غلا وطلع جواله نهار وهو يناظرها ورفعت له يحاسب وحط جواله يدفع ابل باي

وهزت راسها بهدوء:لبس العافيه

نهار:الله يعافيك

مشى يخرج وابتسم يحط الفستان بالخلف ويلف يناظرها بالمحل وركب سيارته وحرك

'

دخلت الغرفه وشافته يكلم ولف عليها من انتبه

وارتبكت تقفل الباب خلفها وتدخل تعلق عبايتها وتجلس قدام مرايتها تناظر انعكاسه

كان يتكلم بالانقليزي وعيونه عليها ، نزلت عيونها تنزل مجوهراتها وساعتها

وفتحت الدرج الاخير تاخذ دواها وهز راسه ثنيان يتكلم ويناظرها

وناظرت الورقه اللي كتبتها وقفلت الدرج وصدت بعيونها من قفل ووقف

واخذت نفس تلهي نفسها عنه وتقدم لها ثنيان وحط يدينه حوالينها وهي جالسه وناظرها بالمرايه من رفعت عيونها تشوف انعكاسه

وهز راسه ثنيان:ماقلتي غير شكراً

بلعت ريقها تصد عنه بعيونها:مستعجل تسمع جوابي ؟

ثنيان نزل عيونه لعنقها ورفع كفه يشيل شعرها عن عنقها:مستعجل

رجفت ترفع عيونها من حست فيه يلمس عنقها وبلعت ريقها من اصابعه اللي يمررها على عنقها ويشيل شعرها عنه

يناظر عروقها بوضوح ، خضارها وجذورها ورفع عيونه عليها بالمرايه:مستعجل واجد

بللت شفايفها بهدوء:ما عرفت أجوبتك عشان نوصل لهنا

ثنيان هز راسه:اعرف والجواب الوحيد اللي ماعرفته ما يهمني ، ليش سرقتي ؟ صدقيني ما يهم

نزل عيونه لعنقها:لانك سرقتي القلب وهذا أغلى شي سرقتيه

ملاك:ما يساوي بملايين من غلاه

رفع عيونه ثنيان عليها ورمشت بهدوء ملاك تشوفه تايهه وعطشان قدامها وينتظر بس ينتظر عشان يقدر يغني موّال ياوصلها الغالي هلا ، لكنها تخاف وواقفه عند فاصله ما تقدر تتخطاها للسطر اللي بعدها ويفهمها

وقفت ملاك ولفت عليه واعتدل ثنيان بوقوفه يناظرها وتقدمت له ملاك وناظرت عيونه:يوم كان كل شي من حواليني يطفح من القسوه وحدك اللي لمست روحي بحنيّه ودفى

تنهد ينتظر اعترافها وتعبيرها لكنها هزت راسها بالنفي:ثنيان

تقدم لها يناظرها بشوق وتعب وجهد ورفعت عيونها عليه وتجمع موج عيونها ورفعت كفوفها لوجهه اللي تعشقه ولمست خدينه بيدينها ورفع كفوفه على كفوفها:سمّي ولبيه

ملاك ناظرت عيونه تغرق فيه:ألف مره أسفه

غمض عيونه بتعب:اهخ ملاك أكره كل مافيك وأحبك ، أحبك

قربت منه اكثر تشوفه مغمض عيونه:لا تبديني عليك ثنيان

فتح عيونه ثنيان يناظرها وناظرت عيونه ملاك:أبتعد عنك لأجل تعرف إنت كل الأجوبه

ثنيان:قوليها طيب قوليها وخلينا ننتهي

ملاك:هذا خوفي اننا نتهي

سكت ثنيان يناظرها وشدت على وجهه ملاك:والله ما بدّل داخلي غيرك وما طفّى اللهب غير الموج

ناظر عيونها من بدت تنزل دموعها وهمس:مابيك تبكين كل ما قربت لك

هزت راسها بقل حيله:تشوف إن الطريق لي أطول

‏وأشوف إن الاماني كثار ‏ولا تكفيني الدنيا لو أشرب من هواك بحور

سكت ثنيان يناظرها وهمست:تركت لك ورقه بأدراجي

عقد حاجبينه ثنيان وهزت راسها ملاك:اقراها متى ماكان ودك

ناظرها ثنيان وقربت منه ملاك:بس تأكد اني ما كذبت فيها بحرف واحد

وهز راسه بالنفي:ليه تسوين كذا ؟

ملاك ماردت عليه وقربت منه أكثر تقطع المسافه اللي مابقي منها غير شعره ولمست ثغره بثغرها وعقد حاجبينه بصدمه وغمض عيونه بقوه من اقتربت له ألف خطوه وقطعت له ألف ميل

ونزل كفوفه من على كفوفها وحاوط ظهرها وخصرها يقربها زود على قربها

لمست خدينه تلمس الحنيّه بكفوفها ولمست عنقه من الخلف وشعره ، تقبّله ، تقبّله عشان ما تندم على لحظه كان فيها قريب وصدته

ما تندم انه ما عرف حجم تمنيها له ولقربه ووصله ،

لكنها ابتعدت اقصر من تمنيها وناظرته وهي تتنفس بسرعه بربكه وفتح عيونه يناظرها من ابتعدت

ورمشت بهدوء تناظر عيونه وبلعت ريقها ومشت تاخذ عبايتها من خلفه ومفتاحها وتخرج تاركه جوالها وشنطتها لأول مره

ظل يناظر الفراغ ولف يشوف الأدراج بخوف ، يخاف إنهم يوقفون هنا وبعدها تنحط نقطة نهايه

لكنه فتح الأدراج يدور على ورقه ، ورقه تكشف كل شي وتنتهي بعدها كل الاسئله كل الفضول

وانحنى ياخذها ومشى للسرير وجلس وفتحها يقراها يقراها وهو يسمع نبرة صوتها وكأنها تقرأ عليه مخطوطها

:جيتك بقايا حيّ كل أكثره مات وقسّمت لي مسراتك وضحكاتك معي نصفين وكأن بوجودك نزعت كل أوجاع الماضي ، فاجئني حنانك وصرت الوضوح والسؤال المنطقي لاصارت الراحه جواب وصرت الرضا قبل الزعل ، صرت البراهين لسكون الوقت والإرتياب وصرت اليقين بعزّ الشك لكني من قبل أعرفك كان لي خلّان عشت سنين ظلما ما وصلها نور لين دكةّ خطاك ، يشبع داخلي خوف وألم أمتلي الوداع وأقول مع السلامه اكثر من مره لكن ما أقدر أخرج منك وكأني لقيت نقطة النور بحياتي وما اتمنى افقدها ، رغم إنك محال ووصولك محال وإنك صبح سريع الزوال لكني أخاف أخرج منك ، انا ماكنت خاينه العهد وناويّه الوداع لا واللي خلقني كنت اتمنى اختم معك كل امنياتي ، أحبك

غمض عيونه من قرأ الكلمه ومن نبض قلبه بتسارع ورجع يفتح عيونه يكمل الورقه

:أحبك رغم إنك موج وأنا لهب وما نلتقي لو كل الحياه دربين ، تعرف وش يعني أحبك رغم خوفي من الموج وجهلي بالسباحه لكني ماترددت بيوم أطيح بالموج مع الموج ، لاني ما اخاف الغرق انا غرقت من زمن وانا معاك ، ودّي لو كنت جيتك بوقت أفضل وبحال أحسن وبقلب صافي من الجروح كان ودّي أحبك لين أخشع بحبك وأقول آمين وأطرّز من اسمك اللي خفت اقوله عقد لولو ومرجان ، ابحث وراي دامك وقفت بحثك ابحث ورا الصوره اللي خلتني بيوم ارجع لك ووقفت بيني وبينك حاجز بكل مره ، ابحث ورا ناري اللي قدرت تطفيها

مسك جبينه وهو يقرأ آخر كلامها:اللي عرفتها تجري وتلهث ورا الدنيا اليوم واقفه محلها تنتظر الدنيا تجري لها

ختمت الرساله بإسمها:ملاك أو لَهب

ناظر الورقه مذهول من كل مخطوطها وكلامها ، يعيد يقرأ الجمل يحفظ اللي ماقدر يحفظه ، ويلمس حروفها باصابعه

ماهو مصدق كل هذا الكلام وكان وده يسمعه يسمعه ويقراه بدموعها وصوتها ورجفة يدينها ماكان راح يكون نهاية مخطوطها غير حضنها

لكنها تركت الورقه له تخليه جالس يهوجس بس بحروف على ورق أبيض

'

ركضت دربها كله بسيارتها لين الشاليه ووقفت عند البحر وخرجت تاركه بابها مفتوح وغمضت عيونها تشم ملوحة الموج وتسمع صوته الهادي ، تغرق بالموج مثل ماغرقت بالموج الحقيقي

تحب الموج مثل ماتحب الموج الحقيقي ، تبي قرب الموج مثل ماتبي قرب الموج الحقيقي

مشت تجلس على الرمل تناظر الموج ورفعت عيونها لآخر مداه وهمست:ماعاد صار عندي حيل أكثر ، ماعاد صار عندي صبر اكثر

وكأنها استسلمت وتعرّت من كل الثقل اللي عليها ، تبي يعرف ويدرون العالم وحتى لو النهايه سيئه

وحتى لو كانت آخر مره تشوفه وتسمعه ، هي تبي النهايه من كل شي

غمضت عيونها من تذكرت البيت اللي احتضنها والصدر اللي احتواها ، عقاب ونوره ، أصايل ونهار وحتى ساري وجنى

كل شي عاشته مع أفضل عائله ماتقدر تخليه ، ماتقدر تتخلى عنه لكن الصبر له حدّ وهي فاقت كل الحدّ

تحس ان ضميرها يياكل من جوفها بسبب منصور وكيف تركت كل شي يقدر يطلعه وتحس ان ضميرها ياكل من جوفها بسبب عطاء عقاب وعايلته لها وبسبب منيف اللي واقع بحب بنت مستحيل تكون له بسببها وتحس ان ثنيان الضحيه الاولى بكل القصه ، كل ماتذكره تبكي ولا تقدر تقاوم

ضمت رجلينها ببعضها تتذكر كل ليله قضتها معه كل هوشه وابتسامه وكل ضربه وبوسه ، عاشت معه الضد والضد ولا مره عاشت معه بعاديّه

كل شي عطاها اياه كان يأثر فيها ويلمس روحها ولا ودها بيوم تجيه منشرح صدرها له ويجازيها بمعرفته بكل شي

ميلت راسها تناظر البحر بهدوء ودموعها تنزل بهدوء على خدينها

'

عاد الرساله مليون مره ولا عرف وش يسوي

اخذ نفس يناظر الغرفه وبلع ريقه يلف يناظر درجه

فتحه وطلع من داخله الصوره اللي مخبيها ورافض يعرف صاحبها

تأمل وجهه ثنيان بحرقه وخوف وقهر ان هذا الشي الوحيد اللي بقي بينه وبين ملاك

وبيده يعرفه وبيده يتركه لكن ملاك ماراح تخطي خطوه زود وهو ماعرف الصوره وصاحبها ويدري

لكنه يخاف ، يخاف ينصدم بشي اكبر من ظنونه

تنفس بسرعه وهو يفكر ووقف يدور بالغرفه ثواني ودخل رسالة ملاك بجيبه ومشى والصوره بيده

وخرج من الغرفه مشى لين غرفة جاسر ورفع كفه وتنفس بهدوء ودق الباب

فتح جاسر وناظر ثنيان وعقد حاجبينه:وشفيك ؟

ثنيان:ناد لي شادن

تقدم جاسر:وش صاير ؟

ثنيان:نادها جاسر

ناظره جاسر ثواني ولف وناظر شادن اللي مع الصغار:ثنيان يبيك

رفعت عيونها شادن بذهول:يبيني انا ؟

هز راسه جاسر ووقفت بربكه تاخذ وشاحها وتغطي فيه وتتلثم ووقفت بجانب جاسر

وناظرها ثنيان وبلع ريقه:تعرفين كل شي عن ملاك ؟

سكتت شادن ولفت لجاسر بصدمه وعقد حاجبينه جاسر

ثنيان:ردي لو اسألك عن شي تجاوبيني ؟

هزت راسها شادن بهدوء ورجفت يد ثنيان ورفع الصوره قدام شادن:من هذا ؟

جمد وجه شادن وعض شفته جاسر وصد عنهم

بلعت ريقها شادن وناظرت ثنيان ورجعت تناظر الصوره:منصور

عقد حاجبينه ثنيان وهمس:من منصور ؟

شادن:اخوي

نزل الصوره ثنيان يناظرها:وينه ؟

شادن:مسجون

لف جاسر يناظر ملامح ثنيان اللي كل مالها تتغير وكملت شادن:بتهمة قتل

جمد وجه ثنيان يسمعها تكمل:وملاك تسدد ديّته

صد عنها وتكتفت شادن:يحبها وتحبه من قبل ما ينسجن وكانت بتتزوجه وبدت تسرق الناس عشان تقدر تطلعه ومن بين اللي سرقتهم انتم ، والحين منصور باقي له القليل ويتسدد ، سدتت ٢١ مليون

لف ثنيان بصدمه يناظر شادن ورفعت حاجبها شادن:وكان شرطي على اخوك يكمل ديّة منصور عشان ملاك ما تكمل تسرقكم لانها للحين ودها تكمل الديّه وتطلع منصور ، صدقني ملاك تحب منصور بجنون والا كيف تسرق ملايين من ناس وتخاطر بنفسها عشان واحد ؟

جاسر لف لشادن ورجع ناظر ثنيان اللي يناظرها جامد وجهه

شادن:ومحد راضي باللي تسويه ملاك وقلت لك وقلت لاخوك اننا تبرينا من ملاك بسبب جنونها في منصور

شد على الصوره ثنيان يناظرها ورفعت كتفها شادن:واذا تبي تتأكد منصور بالسجن العام تقدر تزوره وتعرف من اللي تزوجتها ياثنيان

سكت ثنيان ولف لجاسر اللي واقف جنب شادن ونطق جاسر:حذرتك ثنيان وقلت لك بتصعب عليك ودوّر وراها بس ما سمعتني ، البنت ماهي زينه وكل من يعرفها قال عنها انها ماهي سـ

سكت جاسر بقهر يناظر اخوه وهز راسه بتعب:البنت ماهي شريفه ثنيان

جمد وجه ثنيان يناظر جاسر ورفعت كتوفها شادن:واللي قتله اخوي كان يعرف ملاك وعلى علاقه فيها ، وغيره كثير

لف ثنيان يناظرهم بصدمه وهز راسه بالنفي وتنهدت شادن:روح لمنصور وبتصدقنا وقتها

جاسر:ثنيان اسـ

قاطعهم يخرج من عندهم ويطلع من البيت

مشى بسرعه وركب سيارته ورفع الصوره قدام عيونه مصدوم يناظر الشخص اللي بالصوره

اللي كان سبب في حريق ملاك ونارها وشرّها وظلامها

هز راسه بصدمه من فكرة ان ملاك ماحبته ، ولا يمكن تحبه وان كل شي عاشه معها كذب

وكل مره صدته صدته لانها ماتبيه واسبابها كاذبه

مسك الدركسون وغمض عيونه:اهخ

رفع يدينه على شعره يشده بجنون وشغل سيارته وحرك

شد على جبنيه وهو يسوق وصوت نبضات قلبه يعادل سرعته ، يتذكر كل شي ويربط كل شي

مكالمة السجن العام بليلة زواجهم وروحتها للسجن وبكاها قدامه ، وكيف فتحت باب السياره تنهار وتبي تنتحر

يذكر كل شي كل شي وكأن ذاكرته رجعت من جديد تعمل

وقف عند السجن وفتح باب سيارته ونزل ، مشى والصوره بيده ودخل

ووقفه العسكري:هويتك لو سمحت

طلع بوكه ثنيان ومد هويته ورفع عيونه العسكري يسأله:من بتزور ؟

سكت ثواني يناظر العسكري جامد وجهه:منصور ، منصور بن محمد

دخل على التفتيش وتمسك بالصوره بيده ودخل غرفة الزياره ووقف يناظرها فارغه

لف بعينه على الباب الحديدي ينتظر جيّة منصور

وتنفس بسرعه يسترجع كلام شادن وذكرياته مع ملاك وكأنه بداخل نار تحرقه ويشتعل كله لَهب

رفع عيونه من سمع صوت صدى الحديد والكلبشات ودخل منصور وناظر ثنيان

ميّل راسه بتعب ثنيان وصد عن منصور من شافه نفس الشخص ومسك راسه ثنيان بقوه

تقدم منصور وناظر ثنيان ووقف:محامي ؟

لف ثنيان وهو يتنفس بسرعه بقهر وناظر منصور وملامح منصور وهز راسه بالنفي بتكرار

وعقد حاجبينه منصور ومد الصوره ثنيان له واخذها منصور وعرف انها الصوره من ملاك ، الصوره اللي عطاها لها بإول دخوله وكتب عليها طلبه الوحيد ' لا تنسيني '

ورفع عيونه لثنيان وتقدم ثنيان:انا ثنيان بن عقاب بن جرّاح

سكت ثواني ثنيان يناظر ملامح منصور وهز راسه:زوجها اي

جمد وجه منصور يناظر ثنيان وتبدلت ملامحه لغضب:وش تبي ؟

ثنيان:انا وش ابي ؟ انا ؟ انت اللي شتبي ؟ انتم اللي دخلتم حياتي انتم

تقدم ثنيان بغضب وناظر منصور:انت وبنت عمك اللي دخلتم حياتي وسرقتوني وسرقتوا اهلي

منصور:انا ما سرقت احد

لف ثنيان عنه وضحك بقهر ورجع ناظر منصور

ورفع كتفه منصور:بنت مساعد اللي سوت كل هذا عشاني انا ما طلبتها ورديتها وحذرتها

ثنيان تقدم لمنصور بغضب:حذرتها ؟ اي تحذير ؟ دفعت لك ٢١ مليون من ناس مالهم ذنب اي تحذير ؟

منصور رفع صوته وتقدم لثنيان:انا من يوم عرفت انها تزوجتك عشان تسرقك وانا منعت زيارتها لي ورفضت دفاعها عني بالمحكمه وكرهتها عشر اضعاف حبها لي

سكت ثنيان يناظر منصور بذهول وكمل منصور:ولا ابي وحده ارخصت نفسها لواحد عشان فلوسه حتى لو كان عشاني ، وفلوسها اللي دفعتها لو تقدر تاخذها خلها تاخذها وبترجع لها وفي راس كبير واقف معي وبيطلعني

ثنيان ناظره بغضب وكمل منصور:تدري ليه انسجنت ؟ تعرف ؟ لاني لقيت ملاك مع واحد بالمكتب

سكت ثنيان وعقد حاجبينه وهمس منصور:ويوم مسكتها بأبشع ممسك ، قتلته وكنت بقتلها

جمد وجه ثنيان يناظر منصور ورفع كتفه منصور:بيقولون لك قتل واحد تحرش فيها اي صح لاني بستر عليها ، لكن الحقيقه ماهو تحرش الطرفين كانوا راضين وكنت بشيل العيب عن اسم عمي الله يرحمـ

ماكمل كلامه من صرخ ثنيان وتقدم له يضربه على وجهه وطاح منصور على الارض ودخل العسكري وتقدم ثنيان ومسك منصور من رقبته:اقسم بالله ما اخليك اقسم بالله ما اخليكم

بعدوه العسكر وصرخ ثنيان بغضب واشتعل وجهه باللهب ودفعهم بقهر عنه ومسكوه يخرجونه

وخرج من السجن وصرخ بصوته كله وتنفس يمسك صدره ولف يناظر العسكر اللي واقفين

العسكري:لو اشتكاك بنرجعك محله

مارد ثنيان ومشى يترنح لين سيارته وفتح بابه وقفل الباب ومسك صدره اللي يرتفع وينزل بسرعه من عصبيته وصراخه ونزل راسه يهزه بتعب

ولف لجواله واخذه يدق عليها ولاردت عليه ودور رقم منيف ودق عليه

ورد منيف اللي نزل من سيارته يناظر بيت عقاب:هلا ثنيان

ثنيان:وين اختك ؟

عقد حاجبينه منيف ولف مالقي سيارة ملاك ولا سيارة ثنيان:مدري بس سيارتها مو ببيتكم

ثنيان هز راسه وجا بيكمل منيف وقفل الخط ثنيان

عقد حاجبينه منيف وناطر جواله ومشى بهدوء وهو يدق على ملاك ولاردت عليه

وتنهد ودخل المجلس وناظر عقاب اللي جالس ورفع عيونه عقاب وبلع ريقه منيف:سلام عليكم

عقاب:وعليكم السلام

تقدم منيف وجلس ونطق عقاب:وين جماعتك ؟

منيف ابتسم بهدوء:مالي جماعه تعرفني ياعمي

عقاب:وشلون بتخطب لوحدك ؟

منيف:أسدّ ، أسدّ عن جماعتي اللي المفروض معي

عقاب:ونعم يامنيف

اخذ نفس منيف:يمكن انت تشوف رجال لهم مناصب ونسب ويناسبونك بأفضل نسب ، ويمكن لانها بنتك الوحيده تبي لها افضل رجّال بهالدنيا يعيشها نفس ما انت عيشتها واحسن

سكت عقاب وكمل منيف:بس صدقني محد راح يقدّر بنتك كثري ولاراح يحبها قدّي ولاراح يجيب لها نجوم السماء سلسال غيري

سكت منيف يناظر عقاب:ومستعد اعيشها نفس حياتك واحسن ومستعد اني اشتري لها احسن بيت وادفع مهرها اللي يقدر غلاتها عندك

عقاب:من وين ؟

منيف:وشو اللي من وين ؟

عقاب:من وين بتجيب بيت ومهر وعيشه نفس هالعيشه واحسن ؟

منيف حك جبينه:قدمت على وظيفه وانتظر ردهم ولي ورث من عند ابوي الله يرحمه تركه لي والباقي بجيبه ان شاء الله

عقاب رجع ظهره لورا:وملاك ؟

منيف:شفيها ؟

عقاب:تعرف انك تخطب ؟

منيف هز راسه بالنفي وسأل عقاب:ليه؟

منيف:تقول انك ماراح توافق ولا بنتك بتوافق

عقاب تقدم بهدوء:شوف يامنيف انا أصايل عندي تسوى كل الأموال هذي وكل المناصب والتقدير ، وما تتساوم وتتقارن بين احد

سكت منيف يناظر عقاب بربكه وكمل عقاب:لكن انا ما ارفض واسأل بنتي ، الخطّاب كثير اللي جوني عشان أصايل من وهي بالـ ١٨ لكن هي ترفض وانا ارفض بعدها ، اشور عليها اي لكن القرار عندها

منيف مسح جبينه بتوتر:انا ابي رايك انت ، ابي احس انك راضي عليّ

سكت عقاب يسمع منيف وابتسم منيف بربكه:كلمتك كأنك ابوي السموحه ، بس كنت اقصد اني ابيك انت تعطيني بنتك

عقاب ناظر منيف وسكت وبلع ريقه منيف من سكوته:انا عشت سنين طويله وحيد ماعندي بحياتي غير ملاك وملاك انشغلت بحياتها الحين وصفيت وحدي ، وكبرت

هز راسه منيف يناظر عقاب:كبرت ولاودي اقعد وحيد ، ابي عائله نفس ما تمنيت

عقاب هز راسه:الله ينولك كل خير

سكت منيف لانه ماجاوبه وكمل عقاب:والقرار عند أصايل

وقف منيف من وقف عقاب وهز راسه يتدارك الموقف:الله يطول بعمرك

هز راسه عقاب وخرج منيف ونزل راسه وعقد حاجبينه بضيق من وضعه ومن ثقته وكرامته اللي ماحس بوجودها

تعوّر وهو يتكلم وهو يحسّن صورته قدام عقاب ، تعوّر لانه وحيد وماحوله احد

تقدم وركب سيارته بقهر وسحب حزامه يربطه وحرك سيارته خارج

وقف عند البوابه من دخلت سيارة حمدان ولفت أصايل تناظر سيارة منيف وهمست:لحظه حمدان

وقف حمدان وفتحت شباكها أصايل تناظر منيف اللي بسيارته

وشد على يده منيف يناظرها وحرك سيارته يخرج من البيت

عقدت حاجبينها أصايل وقفلت الشباك ولا فهمت نظراتها ووضعه ، كان لابس ثوب وغتره وكاشخ لكنها مافهمت ليه شافت منه هذي الملامح

دخلت الشاليه وناظرت اماكنها معاه وميّلت راسها تتأمل ، بلعت ريقها ومشت تجلس محله بالكنبه ولمست ظهر الكنبه وغمضت عيونها تنسدح عليها 

ياليت كانت الدنيا معها رحيمه لكنها كانت قاسيه معها ، كل شي سوته رجع يأذيها وكل شرّ زرعته حرق داخلها

ماهي قادره تخرج من دوامة الحيره والخوف وتتخلص من مشاعرها اللي تحبس سعادتها

رفعت عيونها بصدمه من سمعت صوت السياره بالخارج وجلست وناظرت السياره من قزاز الشاليه وجمد وجهها من شافته ثنيان

وقفت ومشت بسرعه تفتح الباب ووقفت تناظره نازل

ناظرت نظراته لها وفهمت انه عرف ، انطفت لمعة عيونه اللي كانت دايم تلمع لشوفتها

شدت على الباب ونزلت دموعها وخرجت له ووقفت قدامه تنتظر منه كلمه وحده

لكن ثنيان كان جامد يناظرها وهمس:ليش ؟

بكت ولا قدرت تتحمل وعضت شفتها تناظره

وهز راسه ثنيان:انا زرعت طول هذي الفتره بأرض ماهي بأرضي كيف استغرب اني ماجنيت ثمرها ؟

ماردت عليه وهي تبكي وناظرها ثنيان:كنت موهوم ساكن في وهم ، كنت مخدوع عايش في خدعه

هز راسه:النيران اللي اشتعلت داخلك وكانت حاجز بيني ويينك ماهي ماضيك وعائلتك ، كانت رجّال

بكت وتقدمت له بتمسك ذراعه وابتعد عنها:كنتي يميني في سريري وقلبك في سجن ؟ بتطلعين ولد عمك عشان دينه ؟

ناظرها وهز راسه:كيف اصلاً صدقتك ؟ كيف وانتي قدرتي تسرقين غيري وعديتي على رجال كثير وشيوخ

جمد وجهها بصدمه من كلامه وكمل ثنيان:الكل كان يأشر عليك وانا ماني سامع لهم ، الكل حذرني لكني مافهمت ، مافهمت لين شفت صاحب الصوره وقالي حقيقتك

همست ملاك وهي ترجف:لحظه كيف عرفت ؟

ثنيان رفع حاجبينه:سألت بنت عمك ورحت لولد عمك القاتل قالوا كل شي

غمضت عيونها ملاك تستوعب حجم اللي سووه فيها وتقدمت له:تجلس تسمع مني ؟

ناظرها بجنون:اسمع ايش ملاك اسمع ايش ؟ انا تعبت اقسم بالله تعبت من انتي يرحم اهلك من انتي ؟

ملاك بلعت ريقها:انا ماني نفس اللي قالوه ، ثنيان انت تعرفني

ثنيان:سرقتي عشانه والا ما سرقتي عشانه ؟

سكتت ملاك تناظره وصرخ بوجهها ثنيان:ردي

هزت راسها وناظرها ثنيان:تدرين وش يقول عنك ؟ تدرين وش قالوا لي عنك ؟

ملاك ناظرته بجمود وكمل ثنيان بغضب:قالي انه قتل عشانك كنتي مع واحد بالمكتب

عقدت حاجبينها ملاك بذهول وكمل ثنيان:وبنت عمك تقول ان غيره عدوا عليك كثير

ميلت راسها بصدمه تسمع كلامه وهز راسه ثنيان:ملاك

قاطعته تصرخ:صدقتهم ؟ جاوبني صدقتهم ؟

ثنيان:يطلع بحياتي كلب طلعتي عايشه عشان روحه هو وش تظنين بيصير فيني ؟ احترقت ملاك احترقت شمّي رمادي

بكت بقهر تصرخ بوجهه وتدفعه:صدقت ، صدقتهم

مسك ذراعينها ودفعها يصرخ:ضربته ضربته

رفعت عيونها وهي تبكي وناظرها ثنيان بعيون تشتعل نار وقهر وصرخ:كسرت فمه اللي تكلم عليك

رجفت وهي تبكي وهز راسه ثنيان:اعرف وش قالوا عنك ووش بيقولون واعرف اني انا اكثر واحد انضحك عليه

ملاك تقدمت له:دامك ماصدقته يعني تعرف خيري ، تعرف اني ماني مثل اللي يقولونه

صرخ يبتعد عنها:اي خير ؟ اي خير ؟ انتي سرقتيني وسرقتي اهلي عشان كلب قاتل ، قاتل يطعن بشرفك وانتي هنا تحاربيني عشانه

ملاك صرخت تتقدم له:طحت ثنيان طالع فيني طحت وانحرقت بسببهم

ثنيان هز راسه:جزاتك

سكتت ملاك وكمل ثنيان:حق الناس منك رجع عليك

بكت ملاك وهي تناظره وتقدم لها ثنيان:عشتي معه وسرقتي عشانه وتكلم عليك وانا الوحيد اللي صدقتك انا الوحيد اللي كسرت فمه يوم تكلم عليك ، يوم سرقتيني عشانه ووقفتي قدامه وصديتيني عشانه هو ارخص بسمعتك وانا اللي عزيتك وقفت قدام اهلي وقدرتك ومسحت ماضيك كله وتقدمت لك وقلت ابيك وجاهدت عشان وصلك ، ورديتيني عشان كلب تكلم عليك

بكت بدون رد تناظره وهز راسه ثنيان بخذلان وقهر

ثنيان:عزاي لأهلي اللي نادوك بنتي وعشتي معهم واكلتي بينهم ، عزاي لجوفي اللي احترق عشان يرضيك وغرق عشان يحميك

ملاك ناظرته بين دموعها بدون رد تشتعل نار أمامه وكلن لأول مره يشتعل قدامها هو بعد ، كانوا لأول مره لهب مقابل لهب

ثنيان هز راسه ودخل يده بجيبه وطلع منها شيك:قيمة كليتك

رفعت عيونها بصدمه تناظره ومشى ثنيان يتركها

ركب سيارته وحرك تاركها وظلت واقفه محلها تتذكر كلامه والافتراء اللي رسمه منصور حوالينها

