عبدالله واقف وقفته الواثقة الاعتيادية لكن قلبه كان يذوي ويذوب بعنف

عبدالله كان يهتف في أعماقه بوجع مرير

(يالله أني طالبك ما تفجعني فيها

ياربي أنت اللي عارف ومطلع على السر

ياربي لا تفجعني

لا تفجعني

مثل ما نجيتني من اللي كنت فيه

تمم نعمتك علي.. لا تحرمني منها..

ليتني مارجعت.. ليتني مارجعت

لو ثمن رجعتي بيكون جواهر

ياربي خذ من عمري ومد في عمرها

خذ عمري كله

وخلها هي تعيش)

*******************

بعد العصر بشوي

في بيت أبو سعود

مزنة كانت جاية تأخذ مها اللي تبي تسوي بروفة فستانها اليوم..

مزنة هي اللي جاية مع سواقهم وشغالتهم لأن سواق بيت مها مأخذ إجازة اليوم..

مها قالت لها تطلع لها فوق.. لأنه مابعد كوت عبايتها.. وماتبيها تنطرها في السيارة

مزنة طلعت لها شوي.. وعقب قالت لها: أنا تركت شنطتي وفيها فلوسي وموبايلي في السيارة.. عجلي علي وانا أنتظرش تحت في السيارة..

مها بعيارة: نعنبو عجوز مافيها صبر.. زين أذلفي... دقايق وأجيش ياجدتي..

مزنة كانت نازلة بسرعة وفتحت الباب الواصل بين الصالتين الداخلية والخارجية بسرعة وعبرت بدون ماتنتبه للشخص اللي كان يبي يدخل..

خبطت فيه بعنف..

مزنة انتفضت وتراجعت بحدة

وهي تشوف محمد قدامها..

وهي بتموت في ثيابها من الخجل من خبطتها في جسم رجال غريب..

محمد تراجع وابتسامته تتسع وهو يعرفها

حتى بالنقاب.. حتى لو هي متغطية من ساسها لرأسها

مستحيل مايعرفها..

(حيا الله بنت هادي.. وانا أقول وش في بيتنا منور بزيادة وانا داخل) محمد بنبرة دافية تتلاعب الابتسامة على أطرافها

مزنة كانت تبي تطلع بس هو ساد الدرب.. ردت بحرج: الله يحيك.. ممكن امر لو سمحت..

بس محمد ماتحرك (مابغيت أشوفش وتبيني أتحرك مهوب حولي) رد عليها بنفس النبرة الدافية كأنه ماسمع طلبها: مبروك التخرج.. ماصارت فرصة أبارك لش قبل..

مزنة بتوتر وهي خايفة حد يشوفها واقفة معه وتسولف بعد: الله يبارك فيك... وخلني أمر لو سمحت..

محمد ماكأنه يسمع: وأنا يعني مافيه مبروك التخرج ولا الوظيفة..

مزنة العبرة خنقتها من الاحراج: مبروك.. وخلني أمر تكفى.. وش تقول أمك لو شافتني واقفة معك كذا.. مافي وجهي حيا..

محمد انتفض وانلسع من كلامها ومن ريحة البكاء في صوتها.. قال بحرج: أسف مزنة ماقصدي أحرجش..

وخر عن دربها وهو يقول: تفضلي..

مزنة مرت من جنبه بسرعة بدون ماتطالع فيه وهي متوجهه بسرعة للسيارة..

وهي تهتف في نفسها بغضب حاد(صدق مايعرف السحا..

أشلون هذا أخو سعود ما أدري!!

سعود مايرفع عينه في المرة..

وهذا مايستحي يقزني عيني عينك وأنا بنت عمه وفي بيته.

. صدق أنه مهوب رجّال ولا فيه من الرجولة شعرة)

مها نازلة لقت محمد واقف مذهول.. سلمت مارد عليها

مها بعيارة: هيه محيميد.. تراني أسلم..

محمد بصوت مضطرب: هاه وشو؟؟

مها بعيارة: خلاص فهمت.. مزنة مرت من هنا.. وهذي حالة مابعد انحسار مد مزنة.. خلني أروح لها

محمد وهو بعده متضايق من اللي صار ماتخيل أنها بتنحرج كذا لدرجة أنها تبكي: روحي لها لا تتأخرين عليها..

مها لقتها فرصة تتشفى في محمد اللي يحرجها دايم: ياقلبي تحاتي قعدتها بروحها.. مهوب ماكلها العوا لا تخاف عليها..

محمد مارد عليها وطلع السلم لغرفته..

مها هزت كتوفها مستغربة (مهوب عوايده يعني!!) وطلعت لمزنة اللي كان كان على رأسها الطير..

صامتة بشكل مر.. وإحساسها بالخجل يلفها بعنف..

*************

كانت تفتح عيونها بشويش..

رأسها مصدع..

وألم حاد قاتل في أسفل بطنها..

لكنها تناست كل شيء وهي تهتف بحنين موجع مر:

عبدالله.. عبدالله.. عبدالله

كانت تظن إن كل اللي هي مرت فيه مجرد حلم

معقولة كل هذا كان حلم

لمسات عبدالله وأنفاسه وهمساته

معقولة؟!!

معقولة؟!!

لكن روحها سكنت بهدوء عذب لذيذ

وهي تسمع صوته العميق الحنون يهمس

"جنبج حبيبتي"

فتحت عيونها كلها وهي تحس بملمس شفايفه الدافية على جبينها البارد ويقول بحنان هامس: الحمدلله على سلامتج ياقلبي

"حبيبي طمني عن المولود" نبرة قلق موجع مجللة بالبكاء

وجه عبدالله أشرق إشراقة رائعة حنونة وهو يمسك يدها بحنان ورقة : ماشاء الله تبارك الله.. ماجد ذيب من ظهر ذيب.. يجنن ياجواهر يجنن..وصحته ممتازة

وعقب كمل بابتسامته اللي اشتاقت لها جواهر: تدرين استخسرت أسميه على ماجد الشين..

بس قلت خلاص طارت الطيور بأرزاقها..

ما تتخيلين أشلون ماجد انبسط.. جاء بنفسه هنا..

ماخلا مكان يدورني جعلني ماخلا منه.. لين عرف من أم حمد أني هنا

وانبسط أكثر بالولد ما تتخيلين!!..

حط كل اللي في بوكه في لفة ماجد الصغير كان باقي يحط بطاقاته الفيزا والجوال والقلم والكبكات ويطلع مفسخ..

جواهر كانت تبتسم بإرهاق وهي ماتبي عبدالله يوقف كلام

يالله!!! وش كثر اشتاقت له.. ولعبق رجولته وخصوصية مرحه وهو يتكلم.. !!

كان يكمل كلامه وهو يقول بمرح: بس الخاين يقول لي أنه مرته حامل بس موب مسمي علي.. يقول أول شيء بيسمي فيصل.. عقب يفكر يسمي علي أو لا..

جواهر بحنان متعب: حبيبي خلهم يجيبون لي ولدي تكفى..

عبدالله بحنان مصفى وهو يمسح على شعرها: حبيبتي أنتي بعدج في العناية.. والولد في الحضانة..

كلها كم ساعة ويودونج غرفتج.. ويجيبونه عندج..

جواهر باستجداء: تكفى عبدالله بأموت أبي أشوفه..

عبدالله رجع يطبع قبلة حنونة على جبينها وهو يقول: إن شاء الله ياقلبي إن شاء الله..

**************

ثاني يوم.. بعد صلاة العشاء

جناح جواهر في الطابق الخامس من مستشفى الولادة

الغرفتين والممر كامل مليانين بباقات وورد وسلال شيكولت ضخمة..

من أهلهم ومعارفهم وزميلات جواهر في الجامعة

والأهم معارف عبدالله اللي عرفوا برجعته وإن زوجته ولدت في نفس اليوم فحبوا يعبرون عن فرحتهم ومجاملتهم بالمناسبتين..

ومعارف عبدالله كلهم من الوزن الثقيل

فكانت باقاتهم بحجمهم..

كان هناك باقات وسلات شيكولت تكاد تصل للسقف من ضخامتها..

جواهر جالسة على سريرها ترتدي روبها الخمري الحرير الفخم بشغل الدانتيل الناعم فيه..

كان عندها نوف بس..

بعد ماراحوا كل الحريم اللي كانوا عندها

وخلت الخدامتين اللي كانوا عندها يخدمون على سيل الزائرات اللي ما انقطع من الصبح يرجعون مع محي الدين للبيت..

بكى ماجد الصغير.. جواهر تتعدل في جلستها رغم الالم اللي هي حست فيه مكان الجراحة..وقالت وهي ترص على اسنانها: نوف حبيبتي عطيني أخوج..

نوف قربت منه بالراحة وهي تقول بحنان ذايب: ياناس يجنن يجنن.. بأكله بأكله والله ينوكل أكل..

جواهر بحنان: الحين عطيني إياه أرضعه وعقب أكليه براحتج..

جواهر خذت مجود برقة وحنان كأنها خايفة تكسره

باست جبينه..وهي تتأمل ملامح وجهه الرقيقة الضئيلة بوله أمومي شفاف..

طلعت ثديها..وحاولت ترضعه..

ماكان متقبل صدرها بالمرة..

لأنه أمس كله لحد اليوم الصبح وهم يعطونه رضاعة في الحضانة..

ومن الصبح وهي تحاول فيه يرضع مو راضي..

نوف اللي واقفة جنب أمها سألت باهتمام: بعده مايبي يرضع..؟؟

جواهر وألم جراحتها ذابحها.. ومتضايقة إنه الولد مايبي يرضع: مايبي..أخاف صدري ينشف حليبه كذا..

نوف بحنان: خلاص يمه فديتج لا تضايقين عمرج.. أنتي بروحج تعبانة وايد.. عطيني إياه بأسوي له رضعة..

جواهر بحنان: مايصير نوف كذا صار له يومين على الرضاعات.. ماراح يرجع يتقبل صدري كذا

نوف بنفس حنان أمها: بس يمه أنتي شايفة.. صار لج الحين أكثر من ربع ساعة تحاولين فيه وهو موب راضي ويبكي..

نوف سوت لمجود رضعة ثم جات شالته .. وجلست على جنب.. ترضعه..

رن موبايل جواهر.. تناولته من جنبها بتعب..

حست برعشة ناعمة عميقة تغزو قلبها وهي تشوف اسم عبدالله يضيء على الشاشة لأول مرة بعد غياب أكثر من سبع شهور..

أفضل راح طلع لعبدالله شريحة جديدة بنفس رقمه القديم.. وتوه عطاه إياها تحت..

وكانت جواهر أول رقم يتصل عليه..ردت عليه بهمس: هلا حبيبي

عبدالله بخفوت وعمق: يابعد طوايفي ذا الصوت.. اشتقت لج ولصوتج اللي يذبحني ويحيني..

ابتسمت جواهر بارهاق: رحت عيار ورجعت عيار..

عبدالله يبتسم: أنا عيار !! تبين أجي اوريج العيار وش كثر مشتاق..

جواهر بابتسامة وهي مفكرته في مكان بعيد: لو جيت خلال دقيقة.. ورني..

عبدالله بخبث: ومن اللي عندكم..

جواهر: ماحد..

تفاجأت جواهر إن رده عليها كان أنه فتح الباب عليهم ودخل ويقول بنبرة خاصة: هاه أم عزوز.. على الوعد اللي بعد دقيقة..

جواهر طالعت عبدالله بوله خرافي

وحضوره يملأ الغرفة باشعاعه الخاص..

كان في غاية أناقته.. ورجولته المتدفقة تغمرها

كأن الأشهر الماضية ماخذت منه شيء

لكنها عمقت سحره وتأثيره العجيب على من حوله

جواهر ابتسمت وهي تقول: يمه نوف عطي ماجد أبوه يسلم عليه وعقب حطيه في سريره..

(يعني معناته احشم وجود بنتك)

عبدالله كان في يده كيس محل مجوهرات شهير نزل الكيس على الكرسي اللي جنب جواهر

وابتسم وهو يشيل مجود بحنان ويطبع على وجهه قبلات كثيرة..

جواهر بحنان: عبدالله الله يهداك توه صغير على البوس الكثير اللي كذا..

عبدالله قرب من أذن جواهر وهو شايل ماجد وهمس وهو يقرب من أذنها لحد مالمس شحمة إذنها بشفايفه: كفاية أنتي ممنوع الاقتراب.. بعد بتمنعيني أحب ولدي..

جواهر كحت من الحرج (الرجّال ذا متى بيعرف السحا؟!!)

عبدالله ابتسم ورجع لنوف اللي كانت مشغولة تغسل زجاجة الحليب اللي توها رضعت ماجد منها: يبه نوف تعالي خذي أخوج حطيه في سريره..

نوف تنشف يدها: إن شاء الله يبه.. الحين جاية..

بعد ماخذت نوف مجود..

عبدالله رجع وشال الكيس وجلس مكانه وقرب الكرسي لحد مالصقه في سرير جواهر

نوف حست انه من الذوق إنها تنسحب..: أنا داخلة الحمام أتوضأ مابعد صليت العشاء..

عبدالله مد الكيس لجواهر وقال برقة وحب: الحمدلله على سلامتج حبيبتي..

جواهر باستفسار رقيق: شنو هذا؟؟

عبدالله بنبرة عميقة: افتحيه وشوفيه..

قبل تفتح جواهر العلبة كان في الكيس ورقة تشبه الشهادة طلعتها جواهر

كانت شهادة باللغة الانجليزية من محل مجوهرات عالمي برقم التصميم وأنه تصميم حصري خاص بحرم السيد عبدالله محمد.. والتاريخ يرجع لحوالي 6 شهور فاتت..

عمر جواهر ما اهتمت لهذي الأشياء

لكنها لهذا المختبئ بداخل العلبة الفخمة كانت تشعر بترقب دافئ: صار له ست شهور؟؟

عبدالله بنفس نبرته العميقة: كنت طلبته قبل أسافر العراق.. وياسبحان الله يكون النصيب انه يكون هدية ولادتج..

صار له في المحل 6 شهور..

ولأن صاحب المحل من ربعي.. قال للعاملين تحتفظون فيه ولا تتصرفون فيه لو حتى يقعد عندنا 20 سنة..

جواهر حست بانفعال جارف يجتاحها.. شنو اللي ممكن عبدالله يطلبه يتصمم لها حصريا...

فتحت بأنامل مرتجفة..

شهقت بنعومة: واو حبيبي.. يجنن.. يجنن

عبدالله قرب خده منها وهو يقول: واو كذا ماتكفي..

جواهر حطت يدها على خده الثاني وقربت وجهه شوي وطبعت قبلة شفافة على خده.. وهي تهمس: شكرا حبيبي شكرا.. ما تتخيل سعادتي فيه

عبدالله بحنان وهو يتحسس مكان قبلتها على خده: والله العظيم موب حتى قدر خطوتج على الأرض عندي

وكمل بخبث: طيب ممكن ألبسج إياه.. ابي الناس كلهم يشوفونه عليج..

جواهر برقة: أكيد..

عبدالله وقف.. وجواهر ميلت شوي قدام.. لحد مالبسها عبدالله السلسلة عبدالله همس في أذنها بعد ماخلص: بأيش يذكرك هالموقف؟؟

جواهر ابتسمت وتفكيرها يرجع لحوالي 9 شهور فاتت: بأنك الرجل الأكثر وقاحة في العالم..

عبدالله باس رأسها ورجع جلس: شفتيني مؤدب حبيت رأسج..

مع أني ما أداني ذا الحبة.. كأني أحب جدتي الله يرحمها..

جواهر تبتسم: انت ماتقول لي متى بتعرف السحا شوي..؟!!

عبدالله بعيارة: والله أني رجّال حياوي وتكانة.. بس من أشوفج أختبص وتخبط عندي المكينه.. وأقط خيط وخيط..

عقب كمل بإعجاب: كنت شايفه حلو في علبته.. بس الحين وهو على صدرج شيء فوق الخيال

كانت سلسلة ناعمة من الألماس.. القلب عبارة حرفي aوj متعانقين بشكل خيالي محترف..

ثم يتناثر الحرفين بأحجام صغيرة مختلفة وخطوط مختلفة على كامل السلسلة..

نوف خلصت وضيها الطويل وطلعت وهي تقول بعيارة: لو ماخلصتوا قضية الشرق الأوسط موب شغلي.. لأني خست في الحمام

بعد دقايق اتصل عبدالعزيز وعزوز يبون يجون..

واجتمعت العائلة الكريمة كلها...

مجود كان ينتقل من يد أخوه لخاله لأبوه.. وكل واحد يبوس فيه شوي..

نوف بقلق عذب رقيق: حرام عليكم.. ذبحتوه..

عزوز بابتسامة: أنتي تبينه لج لحالج؟؟

نوف بعيارة: إيه لي لحالي.. وحتى أمي تقوله.. صح ماماتي..؟؟

قالتها وألتفت على أمها اللي جالسة على سريرها

والباقين جالسين على الجلسة

جواهر بحنان: صح ياقلبي..

نوف برقة: معناتها هاتو ولدي خلوه ينام..

نوف شالت ماجد وحطته في سريره

في الوقت اللي جواهر ألتفتت على عبدالله وقالت بجدية رقيقة: بما أنه احنا كلنا مجتمعين.. أعتقد أنه من حقنا كلنا نعرف اللي صار لك خلال السبع شهور ونص اللي فاتت

عبدالله ابتسم: خلاص المهم أني صرت هنا..

عبدالعزيز باهتمام: ويهمنا نعرف شاللي صار لك وغيبك كل هالمدة..

عبدالله اتسعت ابتسامته: حاضرين.. أحكي لكم قصة عبدالله البصري.. أو البصراوي مثل ما هم (يتحجون) هناك

بغداد قبل حوالي تسعة أشهر..

عبدالله نزل من فندق فلسطين لشارع السعدون اللي الفندق فيه

كان تارك محفظته عند عبدالعزيز.. ومعه موبايله وشوي فلوس في جيبه بس..

وقف تاكسي وطلب منه يأخذه للشورجة (منطقة الأسواق الشعبية في بغداد)

كان مقرر ياخذ له لفة سريعة.. ويمر مقهى القدوري الشهير مقهى المقامات العراقية

ويشتري شغلات تراثية خفيفة

ويرجع خلال ساعة على الأكثر..

في السوق كان منبهر بالأجواء القديمة الحميمة.. وكان يستفسر من الحرفيين اللي هو شافهم عن كثير من الأشياء..

شاف العبابجي.. والمغازجي.. والكندرجي..والأطرقجي.. وغيرهم..

أشياء كان يسمع عنها من راوي اللي كان محتفظ ببقايا ذكرياته عن بغداد مثل حلم شفاف مرتبط بشباب مهدور..

أشياء عشقها وتمنى يشوفها من قد ماشوقه راوي لها..

بعد شوي مر عليه جماعات متراصة من الرجّال اللي كانوا يمشون مع بعض وكلهم لابسين ثياب وغتر مثله

سأل عنهم.. قالوا له البياعين انه هذولاء من العشائر اللي من منطقة الهوير قريب البصرة..

وأنهم جايين عشان يجتمعون مع شيوخ عشائر ثانية هنا في بغداد.. يتفقون على من يرشحون يخوض انتخابات مجلس النواب..

عبدالله كان يمشي جنبهم وهو يستفسر عن مقهى القدوري يبي يعرف من وين ممكن يطلع له..

وصار التفجير الانتحاري وقتها..

وتصوب عبدالله.. وتحطم موبايله..

التفجير كان بسيط.. والمصابين كانوا 13 ومو 10 مثل ماعبدالعزيز كان يظن..

3 كانوا من رجال العشيرة اللي أمر شيخهم إنه لو اصاباتهم بسيطة..

أنهم يشيلونهم معهم على الباص الكبير اللي هم جايين عليه ويرجعون فورا للبصرة..

ووفي الربكة والاضطراب الهادر اللي بعد الانفجار..

رجال العشيرة شالوا مصابينهم الثلاثة ورجعوا فيهم للبصرة..

لأنهم شافوا إن الاصابات كانت بسيطة

وماتستلزم أنهم يدخلون مستشفيات بغداد

ويعنّون أهلهم عشانهم..

الاحسن يرجعونهم لمستشفيات البصرة عشان يكونون قريب من اهلهم في الهوير..

ولأن عددهم كان كبير.. وماكانوا يعرفون بعض بشكل كامل.. فهم حملوا الثلاثة اللي كانوا ملاصقين لهم ولابسين ثياب نفسهم..

اثنين من المصابين كانت اصابتهم جرح في اليد والثاني في الوجه...

أما الثالث كان مغمى عليه اغماء عادي مثل ماهم يظنون..

بينما طريقة حملهم غير الاحترافية والطريق الطويل بإرتجاجه الدائم وهو ممدد على أرضية الباص

أدى لتدهور حالته اللي كانت ارتجاج في المخ أدى لذهابه في غيبوبة لعدم تلقيه العلاج بالسرعة المطلوبة...

وصلوا العشيرة للمستشفى العسكري الحكومي شمال البصرة..

ودخلوا مصابينهم.. الأثنين الأولين كانت إصاباتهم طفيفة احتاجت مجرد ضمادات..

الثالث راح في غيبوبة عميقة.. رغم انه كان خالي من أي إصابات..

العشيرة تجمعوا حوله.. وهم يسألون هذا ولد من؟؟

لكن ماحد عرفه..

وأكتشفوا الخطأ الكبير اللي هم سووه..!!

أنهم خذوا لهم واحد من أهل بغداد بالخطأ...!!!

بلغوا إدارة المستشفى بخطأهم..

وإنه هذا المصاب جايبينه من بغداد بالخطأ..

المستشفى العسكري في البصرة من أسوأ مستشفيات البصرة

لايوجد أسوأ منه إلا مستشفى ابن غزوان للنساء والأطفال الموجود بمنطقة الرابع عشر من تموز..

المستشفى العسكري تأخروا في إبلاغ عن مصاب محضر من بغداد بدون أوراق ثبوتية..

وبعدها لهوا من كثر المرضى والداخل والخارج.. وهم يأجلون التبليغ كل يوم.. لكنهم مانسوا التبليغ.. فقط كانت الفكرة مؤجلة لحد مايتفرغون من ضغط مشاعلهم..

بعد أسبوع ونص بدأ عبدالله يستعيد وعيه..

حاول يتكلم بس ماقدر.. لأن أنبوب الإطعام مع ادخاله لفمه واخراجه جرح البلعوم عنده

فكان بلعومه مجروح بشدة وصوته مايطلع..

عبدالله كان شايف بنفسه.. أنه الممرضين والممرضات مايقدرون يحكون رووسهم من الانشغال وكثرة المرضى..

فماحب يشغل حد بمشكلته

وخصوصا أنه ماكان عارف الوضع أشلون..؟؟ أو أيش اللي جابه هنا؟؟ أو كم صار له هنا؟؟

فقرر أنه يكون حذر.. وأنه يصبر لحد مايقدر يطلع.. أو صوته يطلع ويتصل في فاضل ..

بعد كم يوم استعاد نشاطه.. وكان قادر أنه يمشي.. وبنيته القوية ساعدته على استعادة عافيته بسرعة..

كتب للممرضة على ورقة انه يبي يطلع ويشوف حد ممكن يوصله لبغداد..

سألته: أنته عارف أهلك وين؟؟..

كتب: نعم.. بس عطوني ملابس..

الممرضة جابت له ملابسه اللي كانت عليه لما وصل..

بس قالت له بتحذير: لا تطلع هسه...

وماقالت له السبب..

عبدالله التعيس الحظ ما اهتم من تحذيرها

لأنه ماكان عارف الأخبار عن الاضطراب الهائل اللي كان يموج في البصرة وقتها

كان الوقت الأسبوع الأخير من شهر مارس/ آذار 2008

حملة نوري المالكي المسماة (صولة الفرسان) ضد ميليشيات جيش المهدي..

وكان فيه حظر تجول عام في كل المدينة..

بس عبدالله قاده حظه العاثر للاصتدام مع قوات الأمن اللي استغربت خرقه لحظر التجول..

دفعوه على الارض وحاولوا تثبيته.. فتعارك عبدالله معهم.. اللي كان عاجز عن إخراج صوته بشكل واضح..

فانتهى به حظه العاثر في المعتقل..

ولم يكن أي معتقل..

كان معتقل "الجدر"!!!!

وهكذا هي الأحكام العرفية حين تسود وقت الاضطرابات

يؤخذ البريء بذنب المسيء

الأحكام العرفية التي ماعرفها غير بلدان العالم الثالث في أزماتهم المتلاحقة..

بينما في أي بلد من بلدان العالم الأول والثاني يعتبر إقرار الأحكام العرفية من أخطر القرارات التي قد تتخذها حكومة ما.. والتي قد تؤدي إلى اسقاطها..

***************

الساعة 9 مساء

دانة في غرفتها..متمددة على سريرها

الهم يملأها حتى الثمالة

ويحز في عروقها حتى النخاع

وهي تقرأ مسج سعود للمرة الألف

"ريحتي قلبي الملتاع

من البارحة ماجاني نوم

كأني أشوى على أسياخ حديد محمي"

(زين ياسعود.. وارتاح قلبك الملتاع

وأنا قلبي متى بيرتاح؟؟

متى بيرتاح؟؟

متى بيرتاح؟؟)

انتفضت برعب على رنة موبايلها.. اللي أخرجها من عوالم حزنها الآسر..وكآبتها المسيطرة اللي تخفيها عن الكل

وتكتوي هي بنارها وحيدة في وحشتها وغربة روحها..

تماسكت وهي ترد بصوت هادئ: هلا تهاني.

تهاني بغضب: أنتي مجنونة... فيه وحدة ترفض الدكتور سعد..

(للتذكر: د سعد كان رئيس قسم دانة لما كانت تشتغل في الرميلة)

دانة بهدوء وهي تتنهد: الزواج قسمة نصيب.. وأنا جربت قسمتي خلاص..

تهاني وهي تحاول تتماسك: يادندون يا حبيبتي.. بدون حساسيات أنتي الحين مرة مطلقة.. مين بيخطب المطلقة إلا مطلق وإلا أرمل وعندهم بزران بعد..

بينما دكتور سعد رجّال عزابي.. صحيح أكبر منج بأكثر من 13 سنة.. بس بعده في عز رجولته ولا تزوج قبل.. معاه دكتوراه.. ووضعه المادي والاجتماعي ممتاز..

يعني مستحيل يجي لج أحسن من كذا..

هذا البنات مايحلمون فيه.. أشلون مرة مطلقة!!!

(تهاني قررت توجعها شوي أو تفوقها على رأيها..

لأن سعد اللي يقرب لزوج تهاني من بعيد.. طلب منها تحاول تقنع دانة وهو بيرجع يخطبها مرة ثانية)

دانة بنفس الهدوء ووجع مر في داخلها: أنا عقب سعود مستحيل أتزوج..

تهاني بعصبية: أنا أبي أعرف سعودوه وش فيه زود.. فر مخك عن الكل..

دانة وهي تسرح وكأنها تشاهد شيء غير مرئي أستولى على بصرها وهمست بصدق شفاف مؤلم: فيه أنه خذ القلب والعقل وحبسهم في يديه وحناياه..

أشلون أكون عند رجّال وقلبي وعقلي عند غيره..

أنا من عقب ماسعود طلقني.. وأنا حاسة أني عايشة مجرد جسد بدون روح.. والله ياتهاني.. جسد بدون روح..

تهاني شهقت: تحبينه ليما الحين؟؟

دانة بهمس: ولين أموت..

*******************

الساعة 9 وربع في غرفة جواهر...

جواهر شهقت برعب مؤلم: المعتقل؟؟!!

ونوف بدت دموعها تنسكب بصمت وغزارة وحرارة..

عبدالله ونظرة غامضة ترتسم على وجهه.. وعبدالعزيز وعزوز مشاعرهم وأفكارهم كلها وعيونهم مع عبدالله:

وماكان أي معتقل كان "الجدر" أو القدر على قولتنا..

في البصرة فيه 3 معتقلات..

واحد للقوات الأمريكية في صحراء أم قصر جنوب البصرة اسمه "بوكا"

والثاني هو سجن "المطار" للقوات البريطانية

والثالث هو سجن "المعقل" لقوات الأمن العراقية..

الثلاث معتقلات يمكن فيها 20 ألف معتقل..

وأنا رماني حظي في "الجدر" أو "جدر موحان" اللي كان شيء ثاني.. ثاني..

ماكان فيه إلا 200 معتقل صار حظي أني منهم..

سموه جدر موحان على اسم "موحان حافظ" اللي كان قائد العمليات وقتها..

وفعلا كان "الجدر" قدر.. بس قدر مفتوح على فوق بدون غطاء..

عزوز بتوتر: أشلون؟؟

عبدالله بهدوء عميق فيه نبرة حزن واضح: كان عبارة عن حوطة اسمنت مكشوفة.. كان المطر يضربنا.. والشمس تصقع في روسنا..

ومافيه إلا دورة مياه وحدة...

أكثر المعتقلين صابتهم الأمراض والأوبئة..

عبدالعزيز بتوتر بالغ: وأنت ليش ماقلت أنك موجود هناك بالغلط.. وأنك مواطن قطري..

عبدالله تنهد: أنا لين قدرت أتكلم عدل.. كان صار لي أسبوع في المعتقل.. ومتخانق مع الحراس كلهم..

مين اللي بيسمع لي يعني؟!!

جواهر وبنتها كانوا عاجزين عن الكلام.. والحزن والعبرات خانقتهم بمرارة وألم محرق غائر في القلب..

عزوز بحدة متوترة: وانت ليش تتخانق مع الحراس..؟؟ ماسمعت المقولة اللي تقول: ياغريب كن أديب..

عبدالله خذ نفس عميق وكمل: يا أبوك القضية ماكانت قضيتي بروحي..

معاي العشرات.. ناس صابتهم الأمراض وناس ضعاف..

ومو أنا بروحي اللي كانت أتخانق.. المعتقلين كلهم كانوا في خناق دائم مع الحراس..

وش عندنا غيرهم نفش حرتنا فيهم.. رغم أنهم مجرد عبيد مأمورين..

كنا ننضرب بأعقاب الرشاشات.. نتعذب أحيانا..

رغم أن وجودنا في "الجدر" كان بروحه هو العذاب.. وإحنا مثل حيوانات في زريبة..

حاولت أشرح للحراس أني أبي أكلم في التلفون وأني موجود هنا بالغلط.. بس ماحد عبرني

قالوا لنا أنه وجودنا هنا مؤقت .. لحد ماتنتهي التحقيقات في عملية (صولة الفرسان)..

وقعدت في "الجدر" من أخر شهر 3 لين أخر شهر 8..

عزوز برعب: وأشلون قدرت تستحمل؟؟

عبدالله بإيمان عميق جدا: إن الله مع الصابرين..

كنت أقضي الوقت في الصلاة والدعاء وقراءة اللي أنا حافظة من القرآن.. ومساعدة المعتقلين اللي تدهورت حالتهم الصحية بسبب سوء وضع المعتقل وتعرضهم للاضطرابات الجوية بشكل مباشر..

عبدالعزيز باستفسار مر: وأشلون طلعت زين..؟؟؟

بعد الغياب/ الجزء المئة وثمانية

#أنفاس_قطر#

عزوز برعب: وأشلون قدرت تستحمل؟؟

عبدالله بإيمان عميق جدا: إن الله مع الصابرين..

كنت أقضي الوقت في الصلاة والدعاء وقراءة اللي أني حافظه من القرآن.. ومساعدة المعتقلين اللي تدهورت حالتهم الصحية بسبب سوء وضع المعتقل وتعرضهم للاضطرابات الجوية بشكل مباشر..

عبدالعزيز باستفسار مر: وأشلون طلعت زين..

عبدالله بهدوء وعيونه تسرح: مع بداية شهر 8 تسربت أخبار معتقل "الجدر" للاعلام..

وصلت أخبارنا لمجلس النواب..

وجات زارت السجن لجنة حقوق الإنسان في مجلس النواب.. وثاروا جدا على وضعه..

وإنه هل من المعقول إنه يكون فيه معتقل مثل هذا؟!!

بعد كم أسبوع "الجدر" اتسكر..

واحنا توزعنا على المعتقلات الثانية.. ورحت أنا لسجن "المعقل"

وقتها قدرت أتصل على فاضل.. وطلبت منه مايبلغ حد لحد مايجيني..

طلبت منه يجيب جواز سفري.. ثم اتصلت على ثاني عشان يرسل لي فلوس لأني ماكان معي أي فلوس ولا اثباتات..

وعطيته رقم فاضل عشان يبعث الفلوس له..

رغم أن فاضل اللي والله عمري كله ما أقدر أرد جميله.. كان مصر إنه هو اللي يعطيني فلوس.. بس أنا أصريت أطلب من ثاني..

تفاجأت بفاضل جايني ثاني يوم وخالي ثاني معه.. اللي ما أعرف متى لحق يحجز ويجي.. وكانوا جايبين جواز سفري معهم..

ما تتخيلون سعادتي لما شفت وجه ثاني..

يالله وش كثر اشتقت له..

واشتقت لكم واشتقت للدوحة..

خذت كم يوم لين خلصنا.. وافرجوا عني

وبعدين حجزنا أنا وثاني على عمّان في الأردن..

أنا كنت مصمم أسوي فحوص طبية شاملة قبل أرجع للدوحة..

لأني مروا علي مرضى أشكال ألوان الله يشفيهم ويفك ضيقتهم..

قعدت في عمّان أسبوع ونص.. لحد ما تاكدت أني سليم تماما.. وجيتكم أنا وثاني من عمّان للدوحة

نوف وقتها ماستحملت رمت نفسها في حضن أبوها وبدت تبكي..

ودموع جواهر بدت تنزل بصمت..وألم مر قاس يتجذر في أعماقها وهي تتخيل كل الألم والعذاب اللي عاناه عبدالله خلال الشهور اللي فاتت..

بينما عزوز عبرته خانقته وحابسها.. وعبدالعزيز كان متأثر جدا ومتماسك كعادته..

عبدالله حضن نوف بحنان وهو يمسح على شعرها

ويقول بحنان أبوي صافي: قولي الحمدلله يا بنتي على كل حال

ناس كثير ماتوا قدام عيني.. وذقت الحسرة عليهم ألف مرة..

يالله ماأقسى الإنسان على أخيه الإنسان..!!

الله يفرج عنهم ضائقتهم.. ويتمم عليهم نعمة الأمن والأمان..

أنا أشهد أنه فيهم رجّال ومن ظهور رجّال.. الله يكشف غمتهم

ويحرر بلدهم..

****************

حوالي الساعة 11 ليلا

سالم مار على بيت عمه أبو علي..

عشان يأخذ منيرة اللي كانت سهرانة عند أهلها..

منيرة طلعت لسالم في سيارته..

أول ماركبت: مساء الخير يابو مبارك..

سالم يبتسم وهو يحرك بسيارته: مهوب حرام نسمي ولدنا مبارك.. يتعقد من أسماء الشيبان من أولها..

منيرة تبتسم: مالك لوا... وش تبينا نسميه يعني مهند وإلا لؤي؟؟

سالم يضحك: يازينه لؤي بن سالم خوش اسم.. شامي على بدوي.. سلطة عجيبة..

منيرة برقة: على طاري المواليد.. ترخص لي بكرة.. أبي أزور دكتورتي جايبة ولد..

سالم باستفسار: مع من بتروحين... مع رقية وسبيكة أكيد؟؟

منيرة ضحكت: فيه غيرهم يعني.. خاطري أعرف حاط دوبكم دوبهم ليه..

سالم يضحك: أغار منهم حبيبتي.. من أشوفس ماسكة التلفون والضحكة شاقة.. أدري أنس تكلمين وحدة منهم..

منيرة بمرح: الزبدة مرخوصة وإلا لا ياقلبي؟؟

سالم بود: مرخوصة.. بس لا تتأخرين

*****************

الساعة 11 وربع...

عبدالعزيز يدخل بيته...

ويطلع للصالة اللي فوق.. اللي نورة كانت تنتظره فيها

نورة كانت قاعدة على أعصابها... أول ماشافته نطت: عزوز وأشفيك تأخرت.. وكل ما أدق عليك تقول لي بعد شوي... ولا ريحت قلبي...

عبدالعزيز ابتسم ابتسامة مرهقة: ياذي عزوز... غيري بدلي يابنت الحلال.. مافيه عبدالعزيز وإلا ابو منصور من هنا وإلا هناك...

نورة ابتسمت ابتسامتها المعتادة: مافيه تتهرب من السؤال... وماعندي غير عزوز ياعزوزي..

عبدالعزيز بنبرة حزن واضح: كنت عند جواهر..

نورة نط قلبها في حلقها: جواهر فيها شيء؟؟؟

عبدالعزيز باستنكار: بسم الله عليها... ليش تقولين كذا؟؟

نورة بقلق: ماشفت وجهك وأنت تقولها...

عبدالعزيز وهو يدخل غرفته ويحط غترته على السرير ويجلس جنبها: عبدالله يانورة.. هو سبب ضيقتي..

نورة جلست جنبه وهي تقول: ليه عسى ماشر... وش فيه أبو عبدالعزيز؟؟

عبدالعزيز بحزن عميق: تدرين إنه كان في المعتقل كل هذي الشهور.. وشاف اللي ماينشاف... الله إن شاء الله يجازيه الخير ويجبره على قد ماصبر...

نوف بمساندة عميقة: ياحرام والله إنه مايستاهل... أنا بصراحة عزيته من كثر منت تعزه...

عبدالعزيز بمودة: والله أنه يستاهل من يعزه ويقدره ويحترمه..

نورة وقفت وهي تلبس روبها: زين تعشيت؟؟

عبدالعزيز بهدوء: كلينا فطاير وشربنا كرك وعصير عند جواهر لحد ما انفقعت خلاص...

نورة بحب: فيه العافيه... أنا بأنزل أجيب لي عصير ليمون.. مشتهيته.... تشرب معي؟؟

**************

ثاني يوم

بعد صلاة العصر مباشرة

مها وفاطمة ومنيرة اتفقوا يروحون يزورون جواهر في المستشفى

عشان يلحقون يرجعون قبل المغرب..

محمد وصّل مها لبيت منيرة..

وبعدين فاطمة جات لهم مع شغالتهم وسواقهم.. وراحوا كلهم للمستشفى على سيارة فاطمة..

والاتفاق إنهم كلهم يرجعون لبيت فاطمة.. يسولفون ويتعشون عندها وعقب مها يجيها سعود.. ومنيرة يجيها سالم هناك.. ويرجعونهم..

وصلوا مستشفى النساء والولادة حدود الساعة 4 وربع

اشتروا لهم أكبر سلة شيكولت لمولود ولد لقوها في محل لاريسا اللي تحت..

لأنهم كانوا متقاطين فيها ثلاثتهم والكرت باسمهم الثلاثة فكانوا يبون شيء راهي.. على قولتهم..

فاطمة وهي تضحك: شوفوا أنا باكتب حرم سويلم وحرم متيعب والآنسة فاطمة.. عشان يكون كرت معبر عن واقع الحال...

مها بعيارة: عشان أفلع لش ذا الوجه اللي أنتي رازته..

فاطمة تبتسم: أنا أبي أعرف وش حارج في ذي الويه.. لاني حاطة مكياج ولا مبينة شعري.. بس حلوة.. وش أسوي بجمالي؟؟ أحرق روحي يعني؟!!

منيرة بعيارة: ياشين الثقة.. الثقة عليس مثل السرج على البقرة...

فاطمة تضحك بصوت واطي وهم متوجهين للمصاعد: أنا وش مصبرني عليج أنتي وياها ما أدري.. كله تنغزوني

مها بعيارة: المحبة الله يكفيش شرها..

فاطمة : وع منكم ومن المحبة اللي من وراكم يالشيف..

مها وهي تضحك بصوت واطي وهم داخلين المصعد: والله مافيه شيفة غيرش يالعانس..

فاطمة تمسك قلبها وتقول بلهجة حزن مصطنعة: آه جيتي عالقرح اللي قوا ئلبي..

المصعد ماكان فيه حد غير البنات الثلاث..

مها ومنيرة كالعادة عليهم نقاباتهم..

وفاطمة كانت لابسة عباية مسكرة سادة وشيلة فيها تطريز ناعم مشدودة عدل على راسها..

وطبعا الثلاث بدون أي مكياج ولاحتى ماسكرا..

المصعد كان على وشك أنه يتسكر.. لولا أن يد وقفت في طريق الباب ومنعته يتسكر..

كانت يد رجّال.. مسكت الباب بثقة وبان في معصم صاحبها ساعته وكبك الكم اللي كانت كلها من الألماس وفي قمة الفخامة والذوق..

دخل صاحب الكم ليمتلئ المصعد بحضوره وطوله ورائحة عطره الفخمة كان عطر (شيخ) مخلوط برائحة دهن عود فاخر..

ماكان وسيم.. ولكنه كان جذاب وأنيق بطريقة غير معقولة..

يبدو كما لو كان فيه سحر خاص به..

ثقته الواضحة بنفسه تحيط به كغلالة رجولة مشبعة بالألق..

كان في المصعد ومع ذلك كان يلبس نظارته الشمسية السوداء اللي ما تدل وين عيونه ونظراته تروح..

واقف بثقة كأنه يقف في أملاكه الخاصة..

منيرة تهمس للثنتين بصوت واطي جدا ما يسمعه غيرهم بعد سنوات من التعود مع بعض بهذه الطريقة في الحصص والمحاضرات والأماكن العامة: نعنبو هذا جاي مستشفى وإلا رايح عرس.. بيصرع المرضى بريحة عطره..

مها بنفس الصوت: لا وعطر شيخ بعد.. شكله متسبح فيه..

منيرة بنفس الصوت: وأنتي وش عرفس؟؟

مها: عطر سعود أشمه وهو طالع وهو داخل... تدرون أول مرة أشوف واحد ينافس سعود في الكشخة...

فاطمة كانت الوحيدة التي لم تعلق.. لأنها حست أنه كما لو كان يراقبها من خلف نظاراته..

رغم أنه في الحقيقة ماكان يطالع ناحيتها ولا حتى اهتم فيهم..

فاطمة بدون ماتعرف السبب حست كأن المصعد تضيق جدرانه عليها حتى كادت تختنق.. وإنها بتفطس من الحرارة اللي اجتاحت جسدها بعنف..

حست إنها تغرق عرق.. وتمنت لو تأخذ طرف شيلتها وتغطي وجهها فيها.. بس خافت تسوي كذا يعرف إنه عشانه..

يعني موب أول مرة تصدف أنهم يركبون المصعد مع شاب... هذا وش فيه مختلف؟!!

حست أنها فعلا مو قادرة تنتفس وكأن وجوده يسحب كل الأكسجين من غرفة الحديد المربعة الضيقة..

ماصدقت إنهم يوصلون الطابق الخامس حتى تنط تطلع وتأخذ نفس عميق

منيرة بقلق: فاطمة وش فيس؟؟

فاطمة بنبرة متوترة: يمه.. ماشفتيه أشلون يطالع؟؟

مها بعيارة: أنا شفتش أنتي تخزينه والمسكين يتصدد من الاحراج.. باقي تعطينه الرقم..

فاطمة بتوتر: حرام عليج مها..أنا؟؟

مها بقلق: توتي.. أمزح معش.. يعني أنتي ما تعرفيني.. وش معنى خذتيها بحساسية ذا المرة..

فاطمة بنبرة متوترة: خلاص بنات هذا إحنا وصلنا غرفة دكتورة جواهر خلنا ندخل..

مها ومنيرة هزوا اكتافهم وهم يتبادلون النظرات..

دقوا الباب لأنهم كانوا اتصلوا في جواهر وبلغوها بجيتهم

فاطمة وهي تدخل.. طاحت عينها على صاحب النظارات الغامض واقف قريب منهم..

كأنه كان يلاحقهم (صدق مايستحي)..

**********************

الجازي تدخل بيت عمها هادي..

لأنها عندها بعد شوي مدرسة هي وغالية اللي ثنتينهم 3 ثانوي ذا السنة وشادين حيلهم بزيادة..

أم سعود نزلت الجازي وقالت لها: بأروح للجمعية.. أشتري أغراض وعقب بأرجع أتقهوى مع أم خالد لين تخلصين..

الجازي داخلة محملة بملفاتها..

وطلعت فوق لغرفة غالية

وهي خلاص واصلة لفوق شافت خالد طالع من غرفته..

الجازي عادي كملت طريقها تبي تروح لغرفة غالية

وخالد مابعد انتبه وكان طالع

ولو أنه انتبه قبل.. كان رجع لغرفته وقفل على نفسه لحد ماتروح

بس هي خلاص شافته وشافها.. مايبي يحسسها إنه هربان منها...

اللي ماحد يعرفه إنه عاشقنا المتيم كان عارف إنه الجازي وغالية عندهم مدرسة هذا الوقت عشان كذا كان دايما يهرب قبل ماتجي الجازي

ومايرجع إلا لما يدري إنها راحت..

ماكان يبي يشوفها بعد أخر موقف صار بينهم لما استنجدت فيه من محمد.. مرت شهور على ذاك الموقف..

والنار في قلبه تتأجج..

وكان عارف إنه لو شافها معناها نار جديدة تُضاف للنار الحالية.. وهو ماعاد متحمل..

الجازي شافته جاي ناحيتها يبي ينزل مع أنه ماكان يطالع ناحيتها أبد...

وهو يتمنى أنه تروح في حالها وتخليه يروح في حاله..

بس الجازي ببراءتها وقفت وقالت: خويلد.. وينك زمان ماحد شافك؟؟

خالد كح (لحول وش تبي فيني هذي) خالد وقف وبينهم مسافة وهو يحاول مايطالع ناحيته: والله مشاغل... تخرج.. وتوني اشتغلت..

الجازي ببراءة حقيقية: صدق سوري.. ماقلت لك مبروك.. والله منت بهين ياخويلد.. عقبالنا يارب..

خالد حس إن الجو حر وكان وده يهف على روحه شوي.. رد بتوتر: الله يبارك فيش.. وقلنا لش قبل خالد لو سمحتي..

الجازي بعذوبة مرحة: صدق إني غبية.. يعني معطت شعري على سبتها قصدي كشتي المحترقة.. المفروض ما أنسى.. زين أسفين ياخالد..

وعقب كملت بلهجة اعتيادية: يالله رخصنا.. عندنا مدرسة..

خالد ماصدق إنها تروح.. كان ضايق حده.. ومايدري وش يسوي.. يطلع.. وإلا يرجع..

هو أصلا كان طالع عشان مايقابلها وهذا هو قابلها.. يعني ماعاد للطلعة فايدة..

خالد اللي تعب من الكبت والحسرة والقهر قرر يروح لدانة في غرفتها.. يسولف معها شوي

بعد الغياب/ الجزء المئة وتسعة

#أنفاس_قطر#

خالد دق باب غرفة دانة بالراحة..

صوت دانة الناعم الهادئ من خلف الباب: تفضل..

كانت دانة فاتحة اللابتوب على منتدى نسائي تشوف الهذرات الجديدة.. لما شافت وجه خالد اللطيف بابتسامته القلقة..

سكرت اللابتوب وابتسمت: تعال حبيبي..

خالد دخل وجلس جنبها على سريرها..

دانة برقة: وش عندك؟؟

خالد بابتسامة متوترة: يعني ماحد يجي عنده أخته الغالية إلا لو عنده شيء.. اشتقت لش..

دانة تبتسم: يالعيار.. أنت اللي توك جايبني من الشغل من ساعتين بس.. لحقت تشتاق..

خالد فعلا كان تعبان ومتضايق: ضايق شوي يا أخيش..

دانة بقلق: تخسى الضيقة يابو هادي.. أفا.. وش مضيق خاطر شيخ الشباب؟؟

خالد بعمق: خليها على الله بس..

دانة قلقها تزايد: تكفى خالد لا توترني.. وش فيك..

خالد بعذوبة وشفافية موجعة: أحب !!

دانة شهقت بعنف كأنها ضُربت على راسها بمطرقة: تحب؟؟

خالد وهو يعبث بمفتاح سيارته ويقول بنبرة هادئة فيها نكهة انكسار: ليه حرام أني أحب؟؟

دانة تأخذ نفس عميق: الحب كمشاعر حق لكل إنسان.. ماحد يقدر يتحكم في قلبه.. وأنا أكثر واحدة عارفة..

بس المهم إن حبك هذا مايكون فيه مخالفة لدين ولا أعراف ولا تقاليد..

خالد بهدوء مؤلم: من هالناحية لا تحاتين.. كاتم في قلبي وساكت... لحد ماقربت أنفجر..

دانة باستفسار بحذر: وممكن أعرف اللي تحبها؟؟

خالد وهو يوقف دلالة على رغبته في إنهاء الكلام: مهوب الحين..

دانة بتفهم (وهي خير من يفهم المحبين ورغبتهم في الكتمان): براحتك فديتك.. بس تأكد إنك متى ماحبيت تتكلم قلبي وأذني مفتوحين لك.. وتأكد إن كلامك وبوحك بيكون في بير عميق..

خالد وهو يوطي ويحب رأسها بحب واحترام: مايحتاج تقولين.. أنا أكثر واحد عارف...

والله إنه سعود مايعرف هو وش كثر خسر!!

دانة انلسعت بعنف: مافيه داعي لذا الكلام ياعيون أختك.. مافيه داعي !!

****************

ماجد يدخل بيته..

عقب ماطلع من صلاة العصر..

مر واحد من جيرانه.. شايبهم كان مريض

وراح يعوده ويتطمن عليه

كعادته كل يوم من يوم مرض الشايب..

دلال كانت في مطبخ التحضير..

تسوي له قهوة العصر..

ماجد بصوت عالي: دلال.. دلال.. دلولتي..

دلال تطل عليه من باب المطبخ: يمه منك.. قصر حسك.. أخر الشارع عرفوا أنك تناديني..

ماجد بمرح: اللي عنده معاش يقطعه.. حد له عندي شيء.. واحد ينادي دلولته... أخر الشارع وش كارهم..

دلال تبتسم: الحكي معك ضايع.. روح إجلس باجيب لك القهوة..

ماجد بحنان وهو يدخل عليها المطبخ: إن شاء الله تبين تجيبينها أنتي.. وخري أنا بأشيلها.. لا تولدين علينا قبل وقتك..

دلال بابتسامة: كل السالفة دلتين وصحن كيك.. يعني موب صحن ذبيحة...

ماجد بعيارة هو يشيل الصينية: أنتوا يابنات ذا الأيام مافيكم فايدة... أقل شيء يولدكم.. وينج يمه ووين أيامج

ماجد ودلال جلسوا..

ماجد بحب وعذوبة: تعالي جنبي..

دلال قامت وجلست جنبه وصبت له فنجان قهوة وحطت له صحن كيك..

ماجد وهو ينزل فنجانه ويمسك يدها: زرتي مرت عبدالله؟؟

دلال بذوق: أكيد .. رحت لها مع نجلاء وعمتي أم جاسم..

ماجد بمرح: وش جبتي لسميي هدية..؟؟

دلال بنبرة حب واضحة:جبت سلة شيكولت..و ياي على سميك يجنن.. ولا يهمك سماوته نزوجه بنتنا..

ماجد بحنان: البنت ماتغلى على عبدالله وولده.. بس الحين أبيج تشترين له أحسن شيء وأغلى شيء في السوق

دلال بعذوبة: حبيبي والله أني ناوية.. بس خل أم عبدالعزيز لين تطلع لبيتها.. وأزورها بهديتها و بهدية ماجد إن شاء الله..

****************

في جناح جواهر بالمستشفى

الموجودين عند جواهر: نوف وعائشة وبنتها ديمة.. ومها ومنيرة ونوف...

البنات صار لهم حوالي 10 دقايق...

خلصوا السلامات والتعارف على بعضهم

جواهر بذوق: والله كلفتوا على أنفسكم..

البنات: لا والله مافيه شيء من قدرك يادكتورة جواهر.. قدرك عندنا عالي

جواهر توجه كلامها لمنيرة: منيرة متى عرسج أنتي و.... خليني أنا متذكرة اسمه... إيه.. سالم..

منيرة كحت بحرج... ومها ابتسمت وقالت: منيرة يادكتورة حامل في الشهر الثالث الحين..

منيرة قبصت مها في فخذها بدون ماحد ينتبه غير مها اللي كتمت في نفسها وقالت منيرة بحرج: ماصار عرس يادكتورة.. زوجي صار عنده ظرف صحي.. وانا رحت لبيته بدون عرس..

جواهر باحترام: والله أنج بنت أصل.. الله يتمم عليج يارب

عقب منيرة ابتسمت وقالت بخبث:مشكورة يادكتورة ...وإن شاء الله تحضرين عرس مها عقب 3 شهور إن شاء الله

الحين جاء دور مها تكح من الحرج وتقول بنبرة متقطعة: أول مانطبع الكروت.. أنتي أول وحدة دكتورة..

جواهر برقة: إن شاء الله..

فاطمة كانت تتكلم على القد.. وبحدود..

أبو نظارات الغامض وتّرها بشكل غير معقول.. وبدون سبب منطقي.. (صج وش أبي فيه.. خله يولي!!)

بس عقبها أشرت للبنات خلونا نستأذن..

وفعلا قاموا يستأذنون في الوقت اللي كانت عائشة تخلص مكالمة في موبايلها.. وتهمس لنوف.. اللي قامت تجيب لامها نقابها وجلالها..

البنات طلعوا.. لقوا أبو نظارات واقف برا بنظاراته اللي ماخلعها بوقفته الواثقة أو لنقل المغرورة..

مع طلعتهم .. تحرك ناحيتهم

فاطمة بنبرة غضب وحدة وجهت كلامها له: أنت يأ اخ ماتستحي ولا عندك خوات..

خلع نظاراته بثقة وألتفت ناحيتها وهو يقول بهدوء حاد وهو ياشر بأصبعه باحتقار: أنتي يا أخت أنتي تكلميني أنا..

فاطمة انلسعت من نظرة عينه الحادة القاسية المتجبرة

والبنات متفاجأين من ردة فعل فاطمة..

يعني مو أول مرة يتعرضون لمعاكسات وخصوصا هي..

وكان ردهم دائما التجاهل... من باب المقولة الخالدة (الحقران يقطع المصران) وش معنى ذا المرة قررت تهزئ اللي يعاكس؟؟

فاطمة تماسكت وردت بنفس الحدة: والله مافيه حد غيرك لحقنا في الاسانصير.. ثم هنا.. لا وقاعد تنطرنا بعد... صدق إنك قليل أدب ولا عمرك تربيت..

ابتسم ابتسامة ساخرة والاثنين يتبادلون نظرات حادة عميقة: ياحليلج ياشاطرة... !!

أنتي وش شايفة حالج.. عشان ثاني بن ناصر يتنازل لشكلج ويمشي وراج..

شايفتني بزر وإلا مراهق.. روحي يابنت الله يستر عليج... وألعبي على قدج.. أنا جاي أزور المرة اللي أنتوا طالعين من عندها... وإلا ممنوع بعد؟؟

فاطمة صرت على أسنانها وقالت له: صج وقح وحشرة بعد..

وسحبت نفسها ومشت

والبنات وراها مذهولين من حدة فاطمة الناعمة الرقيقة الغير مسبوقة

في الوقت اللي ثاني اتسعت ابتسامته واستمرت عينه تتابعهم لين أختفوا..

فاطمة كانت تقريبا تركض والبنات وراها.. ومها تقول لها: توتي حبيبتي شوي شوي.. لا تنسين منيرة في شهورها الأولى.. مايصير تسحبينها وراش كذا..

فاطمة حطت شيلتها على وجهها عشان ماحد يشوف دموعها وبدت تمشي شوي ودموعها تنسكب بغزارة

أول ماوصلوا للسيارة... فاطمة بدت تبكي بصوت مسموع ورمت نفسها على فخذ مها

منيرة اللي كانت تجلس جنبها من الناحية الثانية كانت تطبطب عليها وتقول بحنان: فاطمة فديتس.. مافيه داعي لذا كله..

فاطمة وهي تشهق: شنو مافيه داعي... ماشفتي أشلون هانني جني حشرة عنده..

مها وهي تحاول تهديها: وأنتي ماقصرتي فيه.. عطيتيه على رأسه..

فاطمة وهي تشهق أكثر: وهذا حد يقدر يعطيه على رأسه ماشفتيه أشلون يطالع ويتكلم جن الناس عبيد أبوه..

قال ثاني ولد مدري شنو.. يكون التافه ولد الشيخ حمد بن خليفة على غلفة..

قبلها بدقايق

ثاني واقف والابتسامة الواثقة تتسع على وجهه

ثاني تفكيره غريب شوي..

تعود يتعامل مع الجنس الآخر بجفاف وقسوة

من باب إنه كان له تعامل كبير مع موظفاته وموظفات الشركات الأخرى

ويؤمن أنك لو عطيت المره وجه إنها بتزودها وتقط الميانه..

وأنك لازم تحط بينك وبينهم حدود قاطعة عشان يعرفون حدودهم ومايتجاوزنها..

فاطمة اليوم لفتت انتباهه.. وبعمق

يمكن لو كان على موقف المصعد بس.. ماكان اهتم أبدا.. ولاحتى درا عنها..

لكن حدتها وهجومها عليه المتمازج مع عذوبتها ورقتها

ترك في نفسه أثر ما...

مجرد أثر!!!

ثاني يدق باب غرفة جواهر

عائشة فتحت له الباب وهي تحضنه بعنف تقول: يالظالم تروح العراق بدون ماتقول لي.. وحتى اليوم في البيت ماقلت لي..

وبعدها نطوا نوف وديمة كل وحدة منهم تحضنه شوي..وبتاثر بالغ

ثاني بهدوء ومودة: أنا قلت بدل مايصيرون فيلمين هندية واحد قبل وواحد عقب.. خلهم واحد لين رجعت..

عقب وجه كلامه لجواهر اللي كانت جالسة على سريرها لابسة نقابها وجلالها وهو بعده واقف عند الباب المسكر

وهو يقول لها باحترام: الحمدلله على سلامتج يا أم عبدالعزيز ومبروك المولود

جواهر برقي: الله يسلم غاليك.. ويكبر قدرك وخطوتك..

عائشة بعيارة: وش ذا العطر كله ياثاني... حرام عليك بتذبح جواهر ومجود...

ثاني بهدوء: والله أني متعطر من صبح.. ماتوقعت إنه لحد الحين مبين..

وعقب ألتفت لجواهر وهو يقول بذوق: سامحينا يا أم عبدالعزيز لو ضايقناج.. كنت أبي أسلم على ماجد.. بس دام دكتورة الأعصاب تقول ريحة عطري بتضايقه خلاص..

جواهر باحترام: لاوالله مانردك وأنت عاني لنا...

ووجهت كلامها لنوف: نوف يمه قومي شيلي ماجد وعطيه خالج..

ثاني جلس على الكنبة البعيدة وشال ماجد وهو متخوف: أخاف أعوره وإلا أكسره.. كنه عصفور

نوف وهي تضحك: الله يهداك خالي هذا أنا جنبك.. لاتخاف..

ثاني قرب ماجد منه بحنان وباس جبينه.. وحط ظرف فيه فلوس في لفته وقال بحنان: ماشاء الله تبارك الله مزيون طالع علي..

عائشة بعيارة: إذا مزيون على عبدالله.. إذا شين عليك..

ثاني ابتسم: كالعادة في صف عبدالله ضدي...

عائشة بحب: إذا سمعت كلام أختك الكبيرة وعرست.. ذاك اليوم باقط عبدالله في الزبالة..

جواهر ابتسمت وقالت لعائشة: زين احشميني أنا ونوف.. بتقطين أبونا في الزبالة واحنا نسمع..

عائشة بمرح: أنا كبيرة العائلة.. الحشيمة أولا وأخيرا لي..

ثاني بارك لجواهر مرة ثانية وأستاذن.. وهو عند الباب نادى عائشة: تعالي عائشة أبيج شوي..

عائشة لبست نقابها وطلعت مع ثاني برا: شالسالفة ثاني؟؟

ثاني بلهجة حاول إنها تكون واثقة كعادته: البنات اللي كانوا عندكم قبل أدخل.. من هم؟؟

عائشة استغربت ماعمره سأل عن حريم: طالبات جواهر في الجامعة..

ثاني بنفس الهدوء: واللي منهم كاشفة وجهها شاسمها..

عائشة ابتسمت وقالت بخبث: اهتمام خاص يعني؟؟

ثاني: عائشة جاوبيني من غير حركاتج القرعاء..

عائشة وهي فهمت بس قررت تتغابى ولا تسأل وتشوف اللي ورا ثاني: اسمها فاطمة ومابعد تزوجت..

ثاني بخبث: شفتي ماطاحت حنوكج يوم جاوبتي بدون لعانة..

عائشة بعيارة: ثاني احترمني... بيني وبينك فرق 13 سنة موب شوي.. أمك يالولد العاق..

ثاني مشى بثقة..

وعائشة رجعت للداخل..

عائشة كان لها أخت أكبر منها هي أم عبدالله

وأخين أصغر منها..

حامد الله يرحمه كان في سن عبدالله

توفي قبل حوالي 17 سنة.. في حادث سيارة وقبل يتزوج..

أمها كانت تقعد سنوات طويلة بين كل حمل وحمل..

ثاني جابته أم عائشة على كبر.. وماتت وهو صغير

وعائشة هي اللي ربته.. وكان معها طول فترة دراستها برا ودرس هو كل سنوات دراسته من الابتدائية للجامعة برا

شخصيته كانت استقلالية جدا.. ومستحيل حد يفرض عليه شيء... رجل أعمال ناجح جدا..

لاهي في أشغاله.. عن أفكار الزواج.. رغم أنه مو رافض فكرة الزواج.. لكن مالقى وقت يفكر فيها..

مغرور شويتين أوثلاث أو يمكن أربع

لكنه رجّال بمعنى الكلمة وقلبه طيب..

بعد يومين..

بعد الظهر وقبل العصر..

جواهر ترجع لبيتها..

عبدالله مابعد رجع من البنك.. وجواهر ماحبت تقول له انها بتطلع.. عشانها عارفة انه هو اللي بيلزم انه يجيبها..

رجعت مع أفضل ونوف..

كانت جهزت وحدة من صالات الاستقبال اللي تحت قبل تولد

الصالة كانت عبارة قسمين بينهم باب ضخم متحرك منزلق بالسحب..

حطت في القسم الداخلي اللي معاه حمام غرفة لها

والخارجي جلسة لضيوفها اللي بيجون يسلمون عليها..

كانت بالكاد قادرة تتحرك.. نوف والشغالات دخلوها لحد ماجلسوها على السرير..

أول ماارتاحت على سريرها قالت لنوف بحنان: يمه نوف من بكرة تداومين..

نوف بخيبة أمل: بس يمه..

جواهر بحنان: يا ماما خلاص مايصير.. غبتي 3 أيام قبل الجمعة والسبت..يعني 5 أيام قاعدة عندي.. بكرة الأحد تروحين تداومين بدون نقاش..

نوف بحنان: بس مايصير يمه تقعدين بروحج وأنتي نفاس.

جواهر تحضنها: حبيبتي الصبح بتجي عندي أم فهد وإلا موزة وإلا نورة.. لين تجين.. لا تحاتيني..

صوت رجالي يقاطعهم بمرح: خيانة.. خيانة.. تطلعين بدون ماتقولين لي..

نوف نطت وباست خشم أبوها: زين أنك جيت.. اقعد مع أمي.. ما أبي أخليها بروحها..

أبي أروح اخذ شاور وابدل..

نوف طلعت.. وعبدالله جلس جنب جواهر.. باس جبينها وهو يقول: الحمدلله على رجعتج بيتج بالسلامة..

جواهر بعذوبة: قول الحمدلله على رجعتك أنت لي..

عبدالله وقف وهو يلف ناحية سرير ماجد: وينه الشيطان الصغير.. اشتقت له.. اليوم في البنك كل شوي تتخايل لي خدوده اللي أبي أكلهم..

جواهر حاولت تلف: خلني أشيله أعطيه لك..

عبدالله وقفها بحركة من يده: لا تتحركين حبيبتي أنتي تعبانة.. وبعدين نسيتي أنا خبرة قديمـــــ

الكلمة ماتت على لسان عبدالله.. وهي تعيد له الذكرى القاسية المرة اللي يحاول ينساها..

الذكرى اللي تعمقت قساوتها بعد تجربته في العراق.. التجربة اللي أثبتت له مرارة الحياة بعيد عن الأحبة.. (وأشلون وأنا حرمتها من عيالها 17سنة!!)

عبدالله اللي كان على وشك إنه يشيل ماجد.. تركه وراح جلس على كرسي في الزاوية..

جواهر حست بوحشة موجعة تستولي على قلبها وهي تشوف عبدالله جالس بعيد ومعتصم بصمت مر.. منكس رأسه ويفكر..

اخترق سكون عبدالله صوتها العذب وهو يناديه..رد عليها بهدوء: هلا حبيبتي.. تبين شيء؟؟

جواهر برقة: تعال عبدالله أجلس جنبي.. أبي أقول لك شيء..

عبدالله قرب وجلس جنب جواهر على السرير

جواهر حطت رأسها على كتفه.. وعبدالله حضنها بيد وحدة برقة خوفا أنه يألمها بأي صورة

جواهر مسكت كفه الحرة بيديها الثنتين بحنان بالغ

وقالت له بحزم رقيق: عبدالله أنا وأنت شفنا اللي كفانا في حياتنا..

عبدالله قاطعها بحزن: بس اللي شفتيه أنتي كان أكثر أكثر بكثير..

جواهر بعذوبة وهي ترفع يده لشفايفها وتطبع عليهم قبلات دافئة شفافة: وأنا أشوف أن اللي أنت شفته أكثر بكثير..

واحنا يعني ياعبدالله بنقيس أحزاننا نشوف مين الأكثر..

تكفى عبدالله خلاص.. احنا شفنا ماكفانا.. ماراح أسمح لك تحس بالذنب.. أو تخلي شيء يوقف بيني وبينك..

ماراح اسمح لك تعيش في أوهام ممكن تخرب علينا حياتنا

أنا من لما بديت معك حياتنا الجديدة.. وأنا رميت كل شيء ورا ظهري

أنا وأنت وعيالنا وبس.. مانبي حزن.. ولا هموم تكفى.. أوعدني عبدالله أوعدني..

عبدالله بثقة حنونة وهو يرفع وجهها ناحيته ويقرب وجهه منها: إن شاء الله حبيبتي.. أوعدج ياقلبي

جواهر حطت أصابعها على شفايف عبدالله تمنعه من إكمال اللي في باله وقالت بمرح عذب: أنا مكتفية بالوعد..

عبدالله بعمق: بس أنا موب مكتفي..

جواهر وهي تبعد شوي عنه: الركادة زينة..

عبدالله بمرح: أنتي وحركات العجايز والنفاس.. ماني بمأكلج كلها بوسة وحدة بس..

جواهر بخجل: عيب عليك عبدالله... روح يالله توكل على الله

********************

في نفس اليوم الساعة 9 بالليل

سعود وصل للبيت..

لقى أمه جالسة تتفرج على التلفزيون..

سلم ثم سأل عن البنات

أمه بتخوف: برا..

سعود بغضب: برا وين لذي الحزة؟؟

أم سعود تحاول تهديه: قريب يأمك.. في فيلاجيو وأكيد على وصول..

سعود طلع معصب وركب سيارته..دق رقم على السواق: سيد علي أنت وينك؟؟

.....................

زين ارجع البيت أنا بأجيب البنات خلاص..

اتصل على مها وقال لها تطلع عليه من عند باب كارفور..

مها قلبها رقع وهي تشوف الساعة: يمه بيذبحنا!!

التفت على الجازي ودانة اللي رماها حظها اليوم انها هي اللي تكون مرافقتهم: يالله سعود برا ومعصب.. يقول اطلعوا.. وخلا سيد علي يرجع للبيت...

دانة بارتباك غلفته بهدوء: أنتو روحوا بأكلم خالد يجيني..

مها بتوتر وهي مو حابة تحرج دانة وتجبرها تركب مع سعود: كلميه أول.. خل نشوف وين مكانه

دانة دقت الرقم: هلا خالد وينك؟؟

...................

عزبة أبو جبر في الشمال..زين أنا في فيلاجيو.. تقدر تجيني الحين..

..................

عادي أنتظرك ساعة مهوب مشكلة..

دانة بهدوء:خلاص روحوا خالد جايني..

الجازي بعصبية: أنتي مجنونة.. تبين نخليش ورانا الساعة الحين 9 وثلث.. والمجمع محلاته تسكر 10..

وبعدين احنا اللي جايبينش وانتي ماكان لش حاجة جاية عشاننا..

دانة بنفس الهدوء: كارفور والمطاعم فاتحين للساعة 12.. روحو أنا بأقعد في المصلى لين يجيني خالد..

الجازي ومها حاولوا فيها لحد ماتعبوا وهي معندة..

وسعود جننهم اتصالات عشان يطلعون عليه..

البنات طلعوا لسعود..

ركبوا.. مها قدام والجازي ورا.. وهم باين عليهم الارتباك والقلق..

سعود بعصبية: وش فيكم؟؟ بعد متأخرين لذا الحزة.. وعادكم مسوين روحكم زعلانين..

الجازي بلعت ريقها وقالت بصوت واطي: الدانة داخل ومارضت تطلع معنا.. وحنا نحاتيها..

سعود ألتفت عليها بحدة : وشو؟؟

مها بتوتر: تقول بتتنى خالد.. وخالد في الشمال.. والمجمع محلاته بتسكر عقب نص ساعة..

سعود دق موبايله وقال بلهجته الآمرة: هلا خالد... لا تجي خلاص.. دانة بتطلع مع خواتي وبنوصلها للبيت..

................

أكيد طبعا.. أنت تبي لك ساعة لين توصل بيكون المجمع سكر..

..................

ماعليك منها.. خلك مع ربعك وإزهلها..

سعود دق على دانة وهو يحرك سيارته عشان يأخذ لفة ويرجع..

دانة اللي شافت اسم سعود.. رقع قلبها بعنف حاد.. بس ماردت عليه..

ماعاد قدرت ترجع تلفونها للشنطة وهي ترتعش بعنف..

رن مرة ثانية.. وثالثة.. ولاردت..

رنة مسج:

" ردي أحسن لش"

دانة دخلت لمحل نكست أقرب محل للباب الخارجي.. ووقفت في زاوية..

رن الموبايل..

خذت دانة نفس عميق وردت بصوت مرتعش: ألو..

سعود حس بطعنة عذبة حادة موجعة في عمق قلبه وهو يسمع صوتها لأول مرة بعد طلاقهم..

"يالله وش كثر اشتاق لصوتها ولانسكاب رنينه في أذنه..!!"

تماسك سعود ورد بصوته الواثق: هلا

عشان يرجع لها نفس الطعنة وبنفس القوة..بنفس العذوبة والوجع

دانة حست إنها مو قادرة توقف وهي تسمع صوته.. دورت كرسي قريب مالقت.. تسندت على الطوفة وهي تقول: سم سعود..

سعود بنفس هدوءه: سم الله عدوش.. اطلعي أنا أتناش برا..