وجلست على الارض تعجز رجولها تشيلها ومسكت التراب بيدينها تحترق من جوفها

ورفعت راسها تصرخ بعلو صوتها وتبكي ، رفعت يدينها على صدرها تضربه بقوه من اللي يصير معها من الخذلان اللي تعيشه

عضت شفتها من منصور وهزت راسها بالنفي وهي تبكي بصدمه ، هي رمت نفسها بأوسخ محل عشانه وما كان منه الرد الا انه يعوّرها يعوّرها بأكثر مكان يعوّر ، بقلبها

ذاقت ابشع كلمات ممكن تسمعها من ثنيان وابشع افتراء تسمعه من منصور

تلفتت وكأنها تدور دروب الآمان اللي حست انها خرجت منها ، حست انها بهاللحظه زائده مثل صدى مهتز ماله معنى ، حست ولأول مره ضئلها وضعفها وكأنها أخف من غصن هزيل

ماتدري من وين بتجيها قوه وصبر بحجم كل اللي ذاقته ، تهشّم داخلها واحترق آخر املها

ملاك وحيده وبتموت وحيده ، هذا الصوت اللي كانت تسمعه بعقلها وتناظر البحر قدام عيونها

تغيرت ملامحها ولانت وكأنها استوعبت حجم خيبتها وحزنها وضعفها

'

-بعد مرور أسبوع -

وقف قدام الزنزانه الاخيره للنجاه وهو مبتسم بإنتصار وناظر اللي يستقبله بالخارج وخرج اول خطواته على الأرض ، على الحريّه

وتقدم بشنطته لين وقف قدام الشخص اللي انتصر معه وكان سبب في انتصاره واخذ حقه وهز راسه

لف منصور لجواهر وابتسم:نزور اهلي والا اهلك ؟

جواهر ابتسمت:اهل زوجتك

اتسع ثغره يناظر جواهر وهز راسه ومد كفه لها وابتسمت تناظره ومسكت كفه ومشى معها وفتح السواق السياره لمنصور وجواهر وركب

وركب السواق وحرك وابتسم منصور يناظر الطريق مع شباكه

ولفت جواهر:زارك ثنيان ؟

لف منصور وهز راسه وهو يناظر الطريق:قبل أسبوع

جواهر:محد يدري وينه

لف منصور عليها وكملت جواهر:ولا لملاك

منصور:مستحيل مع بعضهم

جواهر:لا لا ثنيان لوحده شافوه بالمطار

سكت منصور يناظر الطريق وابتسم:المهم سلامتي مع اغلى غنيمه وانتصار

ابتسمت جواهر تناظره ورجعت ظهرها للخلف ولفت تناظر الطريق

ووقف السواق ببيت جواهر ونزل منصور من شاف راشد وبندر وام راشد بإستقباله

وابتسم وتقدم لهم وفتح ذراعينه بندر وتقدم يضحك منصور وحضنه

ابتسمت جواهر تناظرهم ولف منصور لراشد وابتسم راشد:النسيب

حضنه منصور وابتسم يلف على ام بندر:عمتي

سلم عليها وهزت راسها بهدوء تناظره ولف منصور:اعذروني جيت من سجني لكم على طول

بندر:حياك منصور حياك ببيتك

ابتسم منصور ولف لجواهر اللي تقدمت له ودخل معها للبيت

'

نهار ناظر منيف:بترجع منيف

منيف:وين ترجع ؟ جوالها واغراضها كلها عندكم وماهي مع ثنيان وينها ؟ جاوبني نهار وينها ؟

نهار تنهد:ملاك ما ينخاف عليها

منيف هز راسه:هالمره بخاف

نهار:طيب اخر مكان رحناه كان الشاليه ولا لقيناها يمكن راحت الدمام الخفجي اي مكان قريب

لف منيف عليه:مصرّ تهوّن الموضوع نهار ؟ اقولك كل اغراضها هنا اختي ما خرجت من البيت الا هاربه

نهار تنهد وناظره منيف وهز راسه بتعب:تركتني وتركت كل شي

جلس منيف بصدمه وهمس:تركتني

رجع ظهره لورا نهار يناظر حال منيف ولف من دخل عقاب عليهم ورفع عيونه منيف:وش صار ؟

عقاب:ماعرفت شي ، ثنيان برا السعوديه لكنه لوحده

نهار:وش صار عليهم هم ؟ ليه كل واحد بمكان ؟

عقاب ناظر منيف:صار شي بينهم ؟

منيف رفع متفه:قلت لك دق علي ثنيان يدورها بعدها ماعرفت شي

عقاب جلس واخذ نفس:يرجعون انا متأكد

منيف سكت وناظره عقاب:ملاك بالذات بترجع

هز راسه منيف:يارب

خرج نهار من الديوانيه وتقدم للبيت وتقدمت له أصايل:وش صار ؟

نهار:منيف متوتر وابوي ماعرف شي عن ملاك

نوره ضربت رجلينها:هالبنت بتجننا عليها وش صار عليها ؟

نهار:ماندري الموضوع يخوف بس مابغيت اقول شي لمنيف ، الشاليه كان مفتوح يوم رحناه وسيارة ملاك موقفه لكنها مو موجوده

جلست أصايل بخوف وناظرت نهار:نهار ما بتسوون شي ؟ يمكن فيها شي يمكن صار لها شي

نهار:ابوي متكفل بالموضوع وبيعرف قريب ان شاء الله

تنهدت نوره:الله يردك بالسلامه ياملاك

أصايل:اكيد تهاوشت مع ثنيان والا ماكان ثنيان هرب بعد وسافر

نهار:وش صار عليهم ياخي ؟

أصايل رفعت كتوفها بتعب ولفت تناظر الديوانيه من بعيد

'

دخل جاسر الغرفه ورفعت عيونها شادن عليه وتقدمت له:اخوي خرج

لف عليها بصدمه جاسر وعقد حاجبينه:كيف خرج ؟

شادن رفعت كتوفها:اندفعت الديّه اللي مادفعتها انت

جاسر:وينه ؟

شادن:ببيت اهل زوجته

جاسر تقدم لها:اي زوجه

شادن ناظرته:بنت بندر

سكت جاسر وعقد حاجبينه اكثر وكملت شادن:جواهر اللي طلعت منصور من السجن

جاسر تقدم وناظرها بصدمه:انتم من وشو مخلوقين ؟ وش هالمخططات ؟ كيف جواهر جابت درب لمنصور ؟ وكيف منصور انتقم من ملاك واخوي بهالطريقه ؟

شادن رفعت كتفها:هذي عدالة الله

جاسر:اي عداله ؟ انتم بغابه

شادن سكتت تناظره وهز راسه جاسر:مابيك تكونين موجوده من اليوم ، اطلعي من البيت اللي دخلتيه واخرجي بشرّك

شادن ابتسمت وناظرها جاسر:اطلعي انتي وبنت عمك من حياتنا

شادن:هذا اللي كنت ابغى اقوله وكنت انتظرك ، انتيهنا ياولد العميد

جاسر هز راسه بذهول منها:اذا قدرتي تغدرين ببنت عمك مع اهلك وش بقى بتسوين ؟

شادن:على اساس انت ماغدرت فيها ؟ حتى انت كنت بتطيحها معي

جاسر:اقسم بالله ولا اجي بربع شراستكم وعداوتكم لها ، انا ما اخذت منها غير حق اهلي وتبقى غريبه ما يربطني معها دم ، لكن هي عاشت معك ببيت واحد وبعتيها برخيص بلحظه

شادن تقدمت للدولاب تفتحه وتلم اغراضها:كل شخص بياخذ حقه

ولفت عليه وابتسمت:والحين اقدر اخرج من تحت سلطتك واخيراً

جاسر سكت يناظرها ولفت شادن تكمل اغراضها وعقد حاجبينه برعب جاسر وصدمه من خروج منصور واقترانه بجواهر

ابتسمت شادن وناظرته وناظرها جاسر لآخر نظره وخرج تاركها

'

دخلت أصايل المستشفى تكمل تدريبها بيومها الأخير ودخلت تشوف المتدربين اللي بالقسم

جلست بزاويه لوحدها بضيق من الوضع ببيتهم وحاجتها لملاك وخوفها على ثنيان وخطبة منيف لها اللي للحين ما جاوبت عليه

ما عاشت فرحتها بخطبته رغم انها تمنته وحلمت فيه لكنه يوم جاها ، جاها بوقت غريب ومبعثر

اخذت نفس تناظر كفوفها وناظرت الثوب اللي تقدم لها ورفعت عيونها تشوفه واقف

ولانت ملامحها تشوف الكيس اللي بيده والورد وكوبين

وابتسم بهدوء بدون يبيّن اسنانه:ماقدرت ما أجي

وقفت بصدمه تناظره وكمل منيف:وأبارك لك بنهاية تدريبك

رمشت بهدوء وهمست:كيف عرفت ؟

منيف ناظر عيونها:اللي مهتم يعرف

بلعت ريقها ورجفت يدينها ومد لها البوكيه واخذته من كفه وابتسمت ورفعت عيونها عليه من تجمعت دموعها وفهمها ، فهمها من شاف اختلاف حالها

ونطق:دريت ان محد بيكون معك وانتي متعوده يكونون حواليك ، ودريت ان الوضع الحين أشدّ ضيق علينا كلنا بس مع ذلك جيت

عضت شفتها تتأمله ورفع كتفه منيف:يمكن لأني اشعر بالوحده مثلك

ناظرت عيونه ونظراته لها وهمست:بترجع ملاك

هز راسه بالنفي:حتى انتي مو متأكده حتى انتي تحترين

مسحت دموعها اللي نزلت بعشوائيه:مشتاقه لها بس والا ماراح اخاف عليها او اخاف على ثنيان حتى

تنهد منيف وجلس وحط الاكواب بحضنه والكيس بالارض وناظرته أصايل وجلست جنبه بالورد وناظر الفراغ منيف:كنت اقولها تروح بس ما ظنيت تروح بدوني

عقدت حاجبينها أصايل من ضيق منيف ووضعه وبللت شفايفها:منيف

لف عليها من نادته وناظرها وهزت راسها له:أنا موجوده وأعرف ماراح أسدّ مكانها لين ترجع بس

سكتت بتردد من نظراته والتفت بجسمه عليها:هذا أطول حديث معك وأول اسم اسمعه وأول مره اشوفك فيها بعد ما خطبتك

بلعت ريقها بربكه واخذ نفس منيف:يمكن وصلك الخبر في وقت ماهو مناسب وانا خطبت بوقت ماهو مناسب

ناظرته أصايل ترتخي من شعوره ونظراته وكمل منيف:بس أول مره أشعر ان لي صوت وشعور اقدر أوصلّه

سكتت وكمل منيف:لانك غاليه ومدللـه وبنت العميد عقاب ولأنك اخت النهار وصيتك يسبقك يوم جيتك ، جيتك من مجلس بيت ابوك لوحدي ما استحيت من وحدتي

هز راسه يناظرها:ووقفت عندك نهايتنا ، وقف عندك الكلام وانا نسيت نفسي وتركت كل الدروب وجيتك ، وفاضت مشاعري ولا أقدر أخفّي زود ، انتي أول من دخل صدري وفتق من داخله خيوط ملونه وأسقى ربيع عاش طول عمره في عجاف

ناظرت عيونه أصايل من كلامه وكمل منيف:غنيمة أيامي وأصح اخطائي

نزلت عيونها للورد واخذ نفس منيف:وادري ان الطريق بيوقف بيني وبينك لين ألقى طريق ملاك لكني أبي اعرف من انا عندك ؟

رفعت عيونها أصايل عليه تناظره ونزلت عيونها للأكواب المقفله وهمست:ماتشا ؟

ناظرها منيف ورفعت عيونها عليه وهز راسه وتقدمت تاخذ من حضنه كوب وناظرته:اسألني أبيها ؟

سكت يفهم تلميحها وحياها من اجابته بالصريح وابتسم بهدوء:ماهو مهم تبينها المهم تحبينها ؟

ابتسمت أصايل تشرب من الماتشا وصدت عنه واتسع مبسم منيف وناظر الكيس:شريت لك بودرة ماتشا وعدتها عشان تشربينها بالبيت

لفت عليه وناظرها منيف:بيتنا

سكتت بربكه وصدت عنه وابتسم منيف ولف يفتح كوبه ويشرب من الماتشا

-

عقاب لف عليه:جرّب البنك شوف اخر عمليات الدفع من هناك نعرف وينها

لف منيف يناظر ويترقب وهز راسه العسكري:برفع طلب للبنك واشوف

عقاب:لا ترفع انا ما انتظر ، اتصل على مدير البنك وعطني السماعه اكلمه

هز راسه العسكري وحط نهار يدينه بجيوبه ينتظر واخذ السماعه عقاب:سلام عليكم

تقدم منيف بتوتر يسمع

عقاب:معك العميد عقاب بن جرّاح ، ماعليك زود ، عندنا بحث مهم وما يتأجل ابد ، ملاك بنت مساعد نبحث عنها ونبي اخر عمليات دفع من بطاقتها البنكيه

هز راسه عقاب:اعرف حدود الشغل وضوابطه والله بينرفع طلب وبيوصلك لكن ودنا نستعجل وتشوف الموضوع الان

اشر عقاب للعسكري ولف للكمبيوتر العسكري

وهز راسه عقاب:الله يطول بعمرك ننتظر اتصالك

مد السماعه عقاب ونطق منيف:وش صار ؟

عقاب:دقايق يشوف الموضوع ويتصل

رجع ظهره للخلف منيف وناظرهم نهار:يمكن ما استعملتها

عقاب:يمكن ويمكن اي ليش ما نجرب ؟

منيف:اكيد استعلمت بطاقتها مستحيل تعيش بدون فلوس

عقاب:هي وين عاشت اصلاً ؟

سكت منيف وتكتف ينتظر الايام تمشي بسرعه والى الان ما هدأ باله وسكن ، وين ملاك ؟

مرّت اربع ايام زود على الاسبوع ولارجع ثنيان ولا ملاك رجعت

رفع عيونه وبلع ريقه يشوف عقاب اللي وده يصارحه ويقوله ان يمكن ملاك هربت او ثنيان ضغط عليها وعرف كل شي وهددها وهربت

ما يعرف وين ودته هواجيسه الا يوم دق التلفون وفزّ

تقدم عقاب واخذ السماعه:هلا ، معك

هز راسه واشر للعسكري وهز راسه العسكري:وصلت

عقاب:وصلت ماقصرت معنا

قفل التلفون وناظره عقاب:وين ؟

العسكري:قبل ساعتين

جمد وجه منيف وكمل العسكري:فندق جبل عمر

عقد حاجبينه عقاب وكمل العسكري:مكه المكرمه

لف عقاب على منيف وعقد حاجبينه منيف ونطق نهار:في مكه ؟

'

مشت بين الحشد والاعراق والجنسيات وتدخل داخل حدود الحرم اللي هربت له رغبه بالشفاء بالتطهير بالجبر ، الراحه والاطمئنان

تقدمت تناظر الكعبه من بعيد براحه تغمر جوفها ونزلت مع السلالم الكهربائيه ومشت تدخل في صحن الطواف

وقفت بين الطائفين وعيونها على الكعبه ونزلت دموعها وتقدمت تدخل بين الحشد تسمع أدعيه بكل اللهجات وتسمع دموع وآهات ، حاجات ومطالب وأمنيات

كان الوقت ٤ بعد منتصف الليل وقبل أذان الفجر ، جوف الليل

تمسكت بالكعبه ومن لمستها بكت ، ماكانت تشعر بالتزاحم لان داخلها أزحم من كل هذا الحشد

حطت راسها على الكعبه وهي تبكي وكل مطلبها ، انها ما تيأس ما تقنط ما تجزع

مرّت بأشياء كثيره ، خذلان وفقد وأقسى كلام

لكنها تمسكت بأغلظ حبل ، إيمانها بالله ووجوده

شهقت وهي تبكي ونطقت بحرقه:يارب ، يارب جيتك من أقصى مكان من أبعد مدى ، جيتك بإنكسار املأ جوفي اطمئنان وامسح على قلبي

مسكت صدرها تدقه بهدوء وبتعب وبثقل:يارب سامحني يارب

بكت من جديد ورفعت راسها:سامحني يارب ، عوضني يارب وأجبرني يارب يارب هذا القلب القلق ‏آمنه بأمانك حتى يطمئن ، يانور هذا الكون ، يا عون من يطلب العون

شهقت تمسح دموعها وهمست:ارضى عني وارضني مالي سواك ، جيتك مالي سواك يارب انت الحكم وانت القاضي يارب

رفعت عيونها وتنهدت وسع رئتها ولفت تترك مكانها وتمشي

اخذت لها ماء زمزم وجلست أمام المعتمرين والكعبه وسكن جوفها وهدأت روحها تناظر الحرم بسكون

انتظرت دقايق وأذن للفجر ووقفت تسمع أذان الحرم بمسمعها كله بيقين : الله أكبر

أكبر من كل الهموم وأسباب الهموم ، أكبر من الدنيا وحياتنا بالدنيا ، وأرحم بنا منا ، قادر على أن يجبر كسرك ويقوي ضعفك ويؤنس وحدتك ويحقق أمانيك

كانت تعلم ان كل هذا الابتلاء والثقل اللي جعلها تتوارى عن أعين الناس وتذهب لله في دجى الليل شاكيه وداعيه وراجيه لم يكن عبث بل كان رحمة من الله لينزع من صدرها حب الدنيا وزينتها

رفعت راسها وهمست:يارب

مشت تصطف مع المصلين وتكبر وتصلي

'

سحب شنطته بيده وجوازه بكفه وخرج من المطار ووقف يناظر حوالينه

راجع لنفس المكان اللي تأذى منه بعد ما طاب لوحده وسافر لبعيد ، راجع الان لنفس المكان

فتح شنطة سيارته وحط شنطته وركب يشغل سيارته

واخذ نفس من تذكر وجودها يمينه ، مع انه حلف انه طاب ورجع أقوى لكنه من أول مكان تذكرها على طول

لف يناظر مقعدها ورجع يلف يناظر طريقه وحرك

مشى للخبر وفتح جواله يسمع رسايله والاتصالات اللي تراكمت عليه ولا فكر انه يناظرها حتى

ناظر بيتهم من بعيد ماشي له وعقد حجاجه من حريق جوفه واشتعال النار داخله

ووقف عند البوابه ثواني وغمض عيونه بتعب واخذ نفس ودخل البيت يوقف سيارته بجانب سيارات اخوانه

وشد على الدركسون ثواني وفتح بابه ينزل ومشى يناظر بيتهم ودخل

مشى للصاله ولفت نوره:نهار ؟

وسكتت من شافت ثنيان وجمد وجهها بصدمه وتقدم ثنيان وهمس:أمي

وقفت بخوف تضمه وغمض عيونه من حضنته وانحنى لها

نوره:ثنيان أمي وين كنت ياحبيبي ؟ ليه تخوفنا عليك ؟

ثنيان مارد وهو مغمض عيونه وابتعدت نوره تناظر شعره اللي حلقه ولونه اللي تغير وهمست:وش صاير معك ؟

ثنيان رفع كتفه ولمست خده نوره:وش صاير يا امي وش صاير علمني لا تخوفني عليك

جلس ثنيان وجلست جنبه نوره وانحنى يحط راسه على فخوذها وناظرته بخوف نوره ومسحت على راسه:ما بتعلمني ثنيان ؟

ثنيان:ماصار شي

نوره:كيف ماصار شي انت اختفيت وملاك اختفت ولا بلغتونا بشي ، ملاك معك ؟

سكت ثنيان بدون رد من جابت طاري ملاك وناظرته نوره وجلس ثنيان بتعب ولف على نوره:معد في ملاك

عقدت حاجبينها نوره وكمل ثنيان:ولا تسألين اكثر

وقف ومشت خلفه نوره:شلون يعني ما اسأل ثنيان انت تبي تمشي الامور كذا ؟ انا بسأل وابوك بيسأل لين مانفهم

مارد ثنيان وهو يمشي وفتح الغرفه وناظر الغرفه وتقدمت نوره:ابوك منشغل يدور على ملاك مالقينا لها مكان ، تركت سيارتها بالشاليه ولاندري وينها

ناظر الغرفه ثنيان بتعب ولف لامه وهز راسه بهدوء

وتقدمت بخوف نوره:يا أمي ياثنيان

ثنيان:امي جاي تعبان ابي ارتاح

سكتت نوره تناظره وهزت راسها وخرجت ومن قفلت الباب غمض عيونه بقوه من اعتلت صدره جمره كَوت داخله

فتح عيونه يناظر السرير ومكانها ومشى ينسدح مكانه وغمض عيونه ، يذكر اخر نومه نامها على صدرها ، اخر أمان عاشه واخر شعور

يذكر لمسات كفوفها لشعره وكأنها موجوده الان

فتح عيونه بتعب يناظر السقف

'

دخل عقاب البيت وتقدم لنوره:هذي سيارة ثنيان ؟

هزت راسها وتقدم بصدمه نهار:ثنيان رجع ؟

نوره:رجع ولا علمني وش صاير سألته عن ملاك وقال ماعاد في ملاك

سكت عقاب ثواني:ملاك في مكه

عقدت حاجبينها نوره:وين ؟

عقاب مشى يجلس ورفع عيونه لنوره:وش صاير مع ولدك وملاك ؟

نوره:ما ادري سألته ماجاوبني حاله ماهو زين عقاب

نهار تقدم يجلس ورفع عيونه عقاب من دخل جاسر:ثنيان رجع ؟

هزت راسها نوره:اي اي

جاسر سكت بقلق ولفت له نوره:انت وينك خليت الصغار مع الخدامه وطلعت ؟ وين زوجتك ؟

جاسر ناظر ابوه:ابوي انا طلقت

بقق عيونه نهار ولفت نوره بصدمه:وش تقول ؟

جاسر:انتهى اللي تعبنا عشانه

نزل عيونه عقاب وهز راسه:هذولا عيالي

لفت نوره ومسكت راسها بتعب ورفع عيونه جاسر لنهار اللي يناظره مصدوم

ولفوا من دخل ثنيان وناظرهم:سلام عليكم

ناظرته نوره:مانمت يا أمي ؟

تقدم لأبوه وانحنى يبوس راسه ولف لنهار اللي وقف له:اشتقنا لك

حضنه ثنيان وضرب كتفه ولف لجاسر اللي واقف

ظل يناظره جاسر بقهر على حاله وهز راسه ثنيان وناظرهم عقاب وقوف قدام بعض

وتقدم جاسر يحضن ثنيان وتنهد ثنيان وابتعد يناظره جاسر:حمدلله على سلامتك

هز راسه ثنيان وجلس وناظره عقاب:وش صاير معك ؟

ثنيان لف لابوه وهز راسه بالنفي:ولاشي

ناظره بعصبيه عقاب ورفع صوته:وشو ولاشي كيف ولاشي ، تغيب كل هذي المده وترجع وتقول ولاشي ، تختفي زوجتك وندورها ما نلقى غير سيارتها واغراضها بالشاليه ؟ وش صاير ثنيان انطق

ناظرهم ثنيان بهدوء ورجع ظهره لورا:ولاشي انفصلنا

ناظرته نوره بصدمه ولف نهار:وش صاير معكم انتم؟

عقاب عقد حاجبينه:كيف يعني انفصلتم ؟

ثنيان:يعني معد في شي يربطني فيها

سكت عقاب يناظره ولفت نوره بصدمه:ليش ؟ وش يسوى ؟

ثنيان ناظر امه ورجع ناظر ابوه ونطق جاسر:ماكانت تناسبه اصلاً

نزل عيونه ثنيان ونطق عقاب:ماراح ينفتح هالموضوع لين ترجع ملاك واسمع منها نفس ما سمعت منك

رفع عيونه ثنيان ووقف عقاب وناظر نوره:شوفي عيالنا

تنهدت نوره ولفت تناظر جاسر وثنيان

خرج تاركهم ولف نهار:ليش ياخي ثنيان ؟ ليش ؟

ثنيان ناظر نهار وسكت وصد عنه وتأفف نهار من الوضع الفوضوي ووقف يخرج من البيت

ركب سيارته واخذ جواله يتصل ورد عليه منيف:هلا نهار

نهار:وش تسوي ؟

منيف ناظر يامور اللي قدام عيونه:بالبيت اهوجس

نهار اخذ نفس:ثنيان رجع

انصدم منيف وجلس:لوحده ؟

هز راسه نهار:لوحده

منيف سكت وكمل نهار:قلت لك لانك كنت تبي تعرف وش صار مع ملاك ومعه

منيف هز راسه:اي بشوفه ان شاء الله

نهار عض شفته يتذكر كلام ثنيان ولاقدر يقول شي وقفل جواله

ناظر جواله منيف وعقد حاجبينه يفكر ، يبي يعرف اللي حصل ووش صاير

لف من دق جواله من جديد واخذه واستغرب اسم عمه اللي على شاشة جواله وهمس:عسى خير

رد:هلا

محمد ابتسم:شلونك ولد اخوي ؟

منيف:حمدلله

محمد:افا ماجيت ولا تحمدت بالسلامه ؟ انا قلت يمكن ماعرف قلت اعلمك وتفرح لنا

عقد حاجبينه منيف:وش صاير ؟

محمد:منصور

سكت منيف وكمل محمد:خرج حمدلله بالسلامه

جمد وجه منيف وضحك محمد وناظر منصور اللي امامه:بلّغ اختك تفرح له

سكت منيف بصدمه وابتسم محمد:بلعت لسانك ؟

منيف همس:حمدلله على سلامته

محمد:ما يقبلها منك تعال بعشاك وذبيحتك

مارد عليه منيف وضحك محمد:يالله قلت اعلمكم ويكون عندكم خبر

قفل محمد وناظر جواله بصدمه منيف ، من طلعه ؟ وكيف خرج ؟ معقوله ملاك سددت الباقي وهربت ؟ والا وش صاير حوالينه ؟

'

ناظر العطر قدامه وهو هادي يتذكرها ، يتذكر بكاها وصوتها ونظراتها مستحيل يكون كل هذا كذب وتلفيق مستحيل ماهو قادر يصدق

اخذ نفس ولف ياخذ جواله وخرج من البيت

نزل ولفت أصايل:ثنيان ؟

تقدمت له وحضنته وغمض عيونه ثنيان:اشتقت لك

أصايل ابتعدت عنه:وانا اكثر ، وش صاير ؟

لف ثنيان يناظر ابوه وامه واخوانه ورجع ناظر أصايل:ولاشي

أصايل مسكت ذراعه:انتظرني بجي معاك

سكت ثنيان من مشت أصايل تاركته ولف يناظرهم جالسين وخرج

ركب سيارته ينتظر أصايل وخرجت وركبت جنبه وحرك بدون يتكلم

لفت أصايل تناظره هادي وساكن وهمس:امس جيت بس قالوا انك نمت انبسطت انك رجعت

هز راسه بهدوء وكملت:فين بتروح ؟

ثنيان رفع كتفه ولفت عليه أصايل:وقف هنا

وقف السياره على جنب ومسك كفوفه ببعض واخذت نفس أصايل:قولي ثنيان وش صاير ؟

ثنيان لف يناظر أصايل وهز راسه بالنفي:هربت ظني بتقنع واصدق بس ماقدرت ، اقسم بالله مو مصدق وكأني طحت بقاع جهنم من حرّ داخلي

عقدت حاجبينها أصايل تناظره وكمل ثنيان وهو يناظر الطريق:لمستني واحترقت وماصدقتها يوم قالت انها بتحرقني

هز راسه:ماصدقت

أصايل سكتت تسمعه ولف ثنيان على أصايل:معد في ملاك أصايل ، طريقي وطريقها تفارقوا

أصايل:ليش طيب ؟ علمني ؟ وشو السبب ؟ كانت اموركم حلوه كنتم متفقين ومناسبين بعض وش تغير ؟

ثنيان:كل شي

أصايل:طيب تعرف ان ملاك في مكه ؟

هز راسه ونطقت أصايل:يعني الموضوع كبير لدرجة انت تهرب للبحر وهي تهرب لربي ؟

ثنيان التفت لأصايل ومسكت كفه أصايل:ماراح ينتهي شي انا بنفسي بحل كل شي بينكم وترجعون احسن من قبل

ثنيان:لا أصايل لا تتدخلين وابعدي عنها خلاص ماراح تدخل بحياتنا من جديد

أصايل:كيف ماترجع تدخل كيف ؟ ملاك اكثر من اختي وماراح ارضى على اللي صار

تنهد ثنيان بتعب وحرك سيارته:برجعك واروح

أصايل:فين بتروح ؟

ثنيان:عندي شغل

أصايل:قولي اول ماراح تختفي ؟

ثنيان هز راسه بالنفي وناظرته أصايل بضيق ووقف عند البيت ولفت أصايل:اي شي تبي تقوله بسمعك

ابتسم لها بخفوت وتقدمت له تحضنه وتنهد يحضنها ونطقت أصايل:كل شي بيكون كويس بإذن الله

ابتعدت عنه ونزلت من السياره وحرك ثنيان سيارته

عض شفته بتفكير ومشى دربه لين بيتها

ووقف يناظر البيت تردد ومشى ورجع يوقف وضغط على كفه ما يدري وش يسوي لكن ناره تكويه وما يقدر يقاوم احتراقه اكثر

قفل سيارته ونزل ومشى للبيت ودق الباب

ومشى منيف وفتح الباب وجمد وجهه وهمس:ثنيان !