دانة بحرج: لا خلاص.. مشكور.. خالد جايني..

سعود بثقة: أنا كلمت خالد وقلت له لا يجي وانش بتروحين معنا..

دانة اللي استفزها تصرفه وخلاه تتماسك أكثر: مالك حق ياسعود تتصرف من رأسك..

سعود بهدوء: من غير كثرة كلام.. اطلعي يادانة قدام أعصب.. وإلا والله العظيم لانزل بنفسي واسحبش قدام العالم..

دانة اللي عارفة سعود إذا عصب وش ممكن يسوي قالت بقهر: زين زين طالعة..

نزلت شيلتها أكثر على عيونها الباينة من خلال فتحات النقاب الضيقة.. وطلعت..

شافت سيارة سعود الفيكسار الذهبية واقفة قدامها مباشرة

مارفعت عينها وهي تحط يدها على القفل تبي تفتح الباب الخلفي..

عشان تتفاجأ بيد قوية تمسك معصمها قبل تفتح الباب

يد عرفتها بقلبها قبل عينها

انبعثت كهرباء لاسعة بدأت من معصمها وانتشرت لكامل يدها لتعبر عبر سلسلة ظهرها بعنف..

وصوته الغاضب كموج بحر هائج يغرق أذنها: دانة وين بتروحين..؟؟

دانة رفعت عينها عشان تغرق في بحر النظرة الحادة الغاضبة المرعوبة..

كانت ثانية وحدة من الزمن.. لكن بالنسبة للاثنين كانت عمر كامل.. وكأن الدنيا بكبرها خلت من كل شيء

عدا شخصين اثنين يحتضنهم المشهد

هو

و

هي

العين في العين

والمعصم في اليد

والقلب يثور كطوفان هادر على وشك إغراق الأرض والحنايا والأضلاع..

دانة كانت أول المتماسكين وهي تقول بارتباك وخجل وهي تحاول تخلص يدها منه بدون فايدة

كان مطبق على معصمها بكل قوته: وين باروح بعد.. بأركب..

سعود ألتفت على سواق السيارة اللي كانت دانة بتركبها وهو يقول بنبرة احترام: سامحنا يالأخو.. نفس سيارتي القديمة والاهل تلخبطوا..

سعود قال كلمته وسحب دانة من يدها لسيارة ورا السيارة الذهبية

دانة من بين أسنانها: سعود فكني مالك حق تمسك يدي..

سعود ماكان سامعها.. من لما شافها تتوجه للسيارة اللي قدامه وكانت بتركبها ..نط من سيارته وترك الباب مفتوح عشان يوقفها.. من دقيقتها وهو حاسس بصداع مؤلم وكأنه ضُرب على رأسه فعلا من خوفه وغيرته عليها..

ظل يسحبها من يدها لحد ما وقفها قدام باب سيارته الخلفي وفتح لها الباب وركبت وهي مستغربة

(وش عرفني يعني أنه اشترى مرسيدس فورويل سوداء..؟!!)

دانة ركبت جنب الجازي..

وسعود رجع لمكانه وحرك..

الدانة كانت ماسكة معصمها مكان يده بالضبط

كأن مسكته تركت في يدها حريق ماكن

الجو في السيارة كان ساكن جدا.. عاصف جدا

وكأنه يدور بينهم شرارات كهربائية مشتعلة..

الكل ساكت..

حتى مها اللي تعودت تقلب كل شيء لمزح

كان ريقها ناشف والكلام جمد في بلعومها

الكل كان حاسس بالتيار الكاسح العابر بعنف بين المقعدين الأمامي والخلفي

دانة ماصدقت توصل لبيتها

عشان تنزل بصمت..

قبل ماتوصل غرفتها

رنة مسج

بعد الغياب/ الجزء المئة وأحد عشر

#أنفاس_قطر#

دانة ماصدقت توصل لبيتها

عشان تنزل بصمت..

قبل ماتوصل غرفتها

رنة مسج

"آسف

والله العظيم آسف

على كل شيء ضايقتك فيه

جديد كان وإلا قديم"

دانة تنهدت بحزن غمر كل مشاعرها وأغرق روحها المثقلة.. وهي تحط الموبايل على التسريحة

وتخلع عبايتها

***************

حوالي الساعة 10 ونص في بيت عائشة

ثاني راجع من برا..

عائشة كانت تقرأ في تقارير طبية في يدها..

ثاني قعد جنبها عقب ماسلم

عائشة وعينها على التقارير: آمر..

ثاني بابتسامة: وأنتي وش عرفج أني أبي شيء

عائشة ترفع رأسها وتحط عينها في عينه: ثاني خلص علي.. أنا مربيتك

وعقب كملت بخبث: فاطمة صح؟؟

ثاني بدهشة: يمه منج..

عائشة تضحك: صار لك كم يوم وانت مو على بعضك.. وكل ماتجي تبي تكلمني تغير رأيك وتقوم

وأنا فاهمتك من أولها بس قلت خلك تتأدب شوي..

ثاني ابتسم: زين والزبدة؟؟

عائشة تبتسم: الزبدة أني سألت جواهر عنها.. ومدحتها وايد.. فأنا خذت رقم موبايل البنية

متى ما انت عزمت.. اتصلت فيها وخذت رقم أبوها

ثاني بتصميم: اشرايج تتصلين الحين..

عائشة بمرح: اللي مافينا صبر.. يمكن الوقت موب مناسب

وعقب كملت بهدوء: وممكن أعرف وش اللي غير رأيك؟؟

كنت كل ماكلمتك عن الزواج قلت موب الحين..

ثاني بهدوء: على قولت المصريين (هوا أكل وبحلئة) يعني أنتي وش لج باللي غير رأيي.. المهم رأيي..

عائشة بمودة: يمه منك.. بتاكلني... زين قشرني أول.. لا تأكلني بقشورك

ثاني بثقة ومرح: أنتي أصلا ماتنبلعين مقشرة وإلا بقشرج..

خلصيني ودقي عليها الحين وجيبي لي رقم أبوها ..

ثاني رجل القرارات السريعة

البنية عجبته من ذاك اليوم

فليش التاخير؟؟

اطرق الحديد وهو ساخن..

(وخلني أحط عيني في عينها وهي خطيبتي... واشوف حزتها هي وش يتقول؟؟)

عائشة طلعت الرقم اللي متسيف جديد عندها.. دقت

باحترام: مساء الخير

.........................

انا الدكتورة عائشة.. اللي تقابلنا عند جواهر قبل يومين..

........................

الله يسلمج ياقلبي

.................

الحمدلله

(ثاني بدأ يتوتر رغم أنه محافظ على هدوءه وبروده الاعتيادي)

................

ممكن أخذ رقم أبوج فاطمة لو سمحتي..

...............

أكيد من حقج تعرفين.. موضوع خطبة إن شاء الله

أنا اسمي عائشة بنت ناصر الـ

وأخوي اسمه ثاني وعمـ.....

(مقاطعة)

................

بس يابنتي الكلام أخذ وعطاء.. أنتي حد متكلم عليج؟؟

(ثاني حس بضيقة غير طبيعية تكتم على صدره)

(أنا وحدة تتجرأ وتفكر مجرد تفكير إنها ترفضني)

......................

زين دام ماحد متكلم عليج.. عطونا فرصة نتقدم.. وأسألوا عن الولد براحتكم...

والله العظيم موب عشانه أخوي بس ثاني ما ينتعيب بشيء.. مصلي وحافظ فرضه ومال وشباب وتعليم وشخصيــ..

(مقاطعة)

...............

زين يابنتي خذي مهلة تفكرين.. وانا بأكلمج بعدين

....................

عائشة تنتهد: أنتي شكلج متوترة ومعصبة على ثاني ليش ما أدري... ماراح أخذ بكلامج ذا المرة.. وبأعطيج فرصة تفكرين

..............

مع السلامة..

عائشة تلتفت على ثاني وهي تقول باستفهام: ثاني انت وش مسوي في البنية؟؟ البنية شكلها شايلة عليك من قلب..

*****************

بعدها مباشرة..

مها كانت في غرفتها تجهز لمحاضراتها بكرة..

رن موبايلها..

شافت الاسم.. ردت بعيارة: يا أختي وش ذا الازعاج؟؟

مها انفجعت وهي تسمع صوت فاطمة تبكي..

مها برعب: فطوم وش فيش فديتش؟؟

فاطمة وهي تشاهق: النذل الحقير.. وش مفكرني.. ياي يكمل علي..

مها وهي تهديها: فاطمة حبيبتي أنا ماني بفاهمة شيء.. هدي واشرح لي..

فاطمة قالت لها اللي صار كله وهي كلمة تشرح وكلمة تبكي..

مها بهدوء: زين حبيبتي وش فيها؟؟

فاطمة اللي تماسكت بعد مافرغت اللي في خاطرها: يعني يقول لي أنتي وش مفكرة نفسج.. وروحي إلعبي بعيد ياشاطرة

وعقب يبي ييي يخطبني..

مها بعيارة: ياسلام حب من أول نظرة الأخ...ماعنده وقت.. حامي حامي

أنا بصراحة شفته يجنن. طول ورزة وشخصية.. لاتضيعينه..

فاطمة بغضب: أحر ماعندي أبرد ماعندج.. ضاعت علومه إن شاء الله

وش فيه الواحد يتحسف عليه..غروره وإلا وقاحته

خليه يولي..

*****************

مازلنا في بيت أبو سعود وخلال نفس الوقت

لكن في مكان آخر..

غرفة سعود..

سعود كان قاعد يشوف أخبار الجزيرة..

اندق الباب عليه..

سعود بهدوء: تفضل..

كان محمد اللي دخل بخطوات متوترة..

سعود ابتسم: تعال محمد.. اسهر معي.. بنقول للجويزي تسوي لنا كرك..

محمد جاء وقعد مقابله.. وفي وجهه كلام..

سعود حس بالكلام اللي على طرف لسان محمد: وش عندك..؟؟

محمد بتوتر: أبيك في موضوع مهم...

سعود بود وثقة: وأنا حاضر..

محمد بذات التوتر: أبي أخطب مزنة بنت عمي هادي...

اتسعت ابتسامة سعود: زين نخطبها لك بكرة ولايهمك..

محمد بقلق: أنا بصراحة من زمان أبي أخطبها.. بس طلاقك لدانة وقف في وجهي..

سعود بهدوء: محمد يا أخيك اسمعني.. أنا والدانة موضوع ثاني غيرك أنت ومزنة.. مالكم علاقة فينا..

محمد بذات القلق: أخاف عمي هادي يعيي عشان .......

سعود قاطعه بثقة: لا تخاف.. مهوب معيي عشاني طلقت دانة.. عمي هادي رجّال عاقل ويحبنا مثل عياله

العقبة الوحيدة إن البنت تكون ماتبيك..

وأخيرا ابتسم محمد: إن شاء الله إنها تبيني..

******************

ثاني يوم..

يوم الخطبات على كل الجبهات..

راشد كلم عبدالعزيز.. ماعاد فيه صبر

من لما عرف أن عبدالله رجع وهو مجنن عبدالعزيز يبيه يحدد له موعد مع عبدالله عشان يجي هو وأبوه يخطبون نوف..

عبدالعزيز طلب منه يصبر شوي لأن عبدالله عليه ضغط زوار ومجلسه مايخلا من أفواج المهنئين بسلامته...

ثاني العنيد قدر يطلع رقم أبو صالح أبو فاطمة بدون اهتمام برفض فاطمة..

وانبسط أنه طلع من معارف أبوه.. أتصل فيه وطلب منه يحدد له موعد.. واتفقوا يتقابلون بعد صلاة المغرب.. بدون مايقول ثاني لأبو صالح عن سبب الزيارة..

سعود اتصل في عمه.. وقال له أنه يبي يجيه عقب صلاة العصر

عدا عن مخطط لخطبة رابعة على جبهة رابعة

****************

عقب صلاة العصر

في مجلس أبو خالد..

سعود قاعد مع عمه... محمد المتوتر مارضى يجي معه.. اتصل في خالد وطلعوا الثنين سوا..

سعود باحترام: يبه أنت عارف أنه أنا ومحمد عيالك مهما صار بيننا...

أبو خالد بحنان: أكيد يا أبيك مافيه شك..

سعود يكمل بذات الاحترام: وطلاقي لدانة أنا اللي اتحمل ذنبه بروحي.. وماحد له ذنب فيه عشان غيرنا يتحملونه..

أبوخالد رغم ألمه اللي هو حس فيه لكنه جاوب بصدق: أكيد ياولدي..

سعود باحترام كبير: يعني إذا محمد بغى مزنة منت براده بسبتي..

أبو خالد باستنكار: حاشا أرده أبو سعيد وهو رجّال كفو ولا عليه منقود..

سعود اللي حس بفرح عميق ابتسم وقال بهدوء: يعني أنت موافق؟؟

أبو خالد بثقة: أنا موافق.. لكن يا أبيك بأشور مزنة.....

وعقب كمل بحزن: سامحني يا أبيك لكن من عقب سالفة دانة نذرت نذر أني ماعاد أغصب وحدة من بناتي على العرس..

سعود باحترام رغم ماأعادته له الذكرى من تأثر: أكيد يبه.. أكيد

سعود طلع من عند عمه اللي وعده يرد عليهم في أقرب وقت

وأبو خالد دخل داخل البيت.. ونادى دانة وقال لها كل شيء.. وطلب منها إنها تشوف رأي مزنة

*******************

خالد ومحمد في مقهى دي لاميزون اللي في شارع سلوى

محمد متوتر لأخر حد..

خالد يضحك عليه: ذا التوتر كله عشان مزون القرعاء؟؟

محمد ابتسم رغم توتره: ما اسمح لك تسب المدام..

خالد يضحك: لم لسانك لا يتدلى وأنت تقول المدام... احترمني قدام أعيي وأقول لك مالك عندنا مرة..

محمد ابتسم.. لخالد دائما القدرة على تبديد همه: تخسى تعيي مني أنت ووجهك.. احمد ربك أني بأصير نسيبك..

الشباب قاعدين يتقهون ويسولفون وكل واحد يقط النغزات على الثاني

رن موبايل محمد.. شاف اسم سعود

رقع قلبه من التوتر والترقب: هلا أبو سعيد.. بشر

................

محمد بفرحة عميقة: زين.. زين.. مشكور جعلني ماخلا منك يوم ياسنيدي..

..................

محمد ألتفت على على خالد بفرح: هذا سعود يقول عمي موافق.. بس يبي يأخذ راي مزنة..

خالد بثقة ومرح: ماعليك منها بتوافق.. وإلا بأكسر لك رأسها..

محمد بابتسامة: عشان أكسر لك يدك.. وبعدين لا تنسى إنها هي اللي أكبر منك يالبزر..

خالد يضحك: كلها فرق عشر شهور اللي بيني وبينها.. يعني عبارة إنه حنا توأم..

خالد كان في رأسه موال ينرسم..

أجله شوي لين يرجع للبيت

*********************

قبل المغرب بشوي

دانة في غرفة مزنة..

وملامح حزن عميق مرتسمة على وجهها: مزنة حبيبتي.. فكري شوي.. مايصير تقررين موضوع مهم مثل هذا في حزتها..

بعد الغياب/ الجزء المئة وأثنا عشر

#أنفاس_قطر#

قبل المغرب بشوي

دانة في غرفة مزنة..

وملامح حزن عميق مرتسمة على وجهها: مزنة حبيبتي.. فكري شوي.. مايصير تقررين موضوع مهم مثل هذا في حزتها..

مزنة بتوتر لكن بثقة: ما أبيه يادانة.. ما أبيه.. وأنتي بروحش قلت لي أنه ابي مهوب غاصبني..

وأنا قلت رأيي خلاص..

دانة بحنان وحزن: والله أنه محمد مافيه عيب.. رجّال اللي مثله قليل والله العظيم..

مزنة بهدوء وألم: بس شخصيته بكبرها ماتعجبني.. واشك في سالفة أنه رجّال اللي مثله قليل..

دانة بحزن: ليه فديتش؟؟

مزنة بهدوء وهي تقوم من السرير وتجلس على مكتبها: أولا وأهم شيء مايستحي ولا يحشم

كل مرة يشوفني في بيتهم.. يقزني قز

مايحشم أني بنت عمه وفي بيته..

ثاني شيء تركيبة شخصيته كلها غلط

أول كان مطول لي ذا الشعر كنه شعر بنية... أخييييه منه ومن سواياه..

ثاني شيء يوم صارت سالفة صديقه رجّال منيرة رفيقة مها

بغى يموت وحبس روحه وصابه اكتئاب

هذي تصرفات رجّال بالإمانة عليش..؟؟!!

وحتى يوم حلق شعره.. ماحلقه عشان يسوي مثل الرياجيل

لكن من زود ماهو مكتئب وحزين ومتحطم

يعني بكرة لو صار لحد من عيالنا شيء

هو بيقعد يبكي وأنا اللي أروح أوديهم المستشفى أراكض فيهم؟!!!!

أنا أبي رجّال يشيلني مهوب أنا اللي أشيله..

محمد هذا مايصلح لي.. ولا أصلح له..

دانة برقة: بس يامزنة.......

مزنة قاطعتها بحزم: خلاص دانة تكفين.. انتهينا من ذا الموضوع..

*****************

بعد المغرب..

في مجلس أبو صالح.. اللي اسمه ابوصالح من أيام ماكان شباب وقبل يتزوج حتى.. بس صالح ماجاء

ومارزقهم الله عقب العلاج الطويل إلا فاطمة وبس

ثاني عمره ماتردد في قرار..

ويوم يصمم على شيء يسويه..

وفاطمة حطها في رأسه

وخصوصا عقب ماقالت له أخته أنها تقول أنها ماتبيه..

(أنا وحدة ترفضني!! ولاعمرها بتصير!!)

بعد السلامات والتعرف على بعض..

أبوصالح طلع يعرف ناصر أبو ثاني عدل..

وثاني عرف يهدّف مضبوط..

وحط الشايب أبو صالح في جيبه..

أبو صالح كان يجيه خطّاب كثير لفاطمة.. لكنه كان يرفض

لأنه كان خايف عليها

لا لها عم ولا خال لها عمات وخالات بس..

وأبو صالح رجّال كبير في السن

وماكان يبي يعطي فاطمة إلا رجّال يعرف أنه بيصونها

ويخاف الله فيها وماراح يظلمها أو يضيمها لما يدري إنها مالها سند..

وحس انه لقاه في شخص ثاني.. وقرر انه مايفرط فيه..

ابو صالح باحترام: شوف ياولدي من ناحيتي أنا موافق.. بس خلني اشور البنت

ثاني (وأنا خايف إلا من سالفة تشور البنت ذي) رد باحترام بالغ: المهم شورك.. وإلا البنت صغيرة ويمكنها ماتعرف مصلحتها وين.. بتخليها على كيفها يعني؟؟

أنا شاريها وشاري نسبكم.. وأوعدك أحطها في عيوني الثنتين..

أبوصالح بتفكير: مايصير إلاّ الخير واللي يرضيك ان شاء الله

أبو صالح قرر يسال عن ثاني أول وباستقصاء واهتمام

قبل يسأل فاطمة..

**************

بعد صلاة العشاء..

خالد يدخل البيت...

أبوه كان في مجلسه وعنده رجال...

خالد قاعد كأنه قاعد على مقلى.. ياما قام.. ياما قعد.. يا مادخل وياما طلع..

أول ماراحوا الرياجيل..

أبو خالد ألتفت على ولده بغضب: الحين تقدر تقول لي وش فيك؟؟

فشلتني في الرياجيل كنك مخروش.. ماقعدت على ذيلك دقيقة وحدة..

خالد حب خشم أبوه: قل تم فديتك..

أبو خالد ابتسم: أثر السالفة فيها طلبة وحب خشوم.. اخلص علي ياخويلد وش تبي؟؟

خالد بتوتر: أبي الجازي بنت عمي سعيد..

أبو خالد تغير وجهه: مهوب ذا الحين.. ولا هو بوقته..

خالد بخيبة أمل: ليه يبه؟؟

أبو خالد بنبرة الشياب المنطقية: أول شيء بيحسبون أنه حنا خطبنا عشان هم خطبوا.. كن حن نقول لهم وحدة بوحدة

وهذا عيب ما ارضاه لأختك ولا لبنت عمك...

الشيء الثاني والأهم إن بنت عمك عندها شهادة مثلها مثل غالية.... وأنا لو جاني حد يخطب غالية ذا الحين تفلت في وجهه...

تركد لين تخلص بنت عمك ذا السنة.... وقدام تخلصها وتاخذ شهادتها.. ما أبغي أسمع منك كلمة..

والجازي مهيب طايرة.. ولا حد بمتقدمن عليك.. وأنت وياها عادكم صغار وش أنت طايرن عليه..

خالد بخيبة أمل بالغة رغم أنه مقتنع بكلام أبوه: خلاص يبه اللي تامر عليه تم..

*******************

في الليل متأخر...

عبدالله داخل بيته من مجلسه الخارجي بعد ماراح أخر زائر من الرياجيل اللي تعشوا عنده..كان حاس بصداعه المعتاد..

داخل غرفة جواهر بشويش.. اليوم ماشافها ولاشاف ماجد إلا يمكن 10 دقايق بس طول اليوم..

خاف إنها تكون نايمة..

ابتسم لما لقاها قاعدة تغير لماجد...على ضوء أباجورة خافتة لأن نوف كانت نايمة جنبها.. وسرير ماجد الصغير المحمول بينهم ثنتينهم..

جواهر لما شافته ابتسمت ابتسامة صافية عميقة.. واشرت له أنه خليك في الجلسة وأنا بأجي لك..

عبدالله رجع وجلس في الجلسة وسند رأسه على الكنبة عقب ماحط غترته جنبه..

صوتها الناعم قريب منه: الصداع صح؟؟

عبدالله بألم وهو يفتح عيونه: على خفيف.. الحمدلله ماعاد يجي مثل أول..

كمل بابتسامة: الشمس في "الجدر" سيحت الصداع..

جواهر جلست جنبه قالت له بحنان وهي تأشر على فخذها: تعال حبيبي..

عبدالله بحذر: أخاف أعورج ياقلبي..

جواهر برقة: ليه حد قال لك إن عمليتي في فخذي..

عبدالله ابتسم رغم صداعه وحط رأسه على فخذها..

والصمت يحل بينهم.. كعادتهم حينما تعبر مشاعرهم العميقة الاستثنائية عن نفسها بدون كلام..

جواهر دلكت رأسه بحنان..

عبدالله شوي شوي بدت ملامح الالم تنبسط وتلين..

عقب مسك يدها وحضنها..وهو بعده مغمض عيونه..

جواهر بحنان مصفى: حبيبي من لما وصلت وأنت ماريحت روحك.. مابين البنك وزوارك اللي مايخلصون..

على الاقل خذ إجازة من البنك أسبوعين.. لين تخلص على الأقل عشاك الأسبوع الجاي...

عبدالله كان مرتب لعشاء ضخم في قاعة الدفنة بفندق الشيراتون بمناسبه رجوعه وسلامته.. وزعوا سكرتاريته كروت دعوته...

وعزم الكل بدء من سمو الأمير الله يحفظه إلى أصغر موظف عنده في البنك..

عبدالله اللي شدد من احتضانها ليدها: ما أقدر حبيبتي.. البنك حاله مقلوب... اللي كان مستلم الإدارة بالانابة جيت لقيته حايس لي الدنيا.... والعملاء في تناقص.. ومشاريع كبيرة ضاعت علينا..

يبي لي شوي وقت لين أضبط وضع البنك

وعقبها أوعدج أخذ إجازة طويلة واسافر أنا وأنتي وماجد وبس...

جواهر بابتسامة: ياسلام عليك.. ونوف وعزوز..؟؟

عبدالله ابتسم وجلس على حيله: وش فيهم نوف وعزوز.. شيبان في بيتهم... يالله جيبي لي مجود اليوم ماحبيته على راحتي..

جواهر ابتسمت وهي تقوم تجيب ماجد: وهو ماجد طفش من شيء إلا هالحبب اللي ماتخلص..

****************

ثاني يوم العصر..

سعود طالع من صلاة العصر هو ومحمد..

كانوا جايين كلهم على سيارة محمد..

وكانوا في السيارة راجعين لبيتهم..

رن موبايل سعود كان عمه هادي..

أبو خالد حب يبلغ سعود رفض مزنة في التلفون

ماحب إنه يواجهه.. ويرده وجه لوجه

أبو خالد حاول يقنع مزنة.. لكنها شاف إنها كانت مصرة على الرفض.. وهو حلف أنه ماعاد يجبر حد منهم على رجّال ماتبيه..

كانوا يوقفون في البيت وقلب محمد يوقف وهو يسمع سعود يقول: هلا والله يبه حياك الله..

..............

طيبين طاب حالك..

..................

يسرك الحال جعلني ماخلا منك

..................

الشغل زين ولله الحمد (سعود ماارتاح لتطويل عمه في السلامات... حس إنه السلامات مقدمة لتأجيل كلام أخطر)

..........................

أكيد يبه.. حن أهل.. ومافيه شيء بيفرقنا..

.........................

وأكيد إن كل شيء قسمة ونصيب...... يبه قل اللي في خاطرك..

.......................

سعود بتماسك رغم الحزن العميق اللي اجتاحه: زين وممكن نعرف السبب؟؟

...........................

زين يبه طال عمرك.. ماصار إلا الخير جعل راسك سالم... وانت تراك تحل وتربط... وانت أبينا كلنا أول وتالي..

......................

مع السلامة الله يحفظك

محمد حس إن يد هائلة تكتم على قلبه... وإنه عاجز عن التنفس.. سأل بحذر: عمي وش كان يقول لك ياسعود؟؟

سعود بمساندة: محمد أنت عارف إن العرس قسمة ونصيب والمرة بدالها مرة...

محمد بهدوء قاتل وهو يصر أسنانه على كل كلمة: عمي وش قال لك ياسعود؟؟

سعود بحزن: يقول إن مزنة مارضت...

محمد بنفس هدوءه القاتل: سعود انزل لو سمحت...

سعود بقلق: والله ما أخليك تروح مكان... تبي تروح رجلي على رجلك...

محمد بنفس الهدوء البارد: سعود أنت وش شايفني؟؟ بزر؟؟...

يعني بأروح أنتحر وإلا اقط روحي في البحر.. عشان مره عيت مني..؟؟

وعقب كمل بعزم: ماعاشت ولا كانت... أنا بس أبي اقعد بروحي شوي..

سعود بإصرار: اعتبرني ماني موجود... الليلة رجلي على رجلك لين نرجع سوا للبيت..

بعد الغياب/ الجزء المئة وثلاثة عشر..

#أنفاس_قطر#

بعد صلاة العشاء...

سعود ومحمد قاعدين على البحر المنطقة الخالية اللي ورا منطقة الأبراج...

محمد من لما طلعوا وهو ساكت.. وهذا هو الحين قاعد على الشاطئ ساكت..

سعود كان يروح ويجي وفي رأسه فكرة كانت تعذبه..

فكرة تلتهم مشاعره كنار محرقة يتزايد اشتعالها في كل دقيقة

ماقدر يتحمل خلاص..

طبع مسج وأرسله...

وقتها كانت دانة قاعدة مع امها تحت.. يتفرجون على التلفزيون...

رن موبايل دانة بمسج.. رقع قلبها بعنف لما شافت اسم سعود قبل تفتح المسج.. بيد مرتعشة وقلب أكثر ارتعاشا فتحت المسج:

" تكفين دانة

قولي أنه موضوعنا ماله دخل

برفض مزنة لمحمد"

دانة حست بألم عميق وهي تحس بألم سعود

وإحساسه بالذنب في شيء هو ماله علاقة فيه

سعود كان قاعد في السيارة

والأبواب كلها مفتوحة

وهو يشعر بالتوتر في انتظار رد دانة

بعد أقل من دقيقة رنة مسج

" والله العظيم إنه رفض مزنة لشخص محمد

وأنه موضوعنا ماله علاقة من قريب وإلا بعيد"

سعود حس براحة.. لكنه حس بألم أكبر

(ليه محمد وش فيه كشخص؟؟)

طبع لها مسج

" وممكن اعرف وش هي ردت في محمد من الردى؟"

دانة عارفة إنه سعود مو مرتاح لين يعرف السبب

فحبت تجاوبه بطريقة لبقة

ومن ناحية ثانية قررت ماتقول له على سالفة إنه محمد يخز مزنة لما يشوفها

لأنها من معرفتها لسعود مستحيل يعدي موضوع مثل هذا لمحمد..

طبعت له مسج

" محشوم أبو سعيد من الردى

لكن مزنة تشوف إن محمد عاطفي بزيادة

وشخصيته لينة زيادة عن اللزوم

على خلفية اللي صار له يوم حادث سالم"

سعود سكت..

حس بالحزن العميق إن محمد يتحاسب على وفائه لصديقه

وحنانه وطيبة قلبه.... شيء مايعيب رجولته اللي ماتخفى على حد...

(لكن وش يقول؟؟ مايقدرون يجبرون البنت على شيء ماتبيه)

****************

بعد كم يوم..

الصبح

نورة كانت عند جواهر..

نورة كانت شايلة ماجد وتلاعبه برقة: ماشاء الله تبارك الله على ذا الماجد.. القلب ينفتح له عشان يتربع فيه..

وعقب كملت وهي تمصمص: مشتهية ليمون جواهر فديتج.. دقي الجرس اللي جنبج خلي وحده من الشاينيز اللي عندج تجيب لي صحن فيه ليمون مقطع..

جواهر ضحكت برقة: ان شاء الله عمتي.. نخل الشاينيز يجيبون لج ليمون..

وعقب كملت باستفهام: الا انتي وش فيج على الليمون.. كل يوم تبين ليمون..

نورة وهي لاهية تلاعب ماجد: ما أدري مشتهيته..

جواهر ماحبت تعطي نورة أمل على خلفية إنها مشتهية ليمون بس..

سألتها بطريقة عادية: متى اخر دورة شهرية جاتج نورة..؟؟

نورة وعقلها مع ماجد: المفروض ذا الايام تجي تتأخر يوم.. تتقدم يومين.. خلاص على وصول..

جواهر لما جاتها الشغالة.. طلبت منها تجيب الليمون وشيء ثاني من حمامها اللي فوق..

بعد دقايق الخدامة جابت الشغلتين..

حطت الليمون على الطاولة قدام نورة..

وعطت الشغلة الثانية لجواهر..

جواهر لنورة اللي حطت ماجد في كرسيه وبدت تمص الليمون: نورة قومي هاج..

نورة وهي لاهية في الليمون: شنو هاني؟؟

جواهر برقة ومساندة: تيست حمل..

******************

دانة وتهاني في استراحة الاطباء

تهاني مددت انتدابها للصحة المدرسية سنة زيادة

دانة تشرب قهوتها وتسأل تهاني برقة: وش اخبار مرضاش اليوم...؟؟

تهاني تضحك: الله يقلع دارهم ذا البزارين.. جننوني.. اللي يبكي واللي يضرب.. وكله كوم واللي سواها علينا اليوم كوم..

دانة تضحك: من جدش؟؟

تهاني وهي ميتة من الضحك: والله العظيم.. المسكين كان مرعوب.. ماشفت إلا السيول اللي غرقت الكرسي..

دانة بتعاطف: حرام.. أكيد انحرج ياقلبي عليه..

تهاني بابتسامة: ايه والله انحرج المسكين..

دانة قامت تحط كوبها على الطاولة.. ثم رجعت تجلس..

سألتها تهاني بنبرة خاصة: ماغيرتي رايج؟؟

دانة بنبرة عادية: في شنو؟؟

تهاني باهتمام: في دكتور سعد؟؟

دانة بضيق: تهاني حبيبتي قلت لش ألف مرة سكري ذا الموضوع..

تهاني هزت كتوفها: بكيفج.. بس حبيت أقول لج.. ان دكتور سعد عنده امل أنج تغيرين رايج

******************

في بيت أبو صالح...

فاطمة نازلة من فوق....

اليوم ماعندها الا محاضرة وحدة.. والدكتور معتذر

فاليوم قاعدة في البيت

أبو صالح وأم صالح قاعدين تحت يتقهون..

أبو صالح خلص سؤال عن ثاني

ماخلى حد ما سأله..

وطلب من ناس ثانين يسألون له بعد..

الكل مدح فيه.. ومدحوا حفاظه على صلاته وقوة شخصيته

وإنه عنده خير كثير

لكنهم بعد قالوا لهم أنه شايف حاله شوي وأنه هذا هو عيبه الوحيد..

أبو صالح ما اعتبر هذا عيب لأنه شافه نوع من الثقة بالنفس

وخصوصا أنه جلس مع ثاني بنفسه

وشاف إن اعتداده بنفسه شيء ينبع من طبيعته

لاهو مستقبح ولا مبالغ فيه..

وقعدته وسوالفه تدل على رجولته ومافيه عذروب..

وحتى أم صالح صارت مقتنعة بأفكار زوجها

هذي كانت أفكار أبو صالح.. وقت ماوصلته فاطمة وحبت رأسه ورأس أمها وهي تقول: صباح الخير باباتي.. صباح الخير ماماتي..

أبو صالح طالع فاطمة بحنان: فطوم.. تعالي اقعدى يمي يبه..

فاطمة جلست جنب أبوها وهي تحضن ذراعه وتحط رأسها على عضده..

أبو صالح وهو يمسح شعرها: فطوم ياج معرس خوش ريال والله.. ريال الله أرسله لنا من السماء

فاطمة تصلبت يدها على يد أبوها وردت بسرعة مفاجئة.. رد أشبه بقنبلة انفجرت وسط السكون: أنا موافقة..

أبو صالح ابتسم وهو مستغرب موافقتها السريعة بدون حتى ماتعرف من هو..

وماعرف الأفكار اللي دارت في عقل فاطمة خلال ثانية واحدة...

فاطمة لما سمعت أبوها يقول إنه جاها رجّال فيه خير قررت توافق بسرعة عشان تسكر الباب على ثاني

" إذا اتصلت أخت الشيخ ثاني بن ناصر مرة ثانية عطيتها رقم أبوي... خل الحقير يتفاجأ أني مخطوبة إذا يا .. وأبرد حرتي فيه شوي"

وماعرفت فطومة الأمورة "إن من هرب من شيء ماذبحه إلا هو" مثل مايقول مثلنا..

أبوها بتردد: توافقين كذا حتى بدون تعرفين من هو..

فاطمة بثقة: مو أنت تقول إنه ريال فيه خير.. وأنت موافق عليه..

أبوها بثقة: أنا أشهد أنه فيه خير.. وريال مامنه اثنين.. وأنا فعلا موافق عليه..

فاطمة بثقة ونعومة: وأنا عقب رأيك مالي رأي...

أبو صالح بود: يعني نحدد يوم للملجة؟؟

فاطمة قامت تطلع وهي تقول بخجل: كيفك يبه..

**************

بعد دقايق.. فاطمة كانت تسوي مكالمة جماعية شبكت فيها مها ومنيرة..

فاطمة بمرح مخلوط بالخجل: العانس بتلحق بركبكم.. أنا انخطبت..

منيرة بصدمة: من؟؟ اللي شفناه عند باب الدكتورة جواهر في المستشفى؟؟

فاطمة بعصبية: يخسى هو وويهه.. ماعاد إلا ذاك الوقح الحقير..ليه خلصوا ريايل الدوحة..

مها بفرح: زين وش اسمه؟؟ واشلون؟؟

فاطمة بارتباك: تصدقون ما اعرف اسمه..

منيرة باستغراب: أشلون تجي ذي؟؟ تنخطبين لواحد ماتعرفين اسمه..

فاطمة ببراءة: ماطر ببالي أسال.. أبوي قال لي ياج ريال فيه خير...

قلت موافقة عشان أقطع الطريج على الحقير إذا يا...

أبيه يي يخطب يقول له أبوي أني انخطبت.. أبي أهينه مثل ماهانني..

مها وهي تضحك: شكلش مكثرة من شوفة الأفلام يالخبلة

فيه وحدة توافق على العرس عشان تحر واحد ماشافته إلا مرة وحدة...

هذي حياتش يالمرجوجة.. مايصير تقررينها بذا الطريقة..

فاطمة تبتسم: خليني أضرب عصفورين بحجر...

بانخطب لواحد فيه خير وأبوي مقتنع فيه..

وفي نفس الوقت أبرد حرتي في ثاني الكلب...

وبعدين أبوي كان يرفض ناس وايد بدون مايقول لي..

وهذيه أول مرة يقول لي.... معناته أنه هذا أحسن واحد ياه..

وعقب كملت بخجل: تدرون ودي أعرف اسمه.. بس استحي أروح لأبوي أسأله..

جواهر ماكانت قادرة تجلس من الترقب

ونورة داخل في الحمام.. وتأخرت كثير

التيست يبي له 3 دقايق

ونورة صار لها ربع ساعة...

بعد دقايق طلعت نورة

وجواهر نطت لها

كانت نورة صامتة بشكل مرعب

عيونها مليانة دموع..

وهي ماسكة التيست الطويل وتفره ناحية جواهر

عشان توريها الخطين المتوازين

خط في كل فتحة من فتحات التيست الثنتين..

**************

عبدالعزيز في دوامه في بيت الزكاة..

رن موبايله..

شاف الاسم ابتسم: هلا والله بالغالية... حيا الله أم عزوز

جواهر بفرحة غامرة: البشارة.. البشارة..

عبدالعزيز بتوتر وتوجس وترقب قاتل: جاتج.. بس على شنو..

جواهر بحنان وفرحة وعذوبة: نورة حامل.. نورة حامل.. منصور جاي في الطريق يابو منصور... منصور جاي..

عبدالعزيز سكت.. الفرحة ربطت لسانه.. حس بفرحة صافية تخترق جوانحه وتحلق بقلبه..

جواهر بنبرة فرح واضحة: وين رحت يابو منصور؟؟

عبدالعزيز بابتسامة كبيرة: اللهم لك الحمد والشكر.. اللهم لك الحمد والشكر..

وعقب كمل بحب واضح: نورة عندج؟؟

كان رد جواهر عليه هو صوت نورة الباكي: هلا عبدالعزيز..

عبدالعزيز بحنان مصفى: مبروك ياقلبي مبروك..

نوره وسط عبراتها: الله يبارك فيك..

عبدالعزيز بعذوبة: حبيبتي ليش البكاء ياقلبي؟؟ اللي يشوف يقول لج 10 سنين تنطرين.. كلها 8 شهور من يوم تزوجنا..

نورة بعبرة وفرح: يا الله..... ياعبدالعزيز.. كنت شفقانة شفقانة.. اللهم لك الحمد والشكر..الحمدلله على نعمته..

عبدالعزيز بحب: الله يتمم عليج.. ويرزقنا الذرية الصالحة

****************

أبوصالح كلم ثاني وبلغه موافقتهم.. وانه يحدد الموعد اللي يناسبهم لعقد القران..

ثاني ابتسم بغرور وقال في نفسه : كنت عارف إن بربرتها على الفاضي.. وإلا أنا فيه وحدة ممكن تتجرأ وترفضني..

كلهم سوا.. بس هي أمها أكيد داعية لها..

قال لابو صالح باحترام: الخميس الجاي زين... أجيب المملك عقب المغرب.. وألبس العروس ونسوي الخطبة

وموعد العرس على راحتكم.. تحددونه..

وأنا بأمر العصر بأعطيك المهر..

أبو صالح بهدوء: وليش مستعجل على المهر يا أبوك.. خله يوم الملجة مرة وحدة..

ثاني بثقة: اليوم أحسن.. عشان العروس ترتب لخطوبتها على راحتها..

*****************

محمد رجع ينخرط في حياته.. شغله وربعه..

وهو يحاول يتناسى رفض مزنة له..

(عمر الحياة ماتوقف عشان مرة رفضت رجّال!!)

على جبهة الخطبة الأخرى

راشد ونوف..

عبدالعزيز كلم عبدالله بينه وبينه..

كان رد عبدالله عليه مباشرة: أنه نوف بعدها صغيرة.. ومستحيل يفكر يزوجها الحين...

عبدالعزيز وهو يحاول يقنع عبدالله: بس راشد ما ينرفض ياعبدالله.. حرام تضيعه على نوف..

عبدالله بثقة: أنا شفته راشد بنفسي كم مرة.. وأنا أشهد أنه رجّال وجاز لي.. بس يابو منصور بنتي صغيرة.. وماني بمستعجل عليها..

****************

العصر

في بيت أبو علي....

منيرة متمددة على سرير سارة..

وسارة متمددة جنبها وحاطها إذنها على بطن منيرة: وش فيه ولدس الغبي ساكت..؟؟

منيرة تضحك: والله يقول خالتي ذي أذوة وما أبغي أحاكيها..

سارة بلهفة وهي تقوم تجلس: يالله وش كثر مشتاقة لذا الصغير... ولدس وولد سالم.. أنا أشهد أن غلاه ما ينلحق..

منيرة بحب: جعلني ماخلا منس ومن عينس..

وعقب كملت باستفهام: إلا ماقلتي لي وش أخبار شغلك الجديد في الوزارة اللي أنتي فيه؟؟

سارة بلهجة اعتيادية: زين لو أن الله يفكنا من شر حمد..

منيرة باستفسار: من حمد ذا؟؟

سارة بنفس اللهجة الاعتيادية: واحد من جماعتنا.. حمد ولد راشد بن فهد اللي خواته وضحى ونورة.. عرفتيهم؟؟؟

رماني حظي أكون معه في نفس الأدارة.. ناشب في بلعومي

الحين تدرين أنه احنا بنات كلنا مع بعض بس أحيانا نحتاج أوراق من السكرتير أو الطباع..

شكله مسوي رقابة على مكتبنا.. مايشوفني طلعت إلا وينط لي: وش مطلعس من مكتبس؟؟

يكون خاطري أقول له: أنت وش دخلك يالملقوف...

بس أقول له: أبي كذا وإلا أبي كذا

يقول لي بلقافته: ارجعي.. وانا باخلي المراسل يجيب لس اللي تبين...

حُميّد الملقوف ذا وأشلون يعرفني وانا بالعباة والنقاب من بين عشر موظفات معاي بالقسم ما أدري...

خنقني.. خنقني.... بصراحة ودي أشتكي عليه...لأنه متجاوز صلاحياته بواجد...بس عشانه من جماعتنا حاشمته..

منيرة باستفسار: ليه هو قل حياه عليس؟؟

سارة باستنكار: لا والله ظليمته شينه.. مؤدب.. بس لو أنه يخلي منه اللقافة.. والتدخل في اللي مايخصه..

*****************

بعد المغرب

أبو صالح نادى فاطمة تجي عنده..

فاطمة جات له وحبت رأسه وعقب جلست

أبوصالح بحنان: يبه فطوم.. ملجتج وخطوبتج الخميس إن شاء الله

فاطمة بصدمة: يبه فديتك مافيه وقت.. عقب 3 أيام بس..

أبو صالح بنفس الحنان: يبه هذي ملجة.. العرس حدديه براحتج.. وعلى فكرة ترا مهرج حطيته بحسابج خلاص

فاطمة بتوتر: مو جنه مستعيل شوي..

أبو صالح بحنان صافي: يقول عشان تجهزين لخطوبتج اللي تبينه...

بعد دقايق المكالمة الجماعية المعتادة

فاطمة بتوتر: خطوبتي وملجتي يوم الخميس

منيرة تضحك: ماشاء الله حامي حامي... أنتي وش فيهم الرياجيل عليس... هذاك اللي اسمه ثاني كان يبي يخطبس على طول

وهذا اللي مانعرف اسمه يبي يتملك على طول...

فاطمة بتوتر: خلينا من البربرة.. كنت أبي أسال أبوي عن اسمه... قال لي على الملجة ارتعبت... ما أدري وش أسوي

مها بنبرة مساندة صادقة: ولا يهمش بأرتب معش كل شي..بما إن المضلع الثالث مضلع منفوخ وتعبان..

بس أهم شيء اتصلي الحين احجزي لش كوافيرة... وبكرة بنروح الستي السنتر ندور لش فستان ونكمل اكسسوارته..

******************

راشد وعبدالعزيز طالعين من المسجد عقب صلاة العشاء

وراجعين مشي لبيوتهم

راشد بهدوء: أبو منصور وش صار على الموضوع اللي قلت لك عليه؟؟

عبدالعزيز بهدوء ممزوج بنبرة حزن: عبدالله يقول بنته صغيرة..

راشد حس بحزن عميق يغتال قلبه الرقيق: يعني موب مزوجني؟؟

عبدالعزيز بمساندة وهو يحط يده على كتف راشد: راشد يا أخوي إذا أنت مستعجل على العرس.. بنات الأجواد كثير

إذا مستعد تنطر شوي.. بأرجع أكلم عبدالله عقب فترة

راشد بحزن ونبرة غامضة: يصير خير يابو منصور.. يصير خير..

********************

بعد العشاء في مجلس سالم...

كانوا الشباب متجمعين عنده

جبر وخالد ومحمد وسعود.. ومعهم عمه فالح وولده علي..

السوالف كانت تدور بينهم..

خالد اتصلوا فيه هله.. غالية كانت تبي لها ملازم من المكتبة

خالد خلص مكالمته بصوت واطي..

وقام يستأذن..

كان أبو علي قريب منه وجنبه سعود

والأثنين يسولفون..

بينهم علاقة متينة جدا من عقب حادث سالم..

ووخالد قايم سمع أبو علي يقول لسعود: أنت منت بناوي تعرس يا أبوك؟؟

سعود رد عليه بمرح: ليه عندك مرة لي؟؟

أبو علي بنفس المرح: أفا عليك.. إذا مازوجتك من أزوج.. أزوج مندوبك لو جاني..

سعود بتقدير: وأنا أشهد أن نسبك يشترى بالذهب يابو علي..

خالد ماسمع باقي الكلام.. وطلع وهو معصب وماحد انتبه له.. لأنه أصلا كان مستأذن يطلع

(كذا يا سعيّد.. تبي تعرس وأختي قاعدة على ذكراك.. مالت عليها من ذكرى)

الكلام كان مستمر بعد خالد.....

سعود بتقدير: وأنا أشهد أن نسبك يشترى بالذهب يابو علي..

بس حد يأخذ أخته... بناتك خواتي...

أبو علي بتقدير أكبر: وأنا أشهد أنك ولدي وأنهم خواتك.. الله يكبر قدرك

**********************

خالد جاب لغالية الملازم.. وداها لها في غرفتها..

وعقب راح لدانة في غرفتها

كان يبي يفضي شوي حرته من سعود..

دخل على دانة لقى مزنة عندها...

خالد بنبرة غامضة: مزنة لو سمحتي روحي لغرفتش..

مزنة بابتسامة: ياسلام على الاسرار يعني مايصير أسمع لي كلمتين على الطاير..

دانة ظنت أن خالد يبي يقول لها عن الموضوع اللي هو كلمها عنه قبل ..موضوع حبه الغامض..

وجهت كلامها لمزنة برقة: مزنة ماعليه لو سمحتي... روحي خليني أنا وخالد شوي

مزنة تطلع وتسكر الباب: لنا الله.. ياأهل الاسرار..

بعد الغياب/ الجزء المئة وخمسة عشر

#أنفاس_قطر#

خالد جاب لغالية الملازم.. وداها لها في غرفتها..

وعقب راح لدانة في غرفتها

كان يبي يفضي شوي حرته من سعود..

دخل على دانة لقى مزنة عندها...

خالد بنبرة غامضة: مزنة لو سمحتي روحي لغرفتش..

مزنة بابتسامة: ياسلام على الاسرار يعني مايصير أسمع لي كلمتين على الطاير..

دانة ظنت أن خالد يبي يقول لها عن الموضوع اللي هو كلمها عنه قبل ..موضوع حبه الغامض..

وجهت كلامها لمزنة برقة: مزنة ماعليه لو سمحتي... روحي خليني أنا وخالد شوي

مزنة تطلع وتسكر الباب: لنا الله.. ياأهل الاسرار..

دانة ألتفت على خالد وقالت له بحنان: وش عندك حبيبي؟؟

خالد اللي كان يروح ويجي.. قال لها في جملة واحدة حادة: سعود بيتزوج..

دانة شهقت بعنف..شهقة حادة مرعبة..

خالد ارتعب من شهقتها الغير طبيعية وهو يقرب منها ويحط يده على كتفها: بسم الله عليش.. بسم الله عليش

دانة كانت مستمرة في الشهقات العنيفة المتتابعة.. ووجهها يتحول للون الأحمر دلالة عجزها عن التنفس..

خالد احتاس (أنا وش سويت؟؟ وش سويت؟؟)

طلع يركض لمزنة.. وسحبها سحب وهو يركض راجع لغرفة دانة

اللي كانت بعدها جالسة وتشهق.. ووجهها يقلب من الأحمر للازرق دلالة الاختناق.. مزنة بسرعة خذت كأس الماي اللي كان على الكوميدنيو... ورشته بشكل مباشر على وجه دانة..

دانة شهقت شهقة طويلة.. وعقبه رجعت تتنفس.. ووجهها يرجع للونه..

لكنها لأول مرة من طلاقها تعبر عن مشاعرها بصراحة قدام أخوانها لأنها بدت تبكي بهستيرية

خلاص ماعادت مستحملة.. طاقة التحمل انتهت..

انتهت..

انتهت..

"هذي أخرتها ياسعود..

هذي أخرتها

تبي تتزوج"

مزنة ألتفت على خالد بغضب: أنت وش قلت لها؟؟

خالد بارتباك وعينه في الأرض : قلت لها إن سعود بيتزوج.. هو حتى يوم طلقها مابكت كذا..

خالد ألتفت على دانة اللي كانت تبكي بشكل هستيري وهو يقول بحنان: أنا أسف يادانة سامحيني.. ماعرفت إنش بتتضايقين كذا

مزنة بغضب: ماعليه خالد لو سمحت اطلع برا..

خالد بحزن: بس..

مزنة قاطعته بحدة: لو سمحت خالد خلنا بروحنا

مزنة طلعت خالد وقفلت الباب

و رجعت تبي تشوف دانة وتهديها

فوجئت إن دانة ماسكة موبايلها وتكلم بصوت متماسك وهي تدفن كل مشاعرها داخلها وتطمرها طمر: تهاني...قولي لدكتور سعد يجيب المملك بكرة.. أنا موافقة عليه..

وأبي الملكة بكرة... بكرة مهوب أي يوم ثاني

*****************

في الليل متأخر.. عائشة تدخل جناح ثاني..

لقته في الحمام يأخذ له شاور..

جلست تنطره.. لحد ماطلع..

ثاني أول ماطلع وشاف عائشة جالسة ابتسم: شنو الشيء المهم اللي ماخلي حضرة الدكتورة تنطر لحد ما ألبس على الأقل شيء يسترنا..

عائشة بمرح: عدال على الجسم بس..

ثاني وهو يطالع جسده العاري في المرايه ويمشط شعره: بذمتج ليه شفتي حد عنده عضلات مرتبة مثل عضلاتي..

كانت عائشة بتتكلم لكن ثاني قاطعها بابتسامة: غير حبيب القلب عبدالله... هذا مالنا مجال ننافسه عندج

وعقب كمل وهو يرش الديودرانت بكثافة على كل جسمه: المهم شنو سبب تشريف جناحنا بالزيارة الكريمة؟؟

عائشة باستفسار: أشلون قدرت تقنع فاطمة وأهلها بالموافقة مع إن البنية كانت رافضة بالمرة يوم كلمتها

ثاني مارد عليها راح لغرفة الملابس.. لبس ثم رجع عليها وهو يقول بثقة: ليه وأنتي تصدقين أنه فيه وحدة ترفضني... هذي مابعد جابتها أمها

عائشة بتردد: بس ثاني...

ثاني بثقة وهو يتناول سجادته يبي يصلي له ركعتين قبل ينام: مافيه بس.. خلاص ملكتي وخطوبتي يوم الخميس.. وش أنتي متشككة فيه يعني..؟!!

فاطمة ذي تحب يدها مقلوبة بس..وتسجد كل ليلة سجدتين شكر لربي اللي أرسلني لها..

*******************

السهرة شكلها مطولة في غرفة دانة..

دانة تعتصم بسكون مرعب الآن..

من بعد ماسكرت من تهاني..

ماتكلمت إلا مع تهاني اللي رجعت كلمتها بعد أقل من 10 دقايق.. وتقول لها خلاص د سعد جاي بكرة بالمملك عقب صلاة العصر...

دانة نزلت لأبوها وقالت له...

أبو خالد ثار ثورة هائلة.. وكان ماسك نفسه لا يضرب دانة

على تصرفها من وراه

لكن دانة صارت تعرف تمسكه من يده اللي توجعه: جبرتني على ولد أخيك.. وأخرتها طلقني.. خلني الحين أختار اللي انا مقتنعة فيه.... وبعدين د سعد أنت كنت مقتنع فيه لما جاء

وإلا يعني عشان أنا وافقت صار شين..

يعني مايرضيك إلا أني أكون مجبورة كل مرة

أبو خالد وافق غصبا عنه... لازم يحسس الرجّال إن الموافقة جات برضاه حفاظا على ماء وجهه..

مزنة كانت تحاول تقنع دانة إنها تتمهل شوي..

لكن دانة خلاص صابتها حالة تصميم وعند غير طبيعية من لما عرفت إن سعود يبي يتزوج:

ماعاد باقي لي الا كرامتي يامزنة

سعود داس على كل شيء

داس على قلبي

داس على طموحاتي

داس على مشاعري

داس حتى على انسانيتي...

ماعاد باقي إلا شوي ذا الكرامة هي اللي رابطتني بالحياة

أنا لازم أتزوج قبل ماهو يتزوج

مزنة وهي تحاول تهديها: بس هذي حياتش.. مايصير تقررين تتزوجين واحد عشان تقهرين واحد ثاني...

دانة بنفس سكونها المرعب: أنا ماأبي أقهر سعود.. لأنه لو كان بينقهر ماكان فكر يتزوج... سعود خلاص قرر يقطع كل اللي بيننا.... ومن باعنا بعناه لو كان غالي...

*******************

ثاني يوم..

مها وفاطمة راحوا السيتي سنتر يدورون لفاطمة فستان...

حصلوا لهم فستان راقي جدا وناعم لونه اورانج فاتح مع أخضر..

اشتروا معاه صندل ذهبي.. وكملوا باقي اكسسوارته

ورجعوا لبيت منيرة عشان منيرة اللي كانت تعبانة شوي تشوفه..

بس قبل بيت منيرة مروا حجزوا التصوير وكوشة ناعمة والضيافة والعشاء كله من محل واحد عشان يريحون رووسهم..

*******************

سارة في مقر شغلها...

كان فيه شوي أوراق تبي تصورهم..

طلعت من مكتبها تبي تروح لغرفة الطباعة...

فوجئت بحمد واقف في وجهها.. وهو يقول بحزم وهو منزل رأسه: وين بتروحين يا بنت فالح؟؟

سارة بحرة (وش بنت فالح ذي نكون قاعدين عند خيام هله)

لكنها ردت بصوت واطي وهي تبعد عنه: بأروح مكتب التصوير... عندي أوراق أبي أصورهم..

حمد وهو منزل عينه: عطيني إياهم.. بأخلى المراسل يصورهم ويجيبهم لباب مكتبكم..

سارة بحرج: مشكور.. أنا بأسوي شغلي بروحي..

حمد بحزم: ماعليه لو سمحتي عطيني إياهم..

سارة بحزم وهي ترفع رأسها غصبا عنها وتحط عينها بعينه: لو سمحت أستاذ حمد.. حنا في مكان عمل.. مافيه داعي تجاملني أو أجاملك..

كلاهما انلسع وبشدة.. هو من حدة نظرتها... وهي من اهتمام نظرته..

سارة ارتبكت وحمر وجهها وولع تحت نقابها.. تجاوزت حمد.. وتركته واقف مرتبك في الممر وتوجهت لمكتب التصوير..

***************

خالد من لما عرف باللي دانة سوته

وإنها قررت تتزوج سعد

عشان بلغها إن سعود بيتزوج رغم أنه مو متأكد من الخبر

وهو حاس بذنب عظيم...

سعد هذا بنظاراته وثقل دمه مادخل مزاجه

شافه مايستاهل أخته.. مع انه عجب أبو خالد

وشافه رجال ثقيل وتكانة ويملأ العين برزانته وكلامه الموزون..

خالد اتصل في محمد وقال: له بامرك عقب الدوام في بيتكم..

قال له محمد بمودة ومرح: تعال تغدى معي.. سعود اليوم في الزام ومهوب طالع إلا بكرة.. وماعندي حد يتغدى معي.. البنات يسوون ريجيم.. وامي ماتاكل من أكلنا..

في مجلس أبو سعود الخارجي

الشباب قاعدين عقب الغداء

خالد متوتر...

ومحمد مريح ومتكي على المساند ويقول بنعاس: تدري خويلد أنت ووجهك أن وقتك غلط.. رأسي ثقيل وأبي أنام عقب ذا الغدا الثقيل.. أنا بأغط لي شوي..

خالد بنفس التوتر: محمد صحيح أن سعود بيتزوج؟؟؟

محمد ضحك ضحكة قصيرة نعسانة: مهوب حوله.. حضرة النقيب عايش على أطلال ذكرى أختك.. ومستحيل يتزوج.. حاب يعذب نفسه ويعيش فيلم هندي..

خالد شهق وقال برعب: والبارحة يوم قال له أبو علي أنه بيزوجه.. وهو قال له أنه نسبك ينشرى...

محمد اللي نط من شهقة خالد: سوالف مزح.. أبو علي وسعود ربع.. وسعود قال لأبوعلي عقب منت طلعت: وهو حد يأخذ خواته..

خالد بتوتر وانفعال: لا إله إلا الله.. لا إله إلا الله... وش سويت أنا.. وش سويت؟!!

محمد تحفزت مشاعره وقفز انفعاله للذورة: خويلد أنت وش أنت مهبب؟؟

خالد حكى لمحمد باختصار اللي صار...

محمد عصب لأبعد حد : دانة مستحيل تأخذ حد غير سعود مستحيل... وأنت ياخويلد دواك عندي بس مهوب ذا الحين

ما تخاف الله تكذب على سعود.. مالقيت تكذب الا على سعود..

خالد توتر وارتبك.. محمد بالذات مايقدر يزعل منه ولا يحبه يزعل عليه...

موعد الملكة ماعاد عليه الا حوالي ساعتين ومحمد يتصل على سعود في المعسكر وجواله مسكر..

اتصل عليه 20 الف اتصال وجواله مسكر....

محمد صار مثل الأسد الحبيس مو عارف أشلون يتصرف

أخرتها هداه باله يتصل على جابر

- جابر وينك؟؟ (بدون أي سلامات)

- في البيت... (بتوتر)

- تكفى ياجابر تكفى طالبك ( رجاء حاد موجع)

- أبشر بسعدك (برجولة واعتزاز)

- أنا أتصل بسعود وجواله مقفول....

- قاطعه جابر: اليوم عندنا استعراض عسكري مهم.. حتى أنا المفروض هناك... بس أصبع يدي انكسرت في تدريبات أمس فأعفوني اليوم..

- جابر تكفى.. روح لسعود في المعسكر وقل له أنه لازم يكلمني الحين... فيه مصيبة بتصير عقب صلاة العصر لازم يجي يمنعها..

- لحول وشي مصيبته (جابر بقلق)

- تكفى ياجابر مافيه وقت.. لازم تروح له الحين.. انا ماابي ابعد من الدوحة والا كان رحت له بنفسي.. عدا انهم مهوب مخليني ادخل المعسكر..

- ابشر.. ابشر (قالها جابر وهو ينط لسيارته)

خلال 40 دقيقة كان جابر يوصل المعسكر

وينزل ركض لسعود...

سعود لما شافه ابتسم: غريبة أنت مهوب معفى اليوم..

جابر بنفس مقطوع: هاك جوالي كلم محمد..

سعود برعب: ليه حد من هلي فيه شيء؟؟

جابر وهو مو قادر يتنفس: كلمه واسمع منه...

سعود دق على محمد بسرعة... ومحمد فجعه بالخبر اللي ذبحه

(ملكة دانة بعد حوالي ساعة)

سعود تعطل مخه عن التفكير.. متى؟؟ وليه؟؟ وكيف؟؟ وأشلون؟؟

مخه فيه شيء واحد

دانة وبس

دانة وبس

دانة وبس

توجه ركض للقائد يستأذنه في الخروج..

كان جواب القائد بحزم عسكري شديد:

مستحيل.. مستحيل..

اليوم عندنا استعراض عسكري أمام قائد القوات المسلحة

ومستحيل نأذن لأي ضابط داخل في الاستعراض

وخصوصا أنك أنت بيكون لك مشاركة خاصة في الرماية

يعني

مستحيل أأذن لك..

ولو فكرت أنك تسويها وتطلع أنت عارف العواقب..

والالتزام العسكري موب لعبة..

قبل صلاة العصر بشوي..

عزوز خلص محاضراته.. وطالع للمواقف ومعاه صديقه الجديد سلطان..

سلطان بود: أنا بأوصلك..

عزوز بنفس الود: جعلك سالم... عمي أبو محمد ينطرني في المواقف..

سلطان ابتسم: تدري أنك أغرب شاب قطري..!!

فيه قطري يوصل 18 سنة مايعرف يسوق سيارة.. أنا خذت رخصتي وأنا عمري 16 سنة استثنائي..

عزوز بابتسامة وهم يمشون: أنا حالة خاصة.. !!

وعلى العموم أبوي أول مارجع ودرا أني صرت في الجامعة.. ياهو تفاجأ وانبسط..

أول شيء سواه شرا لي سيارة.. وسجلني في مدرسة سواقة..

السيارة واقفة في الحوش.. ومدارس السواقة خبرك زحمة... بس خلاص حصلت لي موعد مبكر

وبأبدأ الحصص من الأسبوع الجاي...

سلطان باستغراب: أشلون يوم أبوك درا أنك في الجامعة ؟؟.. ليه هو ماكان يدري؟؟

عزوز بهدوء: وش فيك سلطان؟؟ أنت كنت تدري أن أبوي كان مفقود في العراق وتوه رجع..

وهو يوم راح أنا في grade11 مادرا أني قدمت البكلوريا وسجلت جامعة..

سلطان دق على رأسه: صدق أني مسبه...

عزوز بود: زين لا تنسى تحضر أنت والوالد وأخوانك عشاء أبوي الأسبوع الجاي في الشيراتون..

سلطان بنفس الود: أكيد ولا يهمك.. احنا نعزم.. مااحنا بضيوف...

وعقب كمل باستفسار: إلا تعال عبدالعزيز... ليه ماجيت البارح.. حفل التعارف والتكريم اللي المدينة التعليمية سوته لكل جامعاتها؟؟

عزوز بابتسامة: يا ابن الحلال أنا أي وقت فاضي عندي أبي أقعده مع مجود.. خذ قلبي ذا الولد.. القعدة معه تسوى عندي ألف حفل..

سلطان يضحك: يوم أنك تحب البزران ذا الكثر.. تعال خذ لك شوي من الشواذي والسيابيل اللي عندنا..

عيال أخواني وخواتي.. إذا تجمعوا عندنا سوا لنا مستشفى مجانين...

بس جد الحفل البارح فاتك.. كان شيء..

شنو تنظيم .. وشنو فعاليات..

اعرضوا لنا نماذج من أعمال الطلاب في مختلف الجامعات

أما طلاب فرجينيا كومنولث بدعوا أمس...

تخيل فيه طالبة عندهم عمرها 16 سنة بس.. مصممة برنامج تصميم ثوري على الكمبيوتر.. يقولون إن شركات الكمبيوتر العالمية تتنافس عليه: مايكروسوفت والماكنتوش..

بس هي مارضت تبيعه وسلمته للمدينة الجامعية تتصرف فيه..

ماشاء الله تبارك الله... هذا المخ موب مخي..

هذي 16 سوت كذا على الثلاثين وش بتسوي؟؟

عزوز حس بألم غير مفهوم في قلبه.. لأنه عرف سلطان عن من يتكلم..

سأل سلطان: والبنت هذي حضرت بنفسها؟؟ وإلا بس عرضوا تصميمها؟؟

سلطان بلهجة اعتيادية: لا حضرت نفسها.. بس سبحان الله مخ مختلف وشكل مختلف..

سلطان قال كذا وسكت.. لأنه أصلا مايحب يتكلم في أشكال البنات..

بس عزوز فهم هو وش يقصد.. والفهم هذا بعث ألم حاد في روحه...ألم شديد الوطأة والقسوة والمرارة..

كانوا وصلوا للمواقف خلاص... سلموا على بعض وتفرقوا..

عزوز في السيارة جنب أفضل ساكت..

أفضل بود: ئزوز .. وش فيك ساكت؟؟

عزوز بهدوء: مافيني شيء عمي.. تعبان شوي بس...

عزوز موب مستحمل لازم يطلع اللي في خاطره...بيموت من احساس الغيرة على ديمة اللي اجتاحه بعنف

" بس هو ماله حق يفرض على ديمة شيء!!"

(لا أنا لي ألف حق!!)

طبع مسج وأرسله:

" ديمة لو سمحتي

تجمع مفتوح مثل التجمع اللي في احتفال أمس

لا عاد تحضرينهم"

بعد دقيقة الرد:

" أنا ممكن أعرف أنت لمتى

وأنت تفرض قراراتك علي؟"

تنهد عزوز وكتب:

" هالمرة أنا ما افرض

أنا أطلب وأقول لو سمحتي"

رد ديمة

" وممكن أعرف السبب؟؟"

رجع عزوز يتنهد وكتب

" عشان خاطري ديمة

لو لي خاطر عندج"

رد ديمة

" إن شاء الله.. تم"

خلاص عزوز أكتفى وفهم وابتسم..

مازال عند وعده أنه مايتجاوز حدوده..

بس اللي في القلب في القلب..

وباقي سنوات مو قليلة لين يكون له حق أنه يظهر مشاعره بصورة مقبولة للمجتمع...

لأنه مستحيل يكون فيه علاقة مقبولة اجتماعيا

بين شاب في الـ18

وبنت في الـ16

" بأصبر ياديمة

بأصبر..

صبرت سنين وكتمت وأنا مراهق

يعني ماني بقادر أصبر كم سنة بعد وأنا رجّال"

********************

سعود دق على محمد بسرعة... ومحمد فجعه بالخبر اللي ذبحه

(ملكة دانة بعد حوالي ساعة)

سعود تعطل مخه عن التفكير.. متى؟؟ وليه؟؟ وكيف؟؟ وأشلون؟؟

مخه فيه شيء واحد

دانة وبس

دانة وبس

دانة وبس

توجه ركض للقائد يستأذنه في الخروج..

كان جواب القائد بحزم عسكري شديد:

مستحيل.. مستحيل..

اليوم عندنا استعراض عسكري أمام قائد القوات المسلحة

ومستحيل نأذن لأي ضابط داخل في الاستعراض

وخصوصا أنك أنت بيكون لك مشاركة خاصة في الرماية

يعني

مستحيل أأذن لك..

ولو فكرت أنك تسويها وتطلع أنت عارف العواقب..

والالتزام العسكري موب لعبة..

سعود تنهد وشد قامته بالوقفة العسكرية وقال بحزم واحترام: إذن اسمح لي سيدي أقدم استقالتي فورا..

القائد بدهشة حادة: كذا ياحضرة النقيب.. هذي أخرتها

العلاقة بيني وبينك أكبر من مجرد علاقة بين قائد وضابط عنده..

أنا درستك في الكلية... وأنا طلبتك أنت بالذات عشان تتعين في كتيبتي.. وأنا اللي رفعت لك ترقياتك كلها استثنائيا

علاقتنا لها 12 سنة.. 4 في الكلية.. و8 في الكتيبة..

تكون هذي أخرتها...

سعود باحترام: اسمح لي سيدي.. بس الموضوع عندي حياة وموت.. وأنا مستحيل أخلي شيء يقهرني..

وأنت علمتنا إن اللي يخلي المستحيل يوقف في وجهه.. مايستحق شرف العسكرية

وقتها تنحنح جابر اللي كان واقف ساكت على جنب.. وقال باحترام:

سيدي اسمح لي أدخل بدل سعود في الاستعراض

الكسر في أصبع يدي اليسار الصغير.. ماله علاقة بشيل الرشاش...

وأنا أصلا تدربت مع الشباب على الاستعراض لحد أمس..

صحيح أنا ماني بمثل سعود في الرماية

بس أوعدك أبيض وجهك..

القائد كان ينقل بصره بين وجه جابر المرتسم عليه الرجاء.. ووجه سعود الغامض اللي يمور بالانفعالات... ابتسم وقال: روح ياسعود.. وانت ياجابر تجهز تدخل مكان سعود

وعقب كمل بحزم: بس حط في بالك ياسعود.. إنك بترجع بكرة الساعة 6 الصبح للمعسكر وأنك مُعاقب ومحجوز حجز عسكري لمدة شهر ماراح تطلع فيه..

سعود وهو يدق التحية العسكرية: احجزني سنة... بس خلني أطلع الحين...

وطلع سعود يركض لسيارته وهو بلبسه العسكري الكامل.. لبس الاستعراض..

********************

عبدالله نازل من الطابق الثاني متوضي يبي يروح لصلاة العصر..

مر أول على جواهر: حبيبتي وش فيهم العيال تأخروا اليوم؟؟

جواهر وهي ترضع ماجد وترد برقة: نوف عندها اليوم دورة في الجامعة بتخلص المغرب..

وعزوز على وصول.. توه مكلمني.. بس قال بينزل في المسجد يصلي وعقب بيجي للبيت..

عبدالله بحزم: عزوز خلاص باواجهه في المسجد... بس نوف أنا ما أحب إنها تقعد في الجامعة للمغرب..

جواهر بعذوبة: حبيبي.. الدورات والمحاضرات موب على كيفها... وبعدين بنت خالي حصة معها.. وبتجيبهم أم فهد..

عبدالله بنفس الحزم: ماعليه جواهر.. ماتقعد للمغرب إلا للضرورة القصوى.. ويكون عندي خبر قبلها عشان أنا اللي اجيبها..

جواهر وهي تبتسم: إن شاء الله حبيبي ولايهمك..

عبدالله بحزم رقيق: أنا ما أبي أكون متحجر وإلا قاسي.. بس أنتي تسمعين بلاوي.. والبنات تربيتهم موب سهلة.. ونوف في سن حرجة.. ولازم نكون منتبهين لكل شيء..

جواهر بتقدير كبير وحب أكبر: وأنا أشهد أنك ماقصرت في تربيتها..

عقب عبدالله ابتسم: عشان تشوفين أن تربيتي تجيب نتائج مبكرة.... بنتج صارت تنخطب!!!

جواهر بصدمة: من جدك؟؟

عبدالله وهو يستعد يطلع: والله العظيم..

جواهر باستفسار: ومن اللي خطبها؟؟

عبدالله بلهجة اعتيادية: راشد رفيق عبدالعزيز.. عبدالعزيز هو اللي فتح معاي الموضوع

جواهر بحذر: وأنت وش قلت؟؟

عبدالله: رفضت طبعا.. نوف بعدها صغيرة..