ثنيان ناظر منيف بقهر وسكت منيف من شاف نظراته ورجع خطوه لوراه:حيّاك

هز راسه بالنفي ثنيان:جاي اخذ حقي منكم

منيف:ادخل ثنيان ادخل

ناظره ثنيان وهز راسه منيف ومشى ثنيان يدخل البيت

ناظر البيت ويتذكر اول جيّته هنا عشان يهدد ملاك وعشان يخطبها ويذكر

يذكر اول مادخل الصاله هذي وجلس على سفره وحده معها ومع منيف واكلوا سوا

جلس ثنيان ومشى منيف وناظره وجلس قدامه:شلونك ؟

ثنيان ناظر منيف:محترق

تنهد منيف:وش عرفت ؟

ثنيان هز راسه:كل شي

بلع ريقه منيف بتوقع وكمل ثنيان:كل شي يخليني احترق ، منصور والديّه وسبب سجنه

نزل عيونه منيف وناظره ثنيان بقهر:انا دخلتكم بيت اهلي ووثقت فيكم ياخي

منيف رفع عيونه:ومن يوم دخلت ملاك بيتكم وقفت عن كل شي

صد ثنيان:ريحنا تكفى

منيف:اقسم بالله ثنيان ملاك من بعد زواجك وقفت كل شي ، وماقدرت تكمل واللي طلع منصور الحين ماهي هي انا متأكد

عقد حاجبينه ثنيان وهمس:طلع ؟

هز راسه منيف وسكت ثنيان

واخذ نفس منيف:ثنيان كانت تحترق بوجودها معكم وكانت بتهرب وتترك كل شي ، اي اعترف واقولك انها غلطت وسرقت ومشت بالشرّ بس صحت وهي جنبك

سكت ثنيان وكمل منيف:استوعبت وهي بينكم

ثنيان:انا صدقتها وساعدتها واكتشفت انها تعيش عشان واحد قاتل بالسجن ، سرقتني وسرقت اهلي وخربت حياتي ولصقت فيني فضيحه عشان واحد كلب قاتل

سكت منيف وتنهد بضيق وكمل ثنيان:ونفس ما دخلت ولد عمك بالسجن عشان واحد كانت بتدخلني انا بعد عشان منصور

رفع عيونه منيف وعقد حاجبينه:مو هي اللي دخلت منصور ، منصور بنفسه قتل واحد عشانه تحرش في ملاك لا يكذبون عليك ثنيان

ضحك ثنيان:تحرش اجل ، يقولي انها كانت تعرفه وجاهم بالمكتب لقاهم سوا وكان بيقتلها مع الكلب اللي كان معها

عقد حاجبينه بصدمه منيف وهز راسه:من قالك هالكلام ؟

ثنيان:هو بنفسه القاتل الكلب

منيف:منصور ؟

هز راسه ثنيان ورفع راسه منيف:اهخ يارب

نزل راسه وناظر ثنيان:كذاب ثنيان كذاب وكذب نفس ما كذب عمي وكذبت شادن

تنهد ثنيان بإنزعاج:ماصدقته اصلاً

منيف:اقسم بالله ماهو كذا ، ملاك عاشت شي محد يعيشه وتحرش فيها واحد بمكتبها وجاها منصور وقتله قدام عيونها ودليل محاكمته اصلاً فيديو كاميرا من مكتب ملاك وبوريك اياه دقيقه

وقف منيف وعقد حاجبينه ثنيان يسكت ثواني ودخل منيف غرفته وجلس على كمبيوتره ودخل خلفه ثنيان وناظره

بحث بين مقاطعه وتسجيلاته ولف لثنيان:تعال

تقدم ثنيان وانحنى وشغّل المقطع منيف

عقد حاجبينه يشوف ملاك جالسه على كرسيها ودخل عليها رجّال وركض لها يمسكها وبعدت عنه وضربها يثبتها على الكرسي ، فتح عبايتها وهو خانقها بكف وكانت تضربه وتحاول تتخلص منه

ودخل منصور وسحب الرجّال وطاح على الارض واخذ منصور درع من على المكتب وخبطه على راسه بقوه

جلس على صدره يضربه بتكرار وكانت ملاك واقفه تصرخ وماسكه راسها وتبكي

عقد حاجبينه ثنيان بصدمه ولف منيف:منصور يبي ينتقم من ملاك بس عشانها تزوجتك

لف ثنيان يناظر منيف وكمل منيف:دق عليها بيوم زواجكم وعمي ماقصر كان يروح ويعبّي راسه عليها وعليك

وقف ثنيان ورجع ظهره للخلف منيف على كرسيه:اي صحيح ملاك سوت كل هذا عشان منصور بس منصور خذلها بالنهايه وخذلها عمي وخذلتها شادن ، لكنها والله تعبت ثنيان وقاعده تاخذ نصيبها من الناس اللي سرقتهم واكثر

سكت ثنيان وكمل منيف:ولو انها ماتشعر بالذنب والخذلان والحب اللي عاشته معكم ماكان تبرعت بكليتها لابوك ، تشوفه مثل ابوها وتشوفكم اهلها وبكت ايام طويله من صوت ضميرها

بلع ريقه ثنيان يشد على كفه وكمل منيف:كانت الفتره الاخيره تجي البيت وتنام بالصاله بعد ما تبكي ، كان كل كلامها عن تعاملكم معها وكيف تنادونها بنتي وتحتونها وانت اكثر واحد ثنيان شاف حزنها بميلادها انت شفت ثنيان

ثنيان هز راسه بتعب:ماني قادر

منيف وقف وتقدم لثنيان:مابيك تسامحها واذا ماتبي اختي لا ترجعّها بس لا تصدق كلام احد عنها ، انت عشت معها وانت عرفتها وما كذبت بشي عليك كل اللي قالته كان صدق لكن خبّت الحقيقه ما كذبت

بلع ريقه ثنيان وكمل منيف:عمي حرقنا من واحنا صغار ثنيان ، احترقنا بينه وخرجنا من عنده ولا سلمنا ، للحين يبي يحرقني ويحرق ملاك معي مع انها تعبت عشان نكون منهم وحاربت وذاقت المرّ وخاطرت عشانهم ، بالنهايه شوف وش سووا فينا

ناظره ثنيان وهو ساكت وكمل منيف:ما يهمني شي الحين غير ان ملاك ترجع وتكون بخير

مارد ثنيان ومشى يخرج من غرفة منيف وتنهد منيف وجلس وناظر الفيديو بقهر ووقف بغضب يخرج من البيت ولف ثنيان من شاف منيف خارج وهمس:وين رايح ؟

منيف تعداه:اخذ حق اختي

مشى يفتح سيارته منيف ومشى ثنيان لسيارته وركب

وناظر سيارة منيف وغمض عيونه بقهر ، ملاك دفنت نفسها بالنار والجمر عشانهم ومحد للان اخذ حقها ورفم انه محروق ماقدر ما يلحق منيف

وقف عند بيت عمه منيف ونزل ونزل معه ثنيان ومشى  بسرعه منيف ودق الباب بقوه :منصور يا ابن الكلب اطلع

دق الباب بقوه ووقف خلفه ثنيان يناظره واقف محله

فتح الباب محمد وعقد حاجبينه:من الكلب ؟

منيف:انت وعيالك كلهم واللي جابك طلّع لي منصور الحين

خرج منصور وعقد حاجبينه وناظر منيف:خير انت ؟

منيف:وش قايل عن اختي ؟ وش قايل عن ملاك يا ابن الكلب ؟

رفع عيونه منصور لثنيان اللي واقف وناظر منيف:اذا عرفت تتكلم زين فتحنا لك بابنا

جاء بيقفل الباب وتقدم منيف وسحب منصور من ياقته وضربه

ومسكه بقوه منصور وتضاربوا وتقدم محمد بيفزع ومسكه بقوه ثنيان ولف عليه محمد بذهول

وقف منيف ورفس منصور على بطنه ولف لعمه يناظره:اقسم بالله اللي يدوس على طرف من اختي ملاك لأدفنه والله لأحرق هالبيت فوق روسكم ، خلاص عاد

محمد:والله لأشتكيك والله لأخليك تخيس نفس ماخاس ولدي

ثنيان لف لمحمد:زين تدري انه خسيس

وقف منصور وضحك وهو يتنفس بسرعه:وشو صدقت الهطف ذا وكذبتني ؟

ثنيان:ابلع لسانك لا اكمل عليك انا بعد

منصور:تعقب

تقدم ثنيان ومسكه منيف وضحك منصور:دام جيت بقدم لك هدية سلامتي بتعجبك

لف محمد عليهم وتقدم منصور ماسك بطنه وضرب الباب:يا أم محمد

عقد حاجبينه ثنيان ووقف منيف يناظرهم وخرجت جواهر من البيت وناظرت ثنيان وجمد وجه ثنيان من وجودها وعقد حاجبينه منيف يناظرها

وابتسم منصور يناظر ثنيان:شرايك ؟

رفعت حاجبها جواهر وتكتفت تناظر ثنيان وناظرها ثنيان بصدمه وعدم تصديق ورجع ناظر منصور اللي مبتسم:وش تسوي هنا ؟

منصور ضحك وتقدم ثنيان:انت وش قاعد تسوي ؟

منصور:اخذ حقي منكم

ثنيان رفع صوته:اي حق ؟ اي حق اللي اخذناه منك وبتردّه ؟ انت اللي قتلت وهذا جزاك ؟ انت صاحي والا مهبول ؟

ولف لجواهر بصدمه:كيف وصلتي له ؟ من دلك عليه ؟ ووين اهلك ؟

منصور سحبه من ذراعه:كلامك معي

رفع كفه ثنيان يصفعه كف وتقدم محمد يسحب ثنيان ورفع صوته منيف يدخل بينهم

وتقدم ثنيان يضرب منصور اللي ردّ له الصفعه وتضاربوا قدام عيون جواهر

وناظر عمه منيف بقهر من تسلطه ومن يده اللي يحاول يمدها عليه وضربه يدفعه وطاح محمد يجلس على الارض ولف منيف لثنيان يسحبه

وناظره ثنيان بغضب ورفع صوته:اقسم بالله ويمين بالله ان طلعت بوجهي لأذبحك وأبكي اهلك عليك تفهم ؟

منصور:تخسى ياولد عقاب تخسى وانا اللي برباك انت وزوجتك الـ

رمى شتيمه وتقدم منيف بيصفعه وابتعد منصور عنهم وناظره منيف:والله يامنصور لاطلع عشرتها من عينك ياجاحد

منصور:توكلوا بس لا انادي لكم الشرطه تلقطكم

ناظره ثنيان بغضب وهز راسه والتفت منيف وسحب ثنيان معه

وخرج ثنيان ومسك ركبته يتنفس بتعب وبلل شفايفه يذوق دمها واخذ نفس منيف ولف لثنيان يناظره

رفع عيونه ثنيان يناظر منيف وهمس ثنيان:ديني ودين الجحود

منيف هز راسه وهو يتنفس:ماقصرت

مشى ثنيان يفتح سيارته ومشى منيف يركب سيارته وحركوا سوا مبتعدين

ناظر وجهه ثنيان وشد على اسنانه بقهر من منصور وكلامه وغضبه وجحوده وهز راسه بصدمه:ما يستاهل ياغبيه ما يستاهل

انقهر من كل اللي سوته ملاك عشان كلب مثل منصور وشد على يده بقهر

ضرب الدركسون يتذكر جواهر يبي يعرف وشلون وصلت لمنصور وليه بندر ما نشر خبر زواجها ؟ وليه ما ما كان يدري عن شي ؟ ومتى تزوجها ؟ وهي اللي طلعته والا لا ؟

اسئله براسه كثيره مالقي لها اجابه وصرخ بقهر:اهخ ياملاك

النار تحرقه من ملاك واللي سوته بحياته وحياتها

نزلت من الطياره بدون شنطه نفس ما سافرت بدونها لمكه ومشت تاخذ لها قهوه بهدوء نفس هدوء داخلها

وشربت من القهوه تخرج من المطار وتركب تاكسي للخبر

ناظرت حوالينها الطريق والبحر واخذت نفس طويل تشوف الموج ، الموج اللي صار يشبهها وتشبهه

ونزلت عيونها بهدوء لين وصلت للخبر وعطته عنوان بيت منيف

ووقف التاكسي عند البيت وناظرت سيارة منيف ودفعت له ونزلت

مشت للبيت واخذت نفس طويل ودقت الباب ما فتحته

وقف منيف ومشى يفتح الباب وجمد وجهه يوم شاف ملاك

ابتسمت له تشوف تعابير وجهه وتقدمت له تحضنه وانصدم محله وهمس:ملاك

غمضت عيونها وهي حاضنته:اشتقت لك

عقد حاجبينه وابتعدت عنه تناظر وجهه:ما اشتقت لي ؟

منيف:ليه ؟

تنهدت ولفت وقفلت الباب ومشت للبيت وفصخت حجابها وجلست ورفعت عيونها له من دخل

منيف:ليه ملاك ليه ؟

ملاك:عشان هذا المفروض

منيف جلس وناظرها وابتسمت له:بس رجعت احسن لا تخاف عليّ

منيف:كل شي سيئ ظنيته خفت عليك ودورتك ولا نمت ، ليه ملاك ؟ ايه تعاقبيني معك ؟

ملاك:منيف تكفى افهمني

منيف هز راسه:على الاقل علميني لا تخوفيني عليك تعرفين وش يعني الاقي سيارتك واغراضك بالشاليه ولا احصلك انتي ؟ تفهمين وش يعني اللي عشته ؟

ملاك رفعت كتفها:ما فكرت بشي وقتها

تنهد منيف ورجعت ظهرها لورا:مين دورني معاك ؟

منيف:كلهم

سكتت ثواني وكمل منيف:ثنيان كان عندي هنا امس

رفعت عيونها ملاك واخذت طرحتها:بدخل اريّح

منيف:ماتبين تسألين عن شي ؟

هزت راسها بالنفي وتركته تدخل غرفتها

غمضت عيونها بتعب وانسدحت وناظرت صورها اللي بالغرفه وصور اهلها

وتقدمت تفتح درجها وطلعت من داخله ألبوم الصور وجلست بإعتدال تشوف صورهم وابتسمت تلمس وجيههم

ولفت باقي الصور تشوف صورتها مع شادن ومنصور ومنيف وعقدت حاجبينها بإنزعاج تناظر وجيههم

مستحيل هم اللي عاشت معهم واستأمنت روحها بينهم ، ماظنت بيوم انها بتتعور ومن هذولا اللي كانوا اقرب لها من اي احد

وقفت بالألبوم تفتح لابتوبها اللي على طاولتها وجلست تسحب كرسيها وفتحته تبحث عن رقم ديّة منصور ورجعت ظهرها لورا تنتظره يفتح

ولانت ملامحها مالقت للديّة أثر ، عقدت حاجبينها تكتبه من جديد ولا جاها شي

جمد وجهها من شكت بخروجه ومشت وخرجت برا وناظرت منيف:وش صار ؟

تنهد منيف يناظرها وهمس:منصور خرج

جمد وجهها بصدمه وعض شفته منيف يناظر تعابيرها

تمسكت بالكنبه تجلس وتناظر الفراغ ورمشت بهدوء ولفت على منيف بخوف:عرفوا ؟

هز راسه بالنفي:اذا قصدك عقاب وعياله لا ، ثنيان بس اللي يدري

رجف قلبها من اسمه وتنفست بسرعه بخوف

وتقدم منيف يجلس جنبها:كان عندي ثنيان

هزت راسها بالنفي:مابي اسمع شي منيف تكفى تعبت لين استجمعت نفسي مابي شي يهدني من جديد

منيف:ماتبين تشوفين عقاب ؟ تراه سهر بالقسم يحاول يعرف مكانك

هزت راسها بالنفي ولفت عليه:مو اليوم

سكت منيف واخذت نفس بتوتر ملاك ولفت لمنيف:شفت منصور ؟

هز راسه منيف:وعرفت وش قال عنك لثنيان

صدت وغمضت عيونها بتعب وتقدم منيف:وعطيته حقه واخذت حقك منه

لفت وعقدت حاجبينها:وش سويت ؟

منيف:رحت ضربته ببيت عمي وثنيان كان معي

ملاك:ثنيان وش يسوي معك؟

منيف:ياخذ حقك

سكتت ملاك وكمل منيف:وريته فيديو القضيه وعلمته ان منصور يلفق عليك كلام ويقذفك بشي مستحيل يمسّك ورحنا سوا نهدّ فيه

ابتسم ثواني منيف:وضربت عمي بعد

جمد وجهها بصدمه:منيف ؟

منيف:ليش تناظريني كذا ؟ هذا حقهم وحق اي واحد يتكلم عليك ، مستحيل اسمح لهم يجحدونك ويخربون سمعتك واقعد

سكتت ثواني وهمست:وش قال ؟

منيف:ماقال شي ثنيان بس ماهو مصدقهم انا متأكد

لفت ملاك بهدوء ورمشت تناظر الفراغ قدامها

منيف مسك كتوفها بقوه:ما بسمح لأحد يعورك اكثر يكفي اللي جربتيه منهم

تنهدت ملاك بتعب وهزت راسها ورفعت عيونها من دق الباب وعقدت حاجبينها

ووقف منيف ومشى للباب وفتحه

نهار:الفال الطيب صاحي ؟

ابتسم منيف:صاحي وعندي ضيف

نهار تقدم:من ؟

منيف:ماتقدر تدخل السموحه بس ملاك

انصدم نهار وناظر منيف:احلف ؟ ملاك رجعت ؟

هز راسه منيف وابتسم وتقدم نهار يرفع صوته:ملاك اينجل تكفين بشوفك

ابتسمت ملاك بحنيّه من سمعت نهار يناديها ومشت لغرفتها تاخذ عبايتها ومشت تخرج

ورفع عيونه نهار بصدمه من خرجت له:اقسم بالله انها مليون مرحبا

ابتسمت ملاك بإمتنان لنهار:شلونك نهار ؟

نهار:وينك انتي ليه تخوفينا عليك ؟

ملاك اخذت نفس:لا تسأل عن شي اهم شي اني بخير قدامكم

نهار:والله حمدلله على سلامتك خوفتينا عليك

ملاك:اشتقت لك ولأصايل وخالتي شلونكم ؟

نهار:تعالي معي ارجعي البيت وشوفيهم تكفين

ملاك:لا لا تكفى نهار

نهار:عشان ثنيان ؟

سكتت ملاك ولف منيف عليها ورفعت عيونها عليهم:لا نهار

نهار:وش صار معكم ؟

ملاك:ولاشي

نهار:ولاشي انتي وهو اتفقتم تقولونها ؟

ملاك انضغطت ورفعت يدها على عنقها بتعب ولف منيف:بلغ عمي عقاب وان شاء الله ترتاح ملاك وتشوفه

نهار هز راسه:ملاك ان احتجتي شي كلميني

هزت راسها ملاك وابتسمت له وابتسم نهار ورفع كفه يضرب لها تحيّه وضحكت بخفوت

وابتسم منيف ومشى نهار راجع وعض شفته يسوق

راجع للبيت ودخل يوقف سيارته ويدخل البيت:امي

لفت نوره من صوته ورفع راسه ثنيان

دخل نهار وابتسم:خبر بمليون ريال وسياره

عقاب:وشفيك ؟

نوره:بسم الله وش صاير ؟

نهار ابتسم وناظر ثنيان:ملاك

لانت ملامح ثنيان وكمل نهار:رجعت

شهقت أصايل بصدمه ولفت نوره:اسألك بالله ؟

نهار:والله عند منيف قبل شوي كنت عندهم

أصايل وقفت:تكفى خذني اشوفها نهار

عقاب سكت ولف لثنيان اللي صد بهدوء

ولفت نوره:عقاب قوم نروح نشوفها

عقاب:جاي جاي

وقفت نوره تخرج وخرجت أصايل ولف نهار من لخلت جنى:وشفيكم؟

نهار:ملاك رجعت

رفعت حاجبينها جنى:بالله ؟

لفت تشوف ثنيان ولف عقاب عليه:ما بتجي ؟

هز راسه بالنفي ثنيان ورجع ظهره للخلف يشد على يده

ووقف عقاب يخرج من عندهم وناظر الفراغ ثنيان وهز رجله بتوتر

جنى همست:كل شي غريب شادن فجأه تتطلق وملاك فجأه ترجع

لف ثنيان عليها ورجع صدّ بلع ريقه يمسك ياقة تيشيرته من تعرقه من طاريها

وقف بربكه ووقف عند شباك الصاله يناظرهم رايحين ومسح على شعره اللي محلقه

'

اكلت من صحنها بهدوء ورفع عيونه منيف:بتنامين ؟

هزت راسها ملاك بدون تناظره وسكت منيف

ولفت من دق الباب ولفت لمنيف:علمهم

هز راسه منيف ووقف وارتبكت ملاك توقف وخرج منيف يفتح الباب ودخل عقاب:شلونك منيف ؟

ابتسم منيف وهز راسه:حياكم

دخل عقاب ودخلت نوره وبجانبها أصايل وناظرته أصايل ومشت تدخل

دخل عقاب وعضت شفتها ملاك تناظر نظراته لها تفهم عتابه وبلعت غصتها وهمست:معذوره صح ؟

هز راسه عقاب وتقدم لها:زي دايم

ابتسمت ومشت تحضنه وحضنها عقاب:خوفتينا عليك

ناظرت نوره وأصايل خلفه وابتسمت بين دموعها تشوف خوفهم وجيّتهم لها

وابتعد عقاب وتقدمت نوره تحضنها:الف حمدلله على سلامتك ياملاك خوفتينا يا أمي خوفتينا

ابتسمت بإمتنان ملاك بين دموعها وابتعدت عنها نوره:انتي بخير يا أمي ؟

هزت راسها ملاك وتقدمت أصايل وحضنتها ملاك وتنهدت تغمض عيونها

أصايل:اشتقنا لك

ناظرهم منيف وهو واقف وابتعدت ملاك تلف عليهم:حياكم

جلسوا وجلست ملاك تشد على ركبتها بربكه

وناظرتها نوره:وش صاير معكم يا أمي ؟ لا انتي ولا ثنيان لقينا لكم مكان

رفعت كتفها ملاك:ولاشي

عقاب:في في ياملاك واذا مارضي يتكلم ثنيان انتي بتعلمينا

أصايل عقدت حاجبينها بضيق:تكفين ملاك

ابتسمت تناظر سؤالهم وتجمعت دموعها بمحاجر عيونها وهزت راسها بتعب

ووقفت نوره تجلس جنبها ومسكت كفها:وش صار معكم ؟ تهاوشتوا ؟ احد دخل بينكم ؟ علميني يا أمي

تنهدت ملاك بضيق ورفعت عيونها لعقاب ودها تقوله كل شي ، كل شي ويحلّ لها امورها زي ما يحل مشاكل عياله دائماً

عقاب:علميني

ملاك هزت راسها بالنفي:ما اتفقنا

عقدت حاجبينها نوره:وشلون ما اتفقتوا ؟ انتم دايم متفقين ما اختلفتم

هزت راسها بالنفي ولفت لنوره ولفت نوره على عقاب

عقاب:ومهما ، مايكون الحل تنفصلون

رفعت عيونها ملاك وهمست:يبي ينفصل ؟

عضت شفتها أصايل ولفت لعقاب اللي سكت

وبلعت ريقها ملاك ولفت لمنيف وناظرهم منيف وهو ساكت

واخذت نفس ملاك ورجفت كفوفها تستجمع نفسها:يصير

عقاب:لا ما يصير بتعلميني انتي مابي اسمع من ثنيان وان طلبتي انتي تنفصلون بكون معك

أصايل:ملاك تعالي البيت عندنا واجلسي مع ثنيان ومع ابوي وتكلموا يمكن تنـ

وقفت بتوتر ملاك تمسح كفوفها:لا لا خلاص

ناظرتها نوره:ملاك يا أمي

ملاك:تكفون لا تضغطون عليّ

هز راسه عقاب وسكتت نوره بتعب ووقف عقاب:جينا نطمن عليك وهذا المهم ، سلامتك ، وان بغيتي تتكلمين تلاقيني دايم

ابتسمت له بهدوء ملاك ووقفت أصايل بتعب ولفت تناظر منيف اللي جالس ورفع عيونه عليها

تنهدت من وضعهم ووضع ملاك وثنيان وخرجت ولف عقاب على منيف:ان احتجتم شي كلمني

هز راسه منيف ووقف:ماتقصر عمي

لفت نوره تمسح على ذراع ملاك وابتسمت لها ملاك:شكراً

تنهدت بحنيّه نوره وتقدمت ملاك لها:احضنيني من جديد

لف عقاب عليها وصد منيف وتقدمت نوره تحضنها وغمضت عيونها ملاك

شدت عليها تدور حضن دافي حضن أم حضن يستقبل تعبها ويزيحه

مسحت على ظهرها نوره:الله يجبر بقلبك يا أمي ويصلح ما بينكم

ابتعدت عنها ولفت نوره لعقاب وخرجت معه

لفت أصايل عليهم عند السياره:ابوي

لف عقاب وناظرتهم:ينفع اجلس عند ملاك؟

لفت نوره على عقاب وناظر البيت عقاب ثواني وهز راسه ومشت أصايل تدخل البيت

منيف لف لملاك اللي واقفه ومميله راسها بتعب تناظر محلهم وتقدم لها يحضنها من الخلف وتنهدت تمسك ذراعينه

ولف منيف من دخلت أصايل ولانت ملامحه وعقدت حاجبينها ملاك:أصايل ؟

بللت شفايفها أصايل بتوتر:ينفع اجلس عندك صح؟

بعد منيف عن ملاك وناظرتها ملاك ثواني وهزت راسها:ينفع

ابتسمت أصايل بهدوء ومشت ملاك لها:تعالي

مشت تدخل غرفة ملاك وابتسم منيف يناظرها وجلس بالصاله

دخلت أصايل وناظرت غرفة ملاك وابتسمت تشوف صورها وصور اهلها

لفت عليها ملاك:اشتقتي لي والا بتحققين معاي ؟

أصايل:الاثنين

ضحكت بخفوت ملاك وجلست على السرير ومشت لها أصايل:والله مكانك بالبيت خالي ملاك مو متعوده ولا راح اتعود

ملاك:تأقلمي

أصايل:انتي انصدمتي يوم ابوي قال ان ثنيان يبي ينفصل لان انتي مانويتي صح ؟

سكتت ملاك تناظر أصايل وكملت أصايل:تكفين ملاك بجمعكم وتكلموا سوا وماراح اتدخل بس بعد كل هالايام بدون بعض يمكن تلينون شوي تشتاقون لبعض ويرجع كل شي نفس قبل

هزت راسها ملاك بالنفي:ماراح يتصلح شي أصايل صدقيني مستحيل نرجع

أصايل:بترجعون واحسن من قبل بعد لان ادري ان هالفتره ما تأقلمتوا على فراق بعض هالفتره اشتقتوا لبعض

صدت ملاك بهدوء وكملت أصايل:ونفس ما اشوف نظراتك وتعبك اشوف نظرات ثنيان وتعبه ، يمكن اللي صار بينكم شي كبير وبظنكم ما يتصلح بس صدقيني الحب اكبر من كل المشاكل

ملاك لفت لأصايل:الحب مو كل شي أصايل

أصايل:كل شي ، الحب كل شي هو اللي يعطيك جمال ويعطيك راحه ويعطيك نجاح وصبر ويعطيك ذريه صالحه نظيفه صحيّه

سكتت ملاك تناظر أصايل وكملت أصايل:واذا انتي تحبينه وهو يحبك بترجعون لانكم عمركم ما خرجتوا من بعض ، هو ترك كل شي وهرب لساحل بحري ما اعرف وين وانتي هربتي لربي معناته كلكم تأذيتوا ليه تعاقبون بعضكم ببعض ؟

ملاك تنهدت بتعب وصدت عن أصايل ومسكت كفها أصايل:مابضغط عليك اكثر ، تجهزين لنا فيلم ؟

لفت ملاك لأصايل وابتسمت لها وابتسمت أصايل وهزت راسها ملاك ووقفت

مشت تفتح الباب تخرج ملاك وتركته مفتوح وتلفتت أصايل بالغرفه ولفت من سمعت صوت

وابتسمت من شافت يامور وشهقت من شكله الحلو وهمست:يامور

تقدمت له بهدوء:يصير المسك ؟ والا تسوي فيني زي ما سويت في منيف ؟

قربت كفها تمسح عليه وابتسمت من ارتاح لها وضحكت تناظره:اشتقت لكوتي ؟ اجيبها عندك ؟

تذكرت منيف وكيف كان يجي عشان كوتي وعشانها وابتسمت بهدوء ورفعت عيونها من وقف عند الباب يناظرها

ابتسم بخفوت بدون يبين اسنانه يناظرها جالسه عند يامور وهمس:ما يخلي احد يلمسه كذا كثير

هزت راسها أصايل تناظر يامور:يمكن يحبني

اتسع وسع ثغره منيف وهز راسه:يحبك أكيد مو يمكن

عضت شفتها بحيا بدون تناظره ودخلت ملاك وناظرتهم ولف منيف على ملاك وتلاشت ابتسامته

ملاك:منيف تجيب لنا اغراض من برا ؟

منيف هز راسه:اي

ملاك:طيب جيب لي قهوه وأصايل شتبغين ؟

رفعت عيونها أصايل وهز راسه منيف:ماتشا

ابتسمت له أصايل وهزت راسها ولفت عليه ملاك تناظره ورجعت تناظر أصايل

ولف منيف لملاك وخرج تاركهم ووقفت محلها ملاك ثواني تفكر

ولفت تدخل لأصايل:وشو بتاخذين قطوة منيف مع كوتي زياده ؟

ابتسمت أصايل تشيل يامور:متعود عليّ اصلاً ومتعود على كوتي

لفت ملاك عليها وكملت أصايل:يجيني دايم يامور

سكتت ملاك وابتسمت أصايل تلعب مع يامور وفصخت طرحتها وعبايتها

وتقدمت ملاك تشغل اللابتوب وانحنت أصايل تتصور مع يامور ولفت ملاك تناظرها

'

واقف عند الشباك الكبير يناظر الحوش بهدوء وناظر سيارة السواق من دخل البيت ونزل عقاب مع نوره وبلع ريقه وصد من دخلوا ولف عقاب عليه وناظرهم ثنيان

تقدمت نوره وناظرت ثنيان:حرام عليك ثنيان ليه ماجيت معنا ؟

ثنيان:مالي لزوم

عقاب تقدم وناظرهم ثنيان:قالت شي ؟

نوره هزت راسها بتعب وجلست:ماقالت ياليتها تكلمت من شافتنا بكت وطلبتني احضنها مرتين ، البنت تعبانه ثنيان

سكت ثنيان ولف عقاب عليه:بتنحل السالفه ثنيان بتنحل

بلع ريقه ثنيان ومشى يجلس عقاب وناظرهم ثنيان ومشى يطلع غرفته

فتح الباب وتنهد بتعب وجلس على السرير ما يقدر ولا يعرف وش يسوي

مستحيل يرجع كل شي نفس قبل مستحيل ، كيف يشيل من باله منصور والسبب في نار ملاك اللي ماحرقت الا هو

كيف يتخطى سرقتها لاهله عشان كلب جحدها ورمى عليها اتهامات يعقب تكون فيها

كيف يقدر يتقدم اكثر ؟ كيف بيقدر يواجه ؟

تأفف بتعب من التفكير ولف من دخل نهار:اخوي مهندسنا الكبير

ثنيان:مو رايق نهار تكفى

نهار تقدم له:اي ادري وعشان كذا جيتك عندي بطوله

ثنيان رفع عيونه لنهار:لا يكون بالعلا بعد ؟

نهار ضحك:لا لا بنادي ابوي

ثنيان هز راسه وكمل نهار:بتجي لازم ولا تعتذر لان مالك اعذار

ثنيان:والله نهار مدري لو كان لي خلق جيت

نهار:اقولك بطوله بطوله ومعي راشد ولد بندر ابي اكسر خشمه

رفع عيونه ثنيان من جاب طاري راشد وتذكر جواهر واكيد انها بتجي مع منصور للبطوله وعض شفته بقهر

ما بيقدر يطردهم ما بيقد يمنع دخولهم لان الحين امام الناس لبندر دين عليهم

نهار:هاه وش قلت ؟

هز راسه ثنيان وهو ساهي وخرج نهار تاركه وناظرته نوره:وش قال ؟

نهار:وافق

نوره:حمدلله الحين كلّم أصايل تقنع ملاك تجي بعد نبي يشوفون بعض ويقعدون مع بعض يجوز يتراضون

نهار اشر على خشمه وابتسمت له نوره

'

ضحكت أصايل تلف لملاك:بصراحه ملاك تحبين وجودي الحين والا لو ماجيت احسن ؟

لفت ملاك وعقدت حاجبينها:وش هالكلام؟

أصايل جلست ويامور بحضنها:يعني حلو وجودي هنا في هذا البيت ؟

سكتت ملاك تفهم أصايل ورفعت حاجبها:والله ما اعرف انتي عاجبك بيتنا هذا والا ماهو ذوقك ؟

أصايل:ذوقي وعاجبني

هزت راسها ملاك ودق الباب ووقفت ملاك وفتحت الباب واخذت الاغراض من منيف وحك جبينه منيف:اجيب شي ثاني ؟

ملاك:لا

منيف:طيب يامور عندكم ؟

ملاك:عندنا

منيف:تحتاجون شي ؟

ملاك:منيف ؟

ناظرها منيف وهز راسه:طيب

مشى وتركها وقفلت الباب ومدت الماتشا لأصايل وابتسمت أصايل من شافتها من محلها المفضل مع ان ملاك من كوفي غير لكنه اخذ لها اللي تحبها

ملاك شربت من قهوتها:اي أصايل

لفت أصايل ولفت عليها ملاك:قلت لي على ذوقك بيتنا ؟

هزت راسها أصايل وناظرتها ملاك:بالعكس انا ما اشوفك تشبهين هالمكان ابد

تنهدت أصايل:ملاك !