جواهر بنفس الحذر: نوف فعلا بعدها صغيرة.. بس راشد أنا أعرفه من وهو صغير... شاب ما ينرفض..

عبدالله بهدوء: يعني وش كنتي تبيني أرد عليه... تعال أزوجك..

جواهر بهدوء: لا طبعا.. بس كان وعدته خير.. لين تخلص نوف جامعتها..

عبدالله بمنطقية: نوف تبي لها 3 سنين لين تخلص الجامعة... تبين نربط ولد الناس واحنا موب عارفين وين النصيب..

جواهر تبتسم: اللي تقوله تم حبيبي... ماعقب رايك راي

عقب صلاة العصر

مجلس أبو خالد

الدكتور سعد وصل ومعاه المملك..

محمد قاعد برا بيت عمه في سيارته

وخالد يروح ويجي ويدخل ويطلع وكان في غاية التوتر و الهم بيكسر ظهره..

حاسس بنار محرقة تحرق أطرافه..عقله..مشاعره..وخلايا ه

وسعود مابعد بين ولا طل.. لأنه حرك من المعسكر من ربع ساعة بس..

في نفس الوقت

وفي مكان ثاني في بيت أبو خالد

في غرفة دانة

دانة كانت تبي بكاء مر موجع يائس عميق

لم يكن مجرد بكاء.. كان شيئا يتجاوز البكاء

شيء أشبه بالأنين الحاد المؤلم المنتزع من عمق روح مدمرة لبقايا حطام إنسان..

مزنة اللي كانت بطبعها دمعتها بعيدة.. بدت تبكي من تأثرها من بكاء دانة المؤلم: دانة حبيبتي ليش تبكين الحين؟؟ مهوب سويتي اللي في راسش؟؟

دانة من بين عبراتها وأنينها: خليني أبكي على خسارة سعود قبل أصير حلال غيره..

خليني استغل الدقايق الأخيرة أبكي عليه قبل يصير حرام علي أفكر فيه وأخون الرجّال اللي بأصير مرته..

خليني أبكي في هالدقايق بكاء لو بكيته عمري كله ماكفاني..

مزنة برجاء باكي: تكفين دانة.. تقدرين تتراجعين... حرام اللي تسوينه في روحش.. حرام

دانة بوجع: خلاص مزنة.. ماعاد للحكي فايدة...خلاص

في المجلس

فتح الشيخ دفتره.. وقال للدكتور سعد اللي كان معه أخوانه الاثنين: عطوني بطاقة المعرس.. وبطاقات الشهود..

سعد عطاه بطاقته..

ثم واحد من أخوانه طلع بطاقته...

وتوقعوا إن خالد بيطلع بطاقته.. عشان يعني من باب الذوق

واحد من هنا وواحد من هنا

لكنهم شافوا إن خالد كان سرحان في ملكوت ثاني...

فطلع أخوه الثاني بطاقته وحطها على دفتر الشيخ..

الشيخ بوقار: بسم الله الرحمن الرحيم.. توكلنا على الله..

وكان على وشك يطلب بطاقة دانة

صوت حاد حازم : وقف ياشيخ لا تكتب شيء

الكل ألتفتوا ناحية الصوت...

وأبو خالد تغيّر وجهه من الغضب

وهو يلتفت ناحية خالد اللي كان واقف فوق رأس الشيخ بحزم ويقول: أقول يادكتور سعد..

مالك مرة عندنا توكل على الله..

سعد بغضب: ليه أنتوا شايفيني لعبة عندكم..

خالد بحزم وبرود: أقول توكل على الله.. لا تتأخر على العيادة المسائية..

أبو خالد بغضب: خويلد ياللي ماتستحي.. ماكن لك كبير.. ولا كن لي قدر ولا حشيمة...

خالد بنفس بروده رغم أنه يذوب توتر في داخله: يوم ملكة دانة الأولية.. طلعت الرشاش بس ماسيحت دم حد...

ترا ماعندي مانع أطلع أجيبه.. ونسيح لنا دم ذا المرة بحق وحقيق..

أبو خالد بغضب: خويلد...

خالد بحدة وعيونه تنقلب من الغضب وبروده كله يتبخر: شوف يابو خالد... ذا الشنب على مره.. كن ذا الرجال خذ الدانة.. خله يقوم يتوكل على الله.. قدام نتذابح..

سعد وأخوانه نطوا واقفين واطلعوا من الزعل برا لسياراتهم اللي كانت واقفة قدام البيت..

وأبو خالد يلتفت بغضب حاد على خالد..

وخالد يقول له بحدة أكبر وقبل مايقول أبوه شيء: لا تقول شيء.. وإلا والله ماعاد تشوف رقعة وجهي لين أموت

في خلال ثواني كان محمد اللي كان واقف برا يدخل عليهم ونفسه متقطع..ووجهه أحمر.. وقلبه بيوقف من الانفعال

محمد لما شاف الرياجيل طلعوا... حسب أن الملكة تمت

لأنه كان قايل لخالد انه واقف برا..

واذا سعود ماقدر يجي على الوقت.. محمد بيدخل ويحير دانة هو لين يجي سعود..

محمد برعب بأنفاسه المتقطعة وكلماته المتناثرة: دانة تملكت خلاص..؟؟

خالد بنبرة غامضة: لا..

الشيخ قاطعهم وهو يقول بارتباك: زين اسمحوا لي أنا بأروح..

خالد بحدة وغضب هادر: اقعد ياشيخ..

أنت جيت تملك اليوم.. ومنت بطالع إلا وأنت مملك..

سعود بياتي.. وبنقعد ننتظره إن شاء الله مايأتي إلا بكرة الصبح..

خالد كان مولع.. ويتنافض من الانفعال.. وماكان حد يقدر يكلمه..

محمد قعد جنب عمه.. وهمس له: وش اللي صار؟؟

ابو خالد حكى لمحمد كل شيء من بين اسنانه وبغضب مكتوم.. وابتسامة محمد تتسع ويقول في نفسه (كفو يابو هادي.. كفو)

بعد دقايق كان سعود يدخل عليهم مثل الاعصار الكاسح..

مالقى في المجلس إلا عمه وأخوه وولد عمه ومعهم الشيخ.. مادرا وش اللي صار.. هل الملكة صارت؟؟

وإلا الرياجيل مابعد جاو؟؟

حس إن روحه تتأرجح على حد سكين محمي..

إن الباقي من حياته كلها يتوقف على الكلمة اللي بيسمعها

من الناس اللي جالسين قدامه

بنفس مقطوع: شاللي صار؟؟

خالد بنفس حدته وغضبه الكاسح: سعود هات بطاقتك..

سعود مو فاهم: شالسالفة؟؟

خالد بحدة مرعبة: أنت تبي مرتك وإلا ماتبيها؟؟

تراكم أقرفتونا بذا السالفة..

تبيها أخلص وهات بطاقتك... ماتبيها اطلع ولا عاد أشوف وجهك في بيتنا..

سعود بغضب: خويلد احشم اللي اكبر منك..

محمد نط واقف عشان يقطع العراك اللي شكله بيبدأ..

وهو يطلع بطاقته ويحطها على دفتر الشيخ ويقول: الشاهد الأول

ثم ألتفت على سعود وهو يقول بهدوء: أبو سعيد... خالد اليوم رايته بيضا.. خلّص وحط بطاقتك...

سعود طلع بطاقته وحطها

وخالد طلع بطاقته وحطها على دفتر الشيخ وهو يقول: الشاهد الثاني..

الشيخ قال: بسم الله الرحمن الرحيم.. توكلنا على الله.. وين بطاقة العروس؟؟

طلعها أبو خالد من جيبه وعطاها الشيخ..

أبو خالد مو فاهم شيء...بس حاسس بسعادة عميقة مايعرف سببها

سبحان الله على قد ماكان حاسس بالضيق وهو يبي يطلع بطاقة دانة يوم كان سعد قاعد...

على قد ماهو مبسوط الحين وهو يطلعها عشان ترجع لسعود مرة ثانية..

الشيخ خلص تسجيل البيانات: ودوني للعروس أخذ موافقتها..

الشيخ دخل للمقلط.. وخالد دخل داخل البيت

وطلع لدانة في غرفتها.. لقى وجهها متنفخ من البكاء.. وشكلها على وشك الانهيار.. مثل عود يابس خالي من الحياة ينتظر أقل هزة عشان عشان ينحني وينهي رحلته..

لما شافها حس إن كل الحدة اللي بداخله تبخرت مثل قطعة ثلج على صفيح ساخن وهو يشوف شكلها المعذب المحطم..

همس بصوت واطي حنون: دانة..

دانة وقفت بتعب وكأنها ماتقدر تحمل جسدها من الارهاق

ورمت نفسها على صدره وبكت بكاء مكتوم حزين..

تركها خالد تبكي شوي وهو حاضنها بحنان فياض

ثم قال لها بحنان: ألبسي عباتش

لبست بآليه مريرة..

ثم مسك يدها

ونزل فيها تحت..بدون مايقول لها شيء..

دانة سارت معه.. مثل الذبيحة اللي تُقاد للمسلخ..

نحّت كل مشاعرها جانبا وهي تقرر إنها تعيش بعقلها

وتدفن قلبها وكل مشاعرها من هذي اللحظة..

وصلت المقلط.. وهي تحس إن روحها في مكان ثاني..

وإنه فقط جسدها هو المتواجد هنا..

سألها الشيخ: توافقين يا بنتي على سعود بن سعيد الـ

دانة حتى الاسم ماكانت تسمعه.. ماكانت تسمع شيء..

روحها موجوعة.. ومشاعرها ثكلى..

وألمها كتم كل أنفاسها بمرارته..

كانت تبي تهرب من كل شيء

من هذا المكان.. ومن نفسها.. ومن ضعفها..

(مستحيل أوافق.. مستحيل!! أنا وش كنت ناوية أسوي بروحي)

خالد بحنان: دانة الشيخ يقول موافقة على سعود..

دانة وهي تنتفض بحدة (الظاهر أني استخفيت.. يتهيأ لي إن اسم سعد صار سعود) : وش تقول؟؟

الشيخ بهدوء: أقول يا بنتي توافقين على سعود بن سعيد الــ؟؟

دانة شهقت بعنف..

وخالد برعب: تكفين دانة مهوب وقته تشاهقين علينا... تبين سعود وإلا ماتبينه؟؟

دانة مو قادرة تتكلم.. والصدمة العذبة غير المتوقعة تشل تفكيرها

وسعود ذبحه التوتر داخل المجلس (وش فيهم تأخروا؟)

دانة بخفوت: بس أشلون خالد أشلون؟؟

خالد برجاء مخلوط بالحدة: تكفين دانة خلاص..

خلصوا ذا الفيلم الهندي..

أنتي ذايبة هنا.. وهو ذايب هناك.. خلصونا

وسالفة إنه بيعرس مهيب صحيحة أنا اللي فهمت السالفة غلط..

دانة تنهدت بعمق وهي تقول من أعماقها الموجوعة: موافقة ياشيخ..

أشر لها الشيخ توقع.. وقعت وهي ترتعش.. وعقب ماقدرت توقف ورجولها ماتحتمل ثقل جسدها

فجلست..

والشيخ رجع داخل..

وخالد قعد مع دانة..

سعود أول ماشاف الشيخ نط واقف

وقلبه فيه طبول حرب مجنونة..

الشيخ ابتسم وهو يقول: بارك الله لكما وبارك عليكما.. وجمع بينكما في خير..

محمد حضن سعود بقوة.. وسعود همس له: لا تقصر في الشيخ..

عقب ألتفت على عمه وحب خشمه.. وعمه يقول بابتسامة: مبروك ياولدي.. سبحان الله.. سبحان الله.. اللي فرقكم بدون سبب.. ورجعكم بدون موعد..

سعود باحترام: يبه أبي أشوف دانة..

سعود بيموت يبي يشوفها.. يبي بس يملأ عينه منها

(يالله وش كثر اشتقت لها.. يالله..!!)

يبي يتأكد أنه فعلا الدانة رجعت له

صار حقه يشوفها.. ويمسك يدها

ويعبر عن شوقه المر الهادر لها

(وأخيرا يادانة وأخيرا)

أبو خالد بتردد: بس يا أبيك..

سعود برجاء: يبه دانة مرتي أول وتالي..

أبو خالد دق على خالد.. وخالد قال له أنه هو ودانة بعدهم قاعدين في المقلط.. قال له أبوه: تعال أنت وخل دانة في المقلط..

***************

بيت سالم...

منيرة قاعدة تدرس..

وسالم في الحمام يأخذ له شاور.. عشان يطلع لشركته..

رن موبايلها.. طالعت الاسم وابتسمت: هلا بخالة الشيخ مبارك..

سارة تبتسم: عدال على ذا البروك.. يكون ويليام ولد تشارلز وديانا.. كله بروك ولد منور وسويلم

منيرة تضحك: بسم الله على ولدي تشبهينه بذا الكافر..

سارة تضحك: الزبدة.. بتجينا الليلة وإلا لا؟؟

منيرة برقة: ما أعتقد... عندي دراسة.. وبعدين ذا اليومين مشغولة بخطوبة فاطمة..

سارة بتحسر: كنت أبي أسولف معس شوي..

منيرة بعيارة: ماعاد عندس من السوالف إلا حمد وشغلس..

سارة بمرح: ياختي اذكري شيء عدل مالقيتي إلا حُميّد.. الله يقرفه..

منيرة باستفسار ليه وش سوى اليوم؟؟

سارة بلهجة اعتيادية: اليوم وعلى غير العادة مر بسلامة بدون لقافته المعتادة.. انا بصراحة كنت مستغربة..

بس طبعا مستحيل يخلص اليوم ماغثني..

خلص الدوام..

وقفت برا أنطر عليان يجيني..

الأخ قاعد في سيارته مسوي رقابة علي..

جاء واحد من الموظفين بس شكله في ادارة ثانية

ووقف سيارته مقابلي..

أنا كنت بأرجع داخل لين يجي عليان..

فوجئت بالاستاذ حمد ينط من سيارته ويتهاد مع اللي موقف سيارته يقول له: المواقف كلها فاضية مالقيت موقف غير هذا..

وعقب كملت سارة بعصبية:

خلاني في نص هدومي..

الرجّال الثاني ماحب يزودها مع حمد المجنون فحرك سيارته وراح...

والشيخ حمد رجع علي يقول بعصبية: لاعاد تنزلين من مكتبس لين يصير علي تحت..

قلت له بعصبية: مالك دخل يأخ أنت..

تخيلي الوقح وش قال لي؟؟ قال ببرود: إلا لي دخل ونص..

حرق أعصابي الله يحرق أعصابه..

منيرة ماتت من الضحك.. وسارة ضحكت من ضحكها: أحر ماعندي أبرد ماعندس..

منيرة بعيارة: صحيح أنتي أختي الكبيرة.. بس غبائس منقطع النظير واسمحي لي أقولها..

سارة بمرح: ليه ياعبقرية زمانس؟؟

منيرة بمرح: حمد ذايب في هواس وانتي تستهبلين..

سارة بغضب: عيب منور.. وش ذا الكلام؟؟ احشميني ياقليلة الحيا.. حتى لو كنتي مرة معرسة.. انا اختس الكبيرة..

منيرة بهدوء: زين خلاص لا تزعلين.. اكلمس بعدين

سالم طلع من الحمام..

وفعلا كان سالم طالع من الحمام..

ابتسم لما شاف منيرة تبتسم له..

قرب منها وهي جالسة على مكتبها وجاء من وراها

وقبل كتفها برقة: شأخبار الدراسة؟؟

منيرة بعذوبة: لا تحاتي.. ذيبة مرت ذيب أم ذيب..

سالم ضحك: الله يستر من ذا العايلة.. شكلها عايلة متوحشة..

منيرة برقة: مطول الليلة في الشركة؟؟

سالم بود: لا حبيبتي.. ساعتين وراجع... بس أنتي لا عاد تتعبين روحس واللي يرحم والديك.. وبلاها النزلة والطلعة كل شوي..

بعد الغياب/ الجزء المئة وثمانية عشر

دانة كانت قاعدة في المقلط حاسة إنها مو قادرة تمسك أعصابها من هول المفاجأة

(مرت سعود للمرة الثانية!!

معقولة!!

معقولة!!)

ما انتبهت إن خالد طلع من عندها عقب ما تلقى اتصال..

كانت جالسة على الكرسي بعد ماخلعت نقابها.. باقي عليها شيلتها وعبايتها..

دخل سعود عليها

ما انتبهت..

كانت سارحة في عوالمها..

سعود حس بتيار هادر يجتاحه بعنف..

ظل واقف متخشب دقايق مايدري عن حسابها

دقايق غير محسوبة من عمر الزمن

دقايق خاصة كخصوصية مشاعرهم المشبعة بالشجن المؤلم

دقايق حفرت في قلبه الوجع والفرحة

وهو يتأمل دانة الصامتة السرحانة..

حس بالالم يجتاحه بقسوة وهو يشوف وجهها اللي كان باين عليه آثار التعب والبكاء الطويل..

قرب منها بشويش..

لم تنتبه بعد..

أعادها لعالم الواقع الجميل ملمس يدين دافئتين على عضديها

يدان أنهكها الألم والوجع واستنزفاها اشتياقا للمساتهما

شعرت بالخجل والارتباك والتوتر والانفعال يغزو قلبها بمرارة

وسعود ينهضها بقوة وحنان

والعين تعانق العين بوجع ساحر

والرمش يحكي حكاية السهد واليأس وليالي السهر للرمش

وارتعاشة الجفن تشتكي حسرة البعد والقهر والشوق الهادر

دانة أنزلت رأسها بخجل وهي مصعوقة: كيف دخل سعود..؟؟

لم يسمح لها سعود أن تحرمه من عناق عينيها التي اشتاق بعنف لحنانهما ودفئهما وسحرهما..

رفع رأسها إليه..

وهو ينزل شيلتها على كتفيها

و يدخل كفيه في خصل شعرها

ويمسك برأسها من ناحيتي صدغيها

ويقرب وجهها منه..

دانة انتفضت بوجل.. وهي تشعر بأنفاسه الحارة على وجهها

ووجل أكبر حينما شعرت بهذه الانفاس تخترقها

وسعود يلصق شفتيه بشفتيها في عناق طويل مشتاق..

حاولت دانة أن تخلص نفسها رغم أنها كانت أكثر اشتياقا له

ولكن خجلها الحاد خنقها..

لم يفلتها سعود حتى شعر أنه أروى الحد الأدنى من غليله..وشوقه.. ووجعه

حينها تركها بصمت..

وعاد من حيث أتى..

لتنهار دانة جالسة على نفس الكرسي

الذي كانت تجلس عليه قبل دخول سعود العاصف المثير الموجع الناعم عليها..

******************

بعدها بدقائق في مجلس أبو خالد

سعود احتاج دقائق حتى استطاع التماسك من ثقل الأحاسيس

التي دغدغت قلبه المتيم ودانة بين ذراعيه..

وشفتيها ترتعش بين شفتيه..

ألتفت على عمه وهو يقول باحترام: بكرة محمد بيحط مهر دانة في حسابها.. وذا المرة بأعوض دانة وبأسوي لها عرس كبير..

بأدور أقرب حجز وبأحجز..

يعني عقب شهر بالكثير..

خلها تتجهز بسرعة..

وكل شيء صار موجود جاهز بالسوق...

وفعلا طلع سعود من بيت عمه

حجز لموعد عرسه

بعد شهر بالضبط

ثاني يوم خروجه من الحجز العسكري

***************

في المساء

في غرفة دانة..

دانة صامتة.. صمت المحلقين..

على شفايفها ابتسامة ناعمة صافية.. وهي متمددة نصف تمدد على سريرها..

مزنة تبتسم: ياحرم حضرة النقيب.. عطينا وجه..

صار لي ساعة أسحب الكلام منش

خالد يقول إن سعود طلب يشوفش

وش قال لش؟؟

دانة تبتسم وتقول بنبرة حالمة وهي تلمس شفايفها: ولا شيء..

مزنة تضحك: البنت استخفت.. أشلون ولا شيء.. يعني شافش وبس..؟؟

دانة بنفس النبرة الحالمة وهي سرحانة: وبس..

في نفس الوقت

في مجلس سعود

سعود مسوي عشاء لملكته..

الشباب متجمعين عنده... بعد ماراحوا الرياجيل اللي كانوا عنده...

دخل عليهم متعب مثل الاعصار المرح وهو بلبسه العسكري: تعشيتوا؟؟ وإلا خالي جيّد؟؟

محمد بمرح: لا والله خالك مهوب جيّد الليلة.. تعشينا.. أنت تأخرت واجد...

متعب بمرح: توني خلصت زامي الحين.. جايكم قبل أبدل..

سلم على الكل.. وحضن سعود بشدة وهو يبارك له ويهمس له: رديت حبيبة القلب.. مابغيت..

متعب وسعود أصدقاء مقربين.. بينهم فرق سنة وحدة.. سعود الأكبر..

متعب ملازم ثاني بس في الدفاع المدني..

والدورة اللي توه رجع منها اللي كانت في استراليا

كانت في فن إدارة الأزمات..

تدربوا بكثافة على التعامل مع الكوارث الطبيعية..

اقتحام الحرائق.. الغوص .. والقفز بالمظلات على المناطق السكنية

وهذا النوع من القفز يعتبر أخطر أنواع القفز كما هو معروف

لأن القفز بالمظلات يكون النزول على أرض خالية.. صحراء سهل أو حتى بحر

بينما النزول على المباني.. يكون خطير جدا

لأن المظلي مهما كان درجة تحكمه بنفسه

لا يستطيع التحكم بحركة الرياح التي قد تصدمه بالمباني لتتحطم عظامه من هذا الاصتدام..

سعود ومتعب تقريبا نفس الطول.. لكن متعب أعرض شوي..

قبل كان أعرض بكثير لكنه استغل وجوده في استراليا لعمل ريجيم قاسي..

مثل مها.. اللي استغلت غيابه لعمل ريجيم قاسي..

سعود رد على متعب وهو حاضنه بهمس: مابغينا..

وقعدوا جنب بعض.. يسولفون

وعقب الشباب بدوا يلعبون بيلوت..

متعب ومحمد ضد خالد وجبر

وسعود قعد في الزاوية البعيدة مع أفكاره

ودانة على الطرف الثاني غارقة في أفكارها لوحدها

بعد ماتعبت مزنة منها..

وقامت لغرفتها عشان تحضر لحصصها بكرة..

رنة مسج.. فتحته بدون اهتمام

شهقت ونطت قاعدة على حيلها من تمددها

" لو اتصلت

تردين علي؟؟"

وصله الرد في ثواني

"لا.."

سعود ابتسم وهو يتكي على المساند ويطالع الشباب

اللي كانوا صوتهم طالع من خلافاتهم حول البيلوت

وكتب..

"بس أنا بأتصل

مشتاق..

مشتاق..

مشتاق لصوتك

إذا قلبك يطاوعك تسفهيني

براحتك"

دانة توترت ونطت واقفة

كانت تبي تكتب له: لا تتصل

كانت غير مستعدة للمواجهة

وخصوصا عقب اللي صار اليوم عقب الملكة

واللي رفع درجة خجلها منه

صحيح إنها كانت زوجته ورجعت زوجته.. والخجل هذا يمكن يكون غير منطقي

بس غصبا عنها

احساس الخجل يلفها بشدة

لكنها فوجئت بموبايلها يرن

وقلبها ينط من مكانه

واسم سعود يلمع على الشاشة

ماكانت تبي ترد

الخجل يجتاحها بعنف

لكنها تشجعت وردت

لأنها شافت بنفسها إن ترددها في التعبير عن مشاعرها

ضيع منها سعود المرة الأولى

وهي مستحيل تسمح أنه يضيع منها مرة ثانية

بتردد وخجل: ألو..

سعود بنبرة شديدة الدفء: اشتقت لش..ميت من شوقي

والله حتى مليون كلمة اشتقت لش ماتعبر حتى عن واحد من مليون من شوقي

صمت على الطرف الثاني.. فقط صوت أنفاسها السريعة المتلاحقة..

سعود بنفس الدفء: صوت النفس اللي ذوبني يقول أنه فيه حد على الخط بس هو مابعد تعطف علينا وسمعنا صوته..

مافيه رد.. بس الأنفاس يتزايد تسارعها..

سعود بحنان: دانة..

دانة بخجل: لبيه..

سعود بوله: يالبيه أنا.. ومن أقصاي لبيه..

دانة بتذوب من خجلها..

ثمان شهور عايشة في قحط عاطفي.. وعقبه الفيضان هذا.. مو قادرة تستحمل.. هي أصلا تستحي.. والحين وجهها ورم من الخجل..

دانة بخجل كبير: هذا أنا رديت عليك.. ممكن أسكر خلاص..

سعود بعذوبة: ليه أنتي تعتبرين الكلمتين اللي قلتيهم كلام؟؟

الشباب ألتفتوا على سعود وبدوا يقطون نغزات..

متعب: سعيّد من أنت تكلم يالمغازلجي؟؟ القعدة ذي مالي بها.. قعدة مغازل بجدارة..

سعود بصوت عالي.. ودانة بعدها معه على الخط: وش سعيّد ذي يامتيعب الدب.. 15 سنة ماحد قالها لي؟؟

احشمني قدام أغير رأيي في الموعد اللي عقب شهرين ونص وأخليه عقب سنة..

متعب بخوف مصطنع مرح: لا تكفى خلاص حرمت يالشيخ ياعمي سعود...

وذا المرة نط خالد وقال بمرح: وأنت سكر ذا الاتصال اللي ما ادري وشو قايل.. قدام أغير رأيي في الموعد اللي عقب شهر وأحطه عقب سنتين..

سعود ابتسم: والله حتى البزارين طلع لهم لسان..

محمد يبتسم: والله البزارين هم اللي زوجوك اليوم.. حط أبو هادي على يمناك..

دانة كانت تسمع النقاش وتبتسم بخجل.. تبي تسكر.. بس تبي سعود لين يسكر من خاطره..

خالد طرأ عليه شي..

رن على دانة لقى معها خط ثاني..

ابتسم وأرسل لها مسج..

"فضحتينا أنتي ورجّالش

ماعندكم صبر

كلها شهر وتصيرين في بيته

واهذروا على كيفكم"

دانة فتحت المسج وهي تنطر سعود لين يخلص خناقه مع الشباب.. اللي كل واحد يستلمه شوي..

دانة حمر وجهها من الحرج من خالد..

الشباب رجعوا يلعبون دور ثاني

وسعود رجع يكلم دانة..

دانة بارتباك: ماعليه سعود اسمح لي.. خالد أرسل لي مسج يقول سكري..

سعود رفع صوته: خويلد.. على شحم..

خالد يضحك: ليه.. عسى ماشر؟؟ (مع أنه فاهم!!)

سعود ببرود: أنت عارف.. ولاعاد تدخل في اللي مايخصك..

سعود بنبرته الدافية رجع يوجه كلامه لدانه بصوت واطي: باسكر الحين بس بارجع أتصل قبل أنام.. بتتنيني وإلا لا؟؟

دانة سكتت..

سعود ابتسم: معناها بأتصل

في الليل متأخر شوي..

الشباب تأخروا في السهرة عند سعود

خصوصا لما عرفوا أنه معاقب

وبينحجز شهر ماراح يطلع فيهم من المعسكر إلا قبل عرسه بيوم

الدانة غفت وهي تنتظر اتصال سعود

لأنها لها يومين مانامت

من لما اتصلت في تهاني وقالت لها خلي سعد يجيب المملك

أولا كانت طول الليل صامتة

ثم بدت تبكي من لما طلع النهار لحد موعد الملكة

سعود في غرفته

توضأ وصلى

ثم تمدد وخذ موبايله ودق

انتفضت دانة وهي تسمع رنين الموبايل يمزق سكونها

بصوت نعسان: ألو

سعود بحنان: نمتي؟؟

دانة بخجل: شوي.. غطيت وأنا أنتظرك

سعود بوله: أسف حبيبتي.. بس كان لازم أسمع صوتش لو شوي..

أنا عقب صلاة الصبح لازم أسلم نفسي في المعسكر عندي حجز عسكري شهر.. حتى موبايلي بيأخذونه مني..

دانة برعب: ليه؟؟

سعود برقة: خلاص مهوب مهم.. أنا كان عادي عندي انحجز 10 سنين بس ما تروحين مني حبيبتي..

عقب كمل بحزم عذب: ترا موعد العرس عقب شهر بالضبط.. جهزي اللي تبين بسرعة..وبكرة محمد بيحط المهر في حسابش..

وعقب همس بنبرة خاصة عميقة: وذا المرة لازم تلبسين فستان أبيض مثل أي عروس.. يمكن الله راد انه احنا نتفرق عشان أرجع أعوضش عن المرة اللي فاتت

دانة بخجل قاتل: سعود الله يهداك شنو فستان ومهر.. مهري اللي فات والله ماانصرف منه شيء.. وفستان ماله داعي..

سعود بغضب: شنو ذا الكلام يادانة.. هذا عقد جديد بمهر جديد.. والمهر اللي فات خلاص..

وعقب كمل بهمس: والفستان حق لش تلبسينه وحق لي أشوفه حبيبتي..

دانة بهمس: إن شاء الله سعود..

سعود بحب ومرح: ومافيه حبيبي يعني؟؟

دانة بخجل: إذا شفتك عقب شهر قلتها لك وجه لوجه..

سعود بعمق: يا متى بيخلص الشهر بس.. بأعده بالدقايق والثواني...

بعد الغياب/ الجزء المئة وتسعة عشر

#أنفاس_قطر#

ثاني يوم .. صباح يوم الأربعاء

مكان شغل سارة...

سارة من البارحة من عقب مكالمتها مع منيرة.. وهي حاسة بخجل حاد يجتاحها..

يعني لما كانت شايفة أنه اهتمام حمد مجرد اهتمام رجّال شهم بوحدة من بنات جماعته.. كان احساسها فيه عادي جدا..

بس عقب مادخلت منيرة في رأسها سالفة أنه ممكن يكون يحمل ناحيتها مشاعر خاصة.. وهي حاسة بالارتباك وماتبي تشوفه..

(كله منس يامنور كله منس.. يالله ياكريم يضربس سويلم نعلة ثانية على راسس المخرف)

من لما وصلت الصبح وهي في مكتبها ماطلعت نهائي..

الحين باقي شوي على صلاة الظهر وهي ماطلعت نهائي...

كانت جالسة تتلهى في أوراق في يدها ترتبهم من جديد للمرة الثالثة بعد ماخلصت كل شغلها..

جات وحدة من زميلاتها من برا وجلست جنبها: الأستاز حمد بيسأل عليكي؟؟

سارة بحرج: وليه يسأل عني؟؟ فيه شغل لي عنده؟؟

داليا هزت أكتافها: لأ... بس هو بيسأل أنتي جيتي النهارده وإلا لأ.. عشان هو ماشافكيش النهاردة...

سارة في نفسها (الله يفضحك ياحُميّد.. بتفضحني في كل الإدارة) وعقب كملت بصوت واطي: تسأل عنه العافية... يسأل عشان احنا قرايب (جعل أمحق قرابة جمعتنا)

سارة قررت شيء في رأسها..

توجهت للموظفة المسئولة.. وقدمت طلب عندها...

المسئولة استغربت: توج سارة مالج شهر ونص تقدمين طلب نقل لإدارة ثانية... فيه شيء ضايقج في إدارتنا؟؟

سارة بثقة: لا والله.. بس أنا حابة أغير..

المسؤولة بحذر: أنا بأرفع طلبج لرئيس القسم.. بس أنبهج إن هذا موب من مصلحتج.. بعدين تطلع عليج سمعة إنج ماتحبين الشغل وتتمللين بسرعة.. مع أني شايفتج موظفة نشيطة ماشاء الله..

سارة بود واحترام: أنتي ارفعيه وأنا والله شاكرة اهتمامس.

******************

منيرة ومها وفاطمة طالعين من الجامعة

متوجهين للصالون..

عشان فاطمة تخلص شغلها وتصبغ شعرها وتقصه

والبنات قرروا يترتبون معاها عشان الصور بكرة طبعا

صبغت فاطمة صبغة كستنائي فاتح كانت تجنن مع لون بشرتها وتدويرة وجهها وقصة المدرجات الكثيفة..

مها بعيارة: أخونا اللي مانعرف اسمه بيجيه جلطة إذا شافش بكرة..

فاطمة بخجل: بس مهاوي تحشمي..

مها تضحك: فديت متعب بس.. ليته بس ينجلط إذا شافني.. ياخوفي بس يقول عرفتش دبة.. ورجعت وانتي دبة..

منيرة تضحك: مها حرام عليس... والله جسمس صار يجنن الحين.. ملفوفة تمام...

مها تضحك: أعرفكم يالبدوان أنتم واذواقكم... الدبة تقولون ملفوفة... خلينا نسال الجبهة الثانية

توتي وشرايج في جسمي الحين؟؟

فاطمة بعيارة: دبة..

مها تضحك وتقول لمنيرة: شفتي..!!

فاطمة تضحك: لا والله أمزح معاج... الصدق تبين بس يمكن 5 كيلو بعد وتصيرين موب تمام إلا فوق التمام..

مها بمرح: الله يجزاش خير.. 5 كيلو بس.. خلاص هانت..

ويالله على الحناء.. لازم تتحنين مافيه مهرب..

*****************

سارة طالعة من دوامها..

تتسحب وتتلفت ماتبي تشوف حمد..

وصلت تحت.. بس ماطلعت تنتظر علي يجيها..

فوجئت باللي وقف قدامها كأنه ظهر من العدم

وفي يده ورقة يمدها لها..

سارة انصدمت بعنف وهو يقول لها بحزم: ممكن أعرف ليش طلبتي نقل؟؟

سارة بحدة وهي تتراجع: مهوب شغلك.. وصراحة أنت تجاوزت كل الحدود.. لو تعرضت لي مرة ثانية أو تكلمت معي.. بأقدم ضدك شكوى رسمية..

أنا حشمتك ليش أنك من الجماعة... بس أنت ماتستاهل الحشيمة

حمد قال بهدوء وهو يمدلها الورقة مرة ثانية: يعني مثل ما أنا متوقع..

قدمتى نقل عشان ماعاد تشوفيني..

على العموم أنا سحبت الطلب.. تفضلي.. وأنتي بتشوفيني كل يوم برضاس وإلا غصبا عنس..

سارة عصبت لأبعد حد: أنت بأي حق وبأي صفة تسحب طلبي؟؟

حمد بنبرة خاصة: بصفتي خطيبس.. ماينفع؟؟

سارة بغضب وثورة لكن بصوت واطي: عمري ماشفت وقاحة كذا.. وتبي تطلع على سمعة في الوزارة بعد.. وتكذب علي..

حمد بهدوء: أنا ما كذبت.. أنا خطبتس البارحة من عمي فالح.. ليه هو ماقال لس؟؟

سارة بغضب كاسح: عمت عينك.. قول آمين..

حمد ابتسم: ياحلو الغزل منس.. ينقط سكر من بين شفاياس..

سارة صارت ترتعش بحدة من الغضب لكنها سكتت وهي تشوف سيارة علي توقف وطلعت عليه...

أول ماركبت مع علي ألتفت عليها بغضب وهو يقول من بين أسنانه: مهوب ذا حمد بن راشد اللي كان واقف معس؟؟

سارة بتوتر: إيه...

علي بغضب حاد: زين خليه لين يصير رجلس.. وعقب وقفي تكلمي معه قدام العالم ياللي ما تستحين..

سارة بتوتر: والله العظيم أنه هو اللي وقفني وتكلم معي.. يبي يعطيني ورقة للشغل..