ملاك:وش صار بينك وبين منيف ؟

بلعت ريقها أصايل تناظر ملاك

ورمشت بهدوء ملاك:تكلمون بعض ؟

هزت راسها بالنفي أصايل:لا

ملاك:اجل وش بينكم ؟

أصايل نزلت عيونها ليامور:يمكن يامور وكوتي

ناظرت القطو ملاك ورفعت عيونها أصايل:انا جيت عشانك انتي

سكتت ملاك تهز راسها ماودها تبدأ بحوار مع أصايل بهذا الوقت بالذات

أصايل:وصح نهار كلمني عنده بطوله بالنادي ويبغاك تحضرين

ملاك هزت راسها بالنفي وعقدت حاجبينها بإنزعاج أصايل:ليش ملاك ؟ عادي تعالي

ملاك:لا أصايل اخر مره طاوعتك وجيت معاك لقيت النادي فاضي

ضحكت أصايل:هالمره والله بطوله تبغين ارسل لك كارد الدخول عشان تصدقين ؟

ملاك:مصدقه بس ما ابي اروح

أصايل:ماراح يجي ثنيان

لفت ملاك عليها:ما يهمني

أصايل:الا لو عرفتي ان ثنيان ما بيجي بتجين تكفين ملاك تعالي معانا اذا مو عشاني عشان نهار

ملاك تنهدت من طاري نهار:اشوف أصايل

ابتسمت أصايل:بفهمها اوكيه وبقول لنهار

اخذت جوالها أصايل وصدت ملاك بهدوء

-

دخل النادي مع ساري وجنى اللي وصل معهم وناظر الناس الموجودين والاحتفال الكبير بالنادي وتقدم يشوف ابوه وامه وأصايل وجاسر جالسين ومشى معهم

ابتسمت نوره:وصلتوا ؟

ساري:تأخرنا شوي جنى كانت بالصالون

ضحكت جنى:سوري بس حمدلله ما بدأ

عقاب:لا لا للحين

جلس ثنيان ولفت أصايل عليه وابتسمت له ورد لها الابتسامه ولفت تناظر الخيول اللي تتدرب

ولف ثنيان من دخل منيف وبلع ريقه بتوتر لكن كان منيف لوحده

ابتسم لهم من بعيد ولفت أصايل من رفع كفه عقاب وابتسمت تشوفه من بعيد

نزل من بينهم لين تحت وتقدم يدخل الاسطبل لنهار ولف نهار:الفال الطيّب

ابتسم منيف وحضنه:موّفق

نهار:لوحدك جاي ؟

منيف:جايه ملاك بس ماهو الحين

نهار:ان شاء الله ما تتأخر

منيف:لا تفكر انت جب البطوله

نهار ابتسم:بجيبي ولا يهمك

ضحك منيف وصد يناظر الخيول ورفع عيونه يحاول يناظر جلوسهم لكن كانوا ابعد من مدى بصره

وتقدم منيف يجلس قريب من الاسطبل

دخلت النادي تسمع ضجيج البطوله واخذت نفس تتقدم تدخل وتناظر الاسطبل والحضور

بلعت ريقها تذكر جيّاتها لهنا وتذكر اخر مره مع ثنيان

دخلت تناظر حوالينها ولفت أصايل وابتسمت:ملاك

لف ثنيان وناظرها من بعيد وطاحت عينها بعيونه من لف عليها وجمدت محلها

نبض قلبه من شافها بعد مدّه طويله والتقوا من جديد وعاد كل الشعور اللي تعب عشان يتخطاه ويخبيه

ياما حاول وياما جرّب لكنه ما قَوى ، ماعصاه قلبه الا على نزوعها من صدره

ملاك ، ملاك اللي عاش معها جنون العاقل ، ملاك اللي اشعلت داخله مع انه موج والموج قادر

بلعت ريقها تشوف نظراته من بعيد ، شعره اللي حلقه ولونه اللي تغير وتذكرت اخر كلامه وشعوره ونظراته ، تذكر القسوه اللي جربتها منه بعد حنيّه طافحه منه

ياليت تتخطى كل الحضور وترجع لحضنه من جديد ، تحبه وهي معاه وتحبه يوم يتفارقون وتحبه يوم يتواجهون

ماعمرها طاحت وتعورت الا بعد فراقها عن ثنيان اللي علمها وشلون الحنيّه وكيف المحب يمحي خطايا الحبيب

صدت بعيونها من طولوا بالنظر ومشت تنزل وناظرها لين جلست بجانب منيف اخر المدرجات

ولفت نوره تناظر ثنيان وتنهدت من جلوسه اللي مستمر

ظنت انه بيقوم لها لكنه ماقدر رجع ظهره للخلف وصد بعيونه

جلست بجانب منيف وهمست:كنت ادري انها تكذب

منيف:وليه جيتي ؟

ماردت عليه ملاك وناظرت الخيول من بدأ إعلان المتسابقين ولفت من دخل راشد بجانب فرسه ورفع كفه لأهله ورفعت عيونها تناظر بندر وزوجته

بلع ريقه بترقب منيف ولف لثنيان اللي بالاعلى ورجع صد

بدأت أشواط القفز على الحواجز واندمجت تنتظر فوز نهار فقط

لف ثنيان من دخل محمد وخلفه زوجته وشادن ونزلوا وثواني ودخل منصور مع جواهر

وشد على قبضة يده ثنيان بقهر ولفت نوره بصدمه:جواهر وش جابها معهم ؟

جاسر لف يناظرهم وانصدمت أصايل:جواهر مو برا السعوديه ؟

نوره:هذا منهو اللي معهم ؟

جاسر:ولدهم

عقدت حاجبينها نوره ولف ثنيان عليهم:تزوجت اخو شادن

جمد وجه نوره وغطت فمها بصدمه جنى وناظرهم جاسر من بعيد يناظرونهم وجلسوا

اخذت نفس ملاك ودها تلتفت وتشوف ثنيان وكيف وضعه لكنها ماتقدر

بللت شفايفها ولفت من نزلت شادن وعقدت حاجبينها ملاك من وجودها وتقدمت شادن لها:ملاك

ناظرتها ملاك وهي جالسه ووقف منيف:وش جابك انتي ؟

شادن:جيت اسلم على ملاك كانت مختفيه فتره طويله ما اعرف وش صار معها ، عسى خير ملاك ؟

وقفت ملاك قدامها واخذت نفس:افضل لك تتركيني لان ماراح يعجبك شي لو تكلمت

شادن ابتسمت:يالله مو مشكله بروح اجلس مع حمولة منصور احسن

عقدت حاجبينها ملاك ولفت من اشرت لها شادن وناظرت جواهر ومنصور اللي واقفين على المدرج وجمد وجهها من شافت منصور ماسك كف جواهر ويناظرها

عقدت حاجبينها بصدمه وانقطع كل صوت عن مسامعها تناظر منصور حرّ ، واقف قدامها الشخص اللي حرقت نفسها وحرقت ثنيان واهله وناس كثير عشانه ، اللي حرقها وسبب نارها

رمشت بصدمه وابتسم منصور يشوف نظراتها له وأول ملتقى لهم من جديد

لف ثنيان يناظر منصور من لفت ملاك ورجع يناظر ملاك وشد على قبضة يده يشتعل نار من نظراتهم

نشف الدم بعروق ملاك وعجزت ترمش وهي تناظر منصور وعقدت حاجبينها ثواني تستوعب وجود جواهر بجانبه وكل هذي الفوضى وابتسمت شادن:عروستنا جواهر

لفت ملاك بصدمه على شادن وضحكت شادن ومشت تاركتها تطلع ورجعت ملاك تناظر منصور بصدمه

تنهد منيف يناظرهم من بعيد ويناظر ردة فعل ملاك

نزل منصور يجلس معهم ومع جواهر وناظرتهم ملاك جالسين مع بندر ومختلطين معه

هي سددت من حياتها وعمرها وخيرها وضميرها ٢١ مليون عشان يكون منصور اليوم هنا وبأول خروجه ، جلس مع أعداء عقاب وعدوتها وكأنه ينتقم منها ينتقم من خيرها اللي قدمته له

ناظرها منصور من بعيد ولفت عليه جواهر:تشوف صدمتها ؟

مارد منصور يناظر ملاك ولف لجواهر:ثواني وجاي

محمد:خلك منها

مارد منصور ووقف وناظره ثنيان ينزل وتقدم بغضب يناظره متوجه لملاك

وقف قدام ملاك اللي تناظره بصدمه بجمود وناظرهم منيف وهو واقف بجانب ملاك

ناظرت عيونه ملاك بصدمه وذهول وتساؤل وحيد همست فيه:ليه ؟

منصور ناظر شكلها:تغيرتي صرتي تشبهينهم

هزت راسها بالنفي بتكرار ملاك:ليه ؟

منصور:سألت كثير وانا وحدي بين اربع جدران هالسؤال يوم عرفت انك بعتيني وتزوجتي وكملتي حياتك معه وجاتك منه سياره وشاليه وتركتي اللي دخل السجن بسببك

عقدت حاجبينها ملاك:بسببي ؟ يوم دافعت عن شرفي برجولتك وبنفسك صرت انا السبب ؟

منصور ضحك بسخريه:صح نسيت انك جحدتي اللي سويته لك لانك لقيتي الاغلى

لف يناظر ثنيان من بعيد اللي يناظرهم ورجع ناظرها:والكايد احلى

ملاك تقدمت له تناظر عيونه بقهر:انا اللي عشت بسجن مو انت انا اللي وسخت يديني بسببك مو انت ، انا اللي تعبت وانهد حيلي وبكيت وركضت عشان بس انت تكون هنا

ضربت صدره باصبعها تأشر عليه وتناظره بحرقه من دموعها اللي بعيونها:انا يامنصور انا

سكت منيف يناظرهم وهزت راسها ملاك:انا اللي قلت عنها رخيصه ومن حضن رجّال ورجّال ، انا اللي جحدت كل ايام عمرها اللي قضتها عشانك ، انا

تنفست بسرعه بتعب من حست انها بتبكي وهز راسه بالنفي منصور:ولا راح احزن ويأثر عليّ

سكتت تناظره وناظر عيونها منصور بحده وقهر

لفت أصايل وعقدت حاجبينها:وشفيهم ؟

جاسر سكت يناظر منصور من بعيد ووقف ثنيان ما تحمل حريقه ورفع عيونه عقاب:ثنيان

مشى ينزل ورفع عيونه منيف يناظره جاي وتقدم ثنيان وسحب منصور من ذراعه ولف منصور يناظره

بلعت ريقها ملاك تناظر ثنيان وتقدم ثنيان:عسى خير ؟

منصور:شدخلك ؟

منيف تنهد:خلاص ياخي ماهو وقته المكان مليان ناس

ناظره ثنيان بحده وابتسم منصور:تغار يعني ؟ لا اذا بتغار عليها مني فبتغار اكثر اذا عرفت انها مرّت على كل شيوخ هالمكان

عقدت حاجبينها ملاك من كلام منصور عنها وتقدم ثنيان لمنصور ودخلت بينهم جواهر:منصور

ناظره ثنيان بحده ولفت جواهر على ثنيان تناظره وناظرها ثنيان ورفعت عيونها ملاك عليهم وهزت راسها بالنفي بتعب

واخذت شنطتها ومرت من بينهم تطلع وتقدم ثنيان لمنصور وهمس:لعد تقرب منها

ابتسم منصور ولارد ومشى ثنيان خلفها وناظرهم عقاب ولف لجاسر اللي نطق:ثنيان

مارد عليه ثنيان وخرج خلف ملاك ، مشت بسرعه لسيارتها بتعب ورجفت اصابعها تفتح السياره

وتقدم لها وهمس:ملاك

غمضت عيونها بتعب من صوته ومناداته لاسمها ونزلت دموعها ماردت عليه

ووقف خلفها ثنيان ولفت عليه تناظره بموج عيونها وسكت يناظر حالها ودموعها وبلع ريقه ما يطفي حريقه الان ولا اي موج

عضت شفتها وهي تبكي بدون صوت ولفت تفتح بابها وتركب

ومسك الباب وشدته تبي تقفله ولاقدرت وغمضت عيونها تصرخ بقوه بغضب وقهر

وناظرها ثنيان يشتعل وجهها من قوة صراخها وتوقفت تتنفس بسرعه ولفت عليه تناظره وهمس:انزلي

هزت راسها بالنفي ونطقت ببحه بسبب صراخها:لا

ثنيان رفع صوته:انزلي قلت انزلي

لفت عليه تصرخ:ماراح انزل خلني لوحدي

مسك ذراعها بقوه وسحبها من السياره وعقدت حاجبينها بألم من شدته ولفت عليه بغضب:فكني اتركني

قفل باب سيارتها ومشى وهو شادها بقوه ولا يشوف احد من غضبه ونار صدره وفتح باب سيارته ودفها ولفت عليه تناظر تعامله معها وقسوة ذراعه وتجمعت دموعها تناظره

وقفل الباب ومشى يركب يسارها ومسكت ذراعها بألم وقفل بابه وشغل سيارته يطلع من النادي

عضت شفتها تمنع نفسها تبكي وتناظر الطريق ورمشت تطيح دموعها بحضنها

كل شي يعورها كل شي تعبت عشان تتخطاه وتكون قويه جاها اضعافه اليوم

كانت تظن انه بياخذها للبحر كعادة غضبهم اللي ينثرونه على الموج ورفعت عيونها تشوف بيتهم ولفت عليه:ودني للبحر

قفل سيارته بغضب:اذا كنا بنتمشى اخذتك بس جايين نصفي حسابات

ناظرته وفتح بابه ومشى لها وفتح بابها ومسك ذراعها وتأوهت بألم من كفه ومشت معه تدخل البيت

رفعت عيونها للبيت اللي تمنت تسكنه طول عمرها ولا تخرج منه ابد

دخل وطلعت معه للدرج وهمست:تعورني

فتح غرفتهم ودفعها وغمضت عيونها وقفل الباب بقوه وتقدم لها:نفس ماعورتيني ؟

رفعت عيونها عليه وهز راسه بحرقه ثنيان:نفس ما حرقتيني ؟

ملاك:قلت لك بحرقك قلت لك ثنيان ، وقفت بوجهك وصديتك وتركتك

ثنيان رفع صوته يصرخ بوجهها ويرمي مفتاحه:وقلتي لي أحبك

سكتت تناظره وتجمعت دموعها بعيونها وكمل ثنيان بقهر:قلتي أحبك وعيشتيني أيام طويله كلها كذب ، كنتي تلوميني على زواجي من جواهر وطلعتي كل لياليك جنبي تفكرين بغيري

غطت أذانيها بإنزعاج من صدمتها ورعبها ووجود منصور قدامها بعد سنين وجلست تحس ان رجلينها ما تشيلها

غمض عيونه ثنيان يتنفس من قهر:سمعتيه وش قال عنك ؟ سمعتيه هذا حبيبك ؟

صرخت توقف ملاك:لا تقول عنه حبيبي ولا صار بعمري سافرت من شوقي وضربت الموج وانا أخافه ، ما وصلت بحياتي كلها لهذا الضعف الا جنبك ، غلبتني وهزمتني واخذت سلاحي وذخيرتي ونزعت عن وجهي أقنعتي ، ما عاد فيها نار لمنصور ناري الي داخلي منك

هزت راسها تناظره من فتح عيونه ونزلت دموعها:ذقت الموج وذقت اللهب وانا جنبك

ثنيان تقدم لها:كيف قدرتي ؟ كيف جمعتيني معه بقلب واحد ؟

بكت بتعب تجلس على السرير:ماحبيته ما حبيته

ثنيان ناظرها بغضب ينحني لها:سرقتي الناس وهديتي بيوت وما تحبينه ؟ اذا هذا ماهو حب وشو ؟

رفعت عيونها عليه تبكي:عرفته وانا وحيده وبنت ١٥ سنه تمسكت فيه ظني انه حب لكن ظنيت ، وسرقت وركضت بين الشرّ عشان ضميري

ثنيان سكت يناظرها ولا قادر يطفي لهب صدره شي كل ما يذكر منصور ويذكرها وده يحرق كل شي

ناظرت عيونه اللي تشتعل لهب وميّلت راسها:انت صدقته

ابتعد عنها ثنيان يناظرها وكملت ملاك:قلت لي لو تهمك نظرة عيوني لك ما بصدق حتى الوشاه ، وصدقت

هزت راسها بخذلان:صدقته ما سمعتني

ثنيان:ماصدقته كسرت فمه اللي تكلم عليك

ملاك سكتت وناظرها ثنيان:تلوميني سمعت كلب تكلم عنك وطلع هو سبب نارك وناري ؟ كلب كان حاجز بيني وبين وصلك ؟ كلب بكّاك ليالي طويله وانتي المفروض تفرحين ؟

صرخ يتقدم لها:تكلمي

غمضت عيونها تبكي ولف بغضب وضرب الدولاب وبكت بعلو صوتها وتمسكت بالسرير بحرقه

نزلت راسها تبكي وحط راسه ثنيان على الدولاب ثواني ولف عليها يشوفها تبكي وهز راسه بتعب

رفعت عيونها عليه بين دموعها:يحرم نوم عيني لو كذبت بشعوري

وقفت ومشت له وهي تبكي:يحرم نوم عيني لو قدرت اعيش معك بدون ما ياكلني ضميري ، يحرم نوم عيني اذا قدرت اطيب منك

بكت وناظرها ثنيان وكملت ملاك:عشت عمري ثابته وماهزنّي في رحلة العمر غيرك ، حاولتك وحاولتنا وتمنيت لو اللي بيني وبينك عامر واللي بيني وبين العالمين خراب ، ماهمني شي غيرك

ناظرها ثنيان وهو يتنفس بحرقه وكملت ملاك:كنت أبيك وأرفضك ، أتجاهلك وكل مافيني يتشفق عليك ، ويوم جربت أودعك

رفعت كتوفها بقل حيله:حبيتك

صد ثنيان بتعب وغمض عيونه وعضت شفتها تناظره

هزت راسها بملامه وعتاب:ثنيان

لف عليها من نادته وعقد حاجبينه بتعب:وظيفتك تلوين ذراعي ؟

تقدمت ومسكت ذراعه بتعب:مابي أذوق قسوتك يكفي ، والله يكفي ، نسم صدري يطلع من داخلي من ضيق إبره ماعاد عندي قوه أتحمل قسوتك مع كل هذا الخذلان ، جيتك أسف وجيتك ألم وجيتك مليانه ندم جيتك جروح وجيتك وقلبي مالقيته بصدري

ناظرها ثنيان وبكت ملاك تتمسك بذراعه:تركته عندك ، أضيق من النسم بعدك وماعمري مشيت ورا ظهر أحد غيرك ، كل اللي عطاني ظهره ما ناديته

تقدمت له تناظر عيونه وهي تبكي:الا انت صوتي وروحي تناديك

ناظر عيونها ثنيان وبلعت ريقها ملاك تشد ذراعينه ولاقدرت تكابر اكثر وتقدمت تحضنه وتحاوط ظهره بذراعينها وتحط براسها على صدره

بكت على صدره تحترق مهزومه ، مخذوله موجوعه

غمض عيونه ثنيان من حضنته وشدت على ظهره ملاك:ماراح تلقى مثل حبي والقلوب وساع انا الصادق وانا الثابت بحبك رغم متاهاتي

تنهد بتعب ثنيان يسمعها وعقد حاجبينه وكملت ملاك:كنا نهر واحد متى صرنا ضفتين ؟

ثنيان هز راسه وهمس:حبك تملكني وذوقني الويل ناشدك بالله من لظى لهبك كافي

مسحت على ظهره بكفوفها ماودها تتركه ويتركها وتنهد ثنيان:لمستيني وحرقتيني ماعادني موج

رفعت عيونها عليه وهي ماسكه ظهره وناظرها ثنيان من قريب وهمست:انا موج

هز راسه بالنفي برفض لفكرتها:انتي لَهب

ملاك ناظرت عيونه من قريب:تعرفني وتعرف كبريائي وغروري ، وتعرف اني ما ركضت خلف احد غيرك ولا اعتذرت واهتميت بإعتذاري لأحد غيرك

سكتت ثواني وكملت:انا عندك رميت كل أوراقي وتمسكت فيك ، انت الوحيد اللي شفت بيض جنحاني ، رميت كل غروري اللي لبسته سنين

ناظرها ثنيان وهز راسه بنفي:رميتيه ويعزّ عليّ انك رميتيه ، غرورك اللي علّم الطاووس نفش ريشه ، غرورك اللي تلبستيه لباس عباتك وعرفتك فيه

ناظرت عيونه وكمل ثنيان:ارمي غرورك عني ماعاد فيني اتحمله زود ، غرورك ودانا الهلاك ياملاك

ملاك بلعت ريقها من نطق اسمها:ماعاد بيني وبينك غرور ومكابره ، ملاك اللي عند كل العالمين عندك غير معك مركب غرامي ما سأل عن مُنتهى ‏مرساي و أعاف المطيح إلا مطيحي على صدرك

كان يشوفها تتجرد من كل الكبرياء والغرور اللي تعوّد يشوفها عليه كان فعلاً يشوفها متمسكه فيها بحاجته تتوسل إليه وهذا المنظر أشد قسوه عليها وعلى روحها اللي علمتها الغرور

وفلتت يدينها من طوّل بالصدّه وناظرته وهز راسه بالنفي:ما طفت ناري

سكتت تناظره وتنهد ثنيان وبلع ريقه وخرج من الغرفه

تركها وجلست على الارض بتعب تحس ان كل بيبانها تقفلت بوجهها وكل دروبها ضاعت فيها ، وكل كفوف الحنيّه قست عليها

جلس بالصاله وفتح ياقة ثوبه وناظر الفراغ يذكرها ويذكر دموعها وتمسكها فيه وحاجتها له

انهيارها وضياعها وخذلانها ويذكر بنفس الوقت منصور وكيف اختلف كل شي بلحظه واحترق

وكأنها لمسته فتره طويله ويوم احترق احترق حريق ما يرحم

مسك صدره وغمض عيونه ولف يناظر غرفتهم من بعيد يدري انها تتألم لوحدها وهو يتألم لوحده

كان وده يحضنها ووده بالحضن لكنه تمنّع من قهره وغيرته ونارها

بلع ريقه من شاف سيارات اهله وعض شفته ووقف

دخلوا البيت وتقدمت أصايل وناظرت ثنيان:ثنيان ؟

نوره:وش صار وين ملاك ؟

ثنيان:فاز نهار ؟

دخل عقاب وناظرهم وهزت راسها أصايل:فاز

هز راسه ثنيان وتقدمت نوره:تكلمت مع ملاك؟

ثنيان:هي فوق

ابتسمت أصايل وعضت شفتها نوره:حمدلله يعني تصالحتم ؟

رفع عيونه ثنيان لعقاب ورجع ناظرهم ولارد

أصايل:اوكيه باين باقي بس المهم انها موجوده هنا

نوره:تراضيها وتراضيك ماعليك يا أمي

مشت نوره تجلس ودخل جاسر وناظر ثنيان ورفع عيونه ثنيان على جاسر وعقد حاجبينه جاسر

أصايل:تعال جاسر ، ملاك بالبيت

لف جاسر بصدمه على ثنيان واخذ نفس ثنيان يصد عنه

ودخلت جنى مع ساري وابتسمت أصايل:ملاك بالبيت

ناظرتها جنى بصدمه:احلفي

أصايل ضحكت:والله

ساري:ماشاء الله البيت كله روّق برجعة ملاك

نوره:اي والله مكانها خالي

جلس ثنيان ولفت نوره:أصايل امي كلمي الخدم يجهزون لنا قعده برا وشاهي ومكسرات ومعجنات صح ان الجو حار لكنه يحبها كذا ثنيان

ابتسم ثنيان بهدوء لامه وضحكت أصايل:اوكيه

مشت عنهم ورفع عيونه عقاب لثنيان وهز راسه له وتنهد ثنيان يصد

ومشى جاسر عنهم وناظره ثنيان لين ابتعد ورجع يصد

نوره:بقوم اشوف ملاك

ثنيان:امي خليها

ناظرته نوره وبلل شفايفه بهدوء ثنيان:خليها ترتاح

نوره:بطمن عليها

مشت توقف تاركتهم وطلعت لغرفتهم ودقت الباب ولفت ملاك وفتحت الباب نوره وابتسمت ملاك من شافت وجودها

ودخلت نوره:حيّ بنتي حيّ ملاك

وقفت ملاك بتعب وتقدمت نوره تحضنها وتنهدت ملاك بتعب

وحسّت نوره بالوضع لان ملاك عليها آثار دموع وبكاء ومسحت على ظهرها:بداية الغيث قطره دامك ببيتنا ومع ثنيان شوي شوي ويلين كل شي

ملاك همست:ياليت

نوره ابتعدت عنها ومسكت كفوفها:ماعليك مهما قسى شوي ثنيان الا وما يرجع يحنّ وانتي تعرفينه

هزت راسها ملاك وابتسمت نوره:قومي غسلي وجهك وغيري هذا الوجه ما ابي اشوفه وانزلي معنا كلنا

ملاك:لا تكفين خليني ارتاح لوحدي

نوره:مافي وتحلمين تقعدين لوحدك واحنا مع بعض ، قومي ملاك قومي يا أمي والحقيني

سكتت ملاك وابتسمت لها نوره ومشت تتركها وتنهدت ملاك بتعب

جلست على السرير واخذت جوالها ترد على منيف:دقيت عليك منيف ليش ماترد ؟

منيف:كانوا يحتفلون ولا سمعت ، وينك وش صار معك؟

ملاك:انا ببيتهم

سكت منيف ثواني:وش صار ؟

ملاك رفعت كتفها بحيره:ما اعرف

منيف تنهد:طيب اجيك؟

ملاك:لا لا اذا احتجت شي بكلمك

هز راسه منيف:براحتك

قفلت منه واخذت نفس وقامت تشوف ملابسها اللي لا زالت موجوده واغراضها وعطورها وناظرت ملابس ثنيان

واخذت لها ملابس تغيّر وغسلت وجهها وناظرت وجهها بالمرايه تناظر صورة منصور من جديد ووجود جواهر معه وتناظر وجه ثنيان القاسي الغاضب

رجعت تغسل وجهها من جديد تفوق من كل شي يكسرها

ولبست وخرجت وفتحت شعرها تنثره وجلست قدام المرايه تناظر وجهها وحاولت تبتسم وترسم ابتسامه وفشلت ورجعت من جديد تحاول تبتسم ونجحت

بانت أنيابها من جديد وانشرح وجهها بعد حزنه وضيقه واخذت الماسكرا والبلشر واخذت عبايتها وحجابها ولبستهم

وهمست:قدّها ملاك

اخذت نفس طويل وخرجت من الغرفه نزلت ولا لقت احد وسمعت اصواتهم برا

ومشت تخرج لهم ورفع عيونه عقاب من شافها وابتسم ولفت نوره:هلا لين ما يبقى هلا بهالدنيا هلا باللي هروجه تسّلي

ابتسمت لهم ولف عليها ثنيان يناظرها مبتسمه نزل عيونه لأنيابها ويدري ان هذا الوجه ماهو حقيقي وهذا اللي تظهره للجميع ماعداه

وقفت أصايل تمشي لها:احضنك والا نصير دراما ؟

ملاك ابتسمت:امس نمتي عندي امداك تشتاقين لي ؟

أصايل:لا هذي فرحة وجودك ببيتنا

ابتسمت ملاك وحضنت أصايل وضحكت أصايل

وقفت جنى ومشت لها ملاك تسلم عليها ولا نطقت بشي

ومشت تجلس بجانب ثنيان واخذت نفس بربكه من جلوسها بجانبه

وسكتوا يناظرونهم وبلع ريقه ثنيان بوجه جامد وهو يناظر فنجان الشاهي

وابتسمت نوره:اي ووين الطايش نحتفل فيه ؟

أصايل:كلمته يقول النادي مسوين احتفال وبيجلس معهم

ساري ضحك:انتم شفتم فرحته ؟ ولا كأنه فاز من قبل

ضحكت أصايل:اعشقه صورته اوريك ملاك ؟

ثنيان:وريني انا

وقفت أصايل وجلست بينهم وفتحت فيديو نهار اللي يحتفل وابتسمت ملاك وضحك ثنيان من فرحته

وتلاشت ابتسامة ملاك من شافت منصور واهله وجواهر واهلها بزاوية المشهد

وجمد وجه ثنيان يناظرهم ورجعت ظهرها ملاك تصد عنهم وبلعت ريقها

وهز راسه ثنيان ورجعت محلها أصايل ولف ثنيان يناظر ملاك ولفت عليه تناظره

صد عنها ولفت نوره وابتسمت:دايم تهربون من هالقعدات سوا انا اسمح لكم تهربون الحين

هز راسه بالنفي ثنيان:لا ماله داعي

نوره ناظرته بحده وصدت ملاك عنهم وابتسمت نوره:اقول ملاك

لفت عليها ملاك وكملت نوره:كم قعدتي بمكه ؟

ملاك عقدت حاجبينها:ما اذكر من اخر مره شفتوني يمكن

عقاب:وطبتي ؟

ملاك ناظرت عقاب وهزت راسها:يوم احترت بدروبي اخترت الدرب الصح

لف ثنيان عليها وابتسمت نوره:اي والله الدرب الصح والله يكتب لنا عمره قريبه كلنا

ساري:اللهم امين

دخلوا سارا وحمد وابتسمت نوره:ياهلا بعيوني ياهلا

دخل جاسر خلفهم ولفت ملاك تناظره وناظرها جاسر واخذ نفس ثنيان نفس بتعب من نظرات جاسر وحدّتها

وجلس جاسر ولفت ملاك تشوف سارا اللي ترقص ونوره تغني لها وتصفق وابتسمت ، تتمنى لو كان حظها أجمل وولدت من طفولتها مع هذي العائله وعاشت معهم وكبرت

تقدمت أصايل تشيل حمد توقفه على الطاوله ورقص مع سارا وضحك عقاب يناظرهم

وابتسمت نوره:يالله الحين ترقصون بزواج عمتكم

سكتت أصايل بربكه وعقدت حاجبينها ملاك ولف عليهم ثنيان:زواج من ؟

عقاب لف لملاك:ماكلمك منيف ؟

لف ثنيان بصدمه وناظرتهم ملاك:شدخل منيف ؟

نوره:منيف اخوك طلب أصايل ووافقت عليه لكن كنا ننتظر رجعتكم

جمد وجه ملاك بصدمه ولفت لأصايل اللي تناظرهم بتوتر ولف ثنيان:وشو وانا ويني محد يقولي شي ؟

جاسر ناظرهم:حتى انا ماعندي علم ليه محد قالي ؟ شلون توافقون عليه وما تعلموني ؟

عقاب:نعلمك ليه ؟ اختك راعية الشان وهي تقرر

جاسر وقف:تخسي ويخسي هو ما ياخذها

لفت ملاك عليه وكمل جاسر:ما ياخذ اختي هالكلب لو يموت

وقفت ملاك تناظره بحده:امسك لسانك لا اقصه لك

وقف ثنيان والتفت ساري:اذكروا الله

تقدمت ملاك له ومسك ذراعها ثنيان:ملاك

ناظرته ملاك بحده:اقص لسانك ان قلت شي عن اخوي تفهم؟

جاسر:يالله بس يالله بتخرعيني انتي يعني ؟ تبطين ويبطي اخوك الورع ياخذ اختي

ملاك فلتت ذراعها من ثنيان ووقفت قدام جاسر وتأفف ثنيان:ياجاسر

ملاك ناظرت جاسر:الورع اجل ؟ على الاقل أرجل منك يوم انك رحت تسربت برا وجبت لك ورعين ورجعت تستر عيبك وتاخذ وحده من اهلها غصب عليها وتشتريها بفلوسك

جاسر ناظرها بحده:لكني ما سرقت ناس دخلوني بيتهم

وقف عقاب ورفع صوته:خلاص

ناظرته ملاك ولف ثنيان يتدارك كلام جاسر ويناظرهم

وهزت راسها ملاك:بتندم على صوتك اللي عليته هذا

عقاب:ملاك خلاص قلنا

ناظرته ملاك بحده وتقدم ثنيان يسحبها لناحيته بهدوء وناظرهم جاسر ولف لأبوه وهز راسه:دافع عنها لا تقصر

عقاب:اذلف

هز راسه جاسر وخرج من عندهم ولفت ملاك على عقاب اللي يناظرهم بعصبيه واخذت نفس ومشت تدخل البيت

عض شفته ثنيان ولحق جاسر اللي بيركب سيارته ولف عليه جاسر:اذلف ثنيان عيوني لا تشوفك

سحبه بقوه ثنيان وناظره:وشفيك جاسر وشفيك ؟

جاسر:انت صاحي ؟ رجعتها لبيتنا من جديد ؟ رغم انك عرفت حقارتها ترجعها ؟

ثنيان ناظره بحده:ما يخصك ولا تدخل بمشاكلي تفهم ؟ خلاص جاسر خلاص ريحنا من مشاكلك

جاسر:المشاكل كلها من اللي عندك هذي وشوفها تبي تدخل اخوها بيننا بعد وتخليه ياخذ اختي لكن يبطي

ثنيان:لا تدخل

جاسر:احمد ربك لين الحين مافضحتها لكن والله ياثنيان والله ان ما انحل هالموضوع قريب اني لاروح لابوي واقوله كل شي

ثنيان:روح الحين روح الحين اذا معك دليل روح ، تحسب ابوي بيصدقك ؟

جاسر هز راسه بقهر:مشكلتي الوحيده لكن والله ما اخليها

ثنيان تقدم وهمس:تعرف من تبرع لأبوك ؟

سكت جاسر يناظر ثنيان وكمل ثنيان:ملاك

جمد وجه جاسر وعقد حاجبينه وهز راسه ثنيان:كلنا مدينون لها

ناظره جاسر بصدمه ومشى ثنيان تاركه ودخل البيت

طلع للغرفه وفتح الباب ولفت عليه ملاك وناظرته:حاربني معه استاهل

سكت ثنيان وتقدمت ملاك:حاربني انت بعد حاربوني كلكم وقفوا قدامي واخذلوني وهددوني ، حاربني معهم

ثنيان:ملاك

صرخت ملاك بتعب:احترقت

ناظرها ثنيان ومسكت راسها بتعب:خلاص يكفي يكفي

جلست على السرير:كل شي يحاربني حتى منيف يحاربني حتى هو

عضت شفتها ووقف قدامها ثنيان ورفعت عيونها عليه:تشمت فيني قول هذي عدالة ربي واخذ حق الناس وحقي منك ، قولي ووقف مع اخوك ، تكلم واحكي بشماتتك توها تغفى جروحي اصلاً

ثنيان:طول عمرك لهب متى صرتي ضعيفه كذا ؟

وقفت ملاك وناظرته بحرقه:ضريبة اني سلمت قلبي لك

سكت ثنيان يناظر عيونها وكملت ملاك:وانت داري وعارف الحال بوضوح ان الموج قادر وطفّى اللهب

فتحت يدينها بقل حيله:وهذا انا بدون لهب ، يهددني شخص مجهول ويهددني اخوك ويخذلوني أهلي ويتعداني اخوي

هزت راسها تناظره:ويظن فيني أبشع ظنونه من عطيته قلبي

ثنيان ناظرها بحده:انتي خليتي فيها ظنون ؟ خليتيني اصدق بياضك عشان ما اشوف سوادك ؟ بليله عرفت ان كل الحواجز بيني وبينك هو واحد كلب كيف تبيني ما اصدق ابشع ظنوني ؟

ملاك صرخت بوجهه:وطعن بشرفي وضربته ، دافعت عني لانك تدري انه كلب

ثنيان تنهد من صراخها وصد عنها يتحمل غضبه وناظرته ملاك بحرقه:اول مره اوقف ضدي معك لكن كل شي قلته عورني

لف عليها ثنيان وهزت راسها:ويوم شفت جواهر ماسكه يمين منصور عرفت انه طعنّي

ثنيان سكت وكملت:عرفت وش يعني تكون معطي ظهرك بأمان لشخص وما يطعنك الا هو ، هذا اللي كدّيت عشان أطلعه هذا هو ، خرجته جواهر

هزت راسها بتعب واخذ نفس ثنيان بضيق وخرج من الغرفه يهرب اكثر من عيونها وعتابها

جلست بتعب على السرير لانه يقطع كلامهم ويخرج كل ما تمنت تتكلم اكثر ويسمعها تركها وخرج

'

دخلت أصايل الغرفه ومسكت قلبها ودخلت خلفها نوره:ليش تقومين ؟

لفت أصايل بخوف:وش يعني جاسر وملاك وثنيان ما يبون ؟ محد سألني انا وش ابي ؟

نوره:ابوك سألك وانتي جاوبتي بإيه وهذا المهم

أصايل جلست تحاول ما تبكي:أمي تهاوشوا قدام عيوني كيف يعني مو مهم ؟

نوره تنهدت وتقدمت لها:أمي أصايل جاسر من قبل علاقته ماهي زينه لملاك تسمعينه وش يقول عنها ؟ يقول تسرقين ، بالله هذا كلام ينقال ؟ ترا من تالي جاسر ماهو جاسر

أصايل:ما ابي احد يتهاوش بسببي

نوره:وانا ما بسمح لأحد يوقف بينك وبين قرارك

أصايل رفعت اصابعها تمسح مدمع عيونها ومسحت على كتوفها نوره:لا يتأثر قرارك باللي يصير

أصايل:افكر ارفض ولا تصير مشاكل اكثر

نوره:ياويلك أصايل ياويلك ، انتي تبينه وهو يبيك وابوك واقف مع شورك من هم يقررون عنك ؟

أصايل لفت بخوف:امي بتوصل بين ثنيان وجاسر

نوره:وتوصل ، انا موجوده احلّ وافك العقد وتعرفين امك صلحت كل شي بهالبيت سنين ما بقدر احلها الحين ؟ هذا قرارك وفرحتك واللي تودينه ويودك ، أمي أصايل لا تكسرين فرحتك

لفت أصايل تناظرها بضيق وابتسمت نوره:بتنحل وتصيرين عروس الموسم كله وبيكون زواجك افضل زواج بهالدنيا كلها وازهلي ام ساري

ابتسمت أصايل بين دموعها وضحكت نوره وباست راسها تحضنها:أمي انتي ولا ينكسر خاطرك

تنهدت أصايل بحضن امها وتنهدت بتعب نوره

'

وقفت عند البيت ونزلت ودخلت وخرج منيف وناظرها:ملاك ؟

تقدمت له وحطت مفتاحها وشنطتها على الكنبه:خطبت ؟

سكت منيف بصدمه وثواني لانت ملامحه وهزت راسها ملاك وجلست ورفعت عيونها عليه:ماقلت لي

منيف:انحديت وما كنتي موجوده

ملاك:انحديت ؟

منيف جلس قدامها:اي خطبوها قدام عيوني واحترقت ملاك ولاقدرت اصبر وتروح عليّ ورحت لعقاب وخطبتها من عنده

ملاك عقدت حاجبينها:ليش ماقلت لي منيف ؟ ليش ؟

منيف:ماراح توافقين وماكان ودي اخرج عن شورك

ملاك:وخرجت عن شوري

منيف:ملاك انتي شتبين اسوي بحياتي ؟ شتبين اسوي وترتاحين ؟ حبيتها ياخي حبيتها وماني قادر اتخطاها وادري انها درّ ثمين لكني أبيها لو هي الموت أبيها

ملاك رفعت صوتها:ماهو عشانها أعلى منك ولاهو عشانك أقل منها ، عشانك بيوم هددتها بسببي واختك هددت اهلها كلهم عشان كذا افهم

منيف سكت وكملت ملاك وضربت الطاوله قدامها:عشان ما يصير فيك نفس ماصار بأختك تحب ولا تقدر تطوله

لانت ملامح منيف ورفعت عيونها ملاك من رجفت يدينها وامتلت عيونها بالموج:عشان ما تحب شي ما تطوله

بلع ريقه منيف وكملت ملاك:لأني يوم حبيته وعرف كل شي عني !

هزت راسها بتعب:افترقت طرقنا

نزل عيونه منيف واخذت نفس ملاك تستجمع نفسها:عشاني الحين ابيه وكل داخلي يبيه لكن في ألف شخص يبعدني عنه ، اتهدد كل يوم واشوف عذالي كل يوم وكل يوم اغرق فيه اكثر ، ما ابيك تصير نفسي

منيف:محد يقدر يهددني بشي وأصايل مستحيل تصدق عني شي

ملاك ضحكت ثواني وصدت:تصدق تصدق

لفت على منيف:لان عمك وعياله شياطين

تنهد منيف بتعب وهمس:أبيها ملاك لو ماصارت لي بموت بحسره

سكتت ملاك تناظره وكمل منيف:اقسم بالله صرت ابي اعيش عشانها ، ابي اعيش معها

عضت شفتها تناظر منيف وهز راسه منيف:أحبها

تنهدت ملاك وغضمت عيونها

منيف:ولقيت لي وظيفه وبشتغل وقبلوني بالمقابله الشخصيه وانا واثق بنفسي وبشغلي

ملاك سكتت تناظره وكمل منيف:وابيك جنبي بقراري وتساعديني بحياتي وتوقفين جنبي بزواجي

عقدت حاجبينها تبكي من نقطة ضعفها منيف وحاجته للعائله بنفس حاجتها

ووقفت وحضنته وهو جالس ووقف لها وحضنها:تكفين ملاك

ملاك بكت وهي حاضنته:اسفه ان كل شي صار بسببي

منيف:ولا تتأسفين ماعندي اغلى منك وخطاك بعيوني صواب بس لا تتركيني بعد

ملاك تنهدت وابتعدت عنه ومسحت دموعها باصابعها:باقي اخطبها انا لك ؟

ابتسم منيف وهز راسه:مع انها ردت بإيه بس اخطبي لي

ابتسمت له ملاك وهزت راسها واخذ يدينها منيف وباس كفوفها وتقدمت تبوس خده ملاك ورجعت حضنته:انت نقطة ضعفي منيف مابي يعوروني فيك

منيف:ماهو صاير شي لا تخافين

تنهدت وهي بحضنه وغمضت عيونها وابتعدت عنه بعد ثواني:برجع انا جيت اشوفك

منيف:بتتكلمين معهم ؟

هزت راسها ملاك:وجاسر هذا بملي فمه تراب لا تشيل هم شي

منيف تنهد بتعب ومشت ملاك واخذت شنطتها ومفتاحها وخرجت

رجعت للبيت ودخلت توقف سيارتها وقفلتها ولفت من وقف بجانبها ثنيان بسيارته وناظرته

ناظرها ثنيان وتنهد بتعب ، كل مره يشوفها وده يقطع كل شي بينهم ويتخطاه ولا تفترق دروبهم عن بعض

يناظر وجودها بجانب سيارته متشفق على وصلها وقربها وخيرها وبياضها ويبيها وكل مافيه يركض لها

يحلف بالله انه يحس روحه خرجت من سيارته لسيارتها ، ملهوف ملهوف ولا يقدر يخبي لهفته اكثر

رمشت تشوف نظراته وتنهدت بتعب تنتظر سماحه وحنيّته ترجع عليها من جديد ، تتمنى وتحلم كل شي يتصلح برمش عينها لكن كل مالها حياتهم تصير أصعب

نزل من سيارته وفتحت بابها تنزل ووقف ومشت له:منيف كلمني

سكت ثنيان وكملت ملاك وهي واقفه امامه ماسكه شنطتها بيدينها الثنتين:خطب أصايل من ابوك وأصايل ردت عليه بإيه

ثنيان:وانتي ماودك ؟

ناظرته ملاك وهمست:ماودي عشان ما يذوق اللي اذوقه

ثنيان:ولا ابي أصايل تعيش اللي عشته وتنصدم زود

ملاك:منيف ما لمس الشرّ بحياته الا بأسبابي اذا بتحاكم منيف قبل يتقدم لأصايل فحط ببالك اني انا سبب بكل شي سواه منيف ، منيف أنظف وأطهر من بيض جنحاني

ابتسم بخفوت ثنيان:جنحانك ؟

ملاك:ماعاد فيها جنحان ؟

ثنيان سكت وكملت ملاك:كسّرتها الدنيا

ثنيان:كسّرها اللهب الدنيا ما سوت شي انتي سويتي بالدنيا

تقدمت له ملاك ورفعت اصبعها لصدره ورفعت عيونها لعيونه تناظره من قريب:وسويت لي مكان هنا

ناظر عيونها من قربها وصوتها ونظراتها وكملت ملاك:نجمه من هالسماء طاحت على راحة يدينك

ثنيان نزل عيونه لثغرها ورجع ناظر عيونها وهمس:تغرقين موج وترجعين من جديد لَهب وشاهين مغرور

ملاك اخذت نفس:مالقيتك ترجعني من جديد شاهين مغرور ، رجعت لوحدي

ثنيان:يعني هواي ماله لزوم ؟

ملاك ناظرته يقيس غلاه ويبيها تكشف مكانه عشان ينكسر زعله وكبريائه وهمست وهي تناطر عيونه:ولا تكفيني الدنيا لو أشرب من هواك بحور ، ضاميه وقلبي على الماء وقلب الماء على شطك

ابتسم بدون يبين اسنانه من اعترافه اللي كررته على لسانها ونزل عيونه لثغرها وتكرر عليه كل التردد اللي سكن داخله بالبدايات ورجع ناظر عيونها من همست:اللي بخاطرك تقدر تسويه ماعاد فيه حاجز بيني وبينك الا اذا انت بنيت حاجز بيننا

ثنيان:تلوين ذراعي

ملاك سكتت وتنهد ثنيان ومشت ملاك تاركته تدخل البيت ومشى خلفها ثنيان

طلعت للغرفه وفصخت عبايتها ودخل ثنيان وناظر وجودها بالغرفه وارتبك

علقت عبايتها وجلست على الكرسي وناظرته واقف يناظر الفراغ ونزلت عيونها لدبلتها:تقدر تنام

لف عليها ورفعت عيونها عليه:وتكمل زعلك وعتابك وملاماتك بكره

ثنيان ناظرها ولارد ومشى للدولاب واخذت نفس ملاك تناظره يتجاهلها واخذ ملابسه ودخل الحمام

غمضت عيونها من دخل الحمام ومسكت راسها ثواني ورفعت عيونها لشكلها بالمرايه ، ينقصها وجوده معها عشان تقدر تستقوي وترجع من جديد لهب وتحارب ، تحتاج تحارب خصوصاً بعد اخر معاركها اللي ما حلتها للحين واخذت ثارها

خرج ثنيان ومشى ينسدح وناظرته بضيق ملاك ومشت وانسدحت بجانبه وعطاها ظهره

ناظرته وجلست واخذت نفس:تعرف ؟

سكت يناظر الفراغ قدام عيونه ولفت عليه ملاك:المطر بعد طول جفاف الحصاد بعد طول السنين العجاف ، رويّ العطشان ويقين المحتار وجواب الفضولي ومعطف البردان وشمس الصيفي الغرقان

تنهدت تناظر ظهره:عطيتني كل هالمشاعر انت

غمض عيونه بتعب ثنيان من محاولاتها وصدت ملاك للأمام تسمع اللارد وهمست:تصبح على خير

انسدحت وطفت الأنوار وعطته ظهرها تناظر الظلام

ابتسم من محاولاتها وعاجبه كيف تحاوله مثل ما تعب وجاهدها ، ومبسوط لانها من خوفها على زعله قاعده تعترف وتبتعد عن المكابره والصمت

'

نزلت تشوف ثنيان جالس على الطاوله يفطر وتقدمت وابتسمت:صباح الخير

ابتسمت نوره:أسعد الأيام ‏شوفك ولقياك و أقشر الأيام غيبتك عنّا

ضحك نهار:امي اعترفي انك تجهزين قبل تنامن ترحيبة ملاك

التفت عقاب:وانا مارديتي على سلامي

مشت ملاك لنوره ولفت أصايل:انا ما شافتني للحين اصلاً

ضحكت نوره وحضنتها ملاك من الخلف ونوره جالسه

ناظرهم ثنيان وابتسم بهدوء وناظرهم جاسر بجمود

وهز راسه عقاب:لو هالكلام لغير ملاك ماقبلت

جنى:يعني عمي لو لي هالكلام مع انه مستحيل يصير بتزعل ؟

ابتسمت ملاك من دق الكلام وباست خد نوره ومشت تجلس بجانب ثنيان

نوره:دايم ارحب فيك ياجنى بس شكلك تغارين كثير

جنى:اغار اغار وساري يدري

مارد عليها ساري وهو ياكل واخذت نفس ملاك تبدأ تاكل:مبروك يالطايش

ابتسم نهار:الله يبارك فيك

قاموا بعد ما خلصوا فطورهم يجلسون ولفت على ثنيان اللي يناظر فنجانه وساهي وهمست:بتداوم ؟

لف عليها ثنيان يناظرها وهز راسه يصد

وبلعت ريقها ملاك:توصلني معاك ؟

ثنيان:وين سيارتك ؟

ملاك:موجوده

ثنيان ناظرها ثواني تحاوله وهز راسه بالنفي ووقف:طريقي غير طريقك

سكتت تناظره يصدّها وبللت شفايفها بضيق من مشى يجلس مع اهله

لفت على جاسر اللي يناظرها وصدت تاخذ فنجان قهوتها وتقوم تجلس جنب ثنيان حطت شنطتها يمينها

وحطت رجل على رجل لابسه كعبها ولفت لعقاب:دريت عن اللي حصل بغيابي

سكتوا ولف ثنيان عليها يشوفها تكلم عقاب

وهز راسه عقاب بهدوء وكملت ملاك:كلمت منيف

لفت أصايل بتوتر وبلعت ريقها

ملاك:وعرفت انه تقدم لأصايل لوحده قدامك بدون أحد معاه ، مع اني وراه وسنده وعن قبيله كامله واعرف ان وجودي معه قدامك بيفرق

سكت عقاب يسمعها ووقف جاسر يتقدم لهم ويجلس

ملاك:لكن منيف ما خطى هالخطوه بدوني الا انه سمع باللي يبون أصايل وخاف تضيع من يده

شدت على كفوفها أصايل بربكه

ملاك ناظرت نوره ورجعت ناظرت عقاب:وعشان منيف قطعه من روحي وأوفى علاقاتي وكل أهلي ، دام إختياره أصايل

لفت ملاك تناظر أصايل المرتبكه:فأنا أبي أطلب أصايل منك ومن خالتي ومن باقي أخوانها

عضت شفتها بتوتر أصايل ولف عقاب على العيال اللي يناظرونه ولا تكلم احد بوجوده

ولف يناظر أصايل اللي تناظره بخوف وتوتر ورجع ناظر ملاك:منيف طلبها ووافقت أصايل عليه والحين انتي طلبتيها وهذي هي أصايل ترد عليك

لفت أصايل من نطق جاسر:واخوانها ؟

عقاب:انت اللي بتتزوج منيف ؟

ضحكت جنى وتلاشت ضحكتها من لف عليها جاسر

ورجع ناظره جاسر:مابي أختي تطيح بإختيار غلط

لفت ملاك ترفع صوتها:كل الإختيارات غلط الا منيف الصواب الوحيد

جاسر:عشان ايش عشانه اخوك ؟

نوره:يوووه جاسر خلاص يكفي ما بنخلص من هالكلام ؟ ولحد يتدخل بقرار يخص أصايل ، ابوكم موجود وحيّ الله يطول بعمره وأصايل كبيره وتعرف تختار وحتى لو أصايل بعد مده تكتشف ان اختيارها غلط وانا ماظنتي ، بنوقف معها كلنا

ملاك لفت لجاسر:واذا بنتكلم عن الاغلاط يا أخو زوجي موج ، فلا تنسى اغلاطك

لفت ملاك على سارا وحمد اللي جالسين يلعبون

ولف ثنيان على أصايل:أصايل انا ما تكلمت للحين ولا قلت رايي انا ابي اسمعك انتي ابي اعرف ان قرارك هذا طلع من اقتناع ويقين

ارتبكت أصايل من نظراتهم والضغط اللي تحسه ولف ساري:ضغطتوها ياخي يكفي ماصارت خطبه

نهار:انا اعرف أصايل تحب اعطيها رايي دايم ، ورايي يقول ان الفال الطيب مناسب لها ومثل ماكان فال طيب لي بيكون فال طيب لها

لفت أصايل على نهار وابتسمت له وضحكت نوره:اي هذا نصف الجواب اجل

ابتسم عقاب ولفت أصايل تناظر عقاب اللي يناظرها ومبتسم

ولفت نوره لملاك:بعد العصر نطلع انا واياك سوا هالمره ام ساري وملاك يرتبون لعرس ماصار احسن منه

ابتسمت ملاك وضحكت أصايل بربكه وتقدم نهار:وانا مني اقوى دعم مادي ومعنوي اللي تبونه يصير

عقاب:أصايل للحين تبين شاعر يكتب لك زفه ومغني يغنيها لك لوحدك ؟

ضحكت لانه يعيد احلام مراهقتها اللي تكررها وابتسم ثنيان:هذا عندي من الشاعر للمغني للزفه

نهار:وش هالغش سبقتني يعني ؟

نوره:باقي ياحبيبي العرس ماهو زفه وبس ، نبي فستان زواج انرسم لأصايل

ابتسمت أصايل بإمتنان تناظرهم وامتلت الدموع بعيونها

نهار:المصممه عندي انا

عقاب لف لملاك:بكلم منيف واحدد معه كتب الكتاب

ثنيان:ابوي انا اشوفه واكلمه لا تشيل هم

ساري:وانا بتكفل بتغطية سعودي ويدنق لأحلى عروس بالدنيا

ضحكت أصايل وكمل ساري:بخلي كل العالم تشوف زواجك وتتكلم فيه

ابتسمت بإمتنان لساري ولفت جنى:وانا يكفي حضوري

ضحكت أصايل وهزت راسها لجنى ولفت تناظر جاسر اللي يناظرهم وتلاشت ابتسامته بضيق

وعض شفته جاسر يناظر فرحة أصايل ونظراتها له وتنهد وتقدم:الله يوفقك

سكتوا يناظرون جاسر وهز راسه:وان بغيتي شي اخوك جنبك وما بيقصر

ابتسمت له بين دموعها ووقفت:بحضنك

وقف جاسر ومشت تحضنه ولف نهار عليهم:لي ساعه اداريها وبالنهايه الحضن من نصيب جاسر

ضحكت نوره وابتسم عقاب يناظرهم وتنهدت ملاك تناظر فرحتهم ياليت كان منيف يعيش فرحه عائليه نفس ما تعيشها أصايل

وقف ثنيان:انا ماشي

رفعت عيونها ملاك بضيق ونزل عيونه عليها:استناك بالسياره

جمدت ملامحها وخرج تاركها وابتسمت لانه ناداها ولفت عليهم وابتسمت لهم ومشت خلفه بشنطتها

فتحت باب سيارته وركبت يمينه وحرك ثنيان

اخذت نفس بربكه ولفت عليه:بتروح لمنيف ؟

هز راسه بالنفي وهو يناظر الطريق

ملاك:بتروح لشغلك ؟

لف عليها ثنيان يشوفها تسأله:وين تبين انتي ؟

ملاك:معاك لان طريقي نفس طريقك

سكت ثنيان يناظرها ورجع لف للطريق

ملاك:ما بنتكلم ؟

ثنيان:وش نقول ؟

ملاك:أحبك

لف عليها ثنيان وميلت راسها ملاك تناظره وتنهد يسمعها من ثغرها أغنيه ، وكأن لحنها منها غير وحروفها منها غير ، قراها وكتبتها له لكن سمعها مختلف

كان يتمنى تكررها من جديد عشان يستوعبها

نثرت على لهب جمر صدره موج وطفت كل نار تحرقه وهي بس نطقت بكلمه

ناظرته ساهي يناظر الطريق وكملت:وأبيك وأعذارك سمينه وخطاياك مسموحه وأتشوقك جداً حد الثماله ، وأتخيلك حولي وودي ألوذ بصدرك الدافي مدى حياتي وحتى أفنى ، هذا كلامنا

ثنيان لف عليها:كل مره بادرت لك وصديتيني بسبب حاجز بيني وبينك هالمره صدودي من نفس الحاجز

تأففت بتعب ولفت عليه:يحترق هو مو إحنا ، تعبت ثنيان تعبت من وجوده بحياتي وبحياتنا انا وإياك ، خلاص يكفي اللي سواه فيني وهو مسجون وش بيسوي اكثر وهو حرّ ، أبيك ثنيان أبيك

تعب ووقف على جنب ولف عليها:يعني تشوفينه هيّن ؟

ملاك:انت تبيني بعد انت جبتني ببيتك وبين اهلك من جديد انت ودك فيني ثنيان نفس ما انا ودي فيك

ثنيان ناظرها وبللت شفايفها ملاك بهدوء:ماعمري ترجيت احد ثنيان ولا عمري تمسكت بأحد بس انت الوحيد اللي لو اقضي عمري كله انادي على اسمه ماتعبت

ثنيان لف يناظر الفراغ وتقدمت له ملاك:أحبك ثنيان

غمض عيونه ومسكت كفه وفتح عيونه يناظرها وناظرت عيونه:والله أحبك وقلبي على الماء وقلب الماء على شطك

بلع ريقه ونزل عيونه لثغرها ورجع يناظر عيونها ولمعتها ونظراتها له

سمع اعترافها اللي اعترفه لها من قبل وتعب ، تعب بين كل مشاعره وهز راسه ورجع ظهره للخلف:نتكلم بالبيت

سكتت تناظره ولف عليها ثنيان وهزت راسها بضيق ورجعت محلها وصدت للطريق:بشوف مكتبي

مارد عليها وحرك لمكتبها ووقف عنده ورفعت عيونها لباب مكتبها وعقدت حاجبينها

ورفع عيونه ثنيان وتغيرت ملامحه يناظر باب المكتب الزجاجي الشفاف اللي مكتوب عليه بخط كبير ببخاخ احمر ' شيطان '

رجفت وهي تناظر الباب بصدمه وهمس ثنيان:من ؟

بلعت ريقها ما تشيلها رجولها من خوفها ورعبها وفتحت الباب ومسك ذراعها ثنيان ولفت عليه

ثنيان:لا تنزلين

فتح بابه ونزل ومشى للمكتب يناظر الكلمه وتلفت حوالينه ونزلت ملاك ومشت بهدوء وخوف ووجهها جامد ووقفت عند الباب:ماتركني

ثنيان تنفس:الله ياخذه الله ياخذه ، اقسم بالله لو ادري انه الكلب منصور والله ما يبقى فيه شي صاحي