وعقب كملت بحدة: ورجلي مهوب صاير رجلي.. ليه خلصوا الرياجيل أخذه..

علي تحول غضبه لناحية ثانية: ليه وش أنتي راده فيه بعد؟؟ رجّال والنعم فيه..

سارة ماكانت شايفة فيه عيب.. بالعكس هي معجبة فيه ومن أول يوم شافته في الشغل وعرفت هو من..... بس العند أبعدكم الله عنه ودلع البنات..

سارة بحدة: راده فيه اني ما أبيه... مايكفي..؟؟

علي وهو يبي يسكر الموضوع: انتظري لين يكلمس أبوس رسمي.. وعقب عيي على كيفس.. أربه يكسر راسس اليابس..

*****************

بعد صلاة العصر..

جواهر كانت تمشي شوي في البيت..

لأنها تعبت من القعدة..

نوف قاعدة عند مجود اللي مفكك على السرير تلاعبه وتبوس فيه..

رن موبايل أمها..

شالته بدون اهتمام وطالعت الاسم..

كان اسم راشد الــ يلمع على الشاشة

جواهر سيفته لما أتصل فيها أخر مرة..

حست نوف بحرج شديد.. ليش ماتدري..

رجعت الموبايل مكانه..

بعد دقايق.. رجع راشد يتصل..

(وش عنده ذا ملزم؟!!)

لكنها تركته يرن..

لما رجعت جواهر.. قالت لأمها وهي تحاول تبين إنها غير مهتمة: يمه موبايلج رن كم مرة..

شالت جواهر موبايلها.. وطالعت الاسم الذي لم يرد عليه..

استغربت.. لكنها شبه توقعت السبب..

ألتفتت على نوف وقالت برقة: يمه نوف أطلعي جيبي لي ملابس داخلية من غرفتي من فوق.. أبي أخذ لي شاور..

نوف باستغراب: يمه الدولاب هنا مليان ملابس داخلية.. أنا شايفتهم قبل شوي..

جواهر بحزم: قلت لج روحي جيبي لي.. تروحين بدون نقاش..

نوف بعذوبة: ياشينج ياجيجي لا حمقتي.. إن شاء الله رايحة

جواهر جلست جنب ولدها على السرير

واتصلت في راشد..

راشد باحترام: السلام عليكم.. هلا أم عبدالعزيز

جواهر بنفس الاحترام: وعليكم السلام حياك الله راشد

- الحمد لله على سلامة أبو عبدالعزيز.. وعلى البركة المولود.. رزقك الله رضا الواهب وبر الموهوب..

- الله يسلمك ويكبر قدرك

- أم عبدالعزيز أنا أسف لو كانت أتجاوز حدودي.. بس أنتي عودتينا أنج اختنا الكبيرة (راشد بتردد وارتباك)

- أكيد راشد مافيه شك.. غلاك من غلا عبدالعزيز والله الشاهد... (جواهر بذوق وصدق)

- وأكيد أنج عندج خبر بخطبتي لكريمتكم..

- عندي.. ومثلك والله العظيم مايرد.. بس نوف بعدها صغيرة ياراشد..

- أنا والله العظيم ما أبي أتجاوز أبو عبدالعزيز.. بس المكالمة ذي أبيها بيننا.. لو أنتي أكدتي لي أنه لو أنا أنتظرت نوف أنكم بتزوجوني.. أنا مستعد أنطر لين تخلص.. (راشد برجاء عذب) أنا شاريها يا أم عبدالعزيز.. لو أني ماني بشاريها ماكان رجعت أكلمج عقب ماردني أبو عبدالعزيز...

أنا والله ما أبي وعد قاطع.. بس عطيني أمل... وانا أكثر واحد عارف إن الزواج قسمة ونصيب.. يعني ختى لو ماصار نصيب يكفيني الامل الحين..

- توكل على الله (جواهر بحنان وهي تبتسم)

- يعني؟؟ (راشد بفرحة صافية)

- يعني مايصير خاطرك إلا طيب (جواهر بعذوبة)

- مشكورة يا أم عبدالعزيز مشكورة (راشد بفرحة محلقة)

جواهر ابتسمت وهي تحس بفرح ممزوج بالحزن.. لفت ماجد وحطته في سريره..

قامت طلعت لها ملابس.. وجلست تنطر نوف لين تجي عند ماجد عشان تاخذ شاور...

أول ماجات نوف بالملابس الداخلية.. جواهر وقفت وابتسمت وهي تقرص خد نوف وتقول بحنان صافي: والله وصرتي مرة..

وعقب كملت بحنان وهي تشيل ملابسها وتدخل الحمام: خليج عند أخوج بأقوم أخذ شاور

جواهر تجاوزت نوف.. ونوف تقول لها مستغربة: والملابس اللي أنا جبتهم؟!!

جواهر ماردت عليها.. ودخلت الحمام..

ونوف تهز كتوفها و تضحك.. وترجع تشيل ماجد وتحطه على السرير.. وتفك لفته عشان تلاعبه وتبوس إيديه ورجليه..

******************

في بيت أبو علي..

أبو علي نادى سارة..

تجي عنده في الصالة الرئيسية...

سارة نزلت وهي مترددة ومتوترة وخايفة

لأنها كانت عارفة أبوها وش يبي فيها..

نزلت لأبوها حبت رأسه.. ثم جلست على جنب وهي تقول: سم يبه...

أبوعلي بهدوء: سم الله عدوس..

وعقب سكت شوي وقلب سارة صار يرقع بشدة لدرجة انها خافت إن أبوها يسمع دقات قلبها

كمل أبوها: سارة يا أبوس.. فيه رجّال فيه خير جاء يخطبس

سارة كحت بحرج: ما ابي أعرس يبه..

أبو علي بحنان: مافيه يا أبوس بنت ماتبي العرس...

وهذا حمد بن راشد رجّال فيه خير ومن عربن أجواد..

رجّال مايعيبه شيء عشان نرده...

والرسول صلى الله عليه وسلم قال: إذا جاءكم من ترضون دينه وخلقه فزوجوه"

وحمد ماعليه قاصر دين ولا أخلاق ولا مال.. فليش نرده..

سارة تنهدت وقامت وهي تقول لأبوها بخجل ومنطقية: خلاص يبه الرأي رأيك..

بعد الغياب/ الجزء المئة والعشرون

#أنفاس_قطر#

يوم الخميس..

يوم ملكة وخطوبة ثاني وفاطمة...

الشهود تقرر أنهم يكونون عبدالله وولده عبدالعزيز اللي قرر أنه يحتفل بأنه كمل 18 سنة بشهادته على عقد زواج خال أبوه..

اللي بيحضر الخطوبة بيكونون من طرف ثاني أخته عائشة وبنتها ديمة ونوف بس

اعزموا نورة وخواتها بنات أبو فهد.. بس اعتذروا ووعدوهم يوقفون معهم في العرس..

ومن طرف فاطمة.. صديقاتها مها ومنيرة.. وخالاتها وعماتها وبناتهم..

الظهر...

فاطمة متوترة بشكل مرعب.. وإحساس غريب يجتاحها..

إحساس إنها تسرعت زيادة عن اللزوم..

إحساس مر بالندم..حاسه بمرارته تؤلمها حتى النخاع

(حتى اسمه ما أعرفه... شنو هالعرس؟؟

هذا كله عشان أقهر واحد ما أعرفه)

(بس الواحد هذا هزج..

وهز أعماقج بشكل عمره ماصار لج

حرك مكان في قلبج ماحد وصله)

(وش هالكلام الغبي السخيف؟؟

يخسى هو وويهه؟؟)

أبو صالح متمدد في غرفته..

وأم صالح تشرف على ترتيب العمال للحفل

فاطمة تسحبت ودخلت على أبوها..

حست بحنان عظيم وهي تشوف ضعف أبوها

وشعره اللي صار أبيض كله..

سمعت صوته يقول بحنان وهو مغمض عيونه: تعالي يمي يبه..

فاطمة تمددت جنبه وحطت رأسها على عضده

ودفنت رأسها في صدره..

أبو صالح حضنها بحنان وهي بدت تبكي بخفوت..

أبو صالح بحنان وحزن: ليش تبكين يبه؟؟

فاطمة بين عبراتها الخافتة: ماأبي أتزوج يبه.. خلاص..أبي أقعد عندكم

أبوصالح بحنان: يبه البنت مالها إلا بيت ريلها.. أنا عايش لج اليوم.. ماني بعايش لج بكرة.. خليني أروح وأنا مطمن عليج..

فاطمة بكت اكثر وابوها يحضنها أكثر: تكفين يأبوج.. لا تقطعين قلبي عليج.. أبي أحس أنج مبسوطة اليوم

ثاني ريال مامنه اثنين..

فاطمة تصلب جسدها في حضن أبوها وهي تسمع اسم ثاني..

وأبوها حس بتصلب جسدها..

قام قاعد..

وفاطمة تقعد على السرير وتنزل رجولها وهي تعطيه ظهرها عشان ماتحط عينها بعينه وهي تقول بنبرة غامضة: وش قلت اسمه يبه؟؟

أبو صالح بنبرة اعتيادية: ثاني يأبوج.. ليه انا ماقلت لج..؟؟ ثاني بن ناصر الـ

فاطمة حست إن الاسم ينزل على رأسها مثل قنبلة ذرية فتت خلايا مخها إلى ملايين الذرات..

حست بصداع مؤلم.. وهي تغمض عيونها وتسكرها عاجزة عن الاستيعاب..

(عشان كذا مارجعت أخته تتصل..

وأنا اللي كنت أنتظرها تتصل

عشان يي يخطبني ويتفاجأ أني مخطوبة

أتاريني مخطوبة له هو

له هو ...

له هو..

ثاني الحقير

المغرور

الحشرة..

الذنب كله ذنبي..

كله ذنبي!!

وإلا فيه وحدة توافق تتزوج واحد بدون ماتعرف اسمه

يمكن الله راد أني ما أعرف اسمه

عشان ثاني يكسب ذا الجولة

بس هذي مجرد جولة في معركة

والحرب بعدها في أولها...

وإذا أنت مفكر ياثاني أني فاطمة الدلوعة و لقمة سهلة

شكلك ماعرفت إن لحمي مر"

فاطمة تنهدت بعزم وعشرات الأفكار الغريبة المتشابكة تتزاحم في مخيلتها اللي أثقلتها وطأة المفاجأة..

قالت لأبوها بنبرة خاصة: يبه ممكن أخذ تلفونك أكلم شوي..

أبوها وهو يرجع يتمدد: اخذيه.. وسكري الباب أريح شوي قبل صلاة العصر..

فاطمة خذت تلفون أبوها وطلعت لغرفتها وقفلت الباب عليها

دورت في الأسماء الواردة والصادرة

أكيد أنه من أخر من أتصل في أبوها

أو أبوها اتصل فيه..

وفعلا لقت اسمه (ثاني بن ناصر)

(ياثقل الطينة!! أكيد هو اللي مسيف اسمه بنفسه

يخاف حد يغلط في اسم حضرة جنابه

وإلا يختلط مع اسماء عامة الشعب)

فاطمة قررت إنها ترد الكف لثاني..

(وخلنا نلعب... ليش لا؟؟)

وقتها كان ثاني مخلص اجتماع في شركته

ومعصب على موظفينه

وخصوصا أنه ملكته بعد ساعات

وهو متوتر ليش مايدري

(وخير ياطير ياملكتي

يكون حفل تخرجي من هارفرد والا ساندهيرست

كله الا ورقة

ومرة تصير حلالي

مثلها مثل أي سيارة اشتريها)

دقت فاطمة عليه..

تفاجأت بالصوت الرجولي الفخم اللي رد باحترام: هلا عمي..

ضحكت ضحكة ناعمة صعقت ثاني على الطرف الثاني: يعني تعرف ترد باحترام!!

تصدق حسبتك ماتعرف تتكلم مثل الأوادم لما يكلمون أوادم مثلهم..

ثاني تماسك بسرعة ورد برود: والله الاحترام لأهل الاحترام..

وعقب كمل بخبث: وأنتي يعني متصلة عشان تشوفين أشلون بأرد على أبوج..؟؟!!

وإلا خلاص ماعاد تقدرين تصبرين لين بعد المغرب؟!

فاطمة قررت تحط أعصابها في ثلاجة.. وماتسمح له يهز شعرة فيها: عدال منهو ذا اللي ما أقدر أصبر عشانه... ماجابته أمه بعد..

ثاني بغروره المعتاد: إلا جابته أمه ونص.. اللي خلاج ماصدقتي أنه تقدم لج..و ثاني يوم كنتي موافقة.. وأنتي بتموتين على روحج من الفرحة..

فاطمة ضحكت ضحكتها الناعمة وقالت: ياحليلك ياثاني ياولد أبوك ناصر.. كيوت.. والله كيوت.. مافيه مثلك أحجام صغيرة أعلقهم في ميدالية مفاتيحي..

ثاني بدأ يفول عليها لكنه كان متماسك وهو يقول لها ببرود: أخلصي علي... وش تبين داقة..؟؟

فاطمة بثقة قهرته: أبي أقول.. ماعليه الملجة تصير الليلة بما أنه الناس كلهم صار عندهم خبر..

بس حط في بالك عقب تطلقني.. ومهرك ما أنصرف منه ريال

ولو تبي عليه قده مرتين..أو ثلاث أو حتى عشر.. ترا احنا حاضرين

لأن الخلاص من شكلك الغلط شيء مايقدر بثمن عندي..

ثاني ببرود مع انه صار يغلي مثل قدر ماي يفور وبخاره بدأ يطلع.. وكأن الدخان بدأ يطلع من أذانيه من الحرة: وليش وافقتي علي يوم أن حضرتج ماتبيني..؟؟ نلعب احنا؟؟

فاطمة ببرود مثلج: كيفي.. ألعب.. عندك مانع..

ثاني بنفس برودها: وأنا بعد بكيفي.. مثل ما تقولين خل الملكة تصير الليلة.. بس اللي أنا أقوله إن الطلاق حلم احلمي فيه بس

لأنه مستحيل يصير.. أنا بأتزوجج وأخليج خدامة تحت رجولي

وكل كلمة قلتيها لي بتدفعين ثمنها غالي ياحلوة..

فاطمة بنفس بروده: تخسى.. ماعاش ولا كان اللي يخليني خدامة له.. ونشوف ياثاني أنا وإلا أنت..

وعقب سكرت الخط في وجهه... وهي حاسة براحة عميقة أنها بردت حرتها فيه.. وماعرفت بالنار اللي أشعلتها في جوانح ثاني

اللي صار يدور في مكتبه مثل المجنون

" أنا وحدة تافهة تسوي فيني كذا

أنا ثاني بن ناصر

أخرتها تجي وحدة ماتسوي تراب نعالي

وتهيني وتسبني وعقبها تقفل الخط بوجهي

زين يافطوم زين

وأنا اللي كنت ناوي احشمج عشان أبوج الشايب

دواج عندي

إن ماخليتج تمنين الموت ولا تطولينه

ما أكون ولد أبوي"

ثاني صار يطالع ساعته كل دقيقتين وهو يحس إن الوقت مايمشي

كان يبي المغرب يجي بسرعة

كان يبي يملكها ويحطها في يده

يبي يسجلها باسمه

عشان يعرف يقص لسانها

(زين يافطوم .. هانت.. هانت.. كلها كم ساعة

وتصيرين ملكي

وخل نشوف لسانج الطويل عقب)

*******************

عقب المغرب..

في بيت أبو صالح

الملكة تمت على خير

ثاني مزاجه مقلوب..

لكنه ماسمح إن هذا المزاج يظهر للناس

كان محتفظ ببروده

وراسم نفسه قدام الموجودين بابتسامة مرسومة بحرفنة..

ابتسامة ثقيلة متناسبة مع غروره

عبدالله قاعد جنبه ويهمس له: مبروك ياخال.. وأخيرا.. مابغيت..

ثاني ابتسم: كل واحد ينطر نصيبه.. هذا أنت قعدت 17 سنة تنطر نفس النصيب..

عبدالله بعيارة: فديت عيون نصيبي بس..

ثاني بابتسامة: تحشم ياولد قدام خالك..

عبدالله بابتسامة: يخسأ خالي طال عمرك.. الخال ذا بيني وبينه فرق 10 سنين.. خله هو يحشمني..

ثاني ابتسم: لحول منكم يا أهل الأقتصاد كل شيء تحسبونه بالأرقام.. مافيه اعتبارات معنوية يعني؟؟

عبدالله بمرح: لا.. جعلني ماخلا منك.. مافيه اعتبارت معنوية في عوالم البنوك..

وعقب كمل باهتمام: إلا ثاني.. العرس متى إن شاء الله؟؟..

هز ثاني أكتافه بدون اهتمام: بأحدد عقب..

*******************

بعد صلاة المغرب شوي

وقبل صلاة العشاء

دلال قاعدة تجهز مراجعة لطالباتها ثاني يوم

نزل عليها ماجد بكامل أناقته..

دلال رفعت عينها لما شمت ريحة عطره اللي كانت بزيادة ذا المرة..: واو.. وين رايح بذا الكشخة من وراي؟؟

ماجد ميل عليها وطبع قبلته الحانية على خدها وفي نفس الوقت سكر اللابتوب اللي في حضنها وقال بحنان: بس ارحمي روحج شوي.. بطنج قدامج واللابتوب بعد

وأنا رايح لبيت ثاني خال عبدالله مسوي عشاء لملكته الليلة..

دلال باستفسار: هذا أخو الدكتورة عائشة؟؟ ليه هي عندها اخوان شباب؟؟

ماجد بهدوء: إيه توه.. عمره 30 أو 31.. بس كان لاهي في شغله عن العرس

وعقب كمل بعيارة: أو توه لقى له وحدة تشلع قلبه مثل مادلولتي شلعت قلبي..

وعقب كمل بنبرة فيه لمحة حزن: بس زين لحق على روحه قبل مايطوف الأربعين.. ويلاقي نفسه خايف يصير له شيء ويترك عياله صغار..

دلال انتفضت بعنف ونزلت اللاب جنبها وقامت وقفت: ماجد وش هالكلام؟؟ الواحد ممكن يجيب عياله في العشرين ولا يلحق يربيهم.. وغيره يجيبهم في الأربعين ويشوف عيال عيالهم..و أنت إنسان مؤمن..

ماجد ابتسم وحط يده على خدها بحب: جد أمي داعية لي اللي الله أرسلج لي.. كاملة والكامل وجه الله...

وعقب ميل قبل جبينها: يالله حبيبتي رخصي لي

دلال بابتسامة: لا لا وقف خلني أقرأ عليك شوي.. لا يطسونك بعين.. وإلا يحسبونك أنت المعرس

بعد صلاة العشاء

الرياجيل توجهوا لبيت ثاني

وعبدالله هو اللي راح يستقبلهم هناك

لين يجي ثاني اللي بيلبس عروسه ثم بيجيهم هناك..

فاطمة داخل ومها ومنيرة عندها

ماطلعت على الحريم بعد

كانت متوترة جدا

وحاسة إنها دخلت نفسها في شيء أكبر منها

(الله يلعنك يا أبليس

وش أبي بذا السالفة كلها

جان قلت له اليوم لما كلمته

ما أبي العرس وخلاص)

لما ناداها أبوها للشيخ كانت تبي تقول ما أبيه

لكنها شافت فرحة أبوها وماحبت تكسر بخاطره

وتفضح نفسها في العالم اللي عارفين إن ملكتها اليوم

مها بمرح وهي تطالع فاطمة: ماشاء الله تبارك الله.. إذا ما أنسطل اللي ما أعرف وش اسمه اليوم ما أكون مهاوي بنت سعيد..

منيرة بمرح مشابه: إلا هو وش أسمه..؟؟ خلاص أكيد صرتي تعرفين

فاطمة بجمود: ثاني.. ثاني بن ناصر..

مها ومنيرة تبادلوا نظرات دهشة حادة

وعقب الثنتين فقعوا يضحكون بهستيرية...

مها وهي تضحك: بس خلاص يا بطني... مكياجي بيخرب..

فاطمة بغضب وهي تطالعهم ثنتينهم: إيه وش عليكم.. اضحكوا وانا اللي طاحت في رأسي.. صج شر البلية مايضحك..

منيرة وهي تتماسك من الضحك: الخيرة فيما اختاره الله يا بنت الحلال.. وهذي خيرتس..

ماكان فيه وحدة عايفة اللي هي بتأخذه مثل ماكنت أنا عايفة سالم.. وهذا أنتي شايفة بعينس أشلون صرت الحين..

فاطمة بتوتر: بس مو كل مرة تسلم الجرة.. وموب لازم إن كل وحدة بتكون نفسج أنتي وسالم...

مها بحنان مخلوط بالعيارة: توكلي على الله.. الولد يطيح الطير من السما... صحيح مهوب ذابحه الزين... بس عليه رزة ماشفتها على مخلوق..

فاطمة بحرة: مالت عليه هو ورزته..

وهم يتكلمون دخلت عليهم أم صالح اللي كانت لابسة دراعة خمرية.. الطراز الأبدي لدراريع العجايز: فطوم يمه الحريم برا يتحرونج.. خالاتج وعماتج وأخت المعرس وبنتها وبنت ولد أخته.. اطلعي سلمي قبل يجي ثاني..

فاطمة سمعت اسمه حست إن قلبها بيوقف من الرعب وشعور آخر مختلف.. شعور أشبه بالكراهية والتحدي.. قلنا أشبه!!!!!

مها نزلت قبل.. وطلبت من الدي جي إنها تشغل الأغنية اللي اختاروها لنزلة فاطمة على الدرج..

الحريم كانوا جالسين في صالة البيت الرئيسية اللي كانت صالة واسعة انحط في زاويتها الرئيسية كوشة ناعمة راقية

فاطمة نزلت بشويش وراها مها ومنيرة وهي حاسة باضطراب غير طبيعي..وحاسة إنها بتختنق

وروحها ترتعش بعنف بين أضلاعها

كأن هذه الاضلاع سجن تتوق روحها للانعتاق من بين قضبانه..

الكل يسمي ويذكر الله عليها..

جات وجلست..

والكل سلم عليها...نوف انبسطت كثير لأنها حبت البنات من أول مرة شافتهم عند أمها في مكتبها..

الكل كان متجهز لدخلة ثاني.. والحريم حاطين عبيهم جنبهم عشان يلبسونها...

الأستاند الضخم المكون من الورد والشيكولاته اللي كان عليه الشبكة والدبلة كان محطوط جنب الكوشة...

عائشة أتصلت على ثاني وكلمته بصوت واطي: ثاني خلاص تعال عشان تلبس عروسك..

المجلس ماعاد باقي فيه الا ثاني وأبو صالح.. اللي ينطر ثاني يلبس فاطمة.. عشان يروحون للعشاء في بيته..

ثاني قال ببرود وهو يوقف ويطلع برا المجلس عشان أبوصالح مايسمعه: عطيني أكلم فاطمة أول..

عائشة بعصبية بس بصوت واطي: ثاني وش تكلمها، تعال لبسها وكلمها على راحتك..

ثاني بحزم وبنبرته الجادة الباردة: عائشة أقول عطيني فاطمة أول.. أو ماراح أدخل..

عائشة قامت وهي منحرجة.. وجلست جنب فاطمة على كرسي الكوشة الطويل وقال بصوت واطي: خذي كلمي ثاني.. يبي يكلمج قبل يدخل..

فاطمة نط قلبها في بلعومها (وش يبي ذا؟؟) ردت بصوت واطي والخجل ذابحها: ألو..

ثاني ببرود قاسي: وين صوتج الطويل اللي اليوم الظهر؟؟

فاطمة بصوت واطي وهي تصر على أسنانها وفي نفس الوقت تحاول ترسم ابتسامة ناعمة على شفايفها: ثاني وش تبي؟؟

ثاني بقسوة: لو مادخلت الحين ورحت لعشاي وطقعت لج.. وش يكون موقفج؟؟

فاطمة ببرود: بأقول أبركها من ساعة.. فكة من ويهك..

(مع إنها في داخلها خايفة إنه يسويها ويفشلها في أهلها)

ثاني ضحك ضحكة ملولة باردة قصيرة وقال ببرود: بس أنا أبي أشوف وجهج..

عطيني عائشة..

فاطمة اشرت لعائشة اللي جات وخذت التلفون وثاني يقول لها: وسعوا لي درب أنا جاي..

*****************

عبدالعزيز راجع من صلاة العشاء..

يبي يلبس و يروح لخاله وعياله عشان يروحون مع بعض العشاء في بيت ثاني..

انفجع من المنظر اللي شافه..

لقى نورة راكبة السلم المحمول تنظف الستاير من فوق.. بالمكينة الكهربائية الصغيرة المحمولة...

عبدالعزيز انفجع منها بكل معنى الكلمة..

مايبي يتكلم يخرعها...

لأول مرة يحس عبدالعزيز إنه مفول عليها هي وحبها للتنظيف اللي مايخلص..

(يعني المرة مابغت تحمل.. وجننته تبي الحمال وأخرتها كل شوي تنط من سلم لسلم..!!!)

جاء وجلس.. وهي خلصت الناحية الأولى.. ونزلت تبي تنقل السلم الناحية الثانية وتطلع... شافت عبدالعزيز جالس

ابتسمت: يعني غريبة ماسلمت وخرعتني..

عبدالعزيز بغضب مكتوم وهو يستعيذ بالله من الشيطان الرجيم: السلام عليكم..

نورة ماكانت محتاجة أنه يتكلم عشان تدري أنه فيه شيء غير طبيعي: حبيبي فيك شيء؟؟

عبدالعزيز يستعيذ بالله من الشيطان الرجيم ويتنهد: يانورة ياحبيبتي.. رجاء حار.. السلم ذا لا عاد أشوفج راكبته.. تكفين.. أول كنتي مسؤولة عن روحج بس.. بس الحين أنتي مسؤولة عن روح ثانية لازم تحرصين عليها..

نورة بتوتر: بس

عبدالعزيز بهدوء تحته غضب: إذا أنتي تنظفين عشان زبيدة عجوز وماتقدر تطلع وتسوي اللي تبينه... من بكرة بأقدم لج على خدامة جديدة معها...

بس تكفين طالبج السلم ذا ماتركبينه مرة ثانية.. وتركدي في كل حركتج..

نورة بمرح وهي تحب رأسه: ياشين الزعل عليك.. على خشمي.. بس المهم ورني ابتسامة عزوزي الحلوة..

***************

بيت أبو صالح..

الحريم كلهم تغطوا عدا أم صالح وعائشة وديمة ونوف..

وعائشة طلعت لباب المقلط عشان تدخل ثاني..

فاطمة حست إنها مصابة بحمى.. وأنه جسمها ولع من الحرارة.. كانت تبي تبكي وبعنف

بس مستحيل تبكي و تشمت ثاني فيها..

ثاني دخل بمشيته الواثقة كأنه يتحرك في أملاكه الخاصة..

باناقته الاستثنائية.. وحضوره الطاغي..

وعائشة تمشي جنبه لحد ماوصلته عند فاطمة...

فاطمة قاعدة عينها في حضنها وتفرك أصابعها بتوتر.. أمها شافته دخل.. وقفتها..

ثاني وقف لثواني مذهول.. ثواني ماحد انتبه لها.. هو بس اللي حس فيها..

وقف ضايع ونظراته تبحر في عذوبة ملامحها

للجمال احترامه.. وللموقف رهبته..

كانت تقف أمامه بعذوبة الخجل تلفها

بفستانها الأنيق المنساب بألوانه القوية الأورانج والأخضر الفاتح.. فتحة صدره واسعة أكمامه كت..

ونقشات الحناء ملفوفة على ذراعها بصورة ناعمة متباعدة حتى عضدها.. (مها اللي أصرت عليها تتحنا بذا الطريقة)

مكياجها ناعم..والروج الأورانج كان حكاية مبهرة على شفايفها..

شعرها مرفوع في شينيون راقي بين لون صبغتها بطريقة جذابة..

تماسك ثاني وقرب منها بثقة وهو يقبل جبينها كما جرت العادة...

فاطمة انتفضت بعنف وهي تحس بملمس شفايفه الدافئة على جبينها الملتهب

وثاني نفسه حس بارتعاشتها وابتسم

ثم جلسها وجلس جنبها وهو يهمس لها: تصدقين مادريت أنج تعرفين تستحين مثل الأوادم لما يستحون من الأوادم.. (يرجع لها نفس كلمتها اللي هي قالت له)

عائشة قربت منه وباسته وباركت له هي وديمة ونوف..

ثم جابت له الدبلة أول شيء..

مسك يدها المرتعشة حس إنه انلسع من نعومة أناملها لكنه تجاوز أحاسيسه المربكة في ذات اللحظة..

لبسها الدبلة..

جات عائشة بتجيب طقم الشبكة الماسي لكنه اشر لها: لا..

وقال بهدوء بارد: خلاص الطقم تلبسه براحتها.. أنا تأخرت على الرياجيل اللي في مجلسي..

وعقب همس في اذن فاطمة بصوت واطي: والحقيقة أني انقرفت من تلبيس الدبلة.. أشلون يبوني ألبسج طقم كامل.. ياحبيبتي (ورص على كلمة حبيبتي)

فاطمة ابتسمت وهي تهمس له: قرف متبادل ياحبيبي (ورصت على كلمة حبيبي بسخرية)

عائشة ابتسمت: خلاص بس ارفعوا وجوهكم للصورة..

ثاني حضن فاطمة من خصرها وشدها ناحيته..(موب أملاكي.. كيفي أتصرف فيها!!)

وفاطمة ولعت من تصرفه.. قرصته في خصره من جنب تعبيرا عن اعتراضها..

حست إنها تقرص في حائط من صلابة عضلات جسده..

وكان رد ثاني عليها إنه قرصها في خصرها مكان ماكانت يده..

لكن هو حس أنه أظافره المقصوصة غاصت في جسدها الزبدي.. فاطمة أطلقت آهة آلم كتمتها بسرعة..

لكن ثاني سمعها وحسها لسعت قلبه غصبا عنه

مع أنه ماشدد في قبصته لها

قام يستأذن... وهو يلقي نظرة أخيرة على فاطمة..

وغصبا عنه.. عينه راحت لجنبها مكان ماهو قرصها..

انفجع وهو يشوف بقعة دم صغيرة تلوث الفستان مكان ماقرص..

ألتفت على أم صالح وقال لها باحترام: لو سمحتي يمه.. أقدر أكلم فاطمة على انفراد..

أم صالح بود: أكيد يمه...

ثم ألتفتت على فاطمة وهي تقول: يمه فاطمة قومي مع ريلج للمقلط..

فاطمة كان ودها إنها ترفض (هذا واحنا قدام الناس قطع جلدي.. بروحنا وش بيسوي فيني)

لكنها ماحبت تحرج نفسها قدام الموجودين.. أو تبين لثاني إنها خايفة منه..

ثاني مسك كفها لزوم البرستيج قدام الناس.. وراح فيها للمقلط..

أول ماوصلوا.. فاطمة شدت يدها من يده بعنف

في الوقت اللي ثاني قال لها بحزم: افسخي فستانج..

فاطمة تراجعت بعنف وقلبها ينط في حلقها من الرعب.. وهي تبي تهرب و تفتح باب المقلط..

لكن ثاني وقف على طريقها..

فاطمة وهي مفجوعة منه... لكنها قالت في نفسها البيت مليان ناس مايقدر يسوي لي شيء

ردت عليه بغضب: أنت واحد قليل أدب وحقير.. وخر عني قبل أصيح وألم عليك الناس..

ثاني ببرود: أنتي وين راح بالج؟؟ لا يكون مفكرة أني صعقت من جمالج وماني بقادر أصبر.. لا ياشاطرة.. كان غيرج أشطر

أنا أبي أشوف الجرح اللي في خصرج..

فاطمة تلفتت وانفجعت وهي تشوف الدم اللي غرق فستانها أكثر..لكن البقعة بعدها صغيرة نسبيا لكنها واضحة جدا..: يالمتوحش.. يالهمجي.. ياعل يدك الكسر

أنا فعلا حسيت إن قبصتك طلعت جلدي.. بس ماتوقعت أنها تدمي كذا..

ثاني ببرود: والله أنتي اللي بديتي.. عشان ثاني مرة تفكرين ألف مرة قبل تحطين راسج براسي..

والحين افسخي الفستان خليني أشوف لو محتاجة تروحين مستشفى وديتج..

فاطمة بغضب: ثاني أنت مجنون؟؟ وإلا عقلك على قدك؟؟

ثاني بنفس بروده: ليش يعني؟؟

فاطمة وغضبها يتزايد: وش شايفني عشان أفسخ ملابسي عندك.. توكل على الله..روح لعشاك

ولا تخاف ماني بقايلة لأحد أنه الدم منك.. باقول إنه دبوس كان في الفستان ماشفته.. وانت انتبهت للدم عشان كذا ناديتني

ثاني ببرود مثلج: ليه أنتي تعتقدين انه حد يهمني.. قولي لهم أنه أنا.. واذا حد عنده ريال خله يقطع..

أنا اهتمامي من باب انج صرتي حرم ثاني بن ناصر ومن ممتلكاته..

وممتككات ثاني لازم تكون على أحسن حال

مثلها مثل سيارتي.. نظارتي.. ساعتي.. ما أرضى فيهم خدش حتى لو أنا اللي خدشتهم

لكن أنتي كفاطمة ماتهميني أكثر من الجزمة اللي أنا لابسها في رجلي..

فاطمة حست إنها بتموت من كلامه الحاد الموجع وسيل إهاناته لكنها تماسكت وهي تقول له ببرود: إذا انت تشوفني ممتلكات ثمينة شيء زين صراحة.. يدل على طيبة قلبك الزايدة..

لأني أشوفك بالضبط مثل لعبة... لا ولعبة رخيصة بعد... بألعب فيها شوي ثم بأدوسها وارميها في الزبالة..

ثاني مسك نفسه لا يصفعها.. وكل واحد يعطي الثاني ظهره ويرجع لمكانه..

فاطمة للحريم في الصالة...

وثاني لأبو صالح في المجلس

وكل واحد منهم مجروح من الثاني

مجروح للنخاع

بعد الغياب/ الجزء المئة واثنان وعشرون

#أنفاس_قطر#

عائشة مرجعة نوف لبيت عبدالله عقب ماخلص حفل الخطوبة على خير

الحفل اللي كانوا ضحاياه هم المعاريس أنفسهم..

وهم يوقفون كان عبدالله وولده يوقفون جاي من بيت ثاني..

عبدالله وقف عند سيارتهم

وهو يقول بمودة: مبروك عائشة ملكة ثاني.. مابغى..

عائشة بنفس المودة: ايه والله مابغى.. الله يبارك فيك.. عقبال مانفرح بعبدالعزيز إن شاء الله..

عبدالله يبتسم وهو يحط يده على كتف عزوز اللي واقف جنبه: تو الناس.. خليني أفرح بتخرجه أول..

عقب عبدالله ألتفت وسأل عائشة: وديمة وينها موب معكم؟؟

ديمة اللي كانت في الناحية الثانية وموطية رأسها خجلانة من الميكب اللي هي حاطته

لأنها أول مرة في حياتها تحط ميكب كامل مع أنها كانت لابسة عبايتها ومغطية شعرها عدل.. ردت بخجل: أنا هنا بو عبدالعزيز..

عزوز انتفض قلبه بعنف وهو يسمع صوتها.. وكان يبي ينسحب

عبدالله طل عليها في السيارة وهو يقول بمرح: وش هالزين ديومتي.. ماخليتي للبنات شيء..

ديمة بتموت من الخجل: شكرا على المجاملة..

عبدالله بود: لا والله موب مجاملة.. الله يحفظج يا أبوج..