ملاك رجفت وتقدم لها ثنيان:بنحلها تعالي ارجعك البيت

ملاك لفت عليه بتعب:وش يبي مني ؟ من هذا اللي يبي يرعبني ؟

ثنيان:يخسى يرعبك والله لأجيب راسه لا تخافين

ملاك:ماني خايفه ابي اعرفه ابي اعرف من هذا اللي يبي يأذيني

ثنيان عض شفته بتعب ولف يناظر الشارع ورجع ناظرها:طيب اركبي اركبي برجعك البيت

مشت وفتحت باب سيارته ولفت تناظر الكلمه وهي عاقده حجاجها وركب ثنيان وناظرها:ملاك

لفت عليه وركبت وحرك وناظرت الطريق وهي ساهيه وثنيان عاقد حجاجه يفكر

وقف عند البيت واخذت شنطتها ولف عليها:لا تسوين شي بدون علمي

ماردت عليه ملاك ورفع صوته ثنيان:ملاك

هزت راسها ونزلت وتنهد ثنيان وناظرها تدخل البيت وحرك

'

وقفت بالغرفه تمنع صرختها وضحكت وناظرت شكلها بالمرايه وابتسمت ماهي مصدقه ابداً ان كل احلامها بتصير بتاخذ اللي شافها احلى بنت بالعالم وحافظ كل تفاصيلها يحب كوتي ويحبها

عضت شفتها تلف على كوتي:بنعيش معاه

ضحكت ماهي مصدقه وعضت شفتها ماتبي تبكي من مشاعرها واخذت كوتي بحضنها تناطر سلسالها:بنعيش سوا ، بعيش معاه

غمضت عيونها ما تتخيل كيف بتكون حياتها معاه واخذت نفس تهدي صوت نبضها

ورفعت عيونها من دق الباب:مين ؟

دخلت نوره وابتسمت لها أصايل وغمزت لها نوره:اناديك عروس ؟

أصايل ارتبكت:امي ؟

ضحكت نوره:امشي حبيبتي امشي ورانا تماشي ماراح تخلص

أصايل تنهدت بتعب من امها:امي

نوره:قومي بس قومي لا تتدلعين بندور لك فستان لكتب الكتاب على بال ما يتحدد موعده ونحجز كل شي

وقفت أصايل وابتسمت:يعني صدق خلاص ؟

تكتفت نوره تناظر بنتها:وش رايك ؟

ضحكت أصايل:اوكيه بجيك

هزت راسها نوره وخرجت وابتسمت أصايل ومشت تاخذ عبايتها وخرجت

ناظر ملاك اللي طالعه:ملاك

لفت ملاك عليها وتقدمت أصايل:تكفين تعالي معاي بنروح نشوف لي فستان

ملاك:تعبانه أصايل والله

أصايل عقدت حاجبينها:ليش فيك شي ؟

هزت راسها بالنفي ملاك:لا لا روحي انتي

مشت تاركه أصايل ودخلت الغرفه وقفلت الباب واسندت ظهرها على الباب تناظر الفراغ

الكلمه اللي بالخط الاحمر للحين ببالها التهديد اللي كان يوصلها بكثره كل شي غريب وغامض يرعبها

هزت راسها بالنفي تبعد شكوكها لمنصور واهله ، مع انها انخذلت منهم وانصدمت من جحودهم بس ما تظن انهم ممكن يهددونها ويرعبونها

جلست وعضت شفتها تفكر وعاقده حجاجها طال الموضوع واخذ وقت طويل واللي يلعب معها جهل انها ملاك بنت مساعد ، تطيح وطاحت واجد لكن ترجع توقف من جديد وما تنكسر

اخذت جوالها وهي تتذكر كلام ثنيان:لا تسوين شي بدون علمي

تأففت بإنزعاج واخذت مفتاح سيارتها وخرجت من البيت

ركبت سيارتها وحركت تناظر طريقها من قدام ومن خلفها ووقفت عند بيت عمها ، محتاره تنزل والا ما تنزل

اخذت نفس تخفي ربكتها وفتحت الباب ونزلت ، مشت لباب البيت وبلعت ريقها ورفعت كفها تدق الباب

رجعت خطوه للخلف تنتظر الباب ينفتح وثواني فتحت شادن ورفعت عيونها ملاك:وخري

شادن:ماراح تدخلين

دفعتها ملاك عن طريقها ودخلت البيت ومشت خلفها

دخلت الصاله وناظرت منصور وجواهر ومحمد ووفاء ورفعوا عيونهم بصدمه من وجودها

وناظرت منصور ملاك وجمد وجه منصور من وقوفها اللي استبعده

ورفعت حاجبها جواهر:تعودتي تدخلين البيوت كذا ؟

تقدمت ملاك وناظرت جواهر:اخر شخص اتكلم معه انتي ، كل ما قلت لك بتعرفين قيمة اسمك تصدميني انك ارخص منه

محمد:احنا ما بنخلص ياملاك ؟ ما بتتركينا لوحدنا ؟

حطت شنطتها على الكنبه بغضب ولفت له:انا ما تركتكم ؟ انا ؟

منصور:ليه جيتي ؟

لفت عليه ملاك وناظرته بحرقه وهزت راسها بالنفي بعدم تصديق

ورفع حاجبه منصور:اشتقتي تشوفيني ؟

لفت جواهر على منصور وابتسم منصور وتقدمت له ملاك:اطالع في سبب همّي وظلامي وشرّي وهو جالس يشرب قهوه مع شخص يشوفني عدوته

رفعت عيونها جواهر على ملاك وكملت ملاك تناظر منصور:اطالع في الجحود كيف يكون

وقف منصور:جحود ؟ كالعاده بتوقفين قدامنا تحسابينا على جحودنا ؟ انتي ما تشوفين نفسك ؟ من اللي تزوجت ولد عميد وشيخ وانا بالسجن بسببها

تقدمت بغضب ترفع صوتها وضربت صدره:بسببي ؟ بسببي قتلت ؟ انت اللي قتلته وما كنت تسمع صوتي اناديك ورغم هذا انا طحت عند رجلين الشيوخ عشان اطلعك ، سرقتهم ونهبتهم عشان اطلعك

منصور:قلت لك اسرقي وطلعيني ؟ طلب واحد طلبته وقلت لا تنسيني

هزت راسها تناظره بصدمه:وتجازيني كذا ؟

منصور:اجازيك واحرق قلبك وانتقم منك ومن اللي اخذك ، لاني خست بالسجن بسببك وبسبب واحد ما اعرف كيف تعرفينه ، بعتيني عشان لقيتي الاحسن مني انتي كذا يا ملاك ما منك أمان   

ملاك:تركت أماني عندك لاخر لحظه قلت فدا منصور وبخلصه وبيطلع تحملت كلام اهلك وصوت ضميري وظلمي لنفسي وشوف كيف تجازيني ، تتكلم عني بأبشع الظنون وترمي علي تهم ماصارت فيني

منصور ابتسم وتقدم لها:تستاهلين

ناظرته ملاك ورفعت ذراعه وضربته كف ووقف محمد:زودتيها انتي

ناظرته ملاك من التفت عليها يشتعل من غضبه وتقدمت ترفع اصبعها:اقسم بالله لأرمي عشرتك رمي الزباله ولا اشوفك شي ، إصحّك تلعب معي يامنصور أصحَك تطلع اسوأ مافيني ووخر عن طريقي

سكت منصور يناظرها وناظرت جواهر:دام هي سددت الباقي وصارت الافضل ابعد عن الاسوأ

منصور:تحسبين بتمشي ببساطه ؟ تتهنين مع ولد الشيوخ وتسكنين بينهم ؟ بخليك ؟

ملاك:شتبي مني شتبي ؟ ما يكفي التهديد اللي تهدده لي بالخفاء وادري انه انت ؟

منصور:انا ماهددت بالخفاء انا اهدد بالعلن وقدامك الحين واقولك عيال عقاب هذولا بيرمونك رمية كلاب

ملاك هزت راسها:ابيك بس تطلع بوجهي والا بوجه عيال عقاب يمين بالله ما يكون فيها ولد عمي يامنصور

منصور:صاروا اهلك ؟ تخافين عليهم ؟

ملاك سكتت تناظره بعدم تصديق وهز راسه منصور:تحسبين بمشي اللي سووه بأختي ؟

صرخت ملاك:هي اللي انباعت له من اهلك محد جاء لاختك

منصور صرخ:تدافعين عنهم ؟

ملاك:ادافع وابيع عمري كله اللي عشته معكم عشان يكونون بخير هم اقسم بالله لأضحي بنفسي عشان ما يجيهم شرّ منك ومن اهلك

منصور:بيعي انا ودي اشوفك تبيعين وتخسرين عشانهم

ملاك سكتت وهز راسه منصور:بيعي مثل ما بعتيني انا

ملاك ناظرتهم وناظرت جواهر اللي جالسه وهزت راسها ومشت تاخذ شنطتها ولفت عليهم:كثرتكم ما تعني الانتصار ، اوقف قدامكم وحدي واكسر خشومكم وما اكون بنت مساعد

مشت تتركهم ولف منصور من خرجت وتنفس من غضبه وناظرتهم شادن:ترا زودتها محد بيوقفها عند حدها ؟

محمد:اسألي اخوك اللي يطبخ على نار هاديه

رفعت عيونها جواهر:منصور

منصور:لحد يتدخل

مشى يتركهم ولفت جواهر عليهم وجلست وفاء:ما بتريحنا هالحيّه

مشت وهي بالسياره عاقده حاجبينها بغضب وتتآكل من شعورها واخذت نفس من شافت سيارة ثنيان عند بيت منيف ووقفت خلفه ونزلت

دخلت البيت ولف ثنيان من سمع المفاتيح وناظرها:تلحقيني ؟

ملاك هزت راسها:اراقبك

وقف منيف وابتسمت لمنيف تحضنه وناظرها ثنيان بهدوء وجلست تفتح حجابها:بوشو تسولفون ؟

منيف:ما بدينا قبل شوي جاني ثنيان

هزت راسها ملاك وناظرت ثنيان ولف ثنيان على منيف:جيت عن ابوي بنتكلم عن الايام اللي تناسبك وتناسبنا

منيف عقد حجاجه:ايام ايش ؟

لفت ملاك:الو منيف ركز حبيبي مافي سالفه الحين غير زواجك

جمد وجه منيف بصدمه وناظرهم بتوتر:مدري عنك اقصد مدري عنكم يعني اللي يناسبكم

ملاك:واللي يناسبك انت بعد لانك عريس والحين صرت متوظف وجدولك مو دايم متوفر ، قول منيف

منيف اخذ نفس وبلع ريقه وناظر ثنيان ورجع ناظر ملاك:يعني انا مدري عن اختك اذا تبي كتب الكتاب بالبيت عندكم والا برا

ثنيان:لا ماهو بالبيت بنسويه برا

منيف ناظر ملاك ورجع ناظر ثنيان:الجمعه يمديكم ؟

ثنيان سكت ثواني ولف لملاك وهزت راسها:أصايل راحت اليوم تدور فستان بيمدي

هز راسه ثنيان ولف لمنيف:بإذن الله ببلغ ابوي وأكد لك مره ثانيه

ابتسم منيف بهدوء يهز راسه ووقف ثنيان

منيف:لا وين اقعد نتغدا سوا

ثنيان:ما تقصر برجع البيت اريّح مخلص دوامي وتعبان

ناظر ملاك اللي وقفت:ما بتجلسين ؟

ملاك لبست حجابها:ودك اجلس ؟

ثنيان ناظرها ولف لمنيف:كيف عشت مع غرابتها عمرك كله ؟

ضحك منيف وابتسمت ملاك:يحبني منيف رغم غرابتي

سكت ثنيان واخذت شنطتها تمشي له:وانت تحبني

صد ثنيان وابتسم منيف يناظرهم وخرج ولفت ملاك لمنيف وابتسمت له تبوسه من بعيد وخرجت

فتحت سيارتها تناظره يركب وركبت سيارتها تشغلها ومشت طريقهم خلفه بسيارتها

ناظر كاميرا ربط الحزام وناظرها خلفه وشغل لها الفلشر يهدي وابتسمت تفهمه وربطت حزامها تهدي وضحكت تهمس:منتبه لي ياثنيان

دخلوا الحي ودخلوا البيت يوقف سيارته ثنيان وملاك بجانبه وسيارة حمدان

وابتسمت نوره تنزل:ياحلوكم

نزل ثنيان وناظر أصايل وامه:خلصتوا ؟

ابتسمت نوره تترقب ملاك ومشت ملاك لهم وضمت كفوفها ببعضها نوره:ياحلوكم كنتم سوا ؟

ثنيان ناظر نوره:امي اسألك انا

نوره:وش يهمك خلصنا والا ما خلصنا ؟ قولي وين كنتم ؟ رحتم اليخت ؟

ملاك ابتسمت:لا ثنيان كان مداوم تقابلنا بالطريق

أصايل:احد ينقذني من امي من الصبح برا

ثنيان ابتسم وتقدم لهم ومشت نوره تدخل البيت:وباقي بنتعب

ثنيان مشى يدخل البيت وملاك خلفه مع أصايل:تحدد كتب الكتاب

جمد وجه أصايل ولفت نوره:اسألك بالله ؟

هز راسه ثنيان:كلمت منيف وقال الجمعه بس بشوف يناسب ابوي والا لا

نوره:اي ياحليله يقصد اخر جمعه من هالشهر صح ؟

ضحكت ملاك وهز راسه بالنفي ثنيان:الجمعه هذي امي

أصايل:اوف ثنيان

نوره ناظرته بعصبيه:صاحي انت من وين الاقي لي مطربه زينه بأسبوع ؟

ثنيان:هذا همك امي ؟

ضحك يدخل وابتسمت ملاك:انا ادبرها لك خالتي ولا يهمك

تنهدت نوره بتعب ومشت أصايل تدخل:ما ينفع بعد جمعتين ؟

لفت عليها ملاك ورفعت حاجبها:ودك تتأخرون اكثر ؟

ارتبكت أصايل من نظرات ملاك وسكتت ودخلوا الصاله وناظرت امها أصايل بتوتر:امي

نوره مسكت راسها:أميمه طالب نلاقي لها حجز؟

ضحكت ملاك ولفت أصايل من دخل ابوها:سلام عليكم

ردوا السلام وناظر أصايل اللي واقفه جنبه:وشفيك يانور عيوني ؟

أصايل بلعت ريقها:ثنيان يقول انه تحدد

عقاب لف لثنيان:تحدد ؟

ثنيان:الجمعه يناسبك ؟

عقاب:وش يهم اذا يناسبني او لا ؟ المهم يناسب الشيخه أصايل

ابتسمت أصايل وعضت شفتها من لف ابوها ورفعت كتوفها:ما اعرف

نوره:لا لا ما يناسب نخليه نهاية الشهر ما بلاقي حجوزات

عقاب ابتسم يناظر أصايل ومسك وجهها:قولي يا ابوي قولي اللي ودك يصير

ابتسمت ملاك تناظرهم واخذت نفس أصايل ولفت لثنيان وملاك اللي يناظرونها ولفت لابوها تعض شفاها بحيا:تفهمني ؟

ضحك عقاب وحضنته أصايل وهز راسه عقاب:الجمعه ياثنيان

هز راسه ثنيان ولفت نوره عليهم:اقولكم ما بلاقي حجوزات

عقاب ابتعد عن اصايل يحطها تحت جناحه:نلاقي انتي قولي بنت عقاب بن جرّاح وكلهم بيخضعون

ملاك:خالتي انا موجوده معاك اذا احتجتي شي

نوره:الوحيده اللي حاسه فيني ، امي ملاك الله لا يحرمني منك

ابتسمت ملاك ولفت لثنيان اللي وقف وخرج يطلع للغرفه ومشت خلفه تدخل

لف من دخلت ولبس تيشيرته ومشى للسرير وفصخت عبايتها وجلست على التسريحه تناظر انعكاسه

سرح ثواني بالفراغ يهوجس وهو جالس على السرير تجهل بوشو يفكر لكنه يهوجس وهي تمسح الميك اب

ملاك:ياهوه لا تسرح بعيد وتتركني وحيد أدور عليك ما ألقاك

التفت بإنتباه ثنيان وناظرها صاده عنه تمسح مكياجها

وابتسم ثنيان وصد عنها يجلس يكمل الاغنيه اللي بدتها:أنا هنا ، هنا ياحبي الوحيد

ابتسمت ملاك:يحلّها اللي جمعنا بعد طول غياب ، يحلّها اللي فتح بيني وبينك باب

صد يبتسم بخفوت ثنيان من الاغنيه وتلميحها ووقفت تاخذ لها ملابس وتدخل الحمام

تنهد ثنيان بتعب من حالهم ووضعهم ومحاولات ملاك له وهواجيسه اللي ما تتركه ابد

خرجت ملاك ولا لقته واخذت نفس تاخذ عبايتها وتنزل وهي تلف حجابها

دخلت الصاله تشوفهم يستعدون للغداء ولف نهار وابتسم:اينجل

ابتسمت له ملاك ودق لها تحيّه:الطايش

نهار:حلوه هذي احلى من المتحرش

ضحكت وجلس على سؤال جنى:طيب جهزتي شي أصايل ؟

أصايل:للحين بس الفستان لقيت شي حلو وناسبني يوصلني بكره

نهار:امي مو قلت فستان أصايل عليّ

نوره ناظرته تفهمه:لا بكره بروح انا ادور لي فستان على ذوقك

ابتسم وغمز لها وابتسمت تجلس على الكرسي

عقاب:جاسر وينه ؟

ساري:قال عنده شغل

نوره:وعياله غدوهم الخدم وهم يلعبون بغرفتهم ، الله يعين والاقي له بنت الحلال

هز راسه عقاب بهدوء وبدوا ياكلون ولف ثنيان يناظر ملاك تاكل بهدوء

ودخلت خدامه:مدام ملاك

لفت عليه ملاك وكملت الخدامه:لديك ضيف

عقدت حاجبينها ولف ثنيان وهمس:من ؟

رفعت كتفها ووقفت تحت نظراتهم ولف ثنيان يناظرها تخرج من البيت

وقفت من شافت منصور اللي واقف بالحوش وعقدت حاجبينها بصدمه وتقدمت له:شجابك ؟

لف منصور عليها وناظر البيت وهز راسه يتأمله

تقدمت ملاك:شجابك اخلص ؟

منصور:جيت لانه ما انتهى كلامنا

ملاك:انتهى كلامي انا وما يهمني كلامك ابد

منصور:يهمك يهمك لان ما بيوقف كل شي لهنا

ملاك:شتبي منصور شتبي ؟ مو خرجت من السجن واخذت جواهر اللي تحسبها انتقام مني ومن ثنيان ، شتبي زياده شتبي بعد ؟

منصور:باخذ حقي منك ومن عايلة عقاب وما بترك حقي وحق اختي يضيع

رفعت حاجبها ملاك:حقك وحق اختك ؟ اي حق اللي تبيه منهم ؟ حقك خذه مني انا اذا تبي هالعايله طلعهم من راسك ، واختك محد جبرها هي بغبائها دخلت بينهم وما استفادت غير خسارتها

منصور تقدم لها بحده:ماتعرفين ان ولد عقاب زوجك جاني وتهاوشنا سوا ؟ ببيتي بين ابوي وامي وزوجتي

ملاك:زوجتي ؟

منصور رفع حاجبه:وشو لا يكون بتغارين عليّ مع زوجك بعد

ملاك:لا والله مستغربه المصخره اللي سويتها

منصور:انا ما بموت لين اشوف هالعايله طاردتك من عندهم

سكتت ملاك تناظره وهز راسه منصور:وباقي اللي بيني وبينك ما انتهى بتتعبين وبتترجيني اوقف عن اللي اسويه فيك

ملاك:بتكمل تحط لي رصاصه على مكتبي ؟

ابتسم منصور ورفع عيونه من خرج ثنيان ووقف من شاف منصور ولفت ملاك تناظر ثنيان وبلعت ريقها

عقد حاجبينه ثنيان بصدمه وتقدم:شتبي انتي ؟

منصور ابتسم ووقف قدامه ثنيان ورفع صوته:شتبي جاي ؟

منصور:ابد جيت اسلم على بنت عمي

غمضت عيونها بتعب ملاك وتقدم لمنصور ثنيان:تكلم زين

مسكت ذراعه ملاك وهمست:ثنيان

منصور ضحك:افا هذا مو طبعنا زارتنا اليوم الصبح بنت عمي وما اجي ارد لها الزياره

عقد حاجبينه ثنيان ولف لملاك وبلعت ريقها ملاك تناظر نظراته

ولف ثنيان لمنصور:اذلف

منصور:ابوك يعرف كيف ترحب بالضيوف ؟

ثنيان:اذا صرت ضيف بالاول

منصور ابتسم:افا اعتبرني نسيبك وماخذ وحده من ريحتك

مسك ياقته ثنيان وسحبته ملاك:ثنيان اتركه

مسك يدينه منصور يناظره بغضب وتنفس ثنيان بعصبيه:اقسم بالله ان ما خرجت من بيتي لاحرق وجهك هذا

منصور دفعه وعدل نفسه:انا ماني ورع امد يدي ، انا اعرف كيف ارد عليك وعلى بنت عمي اللي جنبك

ثنيان:توكل وانقلع

لف منصور من نزل جاسر من سيارته وعقد حجاجه يناظرهم وابتسم منصور يناظر جاسر

تقدم جاسر وناظرهم ووقف قدام منصور

وهز راسه منصور وابتسم:جاسر

جاسر:وشو نقولك حمدلله على السلامه ؟

منصور:ماهي زينه لكم سلامتي

جاسر:توكل بس سمعنا نفس كلامك كثير

منصور:سمعت بس باقي ماشفت

جاسر ابتسم وربت على كتف منصور:توكل توكل

مشى جاسر ولف من نطق منصور:باقي عايشين مع اللي سرقتكم ؟

رفع عيونه جاسر لملاك واحتدت ملامحه يناظر ثنيان ولف لمنصور ومشى له:بتتوكل والا تبيني اعدم وجهك ؟

منصور ناظر ثنيان وضحك:ساقتها عليك

ثنيان مشى له ومسكته ملاك:خلاص خلاص

تنفست بتعب تناظرهم ومشى منصور يخرج ولف جاسر على ثنيان:هذا اللي تبيه يصير هذا ؟ شوف وش دخلت بحياتنا بسببها

ملاك ناظرت جاسر ومشى جاسر يدخل وهو معصب

وبلعت ريقها تشوف قبضة يد ثنيان وعصبيته وهمست:ثنيان بشرح لك

لف عليها بحده:انا ماقلت لا تتصرفين بشي بدون علمي ؟

ملاك:كنت بقولك اقسم بالله كنت بعطيك خبر بس ماقدرت اتحمل ورحت هديت فيهم

ثنيان رفع صوته:قلت لك علميني قلت لك لا تسوين شي بدون علمي لا تسوين شي من راسك ، انتي بتعيدين نفس حركات جواهر يعني ؟

عقدت حاجبينها وهسمت:شدخل جواهر ؟

ثنيان:لانها كانت مثلك

ملاك:ما سمعت اسمها منك من زمان وشو حنيت يوم جاب طاريها ؟

ثنيان هز راسه بتعب من ملاك ومشى يدخل وغمضت عيونها ملاك تتحمل غليل صدرها ومشت خلفه

عقاب رفع عيونه:من ؟

ملاك بلعت ريقها ولف ثنيان عليها يناظرها وتنهدت ملاك:ولد عمي

عقاب عقد حاجبينه:وش يبي ؟ ليه ما دخل ؟

ثنيان شد على الكرسي وهو واقف وعض شفته

ملاك:مستعجل

جلست ملاك ورفع عيونه عقاب على ثنيان يناظره ولف لجاسر اللي عينه على ملاك وثنيان ورجع ياكل

اخذ نفس ثنيان بعصبيه ومشى يطلع للغرفه ولفت تناظره ملاك يخرج وبلعت ريقها ومشت تتركهم وتمشي خلف ثنيان وناظروهم ولفت نوره وهمست:اللهم اجعله خير

'

فتحت الباب ولف ثنيان:اطلعي

كان يتشعل من غضبه ولا يبي يزيد ناره اكثر لكنها دخلت وقفلت الباب خلفها وتقدمت له:ماراح اطلع

ثنيان لف عليها بعصبيه:جيتي تكملين اللي صار تحت ؟ تبين نتحارب ؟

ملاك هزت راسها ترفع صوتها:ابي نتحارب نتحارب واحد فينا ينتصر ، انا تعبت من هالحال واحنا بنفس النقطه انا تعبت

لف عليها يرفع صوته:انا اللي وصلتنا لهنا ؟ انا ؟

ملاك:انا او انت ، تعبت ثنيان خلاص مافيني حيل اتحمل اكثر

تقدم يصرخ بعصبيه:من يوم طلع منصور وسبب نارّك ما يتعدل هالوضع ما بيتعدل

رفعت صوتها:قلت لك أبيك قلت أحبك حاولتك وجيتك وقلت اسف وش بقى اسوي عشان يتعدل وضعنا ؟ وش بقى خلاص تعبت

كملت تصرخ بوجهه:متى بستريح متى بعيش ؟

ثنيان:اذا مات هالكلب اذا خرج من حياتنا

ملاك:وما خرج من حياتنا وظل يهددني ويعدم عليّ كل حياتي متى بعيش قولي متى ؟

ثنيان:يهددك لوحدك ؟ هذا الكلب بكل بجاحه جاي بيتنا يهددني ويهدد جاسر ويهددك ، هذا ما يبي ينتقم منك لوحدك هذا يبينا كلنا

ملاك صرخت:خلاص جحدني وباعني برخيص وكل سبايبي منه ماراح اخليه يوقف بيني وبينك ابد ، انا تعبت لين لقيتك تعبت

سكت ثنيان يناظرها بقهر ونزلت دموع ملاك تصرخ:أبيك وباللعنه بأبو هالدنيا لو موتي بكره أبيك ثنيان

ثنيان تقدم يضرب التسريحه اللي خلفها:وأنا محترق قدامك من وش ؟ من وش علميني ؟ ماهو من قلبي ؟ ماهو من اني أبيك ؟

ملاك:هذا اللي يكفيني ومابي زود والباقي ما يهمني

ثنيان:ماراح يخلينا بحالنا وانتي ماراح تستوعبين وجودي جنبك وتصيرين تكلميني قبل تسوين شي

ملاك صرخت ترفع صوتها:رحت انهي كل شي مارحت اتحمد له بالسلامه

ثنيان:نهيتيه ؟ جاوبيني نهيتيه ؟ جايك الكلب لين عندنا هنا

ملاك سكتت تناظر عصبيته وكمل ثنيان:سرق حياتي معك ماهو بس حياتك

نزلت دموع ملاك بتعب من علاقتهم وحياتهم اللي كل مالها تصير اسوأ واخذ نفس ثنيان من شاف دموعها

ومشى بقهر يجلس على السرير يتنفس ويغمض عيونه يحاول يهدأ

وفتحت عيونها من بين دموعها تناظره ومشت تجلس جنبه وهمست:تعبت ثنيان تعبت

تنهدت بتعب من كل شي تخوضه ولفت عليه تناظره صاد عنها معصب:لا يغلبونا

لف عليها وعقد حاجبينه من جملتها وهزت راسها:مابي ينتصرون عليّ ويفرقونا

سكت من استوعب جملتها وطلبها وتقدمت له تحط راسها على كتفه وتحضن ذراعه:مابي أخسرك ، انت الوحيد بحياتي اللي باقي لي

تنهد يغمض عيونه ورفع ذراعه يحضنها من الجنب وبكت ترفع يدينها تلف وتحضنه

غمض عيونه ثنيان من حضنها وهمس:انتي هلاكي

بكت وهي حاضنته وتنهد ثنيان:انتي هلاكي

ميلت راسها على كتفه وهي حاضنته:أبيك ثنيان ما أبي شي من حياتي غيرك

سكت يسمعها وابتعدت عنه تناظر وجهه:مامعي غير انت واقف بصفي ، ذخيرتي ودنيتي واللي معيشني ، انا لو بدونك رفعت كفوفي واستسلمت لكل شي لكني احارب واجاهد عشان ما يجيك شي ، عشان ما يجينا شي

ناظرها ثنيان وهزت راسها بتعب تلمس خده:منقاد لك قلبي وعقلي لك منقاد

تنهد ثنيان يناظرها متمسكه فيه:وشلون اكون الراكد الهادي ياملاك ؟ كل حياتي من قربك حرايق ، اقسم بالله حرايق وان غبتي عني انا في حرايق ، تشتعل نيران شوقي وانتهي مثل الحريق ومن غيرتي احترق وكلي احترق ، إنتي لهب

بكت وهي تناظره وناظر عيونها ثنيان:انتي بلوتي

نزلت راسها وتنهد ثنيان:بلوتي وهلاكي

رفعت عيونها عليه وكمل ثنيان:أبي أفوزك وأبيك لو انك موتي وحتفي وهلاكي ياملاكي

غمضت عيونها من كلامه وتقدم يمسك وجهها:تعبت مشوارك

فتحت عيونها تناظره ونزلت عيونها لثغره ورفعت عيونها لعينه وماقدر يصبر أكثر ، كانت قريبه منه تحاوله وتبيه وتحبه وحرام يصدّ ، حرام ما يروي ضماه

ميّل راسه لها وقبّل ثغرها ياخذ انفاسها لانفاسه ، ولأول مره بادلته تعني كلامها في قولها بإنها تبيه

رفعت كفها على عنقه وشعره من الخلف ونزل ذراعه لخصرها يقربها منه

وقف وهو يقبّلها وانحنى لها وهي جالسه على السرير وابتعد يرفع راسه وناظرها

ورفع ذراعينه ينزع تيشيرته ورجع ينحني لها يقبّلها ، استراحت على ظهرها وميّل راسه يقبّل عنقها

قضى وقت طويل يقبّلها وتقبّله لين ما ابتعدت عنه وناظرت عيونه ، حط جبينه على جبينها وناظر عيونها:ماعاد فيها رجعه ، ما أبالي لو طريقك هلاك

غمضت عيونها ملاك ورجع يقبّلها

-

رفع عيونه نهار يناظر اهله اللي ساكتين ويناظرون بعض

ولفت جنى:سكتوا لا يكون ذبحوا بعض

لف ساري عليها ولفت نوره تناظرها:بقوم اشوف

عقاب:خليهم

نوره:ماسمعتهم يصارخون ؟ ما فهمنا شي غير صراخ وبس صراخ ، خلني اشوف وش صاير

نوره وقفت تتركهم وطلعت للغرفه واخذت نفس ودقت الباب

رفع راسه ثنيان وهمس:مو وقتك

بلعت ريقها ملاك تناظر وضعهم وعض شفته ثنيان ووقف ونطق:من ؟

نوره:انا ثنيان

لف ثنيان لملاك اللي قامت بسرعه واخذ تيشيرته يلبسه ودخلت ملاك الحمام ووقفت عند الباب