عزوز بيموت يبي يشوفها وهو يسمع أبوه يمدحها.. لكنه قهر نفسه.. وهو يستأذن ويدخل داخل..

وعبدالله حاول فيهم ينزلون.. بس عائشة أصرت يمشون لانهم تعبانين واكيد البيت يبي ترتيب عقب عشاء الرجال اللي فيه..

وتبي تشوف الخدم وش سووا..

قبل دقايق أول مادخلت نوف..

دخلت عند أمها مباشرة وهي تقول بحماس: واو مامي فاتتج الخطوبة

تجنن..تجنن!!

وأحلى شيء خالي ثاني وفاطمة.. كل واحد يقول الزود عندي...

خالي برزته... وهي برقتها... يجننون..

جواهر بحنان: الله يجمع بينهم في خير.... وأنتي حبيبتي تعال إجلسي عند أخوج.. أبي أطلع غرفتي..

فيه بحث رئيس قسمي اتصل يسألني عنه

أبي أروح أجيبه من فوق..

جواهر طلعت فوق..

وعبدالله لما دخل.. مر باس ماجد وحسبها هي في الحمام

طلع يبي يأخذ شاور ويرجع ينزل عليهم..

وخصوصا إن نوف وعزوز كلهم جالسين يتخانقون على ماجد..

دخل غرفته

سمع صوت غريب

ألتفت لجلسة المكتب..

حس بشعور عذب يجتاحه وهو يشوف جواهر معطيته ظهرها.. وتقلب أوراق في يدها..

قرب بشويش.. وحضنها بحب هادر من خلفها وهو يطبع قبلة دافئة على عنقها

جواهر أول شيء انصدمت ثم ارتعشت..

بس عقب ابتسمت وهي تقول: بس عبدالله كفاية عليك كذا..

عبدالله فلتها بالراحة وهو يبتسم: أنتي وش قحط المشاعر اللي عندج؟؟

جواهر بعذوبة وهي تلف ناحيته: هانت كلها أقل من شهر وأخلص الأربعين..

عبدالله بمرح: ياكبرها عند الله.. أنا شكلي بأسافر أي مكان لين تخلصين أربعين العجايز ذي..

جواهر بحنان: مش بوزك أخليك تخطي برا الدوحة خطوة وحدة وأنا ماني بمعك... حرمت..

عبدالله حضنها بحنان هادر: وأنا ما أقدر أبعد عنكم.. خلاص

عقب عبدالله وخرها بالراحة وهو يقول بعمق: تدرين أني ماشفت شعرج من يوم جيت.. كله رافعته.. اشتقت له..

قال كلمته وهو يمد يده للكلبس اللي رافع شعرها ويفكه.. عشان ينهمر شعرها الحريري مثل شلال ليل أسود على كفوفه..

عبدالله شهق بإعجاب كبير وهو يشوف إن شعرها طال كثير عن أخر مرة شافه..

جواهر شافت نظرة الإعجاب الموجعة في عيونه فقالت بخجل: مو أنت اللي قلت لي لا عاد تقصينه.. ماطبه المقص من يوم اختفيت..

عبدالله دخل كفوفه في خصلات شعرها المتناثرة وهو يمرر أصابعه من خلالها.. وانفعال عنيف يجتاحه..

جواهر بخجل وهي تلم شعرها: خلاص عبدالله أنا بأروح..

عبدالله تنهد وهو يتجاوزها: روحي حبيبتي..

****************

سالم ومنيرة يدخلون بيتهم

عقب ماسالم جاب منيرة من بيت فاطمة

سالم بود: تاخرتي والله لين كلمتيني..

منيرة برقة: خبرك.. مهوب كل يوم بتنخطب صديقتي..

سالم بخبث: ومهوب كل يوم بتنخطب أختس..

منيرة شهقت وهي كانت تخلع نقابها وتحط شيلتها على كتوفها: وشو؟؟

سالم كان يتمعن فيها بإعجاب: لا لا خليني أملا عيني من ذا الزين شوي... إذا كل يوم بتنخطب فيه صديقتس بتحلوين كذا

أنا مستعد أزوجهم كلهم..

منيرة وهي تمسك في ذراعه وتقول: خلك من العيارة... صدق سويرة انخطبت..

سالم: يس.. انخطبت.. ووافقت بعد

منيرة بحرة: الخايسة ماقالت لي شي..

سالم يبتسم: تلاقينها مستحية... تو عمي قال لي الليلة

وانتي صار لس يومين لاهية مع رفيقتس..

وبكرة أو بعد بكرة الملكة إن شاء الله

منيرة بفضول قاتل: منهو؟؟

سالم بلهجة عادية: حمد ولد راشد بن فهد..

منيرة ماقدرت تمسك روحها من الضحك اللي انتابها كموجة كاسحة..

سالم صار يضحك من ضحكها: ليه تضحكين؟؟

منيرة بين ضحكاتها: مافيه شيء بس طرت علي سالفة!!

**********************

في الليل متاخر..

فاطمة خذت لها شاور..

طالعة من الحمام..

تفتح روبها قدام المراية وتشوف مكان قبصة ثاني المزرقة

(الله يأخذه هو ويده المسمومة..

موب آدمي ذا

مجرم.. مجرم)

(بس أنتي اللي بديتي

فيه مره تمد يدها على ريلها ليلة خطوبتهم)

(خذه ربي من ريل

ياحرتي بس)

فاطمة لبست ثم صلت

جات تبي تنام

مو قادرة تنام من إحساسها بالألم في جنبها

فاطمة كانت ناعمة ومرفهة بزيادة

ممكن قد ينطبق عليهم الوصف

يجرح النسيم خدها

(أنا موب قادرة أنام

والأخ اكيد مكبر وسادته الحين

عقب ماقطع جلدي

ياويله لو ماراح أثر قبصته ذي)

ثاني على الطرف الثاني

مو قادر ينام

محتر منها.. بيولع من تطويلها لسانها عليه

(أنا وحدة تتجرأ وتقول أني لعبة رخيصة

بتلعب فيها ثم ترميها في الزبالة

أنا

أنا ثاني بن ناصر ينقال لي كذا)

شعور هادر بالغضب عليها ومنها يتعاظم في نفسه

وعلى الطرف الآخر وغصبا عنه شعور آخر متعاظم بالحنان

ينمو في صدره ناحيتها..حسها شيء هش قابل للكسر عند أقل هزة.. ومع كذا تدعي الجَلد والقوة

(عمري في حياتي ماتخيلت إنه فيه مره بذا النعومة

حسيت جلدها يذوب في يدي

وإلا نعومة ايديها

شيء فوق الخيال)

فاطمة مو قادرة تنام.. الظهر بردت حرتها فيه من حرة موقف المستشفى

وعقب التلبيس بردت حرتها فيه من كلامه اللي يغث

بس الحين أشلون تبرد حرتها في جلدها اللي تمزع من سواياه..

رقمه.. رقمه كان مميز وسهل الحفظ.. ولصق في مخها..

بسرعة طبعت له مسج وأرسلته..

" ياعل يدك الكسر

أنا موب قادرة أنام من الألم في جنبي

بأقعد أدعي عليك لين انام

بس انت اكيد الحين نايم وتحلم بعد

كوابيس إن شاء الله"

ثاني كان متمدد على سريره لما وصله المسج

فتحه وابتسم

حس بخليط هادر من المشاعر

حسها أنثى مثيرة.. وطفلة.. مجنونة.. وعاقلة

امرأة المتناقضات فعلا

اللي تجلب معها فعلا مشاعر متناقضة

مستحيل تجتمع إلا عشان امرأة مثلها

غضب وشفقة وحنان ورغبة وعطف وحقد

مارد عليها ثاني

(خلها تعتقد أني نمت

وتحترق شوي)

*********************

مر 3 أيام..

دانة بدت تجهز لعرسها مع إحساسها لأول مرة إنها عروس فعلا..

فاطمة وثاني لا شافوا بعض ولا كلموا بعض خلال الأيام اللي فاتت..

سارة اليوم ملكتها...

*********************

بعد صلاة العصر في بيت أبو علي

سارة متوترة لأبعد حد

ومنيرة عند سارة في غرفتها وبدت تقط النغزات المعتادة وهي تضحك: هذا اللي وش نبي بسيرته؟؟ وخل نذكر شيء عدل؟؟ حُميّد الملقوف؟!!

سارة بتوتر: مناري تكفين.. ماني بناقصتس..

منيرة بفضول: بأموت وأشوفه.. أوصفيه لي سويرة..

سارة بخجل: وصفوا لس طوفة تطيح فوق راسس..

منيرة بفضول أكبر: تكفين تكفين السوري..

سارة بتوتر وخجل: رجّال مثل الرياجيل.. وانقلعي لا أهفس بأكبر ماعندي..

دخل عليهم علي: سارة ألبسي عباتس وتعالي..

سارة ماقدرت تحرك رجولها.. حست بشلل تام يشل حركة أطرافها...

علي بعصبية: سويرة خلصي علي.... الشيخ تحت في الصالة..

سارة بدت تبكي.. منيرة وعلي انفجعوا.. سارة شخصيتها قوية مايبكيها إلا شيء كايد...

علي برعب: سارة ماتبينه ترا العرس مهوب جبرية.. عاد حن على البر يا أخوس..

سارة سكتت... ومنيرة ابتسمت وهي تقول لعلي: خلاص أنت انزل وأنا وياها نازلين وراك..

منيرة جابت لسارة عبايتها.. والبسوا كلهم.. ونزلوا تحت للشيخ

****************

قبل المغرب بشوي..

فاطمة داخلة بيتهم جايه من الجامعة..

دخلت للصالة وهي تخلع نظارتها الشمسية.. وعينها على أمها اللي كانت قاعدة مقابلها..

فسخت عبايتها اللي كانت عباية مسكرة واسعة نفس الثوب مستورة وماكان باين تحتها شيء من ملابسها.. رمتها على الكنب هي وشيلتها ونظارتها وشنطتها والكلبس اللي كان رافع شعرها

عشان يبين لبسها اللي كان تحت العباية..

برمودا ابيض قطن واسع... وتيشرت كت وردي قطن خفيف

أمها كانت تأشر لها بس هي ما انتبهت..

باست أمها بوسات كثيرة وعقب رمت نفسها في حضن أمها وتمددت على الكنبة وهي تقول بدلعها الطبيعي: مساء الورد ياحلو... واي ماماتي اليوم حر مووت بغيت أفطس.. أبي لي شاور 3 ساعات... إلا باباتي وينه؟؟

أمها كانت تبي تقول لها شيء مهم..

بس مع تمددها في حضنها.. ارتفع التيشرت شوي..

فبان خصرها واللون البنفسجي المتسع مكان قرصة ثاني

أمها برعب: وش هذا اللي في خصرج؟؟

فاطمة وهي تلف ناحية أمها وتقول بدلال مرح: واي ماماتي لا تزودينها.. هذا من شكة الدبوس اللي ليلة خطوبتي..

ومع التفافها طاحت عينها على أخر شخص في العالم كانت تتمنى أنها تشوفه في هذي اللحظة بالذات.. جالس على الكرسي المقابل

ثاني

بعد الغياب/ الجزء المئة وثلاثة وعشرون

#أنفاس_قطر#

فاطمة وهي تلف ناحية أمها وتقول بدلال مرح: واي ماماتي لا تزودينها.. هذا من شكة الدبوس اللي ليلة خطوبتي..

ومع ألتفافها طاحت عينها على أخر شخص في العالم كانت تتمنى أنها تشوفه في هذي اللحظة بالذات...جالس على الكرسي المقابل

ثاني

اللي كان جالس كان في عيونه نظرة مرعبة

نظرة خليط من

الغضب والحنان والتساؤل والقسوة

فاطمة نطت من حضن أمها وهي تاخذ عبايتها وتلبسها بدون ماتلبس الشيلة.. وشعرها الكستنائي متناثر على سواد العبايه..

(هذا أشلون ما انتبهت له

صدق أني غبية.. غبية)

وأمها بالها مشغول بشيء ثاني وهي تمسك يد فاطمة وتقول بقلق: وشكة الدبوس تسوي كذا؟!!

فاطمة بارتباك وخجل وهي ماتقدر ترفع عينها من الأرض : خلاص يمه فديتج اليوم أصلا احسن من اليومين اللي فاتوا..

أم صالح قامت وهي تقول بتعب: خلاص بكيفج.. اقعدي مع ريلج.. باروح أقول للخدامة تجيب لكم فوالة..

فاطمة مسكت في يد أمها برجاء وهي تقول: اقعدي يمه أنا باروح..

أم صالح تبتسم: ثاني يبي يقعد معاج مو معاي..

وثاني لحد الحين مانطق بكلمة.. وفاطمة مستغربة..

وحاسة إنه ساكت على مصيبة..

فاطمة سكتت ورجعت تجلس في أبعد مكان عن ثاني..

بعد دقيقة صمت.. ثاني ببرود غاضب: ممكن أعرف أنتي أشلون تطلعين من البيت بلبس مثل اللي أنتي لابسته..؟؟

فاطمة كانت في غاية الخجل تبي ترد عليه ببرود بس ماقدرت.. فقالت بصوت واطي: الجامعة حر.. وبعدين شوفة عينك عبايتي مسكرة وواسعة.. ولبسي نهائي موب مبين من تحتها..

ثاني بنفس الغضب المغلف بالبرود: ياسلام.. خوش عذر..

فاطمة تماسكت شوي فردت عليه ببرود: ثاني أنت وش تبي؟؟.. غيران يعني؟؟ ما أعتقد.. وهالتمثيلية موب لايقة عليك..

ثاني بحزم قاسي: اسمعيني عدل

وكلامي ما أثنيه ولا أعيده.. تحت العبايه فوق العبايه.. تلبسين لبس محتشم هذا أولا..

ثاني شيء وجهج تغطينه.. ياويلج لو شفتج طالعة وإلا داخلة وجهج مكشوف...

فاطمة بغضب: والله أنت خذتني ووجهي مكشوف.. بتجي تحكم فيني الحين..

ثاني ببرود: أمج تقول أنج مصلية.. والفرض مايفوتج.. وحتى قيام الليل تصلينه... الوحدة المصلية يوم يأمرها زوجها بشيء ترد عليه بعشر.. وإلا تطيعه؟؟

فاطمة انقهرت.. عرف يمسكها من يدها اللي توجعها.. ماتقدر تعصاه وهي عارفة أن عصيانه عصيان لربها..

ردت من بين أسنانها: زين ثاني.. بأغطي وجهي دام اسم إنك زوجك.. بس لا طلقتني رجعت أكشفه..

ثاني ضحك ضحكة قصيرة وقال لها بقسوة: ياحليلج ياشاطرة.. ألفتي السالفة وصدقتيها..

طلاق مافيه.. والعرس خلاص بنحدده بداية الإجازة الصيفية لأني سألت أمج وقالت لي هذي أخر سنة لج في الجامعة..

وعقب كمل بأمر حازم: وقومي الحين افسخي عبايتج ووريني الجرح اللي في خصرج لأني ماشفته عدل..

فاطمة بحرج: ثاني أنت عليك يني اسمه افسخي ووريني الجرح... أسفة اسمح لي...

ثاني ببرود: الحين أنا توني شايفه.. وأنا ماقلت لج افسخي ملابسج كلها.. أقول ارفعي طرف التيشرت عن الجرح بس خليني أشوفه..

فاطمة بحرج وخجل: أرجوك ثاني اسمح لي ما أقدر.. وبعدين أنت وش تبي فيه تشوفه؟؟

ثاني ببروده: أظني قلت لج السبب.. الجرح في خصرج.. مثل خدش في سيارتي.. نشيك عليه ليس إلا..

فاطمة ببرود: عندك سالفة غير هذي أو اسمح لي أطلع.. أبي ألحق أخذ شاور قبل صلاة المغرب..

ثاني ببروده المعتاد: أنا بعد باروح أصلي في المسجد القريب من بيتكم.. وعقب بارجع عشان أطلع أنا وياج..

فاطمة برعب: وين نطلع؟؟

ثاني بسخرية: نطلع مثل ماكل الناس المخطوبين يطلعون.. أنا أستأذنت أبوج خلاص..

فاطمة تنهدت: والله هذولاك المخطوبين العاديين.. موب اللي بينهم حرب داحس والغبراء..

ثاني ببرود وسخرية: يعني ماتبين تطلعين معي.. وأبوج اللي استأذنته وش أقول له؟؟ انج زعلانة؟!!

فاطمة ببرود: لا تستخدم ذا الأسلوب معي.. وابوي قل له اللي تبي.. مايهمني.. طلعة معك ماني بطالعة..

قالت كلمتها ووقفت.. تبي تطلع فوق.. عطته ظهرها

لكنها فوجئت باليد القاسية اللي تطبق على عضدها وتلفها وترجعها مكانها بقسوة

وهي تشوف وجه ثاني قريب منها تموج عليه عشرات الانفعالات..

نزلت رأسها بخجل.. لكنها صعقت بيد ثاني اللي دخلها في شعرها وهو يشده لأسفل ويرفع وجهها ناحيته ويقول بقسوة: إياني وياج تسوينها مرة ثانية.... تعطيني ظهرج وأنا أكلمج

أنا زوجج وغصبا عنج تحترميني

المرة ذي باعديها لج..

بس سويها مرة ثانية.. وشوفي اللي بيصير لج..

قال كلمته ثم دفها الكنبة اللي كانت جالسة عليها

وطلع...

أمها رجعت بعد دقايق..

لقت فاطمة جالسة بصمت على الكنبة..

وثاني مو موجود

أمها باستفسار: وين راح ثاني؟؟

فاطمة بجمود: راح يصلي المغرب...

*****************

بعد دقايق ثاني في سيارته..

حاسس بتوتر كبير وقلق يجتاحه..

ومشاعر الغضب الغريبة الممزوجة بالحنان الأغرب

تتصارع في نفسه..

(كان المفروض أني عطيتها كف على وجهها

عشان تتجرأ ثاني مرة إنها تعطيني ظهرها وأنا اكلمها)

(هذي أخرتها ثاني

تبي تنزل نفسك لدرجة أنك تضرب مرة)

(جننتني ذا الفاطمة!!

جننتني..

لما أشوفها أحس بكل الرغبات المتضادة تتصارع فيني

يصير نفسي أخانقها

وفي نفس الوقت أحضنها

يصير نفسي أعطيها كف على وجهها

وفي نفس الوقت أغمر ذا الوجه بقبلاتي

يصير نفسي أنفيها خارج حياتي

وفي نفس الوقت احبسها داخل قلبي وروحي

جننتني

جننتني

عمري ماكنت محتار كذا!!)

وثاني في أفكاره الهائجة المضطربة والمتشابكة

شاف أبو صالح جاي ناحية البيت يتسند على ولد جيرانهم..

ثاني نط من سيارته برعب وهو يركض لأبو صالح..

سأل الولد: وش فيه؟؟

الولد بقلق: كان يتقهوى مع أبوي وتعب وقال لي أجيبه للبيت..

ثاني قال للولد: خلاص روح.. مشكور..

وسند هو أبو صالح لين وصله سيارته..

أبو صالح بضعف: وين بنروح؟؟

ثاني بحزم: بنروح للمستشفى..

أبو صالح بتعب: مافيه داعي يا أبوك.. أبي ارتاح شوي بس..

ثاني بحزم أكبر: مايضر ياعمي.. خل نروح نتطمن عليك..

ثاني ركبه جنبه.. ثم ركب وحرك بسرعة..

أبوصالح كان يسكر عيونه ويفتحها.. ويقول كلام غير مفهوم.. ويبتسم.. وقلب ثاني بدأ يرقع بقوة.. وهو يحس بألم عميق ومر

الحالة هذي ماهي بغريبة عليه.. يذكرها عدل قبل حوالي عشر سنين..

لحظات أبوه الأخيرة..

ثاني تنهد بعمق وهو يقول بحزن حز في قلبه لابعد حد: يبه..

قل أشهد أن لا إله إلا الله وأن محمدا رسول الله..

أبو صالح فتح عينه وابتسم بوهن: قلت لي يبه.. طول عمري تمنيت ولد.. والله مارزقني غير فاطمة.. وفاطمة عندي بألف ولد

ثاني بألم مر: وأنت والله العظيم أبوي.. طالبك قل أشهد أن لا إله إلا الله وأن محمدا رسول الله..

أبو صالح رجع يبتسم وهو يقول بصوت خافت واهن عميق:

أشهد أن لا إله إلا الله وأن محمدا رسول الله

أشهد أن لا إله إلا الله وأن محمدا رسول الله

أشهد أن لا إله إلا الله وأن محمدا رسول الله

ثاني حس الحزن يخنق روحه.. ودمعته الغالية تخر من عينه..

مافيه شيء يهز غرور الإنسان وجبروته وطغيانه مثل لحظة الموت.. يرحل الإنسان عن الدنيا عاري مثل مادخلها عاري وغرور الدنيا يبقى في الدنيا..

أبو صالح مسك يد ثاني اللي كانت على قير السيارة وقال له بوهن شديد: تكفى يا ابوك وصاتك فاطمة وأمها.. وصاتك فاطمة وامها.. تراهم من رقبتي في رقبتك..

أم صالح أنا عارف إنها ماعادها بمطولة عقبي..

بس فاطمة أمنتك الله ماتقهرها يوم..

فاطمة ماعرفت غير الدلال.. طالبك ماتغير عليها ولا تحسسها إنها فقدتني..

ثاني بصوت واثق لكن مخنوق بعبراته: ربي يشهد علي أنه فاطمة وامها في رقبتي وأنهم ماينضامون وأنا حي..

وفاطمة في قلبي وعيني.. أنا أبوها وأخوها وزوجها..

ثاني كان يسوق بسرعة صاروخية متوجه لطوارئ مستشفى حمد..

كان متأكد إن أبو صالح في النزع الأخير..

لكن الأمل في قلب الإنسان كان يدفعه للتكذيب..

كان يبي يكذب نفسه.. ويحاول ينقذه من قدره..

بس المكتوب مامنه مهروب

والقدر لازم ينفذ..

وسبحان الدائم الحي الذي لا يموت..

مع وقوفه قدام بوابة الطوارئ كان أبو صالح يشهق ويتشهد

ويرتعش ارتعاشته الأخيرة..

بعد الغياب/ الجزء المئة وأربعة وعشرون

#أنفاس_قطر#

بعد حوالي 3 ساعات..

في بيت أبو صالح..

فاطمة وأمها كانوا منتهين من القلق..

كانوا يدقون على أبو صالح وموبايله مقفول..

المستشفى عطوا ثاني أغراضه كلها

وحطوه في الثلاجة استعدادا لدفنه ثاني يوم الصبح

خذ موبايله وقفله..

وأتصل في رياجيل خوات أبو صالح وخوات أم صالح اللي كان خذ ارقام بعضهم يوم عشاء الملكة..

عشان يبلغون زوجاتهم.. ويروحون لفاطمة وأمها يبلغونهم ويهدونهم..

ثاني كره أنه هو اللي يبلغهم أو يشوف لحظة انهيارهم..

لكنه في نفس الوقت حس إنهم مسؤوليته وانه من مسؤوليته أنه يطمن قلوبهم ويهديهم..

ثاني توجه لبيت أبو صالح..

كان متوقع إنه بيلاقي الناس عندهم..

لكنه مالقى حد.. خوات أبو صالح وأم صالح كلهم كانوا متحطمين.. وماكان حد منهم يبي يكون في وجه المدفع لما فاطمة وأمها يعرفون بالخبر..

ثاني اتصل بزوج أكبر وحدة في خوات أبو صالح وهو اللي بلغه إن زوجته منهارة من الخبر وموب مستعدة انها هي اللي تبلغ فاطمة وأم صالح

ثاني سمى بسم الله الرحمن الرحيم.. تنهد بعمق

وفتح باب الصالة ودخل وهو حاس إن داخله يذوب حزن وتوتر..

لقى أم صالح وفاطمة قاعدين في الصالة متوترين

أول ما انفتح الباب نطوا يحسبونه أبو صالح..

أول ماشافوا وجه ثاني المتغير

ما احتاجوا حد يقول لهم إن وراه مصيبة

فاطمة نطت لثاني وهي تقول بصوت مخنوق مكتوم مرعوب من القادم ومن المجهول: ثاني وين أبوي؟؟ وين أبوي؟؟

ثاني بصوت مطمئن: "قل يأيتها النفس المطمئنة ارجعي إلى ربك راضية مرضية.. فادخلي في عبادي وادخلي جنتي"

أبشركم بحسن خاتمته..

أم صالح رجعت تجلس وهي تقول بهدوء وإيمان كبير: إنما الصبر عند الصدمة الأولى

إنّا لله وإنّا إليه راجعون

اللهم أجرنا في مصيبتنا وتجاوز عنه واخلفه خيرا منا..

ثاني كانت عينه على فاطمة ينتظر ردة فعلها بتوتر وقلق وحزن

فاطمة سكتت دقايق مثل تمثال سُحبت منه الروح..

مخلوق جامد لا تبدو عليه أي بوادر للحياة

ثم توسعت عيونها وهي تصرخ برعب موجع مر هادر:

يـــــــــــبــــــــــــ ــــــــــه..

يــــــــــــــــــــــــ ـــــبـــــــــــــــــــ ـــــــه

يــــــــــــــــــــــــ ــــــــــــبــــــــــــ ـــــــــــــــــــــه

وين رحت وخليتني يبه..

وين رحت وخليتني؟؟؟

ورفعت يديها لوجهها تبي تلطمه..

لكن ثاني تحرك بسرعة وكتف ايديها وهو يقول بحزم:

إلا اللطم والعويل.. إلا اللطم والعويل..

ابكي بس لا تلطمين ولا تعولين..

فاطمة رفست ورفست وهي تصارخ:

خلني.. مالك شغل فيني..

خلني.. أنا أكرهك.. اكرهك

اطلع من بيتنا.. اطلع..

فكني.. فكني..

أكرهك.. أكرهك

فكني..فكني

وثاني مستمر بتكتيفها

وأمها تطالعها بدموعها الصامتة وهي تكرر جملة واحدة

" إنّا لله وإنّا إليه راجعون"

فاطمة بدت تهدأ وصراخها يتحول لرجاءات موجعة:

تكفى ثاني هدني.. خلاص..

تكفى.. هدني

ثاني هدها ولفها ناحيته

فاطمة رمت نفسها على صدره وهي تبكي بكاء خافت موجع..

ثاني سحبها وجلسها على الكنبة وهو حاضنها وهي حاضنته من خصره بقوة.. وهو يهمس لها بحنان وحزن: ابكي.. وعبري عن حزنج.. بس أوعديني لا تلطمين ولا تعولين عليه.. أطلبي له الرحمة.. هذا اللي هو يبيه منكم

ولا تحاتين شيء أنتي وأمي .. أنتو في ذمتي أنا

وأنا مكان أبوج.. لا تشيلين هم الدنيا وأنا راسي يشم الهوا..

فاطمة شددت احتضانها لخصره وهي تبكي أكثر..

وثاني يحضنها بقوة أكبر وحنان أكبر وأكبر..

*********************

خلصت أيام العزاء الثلاثة

وأصبحنا بعد وفاة أبو صالح بأسبوع

خلال أيام العزاء بيت أبو صالح مافضا من الناس.. مها ومنيرة ماتركوا فاطمة دقيقة وحدة حتى كانوا ينامون عندها..

منيرة رجعت لبيتها بعد أيام العزاء.. بس مها بعدها تنام عندها لحد الحين.. وحتى خالاتها وعماتها وبناتهم بعدهم ينامون عندهم لحد الحين

ماكانوا حابين يتركونهم للهواجس والأحزان..

الكل جاء وعزا..

حتى جواهر اللي كانت بعدها نفاس..

جات خلال أيام العزاء الثلاثة..

وحضورها وكلامها المطمئن كان له تأثيره البالغ على فاطمة

لأن مافيه حد ذاق الفقد والوجع مثل جواهر

وصبرت على كل شيء مرت فيه..

ثاني ماشافته من عقب أول يوم..

ثاني هو اللي قام بعزاء الرجال كامل كأنه هو فعلا ولد ابوصالح..

لكنه بعدها ماظهر في بيت أبوصالح ولا حتى اتصل..

كان يسأل عنهم عائشة اللي كانت تطمنه انهم متصبرين ومحتسبين مصيبتهم عند الله سبحانه..

بعد أسبوع..

ثاني اتصل على فاطمة..

وطلب منها تجيه في المقلط..

فاطمة في داخلها كانت ماخذها على خاطرها شوي

إنه له أسبوع لا سأل ولا طل..

فاطمة دخلت بتردد للمقلط بعبايتها وشيلتها..

ثاني كان قاعد على الكنبة..

لما شافها دخلت.. وقف..

مضت لحظات وكل واحد منهم يسبر ملامح الثاني..

فاطمة حست بألم غير مفهوم.. وهي تشوف لحيته نامية وغير مشذبة.. وشكله باين عليه التعب..

وهو حس بألم أكبر وهو يشوف وجهها المرهق بآثار البكاء والسهر الطويل عليه..

ما احتاجوا يتكلمون او يتعاتبون..

ثاني فتح ذراعيه لها وهي استجابت لدعوته.. ورمت نفسها على صدره

حضنها بحنان وهي بدت دموعها تنسكب بصمت..

فلتها بالراحة وهو يطالع في وجهها

مسح دموعها بكفوفه بكل حنان

وهمس لها: أشلونج حبيبتي؟؟

"حبيبتي!"

(يا الله.. ما أعذب ذا الكلمة من بين شفايفه)

ردت عليه بوجع: الحمدلله على كل حال..

ثاني بحنان: أمي أشلونها؟؟

فاطمة حست بالتأثر يجتاحها وهو يقول أمي فردت بنفس تأثرها: الله يخليها لي.. زينة الحمدلله..

ثاني بهدوء: يخليها لنا كلنا..

ثم كمل بحنان مخلوط بالحزم: فاطمة أي شيء تحتاجونه.. أنتي وإلا الوالدة تطلبونه مني أنا... لو دريت أنكم طلبتم أي شيء حتى لو كان بسيط من غيري بأزعل..

وأعتقد أنج شفتي إن زعلي شين..

فاطمة بابتسامة دامعة: شفته.. الله يكفينا شره..

ثاني تأثر من ابتسامتها العذبة رفع سبابته ولمس فيها شفايفها

ثم قبل سبابته برقة..

فاطمة انتفضت بعنف وتراجعت..

لكن ثاني تراجع

وانسحب للخارج..

**********************

بعد أقل من شهر...

زواج سعود ودانة باقي عليه أيام بس..

دانة أنهت كل تجهيزها..

واختارت فستانها..

لكنها متوترة جدا..

وسعود مازال محجوز في المعسكر..

فاطمة بدأت بالتأقلم على غياب والدها

ولكن الحزن يظل بالقلب

كانت تبي تترك الجامعة وتعتذر عن الفصل الحالي

لكن ثاني رفض..

وهي ماتقدر تعصي ثاني..

وخصوصا إن مشاعرها ناحية أبوها وطاعتها له

تحولت بشكل عنيف لثاني اللي أصبح رب أسرتهم بالمعنى الكامل

كان يزورهم بشكل دائم.. ويجيب أغراض البيت..

لكنه مايحب يختلي بفاطمة أو يجلس معها بروحهم

كان يفضل إن أم صالح تكون متواجدة طول الوقت..

ينتظر إن أم صالح تفك الحداد عشان يحدد موعد جديد للعرس

وطبعا قرر إن أم صالح تنتقل للسكن في بيته بعد زواجه من فاطمة..

سارة حرم الأستاذ حمد بن راشد.. تحدد موعد عرسهم في الإجازة الصيفية

ومازال حمد يمارس سلطته ورقابته عليها في الشغل

لكنها ماعادت تضايقها بقدر ما تحسسها بحبه وغيرته عليها..

البقية مازال الحال على ماهو عليه بالنسبة للكل

الحوامل كلهم صحتهم تمام بين وحم نورة واستقرار وضع منيرة وقرب موعد ولادة دلال..

عبدالله وجواهر

عبدالله من قد ماهو يعد للاربعين تخلص... نسى عدد الأيام ودخلت الأيام في بعضها عنده مع انشغاله بعياله وبيته وشركته ومسؤوليات البنك...

الصبح بدري..

اليوم جواهر تخلص الأربعين..

أمس راحت الصالون رتبت قصة شعرها بس بدون ماتقصره أبدا

حفاظا على رغبة عبدالله أنه يكون طويل

وخلصت كل شغلها في الصالون أمس

وعبدالله اللي كان مشغول جدا اليومين اللي فاتو في مؤتمر للبنك ما انتبه لغيابها.. وهي كانت مبسوطة عشان تفاجئه..

وهي قاعدة تغير لماجد.. رن موبايلها

جواهر بود: هلا والله بأم حمودي..

نجلاء بنفس الود: يحيج ويبقيج... عندج حد؟؟

جواهر بابتسامة: داقة الساعة 8 الصبح تقولين عندج حد.. لا ماعندي حد انا ومجود بس..

نجلاء بمرح: زين درب درب.. انا عند الباب..

جواهر مستغربة من موعد زيارة نجلاء لكنها قالت بترحيب صادق: تفضلي البيت بيتج..

شوي الا نجلاء داخلة بأكياس كثيرة.. وساحبة لها سيدة هندية مليانة شوي وراها...

جواهر قامت وسلمت وهمست لنجلاء: من هذي اللي أنت جايبتها؟؟

نجلاء ضحكت: معقولة ماتعرفين زبيدة؟؟

جواهر ضحكت: والله أعرف زبيدة شغالتي القديمة اللي عند بيت عبدالعزيز الحين..

نجلاء بعيارة: بلاج مسبهه كالعادة.. حد مايعرف زبيدة؟؟

هذي شهرتها في الدوحة... مثل شهرة بريتني سبيرز في أمريكا..

نجلاء أشرت لزبيدة التي كانت شايلة شنطة سوداء في يدها: تعالي زبيدة هذي عروستنا..

زبيدة ابتسمت وهي تطالع جواهر باعجاب: ماشاء الله.. هلو واجد واجد.. سيم سيم كمر..

جواهر وهي تضحك: نجلاء انتي وش أنتي مهببة.. وش عروسته بعد؟؟

نجلاء وهي تضحك: انتي الواحد لو يوكنج على روحج مامنج فرج...

يوم زواجج لولا بنتج نوف والا كان فشلتينا في عبدالله

والحين في تطلوعج لولاي والا كان فشلتينا في عبدالله بعد..

جواهر تضحك: والله اني خلصت شغلي كله والبارح توني جيت من الصالون..

نجلاء بمرح: خلصي علينا مدي رجولج وايديج خلي زبيدة تشتغل..

جواهر بصدمة: حناء؟؟ تدرين ما أواطنه..

نجلاء بابتسامة: موب لازم تواطينه.. بس بتحنين غصبا عنج...

انتي عارفة عشان أطلع زبيدة من محلها وأجيبها عندج كم دافعة لها.؟؟.. تبين تخسريني على الفاضي

جواهر بابتسامة رغم غيظها من نجلاء: والله ماحد قال لج تدقين الصدر وتصرفين من رأسج كني أصغر عيالج..

نجلاء بود: جيجي حبيبتي.. عمري في حياتي ماشفتج بحناء..

وبعدين عبدالله حرام 8 شهور في العراق انلعن في المعتقل

رجع ولدتي عليه على طول..

يعني فوق 9 شهور المسكين محروم.. حسسيه انج محتفلة فيه..

جواهر كحت بحرج: انتي ماتخلين سوالفج البطالية.. وش دخلج بيني وبين عبدالله.؟؟..

زبيدة بنفاذ صبر: سنو مسكلة.. انا يبي كلاص هينا.. ئسان يرجء مهل..

نجلاء بمرح: مافيه مشكلة عمتي زبيدة يالله ابدي..

جواهر غصبا عنها مدت رجولها عشان تبدأ فيهم زبيدة ونجلاء تقول لها: لا تحاتين أنا قاعدة عندج وبأشوف مجودي لين ينشف الحناء وتغسلينه...

جواهر تبتسم: زين والأكياس وش فيهم.. لا تكونين جبتي لي بعد فستان أخضر نفس نوف...

نجلاء بخبث: لا أنا جايبة أشياء ثانية..

**********************

الحنا نشف وجواهر غسلته.. لونه مابعد غمق..

لكنه كان آيه على لون ونعومة بشرة جواهر المخملية..

نجلاء طبعا أصرت أنها تحنيها حناء عروس..

السيقان لحد تحت الركبة بشوي

واليدين لحد تحت الكوع بشوي

مع أسوارة حنا على العضد..

جواهر بدت ترتب مكانها واغراضها وأغراض ماجد

وترجعهم لغرفتها هي والخدامات..

عبدالله اتصل وقال انه مايقدر يرجع على الغداء.. لأن فعاليات المؤتمر مستمرة في الفندق.. وماعنده وقت يرجع للبيت

فهو بيرتاح شوي في غرفته اللي هو حاجزها في نفس الفندق عشان يكون قريب من المؤتمر.. خصوصا أن اليوم اليوم الختامي..

نوف وعبدالعزيز على الغداء مع أمهم..

نوف بمرح: واو مامي.. يجنن الحناء عليج..

عزوز بابتسامة: ماشاء الله عروس يمه..

جواهر ماتت من الحرج من عيالها وحبت تغير السالفة: عزوز شأخبار درووس السواقة؟؟

عزوز بهدوء: خلاص يمه الأسبوع هذا بأخلص

الأسبوع الجاي بأسوي التراي في المرور والرخصة إن شاء الله.. وأول مشوار في سيارتي أنتي ومجود وبس .. (ورص على كلمة بس وهو يطالع نوف بابتسامة)

نوف وهي تضحك: ليه بايعة عمري أركب مع دريول درجة ثانية..

عزوز يضحك: زين نشوف لاجيتي ترجيني أوديج مكان.. وانا أعطيج أشكل..

نوف بمرح: أمانة أمانة عطني أشكل معتبر لاجيت وترجيتك.. لأني مستحيل أترجاك إلا إذا كان صابني شي في مخي..

بعد الغياب/ الجزء المئة وخمسة وعشرون

#أنفاس_قطر#

عبدالله وصل بيته متأخر..

بعد ماودع كل الوفود اللي كانت مشاركة في المؤتمر..

راح أول شيء للغرفة اللي جواهر فيها تحت

لقى أنوارها كلها مسكرة..

تنهد: مالي نصيب أشوفهم..شكلهم نايمين..و أنا بعد تأخرت الليلة بزيادة..

بس زين عندي يومين إجازة عقب المؤتمر

أقعد مع عيالي وجواهر شوي..

طلع لغرفته..

أول شيء صدمه فيها كان ريحة عطر هو مفتقده بشدة وبوجع يحز في أعماقه..

ريحة عطر تحتفظ كل خلاياه بذكريات عذبة له..

عطرها المميز والمثير والمختلف والدافئ

لكن طبعا كانت الصدمة الأكبر هي صاحبة العطر اللي كانت تنتظره..

اتسعت ابتسامته الرجولية الساحرة وهو يشوفها

وهي وقفت لما شافته دخل..

"مستحيل تكون فيه مخلوقة بهذا الحسن الموجع الشفاف!!"

كانت واقفة قدامه بطقمها الحرير السماوي

وكأنها نجمة تشع في السماء

كانت التنورة قصيرة لتحت ركبتها

والتوب كورساج بأكمام جابونيز

نقشات الحناء اللي غمق لونها كانت شيء أكثر من مثير

مكياجها الناعم الخفيف.. الروج الوردي الفاتح على شفايفها المبهرة..يكاد يسيل من عذوبتها

أما الشعر كان حكاية غرام عبدالله الجديدة

كثافته وتدرجاته وسواده ونعومته أصبحت حكاية موجعة مع طوله الجديد..

الليل الهادر اللي يبي يتوه بين أمواجه

الليل اللي تمنى أنه ماينتهي امتداده وضياعه بين ثناياه..

جواهر ابتسمت

وعبدالله قرب..

مسك ايديها بوله كاسح وشوق عارم

رفعها لشفايفه وهو يتتبع نقشات الحناء

بقبلاته الشفافة المشتاقة الدافئة بدء من أصابع يدها مرورا بكفها لذراعها لعضدها

حينها رفع رأسه

وهمس في عمق أذنها بكلمة واحدة بنبرته العميقة الرجولية الخاصة جدا

"وحشتيني"

*********************

الليلة السابقة لزواج سعود

سعود طلع من الحجز العسكري

رجع للبيت العصر..

فوجئ بمظاهرة تستقبله

كان محمد ومتعب وخالد ينتظرونه..

ويقولون له: مافيه وقت اطلع معنا الحين..

سعود مستغرب: وين أروح؟؟ خلوني أسلم على أمي وأخذ لي شاور أول..

متعب بحماس: روح سلم على خالتي والشاور خله بعدين..

سعود مادرى وش السالفة.. بس راح سلم على أمه وخواته ورجع لهم..

خذوه معهم للسيارة..

متعب يسوق وسعود جنبه.. ومحمد وخالد ورا..

سعود بتعب: أنتو يالمخبل.. وين رايحين فيني..؟؟

متعب بابتسامة: أصبر على رزقك..

أول شيء طلعوا لسوق واقف..

محمد بمرح: أنا رحت لسوق الحسا أمس وشريت لك بشت أسود ورجعت في نفس اليوم.. وخليناه هنا عند شيبتنا يضبطه.. بس لازم يقيس عليك الاول..

سعود بهدوء: وش له البشت الله يهداك.. تدري عندي كم واحد..

محمد بابتسامة: لا بشت العرس غير.. بعدين أنت كل يوم تعرس.. المرة اللي فاتت ما عرست.. وخلاص عقب ذا المرة مانسمح لك تكررها..

سعود نزل غصبا عنه: راح لمحل البشوت وقاسوا عليه... وقال لهم محمد أنه بيرجع يأخذه بكرة..

سعود بتعب: وين بنروح بعد..؟؟

متعب بمرح: ذا المرة دوري...

الصالون الأزرق..

حجزت لك الجوتي الأسود وأنتو كرامة والغترة.. وأدري عندك جواتي سود كل الماركات.. بس بعد جوتي العرس غير..

ولا تسوي لي سالفة هناك.. لأني دفعت ثمنهم خلاص..

وعقب كمل بعيارة: ولاتنسون كلكم أن عرسي عقب شهر ونص.. وماعندي مانع ترجعون جمايلي لي..

خلصوا من الصالون الأزرق.. وخذوا الأغراض معهم..

سعود زهق منهم بس مبتسم وسعيد بإحساسه إنه عريس فعلا أحبابه تعبوا له ومعه..

خالد بابتسامة: الحين دوري.. على الانتركونتنال.. حجزت لك سويت تريح الليلة وتدلل.. واحنا طبعا فوق رأسك..

وبكرة حجزنا الحلاق وسيارة اللموزين اللي بنزفك عليها..

*****************

في الليل متأخر..

دانة متوترة.. ومتوترة أكثر لأن سعود ما أتصل فيها

هي عارفة إنه طلع من الحجز اليوم

ليش ما أتصل فيها..

سعود كان بيموت يبي يسمع صوتها

بس ماقدر يتصل والشباب ماخلوه دقيقة وحدة

محمد ومتعب وخالد وجبر وجابر وسالم

كانوا كلهم معاه وعنده..

محمد رجع للبيت عشان مايقدر يترك هله ماعندهم حد

بس خالد ومتعب باتوا مع سعود في الفندق

وسعود كان خلاص منهار يبي ينام وبس

*****************

ثاني يوم قبل الظهر

ثاني في شركته..

رن موبايله..

ابتسم ورد: هلا والله

فاطمة بابتسامة: تريقت وإلا لأ؟؟

ثاني بهدوء: الحين صرنا الظهر وش ريوقه؟؟

فاطمة بمرح: الصبح كلمتك قلت لي تو الناس على الريوق..

والظهر تقول خلاص غداء.. أنت متى بتأكل؟؟

ثاني بعمق: إذا جيتي بيتي إن شاء الله

فاطمة سكتت محرجة.. وعقب تنحنحت وقالت بصوت واطي: الليلة عرس أخو صديقتي.. وأبي أطلع من الجامعة.. أمر محل شيكولت.. اشتري ورد و شيكولت عشان يروح للقاعة..

ثاني بهدوء: مافيه داعي تتعبين روحج .. أنا بالتلفون بأكلم أكبر محل ورد وشيكولت يرسلون اللي تبينه وباسمج.. تدللي..

فاطمة بخجل: أنا مكلمة أستأذنك... مو عشان انت ترسل..

ثاني بعتب: ليه بيننا فرق يعني؟!!

فاطمة بهدوء: لا .. بس..

ثاني بحنان: مافيه بس.. قولي لي شاللي تبينه.. واسم القاعة.. واللي تبينه ينكتب على الكروت.. وأنتي ارجعي للبيت دايركت أول ماتخلصين محاضرات لا تخلين أمي بروحها..

*******************

العصر

في القاعة

مها والجازي ومزنة وغالية والعروس كلهم موجودين

وكل واحدة لاهية بشغلة

اللي تحط منيكير.. واللي الكوافيرة تشتغل لها بشعرها

واللي تسوي الميكب..

والأجواء الاحتفالية الصاخبة والمزحومة تلف الأجواء..

مها بعيارة: جعل يسقى عقب شهر ونص بس..

مزنة تضحك: أنتي ماتستحين..

مها وهي تضحك: على قولة أخي محمد.. مايودي في داهية إلا كتمان المشاعر.. الواحد لازم يعبر عن مشاعره لا ينفجر

مزنة في نفسها (ايه طبعا والأخ فالها..مايخلي شيء من التعبير عن المشاعر في خاطره)

الجازي تسألهم بحيرة: وش أسوي في شعري.. كيرلي وإلا ويفي وإلا أرفعه وإلا أسوي بف؟؟

غالية تضحك: يا أختي اتركي هذا السؤال للكشة اللي مثلي.. أنتي أي شي بتسوينه في شعرش بيطلع حلو... عشان الأرضية تساعد...

دانة بتوتر: غالية أنتي ليه ماتخلين الجازي في حالها..

غالية تبتسم: لحول.. ايه الحين غلاها بزود.. اخت حبيب القلب..

مزنة رجعت وقفت جنب دانة اللي كانت الخبيرة تسوي لشعرها السيشوار وهي تهمس لها: حبيبتي هدي أعصابش شوي.. أنا أبي أعرف سبب توترش.. سعود ومعاشرته ورجّالش وتحبينه.. يعني لاهو غريب.. ولاهي أول مرة.. فليه التوتر؟؟

دانة سكتت.. ماحد قادر يحس فيها..

طوفان مشاعرها العالي خلف سدودها على وشك أن يحطم أضلاعها

الأضلاع التي أصابها الوهن لطول ماحجزت هذه المشاعر

المشاعر التي تتوق للانسكاب بين يدي سعود ومن أجله..

المشاعر التي تتأججت طوال سنوات من أجل سعود

المشاعر التي أصبح سعود يعلم بها ولكنه لم يسمعها من بين شفتيها..

الشفايف اللي تتوق للهمس بهذه المشاعر في أذن سعود

لينهار كل حاجز فصل بينهما ويتمازجان التمازج الكامل..

*******************

بعد صلاة المغرب...

خبيرة التجميل تطلع من بيت سالم..

وسالم جاي من المسجد يبي يطلع لعرس سعود..

سالم طلع لغرفته.. مالقى منيرة..

ناداها..

ردت عليه من غرفة الملابس..

كان سالم يلبس بسرعة وهو يسألها: تبين أرجع أوديس؟؟

منيرة من ورا باب غرفة الملابس: لا حبيبي.. أمي وسارة بيمروني ونروح سوا..

سالم باستفسار: بس مهوب كنكم رايحين بدري...

منيرة بهدوء: لا بدري ولا شيء.. حن مانعد روحنا معازيم.. أمي وام سعود صحبة سنين..

وعقب كملت بمرح: ولعلمك يوم عرس مها عقب شهر ونص تراني بأكون عندها من قبلها بليلة..

سالم بنبرة زعل مصطنعة: ياسلام.. وأنا من اللي عندي؟؟

منيرة بابتسامة: مايخليك ربي...

سالم باستعجال: زين أنا خلصت وبأطلع.... اطلعي خليني أشوف شكلس..

منيرة : دقيقة بس..

فتحت الباب منيرة وطلعت..

كانت لابسة فستان أصفر ببروش وزم خفيف من عند الصدر عشان يخبي بطنها اللي صار مبين...

وشعرها سوته كيرلي..

سالم بإعجاب: ياسلام.. أحلى حامل شافتها عيني..

منيرة تبتسم: ايه.. تمسخر علي أنا وكرشي..

سالم قرب وحط يده على بطنها بحنان: الله يتمم عليس يا قلبي..

عقب كمل بمرح: خاطري أحضنس بس خايف أحوسس وإلا أنتي تلطخين ثوبي الأبيض بالمكياج..

بعد الغياب/ الجزء المئة وستة وعشرون

#أنفاس_قطر#

الساعة 10 بالضبط..

زفة دانة..

اطفئت أنوار القاعة بالكامل.. واُشعلت الشموع..

تركزت الكشافات على البوابة اللي بتدخل منها دانة..

بدت موسيقى الزفة الناعمة..

وانفتحت البوابة..

وظهرت دانة تتهادى بفستانها الأبيض من الدانتيل الأبيض المخلوط بحرير فضي بتصميمه على الطريقة المغربية بطريقة مبتكرة جدا وفخمة.. الكم دانتيل فخم ضيق وماسك من العضد لكنه يتوسع من الكوع حتى يصل للأرض.. والطرحة الدانتيل بقطع الحرير الفضي هي عبارة عن غطاء الرأس المغربي الواسع المشبوك في ظهر الفستان

المسكة كانت ورد أبيض بشرايط حرير فضية..

دانة كانت تتهادى مثل الأميرة..

مثل بجعة بيضاء على بحيرتها الملكية

لكنها في داخلها كانت تذوب توتر وخجل..

الكاميرات تتابع تحركاتها بدقة وتنقلها لشاشات العرض الضخمة الموزعة في أركان القاعة..

وصلت أخيرا للكوشة.. اللي كانت خليط من الأبيض والفضي الملكي

مثلها مثل كل تنسيق القاعة والطاولات وصواني التقديم وطاقم الضيافة اللي كان اختيار مشترك بين دانة ومزنة ومها..

بعد وقفة التصوير المنفردة.. بدأوا المعازيم والبنات بالسلام على دانة...

تهاني قربت منها وحضنتها وقالت بحب: أحلى عروس شفتها.. وما الحب إلا للحبيب الأولي... مبروك ياقلبي..

تدرين أنا حتى في أعراس أخواني مارقصت.. بس الليلة بارقص في عرسج..

بعد حوالي ساعة إلا ربع.. محمد اتصل على مها.. وقال لها إنهم واقفين على باب القاعة...

الشباب كلهم مشوا بسياراتهم ورا السيارة اللي زفت سعود..

لكن بعدين رجعوا كلهم.. وظل معه أبو خالد وخالد ومحمد..

مزنة لبست عبايتها ثم لبست دانة العباية البيضاء على أساس إن محمد بيدخل وهي تهمس لها وتبتسم: خلي ولد عمنا البصباص يقز الحريم على كيف كيفه.. عنز وطاحت في المريس.. من قده الليلة..

لكن اللي هم تفاجأوا فيه إن محمد وصل سعود بس لأول القاعة وهو منزل رأسه وطلع على طول...

واللي كمل مع سعود خالد وأبو خالد..

مزنة شالت عباية دانة مستغلة إن الكاميرات والعيون مركزة على العريس.. تأكدت من شكل دانة.. ثم نزلت وقعدت مع تهاني على طاولتها..

تهاني همست لمزنة وعينها على سعود اللي مابعد وصل لدانة: من هذا اللي دخل مع المعرس ورجع من عند الباب؟؟

مزنة وهي مستغربة من سؤال تهاني: محمد أخ سعود..

تهاني ابتسمت: ياحليله حياوي.. صحيح سعود أطول وأعرض بس هو أحلى..

مزنة غصبا عنها تضايقت (نعنبو متى لحقت تقزه ذي.. يعني هو ماطالع الحريم ولاحتى دخل.. بس هم ماخلوه في حاله)

سعود وصل لدانة..

وأخيرا..

وهو بعده يمشي جاي من بعيد..

ماكان يشوف شي في القاعة كلها عدا البهاء الأبيض

اللي سيطر على كل مشاعره وأحاسيسه..

ماكان حاس بالعالم ولا العيون اللي تعلقت بطوله وطلته..

احساسه بأميرته وبس..

قبل ماتنزل مزنة.. وقفتها وراحت..

ومن لما وقفتها وعينها في الأرض

ماقدرت ترفعها.. وقلبها يفقز قفزات مجنونة متسارعة..

وصلها سعود..

مع الكعب العالي اللي هي لابسته..

بعده أطول منها

وطى من عليائه وباس جبينها بحنان وشوق

وكانه يوقع بقبلته وعده بحياتهم الجديدة

كان يتمنى بوجع إنه يشوف عيونها في هذي اللحظة

لكنها كانت موطية عيونها بخجل

سعود تنهد في داخله..وهمس في أذنها باعجاب رقيق: أحلى أميرة

ثم وخر ووقف جنبها

عشان أبوها وخالد يسلمون عليها..

خالد بالذات حضنها بشدة وهو يهمس في أذنها: مبروك ياقلبي..

صوروا معها وعقب نزل خالد وابوه طالعين برا..

ينتظرون سعود في السيارات..

عشان يزفونهم للفندق..

سعود مسك يدها المرتعشة.. همس في اذنها بقلق ممزوج بالحنان: انتي ليش ترتعشين كذا؟؟

ماردت عليه..

مها والجازي خلعوا عباياتهم وطلعوا لسعود وسلموا عليه.. وصوروا معه..

والجازي خربت مكياجها وسيحت الدنيا وهي تبكي وهي تسلم على سعود اللي حضنها بحنان وهو يقول: يالهندية أنتي كل شيء عندش دموع.. ماعندش تعبير بوسايل ثانية..

بعد حوالي خمس دقايق.. أشر سعود لمها وطلب منها تتصل بمحمد أنهم بيطلعون الحين..

عقب سعود وقف دانة... وبدت موسيقى توديع العروسين..

مها خذت عباية الدانة...

لحد ماطلعت برا القاعة الرئيسية لقاعة المدخل.. لبستها إياها..

سعود مسك يد دانة وهو قلق من ارتعاشها الغير طبيعي..

ركب هو إياها سيارة الليموزين الطويلة اللي احتضنت ثوبها الضخم بكل اتساع وفخامة

قدام كان محمد وخالد...

محمد بابتسامة: مبروك يابنت هادي... الله الله في أبو سعيد..

دانة بصوت مرتعش: الله يبارك فيك..

محمد وخالد بدت النقرة بينهم.. وسعود همس في أذن دانة بقلق حقيقي: حبيبتي ليش ترتعشين كذا؟؟ خوفتيني عليش..

كان رد دانة عليه إنها احتضنت يده بحنان وقوة

سعود مسك كفها الناعمة المطرزة بنقشات الحناء.. وحضنها بيديه الثنتين.. واحترم صمتها..

(لو تصمتين العمر كله.. يكفيني إنش جنبي.. ما أبي شيء اكثر..ولا أطالبش بشيء أكثر.. خلاص حرمت وحفظت الدرس)

طول الطريق وسعود ماسك يدها..

الشباب يقطون عليه نغزات ويقطون على بعض

وهو أحيانا يرد وأحيانا يصمت..

وباله مشغول بالأنامل المرتعشة بين ييديه..

وصلوا الريتز..

محمد قعد في السيارة..

وخالد طلع معهم لحد ماوصلهم لباب جناحهم ونزل بسرعة..

ملابس دانة جابتها مزنة اليوم الصبح هي وخالد..

لأن سعود ودانة مسافرين الفجر وبيطلعون من الفندق للمطار مباشرة..

مزنة طلعت لها غيارات وأغراض ليلة وحدة وخلت الباقي مرتب في الشنط..

سعود فتح الباب وقال لدانة بحنان ومرح: تفضلي.. سمي وادخلي برجلش اليمين..

دانة دخلت بخطوات مترددة..

سعود سحبها من يدها.. وجلسها على الكنبة

وجلس جنبها..

وقال بهدوء وجدية مخلوطة بحنان فياض: يالله قولي لي ليش متوترة كذا؟؟ متوترة مني او من حياتنا مع بعض أو من أيش؟؟

دانة رفعت عيونها له.. وتعلقت في ملامحه بوله هادر..

وهي تقول بهمس: متوترة من شيء ثاني..

سعود بقلق: اللي هو؟؟

دانة حطت يدها على خده..وسعود مسك يدها وطبع في باطنها قبلة عميقة جدا نفث فيها عبق روحه ودفء مشاعره..

ودانة تقول بعذوبة وعمق: متوترة من ضغط مشاعري اللي ماعدت قادرة اتحمله..

سعود ابتسم باشراق روحي عميق وهو يقول بعمق صميمي: ومشاعرش وش تقول؟؟

دانة بعمق عذب موجع شفاف: أحبك.. وأحبك.. وأحبك

حتى كلمة أحبك ماتعبر عن الشيء الكاسح اللي أحسه في قلبي ناحيتك

الحب والغرام والهيام والعشق والوله وكل مصطلحات الغرام والله العظيم ماتعبر عن قطرة وحدة في بحر الطوفان الهائل من المشاعر اللي في أعماقي لك..

حبيبي...سامحني على كل دقيقة خليتك فيها تحس إني مابادلتك حبك بحب..

سامحني على كل مشاعرك اللي أنت غرقتني فيها.. في الوقت اللي انا جبنت اني أعبر لك لو عن شوي من مشاعري..

سامحني على كل لحظة حزن عشتها وأنت تظن إن حبك كان مهدور وماله مقابل..

سعود حس بالطعنة العذبة اللذيذة الشفافة الموجعة تخترق عمق عمق روحه الملتاعة المشتاقة لحرف واحد من بين شفتيها

فكيف بكل هذه الكلمات النازفة حبا لا مثيل له..

مسك وجهها بحنان بين كفيه وهو يقول بعمق: وانا أحبش أكثر وأكثر واكثر.. وياترى أنتي بتسامحيني؟؟ أنتي قلتي سامحني.. لكن أنا مالي حق أطلب.. أنا أتساءل بوجع.. ياترى يجي يوم وتسامحيني على الجنون اللي أنا سويته؟؟ ياترى..............

كان رد دانة عليه إنها حطت أطراف أناملها على شفايفه تسكته

ثم تقبل أطراف أصابعها الساكنة على شفتيه..

بينما سعود سحب يدها للأسفل لينسحب حاجز أناملها امام تمازج شفتيهما

*********************

بعد حوالي 3 أسابيع..

الساعة 3 الفجر...

جواهر كانت نايمة.. سمعت صوت موبايلها يرن..

استغربت من اللي بيدق هالحزة..

كانت تبي ترد قبل الرنين يصحي عبدالله وماجد من النوم..

وخرت بحنان ذراع عبدالله الغافية على خصرها

وردت بعد ماشافت الاسم برعب وبصوت مكتوم: عسى ماشر نجلاء؟؟

صوت نجلاء المحلق من الفرحة: أبشرج أبشرج.. ماجد جاله ولد... أبوفيصل جاب فيصل أخيرا

جواهر بفرحة حقيقية: مبروك ياعميمة ألف ألف مبروك...

نجلاء بنفس الفرحة: تدرين أنهم قايلين لها في السونار إن اللي ببطنها بنت... المسكينة اشترت كل شيء وردي

الحين أنا رايحة للسوق أول مايفتح اشتري له..

جواهر بحنان: لا تشترين شيء... ماجد نوف اشترت له الدنيا من غير الهدايا اللي مالها عدد اللي وصلته.. 3 أرباع ملابسه مالبسها.. وصغرت عليه.. الحين باقوم ارتبها وبأرسلها لكم مع محيي الدين..

نجلاء بحب: الله لا يحرمني منج.. بس على العموم ريحتيني أول الأيام بس عقب إلا لازم اشتري له... هذا ولد ماجد.. ولد ماجد ياجواهر..

جواهر بحنان فياض: ألف مبروك ياقلبي الله يتمه يارب...أول ماتطلع غرفة أرسلي لي رقمها .. وباجيكم الصبح ان شاء الله..

جواهر جات بتقوم حست بيد قوية حانية تسحبها وترجعها تمددها قرب أنفاسه.. بصوت نعسان وهو مسكر عيونه: وين بتروحين حبيبتي؟؟

جواهر قربت من وجهه وطبعت قبلاتها على جفونه وهي تقول بفرحة عذبة: عطني البشارة؟؟

عبدالله فتح عيونه بالراحة وهو يقول بترقب: كلي لج..

جواهر قامت جالسة وطبعت قبلة ثانية على عضده العاري: وعقبك ما أبي شي... أبشر بفيصل على أبو فيصل..

عبدالله نط قاعد وهو يقول بفرح غامر: والله والله.. هو قال لي إن مرته حامل ببنت...

جواهر بعذوبة: ماشاء الله.. شكله مايدس عليك شيء..

عبدالله لقط موبايله من جنبه: لقى عشر اتصالات من ماجد.. اتصل عليه وهو يقول بفرحة هائلة: مبروك يا أبو فيصل مبروك فيصل..

ماجد بفرحة عميقة عميقة: الله يبارك فيك.. الله يبارك فيك ما تخيل فرحتي.. انصدمت فعلا.. أنا والله بنت وولد كلهم عندي نفس الشيء.. بس المفاجأة فرحتني.. وتراني باسميه عبدالله جهز السماوة...

عبدالله بحزم: لا والله ماتسميه إلا فيصل يابو فيصل.. والسماوة جاتك..

ماجد بود أخوي غامر: يعني ماتبي اسم ولدي...

عبدالله بنفس الود: سم الثاني علي... هذا الحين أنا بأسميه وأنا سميته فيصل.. أشلون أبو فيصل من غير فيصل..

عبدالله خلص الاتصال تلفت مالقى جواهر.. دورها لقاها في غرفة الملابس مجهزة شنطة وتحط فيها ملابس..

عبدالله بحنان: وش تسوين ياقلبي؟؟

جواهر وهي لاهية في الشغل: احط ملابس ماجد اللي مالبسهم لولد ماجد.. لأنهم مجهزين له ملابس بنت..

عبدالله بخبث: خليها لمحمد.. مجود يقول متملل.. يقول لج الست شهور فترة السماح اللي بعد العملية القيصرية.. وعقبها 9 شهور يبي حمود يجي يلعب معه..

جواهر ابتسمت: تدري أنك متفرغ عبدالله.. يالله روح توضأ تصلي قيامك..

ثاني يوم في المستشفى..

غرفة دلال..

دلال قاعدة على سريرها

عندها عمتها أم جاسم.. ونجلاء وولدها حمودي.. وجواهر..

نجلاء طايرة بالولد..

دلال بتعب: مشكورة أم عبدالعزيز.. لولاج ماعرفت وش كان لبست فيصل..

جواهر بحنان:والله موب قدركم عندنا.. وترى هذي موب هدية فيصل.. هديته محفوظة..

ثم كملت باستفسار: قولي لي وش إحساسج لما قالوا لج ولد؟؟

دلال بإيمان: سبحان الله وفق كل ذي علم عليم.. يعني الله سبحانه يثبت لنا عظم قدرته... سويت أكثر من سونار

وكلهم قالوا بنت.. وأنا متاكدة إنها بنت واشتريت كل شيء وردي.. والبنت والولد كلهم رزق من الله.. لكن أنا تفكيري صار في البنت خلاص..

في الولادة لما دفعت الدفعة الأخيرة ونزل الولد.. الممرضة رفعته قدامي قبل تقص سرته وهي تقول: ماشاء الله.. واد واد..

وأنا أقول لها: مستحيل.. أنا في بطني بنت..

فهي قالت لي وهي تضحك: والبتاتيع دي بتاعت واد وإلا بت..

تدرين قعدت أضحك.. والممرضة انفجعت مني: بلاش تضحكي والنبي..

جواهر ضحكت بنعومة وهي تقول: الحمدلله على عطاه.. كلهم نعمة ربي..

********************

في بيت سعود...

قبل المغرب بشوي

دانة وسعود رجعوا قبل كم يوم من رحلة شهر عسلهم اللي كانت شي فوق الخيال..

الليلة سعود بيبات في المعسكر.. دانة أستأذنته تبات في بيت أهلها وأذن لها...

والحين هي طالعة لاخوها خالد اللي ينتظرها برا في حوش البيت...

محمد كان يسولف مع خالد.. لما شاف دانة طالعة مع باب الصالة الخارجية.. ترك خالد وتوجه ناحيتها.. بيدخل البيت..

سلم بدون مايطالع ناحيتها: مساش الله بالخير

دانة بود أخوي: مساك أخير.. أشلونك محمد واشلون شغلك؟؟..

محمد باحترام وعينه في الارض: يسرش الحال.. يسلم غاليش..

دانة هزت كتوفها وهي تقول في نفسها(الولد عرفته المرة اللي فاتت زواجي الاول من سعود والمرة ذي عمري ماشفته يرفع عينه في مره.. لا فيني ولا في غيري.. مزون أشلون تقول انه مايستحي ما أدري)

عقب قالت باحترام: رخص لنا طال عمرك..

محمد بتردد: بنت هادي..

دانة وقفت وردت باحترام: سم..

محمد بنفس التردد: ممكن أسألش عن شيء؟؟

دانة: اكيد طال عمرك..

محمد بأدب وعينه مازالت مثبتة في الأرض: انا ادري ان العرس قسمة ونصيب.. بس الرفض دايما له سبب... ممكن اعرف وش سبب مزنة لما رفضتني؟؟

دانة بحرج: ممكن تعفيني..

محمد بحزن: دامش قلتي ممكن تعفيني.. أجل السالفة كايدة ولاني بمعفيش..

خالد رفع صوته عليه بمرح: انتو خلصوا القمة المنعقدة قدام انزل لكم طرف ثالث..

دانة أشرت له بأجي وهي تقول لمحمد بحنان أخوي: محمد يا أختك.. أحيانا الجهل بالشيء يكون نعمة..

محمد بحزم: بس انا متنازل عن ذا النعمة.. وإذا أنا اخيش فعلا تقولين لي..

دانة بتردد قالت له السبب بصراحة لكن بأفضل لهجة ملطفة لقتها..

محمد حس بألم بالغ إنه يكون هذا ظن مزنة فيه.. تماسك وقال لدانة بحزم: انا بأحملش أمانة وصليها لمزنة.. والأمانة ثقيلة

وصلي كلامي بالحرف

قولي لها الشرهة مهيب عليها الشرهة على العين اللي ماشافت من جنس الحريم غيرها.. ولاعمرها ارتفعت إلا لها وعشانها

وقولي لها الشرهة مهيب على قلبها لأنها ماعندها قلب.. الشرهة على قلبي اللي لازم نحاسبه على طيبته ومحبته لها ولربعي وناسي.. لأنه لازم يكون قلب منزوع المشاعر عشان يعجب حضرة جنابها..

وقولي لها شعري كنت ماني بناوي أرجع أطوله ومن يوم حلقته كنت أقصه كل ماطال شوي... لكن الحين بأرجع أطوله

دامها تكره الشعر الطويل..ما أبي شيء يزيني في عينها

خليني مكروه مثل ما انا بشعري وقلبي..

لكن نظرة عيني.. خليها تطمن.. يحرم علي أرفع عيني فيها حتى لو جاء وجهها في وجهي..

دانة تنهدت بحزن من كلام محمد العميق الموجع

وتوجهت لخالد..

بينما محمد دخل داخل...

*******************

بعد المغرب

في غرفة دانة..

قاعدة هي ومزنة وغالية...

دانة قالت لغالية بحنان: غلاي مشتهية كرك من يدش الحلوة..

غالية نطت وحضنتها وهي تقول: أبشري كم دندون عندي.. ونطت تنزل تحت...

مزنة بابتسامة: شكلها تصريفة لغالية..

دانة بحزم: ايه عندي أمانة أوصلها لش..

مزنة بتوتر: وش أمانته..؟؟

دانة بنفس الحزم: كلام موجع شوي من محمد.. مستعدة تسمعينه..؟؟

مزنة بقلق: ومحمد ليش يوجه لي كلام موجع..؟؟

دانة بهدوء: رد على رفضش له..

مزنة برعب: أنتي قلتي له؟؟

دانة بهدوء: سألني ولزّم علي أقول له السبب

مزنة بتوتر حزين: تقومين تقولين له؟؟

دانة بحزم: أما أنش غريبة!!!... أنتي رفضتيه..وش يهمش إنه يعرف السبب وإلا لأ؟!!

وحقه إنه يعرف... ومثل ماهو استوجع من رفضش له.. حقه الحين إنش تستوجعين من رده على هذا الرفض..

مزنة قامت بتروح وهي تقول بتوتر: دانة تكفين.. ما أبي أسمع شيء بأروح.. سالفة وانتهت وش تبين بها ترجعينها؟؟

دانة بحزم أكبر: والله ماتقومين.. والله إن قد تقعدين وتسمعين... الكلام اللي هو حملني أمانة مهوب لعبة..

ودام تقولين سالفة وانتهت... اسمعيني واعتبرينها عقب سالفة وانتهت..

مزنة رجعت وقعدت غصبا عنها تنفيذا لحلف دانة عليها

ودانة نقلت لها كلام محمد بالحرف بالواحد بدون زيادة أو نقصان..

ومع كل جملة جديدة كانت دانة تقولها كان وجه مزنة يتغير أكثر وأكثر...

دانة خلصت كلامها.. ومزنة ظلت ساكتة ووجهها غائم..

مزنة قالت بنبرة غامضة ماينعرف شنو الانفعال اللي يمور تحتها: بما أنش خلصتي نقل امانتش.. تسمحين لي أروح؟؟

دانة وهي حاسة بحزن إنها اضطرت تجرح مزنة بهذي الطريقة القاسية: تفضلي روحي.. بس بنرجع نتكلم..

مزنة قامت وقفت وهي تصد بوجهها عشان ماتحط عينها في عين دانة: يصير خير..

مزنة انسحبت..

ودانة حاسة بحزن عميق يغزو مشاعرها النبيلة... لأنها تعرف عزة نفس مزنة.. وإنها ما يبكيها إلا شيء كبير.. وهي عارفة إنها ماطلبت إنها تختلي بنفسها إلا لأنها تبي تبكي..

دانة دقت على سعود.. سعود خلاص صار مرايتها ومايريح روحها إلا انسكاب احاسيسها ونبض مشاعرها بين حناياه

-هلا والله حبيبتي

- هلا حبيبي.. أشلونك ياقلبي؟؟

- وش فيش ياقلبي؟؟ (سعود خلاص مو محتاج إنها تصرح عشان يفهم تأرجح نبرات صوتها ويحس بها قبل تعبر)

- متضايقة شوي حبيبي؟؟ (نبرة حزن صافية)

- أفا .. دندونتي تتضايق وأنا موجود (سعود بحنان فياض)

دانة حكت له باختصار اللي صار بس طلبت طبعا أنه يظل سر بينهم...