فتح الباب ثنيان وبلع ريقه ودخلت نوره وناظرته بحده:وش صاير ؟

ثنيان:وش صاير ؟

نوره:انا اللي اسألك وش هالصوت وصلنا لين الصاله مافهمنا شي ما نسمع غير صراخ

ثنيان عقد حاجبينه:اي صوت ؟

نوره:ثنيان لا تستهبل معي ليش تهاوش البنت ؟

سكت ثنيان يناظر امه يحاول يتذكر وتقدمت نوره له بحده:لا تفهي جاوبني

رفعت عيونها نوره من خرجت ملاك ولف ثنيان ناظرها وابتسمت بربكه ملاك

نوره تنهدت:ملاك وش صاير يا امي ؟

ملاك رفعت كتفها:ولاشي ، اختلفنا شوي وتصالحنا

هزت راسها نوره ولفت لثنيان:تعال معي بكلمك

مشى ثنيان وخرج ومسكت راسها ملاك بتوتر وجلست على الكرسي تتسجمع نفسها

لف ثنيان لنوره اللي وقفت عند الدرج:ليش تعامل البنت كذا ثنيان ؟ من تالي صاير تغثني وش هالمعامله

ثنيان تنهد وحك جبينه:امي والله العظيم كنت اراضيها بس انتي خربتي كل شي

كشرت نوره:الله ومراضاتك نفس وجهك ، روح جيب لها هذيك الشنطه اللي تترس العين والا طقم يواجه لزواج اختك

صد ثنيان وكملت نوره:ترا ملاك تبي الشي الزين الغالي لا تخليها تطفش منك ومن هواشك

ثنيان:اقسم بالله امي كانت امورنا بتتغير ١٨٠ درجه قبل تجين

نوره:تضحك عليها بكلمتين مسكينه ، على العموم لا عاد تكررها مو لوحدك بالبيت تقعد تصارخ فيه

هز راسه ثنيان ومشت نوره ورجع ثنيان ودخل الغرفه وما لقاها وسمع صوت المويه بالحمام وجلس على السرير

عض شفته يتأفف لانها فرصه جاته لكن ما تمت

'

جلست نوره بتعب:الله يهدي النفوس

ساري:من تالي امورهم ماهي زينه

جنى:الصراحه اي

أصايل:عادي تصير وبيرجعون يتصالحون حتى يمكن تصالحوا الحين

نهار تنهد:اثاري الزواج صعب

جاسر:عبالك سهالات ؟

نهار:شدراني شفت امي وابوي مبسوطين قلت الدنيا كلها مثلهم

نوره:اللهم لا حسد

ضحك نهار ونطق عقاب:وش ظنك يعني انا وامك ما مرت علينا أيام صعبه عشناها ؟ لكن الزواج الحقيقي اللي يستمر بس يستمر وهو يصلّح كل شي ، يفهم ويسمع ويحب ويبادر

دق جوال نهار واخذه ولف لأصايل يدقها وناظرت الاسم وابتسمت

ورد نهار:الفال الطيب

لفت أصايل تناظر اهلها بربكه ووقف نهار يخرج:ارحب النسيب

ضحك منيف:شالاخبار ؟

نهار:ابد ننتظر فرحتكم

ابتسم منيف:فاضي ؟

نهار:افضى لك

منيف:ماتقصر بغيت اروح اشتري لي بشت وابي احد معي

نهار:تعال البيت وانادي خياط ابوي يضبطك

منيف:لا لا بالله نهار نروح خياط كويس

نهار:اجل اعرف خياط زين نروح له

منيف:استناك

نهار طلع مفتاحه من جيبه:جايك

ركب سيارته نهار وحرك ماشي للطريق ومشغل اغاني ووقف من شاف سيارة منيف وقفل سيارته ونزل:حيّ النسيب

ابتسم منيف:تسوق طاير انت ؟

نهار تقدم:اجيك طاير تبشر

منيف ضحك ودخل عند الخياط ومعه نهار واخذ نفس منيف

ووقف الخياط:اهلاً اهلاً نهار

نهار ابتسم:جايك اليوم لين عندك ما بنتعبك للبيت

الخياط:تبشر انت والوالد تحت أمرك

نهار رفع ذراعه على كتف منيف:جايب لك نسيبنا

ابتسم منيف ولف الخياط:ماشاء الله الف مبروك

منيف هز راسه وهو مبتسم ولف نهار:خذ مقاساته وخلص لنا بشته قبل الجمعه

هز راسه الخياط ياخذ المتر:تبشر تبشر

ابتسم منيف وبدأ ياخذ قياساته الخياط ويحس منيف بالفرحه تغمر داخله

ماهو مصدق كل شي يصير ولا توقع كل شي يتيسر بهالسهوله له ويقدر يربح أغلى البنات ، أصايل

نهار:امي من بدايتها ماجزت لها

رفع عيونه بسرعه منيف؛ليش ؟

نهار:ما عجبها الموعد تقول ما يمديها تجيب اميمه طالب

حك حاجبه منيف:نأجل طيب

ضحك نهار:خفت منها ؟ ابوي وافق ما يمديك تتراجع انت بعد

منيف:لا تكفى نهار اذا ما ناسبكم نأجله

نهار:ماعليك امي تجيب اللي ما ينجاب ليوم الجمعه

منيف سكت ووقف نهار:وانا بجيب مصورين لكتب الكتاب ابوي وصاني بس مدري القاه الحين مفتوح والا لا

منيف:ماعليك انا اشوفهم

نهار:المشكله بكره مستلم انا بقول لساري

منيف:لا والله انا اخلص هالامور ماعليك

ابتسم نهار:اي تبي تكبر بعين ابوي

ضحك منيف ولف للخياط:اسود ؟

لف منيف لنهار:وش رايك ؟

نهار:اسود اسود الله لا يسود عيشتك

ضحك منيف وهز راسه للخياط

الخياط:اوصله لك اذا خلصته

منيف هز راسه:تمام يعطيك العافيه

خرج مع نهار وتقدم نهار يفتح باب سيارته:اذا تحس انك مرتبك ارتبك اكثر تراك ماخذ أصايل اختي

ضحك منيف يفتح باب سيارته وركب نهار وضحك

حرك من جنب منيف وابتسم منيف وناظر طريقه يرجع للبيت

'

لبست فستانها وخرجت توقف قدام نوره وأصايل وجنى

ابتسمت نوره تبدي اعجابها

وهزت راسها أصايل:مايشبهك

لفت لجنى اللي هزت راسها بالنفي ودخلت تغير الفستان

لبست غيره وخرجت لهم ووقفت أصايل:هذا هو هذا اللي صنع لأجل اينجل

ابتسمت ملاك ورفعت حاجبينها نوره:ملاك

ضحكت ملاك تناظر فستانها بالمرايه ونطقت جنى:بتولعين بالناس ؟

ملاك عضت شفتها تناظر فستانها:لَهب ، هذا هو

هزت راسها نوره:خلينا نستعجل عشان نشوف باقي اغراضنا

دخلت تغير وتلبس عبايتها وخرجت لهم

ركبت ملاك سيارتها وأصايل بجانبها ونوره وجنى مع السواق

ووقفت عند دار غلا فهد وابتسمت أصايل:بنشوف ذوق نهار واخيراً

ابتسمت ملاك ونزلت ودخلت نوره قبلهم ودخلوا خلفها

وناظروا المكان وتقدمت لهم وابتسمت:اهلاً وسهلاً

لفت نوره وناظرتها جنى من فوق لتحت وهي تشرب من قهوتها

ومسكت شنطتها ملاك بيدينها الثنتين تتأملها

وابتسمت أصايل وهي تاكل علك وتناظر غلا

وناظرتها نوره بترقب وناظرتهم غلا ولا فهمت شي من نظراتهم وهمست:اخدمكم بشي ؟

نوره هزت راسها:زبونتك ام ساري

ابتسمت غلا:اهلاً وسهلاً شرفتيني تفضلي

مشت نوره تجلس وتناظر الفساتين من حوالينها وجلسوا البنات معها

ووقفت غلا تمد لها الايباد:حابه شي معين ؟

نوره هزت راسها:اي اجلسي

ابتسمت غلا وجلست ولفت تناظر جنى وأصايل وملاك اللي يناظرونها ولفت لنوره

قفلت الايباد نوره:متزوجه ؟

ابتسمت غلا بإستغراب:مو جايه تختارين لك فستان ؟

نوره:الا بس قلت اسولف معاك شوي انا وبناتي

ابتسمت غلا لهم ورجعت ناظرت نوره:لا

نوره هزت راسها:عايشه لوحدك بالخبر ؟

غلا عقدت حاجبينها من اسئلتها:لا مع اهلي

هزت راسها ملاك من جوابها

نوره:كم عمرك ياغلا ؟

غلا:خالتي انا مو فاهمه صراحه اسئلتك للحين كيف اقدر اخدمك ؟

نوره:ابد سولفي معي احب اتعرف على مصمماتي

غلا ابتسمت:لي الشرف اكيد ، حابه اعرض لك الفساتين هنا تشوفين شي مناسب لك وللبنات ؟

رفعت عيونها نوره وهزت راسها جنى

نوره:اي بشوف

مشت غلا ونادت عامله وتقدمت العامله تعلق قدامهم الفساتين وهزت راسها أصايل

وابتسمت نوره تناظر غلا وابتسمت لهم:عن اذنكم اشوف الزبونه اللي داخل وارجع لكم ، خدوا راحتكم

مشت تاركتهم ولفت نوره تناظر البنات

ملاك:بنت ناس عايشه مع اهلها

جنى:قوية شخصيه وتعرف تتجاهل اسئلة نقالين العلوم اللي عندنا

أصايل:وفاهمه منصبها ما عرضت بنفسها الفساتين استعانت بعامله

نوره:ونادتني خالتي

ملاك:تحسب لها ؟

ابتسمت نوره ووقفت:غلا

لفت عليها غلا وابتسمت لها نوره:ابي هذا بقيسه

هزت راسها غلا ومشت العامله مع نوره للداخل

وشربت من قهوتها جنى تناظر الفساتين

أصايل:تايب نهار ما يتغير ابد

جنى:عجبتني تناسب عايلتنا

ملاك:يمكن تصيرون صديقات

جنى:يمكن

ابتسمت ملاك وضحكت جنى ولفت أصايل اللي تاكل علك وتناظر غلا من بعيد:طولها حلو بعد مو قصيره ، نهار ما يحب القصار

ملاك:ولا أنا

جنى عقدت حاجبينها:شعرها طويل ؟

أصايل:ما قدرت اعرف مع حجابها مو مبين

ملاك هزت راسها:تناسبه تقدر تكسر راس نهار وتترس عينه اللي ما تنترس

تقدمت لهم قهوه وشربوا وهم يناظرون غلا من بعيد

خرجت نوره وتقدمت لغلا وابتسمت غلا:ناسبك ؟

نوره:اي عجبني اللي داخل اخذت قياساتي بالضبط اذا خلص تجيبونه بيتي ؟

غلا:ان شاء الله بس حطي رقمك وعنوانك

نوره:اي سجليه عندك

اخذت قلم تسجله على الفاتوره ورفعت عيونها نوره تناظرها ولفت غلا:شرفتي

ابتسمت نوره تهز راسه واشرت للبنات وخرجوا

توجهوا لمحل المجوهرات ودخلوا يختارون أطقم

ورفعت طقم أصايل:هذا ؟

نوره:وش صغره هذا لا ما يترس العين

جنى:خالتي هذا ؟

نوره:مبين رخيص

رفعت طقم ملاك وابتسمت نوره:ما تطيح عيونك الا على الغالي

ابتسمت ملاك ولفت نوره للي واقف عندها:هذي كلها وجايه احاسب عليها

وقفت نوره معاه وتقدم حمدان ياخذ الاكياس وخرجوا ولفت عليهم أصايل:للبيت ؟

نوره:لا ، عشاء حلو للسيدات

ابتسمت جنى وضحكت ملاك ومشت نوره تركب وحركوا لمطعم ونزلوا سوا

وجلسوا وناظرتهم نوره:اي ما قلتوا لي تناسب نهار ؟

ملاك:انا قلت رايي تناسبه وبقوه

جنى:وانا عجبتني

أصايل:بس مين اهلها وكيف اهلها للحين ماعرفنا

نوره:هيّنه هذي على ابوك

جنى:وجاسر ما بتدورون له عروس ؟

تنهدت نوره تناظر المنيو:جاسر اهخ ياجاسر

رفعت عيونها ملاك من طاري جاسر وصدت للمنيو

جنى:خالتي شصار حجزتي مطربه ؟

ابتسمت نوره ورفعت حاجبها بشموخ وضحكت أصايل:أميمه طالب

ضحكت ملاك وهزت راسها نوره:قلت تجيني يعني تجيني حتى لو حجزي متأخر

جنى:وناسه تحمست

نوره:للحين خلصنا حمدلله مابقي الا شي بسيط

ملاك ابتسمت وطلبوا اكل ياكلون سوا

سولفوا سوا وضحكوا وقضوا وقت كامل سيدات فقط

رجعوا البيت ودخلت ملاك بسيارتها ونزلوا ودخلت الصاله نوره ورفع راسه عقاب:الشيخه ام ساري

ابتسمت نوره تجلس بتعب:تعبت

ضحك ثنيان وابتسم ساري:خلصتي طقوسك ؟

نوره:اي حمدلله وكل البنات لقوا لهم فساتين

رفع عيونه ثنيان لملاك اللي واقف وجلست جنى:وخلصنا امور سيدات

ناظرها نهار وابتسم ولف لامه:امي ؟

غمضت عيونها تطمنه ولف نهار لأصايل وغمز لها واشرت له عشره على عشره وعض شفته يضحك

عقاب:وش عندكم تتغامزون ؟

نوره:بعدين بعدين

ملاك:انا تعبت وبدخل ارتاح تصبحون على خير

مشت تخرج ورفع عيونه ثنيان لنوره اللي ناظرته وتنهد من فهم نظراتها ووقف وناظر أصايل:كلمت شاعر وجهزها تبين تقرينها والا تسمعينها ملحنه ؟

ابتسمت بصدمه أصايل:منجدك ثنيان ؟

ابتسم ثنيان وهز راسه وعضت شفتها:بقراها

ثنيان:طيب برسلها عليك

هزت راسها ومشى ثنيان يطلع وفتح الباب ودخل

لفت عليه ملاك اللي تمسح مكياجها وجلس يفتح جواله

وناظرته ملاك:شسويت ؟

ثنيان ارسل القصيده لأصايل:بوشو ؟

ملاك:بغيابي

قفل جواله ولف عليها:خمنت لون فستانك

ابتسمت وهي تمسح مكياجها:وش طلع معاك ؟

انسدح ثنيان ورفع ذراعينه خلف راسه:لَهب

ضحكت وابتسم ثنيان من ضحكتها:بتولعين بالناس

هزت راسها ورفعت عيونها بالمرايه عليه:اشتقت احرق

ابتسم بهدوء ثنيان ومشت ملاك وجلست على السرير:وعشان اعرف ان عمي بيعزم نفسه غصب عني وعن منيف بجهز لهم لهب

ثنيان:اها تبين تتكلمين معهم بهدوء زي دايم ؟

ابتسمت ملاك ورفعت كتفها ببراءه:ولا ازيد على كلامي ابد

ثنيان:ابد ولا تكسرين وتضربين وتصرخين

ملاك عقدت حاجبينها:مين ؟ زوجتك ملاك ؟ اكيد وحده غيرها

ابتسم وتقدم يحط راسه على ذراعه يناظرها:زوجتي ملاك

ابتسمت تشوف نظراته وهز راسه ثنيان:ملاكي هلاكي

ناظرت عيونه اللي تتأملها:تحبها

ثنيان:رغم انها صعبه ولَهب وقروشتني بحياتي وحرقتني وطلعتني من طوري وورتني أيام عصيبه

ضحكت ملاك تصد وابتسم ثنيان:تورطت

لفت عليه ملاك وهزت راسها:اللي عديته معاي كثير وباقي آخر شي بيحرقني ويحرقك

ثنيان هز راسه:اهلي

هزت راسها ملاك بتعب وتنهدت:وش بتكون ردة فعلهم لو وصلهم خبر عني ؟

ثنيان مد ذراعه ومسك كفها:انا معك بنحلها

ملاك:لا تقولي مستحيل يعرفون

ثنيان:بيعرفون وادري هذي ذخيرة عمك وولده اصلاً لكن انا موجود وبتنحل

تنهدت ملاك تصد تناظر الغرفه وناظرها ثنيان:بتنامين ؟

هزت راسها تفتح اللحاف وناظرها ثنيان ولفت عليه تشوف نظراته:لا يكون بتنام على صدري ؟

ابتسم ثنيان:انا لا انتي ودك ؟

ابتسمت له وهزت راسها وفتح ذراعه وتقدمت له وغمضت عيونها من حضنها وحطت راسها بحضنه

وابتسم ثنيان يناظرها بحضنه لأول مره ورفع يده على شعرها:تذكرين اول مره شفتيني ؟

ابتسمت ملاك وهزت راسها وهي مغمضه عيونها:اول مره هددتني قصدك

ثنيان:رفعت عليك سلاح 

تنهدت ملاك تذكره وكمل ثنيان:ماكنت اعرف وقتها انك بتدخلين حياتي بهالقوه وتغيرين كل شي ظنيته صحيح ، اختياراتي اهتماماتي وأولوياتي

ابتسمت ملاك تفتح عيونها تسمعه وكمل ثنيان وهو يلعب بشعرها:ما كنت احب احد اكثر من حبي للموج

رفعت راسها ملاك وناظرت عيونه وناظرها ثنيان:وحبيت

ابتسمت له وكمل ثنيان:وحبيت ضده وعكسه ، لَهب

ملاك رفعت كفها على دقنه تلمسه بأصابعها وهي تناظره

ثنيان:ماحبيت غير الصعب الكايد والمثابره ، لَهثت عشان أدخل قلبك وتعبت عشان أذوق ثغرك وأبي أتعب اكثر اذا بتجيني دايم بلذة الانتصار ، الصابر ، المجاهد ، اصعبي عليّ دايم ولا تتساهلي وتتهاوني معي

ملاك ناظرت عيونه:وعشانك صعب وتحب الصعب انا ما اعرف للسباحه ، تعلمني اسبح ؟

ابتسم ثنيان يفهم تلميحها:اعرف اخليك تغرقين بس

ضحكت ملاك وهز راسه ثنيان:بخطفك

ملاك:لليخت ؟

ثنيان:لا ، بس خلينا نخلص من أصايل ومنيف وبنهرب

ملاك ابتسمت:انا وانت ؟

ثنيان:متى صرنا بدون بعض ؟

ملاك ناظرت عيونه ورجعت تحضنه وغمضت عيونها براحه من وجود هذا الحضن والحنيّه اللي تحوفها حوف

غمض عيونه ثنيان يحضنها بذراعينه لصدره

ليلة الجمعه - كتب كتاب منيف بن مساعد على بنت العميد والشيخ عقاب بن جرّاح ' أصايل وأخت النهار '

-

وقفت خلفه بالمبخره:تركت الميك اب ارتست تنتظر عشان ما أفوّت هاللحظه

ابتسم منيف وهز راسه بالنفي يناظر المرايه:مو مصدق

ابتسمت له ملاك وحطت المبخره ومشت تاخذ البشت ووقفت خلفه:أحلى يوم بحياتي

حست انها بتبكي وضحكت:حمدلله مو حاطه ميك اب

ضحك منيف ورفعت البشت تحطه على كتوفه وتنهد منيف يناظر شكله بالمرايه

مسكت كفوفها ببعض تناظره وبكت ولف عليها منيف واشرت له:مابي اعفط غترتك

منيف مسح دموعها:بتزفيني الليله

بكت وهي تناظره وهزت راسها:بزفك

ابتسم منيف وبلعت ريقها تاخذ العطور تعطره:اقرأ أذكارك منيف

منيف:تحصنت وتعطرت سبعين مرّه

ملاك ضحكت تعطره:بتروح مع نهار ؟

هز راسه واخذت جوالها ومفتاح سيارتها ملاك:تأخرنا تعال

خرجت معاه ولف نهار:النسيب

ابتسمت ملاك ومشت لسيارتها:منيف بأمانتك يالطايش

نهار:ماعليك بالحفظ والصون انتي روحي طلّي عليهم اينجل

ابتسمت له وركبت سيارته تحرك للقصر ، دخلت للغرفه وناظرتها نوره:تأخرتي ملاك وينك ؟

ملاك:جيت جيت

نوره:بستقبل بدونك يعني ؟

ملاك فصخت عبايتها:دقايق اسبقيني

نوره هزت راسها وابتسمت ملاك للميك اب ارتست:معليش

جلست تستعد وتتجهز وتسمع الاغاني اللي بدت تطرب المكان والحضور

وجهزت تلبس فستانها ووقفت قدام المرايه بالمبخره وتبخرت بالعود

لابسه الأحمر نفس ما تعرف نفسها ' لَهب '

تعطرت بالعنبر والكشمير وتطيّبت بالعود وناظرت شكلها وكأنها تثبت للعيون ؛ لو تقوم بلاد ما تشبه بلادي ولو يجون أشباه ما أشبه أحد

انحنت تلبس كعبها واخذت جوالها بيدها وخرجت تمشي بكل ثقه وفرحه وتقدمت لنوره اللي واقفه تستقبل ووقفت بجانبها

ابتسمت للي يباركون ويسلمون عليها ووقفت قدامها وحده تجهلها ومدت لها كيس:هديه بسيطه

ابتسمت ملاك:للعروس؟

هزت راسها بالنفي:لاخت العريس

عقدت حاجبينها ملاك ودخلت المَره تجلس بين الحضور ونزلت عيونها للكيس ملاك ورجعت تلف تسلم

'

-قسم الرجال -

بلع ريقه يناظر الحضور والبشوت وطوال اللحى ، واخذ نفس يجلس بجانب الشيخ

ورفع عيونه عقاب لمنيف وابتسم منيف بهدوء يسمع مقدمة الشيخ

ورفع عيونه من دخل محمد ومعه منصور وتلاشت ابتسامته ولف للشيخ من طلبه يردد خلفه

وقف منصور يناظر منيف من بعيد بجانب عيال عقاب

والمصوريين أمامهم يصورونهم

وكل من عيال عقاب لابس بشته وكأنهم جميعاً أخوان وعزوه لمنيف ولأصايل

ما أخذ منيف غير الكايد والأغلى ، ما أخذ غير بنت الشيوخ وحيدة عقاب ودلوعة أخوانها ، الدرّ الثمين

وقف من ابتسم عقاب وصافحه:مبروك

سلم عليه منيف ولف للي بجانبه أخوانها وسلم عليهم

يشوف الحضور ومكانه بين عقاب وعياله وكله شعور بالراحه يغمر صدره ، تواجد بالمكان اللي يستحقه وأخذ الأغلى والأفضل

ابتسم عقاب يمسك كتف منيف اللي يسلم على الل تقدموا له يباركون

ولف عقاب يناظر محمد ومنصور وهمس:عمك

لف منيف يناظرهم من بعيد وتقدم محمد:ماشاء الله لو ما جيت بدون عزيمه ما دريت

سكت منيف وناظره عقاب:ما تحتاج عزيمه يا ابو منصور الله يحييك

محمد ناظر عقاب اللي ابتعد ولف لمنيف وصافحه محمد:مبروك مبروك

منيف ناظر تسليكه وبرودة كلامه وهز راسه بضيق

تقدم منصور وصافح منيف:استحليتوا لكم مكان بينهم ؟

منيف اخذ نفس:اذا جاي لغير المباركه مابي اسمعه

منصور سكت والتفت منيف من ناداه نهار وتقدموا يرقصون سوا بالسيوف

ابتسم منيف وذراعه جنب بجنب لثنيان ونهار يرقصون بالسيوف وأمامهم فرقه تقرع لهم

وتقدم عقاب يرقص بسيفه وسطهم فرحه ببنته وأغلى أمنياته

وتقدموا ساري وجاسر معه ما يتركونه لوحده وابتسم ثنيان يناظر فرحتهم

انحنى جاسر يشيل ولده حمد ويرقص بسيفه مع ابوه وساري

والمصورين منتشرين بالمكان يصورونهم

'

اخذت نفس أصايل توقف ودخلت ملاك:مادخل منيف ؟

هزت راسها المصوره:كلميه عشان لا نتأخر بالتصوير ونعطل الزفه

ملاك اخذت جوالها:لا ما بيتعطل شي ان شاء الله

دقت عليه وفتحت الباب وناظرته:منيف ؟

قفلت جوالها وتقدم منيف:جيت

ابتسمت ملاك:انتظر فرست لوك

ابتسم منيف ولفت ملاك وغادرت الجناح أصايل توقف بالصاله الصغيره ودخل منيف

المصوره:طيب منيف راح توقف هنا تعطينا ظهرك نصور الفرست لوك

هز راسه منيف ووقف يعدل بشته وعطاهم ظهره وابتسمت ملاك توقف بجانب المصوره

ونطق منيف:ملاك

ملاك:موجوده ما بروح لين تشوفها

ابتسم منيف بربكه يناظر الفراغ قدامه وشغلوا اغاني بالجناح المصورات ودخلت أصايل وهي ماسكه مسكتها

وابتسمت من شافت ظهر منيف وناظرتها المصوره:وقفي خلفه شوي أصايل

وقفت أصايل وشدت على مسكتها بتوتر وابتسمت ملاك تناظرهم

تقدمت المصوره تصورهم ورفعت كفها أصايل على كتفه ونطقت المصوره:لف ياعريس

التفت منيف وابتسم من شافها قدام عيونه ولمعت عيونه بصدمه من فرحته وحلمه اللي قدام عيونه ورفع كفوفه يغطي وجهه بصدمه ورجع يناظرها

وضحكت أصايل تناظره مو مصدقه ابداً مشاعرها

ومسك قلبه منيف يهز راسه بعدم تصديق وتقدم لها:حلالي ؟

ارتبكت لانه يطلب حضنها وابتسمت ورفع ذراعينه يحضنها وابتسمت ملاك تناظرهم ولفت للمصوره وابتسمت وخرجت

غمض عيونه من حضنها ومن صارت نصيبه وحلاله ويعيش معها كل عمره الباقي

حست ان دمها حار من شعورها وتناثر داخل بطنها مشاعر من حضنه وابتعد عنها وابتسم:انزعيني من يدين الحسايف والظنون أنتي بعد ليالييّ المظلمه طلعة فجر ، إخت النهار وشمس حياتي

ابتسمت تناظر عيونه وارتبكت تنزل عيونها وابتسم من حياها ووجودها قدامه ، ما يبي أكثر اخذ اغلى مكاسب الدنيا وأغلى الأمنيات

لف للمصوره من طلبت منهم يتصورون سوا

المصوره:حاوط خصرها ياعريس

منيف:عمري كله ولا أفلته

ضحكت أصايل بحيا وتقدم منيف لها وارتبكت ترفع عيونها عليه وتحط بكفوفها على صدره

ناظرها وما غابت عن ثغره الابتسامه ولا رمش هدب عينه ابد

لفت أصايل للمصوره:بس بنصور مع كوتي ويامور

لف منيف وناظر المصوره:فيها يامور ؟

تقدمت المصوره بكوتي واخذتها أصايل وجات بتاخذ يامور وهوّش لها وضحكت أصايل

منيف:خليه الحيوان ذا بحرمه التونه

أصايل:حرام

انحنت تناديه ومشى لها وابتسم منيف ووقف واخذ كوتي من حضنها وهمس:صور حديقة الحيوان

ضحكت أصايل وابتسم منيف وتصوروا مع كوتي ويامور

انتهوا التصوير وابتسم منيف وجلس ومسك كفوف أصايل:فرحتي الـ

وفزّ من انفتح الباب وبلع ريقه من دخل عقاب وخلفه العيال وناظرهم منيف ناشف ريقه وهمس:اعوذ بالله من الشيطان

ابتسمت أصايل:ابوي

مشى لها عقاب:نور عيوني

مسك ياقته منيف ووقف يعدل بشته وناظر أصايل اللي تحضن اخوانها وناظر عقاب اللي يناظرها وابتسم له بهدوء

وصد عقاب عنه وتلاشت ابتسامة منيف وناظر نظرات اخوانها ولف من نطق نهار:ياويلك ياولد مساعد

ضحكت أصايل وهي بحضن نهار وبلع ريقه منيف

ناظر جاسر وساري وثنيان اللي يناظرونه وحك جبينه بربكه

دخلت نوره وناظرتهم:عقاب ؟

لف عقاب وابتسم:ام ساري

ابتسمت وتقدمت لهم ولف نهار:ملكة العرس والشرقيه والعالم كله الشيخه ام النهار

نوره تقدمت لهم تضحك وتقدم جاسر اقرب واحد وسلم عليها:افراحك دايمه ام جاسر

ابتسمت نوره وناظرته:عقبالك

هز راسه جاسر وسلم عليها ساري وتقدم ثنيان يسلم عليها وتقدم نهار يبوس كفها:ما بخرب الطلّه

لفت نوره لمنيف اللي واقف وبلع ريقه منيف:شلونك خالتي ؟

نوره هزت راسها وتقدمت له:مبروك منيف مبروك عليك بنتي واغلى شي بحياتي

ابتسم منيف وسلم عليها ووقفت نوره بجانب منيف:الحين صاروا عيالي خمس

عقاب:يعني ما يهم وجودك ياعقاب

ضحكت نوره:انت راس مالي ياعقاب

ابتسم عقاب وناظرتهم:يالله عشان تدخلون ، أمي أصايل

مشت لها أصايل وعدلت شعرها نوره:تجهزي وخل يعطرونك ، تحصنتي ؟

هزت راسها أصايل وابتسمت نوره:تسمعين الطرب ؟

ضحكت أصايل وهزت راسها وخرجت نوره

ووقفوا عند الباب وحك جبينه منيف وهو بجانب عقاب

ومد كفوفه جاسر يعدل بشت منيف ولف عليه منيف يناظرهم خلفه وصد لقدام وغمض عيونه بتوتر

وقفت نوره تشوف المباخر اللي توزعت بالقصر واشتغلت الاغنيه وانفتح الباب

ووقفت ملاك على الكوشه تناظر منيف من بعيد وهي لابسه عبايتها وابتسمت بفرحه من تقدم مع عقاب

دخل مع عقاب وابتسم براحه من شاف ملاك واقف قدامهم

رفعت جوالها تصوره معهم وطلع على الكوشه وفتحت يدينها له وحضنته وابتسم يحضنها:أموت عليك ملاك

ضحكت تشوف فرحته وابتسم عقاب يناظرهم وحك جبينه ثنيان يوقف جنب أخوانه وابتعد منيف وابتسمت له:احلى عريس بالشرقيه كلها

منيف تقدم لها:خليتيني بينهم

ملاك:مو لوحدك انا معاك

ابتسم منيف وتقدم يوقف بجانب عقاب ورفعت عيونها ملاك تناظر عقاب اللي ابتسم لها وردت له الابتسامه وناظرت ثنيان اللي واقف ببشته وابتسم من شافها وابتسمت تصد بعيونها

وطلعت نوره ترقص بذراعينها وتتباهى بعيالها وكثرتهم ، وتقدم نهار يرقصها وابتسمت ترقص مع نهار

ورفع عقاب يصفق بهدوء ويناظرهم واخذت نفس ملاك ولفت للحضور وتلاشت ابتسامتها من شافت اللي من بعيد داخلين متأخر وعرفتهم ومستحيل ما تعرفهم ، شادن وجواهر ووفاء

ظلت تناظرهم ولفت شادن على وفاء وجواهر اللي دخلوا بين الطاولات وشادن مشت لباب العروس

وابتعدت ملاك من بينهم ومشت تلحق شادن اللي دخلت

رفع عيونه منيف ينتبه لملاك وناظر اللي تدخل لابسه عبايتها وبلع ريقه بتوتر

وعقد حاجبينها ثنيان يشوف ملاك تدخل خلف وحده

'

دخلت ملاك ورفعت صوتها:شادن

لفت شادن وناظرتها وتقدمت ملاك:عسى خير هالجيّه ؟

اخذت نفس شادن:جيت اسلم على عروسة ولد عمي

ملاك تكتفت:بدون عزيمه ؟

شادن:احنا اهل

ملاك تقدمت ووقفت قدام شادن وهمست:اتركي اللي جايه تسوينه واطلعي الحين قدام عيوني من المكان

شادن ابتسمت:بعد ماتعرف عروسة منيف من كان يهددها بصورها

رفعت كفها ملاك تشد شادن من ذراعها:لا تخليني اخلي هالليله فوق راسك ، لا تطلعين أقصاي ياشادن

خرجت أصايل مع العاملات وهمست:ملاك ؟

لفت شادن وابتسمت من اطلالة أصايل:واو

رفعت عيونها أصايل وعقدت حاجبينها:شادن ؟

شادن هزت راسها:عرفتيني وانا منقبه ؟

ملاك عضت شفتها ومشت وسحبت شادن معها ووقفوا عند باب العروس

ورفعت عيونها ملاك:قدام هالناس ولا اسأل عن احد ولا يهموني اخلي فضيحتك على كل لسان اقسم بالله يا شادن لأطلع شرّي كله عليك وعلى اهلك

شادن لفت تناظر الناس اللي يناظرونهم والرجال اللي صافين على الكوشه

وشدتها ملاك وهمست:احرقك

لفت شادن تناظر عيون ملاك:عبالك اذا خلصتي مني الحين ما بقدر اوصل لها ؟

ملاك ابتسمت:تعديني قبلها

سكتت شادن وبلعت ريقها من عيون الناس ولفت تشوف جواهر وامها من بعيد واتسع مبسم ملاك:توكلي على الله

لفت شادن تتركها ولفت ملاك على الانظار اللي من الكوشه عليها وابتسمت لهم وقفلت الباب خلفها وتقدمت توقف يمين الباب تترك الزفه تشتغل لأصايل

لفت تناظر شادن اللي جلست مع جواهر ووفاء ورجعت تصد

اشتغلت الزفه بالقصر واخذ نفس منيف يناظر الباب ينتظر خروج أصايل لهم

تقدمت نوره لعقاب توقف بجانبه وتمسك كفه بقوه من نظرات عيونه للباب وابتسمت

ارتبك جوف منيف من صوت الزفه والمقدمه وبلع ريقه من عظمة توزيع الزفه والكلمات ولحنها

وشدت على مسكتها أصايل تخفي ربكتها وانفتح الباب وابتسمت بوسع مبسمها من اهلها اللي قدام عيونها

ابتسم منيف بعدم تصديق ورفع كفه على صدره اللي بيخرج من مكانه

وابتسموا اخوانها يناظرونها وتقدمت تمشي بهدوء

ورفع جواله يصور نهار وابتسم

وابتسمت ملاك اللي بجانبها ولفت تناظر حوالينها بحذر ورجعت تناظر أصايل

نزلت دموع نوره ومسحتها بسرعه تغطرف بعلو صوتها وابتسمت أصايل من نظرات اهلها لها

وحست انها بتبكي من اشكالهم ورجفت كفوفها وعض شفته نهار من شافها ترتبك وصفّر بأصابعه وضحكت أصايل تناظره

وتقدمت ملاك لها ترفع صوتها:اضحكي اضحكي

ابتسمت أصايل بربكه وناظرت منيف اللي بإنتظارها وتقدمت ملاك تطلع على الكوشه وناظرت طاولة جواهر وشادن ورجعت ناظرت أصايل

هزت راسها بتعب من وجودهم وتغيرت الاغنيه من وصول أصايل وتعالت اصوات صديقاتها بالصراخ ولف منيف لعقاب يناظره وابتسم عقاب يأشر له يروح

وابتسم منيف ومشى لأصايل ومسك كفها وباس جبينها وضحكت أصايل من فرحتها وابتسمت ملاك تناظرهم

كانت تشوف أطهر قلوب وأنقى حب ، كان ودها تحارب هذا الحب لأجل مصالحهم لكنها ماقدرت تغلب حبهم ابد ، تمنت لو ما كانت موجوده بحياة منيف ودمرت حتى مستقبله واختياره

حست انها بتبكي وهي تناظر منيف وأصايل وصدت تاخذ نفس وبلعت ريقها ورجعت ناظرتهم

حضنت عقاب أصايل وتجمعت دموعها بعيونها:أحبك أبوي

عقاب ابتسم وابتعد عنها ومسك وجهها:وللحين أنا أبوك وما خرجتي من تحت جناحي

عضت شفتها ماتبغى تبكي وباس جبينها عقاب:لا تبكين

مشت نوره وحضنتها:أمي ودنيتي وأحلى عطايا ربي لي

ابتسمت أصايل تحضن نوره:الله لا يحرمني يا أمي

ابتعدت وضحكت من تقدم لها نهار:صديقتي تزوجت

حضنته تضرب ذراعه وابتسم نهار:احلى عروس لا تحسبين بخليك بعيش معكم بعد

ضحكت أصايل وابتعدت عن نهار وتقدم لها ثنيان وضحكت تحضنه:شكراً على الزفه

ثنيان ابتسم:لو تبين عيوني لا تشاورين

ابتعد عنها وتقدم ساري لها وحضنته تضحك:أخوي الكبير

ساري:الله يوفقك ياحبيبة اخوك

ابتسمت وتقدم جاسر وحضنها:تكفين لا يردك لسانك أصايل

اصايل ابتسمت وهي بحضنه:أعشقك

ابتسم جاسر وابتعد عنها يبوس كفها وابتسمت لهم ووقفت بجانب منيف

وتصوروا سوا وملاك واقفه بعيد تناظرهم يدينها ترجف من مشاعرها ، نزلت عيونها تفكر بحالها وحياتها وحياة منيف معها

رجعت تناظرهم من بعيد وابتسمت بين دموع عيونها تشوف فرحتهم

لفت أصايل وابتسمت لمنيف تناظره وهز راسه بعدم تصديق يناظرها ، تبتسم له وما يصدق عيونه من جمالها وابتسامتها ونظراته لها

وضحكت من تقدمت نوره ترقصّها قدام عيون اهلها وابتسم منيف يتأمل كل هذي الرقه والدلال قدام عيونه

وتلاشت ابتسامته من مسكت كفه نوره تقدمه يرقص مع أصايل وبلع ريقه ولف يناظر عقاب والعيال اللي يناظرونه

وابتسمت أصايل تمسك كفه وهي ترقص بكفه ولف عليها واتسع مبسمه من شكلها ولا رمشت عيونه وهو يناظرها

مسك كفوفها الثنتين وهي ترقص أمامه ، ورفع حاجبه جاسر يناظرهم وناظرهم نهار قدام عيونه

وحك جبينه ثنيان وصد ساري بعيونه ودارت أصايل بفستانها قدامهم وكفها بكف منيف وهو مبتسم

اخذها من بينهم وحده وصارت له وحده ، صارت حلاله ونصيبه

لف ثنيان يناظر ملاك اللي واقفه بعيد تناظرهم وحك شاربه يحاول يلفت انتباهها وابتعد عنهم شوي ورفعت عيونها ملاك عليه ومن ناظرته اشر لها وابتسمت تبلع غصتها ومشت له

وقفت بجانبه ولف عليها:اشوفك ترا

ابتسمت تناظر عيونه:منتبه لي ؟

ثنيان:اي موج عيونك من بعيد اشوفه

ملاك نزلت عيونها بهدوء ورفعت راسها تناظرهم وتنهدت

ثنيان:من اللي دخلت ولحقتيها ؟

رفعت عيونها ملاك:شادن

سكت ثنيان يلف عليهم والتفت عقاب عليهم عشان يطلعون

والتفت ثنيان عليها وابتسم:احرقيهم لَهب

ابتسمت له ملاك وشدت على كفه والتفت ثنيان يعطي الناس ظهره وناظر جمالها اللي كَوى صدره ، وناظر أنيابها من ابتسامتها ورجع ناظر عيونها وتقدم يبوس جبينها

واتسع ثغرها وشدت على كفه وابتعد عنها وناظرت عيونه:أحبك

ايتسم والتفت لاهله ومشى يخرج مع اخوانه

لفت تناظر الطاوله ولا لقت جواهر ودورت بعيونها ولفت من نادتها نوره وهزت راسها من مد كفه منيف يناديها

مشت تترك عبايتها وتمشي لهم وابتسمت من مسك كفها منيف ورقصت له بفرحه

وابتسم منيف من مسكت كفوفه الثنتين تغني وترقص معاه والفرحه تغمرها

وابتسمت أصايل اللي واقفه وتناظرهم

رقصت قدام منيف بتباهي وفرحه بأخوها وفرحته

وحضنته وحضنها منيف بقوه:انتي أهلي

ابتسمت وابتعدت عنه:خلك مع عروستك

ابتسمت ملاك تناظر أصايل ومشت تاركتهم ورفعت فستانها تدخل مع الباب ماهي مطمنه من عدم وجود جواهر

-

خرج اخر واحد مع اخوانه ولف من مسكت ذراعه كف وجمد وجهه يناظر جواهر والتفت يشوف اخوانه اللي خرجوا والتفت عليها يناظرها بصدمه

وقفلت الباب وتقدمت له:ولا فكرت تسألني ليش ؟

ثنيان:وهنا بسألك ؟

جواهر:ما شفتك تعنيت واهتميت وجيتني

ثنيان:اسبابك معروفه ياجواهر تحسبين انك كذا انتصرتي لكن مع الاسف ما فزتي بشي

ابتسمت جواهر:المشكله انك متمسك بالشخص الغلط ، دمرتك ودمرت حياتك وحياة اهلك والى الان مصرّ تشوفها صح

ثنيان:اطلعي منها جواهر وفكيني من شرّك انتي واللي اخذتيه

جواهر:فرحان بزوج اختك ؟ تعرف سواته ؟

ثنيان تقدم بغضب:اذلفي جواهر

جواهر:هو اللي هدد اختك بصورها اذا ماتدري

جمد وجه ثنيان وهزت راسها جواهر:كل مره تنصدم من سوء الشيطان اللي معك ، صحصح ثنيان

لفت ولف ثنيان من دخلت ملاك وناظرتهم

بلعت ريقها جواهر تناظر ملاك بحده ورفعت حاجبها ملاك وتقدمت تمشي بكعبها وفستانها:تحومين حوالين رجال غير زوجك ؟

جواهر:كان زوجي

ملاك تقدمت ووقفت قدامها:كان ، فعل ماضي عليه حسوفه وملامه وسوء اختيار

جواهر ابتسمت:ماجيت اتغزل فيه جيت عشان العشره اللي بيننا

ملاك لفت تناظر ثنيان ورجعت ناظرت جواهر:تنصحينه ؟

جواهر:أفوّقه

ملاك سكتت وكملت جواهر:ان اللي هكر جوال اخته وسنابها وصورها وهددها فوق هذا كله هو عريسها ياحرام

لانت ملامح ملاك وهي تناظر جواهر وضحكت جواهر:كل مالها تبان فضايحك يا الشيطان ، وش بيكون ردة فعل عقاب بن جرّاح ياترى

بلعت ريقها ملاك وابتسمت جواهر ومشت تخرج من عندهم

رفعت عيونها ملاك لثنيان اللي يناظرها وهمست:ثنيان

ثنيان:ثنيان ايش ثنيان ايش ؟ وش باقي ما علمتيني ؟

ملاك:منيف ماله شغل اقسم بالله ماله شغل انا اللي سويت كل شي

ثنيان عقد حاجبينه بصدمه:كذا بتهونينها ؟

ملاك اخذت نفس:انت كان عندك خبر من قبل

ثنيان:عندي خبر انك انتي هددتي مادريت ان اللي كان يهدد واحد كلب قاعد يرقص مع اختي الحين

ملاك:ثنيان قلت لك ماله شغل

صد ثنيان وشد على اسنانه ولف عليها:متى بنخلص ملاك ؟ متى اقسم بالله تعبت منك ومن مصايبك

سكتت ملاك تناظره وناظرها بغضب ثنيان وفتح الباب وخرج يقفله بقوه

وغمضت عيونها ملاك ولفت تاخذ نفس وتخرج

ناظرت مكانهم وهزت راسها بوعيد

وقفت جواهر مع شادن ووفاء خارجين وتقدمت لهم ملاك وحطت يدها على الطاوله وناظرت جواهر:جربتي من قبل وش ممكن اسوي لو انداس لي طرف

جواهر:هالمره جربيني انا

ابتسمت ملاك وتاظرت شادن ووفاء ورجعت ناظرت جواهر:لا تتعزوين فيهم مالهم امان اسأليني انا

شادن:متى تبطلين القوه المصطنعه هذي ياملاك ؟

ملاك:لا يابنت عمي ماهو تمثيل وزيف ، انا احرق وناري لظى وانتي تعرفيني

وفاء:ريحينا من المشاكل ملاك

ملاك:كان قعدتي ببيتك لو ماتبين المشاكل ، اذلفي وخذيهم معك

ناظرتها وفاء بصدمه ولفت ملاك لجواهر ومشوا تاركينها واحتدت ملامحها تشوفهم يطلعون ولفت للناس اللي قاعدين وطلعت للكوشه وتقدمت لمنيف ونطق:بطلع

هزت راسها ولف منيف لأصايل وابتسم وشد على كفها وابتسمت له

خرج مع ملاك ووقف عند الباب الخارجي ولف لها:شادن اللي دخلت وقت الزفه ؟

هزت راسها ملاك وكمل منيف:وش بغت ؟

ملاك تنهدت:بنت عمك يعني وش تبي بس وقفتها عند حدها

منيف:وليش متضايقه انتي ؟

ابتسمت:مو متضايقه ماعليك

ناظرها منيف وهز راسه وخرج وقفلت الباب ملاك وجلست بالغرفه

غمضت عيونها واخذت نفس وخرجت تناطر أصايل اللي ترقص مع صديقاتها والكوشه تعج بالبنات

ورجعت تدخل وتلم اغراضها وتلبس عبايتها وخرجت فتحت سيارتها وركبت واخذت نفس وحركت

مرت من عند قسم الرجال تشوفهم يتعشون وتعدتهم ترجع للبيت

وساقت بهدوء لين دخلت البيت ونزلت من سيارتها ولفت من ناداها من عند البوابه:ملاك

ناظرت منصور وعقدت حاجبينها وتقدم لها وابتسم

ملاك:خير ؟

منصور ناظر طرف فستانها الاحمر الباين:خير ان شاء الله

دفعت كتفه بسبابتها ورفع عيونه لها وناظرته:شتبي جاي ؟

منصور:متلهف اشوف طلة اخت العريس

ملاك:ارسلت اختك وزوجتك والحين جاي تكمل السهره يعني ؟ ما تعبت ؟

منصور سكت يناظرها:تعبت ؟ سنيني كلها اللي بالسجن تعبت فيها وانتي ماتدرين

ملاك ناظرته بحده:ما ادري ؟ انا اللي ما ادري منصور ؟ انا اذا كنت اليوم هنا فكنت عشانك انت ، انا سرقتهم هذولا اللي ينادوني بنتهم وعطوا بنتهم لاخوي ، سرقتهم عشانك انت

منصوو:طلبتك ؟ جاوبيني طلبتك تسرقين ؟ تتزوجين ؟ والا بتحمليني كل شي انتي سويتيه حتى الحيوان اللي لقيته في مكتبك

ملاك:كمل كمل واطعن بشرفي ياولد عمي ، قول عني مستعمله وعند رجلين الشيوخ

سكت منصور وتقدمت له ملاك:٢١ مليون

بلع ريقه منصور وهزت راسها ملاك:ريال ريال عشان اطلعك من جريمه انت سويتها بنفسك وحطيتوا غلطتك انت واهلك عليّ والحين يوم طلعت بتجي تنتقم من السبب اللي خلاك تعيش ؟ الجحود وراثه ؟

منصور ناظرها بعصبيه:انتظرتك تجين وتنكرين وتدوريني ولا جيتي، تزوجتي وانترست عيونك فيهم

ملاك عقدت حاجبينها:انتظرت ؟ انا اللي انتظرت ووقفت قدام زنزاتك وجاني منع اني ازورك ، انا يامنصور

منصور هز راسه بالنفي:مامنعتك

بللت شفايفها تبتسم ملاك:ابوك ، وهو اللي خلاك تخرج بكل هذا الغضب تبي تحرق وتذبح

منصور تقدم يناظرها:وش النهايه ؟ تعيشين معه طول عمرك ؟

سكتت ملاك تناظره وكمل منصور:تبيعيني ؟

صرخت بوجهه بقهر:ما بعتك متى تفهم اني ما بعتك

منصور:لو ما بعتيني كان الحين انتي ببيتنا مو ببيتهم

رفعت عيونها من السيارات اللي دخلت البيت وبلعت ريقها تشوف سيارة ثنيان

ولف منصور يناظر سياراتهم اللي دخلت ووقف بإعتدال يناظرهم

فتح الباب عقاب ينزل ووقف يناظرهم ونزل ثنيان وعقد حاجبينه

ولفت ملاك لمنصور وهمست:روح

ناظرها منصوره وهز راسه وخرج

واخذت نفس ملاك ولفت تناظرهم ينزلون ومشت تدخل البيت

قفل باب سيارته ثنيان بقوه وهمس:صبرك يارب

دخل بعدها البيت وطلع الغرفه ودخلت ملاك ودخل خلفها وقفل الباب:وش يبي ؟

فصخت عبايتها وناظرته:منصور ماتعرفه ؟

ثنيان تقدم لها:ناديه كلب لا تنادينه بإسمه

سكتت ملاك تناظر عصبيته ولفت ومسك ذراعها ولفت عليه

وهز راسه:ماجاوبتي وش يبي جاي ؟

ملاك:يكمل مع اخته وزوجته فضايحهم

ثنيان:لحقك يدري انك لوحدك ؟

ملاك تنهدت تصد وهز راسه ثنيان:هاه ملاك ، ليه ترجعينا دايم لنفس المكان ؟

لفت ملاك عليه:انا ناديته ؟ شفتني انا عزمتهم وفتحت بيباني لهم ؟

ثنيان:لو لقي ردة فعل منك ما كان تجرأ يجيك لوحدك

ملاك رفعت حاجبينها:بتتكلم عني انت بعد ؟ حلو لان اي ذكر عليه شارب يوقف قدامي ويتكلم عني

رفعت صوتها تناظر ثنيان بحده:خلاص عاد كل من وقف قدامي وتكلم علي

ثنيان:ملاك ! انا عاقل لين تشتب نيراني

ملاك:لا تشتب يازوجي موج لا تشتب انا اللي بشب نيراني من اليوم

ناظرت ثنيان ورمت شنطتها والكيس على السرير وطاح الكيس على الارض وتأففت

وفصخ شماغه ثنيان يرميه وانحنت تاخذ الكيس وناظرت البوكس الصغير وعقدت حاجبينها تذكر الهديه

فتحتها واخذت الكرت اللي عليها تقراه:قربت

عقدت حاجبينها وتقدم ثنيان وهمس:وش هذا؟

فتحت البوكس وجمد وجهها ولانت ملامح ثنيان وبلع ريقه

نشف الدم بعروقها تناظر الكلبشات اللي بالبوكس

ولف ثنيان بصدمه ياخذها من يدينها:من عطاك اياه ؟

رجفت تجلس على السرير بصدمه وقرأ الكرت ثنيان وعقد حاجبينه وناظرها:ملاك انطقي من عطاك اياه ؟

عقدت حاجبنيها ورفعت عيونها عليه:ما اعرف

ثنيان ناظرها بجنون:كيف ما تعرفين ؟ من وين وصلت الكلبشات ذي لهنا ؟

ملاك:في وحده عطتني بالزواج ما اعرفها ولا اذكر شكلها ولا سألتها

ثنيان:كيف يعني ما تعرفينها ؟كيف يعني تعطيك كلبشات بنص الزواج ولا تدرين ملاك ؟ كيف ؟

صرخت برعب توقف قدامه:شدراني انها كلبشات

ناظرها ثنيان وهو يتنفس بسرعه:من بنت الكلب ؟

بلعت ريقها ملاك:ماهي هي

ثنيان:وشو ماهي هي ؟

ملاك:هي وصلتها لي بس نفس ما وصل لي الاوراق وصورك منيف واحد ما اعرفه

سكت ثنيان يناظرها وعقدت حاجبينها ملاك وهي ترجف:كيف دخلت بالكيس الزواج ؟

رفعت عيونها لثنيان:ثنيان ابوك حط تفتيش عند القصر كيف دخلت ؟

ثنيان:قالت هديه ودخلوها صعبه يعني ؟

جلست بتوتر وهزت راسها بالنفي:هذا مو تهديد هذي لعبه ثنيان

ناظرها ثنيان وعض شفته يغمض عيونه بتعب

وهزت راسها بتكرار:في احد يلعب معي

ثنيان:من غيره ولد عمك الكلب

هزت راسها بالنفي:لا ماهو هو

ثنيان:شدراك ؟ عشانه قابلك اليوم عند البوابه ؟

مسكت راسها بتعب ملاك وغمضت عيونها تسترجع كل شي

وناظر الكلبشات ثنيان:ان طلع ولد عمك بالسالفه برجعه مكان ما كان

وقفت ملاك:انا اللي بلاقيه هالمره انا اللي بوقف قدام اللي يلعب فيني ، ماراح انتظر رحمه من تحت يدينه

ثنيان:قامت لهب اللي تجازف بكل شي صح ؟ اعقلي ماراح تسوين شي بدون علمي

ملاك:هذا انت عندك علم ابن الكلب اللي يلعب معي بجيب راسه

تأفف ثنيان وهزت راسها ملاك:اقسم بالله ما اخليه

جلس ثنيان ومشت ملاك توقف قدام التسريحه ودق الباب ولف ثنيان وقفل البوكس:ادخل

دخلت أصايل وابتسمت:العروس عازمتكم تحت بالحوش نسهر شوي

ابتسمت لها ملاك وهزت راسها:جايين

ابتسمت أصايل وقفلت الباب وتلاشت ابتسامة ملاك ولفت تناظر ثنيان ودخلت الحمام

نزل عيونه ثنيان يقرا الكرت وغمض عيونه بتعب:اهخ ملاك

سندت جسمها على الباب تناظر شكلها بالمرايه

تلبس اللهب وتشتعل لهب لكن في نار تصلاها اكبر منها وتجاهلتها واستهانت فيها

هزت راسها بخوف تتذكر الكلبشات وغمضت عيونها تسمع صوت نبضها

تعبت ، تعبت وأنهد حيلها وما استراحت ابد ، حق كل الناس اللي سرقتهم قاعده تعيشه الحين

التهديد بالصور وبالكلام قاعده تعيشه ثقله الحين

فتحت عيونها تتنفس وتهدي نفسها

'

نزل ثنيان وابتسم يناظرهم جالسين وتقدم:ما نمتوا ؟

نوره:انا من فرحتي ما بنام

ضحكت أصايل وجلس ثنيان:وين نهار ؟

ضحك ساري:مع النسيب

تلاشت ابتسامة ثنيان وناظر أصايل اللي مبتسمه ورجع ظهره لورا

نوره:لقيت وحده وحده اهخ ياناس من شفتها قلت بس هذي عاشت للحين تنتظر جاسر ولدي

تنهد جاسر بتعب وضحك عقاب ولفت نوره:لا تطالعني كذا ما بخليك تقعد بدون زواج

جاسر:خليني انا اختار

نوره كشرت:لا تكفى الا انت لا تختار نهار يعرف ينقي احسن منك

أصايل لفت:صح ابوي سألت عن اهل البنت ؟

عقاب هز راسه:اي ابوها راعي عقار معروف بالشرقيه

نوره:اسم الله على نهار ما يطيح الا على الشي الزين

عقاب لف عليها:كيف البنت عاد ؟

جنى:انا عجبتني وبتعجبك عمي

عقاب سكت ولفت نوره:بتعجبنا وبتعجب نهار هذا اللي يبي له وحده تكسر راسه

ساري:من بالله بعقله ياخذ وحده قويه ؟

رفعت حاجبها نوره:عسى خير ياساري

جنى:مستهين فيني خالتي تشوفين ؟

ساري:انتي قويه ؟

جنى رفعت حاجبها ولف ساري لثنيان:والله اللي سحبت ثنيان اخوي وراها وشرى لها شاليه وسياره ويخت هي اللي قويه وما تناسب الرجال

رفع عيونه ثنيان:حلو ساري من كثر قعدتك مع امي والحريم صارت سواليفك نفسهم

ضحك جاسر ولف عقاب:بس عاد سولفوا زين

رجع ظهره لورا ساري وضحك ولف ثنيان من دخلت ملاك واخذت نفس وجلست

عقاب:اخت العريس

ابتسمت بهدوء ملاك:اخت العريس اليوم تعبت

نوره:اي ياحياتي انتي كان ارتحتي طيب

ملاك صدت بعيونها وهزت راسها بالنفي

وناظرها ثنيان ونزلت عيونها لكفوفها ملاك تتخيل شكل الكلبشات حوالينها

ورفعت اصابعها بتوتر تمسح جبينها بيد راجفه وشدت على عبايتها ما تعرف كيف توقف رجفتها

واخذ نفس ثنيان وهو يناظرها بقهر وغضب على الوضع اللي هم فيه سوا

وتقدم ومد كفه ومسك كفها ولفت عليه واخذ كفها لحضنه يشد عليه

وناظرته ملاك تهدأ رجفتها ونبضها يستريح من كفه فقط ، فهمت انها كل ماكانت بعيده عنه كل ما كانت اضعف مو اقوى

هز راسه بهدوء ثنيان يطمنها واخذت نفس تقترب منه وتحط ذراعها جنب ذراعه بطمأنينه لوجوده

دخل نهار وابتسم:سلام عليك يا أفضل عائله

ضحكت نوره تناظر بشته اللي على ذراعه وغترته على كتفه وعقاله فوق راسه

عقاب:ابطيت

نهار:كنت احتفل مع سارق اختي

ابتسمت أصايل ونطق عقاب:تكلم زين

جلس نهار:سمّ

ناظرهم وابتسم:نبي عرس ثاني ادمنت

نوره ضحكت:والله تبي نفتح طاري التايقر

ضحك نهار:مهما حاولت الف وادور انتي الوحيده اللي تفهميني

رمى لها بوسه وابتسمت نوره تضحك

لف جاسر يناظر نهار وناظره نهار:عسى خير اخوي تبي تتزوج تزوج قبلي بس لا تطالع فيني كذا

جاسر:لا والله اطالع وافكر كم بتصمل على هذي قبل تعجبك غيرها

نهار:لا لا هذي نثبت عليها خلاص مافي لعب زياده كبرت وانا اخوك ابي لي عيال ينادوني نهوري

ضحكوا وتقدم جاسر يضربه وضحك نهار:ابوي وش طلع الموضوع عندك ؟

عقاب:والله الموضوع عندي زين وخير لكن اللي بيناديك نهوري ماهو عيالك

ضحك نهار وابتسم عقاب له واخذت نفس ملاك بتعب ولفت لثنيان وهمست:بطلع أنام

ثنيان:ما بتنامين

هزت راسها وبلعت ريقها ووقفت:تصبحون على خير

مشت تتركهم ودخلت الغرفه وغمضت عيونها ومشت انسدحت بالسرير وهي تناظر الفراغ وضمت نفسها

متى بترتاح وتسدد كل ديونها ، تضحك لها الدنيا ، وتهجرها مخاوفها وتلاقي حصاد تضحياتها

متى بتنام مرتاحه وتغمض عيونها وما تشعر الا بدفى ، متى بتعيش يوم طبيعي بدون مشاكل وخوف وحذر

غمضت عيونها تسيح دموعها على مخدتها وفتحتهم من حست بذراعينه تحضنها

انسدح خلفها يلاحظ سرحانها وحاوطها بذراعينه يحضنها

رفعت كفوفها لذراعينه تشده لها وغمضت عيونها

همس ثنيان:تبكين على وسادتك وكتفي موجود ؟

بكت بتعب وتقدم لها ثنيان ودفن وجهه برقبتها يبوسها ويحضنها وبلعت ريقها بتعب

ونطق ثنيان:بجيبه

ملاك هزت راسها:يكفي تكون جنبي

ثنيان:تلوين ذراعي واغلاطك كثيره وحياتك شقى بس يمين بالله أحبك

مسحت دموعها ولفت عليه وناظرها ثنيان:حمار

ضحكت بين دموعها وحضنته ورفع راسه ثنيان وتنهد يشدها لصدره

غمضت عيونها من استراحت على صدره وعاشت امنيتها واخيراً ، تشعر بالأمان بالدفى